Wednesday 23 June 2021

ශ්‍රී ලංකාවේ දේශපාලනය හා පුබුදු ජයගොඩ ගේ අහිංසක කම


පුබුදු ජයගොඩ ගැන ඇත්තටම දුක හිතෙන්නේ නැත්ද? ඒ ප්‍රශ්නය ඇහුවේ දීප්ති කුමාර ගුණරත්නය. කල්පනා කර බැලූවිට ඇත්තය. ලඟකදී ධීවරයන්ගේ උද්ඝෝෂණයට ගිය පුබුදුව පොලිසියෙන් අත් අඩංගුවට  ගැනීමට තැත් කළේය.  ධීවරයන් කෑ කෝ ගසා ඔහුව බේරා ගත්හ. මෙහිදී ධීවරයන් ගේ ප්‍රශ්නයට සමහරවිට  තත්පර දෙකක බුකියේ හා මාධ්‍ය වල ප්‍රසිද්ධියක් ලැබෙන්නට ඇත. ඊළඟ මැතිවරණයේදී ඔය ධීවරයන් ගේ චන්දය වත් පෙරටුගාමී සමාජවාදී පක්ෂයට ලැබෙන්නේ නැත. 

මේ ඉන්ධන ප්‍රශ්නය මෙන්ම අනිකුත් ප්‍රශ්න අටෝරසියක් හැමෝටම ඇත. මේ කාලයේ එදා වේල ටුවර්ස් රැකියා කරණ අය, පෞද්ගලික වෙළඳම් අනිකුත් අත්‍යවශ්‍ය නොවන රැකියා කරන බයියන්, ටොයියන් , ජෙප්පන්, පෙරට්ටන්  ආදී සියල්ල අමාරුවේය. අමාරුවක  නැත්තේ ඔය  රජයේ හෝ අත්‍යවශ්‍ය සේවා රැකියා කරන වෛද්‍ය, හමුදා, සෞඛ්‍ය සේවයේ අනිකුත් අය , දේශපාලකයන් හා සල්ලි තිබෙන අයත්, පිටරට සිටින ජෙප්පන්, පෙරට්ටන් ආදීනුත්ය. 

ඒ අතරේ ලංකාවේ දේශපාලනය ගැන යහපාලන ආණ්ඩුව පත් වූ පසු 2015 පෙබරවාරි 19 "පුටින් ගේ අපේ ටිකිරි මොළේ (හෙවත් රජ්ජුරුවන්ගේ ප්ලෑන)" ලියූ ලිපිය නැවත රිසයිකල් කර 2019 නොවැම්බර    19 දින "අපේ රජ්ජුරුවෝ" මැයින් පල  කලෙමි. නැවත එම ලිපියම අද 2021 ජුනි 21 රිසයිකල්  කරමි. ලංකාවේ දේශපාලනය ගැන පේන කීමට ජ්‍යෝතිෂය අවශ්‍ය නැත. 


2019-11-19 : 
අපේ රජ්ජුරුවෝ අද නැවත  දිවුරුම්  දුන්නේය. ඒ අගමැතිතුමන් වශයෙනි.
මම  යහපාලන ආණ්ඩුව පත්වුණු 2015 මාසයේ ඒ ආණ්ඩුවේ පිළිවෙත  දෙස බලා මෙම ලිපිය ලීවෙමි.

අද නැවතත් විපස්සයා විපස්සයාම  වී ඇත.

ඒ ප්‍රීතිය නිමිත්තෙන් 2015 පෙබරවාරි 19 ලියූ ලිපිය නැවත  පළ කරමි.
කියවා  සැනසෙන්න.
( දැන්වීමයි- මේවා ලිවීමට ජ්‍යොතිෂය උපයෝගී කර නොගත්තෙමි.)

එදා 2015 පෙබරවාරි 19 ලිපිය: (මේ ලිපියේ අනාවැකියේ පොඩි වරදක් තිබේ. එහි කියවෙන්නේ  ලේකම් කොලූ නැවත  ජනාධිපති වන බවයි. ඒ වෙනුවට ජනාධිපති වූයේ බාල සොහොයුරාය. ඉතිහාසය වෙනස් වනු ඇත.)

පුටින් ගේ අපේ ටිකිරි මොළේ (හෙවත් රජ්ජුරුවන්ගේ ප්ලෑන)

ඔන්න ඉතින් අපේ පුටින් උන්නැහේ දන්නවනේ රුසියාවේ. සෝවියට්  දේශය කාලේ  කේජිබී  ලෙෆ්ටිනන්ට් කෙනෙක්. පස්සේ ලෙනින්ග්‍රාද් (සාන්ත පිතර්බුර්ගය) පැත්තේ දේශපාලනේ කරලා යෙල්ට්සින් හරහා ඇවිත් ජනාධිපති වුණා. ඇස්වහක් කටවහක් නැහැ මන් මනාපය දෙන පොරක්. වෙන හේතුවකට නෙමේ වැටිලා තිබුන රුසියාව නැගිට්ටේවට. රුසියාව දියුණු රටක් වශයෙන් රුස්සට ජාතියේ ආඩම්බරය ඇතුව ජීවත් වෙන්න යලි ඉඩ සලසා දුන්නට. හැබැයි පොර මෙහෙමත් කලා. හොරකම් කර කර හිටි මදාවියෝ ටික තමන්ගේ යටතට අරගෙන ඒක  පිළිවෙලක් ඇතුව ගානට කරන්න හදල දුන්න, තමන්ට ගානක් එන විධිහට. දෙන්නේ නැති නහර කාරයන්ව එංගලන්තෙට පිටුවහල් කලා.  නාකි මිනිසුන්ව මරල උන්ගේ දේපල උස්සන එවුන්ව  අල්ලල හිරේ දාල ඒක  නවත්තල, උන්ට පැන්ෂන් වැඩි කරලා පාරවල් ටික අලුත් වැඩියා කලා රුසියාවේ, බෙදුම් වාදී චෙචේනියාවට කෙලින්ම බෝම්බ  දාල  හමුදා යවල මට්ටම් කරලා සාමය හැදුව,   අමෙරිකාවට කෝචෝක් එකක් එහෙම දාල  දැහැමෙන් සෙමෙන් වාර  දෙකක් හිටිය. පස්සේ ජනාධිපතිවරණේ  එනකොට පොර දැනගත්ත ආයි ඉල්ලන්න බැරි නීතියක් මේ යෙල්ට්සින් කියන වසවර්තිය දාල තියෙනවා කියල.

ඉතින් මොකද කරන්නේ. ටක් ගාල පක්ෂයක් ගත්ත සල්ලි වලට. මෙද්වෙදෙව් මලයට කිව්වා ජනාධිපති කමට ඉල්ලන්න කියල.  පූටින්  අය්යා  අගමැති කමට ඉල්ලුව. ඉතින්  අපේ නාමික ජනාධිපති ඉන්නවා මඟුල් ගෙවල් වලට යනවා එහෙම, කම්හල් අරිනවා පීත්ත  පටිය කපල හෙම වැඩ ගොඩයි.. පුටින් අගමැති රට පාලනය කළා. ඇමෙරිකන් කාරයා නම් වැඩිය කැමති වුනේ නැහැ. ඒත් ඔය අධිරාජ්‍යවාදියෝ කවුද ගණන් ගන්නේ. මෙන්න අවුරුදු 4 ගියා. ජනාධිපති හැටියට අවු 8 , අගමැති හැටියට 4 යි. 12 යි.  මෙන්න ව්‍යවස්ථාව වෙනස් කරලා ජනාධිපතිට අවුරුදු 6 ක් ඉන්න පනතක් ගේනවා. 2012 අගමැති පුටින් ආයේ  චන්දෙ ඉල්ලල ජනධිපති වුණා . අර කලින් කොමියුනිස්ට්  නායකයෝ මැරෙන  කන් හිටියේ එල්ලිලා.  15හක් ඉවරයි තව අවුරුදු 3 ක්  තියෙනව. ඊට පස්සේ හතරවැනි වතාවට ඉල්ලුවම (ඇයි දෙපාරක් පුළුවන්නේ ) ආයේ ඉතින් යාවජිව ජනාධිපති කිව්වත් කමක් නැහැ.

ඉතින් ඔන්න රුසියවට එහා ඈතම ඈත ඩිස්නිලන්තෙක හරිත වර්ණ කට්ටියක් අවුරුදු 17ක්  රට කාල  බීල  අහවර වුණාම, නීල  වර්ණ කට්ටියක් 1994 ඉඳන් රට පාලනේ කලා. ඒගොල්ල ගත්තෙත් කන බොන ගමන් රට වැසියටත්  පොඩ්ඩක්  දෙන්නම්  කියල පොරොන්දු වෙලා . හරිතවර්ණ එවුන් රක්ත වර්ණ උන්ගේ කැරැල්ලක් මැඩ  පැවත්වුවට උතුරු පැත්තේ චෙචෙන් කාරයන්ට වැඩක් දීගන්න බැරි වුන.  නීල වර්ණ එකීටත් බැරි වුනා . අවුරුදු දහයක් ඔහේ අද්ද අද්ද ගියාට පස්සේ රජතුමෙක් ජනපති වුනා. වණයක්  වෙලා හිටිය චෙචෙන් වගේ කට්ටියට විතරක් නෙමේ උන්ගේ අඹු දරුවන් ගේ ගෙවල් දොරවල් වලටත් බෝම්බ දාල මට්ටම් කරලා කොහොම හරි සාමය ගෙනාව. ඉතින් මිනිසුනුත් කැමැත්තෙන් පලවෙනි අවුරුදු පහ දුන්න . දෙවෙනි අවුරුදු පහ යනකොට  හරිත වර්ණ කට්ටියකුත් සෙට් වෙලා කාගෙන කාගෙන ගියා. සුදු අස්ස කරත්ත හෙම හිටි හැටියේ මතු වෙන්න ගත්ත. මිනිසුන්ට එපා වෙන්න ගත්ත. රජතුමා ව්‍යවස්ථාව වෙනස් කළා තුන්වෙනි පාර ඉල්ලන්න. මිනිස්සු කීව  දැන් කෑව ඇති කියල. රජතුමාගේ උපදේශකයන්ට තේරුණා වැඩේ වල්  වේගෙන එන බව. රජතුමා මේ පාරනම් සෙට් කියල උපදෙස් දුන්න. පිස්සුද බොල මන් වගේ එකෙකුට හේමත් වෙනවද කියල උදහස් වෙලා හැච් කළා ප්ලෑනක්.

රජතුමා කතා කලා සාස්තර කියන පුරෝහිතයට. " මම තුන්වෙනි පාර ඉල්ලනවා. මම දිනනවයි  කියල මුසාවක් කියපිය රට වටේ " කියල උපදෙස් දුන්න . පුරෝහිතය කීව ග්‍රහ බලපෑම  අනුව විතරක් නෙමේ  මිනිස්සු කියන කතා අනුවත් ඔබතුමා මේ පාරනම් පරදිනවා කියල. රජතුමා උදහස් වෙලා කිව්වා "යකෝ තෝ මාව දිනනවා කියල කිව්වේ නැත්නම් තෝව  දඬු කඳේ ගහල රජ අලියට කියල පාගවනවා" කියල. අරූ භයවෙලා අඬ බෙර ගහල යැව්වා  රජා  දිනනවා කියල. ඔය අව්වස්සේ මේ රටේම හිටිය විපස්සයෙක් . හරිම ආසයි විපස්සේට වෙලා ඉන්න.  විපස්සේ එවුන් කොච්චර තල්ලු කලත් ම්හු හොලවන්නම බැහැ. රජතුමා කතා කලා විපස්සයාට. කිව්වා විපස්සයෝ දන්නවනේ මම උඹට හැමදාම සලකනවා තේ බොන්න කෝපි  බොන්න කතා කරනවා.  මේක තියාගන්න ඕනේ නම් මට උදව් කරපිය කියල. විපස්සයත් කියන ඕන ලබ්බකට කැමති පොරක්. ඉතින් හැදුව ප්ලෑන. ඔහේ අර පරණ නෝනවයි ඉන්දියන් ඇමෙරිකන් කාරයෝ ටිකයි අන්ද ගන්නවා. වමාල ටිකත් සෝසෝ හරහා උඹ බලා ගනින්. සෝමේ ටිල්විල අනූ ලා මගේ පරණ කොල්ලෝ සැට් එක මාව 2005දී උස්සපු එවුන් ටිකනේ.  උන්වත් උඹ ගාවට එවන්නම්. ඉන් පස්සේ මම මගේ විශ්වාසවන්තම  ලේකම් කාරයා එවනවා උඹේ පැත්තට. ඕන වෙලාවක මම කියන එක අහන එකෙක්.  මාව යුද්දෙට තල්ලු කරපු අර කිව්වා නාහන පිංචක රතන සෙට් එකත් එවන්නම් ජාජිත් කොලූ එක්ක. මිනිස්සු ටික අන්ද ගන්න ඒ ඇති.  ඊළඟට උඹ  එවපන් උඹේ එකා මගේ පැත්තට. ඊට පස්සේ උඹ අගමැති  වෙලා මගේ එකාව  ජනාධිපති කරපන්. විපස්සයත් බොහොම අකමැත්තෙන් විපස්ස කම දාල යන්න බෑ කියල බෑඟිරි ගහල හෙම කැමති වුණා.  පොර අහනවා.

"ඉතින් ඊට පස්සේ මට විපස්ස කම හම්බ වෙන්නෙම නැත්ද ?"

"ඔය ඉතින් සරත්මධු වෙන්න යනවනේ. ඉඳපන් කියනකන්.  ඔන්න උඹ අගමැති වුනාට පස්සේ අර මාත් එක්ක ටුවර්  ගිය ජිල්ජෝනට භාර දීපන් පොලෝසිය. ඔය පෙළපාලි ගිය නීතිඥ උන්ට හොඳ සභාපති කමක් දෙකක් දීපන්. ජනරාලයත් පව්නේ ආපහු ඔක්කොම දීලා තියන් ඉඳපන්. නැත්නම් මිනිස්සු  බලයි මොකද කියල. වැඩිය දෙන්න එපා ගන්න අමාරු වෙයි. "
"ඉතින් ඊට පස්සේ "..

"ඔය ආයි ඉතින් මට ඔය දේදුනු කැලුම් පෙන්නන්න බැහැ". මොන් ගලයව පුළුවන් තරම් එලියෙම්ම  තියා  ගනින්. ගල් ආඳා. අපේ වැඩේ මාට්ටු වෙයි. යවපන් ලෝකේ වටේ. මම බයිලලනිපේ ලේකම් ටම දෙන්නම් සභාපති කොමත් . එතකොට ඒකත් හරි. උඹේ හිටිය ලේකන්ව මිනිස්සුන්ට පේන්න දවසක් දෙකක් ඇතුලට දාල ගනින් එලියට. හැබැයි ඔන්න මගේ කොල්ලෝ ටික  හෙම ඇතුලට දාන්නේ නැහැ විහිළුවටවත්. බිසෝ තුමී මගේ ඔලුව පලයි. ඕන් ඔහොම යනකොට මිනිසුන්ට උඹව නිකම්ම එපා වෙනවනේ.
ආ කියන්න අමතක වුනා. දන්නවනේ මගේ පුරෝහිත වංශ, නානලා සෙට් එක. උන් උගේගොඩ හෙම රැස්වීමක් දෙකක් තියල  මාව ආපහු ඉල්ලයි. උඹට තියෙන්නේ ආපහු චන්දෙ තියන්න.
එතකොට මං අගමැති , මගේ ලේකම් කොලූ ජනාධිපති උඹ ආයිත් විපස්සේ. ඊට පස්සේ මම ව්‍යවස්ථාව වෙනස් කොරනවා මට අවුරුදු දහය ගානේ ඉන්න. උඹ අවුරුදු 20ක් විපස්සේ ආයි. කොහොමද මගේ ටිකිරි මොලේ." විපස්සයට කොච්චර ජොලියක්  ගියා ද කියනවනම් රජතුමාව ඉඹින්නත්  හැදුව. හොඳ වෙලාවට රජතුමා සාටකෙන් මුණ වහ ගත්ත.
ඔය වෙලාවේ සුදු අස්ස කරත්තයක් හය්යෙන් ඇවිල්ල අස්ස කකුල් හතරම තද කරලා බ්රේක් ගැහුවා.
"ඒ සද්දෙට මට ඇහැරුණා."

