Friday, 22 June 2018

අයිවෝ උපහාරයක්

මේ නිසඳස ලියා  තිබුනේ මගේ ලිපියකට ප්‍රතිචාරයක් වශයෙන්. අයිවෝ ඩෙනිසුන් ට උපහාරයක් නිසා එය මෙහි පළ කරන්නට සිතුවෙමි. ඇනෝ මහතා/මහත්මියට කැමති නම් නම එවන්න.



මට මතකයි ඔබ
නාවල පාරේ
'සුනිලුන් නිවහන'
පෙනෙනා මානේ
ආපසු යන්නට බසයක් එනතුරු
ඉවසීමෙන් හිටගෙන උන්නා

කුරුළු පරා දිසයේ
කුරුළු සිහින සාගරේ
ඔබ හා විසුමට එන්නෙමි
කුරුළු සුරපුරේ.....

සුනිලුන් ගිය දෙව් විමනට
යනු මැන
ගීතිකාවකින්
යලි එක්වනු මැන
ඔබට සුභ ගමන්



(අයිතිය) (C)  Anonymous 20 June 2018 at 00:39

"වළාකුලින් බැස " ගීතය මුලින්ම ගායනා කරන ලද්දේ සුනිල් ශාන්තයන්ය.



Artist: Ivor Dennis O. Music & O. Sung: Visarada Sunil Shantha Lyrics: Kalasuri Arisen Ahubudu

Tuesday, 19 June 2018

ලන්ඩනයේ දී එක අහසක් යට පෑයූ හිරු, අඩ හඳ හා තරු රැස

සාමාන්‍යයෙන් මම ලන්ඩනයේ පවත්වන  සිංහල දෙමළ  අවුරුදු උත්සව වලට සහභාගී වෙන්නේ නැහැයි.  එක හේතුවක් නම් සෑහෙන කලකට ඉහතදී කිසියම් අමිහිරි අත්දැකීමක් ලැබීම.  මම හිතන් හිටියේ මේ සංස්කෘතික සංදර්ශන පවත් වන්නේ ලන්ඩනයේ ජීවත් වෙන අනිකුත් සංක්‍රමණික ජාතීන්ට, බහුතර සුදු ජාතිකයන්ට හෙම ශ්‍රී ලංකාවේ සුන්දරත්වය, සංස්කෘතිය, හැදියාව පෙන්වල දීල ලංකාවට සංචාරකයෝ යවන්න, ආයෝජකයෝ ගෙන්වන්න, මේ රටේ ජනතාව එක්ක සමගියෙන්, සමාදානයෙන් ඉන්න වගේ දේවලට කියල. නමුත් එදා නම් මාත් එක්ක ගිය සුදු ජාතික උදවියට බොහොම නරකට සැලකුව එකයි වුනේ. ඉඳගෙන හිටි පුටු වලිනුත් නැගිට්ටවල මොකට අපේ ඒවාට එනවද වගේ කතා කියපු නිසා අපි එතනින් ආව. ඊට පස්සේ මම ඒවගේ තැන් මග හැරියා.

දෙවැනි හේතුව තමයි බ්‍රිතාන්‍යයේ සංවිධානය කරන  බොහොමයක් සංස්කෘතික උළෙලවල් මෙහෙයවන්නේ  සිංහලෙන් (හෝ දෙමළ නම් දෙමළෙන්) පමණයි. ඒවාට එන මෙහෙ ඉපදුනු ළමයින්ට වත් වෙනත් ජාතියක  කෙනෙකුටවත් වෙන කිසි දෙයක් තේරෙන්නේ නැහැ. ඉතින් හැමදාම නැගුන ප්‍රශ්නයක් තමයි හැමෝටම තේරෙන්න හැම ජන වර්ගයක්ම සහභාගී කරගෙන  ඔය වගේ උත්සවයක් සංවිධානය කරන්න  බැරිද කියන එක.

එහෙම  උත්සවයකට මම මේ  ඉරිදා සහභාගී වුනා. "එක අහසක්  යට" යන තේමාවෙන් අගෝරා කලා  කවය හා මිතුරු පිරිසක් වොට්ෆොර්ඩ් ප්‍රදේශයේ සංවිධානය කරන ලද ශ්‍රී ලංකික දිනයට.  අර හැම උත්සවයක වගේම කඹ ඇදිලි, කොට්ට පොර වගේ "ශ්‍රී ලංකාවේ ජාතික ක්‍රීඩා " තිබුන. වෙනසකට තිබුනේ පර්දාව හැඳ  සිටි මුස්ලිම් කාන්තාවන් , සිංහල හා දෙමළ  කාන්තාවන් සමග කඹ ඇදීම. දෙමල සිංහල මුස්ලිම්   තරුණ ළමයි දෙහි ගෙඩි හැන්දේ  තබාගෙන තරඟයට  දිවීම. ඒ වගේම සිං හලෙන් සහ දෙමලෙන් ඒ ඒ අංගයන්නිවේදන  කිරීම වගේ වෙනසක් ඇති උළෙලක්. ඒ එකමුතු කම දකින විටත් හරිම සුන්දර හැඟීමක් සිතට ආව.
හැරෝ නගරාධිපතිනි කරිමා මරික්කාර් 

ශාලාව තුළදීත් ඒ සම්ප්‍රදාය රැක ගන්න සංවිධායකයන් සමත් වුනු බව පෙනුනා.
ඉතා මෑත දිනෙක හැරෝ ප්‍රදේශයේ  නගරාධිපතිනිය ලෙස තේරී පත්වුණු, ශ්‍රී ලංකාවේ මහනුවර ප්‍රදේශයේ උපත ලද මුස්ලිම් කාන්තාවක් වන කරීමා මරික්කාර් මහත්මිය භාෂා තුනෙන්ම සභාව  ඇමතුවා. ශ්‍රී ලංකාවේ ජීවත්වෙන සහ ජීවත්වී දැන් බ්‍රිතාන්‍ය වැනි රටවල සිටින බහුතරයක් මුස්ලිම්වරුන්ට ශ්‍රී ලංකාවේ භාවිතා වන භාෂා තුනෙන්ම සංනිවේදනය  කිරීමේ හැකියාව ඇත්තෙන්ම  පැසසිය යුතුයි. මරික්කාර් මහත්මිය පැමිණ සිටින ජනතාවගේ එකමුතුකම අගය කලා වගේම ඔවුන්ට ශ්‍රී ලංකා සුන්දර පාරාදීසයේ සංචාර කරන ලෙසද ආරාධනය කළා.

ප්‍රවීණ රංගධර රෙඩ්ලි සිල්වාගේ ප්‍රමුඛත්වයෙන් විදී නාට්‍යයක් ඉදිරිපත් වුණා මුලින්ම වගේ.
රෙඩ්ලි සමග වීදි නාට්‍ය කණ්ඩායම 
ඉනික්බිතිව ඉංග්‍රීසි භාෂාවෙන් සවන පිනවන සරල ගී කිහිපයක්ම ක්‍රිස් ඩන්ලොප් ප්‍රමුඛ  ගෘවී කලෙක්ටිව් වෙතින් ශ්‍රවණය කිරීමේ භාග්‍යය  ලැබුණා.
ක්‍රිස් ඩන්ලොප් 

මෙවැනි උත්සව කිහිපයකම මා දැක පුරුදු ලන්ඩනයේ ප්‍රසිද්ධ ඕලු නාට්‍ය කණ්ඩායමේ  අමා ප්‍රමුඛ තරුණ දැරිවියන්  දර්ශනීය නාට්‍ය අංගයන් කිහිපයකින් සභාව පිනැවූවා. 
ඕලු නාට්‍ය කණ්ඩායම 

මනෝහාරී කරුණාකරන්  පියකරු දකුණු ඉන්දීය ද්‍රවිඩ නාට්‍ය අංගයක්  ඉදිරිපත් කළා පමණක් නොවෙයි, සභාවේ සිටි ප්‍රේක්ෂකයන්  ඇගේ වේග රිද්ම   නැටුමට  අත්පුඩියෙන්  තාලය අල්ලන්නට පෙළඹවෙන පමණටම සභාව කුල්මත් කලා.


