Wednesday 7 January 2015

ඔටෝක්‍රසි හා ඉගෙන ගන්න, ඉගෙන ගන්න, ඉගෙන ගන්න -учиться, учиться и учиться

ඉහත කී  පාඨය මට කියන්නට සිදුවුවකි.  උචිත්සා  යනු ඉගෙන ගන්න (learn) යන තේරුම ඇති රුසියානු වචනයයි. ඒ මම  සොවියට්දේශයේ ඉගෙනුම ලබද්දී පළමු අවුරුද්ද අවසන්වූ කාලයේ තිබු රුසියානු භාෂා උත්සවයටය. මගේ පියකරු කරුණාවන්ත රුසියන් ගුරුතුමිය මෙම වදන් පෙළ අඩංගු පරිච්චේදය එම උත්සවයට වේදිකාවේ සිට කියැවීම සඳහා පැවරුවේ මටය. ඒ 1984 දීය. එම පරිච්ඡෙදය  ඇය රැගෙන තිබුනේ ලෙනින්ගේ ලිපියකිනි.  2014 දී එම පරිච්ඡෙදය වෙන හේතුවක් සඳහා ලියන්නට වේයැයි හීනෙන් වත් නොසිතුවෙමි. එයට පෙර කියයුතු තව කතාවක් මතකයට නැංවේ.

1985 උපාධිය පාඨමාලාවේ පළමු අවුරුද්දේ සෝවියට් කොමියුනිස්ට් පක්ෂයේ ඉතිහාසය උගන්වයි. මෙය ඉන්ජිනේරු, වෛද්‍ය ආදී ඕනෑම පාඨමාලාවක් කරන අය ඉගෙන ගත යුතුය. මෙහිදී වසර අවසාන විභාගයේ ප්‍රතිපලය උපාධියේ අවසන් ලකුණු ලේඛනයට යන නිසා වැදගත්ය. මෙහි එක ප්‍රශ්නයකට තිබුනේ ලෙනින්ගේ "පියවරක්  ඉදිරියට පියවර දෙකක් පසුපසට" පොත් පුන්ච ගැනයි. සියලුම ප්‍රශ්නවලට හොඳින් පිළිතුරු සැපයු මම පිළිතුරු පත්‍රය සමග මදක් තද ගතියකින් කටයුතු කරන ඉතිහාසය ගුරුතුමිය ලී.***** ලඟට  ගියෙමි. ඇය සියලුම ප්‍රශ්න සලකුණු කල නිවැරදි බව කියා ඉන්පසු ඉහත පොත් පිංච මොන අවුරුද්දේ ලීවක්ද  කියා ඇසුවාය. මම හරි පිළිතුර දුන්  පසු ඇය ලෙනින්ගේ "ඉගෙන ගන්න යනුවෙන්  තෙවරක් තිබෙන" පොත් පුන්ච ඉදිරිපත් කල වර්ෂය ඇසුවාය. එය නොදන්නා බව කියූ මම එහි ඇති දේ හා ලියුවේ ඇයි  කියා පැහැදිලි කල හැකි බව කීවෙමි. නමුත් ඇය පන්න පන්නා වර්ෂයම  ඇසුවාය. එතැන සිටි විදේශ ශිෂ්‍යයන් භාර අංශයේ පීඨාධිපතිනිය දෙනිසෝවා  (අපේ විභාග නිරික්ෂනයට ඇය  පැමිණ සිටියාය)  මෙහිදී මා හොඳට පිළිතුරු දුන් බවත් මට මුළු ලකුණු දීම යෝග්‍ය බවත් කියා සිටියාය.  එය ප්‍රතික්ෂේප කල ඉතිහාස ගුරුතුමිය කීවේ මා විභාගයට ආවේ නොගරුවෙන් බවයි. අනික මා පන්තියේදී පවා ප්‍රශ්න අසමින් වාද කරන බවයි. එහිදී මට තේරුනේ අනික් පිරිමි සිසුන් සියලු දෙනාම පාහේ  ටයි කෝට් දමා පැමිණි අතර ටි ෂර්ට් එකක් ඇඳන්  සිටියේ මා පමණක් බවයි.  එය හොඳ සුදු ටි ෂර්ට් එකක් මිස අනං මනං ලියා  තිබූ  එකක්වත් නොවේ. කෙසේ වතුදු ඉතිහාස ගුරුතුමිය ලී.***** තරහෙන් මෙන් මට අඩු ලකුණු දුන්නාය.  පීඨාධිපතිනිය කලේ කණගාටුවෙන් බලා සිටීම පමණි.

මින් අවුරුදු තුනකට පමණ පසු මා ශිෂ්‍ය සංගමයේ ලේකම් කාලයේ ප්‍රදර්ශනයක්  සංවිධානය කලෙමි. එයට පැමිණි ඇය (ලී.*****) මා හොඳින් ඉගෙන ගන්නා බව දැනගන්නට ලැබුණු බවත් මගේ ප්‍රදර්ශන වැඩ ආදිය  ඉතා හොඳ බවත් පැවසුවාය. මෙහිදී මා ඇයට කිවේ ඇඳුමින් මිස දැනුමෙන් මිනිසුන් මැනිය නොහැකි ඇය ගැන මට  වැඩිපුර ප්‍රසාදයක් නැති බවයි. මා කියනදේ මුහුණට කෙලින්ම කියන බව පැවසූ ඇය මගේ දේශපාලන ආර්ථික විද්‍යාව ගුරුතුමියට කථා කල බවත් මා  පන්තියේදී වාද කරන බව එය නුසුදුසු බවත් පැවසුවාය. මා එහිදී කිවේ මේ යන විධිහට ගියොත් සෝවියට් දේශය වැඩිකල් නොපවතින බවත් ආර්ථිකය දුර්වල බවත් ආර්ථික ප්‍රතිපත්ති වැරදි බවත්ය. මෙහිදී කෝපාවිෂ්ට බවක් පෙන්වූ ඇය කිවේ මා නිවාඩුවට ධනවාදී රටවලට යන නිසා ඔලුව කුරුවල්වී ඇති බවයි.  මා සෝවියට් දේශයට ආදරය කරන බව පවසා ඇයගෙන් ඉවතට ගියෙමි.
පසුව මා ඇය දුටුවේ  දෙතුන් වතාවක් පමණි. ඉන්පසු එළඹියේ 1991 වසරයි. සෝවියට් දේශයේ පෙරේස්ත්රෝයිකාව (perestroika)  වැරදී ගොර්බචෝව් සෝවියට් කඳවුර විසිරෙවූ කාලයයි.  පෝලන්තය කඳවුරෙන් ඉවත ගොස් තිබුණි. අගෝස්තු 19 දා  යෙල්ට්සින්  ටැංකියක් උඩ නැග කතා කරන විට මම  ඒ අසල (තරමක් දුරින්) සිටියෙමි. ඒ දිනවල මා  යහළුවී සිටි රුසියානු පෙම්වතියගේ නිවස තිබුනේ ක්‍රෙම්ලිනයට  හැතැප්ම  භාගයක් පමණ එහා අර්බාත්සකයා   නමැති පෙදෙසේ හෙයිනි. ජර්මන් ජනතාව නොවැම්බර් 9 ජර්මනිය  බෙදන තාප්පය  බිඳ හෙලන ලදී. ඒ ආසන්න දිනෙක මා අර්භාත්සකයා  වලින් උමන් දුම්රිය ගැනීමට පාර හරහා ඇති පොලව යට උමගින් ගමන් කරමින් සිටියෙමි. මේ දිනවල රූබලය වැටී තිබුන අතර උද්ධමනය අහස උසට නැග  තිබුණි.  ලැබෙන පඩියෙන් සුමානයක් වත් ජිවත් වීමට නොහැක. ඒ නිසා බොහෝවිට මහලු අය පමණක් නොව කන්තෝරු රැකියා කල අය පවා කිසියම් දෙයක් විකුණා මුදලක් සපයා ගන්නට පාරවල් වල , උමන් දුම්රියට යන මාර්ග දිගේ පේලියට සිටියහ. එදා මා යනවිට තමන් වියූ සීත  සෘතුවට අදින ජර්සියක් විකුන්නනට බලා සිටියේ ඉතිහාස ගුරුතුමියයි. මට ඉමහත් දුකක් දැනුනි. මා ඇය අසලට ගොස් කතා කර කෝපි එකක් බොන්නට ආරාධනා කලෙමි. ඉන්පසු රුසියානු කෑමක් වන පිරශ්කි (මස් හා බත් ඇතුලට දැමු රෝල්ස් වර්ගයක්) සමග කෝපි එකක් රැගෙන දුනිමි. කතාව අතරතුර ඇය මුලින්ම අවුරදු හයකට පමණ කලින් මට අකාරුණිකව  සැලකු බව සිහිපත් කලාය. ඇයට එය මතක තිබ්බේ ඇයිදැයි මම නොදනිමි. එසේම මා මේ තත්වය එන බව කී  නමුත් ඔවුන්ට උගන්වා තිබුනේ පක්ෂය විශ්වාස කිරීමට බව මට කීවාය. ඇය අමාරුවෙන් ජිවත් වන බවත් හැකිනම් රැකියාව නැතිවී සිටින ඇගේ  පුත්‍රයාට වෙළඳාමක්  කිරීමට උදව් කරන ලෙසත් ඉල්ලා සිටියාය.  නැවත සමාජවාදයක් එනතුරු සිටින්නයි ඇයට කීමට මට සිත් දුන්නේ නැත. ධනවාදී යයි කියන චැරිටි (සුභ සාධන) මාර්ගයේ යාමෙන් පමණක් ඇයට උදව් කල හැකිව තිබුණි. ඇය මගෙන් මුදල් ප්‍රතික්ෂේප කළ නිසා ජර්සිය මිලදී ගත්  මා පසුව ඇගේ  පුත්‍රයාට ඒ දිනවල පරිගණක ආදිය විකිණීම කරන අයෙකු හඳුන්වා දුන්නෙමි.

ලෙනින් "ඉගෙන ගන්න ඉගෙන ගන්න ඉගෙන ගන්න"  කියා ලියු පොතේ නම "රුසියානු සමාජ-ප්‍රජාතන්ත්‍රවාදයේ ප්‍රතිගාමී  නැඹුරුව " යන්නයි. එය ඉංග්‍රීසියෙන් A Retrograde Trend in Russian Social-Democracy යනුවෙන් හැඳින්වේ. රුසියානු ප්‍රකාශනය පහත ඇති මුලශ්‍ර යොමුවේ ඇත.

මෙය වැදගත් ලිපියකි. අර ඉගෙන ගන්න කියන කොටසේ පරිවර්තනය මෙසේයි.
"ඉගෙනීම ලබා තිබෙන සමාජ කොටස් අවංක එහෙත් නීති විරෝධී ප්‍රකාශන (කොමියුනිස්ට් ප්‍රකාශන මේ දිනවල නීති විරෝධීව තිබුණි) කෙරෙහි ඇති උනන්දුව හීනවී ඇති මේ අවස්ථාවේ දැනුම ලබා ගැනීම පිළිබඳවත් සමාජවාදය පිලිබඳවත්  උද්යෝගිමත් ඉමහත් අභිරුචියක් ශ්‍රමිකයන්  (වැඩ කරන ජනතාව) අතර ඇතිවී තිබේ. ඉතා අසීරු ජීවන තත්වයන් මැද, කම්හල්වල වහල් කම වැනි රැකියා කරමින්  බලවත් අසීරුකම් මධ්‍යයේ නියම වීරයන් මොවුන් අතර බිහි වෙමින්, ඔවුන් ඉගෙනීම, ඉගෙනීම හා නැවතත් ඉගෙනීම කරමින් තමන් නියම සවිඥානක සමාජ ප්‍රජාතන්ත්‍රවාදීන් බවට පත් වෙති. ඔවුන් සැබෑ වැඩ කරන ජනතා බුද්ධිමත්හුය.

ඕනෑම භාග සමාජවාදී රටක වුවද දැනුමට සහ ඉගෙනීමට මේ අනුව ලබා දී තිබුනේ ඉතා ඉහළ තැනකි.
ඉහත ලිපිය ලෙනින් ලියුවේ 1899 වසරේදීය. 

මෙහි තවත් වැදගත් කොටසක් තිබේ. ඒ ඔටෝක්‍රසි  යනු කුමක්ද යන්නය. මේ ලිපිය ලියා ඇත්තේ "රබෝචය මිස්ල්" හෙවත් "ශ්‍රමයේ තේරුම" නමැති රුසියානු සඟරාවේ ඒකධිපතිවාදය ගැන  ලිපි පෙළකට පිළිතුරු වශයෙනි.
ඔහු (ලෙනින්) මෙසේ කියයි.
"පරණ රුසියානු විප්ලවවාදීන් වන නරෝද්නයා වොල්යා  (ජනතාවගේ අභිප්‍රාය) වරුන් බලය විප්ලවාදී පක්ෂයක් මගින් ලබා ගැනීමට යත්න දැරුහ. බලය ලබා ගැනීම මගින් තමන්ට ඔටෝක්‍රසියේ "පුද්ගලික බලය " අභිබවා යාමටත් තමන්ගේ නියෝජිතයන් ඒ ඒ තැන් වලට පත් කිරීමටත් ආර්ථික බලය අල්ලා ගැනීමටත් හැකි යැයි  සිතූහ. එයින් සමාජ විප්ලවය සඳහා අවශ්‍ය මුල්‍ය බලය ලැබෙනු ඇති සිතුහ. ප්ලෙඛානොව් ඇතුළු රුසියානු සමාජ ප්‍රජාතන්ත්‍රවාදීන් මෙම විප්ලවවාදී තියරියට විරුද්ධ වුහ.

රුසියාවේ දැන් ඇත්තේ සමාජවාදයක්ද ඔටෝක්‍රසියක්ද?

ඔටෝක්‍රසි යනු කුමක්ද? ඔටෝක්‍රසි  හෙවත් නිරපේක්ෂ බලය, අසීමාන්තික (බලැති) රාජාණ්ඩුව යනු සම්පුර්ණ සුපිරි බලයම එක රජෙක් සාර්  කෙනෙක් අතර රඳවා  ගත් පාලන ක්‍රමයකි. ඔහු නීති නියම කරයි, නිලධාරීන් පත් කරයි, රටේ ලැබෙන අදායම  පාර්ලිමේන්තු නියෝජිතයන්ගේ සහභාගිත්වයෙන් හෝ පාලන තන්ත්‍රයකින් තොරව තම හිතු මතයේ වියදම් කරයි. මේ නිසා ඔටෝක්‍රසි යනු රාජ්‍ය නිලධාරීන්ගේ නිරපේක්ෂ සුපිරි බලයක්  හා අයිතිවාසිකම් රහිත ජනතාවක්ය. මෙම අයිතිවාසිකම් නැතිවීම මගින් මුළු මහත් ජනතාවක් පීඬා  විඳින මුත්  ප්‍රාග්ධන හිමියන් (මහා ඉඩම් අයිතිකරුවන්  සහ ධනපතියන්)  රෙජීමයේ නිලධාරීන් කෙරෙහි බලවත් බලපෑමක් ඇත්තන් වෙති.
ඔටෝක්‍රසිය පරාජය කිරීම යනු කුමක්ද? එහි තේරුම සාර්  ගේ නිරපේක්ෂ බලය අත් හැරීමයි. මිනිසුන්ට තමන්ගේ නියෝජිතයින් තෝරා ගැනීමට ඇති අයිතියත් , රාජ්‍ය නිලධාරීන්ගේ ක්‍රියා අධීක්ෂණය කිරීමේ බලයත්, රාජ්‍ය ආදායම එකතු කිරීමේ හා  නිසි පරිදි බෙදාහැරීමේ බලයත් ලබා ගැනීමය. මෙවැනි රජයක් ව්‍යවස්ථාදායක රජයක් වේ.  මේ නිසා ඔටෝක්‍රසිය පරාජය කිරීමෙන් ඒකාධිකාරී රජයක් ව්‍යවස්ථාමය රජයක් මගින් ප්‍රතිස්ථාපනය කෙරේ.

ඔටෝක්‍රසිය පරාජය කිරීම රුසියානු වැඩ කරන පන්තියේ මුල්‍ය කාර්යභාරය විය යුත්තේ ඇයි ?
එයට හේතුව ඔටෝක්‍රසිය යටතේ වැඩ කරන පන්තියට තමන්ගේ අරගලය පුළුල් ලෙස වර්ධනය කිරීමට අවස්ථාවක් නොලැබේ . වැඩ කරන පන්තියට ආර්ථික හෝ දේශපාලන ක්ෂේත්‍රයේ ස්ථිර තත්වයක් ලබා ගැනීමට නොහැකි වේ. ශක්තිමත් ජනතා ව්‍යාපාරයක් ගොඩ නඟා සමාජ විප්ලවයේ ධජය  වැඩ කරන මිනිසුන් ඉදිරියේ දිග හැර ඔවුන්ට අරගලය කිරීමට ඉගැන්වීමට නොහැකි වේ. ධනවාදී පන්තියට එරෙහි මුළු මහත් වැඩ කරන ජනතාවගේ අරගලය කල හැකි වන්නේ දේශපාලන නිදහස තිබ්බොත් පමණි. ධනය විරහිත පන්තියේ අවසාන අරමුණ දේශපාන බලය ගැනීම හා සමාජවාදී සමාජයක් ගොඩ නැගීමයි. සංවිධානාත්මක ධනය විරහිත පන්තියේ අරගලයන්  ගැන දීර්ඝ කාලින ඉගෙනීම තුලින් දේශපාලන බලය ජය ගැනීම යනු ධනවාදී රජයක නියම "පුද්ගල බලය  පෙරලා   ආර්ථික බලය" අල්වා  ගැනීමයි. රුසියානු සමාජ-ප්‍රජාතන්ත්‍රවාදීන් මේ බලය අල්ලා  ගැනීමක් රුසියන් ශ්‍රමික පන්තියේ  ක්ෂණික කාර්යයක් හැටියට එලියට දමන්නේ නැත. රුසියානු සමාජ-ප්‍රජාතන්ත්‍රවාදීන් සැමවිටම දරන මතය වන්නේ දේශපාලන නිදහස යන කොන්දේසිය මත, පුළුල් මහජන අරගලයක් ඇති විට , රුසියන් වැඩ කරන පන්තිය සමාජවාදයේ අවසන් ජයග්‍රහණය සඳහා සංවිධානයන් වර්ධනය කරන බවයි."

