Wednesday 14 July 2021

ජිවිතයේ ඔයිල් පැල්ලම් නැත්තෙක් සිටීද


ඔයිල් පැල්ලම් ගැන ලිවීමට පටන් ගන්නේ කොතැනින් දැයි මාසයක්ම කල්පනා කළෙමි. අවසන සිතුනේ පොතකට කළහැකි හොඳම උපහාරය වන්නේ මගේ ජිවිතයේ ඔයිල් පැල්ලම් වලින්ම පටන් ගැනීමෙන් කියාය. වසර විස්සකට මත්තෙන් මගේත්  වෙන්ඩ බිරින්දෑ ගේත් සංචාර සඳහා ප්‍රියතම ක්‍රමයක වූයේ දුම්රියයි.  දුම්රිය කාල වේලාවට යන නිසාත් අපි නිතරම අන්තිම මොහොතේ දුව පැමිණ එල්ලෙන නිසාත් ඉන්පසු ගමන් යාමට බොහෝ  විට නිසාන් මයික්‍රා කාරයක් කුලියට ගතිමු. අප මිලයට ගත් පළමු කාරය වූයේ  මිනි කූපරයකි. ඉන්  අපි දීර්ඝ සංචාර  හතර පහක් ගිය මුත් එය  නිතර අතර මග නවතින්නට විය. ඒ බැටරිය බැසීම නිසාය. අලුත් බැටරි දැම්මද එය ට්‍රැෆික් ලයිට් ළඟ නැවැත්වුව හොත්  නැවත පණ ගැන්වීම අසීරු විය. වාහන හදන දෙතුන් දෙනෙකු ගෙන් විමසුවත් ඔවුන්ට ප්‍රශ්නය සොයා ගත නොහැකි විය. අන්තිමේදී දී එය අප සිටි නිවස ඉදිරිපිට  ගාල් කර තැබුවෙමු. දවසක ගරාජ් හිමියකු පැමිණ එය   පවුම් 25 කට එනම්  දැන් කාලයේ මුදලින් රුපියල්  පන්දාහකට පමණ රැගෙන ගියේය.

මාස දෙක තුනකින් පමණ ලන්ඩනයේ ටල්ස් හිල් පෙදෙසේ ඔහුගේ ගරාජය අසලින් යන විට එය අලුත්වැඩියා කර පවුම් 1800 කට විකිණීමට තබා තිබෙනු දුටුවෙමු. (රු ලක්ෂ පහකට පමණ). මේ අවුරුදු  25 කට පමණ පෙරය. මම ගරාජ හිමියාගෙන් කාරයේ තිබූ වැරැද්ද කුමක් දැයි විමසුවෙමි. මිනි කූපරයේ බොඩිය හරහා  විදුලි පරිපථය සම්බන්ධ වන බවත් එක තැනකින් එම බිඳුණු පරිපථය වෙල්ඩින් කල පසු ප්‍රශ්නයක් ඇති නොවූ බවත්ය. ඔහු කීවේ ඇත්තද බොරුද යන්න අදටත් නොදනිමි. විදුලි පරිපථ  සටහන් වල එවැන්නක්  නොදුටුවෙමි.

ඉන්පසු වෙන්ඩ බිරින්දෑ ඒ දිනවල රැකියාව  කල ඩෙල්ටා ගුවන් සේවයේ ජර්මන් ජාතිකයෙකු ජර්මනියේ දී  සම්පූර්ණයෙන් ම වගේ නිමවන  ලද වමෙන් පදවන ෆෝඩ් ෆියෙස්ටා එකක් අඩුවට විකුණා ගියේය.  ෆියෙස්ටා එකට මම බොහෝ සේ ඇළුම් කලෙමි. එහි එන්ජම ඉතා සරල එහෙත් හොඳින් වැඩ කළ එකකි. පස් දෙනෙකුට යා හැකි  එම කුඩා කාරය අප දෙදෙනා බොහෝ තැන්වල විශ්වාසනීය ලෙස රැගෙන ගියේය. මගේ මලයා  බෙල්ජියමේ සිටින විට ඔහු බැලීමට බෙල්ජියමටද  ඔහු සමග ප්‍රංශයටද  ගිය ගමන එයින් ගිය දිගම ගමනයි. 

එහි තෙර්මොස්ටාටය වැඩ නොකර එන්ජිමේ උණුසුම වැඩි වුනු විට එය ගලවා අලුත් එකක් සවි කිරීමට  මෙන්ම කාරයේ  ඔයිල් මාරු කිරීම, ස්පාක්  ෆ්ලග් මාරු කිරීම ඇතුළු සර්විස් එකකදී කරන වැඩද මට කළ හැකි විය. 
කළු පැහැ පරණ ෆෝඩ්  ෆියෙස්ටා එකේ පින්තූරය පහල තිබේ. 


වරෙක සති අන්තයේ හෙඩ් ගෑස්කට් එක ගලවා අලුත් එකක් සවි කරන විට අසල නිවසක චීන කාන්තාවක් පැමිණ ඇගේ කාරයේ ප්‍රශ්නයක් පවසා  හදා දෙන්නට කීවාය. මම වාහන රෙපයාර් කරන්නේ නැති බවත් මගේ කාරයේ  පමණක් ආසාවට වැඩ කරන බවත් මගේ ළඟ තිබූ මැනුවල් පෙන්වා කීවෙමි. ඒ දවස් වල යූ බටය තිබුනේද නැත.  "උඹ  රන්වන් හිස කේ තියෙන සුදු ගැහැණුන් ගේ කාර් පමණක් හදන වර්ණවාදියෙකු බව" පවසා ඇය ඉවත ගියාය. මේ මොන කුණුහරපයක් දැයි කල්පනා කරන විට මට මතක් වුනේ ඇය, මා  වෙන්ඩ බිරින්දෑ සමග කාරයේ  යනවා දකින්නට ඇති බවයි.  ඒ දවස් පරණ මළකඩ කෑ එහෙත්  ක්ලැසික් බෙන්ස් එකක්  භාවිතා කල  මිනි කූපරය මට තල්ලු කළ මගේ මිතුරකු  නිතර කීවේ දකුණෙන් පදවන  හොඳ කාරයක් ගන්නා  ලෙසය. මට මේ කියමන තේරුනේ නැත්තේ ෆියෙස්ටා එකේ වරදක් මා නොදුටු බැවිනි.  මේ පරණ කාරය පසුව තුර්කි ජාතිකයෙකුට ගත් ගණනටම  වාගේ  විකුණා දැමුවෙමි. අවුරුදු 20කට පසු  එය තවමත් තුර්කියේ නෑදෑයෙක් භාවිතා කරන බව ඔහු පැවසුවේය.   ඉන්පසු වොක්සොල් ඇස්ට්‍රා (ඕපල්) එකක් , හා ෆෝර්ඩ් එස්කෝට් කාර්  දෙකක් ද අප සතුව විය. එස්කෝට් එක කාරයක් වුවද ලොරියක් මෙන් බර අදින වාහනයකි.  අප වරක නිවසකින් නිවසකට  බඩු ඇද්දේද ඒවායිනි. 

 ඉන්පසු වඩාත් සුවපහසු කාරයක් වන එන්ගලන්තයේම  බොඩිය ගැසූ රෝවර් 416  SLI වාහනයක් ගතිමු. මෙහි සුවිශේෂත්වය වූයේ එහි තිබුනේ හොන්ඩා ස්පෝර්ට් එන්ජිමක් වීමයි.  ඒ කියන්නේ ට්‍රැෆික් ලයිට් එකක නැවැත්වූ පසු ඇදලා යා හැකි කවදාවත් කැඩුනේ නැති වාහනයකි. එනිසාම මේ පරණ කාරයට තවමත් එංගලන්තයේ ඉල්ලුමක් තිබේ.  මේ නිසාම මගේ ඊළඟ කාරය වූයේ හොන්ඩා සිවික් එස්ටේට් එකකි.  මේ කාලය වන විට මා ළඟ තිබූ  තරු බලන දුරේක්ෂය මෙන්ම දරු දෙදෙනෙකු සිටින නිසා සංචාරයන් හි යනවිට ගෙනයන  බඩු  බාහිරාදිය වැඩි වීමද එස්ටේට් එකක් ගැනීමට හේතුවක් විය.  මේ වනවිට බිරිඳ බවට පත්වී  උන් වෙන්ඩ  බිරින්දෑ  දරු දෙදෙනා ද සිටි නිසා වෙනම කාරයක්  භාවිතා කල අතර ෆෝඩ් එස්කෝට්  එකෙන් පසු ඇය දිගටම  ගත්තේ ජර්මනියේ නිෂ්පාදිත  වොක්ස්වැගන් ගොල්ෆ් කාර්ය.  හොන්ඩා එකෙන් පසු BMW 320 ටර්බෝ ඩීසල් එස්ටේට් එකක් සෑහෙන කාලයක් පාවිච්චි කර බෙන්ස් C180 කොම්ප්‍රෙසර්  එස්ටේට් කාරයක් ගත්තෙමි.  එයද ට්‍රැෆික් කණුවක අසල  නැවත්වූ පසු ඉක්මනින් රේස් කර යා හැකි එකකි. වොක්සෝල් එකෙන් පසු මම කාර් හදන්නට නොගියෙමි. ඒවා වඩා සංකීර්ණ වූ අතර වෙලාවක ද ඉතා සීමිත වීමද හේතුවකි. මට පුළුවන් වූයේ හදිසියේ කැඩුණු ලයිට් එකක් මාරු කිරීම පමණය.

හැබැයි මම පරණ කාර් වල කුඩා ආකෘති එකතු කිරීම  නම් දිගටම කරගෙන යමි. 
 
එන්ෆිල්ඩ් නගරයේ එන්ෆිල්ඩ් අජිත් නමින් හැඳින්වෙන සුප්‍රසිද්ධ පුද්ගලයෙක් වාසය කරයි. වෘත්තියෙන් ගණකාධිවරයෙක් වන ඔහු විනෝදයට කරන්නේ ගෙය පිටුපස ඇති ගරාජයක කාර් හැදීමය. ඒවායින් ලැබෙන අතිරේක මුදලින් ඔහු ලොව වටා සංචාරය කරයි.  අපේ කාර් වල සර්විස්  එකේ සිට ඕනෑම වැඩක් කර දෙන්නේ මේ කාර් හදන්නට ලෙජෙන්ඩ් එකක්වූ අජිත් ජ.  අයියාය. "කොල්ලන්" කියන්නේ වාහනයක් ඔහුගේ ගරාජය පැත්තට එනවිට ඔහුට සද්දෙන් වාහනයේ වර්ගය කියත හැකි බවයි. මම එය ඔහුගෙන් කවදාවත් අසා නැත.

මගේ  ඔයිල් පැල්ලම් කතාව ඉතා කෙටියෙන් ඕකය. තව රස කතා තිබුනත් ලිපිය දිග වැඩි වනු ඇත.  තරිඳු ශ්‍රී ලොකු ගමගේ ගේ "ජිවිතයේ ඔයිල් පැල්ලම් " මම කලකින් කියවූ වෙනස්ම අන්දමේ කුතුහලය, හාස්‍ය රසය, දුක සතුට දනවන හඟවන ලියැවිල්ලකි. 

තරිඳු ශ්‍රී ලොකුගමගේ මා  හඳුනන්නේ බ්ලොග්කරුවෙකු ලෙසය. ඔහුගේ කාර් පිස්සුව බ්ලොගය නිසා  රසවත් ලිපි ලියන්නෙකු බව මෙන්ම තරිඳුවා යනු  හොස්ස ළඟින් මැස්සා ගියොත් බොනට්ටුව නැතිව ගෙදර යවන ජාතියේ එකෙකු බවද දැන ගතිමි. ඒ කාලයේ දරුවන් ගැන කතා කළොත් තරිඳු ඉන්නේ වැරදි පැත්තේ බව ඉක්මණින්ම අවබෝධ වුවත් ප්‍රග්යාන් ගේ ආගමනයෙන් පසු ඒ සුන්දර කොලු පැටියා නැති ෆේස්බුක් පොස්ට් එකක් හොයා ගැනීමට අමාරු තරමට තරිඳු ශ්‍රී ලොකු ගමගේ දැන් පරණ බෙලෙක්කයක් මෙන් මෙළෙක්  වෙලාය.

පොත එක හුස්මට කියැවිය හැකි විටෙක රහස් පරීක්ෂක නවකතාවක මෙන් ත්‍රාසය දනවන එකකි. කතුවරයා ශ්‍රී  ලංකාවේ  පැවති  දේශපාලන ප්‍රචණ්ඩ අවධිය මෙන්ම බොහෝ විට අප අසා ඇති වාහන සම්බන්ධ අපරාධ සිද්ධීන් ද කාටත් නොදැනෙන්නට කතාවේ ගලායාමට ස්පාක් ප්ලග් මෙන් අටවන්නේය.
  
මේ නවකතාවේ මා දුටු විශේෂිතම ලක්ෂණය නම් කතුවරයාගේ උපමා භාවිතයයි. මේ තරම්ම උපමාවන්  හාස්‍ය රසය දනවමින් භාවිතා කල පොතක් මා කවදාවත්කි යවා  නැත. අන්තිමේදී මට සිතුනේ මෙහි හොඳම උපමාව හා නරකම උපමාව සොයා ගැනීමට පාඨක තරඟයක් පැවැත්විය යුතු බවයි. තේරුමක් නැතිම  උපමාව ලෙස මට හිතෙන්නේ  "ඩෙංගු හැදෙන්නට කලින් වේලිච්ච බුලත් අතක් මෙන් සිටි කපිලයා දැන් වේලිච්ච දුන්කොල නැට්ටක් මෙනි." (පි. 160)  බුලත් කන්නේ නැති මට ඔය දෙකේ වෙනස් තේරුම් ගැනීමටද බැරිය. හැබැයි මේ උපමා වලින් අවස්ථාව පහදා  දෙන්නට කතුවරයා දරන වෑයම ඉතා සාර්ථකය. අපට සිද්ධිය  මැවී පෙනෙන්නට ඒවා ප්‍රමාණවත්ය.