මනෝහාරී කරුණාකරන් 
ලන්ඩනයේ පදිංචි ද්‍රවිඩ ජාතික කූගන් මහතා විසින් ඉදිරිපත් කරන ලද කුඩා නාට්‍යයක් වේදිකා ගත කෙරුනා. කථා සාරය වූයේ  පසුගිය දිනෙක ඉන්දියාවේ තමිල්නාඩු ප්‍රාන්තයේ බ්‍රිතාන්‍ය අධිකාරිත්වය  හිමි තඹ නිෂ්පාදන  කරන  වේදාන්ත සමාගමේ අනු කම්හලක විරෝධතාකරුවනට  තමිල්නාඩු පොලිසිය තිරශ්චින ලෙස පහර දීමට විරෝධතාවය දැක්වීමයි.
වේදාන්ත තඹ සමාගමට හා තමිල්නාඩු  පොලිසියට  විරෝධය පල කළ නාට්‍යය 
  
තමිල්නාඩු පොලිසිය බිම 
පිටියේ කෙලි සෙල්ලම් අංගයන් නිවේදනය කලේ බ්ලොග් රචකයෙකු හා ලේඛකයෙකු වන සරද සිංහල භාෂාවෙන්  සහ  මධු දෙමල භාෂාවෙන්. සභාව තුල  නිවේදනය කළේ පළපුරුදු නිදෙකයෙකු වන දිසා කෝනාර චතුර ලෙස සිංහලෙන් සහ මධු දෙමල භාෂාවෙන්. සේනක හෙට්ටි ආරච්චි ඉංග්‍රීසියෙන්  සභාව ඇමතුවා.

නාට්‍ය අංග අවසානයේ සොලිඩ් වාදක කණ්ඩායම සිංහල සහ දෙමල ගීත කිහිපයක්ම  වාදනය කරමින් සභාව ප්‍රීතිමත් කළ බවත් මතක් කල යුතුයි.

මේ ප්‍රසංගයේ සහ උත්සවයේඅඩුපාඩු නොතිබුණා  නෙමෙයි.

කන්ද උඩරට නැටුමක්, යක් නැටුමක්  හෝ හොඳ බෙර වාදනයක් තිබ්බ නම් අගෙයි.

කෝනා දිසා විශිෂ්ඨ ලෙස සභාව මෙහෙයවූවත් ඔහු ඇතැම් විට සංක්ෂිප්ත නිවේදනයන් වඩා දීර්ඝ ලෙස පැහැදිලි කරන්නට යාම ප්‍රේක්ෂකයන් මදක්  නොසන්සුන් කළා. ඒ වගේම ශබ්ද පරිපාලනයේ ඇතැම් අඩුපාඩුකම් මග  හරවා ගැනීමට නොහැකි වීම නාට්‍ය හා ගීත රසාස්වාදනයට බාධාවක් වුනු බව  සඳහන් කළ යුතුයි. 

වඩාත් පුදුම සහගත දෙය වුනේ වොට්ෆොර්ඩ් ප්‍රදේශයේ  ජනතා විමුක්ති පෙරමුණේ සාමාජිකයන් මෙයට සහභාගී නොවන ලෙස තම ආධාරකරුවනට හා හිතවතුනට දැන්වූ බව දැන ගැනීමට ලැබීමයි.  මෙයට හේතුව වී ඇත්තේ සංවිධායක මණ්ඩලයේ පෙරටුගාමී සමාජවාදී පක්ෂයේ සාමාජිකයන් සිටින බවට ඇති චෝදනාවක් කියාත් දැන  ගන්නට ලැබුනා. එසේම මේ ප්‍රදේශයේ ඇතැම් සිංහල ජාතිකයන්ද මුස්ලිම් සහ දෙමළ ජනතා සහභාගිත්වය විවේචනය කරමින් උත්සවය වර්ජනය කල බවත් දැන ගන්නට ලැබුණා.

පක්ෂ දේශපාලනයේදී  විරුද්ධවාදී අදහස් තිබීම  සාමාන්‍ය දෙයක්. නමුත් ජවිපෙ  නායකයන් හෝ පෙසපේ නායකයන් කෙසේ වෙතත් බිමේ සිටින සාමාජිකයන් විරසක වීම කණගාටුවට කරුණක්. මගේ අදහස නම් මේක හොඳ වැඩක්. ජවිපෙ පවා මේ දිනවල ලංකාවේ ජාතින් ගේ සමගිය ගැන හුඟක් සංවේදීව  කතා කරන බව පෙනෙනවා.  ඉතින් මෙවැනි දෙයක් වර්ජන කිරීම නම් ඉතා බොළඳ බවයි මගේ අදහස. උත්සව සංවිධානය වලදී දේශපාලනය අමතක කර එකමුතු වී සතුටු වීම වැරැද්දක් නෙමෙයි.

අවසානයේදී සඳහන් කරන්නට තියෙන්නේ අඩුපාඩු කිහිපයක් තිබුනත් වැඩේ විශිෂ්ඨයි කියල. මෙවැනි උළෙලවල් සංවිධානය කිරීම ලෙහෙසි නැහැ. ජනතාව  ගෙන්වා ගැනීම අමාරුයි. එසේම  විරසකව සිටි ජාතින් තුනක් එක්කහු කිරීම ඊටත් වඩා අමාරුයි. නමුත් අමාරුවෙන් හෝ මේ උඩුගං  බලා පිහිනීම අගය කළ යුතුයි. ස්තූතියි සංවිධායකවරුන්ට සහ මහන්සි වූ සැමට. 

"දකුණ නැගෙනහිර බටහිර උතුරද "
පසුගියදා අභාවප්‍රාප්ත වූ අයිවෝ ඩෙනිස් මහතාට ගරු කිරීමක් ලෙසත්  මේ දිනය සැමරීමටත් මේ ගීතයද  එකතු කරමි.




Tuesday, 12 June 2018

ප්‍රථම ප්‍රේමය ඔබ නොවේ (27) - සිතට වදදුන් පැනය අවසන්

ප්‍රථම ප්‍රේමය ඔබ නොවේ (26) - දොන් නදිය අසබඩ රොස්ටොව්
ගොලුබ්සි හා ඩොල්මා පිඟානක් 
දොන් නදිය අසබඩ පිහිටා ඇති රොස්ටොව්  නගරය මිලියනයක් පමණ මිනිසුන් සිටින විශාල නගරයකි. එය පහසුව සඳහා ප්‍රධාන ප්‍රදේශ අටකට බෙදා තිබේ. වරශිලොව්ස්කි, කිරෝව්ස්කි , ලෙනින්ස්කි පෙදෙස් හඳුන්වා තිබෙන්නේ ඔක්තෝබර්  විප්ලවයට සම්බන්ධවූ නායකයන්ගේ  නමිනි. පියේර්වමයිස්කි යනු මැයි පළමුවැනිදා සමරන්නට යෙදුනු නමයි.සවියෙට්ස්කි නම සෝවියට් සභා ද ඔක්ත්යාබර්ස්කි රතු ඔක්තෝබරය සිහිවන්නටද යොදා තිබේ. තාන්යා ගේ නිවෙස ඇත්තේ ඉහත කි පරිදි ප්‍රොලිතාර්ස්කි (නිර්ධන පන්තිය)  ප්‍රදේශයේය.

මෙම නගරය දොන් නදිය දිගේ වැටී ඇති ප්‍රධාන නැව්  මාර්ගයක පිහිට ඇති නිසා ඉතාලියානු, ග්‍රීක හා තුර්කි වෙළෙන්දන්ගෙන් පැවතෙන ජනකායක් ද සිටිති. වොල්ගා -දොන් නැව්  මාර්ගය 1952 දී නිමැවූ පසු කළු මුහුද, අසොව් මුහුද, කැස්පියන්, සුදු මුහුද හා බෝල්ටික් මුහුද යන මුහු පහට  මෙම වරාය  නගරය විවෘත විය.

