Saturday, 11 May 2019

ප්‍රථම ප්‍රේමය ඔබ නොවේ (53) - කරේනිනා වගේද

ලීබ් ෆ්‍රෞ මිල්ශ් 
"මම යනවා උයන්න එහනම් ඔයාට බඩගිනි ඇතිනේ ." ප්‍රියාන් නැගිට්ටේය.

ප්‍රියාන් ට තාන්යා ගේ මුහුණ දෙස බැලීමේ අපහසුවක් දැනුණි. ඒ වෙනුවට ඔහු ඇගේ  දිගු පියකරු නිරුවත් ධවලමය  කලවයන් දෙස නෙත් හෙළීය.

"උඹ හරි ලස්සනයි තානිච්කා  " ඔහු ඈ  දෙසට හැරී පැවසීය.

ඈ  ඔහුගේ පිට දිගේ සෙමින් සිය වමතින් පිරි මැද්දාය.

"ගිහාන්ගෙන් මම හැමදාම වගේ අහපු දෙයක් ප්‍රියන්චික්. අපි උයන්නේ  නැතිව මොනවා හරි අරන් කමුද. කතා කර කර ඉමු. ඉන්න මම තේ පෝච්චියට තේ දාගෙන එන්නම්. මොනවා හරි බොන්න තියෙනවද "
තාන්යා පොරෝණය ඇඟේ දවටාගෙන නැගිට්ටාය.
ඔවුන්  දෙදෙනා කුස්සිය පැත්තට ඇදුණහ.

"වොඩ්කා තියනවා. ලිකර් තියනවා. තව හොඳ ජර්මන් වයින් වගයක් තියනවා ලීබ් ෆ්රවූ මිල්ෂ් කියල. ටිකක් පැණිරස මෘදු වයින් එකක්. ජර්මනියේ රයින් ගඟ බඩ පෙදෙසේ හදන්නේ "

"ඒකෙ තේරුම දන්නවද " තාන්යා සිනා සුනාය.

"ඔව්, ආදරණිය කාන්තා(වගේ) කිරි. බීල තියනවද "

"ඔව්, මම ආසයි ඒකට. මොස්කව් වල දැන් තියනවා. ඔයාට යාළු ගැහැණු ළමයෙක් එහෙම ඉන්නවද? " තාන්යා ඇසුවේ මදක් පැකිලෙමිනි.

ප්‍රියාන් මදක් කල්පනා කළේය.

"එක්කෙනෙක් ඉන්නවා. කොහොමද දැන ගත්තේ "

"ඔය තියෙන්නේ ටී ෂර්ට්, ඇඳුම්  වගයක් හෙම. මාත් ඔහොම කරනවා ඒ දවස් වල ගිහාන්ගේ කාමරේ ඇඳුම් තියල යනවා "

"තව කවුරු හරි කෙල්ලෙක් ආවොත් හැඟවුමක් දෙන්නද? " ප්‍රියාන් සිනාසෙමින් ඇසුවේය.

"ඔව් නොදැනුවත්වම වගේ කරන දේවල් වුනත් එහෙම වෙන්නත් පුළුවන්. නතාෂාව අමතක කරන්න හිතපු නිසා  "   ඇය ඔහු පිටුපසින් පැමිණ බදා ගත්තාය .

"නැහැ. එහෙමත් නොවේ. මෙයත් එකක් ගොඩක් ඇවිදින්න යනවා. කතාවට හොඳයි. හුඟක් දේවල් දන්නවා. අනික යුරෝපියානු රටක. මේ දවස් වල නිවාඩුවට  එහෙ  ගිහින්. ආයේ එනවා කිව්වා. දන්නේ නැහැ එයිද කියල. මේ රටේ තාවකාලිකව ඉන්නවා කිවේ වැඩ කරන ගමන් ඉංග්‍රීසි ඉගෙන ගන්න. ඔයා විස්තරේ කියනකන් නතාෂා ගැන වැඩිය දැනන් හිටියේ නැහැනේ මම"

"සමා වෙන්න. මට කියන්න හිතුන නතාෂා ගැන. ඔයා මෙයා ට කැමතිනම් ඒ බව කියන්න දැන්මම . ගිහාන් වගේ ලතවෙවී ඉන්න එපා. ආසියානු කොල්ලෝ තීරණ ගන්නේ හුඟක් පමා වෙලා "