මේ අවධියේ ලෙනින් සමග ට්‍රොට්ස්කි , පානි, සිරිතුංග, නාගමුව හා ශාන්ත සිටියේ නැත. 1917 පෙබරවාරි මස ධනපති දේශපාලන විප්ලවයෙන් සාර් බලයෙන් පහ කල පසු ට්‍රොට්ස්කි ලෙනින් සමග එකතු වි ඔක්තෝබර් විප්ලවයට නායකත්වය දුනි. අනිත් අයට මොනවා වුණාදැයි දන්නේ නැත.

ලෙනින්ගේ පොත් තම තමන්ගේ පොත් රාක්කවල තබාගෙන තමන් මාක්ස්ලෙනින්වාදීන්  යයි බුකියේ තර්ක කළාට කම් නැත.  ඒවා ඉඳහිට කියවීමද කල යුතුය.


--අජිත් ධර්මකීර්ති
ප.ලි.
ලෙනින් ඉගෙන ගන්න කිවූ කොටස:
 В то время, как образованное общество теряет интерес к честной, нелегальной литературе, среди рабочих растет страстное стремление к знанию и к социализму, среди рабочих выделяются настоящие герои, которые — несмотря на безобразную обстановку своей жизни, несмотря на отупляющую каторжную работу на фабрике, — находят в себе столько характера и силы воли, чтобы учиться, учиться и учиться и вырабатывать из себя сознательных социал-демократов, “рабочую интеллигенцию”. 
ඉංග්‍රීසි පරිවර්තනය 

 At a time when educated society is losing interest in honest, illegal literature, an impassioned desire for knowledge and for socialism is growing among the workers, real heroes are coming to the fore from amongst the workers, who, despite their wretched living conditions, despite the stultifying penal   servitude of factory labour, possess so much character and will-power that they study, study, study, and turn them selves into conscious Social-Democrats—“the working-class intelligentsia.” 

Notes:
Old Russian revolutionaries (of the Narodnaya Volya) strove for the seizure of power by a revolutionary party. They thought that by the seizure of power the “party would overthrow the personal power” of the autocracy, i.e., appoint its agents in place of the government officials, “seize economic power,” i.e., all the financial means of the state and carry out the social revolution. The Narodnaya Volya members (the old ones) actually did strive to “overthrow the personal power and seize the economic power” of the autocracy, to employ R. M.’s clumsy expression. The Russian Social-Democrats have decidedly set themselves against this revolutionary theory. Plekhanov subjected it to trenchant criticism in his essays, Socialism and the Political Struggle (1883) and Our Differences (1885), pointing out the task of the Russian revolutionaries—the foundation of a revolutionary working-class party whose immediate aim should be the overthrow of the autocracy. What is meant by the overthrow of the autocracy? To explain this to R. M. we must answer the question: what is the autocracy? The autocracy (absolutism, unlimited monarchy) is a form of rule under which all supreme power is wielded wholly and indivisibly by an absolute monarch, the tsar. The tsar issues laws, appoints officials, collects and disburses the national revenues without any participation by the people in legislation or in control over the administration. The autocracy, therefore, means the absolute power of government officials and the police and the absence of rights for the people. The entire people suffers from this absence of rights, but the propertied classes (especially the rich landed proprietors and capitalists) exercise a powerful   influence over the bureaucracy. The working class suffers doubly: both from the lack of rights to which the entire Russian people is subjected and from the oppression of the workers by the capitalists, who compel the government to serve their interests.

What is meant by the overthrow of the autocracy? It implies the tsar’s renunciation of absolute power; the granting to the people of the right to elect their own representatives for legislation, for supervision over the actions of the government officials, for supervision over the collection and disbursement of state revenues. This type of government in which the people participate in legislation and administration is called the constitutional form of government (constitution law on the participation of people’s representatives in legislation and the administration of the state). Thus, the overthrow of the autocracy means the replacement of the autocratic form of government by the constitutional form of government. For the overthrow of the autocracy, therefore, no “overthrow of personal power or seizure of economic power” is necessary, but it is necessary to compel the tsarist government to renounce its unlimited power and convene a Zemsky Sobor[2] of representatives of the people for the elaboration of a constitution (“to win a democratic constitution” [people’s constitution, drawn up in the interests of the people], as it is put in the draft programme of the Russian Social-Democrats published in 1885 by the Emancipation of Labour group).

Why must the overthrow of the autocracy be the first task of the Russian working class? Because under the autocracy the working class is not able to develop its struggle extensively, to gain for itself any stable positions in either the economic or political fields, to establish sound mass organisations and unfurl the banner of the social revolution before the masses of the working people and teach them to struggle for it. The decisive struggle of the entire working class against the bourgeois class is possible only under conditions of political liberty, and the final aim of that struggle is for the proletariat to win political power and organise a socialist society. The conquest of   political power by an organised proletariat that has gone through a lengthy schooling in struggle will really be “the overthrow of the personal power and the seizure of the economic power” of the bourgeois government; but the Russian Social-Democrats have never put forward this seizure of power as the immediate task of the Russian workers. Russian Social-Democrats have always maintained that only under conditions of political liberty, when there is an extensive mass struggle, can the Russian working class develop organisations for the final victory of socialism.

මුලාශ්‍ර :


තාරකා කිසි දෙයක් කීවේ නැත

ඊයේ රාත්‍රියේ අහස හොඳින් පැහැදිලිව තිබුණි. හේතුව උෂ්ණත්වය සෙන්ටිග්ග්‍රේඩ් 0 ත් 1ත් අතර දෝලනය වුනු නිසාය. රාත්‍රී නමය වනවිට උෂ්ණත්වය සෘණ දෙකක් පමණ විය.
මගේ සෙලෙස්ට්‍රෝන් ටෙලස්කෝපය එලියට රැගෙන තාරකා  නිරීක්ෂණය කරන්නට තීරණය කලෙමි. ඔරායන් තාරකා  මණ්ඩලය පැහැදිලිව දකුණු අහසේ පෙනුණු අතර බ්‍රහස්පති ග්‍රහයා චන්ද්‍රයා අසල විසල් ලෙසින් දිළිසුනේය. සඳේ අපැහැදිලි පින්තුරයක් දෙකක් ගැනීමට හැකි විනි. 

සඳ සහ බ්‍රහස්පති දෙස සැහෙන වෙලාවක් බල සිටියෙමි. තාරකා දෙසත් බලා සිටියෙමි. බිටල්ජූස් , බෙලට්‍රික්ස් , මින්ටක , රීගල් යන ඔරායන් මණ්ඩලයේ තාරකාත්  සීරියස් තරුවත් සීරියස් ලෙසින්මා  දෙස බලා සිනහ වෙන සෙයක් හැඟිනි.

නමුත් කිසිම තාරකාවක් ශ්‍රී ලංකාවේ ජනාධිපතිවරණය දිනන්නේ කවුදැයි කිවේ නැත.

නක්ෂත්‍රකරුවන් තාරකාවලට කතා කරන භාෂාව ඉගෙන නොගැනීම ගැන ඇත්තේ බලවත් කනගාටුවකි.

ප.ලි.
හොඳ කොමෙන්ටුවක් ලැබුණු නිසා එය ඇතුලත් කලෙමි.

නක්‌ඛත්තං පතිමානෙත්තං
අත්ථෝ බාලං උපච්ජගා
අත්ථො අත්ථස්‌ස නක්‌ඛන්තං
කිං කරිස්‌සන්ති තාරකා"

අර්ථය නැකත් බලන අඥානයා ඉක්ම ය යි. අභිනිෂ්ට ප්‍රතිඵල ලාභය හෙවත් බලාපොරොත්තුවන ප්‍රතිඵලය ලැබීම ම නැකත වේ. තාරකාවෝ කවර නම් අර්ථයක් යොදත් ද? නො යොදත් ම ය.- බුදුන් වහන්සේ 

http://buddharashmi.blogspot.com/2013/04/thiryak-79.html

- අජිත් 

Sunday 4 January 2015

කුමාර් ගේ පිහිටට විමල් විමල්ගේ පිහිටට කුමාර්?

පන්ති අරගලයේ කොටසක් ජය ගෙන තිබේ. ඒ 2015 ජනවාරි 1 වනදා සිටය. සමහර පිට රටවල සිටින ලංකාවේ ඉපදී ඇති වැසියන්ට දැන් ද්විත්ව පුරවැසි භාවය ලබා ගත හැකිය. එක්සත් රාජධානියේ සිටින අයට එය තවම ලැබී නැත. ඒ නිසා අරගලය තව දුරටත් ඉදිරියට ගෙන යා  යුතුය.

මාක්ස්වාදය පොතේ ගුරුවාදයක් වන්නේ කෙසේදැයි අප දැන ගත්තේ පොල්පොට් ගෙන්ය. නිෂ්පාදනය ගැන හැඳින්වීමේදී ගෝත්‍රික සමාජය දියුණුවී primitive communism හෙවත් ආදිකල්පික කොමියුනිස්ට් ප්‍රජාවක් බිහිවූ බව මාක්ස් පෙන්වා දුනි.  පුද්ගලික දේපල ක්‍රමය බිහිවුයේ මින් පසුවය. වඳුරාට දැලි පිහිය ලැබුවාක්  මෙන් පොල්පොට් කලේ අති  ශුද්ධ කොමියුනිස්ට් සමාජයක් පිහිටුවීමට කම්පුචියානුවන් මිලියන් ගණනක් මරා දමමින් ගම් වලට දක්කා ප්‍රාග් ඓතිහාසික කොමියුනිස්ට් සමාජයක් පසුගාමී කම්පුචියාවේ පිහිටුවීමට තැත්  කිරීමයි. ඒ පොතේගුරුවාදයට ගිය මාක්ස්වාදී භාවිතාවයි.
දුමින්ද නාගමුව දිල්කා සමන්මලී සමග කළ සාකච්චාවේ යොමුව (link එක) බුකිය පුරා  පැතිරී තිබුණි. දිල්කාගේ ප්‍රශ්න වලට දේශපාලකයන් ගල් වන අයුරු අප දැක
ඇතත් නාගමුව නාගත්තේ නැත. දෙදෙනා අතර කෙමිස්ට්‍රිය කොපමණද යත් සාකච්චාව අවසානයේ ඔවුන් එවෙලේම ලාස්  වේගාස්  ගොස් විවාහ වෙයිද කියාත්  සිතුනි. සාක්ෂියට මහින්ද හෝ රනිල් කැඳවා ගත හැකිව තිබුණි. (කැසිනෝ අග නගරය වන ඇමෙරිකා  එක්සත් ජනපදයේ වේගාස්  හි ඔබට එවෙලේම කසාද බැඳීමට හැකිය. අවශ්‍ය සාක්ෂි දෙකක් පමණය.)  එහෙත් සන්නද්ධ අරගලයක් නැවත  කරන්නේද යන ප්‍රශ්නයට ඔහු හරි පිළිතුරක් දුන්නේ නැත. මර්දනය එනවිට එසේ විය හැකිය යන්න
ඔහුගේ පිළිතුර විය. මාක්ස්වාදීන් විශ්වාස කරන්නේ මහජන අරගලය බව ඔහු පැවසුවේ නැත. මහජන අරගලයකදී වන්නේ ජනතාව සමග අවිගත් හමුදාවන්ද එක පෙලට සිට ගැනීමයි. ඔක්තෝබර විප්ලවයේ සිට කියුබානු විප්ලවය  දක්වා සිදුවුයේ එයයි. එසේ නොමැතිව  ජනතා විමුක්ති පෙරමුණ විසින්  මර්දනයට එරෙහිව කියා කල නරෝද්නික්වාදී අවි ගැනීම නොවේ. නරෝද්නික්වාදයෙන් සිදුවන්නේ මර්දනයෙන් සමුල ඝාතනයකට ලක්වීමයි. ලෙනින් සාර් විසින් එල්ලා මරා දැමූ තම සහෝදරයා වන ඇලෙක්සැන්ඩර් උල්යානොව් ගත්  මග ගත්තේ නැත........... 1917
පෙබරවාරිහිදී  සාර් පාලනය පෙරලා දැමු  ධනපති විප්ලවයට එරෙහිව නොගිය ලෙනින් එම අවුරුද්දේ ඔක්තෝබරය (නව කැලැන්ඩරයේ නොවැම්බරය) වන විට පක්ෂ ගණනක එකතුවෙන් කැඳහැලියක්ව තිබු  කෙරෙන්ස්කි ආණ්ඩුව පෙරලා සාර්ථක ලෙස මහජන අරගලය මෙහෙයවා බලය ලබා ගත්තේය. ඒ මාක්ස්වාදය ටූල් එකක් නැත්නම් තමාගේ ගමනට අවශ්‍ය උපකරණයක් ලෙස සාර්ථකව භාවිතා කිරීමෙනි.
ඇලෙක්සැන්ඩර් උල්යනොව් 

දුමින්ද නාගමුවගේ ප්‍රධාන තර්කය වුනේ උනුත් එකයි මුනුත් එකයි යන්නය. මේ නිසා ධනවාදය පරදවා අර බුකියේ එවන පින්තුරවල ඇති පරිද්දෙන් කොම්පියුටරයක් මගින් ක්‍රමය වැරදියි හරි ක්‍රමයක් ස්ථාපිත  කරන්න කියා ක්ලික් කල යුතුය. "අද දෙරණ" නාලිකාවේ චතුර සමග සංවාදයකට එක වෙමින් කුමාර් ගුණරත්නම් පවසා  සිටියේත් එයයි. නමුත් සත්‍ය තත්වය එයද? තිබෙන ධනවාදී ක්‍රමය දෙපක්ෂයම ඉදිරියට ගෙන යන බව පෙනෙන්නේ මතුපිටින් අත ගා  බැලූ විටය.
1970-1977 සිරිමා ආණ්ඩුවට තිබු ප්‍රධාන චෝදනාව මතකද? සිසිර කුමාර මානික්ක ආරච්චිගේ හත් අවුරුදු සාපය  පොත මතකද? එහි තිබුනේ පවුල් ගසක් ගැනයි. ධනවාදී ප්‍රගතිය වලකන වැඩවසම් හා රාජ්‍ය ඒකාධිකාරී මිශ්‍ර ආර්ථික ක්‍රමයක් 1977 වාමාංශික ආණ්ඩුවක් නාමයෙන් ඒ වනවිට ලංකාවේ පැවතුනි. එයට ධනවාදී  ප්‍රතිසංස්කරණ ගෙන ඒමට ජේ ආර්ට රැල්ලක් ඇති විය. ජේ ආර් ට එය හොඳින් සාක්ෂාත් කර ගැනීමට නොහැකි වුනේ ඔහු පාදඩ ධනපති පන්තියකට ඉඩ  දුන් බැවිනි.
කුමාර් ගුණරත්නම් ගේ නොනිල නායකත්වයෙන් හා සෝමවංශගේ නිල නායකත්වයෙන්, විරවංශ ගේ ප්‍රචාරයෙන් යුත් ජවිපෙ හා චම්පක රණවක ප්‍රමුඛ හෙළ උරුමයේ උදව්වෙන් බලයට පැමිණි මහින්ද රාජපක්ෂ රාජ රාජ චෝලයන්ගේ අලුත් අවතාරය වන මිස්ටර් ප්‍රභාකරන් ගේ තර්ජනය මැඩ පවත්වා  රට එක් සේසත් කර ජනාධිපති පදවියෙන් රාජ්‍යත්වයට පත් වුනි. ඉන්පසු ගෙවී ගිය අවුරුදු දහය සමන්විත වුයේ පවුලේ රාජ්‍ය බලය බලවත් කිරීමටය. මෙහිදී ප්‍රාදේශීය රජවරුන් බොහොමයක් හා ජනතාව පෙලන ඔවුන්ගේ පුත් කුමාරවරුන් බොහොමයක් බිහි වුනි. පොළොන්නරු යුව රාජ  සිරිසේන හා ඔහුගේ සහෝදර පිරිසද හොඳට උපයා ගත්හ. නිතිය ක්‍රියාත්මක වන්නේ රජුගේ වචනයට හෝ ප්‍රාදේශීය රජවරුන්ගේ වචනයටය. පොලිසිය හා නීතිය වැඩ කරන්නේ පිළිගත් සම්මත නීතිමය රාමුවෙන් ඔබ්බට වී අපරාධකරුවන් තමන්ම ගඟට පැන  දිවි නසා ගන්නා රාමුවකය.

