Thursday, 28 March 2019

පිදුම -ඇයට .....................................


මේ සටහන 

ජීවිතය විඳින විඳවන 

තම ජීවිතය සුරතින් දරාගත් 

කෙනෙකුට 

අදාළ කළ හැක්කක් ද යයි

නොදනිමි


එහෙත්, අර්බාත් වීදියේ

දිනෙක හිම කිරමයක

සීතල රස විඳගත් 

රතු දෙතොල හිමි  සුන්දර යුවතිය


දැන හඳුනා ගෙන ගතවූ

සුන්දර අතීතය 

පිළිබඳ මතකය 

සිතෙහි නොවෙනස්ව 


රැඳී ඇත 

ක්‍රෙම්ල්හි තාප්පය පහල උද්‍යානයේ 

සීතල වැස්සේ කුඩයක් ඉහලාන 

තුරු ලතා අතර ඇවිද්දා  මතකද 

මා මත වැසි පොද පතිත වන හෙයින් 

ඔබත්  කුඩය හැකිළුවා මතකද

තෙමෙන්නට එකම වැස්සේ 



"යළි කවදාවත් හමු නොවනා බව

මඳ පවනක් හිස අතගා කීවද" යයි 

මා ඇසූ ගීයක තිබුණි 

නමුදු වැස්ස යළි යලිත් පැමිණ

තාප්පය පහළ තුරු ලතා සිඹිනු ඇත

නැත්තේ අප පමණි 




වෙනස් වන ලෝකය

ඔබට කුරිරු වන්නට ඇත

අපට අතපසු වන දේ

තවකෙකුගේ නිර්දය ලැබීමක් 

බව වටහා ගන්නට 

ගතවූ කාලය 

නැවත හැරවිය නොහැකිය 



එහෙත්, ඒ  කෙටිම වූ

මුත් සුන්දරම වූ  කාලයක

පතිනියව කෙනෙකුගේ

ජීවිතය රසවත් කළ



ඔබ අද නොසිටිය හැකිවද

ඔබේ මතකය ජීවත්වනු ඇත

ඔබ වෙනුවෙන් ඉඩක්

මිහිතලය මත වෙන්

නොවන්නට ඇතත්...



අකුරු කිහිපයක ඔබ

තවත් කාලයක් රැඳෙනු ඇත



දයාබර නතාලියා 




****************************



ප්‍රශස්ත ගායක අමරසිරි පීරිස් ගයන  මේ ගීතය වනාන්තරයකට  වැටුණු වැසි පොදක් ගැන යැයි දනිමි.









ප.ලි.


සෑහෙන කාලයක් තිස්සේ ලියූ කතාවක අවසානය තවත් ඉතිරිව ඇතත් මේ  පිදුම
පසුගිය පරිච්ඡේදයක්  හා සබැඳෙන බව ඔබට වැටහෙනු ඇත. 


Saturday, 23 March 2019

ප්‍රථම ප්‍රේමය ඔබ නොවේ (52) - ඉරණම අප එක්කළේ නැත

ප්‍රියාන් ගේ නවාතැන  පිහිටියේ බ්‍රික්ස්ටන් වලය. බ්‍රික්ස්ටන් කළු ජාතිකයන් හා අයිරිෂ් වරුන් බහුලව සිටින ප්‍රදේශයකි. ඔහු ජිවත් වූයේ  දෙවන තට්ටුවේ විශාල කාමරයකය. කාමරයේ කෙළවරක මේසයක් සහ පුටු කිහිපයක් තිබුණි. ඒ සමගම නිදන ඇඳය. හිඳ ගැනීමට සෝපාවක් ද තිබුණි. මුළු කාමරයම කාපට් දමා තිබුණි. මැද හරියේ ඇඳුම් අල්මාරියක් තිබේ. කාමරයේ මුල සුව පහසු සෝපා පුටු දෙකකි.

මුළුතැන් ගෙය සහ නාන  කාමරය එම නිවසෙහිම තවත් දෙදෙනෙකු සමග සමසේ භාවිතා කළ යුතුය. අනිත් දෙදෙනා සිටියේ උඩ කාමර දෙකකය.
බ්‍රික්ස්ටන් රාත්‍රිය 

"අපේ නේවාසිකාගාර කාමර වගේ හැබැයි ලොකුයි."   තාන්යා කාමරය වටා බැල්මක් හෙළුවාය.