"මම දන්නවා ඒක. ඒ අපේ හැටිද මන්ද? අන්තිම මොහොතේ තමයි ඔක්කොම තීරණය කරන්නේ. ඒ නිසාම වැරදෙන දේවලුත් වැඩියි. මේ කුකුළු මස් එක ඊයේ හැදුවේ. ඉන්දියන්  පාන් ජාතියක් තියනවා පරාටා කියල. ඒවත් එක්ක කන්න පුළුවන්. එතකොට උයන්න ඕනේ නැහැ. ඕනේ නම් පස්සේ එලියට යමු. "

"හරි මම කැමතියි. මම ඉස්සෙල්ලම ගිහාන්ගේ ඔබ්ශේශීතිය* එකට ගිය දවස මතක් වුනා. එයත් කුකුළු මස් හැදුවේ. ඉන්දියන් කාරයෙක් ඇවිත් මට මනමාල යෝජනාවක් දැම්ම එදා. ගිහාන්ට හරියට තරහ ගියා."

"ඔය කතාව ගිහාන් කියල තියනවා. අරුන් ගැන නේ ඔය කියන්නේ. දැකල තියනවා. මනමාල කපුටෙක්"  ප්‍රියාන් හඬ නගා සිනා සුනේය.

තාන්යා ගිහාන්, සුබෝධ හා මරියා සමග ගතකල ඒ සැන්දෑව ගැන විස්තර කරන්නට ගත්තාය .

ප්‍රියාන් නිහඬව අසා සිටියේය.

කාමරයට ගිය දෙදෙනා ආහාර ගත්තේ වයින් සමගිනි.


තාන්යා ගිහාන් සමග ඇසූ සිංහල ගීත මතක් කළාය.
"ඔයා අහන්නේ නැත්ද සින්දු ? "  මේසයෙන් නැගිටි තාන්යා ප්‍රියාන් ගේ කැසට් යන්ත්‍රය වෙතට ඇදුනාය. එහි සීඩී තැටි දැමීමටද කවුළුවක් තිබුණි.

"මේවා සිංහලෙන් තියෙන්නේ.හොඳ එකක් මොකක්ද ?"

"ඉංග්‍රීසි ඒවා එපාද "

"නැහැ එපා. මම ඒවා කොහොමත් අහනව. ගිහාන් එක්ක අහපුව තියනවා නම් හොඳයි. මම ඒවා කියන්න ගිහින් තමයි අරාබි රටේදී ලොලිතයි අයායි  හෙම යාලු වුනේ. ගිහාන්ට ඒ දවස් වල සින්දු දුන්නු යාළුවෙක් හිටිය වෛද්‍ය විද්‍යාලයේ "

"ආ, එයා මගෙත් යාළුවෙක්. එයා දුන්න කැසට් එකක් තියනවා. හැබැයි මේකේ ගීත  හුඟක් සම්භාවනීය ගණයට වැටෙන ඒවා. ඔයාට කම්මැලි හිතෙයි"

ඔහු කුමාර ගෙන් ලැබුණු "ගොළු හදවතින් තුන්වෙනි යාමයට " කැසට් පටය පෙන්වමින් පැවසීය.

" මේ රවුම් අකුරු හරියට චිත්‍ර වගෙයි.ලස්සනයි. ගිහාන්ටත් මේ විධිහට ලස්සනට අඳින්න පුළුවන්"

"අඳිනවා  නෙමෙයි ලියනවා " ප්‍රියාන් ට සිනහවක්  ගියේය.

   "චීන අකුරු හා ජපන් අකුරු  ඇත්තට ම අඳින  එකනේ කරන්නේ. ඔයාලගේ අකුරුත් ඒ වගේමනේ. මේකේ තේරුම මොකක්ද "

"නිහඬ වූ හදවතින් රස්වෙත්** එකට වගේ. රෑ ඉඳන් උදේට නිහඬ වූ හදවතින්. ඔන්න ඔහොම තේරුමක්. ලංකාවේ සම්භාව්‍ය කලාකරුවෙක් ගේ සංගීතය  "

ප්‍රියාන්  කැසට් පටය ක්‍රියාත්මක කළේය.
අතර මගින් ක්‍රියාත්මක වූ කැසට් පටයේ ඇසුනේ වියට්නාම් සංගීතය ඇසුරින් කේමදාසයන් නිර්මාණය කළ බටනලා වාදනයක් සහිත මියුරු නාද රටාවකි.

"ගීතයට නව ආකෘතියක නව සංගීත අරුතක් - අ නිව් ඩයමෙන්ෂන් ටු ද ට්‍රඩිෂනල් සෝන් .." තාන්යා හැඳින්වීම අසා සිටියේ මුව මදක් විවර කරගෙනය.  කාන්තා හඬ ආ  ආ යනුවෙන් සංගීතය අරඹන විට තාන්යා හිස හෙමින්  සීරුවේ ඇල කරන්නට වූවාය. ප්‍රියාන්  ඈ දෙස බලා සිටියේ සිනා සෙමිනි.

