Friday 22 May 2015

පොකුණු දිය බොර කල පට්ට වේ*******ගේ කථාවක්

අනුව දශකයේ මුල්ම හරියේ ලංකාවේ දකුණේ කලබල කෙමෙන් සිඳී යමින් පැවති  සමයේ  කිසියම් කරුණකට ලංකාවේ සිටියෙමි. ඒ අතර මගේ හිතවතෙකුගේ අවශ්‍යතාවයකට  එවකටපැවති  රජයේ ඇමති මට්ටමේ ප්‍රබලයෙකු හමුවීමි.  (ඔහු දැන්
ජිවතුන් අතර නැත) ඔහු සමග ආයෝජන  ප්‍රවර්ධන කලාපයේ කම්හලකට ගියේ මගේ හිතවතාට එම කම්හලේ නිපදවන භාණ්ඩ අපනයන කිරීමට අවශ්‍ය වූ බැවිනි. ඇමති මට්ටමේ ප්‍රබලයාට ඒ පැත්තේ කම්හල් හිමියෝ ඉමහත් ගරු කළහ. පිට රටින් ගෙන්වන නිමි ද්‍රව්‍ය අඩු බදු මුදලකට පාස් කර ගැනීම වැනිදේ ඔහු ලවා කරවා  ගත හැකි වුනු අතර, රජය සම්බන්ධ ප්‍රශ්න හා ඕඩර් ලබා ගැනීම්  සඳහාත් ඔහු ඔවුන්ට උදව් කළේය. මට අවශ්‍ය කාර්යයට එම කම්හලට ගිය පසු ඔහු තමන්ගේ "කට් " එක ගැනීම සඳහා වෙනත් ගාමන්ට් එකකට ඇතුළු විය. එහි අයිති කරුද ඔහු හඳුනයි.  "කට් " එක සමග තවත්  "කට් " එකක් ද ඔහු පැජරෝවට රැගෙන ආවේය. ඒ සත්‍යජිත් මාඉටිපේ ගේ  "බොරදිය පොකුණ" හි මංගලා මෙන් එහෙත්  එතරම් උස නැති අවුරුදු දහහතක දහඅටක   ඉතා පියකරු යුවතියකි. ඔහු කීවේ "ඇයට ලිෆ්ට් එකක්" දෙන බවකි. නමුත් කලාපයේ සිට කොළඹ පැමිණි පසු ඔහු තරු 5 හෝටලයක් ළඟ රිය නැවැත්වීමට අණ දුනි. රියදුරුට මා පෙන්වා "මේ මහත්තයාගේ   ගේ ගාවින් බස්සන්න " යයි පවසා,  පියකරු යුවතියව පැජරෝවෙන්  බස්සවා  ගත්තේය. ඇය මදෙස බැලූ  බියමුසු විලාසයත් ඇගේ  අතේ ඇඟිලි වෙව්ලු ආකාරයත් පැහැදිලිව දුටිමි.   ඉන් පසු එන ගමනේදී ජීප් රථයේ සිටි ඔහුගේ ආරක්ෂකයන් සමග කතාවට වැටුනෙමි.
"මහත්තයාට ගාමන්ට් පැත්තේ ගියාම ඒවල  ලොක්කෝ හොඳට සලකනවා, අලුතෙන් හොඳ  කෑල්ලක්  ආවොත්  මහත්තයට එන්නත් කියනවා." එතකොට මේ එහෙම ළමයෙක්ද යයි විමසීමි. වඩාත් දොඩමලු වූ ඔහුත් අනිත් අරක්ෂකයාත් පැවසුවේ ඔහු මාස  දෙක තුනකට වතාවක් අලුතෙන් එන යුවතියක රැගෙන හෝටලයකට යන බවයි. ඒ යුවතියන් යන්නේ ඔවුන්ගේ කැමැත්තෙන් නොවේ. ඔවුන්ට බල කරන නිසාවෙනි.
නැතහොත් ලැබුන රස්සාව දමා  ගෙදර යා  හැකිය. ඉන්පසු ආරක්ෂා අංශ  සමාජිකයා  පැවසුවේ "එහෙම කෑලි  මහත්තය ගෙන් පස්සේ අපටත් සෙට් වෙනව (හෙවත් තර්ජනය කර සෙට් කර ගන්නවා යනුවෙනි)" පස්සේ උන් කොල්ලෝ සෙට් කර ගත්තත් කොල්ලට කියනවා කියල බය කලහම එනවා පට්ට වේ***යෝ. ඔවුන් පට්ට වේ**** වන්නේ කෙසේ දැයි මම නොඇසුවෙමි. නමුත් මගෙත් ඒ දේශපාලනයට සම්බන්ධ තැනැත්තා ගේත්  සම්බන්ධය එතනින් අවසන් කලෙමි.

ලන්ඩනයේ අගෝරා කලා කවය සංවිධානය කල බොරදිය පොකුණ නැරඹීමට පසුගියදා  ගියෙමි.  එහි ගෝතමී (කෞශල්‍යා ප්‍රනාන්දු) තමන් රහසේ ආදරය කරන විපුල (දුමින්ද ඩි සිල්වා)  ලබා ගැනීමට ඔහුගේ පෙම්වතිය මංගලා (දිලානි අබේවර්ධන )  දෙන පෙම් ලිපි නොදී ඔවුන් විරසකයකට යොමු කරයි. ඉන්පසු ඒ පිලිබඳ දුකින් ගොළු හදවතේ මෙන් බි වෙරිවී සිටින බොළඳ පෙම්වතා වන විපුල හමුවීමට ගොස් ඔහු සමග ලිංගිකව  හැසිරෙයි.  ඔහු නොලැබෙන අවස්ථාවල රැයේ  ස්වයං වින්දනය සඳහා රහසේ යොමු වෙයි.මේ අවස්ථාවේ මා  ළඟ හිඳගෙන සිටි  චිත්‍රපටිය පටන් ගත් තැන සිට නිතර තම බිරිඳ සමග  විස්තර ප්‍රචාරය කරමින් සිටි සැමියෙක් මෙසේ කියනු අසා සිටියෙමි. "පට්ට වේසි, ඌම (විපුලව) අල්ල ගන්න ඕනෙද? පව්  අර අහිංසක කෙල්ල මංගලා,  අර ගෙදර ඉන්න අනිත් කොල්ලට  (සුරන්ජිත් - ගයන් ලක්රුවන් ) කියල කර ගත්ත නම් මොකද ".  විවේකයෙන් පසු චිත්‍රපටියේ  දෙවන භාගයේ සත්‍යජිත් මාඉටිපේ ඉතා සුක්ෂම ලෙස මංගලා  රහසේ සුරන්ජිත් සමග ඇති කරගත් සම්බන්ධය හෙළි කරයි. අර සැමියා හා බිරිඳ නිහඬ වුනේ එතැන් සිටය.

දීප්ති ගුණරත්න විසින් සංස්කරණය කල "හිස්ටීරියාව" පොතේ මෙසේ දැක්වෙයි.
"ෆ්‍රොයිඩ් මෙසේ පැවසුවේය. 'තමා ආදරය කරන්නා  අහිමි වීම නිසා තමාට අහිමි වුනේ
කවුදැයි යන්න වැළපෙන්නා  විසින් දන්නා මුත්, එසේ වීමෙන් තමාට අහිමි වුයේ කුමක්ද යන්න ඔහු නොදනී.' ෆ්‍රොයිඩ් විසින් 'කුමක්ද' යන්නෙන් සලකුණු කළේ  ඉහත අභිරහස මානසික ඒජන්සියක් බවයි. ආදරයට ලක් වන්නා යනු පුද්ගලයෙක් බව ඇත්ත මුත්, ඊට ප්‍රථමව ඒ අපේ අවිඥානයේ ම 'කොටසකි'."

මෙම විශ්මිත 'කොටස', මෙම අහිරහස් 'වස්තුව'  පිලිබඳ ගැටලුව ලැකාන් විසින් නොවිසඳූ අතර, ඔහු එයට "object a " ලෙස සලකුණක් යෙදුවේ ය.  මෙහි විශ්මිත, අභිරහස්මය ස්වභාවය යනු අන් කිසිවක් නොව සංකේතනයේ අසමත්වීමට පසුව මුණ ගැසෙන, යථ  තුල ස්ථාන ගත කෙරෙන අතිරික්ත ප්‍රමෝදයයි; යථට අදාලව සංකේතනයේ ප්‍රමෝදයයි; යථට අදාලව සංකේතනයේ ශේෂයයි, මෙය ආදරය කරන්නාට, එනම් විෂයට හෝ අනෙකා -ට අයිති දෙයක් නොවේ. මෙය සරලව කියන්නේ නම් ආදරය කරන්නාගේ ශරීරයේ ශෘංගාර කලාපයක් ප්‍රමෝදයට පත් වන විට එම ශෘංගාරයේ ශරීර කොටස ප්‍රමෝදයට පත්වෙමින් ආදරය ලබන්නාගේ 'කොටසක්' හා බැඳේ, එනම් අනෙක් අතට කීවොත් මගේ ආදරයට පාත්‍ර වන්නා විසින් මගේ ශරීරයේ කොටසක් මට අහිමි කරයි; එය මගේ ආදරයට පාත්‍රවෙන, යථාර්ථය තුල සිටින පුද්ගලයාට  අයිති නොවන අතර මටද අයිති නැත. එම පුද්ගලයා යනු විෂයේ ෆැන්ටසිය තුලින් විෂය කරා  එන හුදු ආධාරකයක් පමණි.
-හිස්ටිරියාව පිටුව 374

ගෝතමිගේ ජිවිතයේ යථාර්තය දිග හැරෙන මේ චිත්‍රපටිය දිග වැඩි බවක්ද පැවසිනි. අනවශ්‍ය දර්ශන කීපයක්ම සත්යජිත්ට කපා  හැරීමට අවකාශ තිබිණි. බටහිර රටවල පැය  එකහමාරේ චිත්‍රපටිය නරඹන සිනමා ලෝලීන් ඉන් අනතුරුව අවන්හලකට රාත්‍රී  ආහාරයට ගොඩ වැදීම සුලභ දෙයකි. දිග චිත්‍රපටියක් වෙළඳ පලට නිකුත් කිරීම ඒ නිසා අවාසිදායකය.  නමුත් පැය  දෙක පසුකරයන  චිත්‍රපටි නැතුවා  නොවේ. "ෆිලිපිනෝ පවුලේ විකාශනය "නමැති චිත්‍රපටිය පැය  10 කි. "දස පනත " චිත්‍රපටිය පැය  තුනකුත් විනාඩි 40කි.  සත්යජිත්ට අවශ්‍ය වී ඇත්තේ ගෝතමී රැකියාව පටන් ගත්  දා  පටන් ඇය  මුහුණ දෙන සිද්ධීන් ගේ විශ්ලේෂණයක් කිරීමට පාඨකයාට අවස්ථාව ලබා දීමට යයි සිතෙන බැවින් මේ මහා දිග කතාවට  එකඟ විය හැකිය.
එය එසේ බව ද සත්‍යජිත් පහදා  දෙයි.  මංගලා  හා විපුල ගේ ආදරයට සහය වන ගමන් ගෝතමී විපුලට රහසේ ආදරය කරන දීර්ඝ රූප  මාලා විපුල හා ගෝතමී ගේ අතර ඇතිවන ලිංගික සම්බන්ධයෙන් හා ගෝතමී  ස්වයං වින්දනය කිරීම  පෙන්වන රූප මාලාවෙන් සාධාරණය වෙයි. එසේම ඉන්දියන් චිත්‍රපටියක මෙන් සුභ අවසානයක් කිරීමට මෙන් යන දීර්ඝ රූප මාලා - එනම් ගෝතමී හා සැමියා ඩෙස්මන්ඩ්  (ධර්මසිරි බණ්ඩාරනායක) ගේ ආදර කතාව, ඔවුන් හදා ගැනීමට දරුවෙක් සෙවීම, දරුවා රැගෙන වාහනයකින් නැවත ඒම - කෙළවර වන්නේ ගෝතමී වැනිම වූ තවත් ගාමන්ට් කෙල්ලක් රථයේ හැපීමට ගොස් බේරී ඔවුන්ට බනින දර්ශනයකිනි. කදුළු වැගිරෙමින් ඈ  දෙස  බලා  සිටින ගෝතමී ප්‍රේක්ෂකයාට, ගෝතමී මුහුණ දුන් විෂම චක්‍රය ඒ ආකාරයෙන්ම ඉදිරියටත් වෙනත් ගැහැණියකටත්  මුහුණ දීමට සිදු වෙන බව දන්වයි.

චිත්‍රපටයේ ඇතැම් තැනක ග්‍රාම්‍ය  වදන් භාවිතය ඒ ආකාරයෙන්ම දැකිය හැකිය.  සම්භාව්‍ය සිනමා හෝ වෙනත් කෘතියක එසේ නොවිය  යුතුයිද භාෂාව හැසිරවීම වඩාත් කලාත්මක විය යුතුයිද විවේචනයක් පවතී. සම්භාව්‍ය යයි කියා ගන්න දේශපාලකයන් සම්භාව්‍ය හා උගත් ජනතා නියෝජිතයන් සිටිය යුතු ව්‍යවස්ථා නීති රීති සම්පාදනය කරන පාර්ලිමේන්තුවක ප*** ඇතුළු ග්‍රාම්‍ය වදන්  භාවිතා කරන්නේ නම් යථාර්තවාදී රීතියෙන් බැහැර නොයමින් සත්‍යජිත් තම සිනමා කෘතියට  එවදන් එක්  කිරීමේ පාපයක් මම නොදකිමි. ඇරත් අතිශය ලෙස උද්වේගකාරී අවස්ථාවක ස්ව හැඟීම් අමු අමුවේ තලා  දමනා  වෙලාවක   අපේ වචන භාවිතය මෙසේ වේ යැයි කිව හැකිද? මා  දන්නා පරිදි විශ්වවිද්‍යාල  උපාධිධාරී යුවලවල් කුණුහරපෙන් බැන ගන්නා  සමයක, හාමුදුරුවරුන්, දේශපාලකයන්, පුජකයන් කුණුහරප කරනා සමයක, ගෝතමිලා කෝපය හා වේදනාව  ග්‍රාමය භාෂාවකින් පිට වීම වැළැක්විය හැකිද?

  ගෝතමිගේ ෆැන්ටසිය විපුලයි. ඇගේ  ෆැන්ටසියේ යථාර්තය දරුවකු ලැබී අනාථ  වීමයි. නමුත් ඒ යථාර්තයට ඇය  යට වුයේ නැත. මවකට කෙතරම් අපහසු වුවත් දරුවා හදා ගන්නට දී ඇය  නැවත  ජීවිතය සොයා ගියාය.


"ෆැන්ටසි සවිඥානික  හෝ පුර්ව  විඥානික (එනම් අපි ඒ කෙරේ අවධානය යොදවන්නේ නම් දැනුවත් විය හැකි ෆැන්ටසි ) ලෙස පැවතිය හැකි අතර ම ඒවා අවිඥානකවත් පවතියි. උදාහරණයක් ලෙස ෆ්‍රොයිඩියානු, "ළමයෙක් පහර කමින් සිටියි" යනුවෙන් වන සවිඥානිකෆැන්ටසියේ අවරෝධිත, දෙවන ස්වරුපය වන "මම මගේ පියාගෙන් පහර කමින් සිටිමි" යන්න පහරදීමේ-ෆැන්ටසියේ අවිඥානික ස්වරූපයයි.නිරන්තරයෙන් මෙවැනි අවිඥානික ෆැන්ටසි කරා  අපට ලඟා  විය හැක්කේ 'අවිඥානය කරා ඇති " ෆ්‍රොයිඩියානු 'රාජකීය මාවත' වන සිහින හරහායි."
අනෙකාගේ ආශාවේ ප්‍රහෙලිකාවට පිළිතුරක් - හිස්ටිරියාව පිටුව 375

බෞද්ධ හැදියාව නමැති  ෆැන්ටසිය විනාශ වෙන නගරයේ සිට දරු ගැබ සහිත කාන්තාව (ගෝතමී)  සහල් පිරි නමන ශාන්ත භික්ෂුව නිරූපනය කරන්නේ දරුවා අවජාතක නොකරන ඇගේ සහෝදරියගේ හා සැමියාගේ අව්‍යාජත්වයද?

විපුල සමග එක්වීමෙන් දරුවකු පිළිසිඳ ගෙන ඔහුගේ යහළුවන්ගෙන් පට්ට වේ... නම් ගරු නාමය රැගෙන දරුවා බිහි කිරීමට ගමට යන ඇය නැවත පැමිණ මැද පෙරදිග යයි. එහිදී කතෝලික ඩෙස්මන්ඩ්  සමග යහළුවී නැවත ලංකාවේදී විවාහ වෙයි.  කතෝලික නම් දික්කසාද විය නොහැකි අතර දෙවන කසාදයක් කිරීමද කල නොහැක්කකි. නමුත් ඩෙස්මන්ඩ් මෙහිදී සම්ප්‍රදායට විරුද්ධව යයි? ඇය බැලීමට ඩෙස්මන්ඩ් ගේ පළමු කසාදයේ බිරිඳ ඩොරින් (වීනා ජයකොඩි?) පැමිණෙයි. ගෝතමී සිටින නිවසට  දරුවාගේ නඩත්තු මුදල් සොයා පැමිණෙන ඩොරීන් දැකීමෙන් ප්‍රලය වන ඩෙස්මන්ඩ් ගේ මව (චන්ද්‍රා කළු ආරච්චි ) ඇයට  "එක එකා සමග යන එකී"  හෙවත් "පට්ට වේ***"  සම්මානය ලබා දෙයි. ඇගේ අලුත ලැබුන  සුපිරිසිදු ලේලියගේ (ගෝතමී) ෆැන්ටසිය ආරක්ෂා කිරීමට මන්නයද  රැගෙන සටනට යයි.  අවාසනාවන්ත ලෙස  මේ අවුලේ ගොදුර වන තම මිනිපිරිය පිලිබඳ දුකට වඩා ඇගේ සමාජ තත්වය  වැදගත්ය.
කතාවේ මුල් හරියේ  වේ...ගේ  සිට  සුපිරිසිදු ලේලිය බවට පත් වීමේ  දයලේක්තික ප්‍රතිවිරෝධයේ සින්තසිය ගෝතමී නමැති පරිණත කාන්තාවයි.
මංගලා  හා විපුලගේ නිවසට යන ගෝතමී ඉන්පසු මුහුණ දෙන්නේ පියකරු යුවතිය හා කඩවසම් තරුණයා  අතර සිදුවිය යුතු  පරිපුර්ණ සාමය සතුට පිරි කසාදය හා මෙරිගෝ රවුමේ යමින් දරුවෙකු සමග සතුටු වන ලස්සන පුංචි පවුල් කැදැල්ලේ  ෆැන්ටසිය
නොවේ. විපුල සමග යහළුවී සිටිමින්ම  බෝඩිමේ මල්ලි සමග ද පෙම් සුව විඳ දරුවකුද ගබ්සා කර ගත්  මංගලා ගේ හා ඇය පිලිබඳ සත්‍ය දැනගත් විපුල අතර විවාහය නමැති ඛේදවාචකයයි.

චිත්‍රපටිය අවසාන  වන්නේ තවත් ගෝතමීලා හා මංගලා ලා මේ ක්‍රමය තුල   බිහි වන්නට වන්නට නියමිත බව පසක් කර දෙමිනි.