"කේක් කමුද? මම තේ හදන්නම් "

"නෑ මම හදන්නම්" ඇය මුළුතැන්ගෙට ගියේ තේ හදන්නය. තවමත් සංගීත කණ්ඩායමක පුහුණු වෙන රිචඩ් එහි සිට තාන්යාට ආචාර කළේය.
කේක් කපා තසිමක දමා ගෙන ආ තාන්යා තේ කෝප්පයක්  ප්‍රියාන් ට පිලි ගැන්වූවාය.

"මම රිචඩ් ට කේක් කෑල්ලක් දුන්න, එපා කියල ආයේ ගත්ත. එයා කතා කරන  ඉංග්‍රීසි තේරෙන්නේ නැහැ හරියට"

"මටත් මුලදී තේරුනේ නැහැ මෙහෙ ඉංග්‍රීසි උච්චාරණය. පස්සේ හරියනවා"

"මම කූරිත්සා  එක හලදිල්නෙක් එකෙන් එලියට  දාල එන්නම්. පස්සේ උයන්න."
ප්‍රියාන්  කුකුළා (කූරිත්සා ) ශිතකරණයෙන් (හලදිල්නෙක්) සින්ක් එකට  දමා  උණු වතුර වත්කොට පැමිණියේ පසුව උයන්නටය.

තාන්යා කිසියම් ලිපියක් වැන්නක් ඇගේ බෑගයෙන් එලියට ගෙන කියවමින් උන්නාය.
"ඔය මොකක්ද"
"මේක ඔයාලගේ ආගමේ කවියක්. මට ලියල දුන්නේ ලෝලි . මේක ඉංග්‍රීසියට පෙරළලා දුන්නේ මොස්කව් වල එම්ගෞ එකේ  හමුවුන ශිෂ්‍යයෙක්. නාද්‍යා තමයි රුසියන් වලට පරිවර්තනය කළේ.  " තාන්යා කොළය ප්‍රියාන් අතට පත් කළාය.

එම්ගෞ යනු මොස්කව්  රාජ්‍ය විශ්ව   විද්‍යාලයේ ලොමොනසොව් ශාඛාවට කෙටියෙන් කියන නමයි.

ප්‍රියාන් කොලයේ ඇති ගාථාව කියවමින්  සිනා සුනේය.

"ඇයි හිනා වෙන්නේ. ඒකෙ  කියන්නේ සම්පුර්ණ ඇත්ත නෙමෙයිද? මට තවත්  ආදරයක් ඕනේ නැහැ. මම  ආදරයෙන් අයින් වෙනවා. මේ ඔක්කොම මට වුනේ ආදරය කරන්න ගිහිල්ල. ආදරය නිසා දුකත් වේදනාවත් භයත් ඇති වෙනවා. කන්යේච්න ඇත්ත. මට ඔය ඔක්කොම  වුණා "
තාන්යා කෝප ගැන්වී සිටිනවා ප්‍රියාන් දුටුවේ ප්‍රථම වරටය. කන්යේච්න යනු සත්තකින්ම යන අදහස දෙන වදනකි.

"සමාවෙන්න. ඔයාගේ හිත රිද්දන්න ඕනේ නැහැ මට. ඒත් මම ඔයාට කියන්නද මම හිතන දේ. තරහ ගන්නේ නැත්නම් "
 ප්‍රියාන් ඇගෙන් සමාව යදිමින් ඇසීය.

"ඔයා ඕන එකක් කියන්න. අපි කතා කරන්න නේ ආවේ ප්‍රියන්චික් " තාන්යා හෘදයංගම ලෙස සිනාසුනාය.

"මේක සෑහෙන ප්‍රසිද්ධ ගාථාවක්. ඔයා කියනව වගේ කවියක් කියල කියන්නත් පුළුවන්. මේ පළමු භාෂාව පාලි. ඒ කාලේ පරණ ඉන්දියාවේ භාෂාවක්." ප්‍රියාන් ඇයට පැහැදිලි කළේය.
ඇය අත තිබුනේ සිංහලෙන් ලියන ලද ප්‍රසිද්ධ  පාලි ගාථාවකි.