2015 පෙබරවාරි 19 ලියන ලද්දකි.

- කොළඹ ගමයා 

 

Sunday 20 June 2021

පියාගේ දිනය


මගේ ආදර දූලා දෙන්නා 

තෑගි දුන්නා මල් කළඹක් එක්ක 

වැළඳගෙන තදින් සිඹ සෙනෙහසින් 

කේක් හදනවා උන් බිරිය සමග 

ඈ දුන්නා මට මල් සමග 

ෂැම්පේන් බෝතලයක් 

බොන්න තහනම් නැහැනේ මේ රටේ 

ඇය හදනවා ශික්ට් ක්‍රවුට් 

මස් එක්ක  ගෝවා 

මේක තනිකර ජර්මන් වැඩක් 


මේ පියවරුන්ගේ දිනය 

මට මතකයි මගේ දුප්පත් තාත්තා 

පියවරුන්ගේ දිනයක් තිබුණාද ඔහුට 

අදහගන්නට අදත් බැහැ 

හැදුවේ කොහොමද ඔහු අපි 

ඒ පුංචි පඩියෙන් 


අපි විභාග පාස් කෙරුවම 

විදුහලේ, එළියේ දස්කම් දුටුවහම 

ඒ තමයි ඔහුට පියවරුන්ගේ දිනය 

ඔහු අප හැර  ගියේ හරි ඉක්මනින් 

යන්තම් හැට දෙකට ළඟ 

මගේ මව බාලය මගේ දැන් වයසටත්  වඩා 

හිතා  ගන්නට බැහැ  මට 

මා හිතන්නේ හදවතින් මම 

තවත් තරුණයි කියා

පනස් හයක්ම මට,

හිතා ගන්නට බැහැ මට 

ඇය කෙතරම් තනිදැයි කියා 

ඇයට කෙතරම් දුක දැයි කියා 


පොරොන්දු විය හැකි ඔබට

දයාබර තාත්තේ  

රැක බලා ගනිමි අප  

ඔබේ ජිවිතයේ ආදරය 

ඔබට සෙනෙහස පිදූ 

ඒ සුන්දර කාන්තාව 

අප මුළු දිවිය පුරාවට 

අපට කළ හැකි 

එයම පමණකි 

ඔබ කළ සියල්ලට 

ඔබේ දරුවන් හතරට 

ඔබ දමාගිය එකම වස්තුව 


 - පියවරුන් ඇති නැති සැමට පිදුමකි 


Friday 18 June 2021

බ්‍රිතාන්‍ය කෞතුකාගාරයට ගිය දෙවෙනි චාරිකාව

පෙර කථාව:  

 කෝවිඩ් ව්‍යසනය ආරම්භ වී යන්තන් අවසන් වුනේ යයි අපට සිතුනු  වසර දෙදහස් විස්සේ නොවැම්බරයේ දිනෙක,  මම බ්‍රිතාන්‍ය කෞතුකාගාරයට ගොස් එලියට ඒමට නොහැකිව හිරව සිටියදී අති උත්තම රාවණා නරේන්ද්‍රයන් හමුවූ බව ඔබට මතකයේ ඇති.  මතකයේ  නැත්නම් මේ යොමුවෙන් කියවාගෙන මොළේ කුරුවල් කරගත හැකිය.   

රාවණා උදව් කිරීමට ඇසූ විට ඒ දිනයේ මම සම්පුර්ණ සත්‍යය ම මෙසේ පැවසුවෙමි. 
--
"අපෝ අවශ්‍ය  නැහැ දේවයාණන් වහන්ස. අපට රාවණා  පරපුරෙන් පැවත එන නෑ යකුන් බොහෝයි . ඒ අතරින් පවිත්‍රා දේවියන් වැනි සේනාධිනායිකාවන් සිටිති. සුදු එලියා වැනි සේනාධිනායකයන් සිටිති. ඔවුන් රාවණා මහිමයෙන් විශ්ව ශක්තීන් උපදවා රට රකිති. රාවණාවබෝධයෙන් යුත් රහතුන් දඬු මොණරකොප්ටරයෙන් ගොස් රට පුරා රාවණා ජලය ඉස ආශීර්වාද කරති.   රට වැසියෝ මොන ප්‍රශ්න පැමිණියත් නොබියවම ඉතා සතුටින්  කල් ගෙවති. " . --

+++++++++++++++++++++++++++++++++++++++++++++++++++++++++++++++++
වර්තමාන කථාව:

මේ පාර හම්බවුනොත් මොනවා කියන්නද කියල හිත හිත තමයි ගියේ. මොකද අර මතුරපු  ජලය  ඉහල, පිරිත් පැන් වැස්සුවත් වැඩක් වුනේ නැහැ නොවැ. හිනා වෙන්නත් බැහැ නේ  නෑ යක්කුන්ටම නේ කෙළ වෙලා තියෙන්නේ. අඬන්නත් බැහැ හිනා යන නිසා. 

මේ පාර නන්දන කියල යක් පරපුරේ කොන්සවේටිව් සමාජවාදී නෑයෙක් එක්ක තමා මියුසියම් එකට ගියේ. බ්ලොග් ලියන කට්ටකාඩුවේ ලොකු මල්ලිගේ අවාසනාවට අර හොයන්න කියපු අත් පිටපත තිබ්බේ නැහැ. ආසියානු කොටසත් වහලා. ඔය රාවණා කට්ටිය හොල්මන් කරන එක තේරිලද දන්නෙත් නැහැ.

ඉතින් නන්දන ගොයියට ඕන වුන නිසා  ගියා මිසරයේ පාරාවෝ පිළිම ආදිය බලන්න. පස්සේ මට හිතුන  කොලොම්පුරේ ලියාගෙන යන  හෝර්ස් ගේ දරුවාගේ කතාවේ අර ශාප දෙන යක්ෂ බඳුන වගේ ඒවා තියනවද දන්නේ නැහැ. ඒකත් හොයල  බලන්න ඕනේ කියල.. මේ තියෙන්නේ දැක්ක බඳුනක් තමයි.

ඔන්න ඊට පස්සේ තමයි මෙන්න මේ ශීලා ලිපිය දැක්කේ.  ඕවට කියන්නේ ස්ටෙලා  කියලද කොහෙද.   පුරාණ  මිසර අකුරු වගයක් තියෙනව නේද. ඒ අකුරු වලට  කියන්නේ හයිරග්ලිෆ්ස්  Hieroglyphs වගේ දිව උළුක් වෙන වචනයක්. මේක කියව ගන්න ගූගල් කාරය ගේ උදව්ව ගන්න   හිතන කොටම වගේ  කවුද ෂේප් එකේ ස්ස් ගෑව පැත්තක ඉඳන්. ඉස්සෙල්ල බලනකොට පාරාවෝ කෙනෙක් ගේ මමියක් පිටි පස්සේ හැංගිලා මෑන්  හිටියේ. ඊට පස්සේ නන්දනය එහා මෙහා වෙනකන් ඉඳල ආව මගේ ළඟට. සද්දන්ත මේ මනුස්සය දැකල පුරුදු කෙනෙක් වගේ.


බලනකොට මේ රාවණා නේ වෙස් වළාගෙන.

"දේවයන් වහන්ස මේ  මොකෝ මේ කලිසමක් ඇඳලා සන්ග්ලාස් දාල කෝවිඩ් මුකවාඩමකුත් බැඳන්? නොපෙනී ඉන්න පුළුවන් කම  තියෙද්දී. කෝ හිස් දහයයි අත් දහයයි " මං ඇහුවා.

"හිස් ටිකයි අත් ටිකයි අර වහපු කෑල්ලේ තියල ආවේ. තමුන්නැහේ  අද එනවා කියල මට ඔත්තුවක් ආව . මේ මිනිස්සු ඉන්න තැනක  වෙන හම්බවෙන්න විධිහක් වත්නැ හැනේ" රාවණාත් ගානක් නැතිව කීව. 

"ඒකනේ හරියට විස්තර කතා කරන්නත් විධිහක් නැහැ තමයි"

"හරි කතා කරන්න පස්සේ හම්බ වෙමු කෝ. ඔය තැනැත්තා අද මේ හරියට එනවා කියල අපට හරියටම ලංකා ඔත්තු සේවයෙන්ම කීව. එනිසා මම ශිලා ලිපිය ගැන කියලා යන්න ආවේ.  අපි ඒ කාලේ මිසරයටත් ආව කියල පෙන්නන්න  "

"අම්මට සිරි එහෙත් ගියාද , දඬු මොණරෙන් උඩින්ද  ගියේ"

"නැතිව වෙන කොහොම යන්නද මනුස්සයෝ? තමන්ගේ ෆීල්ඩ් එකේ නොවෙන දේවල් ගැන කතා කරන්නේ නැතිව ඉන්නවා. ෆේස්බුක් පොලිසියෙන් හිරේ දම්ම ගන්නේ නැතිව. මම ඉතින් ඒ කාලේ ක්ලියෝපැට්ර  නංගා බලන්නත් එනවනේ මාර්ක් ඇන්ටනි ට හොරෙන් "

"එහෙමත් සීන් එකක්ද? අපි ඕව දන්නේ නැහැනේ. කොහෙද ඉතිහාස කාරයෝ ඕව ලියන්නේ නැහැනේ. දැන් එතකොට මොකක්ද අර පෙන්වන්න හැදුවේ"

"ඔය තියෙන  ශිලා  ලිපියේ බලන්න එක්කෙනෙක් නටනවා. එක්කෙනෙක් පෙන්වනවා අතින් ඩ්‍රම් එක. "


"ඉතින්"

"ඕකේ තියෙන්නේ අවුරුදු 2070 කට පස්සේ අපේ ඉතාමත් වංශවත් හඬින් මධුර ගී ගයන රූමත්  උමාරියා සිංහවංශ  දියණිය  අපි දෙන්න අර  විල ළඟ මාක්  ඇන්ටනියට හොරෙන් දාපු  ලව් සීන් එක ගැන "මන්ද පමා" කියල සින්දුවක් කියනවා කියලනේ. ක්ලියෝ මම එනකන් තමයි බලන් හිටියේ." 

"සීරියස්ලි, එතකොට  අර පිටිපස්සේ ඉන්නේ කවුද "

"ඒ අර සුප්‍රසිද්ධ භාතිය ජයකොඩි ළමයනේ "

"හරි හරි ඒ දෙන්නනේ සින්දුවට සම්බන්ධ නේද, " 

මට ඒ වුනාට අවුරුදු ගණන් පොඩ්ඩක් අවුල් වගේ.

එනිසා  පොඩ්ඩක් බයෙන් බයෙන් ඇහැව්වා "දේවයන් වහන්ස අපේ ඉතිහාස කට්ටිය කියන්නේ  ඔබතුමා රජකලේ  අවුරුදු පන්දහකට විතර කලින් කියලනේ. වයස බැලුවහම  හරියට  ගැලපෙන්නේ නැහැ වගේ. අනික  දැන් මේ පහළ තියන විස්තරයේ තියෙන්නේ හොරයි, චූටියි ගේ සොහොනින් ආපු එකක් කියල. ඒ ගොල්ලා තමයි අමුන් මහා දෙවොලේ ප්‍රධාන ගෘහ නිර්මාණ ශිල්පීන්"

"ඔය ළමයට මම කිව්වා නේද ෆීල්ඩ් එකට අදාල නැති දේ ගැන කතා කරන්න එපා කියල. ඕව ඔය අධිරාජ්‍යවාදීන් හොරෙන් ගෙනල්ල ඉතිහාසය විකෘති කරලා ලියපුව. ඔය දෙවොල හැදුවෙත් අපි තමයි. ලංකා පුරයෙන් තමයි ශිල්පීන් අරන් ගියේ. ඔය යට මොකද්ද ලජබටකිව් කියල ගහල තියෙන්නේ. මේකට කිසිම සම්බන්ධයක් නැහැනේ." 



"හරි මට තේරුණා. තව මුකුත් ලියල නැත්ද මේකෙ දේවයන් වහන්ස . මේ දවස් වල කෝවිඩ් නිසා ලංකාවට පොඩි තර්ජනයක් තියනවා. විදේශීය සංචිත අඩු නිසා පිටරටින් මුකුත් ගෙන්වන්නේ නැතිව වවාගෙන කන්න හදන්නේ"

"ලංකාවේ නායකයෝ  කොහොමත් වවාගෙන කන්න දක්ෂයි නේද? විභිෂණය මට කළෙත් ඕකනේ. සහෝදරයෝ කොච්චර ලං වුනත් පරිස්සමින් ඉන්න ඕනේ. නැතිනම් දඬු මොණරෙට ගහන තෙල් ටිකට හරි කෙළියි.  මොන දේ වුනත් දඬු මොනර ප්‍රමාණයක් ණයකට  හරි අරගෙන මගේ යක් ජනතාව රැක බලා ගන්න  රාජ්‍ය සභාවේ එවුන් ටික රැක ගන්න ඕනේ. "

රාවණා දිව දෙකින් කතාකරන්නේ දැයි මට සැකයක් ඇතිවුණි. 

" එකනම්දැ  වෙන්නේ නැහැ දේවයන්න් වහන්ස. මේ දවස් වල ගංවතුර නිසා සරොම් කැහිපොට ගහගෙන තල රාත්තල ගානේ නෑ යකුන්ට බෙදන් යනවා සභාවේ සමහරු.  මුකුත් උපදෙසක් වත් දෙන්න බැරිද දේවයන් වහන්ස මොකද කරන්නේ කියල "

"මම මොකටද ඒක කරන්නේ අර වාරකන් කාලේ මැරෙන මාළු කන  එගොඩහේවා යකයි, සර්ව ලෝක විශාරද  දේපැණියා  යකයි ඒවා කරනවනේ.  ඔහොම ගිහිල්ල ඕක ගිලා බැස්සහම චීන මස්සිනාලට කියල වැලි වලින් තව එකක් ගොඩ දාල දෙන්නම් "

"මේ මේ දේවයන් වහන්ස "

++++++++++++++++++++++++++++++++++++++++++++++++++++++++++++++++

රාවණා නරිදු  පහල පින්තූරයේ තියෙන පූජකවරයෙක් ගේ විශාල  මමියක් අස්සෙන් නොපෙනී ගියේය.

 


 "මොකද බං කෞතුකාගාරේ අස්සේ කෑ ගහන්නේ "

නන්දනයාගේ හඬින් යන්තම් සමාන්තර විශ්වයෙන් මේ පැත්තට පැන ගතිමි.   


