Tuesday 26 September 2017

ධවල භිෂණය නැවතත්

ධර්මසිරි බණ්ඩාරනායකයන  කියන්නේ සිංහල සිනමා ලෝකයේ විතරක් නෙමේ වේදිකාවේත් පතාක යෝධයෙක්. ඒකා - අධිපති , මකරාක්ෂයා , යක්ෂගමනය, ට්‍රෝජන් කාන්තාවෝ එතුමා විසින්  බිහිකළ අමතක නොවෙන නිර්මාණ.
චිත්‍රපට ගත්තොත් සුද්දිලාගේ කතාව, භාව දුක, තුන්වෙනි යාමය , භව කර්ම, හංස විලක් වැනි චිත්‍රපට සිංහල සිනමාවේ නිම වළලු පුළුල් කළ අමරණිය නිර්මාණයන්. අදත් සාජ්ජයක් දාන කොට සුනිලා  අබේසේකර , ටී එම් ගේ මියුරු හඩින්  ගැයුණු ඒ  "හෙමින් සැරේ පියා විදා " ගීතය අපි හැමෝම අහන බැරි බරියාවෙන් හරි ගයන්නට තැත් කරන අපුර්ව ගීතයක්.

ප්‍රේමසිරි කේමදාස ගේ සුසංයෝගයෙන් බිහිවුණු මේ නිර්මාණ අති  විශිෂ්ටයි කිවොත් අතිශයෝක්තියක් නෙමෙයි.

ත්‍රිකෝණ සංස්කෘතික පදනමේ ගොඩනැගිලි අරමුදලට ආධාර  පිණිස ධර්මසිරි  බණ්ඩාරනායක මහතා විසින් අධ්‍යක්ෂණය කල "ධවල භීෂණය" නාට්‍යයේ විශේෂ දර්ශනයක් ඔක්තෝබර් මස පළමු වැනි දින බොරැල්ල පුංචි තියෙටර් හිදී  නැවතත් වේදිකා ගත කෙරෙනවා. පුලුවන්නම් යන්න. 

ඔබට අරමුදලට ආධාර කිරීමට අවශ්‍ය නම් ආධාර මේ ගිණුම් අංකයට යවන්න.

Name of the Account : Trikone Cultural Foundation
Account Number : 1200029179
Name of the Bank: Commercial Bank of Ceylon PLC
Branch: Nugegoda



Saturday 23 September 2017

සෝවියට් සාහිත්‍යය සහ ලංකාවේ වම 3 - විජේවීර හා පොල්පොට්

සෝවියට් සාහිත්‍යය සහ ලංකාවේ වම 1 - පැරැණි වමේ මූලාරම්භය

සෝවියට් සාහිත්‍යය සහ ලංකාවේ වම 2 - පැරැණි වම තුළින් නව වම බිහිවීම


සලොත් සර් හෙවත් පොල්පොට් 
ජනතා  විමුක්ති පෙරමුණ මෙහෙයවූ ප්‍රථම කැරැල්ලේදී සිරගතව සිට ඉන්පසු අධ්‍යාපනය ලැබීමට සෝවියට් දේශයට පැමිණි කිහිප දෙනෙක් මට මොස්කව් වලදී හමුවුණි. ඔවුන් සියල්ලගේම මතය වූයේ සෝවියට් දේශයට පැමිණි පසු දැනගත් කරුණු එදා දැන   සිටියා නම් කිසි විටෙකත් කැරැල්ලට සහභාගී නොවන බවයි. මේ අනුව විජේවීර මහතාගේ (සහෝදරයාගේ) සංවිධාන ශක්තිය, ව්‍යාපාරයට ඇති කැපවීම, පක්ෂයක් ගොඩ නැගීම ආදී සියල්ල නොඅඩුව තිබුනද '71 කැරැල්ල වනාහී ඕනෑ කමින් කළ අත්හදා බැලීමක් පමණක් වී යයි සිතමි. හැත්තෑ එකේ කැරැල්ල දක්ෂිණාංශික ධනවාදී ආණ්ඩුවකට එරෙහිව නොව අර්ධ වාමාංශික සංවෘත ආර්ථික ප්‍රතිපත්තියක් අනුගමනය කළ  රජයකට එරෙහිව කළ එකක් වීම නිසාම  එය පැහැදිලිය.

එසේම වාමාංශික රජයක් වුවද එහි පොලීසිය සහ නීතිය  සම්බන්ධ ආයතන කැරැල්ලට ප්‍රථමව ජවිපෙ හා අනිකුත් රජයට පක්ෂ නොවන වාමාංශික සංවිධාන වල සාමාජිකයන් නීති විරෝධී ලෙස අත් අඩංගුවට ගැනීම් කරමින් මර්දනයක් දියත් කළ බවද නොරහසකි.

සිරිමාවෝ බණ්ඩාරනායක ආණ්ඩුව රට නැංවීම සඳහා 1971 නොවැම්බර් මාසයේදී පස් අවුරුදු සැලැස්මක් ප්‍රකාශයට පත් කළේය. මේ පස් අවුරුදු සැලැස්ම සෝවියට් දේශයේ මෙන්ම  අනිකුත් සමාජවාදී රටවල ක්‍රියාවට නංවන ආකාරයේ පස් අවුරුදු සැලසුම් හා සමාන එකකි.  සෝවියට් දේශයට පක්ෂපාති ශ්‍රී ලංකාවේ කොමියුනිස්ට් පක්ෂය සහ ට්‍රොස්ට්කිවාදී සම සමාජයද රජයේ හවුල් කරුවන් විය.

සෝවියට් සාහිත්‍යය ශ්‍රී ලංකාවේ  ප්‍රචලිත වන්නට හරියට පදනම වැටුනේ මේ කාලයේය.

හැත්තෑවේ මැද කාලයක මගේ පියා කරත්ත රෝදයක් සම්බන්ධ කතාවක්  රැගත් සෝවියට් ළමා පොතක පරිවර්තනයක් ගෙනදුන් අයුරු මට මතකය. ඒ කාලයේ සෝවියට් ළමා පොත් ඉතා ජනප්‍රිය විය. සෝවියට් දේශය සඟරාවද සෝවියට් සංස්කෘතික මන්දිරය හරහා බෙදා හැරීමද සිදු විය. නොබැඳි සමුළුව (1976) පවත්වන කාලයේ රජයේ බොහෝ ප්‍රකාශන සෝවියට් ආධාරයෙන් කළ ඒවා වුනු අතර සෝවියට් හා රුසියන් පොත් වල පරිවර්තන කිහිපයක් එලි දැක්වුණි.

පරිවර්තකයන් අතුරින් සෝවියට් දේශයේ වාසය කරමින් ම රුසියානු පොත් පරිවර්තනය කල දැදිගම වී රුද්‍රිගු ගේ පොත් මින් ප්‍රධාන තැනක් ගති.   "වානේ පන්නරය ලැබූ හැටි " සහ ගෝර්කිගේ "අම්මා " පොත තරුණ මනසට බලපෑම් කරන අන්දමේ පොත් විය. එසේම බොරිස් පලේවොයි ගේ "සැබෑ  මිනිසෙකුගේ කතාවක්", ෂෝලහොව් ගේ "මිනිසෙකුගේ ඉරණම"වැනි සෝවියට් සොල්දාදුවන්ගේ වීර ක්‍රියා සම්බන්ධ පොත් ද සිංහලට පරිවර්තනය වී මොස්කව් හි  ප්‍රගති ප්‍රකාශක මන්දිරයෙන් පල කෙරුණි.

විවෘත ආර්ථිකයක් ගොඩ නැංවීම ප්‍රධාන අරමුණ කොට ගත්  ජේ ආර් ජයවර්ධන රජය 1977 දී බලයට පත්වන විට ඉන්දියාවේ තිබුනේ සෝවියට් හිතවාදී සංරක්ෂණවාදී ආර්ථික ප්‍රතිපත්තියක් සහිත රජයකි. මේ නිසා ඉන්දියානු විදේශ ප්‍රතිපත්තිය බටහිර දෙසට  නෙත් යොමු කරමින් සිටි ශ්‍රී ලංකාවට ප්‍රති විරෝධී එකක් විය.

අපරාධ විමුක්ති කොමිෂන් සභාව අහෝසි කළ නිසා ඒ යටතේ දඬුවම් ලබාසිටි රෝහණ විජේවීර ඇතුළු ජවිපෙ නායකයන් නිදහස් වුනි. ජවිපෙ ග්‍රාමීයව හා සිසු ප්‍රජාව අතර සීග්‍රයෙන් වැඩුණත් නාගරික කම්කරු පන්තිය අතරේ වැඩි බලයක් තිබුනේ නැත. කම්කරු බලය තිබුනේ නව සමසමාජය, සම සමාජය, බාලා තම්පෝගේ වෙළඳ හා කාර්මික   කම්කරු සංගමය ආදීන් අතය.

පැරණි වම විසින් වැඩි පඩි ඉල්ලා 1980 දී දීප ව්‍යාප්ත වැඩ වර්ජනයක් දියත් කරන ලදී. තමන්ගේ සීමිත කම්කරු සාමාජිකත්වය ආරක්ෂා කර ගැනීමේ අරමුණින්  ජවිපෙ නායකත්වය තම සාමාජිකයන්ට වර්ජනයට සඳහා  එලියට බැසීමට අණ කලේ නැත. මා අසා තිබුනේ වැඩ බිම්වල, තම නම්ගම් ප්‍රසිද්ධ සුළුතරයක් ජවිපෙ සාමාජිකයන්ට පමණක් වර්ජනයට සහභාගිවන ලෙස අණ දුන් බවකි.

බ්‍රිතාන්‍යයේ මාගරට් තැචර් ගල් අඟුරු ආකර වසා දමා  කම්කරු වර්ජන නැවැත්වූ ආකාරයෙන්ම ජේ ආර් සියලුම වර්ජිත සේවකයන් අස් කර දමා  වර්ජනය මැඩ පැවැත්වූවේය.  පරණ වමට වැදුණු මේ දැඩි ප්‍රහාරයෙන් ඔවුන් අකර්මණ්‍ය වුනු අතර ජවිපෙ බලය වැඩි විය. ජවිපෙ ක්‍රම ක්‍රමයෙන් ප්‍රධාන ප්‍රජාතන්ත්‍රවාදී දහරාවට එකතු විය.

ජයවර්ධන රජය සමයේ කළ ප්‍රධාන වැරදි දෙකින් එකක් වූයේ 1982 කුප්‍රකට ජනමත විචාරණයයි. ජයවර්ධන මහතාට පහසුවෙන් දිනිය හැකි වුවත් ඔහු ප්‍රබල භිෂණයක් විපක්ෂයට එරෙහිව දියත් කළේය. සිරිමාවෝ මැතිනියගේ ප්‍රජා  අයිතිය අහෝසි කර තිබු අතර විපක්ෂයේ ප්‍රබල චරිතයක් වූ  විජය කුමාරණතුංග නැක්සලයිට් චෝදනාවට සිරගත කරන ලදී.

දෙවැන්න නම් 1983 ජාතිවාදී  කෝලාහල පාලනය කිරීම  ප්‍රමාද වීම සහ එයට වැරැද්ද පටවමින් නිරපරාදේ  ප්‍රධාන වාමාංශික පක්ෂ තුනක් තහනම් කිරීමයි.  අනිත් පක්ෂ දෙකේ තහනම ඉවත් කළද ජවිපෙ තහනම  ඔහු ඉවත් කළේ නැත. මෙම 82/83 ජයවර්ධන රජයේ ක්‍රියා කලාපය ප්‍රජාතන්ත්‍රවාදය කෙරෙහි විශ්වාසය තබා සිටි තරුණ පරපුරේ බලාපොරොත්තු බිඳවන්නක්  විය.

 මහා බ්‍රිතාන්‍යය, නොබැඳි රටක් වූ ආර්ජන්ටිනා රජයට එරෙහිව කළ ෆෝක්ලන්ත සටනට සහය  දුන් රටවල් හතින් එකක් වූයේ ශ්‍රී ලංකාවයි. ඉන්දියාව ඇතුළු නොබැඳි රටවල් ගත්තේ ආජන්ටිනාවේ පැත්තයි. මේ සිද්ධීන් සමුහයේ ප්‍රථිපලයක් ලෙස වැඩුණු ලංකාවට එරෙහි ඉන්දියාවේ නුරුස්නා  භාවය උතුරේ සන්නද්ධ කණ්ඩායම් වලට තමිල්නාඩුවේ පුහුණුව හා ආයුධ ලබා දීම් මගින් පැහැදිලි විය.

ජයවර්ධන රජය විමුක්ති කොටි සංවිධානය පරදවන්නට ඔන්න මෙන්න තිබියදී යුද ආක්‍රමණයක් කරන බවට තර්ජනය කොට ඉන්දු ලංකා ගිවිසුම අත්සන් කෙරෙනුයේ 1987 දීය. රෝහණ විජේවීරගේ "ඉන්දියානු ව්‍යාප්තවාදය " පන්තියට තද ගැම්මක් ලැබුනේද මෙනයිනි.

මේ කාලය වනවිට ජේ ආර් විසින් මුදාහල  ලිබරල් වාදී ආර්ථික ප්‍රතිසංස්කරණ නිසා රැකියා අවස්ථාවන්  වැඩිවී තිබුණු අතර නව ධනපති කොටසක්ද රටේ බිහිවෙමින් පැවතුනි. මොවුන් ඊට කලින් අවුරුදු වල සිටි සම්ප්‍රදායික ධනපති රාමුවෙන් ඔබ්බට ගිය පිරිසක් විය. එසේම මහවැලිය ආදී විශාල යෝජනා ක්‍රම, ගම් උදාව, මහපොළ ආදියද ක්‍රියාත්මක විය. මේ වෙනස්  කමට අසු නොවුණු  ගම්බද සහ නාගරික තරුණ පිරිසක් සිටියහ.  "සාහිත්‍යය කන්න දැයි " ඇසූ  ජේ ආර් ට එරෙහිව පෙළගැසුණු මේ තරුණ පෙලට ජවය සැපයු සාහිත්‍යයක් ද  විමුක්ති කාමී ලේබලයේ සංගීතයක්ද නිදහස් ආර්ථිකය යටතේම බිහිවුණි. ඔවුන් බලා සිටියේ අවස්ථාවකි.

තහනමින්  පසු සැඟවී වැඩ කළ ජවිපෙ, බහුලව තිබූ සෝවියට් පොත පත කියවා  බිහි වෙන්නට සිටින ලංකාවේ තරුණ පාවෙල් කොර්චාගින් ලාට ගර්භාෂය විය.

අරගලය මතු වූයේ ප්‍රථමයෙන්ම අධ්‍යාපන ඇමති  රනිල් වික්‍රමසිංහ ඉදිරිපත් කල ධවල පත්‍රිකාවට එරෙහිවය. ඉන් මතුවූ අරගලය ඉන්පසු රාගම පෞද්ගලික වෛද්‍ය විද්‍යාලයට එරෙහිවත් ඉන්පසු නිදහස් අධ්‍යාපනය රැක ගැනීම දක්වාත් දිග ඇදුනි.

කාම්බෝජයේ 1925 මැයි 19 උපන් සලොත් සර් ධීවර ගම්මානයක උපත ලද්දෙකි. ඔහු මුලින් උගත්තේ බෞද්ධ ආශ්‍රමයකය. කාම්බෝජය එවකට පැවතියේ ප්‍රංශ ආධිපත්‍ය යටතේය. සලොත් සර් කාර්මික අධ්‍යාපනයක් ලබන්නට ශිෂ්‍යත්වයක් ලබා ප්‍රංශයේ පැරිස් නුවරට ඉගෙනීමට  ගියේය. (සලොත් 1949-1953 දක්වා ගුවන් විදුලි කාර්මික ශිල්පය උගත්තේය). ඔහු 1950 දී පමණ  ජාත්‍යන්තර කම්කරු සහෝදරත්වය මගින් යුගොස්ලවියානු සමාජවාදී සමුහාණ්ඩුවේ සගේර්බ් නගරයේ මංමාවත් ඉදි කිරීමේ තරුණ කණ්ඩායම් වලට එකතු වී වැඩ කළේය.ඔහු සහ ඉයන් සාරි  ප්‍රංශ කොමියුනිස්ට් පක්ෂයට බඳුනේ 1951 දිය.

සෝවියට් දේශය වියට්මින් ගරිල්ලා කණ්ඩායම වියට්නාමයේ නිත්‍යානුකුල  රජය ලෙස පිළිගත් පසු සලොත් සර් වියට්නාම නිදහස් අරගලයට ප්‍රංශයේ  සිට සහය දුන්නේය. වසර 1951 දී පැරිසියේ රහසිගත අධිරාජ්‍ය විරෝධී (ප්‍රංශ) කොමියුනිස්ට් කණ්ඩායමකට බැඳුණි. විභාග එක දිගට අසමත් වීමෙන් පසු මේ සලොත් සර් කාම්බෝජයට පැමිනියේ අර රහසිගත කොමියුනිස්ට් කණ්ඩායමේ කාම්බෝජ ශාඛාවට ඇතුළු වෙමිනි.

කාම්බෝජයේ  කොමියුනිස්ට් පක්ෂය තහනම්ව පැවතුණි. එහි නායකයා වන  ටෞ සමුත් නරෝදම් සිහනුක් රජු ගේ ඔත්තු සේවා විසින් අත් අඩංගුවට ගෙන මරා දැමුණි. වසර 1963 දී පක්ෂයේ ඊළඟ රහසිගත  සැසි වාරයේදී සරොත් සර් මධ්‍යම කාරක සභාවේ ලේකම් වරයා ලෙස පත් වුනි. මේ වෙන කිසිවකුත් නොව පොල් පොට් ය.
ඔහුගේ දෙවැනියා වූයේ ඉයන් සාරි ය.


වියට්නාම සහයෙන් කාම්බෝජයේ බේස් කඳවුරක් පිහිටුවා ගත් පොල්පොට් තමන්ගේ මුලික බෞද්ධ ඉගැන්වීමේ බලපෑමෙන් කොටසක් තම දර්ශනයට ඇතුලත් කර ගත්තේය. ඒ සුඛෝපභෝගී භාණ්ඩ ආදිය  කෙරෙහි ඇති ඇල්ම නැති කර ගත යුතුය යන්නයි. එසේම කම්කරු පන්ති අරගලය මුලික කරගත් ප්‍රධාන මාක්ස්වාදී දහරාවෙන් පිට පැන ගම්බද ගොවින් ප්‍රධාන නිර්ධන  පංතියක්  ලෙසද විප්ලවයට ජිවය සපයන්නන් ලෙසද හඳුන්වා ගත්තේය. ඔහුගේ පක්ෂයේ මධ්‍යම කාරක සභාවේ වැඩි හරියක් මේ වැඩවසම් දාස  භාවයේ සිටි දිළිඳු ගොවීන්ගෙන් පැවතෙන්නන් විය.