"ප්‍රේමතෝ ජායති ශෝකෝ, ප්‍රේමතෝ ජායතී භයං
ප්‍රේමතෝ විප්ප මුත්තස්ස, නත්ති ශෝකෝ කුතෝ භයං "

කිසිවෙකු විසින් පිටපත් කරන ලද එහි ඉංග්‍රීසි පරිවර්තනයද ප්‍රියාන් ඉංග්‍රීසියෙන්ම කියැවීය.
"love creates sorrow , Love creates fear If there is no love, there is no sorrow and fear."

"තාන්යා මට තේරෙන්නේ මේකෙන් අදහස් වෙන්නේ  love is root to all evil වගේ  දෙයක් "  ප්‍රියාන් රුසියානු හා ඉංග්‍රීසි භාෂා දෙක මිශ්‍ර කරමින්  පැවසීය.
"මෙතන ආදරයට අමතරව ආශාව, බැඳීම  ඉංග්‍රීසියෙන් endearment, desire, affection, attachment කියල කියන ඔක්කොමත් ඔතනට අයිතියි.  ඔයාට වුන දේ වෙන ඕන කෙනෙකුට වෙන්න පුළුවන්. එහෙම උනාය කියල ඒක වුනේ  ප්‍රේම කිරීම නිසාය කියල හිතන එක තේරුමක් නැති දෙයක්.  බුද්ධාගමේ මේ වගේ උපදේශ වාක්‍ය තියෙන වෙනම  පොතක් තියනවා ධම්මපදය කියල. මේ වගේ ඔයා මේ කවි කියන ඒවා හුඟක් තියනවා ඒකෙ. නමුත් මලදායා  මේකෙන් කියවෙන්නේ නැහැ ඔය මතුපිටින් එන තේරුමම අපි  ඔළුවට ගන්න ඕනේ කියල. මේකෙන් කියවෙන්නේ මේ වගේ නිරීක්ෂණයක් තියනවා  කියල විතරයි. අනික හුඟක් බෞද්ධයෝ හැම විටම දෛවය ට ජිවිතේ වෙන හැමදේම භාර දෙනවා. ඒකට කියන්නේ මේ fatalism වගේ වචනයක්. අනේ මගේ කර්මය, මගේ  ඉරණම මේක කියල. ලලිතා ඔයාට කියන්න ඇත්තේ ඒක.  "  ප්‍රියාන් පැහැදිලි කළේ තාන්යා ජීවිතය ගැන කළකිරී ඇති බවට අනුමාන කරමිනි. ඔහු මලදායා වචනය භාවිතා කලේ ඕනෑ කමින්ය. එහි තේරුම තරුණ යුවතිය  හෝ කෙල්ල යන්නයි.

"මට ඔයා කියන දේ හරියටම තේරුනේ නැහැ ප්‍රියාන්. ඔයා කියන්නේ එහෙම හිතන එක වැරදි කියලද " තාන්යා අහිංසක ලෙස කීවාය.

"බුද්ධා ඔය උපදේශය දීල තියෙන්නේ මුණපුරෙකු නැතිවෙච්ච මිත්තනියක ගේ දුක නිවෙන්න. ඒ මිත්තණියගේ නමත් විශාඛා. බැඳීම , ප්‍රේමය නැත්නම් දුකක් ඇතිවෙන්නේ නැහැ තමයි.  මම කියන්නේ බලන්න ඔය විද්‍යාවේ සමහර  නියමයන් වගේ දේ  තියෙන්නේ. ඔයාගේ රස්සාවෙන්ම  ගමු. පැණි රහ  කෑවොත් දත් නරක්  වෙනව  වගේ දෙයක් ඔයා කියනවා නේ එහෙම වෙච්ච අයට. ඒක ඇත්තනේ. නමුත් අපි කේක් කෑල්ලක් කාල හරි චොකලට් එකක් කාල සතුටු වෙනවනේ. ඊට පස්සේ ඕනෙනම් දත් මදින්න පුළුවන්.
 මම කියන්නේ ඒ වගේ දෙයක්. ප්‍රේමය, ආදරය, ආශාව අපට නැතුව බැහැ. මව්පියෝ ළමුන්ට ආදරේ කරනවා. දෙමාපියෝ එකිනෙකාට ආදරේ කරනවා. යහළුවන් අතර එකිනෙකාට කැමත්තක් බැඳීමක් තියෙන්නේ පුළුවන්. ඒවා නැතිව අපි ජිවත් වෙන්නේ කොහොමද තාන්යා. හැමෝම ඔහොම හිතන්න ගියොත් හෙම ලෝකෙට මොකද වෙන්නේ. හරියට අපි හැමෝටම නිර්වාණය ඕනේ වගේ. හැමෝම හාමුදුරුවරු පූජකයෝ  වුනොත් මොකද වෙන්නේ? කවුද වැඩ කරන්නේ. ඒ ගොල්ලන්ටම වැඩ කරන්න  වෙනවා. පෙම්වතින් , සැමියන් බිරිඳන් අතර ආශාව ආදරය නැතුව ළමයි හැදෙයිද? හොඳයි, ඊට පස්සේ ළමයි ඉපදුනේ නැත්නම් ඒ ධර්මය එහෙම්ම ඉවරයි. ඇයි අලුතෙන් උගන්වන්න පැවැදි කරන්න කෙනෙක් නැතුව යනවනේ. කිසිම ප්‍රයෝගික කමක් නැති විධිහට අපට ඉන්න පුලුවන්ද . ඇති වැඩේ මොකද්ද "