Saturday 12 June 2021

කාබනික ප්‍රශ්නය ගැන මගේ අදහස


මම ලෝකයේ ඕනෑම රටක කාබනික පොහොර භාවිතා කරනවට කැමතියි. ඒක අර ආණ්ඩුව කලාද මේ ආණ්ඩුව කලාද කියන එක කොහෙත්ම අදාල නැහැ. ඒක ප්‍රතිපත්තියක්. අපි හුඟක් වෙලාවට මිලදී ගන්නෙත් ඕගනික් එළවලු, පලතුරු සහ මස්. ටිකක් ගණන් වැඩියි තමා. නමුත් වැඩි පාරිභෝගිකයන් ප්‍රමාණයක් ගන්න කොට ඒවායේ ගාන අඩුවෙන්න ඕනේ නේද. ඒ කියන්නේ ඕගනික් (කාබනික) අහර ද්‍රව්‍ය වලට ඇති ඉල්ලුම වැඩි වෙනකොට තව ගොවින් , සහ සමාගම් ඒවා නිෂ්පාදනය වැඩි කරනවා. එතකොට තිවන තරඟය මත මිල අඩුවෙන්න ඕනේ. මම බොන සෝයා කිරි දැන් එකම ගාන වෙලා තියෙන්නේ. මුලදී ගණන්. (කාබනික සහ නැති එක) ඒක එහෙමයි වෙළඳපළේ වෙන්නේ.
(බොරුනම් එකොන් ගෙන් අහන්න)

ඉතින් මේ කාබනික පොහොර භාවිතා කරන රටවල (යුරෝපයේ) රසායනික පොහොර තහනම් කළේ නැහැ. කලේ කාබනික පොහොර භාවිතා කරන ගොවීන්ට වැඩි සහනාධාර දෙන එක. රසායනික පොහොර වලින් හදන කෑම ලාභයි. නමුත් ඒක පාරිභෝගිකයා අතේ තියෙන්නේ. තමන්ට ඕන නම් කෘමි නාශක තියෙන එලවලු සහ කෑම කෑව හැකි. කාල පස්සේ පිළිකාවකුත් පොඩ්ඩක් හදා ගත්ත හැකි. නැත්නම් ඕගනික් එක ගත හැකි. ඒක තමයි නිදහස.
ඕක බලෙන් කරන්න ගියහම අර මා ඕ ගේ අණින් ගේ කුරුල්ලෝ මරපු චීනුන්ට වුන දේ වුනත් වෙන්න පුළුවන්. පිටින් ගෙන්වනවට වඩා ලංකාවේ කාබනික පොහොර හදන එක හොඳයි කියල විද්වතුන් කියනවා. නමුත් පහුගිය වසර ගණන පුරා සමාගම් විසින් ලංකාවට කාබනික පොහොර ගෙන්වනවා.දැන් කෑ ගැහුවට හුඟක් අය ඒකත් දැනගෙන තියෙන්නේ ඊයේ පෙරේද. ගොවීන්ට කෘෂිකර්ම දෙපාර්තමේන්තුව හා කෘෂිකර්ම නිලධාරීන් හරහා පුහුණුව දෙන්න ඕනේ. ඒ පිළිබඳ පොත පතපත්‍රිකා ගහන්න ඕනේ. හිතුන පලියට පොල්ලකින් ගහනවා වගේ රටක වගා විනාශ කරන්න රජයකට බැහැ.ප්‍රශ්නේ තියෙන්නේ එතැන. කෘෂිකර්මය උගත් අයගේ උදව් අරගෙන සැලැස්මකට කරනවනම් හැමෝගෙම සහයෝගය ලැබේවි.

කෘෂිකර්ම නිලධාරීන්ටත් අවබෝධය නැතිනම් ඔවුන්ව පුහුණු කරන්න ඕනේ.

හැබැයි මටනම් හිතෙන්නේ විදේශ සංචිත සීග්‍රයෙන් අඩුවී ගෙන යන නිසා මේ රසායනික පොහොර තහනම පැනෙව්වා කියල. හැබැයි ඒත් ඉතින් මන්ත්‍රීන්ට ජීප් ගන්න විදේශ විනිමය තියෙනවා කියන්නේ ඉතින් එහෙම වෙන්නත් බැහැ.

ලංකාව දුප්පත් වෙනවට හෝ කරදරයේ වැටෙනවාට අපි කවුරුත් කැමති නැහැ. එනිසා බලයේ ඉන්න අය හොඳට කල්පනා ජාතියටම බලපාන ප්‍රතිපත්ති ක්‍රියාත්මක කලොත් හොඳයි.

බ්‍රිතාන්‍යයේ මේ වැඩේ බොරුවට කරන්න බැහැ. මෙන්න මේ ලිස්ට් එකේ තියෙනෙන් කාබනික සහතිකය දෙන සංවිධාන (බ්‍රිතාන්‍යයේ) . ඒක නැතිව කාබනික ලේබල් නිකන් ගහල කිසි දෙයක් විකුනන්න බැහැ.

පින්තූරය අන්තර්ජාලයෙන් 

Saturday 5 June 2021

අරක්කු බෝතලයෙන් ශේප් වුනු කළු රන්ජි ගේ සුදු පොත


ලංකාවේ සිට ඉරිදා උදයේ පැමිණ  දෙපැයක විරාමයකට පසු  මම සූට්කේස් දෙක අස් කරන්නට ගතිමි. ශ්‍රී ලන්කන් ගුවන් සේවයෙන්,  කටාර් එයාවේස් තරම් බර කිලෝගණනක්  නොදෙන  නිසා ගෙන ඒමට ගත්  සමහර දේ සුපුරුදු පරිදි දමා  එන්නට සිදු වුනි. ඔය අතරේ ගේන්නට අමතකු වුනු  වැදගත් දෙයකුත් තිබුණි.    
බිරින්දෑතුමී  පළමුවෙන්ම  ඇහුවේ ඒ ගැනය. 

"කෝ තුනපහ."

"මළ කෙළියයි, තුනපහ ගේන්න අමතක වුනානේ".

 මම ඇයට අමාරුවෙන් ඔබාගෙන ආ අනිකුත් තෑගී පෙන්වූයෙමි.

" මේ තෑගී (ඇඳුම්  වගයක් ගෙනාපුවා) , මේ කජු , ලෝකේ හොඳම කජු. මල්ලිගේ වයිෆ් කිරි ටොෆි, අලුව දුන්න. අක්කා මුං කැරලි දුන්න.  හේමාලි ඉස්සෝ, මාළු හෙම දුන්න." 

 "ඉතින් ඒවාට  ලොකු ඉඩක් ගිහිල්ල නැහැනේ. මම ඔයාට කීවේ හොඳ අලුත් තුනපහ ටිකක් ගේන්න කියලනේ. මේ කඩවල පරණ ඒවා කන්න පුලුවන්ද?" 

එයාගේ සූදානම  ගේමටය. ඉනෙස් කොහොමටත් ඉන්දියන් කඩවල තුනපහ ගැනීමට කැමැති නැත. ඈ කියන්නේ ඒවා හදා ඇත්තේ වර්ණ ගැන්වෙන රසායන, රස කාරක  ආදිය දමා බවය. තුර්කි කඩවල විකුණන රතුම රතුපාට මිරිස් සහ කෑලි මිරිස් තද රක්ත වර්ණයකින් ඇත්තේ එබැවිනි.

මිත්‍රවරුනි, කලින් ලිපියේ ලියූ පරිදි ජර්මන් අයට බුද්ධාගම කියා දීමට යාම පමණක් නොව  තුනපහ දැමූ  කෑම කන්නට දීමද පසුව ප්‍රශ්න  ඇති කරන  දේ බව  හිතට ගන්න.  යූ ටියුබ් අම්මලා ගේ පිහිටෙන් ඉනේස්ට දැන් මටත් වඩා හොඳට තුනපහ දමා ඉවිය හැකිය. ප්‍රශ්නය වන්නේ  දැන් ටික ටික ජර්මන් කෑම වලටද ඒවා එකතු වීමය.  

"ඉතින් ඔයා කියන්නේ කිලෝ දෙක තුනක් ගේන්න නේ. කාටද ඕවට ඉඩ තියෙන්නේ" මම ශේප් එකේ කියුවෙමි.

"ඉඩ, ඉඩ මම හොයල දෙන්නද?  මේ පොත් මොනවාද, ඕව බර වැඩියිනේ .  ඔයා ගිය පාර ගෙනාව ඒවත් කියෙව්වද තවම.  මේ පොත් මොනවාද , ගොඩක් ලොකු ඒවා. "

ඒ පොත් තුන හතර ටිකක් ප්‍රමාණයෙන් ලොකු බව ඇත්තය. පොඩි පොත් කියවන්න කියා නියමයක් මා දන්නා තරමින් නැත. 

"ඔයාට තේරෙන්නේ නැහැ  අනේ. මේ කාලේ පොත් ගේන්නේ කියවන්නම නෙමේනේ. ඕව කවද කියවන්න බැරිද? ඒ වගේද මම ඒවා දෙපැත්තෙනුයි , උඩිනුයි  තියල, කෝපි කෝප්පයක් හෙම ළඟින් තියල, ෆේස්බුක් එකේ ෆොටෝ එකක් දැම්මම හොඳටම ඇති, කාටද ආඩම්බර"

"එතකොට දැන් ඔයා  ෆේස් බුක් දාන්නද මේවත් ගෙනාවේ " ඉනෙස් ගේ මූණ දැන් දෙහි මිරිකා හැරි  ලෙමන් ලෙල්ලක් වගේය.

"අපෝ නෑ , ඒවා මේ ගුණරත්න  අයිය හම්බවෙලා කරේ ගහපුවනේ. හොඳ පොත් ටිකක් කියල තමයි දුන්නේ. මතකනේ අර අපි ගිය සැරේ ලුණුගල ගිහිල්ල හම්බ වුනේ "

"මට මතකයි, ඒත් මේ  පොතේ ලොකු" 

"ආ ඒක මේ අම්බලවනර් සිවානන්දන් කියල  දෙමළ  ලේඛකයෙක් ගේ හොඳ පොතක්. එයාගේ ඉංග්‍රීසි පොත තියනවා මම අරන් දෙන්නම් ". වැඩේ  ශේප් කර ගන්නට කීවෙමි.
 
"එතකොට මේ කළු එක්කෙනක් ගේ පොතක් තියෙන්නේ. ඒකත් ලොකු වැඩියි.  ඒ කවුද ලංකාවේ  මැන්ඩෙලා ද " ඒ කියන්නේ කළු රන්ජිත් ගැනය. 

"ඒකනම් එච්චරම  ෂුවර් නැහැ. එයා මේ හැමෝටම උදව් කරන කෙනෙක් ලු. පොතේ නම කළු රන්ජිත් සුදු මිනිහෙක් (මේක මම කීවේත්  ඉංග්‍රීසියෙන් ඈ - Black Ranjith is a white man)"

"මොකක්ද ඒකෙ තේරුම. එයා අර ඉන්දියාවේ ලංකාවේ වගේ  බ්ලිච්නුයි අරවයි මේවයි ගාල හම  සුදු කරගෙනද? දැන් පිරිමින්ටත් ඒ පිස්සුවද "

මා කළ බරපතල වැරැද්ද මට තේරුනේ එවිටය.   

"මේකයි, දැන් ඔය කළු කියල තියෙන්නේ ඉතින් පාටින් කළු වුනත්,  එයා ඇත්තටම මුළු හදින්ම  සුදුයි කියල. ඒ කියන්නේ මේ ඔයා වගේ සුදු මිනිස්සු ගැන නෙමේ මේ කියල තියෙන්නේ.  සුදු නමින් ඇඟවෙන මේ හොඳ මිනිසුන් සමූහයක් ගැන. හැමෝටම උදව් කරන හොඳ කරුණාවන්ත මදර් තෙරේස වගේ කෙනෙක් ගැන"

එයාගේ ඇස් දෙක ජම නාරං ගෙඩි දෙකක් සේ විශාල වූ  සයිස් එකෙන්ම මට තේරුණේ  මම තවත්  දිගින්  දිගටම ඇන ගනිමින් සිටින බවය. 

"ඔයා කොහොම කීවත් ඕක වර්ණවාදී  (racist) කතාවක්  නේ.  ඕක ලියපු මනුස්සය දන්නේ නැත්ද මේ දවස් වල ලෝකේ බීඑල්එම් (Black Lives Matter)  කියල ව්‍යාපාරයක් යනවා කියල.  ජෝජ් ෆ්ලොයිඩ් මැරුවට පස්සේ. එහෙම තියෙද්දී ද ඕව ලියන්නේ"




සාමාන්‍යයෙන් වාද වල එල්ලී එල්ලී යන මම  මේ වාදයෙන් ගැලවෙන මගක්  කල්පනා කරමින් සිටියෙමි. 
  
"නැහැ මේකයි ලියපු කෙනා වැඩිය ඉංග්‍රීසියෙන් කියවන්නේ නැතිව ඇති. එහම නැත්නම් අර මගේ පොතේ පිට කවරේට උනා වගේ ප්‍රකාශක තුමා කියන්න ඇති මෙහම ටයිටල් එකක් දැම්මේ නැතිනම් ලංකාවේ පොත විකුණන්න බැරි වෙයි කියල. "

"ඒ කියන්නේ අර ඔයාගෙම යාළුවෙක් කීවේ  ආසියාවත් හරිම වර්ණවාදී කියල. සුදු අයට බැන්නට. ඒක ඇත්ත. ඒක නෙමේ ඔයා  අළුත් ගම්මිරිස් ගෙනෙල්ලත් නැහැ."

මම දැන් තව තවත් එරිලාය. ගම්මිරිස් ගෙනෙන්නටද අමතක වෙලාය. පොත දුන්නාට  මම දැන් ගුණරත්න අයියාට හිතින් බැන්නෙමි .  

හදිසියේම වාසනාව  එලියට පැන්නේ බෝතලයක් ලෙසින් ය. අමර පලිහවඩන නමැති මගේ අතිජාත මිතුරු තෙමේ යන්නට කලින් දවසේ කුමුදු විජිත් සමග  පැමිණ හොඳ වර්ගයේ එක්ස්පෝර්ට් ක්වොලිටි  අරක්කු බෝතලයක් දී ගියේය. පින්තූරයේ  ඇත්තේ එයයි. 

"මේක කාටද"
" ආ ඕක පලිහවඩන දුන්නේ. ඔයාගේ අම්මටයි තාත්තටයි දෙමු. අප දෙන්නට විපුලි එක්ක බොන්න  මම තවත් ඕල්ඩ් ඇරැක් එකක් ගෙනාව."

පලිහවඩන  එදා ආවේ උන්දැගේ ආදරණිය මවද එතරම් හොඳ තත්වයකින් සිටියදී නොවන බව පසුව දැන  ගතිමි.  ඌ එතරම්ම  හොඳ බොක්කකි. මට පසුව කුමුදු විජිත් ගෙන්  ආරංචි වුනේ ඒ සුන්දර කරුණාවන්ත මාතාව අවසන් ගමන් ගිය බවය. අමරයා කවදාවත් පෞද්ගලික දේ  නොකියන නිසා අපේ විදුහලේ  83 ගෘප් එකේද ඒ බවක් නොකියැවිණි.  

මම කිහිප වරක්ම අමරගේ උඩහමුල්ලේ නිවසට ඒ ලෙවල් කරන කාලයේ ගොස් ඇත්තෙමි. අපේ දේශපාලන වාද විවාද බොහොමයක් ගියේ එහිය. තමර අයියා සහ ඔවුන්ගේ නිවසේ  සිටි සේවකයෙකුද මේ විවාද වලට  වරෙක දෙවරක  හවුල් විය. සෝවියට් දේශයට ආ පසු ලෙනින්ගේ හිස ඇඹු පිළිරුවක් ඔහුට දෙන්නට මම එහි ගියෙමි. අමරගේ මව මට දිවා  ආහාරය දෙන්නට  හරියට යමක් නැතිය  කියා බිත්තර දෙකක් එවෙලේම බැද්දාය. එළවළු මාළු පිණි  හතක්  අටක් පිඟාන පුරා තිබියදීත් කන්නට යමක් නැත්තේ ඇයිද යන්න මට වැටහුනේ නැත. සෝවියට් දේශයේදී අපි කෑවේ  මසුයි බතුයි පමණක් බවත් කෙල්ලන් නම් මාළු මිරිස් හෝ බීට් රූට් වැනි දේ ඉවූ බවත් මට මතකය.  

සමහර විට මගේ මවද මම කෝල් කරන විට එවැනිම  කතා කියයි. 
"අද කන්න  හරියට මුකුත් නැහැ."
" ඇත්තට, අනේ, අම්මා  මොනවාද කෑවේ"
 
"කරෝල බැදලා , සම්බෝල එක්ක මේ , පරිප්පු වලට තම්පලා දාල , තව බටුද මොනවද, කොස් ඇට මාළුවකුත් තිබ්බද කොහෙද, අනේ කන්න බැහැ"

"ඉතින් අම්මේ ඔය හොඳයිනේ. මම මේ පොඩි සැන්ඩ්විච් එකක් දවල්ට  කාල රෑට යන්තන් චිකන් එක්ක බත් ටිකක් කෑව "

මට හිතන්නේ අපි එංගලන්තයේ,  ලංකාවේ තරම් හොඳට එළවලු හතරක් පහක් සමග බත් නම් නොකන  බවය. කොහොමත් එහෙම හදන්නට වෙලාවක් ද නැත. අපි වෙන අනම්  මනම් කනවා  මිස බත් හැම වෙලේම කන්නේද  නැත. ඉනෙස් කොහොමත් විනාඩි තිහෙන් හතළිහෙන්  හදා ගන්නට පුළුවන් කෑම වලට වැඩි කැමැත්තක් දක්වන්නීය.