- මා ඉහත ලියූ  පොල්පොට් වියට්නාම අරගලයට එකතුවී සිටියාය යන්න හෝ වියට්නාම සහයෙන් බේස් කඳවුරක් පිහිටුවීම නිවැරදි නොවේ. මා එය දැනගත්තේ මේ අවුරුද්දේ කල කාම්බෝජ සංචාරයෙනි. 2019-12-26 

ගොවීන්ගේ අරගලය 1966 දී පටන් ගත් අතර පොල්පොට් සහ පක්ෂය 1968 සිට එයට නායකත්වය දුනි. චීනය විසින් ආයුධ සහ මුදල් වලින් දෙන ආධාර වලින් පොහොසත්ව පොල්පොට් ගේ කෙමර් රූජ් ගරිල්ලන් කාම්බෝජ හමුදා වලට පහර දුනි. වසර 1975 දී ඔහු කාම්බෝජයේ බලය අල්වා ගැනීමට සමත් වුනි. ඉන්පසු පිහිටුවන ලද "ප්‍රජාතන්තවාදී " කම්පුචියා  ජනරජයේ අගමැති වූයේ පොල් පොට්ය. නාමික ජනාධිපති වූයේ  කියූ සම්පන් ය. කියූ සම්පන්ට ආර්ථික විද්‍යාව පිලිබඳ ආචාර්ය උපාධියක්ද තිබුණි.  කෘෂිකර්මාන්තය රටේ ප්‍රධාන ජිවනාලිය ලෙස හඳුන්වා දුන් පොල්පොට් -කියූ සම්පන් රජය ගොවිතැන් කාර්මීකරණය කිරීම තුලින් රටම ස්වයංපෝෂිත කල හැකි යයි විශ්වාස කළේය. කිසිම රටකින් භාණ්ඩ ආනයනය තහනම් කෙරිණි. වසර 1975 නම් කරන ලද්දේ බින්දුවේ වසර (year zero) ලෙසය. ඉතිහාසය පටන් ගන්නේ එතැනිනි.
පොල්පොට් රජයේ ඝාතන 

ඉන්පසු නොම්පෙන් සහ ප්‍රධාන නගරවලින් සියලුම් ජනයා ගම්  වලට පිටමන් කරන ලදී. ගම්වල කොමියුන් පිහිටවන ලද අතර ජනතාව  වර්ග තුනකට බෙදන ලදී . එනම්  මූලික සියලු හිමිකම් සහිත  (බේස් මිනිසුන් - නිර්ධන ගොවි ජනයා සහ කෙමර් රූජ් සහායකයන්) ,  අයදුම්කරුවන් (මුලික වෙන්නට අයදුම් කරන, කෙමර් රූජ් දර්ශනයට  විරුද්ධ නොවන වැසියන්.) , ශේෂයන් (මේ අය බොහෝ විට නගර වලින් පිටුවහල් කළ බුද්ධිමතුන්, බටහිර රටවල අධ්‍යාපනය ලද්දන්, යම් ධනයක් තිබු මධ්‍යම පන්තිකයන්,  අනිකුත්  නගර වැසියන්  ආදීන් විය)  ලෙසය. "ශේෂයන්" ට කන්නට දුන්නේ දවසටම  කුඩා බත් පොල්කටු දෙකකි.  බොහෝ දෙන්නෙක් සාගින්නෙන් මිය ගියහ. සාගතයෙන් මියය යන  බොහෝ දෙනාට තමන්ගේම අතින් වලවල් සාරා ගෙන වැතිරෙන්නට නියම විය. නැත්නම් වෙඩි තබා මරා  දමන ලදී.

මේ කොමියුන් වල ළමුන් ජිවත් වූයේ දෙමව්පියන්ගෙන්  වෙනම ය. සමහර විටක වැඩිමහල් ළමුන් කෙමර් රූජ් හමුදාවට බඳවා ගන්නා ලදී. ඔවුන් බොහෝ විට ඝාතකයන්ගේ භූමිකාවට යොදා ගන්නා  ලදී.

මේ අතරේ  පොල්පොට් චීනයේ මාඕවාදයට සම්බන්ධ පිළිවෙතක් අනුගමනය කල අතර සෝවියට් හිතවාදී වියට්නාමයටත් සෝවියට් දේශයටත් විරුද්ධ පිළිවෙතක් අනුගනමය කළේය. සෝවියට් දේශය තම ප්‍රධාන සතුරා ලෙස සලකාගෙන සිටි ඇමෙරිකා  එක්සත් ජනපදය ප්‍රමුඛ  බටහිර රටවල් මේ නිසා පොල්පොට් ගේ ප්‍රතිපත්ති කෙරෙහි මුලදී තැකීමක් නොකළහ. පොල්පොට් කාම්බෝජයේ සිටි සුළු ජන කොටස් කෙරෙහිද තැකීමක් නොකළේය. මේ බොහෝ අය අධිරාජ්‍යවාදී ගැත්තන් ලෙස නම්කර ඝාතනය කරන ලදී.

සියලු ආගම් තහනම් කරන ලද අතර බෞද්ධ හිමි වරුන් 25000 පමණ ඝාතනය කරන ලදී. ඔවුන් විසින් නගරයෙන් පිටමං කළ මිනිසුන්ටත් ගම්වල  සිට කැලෑවලට දක්කන ලද මිනිසුන් ටත් කෑම බිම හෝ ජලය මේ දීර්ඝ ගමන් වලදී ලබා දුන්නේ නැත. මේ නිසා  විශාල සංඛ්‍යාවක් කුස ගින්නෙන් සහ දුර්වල කමින් හැදුනු ලෙඩ රෝගවලින් මිය ගියහ. වෙඩි තබා හෝ ආයුධ වලින් පහර දී මරා දැමුවන් ද සමග  සමග මේ ඝාතනය වූ සංඛ්‍යාව මිලියන 1.7 ත්  2 ත් අතර වේ යයි නොයෙකුත් අධ්‍යයන වලින් තහවුරු වී ඇත.

දැනුදු මගේ යහළුවෙකු වන මේ ලිපියේ ඡායාරූපයේ සිටින මා  සමග විශ්ව විද්‍යාලයේ උගත් එන්ග්  වෙන් න්ගුයෙන් රාත්‍රියේ සෑම විටම විදුලි පන්දමක් කොට්ටය යට තබා නිදා ගත්තේය.  ඔහු පසුව කී  පරිදි ඒ පුරුද්ද ආවේ සිටි තැනින් කොයි වෙලේ පැන යන්නට සිදුවේද නොදන්නා නිසා බවයි. ඔහු නිතර ගැස්සී නැගිටියි. ඔහුගේ පවුලේ අය විඳි දුෂ්කරතා බොහොමයක් ඔහු මට විස්තර කළේය.

මේ ඝාතන  හා  මිනිසුන් සාගින්නෙන් හාමතින්  මිය යාම නතර වුයේ සෝවියට් දේශයේ අනුග්‍රහයෙන් වියට්නාම හමුදා කාම්බෝජය ආක්‍රමණය කිරීමෙනි. වියට්නාම ආක්‍රමණයෙන් පොල්පොට් ගේ බිහිසුණු ක්‍රියා බොහොමයක් හෙලිදරව්  වුනි. එය එසේ වුවත් නැවතත් මහජන චීනයේ සහ තායි රජයේ ආධාරයෙන් පොල්පොට්,  හෙන්  සම්රින්, ඉයන් සාරි නැවතත් වියට්නාම හමුදා සහ ඔවුන් සමග එක්ව සිටි කැම්පුචියා  සමාජවාදීන්ට පහර දුනි. වියට්නාම චීන යුද්ධයක් සුළු වශයෙන්  පටන් ගත්තේද මේ කාලයේය.  කාම්බෝජ හමුදා ජයගත් අතර පොල්පොට් චීනයට පැන ගියේය. ඔහු මියගියේ 1998 අප්‍රේල් 15දාය.

රෝහණ විජේවීර සහෝදරයා හැට ගණන්වල වෛද්‍යවරයෙකු වීමට සෝවියට් දේශයේ උගත් අතර ඉගෙනීම හැර දමා පැමිණිය හෝ විසා නැති වීම නිසා ලංකාවේ හිර විය. ඔහු සෝවියට් දේශයේ සිටියදී බයිකල් අමූර් දුම්රිය මාර්ගය හදන තරුණ  කණ්ඩායම් වල වැඩ කළේය. ඔහු තම මුලික පක්ෂ දේශපාලන අයන්න ශන්මුගදාසන් ගේ කොමියුනිස්ට් පක්ෂයෙන් (චීන පිල ) කියැවූ  බවද 71 කැරැල්ල බොහෝ විට ගම්වල තරුණයන් මූලික කොට හටගත් එකක් මිස නාගරික  කම්කරුවන්ගේ සහයෝගයක් නොතිබූ බවද කීවෙමි. කොටින්ම  විජේවීර සහෝදරයා  මාක්ස්වාදයේ මුලික ඉගෙනුමකින් බැහැරව කටයුතු කළේය.

ලයනල් බෝපගේ 1984 ඉවත් වනවිට ජාතීන් ගේ ස්වයං නිර්ණය (මෙය බොහෝ ධනවාදී රටවල් අනුගමනය කරන පිළිවෙතකි) පිළිබඳ විජේවීරගේ මතයට විරුද්ධ වූ බව මා ඒ දිනවල අසා තිබේ. (ඔහුගෙන් විමර්ශනය කළ යුතුය). අප උගත් සෝවියට් රුසියානු පොත්වල රුසියානු රජවරුන් (මහා පීටර් ග්‍රේට් වැනි අය) හා  නැපෝලියන් පැරදවූ සාර් හමුදාවේ ජෙනරාල් කුතුසෝව්  වැනි වීරවරුන් ගැන වර්ණනා කර තිබේ. චීන මාඕවාදීන් මෙන්ම පොල්පොට් ද   කාම්බෝජ වීරයන් භාවිතා කළේය. ඔහුට දාව උපන්  (පොල් පොට් ගේ ) 1986 උපන් දියණියගේ නම "සීතා" රැගෙන ඇත්තේ කාම්බෝජයේ ප්‍රසිද්ධ රාමායනයේ පරිවර්තනයකිනි. (එහි නම් රීම්කර් ය) රෝහණ විජේවීර යොදා ගත්තේ සොළින්ට එරෙහිව සටන් කළ කිර්ති කුමරු (පසුව විජයබාහු රජු) ආදීන් ය.

1977 දී හෙළිදරව් කරන තුරුම පොල්පොට් ගේ පක්ෂයේ නම වූයේ අන්කාර් (angkar) ය. ඔහුගේ ව්‍යාපාරය ඛේමර් රූජ් ය. එනම් කම්පුචියාවේපෞරාණික නම  සහිත කේමර් දේශප්‍රේමී ව්‍යාපාරයයි.  පොල්පොට් ගේ නියම නම සලොත් සර් ය. ඔහුගේ පක්ෂයේ ප්‍රධානීන්ට ප්‍රාදේශීය  නායකයන්ට හෝ පක්ෂ කේඩර්  වරුනට තිබුනේ අන්වර්ථ නාමයන්ය. පොල්පොට් මුලිකව අනුගනය කළේ මාඕ වාදයයි. ඉන්පසු කෘෂිකාර්මික සමාජවාදයයි. පොල්පොට් ලාට සැබවින් අවශ්‍ය වුයේ පෞරාණික  කාම්බෝජ රාජධානියක් වූ අන්කාර් වට් හි ශ්‍රී  විභුතිය නැවත  ගොඩ නැගීමටයි.  මිලිනය ගණනක ජනතාවක්  මේ පර්යේෂණයට භාජනය කළේ එබැවිනි.

රෝහණ  විජේවීර ද රහසිගත ජනතා  විමුක්ති පෙරමුණට යොදා ගත්තේ එම උපක්‍රමයන්මය.  දේශප්‍රේමී ජනතා  ව්‍යාපාරය, දේශප්‍රේමී කම්කරු මධ්‍යස්ථානය අසූව දශකයේ මැද පිහිටවුනි.  සාමාජිකයන්ට තිබුනේ අන්වර්ථ නාමයන්ය.  ජවිපෙ මුලික ආර්ථික ප්‍රතිපත්තියක් වුයේ ගරා වැටුණු වැව් ප්‍රතිසංස්කරණය කර  රටේ කෘෂි ආර්ථිකය නගා සිටුවීමය. කාර්මික දියුණුව සමග මිනිසුන් ගේ රැකියා අවස්ථා  අඩුවෙන බවට  ජවිපෙ චෝදනාවක් විය. විජේවීර සෝවියට් දේශයේ සිටි කාලයේත් ඉන් පසුවත් මුලිකව අනුගමනය කළේ ස්ටාලින්වාදී  මාඕ වාදයයි. ලෙනින් ගේ හා මාක්ස් ගේ පින්තුර රැගෙන පෙළපාලි ගියේ ඔවුන් මූලික විප්ලවකාරීන් නිසා හා පක්ෂ සාමාජිකත්වය රවටන්නට පමණක් යයි සිතමි.

~ මතු සම්බන්ධයි

මුලාශ්‍ර:

http://www.bbc.co.uk/history/historic_figures/pot_pol.shtml
https://en.wikipedia.org/wiki/1987%E2%80%9389_JVP_insurrection
https://en.wikipedia.org/wiki/Khmer_Rouge


Saturday 9 September 2017

සෝවියට් සාහිත්‍යය සහ ලංකාවේ වම 2 - පැරැණි වම තුළින් නව වම බිහිවීම

මුල් ලිපිය මෙතැනින්  කියවන්න.
විජේවීර ලුමුම්බාවේ 

ලංකා සමසමාජය ගැන කතා කරන විට පොපි මල් එකතු කිරීමේ ව්‍යාපාරයට එරෙහිව සුරිය මල් ව්‍යාපාරය පැන නැගුනු හැටි මතක් කලෙමි. එලෙසම ලංකාවේ මැලේරියා මර්දන ව්‍යාපාරයටද පැරණි වාමාංශික නායකයන් මහත්  සේ සහය දුන්හ. මිනිසුන්ට ඒ කාලයේ පරිප්පු ඇතුළු සහනාධාර බෙදු හෙයින් ඇන් ඇම් "පරිප්පු මහත්තයා"  වශයෙන් ද ප්‍රසිද්ධ විය. එනිසාම  ඔහු 1977 දක්වාම රුවන්වැල්ල ආසනය නියෝජනය කළේය.
ශ්‍රී ලංකාවේ බ්‍රිතාන්‍ය පාලනයට එරෙහි නිදහස් සටනේ පුරෝගාමීන් වූයේද ඔවුන්ය.  බ්‍රිතාන්‍යයෙන් පුර්ණ නිදහස ඉල්ලා ගැනීම ඔවුන්ගේ අරමුණ විය.

බ්‍රිතාන්‍ය පාලනයෙන් ක්‍රම ක්‍රමයෙන් සහන ලබා ගැනීම මගින් නිදහස දිනා  ගැනීමට එෆ් ආර් සේනානායක ප්‍රමුඛ ලංකා ජාතික සභාව (Ceylon National Congress) කටයුතු කළේය. ඔහු සමග දෙමළ  ජාතික පොන්නම්බලම් අරුණාචලම්, සර් ඩී බි ජයතිලක , සී ඩබ්ලිව් ඩබ්ලිව් කන්නන්ගර , ඊ  ඩබ්. පෙරේරා , එච් ඩබ් අමරසුරිය ආදීන්ද වූහ .

වර්ෂ 1943 දී ඩී එස් සේනානායක මහතා ජාතික සභාවෙන්  ඉවත්  වූයේ ඔවුන් (ජාතික සභාව)  ඩොමිනියන් තත්වයෙන් පමණක් සෑහීමට පත් වීම නිසාය. එක්සත් ජාතික පක්ෂය 1946 දී  බිහි වූයේ මින් පසුවය. මේ නිසා ආරම්භයේදී එක්සත් ජාතික පක්ෂය මෙන්ම ඇන් ඇම් කොල්වින්ලාගේ සම සමාජයද රටේ පූර්ණ නිදහස උදෙසා සටන් කළහ.

මා පෙර ලිපිය අවසන් කලේ පැරණි  වමට සෝවියට් සාහිත්‍යයේ  බලපෑමක් සිදු නොවීයයි යන නිගමනයට එළඹෙමින්ය.

පැවති එජාප පාලනය බිඳ දමා බණ්ඩාරනායක මහතා බලයට පත්වූයේ 1956 දීය. මේ වනවිට ලංකා සම සමාජ පක්ෂයෙන් බිඳුණු සෝවියට් වාදී  එක්සත් සමාජවාදී පක්ෂය, ශ්‍රී ලංකාවේ  කොමියුනිස්ට් පක්ෂය ලෙස නම වෙනස් කරන ලදී. මහජන එක්සත් පෙරමුණ වශයෙන් ඔවුන් හා සම සමාජ පක්ෂය බණ්ඩාරනායක රජයට එක්විය.  බණ්ඩාරනායක ආණ්ඩුව කිසිම බල කඳවුරකට නොබැඳී සිටීමේ ප්‍රතිපත්තිය යටතේ සෝවියට් දේශය සහ චීනය සමග තානාපති සම්බන්ධතා 1957 දී  අරඹන ලදී. සෝවියට් ශ්‍රී ලංකා  මිත්‍රත්ව සංගමය 1959 දී පිහිටුවන ලදී.ඉතා සීමිත ලෙසින් සෝවියට් සාහිත්‍යය හා පුවත්පත් ශ්‍රී ලංකාවට ඒමට පටන් ගත්තේ ඉන් පසුවය. ඔරුවල වානේ කම්හල, මෝදර පිටි කම්හල හා කැලණිය ටයර් කම්හල පිහිටුවීමට ගිවිසුම් අත්සන් කෙරුණේද මේ කාලයේය.

එවකට පැවති දෙවන ලෝක යුද්ධයේ දී සෝවියට් වැසියන්ගේ වීරකම් මෙන්ම රතු හමුදාවේ ජයග්‍රහණයන් ලොව පුරා ප්‍රචාරණය කිරීමට "සෝවියට් සතිය " නමින් සඟරාවක් 1942 දී පමණ සෝවියට් විදේශ අමාත්‍යංශය හා සෝවියට් ආරක්ෂක අමාත්‍යාංශය එක්ව පළ කරන ලදී. මේවා මුලදී බෙදා හරින ලද්දේ තානාපති කාර්යාල මගිනි. පසුව "සෝවියට් දේශය" යනුවෙන් මාස් පතා පල කෙරුනේ මේ සඟරාවයි.