චිත්‍රපටියේ කෞශල්‍ය ප්‍රනාන්දුගේ ප්‍රතිභාපුර්ණ රංගනය  අති  විශිෂ්ටය. දුමින්ද ඩි සිල්වා හා දිලිනි අබේසුන්දර ද ඉතාමත් දක්ෂ ලෙස තම හැකියාවන්ගෙන් සහය දෙයි. ධර්මසිරි, වීනා, ගයාන්, ප්‍රියංකා, චන්ද්‍රා  , ලියෝනි  චාන්දනී, මෙන්ම  බෝඩිමේ ඇන්ටි රත්නාවලිද මේ දිගු චිත්‍රපටියේ සාර්ථක රංගනයක යෙදෙයි.
කාලයකට පෙර ප්‍රසන්න විතානගේ ගේ "ඔබ නැතුව ඔබ එක්ක" චිත්‍රපටියේ යුද්ධයේ දරුණු පිඩාව විඳ  ජිවිතයෙන් පලා යන අහිංසක යුවතියගේකථාව  නැරඹුවෙමි. ඉන්පසු මලිත් හෑගොඩ ගේ "දැකල පුරුදු කෙනෙක් " චිත්‍රපටියේ සිය දිවි නසා ගැනීම පිළිතුරක් ලෙස නොගෙන දරුවා සමග සැමියා හැර යන කාන්තාව ගේ කතාව දුටුවෙමි. ඒ දෙකම අගනා  සිනමා කෘතීන්ය. පියකරු නොවීම නිසා ළමා කාලයේම කොන්වන, ප්‍රශ්න ඉදිරියේ පීඩා විදිමින් ජිවිතයට මුහුණ දෙන දිරිය ගැහැනියක ගෝතමී තුලින් දුටුවෙමි.   සත්‍යජිත් මාඉටිපේ තම මුල් සිනමා කෘතියෙන්ම සම්භාව්‍ය සිංහල  සිනමා කලාවේ තවත් පියවරක් තබමින් සාර්ථක සිනමා කෘතියක් නිර්මාණය කර ඇත. මේ පරම්පරාව සිංහල සිනමාව වඩාත් උසස් තලයකට ගෙන යනු ඇත. අපේ වාසනාවට අගතිගාමී මන්දබුද්ධික  කපන මණ්ඩලයක් දැන් නැත.

මේ චිත්‍රපටිය ලන්ඩනයේ  පෙන්වූ අගෝරා කලා  කවයට ස්තූතියි.

Thursday 14 May 2015

සිරිසා යනු වමට පරම්පරාවකින් පසුව ලැබුන ජයක්. නමුත් සමාජවාදීන්ට අපහසුම කාර්යය ඇරඹෙන්නේ චන්ද දිනට පසුදා. සෙබස්තියන් බජන්සමග ස්ටදිස් කූවෙලකිස් - 4

නායකයන් විසින් නොයෙකුත් විරෝධතා ව්‍යාපාරවලට සහභාගී වීම මගින් හා වෘත්තීය සමිති   සමග සංවාදයක් තබා ගැනීම මගින් සිප්‍රස් සහ අනිකුත් සමහර නායකයන් තමන් කුමන ආකාරයක දේශපාලන සහ සාමාජික දැක්මක් ආරක්ෂා කරන්නේද යන්න දැඩි ලෙස පෙන්වා දුන්නා . පසුගිය කාලයේ අප එවැන්නක් දැක තිබුනේ නැති තරම්.
තව පැත්තකින් බැලුවොත් ග්‍රීසියේ දේශපාලන තත්වය සම්පුර්ණයෙන්ම වෙනස් වුනා කියල කිව්ව හැකි.
කිසියම් අංශයන්හි අරගල තිබුනත් බොහොමයක් සමාජීය ව්‍යාපාරවල පසු බැස්මක් තිබුන වගේම උදාසීන භාවයක් පැතිරෙමින් තිබුණා.
නමුත් 2012 න් පස්සේ රටේ (ග්‍රීසියේ) සමස්ත තත්වය වෙනස් වුණා.  සමාජීය විරෝධතා ව්‍යාපාර වලට මිනිසුන්ගේ මැදිහත් වීම අඩු වෙද්දී සිරසා එවකට බලවත්ව පැවති නැඹුරුව (trend) ට හැඩ ගැහුණා.

එතකොට "වාමාංශික වේදිකාවේ " ආකෘතිය හැටියට ගන්නේ, වාමාංශික ආණ්ඩුවක් ලිවරය හැටියට තබා ගෙන පිටතින් සිට ජනතාව  පන්ති අරගලයට හා සමාජ ව්‍යාපාර වලට ගොනු කිරීමේ උපාය මාර්ගයට , සහ ඉන් පසු ආණ්ඩුවට පීඩනයක් එල්ල කිරීම වගේ ප්‍රංශයේ ජනප්‍රිය (ජනතාවාදී )පෙරමුණ (Popular Front) අනුගමනය කිරීමක්ද ? ඒ කියන්නේ එක පාදයක් ඇතුලේ අනිත් පාදය  එලියේ?

මෙතන පේන  කියන්න අමාරුයි. ඔබ අදහස් කරන්නේ "ජනප්‍රිය පෙරමුණ " (Popular Front government) ගැන, නමුත් සමාජ ව්‍යාපාරවල් "ජනප්‍රිය පෙරමුණ" ආණ්ඩුවෙන් කල ඉල්ලීම් ඉතාමත් වෙනස්  ඒවා. ඒවගේම "ජනප්‍රිය පෙරමුණ" ට තිබුනේ ඉතා සීමිත වැඩ සටහනක්. මේ නිසා ජයග්‍රහණ, අත්  පත් කර ගැනීම් සහ අනිකුත් "ජනප්‍රිය පෙරමුනේ" ජය ක්ෂණයකින්ම පැමිණියේ බහු ජනතා ව්‍යාපාරයේ පීඩනය නිසා. 

අප සිරිසා අර ගත්තොත් අපට පේනවා පසුගිය කාලේ  තිබුණු උදාසීන බැවින් ගැලවිලා සමාජ ව්‍යාපාර බල ගැන්වීමට සිරිසා  ලද ජයග්‍රහණය උත්ප්‍රේරකයක් වුණා  කියල. හැබැයි එසේම සිරිසා එම සාමාජිය ක්‍රියාවලින්ට විවෘත වීමට අවශ්‍ය ක්‍රියා මාර්ග ගත්ත  කියල අමතක කරන්න නරකයි.  වඩාත්ම වැදගත් ප්‍රශ්නය කියල මට සිතෙන්නේ අවම වැටුප,  අපි  පක්ෂ එකතුවේ ලියවිල්ල අත්සන් කරන්න කලින් තිබ්බ ප්‍රමාණයටම  අරන් යමු කියන යෝජනාව. ඊටත් වඩා  වැදගත් යෝජනාව වුනේ, පසුගිය වසර හතරේ ඉවත දැමුණු  සමස්ත සාමුහික ගිවිසුම් පද්ධතිය සහ කම්කරු නීති නැවත ස්ථාපිත කිරීමයි.
මෙයින්  අරගලයට අවශ්‍ය අවකාශය මුදා හැරෙනවා   පමණක් නොවේ, ඉතාමත්ශෝචනීය තත්වයක ඇති ග්‍රීසියේ වෘත්තීය සමිති ව්‍යාපාරය ගොඩ නැංවීමටත් හැකි වෙනවා.

නමුත් අමාත්‍යංශ ප්‍රශ්නය සහ රජයේ භූමිකාවක් රඟ  දැක්වීම තුල පොදු ක්‍රියාමාර්ගයක් නැහැ නේද? වෙලාව පැමිණිය විට ජනතාව තීරණය කරයිද? 

නැහැ. කොහෙත්ම නැහැ.  "වාමාංශික වේදිකාව"  රජයට සම්බන්ධ වීමේ තත්වයන් තීරණය වෙන්නේ රජයේ උපායත්මක තෝරාගැනීම් මොනවාද යන්න මත බව ඉතාමත් පැහැදිලයි.  මේ ප්‍රශ්නයට ඔවුන් මුහුණ දෙන්නේ එලෙස මිසක් වෙන විධිහකට නොවෙයි. 

අනික මා  සිතන්නේ මේක තමා මාපකය, අනිත් අයගේ දේශපාලනය සහ අප අතර වෙනස: අපි අමාත්‍යාංශ පිබඳ ප්‍රශ්නය මුලික කර ගන්නේ නැහැ, අපි මුල් කරගන්නේ ක්‍රියා මාර්ගය මොකක්ද යන්න, වැඩ පිළිවෙල කුමක්ද යන්න, හැමදෙයක්ම තීරණය වන ක්ෂණික ප්‍රධාන උපායමාර්ග මොනවාද කියන එක. ඉතින් හැම දේම තීරණය වන්නේ මොන ක්‍රියාමාර්ගයද වැඩි දුර රඳා  පවතින්නේ  කියන එක මත. ඉතමත් මෘදු ලෙස කියනවනම් සිරසා එකේ වැඩ පිළිවෙලේ බොහොමයක් දේවල් නිරාකරණය කර ගත  යුතුව තිබෙනවා.
නමුත් සමස්තයක් වශයෙන් අපේ ක්‍රියාමාර්ගය මෙයයි: අපි සිරිසාහි නිරපේක්ෂ මුලික පොරොන්දු වලට අනුගත වී සිටීම.

වර්තමාන වැඩ පිළිවෙලද 2012 වැඩ පිළිවෙලද? 

මම අදහස් කලේ වර්තමාන වැඩ පිළිවෙල ගැන. අඩුම ගණනේ ඉතාමත්ම අවම වැඩ පිළිවෙල ඉදිරිපත් කල තෙසලොනිකි සම්මේලනයේ සිට සිප්‍රස් විසින් යාවත්කාලීන කල වැඩ පිළිවෙලට  වත් ඇලී සිටීම ලොකු ගැටීමක් ඇතිවෙන තැනට යාමක්.  ඒ කියන්නේ උනන්දු සහගත  ජනප්‍රිය  ව්‍යාපාරයන් ගේ කැඳවීම්  වල සහයෝගය ලැබීම, සමස්ත ක්‍රියාවලිය තුල පක්ෂයේ සහ අනිකුත් සමාජ හා දේශපාලන ආයතනයන් කැඳවා සංවිධානය කිරීම, යන්නයි.

මා සිතන්නේ වාමාංශික වේදිකාවේ කාර්ය භාරය මෙයයි: ක්‍රියාත්මක වීමට (මෙන්ම) , රාජ්‍යය මට්ටම  හා සමාජ මට්ටම (level) අතර ඇතිවීමට නියමිත දයලේක්තික ක්‍රියාවලියේ උත්ප්‍රේරකයක් වීමට. මෙය හොඳින් කෙරුනොත් "වාමාංශික වේදිකාවේ " ඓතිහාසික කාර්යභාරය වන්නේ එයයි. රජයේ මට්ටමෙන් සිදුවන්නේ කුමක්ද හා මුලික ජනතා ව්‍යාපාර මට්ටමේ සිදුවන්නේ කුමක්ද කියන තලයන්  දෙක අතර විශාල පරාසයක් නිර්මාණය වීමට එරෙහිව ක්‍රියා කිරීම සඳහා ශක්තිජනක උත්ප්‍රේරකයක් වශයෙන් අපට පක්ෂය තුල වඩා සංගත පැහැදිලි බලයක් තිබෙනවා.

ඔබ හොඳින්ම දන්නවා අප දන්නා පැරණි මෙහෙයවීම තමා  කම්කරු,  ක්‍රීඩා හා සංස්කෘතික අමාත්‍යංශ වමට දී ප්‍රධාන හා වැදගත් අමාත්‍යංශ පක්ෂයේ දක්ෂිනංශය අතට ගැනීම කියල ..........

ඔව්. නමුත් මෙය නොවේ දැන් තිබෙන අනතුර. අනතුර තමා  දැන් ඔවුන් මෙය නොකිරීමයි. ඔවුන් උපායමාර්ගික වශයෙන් වැදගත් අමාත්‍යංශ පුදනවා දේශපාලන ක්‍රියාමාර්ගය පැහැදිලි නොකර. එතකොට වෙන්නේ අපේ අත් මුල සිටම බැඳලා තබන එකයි. එසේම මා හිතන විධිහට වැදගත් ම දේ තමා අභ්‍යන්තර වශයෙන් හා යුරෝපා සංගමය හා යුරෝපීය  බලයන් සමග ඇති ගැටුම හා  එම අභියෝගය එලෙසින්ම පවත්වා ගෙන යෑමේ වගකීම ගැනීම. අප ඒ දිසාවට ගමන් කලොත්, වඩා  පළල්  ලෙස සිරිසා තුල සහ ග්‍රීක වම තුල ඉතාමත්  බරපතල පැහැදිලි කර ගැනීමකින් තොරව මේ සටන ජය ගන්න බැහැ.

මගේ බලාපොරොත්තුව තමා (මන් හිතනවා මෙය ප්‍රායෝගිකයි කියල) මේ වගේ දෘෂ්ටිකෝණයක් ඇති කර ගත් නිසා සිරිසා ගෙන් පිටත සිටින බලවේග නැවත තම එල්ලයන් වෙනස් කර ගනීවි කියල. ඒ වගේම දැනට සිරිසා දෙස  සැකයෙන් බලමින් පසුබටවී සිටින කණ්ඩායම්,  මෙවැනි සන්ධිස්ථානයකදී වඩා තීරණාත්මක ප්‍රවේශයක් ගනීවි යන්න. අන්න එතකොට අපට එක්සත් පෙරමුණක් හැදේවි.


සිරිසා යනු වමට පරම්පරාවකින් පසුව ලැබුන ජයක්. නමුත් සමාජවාදීන්ට අපහසුම කාර්යය ඇරඹෙන්නේ චන්ද දිනට පසුදා. සෙබස්තියන් බජන්සමග ස්ටදිස් කූවෙලකිස් - 1
සිරිසා යනු වමට පරම්පරාවකින් පසුව ලැබුන ජයක්. නමුත් සමාජවාදීන්ට අපහසුම කාර්යය ඇරඹෙන්නේ චන්ද දිනට පසුදා. සෙබස්තියන් බජන්සමග ස්ටදිස් කූවෙලකිස් - 2
සිරිසා යනු වමට පරම්පරාවකින් පසුව ලැබුන ජයක්. නමුත් සමාජවාදීන්ට අපහසුම කාර්යය ඇරඹෙන්නේ චන්ද දිනට පසුදා. සෙබස්තියන් බජන්සමග ස්ටදිස් කූවෙලකිස් - 3

මතු සම්බන්ධයි.
පරිවර්තනය - අජිත් ධර්මකීර්ති  

Thursday 7 May 2015

වාමාංශයේ දක්ෂිණාංශය, දක්ෂිණාංශයේ වාමාංශය හා මාක්ස්වාදී සෝමවංශ

මීට  කලකට පෙර "දක්ෂිනාංශයෙන් සමාජවාදයක්  පැතීම හා මාක්ස්වාදී රනිල් " කියා ලිපියක් මේ බ්ලොගයේ ලියුවෙමි. ඉහත මාතෘකාවේ යොමුව (link) ඇතුලත් කර ඇත. මෙය ත්‍රිමාණ වෙබ් අඩවියේද පළවුණි.
මා විසින් පල කරන ලද "සිරිසා යනු වමට පරම්පරාවකින් පසුව ලැබුන ජයක්. නමුත් සමාජවාදීන්ට අපහසුම කාර්යය ඇරඹෙන්නේ චන්ද දිනට පසුදා. සෙබස්තියන් බජන්සමග ස්ටදිස් කූවෙලකිස්" පරිවර්තනය බොහෝ අයට නොතේරුණු බවක් පැවසූ අතර මේ ලිපිය ලියන්නේ ඉතිරි කොටසේ පරිවර්තනයට ප්‍රවේශයක් ලෙසයි. මේ ලිපිය හැකි තරම් විවේචනය කරන්න. වැදගත් එයයි.

මහා බ්‍රිතාන්‍යයේ පාර්ලිමේන්තු මහා මැතිවරණය අදයි . මගේ මතකයට නැඟෙන්නේ දක්ෂිණාංශික කොන්සර්වටිව් පක්ෂයේ ජෝන්  මේජර් ගේ අවසන් මැතිවරණයි.ජෝන් මේජර් ජය ගත්තේ බ්‍රිතාන්‍ය කම්කරු පක්ෂයේ වාමාංශික කණ්ඩායම නියෝජනය කල නීල්  කිනොක් පරදවමිනි. ඉන් පසු එළඹෙන මැතිවරණයට කලින් කම්කරු පක්ෂයේ නායක ජෝන් ස්මිත් මියගිය විට පක්ෂ නායකත්වයට පත් වුයේ "සමාජවාදය" වෙනුවට "මැද  මාවත " යෝජනා කල ඇන්තනි චාල්ස් ලින්ටන් බ්ලෙයාර් නොහොත් ටෝනි බ්ලෙයාර් ය. ඔහු 1997 දී අති  විශාල චන්ද ප්‍රමාණයකින් ජෝන් මේජර් ගේ කොන්සර්වටිව් පක්ෂය පරදවා  ජය ගත්තේය. වාමාංශික පක්ෂයක් වූ  බ්‍රිතාන්‍ය කම්කරු පක්ෂයේ "වාමාංශයේ දක්ෂිණාංශය" නියෝජනය කළේ  බ්ලෙයාර් ගේ කණ්ඩායමයි.  මුලින්ම ඔහු කලේ "නව කම්කරු පක්ෂය " නමින් නම වෙනස් කිරීමයි. මින් පසු ඔහු කිවේ  සමාජවාදය නොව ඔහු ගෙන එන්නේ -සමාජ වාදිත්වය  "social-ism" බවයි. එය
ඔහු යහ පාලනය, එක්සත් බව, සෑම පුරවවැසියෙකුගේම සමාන වටිනාකම, සැමටම සමාන අවස්ථා යනුවෙන්  අර්ථ දැක්විය. ඔහුගේ විරුද්ධ වාදීන් කිවේ ඔහු අව්‍යාජ සමාජවාදය අතහැර ධනවාදයට පිය නගන බවයි. ටෝනි බ්ලෙයාර් විසින් කම්කරු පක්ෂයේ වාමවාදී ප්‍රවණතාවය  සහසුද්දයෙන්ම පරාජය කරන ලදී.
 ඉන්පසු ඔහු විසින් දස අවුරුද්දක් බ්‍රිතාන්‍ය පාලනය කල අතර ඔහුගේ "වමේ" නව කම්කරු පක්ෂය තැචර් ටත් වඩා  දක්ෂිණාංශික විය. කම්කරු පක්ෂයේ නායකයන්ට වඩා ඔහුට ප්‍රසංශා  කලේ තැචර් ය. හිටපු ඇමෙරිකන් ජනාධිපති බිල් ක්ලින්ටන් සමග සුහදත්වයෙන් සිටි ඔහු යුද සහකරුවෙකු වුයේ දක්ෂිණාංශික ජෝජ් බුෂ් ටය.