සෝවියට් දේශයේ සිටියදී උදේට පොඩි  කැන්ටිමෙන් බිත්තර නිතරම කන නිසා මට බිත්තර  වැඩිය දිරෙව්වෙ නැත. අමරයා මට දුන් බැදපු බිත්තරය එදා  ඩැහැ ගත්තේය.

ඉතින් පළිහවඩන ගේ ඒ කරුණාවන්ත අම්මාද නික්ම ගොස්ය. අමරයා ගේ දැන් ෆෙමස් අක්කා ඒ දවස් වල වෛද්‍ය විද්‍යාලයේය. යන්තමින් හිනාවීගෙන කාමරයට මාරු වෙන නිසා මට ඒ දවස්  වල හිතුනේ වෛද්‍ය විද්‍යාලයේ නිසා හෙන ආඩම්බර ඩයලයක් වන්නට ඇති බවය.  පහුගිය කාලයේ  ඇගේ  නම හැම  වෙබ්සයිට් එකකම වාගේ දුටු නිසා දැන්නම් කොහොමත් ෂුවර් නැත. නමුත් පලිහවඩනලා, ගුරුතුමියක සේ  මා දැන  සිටි ඔවුන්ගේ  මවගේ නික්ම යාම ඉතාමත් නිහඬව විඳ දරාගෙන ඇත. මම ඒ ගැන අමරයාට කතා කොට දෝස් මුරයක් දැමුවෙමි. 

"අපට එන්න බැහැ  තමයි. ඒත් උඹට මට කියන්න තිබ්බ. ඇන්ටි  හදපු තේකක් හරි බීලා තියනවා. අනික මට බැදලා දුන්  බිත්තරේ උඹ ඉස්සුවා."

 ඌට ඒක මතක නැත.     

බිරින්දෑ ගේ මුහුණේ මල් හතයි තවත් එකක් පිපුනා වගේය. ඉනෙස් ගේ අම්මයි තාත්තායි කියන්නේ ලෝකේ හොඳම රම්  එක ලංකාවේ  අරක්කු බවය. ඔවුන්ට එය ඒ තරම්ම ප්‍රිය ජනක බීමකි.   අනික ස්ට්‍රෝබෙරි , තේ, කෝපි කේක් ආදී හැම එකටමත් එය  දමති. බිරින්දෑ ට පොත ගැනද අමතකය.

ඉතින් එදා දවසේ පලිහවඩනයාගේ අරක්කු බෝතලය මගේ ජාම බේරුවේ එසේය.

ඊයේ පෙරේදා  ඉනෙස් කවුදෝ අඹරා දුන්නු  තුනපහ බෝතල් දෙකක්  ගෙනාවාය.

"මේ බලන්න සුවඳ "

"කොහෙන්ද මේ " මම ඇසුවෙමි.

"අපේ ලැටිමර් එකේ (ඉනෙස් රැකියාව කරන විදුහල)  වැඩ කරනවා බංග්ලා දේශ ලේඩි කෙනෙක්. එයාට මම කිව්වා ඔයා මේ පාර ලංකාවට  ගිහින් එනකොට තුනපහ ගෙනාවේ නැහැ කියල. එයාට අළුත් ඒවා තියනවා කියල මේවා ගෙදරම අඹරල ගෙනත් දුන්න "

"හා හා ඒ කියන්නේ ඔයා දැන් බංගලා දේශ කට්ටියගෙන්ද  තුනපහ ගන්නේ . මම ලංකාවෙන්  ගෙන්න ගන්න හැදුවේ මල්ලිට කියල "

"ඕගොල්ලන්ගේ ලංකාව  බංග්ලා දේශයෙන් ණය ගන්නවනම් මම තුන පහ ගත්තම මොකද "

මම ආයෙත් පාරක් බ්ලාස් වී ගියෙමි.

මම කියන්නේ මේ පත්තර කාරයන් හා මාධ්‍ය නිසා කිසි දෙයක් කර ගන්නට බැරි  බවය. වහාම ඔය වගේ නිව්ස් පිටට දෙන දේශද්‍රෝහී විදේශ මාධ්‍ය වේදීන් ට දඬුවම් කළ යුතුය. නැත්නම් ඉදිරියේදී අපට මුහුණවල්   මාස්ක් දෙකකින් පමණ වසාගෙන ඉන්නට වනු ඇත. 

 

Wednesday 26 May 2021

ඔබ සැමට ප්‍රීතිමත් වෙසඟක් වේවා


සෙනසුරාදා ඉනෙස් සුපර්මාකට්  ගිහින් බඩු  වගයක් ගෙනත්. පැස්ටා හාල්, කෑම ජාති අනම්  මනම්.   ඊට කලින් දවසෙත් බඩු ගෙනාව නිසා මම ඇහුවා මොකෝ මේ වැරදිලාද ආයි ගෙනාවේ කියල. 
එයා අහනවා 
"ඇයි මනුස්සයෝ මතක නැත්ද අද කවද්ද කියල?"
මම කිව්වා මතක නැහැ කියල. 
එයා කියනවා, 
"ඇයි මනුස්පයෝ අද වෙසක් නේ , අද බණක් තියනවා පන්සලේ, හාමුදුරුවෝ එන්න කිව්වා, බණ අහන්න  "
"අම්මට සිරි වෙසක්ද "
ඔන්න ඉතින්  බලන්න ජර්මන්  කට්ටියට බුද්ධාගම අඳුන්වල දීල කරගත්ත වැරැද්ද.

මම හිතන් හිටියේ මැදිවියට ආවහම අපේ අම්මල හෙම තමයි පන්සල් යන්න ලැහැස්ති වෙන්නේ කියල. බලාගෙන ගියහම  ඒකත් යුනිවර්සල් ෆෙනොමෙනා එක්ක හෙවත් විශ්වීය පුරුද්දක්ද කොහෙද?
 
ඉතින් මම කිව්වා,
"දැන් ඉතින් මොකෝ කරන්නේ , මම  පොරොන්දු  වුනානේ නන්දන යි යමුනයි එක්ක ඇවිදින්න යන්න , ඔයත් එනවනේ. "
ඉනෙස් කියනවා,   එයත් ඇවිදින්න යන්න ඇවිත් ඊට පස්සේ  පන්සල් යන්නම්ලු.

සෙනසුරාදා ඇවිදලා  ඇවිල්ල මේන්  මෙයා පන්සල් යන්න හදනව. 

අපි නියම  බුද්ධාගමේ තුන්දෙනා පුටු උඩ  වැටිලා මහන්සියට. තව කොහේ යන්නද? හොඳ වෙලාවට නන්දනට මතක් වුනා වෙසක් තියෙන්නේ 22 නෙමේ 26 කියල.

හාමුදුරුවන්ට දවස වැරදිලා කියල යන්තම් බේරුනා. 



මේකයි, අපි එංගලන්තේ බොරිස් ජෝන්සන්ට කොපමණ බැන්නත් මුලදී හරි ක්‍රියා මාර්ග ගත්තේ නැහැ කියල මිනිහ පිළිවෙලකට එන්නත් දෙන්න ගත්ත. මුලින්ම  සෞඛ්‍ය සේවයේ (වෛද්‍ය, හෙදි සහ අනිකුත්ඕ නෑම සේවයක්)  සහ ඉදිරි පෙළ කෝවිඩ් මර්දනය වෙනුවෙන්වු වැඩ කරන අයට,  ඒ එක්කම හෘද රෝගීන්ට, ඇදුම තියෙන අයට. ඊට පස්සේ,   අවුරුදු 80න් උඩ මහලු අයට  එන්නත ගැහුවා.. ඊට පස්සේ වයස 60-70. ඊට  පස්සේ වයස 50-60.  ඉන් පස්සේ අපි වගේ 50 න් උඩ. අගමැතිත්  වෙලා මිනිහත් ගහගත්තේ එතකොට.    මේ රටේ වයසක මිනිස්සු තමයි රට හදන්න උදව් කළේ. අනුන්ගෙන් සූර කාල හරි නැතා හරි. උන් උන්ගේ වයසක එවුන්ට තමයි ඉස්සෙල්ල සලකන්නේ. රටට දහඩිය හෙලපු අය. ඒ අතරට අපටත් වැදුන. සුදු අයට විතරක් කියල එන්නත් ගැහුවේ නැහැනේ. 

ශ්‍රී ලංකා රජය මුලින් හරියට කළා. කොළඹ පැතිරෙන කොට කොළඹ අයට එන්නත් ගැහුවා. ඒකෙන් පැතිරෙන එක අඩු වුනානේ. ඒකම තමයි අනිත් රටවල් කළේ . පැතිරෙන පැති බලල ඒවල එන්නත  ගහල ව්‍යාප්ත වීම අඩු කළා.

අනික තමයි කොරෝන වයිරසය නොයෙකුත් විකෘති  හදනවනේ. (mutation ) ඒ වයිරසයේ හැටි.  ඒක සාමාන්‍ය දෙයක්. මට වැඩිය ඒව ගැන  දන්නා අය මේ ෆ්‍රෙන්ඩ් ලිස්ට් එකේ ඉන්නව. හැබැයි නවතම ප්‍රභේද ඔය විකෘතිය හරහා එනවා (New variants of a virus strain emerge through the process of mutation). ඉන්දියානු , බ්‍රිතාන්‍ය, දකුණු අප්‍රිකා වගේ. ඒවා ටිකක් සැරයි.

ඉතින් දැන් වෙනම  එන්නත් ගිහින් ගැහුවට එච්චරම වැඩක් නැහැ තමන් ඉන්න පළාතේ ආසාදිතයන් වැඩි නම්. මොකද වෙන ප්‍රභේදයක් හැදෙන්න ඕන තරම්  අවකාශ තියනවා.  හොඳම වැඩේ තමන් හැසිරෙන ගම නගරයේ හැමෝටම එන්නත ගහන එක.
ඊටත් වැඩිය හොඳ වැඩක් තමයි, කෝවිඩ් හැදිලා මැරෙන්න වඩා ඉඩ තියෙන හෘදයාබාධ රෝගීන්, පිළිකා තියන අය, අඩුම රෝගීන් , අධික රුධිර පීඩන රෝගීන්ට මුලින් ගහන එක, රට වෙනුවෙන් දිවිය කැප කරපු විශ්‍රාමික අයට එන්නත ගහන එක. මේ වෙසක් එකේ ඒක හොඳ වැඩක් නෙමේද? ධර්ම රාජ්‍යයක් වශයෙන්, බෞද්ධයන්   වශයෙන්.  වැඩිහිටියෝ මහලු නිවාස වල දාලයන  සුද්දෝ, යුරෝපියයන් ඒක  කරනවනම් ධර්ම රජයකට කරන්න බැරි කමක් නැහැනේ. ශිෂ්ඨසම්පන්න මිනිසුන් වශයෙන් කරන්න බැරි දෙයක් නෙමෙයි. 

අන්තිම වශයෙන් මගේ බිරිඳ  අසනීප වෙලාවෙත් මේක ලිව්වා. කොරෝනා හැදුනු පසු මොන බෙහෙත් ද ගන්නේ -ආයුර්වේද එපාද  කියල ලිපියක්. කෝවිඩ් හැදිලා කියල දැනුනොත් ඇඳෙන් බහින්න එපා. ඇවිදින්න එපා. වැසිකිලි කැසිකිලි යනව ඇරෙන්න මුකුත්ම  කරන්න එපා. අමාරු වෙනවා.. එකපාරට මැරිලා වැටෙන්න තරමට හතිය, මහන්සිය වැඩි වෙන්න පුලුවන්.   දීර්ඝ ගමන් වුනත් ඉතාම වෙහෙසකාරී දෙයක්. ඇඳේම ඉන්න.   කෑම ගෙනත් දෙන්නවත් කෙනෙක් නැත්නම් ඉතින් කොහොම හරි රෝහලකට යන්න වෙනව.


ඔබ සැමට සුබ වෙසඟක්  

පින්තුර ගත්තේ මම. මේ පාර  ලංකාවට ගිය වෙලේ. එක්තරා දරුණු  කාලයක පාරවල් වල  අතුරුදහන් වුනු  තරුණ තරුණියන්  උදෙසා හදපු පන්සලක්ලු. හාමුදුරුවරු නැහැ. ඒක බලාගන්නේ  දායකයන් පිරිසක් විතරයි. බොල්ගොඩ පාලමෙන් තමයි තරුණ තරුණියන්ව දාල තියෙන්නේ. දුක විඳපු රටක්. දුක් දන්නා රටක්. ශිෂ්ඨසම්පන්න වෙන්න කාලේ හරි නේද?










Monday 24 May 2021

එංගලන්තේ එන්නත් පෝලිම


මීට කලින් ලිව්ව කෝවිඩ් කතාවලට දැන් තුන්වෙනි රැල්ලකුත් එකතුවෙලා.  මේක මේ එන්නත් පෝලිම් ගැන අහපු කතාවක්. කීවේ යාළුවෙක් උනාට නම ගම විස්තර දාන්න එපා කීව නිසා එයාව  ඇම්ඩා කලා.
 
ඔන්න ඇම්ඩා  කෝවිඩ්එ න්නතක් ගහගන්න පුලුවන්ද බලන්න වෙබ් අඩවියක ලිපිනය දාපු එයාගේ ගම පැත්තේ මධ්‍යස්ථානයකට ගිහින්. පෝලිම තියෙනවලු කිලෝ මීටරයක් විතර දුරට. පන් මල්ලක එළවලු ටිකක්  දාගත්ත මැදිවියේ අක්ක කෙනෙක්,  වයසක අම්ම කෙනෙක් එක්ක හිටියාලු පෝලිමේ අන්තිම කොනේ. ඔන්න ඇම්ඩා හිට ගත්තලු ඒ  පිටි පස්සේ.  ඒත් ඉතින් මගේ යාළු ඇම්ඩා ට එක තැන ඉන්න පුළුවන් එකෙක් නෙමේ. ඇම්ඩා ගේ පිටි පස්සෙන් අන්කල් කෙනක් ඇවිත් හිට ගත්තම,  අන්කල්ටයි අක්කටයි දෙන්නටම එයාගෙ පෝලිමේ තැන තියා  ගන්න කියලා ඇම්ඩා ගියාලු ඉස්සරහට,  පෝලිමේ මුල හොයාගෙන   නර්ස් නංගිලා දිහත් බලල එන්න හිතාගෙන.

මෙන්න බොලේ පෝලිමේ ඉස්සරහ තවත් පෝලිමක් යනවලු අනිත් පැත්තට.  ඇම්ඩා ටිකක් ඉස්සරහ හිටපු ලස්සන ඇන්ටි කෙනක් ගෙන් ඇහුවලු මොකද්ද මේ අනිත් පෝලිම කියල. ආ "ඒ මේ නෑදෑයන්ගේ යාලුවන්ගේ සපෝටර් ලගේ පෝලිම" නේ කියල. ඇම්ඩා ඇහුවලු ඇන්ටිගෙන්. "ඉතින් මේ ඒකත් තියෙනවනේ කිලෝ මීටර් භාගයක් විතර" කියල.
 
"ඒකනේ අනේ , හොඳ වෙලාවට අපේ දුව මේ අවුරුද්දේ මෙඩිකල් තේරුණා. මිට පස්සේ අපට පෝලිමේ ඉන්න ඕනේ නැහැ" . කියල තොල් දෙකත් උළුක්කු කරලා ඇන්ටි කියපි.

ඉතින් ඇම්ඩා ෆෝන් එක පීර පීර හෙව්වලු  කවුද ඉන්නේ දන්නා අඳුනන සවුක්කිය සේවකයෙක්,  දේශපාලකයෙක් කියල. හොඳ  වෙලාවට මතක් වුනාලු  ඇම්ඩා ගේ කොල්ල බඳින්න ඉන්න කෙල්ලගේ අම්මගේ නංගි ගේ බාල කොලූ පී එච් අයි මහත්තෙයක් කියල. ඇම්ඩා කෝල් එක ගන්න හදන කොටම මෙන්න අර  "නෑදෑයන්ගේ යාලුවන්ගේ සපෝටර් ලගේ " පෝලිම ළඟ හෙන කලබලයක් ලු.  ඒ ගමන ඇම්ඩා කෝල් කිරිල්ල පැත්තකට  දාල ඒක බලන්න ගියාලු. කෙහෙවලු පටලවාගෙන කලිසම් බෙල්ට් කඩාගෙන යනවලු දාර වලියක්. වලියක් කොතනද ඇම්ඩා එතන කියාගෙන ඇම්ඩාත් දැන් එන්ටර් වෙන්නලු යන්නේ. කාගේ හරි වලියක් නේ කියල.  ඔන්න එතකොට පොලිසියත්  ආවලු එතනට.