ස්ටාලින්ගේ මරණයෙන් පසු  චීනය සෝවියට් දේශයට ප්‍රතිවිරුද්ධ මතයක සිටියේය. එයට හේතුව නිකිතා කෘෂෙව් (1953-1964)  හා ඔහුගෙන් පසු බලයට පත්වූ සෝවියට් ජනාධිපති/පක්ෂ ලේකම් වරු ස්ටාලින් වාදයට විරුද්ධව අදහස් පල කිරීමයි. ලෙනින් අසලම  එම්බාම් කර සංරක්ෂනය කර තිබු ස්ටාලින්ගේ මිනියද කෘෂෙව්  ගේ අණින්   ඉවත් කර ලෙනින් ගේ සොහොන්  ගෘහය පිටුපස තාප්පය අසල මිහිදන් කරන ලදී.

නිකිතා  කෘෂෙව් ස්ටාලින් විසින් පක්ෂයට කරන ලද ද්‍රෝහී ක්‍රියා ගැන ප්‍රසිද්ධ කතාවක්  කරන ලද අතර මේ ක්‍රියාවලිය "ස්ටාලින් ඉවත් කිරීම   de-Stalinization" ලෙස නම් කරන ලදී.  ස්ටාලින් ගේ අණින්  මරණ ලද හෝ සයිබීරියාවේ වැඩ කඳවුරු (ගුලාග්) වලට යවන ලද  මිලියන් 20ක පමණ සෝවියට් ජනතාව ගැන ප්‍රසිද්ධියේ  විස්තර සපයන ලදී.  එසේම ගුලාග් (වැඩ කඳවුරු) වසා දමා  සියලු දේශපාලන සිරකරුවන් නිදහස් කරන ලදී. රුසියාවට අයත්ව තිබූ ක්‍රිමියාව උක්රයිනයට භාර දුන්නේද මේ කෘෂෙව් මය.
ස්ටාලින් වළ දමා ඇති ස්ථානය (පින්තූරය මා විසින් ගත්  එකකි)

මහජන චීන ජනාධිපති හා කොමියුනිස්ට්  පක්ෂ සභාපති මා ඕ සේතුං හා අගමැති චෞ එන් ලායි සෝවියට් දේශය ස්ටාලින්වාදයෙන් පිට පැනීමට විරුද්ධ විය.  මේ නිසා සෝවියට් දේශය සහ චීනය අතර මතවාදී  විරුද්ධත්වයක් හට ගැනිණි. " මොස්කව් වල වැස්සොත් කොළඹ කුඩ ඉහළනවා" යයි විරුදාවලි ලත් ශ්‍රී ලංකාවේ  කොමියුනිස්ට් පක්ෂය මොස්කව් පිල හා පීකිං වල වැස්සොත් කොළඹ කුඩ ඉහලන චීන පිල ලෙසින් බෙදිණි. චීන පිල බිහි වූයේ 1960 පමණය.

සෝවියට් දේශය ස්ටාලින් වාදය ඉවත දමමින් නැවතත් මාක්ස් ලෙනින් වාදයට යාම පිලිබඳ ප්‍රකාශ නිකුත් කරන සමයේ චීනයේ මාඕ සේතුං සංස්කෘතික විප්ලවය දියත් කරන ලදී. (cultural revolution) මේ සමයේ මිලියන් 30 කට අධික චීන ජනතාවක්  ඝාතනය වුනි. මාඕ ට සහය දුන් සටන් සගයන් පවා "නැවත ඉගෙනීම" පිණිස අති  දුෂ්කර තත්වයන් යටතේ ජිවත් වීමට ගම්වලට පටවන ලදී. (ඩෙන් ෂියා ඕ පින් එවැන්නෙකි)

වසර 1963 දී කම්පුචියානු කොමියුනිස්ට් පක්ෂයේ ලේකම් පදවියට පත් වූයේ මාඕවාදී පොල්පොට්ය. වසර 1979 දක්වා පැවති ඔහුගේ පාලනයේදී "නැවත ඉගෙනීම" සඳහා ගම් වලට  යැවුණු  මිලියන් 1 සිට 3 දක්වා ජනතාවක්  ඝාතනය විය.

ශ්‍රී ලංකාවේ  කොමියුනිස්ට් පක්ෂය  නැවතත් සිරිමාවෝ බණ්ඩාරනායක රජය යටතේ 1962 සභාග ආණ්ඩුවකට පිවිසුණි. එක්සත් වමේ පෙරමුණ යටතේ කොමියුනිස්ට් පක්ෂය, ට්‍රොට්ස්කිවාදී සම සමාජය හා මහජන එක්සත් පෙරමුණ රජයේ සිටියද ඇමති ප්‍රශ්න නිසා එය බිඳී ගියේය.  ශ්‍රී ලංකාවෙන් ප්‍රථම වරට සිසුන් 31 දෙනෙකු උසස් අධ්‍යාපනය සඳහා සෝවියට් දේශයට පිටත් කෙරුනේ මෙම වාමාංශික රජය සමග අත්සන් කළ ගිවිසුමකිනි. ශිෂ්‍යත්ව ලබා දුන්නේ මිත්‍රත්ව සංගමය හරහා වන අතර බොහෝ විට කොමියුනිස්ට් පක්ෂයට සම්බන්ධ සිසුන්ට පමණක් අවස්ථා ලැබිණි. සමහර විට  අයදුම් කරන ලද්දේද ඔවුන් පමණක් වන්නට ඇත.

මෙසේ ගිය එක සිසුවකු වන රෝහණ විජේවීර  වසර කිහිපයකින් පසු රෝගී තත්වයක් උඩ ශ්‍රී ලංකාවට නැවත පැමිණි විට ඔහු චීන පිලේ නිසා රුසියානු තානාපති කාර්යාලය වීසා ප්‍රතික්ෂේප කල බව කියති. මේ කතාව  පිළිගත නොහැක්කේ සෝවියට් වීසා ලබා දෙන්නේ කාල වකවානුවකට බැවිනි. එම කාල වකවානුව තුළ නැවත පැමිණීමේ ගුවන් ගමන් බලපත්‍රය ඇත්නම් රුසියානු තානාපති කාර්යාලයට යාමේ අවශ්‍යතාවයක් නැත.

මා වඩාත් විශ්වාස කරන කතාව නම් විජේවීර සමග කිසියම්  අමනාපයකින් හෝ ඉරිසියාවකින් සිටි සිසුවෙකු හෝ දෙදෙනෙකු ඔහුට එරෙහිව මිත්‍රත්ව සංගමයට චෝදනා කළ පසු ඔහු විශ්විද්‍යාලයෙන් පහ කිරීමට මිත්‍රත්ව සංගමය කටයුතු කල බවය.  ඔහුට එරෙහි චෝදනාවල ඔහු චීනයට පක්ෂව කතා කරන බවටද චෝදනාවක් අඩන්ගුවී තිබුනේ යයි කියති. විජේවීර පැහැදිලිව කියා තිබුනේ සෝවියට් දේශය ධනවාදය කරා ගමන් කරන බවත් මාඕ ගේ ස්‌ථාවරය නිවැරදි බවත්ය. විජේවීරගේ පියා කොමියුනිස්ට් පක්ෂයේ සාමාජිකයෙකු නිසා ඔහු සෝවියට් දේශයට පැමිණියේ එහි එවකට නායක එස් ඒ වික්‍රමසිංහ මහතාගේ අනුග්‍රහයෙන් බව කියවේ.  එසේම නැවත රුසියාවට පැමිණීමට ඔහු පක්ෂයේ උසස් අයගේ උදව් පතා ගියත් එයද නොලැබී තිබුණි.

මිත්‍රත්ව සංගමය හෝ කොමියුනිස්ට් පක්ෂය හරහාත්  පසුව ශ්‍රී ලංකා නිදහස් පක්ෂය හරහාත් ගිය සිසුන් ගේ ශිෂ්‍ය භාවය අහෝසි  කල හැකි වුයේ අදාල විශ්ව විද්‍යාලයට සහ මිත්‍රත්ව සංගමයටය.

(මේ තත්වය වෙනස් වූයේ 1980 දී ජේ ආර් ජයවර්ධන මහතාගේ රජය සෝවියට් දේශය සමග ගිවිසුමක් ගැසීමෙනි. සෝවියට් ශිෂ්‍යත්ව වල අගය වටහා ගෙන සිටි ජේ ආර් ශිෂ්‍යත්ව සඛ්‍යාව 75 දක්වා වැඩි කිරීමට සෝවියට් දේශය එකඟ කරවාගෙන දෙරටේ අධ්‍යාපන අමාත්‍යංශ අතර ගිවිසුමක් අත්සන් කරන ලදී. අපොස උසස් පෙළ විභාගයෙන් සමත් සිසුන්  විශ්ව විද්‍යාල ප්‍රතිපාදන කොමිසමින් සංවිධානය කළ සම්මුඛ පරීක්ෂණ දෙකක් හරහා තෝරා යවන ලද්දේ ඉන් පසුවය. මා  සම්මුඛ පරික්ෂණයට අයදුම් කලේද මේ ශිෂ්‍යත්ව පිලිබඳ දිවයින පුවත් පතේ පල කල දැන්වීමකට අනුවය.මේ සිසුන් ගේ ශිෂ්‍ය භාවය අහෝසි කළ හැක්කේ පක්ෂයකට හෝ මිත්‍ර සංගමයට නොව රුසියානු උසස් අධ්‍යාපන අමාත්‍යංශයට පමණය.)

කේ ශන්මුගදාසන් ගේ නායකත්වයෙන් යුත්   කොමියුනිස්ට් පක්ෂයේ චීන පිලට මුලින් බැඳුනු විජේවීර මහතා  ඉන්පසු තමන්ගේම පක්ෂයක් සංවිධානය කළේය. නව වම වුයේ ඔහු විසින් එසේ පිහිටවූ ජනතා විමුක්ති පෙරමුණයි.

වසර  1970 දී සිරිමාවෝ බණ්ඩාරනායක මැතිනියගේ නායකත්වයෙන් පිහිටවූ  සමගි පෙරමුණු රජයට කොමියුනිස්ට් පක්ෂය සහ සමසමාජ පක්ෂය ද ඇතුලත් වුනි. වසර 1971 වනවිට සිංහල තරුණයන් බහුතරයක් විසින් වාමාංශික සමගි පෙරමුණු රජයට එරෙහිව කැරැල්ලක් ගසන ලදී. කැරැල්ලේ න්‍යායවාදී නායකයා වූ විජේවීර අනුගමනය කළේ චීනයට හා මාඕ වාදයට පක්ෂ ප්‍රතිපත්තියකි. ඔහුගේ එක පන්තියක් වුයේ ඉන්දියානු ව්‍යාප්තවාදය යන්නය. ඉන්දියාව සමග දේශ සිමා යුද්ධයක පැටලී සිටි චීනය ඉන්දියානු  ව්‍යාප්තවාදය තදින් විවේචනය කළ රටකි. (නමුත් සැබවින්ම සිකීමය හා ටිබෙටය ආක්‍රමණය කළේ චීනයයි.)  මේ කැරැල්ලට විරුද්ධව සිරිමාවෝගේ රජයට සහය දීමට ඉදිරිපත් වූ එක රටක් වන්නේ සෝවියට් දේශයයි.කැරැල්ලට පක්ෂ යයි සැක කල එකම රට වුයේ උතුරු කොරියාවයි.

රුසියානු සාහිත්‍යයේ මුදුන් මල්කඩක් වන චෙකොව් ගේ පොත් ඒ පී ගුණරත්න මහතා විසින් පරිවර්තනය කරන ලද්දේ 1949 තරම් ඈත කාලයේය. (රුසියානු කෙටි කථා) ඉන්පසු බොහෝ රුසියානු සාහිත්‍ය පරිවර්තන කෙරුණු අතර කොමියුනිස්ට් පක්ෂයට සම්බන්ධව කටයුතු කල උඩකැන්දවල  ශ්‍රී සරණංකර හිමියන් පලකල "නවලෝකය " සඟරාවේ  ඒවා පළවන්නට විය.  මේ සාහිත්‍ය පරිවර්තන බොහොමයක්ම ප්‍රේමකතා සහ පූර්ව  විප්ලවීය සම්භාව්‍ය  රුසියානු සාහිත්‍යය කෘති වීය.

විජේවීර මහතා ගේ ලුමුම්බා සමකාලීනයකු වූ පද්මහර්ෂ කුරණගේ  මහතා  චෙකොව් ගේ මෙන්ම වෙනත් කතුවරුන්ගේද කෘතීන් අනගි ලෙස  පරිවර්තනය කරණ ලදුව මොස්කව් ප්‍රගති ප්‍රකාශකයන් විසින් මුද්‍රණය කර බෙදා හරින ලදී. මේවා කිසිවක් රුසියානු විප්ලවයට සම්බන්ධ ඒවා නොවීය.  දැදිගම වී රුද්‍රිගු මහතාගේ පරිවර්තන එන්නේ පසු කාලයකය.


 මේ නිසා මේ 1971  කැරැල්ලට සහභාගී වූ තරුණයන්ට සෝවියට් සාහිත්‍යයේ බලපෑම එතරම් ප්‍රබල වුවක් යයි කීම ඉතා අපහසුය.මගේ නිගමනය නම් 1971 කැරැල්ල දක්වා වූ කාලය අතර තුර නව වමට බලපෑවේ සෝවියට් සාහිත්‍යය නොව විජේවීරගේ මාඕ වාදය බවයි. ග්‍රාමීය තරුණයන් කැරැල්ල සඳහා  විජේවීර සංවිධානය කළේත් මාඕ වාදය අනුව මිස ලෙනින් වාදය අනුව නොවේ. ලෙනින් ඔක්තෝබර් විප්ලවය ට්‍රොස්ට්කි සමග සංවිධානය  කලේ පෙත්රෝගාඩ් (සෙන්ට් පිටර්ස්බර්ග්) නාගරික කම්කරුවන් හා සොල්දාදුවන් අතර මිස රුසියානු ග්‍රාමීය ගොවි ජනතාව  අතර නොවේ.

~මතු සම්බන්ධයි
https://www.pressreader.com/sri-lanka/daily-mirror-sri-lanka/20160304/282510067654331

https://www.thoughtco.com/body-of-stalin-lenins-tomb-1779977




Monday 4 September 2017

ප්‍රථම ප්‍රේමය ඔබ නොවේ - (19) - වීසා පෝලිමේ




ගමන් මාර්ගය මොස්කව් සිට බෙලෙරුසියාවේ මින්ස්ක්, බ්‍රෙස්ට්, පෝලන්තයේ වර්ෂාවා, පොස්නන්, ජර්මනියේ බර්ලින්, කොලෝන්, බෙල්ජියමේ බ්‍රසල්ස් හෝ ඕලන්දයේ ඇම්ස්ටඩෑම්  හා හාර්විච් හෝ ඩෝවර් හරහා  ලන්ඩන් 
"මට ටිකක් අප්සෙට් උඹලා මේ ලෙනින්ට බනින එක. විහිළු කරන එක. කොච්චර වුනත් අපිට ශිෂ්‍යත්වයක් දීල උගන්වනවා මේ රට. අපෙ දෙමව්පියන්ට අපිව  ඇමරිකාව, එංගලන්තය වගේ රටකට යවන්න  සල්ලි නැහැ. විශ්ව විද්‍යාලෙට යන්න ලකුණු යන්තම් මිස් වෙච්ච ගමන් අපි ලංකාවේ අනාථයි. මේ රටනේ අපිව බේරා ගත්තේ. දේශපාලනේ ගැන කතා නොකර සරලව ගත්තොත් මම සෝවියට් දේශයට ආදරේ ඒකයි"
තාන්යා රැගෙන යාමට කොල්ලන් එකඟවූ පසු ගිහාන් සතුටු සිතින් කීය.

"අනික නැත්නම්  උඹට තාන්යා හම්බවෙන්නෙත් නැහැනේ " තෙන්නේ කීය.

"ඒක තමයි වැදගත්ම එක. නැත්ද මචං " සුහදය පිටට තට්ටුවක් දැම්මේය.

"අපි වුනත් බනින්නේ නැහැ මචන්. අපි මේ කතා කලේ ඇයි රුස්සෝ මේ වගේ උපහාසෙන්  උන්ගේ රට ගැන කතා කරන්නේ කියල. අපට සලකන එක නෙමෙයි. ඔන්න උඹට ඕක ගැන හොඳ විවරණයක් අහ ගන්න පුළුවන් අර ....සන්  එක්ක කතා කරානම්." ප්‍රියාන් පැවසුවේය.

"අපොයි පොර නේද අර උදේට තේ එකට වොඩ්කා  බොන්නේ. දවල්ට කන්නේ නැතිව රෑට බත් එකට වොඩ්ක  බෙදාගෙන කන්නේ කියල මුන් කාඩ් ගහන්නේ, හැබැයි හරි අහිංසක හොඳ බොහිමියන් බුවෙක්. හැබැයි දැක්ක වෙලේ  මට භය හිතුන හුළඟට වැටෙයි කියල බං"

"ඒ ..සන් තමා. ...සන් කියන්නේ  අර පක්ෂය ගහන පත්තරේ කර්තෘ ගේ පුතා නේද? ඒ කර්තෘ ත් නියම පොරක්. ඒ  පත්තරේ විතරයි කියවන්න පුළුවන් දේශපාලනික පත්තරයකට තියෙන්නේ එයා නිසාම.   කොමියුනිස්ට් පක්ෂයේ ගොඩක් අයට වඩා කෙලින් පොරක්." ගිහාන් කීය.

"ඒක ඇත්ත. ..සන්ට වෙලා තියෙන්නේ පොර ආවේ අර  විප්ලවීය ජිව ගුණයද මොකක්ද කියන එක පිරුණ  පරමාදර්ශී සෝවියට් රාජ්‍යයක් බලාගෙන. ආවහම දැක්කේ වෙන එකක්. මෑන්  ඉන්නේ ඉච්ඡා භංගත්වයෙන් කියල උඹට හිතෙන්නේ නැත්ද?

"ඉච්ඡා භංගත්වේ කොහොම වෙතත් මාර  ලස්සන රුස්සියෝ දෙන්නෙක් එක්ක නම් හිටියා මම එදා යද්දී. අර චිත්‍ර අඳින තේ... ගේ කාමරේ හිටියේ" තෙන්නේ කීය.

"පොර ඉන්න විධිහට කෙල්ලෝ කැමති ඇති. උන් ගැන්සිය ගිටාරයක් අරගෙන සින්දුවක් ගහගෙන ඉන්නවා. අර නියමෙට වයලීන් ගහන පොරකුත් ඉන්නවා ඒ සෙට් එකේ."