දැන් පොතේ ගුරු මාක්ස්වාදීන්ට අනුව වැඩවසම් පාලනයන් පෙරලා ධනවාදය ඇතිවී බොහෝ කල්ය. නමුත් මාක්ස් කිවේ මේ හැම අවධියකම ලක්ෂණ ඊළඟ පරිණාමික අවධියේ ඇති බවයි. උදාහරණයක් ලෙස පකිස්ථානයේ කරච්චිය ධනවාදී රජයක් යටතේ පාලනය වුවත් බලුකිස්තානය හා එපිට පාලනය වන්නේ ගෝත්‍රික නායකයන්ගේ ඕනෑ එපාකම් අනුවය. එයට අන්තවාදී දක්ෂිණාංශික මුස්ලිම්  ආගමේ සහයද ලැබේ. මෙයට විරුද්ධව ඇතිවිය යුත්තේ ප්‍රජාතන්ත්‍රවාදී  ලෞකික (secular)  ධනවාදී හෝ සමාජවාදී අරගලයකි. බොහෝවිට ධනවාදී එකකි. ලෙනින් පින්ලන්තයේ  ස්‌වය තීරණය අයිතියට ගරු කිරීමේදී අවධාරණ කල එක් කරුණක් වුයේ පින්ලන්තයේ ධනවාදී සමාජ ක්‍රමය  ළදරු සෝවියට් රාජ්‍යයට වඩා ඉහලින් පැවතීමයි. එහි උදව් පසුව ලබා ගැනීම සඳහා පින්ලන්තය ආක්‍රමණය කිරීම නොකලේය.
පොතේගුරු මාක්ස්වාදයට අනුව උනුත්  එකය මුනුත් එකය (කරච්චි ආණ්ඩුව හා ගෝත්‍රික පාලනයන්). ලංකාවේ තත්වය කුමාර් ගුනරත්නම්ට අනුව නම්  තේරුම් ගැනීමට ලොකු මාක්ස්වාදී දේවල් ඉගෙන ගන්නට අවශ්‍යද  නැත. (එහෙනම් අවුරුදු දෙකක සංවාද කරන්නට අවශ්‍යද නැත...........) අවුරුදු 66ක ශේෂ පත්‍රය බැලුවිට ඉබේ පැහැදිලිවේ.

පොතේගුරු  මාක්ස්වාදයට පිටින් බැලුවිට,  මාක්ස්වාදී උපකරණයෙන් විග්‍රහ කල විට අපට පෙනී යන්නේ වෙනත් දෙයකි. වැඩවසම්  පාලනයකට යාමට යත්න දරන පාලනයකට විරුද්ධව දයලෙක්තිකව ධනවාදී රැල්ලක් ගොඩ නැගී තිබේ. මෙය 1994 පැවති  මර්දනයට විරුද්ධව පැන නැගුනු රැල්ලම නොවේ.  ධනවාදය තමන්ගේ දියුණුවට තහංචි වැටුණු වහාම එයින් මිදීමට මං සොයයි. බුෂ් ජන අප්‍රිය වනවිට ඔබාමා නම් මිශ්‍ර සම්භවයකින් යුත් කළු ජාතිකයා ගේන්නේ එබැවිනි. නියම මාක්ස්වාදියාගේ කර්තව්‍යය මෙය හොඳින් හඳුනා ගැනීමයි.
භාගයක් බාහුගේ පක්ෂයෙන්, භාගයක් ජවිපෙන්, අනිත් පක්ෂවල අරික්කාල් වලින් ගොඩ නැගු භාග වමේ පෙරමුණෙන් දැන් සිදුවන්නේ එය නොවේ. ඉංග්‍රීසියෙන් කියන
විධිහට Scores settle (ලකුණු සම කිරීම) කිරීමකි. කුමාර් හා දිමුතු ඉස්සුවේ හා කුමාර් රටින් පිටිවහල් කිරීමට හේතුවුයේ යම් ජවිපෙ නායකයන් පිරිසකගේ පාවාදීමක් නිසා යයි රාවයක් පැවතුනි. දැන් වෙන්නේ රුපවාහිනී නාලිකාවල සිට නාගමුව හා ගුණරත්නම් ඔවුන්ට කොකා පෙන්නීමයි. පන්ති අරගලය ඇත්තේ තමන් හිටපු පක්ෂය වන ජනතා විමුක්ති පෙරමුණ සමගය. මුළු බුකිය පුරාවට සිදුවන්නේත් එයයි.
චන්ද්‍රිකා හොඳ  පාලිකාවක් හෝ නරක පාලිකාවක් වුනේ නැත. ඇය උදාසීන පලිකාවකි. රාජිත  ප්‍රා එකට නායකත්වය දුන්නේය. රනිල්ට බටලන්ද ගැන චෝදනා තිබේ. ෆොන්සේකා කර්නල් සමයේ කුමාර් මහත්තයා  ඔහු යටතේ සිරකර  සිටියේය. ඒ නිසා මෛත්‍රි පිලට පෞද්ගලිකව සාධාරණ විවේචනයක් හා scores settle කිරීමක් කුමාර් ගුනරත්නම්ගේ පැත්තෙන් තිබේ. හැබැයි මේ පන්ති අරගලය නොවේ. පතිරනලාගේ ස්වාධින ශිෂ්‍ය සංගමයේ සිට රණවක දක්වා විරුද්ධත්වයද අපට හඳුනා ගත හැකිය. නමුත්  ත්‍රිමා විතානට ඇන ගැසූ අය හා විශ්ව විද්‍යාල සිසුන්ට පහර දුන් අය සිටින්නේ රජය පැත්තේය. ඒ නිසා අනියම්ව හෝ ඔවුන්ට සහයක් වීමද කල නොහැක්කකි.  කුමාර්ට පතුරු යන්න විවේචනය කළ  මහා සෙනෙවි විරවංශ මැතිඳු ගේ අඩවියේ අද ඔහුට පක්ෂව ලියවේ. රණවක පතුරු ගැසූ සඳරුවන්ගේ ප්‍රතිපත්ති විරහිත දේශපාලනය දැන් ඔහුට පක්ෂව ලියවෙන්නාක් මෙන් , බෙදුම්වාදයට එරෙහිව ජාතිවාදින්වූ  රණවක හා රතන හිමි දැන් බෙදුම් වාදීන් කරන ප්‍රතිපත්ති විරහිත දේශපානය මෙන්,
 මෛත්‍රි - ජවිපෙ ගිවිසුම හරහාද  කුමාර් මහත්තයා ප්‍රතිපත්ති විරහිත දේශපානයක් එලියට දමා තිබේ. චන්දය දෙන මිනිසුන්ට මෛත්‍රි - ජවිපෙ ගිවිසුමක් හෝ මහින්ද - කුමාර් ගිවිසුමක් අදාල නොවන බව ඔවුන්ට වැටහී නැත.  මේ යන්නේ හතරබීරි දේශපාලනයකි.

මැකියාවෙලි අධ්‍යනය කර හෝ නොකර ජේ ආර් ගෙන් පසු ලංකාවේ බිහිවූ හොඳම දක්ෂිණාංශික නායකයා  මහින්ද රාජපක්ෂය විය යුතුය. ඔහු විසින් එතරම් දක්ෂයයි බොහෝ දෙනා සැලකු ත්‍රස්තවාදී නායක මිස්ටර් ප්‍රභාකරන්වත් ඇන්දුවේය. රට වැඩවසම් පාලනයකට ගෙන නොයා, අන්ත දූෂණයට ඉඩ නොදී, ධනවාදී ප්‍රජාතන්ත්‍රවාදී නිදහස සහිතව නව ලිබරල්වාදී ප්‍රතිසංස්කරණ හරියට කලේනම් ඔහු හොලවනු බොරුය. ඔහුට විරුද්ධව නව ධනවාදී රැල්ලක් පන නැගී ඇත්තේ එහෙයිනි. ලෙනින් කලේ මාක්ස්වාදය හරියට කියවා  තමාගේ වාරයට සුදානම් වීමය.

අන්තරයේ නජිත් ඉන්දික හා අනිකුත් මල්ලිලාට කිවයුතු දෙයක් තිබේ. නජිත් ඉන්දික තමන් ඉගෙනීම අතහැර පුර්ණ කාලින දේශපාලනයේ (පෙසප දේශපාලනයේ) යෙදෙන බව කියයි. උල්යානොව් සහෝදරයා මර දැමු පසුත් ලෙනින් ගෞරව සහිතව තම ජිම්නාසියම (රුසියාවේ එවකට පැවත උසස්  විදුහල්) අවසන් කළේය. දේශපාලනයට බැස්සේ ඉන් පසුවය. රෝහණ විජේවීරගේ වෛද්‍ය අධ්‍යාපනය අවසන් වූයේ අවස්ථාවාදී බලලෝභී දේශපාලනයේ යෙදුනු ශ්‍රී ලංකා කොමියුනිස්ට් පක්ෂ නිලධාරීන් නිසාය. එසේ වතුදු දක්ෂයකු වූ ඔහු පක්ෂයක් ගොඩ නැගුවේය. ඔහුට ඉගෙනීමට ඉඩ දුන්නා නම් ඉගෙනීම අවසන් කර පැමිණ ඔහුට  වඩාත් හොඳ  පක්ෂයක් ගොඩ නැංවීමට ඉඩ තිබුණි. දෙමල හා සිංහල ඩයස්පෝරාවේ එංගලන්තයේ ඕස්ට්‍රේලියාවේ ඔබට සහය දෙන බොහෝ දෙනාගේ දරුවන් ඉගෙනීම ලබන්නේ ශිෂ්‍යත්ව විභාග සමත් වී හොඳම විදුහල් වලය. ඒ දරුවන් පසුව හොඳ රස්සාවලට යනු ඇත. මට නම් එහි කිසිම වැරැද්දක් නොපෙනේ.
රාජකීය විද්‍යාලයේ අපට ඉහල පන්තිවල සිටි වෙනුරගේ හෝ ටයිටස් ගේ මව අද කොතැනදැයි  ඔබ දන්නවාද? ත්‍රිමා විතානගේ දෙමාපියන් කොහිදැයි ඔබ දන්නවාද? ඉගෙන ගන්නා ගමන් තමන්ගේ ඉඩ ඇති වෙලාවට දේශපාලනයේ යෙදෙන්න. කියවන්න ඉගෙන ගන්න. නැත්නම් ඔබලාටත් සිදු වන්නේ  සිගිරි නොගිය හේතුවෙන් උණු කඳුළු හෙලමින් දක්ෂිණාංශික දේශපාලකයෙකුගේ තුරුල්ලට පැන ආත්මය වනසා  ගන්නටය.

වරුණ දීප්ත යල්පැනගිය අධිරාජ්‍ය විරෝධයක් ගැන කතා කරනවිට අලුත් බෝතලයක පරණ වතුර දමා ඇතිබව මම ලීවෙමි. පෙරටුගාමී සමාජවාදී පක්ෂයේ තවම ඇත්තේ පරණ වතුර බව නැවතත් සිතේ. වැරදී ඇත්තේ මටය.

වරුණ දීප්ත  රාජපක්ෂට ජය වේවා!
මහින්ද රාජපක්ෂ රජ තුමාට ජය වේවා !
මෛත්‍රි යුව රජ තුමාට ජය වේවා!
පන්ති අරගලයට ජය වේවා!

ඉහත කි සියල්ල එකවර සිදුවන දේවල් නොවන නිසා තව දුරටත් එංගලන්තයේ නිර්දේශපාලිනිකව සිටීමට තීරණය  කෙළෙමි.


ප.ලි. ලංකාදීප 31/12/2014
http://www.lankadeepa.lk/index.php/articles/286827?utm_medium=facebook&utm_source=twitterfeed
//තාවකාලිකව නතර කර තිබූ ද්විත්ව පුරවැසි භාවය ලබා දීම නව ක්‍රමයක් යටතේ අද (31) සිට යළි ඇරැඹූ බව ආරක්ෂක අමාත්‍යංශයේ සිවිල් ආරක්ෂක හා සංවර්ධන අතිරේක ලේකම් දමයන්ති ජයරත්න මහත්මිය කීවාය.
නව ක්‍රමයෙන් ශ්‍රී ලාංකිකයන්ට සෘජුවම ද්විත්ව පුරවැසි බව ලබා ගත හැකි බව ද ඇය පැවසුවාය.//

Friday 2 January 2015

නෙලුම් යායෙන් පිදෙන 2014 බ්ලොග් සම්මාන

පුරවැසි මාධ්‍ය කලාව තව දුරටත් ජනප්‍රිය කරවීමටත්, බ්ලොග් කරුවන් සමාජයේ දැනුම පුළුල් කිරීම උදෙසා කරන සේවයත් ඇගයීම සඳහා නෙලුම් යාය සහෘද සමුහය විසින් පහත සඳහන් බ්ලොග් අඩවි සම්මාන සඳහා තෝරාගෙන තිබේ.



  • 2014 වසරේ හොඳම බ්ලොග්  කරු - මාතලන් හෙවත් ප්‍රියන්ත හේවගේ 


     බ්ලොගය: http://maathalan.blogspot.co.uk/ - ත්‍යාගය රුපියල් 15,000 හෝ ඒ හා සමාන වටිනාකමක්
     ඇති ග්‍රන්ථ


  • 2014 වසරේ හොඳම බ්ලොග් කවි/නිසඳස - ප්‍රථම ස්ථානය - බට්ටි

           දමිත් ගුණවර්ධන - http://damgune.blogspot.co.uk/2014/10/blog-post.html - ත්‍යාගය රුපියල්        
           10,000 හෝ ඒ හා සමාන වටිනාකමක් ඇති ග්‍රන්ථ


  • 2014 වසරේ හොඳම බ්ලොග් කවි/නිසඳස - දෙවන ස්ථානය -මොඩෙලින් කිරිල්ලි 


           බස්සි  (යසෝධා සම්මානි ප්‍රේමරත්න )-              
            http://bassigenawathana.blogspot.co.uk/2013/10/blog-post_15.html
           - ත්‍යාගය රුපියල් 7500 හෝ ඒ හා සමාන වටිනාකමක් ඇති ග්‍රන්ථ


  • 2014 වසරේ හොඳම බ්ලොග් කවි/නිසඳස - තුන්වන  ස්ථානය - ගිං ගඟත් අසරණයි - දිලාගේ ලෝකය 


           දිලිනි නිමන්තිකා - http://dilagelokaya.blogspot.co.uk/2014/09/blog-post_21.html
           - ත්‍යාගය රුපියල් 5000 හෝ ඒ හා සමාන වටිනාකමක් ඇති ග්‍රන්ථ


  • 2014 වසරේ හොඳම බ්ලොග් පෝස්ටුව/ලිපිය  - ප්‍රථම ස්ථානය - 

             ආඩම්බරකාර අපේ තාත්තා- දසයා - http://iamdasaya.blogspot.co.uk/2014/12/blog-post_5.html
             - ත්‍යාගය රුපියල් 10,000 හෝ ඒ හා සමාන වටිනාකමක් ඇති ග්‍රන්ථ


  • 2014 වසරේ හොඳම බ්ලොග් පෝස්ටුව/ලිපිය  -දෙවන  ස්ථානය - නිල්  කට්රොල් මල්  
          - රවී වීරසිංහ

             http://ranrandil.blogspot.co.uk/2014/12/294.html

              - ත්‍යාගය රුපියල් 7500 හෝ ඒ හා සමාන වටිනාකමක් ඇති ග්‍රන්ථ


  • 2014 වසරේ හොඳම බ්ලොග් පෝස්ටුව/ලිපිය  -තුන්වන   ස්ථානය - කරුමේ ඩබල් පින සිංගල් 

             ඉවාන් පව්ලුශා - http://iwanpaulooshaa.blogspot.co.uk/2014/10/blog-post.html

        ත්‍යාගය රුපියල් 5000 හෝ ඒ හා සමාන වටිනාකමක් ඇති ග්‍රන්ථ

මෙම ත්‍යාගයන් පිරිනමනු ලබන්නේ නෙලුම්යාය සහෘද සමුහය විසිනි. එහිලා ලංකානිව්ස්වෙබ් අඩවිය හා සංස්කාරක මණ්ඩලය දුන් විශිෂ්ට සහයෝගය ආදරයෙන් සිහිපත් කරමු. තේරුණු ස්ථාන සඳහා මුදලින් ත්‍යාග පිරි නමනුයේ නේෂන් බිල්ඩින් සොසයටි (Nation Building Society) අනුග්‍රහයෙනි.