කවුද බූරුවෙක් පොලිසියට කතා කරලා නේ කියල හිතින්  බැන බැන ඇම්ඩා පාර අද්දර ගැට්ටක් උඩට නැග්ගලු වලිය බලන්න. ඒ ගමන පොලිසියේ ඇත්තොත් ගැට්ට උඩටම නැගල හරි බරි ගැහිලා වලිය බලනවලු. හොල්මන් වෙච්ච පාර ඇම්ඩා ගේ පොලිසි බයත් නැතුව ගිහින් ළඟම  ඉන්න රාළහාමි ගෙන් ඇහුවලු බයාදු ලීලාවක් දාල  
"මේ  රාළහාමි දෙකක් ඇදල දෙන්නැද්ද මුන්ට මව්කිරි මතක් වෙන්න. මෙහම රණ්ඩු  කරනවද නේද " 

රාළහාමිත් පුදුමෙට වගේ ඇම්ඩා එක්ක කතා කෙරුවලු.
"මොන පිස්සුඩ ඕයි අපට කියල තියෙන්නේ බලාගෙන ඉඳල පොලොසියට ගිහින් වාර්තාවක් ලියන්න විතරයි. හොඳට එන්නත් දුන්න කියල, ඕවට අත දාන්න ගිහින් කන්දකාඩු , කිලිනොච්චි පැත්තේ කොරෝනා ඩියුටි දැම්මොත් හෙම "

ඇම්ඩා ත් ඇරියේ නෑලු , "ඉතින්  මේ වලිය රාළහාමි තදයි වගේනේ  "

රාළහාමිට ඒ පාර තදවෙලා කීවලු 
"තමුසේ දන්නවද ඒ නිත්‍යානුකුලව බැණ අඬගහ ගන්නේ කවුද කියල. දිස්ත්‍රික් මන්ත්‍රී ගේ සපෝටර් තුමයි, එම් ඕ එච් ගේ අක්කගේ මහත්තයයි , පලස්සබා මන්ත්‍රීගේ බාප්පයි,  දිස්ත්‍රික්ගේ හොස්පිටල් එකේ අධ්‍යක්ෂක  ගේ   අයියයි ආ තව නර්ස් නෝනගේ අක්කගේ  දුවයි. ඒ ගොල්ලෝ ඔය සාකච්ඡා කරනවා කවුද වඩා සම්භාවනීය, කවුද ඉස්සෙලම එන්නත  විද ගන්නේ කියල. මේවා අපට අයිති වැඩ නෙමේ විසඳන්න. අර පෝලිමේ ඉස්සරහම පාර දෙණිය මහත්තයාගේ සංගමේ ප්‍රබල  නියෝජිතයෙක් ඉන්නවා. එයාගේ පවුලේ විසි දෙනාට ගැහුවට පස්සේ එයා ඕක විසඳයි කියල.  "

එහෙම කියල පොලිසිය අකුලාගෙන ගිහින්.  මගේ යාළුව හෙවත් අන්වර්ථ නාමයෙන්  පෙනී හිටින ඇම්ඩා  මේ නහින දෙහින කාලේ මොන එන්නත්ද කියල ඇළ ගාව ගෙදර කසිප්පු වීරේ ගෙන් කසිප්පු වඩියක් අරන් වයිරස් යන්න කටත් හෝදගෙන,  ධම්මික පැණි කුප්පියකුත් වැඩි ගාණට අරන් කුරුඳු සිගැරට්ටුවකුත් පත්තු කරගෙන ගෙදර   ඇවිත්.  

ඉතින් ඔන්න  මේ විස්තර  ලීවම සමහර නංගිලා බනිනවා පිටරට වලට ගිහින් තමන්ගේ රට සවුත්තු කරනවා කියල. එහෙම එකකට නම් නෙමේ ලිව්වේ. 

මමත් ඉතින් ලංකාවේ හිටිය පසුගිය මාසේ,  මේ අධිරාජ්‍යවාදී සුද්දන්ගේ ජරා කම කියන්නේ ජීපී ගේ  - ඒ කියන්නේ අපේ දොස්තර  -  සේවයෙන් මට මෙසේජ් දෙකක්ම එවල දෙවෙනි එන්නත ගහ ගන්න එන්න කියල. අපි දුඹුරු  හින්දද  මන්ද ඇස්ට්‍රා සෙනෙකා එක දෙන්න තමයි එන්න කියන්නේ.  බලනකොට වයිෆ් ටත් ඒකමනේ . මාව බැන්ද හින්ද වෙන්න ඇති කියල හිත හදා ගත්ත.

ලංකාවෙන්  ආවට පස්සේ එතනත් වර්ණභේදය. බෝඩර් එකේදී ප්‍රශ්නම දෙකක් ඇහුව. පීසීආර් එක කලාද? කෝ මොබයිල් එකේ ඊමේල් එක පෙන්නන්න කියල. යන්න කිව්වා. ඊට පස්සේ ඉතින්  අධිරාජවාදී සුද්දෝ දවස් දහ හතරක්ම මට ගෙදරින් එළියට යන්න එපා කිව්වා. පීසීආර් දෙකකුත් කරන්න වුනා. අර ඉන්දියන් කාරයෝ වගේ හොර එකක් හදා ගෙන  දෙන්නවත් වෙලාවක් නැහැ.  

ඒ නිවාස  අඩස්සියේ ඉඳල ඊට පස්සේ ජීපී සේවයට  කෝල් කලහම විනාඩි දහ අටක්ම ඉන්න  උනා දුරකතනයේ ෆෝන්  එකේ එල්ලිලා. අනිවාර්යයෙන්ම දන්නවා ඇති මේ ආසියානු එකෙක් තමයි කියල. ඒක තමයි එච්චර  වෙලා ගත්තේ. ඊටත්  පස්සේ දවස් තුනක්ම ගත්ත දෙවෙනි එන්නතට අපොයින්මන්ට් එකක් දෙන්න. මගේ නම බලල තේරෙන්න ඇති ආසියාතිකයෙක් කියල. තනිකරම සුදු ජාතිවාදය. මගේ ජීපි සහ ඒකෙ වැඩ කරන අයනම් ටැමිල් හැබැයි. නමුත් සුද්දන්ට නේ වැඩ කරන්නේ.
 
ඔන්න ඉතින් ඉරිදා දවසේ එන්නත ගහගන්න ගියා. පලවෙනි එක ගහල තියෙද්දිත් පෝලිමේ ඉන්න කීවනේ . කළු තරුණියෝ දෙන්නෙක්  තමා  එතන පිළිගැනීමේ  නිලධාරිනියන්. සුද්දන්ට කත් අදින නිසා මට පෝලිමේ පිටි  පස්සටම යන්න කීව . එකසිය පනහක් විතර හිටිය පෝලිමේ. මාව සුද්දන්ගේ පිටි පස්සටම දැම්ම. මගේ ඉස්සරහ හිටියේ  ස්පාඤ්ඤ ගෑනියක් හැබැයි. පෝලිමේ පිටි පස්සට ඊට පස්සේ ටික ටික සුද්දෝ, කළු අය එහෙම එකතු වෙන්න ගත්ත. ඔත්තු බලන්නද මන්ද. පැය භාගයක් ම පෝලිමේ හිටිය මාත්. හරි පිළිවෙලට පෝලිම ගියා. කොහෙන්වත් පනින්න විධිහක් නැහැ. සුද්දන්ට පුලුවන්ද වැඩක් කරන්න හරියට.

ඇතුලට යන තැන කළු  අප්‍රිකානු සම්භවයක් තියෙන සුද්දන්ට කත් අදින එකෙක්  තමා හිටියේ. නැත්නම් ඌට ඕන තරම් පුළුවන්නේ මාව පෝලිමෙන් පිටට අරගෙන එන්නත කලින්ම ගහල යවන්න. කළේ නෑ. 

ඉතින් පෝ ලිමේ ඉඳල අධිරාජ්‍යවාදී එන්නත ගහ ගත්ත. බ්ලඩ් ක්ලොට් හැදෙන්නේ නැත්ද කියල ඇහුවම කියනව අවුරුදු 30ට පහළ අයට විතරලු එහෙම  හැදෙනවා කියන්නේ. බොරුවක්ද කොහෙද?
එන්නත ගැහුවෙත් කළු දොස්තර  ගැහැණු ලමයෙකුයි සයිප්‍රස් වල හෙද නංගි කෙනෙකුයි.  මේ අධිරාජ්‍යවාදී සුද්දෝ  තවම මේ මිනිසුන්ව හූර කනවනේ.

සයිප්‍රස් නංගි ගෙන් ඇහුවා ඇයි මෙහෙ ඉන්නේ කියල. එහෙ ජොබ් නැහැලු. ඒත් ඉතින් මෙහෙ ඇවිත් එන්නත් ගගහ  මෙහෙ සුද්දට කඹුරනවට වැඩිය  තමන්ගේ රටේ හිටියනම් මොකද මං අහන්නේ? (මං ගැන අහන්න ඔට්ටු  නෑ)

ඔන්න ඉතින් එන්නත  ගහගෙන ආව  ගිය සුමානේ . තවම නම් මුකුත් නැහැ. මට ලෙඩ වුනොත් හෙම සුද්දට එරෙහිව නඩුවක් දාන්න වන්දි ඉල්ලලා. 

 මේ ලිපිය චීන වාමාංශික නෝනලා මහත්තයල පොෂ් ඉංග්‍රීසියෙන් බුකියේ ලියන එකට විරුද්ධ නිසා සිංහලෙන්ම ලියල දැම්ම. 

Saturday 22 May 2021

වර්තමාන කෝවිඩ් තත්වය

මුලින්ම ලිවිය යුත්තේ මෙවැන්නක් ලිවීමේ පරමාර්ථය බිය ගැන්වීම නොවන බවයි. බ්‍රිතාන්‍යයේ පසුගිය මාස දෙකහමාරක තත්වය අසාමාන්‍ය විය. දිනකට එක්දහස් පන්සියක සිට දෙදහස දක්වා කෝවිඩ් වැළඳුනු රෝගීන් ප්‍රමාණයක් මිය ගියහ. නමුත් රටේ ජනතාවට එන්නත් දීම වේගවත් කිරීම හා   සමගාමිව ලොක්ඩවුන් ක්‍රමයද ක්‍රියාත්මක කිරීම මියයන ප්‍රමාණය හා ආසාදිත වන ප්‍රමානය අඩු වී තිබේ. එසේම  නිවෙස් වල හමුවීම් සීමා කිරීමෙන්, මංගල උත්සව ආදිය තහනම් කිරීම, පබ් වසා දැමීම  ආදී ක්‍රම පිලි පැදීමද මෙයට දායක වී තිබේ . කෙසේ වෙතත් ඉන්දියානු ප්‍රභේදය මේ තත්වයට කෙසේ බලපාන්නේද යන්න තවමත් කිව නොහැකිය.

ගිය අවුරුද්දේ මාර්තු වල ශ්‍රී ලංකාව කොවිඩ් තත්වය මැඩීම අතින් ඉදිරියෙන්ම සිටියත් නවසීලන්තය,  ජර්මනිය සහ බ්‍රිතාන්‍ය  වැනි රටවල්  කොවිඩ් මර්දනය හොඳින් කරන රටවල් ලෙස ඉදිරියේ තබා යුරෝපීය වාර්තාවක් එළි දක්වා තිබුණි. ඒ මන්ද යන්න ලංකාවේ බොහෝ අය ප්‍රශ්න කොට තිබුණි. සමහරු ශ්‍රීලංකාව එකට දමා ඕස්ට්‍රේලියානු වාර්තාවක් ද සකසා  තිබුණි. එහිදී පෙර කී යුරෝපීය වාර්තාවේ  සඳහන්  කොට තිබුනේ වසංගතය වැඩිවන තත්වයකදී තිබෙන ICU ඇඳන් ගණන, රටක සෞඛ්‍ය  ක්ෂේත්‍රය ට  එය මැඩීමට ඇති හැකියාව ආදිය ගැනද සිතා බලා මුල් වාර්තාව සැකසූ බවයි. ශ්‍රී ලංකාව  ජර්මනියටත් වඩා පහලට දැමුනේ එනිසාය. ඔවුන් නිවැරදි බව දැන් වැටහෙනු ඇත.  



එනිසා නැවතත් ලංකාවේ තත්වය දත්ත මගින් විමසා බැලුවෙමි. මෙහි ආර් R අගයන් ගැන 2020 මාර්තු මාසය කාලයේ ලියා ඇති ලිපි වල සඳහන් කෙරෙන නිසා ඒ  ගැන ලියන්නේ නැත. එකොනමැට්ටා ගේ බ්ලොගයේද R අගයන් ගැන ඇති තරම් ලිපි ලියා තිබේ. කෙනෙකුට මගේ බ්ලොගයේ යොමුවෙන්  ඒ පැත්තට ගොස් කියවා ආ හැකිය.

ශ්‍රී ලංකාවේ දත්ත මා ලබා ගත්තේ https://www.worldometers.info/coronavirus/ වෙබ් අඩවියෙනි. 

ඒ දත්ත විමසා බැලූවිට මැයි අග වනවිට R0 අගය 1.3 හා 1.5 අතර දෝලනය වන්නේ නම් ආසාදිත සංඛ්‍යාව එක්ලක්ෂ අසුදහසේ සිට අනූදහස දක්වා වනු ඇත. ජූනි 14 වනවිට මේ අගයන් දෙලක්ෂ විසි දහසත් දෙලක්ෂ තිස් දහසත් අතර වේ.  මීට ලියා  පදිංචි නොවූ සංඛ්‍යාවන් ද ඇතුලත් කළහොත් මේ ප්‍රමාණය මීට වඩා වැඩි විය හැකිය.   දින ගනනට සාපේක්ෂව අනුලෝමව වැඩි වීමක් පෙන්නුම් කරන්නේ තවමත් එන්නත් කිරීම් හෝ ලොක් ඩවුන් කිරීමේ බලපෑම මද බව නිසා විය හැකිය. 

මරණ සංඛ්‍යාවද වැඩි වන්නේ අනුලෝම වශයෙන් බව පෙනේ. දින හතකට  කට අටකට වරක් මරණ සංඛ්‍යාව එකවරම වැඩි  වේ. මේ පිළිගත හැකි තත්වය අනිකුත් බොහෝ රටවලද එසේමය.  මේ අනුව මැයි අග වන විට අසූවක් පමණ රෝගීන් දල වශයෙන් ජිවිත හැරයනු  ඇති බවත් ජූනි 14 වනවිට එම සංඛ්‍යාව 140 ක් 150 පමණ වන බවත් පෙනේ.  මේ තත්වය මග හැරිය හැකි යයි මට සිතෙන්නේ නැත. එයට හේතුව අප නොදන්නා සංඛ්‍යාවක් රෝගය වැළඳී ඇති බව පෙනෙන හෙයිනි.  අප නොදන්නා තවත්ශ්‍ සංඛ්‍යාවක්රී ද මිය යන හෙයිනි.  ලංකාවේ pcr පරීක්ෂණද එක පිළිවෙලකට කරන ලද්දක් ලෙස  මම නොදුටුවෙමි. ඒවා එහෙන් මෙහාන් මිනිසුන් නවත අහඹු ලෙස කරන බවක් දුටුවෙමි.  (මෙහෙදී මා වැරදි විය හැකියි)   පෙරටුගාමී සමාජවාදී පක්ෂය විසින් ද කිසියම් වැඩ පිළිවෙලක් ඉදිරිපත් කර ඇති  බව පෙනේ.  මේ වැඩ පිළිවෙළවල් ඉදිරිපත් කිරීමේ වරදක් නැත. නමුත් අඩු ආදායම් ලාභී රටක් ලෙස පූර්ණ ලොක් ඩවුන් කිරීමකට යාම හෝ ඇඳිරි නීති පැනවීම මගින් අඩු ආදායම් ලබන ජනතාව  දැඩි අපහසුතාවයකට පත්වීම ද දැඩි ලෙස කල්පනාවට ගත යුතු කරුණකි.