"කපිලයා  දොර පැත්තට හැරුනේ විද්‍යා ප්‍රබන්ධ ජාතියේ චිත්‍රපටි වල රහස් ගබඩා දොරවල් ඇරෙන තරමට සෙමිනි" (පි 163) මේ උපමා දීමේ උත්කර්ශවත් තැනක් නම් තරිඳු ඔස්ටින් ඇට්ලන්ටික් කාරය  හඳුන්වා දෙන අන්දමය. එය කියවාම  බැලිය යුතුය. මම එය මෙහි උපුටා නොදක්වමි. 
ඔස්ටින් අට්ලන්ටික් A 90


මට අල්ලන්නෙම නැති උපමාව "ගස්ලබු ගෙඩියකට දිවුල් ගෙඩියක් මුහු කළා වගේ බැන්දට මුහුවෙන හෙඩ් ලයිට් දෙක" යන යෙදුමය. කොහොම බැලුවත් ඔස්ටින් ඇට්ලන්ටික් A නයින්ටියේ එහෙම  දෙයක් පේන්නේ නැත. (උඩ පින්තූරය) මේ කාර් පිස්සුව හොඳටම මෝරා ගොස් අවුල්  වූ මොහොතක ලියුවක් විය යුතුය.
 
කෙසේ වුවත්  මට සැබෑවටම හොඳම උපමාව හොයා ගත නොහැකිය. "පන්තියේ කෙල්ලෙකුගේ හෙයා බෑන්ඩ් එක කඩා මට්ටු වූ කොල්ලෙකු ටීචර් දෙස බලන්නාක් වැනි බැල්මක්" (පි 153) යෙදුම නම් අත්දැකීමෙන් ම කියවන්නාගේ ඔළුවට රින්ගනු ඇත.  "අට ලෝ දහමට ඔරොත්තු දෙන්නට කාර් හදන්නට දැනගෙන හිටි ලෝකයක් ලෝකයක්, වතුර බින්දුවක් ගිය විට උස්ස ගෙන ගොස් ස්කෑන් කරන තැන හොයන්නට වෙන වාහන හදන මට්ටමකට වැටුනේ කෙසේද " යන ප්‍රශ්නයට අන්තරේ එකෙක් උත්තර දී තිබුනේ ධනවාදය කියාය. මට නම් උත්තරය හැටියට දෙන්න වෙන්නේ  වර්ගයාගේ දියුණුව කියාය. සමාජවාදී ලෝකයේ සිටි සමයේ වොල්ගා කාරය හෝ ලාඩා වක්  දැඩි ශීතයට හසුව හිම අයිස් වී  ගල් මෙන් බොනට්ටුවේ මිදී තිබියදී කාරයේ එන්ජිම යට ගිනි මැලයක් ගසා එන්ජිම රත් කර  ස්ටාට් කරන රුස්සන් දැක ඇති මට මේ ප්‍රශ්නය නම් තේරුම් ගත හැකිය. 

ඇන්ටනි අයියා දවසක හමුවීමට ඇත්නම් හොඳ  යයි මටත් සිතේ. කොපමණ ඇන්ටනි අයියලා  අපේ ජිවිතයේ හමු වන්නට ඇත්ද? එහෙත් හැමටම  එවැනි අපුර්ව චරිත වදන් වලට පෙරලා සිත්  සතන් වල ජීවමාන කිරීමට නොහැකිය. 

මේ පොත ඔබේ සුපුරුදු වට්ටෝරුවේ පොත ක් නොවේ. එනිසාම හා තරිඳු ශ්‍රී ලොකු ගමගේ යනු පොත් සම්මාන දෙන කුලක වල නැති කතුවරයෙක් නිසා මේ පොතට සම්මානයක් නම් සමහර විට ලැබෙන්නේ නැති වනු ඇත. ලැබෙන්නේ නම් වඩාත් සතුටු වන්නේ මමය. එසේ  කුලකයකට අයත්  නැති පිටින් ඉන්න ග්‍රන්ථ කතුවරයන් මම හඳුන්වන්නේ වෙඩිවර්ධන කුලකයට අයත් අය  කියාය.   ඉතින් සමහර විට හිටි හැටියේ සම්මාන උත්සව කරන්නට ගොස් ඇණගත් ලැජ්ජා නැති එකෙකු නිසා මම  ගමයා පොත් සම්මාන යනුවෙන් විකල්ප  උළෙලක් පටන් ගත්තොත් හොඳම විකල්ප නවකතාවට හිමි සම්මානය  පිදෙන්නේ තරිඳු ශ්‍රී ලොකු ගමගේ ගේ "ජිවිතයේ ඔයිල් පැල්ලම් " පොතටය.

තරිඳු  ශ්‍රී ලොකු ගමගේ වෙනුවෙන් ඔස්ටින් හීලියක පින්තුරයක් සමග මේ ලිපිය අවසන් කරමි.




   

Sunday 11 July 2021

කොතලාවල පනත හා නිදහස් අධ්‍යාපනය

මට ඔය පහල තියෙන පණත ගැන විස්තරය යාළුවෙක් එව්වේ. මම මේ පනතට පක්ෂත්  නැහැ විපක්ෂත් නැහැ. දන්නා කරුණු ප්‍රමාණය අඩු බවයි හැඟෙන්නේ.


මට ප්‍රශ්න  කිහිපයක් තිබෙනවා. දන්නා කෙනෙක් පිළිතුරු ලියන්න.

1. දැන් මේ ලියල තියෙන විධිහට මේක අදාල වෙන්නේ කොතලාවලආරක්ෂණ විද්යාල පනතට විතරක් නෙමේද? ලංකාවේ හැම විශ්ව විද්යාලයටම බල පානවද ?
2. මේකෙන් ලංකාවේ නිදහස් අධ්‍යාපනය අහෝසි වෙන්නේ කොහොමද?
2. a එකේ පන්තියේ සිට උසස් පෙළ දක්වා වන නාමික නිදහස් අධ්යාපනය අහෝසි වෙනවද (ටියුෂන් සහිත)?
2. b ටියුෂන් තහනම් වෙන්නේ නැත්ද?

3. විශ්ව විද්යාල පනත වෙනස් වෙනවද?

4. නැවතත් වෛද්‍ය වෘත්තීය පමණක් රැක ගන්න කරන සටනක්ද? එහෙනම් වෛද්ය සංගමය පෙරමුණ ගත යුතු නැත්ද?
6. එහෙම නැත්නම් විදේශ සංචිත නැතිව, රජය ගෙනයන්න මුදල් නැතිව කඩා වැටී තිබෙන රජය කොහොම හරි ගෙනියන්න ගෙනාපු උප්පරවැට්ටියක්ද?
(රජයට ණය ගෙවන්න වත් මුදල් නැහැ කියන එක පැහැදිලියි)

7. අවුරුදු දෙක තුනක් ජවිපෙ, පෙසප, වමේ චීන සයිඩ් එක මේ විරෝධතාවල ඇදන් ගියාට පස්සේ මේක දීල දාල ආණ්ඩුව ශේප් වෙන්න ගෙනියන ගේම් එකක්ද? ------🧐

8. මට පෙනෙන විධිහට බරපතලම ප්රශ්නය මිනිසුන්ට රස්සාවක් කර ගන්න බැහැ. මිනිසුන් ගේ අතේ සල්ලි නැහැ. රජයට මුදල් නැහැ. උද්ධමනය වැඩියි. රටෙන් භාගයක් දැන් දුප්පත් වෙලා. එහෙම වෙලාවක වම අවුළුවන එක තමා ගැලවිජ්ජාවට කරන්න පුළුවන් හොඳම දේ කියන එක වගේ අත්දැකීම් මිට පෙර තිබුනේ නැත්ද?

9. විමල් සහ උදය කරන්නේ රඟපෑමක් නෙමේද?


උපුටා ගැනීම (ෆේස්බුක්) 

මහා වෙදමහත්තයා Maha Wedhamahaththaya

01. උසස් අධ්යාපන අමාත්යාංශය
02. අධ්යාපන අමාත්යාංශය
03. විශ්ව විද්යාල ප්රතිපාදන කොමිෂන් සභාව
04. වෘත්තීය ප්රමිති ආයතන (උදා. SLMC, IESL)
05. විශ්ව විද්යාල සනාතන සභාවන් හා පාලක සභාවන්
මේ ඔක්කොම ආයතන වල බලය, එක මණ්ඩලයකට දුන්නොත් කොහොමට තියෙයිද?
ඒ මණ්ඩලයේ 10 දෙනා ගෙන් 5 දෙනෙක් හමුදා නිලධාරීන්. දෙදෙනෙක් ආරක්ෂක ඇමතිගේ ලේකම්ලා. ඉතුරු තුන් දෙනාත් අඩු වැඩි වශයෙන් දේශපාලන පත්වීම්.
තාම ඉවර නෑ... තව තියෙනවා.
1. දැනට ලංකාවෙ ක්රියාත්මක වෙන 1978 විශ්ව විද්යාල පණත මේ මණ්ඩලයට බලපාන්නෙ නෑ.
2. ඕනෑම පුද්ගලික විශ්ව විද්යාලයකට, මේ මණ්ඩලයෙන් අනුමැතිය අරගෙන, කොතලාවල විශ්ව විද්යාලයට අනුබද්ධ වෙලා "උපාධි පිරිනැමීමේ තත්වය" (Degree Awarding Status) ලබා ගන්න පුලුවන්.
3. මේ මණ්ඩලයෙන් අනුමත කරන උපාධි වලට ප්රමිති ආයතන වල පිලිගැනීමක් අවශ්ය නෑ. තමන්ගෙ උපාධි ප්රමිතිය හොඳයි කියලා ඒ මණ්ඩලයටම තීරණය කරන්න පුලුවන්.
4. මේ මණ්ඩලය වග කියන්නෙ ආරක්ෂක ඇමතිට විතරයි. මුදල් නියාමනය, විගණනය තමන්ම කර ගන්නවා. තමන්ගෙ උපාධි වල මිල තීරණය කරන්නෙත් මේ මණ්ඩලය විසින්මයි.
5. විශ්ව විද්යාල විතරක් නෙමෙයි, පාසල් පිහිටුවන්න, ඒවල විෂය නිර්දේශය තීරණය කරන්න, විභාග පවත්වන්නත් සම්පූර්ණ බලතල මේ මණ්ඩලයට හිමියි. අධ්යාපන අමාත්යාංශය අදාලම නෑ.
6. තව ලස්සන වගන්තියක් ගැනත් කියන්න ඕනෙ.
විශ්ව විද්යාලය ඇතුලෙ සිදුවෙන ඕනෙම විරෝධතාවයක්, ""තමන්ට සුදුසු යැයි හැඟෙන ඕනෑම පියවරක්"" අරගෙන මර්දනය කරන්න ආරක්ෂක ඇමතිට සම්පූර්ණය බලය තියෙනවා. ඒ කියන්නෙ ඕනෑම අසාධාරණයකදි ඔලුව නමාගෙන ඉන්න පුලුවන්.
හරි සංතෝසයි නේද?
මේ දවස් වල, කඩිමුඩියේ පාර්ලිමේන්තුවේ සම්මත කර ගන්න හදන "කොතලාවල ආරක්ෂක විශ්ව විද්යාල පණත" ගැන සාරංශයක් තමයි මේ කිව්වෙ.
ලංකාවෙ දේශපාලකයන්ට සම්පූර්ණයෙන් විනාශ කරන්න බැරි උනු දේවල් 2යි තියෙන්නේ.
01. නිදහස් අධ්යාපනය
02. නිදහස් සෞඛ්
මේ පණත සම්මත උනොත්, මෙතනින් එකක් ඉවරයි. හැබැයි අධ්යාපනය විකිණීමටත් වඩා භයානක දෙයක් මෙතන වෙනවා. ඒ අධ්යාපන මිලිටරීකරණය. පාසල් මට්ටමේ ඉඳලා විශ්ව විද්යාල මට්ටම දක්වාම.
නිදහසේ හිතන්න පුලුවන්, හරි වැරැද්ද දකින්න පුලුවන් මිනිස්සු වෙනුවට, අණ පිලිපදින, කොන්ද කඩපු පරම්පරාවක් ඉස්සරහට දැක ගන්න පුලුවන් වෙයි...
උපුටාගැනීමකි

Thursday 8 July 2021

ජර්මන් ජාතිකයාගේ ලංකා සිහිනය


මට අමුතු ඉල්ලීමක් ලැබුනා මගේ ජර්මන් නෑන කැතරින් ගෙන්. (බිරිඳ ගේ නංගි )  සිංහලෙන් උපන් දින සුභ පැතුමක් ලියල දෙන්න කියල.  එයාගේ ස්වාමියා ගේ ගමේ ඉන්න කෙනෙකුගේ පනස් වැනි උපන්දිනයට.  එයාට  මැරෙන්න කලින් කරන්න ඕන බකට් ලිස්ට් එකක් තියනවාලු. ඉටු කරගන්න තියන හීන ටිකක් කියමු. ඉන් ප්‍රධානම එකක් තමයි ශ්‍රී ලංකාවට යන එක.

  (මේ පැත්තේම තමයි ඉන්නේ මම කලින් කතාවක ලීව ලංකාවට හැම අවුරුද්දෙම නොවරදවාම යන ජර්මන් පවුල ඉන්නේ. මුලින් මවයි, පියයි කසාද බඳින්න අවුරුදු 25 කට කලින් ගිය ගමන දැන් එයාගේ දූ දරුවොයි, දූ දරුවෝ බැඳපු අයයි එයාලගේ ළමයි සහ දෙමාපියන් වශයෙන් ගුවන් යානයක තුනෙන් එකක්  පමණ සීට් වෙන්  කරගෙන ලංකාවට  යන වන්දනා ගමනක් වගේ ඒක. )

ඉහින් මම කියන කෙනාට යාලුවෝ ටික සල්ලි එකතු කරලා ටුවර් පැකේජ් එකක් අරන් දෙන්න යන්නේ පනස් වැනි උපන් දිනයට  ලංකාවට යන්න. ජර්මන් කෙනෙකුට ලංකාවට යන්න සල්ලි නැත්ද කියල හිතෙන්න පුළුවන්නේ.