 බුෂ්  සමග "ත්‍රස්තවාදයට " එරෙහි යුද්ධයේ පෙර ගමන් කරුවකු මෙන්ම ඉරාකයට එරෙහි යුද්ධයේ සහයෙකු වූ ඔහු   බ්‍රිතානයේ වමේ දක්ෂිණාංශික කණ්ඩායම  කොන්සර්වටිව් පක්ෂයේ දක්ෂිණාංශයටත්  එහා තැනක ස්ථාපිත කළේය.  එහි ප්‍රථිපලය  වුයේ ඔහු දෙවතාවක්ම කොන්සර්වටිව්  පාක්ෂිකයන්ගේ, මධ්‍යස්ථ  චන්ද දායකයන්ගේ හා කම්කරු පක්ෂයේ දක්ෂිණාංශයේ චන්ද පහසුවෙන් ලබා දෙවරක් අගමැති වීමයි.

අති වාම වාදී  ජාත්‍යන්තර මාක්සිස්ට් නැඹුරුව හා වෙනත් ට්‍රොස්ට්කිවාදී පක්ෂ ඔහුට එරෙහි වූ අතර, ඔහුගෙන් පසු පත් වූ ගෝර්ඩන් බ්‍රවුන් පක්ෂය නැවත මැද  මාවතකට ගන්නට අසාර්ථක ප්‍රයත්නයක නිරත විය.  එහිදී කොන්සර්වටිව් පක්ෂයේ මධ්‍යස්ත කණ්ඩායම (දක්ෂිනාංශයේ වම) ජය ගත්තත් ආසන  මදි වීම නිසා වඩා වමේ සිටි ලිබරල් ප්‍රජාතන්ත්‍රවාදී (ලිබරල් ඩිමොක්‍රටික්) පක්ෂය සමග  අත්වැල් බැඳ ගති. මේ අනුව වාමාංශික කම්කරු පක්ෂයේ දක්ෂිනාංශයට වඩා කොන්සර්වටිව් ලිබරල් සන්ධානය වාමාංශික හුරුවක් ගති. ඩේවිඩ් මිලිබෑන්ඩ් පරදවා කම්කරු පක්ෂයේ බලය ගත්  ඔහුගේ සොහොයුරු එඩ්  මිලිබෑන්ඩ් කම්කරු පක්ෂයේ වාමාංශය නියෝජනය කරයි. මේ නිසා ඔහුගේ නායකත්වය කැමරන්-ක්ලෙග් සන්ධානයට වඩා  වාමාංශයට බරය.  මේ හේතුව නිසා අති වාමවාදී පක්ෂ  වලට සහය දෙන අය  කොන්සර්වටිව් ආණ්ඩුව පරදවන්නට උපක්‍රමික ලෙස කම්කරු පක්ෂයට චන්දය භාවිතා කිරීමේ ප්‍රවණතාවක්  ඇත.

ශ්‍රී ලංකාවේ වමට බර ධනවාදී පක්ෂයක්ව තිබුනේ ශ්‍රී ලංකා නිදහස් පක්ෂයයි. 70-77 සමගි පෙරමුණු ආණ්ඩුව වාමාංශික ස්වභාවයක් ගත්තේ කොමියුනිස්ට් හා සමසමාජ පක්ෂ නිසා පමණක්ම නොව සමාජවාදී චීනයට හා සෝවියට් රුසියාවට මෙන්ම නොබැඳි සමුළුවට හිතකර විදේශ ප්‍රතිපත්තියක්ද තිබු නිසාය. එම රජයට එරෙහිව කැරැල්ලක් මෙහෙයවූ ජවිපෙයට සීඅයිඒ චෝදනා එල්ල වුයේත් මේ නිසයි. අති වාමවාදී ස්වරූපයක්  ගත් ජවිපෙ කැරැල්ල  දක්ෂිණාංශයට සේවය කිරීමක් සේ දක්නට ලැබුණු අතර එයට විරුද්ධව පැවතුන සිරිමාගේ වාමාංශික රජයට සහය දුන් විදේශ රාජ්‍ය අතර සෝවියට් දේශය, චීනය මෙන්ම බ්‍රිතාන්‍යයද විය.
1977 න්  පසු ජයගත් ජේ ආර් ගේ රජය අති දක්ෂිණාංශික එකක් වූ අතර ශ්‍රීලනිප හා පරණ වමේ සන්ධානය මධ්‍යස්ථ තත්වයටත් විජේවීරගේ ජවිපෙය  වඩා වමටත්, අනිකුත් කුඩා ට්‍රොට්ස්කිවාදී හා ස්ටැලින්වාදී පක්ෂ අති වාම වාදී ගොන්නටත් වශයෙන් බෙදිය හැකි විය.
දෙමළ විමුක්ති අරගලය පටන් ගැන්මේදී එය බොහෝ විට වමට බර විය. රාජිනි තිරානගමගේ කාලය දක්වා එය වාමාංශික නැඹුරුවක් ගත්  බව පෙනිණි. මුලදී එසේ වුවත් ප්‍රභාකරන් හා කොටි සංවිධානය අතට පත් වූ දෙමළ අරගලය ජාතිවාදී මෙන්ම දක්ෂිණාංශික නැඹුරුවක් පෙන්නුම් කළේය. රාජිනි මෙන්ම පද්මනාභ ආදීන් මරා  දැමීමෙන් පටන් ගෙන,   වාමාංශික  නැඹුරුවක් තිබු දෙමල සටන්කාමී කණ්ඩායම් කොටි සංවිධානය
විසින් සම්පුර්ණයෙන්ම සමුලඝාතනය කිරීමෙන් පසු එය වඩාත්  තහවුරු විය.

ජනවාරි 8 දා  පැරදුන මහින්ද රාජපක්ෂ රජය අතිශයින් දක්ෂිණාංශයට  බර වුවකි. ටෝනි බ්ලෙයාර් බ්‍රිතාන්‍ය කම්කරු පක්ෂය කොන්සර්වටිව් පක්ෂයටත් එහා දක්ෂිනාංශයට රැගෙන ගිය ලෙස, මහින්ද රාජපක්‍ෂ ශ්‍රීලනිපයේ දක්ෂිනාංශය නියෝජනය කරමින් එය එතනට තල්ලු කලේ ජෝර්ජ් බුෂ් ගේ "ත්‍රස්ත විරෝධී" සන්ධානයටද සහයෝගී දෙමිනි. වඩා ලිබරල් චන්ද්‍රිකා  පාර්ශ්වය හෙවත් ශ්‍රීලනිප වම පසෙකට තල්ලු විනි. (චන්ද්‍රිකා  පාලනයේ අසාර්ථක භාවය ආදිය  මෙහි සාකච්චා නොකරමි . එය මෙතනට අදාල නැත). ශ්‍රීලනිපය සමග එක්වූ පරණ වමේ පක්ෂ ද දක්ෂිනාංශයට තල්ලු වුනු අතර ජනතා විමුක්ති පෙරමුණේ දක්ෂිනාංශය නියෝජනය කරමින් විමල් විරවංශ, සෝමවංශ  කණ්ඩායම මහින්ද රජයට සහයෝගය දුනි. ඉන්දියාවේ, එක්සත් ජනපදයේ, චීනයේ හා රුසියාවේ උදව්වෙන් දක්ෂිණාංශික දෙමල විමුක්ති අරගලය දක්ෂිනාංශයට බරවූ සන්ධානයක් විසින් මිලිටරිමය මැදිහත්වීමකින් පරාජය කරන ලදී.  (දක්ෂිණාංශික , අතිශයින් කොමියුනිස්ට් විරෝධී රිපබ්ලිකන් පාක්ෂික ඇමෙරිකන් ජනාධිපති රිචර්ඩ් නික්සන් ප්‍රථම වරට චීනයට ගොස් චීනයට ඇමෙරිකන් වෙළඳපොල විවෘත කර දීමට අඩිතාලම දැමු අතර රිපබ්ලිකන් දක්ෂිණාංශික ඇමෙරිකාව සැමවිටම ඒකාධිපති ස්වරුපයක් ගත් පාලනයන්ට සහයෝගය දුනි.)
ඔබාමා නියෝජනය කරන්නේ දක්ෂිණාංශික රිපබ්ලිකන් පක්ෂයට විරුද්ධ වමයි. (මේ වම මාක්ස්වාදි  වමට සම්බන්ධ නොකරන්න) ඔහු ට කොන්සර්වටිව් පක්ෂයේ වම හා ජර්මනියේත් ප්‍රංශ සමාජවාදී ජනාධිපති සමගත් ලෝක දේශපාලනය තුල ව්‍යාජ වමක් ගොඩ නගා  ගත හැකි විය.
ඔහුගේ වම රිපබ්ලිකන් දක්ෂිනාංශයට හා ලංකාවේ මහින්ද  දක්ෂිනාංශයට මෙන්ම සිප්‍රස් ගේ ග්‍රීක මාක්ස්වාදී වමටද විරුද්ධය.
මගේ මුල් ලිපියේ  ඇති අති දක්ෂිණාංශික චැප්මන් ගේ "තේ පක්ෂය" (tea party) ඔබාමාගේ රාජ්‍ය මැදිහත් වීමට විරුද්ධව රාජ්‍යය අහෝසි කිරීමට කතා කරයි.

ලෝකයේම වම දකුණ මාරුවී ඇත.

ජවිපෙ වාමාංශය මෙහිදී කුමාර්, ලසිත් , වරුණ, ඕපාත (ලාල්කාන්ත හැර) කණ්ඩායම වූ අතර ශ්‍රීලනිප  දක්ෂිණාංශික රජයේ යුද ජයෙන් අනතුරුව ඔවුන් ජවිපෙන් වෙන් වුනි.  දක්ෂිණාංශික එජාපයේ වාමාංශික නැඹුරුව මෙහිදී  රනිල් වික්‍රමසිංහ (බටලන්ද බැගේජය සහිතව ) මෙහෙයවූ අතර එජාප දක්ෂිණාංශය ජොන්ස්ටන්, එස් බි, ලොකුගේ ආදීන්  හරහා රාජපක්ෂගේ ශිලනිප දක්ෂිනාංශයට එක්  විය. වාමවාදී සුළු පක්ෂ වලට හා එජාපයට එක වේදිකාවට එක්විය හැකි පරිදි සෝභිත හිමි  , නිර්මාල් ආදීන්ගේ වාමාංශික නැමියාවක් ඇති සමාජ ව්‍යාපාරයන් බිහි වුන අතර වික්‍රමබාහු   ආදීන් ටද මෙයට එක්විය හැකි විය.  ශ්‍රීලනිපයේ වාමාංශික කණ්ඩායම මෛත්‍රීපාල සිරිසේන හා ශ්‍රීලනිප ලිබරල් කණ්ඩායමේ චන්ද්‍රිකා හරහා දක්ෂිණාංශික එජාපයේ වාමාංශික කණ්ඩායම සමග සම්බන්ධ වී වාමාංශික නැඹුරුවක් ඇති සමාජ ව්‍යාපාරයන් (සෝභිත හිමි ආදීන්) ගේ උදව්වෙන් ශ්‍රීලනිප -එජාප (මහින්ද පමුඛ ) දක්ෂිණාංශික සන්ධානය පරදවා බලයට පැමිණ ඇත.  පරණ වමෙක්  වූ චම්පිකගේ දක්ෂිණාංශික හෙල උරුමයේ වාමාංශික කණ්ඩායම ඔවුන්ට එක්  වුනු අතර,  හෙළ උරුමයේ සුළුතර "දක්ෂිණාංශය" ශ්‍රී ලනිප පැරදුන දක්ෂිණාංශයට එක්  විය. නිදහස් දේශපාලනයට දැඩි ලෙස බාධා කල ශ්‍රීලනිප -එජාප (මහින්ද ප්‍රමුඛ ) දක්ෂිණාංශය පැරදවීමේදී,  අති  වාමවාදී ස්ථාවරයක් ගත් ජවිපෙන් කැඩී  ගිය කණ්ඩායම (පෙසප) හා ට්‍රොට්ස්කිවාදී පක්ෂ කිහිපයක් මෙහිදී දක්ෂිනාංශයට සේවය කරන බවක් පෙන්නුම් කරන ලදී. 1971 ජවිපෙට එල්ල කෙරුණු සීඅයිඒ චෝදනාව කල්පනා කරන්න. වාමවාදී රජයකට එරෙහිව කරන අතිවාමවාදී කැරැල්ල එයට චන්දය දුන් බහුතර ජනතාවට පෙනෙන්නේ  දක්ෂිණාංශයට සේවය කිරීමක් ලෙස වන අතර ගම්වලදී කැරලිකරුවන් පොලිසි වලට පාවා  දීමට එයත් හේතුවක් විනි.

මාක්ස්වාදී යයි තමන්  කියා ගන්නා විරවංශ හා වමෙක්  යයි තමන් සිතන වාසු තවමත් ශ්‍රීලනිප දකුණට එක්  වී සිටින අතර  ශ්‍රීලනිප -එජාප (මහින්ද පමුඛ) දක්ෂිණාංශය ට විරුද්ධ නොවුන විරවංශ නැවතත්  අධිරාජ්‍ය විරෝධී සටන් පාඨය  ගෙන හැර දක්වයි. ලෙනින් විරුද්ධ වුයේ අධිරාජ්‍යවාදය විසින් ගෙනයන ධනපති ක්‍රමයට වන අතර චීනය හා රුසියාව අනුගමනය කරන්නේ එයම  බව වීරවංශට වැටහීමක් නැත. (වැටහීමක් ඇත්නම් එය සඟවයි.)  රුසියාවට හා චීනයට පක්ෂවී ඇමෙරිකාවට විරුද්ධ වීම ඔවුන්ගේ අධිරාජ්‍ය විරෝධයයි. රුසියාවට හා චීනයට ඔවුන් පක්ෂ,   දෙමල අරගලයට විරුද්ධ යුදයේදී ලංකා රජයට සහය දුන් නිසාය කියන ඔවුන් ඉන්දියාව හා එක්සත් ජනපදය තීරණාත්මක ලෙස යුද්ධයට රහසේ සහය දුන් බව සඟවයි. (කොටි නැව් විනාශ කිරීමට දුන් ඔත්තු වල සිට). රාජපක්ෂ ජයග්‍රහණයෙන් පසු එම රජයට එකතු වීමට බලා  සිටි සෝමවංශට එය කල නොහැකි වූ අතර, මෛත්‍රී බලයට ආ  පසු ජවිපෙ යු ඇන්පී  රජයකට නොයන  නිසා එහි ඇමති පදවියක් වත් සෝමවංශට නැත. ජවිපෙන් ඉවත් වීම හා ඔහුගේ උපවාසය "අනේ මා දිහාත්  බලන්න" යන්නක් මිස න්‍යායිකව විවේචනය කලයුතු කාරණයක් නොවේ.


1917 පෙබරවාරි හිදී ලෙනින් කෙරෙන්ස්කි කණ්ඩායම  බලය ලබා ගනිද්දී නිහඬ වුයේත්, මාස ගණනකට පසුව "දැන් කාලය එළඹ ඇත " යැයි කීවේ ඇයිද යන්න මෙහිදී කල්පනා කල යුතුය. මේ ලිපිය බලන්න.  ඇලෙක්සිස් සිප්‍රස් මහජන චන්දයෙන් බලයට පත් වීමේදී උපාය මාර්ගිකව අනුගමනය  කලේ ලෙනින් ගේ ක්‍රමවේදය බවට යෝජනා කරමි.

 මෙය කියවිමෙන් පසු කැමති නම් සිරසා පරිවර්තන නැවත කියවන්න.
සිරිසා යනු වමට පරම්පරාවකින් පසුව ලැබුන ජයක්. නමුත් සමාජවාදීන්ට අපහසුම කාර්යය ඇරඹෙන්නේ චන්ද දිනට පසුදා. සෙබස්තියන් බජන්සමග ස්ටදිස් කූවෙලකිස් - 1
සිරිසා යනු වමට පරම්පරාවකින් පසුව ලැබුන ජයක්. නමුත් සමාජවාදීන්ට අපහසුම කාර්යය ඇරඹෙන්නේ චන්ද දිනට පසුදා. සෙබස්තියන් බජන්සමග ස්ටදිස් කූවෙලකිස් - 2
සිරිසා යනු වමට පරම්පරාවකින් පසුව ලැබුන ජයක්. නමුත් සමාජවාදීන්ට අපහසුම කාර්යය ඇරඹෙන්නේ චන්ද දිනට පසුදා. සෙබස්තියන් බජන්සමග ස්ටදිස් කූවෙලකිස් - 3


ප.ලි - මෙම ලිපියේ ඇත්තේ මගේ පුද්ගලික අදහස් පමණි. 

Friday 1 May 2015

බාමියන් නෙළුවෙ ඇයි අපි

අව්කනදි  අපි නෙළුවේ
බුදු රදුන්  නිදන ඒ
සන්සුන් වූ පිළිරුව
භාවනා කරමින්ය
උතුම් වූ බුදු ගුණම

නිවන විමසා ලබන්නට නම්
දර පලන්නම්
දිය ගෙනෙන්නම්
අපි

නිවන සිතටම අවබෝධයක් නම්
ඉනික්බිති නැවත නැවතත්
දර පලන්නම්
දිය ගෙනෙන්නම්

රජ වරුන්ගේ සිටු වරුන්ගේ
කහවනු නොමැතිවම
සසරින් එතර වන්නටම
භාවනාවන් කරමින්ම

නෙළුවෙමු ඒ මහා ප්‍රතිමා
අත රැදුණු කහවනුව
කුසගිනි  නිවන අහර ටික
දුප්පතුන්ටම දෙමින්

අවකන් රටේදී ඒ
මිසදිටුවන් හිරි හැර
කරන විට මහණුන් ට
සටන් ක්‍රම උගත්තෙමු

බේර ගන්නට උන්ගෙන්
දම් පුරන අප මහ සඟුන්
දන් ටික උනුට බෙදනා
දිළිඳු අප බාමියන් ජනයා

වෙලා තියෙනා වෙලාවට
භාවනාවේ යෙදෙමින්ම
නෙලුවෙමුය ගල් කුලේ
බාමියන් මහා ප්‍රතිමා

දර පලන්නට මෙන්
දිය ගෙනෙන්නට  මෙන්
සම්මා සමාධිය වඩා
උතුම්වූ ආලෝකය ලබන්නට

ලක්ෂ දහසක් යොදා ඒ හැදු
ලොව ලොකුම ඒ ශෛල පිළිමේ
හැදුවේ මහා ගලකත් නොවේමය
ඇතුන්ගේ ගල් පුරයේ දී ඒ

කන්නට දෙයක් නැති නිසා
දරුවන් ද කළු ගඟට
විසිකර තමන්ගෙද පන
නසා ගන්නා  මව්වරුන්

සිටින්නා වූ  රටකමය..........

-මෙය ලියුවේ ඇෆ්ඝනිස්ථානයේ බාමියන් අවට පැතිරුණ සෙන් බුදු දහම හා ඔවුන් සම්මා සමාධිය හා සම්මා සතිය වැඩුවේ සාමාන්‍ය  ජිවිතයේ කාර්යයන් වල යෙදෙමින් ම යන්න ඉස්මතු කිරිමටයි. වැඩ කිරීම තුලින් සමාධිය වඩා නිවනට යන්න යනු ඔවුන්ගේ ස්ථාවරයයි.