" ඔය බජාර් එක ගිය පාර අපේ වෙචේර් එකේ  (වේචේර් යනු විවිධ ප්‍රසංගය යන අරුත දෙන්නකි. ශිෂ්‍ය සභාව විසින් මෙවැනි විවිධ ප්‍රසංග වසරකට වරක් සංවිධානය කරන ලදී)  පොඩි අයිටම් එකක් දැම්මා. දන්නවනේ  විප්ලවීය, වාමාංශික ලෙවල් එකට. ලංකාව නිදහස ගත්ත විධිහ පෙන්වන්න. අර විශ්ව විද්‍යාලයේ උප කුලපතිත් ඉන්න නිසාද කොහෙද? ඒකෙ කෙළවර මුන් බ්‍රිතාන්‍ය කොඩිය කඩලා ඉරල දානවා. මගෙන් අර හාර්කොෆ් ඉඳන් අපූ කොල්ලෙක් අහනවා දැන් අපට ලන්ඩන් යන්න දෙයිද දන්නේ නැහැ නේද සුද්ද කියල."

හැමෝම කොක් හඬලා සිනා සුනහ.

"අපොයි මෙහෙමත් එවුන්. මචන්  වාමාංශික පක්ෂ වල ඇමතිලගේ පුත්තු, අධ්‍යාපන අමාත්‍යංශ යේ ලොකු එවුන්ගේ ළමයි හෙමත් ඔය සෙට් වල ඉන්නවා නේද?  ප්‍රේමදාස ගේ මුස්ලිම් ඇමතිගේ ආධාරකාරයන්ගේ ළමයි සෙට් එකකුත් එවල අර මොස්කව් ළඟ සිටි එකට යවල කියල ආරංචියි. අපිව මුලදී යුනිවසිටි ග්‍රාන්ට් කොමිෂන් එකෙන් එව්වත් දැන් දැන් පේමයාගේ   ආණ්ඩුවත් අත දානවා මේ ශිෂ්‍යත්ව වලට "

"ඇමැත්තා  කියල තියනවලු මුස්ලිම් ළමයි ලංකාවේ මෙඩිසින් යනවා අඩුයි කියල."

"ඉතින් බං මෙහ එවල හරි යනවයි ඔය විධිහට. වෙන එකෙක්ගේ චාන්ස් එකක් නේ මුන් ගන්නේ "

"ඔන්න  ඔතනනේ සෝවියට් නිලධාරිවාදයේ වරද එන්නේ මචන් ලා. සෝවියට් ආණ්ඩුව අර ජෝර්ජ් ඕවෙල් ගේ ඇනිමල් ෆාම් පොතේ වගේ තියෙන ඕන ගවන්මන්ට් එකක් එක්ක සෙට් වෙනවා.  "

"විජේවීර මුන් ධනවාදයට යනව කියල හැට ගණන් වල චීන පිලට සෙට් වුනේ මෙහෙම වෙනවා කියල දන්නා නිසා වෙන්න ඇති"

"අනේ මොන පිස්සුද? පොරට ආපහු මෙහෙට එන්න වීසා දුන්නේ  නැහැ. සෝවියට්  ආණ්ඩුව විවේචනය කරනවා කියල අපේම එකෙක් කට්ට ගහල කියල කියන්නේ දන්නා එවුන්. එහෙම කරපු විවේචනයක් නැතිලු. එන්නේ දුන්නේ නැති වුනහම පොර ගිහින් චීන පිලට සෙට් වුණා. මොකෝ දැන් චීනේ  කියල අමුතුය. කොහොමද ඩෙන් ෂියා ඕ පින් දෙන ගේම. කෙළින්ම  ජේ ආර්  ගේ මාකට් එකොනොමි එක වගේනේ. විජේවීර මොකක්ද ඒකට කියන්නේ "

"ඒකට  මොනවා කියනවද දන්නේ නැහැ. ලංකාවේ  විශ්ව විද්‍යාල නම් වහල. අර පිඑම්සී කේස් එකට. මොරටුවේ ඉන්න  මගේ යාළුවෙක් ලියල එවල තියනවා අපි වාසනාවන්තයි මෙහෙට ආපු එකට දැන් උන්ට  අවුරුද්දක් විතර පන්ති නැහැ. පෙළපාලි යනවා, වැඩිපුරම ඉන්නේ ගෙවල් වල කියල. තත්වේ හෙන අප්සෙට් ලු. ඒ මදිවට ඉන්දියන් කාරයෝ ඇඟිලි ගහලා උතුරේ. අනාතයි ලු බන්. "

"ඔය '71 තුවක්කු කෑලි වලින් පොලිසි වලට ගහපු විප්ලවේදී සෝවියට් දේශය උදව් කළේ සිරිමාටනේ බන්. විජේවීර ගැන අපට කොමියුනිස්ට් පක්ෂ ඉතිහාසය  උගන්වන ටීචර් කිව්වේ අර ලෙනින්ගේ පොතේ කෑල්ලක් එක්ක, -අති වාමාංශික ළදරු වලිප්පුව තියෙන උන් කියල"

"ඔව් මුන් කැමති නැහැ දැන් විප්ලව වලට. මුන් නිකරගුවා වලට උදව් කරන්නෙත් ඇමෙරිකන් කාරයා එක්ක තියෙන ඔරොප්පුවට. මටත් හිතෙනවා බන් රටකට  ඉස්සෙල්ලම  ඔය එංගලන්තේ වගේ ධනවාදී දියුණුවක් එන්න ඕනේ කියල. සමාජවාදී ක්‍රමයක් හරියන්නේ එහෙම දියුණුවක් ආවහම කියල. මුන්ට වෙලා තියෙන්නේ  දැන් එතනට ආපහු යන්න බැරි විධිහට දුරක් ඇවිල්ල. එනිසා මේකෙන්ම ගොඩ වෙන්නයි ඕනේ. "

"අඩෝ විජේවීර ලන්ඩන් ගියා නම්, සයිබීරියාවේ රේල් පාර හදන්න  යන්නේ නැතිව '71 කීයටවත් වෙන්නේ නැහැ.  ඒ කාලේ කොල්ලෝ කවුරුත් ගිහිල්ල නැහැ. නැත්නම් අර 60 ගණන්වල ලන්ඩන් පැත්තේ තිබ්බ නිදහස් වාතාවරණයට අහු වුණා නම් කොහොමද? "
 ප්‍රියාන්  අදහස් කලේ ස්වින්ගින් සික්ස්ටිස් යනුවෙන් ඉතිහාසඥයන් හඳුන්වන කාලයයි. බීට්ල්ස් සංගීත කණ්ඩායම ප්‍රසිද්ධව සිටි, හිපියන්ගෙන් සහ ලිංගික වශයෙන් මෙන්ම අදහස් අතින්ද නිදහස් තරුණ පරපුරක් එංගලන්තය, ප්‍රංශය , ජර්මනිය ආදී රටවල් සිසාරා පැතිර ගියේය. පැරණ කොන්සර්වටිව් සම්ප්‍රදායන් බිඳ දමමින් ඉදිරියට ආ එම  තරුණ රැල්ලට බටහිර සමාජය දෙදරුම් කෑවේය.

"ඔන්න ඕව නවත්තපල්ලා බන්. ලන්ඩන් ගමනට සෙට් වෙමු. තෙන්නේ උඹ සීල් ගහනවා නේද. මගේ අන්තිම විභාගේ ලබන සතියේ ඉවරයි."

සුහද අදහස් කලේ තමොශ්නයා (රේගුව ) පසු කර එනවිට සිසුන් අතේ ඇති ඩොලර්, පවුම් ප්‍රමාණය සටහන් කර දෙන පෝරමය ගැනය. එහි සීල් එක තම්බපු බිත්තරයකට ගෙන එය අලුතින් දැමු මුදල් ගණන් ඇති  අලුත් පෝරමයකට ගැහීමට තෙන්නේ දක්ෂයෙකි.

වීසා ගැනීමට මුලින්ම යා යුත්තේ බ්‍රිතාන්‍ය තානාපති කාර්යාලයටය. ඉන්පසු නැගෙනහිර ජර්මනිය, බටහිර ජර්මනිය හා නෙදර්ලන්ත වීසා ගහ ගත යුතුය. සෝවියට් රුසියාව පුරා සිටින සිසුන්වී සා ගැනීමට මොස්කව් පැමිණිය යුතුය. කිව්, ටිබ්ලිසි, දනියෙත්ස්ක්, හර්කෝෆ්, ඔඩෙස්සා, සඵරෝෂි, වොරනේෂ්, අල්මා අටා  ආදී සතර  කොනින් සිසුන් ඇදී එති. එනිසා මේ දිනවල තානාපති කාර්යාල වල දිග පෝලිම්ය.

විභාග අවසන් වූ පසු උදේ පාන්දරින්ම බ්‍රිතාන්‍ය තානාපති කාර්යාලයේ වීසා පෝලිමට යා යුතුය. එහි සිසුන්ම හදන නම්  ලිස්ට් එකක් තිබේ. නම් ලිස්ට් එකට නම් දාගත්  පසු කෙසේ හෝ ඇතුලට පැනගත හැකිය. බ්‍රිතාන්‍ය තානාපති කාර්යාලයට ලොකු මුදලක් පෙන්විය යුතුය. සිසුන් කරන්නේ කිහිප දෙනෙකුගේ මුදල් එකතු කර එම ප්‍රමාණය සාදා ගැනීමයි. ඉන්පසු හැමෝම එය වීසා කාර්යාලයට පෙන්වති.

වරක් ඉතා දිග පෝලිමක සිටි එක ලාංකික සිසුවෙකු ජර්මන් තානාපති කාර්යාලය අසලදී සිහි නැතිව වැටුණි. ජර්මානුන්  ඔහු වහා ඇතුලට ගෙන ප්‍රතිකාර දී වීසා ද දුන්හ. ඉන්පසු අප්‍රිකානු සිසුන්  කිහිප දෙනෙකු එම උපක්‍රමය උත්සාහ කලමුත් හරි ගියේ නැත.

මින් වසර කිහිපයකට කලින් නම් ලාංකිකයන්ට බ්‍රිතාන්‍ය වීසා කලින් ගැනීමට අවශ්‍ය වූයේ නැත. බ්‍රිතාන්‍ය දේශ සීමාවේදී මාස හයකට සියළුම ශ්‍රී ලාංකික, මාල දිවයින්, මොරිෂස් සිසුන්ට වීසා ගසනු ලැබිය. නමුත් 1983 වසරේ  සිංහල දෙමළ  කෝලාහල වලින් පසු බ්‍රිතාන්‍යයට එන දෙමළ ජාතිකයන්ගෙන් 90% පමණ දේශපාලන අනාතභාවයට අයදුම් කළහ. ඉන්පසු අගමැතිනී තැචර් විසින් එසේ තොටුපලේ වීසා දීම නවත්වන  ලදී.

"මුන්ට මේක තේරෙන්නේ නැත්ද බන්. අපි හොර කරනවා කියල" ගිහාන් වරෙක සුහද ගෙන්  ඇසීය. එතනම සිටි  වැඩිහිටි සිසුවෙකු කිවේ සුද්දන් සිසුන්  මෙය කරන බව හොඳින් දන්නා බවය.

"බලපං, උන්ට කොහොමත් සෙනග ඕනේ  සමර් (ගිම්හාන කාලය)  එකට වැඩ කරන්න. අඩු ගානට පඩි ගෙවල. සුද්දන්ට ජොබ් දෙන්න නම් ගොඩක් ගෙවන්න  වෙනවා. ඊට වඩා ලේසියි සුද්දට සහනාධාරයක් දීල අපිටයි,  දේශපාලන අනාථ භාවය ඉල්ලන එවුන්ටයි අඩු පඩියට ජොබ් දෙන එක. අපි ගෙවන ටැක්ස් එකත් උන්ට යන්නේ.  අනිත් කේස්  එක අපි ඒ සල්ලි වියදම් කරලා උන්ගේ බඩුත් අරන් මෙහෙ එනව. එක ගලෙන් කුරුල්ලෝ දෙන්නයි. ඉතින් මොකටද අපි බොරු කරනවද කියල හොයන්නේ"

"රුස්සත් දන්නවා ශිෂ්‍යයෝ මේක කරනවා කියල. උන්ටත් කිසියම් ප්‍රමාණයකට අපි ගේන දේවල් ඕනේ. එනිසා දෙගොල්ලම නොදැක්කා වගේ ඉන්නවා. මට නම් හිතෙන්නේ  එහෙමයි." සුහද කීය.
විදේශික නොවන වැසියන් යන රුසියානු දුම්රිය මැදිරියක් (1984-85)

ගිහාන් සියලුම වීසා සතියක් තුල ගමන් බලපත්‍රයේ ගසාගෙන  තාන්යා සමග ගොස් ඇගේ  ප්‍රවේශ පත්‍රයද ගත්තේය. තාන්යා සතුව තිබූ  ස්වදේශික ගමන් බලපත්‍රයට කැබින් සහිත යුරෝපයට යන දුම්රිය කොටසේ ඉඩ ලැබෙන්නේ  නැත. ඇයට බ්‍රෙස්ට් දක්වා යන රුසියානුවන්ගේ මැදිරියක ඉඩ ලැබිණි. මේවා නම් කර ඇත්තේ ප්ලස්කර්ත්නයා  යනුවෙනි.
රුසියානු මගී මැදිරියක්  (1986 පමණ )

මෙහි කැබින් එකක  ඇඳන් හතරක් හෝ හයක් ඇති අතර කොරිඩෝරයේ ද ඇඳන් තිබේ. නැත්නම්  සීට් දෙකකි. මිනිසුන් බොහෝ ප්‍රමාණයක් ගාල් වී යන නිසා සුඛෝපභෝගී බවින් අඩුය. නමුත් ප්‍රවේශ පත්‍රය ලාභය.  තාන්යා ගේ මුහුණ ඇඹුල් වුවද  ගිහාන් සමග දවසක් හෝ යන නිසා සතුටු වූවාය.

~ මතු සම්බන්ධයි

සියලු නම් ගම්  මනඃකල්පිතය.

Saturday 2 September 2017

ප්‍රථම ප්‍රේමය ඔබ නොවේ - (18) -බ්‍රෙස්ට් යමුද තාන්යා

මෙතෙක් කථාව:

එදා ලැබූ මිහිරි අත්දැකීම් මෙන්ම රුස්සන් සමග ගෙවූ දවස ගැනද ගිහාන් නිතර මෙනෙහි කළේය. ශිෂ්‍ය නවාතැනේ යහළුවන්ට සමහර විස්තර පමණක් කීමට ඔහු පරිස්සම් විය. කතාබහේදී කේ ජී බී පාසැලේ ඉගෙන ගන්නා නමුදු පාලනය හා මාක්ස් උපහාසයට ලක් කරන විහිළු කතා ඔවුන් කිව් බව ඔහු ශ්‍රී ලංකික යහළුවන් සමග පැවසීය.

ලෙනින්ගේ ස්මාරකය අසල පොලිස් නිලධාරියෙක් (පින්තුරය කතුවරයාගේය)

"අපොයි මම ඕව ගොඩක් අහල තියනවා." ජ්‍යෙෂ්ඨ සිසුවකු වන මහින්ද කීවේය.
"මතකද අර ලෙනින් ගෙනාපු කතාව, ප්‍රසිද්ධ එකක්" කිරින්ද  ඇසුවේය.
"මොකක්ද" තවෙකෙක් විමසීය.
"ඇමෙරිකන් කාරයෙක් ලෙනින්ගේ මව්සලොයෙම් එක (රතු චතුරශ්‍රයේ ලෙනින්ගේ සිරුර තබා ඇති මැදුර) බලන්න ගියාලු. හෙන පෝලිම. පොර වට පිට බලල ගියාලු ඩොලර් කඩේට. ගත්තලු ටීචර්ස් විස්කි පෙට්ටියක්. ඒක ටැක්සියක දාගෙන ඇවිත්  මුර කරන භටයෙක්  ගාව නැවත්තුවලු. අර භටයා ගාවට ගිහින්  කිව්වලු

"තවරිෂ් සොල්දාත් (සොල්දාදු සහෝදරයා) මට ලෙනින් බලන්න යන්න  ඕනේ. ඒත් හවසට ෆ්ලයිට් එක නිසා වෙලා නැහැ පෝලිමේ ඉන්න. පොඩ්ඩක් එනවද ටැක්සිය ගාවට "

සොල්දාදුවා ටැක්සිය ඇතුලේ බැලුවම දැක්කලු ටීචර්ස් පෙට්ටිය.
සැලියුට් එකක් ගහල කිව්වලු මෙහෙම.

"තවරිෂ් ඇමෙරිකානෙට්ස් (ඇමෙරිකානු සහෝදරයා) ලෙනින් බලන්න යනවද? ලෙනින් මෙතනට  ගේන්නද? "
සියල්ලෝ කොක් හඬලා සිනාසුනහ.
"මේ කතා ඔක්කොම වගේ මෙහෙ තියන නිලධාරීන් ගේ අල්ලස දුෂණයට එරෙහිව කියන ඒවා නේද?" ගිහාන් ඇසීය.

"නැහැ, දැන්  අර මාක්ස් ගේ කතාව වගේ ඒවා කෙලින්ම සිස්ටම් එකට ඇටෑක් එකක්   නේද? ඇමෙරිකන් කාරයෝ හදල එවනවද දන්නේ නැහැ " සුහද විහිළුවට මෙන් කීය.

"මම නම් හිතන්නේ නැහැ මචන්ලා . සම්භාව්‍ය මාක්ස්වාදය අනුගමනය කරන අය  එහෙම නැත්නම් පැරණි මාක්ස්වාදීන් සහ  ට්‍රොට්ස්කිවාදීන් මේ සිස්ටම් එකට මුළුමනින්ම පක්ෂ නැහැ. අනික මෙහෙ මාක්ස් ලෙනින්වාදය අනුගමනය කරනවා  කියලනේ රට ගෙනියන්නේ. නමුත් ඇත්තටම මාක්ස්, ලෙනින්, ස්ටාලින්වාදය නේ තිබ්බේ. කෘෂෙව් ටිකක් වෙනස් කලා. දැන් ගොර්බචොව් හෙනට  වෙනස් කරගෙන යනවා. ඉස්සර මේ කතා කිව්වනම් රුස්සා කෙලින්ම සයිබීරියාවේ වැඩ කඳවුරක නේද" ප්‍රියාන් පැවසීය.

"මේ රට අපේ රටට වඩා දියුණුයි මචන්ලා. අපේ වගේ දුප්පත් මිනිස්සු, මුඩුක්කු වල ඉන්න මිනිස්සු නැහැ. රස්සා නැති මිනිස්සු නැහැ. බඩගින්නේ ඉන්න මිනිස්සු නැහැ. මට පේන්නේ ප්‍රශ්න කිහිපයයි නේ  තියෙන්නේ. එකක් ආණ්ඩුව කෙලින්ම   විවේචනය කරන්න  බැරිකම. ගොර්බා දැන් ඒකත් පෙරෙස්ට්‍රොයිකා ව යටතේ දීගෙන යනවා. අනික නිලධාරීන්ගේ  වංචාව දුෂණය, මිනිස්සු වැඩ කරන්නේ නැති කම, අයිස් ගහනවා, බටහිර රටවල වගේ සුඛෝපභෝගී භාණ්ඩ අඩුයි. ඕව හදාගන්නනේ ඕනේ ?" ටිකක් වමට බර යහළුවකු වන අමල් පැවසීය.