මෙයා ඉන්නේ මම 2019 වගේ ලියපු ලිපියේ ඉන්න තවමත් යන්තමට සමාජවාදය තියන් ඉන්න ගමේ (පරණ නැගෙනහිර ජර්මනිය). මම ලීවේ වැඩිය මුදල් භාවිතයක්  නැති ගමක් ඒක කියල.
මේ තියෙන්නේ ඒ ලිපිය. ධනවාදී රටක සමාජවාදී ගම 

යහළුවෝ කට්ටියම මුදල් එකතු කරලා මගේ හීනය සැබෑ කරන්න ලංකාවට යවන්න ඉන්නේ.

කෝවිඩ් වැඩේ පිළිවෙලක් වුනහම යනවලු.

මේ මම ලියල යවපු එක.  ගොඩක් ලිව්වේ නැහැ , ඉඩ ටිකක් මදි කියල. හැමෝම උපන් දින සුභ පැතුම් පතේ අත්සන් කරන නිසා.

****************************

පතන්නෙමු ඔබට 
සුභම සුභ  පනස් වැනි උපන් දිනයක්
එසේම අඩ සිය වස 
සමරන්නට පිදෙන 
මේ තිළිණය 
සුන්දර ශ්‍රී ලංකාවට සුභ ගමනක් 

රුසියානු බ්ලොගර් තරුණියකගෙන් ඇගේ මිතුරිය අසන්නේ ගවුම ඉවත් කර පිහිනුම් ඇඳුමින් පෙනී සිටින ලෙසය. ඒ ඇයට වීඩියෝ කිරීමටය. ට්‍රොලි බසයේ කොන්දොස්තරවරිය තරුණිය වන කාත්‍යා ට බැණ වදින්නේ ඇය මුඛ ආවරණයක් නොපැළඳ සිටීම ගැනය. බසයේ අනිත් මගීහු නෑසුන සේ සිටිති.😏
බ්ලොගර්ස් ලා මේවා ලංකාවේ කිරීමට නොයන්න


Sunday 4 July 2021

දොස්තර බෙහෙත් සහ විනෝදයට බෙහෙත් ගිලින ලාංකිකයෝ


කලින් ලිපියේ ලීවේ මා ලංකාවට ගියේ මවට හෘදයාබාධයක් වැළඳීම නිසා කියාය. නමුත් සත්‍යය ඊට වඩා මදක් වෙනස් එකකි. හෘදයාබාධය වැළඳෙන විට ඇය රැගෙන ගොස් තිබුනේ ළඟම තිබු පෞද්ගලික වෛද්‍ය මධ්‍යස්ථානයක් වෙතය. එහි කල ඊසීජී පරීක්ෂාවකින් පසු ඇය **** දිස්ත්‍රික් රෝහලේ අයිසීයූ යුනිට් එකටද එතැනින් රෝහලේ ප්‍රසිද්ධ * වන වාට්ටුව ටද  ඇතුලත් කරන ලදී. මේ වාට්ටුවේ වෛද්‍යවරුන් ද හෙදියන්ද කරුණාවෙන් කටයුතු කරන බවටත් බොහෝ ලෙඩුන් එතැනින් පණ බේරාගෙන එන බවත් කියති.මාද  දුටුවේ එම වාට්ටු ඉතාමත් පිරිසිදු බවත්ය හොඳින් පාලනය වන බවත්ය. එසේම *** වාට්ටුවද එවැනි පිරිසිදු එකකි. එහි වැසිකිලි පවා පිරිසිදුය. ඇත්තටම රෝහලද හොඳින් ක්‍රියාත්මක වන බව  කිව යුතුය.  


හෘදයාබාධය වැළඳුන මවට ICU යුනිට් එකේදී  රුපියල් අසූදහසක් වටිනා එන්නතක් විද්ද බවට එහි සිටි තරුණ වෛද්‍යවරයා කී බව මව මට පැවසුවාය. හෘදයබාධයක දී රුධිරය කැටි ගැසීම වළකාලන්නට බෙහෙතක් දෙන්නට ඇති මම අනුමාන කළෙමි. බොහෝ විට මේවා එන්නත් වශයෙන් දෙන ත්‍රෝම්බෝලයිටික් හෝ ෆ්‍රිබ්රිනොලයිටික්  වර්ගයේ බෙහෙතක් වන්නට ඇත.ඒවා දෙන්නේ රුධිරය  කැටි  ගැසීමට හේතුවන ෆිබ්‍රින් නම් ප්‍රෝටීනය විනාශ කරන්නට බව සඳහන් වේ.  

රෝහලින් සුවය ලබා මව නිවසට පැමිණ පසුව ඇය යලිත් රෝගාතුර වූවාය. රෝග ලක්ෂණ ඇය ට හෘදයාබාධය ට කලින් තිබූ සමහර රෝග ලක්ෂණ බව මට පසක් වුනි.  බොහෝ අය මට කිවේ පෞද්ගලික රෝහලකට වහා ඇතුලත් කරන ලෙසය. මගේ පියාගේ අසනීපය සහ හදිසි අභාවය නිසා මට ඒ පැත්තෙන් ප්‍රශ්නයක් තිබේ. ඒ ගැන මෙහි ලියා ඇත එසේම මවටද එවැනි ප්‍රශ්නයක් දෙකක් තිබුණි. වසර ගණනකට පෙර පෞද්ගලික රෝහලකට පරික්ෂාවකට ඇතුලත් කර තිබියදී ඇයට කිසියම් බෙහෙතකට අසාත්මිකතාවයක්  ඇතිව තිබේ. ඇය හදිසි අනතුරු කාමරයට ගෙන (ICU) ප්‍රතිකාර කළ වෛද්‍යවරු ඇය මෙලොවට නැවත ගෙනාහ. රෝහලේ පරිපාලනය සිදුවූ කිසිවක් එතන සිටි ඥාතීන් ට පැහැදිලි කලේ නැත. ඔවුන් කළේ අසාමාන්‍ය මුනිවතක් රැකීමය. අප සිදුවූයේ කුමක්ද කියා දැන ගත්තේ හඳුනන හෙද සොයුරියක් මාර්ගයෙනි. එනිසාම  පෞද්ගලික රෝහලකට ඇතුළු වීමට ඇය තදින් අකැමැත්ත දක්වන්නීය.

ගිය වර ලංකාවට පැමිණි වෙලේ මිතුරන් ගේ අවවාදයන්ම නිසා මම  ඇය අර්ධ පෞද්ගලික,  රජයේ රෝහලකට ඇතුළත් කලෙමි. එය කිසියම් මුදල් ප්‍රමාණයක් ගෙවිය යුතු රජයට අයත් රෝහලකි. ඉන්පසු ඇයට එහි සායනික සේවාවන්ට යාමට සිදුවිය. තරමක මුදලක්  ගෙවා වාහනයක හෝ ත්‍රී විලයක  ඉංගිරියේ  සිට කොළඹ පිහිටි එම රෝහලට යාමට සෑහෙන වෙලාවක් ගතවේ. ඇය මට කීවේ එම රෝහලේ වෛද්‍යවරු ඇය කියන කිසිම අමාරුවක් ගණන් ගන්නේ නැති අතර සායනික පොතේ කළින්  පිටුව බලා ඔහේ එම බෙහෙත්ම  ලියා දෙන බවය. මේ නිසා ඇය නිවස අසලම සිටි පෞද්ගලික වෙදකම් කරන වෛද්‍ය වරයාගෙන් ද ඔහු නැතිනම්  **** හෙල්ප් හි වෛද්‍යවරුන් (පෞද්ගලික  සේවා) ගෙන්ද නොයෙකුත් අමාරු වලට බෙහෙත් ගත්තාය. ඇයට තිබුනේ  මොනවාට බෙහෙත් බොනවාද යන්න නිනව්වක් නැති අන්දමේ බෙහෙත් ගොඩකි. දිය වැඩියාවට , අධික රුධිර පීඩනයට, කොලෙස්ටරෝල් වලට දෙන බෙහෙත් ද  ඒ අතරම වීය. හෘදයාබාධය හැදුනේ මේ අතරය.

මේ **** රෝහලෙන් රෝගීන් ගේ  ජීවිත හදිසි තත්වයෙන් බේරාගත් පසු  පෞද්ගලික රෝහලකට ගොස් හද සැත්කමක් (ස්ටෙන්ට් දැමීම වැනි) පෝලිමකින් තොරව කර ගත හැකිය.  

මගේ මවද හදිසි තත්වයෙන් සුවය ලබා මේ වාට්ටුවෙන් ගියද ඇය දිගින්  දිගටම අසනීප තත්වයෙන් පසු වූවාය. හැමෝම කීවේ සුපුරුදු පරිදී මව  වහාම හොඳ  පෞද්ගලික රෝහලකට ඇතුළු කරන ලෙසයි.  බොහෝ මිතුරු මිතුරියන් මට හෘද රෝග පිලිබඳ විශේෂන්ඥ වෛද්‍යවරුන්ගේ නම් පවා එවූහ.  

නමුත් මට තිබුනේ සැකයකි. මවගේ සමහර රෝග ලක්ෂණ හෘදයාබාධයකට ලක්වූවක ගේ නොවීම එයට හේතු විය. ඇයට කෑම ගැනීම අප්‍රිය වී තිබුණි. එසේම වමනය, පාචනය, හිස රදය ,ආදිය එකවර තිබුණු  අතර කොහොමත් එක ඇසක් පමණක් පෙනෙන ඇයගේ එම ඇසේ පෙනීමද දුර්වල විය. එසේම නිතර සිටියේ අවුල් සහගත තත්වයෙනි. (confused state) නිතරම වමනයට  (nausea)එන බවද කීවාය.  (එක ඇසක් පමණක් පෙනෙන්නේ අක්ෂි රෝහලේ කරන ලද සැත්කමක වරද්ද්දක් නිසාය)  හෘදයාබාධය එතරම් තද  එකක් නොවූ බවත්   ඇයට ස්ටෙන්ට්  එකක් දැමීමට අවශ්‍ය නම්  ඇගේ කොලෙස්ටෙරෝල් තත්වය හා  අධික රුධිර පීඩනය ඉහල යාම මිස මෙවැනි ලෙඩ තිබිය නොහැකි යයි මට සිතුනි. ඉන්පසු පළාතේ පෞද්ගලික වෛද්‍යවරයෙකු ලඟට ගිය පසු ඔහු වමනය හා කෑම අරුචියට යම් බෙහෙතක් දී අනිකුත් රෝග ලක්ෂණ ඇය තමන්ට අවධානය ගන්නට කරන ඒවා බව පවසා තිබුණි. මගේ සහෝදරයා හා ඇගේ බිරිඳට මගේ මවට කිසියම් කෑමක් කැවීමද බරපතල ප්‍රශ්නයක්  විය.

මට මවට දුන් බෙහෙත් ගැන සැක  ඇතිවූ නිසා සහෝදරයාට වට්ස්ඇප් හරහා බෙහෙත් තුණ්ඩුව එවන ලෙස කීවෙමි.  මා රැකියාව කරන සමාගමේ නයිජල් නමැති ඉංග්‍රීසි ජාතිකයා ගේ බිරිඳ ජූලියා  ප්‍රධාන හෙද නිලධාරිනියකි. ඔහුට හෘදයාබාධයක් වැළඳුන මුල්ම  අවස්ථාවේම එය හඳුනාගෙන රෝහලට ගෙනගොස් ජීවිතය බේරා ගත්තේ ඈය.  මට බෙහෙත් තුණ්ඩුව එවන ලෙසට කී ඈ ,   විශේෂන්ඥ වෛද්‍යවරයෙකුට එය පෙන්වා මා අමතන බවත් කීවාය.

    මට කතා කළ ජූලියා පැවසුවේ විශේෂන්ඥ වෛද්‍යවරයා  බෙහෙත් වර්ග කිහිපයක්  පෙන්වා මේවා  එකවර රෝගියාට දීම අනවශ්‍ය විය හැකි බවත් ඩිගොක්සින් වලින් ඇතිවන අතුරු ආබාධ මගේ මව දක්වන රෝග ලක්ෂණ වලට සමාන බවත්ය.  එම බෙහෙත්  වර්ග තුන, බ්ලඩ්  ක්ලොට් හැදීම වලක්වන ක්ලොපිඩොග්‍රෙල්  (clopidogrel)  (මේවා ස්ටෙන්ට් දැමූ පසු එම  රෝගීන්ට ලබා දේ ) , හදවතේ අක්‍රමවත් හද ගැස්ම වැළැක්වීම සඳහා දෙන  ඩිගොක්සින් (digoxin) සහ හදවතේ වේදනාව සමනයට සහ ඇන්ජයිනා (angina) තත්වයට දෙන ඖෂධයක් වූ නිකරන්ඩිල් ය. ඇන්ජයිනා යනු හෘද පේශි වලට රුධිරය සැපයීම අඩු වීම නිසා ඇතිවන වේදනා සහගත තත්වයයි. මිට අමතරව අධික රුධිර පීඩනය ට හා ඇන්ජයිනා තත්වයන්ට දෙන වෙරපමිල් (verapamil) ද විය. මේ වෙරපමිල් ඩිගොක්සින් මෙන් අක්‍රමවත් හද ගැස්ම සඳහාද  දෙන ඖෂධයකි. (treat irregular heartbeats).  එනොක්සපරින් නමැති ඖෂධය බ්ලඩ් ක්ලොට් වැළැක්වීමට දෙන තවත් ඖෂධයකි. එයද නියම කර තිබුණි.