අලෙක්සේයි වාහනය  පදවමින් මුළු රොස්ටොව් නගර ඉතිහාසයම  ගිහාන්ට පැවසීය. පැය භාගයකට හමාරකට පසු ඔවුන් සිටි නිවාස සංකීර්ණයේ රථය නැවැත්වූ ඇලෙක්සෙයි පෙම්වතුන් දෙදෙනාට හෙමින් සීරුවේ ඒමට ඉඩ හැර ගිහාන් ගේ ගමන් මල්ලද රැගෙන නිවෙසට ගියේය.   ඔවුන් ජිවත්වුයේ තෙවැනි තට්ටුවේ නිවසකය.  විශාල කාමර දෙකක් ද ඉදිරි විසිත්ත  කාමරයක් ද කුස්සියක්ද තවත් කුඩා ගබඩා කාමරයක් සහ බැල්කනියක් ද  එහි විය. මේ සෝවියට් තට්ටු නිවාස වල මුළුතැන්ගෙය  එතරම් විශාල නැත. නමුත් නොයෙකුත් භාණ්ඩ කුළුබඩු  තැබීමට  රාක්ක සාදා තිබේ. සාමාන්‍ය සුළු මධ්‍යම පන්තික නිවසක අවන් එකක් සහිත විදුලි ලිපක්, ශීතකරණයක් ආදිය තිබේ. රෙදි සෝදන යන්ත්‍ර හැම නිවසකම නැත.

නිවසට ඇතුළු වුනු ගිහාන්, තාන්යා ගේ මව අක්සානා විසින් උණුසුම් ව සිප වැළඳගෙන පිලිගත්තාය. මිත්තණිය ඔහුගේ දෙකම්මුලට තදින් හාදු දෙකක් දුන්නාය. සාමාන්‍යයෙන් පිරිමින් යමෙකු පිළි ගැනීමට අතට අත  දීම මෙන්ම මුහුණ පැත්තක් සිප ගන්නා  අතර ගැහැණුන් දෙකම්මුල සිප ගනිති.

හය දෙනෙකුට පමණ හිඳ ගත හැකි මේසය පුරා නොයෙකුත් ආහාර වර්ග තබා තිබුණි.

"කෝ ඔයාගේ සහෝදරිය ලේනා " ගිහාන් විමසුවේ ලේනා දකින්නට නොසිටි හෙයිනි.
"එයා පෙම්වතාගේ ගෙදර, අනිද්දා එයි " අක්සානා පිළිතුරු දුන්නාය.

අලෙක්සේයි රුසියානු චාරිත්‍රයට අනුව වොඩ්කා බෝතලය ඇර වීදුරු වලට දමා සියල්ලන්ගේම අතට දුන්නේය. තාන්යා සාමාන්‍යයෙන් වොඩ්කා නොබොන බව ගිහාන් දනී. ඔහු රැගෙන එන චෙරි ලිකර් එකක හෝ වයින් බෝතලයකින් විදුරුවක් හැරෙන්නට ඇගේ  මත්පැන් වලට කැමැත්තක්  නැත.

"මම මේකත් ගන්නද " ඔහු ඇසුවේය.
"නැහැ ඒක හරි නැහැ. ඔයා ආපු එකටනේ බොන්නේ. මේ ටික බොන්නම්"

තාන්යා ගේ පියා ඇලෙක්සෙයි ගිහාන්ට සුභ පතා වොඩ්කා වීදුරුව එසවීය. ඔහු හා මිත්තණිය වීදුරුව රුසියානුන් කරන පරිදි කෙළින් ම උගුරට හලා ගත්තද මව හා දියණිය එය සෙමින් තොලගා පැත්තකින් තැබූහ. තවත් වොඩ්කා වීදුරුවක් උගුරට හලා ගත් ඇලෙක්සෙයි කළු පාන් කෑල්ලක් සිඹ, සලාද සමග එය ගිල දැම්මේය.

"මේ අම්මා ඔයා  බත් කන නිසා බත් දාලා ගොලුබ්සි හා ඩොල්මා හැදුවා."

ගොලුබ්සි යනු ගෝවා  කොළ වල ඔතන ලද ඇඹරූ මස්ය. නමුත් බත් දමාද සෑදිය හැකිය. ඩොල්මා යනු තුර්කි හෝ ආර්මේනියානු රටවල නිතර සාදන කෑමකි. එය බත්වලට සුදුළුනු සහ තවත් කුළුබඩු දමා මිදි කොළ වල ඔතා තම්බා ගෙන සාදන ආහාරයකි.  උක්රයිනයේ ප්‍රසිද්ධ බොර්ෂ් සුප් ද පලහන  ලද කුකුළෙක්ද , ස්තලිච්නයා සලාදයක් ඇතුළු බොහෝ දෑ  එහි විය.

ගමන්  වෙහෙස නිසා ගිහාන් වැඩිපුර බීමට  නොසිතුවේය. මිත්තණියගේ කළු කොණ්ඩය හා මදක් වෙනස් හැඩහුරු  කම ඔහු විමතියට පත් කළේය.
"බබුෂ්කා මගේ මව් ගේ මව (මිත්තනිය ) එයා කොසැක් හා රුසියන්, මව් ගේ පියා මගේ ද්යෙද් (සීයා) කොසැක්. තාත්තගේ පියා රුසියන්. මව උක්රයින්කා. මගේ රන් පාට හිසකේ ඇවිත් තියෙන්නේ ඒ පැත්තෙන්." තාන්යා පැහැදිලි කලාය.

"බබුෂ්කා ගේ කතාව  ඔයාට පස්සේ කියන්නම්." බබුෂ්කා තාන්යා දෙස විමසුම් බැල්මක් හෙළුවාය.

රාත්‍රිය ඉක්ම යමින් තිබූ නිසා ඔවුහු රාත්‍රී ආහාරය ඉක්මනින් අවසන් කළහ. ඇලෙක්සෙයි තම නැන්දනිය, තාන්යා ගේ මිත්තණිය ඇය සිටින කොමියුනල් නිවසට ගෙන යා  යුතු නිසා ගිහාන් තමන් ගෙන ආ තෑගි ඔවුන්ට බෙදා දුන්නේය. ඇලෙක්සෙයි ට දුන් කමිසය, මවට හා මිත්තනියට දුන් රෙදි පිළි, තාන්යා ට දුන් තෑගි ගොඩ මේ සියල්ලට ඔහුට ස්තුති වර්ෂාවක් ලැබුණි.

"එන්නකෝ මටත් දෙයක් දෙන්න තියනවා. අපේ කාමරේට යං".
තාන්යා ඔහුගේ අතින් ඇදගෙන කාමරයකට ගියාය.
"මේක, ලේනගෙයි මගෙයි කාමරේ " ඔවුන් දෙදෙනාගේ ළමා කල පින්තූර, නළු නිලි පින්තූර සහ ඇමෙරිකා එක්සත් ජනපදයේ යොසොමයිට් ජාතික උද්‍යානයේ පින්තුරයක් ද එහි බිත්ති වල තිබුණි.

"මේක සඟරාවකින් කපා ගත්ත එකක්. ලස්සනයි නේද? කවද හරි යන්න පුලුවන්නම් "
ඇය පැවසුවේ දුක්මුසුවද නැතිනම් බලාපොරොත්තුවකින් ද යයි ඔහුට වැටහුනේ නැත.


සමහර ඉන්දීය චිත්‍රපට රුසියාවේ ඉතා ජනප්‍රිය වුනු බව ගිහාන් දත්තේය. ඇගේ කාමරයේද  පැරණි චිත්‍රපට වන බොබී , දුනියා හා ඩිස්කෝ ඩාන්සර් හි කුඩා සිනමා පෝස්ටර් අලවා තිබුණි.  මේවා කොහෙන් ලැබුනේ දැයි අසන්නට ඔහු ගියේ නැත.