බුදුන් ගේ ප්‍රතිමා  ගල් කුළු වල නෙළුවේ භාවනාවට ආධාරයක් පිණිස බවට මතයක් පවතී.
"For the enlightenment chop wood, carry water. After enlightenment chop wood carry water."
වඩා දැන ගැනීමට මෙතනට යන්න .http://lifehacker.com/four-confusing-zen-quotes-and-what-you-can-learn-from-1676177538

Wednesday 29 April 2015

ඩලස්ලාට ගම්මන්පිලලාට තොත්ත බබා වුන පොලිසිය අන්තරේට ඇර සොයිසා වෙලා

මම මේ ඊයේ පෙරේද දැක්ක අපේ හිටපු ආණ්ඩුවේ ඇමැත්තෝ රැලක් විරෝධතාවයක් ද මොකක්ද කරනවා. පොලිසියෙන් හැබැයි ඒකට තහනම් නියෝගයකුත් දීලයි තිබුනේ. තහනම ගණන්  ගන්නෙත් නැතුව කට්ටිය විරෝධතාවයට ගිහිල්ල තිබ්බ. ඒ කියන්නේ නීතියට පිටු පාල පාර්ලිමේන්තුව අසල තමා විරෝධතාවය් ගියේ.



පොලිසියත් කීකරුව මෙතන ඉන්නවා.

 තව විරෝධතාවයක ඒ මදිවට ශ්‍රී ලංකා ප්‍රජාතාන්ත්‍රික සමාජවාදී ජනරජයේ ජාතික කොඩියට වෙනුවට සිංහලේ කොඩිය කියල වෙන කොඩියකුත් උස්සල එතනත් නීතියක් කැඩුවලු . ඒ කියන්නේ නීති දෙකක් ම කඩලා. මේ දෙතැන. නමුත් අනේ අපේ ප්‍රජාතන්ත්‍රවාදයට ගරු කරන පොලෝසිය මුකුත්ම කලේ නැහැ. නීති කැඩුවත් ප්‍රජාතන්ත්‍රවාදය රකින්න ඕනේ නේ.
අනිත් එක ඉතින් දැන් ඊළඟට චන්දෙකුත් එනවා. ඕක මොන පැත්තට පෙරෙලෙයිද දන්නේ නැහැ. මහින්ද මහත්තයා අගමැති වෙලා එන්න ඕන තරම් ඉඩ කඩ තියෙනවා.  ගෝට මහත්තය ආයේ  ලේකම් වෙයි. මොකට බෙල්ල දෙනවද. යාපනේට නං ට්‍රාන්සර් කොලාට දැන් කමක් නැහැ. ප්‍රභකරන් ගොයියා සෙත්ත පෝච්චි නිසා දැන් අවුලක් නැහැ. එත් ඉතින් යුඑන් එකේ ටීම් එකට එහෙම වැටෙන්නේ නැති වෙයි නේ. අනික මේ අවුරුද්දේ ප්‍රොමෝෂන් සීන් එකත් එනවා.

අහ්හ්හ් මේ ඉන්නේ අන්තරේ පිස්සු ඩබල් ටික. දෙමු වතුර කඳුළු ගෑස් පාර නැවෙන්නම.  මුන්ට ගැහුවට කවුරුත් මුකුත් කියන්නෙත් නෑ. ඕනනම් ඔය ගූ පත්තර කඩමලු දෙකකුයි අර ඒ දවස් වල පැත්ත පළාතේ එන්න නොදීපු වෙබ් කාරයෝ ටිකකුයි කෑ ගහයි. අපට මොකද කවුරුත් කියවනවය ඕව. අනික ආණ්ඩුවට පේන්න මොකක් හරි කොරන්නත් එපාය, නැත්නම් අපි තවම ගිය ආණ්ඩුවටම සපෝර්ට් කියල කියයි. අපි නේ දන්නේ මොකා ආවත් පිස්තෝල අරන් පොලිසි ඇතුලට ඇවිත් කෑ ගහන කොට අපට දෙකට නැවෙන්න වෙනවා කියල. ඔව් සර්. ඉයස් සර්. නෑ  සර්. හරි සර්.

අන්තරේ ට බොහොම ස්තුතියි තවත් වාරයක් ලබා දුන්නට.

ශ්‍රී  ලංකා පොලිසියට ජය වේවා.  (අන්තරේ )

අන්තරේට ජය වේවා . (පොලිසියේ බෙල්ල බේරුවට - පොලිසිය)

අන්තරේ මේ පාරත් පෙත්සමක් අරන් ආවේ නැහැ. බලෙන් ඇතුලට රිංගන්න හැදුව - (අග්‍රාමාත්‍ය කාර්යාලය)




Monday 27 April 2015

එම්බා ගෙම්බා , පැන යනු පැන යනු පැන යනු , ඇන්නෑවේ


මට පළමු වරට තානාපති තුමෙකු හෙවත් ඇම්බසඩර් කෙනෙකු හමු වීමට යෙදුනේ 1987 සෝවියට් දේශයේදීය. ඒ මම සෝවියට් දේශයේ සමස්ත ශ්‍රී ලංකා ශිෂ්‍ය සංගමයේ ප්‍රධාන ලේකම් වූ පසු එහි කාරක සභාව තානාපතිවරයාට හඳුන්වා දීමට සහ කිසියම්  ශිෂ්‍ය ප්‍රශ්න කීපයක් සාකච්චා කිරීමටය. එතැනදී මම එවකට සෝවියට් දේශයේ තානාපති ලෙස කටයුතු කල කෘත හස්ත දක්ෂ තානාපතිවරයෙකු වූ නෙවිල් කනකරත්න මහතාට ආමන්ත්‍රණය කලේ මිස්ටර් කනකරත්න කියායි. එහිදී සම ලේකම් වරයෙකු ලෙස පත්වූ සාලිය මට වැලමිටෙන් ඇන ඇන  කීවේ "මචන් H.E කියපන්. H.E කියපන්. " කියායි. එක්සත් ජාතීන්ගේ සංවිධානයේ කලක් සේවය කල, නීති වේදියෙකු හා පසුව දේශමාන්‍ය සම්මානයද ලැබූ කනකරත්න මහතා  ඉතා නිහතමානී අයෙකු විය. මා  ඔහුට එසේ නොකීම ඔහුට ප්‍රශ්නයක් නොවුණු අතර ඉන්පසු මම ඔහුට සර් කියා ඇමතීමි.  ඔහු පදවියෙන් ඉවත්ව යන තුරුම ශිෂ්‍යයන් සමග හොඳ සම්බන්ධතාවයක් පවත්වා ගෙන ගියේය. ඉන් පසු පත්ව ආ  රොඩ්නි වැන්ඩහාර්ට් ද එසේමය. මේ දෙදෙනාම career diplomat හෙවත් වෘත්තීය තානාපති වරු, එනම් විදේශ අමාත්‍යංශයේ සේවාවෙන් ඉහළට පැමිණි අයයි. ඒ දිනවල පළමු ඇමති (first minister) ලෙස කටයුතු කල ටී  බී මඩුවේගෙදර මහතාත් සිසුන් සමග සහයෝගයෙන් සුහදව කටයුතු කළේය.
ඉන්පසු සෝවියට් දේශයේ තානාපති හා අනිකුත් නිලතල වලට පැමිණි බොහෝ අය එය ජාත්‍යන්තර හොර බඩු  වෙළඳ මධ්‍යස්ථානයක් කල අතර (අපද එයට තරමක් දුරට වග කිව යුතුය. නමුත් අප ශිෂ්‍යයන්ය. ආණ්ඩුවේ පඩි ලබන්නන් නොවේ)  සමහරු එය නීත්‍යනුකුල  නොවන මත්පැන් අලෙවි මධ්‍යස්ථානයක් බවට ද පත් කළහ.
එවකට අප සමග සමකාලීන සිසුවකුව සිටි උදයංග වීරතුංග 2006 දී සෝවියට් දේශයේ තානාපති පදවියට පත්වුණි. ඔහු පත්වීම ලැබූ  අලුතම වාගේ  ලන්ඩනයේ මිතුරන් පිරිසක් සංවිධානය කල සුහද හමුවකදී මට ඔහු මුණ ගැසුණි. එතැනදී ඔහු මිතුරන්ට කලේ දේශපාලන කතාවකි. එතැනදී ඇතිවූ සාකච්චාවකදී යුද උපකරණ මිලදී ගැනීමේ දී වන අක්‍රමිකතා ගැන ඔහු පැවසුවේ එවැනි දෑ  පසුගිය රාජ්‍ය සමයන්හි අනන්තවත් සිදුවූ  බවත් ඒවා විකුණන ආයතන කොමිස් වැනි දේවල් සඳහා දිරි දෙන බවත්ය. මෙය සම්පුර්ණ ඇත්තකි. කොමිස් දීම යුද වෙළෙන්දන් අනිවාර්යයෙන්ම කරන දෙයක් වන අතර යහපාලන තියා  සමාජවාදී ආණ්ඩුවක් ආවත් කොමිස් ලබා ගැනීමෙන් ගැලවීමට ඒ හා සම්බන්ධ වන දේශපාලකයන්ට හා තානාපතිවරුන්ට ඉතා අසීරුය. බලෙන්ම ඇඟේ  ගසන හෙයිනි.  දුවලා බේරෙන්නට වත් බැරිය.
උදයංගට තිබෙන චෝදනා ගැන ඕනෑ තරම් ලිවී ඇති  නිසා  මෙහිදී කතා කිරීමට අවශ්‍ය නැති අතර ඔහු තානාපතිවරයෙකු ලෙස රුසියාවේ සිසුන් සමග සුහදව කටයුතු කල බවත් , එහි වැඩ කටයුතු ගැන "මොස්කව් පුවත් " නම් සඟරාවක් මගින් ප්‍රචාරය කල බවත් දනිමි. දේශපාලන පත්වීමක් වුවත් රුසියාවේ සිටින ශ්‍රී ලාංකිකයන්ට ඔහු අවශ්‍ය තැනදී උදව් කල බව සැවොම කියති.

මගේ බිරිඳ වරක් ශ්‍රී ලංකාවට යෑම  සඳහා වීසා ගැන ඇසීමට ලන්ඩනයේ තානාපති කාර්යාලයට කතා කල අවස්ථාවේ එහි හරි හැටි ඉංග්‍රීසි වත් කතා කල නොහැකි කාන්තාවක් ප්‍රශ්න ඇසීම ගැන මගේ බිරිඳට අසභ්‍ය වචනයක්ද භාවිතා කරමින් බැණ වැදී තිබුණි.  තානාපති කාර්යාලයක වැඩට අඩුම ගණනේ  එක ජාත්‍යන්තර භාෂාවක් ඉගෙන ගත යුතුය කියා නීතියක් වත් ලංකාවේ විදේශ අමාත්‍යංශයේ නැතුවා විය යුතුය. එසේත් නැතිනම් මේවා තනිකරම දේශපාලන පත්වීම්ය.  මේ ඉංග්‍රීසි ප්‍රශ්නය ලන්ඩන් කාර්යාලයේ නිතර ඇතිවන තත්වයක් බව බොහෝ දෙනා  කියති.

මැද පෙරදිග ඇත්තේ ඊටත් වඩා දරුණු තත්වයකි. එහි තානාපති කාර්යාල තිබෙන්නේ තානාපති ලාට හා අනිකුත්  නිලධාරීන්ට වෙළඳම් කිරීමට හා වෙනත් දුෂිත ක්‍රියා වල දීමටය. මේ තානාපති ගෙම්බන් එක තැනකින් තව තැනකට පනිමින් උදර පෝෂණයේ යෙදෙමින් යහතින් කල් ගෙවති. තමන් පත් කර එවූ රටේ ජනතාවට සේවය කිරීම කල යුත්තේ වෙන  රටවල තානාපතිවරු විය යුතුය. දේශපාලන පත්වීම් ලබාගෙන බොහෝ අය එන්නේ තමන්ගේ ගතමනාව හදා ගෙන නිවාඩුවකුත් ගත කර , ළමයින්ටත් ඉගැන්වීම් කරගෙන යන්නටය.

මේ රැලට අළුතින්  එකතු වී ඇත්තේ නේපාලයේ තානාපතිය. ඔහුට ඇති චෝදනාව නම් පසුගියදා ඇතිවූ භූමිකම්පාවෙන් අතරමන් වී  සිටි අනිකුත් ජනයා  සමග ලංකාව බලා ඒමට සිටි දේශපාලන රැකවරණ ලත් ජන මාධ්‍ය වේදීන් තිදෙනෙකුට ඒ සඳහා අවශ්‍ය පහසුකම් නොසැපයිමයි. ඒ ගැන මෙතනින් කියවන්න.  ඔහුත් ඔහුගේ කාර්ය මණ්ඩලයත් සේවය කල  යුත්තේ ශ්‍රී ලාංකිකයන් හට බව ඔහු නොදන්නේ නම් ඒ බව දන්නා කෙනෙකු පත් කර එවීම විදේශ අමාත්‍යංශයේ යුතුකමය.

අප විසින් කලයුත්තේ මේ තානාපතින් හා අනිකුත් නිලධාරීන් තමන් පත් කල රටේ ජනතාවට සේවය කරන්නේ නැත්නම් ඒ පිලිබඳව ඉතා සක්‍රිය ලෙස විරෝධය පල කිරීම, ඔවුන් හෙළි දරව් කිරීම හා ඔවුන් වෙනුවට වැඩ කල හැකි නිලධාරීන් පත් කර එවීමට රජයන්ට බල කිරීමයි.

Tuesday 21 April 2015

අශිෂ්ටයන් අතරේ ශිෂ්ටකම් පෑමේ මාරක විහිළුව හෙවත් අපන්ණක (කාන්තාරයේ යක්ෂයන්ගේ) ජාතකය

ඔන්න ඉතින් ඒකාලේ අර  මොකද්ද නුවරක වෙළෙන්දෝ දෙන්නෙක් හිටියලු. එකාට ගැල් (හෙවත් කරත්ත)  500ක් වගේ හිටින්න. දෙන්නම සෑහෙන්න  පොහොසත්ලු. වෙළඳම්  කරන්න ඈත යනවනේ ඒ දවස් වල. දැන් වගේ ඊබේ, ඇමේසන් දාල විකුණගන්න බෑනේ. ඉතින් යන්න ලෑස්ති වෙලා ගැල් 500 යනකොට පොඩ්ඩක් සෙනග වැඩි වෙන නිසා වෙනම යන්න කතා කරගත්තලු. මුල් වෙළෙන්ද හිතුවලු "කලින් ගියොත් වාසි ගොඩයි. තමාගේ මිනිසුන්ට කෑම හොයා ගන්න ලෙහෙසියි. පාරේ වෙන කරත්ත වලින් එන ට්‍රැෆික් අඩුයි. එන්ජින් තෙල් හෙවත් තණකොළ අලුත් ඒවා. අලුත් නගරේ මාකට් එක අල්ලන්නත් ලේසියි. "වතුර නැති කාන්තාරේ " පහු කරන්න වතුර වැඩිපුර අරන් ගියාම හරි වගේ.". අනික අපායට ගියත් කලින් යන්න කියනවලුනෙ.
දෙවෙනි වෙළෙන්දා කල්පනා කෙරුවලු "යාළුවගේ ගැල් වලින් පාර  නියමෙට මට්ටම් කරල දෙයි මට යන්න. පොරගේ හරක් පරණ තණකොළ කෑවම  මගේ උන්ට නැවුම් ඒවා කෑව හැකි. පොර අර නගරේ බඩු  විකුණන ගණන් සෙට් කලාම මට ඒ ගාණටම  කේවෙල් කරන්නේ නැතුවම දුන්න හැකි. " කියල.  වෙළෙන්දා ඉතින් දෙවැනි වර යන්න තීරණය කළාලු.
පලවන වෙළෙන්දා ට පොඩි පොඩි ප්‍රශ්න ආවත් "දිය නැති කාන්තාරය" කියන හරියට ආවලු. හැබැයි ඉතින් කාන්තාර වල වතුර නැහැ තමා, නමුත් ක්ෂේම භුමි තියෙනවනේ. මේකේ ඒවත් නැහැලු. කාන්තාරේ පටන් ගන්න තැන නගරයක වැසියෝ කීවලු ඒකෙ යක්කු (demons) ඉන්නවා කියල. ඉතින් මේ ගැල්  පෙරහැර කාන්තාරේ තරමක් දුර යනකොට එනවලු කට්ටියක් අනිත් පැත්තෙන්. උන්ගේ ගැල් වල මඩ  ගෑවිලා , වතුර බේරෙනවලු. නෙලුම් මල් (නෙලුම් යායෙන් ගත් ඒවා නොවේ) , ඕළු මල් අතේ , කටේ  ගහගෙන බාගෙට ඇඳගත් අර, ඉන්දියන් සිනමාවේ ඇඟේ වතුර හලා ගෙන ෂූටින්  වලට ඉන්න නිලියෝ වගේ කාන්තාවොලු.
ඒකෙ  නායකයා පොඩ්ඩක් සියල්ල දත් පොරක් වගේලු.  ඉතින් මේ සියල්ල දත් කියනවලු වෙළෙන්දාට "මේ හලෝ ඔහෙට පිස්සුද මේ වතුර ලොරි ගණන් (සමාවෙන්න ගැල්  ගණන්)  පුරවන් යන්නේ. පව් නේ හලෝ මේ අහිංසක හරක් ටික. තනිකරම සත්ව හිංසාව නේ. අලි පැටව් හිර කරන්  ඉන්නවට වඩා දරුණුයි නේ සනා. අර තව ටිකක් දුරින් සිරා ක්ෂේම භූමියක් නේ තියෙන්නේ. වතුර ඕනෑ තරම් නාන්නද, දිය බුං ගහන්නද ඕන එකක්. නෙලුම් අල ද රට ඉඳි ද ඕන තරම්.  විසි කරනවා ඔය වතුර. නිදහස් කරනවා ඔය අහිංසක සත්තු ඔය බරින් " දුන්න නේද සිරා  ටෝකක්. අර විමලෙට එහා. ඉතින් කොහෙද වෙළෙන්දා කෑව ලණුව.  කෑව  නෙමේ ගිල්ල. මිනිහට අර නගරේ වැසියෝ දුන්න සුනාමි වෝනින් එකවත් ගණන් ගත්තේ නැහැ. වතුර ටික බිමට හලලා කෑමත් විසි කරල ගියා  සොමියේ. ගියා  තමයි. යනවා යනවා මොන වතුරද? හරකුන්ටත්  වතුර නැතුව අනාතයි. මොන ගැල්  අදිනවද. ඉතින් කට්ටිය වෙළෙන්දටත්  බැන බැන  වැටුන තැන නිදි. මෙන්න ඉතින් රෑ වෙලා යක්කු ටික කසියා බෝතල් ටිකකුත් අරන් නියම වේශයෙන්ම ඇවිල්ල ගණන් බේරුවලු ඇටකටු විතරක් ඉතුරු වෙන්නම.