මීට අමතරව කොලේටරෝල් (ඇටෝර්වස්ටටින්) , දියවැඩියාව  (මෙට්ෆෝමින්) හා ඇස්පිරින් ආදී  සාමාන්‍යයෙන් නියම කරන ඖෂධ ද  තිබුණි. එංගලන්තයේ වෛද්‍යවරයා ජූලියා හරහා පැවසුවේ ඖෂධයක් නැවැත්වීම සුදුසු බවත් වෛද්‍යවරයා සමග කතාබස්  කර එය කිරීම  වඩා යෝග්‍ය  බවත්ය.  මා  ශ්‍රී ලංකාවට පැමිණියේ  ඉන් පසුවය. 

බේරුවල සිනමන් බේ හි නිරෝධායනය අවසන් වූ වහාම මම මව සමග ගොස් විශේසන්ඥ වෛද්‍යවරයා හමු වුනේ ඔහු නිතර පැමිණෙන පෞද්ගලික සායනයේ දීය. මම  මුලින් කතා කලේ සිංහලෙනි. ඔහු මුව ආවරණ පළඳින ලෙස මට දැන්වූයේය. එහි වරදක් නැත. නමුත් මා කීදේ නොතේරුන බවක් පෙන්වූ පසු  මම මුඛ ආවරණය පහත හෙලු විට නැවතත් මුඛ ආවරණය පළඳින ලෙස කෙටි දෙසුමක් කළේය.මමත් මවත් සිටියේ  ඔහුත් ඔහුගේ සහයිකාවත් අතර මීටර එකහමාරක දුරක ප්ලාස්ටික වලින් සෑදු ආවරණයක එපිටය. මුඛ ආවරණය පහත් කිරීමට මා  තීරණය කලේ එබැවිනි. බෙහෙත් වලින් ප්‍රශ්න ඇතැයි මා කී පසු නියම කළ බෙහෙත් නොගෙනාවේ මන්දැයි ඔහු මදක් සැරෙන් ඇසීය. මගේ මව බෙහෙත් මල්ල ගෙන යාමට තැත් කලත් මා එය වැළකුවේ බෙහෙත් තුණ්ඩුව තිබෙන බැවිණි. 

මව දැන් බියවී සිටියාය. ඇය "මම ඔයාට  කීවේ බෙහෙත් පෙති ගේන්න කියල. කෝ කියන දේ ඇහුවේ නැහැනේ . දැන් යමු, දොස්තර මහත්මයා බනී දැන් "    යනුවෙන් ඇවිටිලි කරන්නට ගත්තාය. මවගේ  කරදරය නිසාත්,  ඉවසීමෙන් පිළිතුරු දීම සඳහා මම රැජිනගේ භාෂාවට බැස්සෙමි.  මා වෛද්‍යවරයාට පැවසුවේ අප  ළඟ බෙහෙත් තුණ්ඩුව (prescription) තිබෙන බවත් මගේ මොබයිල් එකේද එහි  පින්තුරයක් ද තිබෙන බවත් රෝහලෙන් වැරදි බෙහෙත් නොදී ඇත්නම් එයින් ඔබලා දුන් බෙහෙත් මොනවා දැයි දැනගත හැකි බවත්ය. ඔහු මදක් නිහඬ විය.

ඉන්පසු මම එංගලන්තයේ විශේෂන්ඥ වෛද්‍යවරයා  පැවසූ ආකාරයට ඩිගොක්සින් හි අතුරු අබාධ මවට ඇති බව පැවසුවෙමි. ඔහු එය පිලි ගත්තේ නැත.ඔහු පැවසුවේ  ඔහුගේ දශකයක ට වඩා ඇති  වෛද්‍ය අත්දැකීම් වල එසේ නොදුටු බවයි. ඉන්පසු මම ඔහුගෙන් ඇසුවේ වෙරපමිල් වැනි ඒ දේම ඉටු කරන බෙහෙත් දී ඇති නිසාත් බ්ලඩ් ක්ලොට් වලටද එකම බෙහෙත්ද දී ඇති නිසාත් එසේ එකම බෙහෙත් දුන්නේ කුමක් නිසාද  යන්නය. එසේම හැකිනම්  එය නැවැත්වීමට හැකිද යන්නය.      

බෙහෙත් ලියන්නේ  ඔහු නොව කනිෂ්ඨ වෛද්‍යවරුන්  බව පැවසූ ඔහු බෙහෙත් වල නම් කියා ඇසූ නිසාදෝ   ඔහුගේ ටැබ් එකෙන් කිසියම් දෙයක් පරික්ෂා කළේය. මට සිතුනේ ඔහු ඩිගොක්සින් වල අතුරු ආබාධ සොයන්නට ඇති කියාය. අනතුරුව බොහෝ නිහතමානිව විශේෂන්ඥ වෛද්‍යවරයා පැවසුවේ මව පසුදාට ඔහුගේ වාට්ටුවට  රැගෙන එන ලෙසය. බෙහෙත් නවතා පරීක්ෂා කර බලමු යයි ඔහු සන්සුන්ව පැවසීය.

එදා සවස මම මවට  ඩිගොක්සින් නොදී සිටියෙමි. උදයේ වාට්ටුවේදී සියලු බෙහෙත් නැවත්වූ පසු දහවල් වන විට මා කෑම සහ සුප් රැගෙන යන විටත් දින ගණනාවක්  කෑම  නොකා සිටි මව,  බඩගිනි යයි කියා වාට්ටුවෙන් දුන් සෝයා මස් සහිත බත ඇය බලා ගැනීමට සිටි කාන්තාවගේ අතින් කවා ගෙන තිබුණි. 

වාට්ටු රවුමේ යන අර විශේෂන්ඥ දොස්තර  මහතා පැමිණ ඇය බලා "පුතා ටිකක් කතා කරනවා වැඩි නේද" යයි විමසා තිබුණි.  ඉන්පසු අම්මාගෙන් මගේ රැකියාව, ඉන්නේ කොහෙද ආදී විස්තර අසා තිබුණි.  මම වාට්ටුවට යන විට හෙදියන් දෙතුන් දෙනෙක් ම සිනහ මුසු මුහුණින් කතා කළහ. නමුත් දොස්තර මහතා නම් මුහුණ වත් බැලුවේ නැත්තේ ඇයිදැයි මම නොදනිමි. කෙසේ හෝ මෙට්ෆෝමින් සහ ඩිගොක්සින් යන බෙහෙත් වර්ග දෙකම ඔවුන් නවතා  තිබුණි. ඇත්තම පැවසුවොත්  අඩුවෙන් කන කෙනෙකුට ලේ පරික්ෂා  නොකර  දිගින් දිගටම  මෙට්ෆෝමින් දීමේ තේරුමක්  නැත. ඔවුන් මුලින්ම කලේ ලේ පරික්ෂාව බැවින් සීනි අඩු බව වටහා ගන්නට ඇත. හොඳටම සුවවී පහුවදා  ටිකට් කපාගෙන ඇය ගෙදර ගෙන ආවෙමි. බොහෝ අය කීවේ සියල්ල ලියා අවසන් වනතුරු මට පහුවද   හවස් වනතුරම  රෝහලේ කල් මරන්නට වනු ඇත කියාය.  නමුත් වාට්ටුවේ සිටින තරුණ වෛද්‍යවරියක් දහවල් දොළහමාරට පමණම සියලු ෆයිල් ආදිය ලියා අවසන් කර මව රැගෙන යාමට ඉඩ දුන්නාය.

අප හවස හතරට පමණ රැගෙන යාමට සිටි හඳුනන ත්‍රී වීල් මල්ලි විමසුවේ "සර් මෙපමණ ඉකමනින් දොළහමාරට  ආවේ කොහොමද කියාය". මා ඔහුට කිවේ රැජිනගේ භාෂාවෙන් තවමත් ලංකාවේ වැඩ කිරීම පහසු බවයි. 

මේ කතාවේ අනිත් පැත්ත ලංකාවේ මිනිසුන්ගේ අසීමිත බෙහෙත් භාවිතයයි. රෝහලින් දුන් පළමු බෙහෙත් ටික අවසන් වන විට අම්මා ළඟම  සිටින වෛද්‍යවරයා හමුවී බෙහෙත් ගන්නේ නැත්දැයි ඇසුවාය. මම ඇගෙන් ඇසුවේ රෝහලින් නිවැරදිව දවස් ගණනට බෙහෙත්දී  ඇත්නම් තව බෙහෙත් හොයන්නේ මොන මගුලටද කියාය. දැන් ඇය ගන්නේ නියමිත් බෙහෙත් පමණි. අර අර්ධ රජයේ රෝහලින් රෝගියා නොබලා , මුදල්ද ගෙවා ලබා ගත් ඖෂධ සියල්ල විසි කරන්නට සිදු වුනි.

මේ කතාව අසු මගේ යහළුවෙකු පැවසුවේමෙවැනි  දෙයකි. ඔහුගේ බිරිය අනුරාධපුර රෝහලේ රැකියාව කරද්දී කියා ඇත්තේ  එහි එන මහලු රෝගීන් වැඩි දෙනෙකු එන්නේ පුරුද්දට බවය. ඇය ඔවුන්ට සමහර විට පැනඩෝල් ගන්නට බෙහෙත් ලියාදී තිබේ. ඇය වරක එසේ පැමිණි ආච්චි අම්මා කෙනෙකු ගේ  නිවස දැක එහි ගොඩ වැදී  තිබුණි. ආච්චි අම්මා රෝහලින් නොමිලේ  දී තිබූ බෙහෙත් පඬුරු සේ  රෙදි වල ගැට ගසා  වත්තේ මල් පඳුරු හා ගෙයි තැන තැන  එල්ලා තබා තිබු බව  ඇය දැක තිබේ.

එසේම කිසියම් වෛද්‍යවරයෙකු බෙහෙත් වර්ග කිහිපයක් නොදෙන්නේ නම් ඔහු එතරම් හොඳ වෛද්‍යවරයෙකු නොවේය යන මතයද ශ්‍රී ලාංකිකයන් අතර පවතී. එවැනි වෛද්‍ය්යවරයෙකු ලඟට ඉන්පසු යන්නේද නැත. එසේම සාමාන්‍ය හෙම්බිරිස්සාවක ට ද අමොක්සිලින් වැනි ප්‍රතිජිවක ඖෂධ වෛද්‍ය උපදෙස් ඇතිව හෝ නැතිව ගන්නටද බොහෝ අය පුරුදු වී සිටිති. එංගලන්තයේ වෛද්‍යවරු ප්‍රතිජීවක ඖෂධ එකවරම නියම කරන්නේ නැත. ඒවාට පුරුදු වීමෙන්  බැක්ටීරියා රෝග මර්දනයට එය බාධාවක් වන බැවිනි.  

මෙයට ප්‍රථම  2010 වසරේ ලංකාවට පැමිණ ආපසු ලන්ඩන් යාමට නොහැකිව සති දෙකක් වැඩිපුර  ලංකාවේ නතර වී සිටින්නට වුනේ අයිස්ලන්තයේ ගිනි කන්දක් පුපුරා ගොස් යුරෝපය දුමාරයකින් වැසී ගිය නිසාය. අපි කටුනායක ගුවන් තොටුපල  අසල මිතුරෙකුගේ නිවසක හදිසියේ  නතර වුනෙමු.  මිතුරාගේ නිවසේ ෆෑන් තිබුනද බොහෝ රස්නය සහිත එකක් වූයේ අවට ගස් වැල්  නැති නිසා මෙන්ම එය කොන්ක්‍රීට් බිත්ති වලින් ආරක්ෂා කාරී ලෙස නිමවා තිබු නිවසක්නි සා විය හැක. අපේ වැඩි මහල්  දියණිය ශනායා හදිසියේ අසනීප වුනේ තද උණක් සෑදීමෙනි. මීගමුවේ පෞද්ගලික රෝහලකට ගෙන ගිය විට ඇයට ඩෙංගු සඳහා රුධිර පරීක්ෂාවක් කර එය නැති බව පවසා එහෙත්බෙ හෙත් වර්ග අටක් පමණ වෛද්‍යවරිය නියම කලාය. රුපියල්  දෙදාහක්  පමණ ගෙවා ඒවා මිලයට ගත්  පසු ඒවායේ නම් වත් ලියා තිබුනේ නැත. අප මේ බෙහෙත් දරුවාට දීමට මැලිවූ නිසා වෛද්‍යවරියව නැවත  හමු වුනෙමු. ඇය පැවසුවේ බෙහෙත් වර්ග දෙකක් ඩෙංගු සඳහාත්  තව බෙහෙත් වර්ග ඇඟේ දුර්වල කමට ආදී ලෙසටත්ය. ඩෙංගු නැති රිධිර පරීක්ෂණයෙන් තීරණය කළ පසු ඒවා දෙන්නේ ඇයිදැයි අප ඇසුවෙමු. වැඩි හොඳට යයි ඇය පැවසුවාය.  ඇගේ කාමරයෙන් එලියට පැමිණි වහාම පැනඩෝල් පමණක් තබාගෙන ඉතිරි බෙහෙත් සියල්ල  රෝහලේම කුණු බක්කියකට දමා පිටව ආයෙමු .

අප කලේ මීගමුවේ රෙඩ් රෝස් නමැති හෝටලයේ, කාමර දෙකක් හා විසිත්ත කාමරයක් සහිත  හොඳින් වාතාශ්‍රය ඉඩ කඩ ඇති  අපාර්ට්මන්ට් එකක් වූ උඩම තට්ටුව කුලියට ගැනීමයි. එහි නැවතී  දිනකින් පමණ  දියණියට සුව විය. ඇය ඉන්පසු මුහුදු වෙරළේ අප සමග ක්‍රීඩා කිරීමට සහ දුව පැන ඇවිදී ටද වූවාය.  හොඳ වෙලාවට අර නියම කල අපද නොදන්නා  බෙහෙත් අප දුන්නේ නැත. මෙය හැම විටම කලයුතු දෙයක් නොවේ. අප වෛද්‍යවරයන් කෙරෙහි විශ්වාසය තැබිය යුතුය. එසේම ඔවුන්ද එම විශ්වාසය රැකිය යුතුය.  