සෝවියට් තරුණ තරුණියන් හා අපේ රටේ තරුණ තරුණියන් අතර වැඩි වෙනසක් නැත. ඔවුන්ගේ සිතුම් පැතුම් අභිලාෂයන් හි ප්‍රබල වෙනසක් තිබේද? බටහිර තරුණ තරුණියන් මීට වඩා වෙනස්ද? අර පන්ක් වරුනම් සෑහෙන්න  වෙනස් ජිවන රටාවක් අනුගමනය කරති. කාමරයේ මැද සිටගෙන ගිහාන් මේ සියල්ල කිරා බැලීමට  ආයාසයක් දැරුවේය.

"මමත් ඔයාට තෑගි දෙකක් ගත්තා. මේකට කැමතිද කියන්න "
පෙට්ටියක බහා දර්ශනීය ලෙස ඔතා තිබූ යමක් ගෙන ඔහු අත තැබූ ඈ ඔහුගේ කම්මුලට උණුසුම් චුම්බනයකින් සංග්‍රහ කළාය. පාර්සලය තුල තිබුනේ පල්යොත් නමින් හැඳින්වෙන අත් ඔරලෝසුවකි.
සෝවියට් දේශයේ නිෂ්පාදිත පල්යොත් ඔරලෝසුවක් 
වර්තමාන රුසියානු පල්යොත් ඔරලෝසුවක් 

සෝවියට් දේශයේ හැටියට එය වටිනා යාන්ත්‍රික ඔරලෝසුවකි. ඉක්මනින්ම විකිණෙන්නක්  නිසා සාමාන්‍යයෙන් දිග පෝලිමක ලැග එවැනි අත් ඔරලෝසුවක් මිලදී ගත  යුතුය.

"ලස්සනයි. බොහොම ස්තූතියි" ඇයට උණුසුම් හාද්දක් දෙමින් ඔහු පැවසුවේය.

"ඔයා සල්ලි වියදම් කලේ ඇයි? ශිෂ්‍ය ආධාර මුදල වැඩිය ලැබෙන්නේ නැහැනේ අපි තරම් වත් " ඔහු විස්සෝප වූවේය.

"මම ගියා කුබාන් වල අල ගලවන්න. ක්‍රස්නදාර් පැත්තේ. නැත්නම් මට සල්ලි කොහෙන්ද, මේ " ඇය අවිහිංසක ලෙස පවසා දෑත පෙන්වූවාය.
පෙර සුමුදුව තිබූ ඒ දෑතේ නිය ගෙවී කැඩී තිබුණි. සමහර තැන් ලේ එනතුරු  ඉරී ඇති බව පෙනුණි. ඇතැම් නිය කොනක කුබානයේ කළු පස තවමත් රැඳී තිබුණි.

සාමාන්‍යයෙන් ගිම්හාන කාලයට ඇතැම් සෝවියට් විශ්ව  විද්‍යාල  සිසුන් නොයෙකුත් යෝජනා ක්‍රම වල තාවකාලික රැකියා වලට යති. සමහරු පාසල් වල ඉහල පන්තීන් සඳහා වන වසන්ත කඳවුරු හැසිරවීමට යති. බයිකාල් අමූර් දුම්රිය මාර්ගය සැදීමට ගිය කණ්ඩායම් එවැන්නන්ය. නමුත් වැඩි මුදලක් ලැබෙන එවැනි රැකියා වලට යාම ලෙහෙසි නැත. කොම්සොමෝලයේ (තරුණ කොමියුනිස්ට් සංවිධානය) සාමාජිකයන්ට, ගුරුවර ගුරුවරියන්ගේ හිතවතුන්ට හා පක්ෂ නිලධාරීන් ගේ හිතවතුන්ට හෝ ඔවුන්ගේ  දරුවන්ට, විදේශික සිසුන්ට  මුල් තැනක් ලැබේ.

මේ නිසා ඉතිරිව ඇති රැකියා වන්නේ එළවලු වෙළඳ සල් වල (මේ කාලයේ එළවලු වැඩියෙන් එන නිසා) රැකියාවක් කිරීම, සමූහ ගොවිපලක ගෝවා නෙලීමට හෝ අල ගැලවීමට යාම වැනි ඒවාය. කුබාන් ප්‍රදේශයේ අල වලට වැඩි වටිනාකමක් ඇති නිසා ඒ පෙදෙසේ මේ රැකියා වැඩිය. එසේම රොස්ටොව් සිට වැඩි දුරක් නැත. ප්‍රසිද්ධ ක්‍රස්නදාර් නගරය ඇත්තේද කුබාන් ප්‍රදේශයේය.
සෝවියට් දේශයේ  කෝමි ප්‍රාදේශිකයේ  යන්ත්‍රානුසාරයෙන් අල ගැලවීමක්    

මේ විශාල ගොවිපල වල අල ගලවන්නේ යන්ත්‍ර මගිනි. ඉන්පසු ඒවා සොදන්නේද විශාල යන්ත්‍ර ආධාරයෙනි. ඉන්පසු එක්කාසු කිරීමට, ඇහිරීමට  සාමාන්‍ය මාස පඩි  කම්කරුවන් (මොවුන් ගොවියන් වශයෙන් හැඳින්වීමට අපහසුය)  සිටිති. අල ගලවන්නට යන අයට කරන්නට තියෙන්නේ යන්ත්‍රයට හසු නොවූ හා ඉන් විසිවී යන අල එකතු කිරීමයි. මෙසේ කරන්නේ නාස්තිය අඩු කිරීමේ පියවරක් වශයෙනි. නමුත් ඇත්ත හේතුව නම් මේ යන්ත්‍ර බොහොමයක් මළකඩ කෑ පරණ ඒවා වීමය. ඒවායින් හරි හමන් අලයක් ගැලවෙන්නේ නැත.
සෝවියට් සිසුවියන් සමුහ ගොවිපලක 
 ගිම්හාන සමයේ රුසියාවේ ඇතැම් පෙදෙස් ඉතා උණුසුම්ය. කළු මුහුද පැත්තේ කුබාන් පෙදෙසේ උෂ්ණත්වයද ඉහල යයි. මේ නිසා අල ගෙඩි  පසට හිරවී තිබේ. නැත්නම් පොළොවින් එළියට එන්නේ විශාල පස් ගුලියක් ද සමගය. මේවා පස් ඉවත් කර වෙන් කර ගැනීම ලෙහෙසි කටයුත්තක් නොවේ.

ගිහාන් ඇගේ දෝතම ගෙන සිප ගත්තේය.
"මට සමා වෙන්න "
"ඇයි මොකටද"
"මම ලන්ඩන් ඉඳන් කතා කලාම ඔයාගේ අම්ම කීව කවුද එක්ක කුබාන් ගියා කියල. මට හොඳටම දුක හිතුන. ඔයා වෙන කෙනෙක් එක්ක යාළු වෙලා කියල. සුහදලත් විහිළු කලා."

ඇය මහා හඬින් සිනා සුනාය. එළියේ සිට මව අක්සානා සූ සූ ගෑවේ රාත්‍රී වී ඇති බැවිනි.