සිංහල බ්ලොග් අවකාශයේ බ්ලොග  දෙසීයකට අධික ප්‍රමාණයක් ඇති බව අපි දනිමු. අපට පසුගිය තෙමසක පමණ කාලය තුල කියවීමට හා නෙළුම් යායේ  පල කිරීමට හැකි වුයේ බ්ලොග් අඩවි සීමිත ප්‍රමාණයක් පමණකි. එසේ පළ කෙරුණු  බ්ලොග් අතරින් මෙම ස්ථානයන් තීරණය කළෙමු. මෙයින් අනිත් බ්ලොග් ලියන සහෘදයන් වඩා උනන්දුවෙන් බ්ලොග්කරණයේ යෙදෙනු ඇති බවට උදක්ම බලාපොරොත්තු වෙමු.  මේ අවුරුද්දේ දී  ඉහත සඳහන් ස්ථාන වලට අමතරව හොඳම බ්ලොග් කෙටි කතාව, විද්‍යා ලිපිය, ගීත විග්‍රහය  හා වෙනත් වර්ගීකරණයන් ද හඳුන්වා දීමට බලාපොරොත්තු වෙමු.

ඔබ සැමට සුභ බ්ලොග් අවුරුද්ද්දක් වේවා

- නෙළුම් යාය සහෘද සමුහය

ඉහත සඳහන් බ්ලොග් අයිතිකරුවන් කරුණාකර තමන්ගේ විද්‍යුත් ලිපිනයන් මගින් අප හා සම්බන්ධ වන්න. ත්‍යාග ඉදිරියේදී ශ්‍රී ලංකාවේදී ප්‍රදානය කෙරෙනු ඇත. 

Wednesday 31 December 2014

අතීරණයෙන් සුභ අලුත් වසරක්

රජානෝ දිනු යුද්ධයක් ඇත  අනේ ජනයා  ලැබු  දෙයක් නැත
සිටාණෝලා බොහෝ නම් ඇත ජනී ජනයට වැලේ වැල්  නැත

මහා ජාතිය රවටලා ඇත සුළුවූ ජාතින් තලා  දා  ඇත
ජාතියේ මහ දේවතාවුන්  බෙන්ස් රථවල රහත් වී ඇත

ඇමතිලා මන්ත්‍රී තුමාලා පළාතේ හුන් සභාපතිලා
ගසා  කති බලන හැම තැන හදන ගම් පාරෙන් පවා

පාරවල් අධිවේගයන් වී හරිම ඉක්මන් ගමන් නම් ඇත
පිටරටින්  යන අපට නම් මේ, ගමන් ටික දැන් ජොලියෙ  කල හැක

මෛත්තිරියා  කඩා ගෙන ගොස් වාසලක් දෙදරුම් කවා  ඇත
චන්දි රාජිත දෙපොල හින්දා චන්ද ටික වල් වැදී  ගොස් ඇත

ප්‍රේමයා  කකුලෙන් අදින සඳ රනිල් මංගල වැටී යාදෝ
ජෝන්ස ලන්සා  මර්වින් හින්දා  රජා අතරමන් විලා යාදෝ

මන්දබුද්ධිකද ජනයා..... ඒකදෝ සල්මනා ගෙන්නුවෙ
ජැකාලින්ගේ කකුලෙ  සුදු දැක අනේ උන් චන්දය දේවිදෝ

එහෙම ජනයින් ඉන්න රටකට එහෙම නයුවන් ලැබී ඇත් දෝ
හත් පොලේ ගාගත් වම්මු හට ඇපත් චන්දත් නැතිවී යාදෝ

මේ මොකවුනත් හැම තැන බ්ලොග ලෝකයේ හැම එකා  වාගේ
නෙලුම් යායේ සහෘද සමුහය බැබලි බැබලී ඉන්නවානේ

කිරින් පැණියෙන් තව ලියන්නට පතමි තොප හැමට වාගේ
හොඳම  සුභ නව වසරක්ම  වේවා කියවනා හැම දෙනට අපගේ

- අජිත් ධර්මකීර්ති
නෙළුම් යායේ අප හැමෝටම සුභ නව වසරක් වේවා
с новым годом




Monday 29 December 2014

කවියක්

හැමෝම කවි ලියනවා වගේ කියල හිතෙනවා. ඊයේ කියෙව්වේ අපේ හිතවත් ජයසිරි අලවත්තයන් ලියු "කාව්‍ය මකරන්ද විමංසා " එකට විචාරයක්. ඒක කියෙව්වහම හිතුනේ කවි නිසඳැස් ලිව්ව කාලයක් මතක නැහැ කියල. ඉඳල හිටලා මාතලන්ගේ දේශපාලන කවි පේලියක්, බස්සිගේ, කටුසු හදවතගේ , දිලාගේ, ශාශියගේ නිසඳැසක්, කවියක් කියවෙනකොට හිතෙනවා ලියන්න ඕනේ කියල.

ඒ අතරේදී තම මගේ සහෝදරිය මට මතක් කලේ මම  ලිව්ව නිසඳැසක් ගැන. මම ලිව්ව එක වුනත් අක්කා කිව්වේ ගොඩක් අය ඒක කොපි කරගෙන තමන් ලිව්වා වගේ සමරු පොත්වල හෙම ලියාගෙන හිටිය කියල. ඉතින් ඇත්තටම මේක මගේ. ඔරිජිනල් කොපිය ලියු පොත තවම අක්ක තියන් ඉන්නවා සිහිවටනයක්ලෙසට . (මම පිටරටක ජිවත් වෙන නිසා). මේක ලිව්වේ එක්තරා යුවතියක් ගැන 1982 විතර මම අපොස (උ.පෙ.) කරන කාලේ. කතාවත් කියලම හිටින්නම්.

ලස්සන ගෑණු ළමයෙක් හිටිය ගෙවල් ගාව. මගේ ගේ ළඟ නිසා මම සාමාන්‍යයෙන් කතාව දාගෙන  ඉන්නවා එයා එක්ක. ඒ දවස් වල මට ගණන් පුළුවන් කියල රාවයක් තිබ්බ නිසා මගෙන් ඉඳ හිට ගණන් අහගන්නත්  එනවා. හැබැයි එයා ටිකක් නම තියෙන බාලිකා විද්‍යාලයකට ගිය චුට්ටක් වෙන්න උඩඟු කෙනෙක්. මෙයාට කැමති පිරිමි ළමෙකුත් හිටිය ඒ ළඟම නුවන් කියමුකෝ නම.  ඉතින් මේ නුවන් කොළු ගැට තෙමේ මමත් දන්න කෙනෙක් වුනත් යාලුවෙක්ම නෙමේ. මිනිහ දවසක් මාව හමුවෙන්න ආව උදව්වක් ඉල්ලා ගෙන. උදව්ව මොකක්ද ඉතින් අර ගෑණු  ළමයාගෙන් අහන්න පොරට කැමතිද කියල. මන් කිව්වා මම ඔය කපු වැඩ වලට නැහැ කියල. පස්සේ මූ  කියනවා ඒ කියන්නේ උඹ යාලුයි නේද, උඹ ටියුෂන්  දෙනවා නේද ඒකද මේකද කියල. මාත් එක්ක වලිය දැන් . පස්සේ මල කරදරෙන් බේරෙන්න බැරි නිසා මම හා අහන්නම් කිව්ව.
දින දෙකකකට විතර පස්සේ කෙල්ල එක්ක කතා කරන ගමන් මම නිකමට කෝට්ටක් වතුරට දාල ඇනල බැලුව?

"ඔයා  දන්නවද නුවන් හෙම අර පල්ලහා  ගෙදර ඉන්නේ?"

කෙල්ල කියපි "අපොයි මම දන්නව ඒ වසංගතේ. අර කබල්  බයිසිකල් කට්ටත් තල්ලු කරගෙන ඇවිත් මගෙන් ඇහුවනේ යාලු වෙනවද කියල. මම බැනල එලව ගත්ත. ඌත්  එක්ක යාලුවෙන්න අර කොරියාවේ කෙල්ලක් හොයා ගන්න කිව්ව".  (කොරියාව කියන්නේ උතුරු දකුණු කොරියාව නෙමේ. ඒ දවස් වල තිබ්බ කොලඹ දුප්පත් කෑල්ලක්)

දැන් මට ටිකක් අප්සෙට්. නුවනයා  මට අහපු  කතාව කිව්වෙත්  නෑනෙ.

මං නුවනය  හම්බ වෙලා බැන්න. කලින් ඇහුව කියල කිව්වේ නැහැ කියල. මු මට කියනවා " මචන් උඹ ටියුෂන් දෙන නිසා උඹ කීවොත් ඒකි  කැමති වෙයි කියල මට හිතුන " නුවන් උසස් පෙළ අසමත් වෙලා පොඩි ජොබ් කට්ටක් පටන් අරන් හිටියේ. මම නුවන්ට කීව කෙල්ලට වෙන කොල්ලෙක් ඉන්නවා. ඒකයි කේස් එක. උඹ වෙන අතක් බලා ගනින් කියල. නුවන් දුකින් ඔලුව පහත් කරගෙන යන්න ගියා.

මේක තමයි ලිව්ව කවිය. දැන් බලන කොට බොළඳයි වගේ. වචනත් ඔහේ ලිව්වට තාරකාත් එහෙම නැහැ වගේ. ....

ඈත දිදුලන නිම්  වළල්ලෙන් 
සීත  මිදුම් කඩ තුරාවෙන් 
වැසී  ගිය රන් වළා හුයෙකින්  
දිදුල දිදුලා  සිත් කැලුම් දෙන 
නීල උත්පල දිමුතු තරුවක් 
එපා කිසිදින ඔබ පතන්නට 
විරහ ජිවන වේදනාවන් 
එහි රැඳී ඇත 
එහි රැඳී ඇත !

(ප.ලි.  මගේ අක්ක කියන විධිහට මේක ලියා  තිබුන මගේ මේ කවි පොත තියාගෙන ඉඳල තියෙන්නේ ඒ ළමය. ඒ ගොල්ලෝ ගෙවල් ඇරලා යනකොට ඒක  දීල ගිහිල්ල. (මං එතකොට වෙන රටක) ඒ ළමය හිතාගෙන ඉඳලා  තියෙන්නේ මං ගැනලු. කාටද ඉතින්  ඕව තේරෙන්නේ ඒ කාලේ. පොත්  කියව කියව හිටිය පොත් ගුල්ලනේ.)

Friday 19 December 2014

අරිට්ටදාස කීවෙන්ඩුලා හා රතුපුටින්ස්ලා

 සාමාන්‍යයෙන් මම ඉතිහාස පොත් කියවන්න සෑහෙන්න කැමැතියිපුංචි  කාලේ ඉඳලම.
ඒ දවස් වල මතකද දන්නේ නැහැ විදියේ  බණ්ඩාර කියල චිත්‍ර කතා පොතක් තිබුන. (සඳ කුමරිය, පරංගි හටන වගේ ඒවත් එක්කම) මම හරි ආස  කතා වක්. හැබැයි විදියේ බණ්ඩාරට වඩා  මම කැමති වෙලා හිටියේ සිතාවක රාජසිංහ රජතුමාට.  ඒ දහම් පාසල් යන කාලේ, අනගාරික ධර්මපාල තුමාගේ පොත් කියවන කාලේ, පෘතුගීසින් ඇතුළු විජාතික බලවේග වලට එරෙහි කාලේ. දැන්නම් එරෙහිවන බලවේග මොනවද කියලවත් හිතා  ගන්න බැරි තරම් සංකීර්ණයි. දැන් විජාතික බලවේග කිව්වහම හිතට එන්නේ එතනෝල් විජාතික බලවේගය, හෙරොයින් විජාතික බලවේගය, චීන මහින්ද ණය විජාතික බලවේගය, ඉන්දියන් චන්ද්‍රිකා විජාතික බලවේගය, ඇමෙරිකන් රනිල් විජාතික බලවේගය, අතුරලියේ විජාතික බලවේගය, ඕස්ට්‍රේලියන් ගුණරත්නම් විජාතික බලවේගය, ටිල්වින් චීන බලවේගය වගේ. මේ යන රුපවාහිනී කතා වල හැටියට, හරි සමහර පත්තර වල කියන හැටියට අතුරලිය තියෙන්නේ ලංකාවේද කියලත් ෂුවර් නැහැ දැන්නම්.

ඉතින් අපි ඉතිහාසයට පොඩ්ඩක් හැරිලා බැලුවොත් ලංකාවේ රජවරුන් හරිම අමුතු ජාතියක් තමා. හත් වන විජයබාහු රජතුමා පුත් කුමාරයන් තුන්දෙනාව  මරන්න හැදුව. ඔවුන් බේරිලා පස්සේ පිය රජුට එරෙහිව කැරලි  ගැහුවා. හත්වන විජයබාහුව මැරුව  කියන්නේ විදේශිකයකු ලවා (විජයබා කොල්ලය) . කුමරුන් තිදෙනා රාජ්‍යය 3ට බෙදා ගත්ත. හත්වන බුවෙනකබාහු කෝට්ටේ රාජධානියත්, මායාදුන්නේ (1501-1581) සීතාවක රාජධානියත් , මහා රයිගම් බණ්ඩාර රයිගම් රාජධානියත් වශයෙන්. උදාහරණයක් වශයෙන් කෝට්ටේ රාජධානිය පාලනය කල බුවනෙකබාහු රජතුමා ගමුකො. එයාගේ ආරක්ෂාව භාර කරලා තිබ්බේ පෘතුගීසින්ට. මොකද ඒ රජා තමන්ගේ මල්ලි රජා වන මායදුන්නේට භයයි. මායාදුන්නේ තමා විජයබා කොල්ලයේ හෙවත් කැරැල්ලේ මහා මොළකරු . මායා දුන්නේට කොහොමටත් ඕනෑකම තිබ්බේ බුවනකෙබාහුවත් යටත් කරගෙන මුළු ලංකාවේම රජු වෙන්න. බුවෙනකබාහුව මැරුවේ මාලිගාවේ සඳලුතලේ ඉන්දෙද්දී පෘතුගිසි තුවක්කුකරුවකු විසින්. පස්සේ ඔහුගේ පුතා දොන් ජුවන් ධර්මපාල  පෘතුගිසි රැකවරණ යටතේ තමා  රාජ්‍යය කලේ දෙවියන් කෙරෙහි විශ්වාසය තබමින්.

එතකොට කන්ද උඩරට රජ කලේ ජයවීර රජු. යාපනයේ හා වන්නිය ස්වයං පාලන ඒකක දෙකක් තිබ්බ. යාපනයේ රජු කෝට්ටේ රාජධානියට බදු ගෙවූ අතර වන්නියේ රජු කන්ද උඩරටට ගෙව්වා. නැගෙනහිර දිස්ත්‍රික්කය පාලනය කලේ කන්ද උඩරටින්. දැන් ඇත්තටම මේ රජ ගොල්ල එකතු වෙලා රාජ සමුහාණ්ඩුවක් හදල අර ලිච්චවි රජුන් වගේ රට පාලනය කලා නම් මොකද? යාපනයටත් බදු ගෙවන්න කියල ස්වයං පාලනයක් තබාගෙන. කට්ටියටම එකතු වෙලා පෘතුගීසින්ට දුවන්න දෙන්න තිබුන. නමුත් උනේ වෙන දෙයක්. කෝට්ටේ රාජධානිය පෘතුගීසින් ගෙන් උදව් අරගත්ත සීතාවක රජුට විරුද්ධව. සීතාවක රජු හැම වෙලේම යුද්ධ කලා කන්ද උඩරටයි කෝට්ටෙයි එක්ක.