 සමහර විට මහාචාර්ය නලින්ද සිල්වා මහතා බටහිර දේට  සහ බටහිර වෙදකමට විරුද්ධ මේ නිසා විය හැකිය.  නොදන්නා බෙහෙත් වර්ග දී හැදෙන අතුරු අබාධ වැඩි නිසා ඔහු ලංකාවේ බටහිර වෙදකමට විරුද්ධ යයි මට සිතේ. හේතුව, බ්‍රිතාන්‍ය යේ හෝ යුරෝපයේ මෙය සිදු නොවන නිසාය. ජර්මනියේ පවුලේ වෛද්‍යවරු (බටහිර )  සමහර විට හෝමියෝපති හෝ  ආයුර්වේද තේ වර්ග පවා නියම කරති. 

මට සිතෙන්නේ ශ්‍රී ලංකාවේ රෝගීන් සඳහා වන සංවිධානයක්/සංගමයක්  දේශපාලන භේදයකින් තොරව  පිහිටුවිය යුතු බවය. බ්‍රිතාන්‍යයේ දියවැඩියාව රෝගයේ සිට නොයෙක් පිළිකා වර්ග නිසා රෝගී වුනු අය සඳහාද එවැනි සංවිධාන තිබේ. ඔවුන් රෝගීන්  ගේ යහපත තකා කටයුතු කරති. ශ්‍රී ලංකාවේ  රෝගීන් ගේ යහපත සඳහා එවැන්නක් පිහිටුවීම ඉතා කාලෝචිත බව මගේ අදහසයි. 


(Clopidogrel is an antiplatelet medicine. It prevents platelets (a type of blood cell) from sticking together and forming a dangerous blood clot.

 Digoxin is a type of medicine called a cardiac glycoside. It’s used to control some heart problems, such as irregular heartbeats (arrhythmias) including atrial fibrillation. It can also help to manage the symptoms of heart failure, usually with other medicines.

Nicorandil is a medicine used to prevent and treat chest pain caused by angina.

Your doctor will usually prescribe nicorandil when other heart medicines have not worked or are not suitable for you.

Enoxaparin is an anticoagulant that helps prevent the formation of blood clots. Enoxaparin is used to treat or prevent a type of blood clot called deep vein thrombosis (DVT), which can lead to blood clots in the lungs (pulmonary embolism)

The Danger of Antibiotic Overuse

ඇන්ජයිනා 

පියා ගැන ලියූ ලිපිය.

Wednesday 23 June 2021

ශ්‍රී ලංකාවේ දේශපාලනය හා පුබුදු ජයගොඩ ගේ අහිංසක කම


පුබුදු ජයගොඩ ගැන ඇත්තටම දුක හිතෙන්නේ නැත්ද? ඒ ප්‍රශ්නය ඇහුවේ දීප්ති කුමාර ගුණරත්නය. කල්පනා කර බැලූවිට ඇත්තය. ලඟකදී ධීවරයන්ගේ උද්ඝෝෂණයට ගිය පුබුදුව පොලිසියෙන් අත් අඩංගුවට  ගැනීමට තැත් කළේය.  ධීවරයන් කෑ කෝ ගසා ඔහුව බේරා ගත්හ. මෙහිදී ධීවරයන් ගේ ප්‍රශ්නයට සමහරවිට  තත්පර දෙකක බුකියේ හා මාධ්‍ය වල ප්‍රසිද්ධියක් ලැබෙන්නට ඇත. ඊළඟ මැතිවරණයේදී ඔය ධීවරයන් ගේ චන්දය වත් පෙරටුගාමී සමාජවාදී පක්ෂයට ලැබෙන්නේ නැත. 

මේ ඉන්ධන ප්‍රශ්නය මෙන්ම අනිකුත් ප්‍රශ්න අටෝරසියක් හැමෝටම ඇත. මේ කාලයේ එදා වේල ටුවර්ස් රැකියා කරණ අය, පෞද්ගලික වෙළඳම් අනිකුත් අත්‍යවශ්‍ය නොවන රැකියා කරන බයියන්, ටොයියන් , ජෙප්පන්, පෙරට්ටන්  ආදී සියල්ල අමාරුවේය. අමාරුවක  නැත්තේ ඔය  රජයේ හෝ අත්‍යවශ්‍ය සේවා රැකියා කරන වෛද්‍ය, හමුදා, සෞඛ්‍ය සේවයේ අනිකුත් අය , දේශපාලකයන් හා සල්ලි තිබෙන අයත්, පිටරට සිටින ජෙප්පන්, පෙරට්ටන් ආදීනුත්ය. 

ඒ අතරේ ලංකාවේ දේශපාලනය ගැන යහපාලන ආණ්ඩුව පත් වූ පසු 2015 පෙබරවාරි 19 "පුටින් ගේ අපේ ටිකිරි මොළේ (හෙවත් රජ්ජුරුවන්ගේ ප්ලෑන)" ලියූ ලිපිය නැවත රිසයිකල් කර 2019 නොවැම්බර    19 දින "අපේ රජ්ජුරුවෝ" මැයින් පල  කලෙමි. නැවත එම ලිපියම අද 2021 ජුනි 21 රිසයිකල්  කරමි. ලංකාවේ දේශපාලනය ගැන පේන කීමට ජ්‍යෝතිෂය අවශ්‍ය නැත. 


2019-11-19 : 
අපේ රජ්ජුරුවෝ අද නැවත  දිවුරුම්  දුන්නේය. ඒ අගමැතිතුමන් වශයෙනි.
මම  යහපාලන ආණ්ඩුව පත්වුණු 2015 මාසයේ ඒ ආණ්ඩුවේ පිළිවෙත  දෙස බලා මෙම ලිපිය ලීවෙමි.

අද නැවතත් විපස්සයා විපස්සයාම  වී ඇත.

ඒ ප්‍රීතිය නිමිත්තෙන් 2015 පෙබරවාරි 19 ලියූ ලිපිය නැවත  පළ කරමි.
කියවා  සැනසෙන්න.
( දැන්වීමයි- මේවා ලිවීමට ජ්‍යොතිෂය උපයෝගී කර නොගත්තෙමි.)

එදා 2015 පෙබරවාරි 19 ලිපිය: (මේ ලිපියේ අනාවැකියේ පොඩි වරදක් තිබේ. එහි කියවෙන්නේ  ලේකම් කොලූ නැවත  ජනාධිපති වන බවයි. ඒ වෙනුවට ජනාධිපති වූයේ බාල සොහොයුරාය. ඉතිහාසය වෙනස් වනු ඇත.)

පුටින් ගේ අපේ ටිකිරි මොළේ (හෙවත් රජ්ජුරුවන්ගේ ප්ලෑන)

ඔන්න ඉතින් අපේ පුටින් උන්නැහේ දන්නවනේ රුසියාවේ. සෝවියට්  දේශය කාලේ  කේජිබී  ලෙෆ්ටිනන්ට් කෙනෙක්. පස්සේ ලෙනින්ග්‍රාද් (සාන්ත පිතර්බුර්ගය) පැත්තේ දේශපාලනේ කරලා යෙල්ට්සින් හරහා ඇවිත් ජනාධිපති වුණා. ඇස්වහක් කටවහක් නැහැ මන් මනාපය දෙන පොරක්. වෙන හේතුවකට නෙමේ වැටිලා තිබුන රුසියාව නැගිට්ටේවට. රුසියාව දියුණු රටක් වශයෙන් රුස්සට ජාතියේ ආඩම්බරය ඇතුව ජීවත් වෙන්න යලි ඉඩ සලසා දුන්නට. හැබැයි පොර මෙහෙමත් කලා. හොරකම් කර කර හිටි මදාවියෝ ටික තමන්ගේ යටතට අරගෙන ඒක  පිළිවෙලක් ඇතුව ගානට කරන්න හදල දුන්න, තමන්ට ගානක් එන විධිහට. දෙන්නේ නැති නහර කාරයන්ව එංගලන්තෙට පිටුවහල් කලා.  නාකි මිනිසුන්ව මරල උන්ගේ දේපල උස්සන එවුන්ව  අල්ලල හිරේ දාල ඒක  නවත්තල, උන්ට පැන්ෂන් වැඩි කරලා පාරවල් ටික අලුත් වැඩියා කලා රුසියාවේ, බෙදුම් වාදී චෙචේනියාවට කෙලින්ම බෝම්බ  දාල  හමුදා යවල මට්ටම් කරලා සාමය හැදුව,   අමෙරිකාවට කෝචෝක් එකක් එහෙම දාල  දැහැමෙන් සෙමෙන් වාර  දෙකක් හිටිය. පස්සේ ජනාධිපතිවරණේ  එනකොට පොර දැනගත්ත ආයි ඉල්ලන්න බැරි නීතියක් මේ යෙල්ට්සින් කියන වසවර්තිය දාල තියෙනවා කියල.

ඉතින් මොකද කරන්නේ. ටක් ගාල පක්ෂයක් ගත්ත සල්ලි වලට. මෙද්වෙදෙව් මලයට කිව්වා ජනාධිපති කමට ඉල්ලන්න කියල.  පූටින්  අය්යා  අගමැති කමට ඉල්ලුව. ඉතින්  අපේ නාමික ජනාධිපති ඉන්නවා මඟුල් ගෙවල් වලට යනවා එහෙම, කම්හල් අරිනවා පීත්ත  පටිය කපල හෙම වැඩ ගොඩයි.. පුටින් අගමැති රට පාලනය කළා. ඇමෙරිකන් කාරයා නම් වැඩිය කැමති වුනේ නැහැ. ඒත් ඔය අධිරාජ්‍යවාදියෝ කවුද ගණන් ගන්නේ. මෙන්න අවුරුදු 4 ගියා. ජනාධිපති හැටියට අවු 8 , අගමැති හැටියට 4 යි. 12 යි.  මෙන්න ව්‍යවස්ථාව වෙනස් කරලා ජනාධිපතිට අවුරුදු 6 ක් ඉන්න පනතක් ගේනවා. 2012 අගමැති පුටින් ආයේ  චන්දෙ ඉල්ලල ජනධිපති වුණා . අර කලින් කොමියුනිස්ට්  නායකයෝ මැරෙන  කන් හිටියේ එල්ලිලා.  15හක් ඉවරයි තව අවුරුදු 3 ක්  තියෙනව. ඊට පස්සේ හතරවැනි වතාවට ඉල්ලුවම (ඇයි දෙපාරක් පුළුවන්නේ ) ආයේ ඉතින් යාවජිව ජනාධිපති කිව්වත් කමක් නැහැ.

ඉතින් ඔන්න රුසියවට එහා ඈතම ඈත ඩිස්නිලන්තෙක හරිත වර්ණ කට්ටියක් අවුරුදු 17ක්  රට කාල  බීල  අහවර වුණාම, නීල  වර්ණ කට්ටියක් 1994 ඉඳන් රට පාලනේ කලා. ඒගොල්ල ගත්තෙත් කන බොන ගමන් රට වැසියටත්  පොඩ්ඩක්  දෙන්නම්  කියල පොරොන්දු වෙලා . හරිතවර්ණ එවුන් රක්ත වර්ණ උන්ගේ කැරැල්ලක් මැඩ  පැවත්වුවට උතුරු පැත්තේ චෙචෙන් කාරයන්ට වැඩක් දීගන්න බැරි වුන.  නීල වර්ණ එකීටත් බැරි වුනා . අවුරුදු දහයක් ඔහේ අද්ද අද්ද ගියාට පස්සේ රජතුමෙක් ජනපති වුනා. වණයක්  වෙලා හිටිය චෙචෙන් වගේ කට්ටියට විතරක් නෙමේ උන්ගේ අඹු දරුවන් ගේ ගෙවල් දොරවල් වලටත් බෝම්බ දාල මට්ටම් කරලා කොහොම හරි සාමය ගෙනාව. ඉතින් මිනිසුනුත් කැමැත්තෙන් පලවෙනි අවුරුදු පහ දුන්න . දෙවෙනි අවුරුදු පහ යනකොට  හරිත වර්ණ කට්ටියකුත් සෙට් වෙලා කාගෙන කාගෙන ගියා. සුදු අස්ස කරත්ත හෙම හිටි හැටියේ මතු වෙන්න ගත්ත. මිනිසුන්ට එපා වෙන්න ගත්ත. රජතුමා ව්‍යවස්ථාව වෙනස් කළා තුන්වෙනි පාර ඉල්ලන්න. මිනිස්සු කීව  දැන් කෑව ඇති කියල. රජතුමාගේ උපදේශකයන්ට තේරුණා වැඩේ වල්  වේගෙන එන බව. රජතුමා මේ පාරනම් සෙට් කියල උපදෙස් දුන්න. පිස්සුද බොල මන් වගේ එකෙකුට හේමත් වෙනවද කියල උදහස් වෙලා හැච් කළා ප්ලෑනක්.