ඔය අස්සේ අපේ දෙවෙනි වෙළෙන්දා යන්න ලෑස්තියලු. පොර යන්න කලින්ම දුන්නලු කතාවක්. " මේ කට්ටිය යන ගමනේ මුකුත් විස පැළෑටි කන්න  එපා විස සත්තු ඉන්නවා පරිස්සමින්. මන් අහල තියෙනවා වතුර , ක්ෂේම භුමි නැති කතරක් ගැන. යක්කු, කුම්භාණ්ඩයෝ පෙරේතයෝ ඉන්නවලු. එයි ගැල් පෙළපාලියේ ඇමතිකම් දෙන්න. ඒවා අල්ලස්. අහු වෙන්න එපා. කැසිනෝ ගහන්න කතා කරයි, අලුත් හයිවේ එකක් දාන්න කතා කරයි කාන්තාරේ හරහා. 10% දෙන්නන් කියයි. අහුවෙන්න නම් එපා පුතෝ. වතුර එහෙම කටේ තියන්න එපා මගෙන් නාහ. "
ඉතින් කට්ටිය ගියාලු. කාන්තාරේටත් ආවලු. අර වගේම ආවලු සියල්ල දත් යක් නායකයි රෑනයි වතුර හලාගෙන එහෙම. අපේ වෙළෙන්දා කීවලු කට්ටියට, මුන්ගේ ඇස් එලියට පනින්න වගේ. හොඳටම රතුයි. කසිය ගහපු ගොබිලො වගේ පෙන්නේ. වලියෙන් වගේ ටෝක දෙන්නේ. ගණන්  නොගෙන ඉමු කියල.  ඒ වුනාට කට්ටිය කුණු කුණු ගානවලු. වතුර තියේ නම් මොකටද මේව උස්ස ගෙන යන්නේ හෙම කියල. එතන හිටපු ඇම්නෙස්ටි ඉන්ටනැෂනල් එකේද කොහෙද බුවෙක් කිව්වලු , අපොයි මේ හරකුන්ගේ මානුෂික අයිතිවාසිකම් කඩ වෙනවනේ . වතුර හෙම විසි කරලා සහනයක් දෙමු කියල. බිබිසියෙන් ගමන කවර් කරන්න ආපු බුවා කියනවලු අපේ අසන්නෝ අප්සෙට් ගහයි මේ සත්ව හිංසනය, මානුෂික අයිතිවාසිකම් කඩ වෙනවට හෙම. වෙළඳ නායකයත් ආයේ අඟලක් හෙල්ලෙන්නේ නැතිව ගත්ත තීරණේ වෙනස් කරන්නේ නැතිව  කිවලු "අපි මේ  නියම වෙළෙන්දෝ. මිනිස්සු සත්තු ඔක්කොම අපි බලා  ගන්නවා. හම්බ වෙනකන් අතේ තියෙන දේ විසි කරන්නේ නැහැ." කියල ගමන ගියාලු. මෙන්න දුර යනකොට හම්බ වුනාලු යක්කු ගේම දුන්න ජනතාව, සත්තු ටික එක්කම . ඇටකටුයි කරත්ත රෝදයි විතරලු. පොරවල් රවුමට කරත්ත නවත්තල.  රාත්‍රිය පුරා  ගාඩ් එකක් දාල , උදේ එන කම් හොඳට නිදා ගෙන ගමන ගියාලු. අරගෙන ගිය භාණ්ඩත් විකුණා ගත්තලු.

ඉතින් මේ ජාතක කතාවේ මොරාල් එක මොකක්ද කියනවා නම් , අශිෂ්ටයන් මොන විධියෙන් ආවත් රැවටෙන්න හොඳ නෑ  මල්ලිලා නංගිලා. උන් දෙන මොත්තේ අහල රැවටිලා අහු වෙන්න එපා. කට්ටිය ඇටකටු ටික විතරයි ඉතුරු කරන්නේ.
හොඳ නායකයෙක් නම් අශිෂ්ටයන්ට යක්කුන්ට ඉඩ නොදී තමන්ගේ මිනිස්සු බේරා  ගෙන යන ගමන යන්න දන්නවා.  එහෙම නායකයෝ හොයා ගන්න එකයි ප්‍රශ්නේ.
-අශිෂ්ටයන් අතරේ ශිෂ්ටකම් පෑම මාරක විහිළුවකි කියල කිව්වේ යාළුවෙක්. 

Thursday 16 April 2015

කඩාකප්පල් කාරී ක්‍රියාවක්

හිතවත් මිත්‍රවරුනි,
පෙරේදා  දිනයේ සවස මට ලංකා නිව්ස් වෙබ් අඩවියට හා නෙලුම් යායට  ඇතුළු විය නොහැකි සේ වාරණයක් දමා  තිබුණි.  මා  මුලින් සිතුවේ යහපාලන ආණ්ඩුව අන්තිමේ දී පරණ ආණ්ඩුවේ ඇත්තන් ගෙන් (දැන් එකතු වී සිටින)  උපදෙස් ගෙන  ලංකාවේ පමණක් නොව කැමරන්ට කියා එංගලන්තයේද තහනම් කොරලා කියාය.

නමුත් බලාගෙන යනවිට මට දැන  ගන්නට ලැබුනේ ලන්ඩන් බ්රුටස්,  ශ්‍රී ලංකාවේ ගෝමයා  හා නේපාලයේ කුමී හරහා දියත් කල කුමන්ත්‍රණයකින් මගේ කිර්ති නාමයට හානිකර අයුරින් ලිපියක් පල කර ඇති බවයි. මෙයත් දැන  ගන්නට ලැබුනේ ෆේස්බුක් එකේ අනවරතයෙන් සැරි සරණ මගේ ෆේස්බුක් යහළුවෙක් මා  කෙරේ අනුකම්පාවෙන් උදේ පාන්දර තද නින්දේ සිටියදී නැගිට්ටවා කරන ලද දැනුම් දීමෙනි.

මගේ වයස ගැන මම බස්සි, දිලා හෝ වෙනත් කිසිදු බ්ලොග් ලියන්නියකට  කිසි දෙයක් කවදාවත් කියා නැති අතර මෙය හුදු ද්වේශ සහගත ලෙස බ්ලොග් ලියන්නියන් අතරේ මගේ ඇති ජනප්‍රිය භාවයට අකුල් හෙලීමට  ලියන ලද්දක් බව පෙනී යයි.

එසේම මගේ නම වෙනුවට වෙනත් නම් වලින් මා   ඇමතීම තරයේ හෙළා දකිමි.

මට වයස අවුරුදු පනහක් වුන ඊයේ සුපුරුදු ලෙස මගේ මිතුරන් සමග ටෙකිලා බෝතලයකට වග කියමින් ඉතා වගකීමෙන් යුතුව සැමරූ  උපන් දිනය ට මේ මඩ  ප්‍රහාරය එල්ල කිරීම පිළිබඳව අද සිට නීති මගින් ක්‍රියා කර මොවුන්ට දැඩි දඬුවම් ලබා දීමට උදව් කරන  මෙන් බ්ලොගා ලා ගෙන් කරුණාවෙන් ඉල්ලා සිටිමි.

එම ලිපිය මෙතන ඇති අතර මෙය ඉවත් නොකල හොත් අද සිට නෙලුන් යාය වර්ජනය කොරමි.

http://sinhala.lankanewsweb.net/features/2013-07-01-07-49-32/16580-2015-04-15-10-23-53

මිට කොළඹ ගමයා

You must become an old man in good time if you wish to be an old man long.

Marcus Aurelius

Tuesday 14 April 2015

දෙවන මොන්කාඩා ප්‍රහාරය 2016 මාර්තු 26

ශ්‍රී ලංකා බ්ලොග් සංසදය හා නෙලුම් යාය විසින් සංවිධානය කෙරෙන දෙවන බ්ලොග් සම්මාන උළෙල 2016 මාර්තු 26 වන සෙනසුරාදා සවස 2.30 සිට පැවැත්වීමට තීරණය කරන ලදී.

මේ සඳහාතෝරා ගනු ලබන බ්ලොග් ලිපි ආදිය වර්ගීකරණ එකොළහකට  අයත් වනු ඇත. ඒ නම් දේශපාලන, කවි/නිසඳැස් , කාලීන සංවාද, කෙටි කථා , ඡායාරූප, තාක්ෂණ, විද්‍යා, හයිකු, සංචාරක, සංගීතය හා  ඉතිහාස   යනුවෙනි. මෙයින් දේශපාලන, කවි/නිසඳැස් , කාලීන සංවාද, කෙටි කථා , සංචාරක යන අංග වලට එක, දෙක, සහ  තුන ස්ථාන තෝරනු ඇත.

එසේම වසරේ ජනප්‍රියම (හොඳම) බ්ලෝග කරුවාද තෝරනු  ලබන අතර එයට පළමු , දෙවන සහ තුන්වන  ස්ථාන තෝරා  ගනු ඇත.

ශ්‍රී ලංකා බ්ලොග් සංසදයේ සාමාජික බ්ලොග් කරුවන් ගෙන් , නෙලුම් යායේ හා ලංකානිව්ස්වෙබ් අඩවියේ නෙලුම් යාය, සිව්මන්සල , සයිබර් පවුර යන අංගයන්හි පලවන බ්ලොග් ලිපි ආදිය  අතුරෙන් ජයග්‍රාහකයන් තෝරනු ලැබේ.  මෙහිදී ලිපියකට කොපමණ තරමකට සංවාද කෙරෙන්නේද යන්න, ලිපි හා බ්ලොග් වල ජනප්‍රියත්වය, කාලීන මාතෘකාවකට ඇති වැදගත්කම ආදිය වැනි නිර්ණායකයන්ද භාවිතා කෙරෙනු ඇත.

ශ්‍රී ලංකා බ්ලොග් සංසදයට බැඳීම සඳහා හෝ නෙලුම් යාය, ලංකානිව්ස්වෙබ්/නෙළුම් යාය  ට පල කිරීමට, ඔබේ බ්ලොග් යොමු කරන්න පහත සඳහන් ලිපිනයන්ට:
editor@nelumyaya.com
editor@lankanewsweb.com

ශ්‍රී ලංකා බ්ලොග් සංසදයට බැඳීමට පහත සදහන් බ්ලොග් කරුවන්ගේ අඩවි වලින් විමසීමක් කිරීමෙන් ද පුළුවන.
මාතලන්, කල්‍යාණ  මිත්‍ර, බස්සි ගේ නවාතැන , දිලා ගේ ලෝකය, මනා  ගේ පින්තාරුව, ඉවාන් පව්ලුෂා, අටම්පහුර, අජිත් පැරකුම් (W3ලංකා) හෝ  ප්‍රාජේ.

සම්මාන සඳහා වන ත්‍යාග පිලිබඳ පැහැදිලි කිරීමක් ඉදිරියේදී කරන්නෙමු.

ශ්‍රී ලංකා බ්ලොග් සංසදයට එක්වන ලෙස අප ඔබට ආරාධනා කරන්නෙමු.

ඔබ සැමට සුභ නව වසරක්.

- සංස්කාරක නෙලුම් යාය






Friday 10 April 2015

නෙළුම් යායේ නොකළ කතාව හා ජයග්‍රහණයට හේතුව

ඉහල පන්ති වල ඉන්න කොට ඒ දවස් වල ඉස්කෝලේ (වැරදුනා ) කොලේජ් එක ඇරුනහම වලක්  බහින්න තැනක් හොයනවා නේ. පාඩම් වැඩ වලට අමතරව. මේ කොලේජ් කතාවත් අපේ රෝයල් ගිය බුවෙක් තමා  කිව්වේ. මම ඉස්කෝලේ ගියේ රෝයල් කිව්වහම මෑන් ඇහුව මම ගියේ පොළොන්නරුවේ රෝයල් එකටද කියල. ඒකට හේතුව මම "ඉස්කෝලේ ගිය එක " කියල කිව්ව නිසා. ඉතින්
මට පොර දුන්න අවවාදය තමයි මීට  පස්සේ කියපන් කොලේජ් ගියයි කියල. කොහෙද රෝයල් ගියත් බයියනේ. ඉස්කෝලේ කියලමයි කියවෙන්නේ.

ඉතින් මේ වල ගැන කිව්වම දැන් මේ මාතලන්ට, ඉවානයලට, බස්සිලට ඉතින් තියෙනවනේ KFC, මැක්ඩොනල්ඩ්ස්, පිට්සා හට් වගේ තැන්  වල බහින්න. අපිට තිබ්බේ නැහැ ඒ කාලේ  එහෙම තැන්. ඉතින් ඉස්සෙල්ලම බැලුවා අර මල් පාරේ (flower road ) එකේ ලේඩිස් කොලේජ් එක ඉස්සරහ තියෙන ඇමෙරිකන් සෙන්ටර් එකට සෙට් වෙන්න. (මේක දැන් එතන නැහැ. ගාලු පාරේ තියෙන්නේ). ඉතින් චෙස් අතක් හෙම ඇදල සෙට් වෙන්න බැලුවා. ම්හු ..ඩිප්ලොමැට් පොරවල්  ගේ ළමයි කස්ටිය, ඇමතිලගේ දුල පුතාල සෙට් එක එතන බහිරවයෝ වගේ ලැගන්  ඉන්නවා. ගෙවල් වල කතා නොකරන නිසා කඩ්ඩත් එච්චරම පොලිෂ් නැහැ. මං  පිටස්තරය එතනින් කැපුන. ඊළඟට සෙට් වෙන්න බැලුවේ බ්‍රිටිෂ් කවුන්සිල් එකට. අර සන්තෑසියම තමයි. පොතකුත් අරන් කියවල, ආපහු  ගිහිල්ල දීලා එතනිනුත් කැපුනා. ඒ දවස්වල අපි වාගේ වැඩි  සල්ලි බාගේ  නැති  සිංහළ  පවුල් වල එවුන් සෙට් වෙන්නේ නැතුව වගේ එතනට. සෙට් වෙන එවුනුත් ඉන්නවා. ඒ අපි නෙවේ.  අපි පිටස්තරයෝ.
ඊළගට සෙට් වෙන්න  බැලුවේ පොඩි කාලේ ඉඳන් අර නිකන් පෙන්වන ෆිල්ම් බලන්න යන තැනට.  සෝවියට් සංස්කෘතික මන්දිරේ,  අර ගංගාරාමෙට යන පාරේ  බිෂොප් කොලේජ් එක ගාව. එතන පරණ කොමියුනිස් සමසමාජ ඈයන් ගේ දු දරු රොත්තක් පිරිලා. තව එතනම අවුරුදු ගණන් ලැගල ඉන්න කස්ටියකුත් හිටිය. උන් නම් ටිකක් හොඳයි කියල හිතුන.  කඩ්ඩ වැඩිය  දාන්නේ  නැහැ.  එතැන රෂියන් නේ උගන් වන්නේ. හැබැයි උනුත් අලුතෙන් එන එවුන්ට කොස්ස. අපි පිටස්තරයෝ කීප  දෙනෙක් සෙට් වුනා. නව සමසමාජේ පොරක්, යංග්  ස්පාටසිස්ට් ලිග් පොරවල්, හිටපු ජවිපෙ , ඉන්න ජවිපෙ, යු ඇන්පී,  සිරි ලංකා  පොරවල් වගේ. හැබැයි අර බහිරවයෝ වගේ මුල් බැසගෙන ඉන්න පොරවලින් ඉතින් වලිම තමා. පස්සේ තමා හේතුව එලියට ආවේ. මේ සෝවියට් ශිෂ්‍යත්ව පෝලිම නොවැ. අර බහිරවයෝ රැල අදිනවා ලෙඩේ එතනට මොකා  ආවත්. ඔය අස්සේ කවුද කීව  එතන හිටි නෙත්තය  ඒවා විකුනනවා කියලත්.

දැන් ඉතින් යන්නේ කොහෙද? කොච්චර දක්ෂිණාංශික කීවත්, දැනුමට බයයි කීවත් ජේ ආර් ලොක්ක හොඳ වැඩක් කලා .  අර යාපනේ පුස්තකාලේ ගිනි තියල නරක වැඩක් කරලා - ඊට පස්සේ - කල හොඳ වැඩක්. අපේ අර කෞතුකාගාරේ ඉස්සරහ හරියේ තිබිච්ච පරණ මහජන පුස්තකාලේ වෙනුවට හදල දුන්න නොව නියම සිරා ගොඩ නැගිල්ලක්. ඒකෙ  තියෙන පොත්  ගොඩ. පත්තර ශාලාව.  ඒ මදිවට වලට කැන්ටිමක්. ඒලෙවල් පාඩම් කරන්න ශාලා. කියල වැඩක් නැහැ.  මෙන්න ඉතින් පිටස්තරයෝ රෑන  එතනට සෙට් වුණා.
ඉතින් මට මේ අපේ බ්ලොග් කාරයෝ ගැන හිතෙන්නෙත් එහෙමමයි. රේනගේ එක, වෙල්ගමගේ එක, අලස් ගේ එක , අසංගගේ  එක වගේ පුද්ගලික "එකවල්", අරTN, අරවාහිනී, මේ වෙබ් අඩවි වල නැතුව එළියේ ඉන්න පිටස්තරයෝ රෑනක් අන්තර් ජාලයේ එකතු වෙලා , නිව්ස් එකක් , ලිපියක්, කයියක් දාන ගමන් වලකුත් බහිනවා. මේකේ තියෙන ආතල් එක තේරෙන්නෙම එතන හිටියොත් විතරයි.

ඉතින් පිටස්තරයෝ එකතු වෙන තැන කට්ටියක් නිර්මාණ සංවාද කුලකය කියල එකක්  හදල ඔය සාකච්චා, සාහිත්‍ය කෘති විවේචන, සිනමා විවේචන යනවා. ඔතනට පස්සේ අර අහවල් රතු පක්සේ කට්ටියකුත් සෙට් වුණා. හැබැයි ඒ සමහරුන්ට වාද කරන්න පොයින්ට් නෑ. වැඩිය කියවන කට්ටියත් නෙමේ වගේ. කියවන්නේ දෙන දේ විතරද කොහෙද. ඒ නිසා වාදය උණුසුම් වෙනකොට උන් පුටු වලින් තමා වාද කලේ. පුටු අඬු කඩලා අරන් (අපරාදේ අර හොඳ පුටු ) ඒ ගොල්ල දන්නා වාදෙට  සෙට් වෙනකොට අපි වාදය කකුල් දෙකට දීල දුවන්න ගත්ත.  වැටෙන් පැනල විහාර මහා දේවි  පාක් එකට දාල දුවනවා. පඳුරු අස්සේ හැංගෙන්නත්  බැහැ. පාඩම් කරන්න ආපු ගෑල්ලමෙක් කීං ගාල කෑ ගහනවා. පඳුරේ  ඉන්න කොල්ල ගහන්න එනවා විකෘතියෙක් කියල හිතල. දුවන කොට උන්ගේ කකුල් වලත් පැටලෙනවා. ඇයි  කකුල් විතරනේ එළියේ තියෙන්නේ.  ඉතින් මොනවාද දුවල දුවල ටවුන් හෝල් එක ගාව  138 ක එල්ලෙනවා.

දැන් බ්ලොග් වල කොමෙන්ට් දාන යාලුවෝ, වාද කරන එවුන්, සංවාද කරන එවුන් ඔක්කොමත් ඉන්නවා. ඒ අතරේ ඉන්නවා තනිකර ඇනයක්ම වෙන ඇනෝලත්. ඒ ගොල්ලන්ට ඕනේ කෑ ගහල වන කරලා පුටු කඩලා බ්ලොගේ නවත්වන්න. මොකද සංවාද කරන්න තරම් සංයමයක්  නෑ.  හැබැයි අපට තියෙන්නේ ඉස්සර වගේ දුවන්න නෙමේ. සංසදයක් හදල සංවිධානය වෙන්න. අපි එකතු වෙනකොට අපේ ශක්තිය වැඩියි.