"නිර්වාණය කියන එක මට තේරෙන්නේ නැහැ. ඔයා තවමත් අපේ තිබ්බ සමාජවාදයට කැමතිද ප්‍රියාන්? ඔයා ඒ කාලේ වගේ තවමත්  දෙවියන් හෙම විශ්වාස කරන්නේ නැත්ද? මම ඒ දවස් වල ඔවැනි දේ ගැන කල්පනා කලේ නැහැ, දැන් හිතනවා. අනික ප්‍රියාන්  මේ රට හොඳයි වගේ. රුසියාවේ තරම් අපරාධ නැහැ වගේ. පිළිවෙලක් තියනවා. මමයි නදින්කා යි රොබට් නුයි ඉතාලියේ වෙනිසියටත් ගිහින් මෙහෙ ආවේ. ඒ  රටත් හරි ලස්සනයි. ටිකක් රුසියාවේ පරණ ලෙනින්ග්‍රාද්  නගරය වගේ කියල මට හිතුන.   මගේ ආච්චි හෙම පල්ලියට ගියාට අපි කවුරුත්  ගියේ නැහැනේ.  මේ අදහස් අලුත් දේවල් මට.  මට මොස්කව් ඉන්න එපා වෙලා ප්‍රියාන්. ඔයා කියන්නෙ ඇත්ත. මට ඒ හැමෝගෙන්ම අයින් වෙලා යන්න ඕනේ.  මොකද්ද  මම කරන්නේ අමරාවතියට යන්න එපාද " තාන්යා එකිනෙකට  සම්බන්ධ නොවූ දෑ බොහොමයක් වැලක් ඇදී යන සේ කියාගෙන ගියාය.

"ඔයාගේ ප්‍රශ්න ගොඩයි. ඔයා ඉන්න මානසික  තත්වය නිසා ඔයා ඔය ප්‍රශ්න අහන්නේ. සෝවියට් දේශය  දැන් නැහැනේ. සමාජවාදී සමාජය තුල ප්‍රශ්න තිබුනනේ තානිච්කා . ඒක අත ඇරලා දාමු දැනට. මම දෙවියෝ ආගම් වැනි දේ විශ්වාස නොකළේ රුසියාවට ඉගෙන ගන්න එන්නත් කලින්. ඒ නිසා ඒකත් අත ඇරලා දාමු. මේ රටවල් අපට කියපු තරම් නරක නැහැ. මේ මගේ පළමු වතාව නෙමෙයි මෙහෙ ආපු. මේ පාර නම්  දිගටම ඉන්න වුනා. ඔයාට ඇත්තටම එන්න ඕන වෙලා තියෙන්නේ  වලෝද්යා හා ලේනාගෙන් ඈත් වෙලා ඉන්න ඕන නිසා කියල මට හිතුන. " ප්‍රියාන් ඇසීය.