මායාදුන්නේ රජුගේ පුතා ටිකිරි බණ්ඩාර (වයස අවුරුදු 12 දී) , විදිය බණ්ඩාර මෙහෙයවූ කෝට්ටේ හමුදාවට පහරදී යටත් කලා අලුත්නුවරදී . (අලකේශ්වර යුද්ධය) මායාදුන්නේ මියගියාට පසුව ටිකිරි බණ්ඩාර පලමුවන රාජසිංහ  නමින් රජවුණා. ඔහු තම පියරජු මැරුවා කියා කියන නමුත් එයට සාක්ෂි නැහැ. ලංකාව එක්සේසත් කරන්නටත් පෘතුගීසින්ට විරුද්ධවත් සටන් කළ  සීතාවක රාජසිංහ රජතුමා වඩා  ප්‍රසිද්ධ මුල්ලේරියවේ කළ සටන සහ කොළඹ කොටුව වැටලීම පිලිබඳ. "කොළඹ කොටුවේ බළල් මසුත් ගිනි ගණන් ගියා වුනා  " කියල සින්දු කෑල්ලකුත් තියෙන්නේ. පසුව පෘතුගීසින් යවපු කොන්නප්පු බණ්ඩාර උඩරට කලබල ඇති කරපු නිසා සීතාවකට පසු බැස්ස රාජසිංහ වික්‍රමසිංහ මුදලිට දෝෂාරෝපණය කරලා තිබෙනවා. කොහොමහරි අසනීප ව සිටි මෙම හොඳ  සෙනෙවියා කවුරුන් හරි වසදීම නිසා මැරුන.
මෙන්න මේ වෙලාවේ තමා  සොලී රටේ ඉඳන්  අරිට්ට කීවෙන්ඩු පෙරුමාල් කියන සන්නසියා තව හතර දෙනෙකු සමග ලංකාවට ගොඩ බැස්සේ. මේ යුද සටනේ දක්ෂයෙක් කියන සොලී ජාතික සන්‍නාසියාට මාන්නප්පෙරුම මොහොට්ටි කියන තනතුර ලබා දෙන රාජසිංහ රජතුමා තමන්ගේ අන්තඃපුර යුවතියකුත්  (රාජහෙට්ටිගේ දෝනියන්දෑ ) බාර  දෙනවා. මේ අරිට්ට කීවෙන්ඩු තම රජතුමාගේ සිත දින ගන්නවා ඊට පස්සේ. මේ කාලේදී තම රජතුමා බුද්ධාගම අත්හැරලා හින්දු දෙවිවරු අදහන්න පටන් ගන්නේ. මෙහෙම කරන්නේ අරිට්ට කීවෙන්ඩු  නිසා කියලයි කියන්නේ. බාර  හාර, බලි යාග  එහෙමත් කලාලු.
රාජසිංහ රජු කන්ද උඩරට රාජධානිය අල්ලන්න ගියත් කොනප්පු බණ්ඩාරට පැරදෙනවා. ඉන්පසු පෙතන්ගොඩට පසු බැස  විවේක ගන්නකොට කටුවක් ඇණිල ඔත්පලව මිය යනවා. අර කවියකුත් තියෙන්නේ.
"රුදුරු පෙතන්ගොඩ උයනට වැඩියාය
නපුරු උණ  කටුව පතුලේ ඇනුණාය
ඉන්න සිටි සැවොම මතුලාය
රාජසිංහ දෙවි නා මෙත් මැකුණාය "

පස්සේ ආපු අරිට්ට කීවෙන්ඩු  ලොකු වුන එකත් ඔහුගේ කීම පිට බහුතරයේ ආගම අත හැරීමත් නිසා රාජසිංහ රජු තමන්ගේම නිලධාරීන් හා නෑදෑයින් අතරේ වෛරයට ලක්වූ නිසාත්  තමා  "ඉන්න සිටි සැවොම මතුලාය " කියා කියන්නේ මේ කවියේ.රජු මැරුනේ 1514 කියන සක වර්ෂයේ කියල රාජාවලියේ සඳහන් වෙන්නේ.
අරිට්ට කීවෙන්ඩු කියන්නෙත්  මාර චරිතයක්. රාජසිංහ මැරුනහම දොන් ජුවන් ධර්මපාල පෘතුගීසි හමුදාවක් යවනවා සීතාවකට. අරිට්ට කීවෙන්ඩු හෙවත් මාන්නප්පෙරුම මොහොට්ටි මීගමුවේදී මේ පෘතුගීසි සේනාව පරදවනව. සීතාවක මිනිස්සු සන්නාසිය කියා ගරහන නිසාය කියා පසුව දොන් ජුවන් ධර්මපාලට එකතු වෙනවා මේ මාන්නපෙරුම මොහොට්ටියා  හෙවත් අරිට්ට කීවෙන්ඩු  පෙරුමාල්. නමුත් ඇත්ත හේතුව නම් වඩා බලය ඇති තැනට පනිනවා පෙරුමාලයා. පසුව ජයවීර බණ්ඩාර නමින් ඔහු ධර්මපාලට සේවය කරනවා. ජයවීර බණ්ඩාර පෘතුගීසීන්ගේ උදව්වෙන් ගුරුබෑවිල සටනේදී සීතාවක හමුදා පරාජය  කරලා සිතාවක අල්ල ගන්නවා ධර්මපාල වෙනුවෙන්. රාජ්‍යය දෙන්න කුමාරයෙක් නැතුව මැරෙන ධර්මපාල නිසා පහතරට රාජ්‍යය පෘතුගාල රජුට අයිති වෙනවා.
මේ අතරේ දෙවනගල තෙරුන්නනස්සේ ප්‍රමුඛ වෙලා  කොන්නප්පු බණ්ඩාර පළවන  විමලධර්මසූරිය නමින් රජකමට පත්කරනවා. ඔහුට පසු  උඩරට රජවුනු  දෙවන රාජසිංහ පස්සේ ඉඟුරු දීලා  මිරිස් ගන්නවා.

රස්පුටින් රුසියානු සාර්  රජ පවුලට හේත්තු වෙලා එක එක මන්ත්‍ර ගුරුකම් වලින් රැජින අල්ලාගෙන , පවුලේ කුමාරිකාවන් හා අනිත් සේවිකාවන් වසඟයට ගෙන කාමභෝගී ජිවිතයක් ගත කරනවා. මිනිස්සු දුක් විඳිද්දී උන්ට පෙනුනේ සාර්  පවුල පාලනය කරන්නේ මන්ත්‍රකාරයෙක් කියලා. අර පළමුවන ආලවන්ත දාස ගෙයි බාබු මහත්තැන් ගෙයි පයුරු පාසානය වත් අඩුම ගානේ  ඒ කාලේ  පාරේ යන්න එපා කියලවත් සේනා  පියා  රතුපුටින්ස් කිව්වද? ඉතින් අමනදාස කීවෙන්ඩුලා රතුවපූටින්ස් ලා හැමකාලේම පහලවෙනවා මිනිස්සුන්ව බොරුවෙන් රවට්ටලා තිරුපති දේශවලට යවල තමන්ගේ මඩිය තර කරගන්න. දන්න බුද්ධාගම අදහගෙන ඉන්නේ නැතුව අපේ මිනිස්සු දෙය්යෝ අදහන්න ගියාම කෙළවෙන්නේ කාටද කියල දන්නේ වැඩේ වුනාට පස්සේ.

මුලාශ්‍ර: රාජාවලිය - ගුණසේකර බ .
විකිපෙඩියා http://en.wikipedia.org/wiki/Rajasinha_I_of_Sitawaka

- අජිත් ධර්මකීර්ති 

Thursday 11 December 2014

විශ්වයේ දුර මැනීම හා සාක්ෂි සොයා ගැනීම

ඔරායන් නෙබුලාව - විකිපෙඩියා වෙන් හබල් දුරේක්ෂයෙන් ගත්  එකක් 

විශ්වයේ දුර මැනීම හා සාක්ෂි සොයා ගැනීම  

මම පසුගිය ලිපියෙන් මන්දාකිනි හා අප අතර දුර මැනීමට දුරේක්ෂයන් භාවිතා කරමින් හබල් විසින් ඉදිරිපත් කල නියමය සාකච්චා කලා. දැන් දුරේක්ෂ වලින් නිරීක්ෂණය කර ලබා ගත්  ආලෝක වගු  ඇසුරින් මේ දුර මනින්නේ කෙලෙසද කියා බලමු.
පහත ඇත්තේ හයිඩ්‍රජන් ලාම්පුවක්  (පින්තුරය 1).  හයිඩ්‍රජන් වායුවේ වර්ණාවලිය එයටම ආවේනික වුවක්. එය ඊළඟ පින්තුරයේ දැක්වෙනවා. එක්තරා නිශ්චිත තරංග ආයාමයක්  එයට තිබෙනවා. මෙහි දෙවන පින්තුරයේ නැනෝ මීටර 656 රතු  ලකුණ (රතු ඉර) බලන්න.   මේ හයිඩ්‍රජන් වර්ණාවලිය අපට ලබාගන්න පුළුවන් පර්යේෂණාගාරයකදී එම තත්වයන් තුල. (in Laboratory conditions).

පින්තුරය 1

පින්තුරය 2
















මේ තුන්වන පින්තුරයෙන් පෙන්වන්නේ ඔරායන් නෙබුලාවයි. (nebula).  නෙබුලාවක් කියල කියන්නේ ඈත අභ්‍යවකාශයේ එක ගොණුවකට දිලිසෙන දුවිලි සහ වායු  වලාකුළු සමුහයක්. මේවායේ අලුත් තාරකා  පවා නිර්මාණය වෙනවා.. ඔරායන් නෙබුලාව කියල කියන්නේ අපේ චක්‍රාවාටයේ එවැනි තාරකා  සෑදෙන  අඩවියක්. ඉතින් මේ නෙබුලවල වැඩි හරියක් තියෙන්නේ හයිඩ්‍රජන්. ඔක්සිජන්නුත් යම් ප්‍රමාණයක් තිබෙනවා. දැන් බලමු මෙම ඔරායන් නෙබුලාවෙන් එන වර්ණාවලිය දිහා.
ඔරායන් නෙබුලාව 
හතරවන පින්තුරයේ පෙන්වන්නේ එයයි. හයිඩ්‍රජන් තිබෙන බව පෙන්වන නැනෝ මීටර 656 යේ රතු ඉරත් ඔක්සිජන් තිබෙන බව පෙන්වන කොළ පාට ඉරත් බලන්න.









පින්තුරය 4

දැන් අපි බලමු රක්ත විතැන් වීම (Red Shift රතු පාටේ වෙනස් වීම)  කියන්නේ මොකක්ද කියල. පහල පින්තුරය තවත් චක්‍රාවාටයක් වන UGC 12915. මෙය උප්සලා කියන අභ්‍යවකාශ වස්තු කැටලෝගයෙන් (නාමාවලිය) ගත්  එකක්. එහි උතුරු අර්ධගෝලයේ සිට පෙනෙන මෙවැනි මන්දාකිණි 12921 වගු ගත කර තිබෙනවා.  දැන් බලන්න එයින් ලැබෙන වර්ණාවලිය දිහා. (පින්තුරය 6) මෙය කලින් එක වගේම මන්දාකිණියක වර්ණාවලියක්. මෙම වර්ණාවලියේ  නැනෝ මීටර 656 යේ හයිඩ්‍රජන් ඉර එසේම තිබුනත් එය දකුණු පැත්තට ගිහින් (displaced) තිබෙන බව පේනවාද ? මෙයට කියන්නේ red shift කියල.
පින්තුරය 5 UGC 12915.


පින්තුරය 6
එතකොට මෙහි (මන්දාකිණියේ ) අපෙන් ඉවත්වී යන වේගයත් මැනලා  තිබෙනව. එය තත්පරයකට කිලෝමීටර 4350ක්. (Recession velocity: 4350 km/s). දැන් හබල්ගේ නියමය මෙතනට දැම්මහම අපට පුළුවන් දුර මැනගන්න.  (හබලයාගේ නියමය) .
අපි තව දුරටත් බලමු මේ ප්‍රසාරණය වන විශ්වය ගැන තියෙන සාක්ෂි. පින්තුර වලින් මේක පැහැදිලි කරන එක ලේසි නිසා ගොඩක් පින්තුර මේකේ දානවා. චක්‍රාවාටය ඈතට යන්න යන්න red shift එක එහෙම නැත්නම් වර්ණාවලියේ හයිඩ්‍රජන් ලකුණ රතු පැත්තට යනවා වැඩිය. UGC 12508 මන්දාකිනිය තත්පරයට කිලෝමීටර 9100 ක වේගයෙන්  අපෙන් ඉවතට යන එකක්. එහි වර්ණාවලියේ  red shift එක බල ඉහත එක එක්ක සසඳන්න. රතු ලකුණ තව දකුණට ගොස් ඇත.
පින්තුරය 7 UGC 12508 මන්දාකිණිය 



















පින්තුරය 8 තරංග ආයාමය තව දකුණට 

දැන් මෙහිදී තේරෙනවා ඇති මේ red ශිෆ්ට් එක වෙන්නේ  අවකාශය (space)  ප්‍රසාරණය වීම නිසා කියල. red shift එක වැඩි වෙන තරමට චක්‍රාවාටය ඉවත් වී යන වේගය (receding) වැඩියි. 
අවසන් වශයෙන් මේ පින්තුර දෙකත් බලන්න. පින්තුරය 9 යේ තිබෙන්නේ KUG 1217 කියන චක්‍රාවාටය.
මෙහි වේගය ඉතාම වැඩියි. තත්පරයට කිලෝමීටර 31400ක් (Recession velocity: 31,400 km/s).
මෙය තිබෙන්නේ ursa Major හෙවත් මහා වලහ කියන තාරකා මණ්ඩලයේ. KUG කියල කියන්නේ Kiso Ultraviolet Galaxies කියන එක.
පින්තුරය 9 kug 1217

පින්තුරය 10 red ශිෆ්ට් තවත් එහාට 
දහවන පින්තුරයේ හයිඩ්‍රජන් 656 ලයින් එක redshifted එහෙම නැත්නම් ඉතාමත් රතු පැත්තට ගිහින්. ඒ කියන්නේ infrared අධෝරක්ත කිරණ පෙන්වන හරියටම ගිහින්. එයින් පෙනෙන්නේ ඉතාමත් සීග්‍රයෙන් අපෙන් ඉවත් වී යන බව. 

අන්තිමට මම මේ පින්තුරය පල කරනවා. "මන්දාකිණියෙන් ඔබ්බට" බ්ලොගයේත් මේ පින්තුරය තිබුන. විශ්වය ප්‍රසාරණය  වීමේ සාක්ෂි අපට තිබෙන නිසා දැන් මෙය වඩාත් අදාලයි. විශ්වය බැලුමක් ප්‍රසාරණය වෙනවා වගේ ප්‍රසාරණය වෙන්නේ කියන අදහස තමා  එන්නේ.


කලින් ලියු ලිපිවල ලින්ක් පහත ඇත:
බිග් බැන් BigBang හෙවත් මහා පිපිරුමට නම ලැබුන හැටි

බිග් බැන් (Big Bang ) තහවුරු කල CMB

නිව්ටන් හා අයින්ස්ටයින් බිග් බැන් මොඩලයට  මග පෑදුවේද?

අවකාශ-කාලය යනු කුමක්ද හා අයින්ස්ටයින් ගේ ගණන් 

හබලයාගේ නියමය

මුලාශ්‍ර හා පින්තුර : නාසා වෙබ් අඩවියෙනි.

- අජිත් ධර්මකීර්ති 

Wednesday 10 December 2014

කොන්ඩෝම් පාලනය

මේ දවස් වල සෑහෙන්න වැඩ අධික නිසා දාන්න හිතන් ඉන්න පොස්ට් ටික ඔක්කොම හිර වෙලා. නමුත්  කොන්සේර්වටිව්  රජය ගැන කියන්න මේ ලෝගෝ එක මීට සෑහෙන කාලෙකට කලින් කාර්යාලයේ වැඩ කරන සගයකු (ඉංග්‍රීසි ජාතිකයකු) එවුවක්, ලෝකේ බොහොමයක් ආණ්ඩුවලට ගැලපෙනවා කියල හිතුන නිසා පොස්ට් කරන්න හිතුන.

මේකේ කියන්නේ මෙහෙම අදහසක්. 
"අද ආණ්ඩුව නිවේදනය කලා ආණ්ඩුවේ ලෝගෝ එක එහෙම නැත්නම් රාජ්‍ය ලාංචනය වෙනස් කරනවා කියල කොන්ඩෝම් පින්තුරයකට. ආණ්ඩුවේ ප්‍රතිපත්ති හා දේශපාලන ස්ථාවරය හොඳින් නිරුපනය වන්නේ ඒකෙන් කියල.
කොන්ඩෝම් එකක් උද්ධමනයට එරෙහිව ඉදිරිපත් වෙනවා, නිෂ්පාදනය නවත්වනවා, ඊළඟ පරම්පරාව විනාශ කරලා දානවා, මොලේ නැති හොරු   ටික ආරක්ෂා කරනවා,   ඔවුන් ඔබට ඇත්තටම කෙළවන මුත් ඔබට දැනෙන්නේ  ඔවුන් ඔබට ආරක්ෂාව ලබා දෙනවා යයි හැඟීමකි. 

- ආණ්ඩුව පිලිබඳ මිට වඩා හොඳ ලාංචනයක් තිබේද ?
එංගලන්තේ මෙහෙම වුනාට වෙන රටවල මෙහෙම වෙන්නේ නැත. - සුනිල් පෙරේරා 



(ප.ලි: pricks යනු slang එකකි. එය පුරුෂ ලිංගය සම්බන්ධ කර මොලේ නැති විධිහට වැඩ කරන පිරිමියා යන අරුත දෙයි)

Tuesday 2 December 2014

යුගොස්ලාවියාවට බැඳී පෙමට ඉකි බින්ද යුවතියන්

යුගෝස්ලාවියාවේ අර්ථ ක්‍රමය  ගැන  හෙම දන්නවද කියල අහපු කොමෙන්ටුවක් තිබුනා. එතකොට මට මතක් වුනේ මා අනූ ගණන්වල දැන  සිටි ළාබාල යුගොස්ලාවියන් තරුණියන් තිදෙනෙකු  ගැන. මම අනූ ගණන්වල කාමර එකසිය ගාණක් තිබුන ලන්ඩනයේ  හෝටලයක කළමණාකාර තනතුරක වැඩ කලා.  මුලදී ඒක  සංචාරක හෝටලයක් වුනත් පස්සේ පස්සේ දේශපාලන (හෝ ආර්ථික) අනාථයන් වයි   අර ගත්තේ. මේකට හේතුව සංචාරකයන් ගන්න නොයකුත් දැන්වීම් දාන්න ඕනේ. ඒජන්සි වලට ගෙවන්න ඕනේ. නමුත් අනාථයන්ගේ කාමර කුලිය ආණ්ඩුවෙන් ගෙවනවා. අනික බ්‍රිතාන්‍යයේ රැඳී සිටීමේ වීසා ලබනකන් අනාථභාවය ඉල්ලපු අයට ඉන්න වෙනවා  ටිකක් දිග කාලයක් හෝටලයේ නැවතිලා. ඉතින් මේක හෝටලයට ස්ථිර ආදායමක්.
අර යුවතියන් තුන් දෙනාත් එකටම හිටපු නිසා මම එකම කාමරයකට දැම්මා. තුන් දෙනාම හරිම ලස්සනයි. මාත්  එක්කත් හොඳට කතා බස් කරනවා දැක්ක තැන. ඔය තුන්දෙනාට හෝටලේ ඇතුලෙත් පිටතත් කොල්ලොත් හරියට බැලුම් හෙලනවා. වැඩිපුරම බොස්නියා වල මුස්ලිම් කට්ටිය තමා  හිටියේ. ඒ දවස් වල ජාතිවාදී සර්බියානුවන්,  බොස්නියන් හා ක්‍රෝශියන්  වරු සමග යුද වැදුණු කාලය මේ.