මගේ අදහස නම් ඇමරිකානු වාර්තාව කියන පරිදි ශ්‍රී ලංකාවේ දිනකට දහසක් පමණ මියයන තරමට තත්වයක් එළඹීමට ඉඩක් නැති  බවයි. ඇමෙරිකානු වාර්තාවට මට වඩා දත්ත තිබිය හැකි බව පිලි ගනිමි. නමුත් ශ්‍රී ලංකාවේ සෞඛ්‍ය සේවයේ කැපවීම, රෝහල් වල තත්වය ආදිය බොහෝ අඩු ආදායම් ඇති රටවලට වඩා ඉහල තත්වයක පවතී.

රුසියානු සහ චීන එන්නත්  කෝටි  දෙකකට මදක් වැඩි ශ්‍රී ලංකාවේ  ජනගහනයෙන් භාගයකට වත් ලබා දුන හොත් ඔය කියන තත්වය  ඇති වන්නේ නැති බව මගේ අදහසයි. මා  කියන්නේ පළමු එන්නතෙන් ද කොවිඩ් ව්‍යාප්ත වීම සෑහෙන්න මැඩ පවත්වන බවට සාක්ෂි ඇති බවයි..  මේ නිසා 140 කට මා අනුමාන කර ඇති දිනක මිය යන ප්‍රමානය ජූනි අග වනවිට 200-250 පමණ විය හැකි වුවත් බ්‍රිතාන්‍යය හෝ ඉතාලියේ වැනි තත්වයකට පැමිණීමට ප්‍රථම වළකා ගත හැකිවීමේ ශක්‍යතාවය වැඩිය. ඒ සඳහා රටම එකතුව වැඩ කිරීමේ අවශ්‍යතාවය බරපතල ලෙස මතුව  පවතී.  
ඇමෙරිකානු වාර්තාවේ වගුව (එකොනමැට්ටා පෙන්වූ පරිදි) 
     





මගේ පරණ ලිපි මේවාය. 

Wednesday 12 May 2021

"සමබිම" දීප්ති ගේ දියවෙන සටනක්ද


මම කාලයකට කලින් මගේ ලෝකයෙන් අහවල් ලෝකය හා ගෙල්මන් ගේ අරී අට මග නමින් ලිපියක් ලීවෙමි.ඒ "මගේ ලෝකයෙන් පසු ලෝකය" කෘතිය  පිලිබඳව පැවති  සංවාදයක් ගැන ලිපියකි. මේ ලිපියට පිළිතුරක් ලියන හපුගොඩ සහෝදරයා සැලකුවේ එය ඔහුට කරනා විවේචනයක් ලෙසය. මේ නිසා ඔහු අපූරු පිළිතුරක් දී තිබුණි.  ඒ පිළිතුරේ වැදගත්ම වාක්‍යය වූයේ මෙයයි. 


"මා පිටරට සිට මෙරට ට චන්ඩි පාට් දමන වමේ දේශපාලනයක ද නිරත නොවෙමි. මා ඉන්නේ මේ ගෙන්දගම් පොළොවේ ය. " (ම.හ.)

ඉන්පසු  ඔහු මෙසේද ලියා තිබුණි.
මා අසන්නේ ‘කුමන හේතුවකට හෝ ලංකාවේ භූමියෙන් වි-ප්‍රදේශගත වූ නුඹලා එම රටවල ඇති වාමාංශික අරගල සමග ඒකාත්මික වන්නේ නැතිව ගෙදරින් විසිකළ ගෙම්බන් මෙන් නැවත නැවත ආපසු ගෙදර දෙසට ම හැරී ලංකාවේ ඇති බිබික්කම ගැන සොයන්නේ මන්ද?’ යන්නය. 

ඒ කියන්නේ ඔහු සිතා සිටියේ මම පිටරට සිට ලංකාවට තග දමන්නෙකු හැටියටය. ඔහුගේ ෆිලොසොෆිය සමහර බයියන්, සමහර ටොයියන්, සමහර ජෙප්පන්/පෙසපන්  ගෙන් වෙනස් වන්නේ නැතිබවට මම පිළිතුරු දුනිමි.

එහිද සඳහන්  කළ පරිදි මම කෝබින් ගේ කම්කරු පක්ෂයේ සාමාජිකයෙක්ව සිටියෙමි.  එයින් ඉවත්වුනේ ඇයිද යන්න තවම ලීවේ නැත.


මගේ පිළිතුරෙන් කොටසක් මෙසේ විය. /මම නම් කියන්නේ දීප්ති වගේ කෙනෙක් මේ වගේ ප්‍රශ්නයක් ජිවිතේට අහන්නේ නැහැ කියල. මහේෂ් මේක ටිකක් බොළඳයි කියල හිතෙන්නේ නැත්ද? විවේචනයට උත්තර දෙනවා මිසක් උඹල මොනවාද කරන්නේ යකෝ අපිනේ භුමියේ දේශපාලනය කරන්නේ කියන තර්කය ඉස්සර මට දැම්මේ  සහ පෙසප සහෝදරවරු. දැන් ඔයත් පටන් ගත්තද? වැඩේ කියන්නේ මේකයි. අපි කරන හුඟක් දේවල් එළියේ ඉන්න අය දන්නේ නැහැ . දැනගන්න දෙන්නෙත් නැහැ. ඉතුරු ටිකට පිළිතුරක් බ්ලොග් එකෙන් දෙන්නම්. මගේ ලිපියේ උඩම කියල තියනවා මම දීප්ති සහ හපුගොඩ ගේ අදහස් වලට එකඟයි කියල . ඒක ඔයාට මිස් වුනේ කොහොමද දන්නේ නැහැ. මගේ ලිපියේ අදහස මොකක්ද කියලවිස්තර කරලා ලිපියක් බ්ලොග් එකේ දානවා.//

එම ලිපියේම මහේෂ් හපුගොඩ දුන් පිලිතුරද  තිබේ. ඔහු ගමෙන් පැමිණි බව ඔහුම පිලි ගැනීම හැර අනිකුත්  ඔහුගේ පැහැදිලි කිරීම් මම පිලි ගත්තා යයි නොසිතමි.
.
ලිපි පෙලේ  සඳහන් වූ මගේ ලෝකය පොත මා  දැන් කියවා  තිබේ.   එයට පිළිතුරක් ලෙස මහේෂ් හපුගොඩ හා ජයසිරි අලවත්ත එක්ව ලියු "මගේ ලෝකයෙන් පසු ලෝකය" පොතද කියෙව්වෙමි. එම පොත සැබවින්ම "මගේ ලෝකය " පොතට පිළිතුරක්ද නැත්නම් තමන්ගේ ම දැනුම විවරණය කිරීමක් ද  යන්න තවමත් සිතමි.



ඊට කලින් ජිජැක් ගැන ඔවුන් දෙදෙනා ලියු පොතේ අග දීප්ති ගුණරත්න මෙසේ ලියා තිබුණි.

//"මේ තරම් පොත් කියවපු සංවිධානයකින් මෙච්චර  මැට්ටෝ බිහි වුනේ කොහොමද? දෙවියන් අපිට ලබා දුන් තෑග්ග වන මහේෂ් හපුගොඩ හරහා  එම ප්‍රශ්නයට පිළිතුරු ලැබී ඇත. ජීසස් ගේ කියමන  වූයේ "දෙවියනේ ඔබ කොහිද?" මැට්ටන්ගෙන් මගේ ව්‍යාපෘතිය වෙන් කිරීමට මේ ලෝකයට එවූ තෑග්ගට දෙවියන්ට ස්තුති වේවා. ප්‍රාතිහාර්ය බලාපොරොත්තු නොවන්නා යථාර්ථවාදියෙක් නොවේ. මාක්ස්වාදය අද දවසේ ඉල්ලන්නේ භෞතිකවාදයද නොවේ. එය ඉල්ලන්නේ "රැඩිකල් විඥානවාදය' ය."- (පුනර්ජීවනය  -ජිජැක් අධ්‍යයනය)//

 ඇත්තටම ගතහොත් භෞතික  විද්‍යාව,  අභ්‍යවකාශ භෞතික විද්‍යාව වැනි විෂයයන් අද ඇත්තේ මහාචාර්ය නලින්ද සිල්වා මහතා ඔහුගේ පොත ලියන කාලයටත් වඩා පුළුල් පරාසයකය.

මේ ගැන මම තව ලිපියක් "හපුගොඩ ගේ කතාවක් " මැයෙන් ලීවෙමි. 

 
ඔය හපුගොඩ /අලවත්ත සහෝදරයින්ගේ පොත් දෙක පිටුපසම දීප්ති ගුණරත්න ගේ අවතාරය හොල්මන් කරන බව මම කියමි. 

හැබැයි පසුව මට පෙනී ගියේ මහේෂ් හපුගොඩ නමැති දර්ශනවාදියා දීප්තිගේ ත්‍රිමානය  තුල තව දුරටත් හොල්මන් නොකරන බවය. ඊට හේතුව වුයේ හපුගොඩ ගේ ලිපි පෙරටුගාමී සමාජවාදී පක්ෂයේ හා ජවිපෙ සහෝදරවරු ෆේස්බුක් එකේ හෝගා බෙදා හදා ගන්නා  බැවිනි. මේ සංසිද්ධිය මම ඊට කලින්ද දැක තිබේ. එක්ස් කණ්ඩායමෙන්  හෝ පරණ පෙරටුගාමී (දැන් සමබිම) පක්ෂයෙන් යමෙකු වෙන්වූ වහාම අනිකුත්  වාමාංශික පක්ෂ දෙකට ඔවුන් ඉබේම  මාහැඟි වස්තූන් වේ. නමුත් කුමන  හෝ හේතුවකට ඒ බව ඔවුහු ප්‍රසිද්ධියේ පිලිගැනීමට මැලි වෙති.
 
එසේම මම හපුගොඩ සහෝදරයාගේ  ලිපි "ලංකා නිව්ස් වෙබ් " අඩවියේ මෙන්ම ලංකා ලීඩ් නිව්ස්, ලීඩර් වැනි ප්‍රකාශන  වලද දුටුවෙමි. ඔහුට වැඩි ඉඩකඩක් ලැබෙනවා කියන්නේ ඔහු දීප්ති සමග නැති බව බොහෝ දුරට අනුමාන කලෙමි.  මම මහේෂ් හපුගොඩ ට සුභ පතමි. ගමෙන් නගරයට එන අය එකතැන පල්විය  යුතු නැත. 


දීප්ති කියන දේ අසන පිළිපදින දීප්ති සමග සිටි අයට බුකියේ චෝදනා මිස වෙනත් දේවල් ලැබෙන්නේ නැත. ඒ කණ්ඩායම්ද අනිකුත් පැරණ එක්ස් කාරයන් සමග සැම විටම අවුලේය. එසේම  බොහෝ "විද්වතුන්" ලෙස තමන්වම තමන් හඳුන්වා ගන්නා  අය දීප්තිට බුකියේ සිනාසෙති.   බුකිය විකාරයක් බවට දීප්ති කියන්නේද එනිසා විය යුතුය.

දිප්තිද සියට සියක් බෝසතකු  නොවේ. ඔහු තමන් හැරගිය අයට ද ඒ අයගේ යහළුවන් යයි සිතන අයටද නිර්දය ලෙස පහර දෙයි. එනිසා ඔහුට තරහකාරයන් වැහි වැහැලාය. මට හිතෙන්නේ දීප්තිට මේ නිසා ජිවිතේට ලෙනින් කෙනෙකු වෙන්නට බැරිය.  මේ ගැන මගෙන් ඇසූ  ජවිපෙ සහෝදරයෙකුට මා දුන් පිළිතුර වූයේ, පක්ෂය හැරගිය නන්දන මාරසිංහ වැනි අයට විජේවීර පිළිතුරු දුන්නේ කළුකුඩුබස්නයෙන් බවයි.    ඒ නිසා සාපේක්ෂව දීප්ති විජේවීරට වඩා සාධාරණ බවය. ඔහු අවඥාසහගත ලෙස කිව්වේ දීප්තිට එවැනි හයියක්  නැති බවයි. 

මෙවර ලංකාවට ගිය වෙලේ යහළුවෙකු ගෙන් හපුගොඩ /දීප්ති සුසංයෝගයේ ඉරණම  පිළිබඳව විමසුවෙමි. ඔහු කීවේ දීප්ති තමන්ට වඩා කෙනෙකු පක්ෂයේ ඉහලට ගියහොත් ඔවුන්ව ඉවත් කරන බවය. එනම්ම දීප්ති තමන්ව බුද්ධිමය වශයෙන් පසු කරයන්නට පක්ෂයෙන් කෙනෙකුට  ඉඩ දෙන්නේ නැති බවත් ප්‍රභා මනුරත්න, බුද්ධික, කල්යානන්ද , නිර්මාල් දේවසිරි මෙන්ම හපුගොඩ ද ඉවත්ව ගියේ ඒ නිසා බවය. 

මට  ඒ අදහස පිළි ගැනීමට නොහැකි බව කීවෙමි. මගේ අදහස වූයේ,  දැන්  ජිජක් විශාරදයෙකු වී සිටින ජයසිරි අලවත්ත සහෝදරයා  හා ඉන් එහා ගොස් ජනප්‍රිය දර්ශනවාදී අදහස් බෙදා හදා ගන්නා හපුගොඩ සහෝදරයාගේ ග්‍රන්ථ ද්විත්වය පසුපස දීප්තිගේ බුද්ධිමය මැදිහත්වීමක් තිබුණු බව ඉතාමත් පැහැදිලිය.  එනිසාම දීප්තිට එවැනි අවශ්‍යතාවයක් තිබෙන්නට ඉඩක් නැත.එක්ස් කණ්ඩායමෙන් ගිය අයද දීප්ති ගෙන් තව දුරටත් ඔවුනට ගන්නට දෙයක් නොමැති නිසා නික්ම ගියා විය යුතුය. ඒ ගැන බොහෝ සෙයින් ත්‍රිමාණ වෙබ්  අඩවිය හා බුකිය තුල විවේචන-ප්‍රති විවේචනය යන නිසා ඒ ගැන කතා නොකර සිටිමු.  නමුත් සමන් පුෂ්ප කුමාර ඔහුගේ  පශ්චාත් උපාධියෙන් පසු නැවත  දීප්තිගේ පක්ෂයට නො ආවේ ද ඒ නිසාය යන තර්කය බැහැර කිරීම මදක් අපහසුය.  

මුලින් දීප්ති කුමාර ගුණරත්නට හා ඔහුගේ පක්ෂයට කැමතිව සිටි තවත් මා බ්ලොග් ලෝකයේ දැන සිටි සගයෙකු  දැන් සිටින්නේ විදර්ශන කන්නගර කණ්ඩායම සමගය.  ඔහුගේ  මුලික තර්කය දීප්ති චතුරිකා පසුපස යාම නිසා ක්‍රෙඩිබිලිටිය විනාශ කරගෙන ඇති බවය. නැතිනම් කාඩ් කුඩු කරගෙන ඇති බවය. චතුරිකා පසුපස යාමට වඩා දීප්ති  කලේ රැකියාවක් යන්න මගේ වැටහීමයි.  ඒ රැකියාවේ ප්‍රතිපල සමහර විට ඉදිරියේදී බලා ගන්නට හැකිවනු ඇත. මා හඳුනන බ්ලොග්  සගයා  දැන් අනුයන  විදර්ශනගේ සමහර ලිපි හා කියුම් දීප්ති ලියන ඒවා තරමට මට තේරෙන්නේ නැත. එනිසා මම ඒ සහෝදරයාව  බොහෝ සෙයින් මග හැර තිබේ.   