රජතුමා කතා කලා සාස්තර කියන පුරෝහිතයට. " මම තුන්වෙනි පාර ඉල්ලනවා. මම දිනනවයි  කියල මුසාවක් කියපිය රට වටේ " කියල උපදෙස් දුන්න . පුරෝහිතය කීව ග්‍රහ බලපෑම  අනුව විතරක් නෙමේ  මිනිස්සු කියන කතා අනුවත් ඔබතුමා මේ පාරනම් පරදිනවා කියල. රජතුමා උදහස් වෙලා කිව්වා "යකෝ තෝ මාව දිනනවා කියල කිව්වේ නැත්නම් තෝව  දඬු කඳේ ගහල රජ අලියට කියල පාගවනවා" කියල. අරූ භයවෙලා අඬ බෙර ගහල යැව්වා  රජා  දිනනවා කියල. ඔය අව්වස්සේ මේ රටේම හිටිය විපස්සයෙක් . හරිම ආසයි විපස්සේට වෙලා ඉන්න.  විපස්සේ එවුන් කොච්චර තල්ලු කලත් ම්හු හොලවන්නම බැහැ. රජතුමා කතා කලා විපස්සයාට. කිව්වා විපස්සයෝ දන්නවනේ මම උඹට හැමදාම සලකනවා තේ බොන්න කෝපි  බොන්න කතා කරනවා.  මේක තියාගන්න ඕනේ නම් මට උදව් කරපිය කියල. විපස්සයත් කියන ඕන ලබ්බකට කැමති පොරක්. ඉතින් හැදුව ප්ලෑන. ඔහේ අර පරණ නෝනවයි ඉන්දියන් ඇමෙරිකන් කාරයෝ ටිකයි අන්ද ගන්නවා. වමාල ටිකත් සෝසෝ හරහා උඹ බලා ගනින්. සෝමේ ටිල්විල අනූ ලා මගේ පරණ කොල්ලෝ සැට් එක මාව 2005දී උස්සපු එවුන් ටිකනේ.  උන්වත් උඹ ගාවට එවන්නම්. ඉන් පස්සේ මම මගේ විශ්වාසවන්තම  ලේකම් කාරයා එවනවා උඹේ පැත්තට. ඕන වෙලාවක මම කියන එක අහන එකෙක්.  මාව යුද්දෙට තල්ලු කරපු අර කිව්වා නාහන පිංචක රතන සෙට් එකත් එවන්නම් ජාජිත් කොලූ එක්ක. මිනිස්සු ටික අන්ද ගන්න ඒ ඇති.  ඊළඟට උඹ  එවපන් උඹේ එකා මගේ පැත්තට. ඊට පස්සේ උඹ අගමැති  වෙලා මගේ එකාව  ජනාධිපති කරපන්. විපස්සයත් බොහොම අකමැත්තෙන් විපස්ස කම දාල යන්න බෑ කියල බෑඟිරි ගහල හෙම කැමති වුණා.  පොර අහනවා.

"ඉතින් ඊට පස්සේ මට විපස්ස කම හම්බ වෙන්නෙම නැත්ද ?"

"ඔය ඉතින් සරත්මධු වෙන්න යනවනේ. ඉඳපන් කියනකන්.  ඔන්න උඹ අගමැති වුනාට පස්සේ අර මාත් එක්ක ටුවර්  ගිය ජිල්ජෝනට භාර දීපන් පොලෝසිය. ඔය පෙළපාලි ගිය නීතිඥ උන්ට හොඳ සභාපති කමක් දෙකක් දීපන්. ජනරාලයත් පව්නේ ආපහු ඔක්කොම දීලා තියන් ඉඳපන්. නැත්නම් මිනිස්සු  බලයි මොකද කියල. වැඩිය දෙන්න එපා ගන්න අමාරු වෙයි. "
"ඉතින් ඊට පස්සේ "..

"ඔය ආයි ඉතින් මට ඔය දේදුනු කැලුම් පෙන්නන්න බැහැ". මොන් ගලයව පුළුවන් තරම් එලියෙම්ම  තියා  ගනින්. ගල් ආඳා. අපේ වැඩේ මාට්ටු වෙයි. යවපන් ලෝකේ වටේ. මම බයිලලනිපේ ලේකම් ටම දෙන්නම් සභාපති කොමත් . එතකොට ඒකත් හරි. උඹේ හිටිය ලේකන්ව මිනිස්සුන්ට පේන්න දවසක් දෙකක් ඇතුලට දාල ගනින් එලියට. හැබැයි ඔන්න මගේ කොල්ලෝ ටික  හෙම ඇතුලට දාන්නේ නැහැ විහිළුවටවත්. බිසෝ තුමී මගේ ඔලුව පලයි. ඕන් ඔහොම යනකොට මිනිසුන්ට උඹව නිකම්ම එපා වෙනවනේ.
ආ කියන්න අමතක වුනා. දන්නවනේ මගේ පුරෝහිත වංශ, නානලා සෙට් එක. උන් උගේගොඩ හෙම රැස්වීමක් දෙකක් තියල  මාව ආපහු ඉල්ලයි. උඹට තියෙන්නේ ආපහු චන්දෙ තියන්න.
එතකොට මං අගමැති , මගේ ලේකම් කොලූ ජනාධිපති උඹ ආයිත් විපස්සේ. ඊට පස්සේ මම ව්‍යවස්ථාව වෙනස් කොරනවා මට අවුරුදු දහය ගානේ ඉන්න. උඹ අවුරුදු 20ක් විපස්සේ ආයි. කොහොමද මගේ ටිකිරි මොලේ." විපස්සයට කොච්චර ජොලියක්  ගියා ද කියනවනම් රජතුමාව ඉඹින්නත්  හැදුව. හොඳ වෙලාවට රජතුමා සාටකෙන් මුණ වහ ගත්ත.
ඔය වෙලාවේ සුදු අස්ස කරත්තයක් හය්යෙන් ඇවිල්ල අස්ස කකුල් හතරම තද කරලා බ්රේක් ගැහුවා.
"ඒ සද්දෙට මට ඇහැරුණා."

2015 පෙබරවාරි 19 ලියන ලද්දකි.

- කොළඹ ගමයා 

 

Sunday 20 June 2021

පියාගේ දිනය


මගේ ආදර දූලා දෙන්නා 

තෑගි දුන්නා මල් කළඹක් එක්ක 

වැළඳගෙන තදින් සිඹ සෙනෙහසින් 

කේක් හදනවා උන් බිරිය සමග 

ඈ දුන්නා මට මල් සමග 

ෂැම්පේන් බෝතලයක් 

බොන්න තහනම් නැහැනේ මේ රටේ 

ඇය හදනවා ශික්ට් ක්‍රවුට් 

මස් එක්ක  ගෝවා 

මේක තනිකර ජර්මන් වැඩක් 


මේ පියවරුන්ගේ දිනය 

මට මතකයි මගේ දුප්පත් තාත්තා 

පියවරුන්ගේ දිනයක් තිබුණාද ඔහුට 

අදහගන්නට අදත් බැහැ 

හැදුවේ කොහොමද ඔහු අපි 

ඒ පුංචි පඩියෙන් 


අපි විභාග පාස් කෙරුවම 

විදුහලේ, එළියේ දස්කම් දුටුවහම 

ඒ තමයි ඔහුට පියවරුන්ගේ දිනය 

ඔහු අප හැර  ගියේ හරි ඉක්මනින් 

යන්තම් හැට දෙකට ළඟ 

මගේ මව බාලය මගේ දැන් වයසටත්  වඩා 

හිතා  ගන්නට බැහැ  මට 

මා හිතන්නේ හදවතින් මම 

තවත් තරුණයි කියා

පනස් හයක්ම මට,

හිතා ගන්නට බැහැ මට 

ඇය කෙතරම් තනිදැයි කියා 

ඇයට කෙතරම් දුක දැයි කියා 


පොරොන්දු විය හැකි ඔබට

දයාබර තාත්තේ  

රැක බලා ගනිමි අප  

ඔබේ ජිවිතයේ ආදරය 

ඔබට සෙනෙහස පිදූ 

ඒ සුන්දර කාන්තාව 

අප මුළු දිවිය පුරාවට 

අපට කළ හැකි 

එයම පමණකි 

ඔබ කළ සියල්ලට 

ඔබේ දරුවන් හතරට 

ඔබ දමාගිය එකම වස්තුව 


 - පියවරුන් ඇති නැති සැමට පිදුමකි 


Friday 18 June 2021

බ්‍රිතාන්‍ය කෞතුකාගාරයට ගිය දෙවෙනි චාරිකාව

පෙර කථාව:  

 කෝවිඩ් ව්‍යසනය ආරම්භ වී යන්තන් අවසන් වුනේ යයි අපට සිතුනු  වසර දෙදහස් විස්සේ නොවැම්බරයේ දිනෙක,  මම බ්‍රිතාන්‍ය කෞතුකාගාරයට ගොස් එලියට ඒමට නොහැකිව හිරව සිටියදී අති උත්තම රාවණා නරේන්ද්‍රයන් හමුවූ බව ඔබට මතකයේ ඇති.  මතකයේ  නැත්නම් මේ යොමුවෙන් කියවාගෙන මොළේ කුරුවල් කරගත හැකිය.   

රාවණා උදව් කිරීමට ඇසූ විට ඒ දිනයේ මම සම්පුර්ණ සත්‍යය ම මෙසේ පැවසුවෙමි. 
--
"අපෝ අවශ්‍ය  නැහැ දේවයාණන් වහන්ස. අපට රාවණා  පරපුරෙන් පැවත එන නෑ යකුන් බොහෝයි . ඒ අතරින් පවිත්‍රා දේවියන් වැනි සේනාධිනායිකාවන් සිටිති. සුදු එලියා වැනි සේනාධිනායකයන් සිටිති. ඔවුන් රාවණා මහිමයෙන් විශ්ව ශක්තීන් උපදවා රට රකිති. රාවණාවබෝධයෙන් යුත් රහතුන් දඬු මොණරකොප්ටරයෙන් ගොස් රට පුරා රාවණා ජලය ඉස ආශීර්වාද කරති.   රට වැසියෝ මොන ප්‍රශ්න පැමිණියත් නොබියවම ඉතා සතුටින්  කල් ගෙවති. " . --

+++++++++++++++++++++++++++++++++++++++++++++++++++++++++++++++++
වර්තමාන කථාව:

මේ පාර හම්බවුනොත් මොනවා කියන්නද කියල හිත හිත තමයි ගියේ. මොකද අර මතුරපු  ජලය  ඉහල, පිරිත් පැන් වැස්සුවත් වැඩක් වුනේ නැහැ නොවැ. හිනා වෙන්නත් බැහැ නේ  නෑ යක්කුන්ටම නේ කෙළ වෙලා තියෙන්නේ. අඬන්නත් බැහැ හිනා යන නිසා. 

මේ පාර නන්දන කියල යක් පරපුරේ කොන්සවේටිව් සමාජවාදී නෑයෙක් එක්ක තමා මියුසියම් එකට ගියේ. බ්ලොග් ලියන කට්ටකාඩුවේ ලොකු මල්ලිගේ අවාසනාවට අර හොයන්න කියපු අත් පිටපත තිබ්බේ නැහැ. ආසියානු කොටසත් වහලා. ඔය රාවණා කට්ටිය හොල්මන් කරන එක තේරිලද දන්නෙත් නැහැ.

ඉතින් නන්දන ගොයියට ඕන වුන නිසා  ගියා මිසරයේ පාරාවෝ පිළිම ආදිය බලන්න. පස්සේ මට හිතුන  කොලොම්පුරේ ලියාගෙන යන  හෝර්ස් ගේ දරුවාගේ කතාවේ අර ශාප දෙන යක්ෂ බඳුන වගේ ඒවා තියනවද දන්නේ නැහැ. ඒකත් හොයල  බලන්න ඕනේ කියල.. මේ තියෙන්නේ දැක්ක බඳුනක් තමයි.

ඔන්න ඊට පස්සේ තමයි මෙන්න මේ ශීලා ලිපිය දැක්කේ.  ඕවට කියන්නේ ස්ටෙලා  කියලද කොහෙද.   පුරාණ  මිසර අකුරු වගයක් තියෙනව නේද. ඒ අකුරු වලට  කියන්නේ හයිරග්ලිෆ්ස්  Hieroglyphs වගේ දිව උළුක් වෙන වචනයක්. මේක කියව ගන්න ගූගල් කාරය ගේ උදව්ව ගන්න   හිතන කොටම වගේ  කවුද ෂේප් එකේ ස්ස් ගෑව පැත්තක ඉඳන්. ඉස්සෙල්ල බලනකොට පාරාවෝ කෙනෙක් ගේ මමියක් පිටි පස්සේ හැංගිලා මෑන්  හිටියේ. ඊට පස්සේ නන්දනය එහා මෙහා වෙනකන් ඉඳල ආව මගේ ළඟට. සද්දන්ත මේ මනුස්සය දැකල පුරුදු කෙනෙක් වගේ.


බලනකොට මේ රාවණා නේ වෙස් වළාගෙන.

"දේවයන් වහන්ස මේ  මොකෝ මේ කලිසමක් ඇඳලා සන්ග්ලාස් දාල කෝවිඩ් මුකවාඩමකුත් බැඳන්? නොපෙනී ඉන්න පුළුවන් කම  තියෙද්දී. කෝ හිස් දහයයි අත් දහයයි " මං ඇහුවා.

"හිස් ටිකයි අත් ටිකයි අර වහපු කෑල්ලේ තියල ආවේ. තමුන්නැහේ  අද එනවා කියල මට ඔත්තුවක් ආව . මේ මිනිස්සු ඉන්න තැනක  වෙන හම්බවෙන්න විධිහක් වත්නැ හැනේ" රාවණාත් ගානක් නැතිව කීව. 