පොරෝණය ඉවත  දැමූ තාන්යා තුනී ඇඳ රෙද්ද දවටා ගෙන ආසියානු ක්‍රමයට දෙපැත්තට ලාලිත්‍යයට පැද්දෙමින් නටන්නට වූවාය.

"ඔයත් එක්ක ගිහාන් ගත කළ කාලය මට හිතා ගත හැකි " එය ඇසූ ඈ ඔහුට මද සිනහවක් පෑවේ ඇසකින් ඉඟියක් කරමිනි.

 "නතාෂා සින්දු වලට ආස නැත්ද "

"එයා ඇහුවේ ඉංග්‍රීසි සින්දු විතරයි. කොටින්ම රුසියානු ඒවත් ඇහුවේ අඩුවෙන්. "

"එයා මොස්කව් මැද හිටි නාගරික කෙනෙක් නේ  ඒකයි "

 "නිව් ට්‍රෙන්ඩ්ස් ඉන්  හාමනි ඇන්ඩ් කොම්පොසිෂන්. අ රොමැන්ටික් ඩ්‍රීම් ඩිෆයඩ් බයි හාෂ් රියැලිටි ඔෆ් ෆොර්බිඩ්න් ලව් - හංස විලම කලැතෙයි " කැසට් පටය නිවේදනය කළේය .

"අන්තිමට කිව්වේ මොකක්ද . ඉංග්‍රීසියෙන් කිව්වේ නම් තහනම් ආදරයක් ගැන නේද ආන්නා කරෙනිනා වගේද "

තාන්යා මතක් කලේ ලියෝ තෝල්ස්තෝයි ගේ එනමින් වූ නවකතාව ගැනය.

"ඔව් හැබැයි ඒ වගේමත්   නැහැ හැබැයි ඇනා කරේනිනා වගේ මෙතනත් තහනම් ආදරයක් කරන දෙදෙනෙක් හමු වෙනවා. අන්තිමට කීවේ හංසයන් ඉන්න විලක් කැළඹීලා කියල. නමුත් ඇත්ත තේරුම නම් අපේ භාෂාවෙන් හංස යුවලක් කියන්නේ මේ දෙකට. " ප්‍රියාන්  ඇගේ පිරුණු සුමුදු පයෝධර යුවල  දෙසට ඇඟිල්ල දිගු කළේය.

"මට හිතෙන්නේ හංස විල කැළඹිලා කියන්නේ ඔය දෙක මත් වෙලා කියල. " ඔහු ඈ  දෙස බලමින් සිනා සුනේය .

ගිහාන් එයාගේ සින්දු මට පරිවර්තන කරලා දෙන කොටත් ඔය වගේ ලස්සනයි. ඈ  ගීතය නැවත ක්‍රියාත්මක කලාය.

"සිනිදු සයන කියන්නේ සුමට ඇඳක් ගැන. සුමුදු ඇතිරිල්ලෙන් කියන්නේ ඔයා ඔය පොරව ගෙන ඇඳ ඇතිරිල්ලට . හැබැයි මම හිතන්නේ ඔයිට වැඩිය සිල්ක් වලින් හදපු සිනිදූ එකක් වෙන්න ඇති."

"ඔයා තේරුම කියාගෙන යන්න " මිමිණූ ඈ පුටුවේ හිඳ  උන් ඔහු වෙතට පැමිණි  ඔහුගේ උකුල මත හිඳ ගත්තේ දෙපා පුටුවේ පසු පසට විහිදලා ඔහුගේ මුහුණට ඇගේ ළය හමුවන ලෙසය.

"හිමින් සැරේ පියඹලා එන්න හිතේ හැඟීම් මුදාගෙන,  මට රුසියානු භාෂාවෙන් හරියට කියන්න තේරෙන්නේ නැහැ. " ඔහුට අසීරු බවක් දැනුනි.

" ඒකට කමක් නැහැ ප්‍රියන්චික් මම ගිහාන් කියල දෙන ඒවටත් කැමතියි. "

"ඔයාට අපි කිවේ ලේඩි චැටර්ලි කියල " ඔහු නැවතත්  කීවේය.

"මට ගිහාන් කියල තියනවා. මම ඒ පොත කියෙව්වා, ආහ් ඒකෙත් මේ වගේම කතාවක් නේ. චැටර්ලි ආර්යාව පැනල යනවා නේ සදික්*** එක හදපු කෙනා එක්ක. අපි දෙන්නත් එහෙමද?" ඈ ඔහුගේ නළල ට හාදුවක් දුන්නාය.