දීප්ති කුමාර ගුණරත්න ගෙන් මේවා ගැන විමසු විට කිවේ මහේෂ් හපුගොඩ පක්ෂයෙන් පිටත සිටියත්  තවමත් ඔවුන් සමග සිටින බවය.  සමහරවිට මේ  මේ  සියල්ල බැඳ තබන හුය රුවන් ෆෙර්ඩිනන්ඩ් විය හැකිය.  නිව්ස්වෙබ් අධිපතියන් සාමාන්‍යයෙන් ජිජැක් ට සිනාසෙති. එසේම නූතන මාක්ස්වාදය සමගද ඔවුන්ගේ සමබන්ධ්යක් නැත. මංගලගේ ලිබරල්වාදය සඳහා එහි ඉඩක් තිබේ. එනිසා හපුගොඩ ගේ නව මිතුරන් ඔහු පිළිගන්නේ දීප්ති ඉක්මවා ගියා යයි  සිතන නිසාද?

ලංකාවේ පරිවර්තන නොව ස්වතන්ත්‍ර පොත් පලකරන්නට ගොස් ප්‍රකාශකයන්ගේ, එම ක්ෂේත්‍රයේ කෙලි කාරයන් ගේ හා   අනිකුත් ලේඛකයන් ගේ නරුමවාදයට මුහුණ දුන් මට දීප්ති මුහුණ දෙන්නේ කුමන නරුමවාදයකටද  යන්න ගැන යම් තරමක අවබෝධයක් ඇත. වාමාංශික  පක්ෂ වල සමහරු ක්‍රියා කරන්නේද  අර නරුමවාදය තුලමය. 
 
බලාගෙන යනවිට සියල්ල නැවතත් අවුල් වී ගොස්ය. අවුල ලිහන්නට කෝවිඩ් 19 හොඳ අවස්ථාවක්  දී තිබේ. 


පරණ ලිපි පෙළ:

Saturday 8 May 2021

කෝවිඩ් තර්ජනය මැද ලංකාවට ගිය ගමන

මම පසුගිය මාර්තු 14 වනදා ශ්‍රී ලංකාවට පැමිණියේ මගේ මවට හදිසියේ හෘදයාබාධයක් වැළඳීම නිසාය. ඇස්ට්‍රසෙනෙකා පළමු එන්නත පමණක් විද තිබු නිසා දින දහ  හතරක් නිරෝධායනය  වූයේ බේරුවල සිනමන් බේ නැමැති හෝටල් සංකීර්ණයෙහිය.  ශ්‍රී ලංකාවට ඒමට ප්‍රථම මම බ්‍රිතාන්‍ය ස්ටර්ලින්  149 (රුපියල් හතලිස් දහසක් පමණ) ගෙවා පිසීඅර් පරීක්ෂණයක් කර ගතිමි. පරීක්ෂණය  නෙගටිව් වුනු පසු පමණක් අපට ගුවන් යානයට ගොඩ විය හැකිය.  කටාර් ගුවන් සේවයේ ඩෝහා වලට පැමිණ එතනින් ශ්‍රී ලංකාවට පැමිණෙන යානයකට ගොඩ වුනෙමි. මේ යානා දෙකෙහිම සෙනග සිටියේ ඉතාමත් අඩුවෙනි. මගේ ඉදිරිපස සහ පිටුපස ආසන පේලි හිස්ව පැවතුනි.

  මේ පීසීආර්  සහතිකය  හීත්‍රෝ ගුවන් තොටේදී තදබල ලෙස හා  ලංකාවේදී ද පරික්ෂාවට ලක් කෙරුණි. ලංකාවේදී ෆෝම් එකක් ද පුරවන්නට  තිබේ. හැබැයි ලංකාවේ ආරක්ෂක නිලධරයා පරික්ෂා සහතිකය තේරුම්  ගත්තාද කියා නොදනිමි. ඔහු කිසිදු ප්‍රශ්නයක් පරීක්ෂණය ගැන ඇසුවේද  නැත. (වරදක් කියනවා නොවේ).

මා පැමිණියේ පෞද්ගලිකව නිසා ගුවන් තොටුපලින් එවෙලේම වාගේ පිට වුනෙමි. ඒ අතරේ හමුදා නිලධාරීන් මගීන් ලියා පදිංචි කරමින් බොහෝ අය එක තැනක පෝලිමට ගොනු කරනු දුටිමි. ඒ පෝලිමේ මීටරයේ දුරනම් තිබුනේ නැත.

සිනමන් බේ හෝටලයේදී පළමු දින, හත්වන දින සහ දහතුන් වන දිනයේදී රුපියල්  8775 ගණනේ    තවත් පීසීආර් ටෙස්ට්  තුනක් කල යුතුවිය.  එහිදී පීසීආර් පොසිටිව් වුනු දෙතුන් දෙනෙකු තම කාමරවලම  නිරෝධායනය කර තිබෙනු දුටුවෙමි. ට්‍රැවල්  බබ්ල් (සංචාරක බුබුල) නිසා කොවිඩ් බෝ වෙනු ඇතැයි  බොහෝ අය සංචාරකයන් ගෙන්වීම විවේචනය කළද ඒ සම්බන්ධයෙන් මගේ එදා පැවතුනු  අදහස නම් දැන් වෙනස් වී ඇත. 

  කසක්ස්ථානයෙන්, රුසියාවෙන් සහ යුක්රේනයෙන් පැමිණි සංචාරකයන් සියලු දෙනා එම රටවල දී පීසීආර් පරික්ෂාවක් කර පැමිණෙන අතර ඔවුන් සංචාරක නිකේතන වල රැඳී සිටින දින 7 දී තවත් දෙකක්ද කරති. තම රටේ දී  පොසිටිව් නම් ලංකාවට එන්නට ලැබෙන්නේ නැත.  එසේම ඒ කිසිවෙකුටත් සංචාරක හෝටලයෙන් එළියට යන්නට අවස්ථාවක්  ලැබුනේද නැත. කලින් එක්තරා  පිරිසක් එසේ සංචාරය සඳහා ලංකාවේ යම් ස්ථාන වලට රැගෙන ගිය බව දැනගත්තද අප සිටි සංචාරක නිකේතනයේ එසේ කළේ නැත. කලින් සිද්ධියේදී කළ විවේචන දේශපාලනය මත පදනම්ව සිදුවූවක් යයි සිතමි. පීසීආර් පරීක්ෂණය නෙගටිව් නම් එසේ කිරීමේ වරදක් තිබේද?






දෙවන කාරණය  නම්  මෙම සංචාරක නිකේතනයේ  වැඩ කරන සුළු සේවකයන් මට පැවසූ දේවල්ය. ඔවුන්ගේ මූලික  වැටුප මසකට රුපියල් දොළොස්දහසක් පමණ වේ. (මා  කියන්නේ සාමාන්‍ය  වේටර් වරුන්, කාමර පිරිසිදු කරන්නන් ආදීන් ගැනය)  ඊට අමතරව සංචාරකයන්  වියදම් කළහොත් බිලට එකතුවන සන්තෝෂම් (ටිප්) වලින්ද ඔවුන්ට මුදලක් ලැබේ. ඇත්තම කියන්නේ නම් එවැනි අඩු පඩි තවමත් ලංකාවේ තිබෙන බව මා දන සිටියේ නැත. ඇඟළුම් කම්හල් සේවිකාවන්ට ද   රුපියල් හතලිස්පන්දහකට  වඩා පඩි ලැබෙන බව මට දැන  ගන්නට ලැබී තිබුණි.  සංචාරකයන් විසින් ටිප් දෙන අවස්ථා ඇතත් බොහෝ සේවකයන්  පැවසුවේ එසේ ලැබෙන්නේ බටහිරින් පැමිණෙන සංචාරකයන්ගෙන් බවය. නැගෙනහිර යුරෝපයේ අය ටිප් දීම දුලබ බව ඔවුහු පැවසූහ. සේවකයන්ට  කෑම බිම එම නිකේතනයෙන්ම සැපයේ.මාස  හත අටක් රැකියා නොමැතිව  සිටි ඔවුහු තම ජිවිත  ගැට ගහ ගත්තේ  බොහෝ අමාරුවෙන් බව කියූහ. ඔවුන් ණය බරින් මිරිකී සිටිති. ඔවුන් දින 14 හෝ දින 28ක්  එම නිකේතනයේම නිරෝධායනය විය යුතුය. එනිසා ඔවුන්ගෙන් කෝවිඩ් රටට ව්‍යාප්ත වුනායයි ද  කිව නොහැකිය. 

මා දුටු තවත්දෙ යක්නම් වෙරළ ආශ්‍රිතව ජිවත්වන්නන් බොහොමයක්ද සංචාරක ව්‍යාපාරය නැතිකමින් පීඩා විඳින බවය. සංචාරකයන් රැගෙන මුහුදට යාම , බෙල්ලන් හා වෙනත් භාණ්ඩ අලෙවි කිරීමද ඔවුන්ට කළ නොහැකිය. අප සමග  සිටි සංචාරකයන් දෙදෙනෙකු රුපියල් හතලිස් දහසකට  රහසේ වැටෙන්  පන්නාගෙන ගැඹුරු මුහුදේ කොරල් පෙන්වන්නට ගොස් ඒ ගමේ දෙදෙනෙකු පොලිස් අත් අඩංගුවට පත්වී තිබුණි. ඉතිරි අය නොයෙකුත් පලතුරු, ෂැම්පු වර්ග, ආයුර්වේද බෙහෙත් ආදිය ගෙනැවිත් ඈතින් සිට විකිණීමට තැත් කරති, සංචාරක ව්‍යාපාරය සම්පුර්ණයෙන්ම නවත්වන්නට කලින් මේ මිනිසුන් ජිවත් වන්නේ කෙසේ දැයි ද සළකා බැලිය යුතුය. 

සංචාරක  බුබුල යටතේ හෝ සංචාරක ව්‍යාපාරය ක්‍රියාත්මක වන්නේ නම් ඔවුන් කැමතිය. ආණ්ඩුවේ ලොක්කන් හෝ හිතවතුන්ට මුදල් ලැබේද නැත්ද යන්න මම නොදනිමි. නමුත් සංචාරක මණ්ඩලය ඒ සඳහා සුදුසුකම් සපුරාගත් සංචාරක හෝටල් වල නම් වෙබ් අඩවියට ඇතුලත් කර සංචාරකයන් ගෙන්වීමේ වැඩ පිලිවෙලට විරුද්ධ වීමට මට නම් නොහැකිය. එයින් යැපෙන්නන් බොහොමයක් සිටින බැවිනි.

මට සිනමන් බේ නිකේතනයේ දී ලෙබනන් ජාතිකයෙකු, ඉරාන ජාතිකයෙකු සහ ඉන්දියානුවකු මුණ  ගැසුන අතර ඔවුන් තිදෙනාම තම රටින් කරගත්  පීසීආර් පරීක්ෂණ හැඳුනුම්කම් මාර්ගයෙන් කරගත් බව  පිළිගත්හ. හොඳ  වෙලාවට සිනමන් බේ හිදී කරන ලද ඒවා නෙගටිව් විය. ඔවුන් පැමිණ තිබුනේ, සවුදි අරාබිය, බ්‍රිතාන්‍යය වැනි රටවල් ඉන්දියාව, ඉරානය, ලෙබනනය ආදී රටවල් වල සිට තමන්ගේ රටවලට  පැමිණීම තහනම් කර ඇති නිසා ලංකාවේ නිරෝධායනය වී එමගින් ඉහතකී රටවලට  පැන ගැනීමටය. බොහෝවිට මේ නිසාම බ්‍රිතාන්‍යය ශ්‍රී ලංකාවේ සිට පැමිණීම් ද තහනම් කිරීමට බොහෝ දුරට ඉඩ ඇත. 

එසේම මෙවැනි අයගෙන් කටුනායක ගුවන් තොටුපලේදීම කොවිඩ් පැතිරීම සිදුවිය හැකිය. කෝවිඩ් 19 වෛරසයේ බ්‍රිතාන්‍ය ප්‍රභේදය මා ලංකාවට  එනවිටත් රටවල් 60 කට පැමිණ පැතිරී තිබුණි. ඒ අතර බොහෝ මැද පෙරදිග රටවල්ද විය. (ලෙබනනය, ග්‍රීසිය හා සයිප්‍රසයද  ඇතුළුව) මේ රටවලින් ලංකාවට  එන බොහෝ දෙනෙක් පැමිණෙන්නේ පීසීආර් නොකර බව නොරහසකි. කිසියම් ප්‍රතිශතයක් ශ්‍රී ලංකාවේදී පොසිටිව් ලෙස හඳුනාගන්නා ලද බවත් එසේම නොරහසකි. 


මගේ වැරැද්ද ඒ දෙවෙනි රැල්ල ලෙස හඳුනාගැනීමයි. මේ යන්නේ ඇත්තටම තෙවන කෝවිඩ් රැල්ලයි. ඉන්දියාව තවම උච්ච (පීක්) තත්වයට පැමිණ නොමැති නිසා ශ්‍රී ලංකාව ප්‍රවේශම් විය යුතු වන්නේ ඉදිරි මාස දෙක, තුන තුලදී බව දත්ත විශ්ලේෂණය කරන විට පෙනේ. කොපමණ  පුවත්පත් සහ සමාජ ජාලා මගින්  හඬ නැගුවත් මගේ අදහස නම් සාපේක්ෂව තවමත්  දරුණු තත්වයකට ශ්‍රී ලංකාව  පැමිණ නොමැති බවයි. දරුණු තත්වය එන්නේ තව ,මාසයකින් දෙකකින් ඉන්දියානු ප්‍රභේදය ද ශ්‍රී ලංකාව ආක්‍රමණය කිරීමෙන් පසුවය. රට සම්පුර්ණ ලොක් ඩවුන් කිරීමට යාමක්සි දුවිය හැකිය. ශ්‍රී ලංකාවේ ආර්ථික අවපාතය එන්න එන්නම දරුණු වෙමින් පවතින අතර එයින් මිදිය හැක්කේ වෙළඳාම, තේ නිෂ්පාදනය , ඉදි කිරීම්  හා සංචාරක ව්‍යාපාරය පවත්වා ගෙන යාමෙන්ය. එනිසා ලොක්ඩවුන් කිරීමේදී ඒ පිලිබඳ වද  සිතීම වැදගත්ය. මේ සඳහා කුමන සැලසුමක් පවතින රජය ක්‍රියාත්මක කරන්නට යන්නේද යන්න පැහැදිලි නැත.

කටාර් ගුවන් සේවය විසින් හොර පීසීආර් සහතික හරි හැටි හඳුනා නොගත් නිසා බ්‍රිතාන්‍ය රජය එම ගුවන් සේවයට රටට ඒම තහනම් කරන ලදී. එනිසා මම ශ්‍රී ලංකන් ගුවන් සේවයෙන් නව ප්‍රවේශ පත්‍රයක් මිලදී ගතිමි.  ශ්‍රී ලංකන් ගුවන් යානයේ තත්වය නම් අබලන්ය. (පින්තුරය බලන්න) හිඳගත් ආසන දෙක තුනෙහිම ඉන්ෆ්ලයිට් එන්ටටේන්මන්ට් හි පෙන්වන චිත්‍රපට භාගයකින් නතර වෙයි. සමහර ආසනවල හෙඩ්ෆෝන් එක ගහන්නට බැරි ලෙස කැඩී ඇත. යුඑස්බී වැඩ කරන්නේ නැත. ලොකුම ෂොක් එක එය නොවේ. සාමාන්‍යයෙන් ඉතා  උසස් තත්වයෙන් දෙන ශ්‍රී ලන්කන් සේවයේ එකොනොමි පන්තියේ කෑම වේල දුටුවිට දුක හිතුනි.  මට එකොනොමි  ආසනය බිස්නස් පන්තියට ප්‍රතිශතයක් ගෙවා  අප්ග්‍රේඩ් කිරීමට ඇරයුමක් ලැබුනත් එසේ නොකළේ යානය බොහෝ විට හිස්ව යන බව දන්නා හෙයිනි. එම ඔෆර් එක කාටත් ලැබෙන එකකි. බිස්නස් පන්තිය කටාර් යානයේ මෙන්ම පිරී  පැවතුනි. කොවිඩ් වලින් බේරෙන්නට සිතා  බිස්නස් පන්තියේ යන අය ගැන දුක හිතුනේ එකොනොමි  පංතියේ මා ඉදිරිපස හා පසුපස පේලි දෙක තුනක්ම  හිස්ව යන බව දැකීමෙනි.