ඔන්න එක දවසක් හෙන රණ්ඩුවක් එළියේ. හෝටලේ සිකියුරිටි හිටිය ඊජිප්තු ජාතිකයා මට ඇවිත් කිව්වා අර ගෑනු ළමයින්ට ප්‍රශ්නයක් ඇතිවෙලා කියල. එළියේ පුංචි යුද්ධයක් වගේ. අර තරුණියන් සමග හිතවත්ව හිටි ඉංග්‍රීසි ජාතික තරුණයන්ට හෝටලේම බොස්නියන් කොල්ලෝ කට්ටියක්  ගහන්න හදනවා.
මම මැදිහත්වෙලා පොලිසියට කතා කරනවා, උන්ව හෝටලෙන්  එලියට දානවා හෙම කියල තර්ජනය කරලා ඉංග්‍රීසි තරුණයන්ව බේරලා යැව්වා.  මම කෙල්ලන්ගෙන්  ඇහුව මොකද වුනේ කියලා. බොස්නියන් මුස්ලිම් කොල්ලෝ තර්ජනය කලාලු උන්ගේ කෙල්ලෝ එක්ක යාලු වෙන්න එන්න එපා හෙම කියල. සර්බියන් කෙල්ල මැදිහත් වුනහම එයටත් තර්ජනය කරලා අපේ කෙල්ලව නරක්  කරන්නේ උඹ තමා  කියල.  පස්සේ මම බොස්නියන් කොල්ලන්ට පොඩි තර්ජනයක් දැම්මා උඹලගේ රටේ ජාතිවාදය මෙතනට අරන් එන්න එපා කියල.  මෙතැනදී මම ඇහුව ඒගොල්ල  මොන රටවලින්ද කියල. එතකොට දැන ගන්නට ලැබුනේ එක තරුණියක් සර්බියාවේ ක්‍රිස්ටියන් ඔර්තොදොක්ස් ආගමේ (අද්රියානා කියමු නම). දෙවැනි යුවතිය බොස්නියාවේ මුස්ලිම් යුවතියක් (අයිඩා කියමු නම). තුන් වැන්නිය ක්‍රෝෂියාවේ කතෝලික යුවතියක්, වෙරේනා කියමුකෝ නම . මට එක පාරටම ඇහුනා,  උඹල මරාගන්න ඕනේ එවුන් එක කාමරේ ඉන්න කොහොමද කියල. මුස්ලිම් තරුණිය අඬන්න පටන් ගත්ත. ක්‍රෝෂියන් කෙල්ල වෙරේනා ගේ  ඇස් වලත් කඳුළු. ඇය කාමරයට දුව ගියා මොනවාද අරන් එන්න. සර්බියන් කෙල්ල අද්රියානා ත්  ඇස් වල කඳුළු පුරෝගෙන හෝටලේ කුස්සියට ගිහින් තේ හදා ගෙන ආවා ඔක්කොටම බොන්න.  වෙරේනා ඇල්බම් පොදියක් අරන් ආව.
ඇල්බම් වල තිබ්බේ තුන්දෙනාම සරාජිවෝ වල විශ්ව විද්‍යාලේ ඉගෙන ගත්ත හැටි. බොස්නියන් මුස්ලිම් අයිඩා ගේ ගෙදර වත්තේ තේ බිව හැටි. කට්ටිය සයිකල් සවාරි ගිය හැකි. මේවා දැකල මම ඔවුන් ගෙන් ඇහුව යුගෝස්ලාවියාවේ ජීවිතය ගැන. ඔවුන් හැමෝටම හොඳ  ගෙවල් තිබුන (පින්තුර වල හැටියට).  ඒවායේ තත්වය බටහිර යුරෝපියානු තත්වයටම වගේ උසස්. වාහන තිබුන හැම ගෙදරකම. නමුත් වාහන හොඳ ජපන් වාහන නෙමේ. ඉතාම ටිකක් ජර්මන් වාහන හා ඉතාලියානු වාහන තිබුන.  වැදගත්ම දේ තමා 1990 ගණන්වල
යුගෝස්ලාවියාව බෙදී එකිනෙකා  අතර යුද වැදීමට කලින් ඔවුන් හොඳ ජිවිතයක් ගත කල බව.

1970 දශකය අවසන් වනතුරු යුගෝස්ලාවියාවේ තිබ්බේ හොඳ කාලයක්. ලංකාවේ 70-77 ආණ්ඩුවත් ටිකක් මිශ්‍ර ආර්ථික ක්‍රමයක් හදන්න හැදුවත්  වංචා දුෂණ නිසා හරි ගියේ නැහැ. අනික පෝලිම් යුගය මතකනේ. සෝවියට් දේශයේ බලපෑමෙන් යුගෝස්ලාවියාව ඉවත්වී හිටියත් එහි කොමියුනිස්ට් පක්ෂයක් තිබුන.ජෝසප්  ටිටෝ තමයි ඒකාධිපති පාලකයෙක් වගේ හිටියේ. නමුත් ඔහු දැඩි පාලකයෙක්ම නොවෙයි. ඔහුගේ වඩාත් හොඳම අත්හදා බැලීම තමා ආශ්‍රිත ශ්‍රමය නමැති ක්‍රමය. (партнер труда හෙවත් පර්ත්නොයිර් ත්රුදා ) මෙහිදී කලේ කම්හලක වැඩ කරන කම්කරුවන්ට සහ ඉහල නිලධාරීන්ටත් ඉන්ජිනේරුවන්ටත් එහි කොටස් අයිතිය පැවරීම. වැඩියෙන් වැඩ කරන කට්ටියට වැඩියෙන් කොටස් ලැබෙනවා. අද්රියානා ගේ තාත්තත් ඉංජිනේරුවෙක්. ඔහුටත් තමන්ගේ කම්හලේ කොටස් අයිතිව තිබුන. අනිත් දෙදෙනාගේම මව් පියන් ගුරුවරු. ඔවුන්ගේ වැටුප එතරම් ඉහල නොවුනත් ඉන්ජිනේරුවෙකුගේ හෝ දොස්තර කෙනෙකුගේ වැටුපට වඩා වැඩි වෙනසක් තිබුනේ නැහැ.  මේ තත්වය මත ඔවුන් ජිවන තත්වය ඉහල මට්ටමක තිබුන.

ගොවියන්ගේ තත්වය වුනේත් මිශ්‍ර ක්‍රමයකට වගා කටයුතු කිරීම. එනම් සුළු ගොවීන්ට තමන්ගේ වගා  කිරීම කරගෙන යන්නට ඉඩ තිබු අතර තමන්ගේ කැමැත්තෙන් රජයේ ගොවිපලවලට එකතු වීමට ඉඩ කඩ තිබුනා. ඊට අමතරව පෞද්ගලික පොළක්  නොහොත් සුළු ගොවීන්ට හෝ තමන්ගේ ගෙදර වත්තේ බව බෝග හදන අයට පවා විකුණ  ගන්න හැම නගරයකම වගේ පොළක් තිබුන. හැබැයි තමන්ම තමා විකුනන්න ඕනේ.

මීට  අමතරව  ඕනෑම කෙනෙකුට සුළු ව්‍යාපාර අරඹන්න පුළුවන්. තමන් සමාජයට,  කම්හලකට හෝ ගොවිපලකට අවශ්‍ය දෙයක් නිෂ්පාදනය කරන්න දන්නවා නම් සුළු ව්‍යාපාරයක් , සුළු කර්මාන්තයක් අරඹන්න පුළුවන්. ඒ සඳහා හතර දෙනෙක් වෙනකම් වැඩට ගන්න පුවන්. හුඟක් වෙලාවට හතර දෙනාම යහළුවෝ හෝ අසල්වාසීන්. ඔවුන් සමග කතා කරලා ලාභය ශ්‍රමයට සරිලන පරිදි බෙදා ගන්න ඕනේ. ව්‍යාපාරය පටන් ගත්  කෙනාට තමයි වැඩි පඩිය ලැබෙන්නේ.  එයටම බදු ක්‍රමයත් වෙනස් ලෙස හරි ගස්සල තිබුන.
ටිටෝ ගේ මරණය සිදුවුනේ 1980දී.  ෆෙඩරල් යුගෝස්ලාවියාව කොන්ෆෙදරේෂණයක් විය යුතුයි කියන අදහස ආවේ මේ කාලේ. සමුහාණ්ඩුවේ රටවල් (republics) වල (සර්බියාව, මොන්ටෙනෙග්‍රෝ , ස්ලවේනියාව,  බොස්නියා සහ හර්සගොවිනාව , ක්‍රෝෂියාව, මැසිඩෝනියාව) නායකයෝ එකිනෙකා  අවුරුද්ද බැගින් නායකත්ව මණ්ඩලයට පත් වුනා. නමුත් මේ කාලේදී යුගෝස්ලාවියාව ඩොලර් මිලියන් 16,000 පමණ ණයවී තිබුනා . වැඩියෙන්ම මුදල් ආවේ ජාත්‍යන්තර මුල්‍ය අරමුදලෙන්. මුලදී ණය  මුදල් ලැබුනේ යුරෝපයේ නිපදවන සුඛෝපභෝගී බඩු  ගන්න. එනම් බෙන්ස්, BMW වගේ වාහන ජර්මනියෙන්, ප්‍රංශයෙන් සුවඳ විලවුන් හා ඉහල පන්නයේ නිමි ඇඳුම් ඉතාලියෙන්, මෙන්න මේ වගේ. මිට අමතරව බ්‍රිතාන්‍ය, ඇමෙරිකාව , ජපානය වැනි රටවලින් යුගොස්ලවියානු කම්හල් දියුණු කිරීමට අවශ්‍ය උපකරණ අමතර කොටස්.  නමුත් පසුව ණය ලැබුනේ ජාත්‍යන්තර මුල්‍ය අරමුදලේ කොන්දේසි සහිතව. ආශ්‍රිත ශ්‍රමය නමැති ක්‍රමය නැති කිරීම,
ව්‍යාපාර වලට තමන්ට අවශ්‍ය සංඛ්‍යාවක්  බඳවා ගැනීමට ඉඩ දීම හා අයිතිකරු විසින් පඩි නඩි තීරණය කිරීම. රටේ ශ්‍රම අතිරික්තයක් ඇති කිරීම. ඒ කියන්නේ ආණ්ඩුවේ "වැඩි" සේවකයන් අස්  කිරීම වැනි කොන්දේසින්.

 මෙහිදී (මේ නිසාමත්)  80 මැද හරිය වනවිට ලක්ෂ අටක පමණ රැකියා විරහිතයන්  සංඛ්‍යාවක් බිහිවී තිබුනා. මෙතැනදී ජර්මනිය ප්‍රමුඛ යුරෝපා සංගමය යුගොස්ලාවියානු  රටවල් වලට වෙන  වෙනම බලපෑම් කලා යුරෝපා සංගමයට එකතු වෙන ලෙස. හිට්ලර්ගේ නාසි යුද සමයේ (දෙවන ලෝක යුද්ධය )  නාසින්ට වැඩිපුරම උදව් කලේ ක්‍රෝෂියන් වරු හා බොස්නියන් වරු (තුර්කින් සමග). ඔවුන් නැවත හිස ඔසවන්නට වුනා . ජර්මනියේ දඬුවම් නොලබා බේරුණු නාසිවාදීන් හා ව්‍යාපාර මේ සඳහා සක්‍රිය දායකත්වයක් දැරුවා  කියා කියනවා. කෙසේ හෝ 1980 අග භාගය වනවිට තම තමන් පාලනය කල කොමියුනිස්ට් පක්ෂ මාර්ගයෙන්ම මෙම රටවල් ස්වයං නිර්ණන අයිතිය ක්‍රියාත්මක කරවීමට ඉල්ලුවා. ප්‍රශ්නයක් නැතුවම ඉවත්වන්නට පුළුවන් වුනේ මොන්ටෙනේග්රෝවට හා ස්ලවේනියාවට පමණයි. ඊට හේතුව මේ රටවල සිටි ජාතිය,  සජාතීය (හෙවත් homogeneous හෝ සමජාතීය)  වීමයි. ස්ලවේනියන්වරු හා  ස්ලාව් වරුන් වන සර්බියන් වරුන් හා  වැඩි වෙනෙසක් නැති ජාතියක් වුන අතර මොන්ටෙනෙග්‍රෝ වරුන්ගේ රටේ සිටියේද ඔවුන් පමණයි. (හන්ගේරියන් වරුන් ඉතාමත් සුළුතරයක් සහිතව). එනිසා මේ සජාතීය  රටවලට වෙන්වීම ප්‍රශ්නයක් වුනේ නැහැ . නමුත් සර්බියානුන් වැඩිපුර සිටි ක්‍රෝෂියාවේ සහ බොස්නියා - හර්ට්සගොවේනියාවේ වල සර්බ වරු සුළු ජාතියක් වන්නට කැමති වුනේ නැහැ. මේවා multicultural හෙවත් බහු සංස්කෘතික රටවල්. මෙහි ක්‍රෝෂියන්  වරු හා බොස්නියක් ලා සර්බියන් වරුන් දෙවන ලෝක යුද්ධයෙන් පසු පදිංචි වුනු ආක්‍රමණිකයන් යයි කියා (මෙහිදී  සර්බවරුන් ප්‍රමුඛව නාසිවාදයෙන් රටවල් ගලවා  ගත්  බව ඉතා පහසුවෙන් අමතක කරමින්)  ඔවුන් එලවන්නට හා මරා  දමන්නට, ගෙවල් ගිනි තියන්නට පටන් ගත්තා. (සමජාතීය වීම සඳහා - අප දන්නා රටකත් මේ පිළිවෙතම මෙසේ එක්තරා සුළු ජාතික අවිගත් කණ්ඩායමක් මගින් ක්‍රියාත්මක කල අතර ඇතැම් වමේ පක්ෂ ස්වයං නිර්ණන  කතාවේදී මෙය වුවමනාවෙන්ම කතා කිරීමෙන් මග හරිති.)
ක්‍රෝෂියාවේ  සර්බවරුන් හා මුස්ලිම් වරුන්ට එරෙහිවත් බොස්නියාවේ සර්බියන්, මුස්ලිම් බොස්නියන් හා ක්‍රෝෂියන්  වරු අතරත් සටන් පණ නැගුනා. අවාසනාවකට ජාතිවාදය තදින් ඇවිස්සු පක්ෂයක් සර්බියාවේ බලයට පත්වූ අතර ඔවුන් සර්බියන් වරු බේරා ගැනීමට  යයි කියා අර රටවල් ආක්‍රමණය කර මිනිසුන් බොහොමයක් මරා දැමුණ,  ම්ලේච්ච ජාතිවාදී යුද්ධයක් ක්‍රියාත්මක කලා. ඉන්පසු අමෙරිකා එක්සත් ජනපදය හා නැටෝව මැදිහත්වී සර්බියාවට බෝම්බ දමා තත්වය පාලනය කරමින් ඉතිරි රටවල් බෙදා දැමුවා.

අර තරුණියන් තිදෙනා එංගලන්තයේ සරණාධාර පතා  ආවේ එලෙසයි. අර සිද්ධියෙන් පසු ඔවුන් හැඬුවේ තමන්ට අහිමි වුනු, ඔවුන් ජාතින් වශයෙන් නොබෙදී සිටි ඒ සුන්දර අතීතය වෙනුවෙනුයි.

පසු වදන: ඉහත  පින්තුරයෙන් දැක්වෙන්නේ සර්බියන් පෙම්වතා හා ඔහුගේ ක්‍රෝෂියන් පෙම්වතිය සිප ගන්නා  ආකාරයයි. වැඩිහිටි ක්‍රෝෂියන් ජාතිවාදී කාන්තාවක් සර්බ පෙම්වතාගේ අත අල්ලාගෙන සිටින ක්‍රෝෂියන් පෙම්වතියට දෝෂාරෝපනය කරනවා. මෙය අසා පෙම්වතිය ඕනෑ කමින්ම හැමෝම ඉදිරිපිට පෙම්වතාව සිපගන්නවා.
http://www.huffingtonpost.com/2013/03/10/croatian-girl-kisses-serb_n_2839945.html
දැන් නැවතත් සර්බියන් හා ක්‍රෝෂියන් වරු සමගියෙන් සිටින බවක් පේනවා.ක්‍රෝෂියාව, ස්ලවේනියාව ස්වයං නිර්ණය ලැබීමෙන් පසු යුරෝපා සංගමයට එකතුවුණු අතර  ඔවුන් සර්බියාවට යුරෝපා සංගමයට ඇතුලත් වෙන්න උදව් කරනවා.