"ඒකනේ හරියට විස්තර කතා කරන්නත් විධිහක් නැහැ තමයි"

"හරි කතා කරන්න පස්සේ හම්බ වෙමු කෝ. ඔය තැනැත්තා අද මේ හරියට එනවා කියල අපට හරියටම ලංකා ඔත්තු සේවයෙන්ම කීව. එනිසා මම ශිලා ලිපිය ගැන කියලා යන්න ආවේ.  අපි ඒ කාලේ මිසරයටත් ආව කියල පෙන්නන්න  "

"අම්මට සිරි එහෙත් ගියාද , දඬු මොණරෙන් උඩින්ද  ගියේ"

"නැතිව වෙන කොහොම යන්නද මනුස්සයෝ? තමන්ගේ ෆීල්ඩ් එකේ නොවෙන දේවල් ගැන කතා කරන්නේ නැතිව ඉන්නවා. ෆේස්බුක් පොලිසියෙන් හිරේ දම්ම ගන්නේ නැතිව. මම ඉතින් ඒ කාලේ ක්ලියෝපැට්ර  නංගා බලන්නත් එනවනේ මාර්ක් ඇන්ටනි ට හොරෙන් "

"එහෙමත් සීන් එකක්ද? අපි ඕව දන්නේ නැහැනේ. කොහෙද ඉතිහාස කාරයෝ ඕව ලියන්නේ නැහැනේ. දැන් එතකොට මොකක්ද අර පෙන්වන්න හැදුවේ"

"ඔය තියෙන  ශිලා  ලිපියේ බලන්න එක්කෙනෙක් නටනවා. එක්කෙනෙක් පෙන්වනවා අතින් ඩ්‍රම් එක. "


"ඉතින්"

"ඕකේ තියෙන්නේ අවුරුදු 2070 කට පස්සේ අපේ ඉතාමත් වංශවත් හඬින් මධුර ගී ගයන රූමත්  උමාරියා සිංහවංශ  දියණිය  අපි දෙන්න අර  විල ළඟ මාක්  ඇන්ටනියට හොරෙන් දාපු  ලව් සීන් එක ගැන "මන්ද පමා" කියල සින්දුවක් කියනවා කියලනේ. ක්ලියෝ මම එනකන් තමයි බලන් හිටියේ." 

"සීරියස්ලි, එතකොට  අර පිටිපස්සේ ඉන්නේ කවුද "

"ඒ අර සුප්‍රසිද්ධ භාතිය ජයකොඩි ළමයනේ "

"හරි හරි ඒ දෙන්නනේ සින්දුවට සම්බන්ධ නේද, " 

මට ඒ වුනාට අවුරුදු ගණන් පොඩ්ඩක් අවුල් වගේ.

එනිසා  පොඩ්ඩක් බයෙන් බයෙන් ඇහැව්වා "දේවයන් වහන්ස අපේ ඉතිහාස කට්ටිය කියන්නේ  ඔබතුමා රජකලේ  අවුරුදු පන්දහකට විතර කලින් කියලනේ. වයස බැලුවහම  හරියට  ගැලපෙන්නේ නැහැ වගේ. අනික  දැන් මේ පහළ තියන විස්තරයේ තියෙන්නේ හොරයි, චූටියි ගේ සොහොනින් ආපු එකක් කියල. ඒ ගොල්ලා තමයි අමුන් මහා දෙවොලේ ප්‍රධාන ගෘහ නිර්මාණ ශිල්පීන්"

"ඔය ළමයට මම කිව්වා නේද ෆීල්ඩ් එකට අදාල නැති දේ ගැන කතා කරන්න එපා කියල. ඕව ඔය අධිරාජ්‍යවාදීන් හොරෙන් ගෙනල්ල ඉතිහාසය විකෘති කරලා ලියපුව. ඔය දෙවොල හැදුවෙත් අපි තමයි. ලංකා පුරයෙන් තමයි ශිල්පීන් අරන් ගියේ. ඔය යට මොකද්ද ලජබටකිව් කියල ගහල තියෙන්නේ. මේකට කිසිම සම්බන්ධයක් නැහැනේ." 



"හරි මට තේරුණා. තව මුකුත් ලියල නැත්ද මේකෙ දේවයන් වහන්ස . මේ දවස් වල කෝවිඩ් නිසා ලංකාවට පොඩි තර්ජනයක් තියනවා. විදේශීය සංචිත අඩු නිසා පිටරටින් මුකුත් ගෙන්වන්නේ නැතිව වවාගෙන කන්න හදන්නේ"

"ලංකාවේ නායකයෝ  කොහොමත් වවාගෙන කන්න දක්ෂයි නේද? විභිෂණය මට කළෙත් ඕකනේ. සහෝදරයෝ කොච්චර ලං වුනත් පරිස්සමින් ඉන්න ඕනේ. නැතිනම් දඬු මොණරෙට ගහන තෙල් ටිකට හරි කෙළියි.  මොන දේ වුනත් දඬු මොනර ප්‍රමාණයක් ණයකට  හරි අරගෙන මගේ යක් ජනතාව රැක බලා ගන්න  රාජ්‍ය සභාවේ එවුන් ටික රැක ගන්න ඕනේ. "

රාවණා දිව දෙකින් කතාකරන්නේ දැයි මට සැකයක් ඇතිවුණි. 

" එකනම්දැ  වෙන්නේ නැහැ දේවයන්න් වහන්ස. මේ දවස් වල ගංවතුර නිසා සරොම් කැහිපොට ගහගෙන තල රාත්තල ගානේ නෑ යකුන්ට බෙදන් යනවා සභාවේ සමහරු.  මුකුත් උපදෙසක් වත් දෙන්න බැරිද දේවයන් වහන්ස මොකද කරන්නේ කියල "

"මම මොකටද ඒක කරන්නේ අර වාරකන් කාලේ මැරෙන මාළු කන  එගොඩහේවා යකයි, සර්ව ලෝක විශාරද  දේපැණියා  යකයි ඒවා කරනවනේ.  ඔහොම ගිහිල්ල ඕක ගිලා බැස්සහම චීන මස්සිනාලට කියල වැලි වලින් තව එකක් ගොඩ දාල දෙන්නම් "

"මේ මේ දේවයන් වහන්ස "

++++++++++++++++++++++++++++++++++++++++++++++++++++++++++++++++

රාවණා නරිදු  පහල පින්තූරයේ තියෙන පූජකවරයෙක් ගේ විශාල  මමියක් අස්සෙන් නොපෙනී ගියේය.

 


 "මොකද බං කෞතුකාගාරේ අස්සේ කෑ ගහන්නේ "

නන්දනයාගේ හඬින් යන්තම් සමාන්තර විශ්වයෙන් මේ පැත්තට පැන ගතිමි.   


Saturday 12 June 2021

කාබනික ප්‍රශ්නය ගැන මගේ අදහස


මම ලෝකයේ ඕනෑම රටක කාබනික පොහොර භාවිතා කරනවට කැමතියි. ඒක අර ආණ්ඩුව කලාද මේ ආණ්ඩුව කලාද කියන එක කොහෙත්ම අදාල නැහැ. ඒක ප්‍රතිපත්තියක්. අපි හුඟක් වෙලාවට මිලදී ගන්නෙත් ඕගනික් එළවලු, පලතුරු සහ මස්. ටිකක් ගණන් වැඩියි තමා. නමුත් වැඩි පාරිභෝගිකයන් ප්‍රමාණයක් ගන්න කොට ඒවායේ ගාන අඩුවෙන්න ඕනේ නේද. ඒ කියන්නේ ඕගනික් (කාබනික) අහර ද්‍රව්‍ය වලට ඇති ඉල්ලුම වැඩි වෙනකොට තව ගොවින් , සහ සමාගම් ඒවා නිෂ්පාදනය වැඩි කරනවා. එතකොට තිවන තරඟය මත මිල අඩුවෙන්න ඕනේ. මම බොන සෝයා කිරි දැන් එකම ගාන වෙලා තියෙන්නේ. මුලදී ගණන්. (කාබනික සහ නැති එක) ඒක එහෙමයි වෙළඳපළේ වෙන්නේ.
(බොරුනම් එකොන් ගෙන් අහන්න)

ඉතින් මේ කාබනික පොහොර භාවිතා කරන රටවල (යුරෝපයේ) රසායනික පොහොර තහනම් කළේ නැහැ. කලේ කාබනික පොහොර භාවිතා කරන ගොවීන්ට වැඩි සහනාධාර දෙන එක. රසායනික පොහොර වලින් හදන කෑම ලාභයි. නමුත් ඒක පාරිභෝගිකයා අතේ තියෙන්නේ. තමන්ට ඕන නම් කෘමි නාශක තියෙන එලවලු සහ කෑම කෑව හැකි. කාල පස්සේ පිළිකාවකුත් පොඩ්ඩක් හදා ගත්ත හැකි. නැත්නම් ඕගනික් එක ගත හැකි. ඒක තමයි නිදහස.
ඕක බලෙන් කරන්න ගියහම අර මා ඕ ගේ අණින් ගේ කුරුල්ලෝ මරපු චීනුන්ට වුන දේ වුනත් වෙන්න පුළුවන්. පිටින් ගෙන්වනවට වඩා ලංකාවේ කාබනික පොහොර හදන එක හොඳයි කියල විද්වතුන් කියනවා. නමුත් පහුගිය වසර ගණන පුරා සමාගම් විසින් ලංකාවට කාබනික පොහොර ගෙන්වනවා.දැන් කෑ ගැහුවට හුඟක් අය ඒකත් දැනගෙන තියෙන්නේ ඊයේ පෙරේද. ගොවීන්ට කෘෂිකර්ම දෙපාර්තමේන්තුව හා කෘෂිකර්ම නිලධාරීන් හරහා පුහුණුව දෙන්න ඕනේ. ඒ පිළිබඳ පොත පතපත්‍රිකා ගහන්න ඕනේ. හිතුන පලියට පොල්ලකින් ගහනවා වගේ රටක වගා විනාශ කරන්න රජයකට බැහැ.ප්‍රශ්නේ තියෙන්නේ එතැන. කෘෂිකර්මය උගත් අයගේ උදව් අරගෙන සැලැස්මකට කරනවනම් හැමෝගෙම සහයෝගය ලැබේවි.

කෘෂිකර්ම නිලධාරීන්ටත් අවබෝධය නැතිනම් ඔවුන්ව පුහුණු කරන්න ඕනේ.

හැබැයි මටනම් හිතෙන්නේ විදේශ සංචිත සීග්‍රයෙන් අඩුවී ගෙන යන නිසා මේ රසායනික පොහොර තහනම පැනෙව්වා කියල. හැබැයි ඒත් ඉතින් මන්ත්‍රීන්ට ජීප් ගන්න විදේශ විනිමය තියෙනවා කියන්නේ ඉතින් එහෙම වෙන්නත් බැහැ.

ලංකාව දුප්පත් වෙනවට හෝ කරදරයේ වැටෙනවාට අපි කවුරුත් කැමති නැහැ. එනිසා බලයේ ඉන්න අය හොඳට කල්පනා ජාතියටම බලපාන ප්‍රතිපත්ති ක්‍රියාත්මක කලොත් හොඳයි.

බ්‍රිතාන්‍යයේ මේ වැඩේ බොරුවට කරන්න බැහැ. මෙන්න මේ ලිස්ට් එකේ තියෙනෙන් කාබනික සහතිකය දෙන සංවිධාන (බ්‍රිතාන්‍යයේ) . ඒක නැතිව කාබනික ලේබල් නිකන් ගහල කිසි දෙයක් විකුනන්න බැහැ.

පින්තූරය අන්තර්ජාලයෙන් 

Saturday 5 June 2021

අරක්කු බෝතලයෙන් ශේප් වුනු කළු රන්ජි ගේ සුදු පොත


ලංකාවේ සිට ඉරිදා උදයේ පැමිණ  දෙපැයක විරාමයකට පසු  මම සූට්කේස් දෙක අස් කරන්නට ගතිමි. ශ්‍රී ලන්කන් ගුවන් සේවයෙන්,  කටාර් එයාවේස් තරම් බර කිලෝගණනක්  නොදෙන  නිසා ගෙන ඒමට ගත්  සමහර දේ සුපුරුදු පරිදි දමා  එන්නට සිදු වුනි. ඔය අතරේ ගේන්නට අමතකු වුනු  වැදගත් දෙයකුත් තිබුණි.    
බිරින්දෑතුමී  පළමුවෙන්ම  ඇහුවේ ඒ ගැනය. 

"කෝ තුනපහ."

"මළ කෙළියයි, තුනපහ ගේන්න අමතක වුනානේ".

 මම ඇයට අමාරුවෙන් ඔබාගෙන ආ අනිකුත් තෑගී පෙන්වූයෙමි.

" මේ තෑගී (ඇඳුම්  වගයක් ගෙනාපුවා) , මේ කජු , ලෝකේ හොඳම කජු. මල්ලිගේ වයිෆ් කිරි ටොෆි, අලුව දුන්න. අක්කා මුං කැරලි දුන්න.  හේමාලි ඉස්සෝ, මාළු හෙම දුන්න." 

 "ඉතින් ඒවාට  ලොකු ඉඩක් ගිහිල්ල නැහැනේ. මම ඔයාට කීවේ හොඳ අලුත් තුනපහ ටිකක් ගේන්න කියලනේ. මේ කඩවල පරණ ඒවා කන්න පුලුවන්ද?" 

එයාගේ සූදානම  ගේමටය. ඉනෙස් කොහොමටත් ඉන්දියන් කඩවල තුනපහ ගැනීමට කැමැති නැත. ඈ කියන්නේ ඒවා හදා ඇත්තේ වර්ණ ගැන්වෙන රසායන, රස කාරක  ආදිය දමා බවය. තුර්කි කඩවල විකුණන රතුම රතුපාට මිරිස් සහ කෑලි මිරිස් තද රක්ත වර්ණයකින් ඇත්තේ එබැවිනි.

මිත්‍රවරුනි, කලින් ලිපියේ ලියූ පරිදි ජර්මන් අයට බුද්ධාගම කියා දීමට යාම පමණක් නොව  තුනපහ දැමූ  කෑම කන්නට දීමද පසුව ප්‍රශ්න  ඇති කරන  දේ බව  හිතට ගන්න.  යූ ටියුබ් අම්මලා ගේ පිහිටෙන් ඉනේස්ට දැන් මටත් වඩා හොඳට තුනපහ දමා ඉවිය හැකිය. ප්‍රශ්නය වන්නේ  දැන් ටික ටික ජර්මන් කෑම වලටද ඒවා එකතු වීමය.  

"ඉතින් ඔයා කියන්නේ කිලෝ දෙක තුනක් ගේන්න නේ. කාටද ඕවට ඉඩ තියෙන්නේ" මම ශේප් එකේ කියුවෙමි.