"මචන්ලා විප්ලවය වෙනකොටත් රුසියාව ලෝකයේ ප්‍රබල රටක්. සාර් දරුණු විධිහට රට  පාලනය කලා කියලත් අපි දන්නවා. කෙටියෙන් කියනවනම් පළමු ලෝක යුද්ධය නිසා ප්‍රශ්න, සොල්දාදුවෝ පලා එනවා, මිනිසුන්ට ඉඩම් නැහැ, කන්න නැහැ . ඒනිසා විප්ලවය වුණා. නමුත් මචන් මාක්ස් ඕක  වෙන්න ඕනේ කියල කිව්වේ ජර්මනිය, එංගලන්තය වගේ ඒ දවස්වල කාර්මික වශයෙන් දියුණු ධනවාදී රටකනේ. එනිසා රුස්ස  තමන්ව  සංසන්දනය කරන්නේ දියුණු ධනවාදී රටක් එක්ක  මිසක් ලංකාව, ඉන්දියා ව එක්ක නෙමෙයි. ඕකයි අපි වටහා ගන්න ඕනේ. අනිත් එක වෙන රටවල මිනිසුන්ට වගේ රුස්සට වෙන කිසිම රටකට යන්නත් බැහැ. වෙන නගරෙක නිදහසේ පදිංචියට යන්න පුලුවන්ද අපට වගේ. රෙජිස්ටර් වෙන්න ඕනේ . පක්ෂේ ඉන්නවා නම් තියනවා යම් නිදහසක්.  ඇයි  මේ රට මෙච්චර හොඳනම් , ස්ටාලින් කිව්වා වගේ කොමියුනිස්ම් ඇවිල්ල නම් ඒ ගොල්ලන්ට  පුළුවන්නේ මිනිසුන්ට යන්න  දෙන්න අනිත් රටවල් බලල එන්න. " ප්‍රියාන් සුපුරුදු ලෙස  දිග හෑල්ලක් දෙඩුවේය.

"හරි හරි ඒක කිව්වහම මතක් වුනේ. තාන්යා කියනවා එයාව එක්ක යන්නලු   එංගලන්තේ යන දවසට බ්‍රෙස්ට් එනකන්. ඊට පස්සේ එයා  නිවාඩුවට වොරොනේෂ් හරහා ගෙදර යන්නම්ලු. රොස්ටොව්  පැත්තේ ගෙවල්. " ප්‍රියාන් කීවේය.
සිතූ ලෙසින්ම සුහදට පමණක් නොව අනිත් එවුන්ටද මළ පැන්නේය.

"පිස්සු කතා කරන්න එපා යකෝ. ඒකිව කැබින් එකට ගෙනිහින් කොහොමද අපි අර හොර ගේම් ටික ගහන්නේ, අනික උන්ට බ්‍රෙස්ට් එනකන් යන්න පුලුවන්ද ? බ්‍රෙස්ට් තියෙන්නේ බෙලොරුසියාවේ නේ " සුහද කෑ ගැසුවේය.

එංගලන්තයට යන ගමන තුල  ප්‍රශ්න කිහිපයකි. සිසුන් විසින් ලංකාවෙන් රැගෙන එන්නේ සීමිත  මුදල් ප්‍රමාණයකි. සමහර දෙමාපියන්ට ලොකු වත්කම් නැත. එනිසා මසකට දෙන රූබල් අනූවෙන් මුදලක් ඉතිරි කර ගත්  පසු එංගලන්ත ගමනට මුදල් ඇතිය. ඉන්පසු කෙරෙන්නේ රුස්සන් ට අවශ්‍ය දේ ගැන ඕඩර් ගැනීමය. ලෙවයිස්  ජීන්ස්, සංගීත තැටි (රෙකොර්ඩ්ස්) පමණක් නොව ගැහැණු ඇඳුම් හා සුවඳ විලවුන් ආදී දේටද ඇණවුම් ලැබේ. මේවා සෝවියට් දේශයේ නැති සුඛෝපභෝගී ගණයට වැටෙන  භාණ්ඩය. රුසියානුවන් මේවාට මුදල් දෙන්නේ රූබල් වලිනි.  ගෙනෙන්නට වඩා ලාභ දේ නම් ඇම්ප්ලිෆයර්, ඉලෙක්ට්‍රික් ගිටාර්, මෙන්ම සෝනි, සන්යෝ  වැනි කැසට් ප්ලේයර් සෙට් ආදියයි. ඒවායින් එන ලාභය වැඩිය.

මේවාට  ලැබෙන රූබල් ඩොලර් වලට මාරු කෙරෙන්නේ ශිෂ්‍ය නේවාසිකාගාර වලම සිටින ඇරබ්බන් හෝ විට්ටන් (වියට්නාම් සිසුන්) ගෙනි. හොර බියුරෝ දෙ ශාන්ෂ්(ජ්‍) (ප්‍රංශ -Bureau De Change) පවත්වා ගෙන යන්නේ උන්ය. සිරියානු, ජෝර්දාන් අරාබීන්ට  උන්ගේ රටවලින්  මසකට ඩොලර් 50 ක් 100ක් පමණ ලැබේ. උන් ඒවා මෙසේ බ්ලැක් මාකට් මාරු කරති. විට්ටන් කරන්නේ තනිකර බිස්නස් එකය.

මේ බිස්නස් කිසිවක් නොකළ එකම එක සිසුන් කණ්ඩායමක් පමණක් සිටියහ, ඒ උතුරු කොරියානුන්ය. ඔවුහු කිසිවෙකු සමග අවශ්‍ය ප්‍රමාණයට වැඩිය ඔවුන් කතා නොකළහ. කතා කළත්  "ඔව් නෑ" පමණය. ගිහාන් හේතුව දැන ගත්තේ කියුබානුවෙකු ගෙනි. කොරියානුන් අතර දේශපාලන කොමිසාර් ලෙස සිතෙන්නේ (ඔත්තු කරු) කවුරුද යන්න කිසිවෙක් නොදත්හ. හැම කොරියානුවෙක්ම පැමිණ ඇත්තේ එක්කෝ දරු පවුල නැත්නම් දෙමාපියන් උගසට තබාය. පොඩි වරදකදී හිරේට යැවෙන්නේ උන්ය.

බොහෝ සිසුන් කරන මේ වෙළඳාම ට දක්ෂ නොවන ගිහාන්, ප්‍රියාන් වැනි සිසුන් බොහෝවිට කළේ ලන්ඩනයට ගොස් ගිම්හාන රැකියාවක් කිරීමය. ලන්ඩනයට මේ කාලයට පිරෙන  සංචාරකයන් නිසා විශේෂිත දක්ෂතා අවශ්‍ය නැති රැකියා බහුලය. සංචාරක කාලය අවසන් වූ පසු එම රැකියාද නැත.  වෙළඳම් කරන සිසුන් ගේ මුදල් සඟවන්නේ බොහෝවිට දුම්රියේ කැබින් එකේය. තමන්ගේ රටේ සිට එනවිට පිරවීමට දෙන පත්‍රිකාවේ ගෙනා මුදල සඳහන් කළ යුතුය. එය වෙනස් කර රුසියන්  තමොශ්න්යා (රේගුව) ගහන මුද්‍රාව වෙනස් කරන සිසුන්ද සිටී . නමුත් එය තරමක් අනතුරුදායකය.
දුම්රිය කැබින් එකක් තුල 
 දුම්රිය පෙට්ටියේ සැඟවීම ඊට වඩා පහසුය. ඉස්කුරුප්පු නියන් හා පොඩි පිහි ඇති ස්විස් පෙන් නයිෆ් (swiss penknife) බොහෝ සිසුන් ළඟ ඇත.දුර ගමන් යන මේ දුම්රිය කැබින් වල ඇඳන් හතරක් තිබේ. උඩ ඇඳන් දෙක නැමිය හැකිය. (folding bed)   ඒවායේ පැත්තේ හෝ දොර අසල ඇණ ගලවා මුදල් සැඟවීමට කියා දී ඇත්තේද රුසියානුන්මය.

ගමන යන්නේ බෙලොරුස්කයා වක්සාල් හෙවත් දුම්රිය පලේ සිටිය. දුම්රියේ සෝවියට් ගමනාන්තය බෙලොරුසියානු සෝවියට් සමුහාණ්ඩුවේ  බ්‍රෙස්ට් නගරයයි. සෝවියට් දුම්රිය මාර්ග පද්ධතිය එවකට ලෝකයේ තිබූ  විශාලතම දුම්රිය පද්ධතියයි. එහි පළල මදක් වෙනස් නිසා (european-to-russian gauge (1435 to 1524 mm).) බ්‍රෙස්ට් නගරයේදී දුම්රිය පැය 4ක් පමණ නවත්වනු ලැබේ. එසේ නවත්වන දුම්රියේ පෙට්ටි යුරෝපයට යන රෝද  පද්ධතියට තබනු ලැබේ.
එසේ වෙනස් කරන අවස්ථාවක් පහත ඇත.

රෝද වෙනස් කිරීම 


බ්‍රෙස්ට් වලින් පසු දුම්රිය පෝලන්තය, නැගෙනහිර ජර්මනිය, බටහිර ජර්මනිය, බෙල්ජියම හෝ ඕලන්දය (ප්‍රවේශ පත්‍රය අනුව) වෙත ලඟාවේ. ඒ බ්රුගේ හෝ හුක් වැන් හොලන්ඩ් නම් වරායන් ඇති නගරයන්ටය. ඉන්පසු නෞකාවෙන් ඉංග්‍රීසි ඕඩය තරණය කළ යුතුය. ඩෝවර්, හාර්වීච්  හෝ රම්ස්ගෙට් වලින් නැවත ලන්ඩනයට දුම්රියෙන් පැමිණේ.

"මචන් රුස්සන්ට බ්‍රෙස්ට් එනකන් ආව හැකිනේ. ඉතින් උඹට සල්ලි තියනවනම් තාන්යා එතනට එනකන් අරන් පලයන්. පව්නේ මචන්. ගිහිල්ලත් නැතිව ඇති. අර  අනිත් වැඩ ටික සුහද ලාට කලින් ගිහිල්ල කර ගන්න  පුළුවන්නේ. කොන්දොස්තරව අල්ල ගන්න බලපල්ලා මොනවා හරි දීල " ප්‍රියාන් පැවසීය.

සුහදද එම සැලසුමට එකඟවිය.

මේ දුම්රිය වල කොන්දොස්තරවරු සිටිති. නිදා ගැනීමට අවශ්‍ය අදියාලි හෙවත් ඇඳ රෙදි දෙන්නෙත් තේ සාදා දෙන්නේත් ඔවුහුය. ඔවුන් යාළු කර ගැනීම වාසි සහගතය.