මේ රටේ වෙබ් අඩවි මර්ධනය කරපු කාලයක්, තහනම් කරපු කාලයක් තිබුන කිසි හේතුවක් නැතුව.  ලංකානිව්ස්වෙබ් ඇතුළු තහනම් කරපු අඩවි වලට ඇවිත් බැලුවේ ෆේස්බුක් වගේ සමාජ ජාල වලින් . නැත්නම් පිටරට වල ඉන්න සහෘදයෝ  විතරයි. මේව නිදහස් වෙබ් අඩවි. නමුත් ඒවා එක එක පැති  වලට තල්ලු කලේ මේ තේරුමක් නැති වාරණ. බොහොමයක් බ්ලොග් කරුවන් ඔවුන්ගේ  නිර්මාණ පල කරන්න  දුන්න. අපි ඔවුන් සමග අපේ පාඨක  ජනතාව බෙදා ගත්ත. එහෙම කලෙත් වඩා  නිදහස් මාධ්‍ය භාවිතයක් ඇති වෙයි කියල හිතා ගෙන. ඒ ජයග්‍රහණයතමා  මේ සමරන්නේ. එයට උර දුන් කට්ටියකට සම්මාන දීල මේ පුරවැසි ජන මාධ්‍යය වඩාත් සමාජ ගත කරන්න.

පසු සටහන:
මේ වැඩ සටහනේදී මගේ කතාව කෙසේ වෙතත් අහන්න පුල පුලා බලා  සිටි නාලක ගුණවර්ධනගේ කතාව  වත් අජිත් පැරකුම් ගේ කතාව වත් අහන්න ලැබුනේ නැහැ. වීඩියෝ වල හඬ වල නැහැ. සංගීත කණ්ඩායමේ සින්දු ටික නිවී හැනහිල්ලේ බලන්න හිටිය. ඒවා රෙකොර්ඩ් වෙලත් නැහැ. මොකක්ද වුනේ කියල මම දන්නෙත් නැහැ.  ලබන පාරවත්  බලමු.
අපට වුවමනා  වුනේ සම්ප්‍රදායෙන් පිට යමක් කරන්න. ඒක 100% සාර්ථක නොවෙන්න ඇති.
මේ දේශනය  කිරීමට  ප්‍රථමයෙන් Black  Eyed Peas කණ්ඩායමේ Let's get started ගීතයේ මුල් කොටස වාදනය කරන්නයි හිටිය.  පැයක් පරක්කු වුන නිසා වාදනය වුනේ නැහැ. ජාතික ගීයේ ප්‍රශ්නයකට නොවේ.
එය පහත දැක්වෙනවා.
Let's get it started in here...

And the bass keeps runnin' runnin', and runnin' runnin', and runnin' runnin', and runnin' runnin',
And runnin' runnin', and runnin' runnin', and runnin' runnin', and runnin' runnin', and...

In this context, there's no disrespect, so, when I bust my rhyme, you break your necks.
We got five minutes for us to disconnect, from all intellect collect the rhythm effect.
So lose an inhibition, follow your intuition, free your inner soul and break away from tradition.
Cause when we beat out, girl it's pulling without.
You wouldn't believe how we wow shit out.
Burn it till it's burned out.
Turn it till it's turned out.
Act up from north, west, east, south.

[Chorus:]
Everybody (yeah), everybody (yeah), let's get into it (yeah), get stupid (c'mon)
Get it started (c'mon), get it started (yeah), get it started!
Let's get it started (ha), let's get it started in here.
Let's get it started (ha), let's get it started in here.
Let's get it started (ha), let's get it started in here.




Wednesday 8 April 2015

අන්තරේට කඳුළු ගෑස් - රාජකීයට ටැබ් - ඇත්තටම රනිල්ට පිස්සුද

අන්තරේ ගුටි කන්න පෙළපාලි යාම වැරදි බවත්, අරගල ක්‍රම වෙනස් කල යුතු බවත් කියා කට ගත්තා  විතරය. රනිල් සිසුන්ට කඳුළු ගෑස් දීමට අමතරව තවත් අංඤ කොරොස් කතාවක් ද කියා තිබේ. ඒ පාසල් සිසුන් සඳහා ටැබ් ලබා දෙන බවත් මුල් අදියරේදී රාජකීය විදුහලට ටැබ් 1000ක් දෙන බවත්ය. (යොමුව ලංකා ඩේලි ).
එක්කෝ රනිල්ට පිස්සුය. එහෙම නැත්නම් රනිල්ට උපදෙස් දෙන අයට පිස්සුය.

මා උගත්තේත් රාජකීය විදුහලේය. උගත් විදුහල් මාතාවට ගරු කිරීමේත් එයට නොයෙකුත් පහසුකම් හැකි ආකාරයෙන් ලබා දීමේත් ගැටලුවක් මට නැත. එය සතුටට කාරණයකි. බොහෝ අය පෞද්ගලිකවද තමන් උගත් විදුහල් වලට හා එහි නවක සිසුන්ට උදව් කරති. රාජකීය විදුහලේ නොයකුත් වසර වල උගත් කණ්ඩායම් 82, 83, 84 ආදී වශයෙන් මේ උදව් කරති.

නමුත් රනිල් වික්‍රමසිංහ මහතා අමතක කරන්නේ ඔහු අගමැති වුයේ රාජකීය විදුහලට හෝ කොළඹට පමණක් නොව මුළු රටටම බවය. අන්තරේ සිසුන් කපා  ඇති මහපොළ සහනාධාර ඉල්ලා පෙළපාලි යද්දී එයට කඳුළු ගෑස් ගැසුවේ රනිල්ගේ උවමනාවට විය හැකිය. සිසුන් රජයේ හෝ පුද්ගලික දේපලට  හානි නොකරන තාක් කල් පොලිසියට ඔවුන්ට කඳුළු ගෑස් ගැසීමට හෝ බැටන් චාර්ජ් කිරීමට හේතුවක් නැත.  සිසු ඉල්ලීම් මොනවාද යන්න ගැන  පසන් ජයතිලක ලංකානිව්ස්වෙබ් හි  ලියු ලිපියක  දක්වා ඇත.

එසේ වුවත්  රනිල් සිසුන් ඉල්ලා සිටින සහන වලින් කිහිපයක් හෝ ලබා නොදී ටැබ් ලබා දීමට කතා කරයි. ඇත්තෙන්ම අප විසින් බ්ලොග් හා පුරවැසි ජන මාධ්‍ය ප්‍රචලිත කිරීමට උත්සාහ දරන අවධියක ටැබ් ලබා දීම පැසසිය යුත්තකි. නමුත් රාජකීය විද්‍යාලයටම නොවේ. එසේ නම් තෝරාගත් විදුහල් කිහිපයකට එය ප්‍රදානය කල හැකිය. නො එසේ නම් තෝරාගත් විශ්ව විද්‍යාල සිසුන් කිහිප දෙනෙකුට ප්‍රදානය කල හැකිය. එසේත් නැතිනම් මහජන පුස්තකාලය, හා අනෙකුත් විශ්ව විද්‍යාල වල පුස්තකාලවල තබා පොදු ප්‍රයෝජනය සඳහා භාවිතයාට ගැනීමට  පුළුවන.
 රනිල්ට ඔහු දෙනවා යයි කියන මේ ටැබ් රාජකීය විදුහලට  මුලින් දීමට පොරොන්දු වීම සම්බන්ධයෙන් කිසිම සාධාරණ  හේතුවක් මට නොපෙනේ.
1977 ජේ ආර් ජයවර්ධන මහතා චන්දය දිනු පසු රාජකීය විදුහලට පැමිණියේය. එතැන රනිල්ද තරුණ ඇමතිවරයෙකු වශයෙන් සිටියා  මතකය. ලලිත් ඇතුලත්මුදලිද සිටියේය. ජේ ආර් කලේ අපට (රාජකීය විදුහලට )  දින තුනක් නිවාඩු දීමයි. එය ඔහුගේ අතින්  පයින් වත් රටේ ජනතාවගේ බදු මුදලින් යන්නක් වත් නොවේ.  ලලිත් ඇතුලත්මුදලි නමැති ආදී රාජකියයා මහපොළ ඇති කර දිළිඳු සිසුන්ට උදව් කළේය. දැන් මේ රජය එය කප්පාදු කරනවා යැයි  චෝදනාවක් පවතී.
 රනිල්ට චන්ද අවශ්‍ය නම්, ජනතා සහයෝගය අවශ්‍යනම් කල යුතුව තිබුනේ ආදී රාජකීයයෙකු ඇති කල මහපොළ ශිෂ්‍යත්වය වැඩි කරනවා යයි කීමය. නැතිව මිනිසුන්ගේ බදු මුදලින් තමන් උගත් පාසලට ටැබ් ලබා දීම නොවේ.
  රාජකීය  විදුහල් ශිෂ්‍යන්ට ටැබ් දුන්නා කියා ඔවුන්ගේ  දෙමාපියන්වත් රනිල්ට චන්දයේ දේ යයි සැක සහිතය.
-අජිත් ධර්මකීර්ති
(මේ ලිපියේ සඳහන් දේ කර්තෘගේ පෞද්ගලික දේශපාලන අදහස් පමණි.  වෙනත් කිසිම වෙබ් අඩවියක හෝ පක්ෂයක මතවාදයක් මෙයින් නිරූපණය  නොකෙරේ.)

Friday 3 April 2015

නෙළුම් යාය සම්මාන උළෙලේදී කළ හැඳින්වීම

ආයුබෝවන්,  අපගේ ආරාධනය පිළිගෙන අද දින මෙහි සපැමිණි ආරාධිතයන්  ඇතුළු මෙහි පැමිණි ඔබ සැමගෙන් අවසරයි , නෙලුම් යාය සහෘද සමුහය වෙනුවෙන් අපි ඔබ සැවොම සාදරයෙන් පිලිගන්නවා.
සම්මාන උළෙල
පුරවැසි ජනමාධ්‍ය භාවිතාව  ප්‍රචලිත කිරීමටත් , බ්ලොග් කරුවන් සමාජයේ දැනුම් නිම්තෙර පුළුල් කිරීම උදෙසා කරන සේවය ඇගයීමටත් බ්ලොග් ලෝකයේ නුදුටු මානයන් හඳුන්වා දීමට  නෙලුම් යාය සහෘද සමුහය සංවිධානය කරන බ්ලොග් උළෙල තමා මේ. 

අද දින ආරාධිතයෙකු ලෙස මෙහි පැමිණෙන යහපාලන අමාත්‍ය කරු ජයසුරිය මහතා දැන් දෙවරක්ම  වගේ තොරතුරු දැන  ගැනීමේ පනත පාර්ලිමේන්තුවට ගෙනාව . එය දෙවරක් ප්‍රතික්ෂේප වුණා  . අපි හිතනවා මේ රජය යටතේ එතුමාට මෙය සම්මත කර  ඉදිරියට ගෙනයාමට හැකි වේවි කියල. තොරතුරු දැන  ගැනීමේ පනත,  මාධ්‍ය නිදහස සුරැකීම හා පුරවැසි මාධ්‍යකරණය යටතේ ඉතා වැදගත් වෙන පනතක්.

 බ්ලොග් ගැන
 අප දන්නවා ඉංග්‍රීසි බ්ලොග් නම් සැහෙන කලක සිට ජනප්‍රියයි. සමහර ඉංග්‍රීසි බ්ලෝග වලින් මිලියන ගණන් මුදල් හම්බ කරන අයත් සිටිනවා. ඒ වගේම ජනතාවට අධ්‍යාපනය ලබා දෙන්න , තම මතය නිදහසේ පල කරන්නත්  මේ බ්ලොග් භාවිතා වෙනව. සිංහල බ්ලොග් පටන් ගත්තේ මන් හිතන්නේ 2004 වගේ කාලෙක. බොහොමයක් බ්ලොග් පටන් ගත්තේ රටේ පැවති  දේශපාලනය විමර්ශනය කරන ඒවා හැටියට. නමුත්  ඒවා වැඩිකල් දිව්වේ නැහැ. නොයෙකුත් තර්ජන ආව නිසා ගොඩක් ඒවා වැහුන. ටික දෙනෙක් වෙනත් රටවල සිට ආරූඪ නම් වලින් මේවා රැගෙන ගියා. 2010 වෙනකොට හැබැයි වැඩි දෙනෙක් සිංහල බ්ලොග් කරණයට යොමු වෙන්න පටන් ගත්ත. දැනට සිංහල බ්ලොග් 200 කට වඩා තිබෙනවා. (දේශකයාට අනුව 300කට වඩා).

විවිධ  මාතෘකා යටතේ දේශපාලනය, කෙටි  කතා , කවි, සංචාරක සටහන්. හමුදා කතා, නේවි  කතා, විහිළු කතා, පෞද්ගලික අත්දැකීම් මේ හැම දෙයක්ම බ්ලොග් වල පලවෙනවා. නොයෙකුත් මාධ්‍ය වලින් විටින් විට කිසියම් ප්‍රසිද්ධියක් ලබා දුන්නා කියලත් අපට අදහසක් තිබෙනවා. නමුත් මේක මෙතනින් එහාට මේ පුරවැසි මාධ්‍යකරණය සිටින  සිමිත පාඨක  පිරිසෙන් එහාට පුළුල් කිරීමේ සුදානමක් පෙනෙන්න
තිබුනේ නැහැ. ඉතාමත් නිර්මාණශීලි බ්ලොග් කරුවන් සිටියත් චානුක වත්තේගම, නාලක ගුණවර්ධන වැන්නන්  පෞද්ගලිකව  උදව් කලත්  ප්‍රධාන පෙලේ ජනමාධ්‍ය තුලින් ඉඩ දුන්නේ  පිලි ගැනීමක් ඇති  මාධ්‍යකරුවන්ට පමණයි. ඔවුන් ලියුවෙත් තිබෙන සම්ප්‍රදායික පුවත්පත් (වෙබ් හා වෙබ් නොවන )  හා රුපවාහිනියට වැඩ සටහන් ඉදිරිපත් කිරීමත් පමණයි.  නමුත් කිසියම් ධනවතුන් ප්‍රමාණයක් මේ මාධ්‍ය මිලදී ගැනීමත් සමග ඒවායේ නිදහස අහිමි වී යාමක්  දැඩි ලෙස පෙනුනා.

තර්ජන
අප  දන්නවා මිට අවුරුදු කීපයකට ඉහතදී 2011 වගේ කලෙක ලෝකයේ ප්‍රබලතම  සමාජ ජාලය වන facebook හරහා උතුරේ වැලි ගොඩ දැමීම් ගැන සටහනක් තියපු උතුරේ සමාජජාලා පුරවැසි මාධ්‍යකරුවෙක් එදිනම රාත්‍රියේ  හිසට  වෙඩි තබා ඝාතනය කල බව.
මෙතන දි අපට පෙනෙන්නේ තොරතුරු දැන ගැනීමේ අයිතිය සමාජයට ලැබෙනවාට බය වෙන්නේ , තැති ගන්නේ හොරු  සහ දුෂකයෝ බව.  පුවත්පතක පලකරනවට වඩා ලෝකය පුරා සමාජ ජාල තුලින් ප්‍රවෘත්තිය සැනෙකින් පැතිර යනවා. හොරු සහ දුෂකයන් ඊටත් වඩා බය ඒකට.

සංවාදයකදී සමහරවිට ආගමික නායකයෙකුට අපහාස කලාය  වරදවා වටහගෙන කියල තර්ජන කරන්න  එන අය  ඉන්නවා. මට එහෙම අවස්ථාවල් කිහිපයක් පසුගියදාත් ඇති වුණා. අපි දන්නවා යම් බ්ලොග් කරුවන්ට තර්ජන එල්ල වෙලා බ්ලොග් ලිවිම නැවැත්වූ බව පවා. මෙහිදී ක්‍රම  තිබෙනවා නාඳුනන (anonymous) විධිහට ආවත් ආපු ලිපිනය හොයා ගන්න.
බොහෝ රටවල මරණ තර්ජන කර තිබෙනවානම් පොලිසියට දන්වා එම විස්තරය සමග ගුගල් හෝ අන්තර් ජාල සැපයුම් කරුට  (ip provider) යැවු පසු ඔවුන් බැඳී සිටිනවා  තර්ජනය කල අයගේ විස්තර සපයන්න. ඉන්පසු නීතිමය ක්‍රියා මාර්ග ගන්න පුළුවන්. එහෙම නීති නැත්නම් අපි ඉල්ලා සිටිනවා ශ්‍රී  ලංකාවේ එය ක්‍රියාත්මක කල යුතුයි කියල.

බට්ටි
උප්පැන්න සහතිකයක් නැති හැඳුනුම්පතක් නැති සහ සමාජයේ අවමන් සහගත චරිත සහතිකයක් ඇති ලෝකයේ පැරණිම වෘත්තියේ යෙදුන යයි කියන රත්න පුරේ බට්ටි (ඩබ්ලිව් ඒ කාන්ති ) නමැති කාන්තාවට වූ අසාධාරණයේදී නීතියේ මුදුන්මල්කඩ වන ශේෂ්ඨාධිකරණය වෙත  යුක්තිය පසිඳලීම සඳහා  රැගෙන ගියේ පුරවැසි  ජන මාධ්‍ය. එය පුරවැසි මාධ්‍යකරුවෙකු විසින් සමාජ ජාල ගත කලා. දහස් ගණනක් ඉතා සුළු කාලයකදී එය නැරඹුවා.  සමාජ ජාල හා පුරවැසි මාධ්‍ය වල ප්‍රබලත්වය මින් පැහැදිලි වෙනවා.
එය සංකේතවත් කරන්න බට්ටි ගැන ලියු කවියකට අපි අද සම්මානයක් දෙනවා.