"නැහැනේ. ගිහාන් ..." ප්‍රියාන් කියන්නට ගිය දේ නතර කළේ තාන්යා ගේ ඇසේ  කඳුළු පිරුණු බව ඔහු දුටු හෙයිනි.

"ඔයා දන්නා විධිහට කියන්න. "ඈ දිගින් දිගටම  ඔහුගේ ගෙල සිම්බේ පියොවුරු යුග්මය  ඔහුගේ මුහුණට හා ළයට තද කරමිනි.
තමන් අවදිවනු දැනුනු ඔහු  දැනුනු ඔහු
"කමක් නැත්ද "  ඇසුවේ ඇය  සිතන්නේ කෙලෙස දැයි වටහා ගත නුහුණු හෙයිනි.

"කමක් නැහැ ප්‍රියාන්. ඔයා කිව්වා හරි, මට ජිවත් වෙන්න ඕනේ ආදරය එක්ක, සතුට එක්ක. මම ජිවිතේට ආදරේ කරන කෙල්ලෙක්. ගිහාන් ගෙන් හම්බෙවෙච්ච සතුට, ගත කරපු සුන්දර කාලය කවදාවත් අමතක නැහැ එච්චරයි."

ඔහු ගීතයේ වදන් මිමිණුවේ තේරුමක් කීමටම නොවේ. ඇගේ දැඩි ග්‍රහණයෙන් හා ආදරයෙන් මත්වන මොහොතක වචන මතක් වන්නේ කාටද? ඇය ගීතය ට අත්වැලට මෙන් කුමක්දෝ මිමිණුවාය.

"හරිම මෘදු භාෂාවක්  ඒක,  මෘදු සංගීතයක් ප්‍රියාන්"

ගීතය අවසන් වන විටත් ඔවුන් එම ආසනයේම වෙලී   සිටියේ ආදර පහසේ නිදහස් සුවය හා උණුසුම තරයේ විඳිමිනි.

ඇඳේ ඇලවූ තාන්යා සිගරට්ටුවක් දල්වා ගත්තාය.
"ඔයා සිගරට් බොනවද? "

"ඔව් හිතේ ටෙන්ෂන් එක යන්න " ඈ  ඉංග්‍රීසි වදනක් රුසියන් භාෂාවට ඇතුලූ  කරමින් කීවාය.
"ඔයා සෑහෙන්න ඉංග්‍රීසි වචන කියනවා දැන් "

"නප්‍රයෂ්නස්ට්**** කියනවට වඩා ලෙහෙසියි " තාන්යා දුම් උගුරක් යවමින් කීවාය.

"කෝ මටත් දෙන්න  සිගරට් එකක් "

"ගිහාන් දන්නවා නම් මම සිගරට් බොනවා කියල පුදුම වෙයි තමයි. අපි හම්බ වුනේ පාක් කුල්තුරි උද්‍යානයේ "

 තාන්යා ඇගේත් ගිහාන් ගේත් ආදර කතාව ප්‍රියාන් ට පවසන්නට ගත්තාය.

යාම තුනකුත් ගෙවී හිමිදිරි අරුණළු  ජනේලයේ වීදුරු මතින් කාමරය තුලට පතිත වන තෙක්ම ඔවුහු කතා කරමින් උන්හ.

*ඔබ්ශේශීතිය - විශ්ව විද්‍යාල නේවාසිකාගාරය
 **රස්වෙත්   - හිමිදිරිය
*** සදික් හෙවත් සද් - නිවෙස් වල  ඇති කුඩා උද්‍යාන
*****නප්‍රයෂ්නස්ට්- ආතතිය
~~~~~~~~~~මතු සම්බන්ධයි





5 comments:

සියලු හිමිකම් අජිත් ධර්මකීර්ති (Ajith Dharmakeerthi) සතුය. අනවසරයෙන් උපුටා පල කිරීම සපුරා තහනම්ය.
මෙහි පලවන ලිපි සහ දේශපාලන අදහස් මගේ පෞද්ගලික අදහස් පමණි.
ඔබේ ඕනෑම ප්‍රතිචාරයක් මෙහි පල කරනු ලැබේ. නමුත් වෙනත් කෙනෙකුට සාධාරණ හේතුවක් නැතුව පහර ගසන අශිලාචාර අන්දමේ ප්‍රතිචාර පමණක් පල නොකෙරේ. බ්ලොගයට ගොඩ වදින ඔබ සියලු දෙනාට ස්තූතියි .