"ඔයා ඉරිසියයි කියන්නේ හොඳයි. මම කැමැතියි ඒ ඉරිසියාවට" ඔහුගේ නළල සිඹිමින් ඈ කීවාය.
 "මම ගියේ මගේ ඉස්කෝලේ යාළුවා නතාෂින්කා  හා එයාගේ පෙම්වතා   සිරියෝෂා එක්ක. මම කීව මට සල්ලි ටිකක් හොයා ගන්න ඕනේ කියල. මගේ ශීත  කාලෙට අඳින සපත්තු දෙක එයාලට විකුණන්න කියල ගියේ.  එයාල කීව අල ගලවන්න  යමු කියල. පරක්කු වෙලා එහෙ ගිය නිසා අපට නිදා ගන්න  වුනේ ගොවිපළේ ඉස්කෝලේ පන්ති කාමරයක.   හැබැයි හැමදාම කිරි නම් ලැබුනා නොමිලේ බොන්න"
ඇගේ සීනු හඬින් කියවාගෙන ගියාය.
ශීත කාලයට පළඳින සෝවියට්  හමුදා තොප්පියක්  (මෙය පැළඳීම ට තහනමක් නැත )

රත් පැහැ තොල් සෙලවෙන අන්දම තවත් බලා සිටීමට නොහැකිවූ ගිහාන් ඇගේ මුව දෝතටම ගෙන දෙතොල් තම මුවට  ගත්තේ ඇයව එතනම තිබු මේසය උඩට තල්ලු කරමින් මෙන් නංවමිනි. තාන්යා ඇගේ දෙපා යුග අතර තදින් හිරවුණු ඔහු ගේ බඳ වටා දෑත් යවා පටලවා ගත්තා ඔහුගේ මුවින් තම මුහුණ පසෙකට ගෙන
"මේ අනිත් තෑග්ග , ඔයාට ඕනේ කීවේ"
කියා රුසියානු හමුදාවේ ශීත කාලයේ තොප්පියක් දඟකාර ලෙස ගෙන ඔහුගේ හිසේ රඳවමින් නැවැතත්  දැරියක මෙන් සිනා සුනාය.

"ළමයි හෙට තගන්රොග් යනවා කීවනේ ඔක්කොම නිදා ගත්තොත් හොඳ නැත්ද "
ඔක්සානා  නැවතත් කෑ ගෑවාය. 
"ෂූ ෂූ " ඔහුගේ දෙතොලට මැදගිල්ල තැබූ ඈ
 "කෑ ගහන්නේ නැතිව ඔයා ගිහින් ඇඟ  හෝදගෙන එන්න නිදා ගන්න. මේ කාමරේ අපි දෙන්නට ඉන්න පුළුවන්. අම්ම මුකුත් කීවේ  නැහැ. වෙන කොහෙවත් ඉඩත් නැහැ "

"මමද දැන් හයියෙන් හිනා වෙලා දැඟලුවේ " උරණ වූ සෙයක් පාමින් ගිහාන් ඉවත් වුණේය.

~ මතු සම්බන්ධයි

"මට සමා වෙන්න " - රුසියානු භාෂාවෙන් ඉස්විනී මින්යා
නතාෂින්කා - නතාෂාට ආදරයට කියන නම
සිරියෝෂා - සෙර්ගෙයි යන නමේ කෙටි යෙදුම, වඩා හිතවත් වුව විට මේ නමින් අමතයි 






Saturday, 9 June 2018

ප්‍රථම ප්‍රේමය ඔබ නොවේ (26) - දොන් නදිය අසබඩ රොස්ටොව්

ප්‍රථම ප්‍රේමය ඔබ නොවේ (25) - දෙමසක්ම ඇය නැතිව
දොන් නදිය අසබඩ රොස්ටොව් නගරය 
ගිහාන් ලන්ඩනයේ සිට පැමිණියේ පන්ති පටන් ගැනීමට සුමානයකට කලින්ය. තාන්යා ගේ නිවසට යාමේ බලාපොරොත්තුවද ඒ අතර තිබුණි. දුම්රිය මැදිරියේ ප්‍රොවොද්නික් හෙවත් මැදිරි සහායක වූයේ ඔහු පැමිණි දුම්රියී කොන්දොස්තර වසීලිමය. ඔහු වසීලී ගේ බිරිඳට ගෙනා රූප ලාවණ්‍ය භාණ්ඩ දුන්නද වසීලී ගෙන් මුදල් ගත්තේ නැත. ඔහු සමග යහළු වී සිටීම මැනවැයි කියා සිතුනු හෙයිනි. එපරිද්දෙන්ම මොස්කව් වලදී වසීලි ඔහුට රොස්ටොව් යාමට දුම්රිය ප්‍රවේශ පතක් ගැනීමට උදව් කළේය.

විදේශික සිසුවෙකුට වෙනත් නගරයකට යාමට වීසා අවශ්‍යය. සුහද ලවා ඔවිර් නමැති වීසා දෙන තැන කෙල්ලගෙන් එකක් ලබා ගත හැකි වුවද සුහද තවම ලන්ඩනයේය. එනිසා වසීලි ගෙන් උදව් ලබා ගත යුතුය.

 කුලී රියකින් නේවාසිකාගාරයට ගිය ගිහාන් කලේ මුලින්ම තාන්යා ඇමතීමය. දුරකථනය තුලින් ඇසුණු ඇගේ කටහඬට ඔහු ප්‍රීතියෙන් යුතුව සවන් දුන්නේය.
"මම එයා ගියේ කොහෙද කියල අහන්නේ නැහැ . ගිහිල්ලම අහනවා"
"ඔයා එනවා නේද  ම්යෙලී милый  " ඇය ඇසුවාය. ම්යෙලී යනු රුවැත්තා, සුරතලා    යන අරුත් දෙන රුසියානු ආදර වදනකි. මෙහි මීලයා යනුවෙන් හැඳින්වෙන්නේ රුවැත්තිය හෝ සුරතලිය යන්නය.

"එන්න තමයි. ඔයාව දකින්න නැතිව අමාරුවෙන් හිටියේ. ටිකට් එක අද රෑ. හෙට රෑ දහයට එහේ. මට ලිපිනය දෙන්න, ටැක්සියක් අරන් එන්න"
ඇය සිනාසෙන හඬ ඔහුට ඇසුනි.
"මටත් ඔයා දකින්න  නැතිව (රුසියානු බසින් - යා ස්කුචාලා ) හිටියේ දුකින් වගේ. මම එනවා දුම්රිය ස්ථානයට ඔයාව එක්ක යන්න. දුම්රිය මැදිරිය කියන්න"
 "එතකොට අර කාත් එක්කද ගියා කීවේ " යයි අසන්නට සිතුනත් ගිහාන් දිව විකා ගත්තේය.
ඇයට මැදිරිය පැවසූ ඔහු ඇගෙන් සමුගෙන ගමනට ලැහැස්ති වුනේය.
තාන්යා ගේ  මවට, පියාට, සහෝදරියට, සහෝදරිය ගේ පෙම්වතාට සහ මිත්තනියට ගත් තෑගී සමග ලන්ඩනයෙන් ගත්  චොකලට්  හා චෙරි ලිකර් මත්පැන් බෝතලයක් ද විය.

ලන්ඩනයේ සිට  පැමිණ ගමන් මහන්සිය හා යහළුවන් දැකීමට යාමේ අවශ්‍යතාවය  තිබුනත් තාන්යා දැකීමේ උනන්දුව ඒ සියල්ල වසා පැතිරුණේ දහදිය දමා වෙහෙස වූ විටෙක සීතල ජල කඳක් සිරුර සිප ගන්නා අයුරිනි.

 නමුත් ලන්ඩනයේ සිට පැමිණි නිසා ඔහු කලේ ට්සෙන්ත්‍රාල්නයා පෝච්තා හෙවත් ප්‍රධාන තැපැල් මධ්‍යස්ථානය යනුවෙන් හැඳින්වෙන ගොර්කව්ස්කයා උමන් දුම්රිය පල අසල ඇති  මහා තැපැල් හලට ගොස් ලංකාවට දුරකථන ඇමතුමක් ගැනීමය. ඒ දිනවල රුසියාවේ සිට පිටරටකට දුරකථන ඇමතුම් ගත හැක්කේ එලෙස පමණි. නංගී හා අම්මා සමග කතා බහ කරමින්  අසනීපයෙන් සිටි පියා ගැන ද සුවදුක් විචාරා ශීත  සමයේ හැකි වුවොත් ලංකාවට එන පොරොන්දුව පිට ගිහාන් ඔවුන්ගෙන් සමු ගත්තේය.