කොන්දොස්තර නංගිලා දෙන්නෙක් 
සුභ ආරංචිය ඊළඟ දවසෙම තාන්යා ට කීමට ගිහාන් සිතා ගත්තේය. ගිය අවුරුද්දේ ලන්ඩන් ගොස් ඉතිරි කරගත් මුදල් ඇති නිසා ඇය සඳහා  ප්‍රවේශ  පත්‍රයක් ගැනීම ප්‍රශ්නයක් නොවේ.

~~~~~~~~~~~~~මතු සම්බන්ධයි.
සියළු නම් ගම් මනඃකල්පිතය.

Wednesday 30 August 2017

අර්බුස් ගෙඩිය හා කුකුළා - සෝවියට් විහිළු කතා

සෝවියට් විහිළු කතා ගැන ප්‍රථම ප්‍රේමය ඔබ නොවේ බ්ලොග්  නවකතාවේ සඳහන් කල පසු එම කතා පිලිබඳ කුඩා සංවාදයක් ගොඩ නැගුණි. ඒ අනුව මේ කතාවද  ලියන්නට සිත් වුනි. එහි මාක්ස් විසින් "සලක ලෝක වාසී කම්කරුවනි , මට සමාවෙන්න " යයි කියන කතාව  ඇත්තටම ගොතා  ඇත්තේ සෝවියට් ක්‍රමයට විරුද්ධ සෝවියට් වැසියන් නොව එම ක්‍රමයට පක්ෂ අය විසින් බව රුසියානුවන්ගේ විශ්වාසයයි. එයට හේතුවූ   කතාව ගෙතී ඇත්තේ ස්ටාලින්ගේ කාලයේදී ඔක්තෝබර්  විප්ලවයට දායක වුනු බොහෝ පරණ කොමියුනිස්ට් වාදීන් හා වාමාංශිකයන්  මරා දැමීම හෝ ගුලාග් (වැඩ කඳවුරු) වලට පිටුවහල් කිරීම නිසා බව ඔවුන්ගේ විශ්වාසයයි. කාල් මාක්ස් පැමිණියා නම් ඔහු ඔවුන්ගෙන් සමාව  අයදින බව මේ සමහර වාමාංශිකයන්ගේ විශ්වාසය විය.

මේ තරමක් දිග විහිළු කතාව ද සෝවියට් සමාජයේ පැතිරී තිබු එකකි. විහිළුවට අමතරව උපහාසාත්මක ලෙස එදා සමාජය, පක්ෂ තනතුරු බෙදා හදා ගැනීම ආදිය පිලිබඳ කිසියම් විවේචනයක් ද කතාවේ තිබේ. මේ කතාවේ කොටස් කෙටි කර කියනුද  මා  අසා තිබේ.

වොවච්කා හෙවත් වෝවා මේ විහිළු වල නිතර සිටින ප්‍රධාන චරිතයකි. මේ කතාවේ වොව්කා යන්තමින් තරුණ වියට එළඹුණු ගැටවරයෙකි. (teenager).

ගම්වල ඩිස්කෝ : (ඒ කාලයේ බොහෝ සෝවියට් රුසියානු (අනිත් රටවල් ගැන දන්නේ නැත) ගම් වල ප්‍රජා ශාලාවේ මෙවැනි සංගීත සන්ධ්‍යා  පැවත්වුනි. බොහෝ විට තරුණයෙක් තරුණියක් හා හමුවීමට මෙන්ම පෙම්වතුන් බවට පත්වීමෙන් පසු මේ ඩිස්කෝ සන්ධ්‍යාවකට යාමද සිරිතක් වශයෙන් කළහ. මේ හා සම්බන්ධ විහිළු කතා ද බොහෝය.)

වැඩිවිය පැමිණි වෝව්කා ට තමන්ගේ ගැටවර වියේ පෙම්වතිය ගමේ  ඩිස්කෝ එකට ගෙන යාමට අවශ්‍ය විනි.  වෝව්කා ගණන් බැලුවේය. පෙම්වතිය ගෙනයන පළමු වර නිසා ත්‍යාගයක් අවශ්‍යය. ඇය කැමති ඔරලෝසුවක් කෙනකු ළඟ තිබෙන අතර එය රූබල් විස්සකි. වයින් බෝතලයක් වත් පසුව බීමට ගත යුතුය. ප්‍රජා ශාලාවේ විකුණන යුෂ වීදුරුවක් හා පිරශ්කි ගැනීමට මුදල් අවශ්‍යය. අවශ්‍ය වන සම්පුර්ණ මුදල රූබල්  30 පමණය.

පොඩි පොඩි හොර වෙළඳම් කළද වොව්කා අතේ එතරම් මුදලක් නැත. නිවසේ  එහා මෙහා යමින් සිටි වෝවා පාරට වැටුනේය. තම පෙම්වතියද ජිවත් වන ගමේ පක්ෂ ශාඛාවේ ලේකම් ගේ නිවස ඉදිරියෙන් යන ඔහුට ගෙවත්තේ වැවී ඇති විශාල අර්බුස් ගෙඩියක් දුටුවේය. අර්බුස් යනු විශාල පැණි කොමඩු වර්ගයකි.




ප්‍රීතියෙන් පිනා ගිය වොව්කා වත්තට පැන  බෑගයකින්ද වසා  ආරක්ෂා කර තිබූ පක්ෂ ලේකම් ගේ අර්බුස් ගෙඩිය කඩා  ගත්තේය.  එයත් රැගෙන තම නිවස දෙසට එන විට තම පියාගේ කුකුළු රෑන දුටුවේය. (සමුහ ගොවිපළවල් අසල නොමැති ගම්වල රුසියානුවන් බිත්තර සඳහා මෙන්ම ඉඳහිට සාදයකට මරා කෑමට ගැනීමට හෝ වෙනයම් දෙයකට හුවමාරු කිරීමට කුකුළන් ඇති කළහ).

රෑනේ සිටි හොඳම කුකුලා අල්ලාගත් ඔහු උගේ බෙල්ල කරකවාගෙන ලණුවක පටලා   ගත්තේය.

අර්බුස් ගෙඩිය හා කුකුළා රැගෙන පාරේ යමින් සිටි ඔහු දේශපාලන කොමිසාර් ගේ රන්වන් කෙහෙ හා නිල් ඇස් ඇති රූමත්  බිරිඳ තම නිවස ඉදිරිපිට පෙම්වතෙක් එනතුරු බලා සිටිනු දුටුවේය. කොමිසාර් බලපුළුවන්කාරකම් පෙන්වා කසාද බැඳ ගත්තා යයි ගම්මු කියන ඇය කොමිසාර් ට රිදවීමට  පෙම්වතුන් කිහිප දෙනෙකු තබා ගෙන සිටින බව කොමිසාර් හැර ගමේ අනිත් සියල්ල දත්හ.

(දේශපාලන කොමිසාර් යනු පක්ෂයට වග කියන දේශපාලන දැනුමෙන් පොහොසත් ලෙස සලකන තැනැත්තාය. බොහෝ විට කේජිබි එකට අනුබද්ධ හෝ ඔත්තු දෙන්නෙකි. ස්ටාලින් ගේ කාලයේ ඔවුන්ට විරුද්ධව යාම මරණයට අත වැනීමකි.)

තරුණිය ගැහැණිය ඉදිරියට ගිය වොව්කා, තවරිෂ් ශෙනා කොමිසාරා (කොමිසාර් ගේ බිරිඳ සහෝදරී )  අර්බුස් ගෙඩියකුයි කුකුළෙකුයි රූබල් දහයකට ගන්නවා දැයි ඇසීය.

ගැටවරයා ගේ හිසේ සිට දෙපතුල දක්වා විමසුම් බැල්මක් හෙළු කොමිසාර් බිරිඳ සිතුවේ පමාවුනු පෙම්වතා වෙනුවට මේ කොල්ලා වුනත් නරක නැහැ කියාය. "අර්බුස් ගෙඩිය ගන්නම්" කියා, කොල්ලාගේ කමිස කරෙන් ඇද ගෙතුලට ගත් ඈ  පෙම්වතා නොපැමිණීමෙන් පමාවුනු   කාර්යය කර ගන්නට ගත්තාය. 

ඒ අතර දොරට තට්ටුවක් වැටිණි.

කොමිසාර් බිරිඳ වහ වහා  කොල්ලාගේ ඇඳුම්, අර්බුස් ගෙඩිය හා කුකුළා අතට දී විශාල රෙදි කබඩ් එකේ   සැඟවූවාය. 
(රුසියානු ගෙවල් හා තට්ටු නිවාස  වල  නිදන කාමරයේ බිත්තියක් වැසෙන්නට සීලිම  තෙක් උස විශාල රෙදි අල්මාරි සාදා තිබේ. මේවා නිවසත් සමගම ලැබේ. )

පමාවී පැමිණි පෙම්වතා සමග අහවල් වැඩේ යෙදී සිටිද්දී තවකෙක් දොරට තට්ටු කරනු ඇසිනි. වහවහා එම පෙම්වතා ද කබඩ් එකට දමා වැසූ ඈ ඊළඟ පෙම්වතා ගෙතුලට ගත්තාය.

වෝව්කා තමන්ගේ චාන්ස් එක දුටුවේය.

"මේ තවරිෂ් (සහෝදරයා) අර්බුස් ගෙඩියක් ගන්නවද"
"තොට පිස්සුද යකෝ, අර ආවේ කොමිසාර් නම් අපිට වෙඩි තියයි.  හිටු" අල්මාරියේ අනිත් පසින් කෝපවත් හඬක් ඇසුනි. 
"එහෙනම් කුකුලෙක් ගන්නවද? අර අහවල් ගෙදර හොඳම  කුකුලා " වොව්කා තමන්ගේ ගෙදර තිබෙන තැන සඳහන් කළේය.
"තෝ මගේ කුකුළා හොරකම් කරාද, තෝව මරනවා. " අනිත් පසින් ගෙරවිල්ලක් ඇසුනි.
"ආ මේ තාත්තද , මම මේ වෝවා, තාත්ත ඔච්චර වැඩ කාරයෙක් කියලා දන්නේ නැහැනේ. අම්මට කියන්නද, නැත්නම් අර්බුස්  ගෙඩියයි කුකුළයි ගන්නවද දෙකටම දහයයි " 
"හපොයි තෝ  වගේ එකෙක් හැදුවනේ" කි වොව්කා ගේ පියා රූබල් දහය දී අර්බුසය හා කුකුළා ගත්තේය.

ටික වෙලාවක් ගියේය. එළියේ වැඩේ තවම යයි.

වෝවා: "තාත්තේ, තාත්තේ, කුකුලයි ගෙඩියයි අපහු දියන්"
"තොට පිස්සුද , කුකුළා කොහොමත් මගේ තෝ වික්කට, මම සල්ලි දුන්නේ තොට "
"මම කෑ ගහන්නද දන්නවනේ තවරිෂ් කොමිසාර් මාමගේ හැටි "
"ආ ගනින් ආපහු."

කවුදෝ නැවතත් දොරට තට්ටු කරුණු  ඇසුණි. කලබල වුනු කොමිසාර් බිරිය වහා එම පෙම්වතා ද අල්මාරියේ මැදට අමාරුවෙන් ඔබා තල්ලු කර දොර වැසුවාය. එවර ආවේ ගෙහිමියා වන දේශපාලන කොමිසාර් වරයාය. 

වොව්කා තමන්ගේ වාසනාව නැවත උරගා බැලුවේය.
"මේ ඕයි කුකුලෙක් ඉන්නව ගන්නවද රූබල් 5යි. "
"මොන කුකුල්ලුද ඕයි . මගේ රැවුල ගිනි අරන් තමුසේ සුරුට්ටු පත්තු කරනවද " අලුත් අමුත්තා හොරෙන් මිමිණුවේය.
" ආ මේ අපේ පක්ෂ ලේකම් තුමා නොවැ. තවරිෂ් ලේකම් තුමා මම කොමිසාර් තුමාට කියන්නද ඔබ මෙතැන කියල "
"කට කට දීපන් කුකුළා "
"ආ කුකුළාට පහයි අර්බුස් එකට පහයි දෙකටම දහයයි."
"මට අර්බුස් තෝ මගේ අර්බුස් ගෙඩිය නේද මේ හොරකම් කරලා තියෙන්නේ , මං තෝව "
"ඔන්නොහෙ ඕක ගන්න ලේකම් තුමා.මාත් ගත්තා. අපි ඔක්කොම එක බෝට්ටුවේ " පසෙක සිටි වෝවා ගේ තාත්ත කීය.
"ආ වොව්කා  ගේ තාත්තා. ඔහෙත් මේ බෝට්ටුව පදින කෙනෙක්ද? කෝ දීපන් එහෙනම්. මෙන්න රූබල් 10."

ටික වේලාවකින් වොව්කා ලේකම් ගෙන් අර්බුස් ගෙඩිය  හා කුකුළා නැවත ඉල්ලීය. 
"තොට පිස්සුද යකෝ මම  ගත්තේ සල්ලි දීලනේ  "
"ඔන්නොහෙ දීලා දාන්න ලේකම් තුමා " අනිත් පැත්තෙන් හඬ නැගුණි.

"හඃ මම හිතන්නේ තාත්තයි පුතායි මාව මේ උගුලට ඕන කමින්ම අහු කරලා. මේක අපේ හතුරන්ගේ කුමන්ත්‍රණයක්. අපේ ගමට විරුද්ධව මම කරන සේවයට අකුල් හෙලන්න. අපේ පක්ෂය අපකීර්තිමත් කරන්න. උඹල ඇමෙරිකන් ඔත්තු කරුවන්ද දන්නේ නැහැ. මම අල්ල ගන්නන්කො "
"මොන පිස්සුද ලේකම් තුමා ඔබමනේ ආවේ කොමිසාර් ගේ ශෙනා (බිරිඳ) ට කෙළින්න. අපි කිව්වයි " වොව්කා ගේ තාත්තා සැර  කළේය.
"තවරිෂ් ලේකම් මාමේ , එහෙනම් මම තවරිෂ් කොමිසාර් මාමට කතා කරන්නම් මේක විසඳන්න " වොව්කා කීවේය.
"හා හා එච්චර දුර යන්න ඕනෙද තරුණ සහෝදරයා. අපි සාකච්ඡා කරල විසඳ ගමු. මෙන්න අර්බුස් ගෙඩියයි. කුකුළයි ගන්න ඉස්සෙල්ල "

ඒ අතරේ වොඩ්කා බීගත් පසු අහවල් වැඩේ කළ වහාම තම ස්වාමියා වන කොමිසාර් කඩා වැටී නිදන බව දත් ගෘහණිය ස්වාමියා නිදි ගත්  වහාම එකා බැගින් හැංගී සිටි පෙම්වතුන් එළියට දැම්මාය.

යන්නට කලින් පොරොන්දු වූ පරිදි අර්බුස් ගෙඩිය දී තව රූබල්  පහක් කොමිසාර් බිරිඳ ගෙන් ගන්නට වොව්කා අමතක නොකළේය.

රූබල් 25 ට තෑග්ග ද මිලදී ගත් වෝවා තම පෙම්වතිය වන පක්ෂ ලේකම්ගේ දියණිය කැටුව ඩිස්කෝ යාමට පැමිණෙද්දී ලේකම් ගේ බිරිඳ රාත්‍රී ආහාරයට බිම පිණිස වයින් බෝතලයක් මේසයේ ලැස්ති කර තිබුණාය.  වෝවා ලේකම් ගේ බිරිඳ ට   "තමන්ගේ හොඳ කුකුළා " පෙන්වා  වයින් බෝතලයට වඩා කුකුළා වටින  බව කියා හුවමාරු කර ගත්තේය. 

ඩිස්කෝ එක අවසානයේ පෙම්වතිය සමග ඔහුගේ නිවසට ගිය වෝවා දැක අම්මා කෑ ගැසුවාය.
"උඹ කොහෙද ඔය පොඩි කෙල්ල එක මෙහෙ රිංගන්නේ. කෙල්ලව ගිහිල්ලා ලේකම් ගේ ගෙදර දාල වරෙන් "
"පිස්සුද අම්මේ ලේකම් නැන්දමයි මේ වයින් බෝතලෙත් දීලා යන්නේ කිව්වේ " කියා අම්මාද චාටුවෙන් රැවටූ  වෝවා කෙල්ල සමග කාමරයට වැදුනේය.

වයින් බෝතලය වෙනුවට තමන් මිලදී ගත් කුකුලාම නැවත ලැබී ඇති බව දුටු ලේකම් කෝපාවිෂ්ටව  ප්‍රාදේශීය පක්ෂ කාර්යාලයෙන් නිකුත් කල ගිනි අවියදා රැගෙන වෝවා සොයා ගියේය.

ගෙදර දොර ඉදිරියේ ලේකම් තැන වෝවා ගේ පියා  හා මව සමග යන දබරය ඇසී ජනේලෙන් හිස එලියට දැමු වෝවා 
"තවරිෂ් ලේකම් මාමේ , දුව ඉන්නේ මෙහෙ, අර කොමිසාර් ගෙදර දී පොරොන්දු වුණා වගේ. ආ අර අර්බුස් ගෙඩිය ඉල්ලලා දෙන්නද ආපහු?" කියා කෑ ගැසීය.

"පිස්සුද ඒවා ඕනේ නැහැ, කට කට. මේ වෝවගේ තාත්තේ , මම මේ කල්පනා මට පක්ෂයෙන් ප්‍රාදේශීය ශාඛාවේ ලේකම් කම ප්‍රදානය කරල තියෙනවා. මගේ කෙල්ලත් මූට කැමති එකේ ලේකම් කම අපෙන් පිට යවන්නේ මොකටද? වෝවා හොඳ දක්ෂ කොල්ලෙක් කියල මට තේරුණා. මම වෝවව මගෙන් පස්සේ හිස් වෙන ගමේ පක්ෂ ශාඛාවේ ලේකම් ධුරයට යෝජනා කරනවා. "

ගමේ පක්ෂ රැස්වීමේදී හිටපු පක්ෂ ලේකම් ගේ යෝජනාවෙන් හා දේශපාලන කොමිසාර් ගේ සම්මතයෙන් ඉදිරිපත් වූ එකම නාම යෝජනාව වන වෝවච්කා ට බිහිරි වලොද්යා ගේ හැර 99% ක්ම චන්ද ලැබී තිබුණි.

ප.ලි.
පළතුරු වලට කියන රුසියානු නම් මේ වීඩියෝවේ  දැක්වේ.



Tuesday 22 August 2017

ප්‍රථම ප්‍රේමය ඔබ නොවේ - (15) -ප්‍රේමයේ විල් තෙරේ යව්වනේ මල් වනේ




සැන්දෑවේ පෙම් යුවල 
මෙතෙක් කථාව:
පොත තවමත් මිලදී ගත හැකිය. 
ප්‍රථම ප්‍රේමය ඔබ නොවේ - (15) -ප්‍රේමයේ විල් තෙරේ යව්වනේ මල් වනේ 

ජලාශය අසල කැළයේ පයින් හා බිරියෝසා මෙන්ම ගිහාන් නොහඳුනන ගස් වර්ගද විය. එහෙත් එලි මහන් බිම් කඩ අසල ඇත්තේ සුදු වැල්ල වසා පැතිරුණු උස තෘණ වර්ගයකි.  අතරින් පතර කැලෑ ඇපල් ගස් ද විය. ගිහාන් ඉන් එකක් කන්නට යද්දී තාන්යා ඔහුගේ අතට ගැසුවාය.
"ඔය ඇපල් කන්න එපා. මම හොඳ ඒවා වගයක් ගෙනාව". එසේ කියමින් ඔහුව ගසට හේත්තු කරමු මුව  සිප ගත්තාය.
"ඔයාව හම්බවෙන දවස බල බල හිටියේ" ඇය මිමිණුවාය.
ගිහාන් මේ රුසියන් තරුණිය මෙන්ම අනිත් යුරෝපියානු තරුණ  තරුණියන් තමන්ට අවශ්‍ය  දෙය කියන්නට නොපැකිලෙන බව වටහා ගෙන සිටියේය. ඔවුන්ගෙන් "ඔබට තේ එකක් අවශ්‍ය දැයි " ඇස විට ආසියානු ජාතිකයන් මෙන් තේ එක අවශ්‍ය වුවත් "නෑ , එපා ඕනේ නැහැ. ඔය බොනවා නම් බොන්නම්" වැනි දේ නොකියති.  අවශ්‍ය නම් අවශ්‍යය. සිනි එපා නම් එපාය. "ඔබට බඩගිනිද කෑමට  යමක් ඕනෑද" කියා ඇසුවොත් බඩගිනි නම් එය එසේ යයි කියති. බොරු කෝල බවක් ආරුඪ කර ගන්නේද නැත. ඇගේ ක්‍රියාව ඔහු වටහා ගත්තේ එලෙසිනි.

ගිහාන් කළේ ඇය ගේ ඉන  වටා දෑත  යවා වැළඳ ගෙන සිප ගැනීමය. ලජ්ජාවෙන් රතු වීමට අහල පහල කවුරුත් නැත. ඇය ඔහුගෙන් මිදී විහිළුවට මෙන් ඉවතට දිව්වාය.
  "මේක නිකන් හරියට හින්දි චිත්‍රපටයක්  වගේ, ගහක් යට ආදරේ කරනවා. ඔයා දුවනවා. " ගිහාන් හිනා වෙමින් තෙපළේය.

"ඒකනේ ලේනා කිව්ව ගමන් මම කැමති වුනේ එන්න"
තාන්යා උස්  හඬින් කියමින් උණුසුමට උඩුකය වසා හැඳ සිටි පුලෝවරය ගලවා උස තණකොළ යාය උඩින් ඇතිරුවාය. එහි යන්තමින් හාන්සි වීගෙන හෙලූ ආරාධනාත්මක බැල්ම ගිහාන්ගේ හෘද ස්පන්දනය දෙගුණ කරන්නට සමත් වුනේය. ඇය සිටින තැනින්ම ඈඳිගත් ඔහු ඇගේ නිල්වන් නෙතට එබී බැලුවේය. ඇය හෙමින් සීරුවේ ඔහු අසල ඇලවුණේ ඔහුගේ අත තම අතින්   තදින් මිරිකා ගනිමිනි.
 තම දෑත ඇයගේ හිස යටින් තබමින් සෙමින් උස්සා  ඇය සිප ගනිමින් ප්‍රේමාලිංගනයේ වෙලී සිටි මොහොත කල්පයක් විය.  ඇය ඔහු සිරුර මත දිගාවුනු මොහොතක ඔහුට නීල අහස දිස් විය. සීතල උස තණකොළ මුහුණේ ගෑවී නොගෑවී සුළඟට  රඟ දෙයි.
ඈතින් යහළුවන් දියේ කෙළින හඬ ඇසී නොඇසී යයි. ඒ මොහොත තුල දෙදෙනාම ගිලි ගියේ තමන් අවට ලෝකය අමතක කරලමිනි.

ඔහුට අමරදේව ගයන ගීතයක් හදිසියේම සිහියට නැගුණි.

"කුමරියක පා සළඹ සැලුනා ...
වසා සිටි නෙතු පියන් ඇරුණා "

ඇය සමග එක්වූ හැම වතාවකම පාහේ  තමන්ට සුවිශේෂි නැවුම්  මොහොතක් වූයේ ඇයිදැයි ඔහු කල්පනා කළේය.

"උකුල ළැමහස මලවි කරලීය
මුවාකල ඇගේ දුහුල් සළු තිර
විවර කෙරුවා මනස්  සලෙළුන්
උමතුවූ දෙනුවන් දැහැන් ඇද
මෙමා  අබියස මැවුණු තුසිතය
සුරන් නැළවුණු සුයාමය "

උන්මාදයෙන්  නැළවුණු  ඒ සුයාමයෙන් ඉක්බිති ව ඇගේ හිස විවේක ගත්තේ ඔහුගේ උරහිස් ගොබය තුළය. දෙදෙනාම අහස දෙස බලාගෙන නිහඬව වැතිර සිටියහ. ඒ මොහොතවල්  සමුහය දෙදෙනාම එක් අයෙකු ගේ සිතකින් හැසිරවුවක් මෙන්ම  විය.

ඈතින් මෙන් ඇසුණු සොයුරිය ලේනා ඔවුන් කැඳ වන හඬින් සලිත වුනු තාන්යා ඔහුගේ අතින් ඇද ගෙනම යාමට සැරසුණාය.

"අපේ රටේ හුඟක් ඈත කාලේ ඈත ගම්වල ජිවත් වෙච්ච පෙම්වතුන් කළේ "බැද්දට රිංගනවා " කියල කැළයට  ගිහින් සුමානයක් විතර අඹුසැමියන් මෙන් ඉන්න එක.  ඊට පස්සේ දෙන්නා ගමට ආවහම යුවලක් වගේ එක ගෙදර ඉන්නේ".
ගිහාන් ඇයට ඔහු දන්නා පරිදි පහදා දෙන්නට හැදුවේය.
"මෙහෙ ඕක කරන්නේ කොහොමද ශිත කාලෙට. අමු හීතලේ හිම ගොඩේ කැලේ  ගියොත් හොඳට  තියෙයි" ඇය හඬ නගා සිනා සුනාය.

අතින් කටින් ඇඳුම් එල්ලා ගෙන පැමිණෙන  දෙදෙනා දෙස බැලු රුස්සන් විසිල් ගැසූහ.
 "රෑ වෙන්නත් කලින්" එකෙක් කියුවේය.
"මුළු රැයක්ම ඉන්නවා මෙතන. ඔච්චර ඉවසන්න  බැරිද" ගේනා විහිළු කළේය.
"අපොයි මේ දෙන්න හාවෝ වගේ. මම දන්නේ නැත්ද " ලේනාද විහිළුවට මෙන්  කියමින් ගිහාන්ව වතුරට ඇද්දාය.

ජලය ඇත්තටම ශීතලය. නමුත් ජලයට බැස  මොහොතකට පසු සිරුර ශීතලට හුරුවෙයි. පිහිනීමට එතරම් නොදත් නිසා ගිහාන් වැඩි ඈතට ගියේ නැත. දිය කිඳුරියක  මෙන් තාන්යා නම් පිහිනා  ඈතට ගියාය. සොයුරියන් දෙදෙනා මොකක්දෝ විහිළුවක් කරමින් සිනා සුනහ. තාන්යා වතුර පාරක් ලේනාට ගැසුවාය. ඔවුන් දෙදෙනා තමන් ගැන කතා වෙතියි ඔහුට සිතිනි.

වතුරෙන් එලියට පැමිණ රුස්සන් සාදා තිබු ගිනි මැලය ළඟ හිඳගත් විට මහත් සුවයක් දැනුනි. ලියොනිඩ් අතු කිහිපයක් කඩාගෙන ඒ මැද ලීයක් තබා  භාග පනිට්ටුවක් වැන්නක් එල්ලා  වතුර උණු කරන්නේ තේ බිමටය. රුසියානුවන් තේ බිමට ඉතා කැමතිය. තේ එකට සමහර විට දෙහි පෙත්තක් ද දමති.  නමුත්  කිරි නම් දමන්නේ නැත. ආසියානුන්  කිරි දමා තේ බිම පුරුදු වී ඇත්තේ ඉංග්‍රීසි අධිරාජ්‍ය සමයේ ඉංග්‍රීසින් ගෙනි. ආල්ලා තේ කොළ රැගෙන එම පනිට්ටුවටම  දැම්මාය . ඉන්පසු බෙලෙක් කෝප්ප රැගෙන සියල්ලටම තේ දුන්නාය.

තේ බොන ගමන් වොඩ්කා බීමද වොඩ්කා බොන ගමන් කළු පාන් පෙත්තක් හැපීමද රුස්සන් නොකඩවා කරගෙන යති. ඒ අතරේ සුරූපී ආල්ලා තේ එකත් රැගෙන අව්ව තපින්නට ඇල වුනාය. අනිත් කෙල්ලන් ටිකද දොඩමළු වෙමින් ඇය අසල වැතිරුනහ. රුස්සන් එකිනෙකා  වතුරට පනිමින් නැවත එමින් වොඩ්කා  බොමින් කාලය ගත කළහ.

 ඒ අතරේ වලොද්යා මස් පලහමින් ඒවා බෙලෙක්  පිඟන් හා පොලිතින් කවර මත ඇතිරුවේය. ඔවුන් ඒවා එකවර කන්නේ නැත. සියල්ලෝම කමින් බොමින් කාලය ගත කිරීමට කැමතිය.

හවස් වන විට ගිනිමැලය වටා රැස් වී කරන කතාබහ ගී ගායනා කීමකට  පෙරලුනි. ගිහාන්ට තේරුණු එක දෙයක් නම් රුසියානුන් මෙවැනි විනෝදකාමී අවස්ථාවල   දේශපාලනය කතා නොකරන බවයි. ලංකාවේ සිසුන් අතර බෝතලයක් අවසන් වන විට දේශපාලන වාද හට ගනී. සමහරවිට ඒවා කෙළවර වන්නේ කවුරුන් හෝ තරහ වීය. මේ නිසා ඇතැම් සිසුන් කලේ ගීත වාදනය කර නැටීමය. එවිට දේශපාලන වාද වලට ඉඩක් නැත.  ලුමුම්බා විශ්ව විද්‍යාලයේ සිසුන් අතර දේශපාලන බෙදීම් නිසා  කණ්ඩායම් කිහිපයක් ඇති බව ප්‍රසිද්ධය. ලුමුම්බා විශ්ව විද්‍යාලය මොස්කව් වල වැඩියෙන්ම සිංහල සිසුන් ඉගෙනගත් ස්ථානයයි. රාජ්‍ය විශ්ව විද්‍යාල සමුහයේ එතරම් සිසුන් සිටියේ නැත. සිටියත් ඔවුන් මොස්කව් නගරය පුරා  විසිරි සිටියහ.

ගිහාන්ට සිංහලෙන් ගීතයක් ගැයීමට එන ඉල්ලීම බලවත් විය. වැඩියෙන්ම ඉල ඇටයට අනිමින් පෙරැත්ත කළේ තානිච්කා ය. අන්තිමේදී වතුර ගෙන ආ කෑන් එකට තට්ටු කරමින් ඔහු තමන් ඉතා ප්‍රිය කරන ගායිකාවක් වූ මාලනී බුලත්සිංහල ගේ "ප්‍රේමයේ විල්තෙරේ" නම් ගීය බැරි මරගාතේ හෝ ගායනා කළේය.

එය ගායිකාවක ගේ වුවත් එම ගීතයට තමන් කැමති බව පවසා ගීතය රුසියානු බසට දන්නා ලෙසින් පරිවර්තනය කළේය.

"ප්‍රේමයේ විල්තෙරේ
යෞව්වනේ මල්වනේ
ඇසෙන මේ ගී මියුරු රාවේ
සිතක ආරාධනා

සුසුදු හසකැන් සලා
දෑස පෙරුමන් පුරා
පාළුවේ තනි වෙලා
කාටදෝ ඉඟි කළා

සීත  පවනැල් ගලා
නීල  තුරු මල් සලා
ආදරෙන්  පිබිදිලා
ලෝකයම හිනැහිලා "

ගීතයේ පරිවර්තනයට හැඟුම් බර වුනු තාන්යා ඔහුගේ වම් උරහිස පැත්තෙන් අත වෙළාගෙන ඔහුගේ ගෙලට හිස තබාගෙන ඇලවී සිටියාය.  ආදරයෙන් මුසපත්වුණු යුවතියක්, ඩොල්පින් මාළුවෙකු මිනිසුන් හැර යාමට අකැමැතිව වටේ රැඳෙමින් පිහිනන්නාක් මෙන්, තමන් අසල දැවටී දැවටී සිටින්නේ යයි කවුදෝ කියනු ඔහුට මතකය.

ඔහු වඩාත්ම කැමති වූ  රුසියානු ගීතය ලේනා ගිටාරය වයමින් පටන් ගත්තේත් අනිකුන් සියල්ලෝම ඊට හවුල් වූයේත් ඉන් පසුය.