"ඉඩ, ඉඩ මම හොයල දෙන්නද?  මේ පොත් මොනවාද, ඕව බර වැඩියිනේ .  ඔයා ගිය පාර ගෙනාව ඒවත් කියෙව්වද තවම.  මේ පොත් මොනවාද , ගොඩක් ලොකු ඒවා. "

ඒ පොත් තුන හතර ටිකක් ප්‍රමාණයෙන් ලොකු බව ඇත්තය. පොඩි පොත් කියවන්න කියා නියමයක් මා දන්නා තරමින් නැත. 

"ඔයාට තේරෙන්නේ නැහැ  අනේ. මේ කාලේ පොත් ගේන්නේ කියවන්නම නෙමේනේ. ඕව කවද කියවන්න බැරිද? ඒ වගේද මම ඒවා දෙපැත්තෙනුයි , උඩිනුයි  තියල, කෝපි කෝප්පයක් හෙම ළඟින් තියල, ෆේස්බුක් එකේ ෆොටෝ එකක් දැම්මම හොඳටම ඇති, කාටද ආඩම්බර"

"එතකොට දැන් ඔයා  ෆේස් බුක් දාන්නද මේවත් ගෙනාවේ " ඉනෙස් ගේ මූණ දැන් දෙහි මිරිකා හැරි  ලෙමන් ලෙල්ලක් වගේය.

"අපෝ නෑ , ඒවා මේ ගුණරත්න  අයිය හම්බවෙලා කරේ ගහපුවනේ. හොඳ පොත් ටිකක් කියල තමයි දුන්නේ. මතකනේ අර අපි ගිය සැරේ ලුණුගල ගිහිල්ල හම්බ වුනේ "

"මට මතකයි, ඒත් මේ  පොතේ ලොකු" 

"ආ ඒක මේ අම්බලවනර් සිවානන්දන් කියල  දෙමළ  ලේඛකයෙක් ගේ හොඳ පොතක්. එයාගේ ඉංග්‍රීසි පොත තියනවා මම අරන් දෙන්නම් ". වැඩේ  ශේප් කර ගන්නට කීවෙමි.
 
"එතකොට මේ කළු එක්කෙනක් ගේ පොතක් තියෙන්නේ. ඒකත් ලොකු වැඩියි.  ඒ කවුද ලංකාවේ  මැන්ඩෙලා ද " ඒ කියන්නේ කළු රන්ජිත් ගැනය. 

"ඒකනම් එච්චරම  ෂුවර් නැහැ. එයා මේ හැමෝටම උදව් කරන කෙනෙක් ලු. පොතේ නම කළු රන්ජිත් සුදු මිනිහෙක් (මේක මම කීවේත්  ඉංග්‍රීසියෙන් ඈ - Black Ranjith is a white man)"

"මොකක්ද ඒකෙ තේරුම. එයා අර ඉන්දියාවේ ලංකාවේ වගේ  බ්ලිච්නුයි අරවයි මේවයි ගාල හම  සුදු කරගෙනද? දැන් පිරිමින්ටත් ඒ පිස්සුවද "

මා කළ බරපතල වැරැද්ද මට තේරුනේ එවිටය.   

"මේකයි, දැන් ඔය කළු කියල තියෙන්නේ ඉතින් පාටින් කළු වුනත්,  එයා ඇත්තටම මුළු හදින්ම  සුදුයි කියල. ඒ කියන්නේ මේ ඔයා වගේ සුදු මිනිස්සු ගැන නෙමේ මේ කියල තියෙන්නේ.  සුදු නමින් ඇඟවෙන මේ හොඳ මිනිසුන් සමූහයක් ගැන. හැමෝටම උදව් කරන හොඳ කරුණාවන්ත මදර් තෙරේස වගේ කෙනෙක් ගැන"

එයාගේ ඇස් දෙක ජම නාරං ගෙඩි දෙකක් සේ විශාල වූ  සයිස් එකෙන්ම මට තේරුණේ  මම තවත්  දිගින්  දිගටම ඇන ගනිමින් සිටින බවය. 

"ඔයා කොහොම කීවත් ඕක වර්ණවාදී  (racist) කතාවක්  නේ.  ඕක ලියපු මනුස්සය දන්නේ නැත්ද මේ දවස් වල ලෝකේ බීඑල්එම් (Black Lives Matter)  කියල ව්‍යාපාරයක් යනවා කියල.  ජෝජ් ෆ්ලොයිඩ් මැරුවට පස්සේ. එහෙම තියෙද්දී ද ඕව ලියන්නේ"




සාමාන්‍යයෙන් වාද වල එල්ලී එල්ලී යන මම  මේ වාදයෙන් ගැලවෙන මගක්  කල්පනා කරමින් සිටියෙමි. 
  
"නැහැ මේකයි ලියපු කෙනා වැඩිය ඉංග්‍රීසියෙන් කියවන්නේ නැතිව ඇති. එහම නැත්නම් අර මගේ පොතේ පිට කවරේට උනා වගේ ප්‍රකාශක තුමා කියන්න ඇති මෙහම ටයිටල් එකක් දැම්මේ නැතිනම් ලංකාවේ පොත විකුණන්න බැරි වෙයි කියල. "

"ඒ කියන්නේ අර ඔයාගෙම යාළුවෙක් කීවේ  ආසියාවත් හරිම වර්ණවාදී කියල. සුදු අයට බැන්නට. ඒක ඇත්ත. ඒක නෙමේ ඔයා  අළුත් ගම්මිරිස් ගෙනෙල්ලත් නැහැ."

මම දැන් තව තවත් එරිලාය. ගම්මිරිස් ගෙනෙන්නටද අමතක වෙලාය. පොත දුන්නාට  මම දැන් ගුණරත්න අයියාට හිතින් බැන්නෙමි .  

හදිසියේම වාසනාව  එලියට පැන්නේ බෝතලයක් ලෙසින් ය. අමර පලිහවඩන නමැති මගේ අතිජාත මිතුරු තෙමේ යන්නට කලින් දවසේ කුමුදු විජිත් සමග  පැමිණ හොඳ වර්ගයේ එක්ස්පෝර්ට් ක්වොලිටි  අරක්කු බෝතලයක් දී ගියේය. පින්තූරයේ  ඇත්තේ එයයි. 

"මේක කාටද"
" ආ ඕක පලිහවඩන දුන්නේ. ඔයාගේ අම්මටයි තාත්තටයි දෙමු. අප දෙන්නට විපුලි එක්ක බොන්න  මම තවත් ඕල්ඩ් ඇරැක් එකක් ගෙනාව."

පලිහවඩන  එදා ආවේ උන්දැගේ ආදරණිය මවද එතරම් හොඳ තත්වයකින් සිටියදී නොවන බව පසුව දැන  ගතිමි.  ඌ එතරම්ම  හොඳ බොක්කකි. මට පසුව කුමුදු විජිත් ගෙන්  ආරංචි වුනේ ඒ සුන්දර කරුණාවන්ත මාතාව අවසන් ගමන් ගිය බවය. අමරයා කවදාවත් පෞද්ගලික දේ  නොකියන නිසා අපේ විදුහලේ  83 ගෘප් එකේද ඒ බවක් නොකියැවිණි.  

මම කිහිප වරක්ම අමරගේ උඩහමුල්ලේ නිවසට ඒ ලෙවල් කරන කාලයේ ගොස් ඇත්තෙමි. අපේ දේශපාලන වාද විවාද බොහොමයක් ගියේ එහිය. තමර අයියා සහ ඔවුන්ගේ නිවසේ  සිටි සේවකයෙකුද මේ විවාද වලට  වරෙක දෙවරක  හවුල් විය. සෝවියට් දේශයට ආ පසු ලෙනින්ගේ හිස ඇඹු පිළිරුවක් ඔහුට දෙන්නට මම එහි ගියෙමි. අමරගේ මව මට දිවා  ආහාරය දෙන්නට  හරියට යමක් නැතිය  කියා බිත්තර දෙකක් එවෙලේම බැද්දාය. එළවළු මාළු පිණි  හතක්  අටක් පිඟාන පුරා තිබියදීත් කන්නට යමක් නැත්තේ ඇයිද යන්න මට වැටහුනේ නැත. සෝවියට් දේශයේදී අපි කෑවේ  මසුයි බතුයි පමණක් බවත් කෙල්ලන් නම් මාළු මිරිස් හෝ බීට් රූට් වැනි දේ ඉවූ බවත් මට මතකය.  

සමහර විට මගේ මවද මම කෝල් කරන විට එවැනිම  කතා කියයි. 
"අද කන්න  හරියට මුකුත් නැහැ."
" ඇත්තට, අනේ, අම්මා  මොනවාද කෑවේ"
 
"කරෝල බැදලා , සම්බෝල එක්ක මේ , පරිප්පු වලට තම්පලා දාල , තව බටුද මොනවද, කොස් ඇට මාළුවකුත් තිබ්බද කොහෙද, අනේ කන්න බැහැ"

"ඉතින් අම්මේ ඔය හොඳයිනේ. මම මේ පොඩි සැන්ඩ්විච් එකක් දවල්ට  කාල රෑට යන්තන් චිකන් එක්ක බත් ටිකක් කෑව "

මට හිතන්නේ අපි එංගලන්තයේ,  ලංකාවේ තරම් හොඳට එළවලු හතරක් පහක් සමග බත් නම් නොකන  බවය. කොහොමත් එහෙම හදන්නට වෙලාවක් ද නැත. අපි වෙන අනම්  මනම් කනවා  මිස බත් හැම වෙලේම කන්නේද  නැත. ඉනෙස් කොහොමත් විනාඩි තිහෙන් හතළිහෙන්  හදා ගන්නට පුළුවන් කෑම වලට වැඩි කැමැත්තක් දක්වන්නීය.

සෝවියට් දේශයේ සිටියදී උදේට පොඩි  කැන්ටිමෙන් බිත්තර නිතරම කන නිසා මට බිත්තර  වැඩිය දිරෙව්වෙ නැත. අමරයා මට දුන් බැදපු බිත්තරය එදා  ඩැහැ ගත්තේය.

ඉතින් පළිහවඩන ගේ ඒ කරුණාවන්ත අම්මාද නික්ම ගොස්ය. අමරයා ගේ දැන් ෆෙමස් අක්කා ඒ දවස් වල වෛද්‍ය විද්‍යාලයේය. යන්තමින් හිනාවීගෙන කාමරයට මාරු වෙන නිසා මට ඒ දවස්  වල හිතුනේ වෛද්‍ය විද්‍යාලයේ නිසා හෙන ආඩම්බර ඩයලයක් වන්නට ඇති බවය.  පහුගිය කාලයේ  ඇගේ  නම හැම  වෙබ්සයිට් එකකම වාගේ දුටු නිසා දැන්නම් කොහොමත් ෂුවර් නැත. නමුත් පලිහවඩනලා, ගුරුතුමියක සේ  මා දැන  සිටි ඔවුන්ගේ  මවගේ නික්ම යාම ඉතාමත් නිහඬව විඳ දරාගෙන ඇත. මම ඒ ගැන අමරයාට කතා කොට දෝස් මුරයක් දැමුවෙමි. 

"අපට එන්න බැහැ  තමයි. ඒත් උඹට මට කියන්න තිබ්බ. ඇන්ටි  හදපු තේකක් හරි බීලා තියනවා. අනික මට බැදලා දුන්  බිත්තරේ උඹ ඉස්සුවා."

 ඌට ඒක මතක නැත.     

බිරින්දෑ ගේ මුහුණේ මල් හතයි තවත් එකක් පිපුනා වගේය. ඉනෙස් ගේ අම්මයි තාත්තායි කියන්නේ ලෝකේ හොඳම රම්  එක ලංකාවේ  අරක්කු බවය. ඔවුන්ට එය ඒ තරම්ම ප්‍රිය ජනක බීමකි.   අනික ස්ට්‍රෝබෙරි , තේ, කෝපි කේක් ආදී හැම එකටමත් එය  දමති. බිරින්දෑ ට පොත ගැනද අමතකය.

ඉතින් එදා දවසේ පලිහවඩනයාගේ අරක්කු බෝතලය මගේ ජාම බේරුවේ එසේය.

ඊයේ පෙරේදා  ඉනෙස් කවුදෝ අඹරා දුන්නු  තුනපහ බෝතල් දෙකක්  ගෙනාවාය.

"මේ බලන්න සුවඳ "

"කොහෙන්ද මේ " මම ඇසුවෙමි.

"අපේ ලැටිමර් එකේ (ඉනෙස් රැකියාව කරන විදුහල)  වැඩ කරනවා බංග්ලා දේශ ලේඩි කෙනෙක්. එයාට මම කිව්වා ඔයා මේ පාර ලංකාවට  ගිහින් එනකොට තුනපහ ගෙනාවේ නැහැ කියල. එයාට අළුත් ඒවා තියනවා කියල මේවා ගෙදරම අඹරල ගෙනත් දුන්න "

"හා හා ඒ කියන්නේ ඔයා දැන් බංගලා දේශ කට්ටියගෙන්ද  තුනපහ ගන්නේ . මම ලංකාවෙන්  ගෙන්න ගන්න හැදුවේ මල්ලිට කියල "

"ඕගොල්ලන්ගේ ලංකාව  බංග්ලා දේශයෙන් ණය ගන්නවනම් මම තුන පහ ගත්තම මොකද "

මම ආයෙත් පාරක් බ්ලාස් වී ගියෙමි.

මම කියන්නේ මේ පත්තර කාරයන් හා මාධ්‍ය නිසා කිසි දෙයක් කර ගන්නට බැරි  බවය. වහාම ඔය වගේ නිව්ස් පිටට දෙන දේශද්‍රෝහී විදේශ මාධ්‍ය වේදීන් ට දඬුවම් කළ යුතුය. නැත්නම් ඉදිරියේදී අපට මුහුණවල්   මාස්ක් දෙකකින් පමණ වසාගෙන ඉන්නට වනු ඇත.