කුර්ස්කි, කසාන්ස්කි  හා කියෙව්ස්කි යන මොස්කව් හි දුම්රියපළවල් තුනෙන්ම යා හැකි වුවද කසාන්ස්කි දුම්රිය පලින් යන දුම්රිය පැය විසි දෙකහමාරකින් රොස්ටොව්  වලට ලඟා වේ. වීසා නැතිව යාමට වසීලි ලවා ප්‍රවේශ පත්‍රය ගත් පසු වසීලි ම එදින රැයේ පිටත් වන දුම්රියට ගිහාන් ව නංවා එහි දුම්රිය මැදිරි සහායකද හඳුන්වා දීමට ඉදිරිපත් විය.

රාත්‍රියේ දුම්රියට නැගගත් ඔහු එලිවී බොහෝ වේලාවක් යනතුරු නිදා ගත්තේය. ඔහුත් සමග එම නිදන මැදිරියේ තරුණියන් දෙදෙනෙකු හා තරුණයෙකු සිටියහ. ඔවුන් සමග සිනාසුනද ඔවුන් වැඩි කතා බහකට පැමිණියේ නැත. රොස්ටොව් පෙදෙසේ ජිවත්වන අයවළුන් නම් ඔවුන් කතා නොකරන්නේ විදේශිකයන් ට එතරම් හුරු නැති නිසා යයි ගිහාන් ට සිතුනි. කුසගිනි දැනුනු නිසා දුම්රියේ බුෆේ මැදිරියට ගොස් ආහාර ගැනීමට ක් යද්දී සිංහල කටහඬ කිහිපයක් ඇසුණු නිසා එදෙස බැලූ ඔහුට දනියෙට්ස්ක් නගරයේ උගන්නා  ගීගනගේ හා තවත් සිසු සිසුවියන් කිහිප දෙනෙකු ඇස ගැටිණි.

"මළ කෙළියයි දැන් මොකක්ද කියන්නේ " ඔහුට සිතුනි.
ගීගනගේ ඔහු දුටු වහාම මැදිරියෙන් එලියට පැන්නේය.

"මචන් කොහෙද අපේ පැත්තේ යනවද "

"නැහැ මම රොස්ටොව් යනවා යාළුවෙක් බලන්න " ගිහාන් කටට ආ නමක් කීවේය.

"උඹල මොකද මේ කෝච්චියේ"
"මචන් අපට කමෙන්ස්කයා වලින් බැහැල දොනියෙට්ස්ක් යන්න පුළුවන්."
 උක්රයින සෝවියට් සමුහාණ්ඩුවේ දේශ සීමාව ඇත්තේ ඒ ළඟ බව ඔහුට මතක් වුනි.

"මේ කට්ටිය ඉන්නේ වරොශිලොග්‍රඩ් වල, මම අපේ දිහා එක්කන් ගිහින් පස්සේ එහෙ යනව. තවම නිවාඩුනේ." ගීගනගේ අනිත් සිසුන්ව හඳුන්වා දුන්නේය. වරොශිලොග්‍රාඩ්
යන නාමය මෙම ලුගාන්ස්ක් නම් වූ නගරයට ලැබුනේ ඔක්තෝබර් විප්ලවයේ නියමුවකු වූ හා රතු හමුදා  සෙන්පති ක්ලිමෙන්ට් වරශිලොව් නිසාය. මෙයද උක්රයීන රුසියානු දේශ සිමාවේ ඇති  නගරයකි.

"ගිහාන් මොස්කව් වල. ට්‍රාන්සිට් ගහන්න ඕනේ නම් පලයල්ලා හොඳ එකා " ගිහාන් අනිකුන්ට හඳුන්වා දෙමින් ගීගනගේ පැවසීය.

පිට නගර වල සිසුන් මොස්කව් පැමිණ යහළු සිසුන්ගේ කාමර වල නතර වෙනවාට කියන්නේ ට්‍රාන්සිට් ගහනවා කියාය. ගීගනගේ බොහෝ විට දේශපාලනය ගැන නොනවත්වා කතා කරයි. ගිහාන් වැඩිපුර දේශපාලනය කතා නොකරයි. දැඩි ට්‍රොට්ස්කිවාදියෙකු වන ගීගනගේ නිතර සෝවියට් දේශපාලනය  විවේචනය කරයි. එසේම ඔහු ළඟ වොඩ්කා බෝතලයක් වරදින්නේද නැත.

ගිහාන් සිතුවා හරිය. මහා දවාලේ කල්බසා පෙති කපාගෙන ඔවුන් වොඩ්කා බොති.

"මචන් මට බඩගිනි කන්න  යමුද."
"මේක ඇතුලේ ඇවිදින්න එපා බන් කවුරු හරි වීසා බැලුවොත්. අපට තියනවා. උඹට නැහැ නේද. මේ තියන ඒවා කමු. " ගීගනගේ ගිහාන් ගමන  යන ආකාරය අනුමාන කරමින් කීවේය.
අන්තිමේදී කමෙන්ස්කයා දක්වා එතැන සිටි ඔහු ප්‍රධාන රොස්ටොව් දුම්රිය පලේ දුම්රිය නැවැත්වීමට තිරිංග තද කරන විට බෑගය අත ඇතිව හිස එලියට දමාගෙන සිටියේ නොඉවසිලිමත්වය.
සෝවියට් රතු තරුව ඇති පදක්කම හා බෙරෙට් එක 

හෙමින් ඇදෙන දුම්රිය මැදිරිය හරියටම පදික වේදිකාවේ නැවතෙන ස්ථානය ඔවුන් එනතෙක් බලා සිටින  මගීන් ගේ සහෘදයන් , හිත මිතුරන් හොඳින් දනිති. හැමදාමත් දුම්රිය හරියටම නවත්වන්නේ එම ස්ථාන වලමය.  දුම්රිය සෙමින් නවත්වන විට තමන් රීෂ්කයා වෙළඳ හලකින් මිලදී ගෙන ඇයට ත්‍යාග කළ දම් පති   ගවුම ද හැඳගෙන බෙරේට් යනුවෙන් හැඳින්වෙන කැපයක් හිසේ පැළඳගෙන බලා සිටින තාන්යා දුටු ගිහාන් දුම්රියෙන් බැස්සා නොව පැන්නේය. ඇය  බෙරේට් එකේ පැළඳගෙන සිටින රතු සෝවියට් තරුව සහිත පදක්කම ද  ඔහුගේ ඇස ගැටුණි.

බෑගය බිම දැමූ ඔහු තදින් තාන්යා වැළඳගෙන ඇගේ රත් දෙතොල් සිප ගත්තේය. ඇයද ඔහු දැඩි ලෙස වැළඳ ගත්තේ සුසුමක්ද මුදා හරිමිනි.

"මේක හරියට චිත්‍රපටියක වගේ. සොල්දාදුවා යුද්දෙන් පස්සේ ගම් බිම් බලා ආවා වගේ "
අසල සිටි මැදිවියේ මිනිසෙක් උස්  හඬින් පවසා සිනාසුනේය.

"ආහ් ගිහාන් මේ මගේ පපා ඇලෙක්සෙයි  " තාන්යා තම පියා හඳුන්වා දුන්නාය.
ඇලෙක්සෙයි ගිහාන්ගේ සුරත තදින් මිරිකා උරහිස අල්ලා ගෙන "ස්  ප්‍රියෙස්දම් " සිනා සෙමින් කීවේය. එහි තේරුම "සුභ ආගමනයක්" වැන්නකි.

තාන්යා ගේ නම තාන්යා ඇලෙක්සියෙව්නා  වූයේ එනිසා  බව ගිහාන් ට වැටහුණි. පියාගේ නමට  "ව්නා " පදයක් එකතු කර දියණියට නම් තබනු ලැබේ. පුතෙක් නම් ඔහු ඇලෙක්සියෙවිච් ය.