~~~~~~~මතු සම්බන්ධයි.


-  කතාවේ  උපුටා ගෙන ඇති විශාරද අමරදේව මහතා ගායනා  කළ "කුමරියක පා" සළඹ සැලුණා" ගීතය ලියා ඇත්තේ කේ ඩී  කේ ධර්මවර්ධන මහතාය.
ඡායාරුපය අන්තර්ජාලයෙනි.

ප්‍රේමයේ විල්තෙරේ ගීතය නැසීගිය සංගීත විශාරද මාලනී  බුලත්සිංහල මහත්මිය ගයන ලද්දකි. පද රචනය කුලරත්න ආරියවංශ , සංගීතය එච් එම් ජයවර්ධන


මේ ප්‍රබන්ධයේ විස්තර වන  කාල පරාසය 1980 දශකයේ අග භාගය වන අතර කතාවට පාදක වන්නේ  බිඳී විසුරුණු සෝවියට් දේශය නමැති රාජ්‍යයේ උගත් විශ්ව විද්‍යාල සිසුන් ගැනය.



Wednesday 16 August 2017

හැම හොඳ දෙයකම අවසානය එළඹෙන දවසක් ද ඇත

"All good things must come to an end " හෙවත් "හැම හොඳ දෙයකම අවසානය එළඹෙන දවසකුත් එනවා" කියල කතාවක් තියෙනවනේ. මටත්  එහෙම දවසක් ඇවිත්.

 මේ තමයි නෙළුම් යාය 2014 ප්‍රථම බ්ලොග් සම්මාන උළෙල ගැන කියල දාපු ලිපිය. එහිදී කළ හැඳින්වීමේ කතාව තමා මෙතන තියෙන්නේ. වසර 2014 ලියූ බ්ලොග් වලට  සම්මාන දෙන බ්ලොග් සම්මාන උළෙල පැවැත්වුනේ 2015 මාර්තු වල . හැබැයි  එතකොට ලංකාවේ අලුත් ආණ්ඩුවක් පත්වෙලා.  අලුත් මාධ්‍ය ඇමති කෙනෙක් ඇවිල්ල.
පළමු උළෙලේ ගීතයක් ගයමින් -මනෝජ්, දිලිනි 

අපි තුන්දෙනෙක් කතා වුනාට දෙදෙනයි වැඩේ කරන්න ඉතුරු වුනේ. එක මහත්මයෙක් දැන් වෙන්වෙලා විරුද්ධ පාර්ශවයක හිටියත් අවවාද අනුසාශන, බ්ලොග් තේරීම් වලට එහෙම උදව් දුන්න ඒ දිනවල.   සමරු සඟරාවේ හැඳින්වීමේ ලිපියට මාතලන් ඇතුළු කිහිප දෙනක් දාපු ප්‍රතිචාර තමා මේ:


පොඩි පොඩි අඩු පාඩු තිබුනට, මෙතක් තිබූ කිසිම උළෙලකින් නොලැබුන තරමේ ප්‍රතිචාරයක් මේ මඟින් ලැබුනා.. වැඩේ අල කරන්න දඟලපු පිරිස අද හොල්මන් වෙලා ඉන්නේ. උන් බයිලා ගැහුවට අද වෙනකන් බ්ලොග් වලට කරපු මෙළෝ දෙයක් නෑ. මීළඟ එක මීට වඩා උත්කර්ෂවත් ලෙස පැවැත්වීමට සියළු ධෛර්යය ශක්තිය ලැබේවා...!!!

බන්ධුල නානායක්කාරවසම් වගේ සාම්ප්‍රදායික පොරකට, මාතලන් කියන නම මතක තිබුන එකත් ළොකු දෙයක්. අනික පොර බ්ලොග් වලට හොඳ රැකොමන්ඩේසොන් එකක් දුන්නා. පොර පුදුම උනා මේකේ උන්ගේ ටැලන්ට් ගැන. විශේෂයෙන් බ්ලොග් කවි ගැන. මම දැක්කා සම හරක් කියලා තිබුනා සයිබර් එකේ තියෙන්නේ කවි නෙමෙයි වෙන මොනවද කියලා. එහෙම උන්ගේ කනට ගහපු එකයි බන්ධුල කළේ. එහෙම දෙයක් මීට කලින් කවදාවත් වෙලා නෑ.
මේ කල්‍යාණ මිත්‍රගේ ප්‍රතිචාරය;
අජිත් අයියා.. මට හිතෙන විදියටනම් මේක ආරම්භයක් විදියට පට්ට සාර්ථකයි.. ඔක්කොම අඳුරට බැන බැන හිටියට එකෙකුටවත් බැරි උනා මෙච්චරකල් එක පහනක්වත් පත්තු කරන්න. ඔයා ලංකාවෙත් නොයිද මේ කරපු හරිය හොඳටම ඇති.. වැඩේ කරගෙන යද්දි වෙච්චි සමහර දේවල් ඔයාට කන්ට්‍රෝල් කරන්න බෑ.

මේ බස්සිගේ ප්‍රතිචාරය:
මම වගේ බ්ලොග් ලියන්න අරන් අවුරුදු දෙකක්වත් නැති කෙනෙක්ටනම් ඒ උත්සවයේ උත්කර්ෂය ඉහටත් උඩින්. ඇත්තටම වැඩේ හොඳටම කෙරුනා. අනික තමයි දේශපාලනය ගෑවිලා තිබුනා කියකියා දොස් කියන අයට කියන්න ඕනෙ, ලංකාවේ කිසිම දෙයක් දේශපාලනයෙන් ස්වායත්ත වෙන්නේ නැහැ. ඒත් පවත්නා රජයන්වල වැරදි අඩුපාඩු පෙන්නලා දෙන ලංකා නිවුස් වෙබ් එකෙන් කරපු උත්සවයකට මෙතරම් අනුග්‍රහයක් ලැබීමම මොනතරම් වටිනවද?
සමා වෙන්න අනිත් අයගේ අදහස්  දැම්මේ නැහැ. මේ තුන තෝරා ගත්තේ බ්ලොග් ලෝකයේ ප්‍රබලයන්ගේ කතා ගැන කියන්න.
බදුල්ලේ පොත් බෙදන්න ගිය සුමිත් කලණ සිරි 

ඉතින් ඊට  පස්සේ මම කාලයක් අයින් වෙලා හිටිය කිසියම් ප්‍රශ්න වගයක් මතු වුනු නිසා. අපේ අදහස වුනේ  බ්ලොග් සංසදයක් පිහිටුවන්න. ඉන් පස්සේ බ්ලොග් කරුවන් අතරින්ම කට්ටිය තෝරලා ඔවුන් සංවිධායකයන කරගෙන දෙවෙනි සම්මාන උළෙල පවත් වන්න. බ්ලොග් සංසදය පිහිටවීමේ වැඩ කටයුතු ඉතා හෙමින් තමා සිද්ද වුනේ.
සම්මාන ලැබූ අයගේ බ්ලොග් ලේඛන සඳහා බ්ලොග්පවර් කියල මමත් සින්ඩියක් හැදුව. මාතලන්  තමා අපි පාවිච්චි කළේ. තව කිහිපයක් අළුත් සින්ඩිත් බිහි වුණා. ඇත්තටම බ්ලොග් කියවීම හොඳ විනෝදාංශයක්. ඒ වගේම නොදන්නා දේ දැන ගන්නත් හොඳ මාර්ගයක්. එසේම  පිස්සුවෙන් වගේ බ්ලොග් කියවපු කාලයකුත් තිබුන.  මගේ අදහස වුනේ දෙවන බ්ලොග් සම්මාන උළෙලින් පසු විශ්‍රාමයක් ගන්න බ්ලොග් වැඩ වලින්. මොකද මම කාලයක් තිස්සේ සැලසුම් කරපු පෞද්ගලික කාර්යයන් කිහිපයක් අතපසු වෙවී තිබෙන නිසා.

පළමු සම්මාන උළෙලේ දේශපාලනඥයෝ දෙදෙනෙක් සහභාගී වුණා. කරු පරණවිතාන මහතා  තමා ශාලාව ලබා දුන්නේ. මේ සහභාගී වීම තුල සම්මාන උළෙලට කිසියම් දේශපාලනික භාවයක් ලැබුණ කියල හිතෙනවා. නමුත් අපේ  අවංක අදහස වුනේ සම්මාන උළෙල රජයේ උත්සවයක් කරන්න පුලුවන්ද කියල බලන්න. එනිසා එම සහභාගිවීම සතුටින් භාර ගත්ත. කථානායක තුමා සහභාගී වෙන එක හොඳ දෙයක් කියලයි මම සැළකුවේ.  නමුත් මේ සම්මාන උළෙලවල් දෙකම පැවැත්වුනේ රජයේ අනුග්‍රයෙන් නොවෙයි. ශාලාව ලැබීම පමණයි වුනේ. ඒකත්  මාධ්‍ය අංශයට වැටෙන වැඩක් නිසා.  බ්ලොග් තේරීමට ඔය කිසිම දේශපාලනඥයෙක් අත දැම්මේ නැහැ.

 පළමු උළෙලේ සංවිධාන කටයුතු රාශියක් මමත් ලංකා නිව්ස්වෙබ් අඩවියේ ප්‍රධාන විධායක චන්දිමත්, හිමාශි කරුණාරත්නත්, උපුල් නිශාන්තත්  තමයි කළේ. හුඟක් වියදම් දරුවෙ අපේ අතින්. ඒ මේක සාර්ථක වෙනවා දකින්න ඕනේ නිසා. සමරු පොතේ ලැබුන දැන්වීම් වලට මුදල් නොලැබුනත් අපි පාඩුව විඳ ගත්තේ සම්මාන උළෙල පැවැත්වීමේ  සතුට නිසා.
දෙවන උළෙලේ නාට්‍යයෙන් 

දෙවන උළෙලේ සංවිධාන කටයුතු බොහොමයක් කළේ බ්ලොග්කරුවන් 20-30 ක් සමග සාකච්ඡා කරලා. මාස  ගණනක් තිස්සේ ඇදුනු සාකච්චාවේ ඊමේල් පණිවිඩ 200 කට වැඩිය හුවමාරු වෙලා තිබුන. නාට්‍යයකුත් සංවිධානය වුණා තරුරසී ගේ උදව්වෙන්. ඒ ගැන ලිපියක් මෙතැන් තිබෙනවා.

මේ ඒ ලිපියට ලැබුණු ප්‍රතිචාර කිහිපයක්.

පොස්ට් හතරම එක හුස්මට් කියෙව්වා.
බොහොම ප්‍රශංසා කරනවා මේ වගේ උවමනාවෙන්ම කට්ටක් හොයාගෙන ඒ කට්ට කාගෙන මේ වගේ වැඩක් සාර්ථකව කිරීම සම්බන්ධයෙන්.
මේ වගේ වැඩක තියෙන සංවිධාන කිරීමේ බර මම බොහොම හොඳින් දන්නවා.
චෝදනා කරන යට චෝදනා කර කර ඉන්න කියන්න. ඔබේ වැඩේ ඔබ ඔහොම්මම කරගෙන යන්න.අපිත් ඉන්නවා ඕනෑම වෙලාවක සපෝර්ට් එකට.
ජය වේවා!!!
නෙළුම්යාය හොඳ ස්ථාවරයකට පැමිණ තිබෙන බව මේ ලිපි පෙළෙන් පැහැදිළි වුනා. දැන් මෙය අපි ඔක්කොම බඩ බැඳගෙන ඉටු කලයුතු වගකීමක්/යුතුකමක්/සේවයක්/ බව පෙනෙනවා. මා හිතන්නේ මෙතැන් සිට බොහොමයක් බ්ලොග්කරුවන් නෙලුම්යායේ සුවඳ විඳගනු ඇති.
වැරදි කියන්න ගොඩක් අය ඉදි එත් වැඩ කරන්න ඉන්නේ ටික දෙනයි ඒ නිසා ඒවා ගන්න ගන්න එපා
සහයෝගය දුන්නු හැම කෙනෙකුටම ඉස්තුති මොකද මම බ්ලොග් වලට ආදරය කරන එකෙක් නිසා
සුන්දර මතක පෙළක් තමා අජිත් අයියා. අපි ඒ වෙලාවේ අපිට හැකි සහයෝගයක් දුන්නා. ඉදිරියටත් හැකි සෑම සහයෝගයක් ම දෙනවා. අපිට අවශ්‍ය බ්ලොග් කෙරුවාවට හොද අනාගතයක් හැදීම පමණයි.

හැබැයි මෙහෙම දෙයක් තියෙනවා අජිත් අයියා. මේ වැඩකට බින්දුවකවත් සහයක් නොදී ප්‍රශ්ණ කරන අයට උත්තර දෙන්න හෝ ඔවුන්ගේ කතාවලට අනුව වැඩ කරන්න හෝ යෑම හොද දෙයක් නෙමෙයි. ඔවුන් අවශ්‍ය අපිව සීමා කිරීමටම තමා. ඒ නිසා ඒවා පැත්තකින් තබා අපි අපේ ගමන යායුතු බවයි අපිනං විශ්වාසකරන්නේ. නැත්තං වෙන්නේ අපි ඔවුන්ව තෘප්ත කරකර සිටීමක් පමණයි. මේ දෙවැනි අවුරුද්ද. අපි දෙවැනි අවුරුද්දෙදි අතිශය සාර්ථකයි. දැන් අපි තුන්වැනි අවුරුද්දට ලෑස්ති වෙනවා. ඊළගට ඉදිරි අවුරුදු වලට ලෑස්ති වෙනවා. අඩුපාඩු හදාගන්නවා සහ හොද ක්‍රමවේදයන් ගොඩනගා ගන්නවා. එහෙම නැතුව දෙවැනි අවුරුද්දේ සම්මාන නොලැබුණ හෝ හිතේ අමාරු හැදුණ අයගේ ගැටලු වලට උත්තර බැද බැද ඉන්නවා නෙමෙයි.