- අජිත්

Monday 24 November 2014

හබලයාගේ නියමය

හබලයාගේ නියමය -
මුලින් ගිය ලිපි පෙලේදී විශ්වය ප්‍රසාරණය වන බව පැහැදිලි කලා. එම ලිපි වලට සබැඳියන් මේ ලිපියේ පහත පළවේ. මිට අමතරව "මන්දාකිනියෙන් ඔබ්බට " බ්ලොගයෙන්ද හොඳ අවබෝධයක් ලබා ගන්න පුළුවන්.  මුලදී විශ්වය කියා සිතා සිටියේ ක්ෂිරපථය (milky way) තුල ඇති තාරකා  ගොන්න පමණයි.  විශ්වය ප්‍රසාරණය වන බව අයින්ස්ටයින්ගේ සාපේක්ෂතාවාදය තුලින් තහවුරු වුවත් ඔප්පු කරන්නට සාධක මතුවුයේ එඩ්වින් පවෙල්  හබල් (1889-1953)  විසින් කල නිරීක්ෂණයන් නිසයි.  ඔහු ඔප්පු කලා අපේ මන්දාකිණිය ට ඔබ්බෙන් තවත් චක්‍රාවාට විශාල සංඛ්‍යාවක් ඇති බව.
 ඔහු මේ සඳහා උපයෝගී කරගත්තේ කැලිෆෝර්නියාවේ පිහිටා  ඇති මවුන්ට් විල්සන් (විල්සන් කඳු මුදුනේ) ටෙලෙස්කෝපයයි.  මෙය අඟල් 100 ක විශ්කම්භයකින් යුත් එවකට තිබු බලවත්ම ටෙලස්කෝපයක්.

මෙහිදී හබල් ට මුණ ගැසෙන හාලොව් ශේප්ලි තමා අපි සිටින මන්දාකිණිය වන  ක්ෂිරපථයේ දුර මැන්නේ. ශේප්ලි මේ සඳහා උපයෝගී කරගත්තේ ආලෝකය විහිදවිම නිතර වෙනස් වන (විචල්‍ය) සේෆියෙඩ්  වේරියබල්ස් (Cepheid variables) නමැති දීප්තිමත් තාරකා  සමුහය. මේ තාරකා සමුහයෙන් විහිදුවන ආලෝකය වෙනස්විම නියතයක් කර එයට සාපේක්ෂව දුර මැනීමේ ක්‍රමය සොයා ගත්තේ හෙන්රියෙටා  ලේවිට් විසින්. ශේප්ලි ක්ෂිර පථය ආලෝක වර්ෂ 300 000 පළල යයි ගණන් බැලුව. එය එදා දැනසිටි ප්‍රමාණයට වඩා  බොහොම වැඩියි. නමුත් ඔහුත් සිතා  සිටියේ විශ්වයේ විශාලත්වය එපමණයි කියා. ශේප්ලි ඇදහුවේද ඈතින් පෙනෙන නෙබුලා දුවිලි හා ගෑස් වලාකුළු බවට. (ෆ්‍රෙඩ්රික් එංගල්ස් ලියු සොබාදහමේ දයලෙක්තිකය (1883) පොතේ  ඔහු සඳහන් කරන්නෙත් මන්දාකිනිය අපේ දුපත් විශ්වය බවත් ඉන් එහා පෙනේනේ නෙබුලා හෙවත්  දුවිලි වලාකුළු බවත්ය.)

සිතල රාත්‍රීන් වල තරු  බලමින් සිටි හබලයා 1923 ඔක්තෝබර් 23 ද දුටු දෙයින් කැළඹුනා. සාමාන්‍යයෙන් ආයු කාලය අවසන් වන තාරකා විශාල ආලෝකයක් විහිදුවමින් පිපිරෙන බවත් ඒවා නෝවා යන නමින් හඳුන්වන බවත් ඔබ දන්නවා ඇති. අන්ද්‍රෝමීඩා තාරක මණ්ඩලයට අයත් යයි සිතු  (constellation of Andromeda) M -31 නමැති නෙබුලාව තුල මේ නෝවා තාරකාව ඉතා ආලෝකමත්ව බැබලෙනවා ඔහු නිරීක්ෂණය කලා. නමුත් එහි පින්තුර නැවත නිරීක්ෂණය කිරීමෙන් හා වෙනත් තාරකා  විද්‍යාඥයන් ගත පින්තුර නිරීක්ෂණය කිරීමෙන් එය තවත් සේෆියෙඩ්  වේරියබල් හෙවත් සේෆියෙඩ්  විචල්‍යයක් බව ඔහු හඳුනා ගන්නවා. එහි දුර ශේප්ලි කල විධිහටම ගණනය කිරීමෙන් M-31 කියන නෙබුලාව ආලෝක වර්ෂ මිලියන ගනනක ඈතින් එනම් ක්ෂිර පථයට බොහෝ ඈතින් පිහිට ඇති බවත් එය නිකම් දුවිලි වලාකුලක් නොව තාරකා මිලියන ගානක් ඇති තවත් මන්දාකිණියක්  (චක්‍රවාටයක් ) බවත් ඔහු සොයා ගන්නවා. අප දන්නා විශ්වය අති මහත් විශාල බව හරියටම  සොයාගත්තේ එදයි.

ඔහු තවදුරටත් තමන් සොයාගන්නා තාරකා  හා නෙබුලාත්,  ඒවායේ ප්‍රවේගයන්  ඒවා වලින් නිකුත්වන  ආලෝක වර්ණාවලි (Spectra) වලින් ගණනය කරමිනුත් වගු ගත කලා. සොයාගත් හැම චක්‍රාවාටයක්ම ඒවායේ සිට පොලොවට තිබෙන දුර ප්‍රමාණයට සමානුපාතික වේගයකින් අපෙන් ඉවත්ව යන බව 1929 දී ඔහු සොයා ගත්තා.

මෙයට Hubble's Law හෙවත් හබල් නියමය කියා කියනවා.

මුලිකවම මන්දාකිණිය වඩා ඈතින් පිහිටන විට එය අපෙන් ඈත් වෙන චලනයේ වේගය වැඩි  වන බවක් පේනවා.
 හබලයාගේ නියමය:
චක්‍රාවාටයේ පෙනෙන වේගය = හබල් නියතය  X (වැඩි කිරීම )  චක්‍රාවාටයට  ඇති දුර
මේක ඕනනම් අනිත්  පැත්තට ලියන්නත් පුලුවන්.
 චක්‍රාවාටයට  ඇති දුර=චක්‍රාවාටයේ පෙනෙන වේගය/ හබල් නියතය (H0)
එතකොට  හබල් නියතය කියන්නේ වේගය චක්‍රා වාටයට ඇති දුරෙන් බෙදුවාම ලැබෙන නියතය (H0).
 මෙය මෙගා පර්සෙක් එකකට (චක්‍රාවාටයට ඇති දුර ) තත්පරයකට කිලෝ මීටර 72 ක්  පමණ වෙනවා. මේ අගය තව තත්පරයට කිලෝමීටර 8 ක් අඩු හෝ වැඩි විය හැකියි.
චක්‍රාවාටවලට ඇති දුරවල් අති විශාල නිසා මනින්නේ පර්සෙක් (pc) වලින්. පර්සෙක් 1ක් කියන්නේ කිලෝමීටර බිලියන් තිස් එක් දාහක්  විතර.   (3.1 x 1031km) . එනම් ආලෝක වර්ෂ 3.3 පමණ වෙනවා. වෙන විධිහකට කියනවා නම් ආලෝක කදම්බයකට පර්සෙක් එකක දුරක් යන්නට අවුරුදු 3 පමණ ගත වෙනවා.

මේ දුර ගැන යම්  අවබෝධයක් ලබා ගන්නට පහත  සැසඳීම කරන්න පුළුවන්.  පොළොවේ සිට සුර්යයා ට ඇති දුර කිලෝමීටර 150000000 (මිලියන් 150ක් පමණ) වෙනවා. මෙය පර්සෙක් වලින් නම් 0.000 005 pc පමණයි. දැන් අපි මේ දුරවල් මන්දාකිණි  දක්වා පෙන්වන්නේ කොහොමද කියා බලමු.  පර්සෙක් එකක් තව දාහකින් වැඩි කලොත් කිලෝ පර්සෙක් එකක් වෙනවා. අපේ  ක්ෂිරපථය කිලෝ පර්සෙක් 40ක් පමණ වෙනවා. එයත් අන්ද්‍රෝමිඩා චක්‍රාවටයත් අතර දුර කිලෝ පර්සෙක් 660ක් පමණ වෙනවා. එතකොට අපේ අසල්වැසියා වන  අන්ද්‍රෝමිඩා චක්‍රාවටය හා අපේ ක්ෂිරපථය අයත් වන්නේ "ප්‍රාදේශීය චක්‍රාවාට කාණ්ඩයටයි -local group of galaxies"


එයත් අනිත්  ප්‍රාදේශීය චක්‍රාවාට කාණ්ඩය වන කොමා ක්ලස්ටර් එකත් (කොමා චක්‍රාවාට ගොනුව)  අතර පරතරය මෙගා  පර්සෙක් 100 ක් පමණ වෙනවා. මේ විශ්වයේ පොඩි කොටසක් පමණයි.

ඉතාමත් ලඟදි එනම් 2011 දී සෝල් පර්ල්මුටර්,  බ්‍රයන් ශ්මිද්ට්, ඇඩම් රයිස් (Saul Perlmutter of Lawrence Berkeley National Laboratory in California, Brian Schmidt of the Australian National University in Weston Creek,  Adam Riess of the Space Telescope Science Institute in Baltimore) තිදෙනාට නොබෙල් ත්‍යාගය සමසේ ලැබුණා. ඔවුන් වෙන වෙනම සුපර්නෝවා 1a නම් තාරකා වල පිපිරුම අධ්‍යනය කලා. මේ සුපර්නෝවා 1a වලින් විහිදෙන ආලෝකය අභ්‍යවකාශයේ අති විශාල දුර මැනීමට භාවිතා කරනවා. සුපර්නෝවා 1a කියන්නේ තාරකා යුගලයක (binary stars) කුදු සුදු තාරකාව (white dwarf star ) අනිකේ ස්කන්ධය තමන්ට ඇද ගනිමින් විශාල පිපිරීමක් ඇති කිරීමයි. මේ අධ්‍යනයෙන් ඔවුන් ඔප්පු කලා විශ්වයේ ප්‍රසාරණය වීමේ වේගයේ විශාල ත්වරණයක් ඇති බව. එනම් විශ්වයේ ප්‍රසාරණ වේගය අධිවේගී වී ඇති බව.
ඉතින් මෙහි සුබලයා ගේ පින කවුද ගත්තේ. හබල් ගේ නියමයෙන් හා සොයා ගැනීමෙන්  ලේමටර් , ෆ්රිද්මන් ඉදිරිපත් කල ගැමොව් ඔප මට්ටම් කල විශ්වයේ මහා පිපිරුම හා එහි ප්‍රසාරණය පිලිබඳ මොඩලය තහවුරු කරනු ලැබුවා පමණක් නොව අයින්ස්ටයින් විසින් ඉදිරිපත් කල සාපෙක්ෂ්තාවාදයෙන් ස්ථතික විශ්වය වෙනුවට විශ්වය ප්‍රසාරණය වන බවට කළ  අනාවැකියත් සාධක සහිතව තහවුරුවුණා.

අවශ්‍ය කෙනෙකුට කාර්ල් සේගන් ලියු අභ්‍යවකාශය පිලිබඳ පොත මේ යොමුවෙන් නොමිලයේ කියවිය හැකියි.
http://www.slideshare.net/berbecaruliana/carl-sagancosmos
මීළඟ ලිපි වලින් සාමාන්‍ය ටෙලස්කෝපයක් තෝරා  ගන්න හැටි සහ ආලෝක වර්ණවලින් දුර මැනීම  පිළිබඳව සඳහන් කරමි.
පෙර ලිපි:
බිග් බැන් BigBang හෙවත් මහා පිපිරුමට නම ලැබුන හැටි

බිග් බැන් (Big Bang ) තහවුරු කල CMB

නිව්ටන් හා අයින්ස්ටයින් බිග් බැන් මොඩලයට  මග පෑදුවේද?

අවකාශ-කාලය යනු කුමක්ද හා අයින්ස්ටයින් ගේ ගණන් 

පින්තුර මුලාශ්‍රය: How the universe works by Andrew Norton

Thursday 20 November 2014

මං නන්-දන්-නෑ තිලක ගුණා

මුලදී දන්නේ නැති වුනත් පස්සේ දැන  ගත්  දෙයක් තමා  මං නන්-දන්-නෑ තිලක ගුණා මැති සඳ මම ඒ කාලේ ජිවත් වෙලා හිටි පැත්තේ ආව ගිය වග. මේ බව දැන ගත්තේ එතුමා අර පලා බබාවකටද කොහෙද මේ ලඟදි  ඉල්ලපු වෙලේ මා  දන්නා යෙහෙළියක විසින් චන්ද ඉල්ලන පත්‍රිකාවක් බුකියේ ශෙයාර්  කලාට පස්සේ. මම එය ෂෙයාර් කිරීම ප්‍රතික්ෂේප කලත් (මගේ ප්‍රතිපත්තියට අනුව )  ඒ පැත්තේ මගේ යාලු නෑදෑ පරපුරට පත්‍රිකාව යැව්වා. ඒ ගොල්ලොත් චන්දෙ දැම්මද දන්නේ නැහැ. මොකෝ ඉල්ලලා පැරදුනා, හෙවත් මඃ ජනයා විසින් තෝරා ගත්තේ නැති නිසා. මඃ ජනයා පලා බබා ලා හැටියට තෝරා ගන්නේ බබාහුකුම් ලා හා ලොකු බබාලා බව  තිලක ගුණා නොදැන සිටියාද යන්නත් ප්‍රශ්නයක්.
දැනගෙන හිටියා නම් ඉල්ලුවේ මොකද කියන එකත් ප්‍රශ්නයක්? ඉල්ලලා පැරදුන නිසා දැන් ආණ්ඩුවෙන් බල්ටියක් ගහල නැවෙන් පැන්නාද කියන එකත් ප්‍රශ්නයක්? යකෝ ප්‍රශ්න ගොඩක් නේ. ( බ්ලොග් කරන යකාට  කරන ඇමතුමක්  නොවේ. සමාවන්න :) )
ලංකාවේ පවුල්වාදය ශතවර්ෂයකට වැඩිය ඉඳල  ක්‍රියාත්මක වෙන එකක් බව දන්නෙත් නැහැ එතුමා . අනේ පව්. ඕක පවුල් මාෆියා හතර පහක් ඒ කාලේ ඉඳන්ම  ෆුට්බෝල් ගහපු රටක්.

ඉතින් මාත් ඒ තුමා පැන්න  දවසේ බුකියේ ශෙයාර්  වෙච්ච අර ෆේමස්  කතාව ඇහුව. මසුරන් වටින කතා ටිකක් කිව්වා.  පාදඩ ධනපති පන්තියක් බිහි වෙලා තිබෙනවා. අරක කරනවා  මේක කරනවා. කොමිස්  ගහනවා ආදී වශයෙන්. කතාව ඇත්ත තමා . හැබැයි ඉතින් ඉස්සරහ පේලියේ කතාව අහගෙන හිටිය ඔය කොමිස් කතාවලට නඩුවක් ඈඳී තිබෙන නායක රවියා ත්. අර අවුරුදු දෙකක් තිබ්බ ලංකාවේ කෙටිම දුෂිත  ආණ්ඩුව කාලේ. එයා  මොන පන්තියේද කියල මන් මේ කල්පොනා  කොලේ.

ඉතින් මේ පාදඩ ධනපති පන්තිය ඉස්සර ඉඳන්ම තිබුණ  එකක්නේ. ඒ කියන්නේ 77 කාලේ නගින්න ඉඩ දුන්නේ ඒ ගොල්ලටනේ. ඔන්න ඇමෙරිකාවේ නම් ඒ රටේ ජනාධිපතිවරු FBI එක දාල වැඩේ නැවැත්තුව. අර අල් කැපෝනයගේ පටන් ඔක්කොමල අල්ලලා දැම්මා ඇතුලට. දැන් තවම තිබ්බත් ගානට කොන්ට්‍රෝල් කරන ඉන්නේ . (ඒ ජනාධිපතිවරු රටට ටිකක් හරි ආදරේ ඇති. නැත්නම් තමන්ගේ ඔය හොඳයි කියන ධනපති පන්තිය වර්ධනය කරන්නේ නැහැනේ ) ජපානේ යකුස එකත් තියෙනවා. හැබැයි රටට බලපාන තීරණ උන්ට ගන්න බැහැ. අගමැති මාරු කරලා හරි යකුස කාරයන්ව නවත් වන්න ජැප්පො දන්නවා. යෙල්ට්සින් හිටි කාලේ රුසියාවේ ඔය හොර පන්තියට කිවේ ක්‍රීශා  එක නැත්නම සිංහලෙන් "වහල" කියල. වහල නැත්නම් ක්‍රීශා එකට මාස් පතා   ගාන  දුන්නේ නැත්නම් බිස්නස් කරනවා බොරු.  පුටින් කාරයා ආපු ගමන් කලේ (පොර පරණ කේජිබි කාරයා  නිසා ගේම දන්නවා) ක්‍රීශා එකට වැඩේ දුන්න එක. කොටින්ම තමන්ට අවනත කර ගත්ත. බැරි වුන් ටික හිරේට දැම්ම. උන් ඒකට  මාර  බයයි.  රුසියාවේ හිරේට යනවට වඩා ලංකාවේ  පොලිසියෙන් ආයුධ පෙන්වන්න ගිහින් වතුරේ බලෙන් පැනල මැරෙන එක ඊට සැපයිලු.  අර අවීචි මහා නරකාදියට වඩා ටිකයිලු හොඳ.
දැන් තිලක ගුණ කියන්නේ  " කුඩු කාරයෝ ධනපති වෙලා, ජාවාරම් කාරයෝ ධනපති වෙලා, කැසිනෝ කාරයෝ ධනපති වෙලා, නංගිලා රැජිනිලා  වෙලා " කියලනේ. 
මෙන්න  ඒ අය.
.