ඇලෙක්සෙයි ගිහාන් ගේ බෑගය ගන්නට තැත් කළේය. ගිහාන් ලජ්ජාවෙන් "නැහැ ඇලෙක්සෙයි  මම ගෙනියන්නම් " පවසා තාන්යා ගේ සිහිල් අත  ඔහුගේ සුරතේ රඳවා ගත්තේය.

පියා කාරයට යාමට ඉස්සර විය. ඔහුට තිබුනේ කුඩා මොස්ක්විච් නමින් හඳුන්වන රථයකි. මෙය තරමක් දුරට පරණ ෆෝඩ් ඇන්ග්ලියා රථයට සමානය.

"අපි ඉන්නේ ප්‍රොලිතර්ස්කි  ප්‍රදේශයේ. "
තාන්යා යමින් ගමන් කීවාය . ප්‍රොලිතර්ස්කයා (proletariat) යනු "නිර්ධන පන්තියේ " යන තේරුම සහිත පදයකි.පියා හා රථය පෙන්වමින් එච්චර අමාරුවක් පෙනෙන්නේ නැතැයි ගිහාන් විහිළුවක් කළේය.

"විප්ලවයෙන්  පස්සේ දාපු නම් "  ඇලෙක්සෙයි සිනා සුනේය.

මේ පියා කොපමණ හොඳද? දුව යහළු වී සිටින පෙම්වතා විදේශික තමන්ගේ පැහැයද නොවන අයෙකි. ඔහු හැසිරිමේ  කිසිම වෙනසක් නැතිව ඉතා නිහතමානීව තමා පිලි ගත්තා නොවේදැයි ගිහාන් ට සිතුනි. රථයේ ඉදිරිපස අසුන ගිහාන් ට දී තාන්යා පිටුපස අසුනේ හිඳ ගත්තාය,

 "මමායි (මව)  බබුෂ්කයි (මිත්තණිය) ඇහැරලා ඉන්නේ ඔයා එනකන්ම"

ඉදිරි අසුනේ සිටින ගිහාන් ගේ ගෙල වටා දෑත යවමින් තාන්යා තෙපලාය.

පියා සිනාමුසු මුහුණින් රථය පදවයි.

~ මතු සම්බන්ධයි 

Monday, 4 June 2018

මෙඝන් ගේ පෙනෙන ගවුම හා නොපෙනෙන පෑන්ටිය

මෙඝන් මාකල් හා හැරී ගේ මංගල්‍යයේ නොපෙනෙන  පැති  කඩක් තිබේ. ත්‍රිමාණ  වෙබ් අඩවියේ මේ ලිපිය "හැරී දෙස බලා සිටින ඔබ ඇත්තටම නිදහස්ද " බලන්නේ දැනට රාජකීය පවුලට කැමැත්ත ඇති ජනයා දෙස සාමාන්‍ය  රැඩිකල් වම විවේචනාත්මකව බලන ලෙසින්මය. උදාහරණයක් වශයෙන් හැරී හා මෙඝන් ට සුභ පතා  ෆේස්බුක් පොස්ට් එකක් මම පල කළෙමි. එයට විරුද්ධව අදහස් දැක්වූ ස්වීඩනයේ දර්ශනවාදය ඉගෙන ගන්නා  සහෝදරයෙක් මම මෙඝන් ගේ මෙලනින් සංඛ්‍යාව සොයාබලා  සුභ පතන  බව පැවසීය.

ඔහුට  මගේ දියණිය දුන් පිලිතුරද සමග මෙහි බ්ලොග් පෝස්ට් (ඉංග්‍රීසියෙන් ඇති බ්ලොගයේ) එකක් දැමුවෙමි.  ඔව්, මෙඝන් ද  මගේ දියණිය මෙන්ම  මික්ස්ඩ්  රේස් හෙවත් මිශ්‍ර විවාහ වලින් උපන් දරුවන්ය. එනිසා ස්වීඩන් සහෝදරයාගේ වාමාංශික කතාව බැලූ බැල්මට එක්තරා  ආකාරයකින් මිශ්‍ර විවාහ දරුවන් කෙරෙහි එල්ල වන ප්‍රහාරයක්  සේ පෙනේ. නමුත් මා සිතන පරිදි ඔහු අදහස් කරන්නේ හැරී රැඩිකල් වුනා කියා හෝ මෙඝන් භාගයක් කළු වුනා කියා හෝ රජ පවුල අපේ බදු මුදල් වලින් පරපෝෂිතයන් සේ ජිවත් වීම  නතර කරන්නේ නැති බවයි.

ත්‍රිමාණ  ලිපියෙන් ද මට වැටහෙන්නේ එයයි.

 හැරී ට අවශ්‍ය නම් රාජකීය ලේ සහිත කන්‍යා කුමාරිකාවක් සම්ප්‍රදාය අනුව යමින් විවාහ කර ගැනීමට අවකාශ තිබුණි. ඒ වෙනුවට ඔහු විවාහ වූයේ එක විවාහයකින්  දික්කසාද වුනු පෙම්වතුන්  කිහිප දෙනෙකු ඇසුරු කළ මිශ්‍ර විවාහයකින් (කළු ජාතික අප්‍රිකන් ඇමෙරිකන් මව හා සුදු ජාතික පියා )  උපන් මෙඝන් ය. ත්‍රිමාණ හා අනිකුත් ලාංකික  රැඩිකල් වමේ අදහස නිවැරදි වන්නේ මෙන්න මේ පැත්තෙන්  පමණි.

 ඇත්තටම හැරී කළේ ජනප්‍රියතත්වය අඩු වෙමින් යන  රජ පවුල රැක   ගැනීමකි. සියයට හැටක් පමණ බ්‍රිතාන්‍ය ජනයා රජ පවුල ගැන තැකීමක් නොකරති.

බ්‍රිතාන්‍ය කම්කරු පක්ෂ නායක කෝබින් රිපබ්ලිකන් වාදියෙකි. එහෙත් කෝබින් ගේ කණ්ඩායම පවා රජ පවුල සම්පුර්ණයෙන්ම   ඉවත් කිරීමේ තර්කයක නැත. රජ පවුල තම ආදායමින්  බදු ප්‍රමාණයක් ගෙවමින් දිගටම පවත්වා ගැනීම  ගැන අකමැත්තක්  නැති ප්‍රවණතාවයක්  පවතී.

මෙයට හේතුව ඇත්තේ බ්‍රිතාන්‍යයේ පවතින ධනවාදය ක්‍රියාත්මක වන ආකාරය තුළය.
උදාහරණයක් වශයෙන් මෙඝන්, හැරී සමග කිසියම් රාජ්‍ය හෝ චැරිටි යෝජනා ක්‍රමයක්  විවෘත කිරීමකට  යනවිට අඳින ගවුමක් ගනිමු.  එම ගවුම සාමාන්‍යයෙන් පැයක්  තුල විකිණීමේ ප්‍රවණතාවයක් පවතී. මෙය හඳුන්වන්නේ මෙඝන් මාකල් එෆෙක්ට් (The Meghan Markle effect යනුවෙනි.

මේ ලිපියේ දැක්වෙන්නේ එසේ ගවුමක් විකුණන වෙබ් අඩවියක් ක්‍රෑෂ් වුනු අයුරුය.

ගෝට් නමැති වෙබ් අඩවියේ විකුණන  ගවුමේ වටිනාකම පවුම් 590 කි. (රුපියල් ලක්ෂයක් පමණ) . බොහෝ අය එය මිලදී ගැනීමට පොරකෑමේ හේතුවෙන් වෙබ් අඩවිය ක්‍රියා විරහිත විය.