මේ යානයේ තේ දුන්නේ නැත. වතර බෝතලයක් හැර වෙන බීමක් (සාමාන්‍යයෙන් වයින්, විස්කි. කොකා කොලා , ලෙමනේඩ් හෝ දොඩම් යුෂ ලැබේ) දුන්නේ ද  නැත. නිදිමත නිසා තේ නොඉල්ලුවෙමි. මදක් සීතල දැනුන නිසා පොරවනයක්  ඉල්ලු මුත් ඒවා  කොවිඩ් නිසා දෙන්නේ නැතැයි කියූහ. වාසනාවකට  මෙන් යානය උණුසුම් වූයේ මධ්‍යම ආසියාවට  ඉහලින් යන බැවිනි. කටාර් යානයේ දී මේ සියල්ල ලැබුන බව මම ගුවන් සේවක මහතාට කීවෙමි. "ඔවුන්ට" මුදල් ඇති බව ඔහුගේ පිලිතුර විය. මුදල් ඇති කතාව ගැන හිතමින් සිටියේදී මට නින්ද ගියේය. ලන්ඩනය  ලඟා වීමට ප්‍රථම උදේ ආහාරය ලැබුණි. ඔම්ලටයේ කියන්නට  වරදක් නැති  මුත් ඊට වඩා හොඳ උදය ආහාර එමිරේට් හෝ කටාර් යානයේ ලැබේ. 


උදය ආහාරයෙන් පසුවද තේ නැත. ගුවන්ගමනට ගෙවූ  මුදල පෙර  වාර වලට වඩා වැඩි වීම  වීම නිසා මේ සැලකිල්ල නම් මගේ  සිත් නොගත්තේය. මම ගුවන් සේවක මහතා කැඳවා තේ ඉල්ලුවෙමි. ඔහු පැවසුවේ තේ දෙන්නේ බිස්නස් පන්තියට බවය. මගේ මුහුණේ කෝප සහගත ස්වරූපය ඔහුට වැටහෙන්නට ඇත. 

"මම අරන් එන්නම් මහත්මයා " කිවූ ඔහු තේ රැගෙන පැමිණියේය. ඉන්පසු බ්‍රෙඩ් රෝල කන්නට බටර් පමණක් තිබූ බැවින්  ජෑම් ඉල්ලුවෙමි.  ජෑම් දෙන්නේද බිස්නස් පන්තියට පමණක් බව ඔහු කීවේය. එවර නම් මට තරහ වෙනුවට හිනා ගියේය. 

"බිස්නස්  පන්තියට තේයි ජෑම් නුයි දෙන එක හොඳයි. අපරාදේ නේ නැත්නම් වැඩිපුර ගෙවපු  සල්ලි. අනික පිරිලත් වගේ නේද. හොඳ වෙලාවට මම ඔෆර් එක ගත්තේ නැත්තේ". 

 සිනාසුනු සේවක මහතා මදෙසට මදක් නැමී කිවේ "සල්ලි නැහැ සර්. කොස්ට් කටින් නේ. " එවිට මම ආසනයේ ඉරුණු තැන් (ඉහල පින්තූරය ) පෙන්වා   මට තේරුණ බවත් සීට් දෙක තුනේම In-flight entertainment (IFE) වැඩ නොකරන බවද කීවෙමි. ඒ වනවිට   මම හතරවෙන ආසනයට මාරු වී සිටියෙමි. සේවක මහතා කටාර් වලට සල්ලි ඇති බව කියුවේ මන්දැයි මට වැටහුනේ එවිටය. 
 ශ්‍රී ලංකන් යානයේ කැබිනය තුල සේවාව කවදත් ඉහළ මට්ටමේ විය. තනිවම ගමන් ගත්  මහළු ද්‍රවිඩ කාන්තාවකට භාෂා අපහසුතා මැද ඔවුන්ම හත් ආදරයෙන් උපස්ථාන කරනු දුටුවෙමි.

හැබැයි ශ්‍රී ලංකන් ගුවන්සේවාව නම් ඇත්තේ  කඩා වැටෙන තැනකය. එනිසා සංචාරක බුබුළු ලෙස හෝ සංචාරකයන් ගෙන්වීමට විරුද්ධ වීමට පෙර ඒ ගැනත් සිතා බැලිය යුතු වේ. හොඳට හෝ නරකට ශ්‍රී ලංකාවට ඇත්තේ මේ ගුවන් සේවාව පමණකි. මිහින් ලංකා ගොඩබිම් ගතව බොහෝ කල් යයි සිතමි.

හීත්‍රෝ ගුවන් තොටේ ලොකු  පෝලිමක් තිබුනේ නැත. නමුත් මට තවත් පීසීආර් දෙකකට පවුම් 169 ක් ගෙවා මුදල් බැඳිය යුතු විය. දවස් දහයක් නිරෝධායනය  වෙමින් සිටියදී ඒවාද නෙගටිව් ලෙසට දන්වා තිබුණි. 
 
  මේ මා ශ්‍රී ලංකාවට මා  ගිය අපූරුම ගමනක් විය. ගිය වියදම එතරම් ප්‍රශ්නයක් නොවුනේ මව තරමක් සුව වූ හෙයිනි. සති හයෙන් සති හතරක්ම ලංකාවේ සිටියදී රැකියාව කිරීමටද සිදු වුනි. මට නිවාඩු තිබුනේ සති දෙකක් පමණි. ලංකාවේ අත්දැකීම් කිහිපයක්ද ලිවීමට ඉඩ තබාගෙන නවතිමි.  

Thursday 29 April 2021

ගුවන් විදුලියේ මහා ගෙදරට පා තැබුවෙමි

මට ගුවන් විදුලි සංස්ථාවේ සම්මුඛ සාකච්ඡාවකට ආරාධනා ලැබුනේ චිත්‍රපට වලට හා නාට්‍ය වලට හඬ කවන ශිල්පිනියක් වන ඉනෝකා බොතේජු මහත්මියගෙනි. ඒ ඉනෝකා බොතේජු ගේ "සඳ සංහිතාව" වැඩ සටහනට සහභාගී වන්නටය. 

 ඇගේ සැමියා ශාන්ත බණ්ඩාර ද රැකියාව කලේද ගුවන් විදුලි සංස්ථාවේමය.ඔහු බොහෝ ජාතක කතා නාට්‍යමය ස්වරූපයෙන් ඉදිරිපත් කිරීම මෙන්ම නාට්‍ය  පිටපත් රචනයේද යෙදී සිටි.ඉනෝකා ගේ ආරාධනය මා භාර ගත්තේ ගුවන් විදුලි සංස්ථාව යනු ශ්‍රී ලංකාවේ මාධ්‍ය සන්නිවේදන ඉතිහාසයේ සුවිසේෂි ස්ථානයක් සළකුණු කෙරෙනා ස්ථානයක් මෙන්ම ගුවන් විදුලි සේවයන්හි මහා ගෙදරද වීම නිසාය. 

 එනිසාම  ඉනෝකා බොතේජු මහත්මිය ගුවන් විදුලි සංස්ථාවේ මැදිරි කරා සංචාරයක් කිරීමටද ආරාධනා කල විට එය සතුටින් භාර ගතිමි. අප මුලින්ම නැරඹුවේ ඩී එම්කො ළඹගේ මැදිරියයි. ගුවන් විදුලියේ නාට්‍ය පිටපත් පුහුණු වෙන කවාකාර මේසයක් සහිත තැනකට ගිය විට පසුගිය දවසක රුපවාහිනිය නැති කලෙක රේඩියෝව ළඟට  එකතුව ඇසූ  ඇසූ මොනරතැන්න, මුවන් පැලැස්ස මෙන්ම ළමා නාට්‍යද සිහිපත් විනි. සමන් අතාවුද හෙට්ටි හඬ කැවූ ජිල්ජෝනා හා වැන්දබෝනා ගේ "ලන්දේසි දූපත" කතාව  මතකද? 

 පාවහන්  එළියේ ගලවා තබා  මැදිරියකට ඇතුළුවී  දහවල් ප්‍රවෘත්ති විකාශනයකට  සවන් දුනිමි. විකාශනයට කලින් දැන් යන වාදනය "ඇන් ඇම් ට පුලුවන්ද හත් හවුල පෙරලන්න" හෝ එදා ජාතිවාදී ප්‍රකාශනයක් වූ "සිරිමක්ක දැන් ඉන්නේ දෙමලුන්ගේ පිටි පස්සේ " යන්න නම් නොවේ. ගුවන් විදුලියේ එදා අතීතයේ සිට විකාශනයන් සඳහා  භාවිතා කරන ලද උපකරණ නරඹමින් යන අතරේ එහි ප්‍රධාන කොරිඩෝරයක සිට ඡායාරුපයක් ගත්තෙමි. සුනිල්  ශාන්ත, ආනන්ද සමරකෝන්, අමරදේව, ජෝතිපාල, එම් එස් ප්‍රනාන්දු, මිල්ටන් ලා දෙදෙනා, සිසිර-ඉන්ද්‍රානි, සනත්-මල්කාන්ති නන්දසිරි, නන්දා මාලිනි,  ශ්‍රීමති තිලකරත්න, මාලනී  බුලත්සිංහල ආදී සියල්ලෝම නිතර මෙහි ඇවිදින්නට ඇත.
සුභාෂිනී ද සිල්වා සහ ඉනෝකා බොතේජු සමග

ඉතා පැරණි ගීත


පැරණි පටිගත කරන ලද නිදහස් උත්සවයක්
සනත් මෙන්ඩිස් සමග


මා විශ්මයට පත් කළ, කලින්  අසා තිබුනද එහෙත් එහි  අගය හරිහැටි  නොවැටහුණු ස්ථානයකට අප එළඹුණේ ඉන් පසුවය. ඒ ශ්‍රී ලංකා ගුවන් විදුලි සංස්ථාවේ ගීත (තැටි) සංරක්ෂනාගාරයයි. මෙය දකුණු ආසියාවේ දැනට පවතින විශාලතම එවැනි පුස්තකාලය යයි අසා ඇත්තෙමි. 

"අරුම පුදුම රෝද හතර" වැඩ සටහනේ නුවන් ජූඩ් ලියනගේ මේ සංරක්ෂනාගාරයේ මිනිස් පරිගණකය වන සනත් මෙන්ඩිස් මහතා සමග ඒ ගැන විමසන අයුරු පහල ඇති යොමුවෙන් නැරඹිය හැකිය. 

සනත් මෙන්ඩිස් ට ඕනෑම ගීත තැටියක් තිබෙන ස්ථානය මතකය. ඔහු මටද මා ඇසූ සැනින් ගීත තැටියක් තෝරා දුන්නේය. ගීත වාදනය කරන විශාල ටේප් එක සහිත යන්ත්‍රය වාදනය කර පෙන්වූයේ තිලකරත්න අධිකාරී මහතා ය. සංරක්ෂණාගාරය සනත් මෙන්ඩිස් ඇතුළු තවත් හතර දෙනෙකුන්  සමග ඉතා හොඳින් රැක බලා ගනිමින් පවතාගෙන යන්නේ සුභාෂිණී ද සිල්වා මහත්මියයි. ඇය බොහෝ කාලයක් එහි රැකියාව කරන්නීය.

සුභාෂිනී ද සිල්වා  පැවසූ පරිදි මෙහි ගීත තැටි දෙලක්ෂ පනස්දහසකට වැඩි ගණනක් සුරක්ෂිතව  ඇත. ඒ අනුව තනි ගීත (එක තැටියක ගීත කිහිපයක් අඩංගු වන විට) මිලියන දෙකකට වඩා තිබිය යුතුය. මෙහි ඇත්තේ ගීත තැටි පමණක්ම නොවේ. එක්දහස් නමසිය හතලිස් ගණන් වල සිට පැවැත්වූ ගුවන් විදුලිය මගින් පටිගත කළ සෑම නිදහස් උත්සවයක්ම, පාර්ලිමේන්තුව විවෘත කිරීමක් හෝ වෙනත් රටවල් රාජ්‍ය නායකයන් ගේ පැමිණීමක් පිලිබඳ විස්තර ද මෙහි ගබඩා කර ඇත. කෙනකුට කිසියම් වසරක නිදහස් උත්සවයකදී  රටේ අග්‍රාමාත්‍යවරයා කළ කතාවක් මෙහි ඇති පරිගණක මගින්  සොයා ගත හැකිය. සන්නිවේදන අංශයේ රැකියා කරන්නන්ට මෙන්ම විශ්ව විද්‍යාල සිසුන්ට , සන්නිවේදන මාධ්‍යයන් ගැන පර්යේෂණ කරන්නන්ටද මේ දත්ත ගබඩාවෙන් ඇති ප්‍රයෝජනය ඉමහත්ය. සුභාෂිනි ද සිල්වා මහත්මිය ඇතුළු සංරක්ෂනාගාරයේ සේවයේ නියුතු සියලුම මහත්ම මහත්මීන් ඒ ගැන ඉතා කැපවීමකින් කටයුතු කරමින් මේ සියලු හඬපට පරිගණකගත කර රැක ගැනීමේ කාර්යයේ  යෙදී සිටිති.  මේ ස්ථානය රක ගැනීම ජාතික වගකීමක් ලෙස සිතමි.

 මේ සංරක්ෂනාගරයට ඇතුලත් විය යුත්තේ පාවහන් ගලවා තබාය. වැලි දූවිලි ආදිය ඇතුලත් වීම වැළැක්වීමටය. එසේම බොහෝ පටිගත කිරීමේ මැදිරි වලටද ඇතුළු විය යුතු වන්නේ පාවහන් ගලවා තබා ආගමික ස්ථානයකට ඇතුළු වන්නාක් මෙනි. අප ඉන්පසු ගුවන් විදුලියේ සුභාවිත වැඩ සරල ගී වැඩ සටහනක් පටිගත කරනු නැරඹුවෙමු. 
 එම් එස් ප්‍රනාන්දු මහතාගේ ගීයක් වන "ඔබට තිබෙන ආදරේ මම "සරල ගී ශිල්පී පසන් කරුණාරත්න විසින් ගයනු මම යූටියුබයට ඇතුලත් කලෙමි. (යොමුව)  ඔහුගේ කටහඬ එම් එස් ප්‍රනාන්දු මහතාගේ මෙන්ම ගැඹුරු සවන පිනවන්නක් විය.

එසේම සරල ගී ශිල්පිණී සඳලි දිල්හාරා විසින් ඇන්ජලින් ගුණතිලකගේ "පෙම්වතියන්නේ" ගීතය ගයනු මේ යොමුවෙන් නැරඹිය හැකිය. ඇගේ කටහඬ ද විස්මය දනවන සේ ඇන්ජලින් ගුණතිලකගායන ශිල්පිනියගේ මධුර කටහඬ ට බොහෝ සෙයින් සමානයයි මට හැඟිණි. 

ආනන්ද සමරකෝන් මැදිරියේ දී පටිගත කෙරුණු, සිංහල හා දෙමළ  අලුත් අවුරුද්ද සැමරීමට පැවැත්වුණු  සංගීතාන්ජලී වැඩ සටහන නැරඹීමේ අවස්ථාවක් ද  ලදිමි. එහිදී විශාරද ටි එම් ජයරත්න, වෝල්ටර් ප්‍රනාන්දු, අමිතා වැදිසිංහ, ඩිස්නි නාකන්දල  ගේ ගීත ද සහ ගයාන් මිහිඳුකුල ගේ සංගීතය හා එම කණ්ඩායමේ විසිතුරු නර්තනයන්ද රස වින්දෙමි.

මේ දවස උදා  කර දීම ගැන ශ්‍රී ලංකා ගුවන් විදුලි සංස්ථාවේ ඉනෝකා  බොතේජු සොයුරියට සහ ලංකාදීප මාධ්‍යවේදිනී පද්මි මාතරගේ සොයුරියට  ස්තුතිවන්ත වෙමි.

ශ්‍රී ලංකා ගුවන් විදුලියේ ස්වදේශීය සේවයට  - FM 91.7/91.9 ඔස්සේ සවන් දිය හැකිය.