මුන්නැහේ  අර අහවල් පක්සේ ඉන්දැද්දී ඕව කියල දුන්නේ නැත්ද මන්ද. ප්‍රාග්ධනය හොයා ගන්නේ කොහොමද නැත්නම්. ප්‍රාග්ධනය හොයා ගත්තට පස්සේ නිත්‍යානුකුලව  ආයෝජනය කරන එකනේ තියෙන්නේ. 

අර සරච්චන්ද්‍රට කාණුවේ දාගෙන නෙලපු දවස් වලම අපි දැනගත්ත හැමදාම හිටිය පාදඩ නිර්ධන පන්තිය හෙවත් ලුම්පන් නිර්ධනයෝ ටික ෆෝම් කරලා අරගෙන කියල  ඒ  කට්ටියට පාන අල්ලන්න. දැන් ඕක වැඩි ඇති. නමුත් වෙන්නේ එකම සීන් එකනේ. දැන් තිලක ගුණගේ  ඉස්සෙල්ල පෙරමුණ කියන පක්සේ බලය එයාට නැතිව ගිහින් දැන් නැවත ඇල්ලුවලුනේ. අර අධිරාජ්‍ය විරෝධී "වැරදුනු දීපාගේ රාජපස්ස " හිත හොඳ කොලූ (එයාගේ යාලුවෝ කියන්නේ එහෙමයි) කොළ පාට  වෙන්න කලින් එක්කහු කර  ගෙන දෙතුන් දෙනාම  ගිහිල්ල විපස්සයේ ඉන්න පාදඩ  ධනපති පන්තිය සුද්ධ කලා  නම් හරි.  ඕකට එක්කහු කර ගන්න ටිකක් හරි හොඳ මනුස්සයෙකුට ඉන්නේ අර පින්වන්ත සිරි වීර සමරේ විතරයි. මෑන්ටත් අර පාදඩ  ධනපති පන්තිය ෆෝම් කරපු ආලයට දාසයෙක් වුනු එතුමාගේ පුතා ලෙඩේ දානවනේ. මිනිහගේ තාත්තල ඇතුළු අයනේ ඔය පෙළපාලියවලට එහෙම  ගල් වලින්, වැලි බෝතල් වලින්, පොලු වලින්,   කුන්  ෆු වලින් ගහන ලුම්පන් පන්තිය අදුන්වල දුන්නේ.  දැන් ඒක වඩා හොඳට ක්‍රියාත්මක වෙන එකනේ වෙන්නේ.

ඉතින් ඔය අව් අස්සේ අර සුද්දන්ට බනින පස්සේ රතු අලියෙ අතන සෙට් එකත් පැන්න නොපැන්න වගේ නැව් බඳේ එල්ලිලා ඉන්නවා.
(මෙන්න ආණ්ඩුවේ නැව. පුරවා ගත්ත බඩු  වැඩි වෙලා නැව  නිකන් බත්තල වෙලා. අමාරුවෙන් යනවා වගේ. )

හැබැයි ඒ කස්ටිය තවම අන්ධානෙලු. ෆස්ට් ඔෆිසර් , ගබඩා පාලක වගේ තනතුරු විතරක් අත  ඇරළලු. මට නම් හිතෙන්නේ හොඳ ශක්තිමත් පොදු අපෙස්සක නැවක් එනකන් එල්ලි එල්ලී ඉන්නවද කොහෙද? අනේ ඒ අතින්නම් අපරාදේ කියන්න බැහැ  මං නන්-දන්-නෑ තිලක ගුණා  භය නැතුව පැනලා පීන පීන ඉන්නවා.
පොදු අපෙස්සක නැව  දැනට පේන  විධිහට මේ වගේ.  ටිකක් කෙලින් කරලා ගන්න වෙයි.
ඔය අව්වස්සේ රතු බෝට්ටු ටිකකුත් යනවා (හෝ එනවා). හරි ඩිරෙක්ෂන් (දිසාවක්) එකක් තියා  කොම්පස් එකක් වත් තියනවද කියල ෂුවර් නැහැ.  ඉස්සර වමේ නායකයෝ දොස්තරලා , අධි නීතිඥයෝ නේ. ඒ ගොල්ලෝ ඉතින් කොහොමත් අන්තිමට අර ඉහල පන්තිය එක්කම ශේප් එකක්  දා ගන්නවා කියල පහල පන්තියේ අය  කියන්නේ. හැබැයි දැන් ගොඩක් වමේ වගේ අලුත්  නායකයෝ නම් ගුණාලා. ඒ කියන්නේ  තිලක ගුණා , කුමා  ගුණා , දීපාගේ ගුණා වගේ. අර ස්වයං නිර්නනේ දෙන්නේ නැති එවුන් ඔක්කොම  මාක්ස් ගේ දරුවෝ නෙමේ කියන නැතිවුන  සසපේ ගොඩේ කොත්තු මහත්තයා ඉන්ටවිව් දේශනයක් කොරල (ඒ ජාතියේ එකක් දැක්කමයි.) කුමා ගුණාට දෑත බදලා ස්වයං නිර්නේ හබලෙනුයි ජාතිය හබලෙනුයි දෙකෙන්ම ගහල.
දීපාගේ ගුණා බණ්ඩා හබලෙන් හා තක්කඩි හබලෙන් ගහල. හබල්  ලොකු වැඩි නිසා, දරා  ගන්න බැරුව කොත්තියගෙයි  දිපගුණා ගෙයි බෝට්ටු එක තැන කැරකෙනවා. මෙන්න ඒවා.
පසුගාමී වාද සමාජ එකේ කුමා ගුණා ගේ බෝට්ටුව තව පොඩි බෝට්ටු ටිකක්  ඇදන් යන්න හදනවා. කොහේ යනවද කියල මටත් ෂුවර් නැහැ. මෙන්න ඒවා. ඒවල එන්ජින් ටිකක් හොරයි. දුම් දානවා වැඩියි. භාවිතාව වැඩියි නේ. න්‍යාය වතුරේ. 
ඉතින් ඕක තමයි කතන්දරේ.  අපිලට යි ස්වයං නිර්නනේ ඉල්ලන්න ගිහින් අන්තවාදේට  කොටු වෙලා කුඩු පට්ටම් වුන අර වර්ධන වෙඩිය කිව්වා වගේ කුවන්නගේ නෑයෝ ටිකටයි, පස්සේ ආපු  නෑයෝ ටිකටයි තියෙන්නේ පොඩ්ඩක් පීනන්න  පුරුදු වෙන්න. මේ නායකයෝ ටික බෝට්ටු හදාගෙන  ගෙන, නැව් කෙලින් කොරාගෙන , කොම්පස් හොයාගෙන එන අතරේ පීනලා  හරි ගොඩ බිමට යන්න. 

ප.ලි.-මොනවා වුනත්  දුෂණයට  මර්දනයකට එරෙහිව යන ඕනෑම ගමනකට අපේ සුභ පැතුම්.

පින්තුර මුලාශ්‍ර: http://digital-art-gallery.com/picture/gallery/mafia

Tuesday 18 November 2014

රොසෙට්ටාවේ අභාග්‍යය

මා  මිට කලින් ලිපියක රෝසේට්ටා යානය 67P චෙරුමොව් -ගෙරසිමෙන්කෝ ධුම කේතුවට අවුරුදු දහයකට පසු ලඟා  වෙන බව සහ මෙහි වැදගත්කම පැහැදිලි කලා. එම ලිපියට මෙතනින් යා  හැකියි. 
http://kolambagamaya.blogspot.co.uk/2014/08/blog-post_7.html

දැන් සිදුව ඇත්තේ යානය ගුහාවක් තුලට වැටීම නිසා එහි සුර්ය කෝෂ දින දෙකකට පසු ක්‍රියා විරහිත වීමයි. යානය ධුමකෙතුවේ පොලොවට බස්සන lander නැත්නම් ගොඩබිම් යානය නම් කර ඇත්තේ ෆිලයේ (Philae) ලෙසයි. Philae යනු ඊජිප්තුවේ,  නසර් නමැති වැවෙහි ඇති දූපතකි.  ගොඩබිම් යානයේ පින්තුරයක් පහත දැක්  වේ.


දැනට බලාපොරොත්තුව යානයේ බැටරි නිම වන්නට කලින් එවූ දත්ත වලින් සොයා ගැනීමට අදහස් කල ප්‍රශ්න වලට පිළිතුරු ලැබුණාද යන්නයි.

විශ්වයේ උපත, සෞරග්‍රහ මණ්ඩලයේ උපත මෙන්ම  ජීවයේ උපත පිළිබඳවද දැනට ඇති නිගමන හා මොඩලයන් (උදා: bigbang මොඩලය ) වඩාත් තහවුරු කිරීමටත් මේ දත්ත වැදගත්.  මෙම මිෂන් එක 2015 දෙසැම්බර් 15 වනදා දක්වා දිව යන්නක්. ගොඩබිම් යානයට අමතරව රොසෙට්ටා ඕර්බිටර් (කේතුව වටේ කැරකෙන මව්  යානය)  ද පරීක්ෂණ සිදු කරන්නට නියමිතයි.

මේ පිලිබඳව ලීඩ්ස් විශ්ව විද්‍යාලයේ මහාචාර්ය ජෝන් ප්ලේන් පවසන්නේ මෙහෙම දෙයක්. "අපි දන්නවා ධුම කේතු වල ඇමිනෝ ඇසිඩ් හා පෙප්ටයිඩ්ස් වැනි කාබනික මොලේකියුල සැදෙන බව.  දැනට අපි දන්නේ නැත්තේ මෙය කේතුවේ න්‍යෂ්ටියේ හැදිලා වාෂ්ප වී යනවද නැතිනම් කේතු වල්ගයේ ඇති දුහුවිලි වල ෆොටෝරසායනික photochemical ක්‍රියාවලියකින් හැදෙනවාද කියා. එතකොට න්‍යෂ්ටියේ සැදුන  නම් මෙම දුර්වල මොලේකියුල පොලොවට පතිත වීමේ ඉඩකඩ වැඩියි. හැදුනේ කේතුවේකෙළවර දුවිලි වලින් නම් පොලොවට ඒමට ප්‍රථම ඒවා විනාශ වී (උල්කාපාත වගේ)  යනවා.  ගොඩබිම් යානයට ( Philae ) chiral amino acid - අසමමිතික (කයිරල්) ඇමිනෝ ඇසිඩ් සොයා ගන්න පුළුවන් නම් එක අතිශයින් වැදගත්.- අසමමිතික (කයිරල්) ඇමිනෝ ඇසිඩ් කියන්නේ එකම වගේ නිමවුමක් ඇති ඇමිනෝ ඇසිඩ් නමුත් එකිනෙකාගේ ප්‍රතිබිම්බයක් වගේ (mirror image). මෙහි වැදගත්කම නම් පෘතුවියේ ඇති ජිව වර්ගවල ඇත්තේ මින් එකම එක chiral   කාබනිකයක් පමණයි. "

දැන් ඔබ දන්නවා ඇති පෑන්ස්පර්මියා (Panspermia) යන උපකල්පනය ගැන. ඒ කියන්නේ විශ්වයේ හැම තැනම ජිවය ඇති බවට උපකල්පනය කිරීම. මෙහි ප්‍රභේද තුනක් තිබේ.
1.  ලිතනො පෑන්ස්පර්මියා (interstellar panspermia) - ග්‍රහලෝකවලින් විසිරුණු ගල් (rocks ) වලින් ජිවය ඇතිවීමට අවශ්‍ය මොලේකියුල පැතිරීම 
2. බැලිස්ටික් පෑන්ස්පර්මියා (interplanetary panspermia) ඉහත ආකාරයටම නමුත් ග්‍රහලෝකයෙන් ග්‍රහලෝකයට ජිවය පැතිරීම
3. මගපෙන්වන පෑන්ස්පර්මියා (Directed panspermia)  වෙනත් වඩා දියුණු ජීවින් විශේෂයක් මගින් ඕනෑ කමින් මෙය පැතිරවීම 

බකිංහැම් විශ්ව විද්‍යාලයේ  මහාචාර්ය චන්ද්‍රා වික්‍රමසිංහ ඉහත උපකල්පනය සඳහා දත්ත සොයන ප්‍රසිද්ධ විද්‍යාඥයෙක්.

ඉතින් මම ගොඩබිම් යානයේ දත්ත කොතරම් වැදගත්ද කියා හිතෙනවා නේද?

මේ ධුම කේතු ගැන සොයන යානයට අමතරව ඇස්ටරෝයිඩ හෙවත් උල්කාපාත ගැනත් සොයන්න යානා යවා තිබෙන අතර ඉදිරියටත් යවන්න සැලසුම් කරලා තිබෙන්නේ. 2007 දී යැවු ඩොව්න් (Dawn ) වෙස්ටා හා සිරෙස් නමැති protoplanet (මුලික ග්‍රහ ලෝක - කුඩා පර්වත දෙකක් වැනි) ගැන හොයන්න යවා  තිබෙනවා. එහි ආයු  කාලය 2015 දී අවසන්.

මේ ධුම කේතු වලට යානා යැවීම  හා  උල්කාපාත  (ඇස්ටරොයිඩ් ) වලට යානා බැස්සවීම හා පරීක්ෂණ ප්‍රධාන හේතු දෙකක් නිසා කෙරෙන්නක්.
එකක් නම් ඒවා වල ඇති මුලද්‍රව්‍ය (ලෝහ) පොලොවට ගෙන ඒමයි. දෙවැන්න ඒවා විනාශ කිරීමට ඇති හැකියාව සොයා බැලීමයි.

ලෝකය දෙසට ඇති විශාල උල්කාපාත  (ඇස්ටරොයිඩ් ) කඩා  වැටෙන්නට හැකි බවත් එයින් ලෝක විනාශය අපි හිතනවට වඩා  කළින් ඇති විය හැකි බවත් සුප්‍රසිද්ධ තාරකා භෞතික විද්‍යාඥ ස්ටීවන් හොව්කින්ස් පවසා තිබුණා. ඔහුගේ අදහස නම් මිනිස් වර්ගයාගෙන්  කොටසක් හෝ වෙන ග්‍රහ ලෝකයකට රැගෙන යා  යුතු බවයි.
මේ අදහස ක්‍රියාත්මක  කිරීමට හෝ ඇස්ටරොයිඩ් විනාශ කිරීමට හෝ ඒවා හාරා දුර්ලභ ලෝහ සෙවීමට පර්යේෂණ  යානාවන්  යැවීම අනිවාර්යයි
රිචර්ඩ් බ්‍රැන්සන් ගේ ගැලක්ටික් යානය කඩ වැටීම තවත් රෝසේට්ටවේ ගොඩබිම් යානය නැවතීම වගේම තවත් පසු බෑමක්.

නමුත් ඉන්දියාව, චීනය මේ අභ්‍යවකාශ තරඟයට එක්වී තිබෙන අතර, ඇමෙරිකන් ආණ්ඩුව සමග තිබෙන ප්‍රශ්න නිසා ජාත්‍යන්තර අභ්‍යාවකාශ නැවතුම් පොලට එක්වීම ඉදිරියේදී  අත හැර රුසියාව තමන්ගේම නැවතුම්  පොලක් සැදීමට සැලසුම් කරනවා. රුසියාවට මීර් නමින් අවුරුදු ගානක් අභ්‍යාවකාශයේ නැවතුම් පලක් තුබූ අතර ඔවුන්ට මේ ගැන තිබෙන අත්දැකීම් සන්කයව අනිත් රටවලට වඩා වැඩියි. ඊට අමතරව බර බදු ගෙනයන හොඳම රොකට්ටුව ඇත්තෙත් ඔවුන්ට. මේ නිසා ලෝකය නැවතත් 1960 ගණන් වල වගේ අභ්‍යාවකාශ  තරඟයකට පෙළ ගැස්වෙන බවක් පෙනී යනවා.
හොඳ හොඳ සෙල්ලම් එළිවෙන ජාමෙටය.
ඉදිරි අවුරුදු පනහ තුල ජිවත් වීමම ඉතාමත් උනන්දුව හා කුතුහලය වඩවන එකක් විය හැකියි.

මුලාශ්‍ර:
1. http://www.leeds.ac.uk/news/article/3624/esas_rosetta_mission__what_is_the_comet_lander_looking_for
2. http://www.panspermia-theory.com/
3. http://sci.esa.int/rosetta/54342-missions-to-asteroids/