නෙලුම් යාය
නෙලුම් යායේ මුලදී පල කලේ සුනිලා අබේසේකරගේ  හා තවත් දෙතුන් දෙනෙකුගේ ලිපි කවි සංකල්පනා පමණයි. බ්ලොග් වලට ඇවිත්  බලන්නේ අහම්බෙන්. එහෙම  නැත්නම් අපි ලින්ක්-යොමුව  යවන යහළුවන් පමණයි.නමුත් බ්ලොග් කියවගෙන යද්දී අපට වැටහුනා නෙළුම්  යායේ පල කරන බ්ලොග් ලිපි වලට සැහෙන ප්‍රතිචාරයක් ලැබෙන බව.  ඉතින් අපි  පටන් ගත්ත තවත් බ්ලොග්  පල කරන්න. නමුත් බ්ලොග් වල නිර්මාණාත්මක ලිපි , කෙටි කතා , කවි ආදිය  පලවෙන ප්‍රමාණයට බ්ලොග් 3ක ඉඩ ප්‍රමාණයක් මදි වුණා. දැන් 15ක් දානවා. ඒත්  අපට අවකාශය මදි.
ඉතා සතුටුයි කියන්න අද සිට  වඩා ඉඩ ප්‍රමාණයකට යනවා. www.nelumyaya.com තමයි ඒ.
එසේම ඉතා සතුටුයි කියන්න නෙළුම් යායේ සුපිපුණ නෙළුමක් තමා "රෑ ඉර පාන " අඩවිය. එහි බන්දුල නානායක්කාරවසම් අද මෙහි අපේ ආරාධනයෙන් පැමිණ සිටිනවා. 

http://www.rairapaana.com/

පහත සඳහන් වර්ගීකරණයෙන්. මේ හැම කැටගරියටම, වර්ගීකරණයටම ඉදිරියේදී සම්මාන දෙනවා.
දේශපාලන 
සංවාද (කාලීන) හෝ කාලීන සංවාද 
 කවි / නිසඳැස් 
 හයිකු 
 කෙටි කථා 
18 ප්ලස් 
 විද්‍යා ප්‍රබන්ධ 
 තාක්ෂණ 
  ඡායාරූප
නිවස 

සම්මාන 
අපි කල්පනා කලා මේ බ්ලොග් කරුවන්ට දිරි ගන්වන්න අපි සම්මානයක් පොත් වවුචර් ටිකක් වගේ මොනවා හරි දෙන්න ඕනේ.  හොඳ ලිපියක් කවියක් තෝරන්න ඕනේ කියල. අපෙන් බ්ලොග් කරුවෝ කවුරුවත් ඇහුවේ නැහැ ඉල්ලුවේ  නැහැ එහෙම දෙයක්. මෙතන තියෙන විශේෂත්වයත් එකයි. අපෙන් බල පෑමක් නැතුව තරඟයකට කියල ඉදිරිපත් නොකර අපි කියවන, කියවල සංවාද කරන බ්ලොග් වලට දෙන  සම්මානයක් මේක. 
අපිට  ඇත්තටම මෙතන මොකක්ද තියෙන ලාභය. අපට තියෙන ලාභය තමා මානව සම්පත. ලාභය තමා  පරිසරය. මේ දෙක තමා රැක ගන්න  ඕනේ. අපි හැකිතාක් උත්සාහ  කරනවා අපේ මානව සම්පත රටක මානව සම්පත දැනුවත් කරන්නේ කොහොමද කියන එක ගැන හොයන්න.  අපි කරන්නේ අවකාශය හදල දෙන එක විතරයි. 
අපිට ඕනේ අනිකුන්ගේ මතය ඉවසන, සංයමයෙන් සාකච්චා කරන , සාධනීය විවේචන   ඉදිරිපත් කරන අපහාසය හා උපහාසය අතර වෙනස හඳුනන බ්ලොග් ලෝකයක් නිර්මාණය කරන්න.
සමහරවිට මරණ තර්ජන ආවොත් අවිජිත් රෝය්ට වගේ රයිෆ්  බධාවී ට  වගේ කරු ජයසුරිය මහත්මයට  මේ දත්ත ඉදිරිපත් කිරිමේ  පනත වගේම අන්තර්ජාල නියාමනය සඳහා අවශ්‍ය කටයුතු කරන්න කියල ඉල්ලා සිටිනවා.

මොබයිල් 
මේ රටේ මොබයිල් ලක්ෂ ගාණක් තිබෙනවා. භාගෙකටත් වඩා  ඉන්ටෙනෙට්  පහසුකම් තිබෙනවා. ඊට අමතරව  ලැප්ටොප් භාවිතය  වැඩි වෙමින් යනව. facebook  වගේම බ්ලොග් නුත් දැන් ජනප්‍රිය වෙනවා. බසයක දුම්රියක  යන ගමන් පොඩි බ්ලොග් ලිපියක් මොබයිල් එකේ කියවල දාන්න  පුළුවන්. බ්ලොග් වලින් අපට ප්‍රවෘත්ති  දෙන්න පුළුවන්.

මේ ඉවාන් පව්ලුෂ "ත්‍රි වීල් " ගැන ලිපියක් ලියල තිබෙනවා. අපි දන්නේ නැහැ මේ උප සංස්කෘතිය කොපමණ නියෝජනය වෙනවද කියල. අපට ඕනේ ඔවුන් ඒවා කියවල විතරක් නෙමේ ත්‍රිවිල් බ්ලොග් නුත් පටන් ගන්න. ඔවුන්ට ඕන තරම් රසවත් කතා තියෙන්න පුළුවන්.  ජුකී මැෂින් මේ රටේ කොපමණ තිබෙනවද. ඒවා ගැන බ්ලොග් ලියන්නෙක් ඉන්නවා අටම්පහුර කියල. ඒ තවත් උප සංස්කෘතියක්. මේ තමා පුරවැසි මාධ්‍යකරණය පුරවැසියන් සඳහා වෙන් වුන. 

ශ්‍රී ලංකා  බ්ලොග් කරුවන්ගේ සංසදය
අපි කල්පනා කලා ශ්‍රී ලංකා  බ්ලොග් කරුවන්ගේ සංසදයක් හදන්න නෙලුම් යාය මුලික වෙලා. (ඊට පස්සේ හැම දිස්ත්‍රික්කයටම නියෝජනයක් දාල බ්ලොග් කරුවෝ දිස්ත්‍රික් මට්ටමින් එකතු කරලා ඔක්කොටම හමුදා පුහුනුවක්  දීල ආයුධ  දීල කර්නල් වරු පත් කරල රට හදන්න ) --මේ   විහිළුවක් කලේ  පරණවිතාන  මහත්මය භය වෙන්න  එපා. එහෙම දේවලුත් කරනවනේ. මෙන්න අපේ ප්‍රධාන ආයුධ  දෙක.  කීබෝර්ඩ් එක සහනිදහස් අත් දෙකක්. විලංගු දාල නැති අත් දෙකක්. 

මෙන්න අපේ කෑම්ප් එක හෙවත් පුංචි කාමරේ තියන බර අවි.

මේ බ්ලොග් කරුවන් දැනුම අරන් යයි මහා ජනතාවට. අපි මේ විප්ලවය පටන් ගමු. මේ නිදහස ඉදිරියට ගෙනියමු. 


ස්තූතිය 
 කරුණාරත්න  පරණවිතාන මහත්මයට මුලින්ම ස්තුති කරන්න ඕනේ අපට මේ තැන වෙලාව ලබා දීල අපිව දිරිමත් කලාට, මාධ්‍ය ලේකම්   මධුෂංක අබේගුණවර්ධන මහතාට. 
විශේෂයෙන්ම සඳහන් කලයුතු කරුණක් වන්නේ නෙලුම්යාය සංකල්පයක් හැටියට හදා වඩා පෝෂණය කර ඊට ඇවැසි අවකාශය , මුල්‍ය ශක්තිය ලබා දුන් ලංකානිව්ස්වෙබ් අඩවියේ කර්තෘ මණ්ඩල ප්‍රධානි නීතිඥ චන්දීම විතාන ආරච්චිට, තාක්ෂණ පහසුකම් සපයා දුන් ප්‍රවීන පරිගණක ඉංජිනේරුවන්  වන හර්ෂ ගෝමෙස් සහ රසික උඩුගමට, එතකොට අප සමග උරෙන් උර ගැටී , අපි කියන වැඩි පුරම චන්දිම  කියන බයිලා ඉවසා දර ගනිමින්   උදව් කරපු ලංකා ඩේලි  සුභාෂ් , හිමාෂි, උපුල්  හා සහ ලංකා මිරර් හි කැලුම් ශානිකා තුෂාරි ජූඩ් ප්‍රමුඛ වෙබ් මාධ්‍යවේදීන්ට.
මුදල් ත්‍යාග ලබා දීමෙන් අනුග්‍රහය දැක්වූ නෙෂන්වයිඩ්  බිල්ඩින් සොසයිටි එකට,  දේශනයෙන් සහභාගී වෙන නාලක ගුණවර්ධන මහතාට හා අජිත් පැරකුම් ජයසිංහට  හා ඉතාමත් සන්තොෂයි කියන්න මම තමන්ගේ  මතවාදයේ වී හෝ නොවී ඒ ගැන තැකීමක් නොකර  මට මෙන්ම තවත් බොහෝ අයටත් නැවත බ්ලොග් ලියන්න දිරි දුන් අපේ ආරාධනයෙන් සහභාගී වෙන දීප්ති කුමාර ගුණරත්න මහතාට,  විශේෂයෙන්ම 
මේ සියලුම බ්ලොග් කරුවන්ට, සම්මාන ලැබූ නොලැබූ ඔබ සියල්ලන්ටම සහ සහභාගිවන ආදරණිය ඔබ සැමට ස්තුතියි. 


So many of our dreams at first seems impossible, then they seem improbable, and then, when we summon the will, they soon become inevitable ~Christopher Reeve~

Wednesday 1 April 2015

අන්තරේට කඳුළු ගෑස් ගහන්න කිවූ යහපාලන පිස්සු හුටං කවුද?

ඊයේ අන්තරේ පෞද්ගලික විශ්ව විද්‍යාල වලට විරුද්ධව නැවතත් පෙළපාලි ගියේය. මේ පෙළපාලි අපි පුංචි කාලෙත් ගිය ඒවාය. වීරසුරිය සහෝදරයාට වෙඩි තැබූ වේලේ අපි පන්ති වර්ජනයකට සහභාගී වන්නට තරමට  ලොකු ළමයි නොවුවත් අපි හැකි අයුරින්  සහය දුන්නෙමු.

මගේ අදහස නම් ඊයේ කල යුතුව තිබුනේ  මේ සිසුන්ට කදුළු  ගෑස් ගැසීම නොවේ. ඔවුන්ට නිදහසේ තම ගමනාන්තය කරා යාමට ඉඩදී පෙත්සම භාර ගැනීමය. ඔවුන්ගේ ඉල්ලීම් බොහොමයක් විප්ලව කරන්නට රජය පෙරලන්නට කරන ඉල්ලීම් නොව අධ්‍යාපනය උදෙසා කරන සාධාරණ ඉල්ලීම්ය. නැවතත් එස් බී වන්නකුට ඇමති කමක් දුන් ආණ්ඩුවකට මේ සිසු ප්‍රශ්න වලට  පිළිතුරු දීමට යුතුකමක් තිබේ. විශ්ව විද්‍යාල සිසුන් ඉගෙන ගැනීමට අමතරව පෙළපාලි කිරීම, සංවාද කිරීම ආදිය කිරීම සාමාන්‍ය දෙයකි. එසේ නිදහස සඳහා සටන් කරන්නේ නැත්නම්, අසාධාරණය සඳහා  පෙනී සිටින්නේ නැත්නම් ඒවා විශ්ව විද්‍යාල නොවේ. 
විශ්ව විද්‍යාල යනු සංවාද කරන , මතවාදී ව ගැටෙන , නිර්මාණයන් බිහි වෙන නිදහසේ තෝතැනි විය යුතුය. දැන්වත්  රජයන් මේ කඳුළු ගෑස් ගැසීම් නවතා පෙළපාලි වලට, සාධාරණ සංවාද , විරෝධතා වලට ඉඩ දිය යුතුය. පොලිසිය යෙදවිය යුත්තේ සිසුන් මහජන දේපල හා පුද්ගලික දේපල වලට  වලට හානි කරන්නේ නම් පමණි. (බස් ගිනි තැබීම, වාහන වලට ගැසීම, රජෙ දේපල වලට හානි කිරීම,  ට්‍රාන්ස්ෆොමර පිච්චීම  වැනි)

එතෙක් මෙතෙක් පැවති මේ විශ්ව විද්‍යාල අරගල වලදී බොහෝ අය මිය ගියහ. ත්‍රිමා විතාන එහි මුල් තැනක් ගනී. පසුගිය රජය සමයේ පැවති අධ්‍යාපනයට  6% ක් ඉල්ලා විශ්ව විද්‍යාල ආචාර්ය සංගමයේ මෙහෙයවීමෙන් කල පෙළපාලියේදී සිසුන් දෙදෙනෙකු මිය ගියහ. ඔවුන්  ඒ රජයේ  මෙහෙයවීමෙන් මරා දැමුවාද එසේත් නැත්නම් රිය අනතුරකින් මැරුණාද යන්න අදත් ප්‍රශ්නයකි.
එම මරණ දෙකත් දැන් මරණ සංවත්සර වලට සීමා වී ඇත. මුලදී අන්තරේ බලය තිබු ජවිපෙ මගින් මුලින් මියගිය ශිෂ්‍යන් සමරුවත් දැන් මිය යන ශිෂ්‍යයන් සමරන්නේ පෙරටුගාමී සමාජවාදීන් ය. ඒ දැන් අන්තරේ බලය ඇත්තේ ඔවුන් අත  බැවිනි.
අන්තරේ නජිත් ඉන්දික තමන් විශ්ව විද්‍යාලයේ  ඉගෙනීම අත්හැර (full timer) දේශපාලනයට මුළු කාලය යොදවන බව කාලයකට ඉහතදී පැවසිය. එයට විවේචනයක් වශයෙන් මෙය ලියුවෙමි. (යොමුවට යන්න)
මේ ලිපියට ලැබුන කොමෙන්ට් තුනක් මෙහි පල කරමි.

මෙහි පළමු කොමෙන්ටුව දැනට ලංකාවේ විශ්ව විද්‍යාලයක් හමාර කර වෙනත් රටක විද්‍යා පර්යේෂකයෙකු වන බ්ලොග් කරුවෙකු ගෙනි. (දසයා)
//දේශපාලනය කරන්න ගිහින් ඉගැනීම කඩාකප්පල් කර ගන්න එකනම් හරිම අපරාදයක්. මොරටුවේ අපේ බැචෙක් හිටිය, හරිම හිතහොඳ කොල්ල. දුප්පත් පවුලකින් ආපු කොල්ල දේශපාලනේ නිසා ඩිග්රි එක ගත්තෙ අපි හැමෝටම වඩා අවුරුදු තුන හතරකට පස්සේ. ජේවීපී එකේ එක්ස් කණ්ඩායමේ පෙරටුගාමී සෙට් එකේ හැමතැනම පරමාදර්ශී දේශපාලනයක් හොයන් ගිහිල්ල මොනම හෝ හේතුවක් නිසා කොල්ල සියදිවි නසාගත්ත. අසරණ දරුවෙකුයි කෙල්ලෙකුයි අම්මකෙනෙකුයි අනාථ උනා. ඌව දේශපාලනේට ඇදල ගත්තු උන්ගෙන් කොටසකට අද දේශපාලනේ මතකත් නෑ. චපාන් එකේ ජීවිතේ ගෙවනව.//

දෙවන කොමෙන්ටුව ඇනෝ කෙනෙකු ගෙනි:
//පුද්ගලික විශ්ව විද්‍යාල විරෝධී අරගලයේදී පාලකයන් ගේ දරුණු මර්ධනය විසින් පද්මසිරි ත‍්‍රීමා විතාන, වෙනුර එදිරිසිංහ, අතුල සේනාරත්න, සරත් කොල්ලූරේ යන සිසුන් මරා දැමූහ​. අද දිනයේ මෙලෙස අවාසනාවන්ත ලෙස මිය ගිය මේ සිසුන් සිසු විරුවන් ද නැතහොත් අවස්ථාවාදී රැඩිකල් දේශපාලනයේ බිලි බෝයිස්ලා වීද යන්න පිලිබඳව බරපතල කුකුසක් මතුවේ. මෙම පුද්ගලික විශ්ව විද්‍යාල විරෝධී අරගල සහ උද්ඝෝෂන පසුපස සිටි නායකයන් ගේ වර්තමාන ක්‍රියා කලාපය පිලිබඳව සලකා බලන විට මේ සැකය මතුවීම සාධාරණය. පුද්ගලික විශ්ව විද්‍යාල විරෝධී අරගලයේදී වර්තමාන ජවිපේ නායක සෝමවන්ස අමරසිංහ විශාල වැඩ කොටසක් කලේය​. පුද්ගලික විශ්ව විද්‍යාල විරෝධී සෝමවන්ස අමරසිංහගේ පුතා අද දිනයේ ඉගෙනුම ලබන්නේ එංගලන්තයේ පුද්ගලික විශ්ව විද්‍යාලයකය​. සරසවි සිසුන් පාරට බස්සවා සන්නද්ධ වියාපාරයකට ඔවුන්ව යොමු කල කුමාර් ගුනරත්නම් එවකට කර්නල්වරයෙකු වූ සරත් ෆොන්සේකාට සියල්ල වමාරා ඕස්ට්‍රේලියාවට පලා ගියේය​. ඔහුගේ දරුවන් දෙදෙනා තව නොබෝ කාලයකින් ඕස්ට්‍රේලියාවේ විශ්ව විද්‍යාලයක ඉගෙනුම ආරම්භ කරනු ඇත​. ඒ කාලයේ මේ විරෝධාතා වලට තිරය යට සිට සහය දුන් එස්. බී දිසානායක ඔහුගේ පුතුන් දෙදෙනා උසස් අධ්‍යාපනය සඳහා යැව්වේ ඕස්ට්‍රේලියාවේ මොනෑශ් විශ්ව විද්‍යාලයටය​. මෙවැනි අරගල වීදි සටන් වලට සැමදා ආවඩන හිටපු ක්‍රම විරෝධියෙකු මෙන්ම අධිරාජ්‍යවාදී විරොධීයෙකු වූ වාසු තමගේ පුතා අධ්‍යපනය සඳහා යොමු කලේ ඇමරිකාවේ පුද්ගලික විශ්ව විද්‍යාලයකටය​. පද්මසිරි ත‍්‍රීමා විතාන, වෙනුර එදිරිසිංහ, අතුල සේනාරත්න, සරත් කොල්ලූරේ යන සිසුන් ෆෝම් කරවා ඔවුන්ව මර්ධනකාරී වෘකයන් වෙත ගොදුරු පිණිස දැමූ දේශපාලකයන් හා සිසු නායකයන් අද දිනයේ ක්‍රම සහ විධි වලින් යහමින් මුදල් උපයන බඩ තඩි මුදලාලිලා බවට පත් වී තිබේ. ස්වයංවරදකාරී බවින් මිදීමට මොවුන් බොරුවට වසරකට වරක් මේ බිලි බෝයිස්ලා අනුස්මරණයට ඉටිපන්දමක් දල්වා ලේ රත් වන කතාවක් කොට විසිර ගොස් යලි ලබන වසරේ අනුස්මරණ දිනයක් එන තෙක් හුරු පුරුදු ජාවරම් වල යෙදී සිටිති. සිසු නායකයන් ගොඩ ගියේය​. අවසාන විග්‍රහයේදී වැරදුනේ කාටද ? මේ බිලි බෝයිස්ලා සහ ඔවුන් ගේ දෙමාපිය සහෝදරයන්ට පමණි.//

තුන්වන කොමෙන්ටුව කිර්ති විජේබාහු ගෙනි. (තවත් ඇනෝ කෙනෙක්)
//ආරම්භයේදීම පොඩි සුලුධනේශ්වර කෝචෝක් එකක් හරහා අරබන අජිත් මහතාගේ ලිපිය අවසාන වන්නේ ඉතාම ප්‍රතිගාමී මතයකින් නිසාම යම් අදහසක් එකතු කල යුතුයයි සිතුනි. එමන්දයත්, සවිඥානිකව හෝ අවිඥානිකව සිදුකරන ඔහුගේ පුරාජේරුව සහ පොඩි "පොර වීමට" තැත් කිරීමට අමතරව, ඔහු විසින් ලියන ලිපිය අවසාන වන්නේ ඉතාමත් කුහක සහ සුලුධනේශ්වර මතවාදයකින් සහ ලෝක සමාජවාදී විප්ලවයේ දැවැන්තයන් ගේ කර්තව්‍යයන් අවමානයකට හෝ අඩු තක්සේරුවකට ලකරමින් වන නිසාය (සමහර විට මාක්ස්, ලෙනින් සහ අනෙකුත් කිහිපදෙනෙකුගේ අද්යාපන පසුබිම හැර අනෙක් විප්ලවාදීන් පිළිබඳව ඔහුගේ නොදැනුවත්කම නිසා වන්නට පිළිවන). 