එසේම වෙනත් දිනෙක ඇය හැඳ සිටි කබායක් මිනිත්තු කිහිපයකින් විකුණා අවසන් විය.
මෙඝන් විකුණා දුන් බෑගය 

ඇය ස්කොට්ලන්තයේ  කළ චාරිකාවේදී කුඩා වෙළඳ ආයතනයක බෑගයක් රැගෙන ගියාය. එයද  විකිණී අවසන් විය. මේ තිබෙන්නේ එවැනි එක බෑගයකි. එසේම එම වෙළඳ ආයතනයට  ලොවේ අනිකුත් රටවලින් (අමෙරිකා එක්සත් ජනපදය, ස්වීඩනය, ජර්මනිය) ද ඇනවුම් ලැබෙමින් පවතී. මේ අනුව ඔවුන් එම බෑගය අපනයනය ද කරයි. වෙළඳ ආයතනය හා කම්හල  පසුගිය වසර තුල වැඩි දියුණු  වුනු අතර නව රැකියා අවස්ථා කිහිපයක්ද බිහිවී  තිබේ. එසේම එම ආයතනය වෙනත් රටක නිෂ්පාදන ගෙන්වා ගන්නා  අතර එම රටේද රැකියා අවස්ථා ඇතිවී තිබේ.

කේට් මිඩ්ල්ටන් හෙවත් කේම්බ්‍රිජ් ආදිපාදවරිය ගේ ඇඳුම් පැළඳුම් වලට ඇති සැලකිල්ල ද  මෙසේමය. වසර 2015 දී කේට් ගේ පවුම් 50 ඇඳුමක් විනාඩි  ගණනකින් විකිණී අවසන් විය.

මේ නිසා මේ කාන්තාවන්  දෙදෙනාගෙන් බ්‍රිතාන්‍යයේ කාන්තා නිමි ඇඳුම්  වෙළඳපලට
ඇති බලපෑම සැලකිල්ලට ගත යුතු තරම් විශාලය.

මෙඝන් අඳින  පෑන්ටිය කුමක්ද යන්න දැන  ගැනීමට ක්‍රමයක් නැත, එනිසා වෙළඳ ආයතන කරන්නේ මේ දෙදෙනාගේ ඡායාරූප ඇතුලත් යට ඇඳුම් නිෂ්පාදනය කිරීමය.

ඉදිරියේදී මේ වෙළඳ ප්‍රචාරණය තවත්  උග්‍ර විය හැකිය. මෙඝන් කන කෑම, දරුවෙකු ඉපදුනොත් ඔහුට හෝ ඇයට කවන කෑම ඉදිරියේදී මාකට් විය හැකිය.  ප්‍රින්ස් ජෝජ් ගේ ඇඳුම පැළඳුම් දැනටමත් විකිණේ.

කොටින්ම  හැරී කළේ රැඩිකල් දෙයක්ම නොවේ.  ඔහු කළේ පවතින යථාර්තයට අනුගත වීම පමණකි. මා  ඔහුට සුභ පතන්නේ ඔහු එය වඩා හොඳින් වටහා ගත් නිසාය.
ධනවාදය දියුණු වනවිට එයට අවශ්‍ය වනුයේ  භේදයකින්, කරදරයකින්, දම්වැල් වලින් තොර  ශ්‍රමයක්  ලබා ගැනීමය. එම ශ්‍රමයෙන් නිපදවන භාණ්ඩ විකිණිය යුතුය. ඒවායින් ලාභ ලැබීමට නම් ඒ සඳහා වෙළඳපල  නිර්මාණය කල යුතුය.

කම්කරු පක්ෂයට ඇති ප්‍රශ්නය මේ තත්වය තුල බිහිවන නව රැකියා අවස්ථා නොසලකා හැරීමට නොහැකි වීමය.

වහල්  ක්‍රමය හා රදළ ක්‍රමය බිඳ වැටුනේ ශ්‍රමයට තහංචි පැනවීමට යාමෙනි. ශ්‍රමයට හා වාණිජ නිදහසට තහංචි දමා ධනවාදය දියුණු වන්නේ නැත. ශ්‍රී ලංකාවේ ආයෝජනයක් කරන්නට එන කෙනකුට ඇති තහංචි කොපමණද? නිලධාරිවාදී රතු පටි පමණක් නොව අල්ලස් ඉල්ලන මැති ඇමැතින් හා ව්‍යාපාර ලියා  පදිංචියේ ප්‍රශ්න ඇතුළු දහසකුත් එකක් බාධක තිබේ. එනිසා දියුණු ධනවාදයක් නොව හොරා කෑමේ හා කළු සල්ලි ආයෝජනයන් ඉහවහා ගිය  පාණ්ඩු ධනවාදයක් ලංකාවේ ක්‍රියාත්මක වේ.

බ්‍රිතාන්‍යය දැනට ප්‍රශ්න ගොඩක පැටලී සිටි. එක පසෙකින් ට්‍රම්ප් විසින් වෙළඳ බාධක හා නව බදු(ස්ටීල්) පනවා තිබේ. මෙහෙන් යුරෝපා සංගමයේ ඉවත් වීමේ ප්‍රශ්නයය. ඉරාක  හා සිරියන් යුද්ධ වලට සහභාගී වීම හෝ සහය දීම නිසා ආරක්ෂක වියදම් වැඩිවී ඇත. ජාම  බේරා ගැනීමට නම් කිසියම් වෙළඳ විප්ලවයක් අවශ්‍යය. මා  කියන්නේ එය සම්පුර්ණයෙන්  ගෙන එන්නේ මෙඝන් හෝ කේට් කියා නොවේ. ඔවුන් සැලසුමේ කොටසකි. හැරී අත  තිබ්බේ රන් කෙණ්ඩියකටය.

 මේ රටේ ආර්ථිකය හොඳ වනවිට මටත් හොඳවන නිසා මගේ නම් එයට විරුද්ධත්වයක්  නැත. ඒ සඳහා මේ පවුලට ගෙවන මුදලින් බද්දක් ගියාට ප්‍රශ්නයක් ද නැත. එකම දේ රජ පවුලට  වඩා  බදු ගෙවන ලෙස බල කිරීමය. දැනට රජ පවුල ට මිනිසුන් ගේ බදු වලින් බ්‍රිතාන්‍ය රජය  පවුම් මිලියන් 43 ක් ගෙවති. රැජින හා චාල්ස් මිලියන් 20 ක පමණ නැවත රජයට බදු ගෙවති.

මෙයට එරෙහිව කතා කරන කම්කරු පක්ෂයේ සමහරු රැකියාවක්  නොකර රජයේ සුභ සහනාධාර වලින් යැපෙන්නෝ වෙති. එනම් ඔවුන් යැපෙන්නේද අප ගෙවන බදු මුදල් වලිනි. නමුත් ඔවුන්ගෙන් ආර්ථිකයට කිසිදු  වාසියක් සැලසෙන්නේ නැත.  සමාජවාදය අවශ්‍ය රජ පවුලට බදු ගෙවීමට කීම සඳහා පමණක් නොවේ. සෝවියට් දේශයේ කලාක්  මෙන් මේ සියල්ලන්ටම රක්ෂාවක ට යාමට බල කිරීමටය.

ඩෝරියා රග්ලන්ඩ් ,  චාර්ල්ස් කුමරු  , කැමිලා , චාලට් කුමරිය  සහ කේට් 
වහල් වෙළඳාම  නිසා අමෙරිකාවට බලහත්කාරයෙන් ගෙන ආ අප්‍රිකානු  කළු ජාතිකයකු ගෙන්  පැවතෙන මෙඝන් ගේ මවත්,  එම වහල් වෙළඳාමට අනුබලය හා ආරක්ෂාව සැපයූ රජ පවුලෙන් පැවත වෙන එලිසබත් රැජින හා ඇගේ පුත් කුමරා චාල්ස් නුත් වින්ඩ්සර් මාලිගාවේ පල්ලියේ  පඩි පෙළ උඩ  එකට සිට ගන්නේ අහම්බයකින් නොවේ.

ඔවුන්ගේ අනාගතය දෙස බලාගෙනය.

The Meghan Markle effect: Garden party Goat dress sells out in minutes and causes website to crash