අජිත්ගේ බ්ලොග් මිතුරකු මෙන්ම, පෞද්ගලික මිතුරකුද වන මම මේ පෞද්ගලිකව අජිත්ට කරන මඩ ගැසීම ගැන කනගාටුවෙමි. මට නෙලුම්යාය හෝ අන් ආයතනයකට සම්බන්ද්යක් නැති මුත්, අජිත් පෞද්ගලිකවම බ්ලොග්ස් වෙනුවෙන් කරන කැපකිරීම මම දැක ඇත්තෙමි. අජිත්ට පඩිපත හම්බවෙන ලන්ඩනයෙ ඔහුගේ සේවාස්ථානයට නම් මම වරක් ගොඩවී ඇත්තෙමි. නෙලුම් බැරිනම් හබරල යායක් දාගත්තාත් මට නම් කමක් නැත. නමුත් පෞද්ගලික මිතුරකුසේ අජිත් වෙනුවෙන් පෙනී සිටීම මගේ යුතුකමයි. එසේ පෙනී සිටින්නේ නෙලුම් හිටවන්න හදන කාලේ පටන් මා දන්නා නිසාය. Aru.

මේ කටයුත්ත පිටුපස මොන තරම් ශ්‍රමයක්, කැපකිරීමක් තියෙනවද කියල හරිම පැහැදිලියි. ලබන සැරේ වැඩේට මීට වඩා උදව්වක් දෙන්න උත්සාහ කරන්නම්. ස්තුතියි අජිත් අයියා, කළණෙ, ඉයන්, ඉවාන් ඇතුළු ඒ හැමදෙනාටම.

බ්ලොග් කියවන්න කාලය ලැබෙන්නෙ අඩුවෙන් නිසා නිර්දේශ කිරීම්වලට සාධාරණයක් ඉෂ්ට කරන්න අමාරු වේවි. ඒ වැඩේ බාරනොගත්තෙ ඒ නිසා. නමුත් මගේ ඇහැ ගැටෙන මට දැනෙන ලිපි ගැන දැනුවත් කරන්නම්.
දෙවන උළෙලින් පස්සේ බ්ලොග් තේරීමට සෑහෙන උනන්දුවක් කිහිප දෙනෙකුට   තිබුන. අප අතරින් නික්ම ගිය විචාරක මහතා මෙන්ම අටම්පහුර ප්‍රධානව තවත්  කිහිප දෙනෙක් බ්ලොග් පොස්ට් එකතු කරන්න ගත්ත වෙනම අඩවියක. ඒ තරඟ විනිශ්චය සඳහා.

දෙවන සම්මාන උළෙලට කල්‍යාණ මිතරට අමතරව ඉවාන්,  මනෝජ්, දිලිනි, ඉයන් ඇතුළු බ්ලොග්  කරුවන් රාශියක් සහයෝගය දුන්න.  අජිත් පැරකුම් සහ නාලක වෙනද වගේම සහභාගී වුණා.  ප්‍රථම වරට බ්ලොග් වලට සහ සමාජ ජාල වලට කළ සේවය සඳහා විශේෂ සම්මානයකුත් හැදුව. මුල් වරට නම් කලේ නාලක හා රසිකලොජි ව.

සම්මාන උළෙලවල් දෙක අතරතුර ප්‍රජා  සත්කාර කිහිපයක්ම කෙරුණා. බ්ලොග්කරුවන්ගෙන් මුදල් එකතු කරලා සහ නෙලුම් යාය ඉතිරි මුදල් පියවල. කඳුකරයේ  පාසල් දෙකකට පොත්පත් බෙදා දීම, වතුර ලබා දීම, රත්නපුරයේ පාසලකට විදුලිය ලබා දීම සඳහා  දායක වීම  වගේ දේ. සමහර බ්ලොග්කරුවන් තමන්ට ලැබුණු මුදල් ත්‍යාග මේ ප්‍රජ සත්කාර වැඩ වලට නැවත ප්‍රදානය කලා.

එසේම මාසිකව හොඳම බ්ලොගයට මුදල් ත්‍යාගයක් දීමටත් යෝජනා කෙරිලා ටික කාලයක් පවත්වාගෙන ගියා. එසේ කලේ නිර්මාණ සහ බ්ලොග් තවත් ජනප්‍රිය කරවන්න. එයට ලැබුණු විරෝධය නිසා පසුව ඒ වැඩ සටහන අත් හැරලා දැම්ම. 
තෙවන උළෙලේ නොබැලූ නාට්‍යය 

 තුන්වන නෙළුම්  යාය උත්සවයට මට සහභාගී වෙන්න අවශ්‍යතාවයක් තිබුනේ නැහැ. වැඩ අධික වීම නිසා. උදව් කරන්න පොරොන්දු  වෙලා හිටියේ. නමුත් කිසියම්  අසත්‍ය ප්‍රචාර සමූහයක් නිසා 2016 අග භාගය වනවිට තත්වය උණුසුම් වුණා කීවොත්  නිවැරදියි. අපි බ්ලොග්කරුවන් හා කතා කරගෙන තෙවෙනි වරත් සංවිධානය කරන්න යත්න දැරුවත්  එය සාර්ථකව ඉටු වුනේ නැහැ. මොකද යෝජනා ආවත් ඉදිරියට එන පිරිස අඩුයි. කල්‍යාණ මිත්‍රත්,  අටමත් තවත් දෙතුන් දෙනෙකුත් ඇරෙන්න වෙන සහයෝගයක් ලැබුනේ නැහැ.  එනිසාම  උළෙල සංවිධානය  කිරීමේ කටයුත්ත ලංකානිව්ස්වෙබ් අඩවිය භාර ගත්ත. එසේම  චන්දිම විතාන ආරච්චි විසින් උළෙල සංවිධානයත් ඒ සඳහාම කැපවුණු පිරිසකට භාර දී තිබුන. පවත්වන තැන ගැන මම දැන  ගත්තෙත් ටිකක් පමා වෙලා.

සම්මාන වලට නිර්දේශි වූවන් මේ ලිපියේ. අජිත් පැරකුම් ට සම්මානයක් නිර්දේශ වී තිබුනත් ඔහු එය ප්‍රතික්ෂේප කළා නෙළුම් යාය  ප්‍රවෘත්ති සාකච්ඡාවකට සහභාගී වෙලා උන්නු නිසා.  එසේම  කිසිම සම්මාන  තේරීමකට කාගේවත් දේශපාලනයක්  නම් හරස් වුනේ නැති බව පැහැදිලිව කියන්න ඕනේ. කරු පරණවිතාන මහතාට මෙවර ආරාධනා කර  තිබුනේ නැති අතර ආරාධනා කර තිබූ දේශපාලනඥයකු වන රාජිත සේනාරත්නට දැඩි විරෝධයක් බොහෝ අය මතු කරලා තිබුන. ඔහු පැති  මාරු කළ නිසා ආව පැත්තේ අයත් භීෂණ සමයට සම්බන්ධයි කියා වාමාංශික කොටසකුත් මේ විරෝධය පළ කලා. ඒ ගැන මේ ලිපියේ  වඩාත් සවිස්තරාත්මකව ලියල තියනවා.  මට ලංකාවේ දේශපාලනය තේරුණු අයුරින් තමා මේක ලියුවේ.

හැබැයි මෙහෙම ප්‍රශ්නයක්  නැගුවොත් මේ දෙගොල්ලටම තරහ යනවා. ඔය කියන දේශපාලකයා තමන් ගේ පැත්තේ ඉන්න කොට ප්‍රශ්න  තිබුනේ නැත්ද කියන කාරණයත් ඒ දේශපාලකයා  හිටි ආණ්ඩුව මගින් යුද්ධය මෙහෙයවද්දී  එයට  සහය දුන් ප්‍රධාන වාමාංශික පක්ෂයට අර කිව්ව "භිෂණය " මතක් වුනේ නැත්ද යන්නත්.  (ඒවා අහන කොට පුද්ගලික මඩ ප්‍රහාර නම් ලැබෙනවා). නමුත් මුලික වශයෙන් දේශපාලනඥයන් ගෙන්වනවද  නැත්ද කියන එක සංවිධායකයන් අත  තියෙන්නේ. බොහෝවිට එහෙම  කෙරුවම භේද ඇතිවෙනවා තමයි. ඒකට  හේතුව යුරෝපයේ හෝ බටහිර වෙනත් රටවල වගේ දේශපාලනය හා දේශපාලකයන් එතරම් ගණන් නොගන්නා ජනතාවක් ලංකාවේ නැති එක.   යුරෝපයේ ඉඳන් ලංකාවේ දෙයක් සංවිධානය කරනකොට  එන ප්‍රශ්න තමයි ඒවා. මිමි දෙකක් තියාගෙන කටයුතු  කරන්න අමාරුයි. 

මේ ඒ ලිපියට ලැබුණු  ප්‍රතිචාරයන් .
අජිත්, ඕනෑම තැනක ප්‍රශ්න තියනවා. තමන්ගේ උවමනාව සමග ඒ අනිත් දේවල් කොච්චර ගැටෙනවද, තමන්ගේ මූලික උවමනාවට ඒවායින් කොච්චර බලපෑමක් වෙනවාද යන දේවල් කල්පනා කර තමන්ට තීරණයකට එළඹිය හැකියි. යම් යම් ප්‍රශ්නකාරී දේවල් තිබ්බත්, මම නම් අජිත්, සුමිත්, අටම් ඇතුළු පිරිස කරපු මේ වැඩේ ගැන බොහොම සතුටු වන කෙනෙක්. සමහර දේවල් වල ආරම්භය මෙහෙම තමයි. ඔය කියන හැමෝගෙම විවේචන එක්ක තමයි ටිකෙන් ටික වේවා හැදෙන්නේ. නමුත් අර ආරම්භක තල්ලුව දෙන්න තමයි අමාරු. කාලයත් සමගම සම්මාන උළෙල මීට වඩා වෙනස් ස්වරූපයක් ගනීවි. නමුත් පුළුවන් කාලයක් ඔබගේ දායකත්වය ඊට ලබාදෙන්න පුළුවන් නම් හොඳයි.

මොකා මොන බයිලා ගැසුවද නෙළුම් යාය සම්මාණ උළෙල ඉදිරියටම යා යුතුය. මෙවර සම්මාණ උළෙල බොහෝ අයගේ ගර්හාවට හා කතා බහට ලක් වන්නේ එහි ඇති සාර්ථකත්වය නිසාමය.

මඩ කාගෙන මේ වෙනුවෙන් කැපවූ සියල්ලන්ටම මාතලන්ගේ ප්‍රණාමය....
නෙළුම් යාය ඉදිරියට යා යුතුයි. බ්ලොගර්ලා සම්මාන උලෙලකට මේ තරම් බය ඇයිදැයි නම් නොතේරේ. බොරු සුචරිතයක් පෙන්වමින් විරුද්ධ වෙන්නන්ට විරුද්ධ වෙන්නටත්, සහභාගී වන්නන්ට සහභාගී වන්නටත් හැක. 

සම්මාන උළෙලවල් ගැන කතා කරන කොට අමතක කරන්න බැරි බොක්කෙන්ම බැහැල  වැඩ කරපු කෙනෙක් ඉන්නවා. ඒ සුමිත් යාපා හෙවත් කල්‍යාණ මිත්‍ර. ඉන්දික , ඉයන් සහ නෙළුම් යායෙත්, තවත් බ්ලොග්කරුවන්/කාරියන්  ගේ ධන පරිත්‍යාගයෙන් කළ සමාජ සත්කාර වලදී මුලිකත්වය ගෙන වැඩ කල කෙනෙක්. දෙවන හා තෙවන සම්මාන  උළෙල දෙකේදීම නිදි මරාගෙන,  නිර්දේශිත  බ්ලොග් කියවමින්, වේදිකාවේ කියවීමට අවශ්‍ය හැඳින්වීම් ලියමින්, තමන් ගේ  පුංචි දුවා දරුවන් බලන්න යන වෙලාව කැප කරමින් ඔහු කටයුතු කලේ. ඔහුගේ කාලය මෙන්ම ගමන් වියදම් පවා වැය කරගෙනයි ඒ උදව් කළේ.  කිසිම  බ්ලොග්කරුවෙක් ඔහුට ස්තූති කළාද කියන්න දන්නේ නැහැ. මම නම් ඒ ස්තුතිය කරනවා හැමෝම වෙනුවෙන්.

එසේම ඉවාන් පවලුශා හා  අටම්පහුර අමතක කරන්නත් බැහැ. මුල් උළෙලේ ගීත ගයපු දිලිනි සහ මනෝජ් , නාට්‍ය ගෙන්වන්න  උදව් කරපු තරංගනී මෙන්ම සම්මාන  සඳහා මුදල් පරිත්‍යාග කල බ්ලොග් කරුත් අමතක කරන්න බැහැ. පළමු හා දෙවන සම්මාන උළෙලේදී ලංකානිව්ස්වෙබ් හි උපුල් නිශාන්ත, සංජිව සහ ජයම්පතිත්  සෑහෙන්න මහන්සි වුණා. උපුල් නිදි මරාගෙන කුසගින්නේ තැවී ගෙන,  අර සමහරු ලී කෑලි කියල කියන සම්මාන හදාගෙන එන්න වෙහෙසි  වුණා . ඒ මහන්සිය දැක්ක නම් එහෙම කියයිද දන්නෙත් නැහැ.  සම්මාන උළෙලවල් තුනේම සංවිධානය සඳහා මුලිකව මහන්සි වුනේ ප්‍රධාන විධායක චන්දිම විතාන ආරච්චි සහ ලංකානිව්ස්වෙබ් ආයතනය. ඔවුන්ගේ සංවිධනාත්මක සහය නැතිනම් මෙය කරන්න ලැබෙන්නේ නැහැ. ඒ සංවිධානය කිරීම උදෙසා ඔවුන් කිසියම් වියදමක් දැරූ බවත් මම දන්නවා.

තෙවන සම්මාන උළෙලේ දී එක අයෙකු ඉවත් වුනාට පස්සේ බ්ලොග් නිර්දේශ කිරීම කළේ මමයි කල්‍යාණයි. ඒ වගේම සම්මාන තුනටම කිසිදු වියදමක් අපෙන් ලබා නොගෙන නොමිලේ සහභාගී වුන දෙදෙනෙක් හිටිය. ඒ නාලක ගුණවර්ධන සහ අජිත් පැරකුම් ජයසිංහ. කවුරු මොන චෝදනා  ඉදිරිපත් කලත් ඔවුන් උත්සව තුනටම ආලෝකයක් සැපයුවා.  නාලක ගුණවර්ධන, සරෝජ පතිරණ,  චන්දිම, කල්‍යාණ මිත්‍ර තමයි විනිශ්චය මණ්ඩලයේ හිටියේ. ඔවුන්ගේ ස්වාධින තීරණ වලටත් ඒ සඳහා වැය  කල කාලයත් අමතක කරන්න බැහැ.

බ්ලොග් සම්මාන ගැන මුලින්ම දන්නා මහත්මයෙක් මෙහම   කතාවක් කිව්වා මට. "අජිය ඕක උඹ නැත්නම්  කෙරෙන්නේ නැහැ. උඹ ඔතන ඉන්න ඕනේ" කියල. මම ඒ කතාවත් සෑහෙන්න විශ්වාස කළා. හැබැයි මම හිතනවා මම නැතිව මේ සම්මාන උළෙල කරගෙන යන්න පුළුවන් කියල. අපි පුද්ගලවාදී වෙන්න ඕනේ නැහැ. බ්ලොග්කරුවන්ට ඒ සඳහා ඕන කමක් තියනවා නම් ලංකානිව්ස්වෙබ් ආයතනයට ඕනෑකම තියනවා නම් කරන්න  පුළුවන්. පදනම දාල තියෙන්නේ.

අවසන් වශයෙන් කියන්න තියෙන්නේ මේ අභියෝගය අපිම නිර්මාණය කරගෙන අපිම සාර්ථකව ඉදිරිපත් කළා කියල. ප්‍රශ්න සහ වරදවා වටහා ගැනීම් තිබ්බ තමයි. ඒත්  මම හොඳින් නිරීක්ෂණය කළ දෙයක් තමයි බොහොමයක් සම්මාන ලබා ගත්ත සහ උත්සවයට සහභාගී වුන බ්ලොග්කරුවන් එය ප්‍රීතියෙන් සැමරූ බව. බොහෝ අය ආඩම්බරයෙන්  එම සම්මාන ලබා ගත් බව හා තම තමන් ගේ බ්ලොග් වල එය ප්‍රදර්ශනය කළ බව.  බ්ලොග් දැන් ආපහු ජනප්‍රියත්වයෙන් හීන වීගෙන යනවනම් ඒ කියන්නේ නිර්මාණ හිඟ වීමක් හෝ සමහර කාල වල බ්ලොග්කරුවන් ගේ ඉවත්ව යාමක් වෙන්න පුළුවන්. එසේම එහෙම නැති වී යනවනම් ඒකට කරන්න දේකුත් නැහැ. ඒක තමයි ලෝකයේ නෙමේ මේ විශ්වයේත් ස්වභාවය. අලුත් දේවල් එනවා පරණ දේවල් නැති වෙලා යනවා. සනාතන  ධර්මයක්. බ්ලොග් වලට වුනත් එහෙම වෙන්න පුළුවන්.

ඉතින් අවසන් වශයෙන් කියන්න තියෙන්නේ මම ඉතා සතුටක් ලැබුවා නෙළුම් යාය තුලින් කල වැඩ කොටස සහ බ්ලොග් සම්මාන උළෙල ගැන. නමුත් තව දුරටත් කාලය ඒ සඳහා ඉඩ ලබා දෙන්නේ නැහැ.

ඉතින් ආයුබෝවන් නෙළුම් යාය ගරු.

ප.ලි. - ලියන්න අමතක වුනු දෙයක්. සමාවෙන්න. මට ආදරණිය යහළුවෝ  සැහෙන ප්‍රමාණයක් හඳුනාගන්න ලැබුණා බ්ලොග් ලිවිල්ලෙන් මෙන්ම නෙළුම් යාය සම්මාන උළෙල නිසා.
යොමු:

ප්‍රථම සම්මාන උළෙල 

ප්‍රථම උළෙලේ හැඳින්වීමේ කථාව