එසේම, ලෙනින්ගේ සහෝදරයා (උල්යනොව්), මාක්ස්, ලෙනින්, Materialism, නරෝද්නික්වරු ගැන වැල්වටාරම් ලියන ඔහු, අවසානයේ නජිත් සහෝදරයට අවවාද කරන්නේ අද්‍යාපනය නිමකොට තමන්ට ගලපෙනවානම් ඉඩ ඇති කල්හි "හොබියකට" දේශපාලනය කරන ලෙසය. එනයින් පිළිබිඹු වන්නේ සමාජ විප්ලවය පිලිබඳ ඔබගේ විශ්වාසයේ දිග පළලය. දෙවනුව ගම්‍යවන්නේ, විප්ලවවාදීන් විවිධ දේශපාලන ධරාවන්වතුල පෝෂණය වෙමින් සහ තම මතවාදයන් දියුනුකරමින් සහ හදාරමින්, සමාජවාදය නිර්මාණය කිරීම වෙනුවෙන් වූ අභ්‍යාස පසෙකලා, ධනපති රාමුව තුල තම දරුපවුල රැකීමට අජිත් මහතා සේ "වැඩ පෙන්වීමට" උත්සාහ කරන ලෙසත්, වුර්තිය විප්ලවාදින්විමෙන් ප්‍රතිපල රහිත බවත්ය. තෙවැනි හාස්‍යජනක කරුණ නම්, තාරක විද්‍යාව පිලිබඳ ලියන ඔබට, සපෙක්ෂතවාදයේ පියා වන ඇල්බර්ට් අයින්ස්ටයින්ටවත් ඔබ නදිතට සම්පුර්ණ කරන්නටයි කියන නිල අද්යාපන රටාව තුල මුල්කාලයේ තැනක් නොතිබූන බව අමතක වීමය.

ඔබ නොකියන හෝ නොදකින එක දෙයක් කිව යුතුය, ඉතාහාසය පුරාවට සමාජ විප්ලවය වෙනුවෙන් තම ජීවිතය පරදුවට තබා , ඉතිහාසයක් නිර්මාණය කල ඒ උදාර මිනිසුන් සහ ගැහැනුන් ධනපති රාජ්‍යයේ අද්යාපන රාමුව කෙරෙහි ඔබතරම් විශ්වාසයක් තැබුවේ නැත. එමන්දයත්, ධනපති අද්යාපන රාමුව නිර්මාණය කරන්නේ වඩා හොඳ "කම්කරුවන්" වීමත්, "බුද්ධිය" සහ "දැනුම" අතර වන වෙනස ඔවුන් වටහාගෙන තිබීමත් නිසාය. ඉදින් , නජිත් ඉන්දික සහෝදරයට උපදෙස් දෙන්නට ඔබවැනි සුලුධනේශ්වර විප්ලවවාදි මහතෙකුට අපහසු එබැවිනි. 

අවසාන ලෙස කිවයුත්තේ, ඔබගේ මතවාදී අපගමනයට හෙතුවලෙස දකින්නේ මාක්ස්වාදී විශ්ලේෂනාත්මක ක්‍රමවේදය (Marxist Epistemology ) වටහා ගැනීමේ ගැටලුක් මත වල්මත් වීම මිස, ඔබ ප්‍රතිගාමියෙක් නොවන බව මාගේ හැගීමය බවයි.//

මෙයට මා  දුන් පිළිතුර මෙයයි.
//**************************************************************************/
කිර්ති විජයබහුලාත් කොමෙන්ට් වලට පැමිනිමම ජයග්‍රහණයකි. මට ප්‍රශ්නය වන්නේ 87-88 දේජාවියේ අනසක මෙහෙයවූ සමන් පියසිරිගේ අනුවර්ත නාමය ගැනීම මගින් මට තර්ජනයක් කරන්නේද යන්නයි. මොකද විවේචනයට ආ නන්දන මාරසිංහ සහෝදරයාට සිදුවූ දේ මා දන්නා බැවිනි. කිර්ති විජේබාහු ආරුඪ නාමය ගෙන කරන්නේ තර්ජනයක් නම් අලුත් බෝතලයේ ඇත්තේ පරණ වතුරමය යන්න මා කල නිගමනය එතැනින්ම සනාථවී ඇති හෙයිනි. 
මෙහිදී ඔබට මතක් කල යුතු පළමු කරුණ වන්නේ මා බ්ලොග් ලියන්නේ හා කතා කරන්නේ මගේ නමින් බවයි. බොහෝ විවේචන කල ඒ කාලයේ අයද එසේ කලේ සැඟව නොවේ. 
ඔබගේ නොදනුමේ තරම හෙළිවන්නේ මෙහිය.
 //ඔහු විසින් ලියන ලිපිය අවසාන වන්නේ ඉතාමත් කුහක සහ සුලුධනේශ්වර මතවාදයකින් සහ ලෝක සමාජවාදී විප්ලවයේ දැවැන්තයන් ගේ කර්තව්‍යයන් අවමානයකට හෝ අඩු තක්සේරුවකට ලකරමින් වන නිසාය// කුහක සුළු ධනෂ්වර මතවාදය කුමක්ද? වරුනට, මහින්දට, සිරිසේනට, පෙසැප පන්නයේ පන්ති අරගලයට ජයවේවා කියා ඇත්තේ ඔලොක්කුවට බවවත් වටහා ගැනීමට නොහැකිවීම ඔබේ අවාසනාවකි. මගේ නොවේ. 
ඊළඟ කාරණය යමක් හරියට කියවා උත්තර දෙන ලෙසය. මා හඳුනන සරද මහතා ඉහත කොමෙන්ටුවක කල වැරදීමම ඔබත් කර තිබේ. 
//, අවසානයේ නජිත් සහෝදරයට අවවාද කරන්නේ අද්‍යාපනය නිමකොට තමන්ට ගලපෙනවානම් ඉඩ ඇති කල්හි "හොබියකට" දේශපාලනය කරන ලෙසය.// 
මිස්‌ටර් විජෙබාහු මා ලියා ඇත්තේ මෙයයි.
**** ඉගෙන ගන්නා ගමන් තමන්ගේ ඉඩ ඇති වෙලාවට දේශපාලනයේ යෙදෙන්න. කියවන්න ඉගෙන ගන්න. නැත්නම් ඔබලාටත් සිදු වන්නේ සිගිරි නොගිය හේතුවෙන් උණු කඳුළු හෙලමින් දක්ෂිණාංශික දේශපාලකයෙකුගේ තුරුල්ලට පැන ආත්මය වනසා ගන්නටය.***********මෙහි සඳහන් දක්ෂිණාංශික දේශපාලකයා කවුද යන්නත් පැන්නේ  කවුද යන්නත් ඔබ දන්නවා ඇත. ඔහු ඔබටත් වඩා හොඳට භාවිතාවක් තිබුවකු වන්නට ඇත. (හිරු කරන කාලයේ)  මා මෙහිදී අදහස් කරන්නේ අන්තරය හා පෙසප ක්‍රියාමාර්ගය වෙනස් කළ යුතු බවයි. 2000 ට පහල rating තිබ්බ ධනපති විශ්ව විද්‍යාල වේවා ඒවා හට තරඟයක් දී තේරුණ පසු ඒවා වල උපාධිය අවසන් කල යුතු බවටත්, ඒවායේ උපාධිය අවසන් කිරීමට අනිත් සිසුන්ට උදව් කල යුතු බවටත් ඒ අතර වාරයේ දේශපාලනයේ, නිදහස් සංවාදයේ, කියවීමේ සහ අරගලයේ යෙදිය යුතු බවටත්ය. එයට හේතුව ශිෂ්‍ය දේශපාලනය අරගලයක පෙර ගමන් කරුවෙකු හෝ මුලිකත්වය ගන්නකු වුවත් එය එහි ගාමක බලවේගය නොවන නිසාය. පෙසපයේ ශෝචනීය තත්වය අන්තරේ නයුවකු වූ නාගමුව ජනාධිපතිවරණ අපේක්ෂකයකු ලෙස ගැනීමෙන්ම පෙනේ. උනුත් එකයි මුනුත් එකයි කියා කතා කර වැඩ කරන ජනතාවක් නොමැතිව අන්තරේ සිසුන් කීප දෙනෙකු අල්ලාගෙන කරන අරගලය නැවතත් ඛේදවාචයකින් කෙළවර වීම වැළැක්වීමට ඇතුලෙන් කතා කල නොහැකි තැන එලියට පැමිණ කතා කිරීමකි මෙය. මෙය තවම ඉවර නැත. ඊළඟට 
//දෙවනුව ගම්‍යවන්නේ, විප්ලවවාදීන් විවිධ දේශපාලන ධරාවන්වතුල පෝෂණය වෙමින් සහ තම මතවාදයන් දියුනුකරමින් සහ හදාරමින්, සමාජවාදය නිර්මාණය කිරීම වෙනුවෙන් වූ අභ්‍යාස පසෙකලා,//
සමාජවාදය ගැන මම කරන අභ්‍යාස ඔබ දන්නේ කොහොමද? එසේම මෙය
 //විප්ලවවාදීන් විවිධ දේශපාලන ධරාවන්වතුල පෝෂණය වෙමින් සහ තම මතවාදයන් දියුනුකරමින් සහ හදාරමින්// 
වැඩ හොඳට කරන්නේ මට පෙනෙන විධිහට සමාජවාදී සමානතා පක්ෂය හා ශ්‍රී ලංකා පෙරටුගාමී පක්ෂය වැනි ඒවායි. මෙය අවුරුදු එකහමාරක නිරීක්ෂණයකින් කියන දෙයකි.. ඔබලා හෝ ජවිපෙ විසින් එහෙය්යන් රැලක් බිහි කරනු මිස එවැන්නක් කරනු මට නම් නොපෙනේ.
 //ධනපති රාමුව තුල තම දරුපවුල රැකීමට අජිත් මහතා සේ "වැඩ පෙන්වීමට" උත්සාහ කරන ලෙසත්// 
මෙය මගේ වැඩ පෙන්වීමක් වන්නේ කෙසේද යන්න මම නොදනිමි. නමුත් ඔහෙලා හදන සමාජවාදී සමාජයේ දරු පවුල් නැත්ද? එසේ දරු පවුල් නැති එකෙක් හැදු සමාජවදයෙක් මම දනිමි. ඒ පොල්පොට්‍ ය. පොල්පොට්ගේ පක්ෂය දරුවන්ට කිවේ අම්මත් තාත්තාත් පක්ෂය බවයි. ඉන්පසු ළමයි තමන්ගේ දෙමාපියන් පවා පාන් කෑල්ලට පාවා දුන්හ. ඒ දෙමාපියන් පොල්පොට් භාවිතාවෙන් උසස් නිර්ධන පන්ති විප්ලවාදින් අතින් මැරුම් කෑහ.
අනික මෙහෙම කතාවක් මගේ බ්ලොග් ලිපියේ ලියා නැත. 
//වුර්තිය විප්ලවාදින්විමෙන් ප්‍රතිපල රහිත බවත්ය// 
මා කොමෙන්ටුවක් කියා ඇත්තේ මා රැකියාව කරන ගමන් උදව් කරන බවකි. රැකියාවක් සොයා ගන්නේ නම් වඩාත් හොඳින් උදව් කල හැකි බවකි. පක්ෂයක කිසියම් ප්‍රමානයක් වෘත්තීය විප්ලවවාදීන් සිටින බව මම දනිමි. ඒ අයට උදව් කරන්නේ රැකියාව කරන අපිය. නැත්නම් පක්ෂයක් වැඩ කර මුදල් උපයා  ගනී. ඒ ධනපති සමාජයේම ධනපති ක්‍රමයම උපයෝගී කර ගනිමිනි. ඒ නිසා නජිත ලා මෝඩ ආදර්ශ සිසුන්ට දීමටත්, සිසු දෙමාපියන් හා ජනතාවන් අන්තරයෙන් ඈත් කරන කතාත් නොකර සිටින්නේ නම් වඩාත් හොඳය.  පාවෙල් කොර්චගින්ලා කම්හල් වල වැඩ කරන මිනිසුන් අතර ගැවසුන අයයි.

//තෙවැනි හාස්‍යජනක කරුණ නම්, තාරක විද්‍යාව පිලිබඳ ලියන ඔබට, සපෙක්ෂතවාදයේ පියා වන ඇල්බර්ට් අයින්ස්ටයින්ටවත් ඔබ නදිතට සම්පුර්ණ කරන්නටයි කියන නිල අද්යාපන රටාව තුල මුල්කාලයේ තැනක් නොතිබූන බව අමතක වීමය.// මෙහි හාස්‍ය ජනක කාරණය අයින්ස්ටයින් ප්‍රශ්න කලේ තද නීති රීති වලින් යුත් Luitpold Gymnasium නමැති ඔහුගේ ප්‍රථමික හා ද්විතියික අධ්‍යාපන ක්‍රමය බවට ඔබේ ඇති නොදැනීමයි . ඔහු ස්විස් පොලිටෙක්නික් එකේ ඇතුළු වීමේ විභාගයෙන් අසමත් විය. නමුත් ඔහුගේ භෞතික විද්යාව හා ගණිතය හොඳ නිසා එහි විදුහල්පති ඔහුව අර්ගොවියන් විදුහලට යොමු කල අතර ඔහු එය අවසන් කළේය. ඉන්පසු නැවත සුරික් පොලිටෙක්නික් එකට ඇතුල්වී එය අවසන් කළේය. භෞතික විද්යාව හා ගණිතය ඉගෙනීම ඔහුගේ තෝරා ගැනීමයි .මහත්මයා තව ටිකක් කියවා පැමිණෙන්න. http://en.wikipedia.org/wiki/Albert_Einstein
http://www.einstein-website.de/z_biography/biography.html

අවසන් වශයෙන් මාක්ස්වාදී විශ්ලේෂනාත්මක ක්‍රමවේදය (Marxist Epistemology ) මා නොදන්නේ නම් මට කියා දෙන්න. මා හැම වෙලේම නොදන්නා දේ නිහතමානිව ඉගෙන ගන්නා අයෙකි. කිසිම දවසක සෑම දෙයක්ම දන්නා බවක් අඟවා නැත.

// ඉතාහාසය පුරාවට සමාජ විප්ලවය වෙනුවෙන් තම ජීවිතය පරදුවට තබා , ඉතිහාසයක් නිර්මාණය කල ඒ උදාර මිනිසුන් සහ ගැහැනුන් ධනපති රාජ්‍යයේ අද්යාපන රාමුව කෙරෙහි ඔබතරම් විශ්වාසයක් තැබුවේ නැත. එමන්දයත්, ධනපති අද්යාපන රාමුව නිර්මාණය කරන්නේ වඩා හොඳ "කම්කරුවන්" වීමත්, "බුද්ධිය" සහ "දැනුම" අතර වන වෙනස ඔවුන් වටහාගෙන තිබීමත් නිසාය. //
 මාත් හොඳ කම්කරුවෙකි. රැකියාව කර පඩියක් ගන්නෙකි. මා වැඩ කරන්නේ ධනපති රටක ධනපති කොම්පැනියකට බවට මට අවබෝධයක් ඇත. මහත්මයා  ලියන්න කියන්න ඔබ ඉගෙන ගත්තේ සමාජවාදී රටකද? නැත්නම් ශ්‍රී ලංකාවෙදිද? එසේ නැත්නම් ශ්‍රී  ලංකා ප්‍රජාතන්ත්‍රවාදී සමාජවාදී ජනරජය සමාජවාදය පිහිටුවා ඇති යයි සිතනවද? ඔබ ඔය කියන ජිවිත පරදුවට තැබූ හැම එකාම එකීම ඉගෙන ගත්තේ ධනපති ක්‍රමය තුලයි. චේ තමන්ගේ ඉගෙනීම ඉවතට දමා මුලින්ම ගියේ ලෝකය බලන්නටය. ඉන් දුටු දෙයින් පසුවයි ඔහු ව්‍යාපාරයට බැඳුනේ. 
//ඉදින් , නජිත් ඉන්දික සහෝදරයට උපදෙස් දෙන්නට ඔබවැනි සුලුධනේශ්වර විප්ලවවාදි මහතෙකුට අපහසු එබැවිනි.// මට මිට කලින් මේ කතාව මේ විධිහටම තව එකෙක් කියා තිබේ. ඒ 1987 කොළඹ විශ්ව විද්‍යාලයේ කැන්ටිමේදිය. 87 ජවිපෙ ක්‍රියා මාර්ගය විවේචනය කරන විටදී මේ නායකයා මට මේ වදන් මෙලෙසම කිවේය. සුළු ධනෙෂ්වර මතවාදී උඹට මට උගන්වන්න බැහැ. ඉන්පසු ජවිපෙ ආණ්ඩුවට ගිය පිහිටෙන් මේ ප්‍රබල විප්ලවවාදියා චන්ද්‍රිකා රජයේ ඇමතිකම් තිබු තැනක ලේකම් රස්සාවක් කර දැන් ඊටත් වඩා හොඳ තැනක පවුලත් බලාගෙන වැජඹෙමින් සිටි.
 නජිත් ඉන්දික වැනි පුංචි මල්ලියෙකුට උපදෙස් දෙන්නට මට ඕනෑ තරම් අත්දැකීම් තිබේ. මොකද නජිත්ලට සන්ජිවලාට හා තවත් අයට මර්දනය එනවිට කෑ ගහන්නට ඉතුරු වෙන්නෙත් අප විතරක් බැවිනි.

/*****************************************************************************/

මේ ලිපියත් කොමෙන්ටුත් වැටුනේ ජනවාරි 6 දාය. පෙරටුගාමී සමාජවාදී පක්ෂය ක්‍රම දෙකම වෙනස් කරන්නට ජනාධිපති චන්දයට ගියහ. අන්තරේ සිසුන් වත් ඔවුන්ට චන්දය දුන්නේ දැයි සැක සහිතය.
දැන් තිබෙන දේශපාලන තත්වය අනුව ඔවුන් හා ඔවුන් මෙහෙයවන අන්තරය සිටිය යුත්තේ තනිව නොව වඩා පුළුල් මහජන වේදිකාවකය.  ජාතිවාදය නැවත හිස එසවීමට විරුද්ධ තැනකය.
මා  දන්නා රැකියාවක් නොකර පක්ෂ වල පුර්ණ කාලීනව වැඩ කරන අය බොහෝ සිටිති. මේ ඔවුන්ට කරන විවේචනයක් නොවේ. ඔවුන් වාමාංශික පක්ෂ දේශපාලනයේ අවශ්‍යතත්වයකි. විශ්ව විද්‍යාල  වල අධ්‍යාපනය අතහැර දේශපාලනය කරනවාට  වඩා ඉගෙනීම කරන ගමන් දේශපාලනය  කරන්නටත්, දුර්වලවී ඇති පහත වැටී ඇති ලංකාවේ විශ්ව විද්‍යාල අධ්‍යාපනය ඉහලට එසවීම සඳහා පෙරමුණ ගැනීමටත් සිසුන්ට කරන ආයාචනයකි.

රජයන් වෙනස් වනවා සේම අරගල ක්‍රමද වෙනස් විය යුතුය.

ඊයේ අන්තරයට එරෙහිව කඳුළු ගෑස්  ගැසීම හෙළා දකිමින් මේ සිදුවීමේදී අන්තරයේ හා සිසුන්ගේ නිදහස වෙනුවෙන් පෙනී සිටිමු.