තාන්යා කල්පනාසහගතව නැගිට්ටාය.
"ඔයාට තව තේ ඕනෙද " ඇය තව තේ කෝප්පයක් වත් කර ගත්තාය. ඇය කලින්ම කුස්සියෙන් පැමිණියේ රුසියානු ක්‍රමයට  තේ පෝච්චියට තේ කිහිපයකට සෑහෙන සේ උණුවතුර දමා ගෙනය තේ බෑග් ද දමාගෙනය.

"බොමු "
තාන්යා තේ වක්කරමින්ම කතා කළාය.

"ඔයා හරිවගේ ප්‍රියාන්. මට ඒ ගොල්ලන්ගෙන් ඈත් වෙලා ඉන්න ඕනේ. නාද්‍යා කිව්වා අමරාවතියේ ඉන්න පුලුවන් කියල, දවස් කිහිපයක් ඉඳල  බලන්න කියල., ඊට පස්සේ ඕනේ නම් එංගලන්තේ නැවතෙන්න කියල. එයා උදව් කරන්නම් කීව. එයා තරමක් දුරට දන්නවා මගේ ගැන. අමරාවතියේ නැවතිලා ඉන්න හිතුවේ දන්න හැමෝගෙන්ම ඈත් වෙලා ඉන්න පුළුවන් කියල හිතල තමා. ඒත් යූරාත් ලන්ඩන් වලට  ඇවිල්ලලු ඉන්නේ. අනික අහම්බෙන් ඔයාවත්  හම්බ වුනානේ. වෙලාවකට හිතෙනවා හොරෙන්ම  ලංකාවට ගිහින් ගිහාන් ඉන්න තැනකට වෙලා එයාට හොරෙන් බලාගෙන ඉන්න. එයා ළමයි එක්ක සෙල්ලන් කරන හැටි.  වීශා එක්ක  ඇවිදින හැටි හොරෙන් බලාන ඉන්න. "

තාන්යා කතා කලේ හිස නැඹුරු කරගෙනය.  ගිහාන් අහිමි වීමේ වේදනාව මෙන්ම මැද පෙරදිග රටේ අත් දැකීම් ද තවමත් ඇය පෙලන බව ඔහු වටහා ගත්තේය. තව දුරටත් අසත්‍ය පවසමින් ඇය මුලා කිරීම නොමැනව යයි ඔහුට සිතුනි.

"අමරාවතියට ගොඩක් බැතිමතුන් එනව. එනිසා තේරුමක් නැහැ එතන ඉන්න එක. තාන්යා .......මට ඔයාට යමක් කියන්න තියෙනවා. "  දිගු හුස්මක් හෙලූ ගිහාන් ගැන ඔහු දත් දේ තාන්යා ට විස්තර කරන්නට පටන් ගත්තේය.

ඇගේ වෙනස් වන මුහුණ ද කඳුළු පිරෙන නිල් දෙනෙතද නිසා ඔහුට  අපහසුතාවක්  දැනිණි. තාන්යා ඔහුගේ දෑතින්ම තදින්  අල්ලා ගත්තාය. ඇගේ යටි තොල වෙව්ලන බව ඔහුට පෙනුණි. ඇය හැඞීම  වළක්වා ගත්තේ අසීරුවෙනි.

ඔහු කතාව අවසන් කරන විට තාන්යා සිටියේ ඔහුගේ උරහිසට හිස තබාගෙන නිහඬව ඉකි බිඳිමිනි.  ඔවුහු බොහෝ වේලාවක් සිතුවිල්ලේ ගැලෙමින් එලෙසම සිටියහ. ප්‍රියාන් සීරුවෙන් ඇගේ හිස ඉවත් කර නැගිට ගොස්  වයින් බෝතලයක් හැර දෙදෙනාටම වයින් වීදුරු දෙකක් වත් කර එකක් ඇගේ අතට දුන්නේ නිහඬවය. ඇය වයින් වීදුරුව තොළ නොගා ඉක්මනින්ම පිපාසාවෙන් සිටි විටෙක මෙන්  අවසන් කළාය. ඔවුහු තවත් වීදුරු දෙකක්  වත් කර ගත්හ. ඇය සෙමින් කටහඬ අවදි කළාය.

"එයා බැන්දේ නැහැ නේද "

"නැහැ තාන්යා. සමාවෙන්න, මම එහෙම කිව්වේ ඔයාගේ හිත නොරිද්දන්න, නමුත් දැන් හිතුන මම ඔයාට ඇත්තම කියන්න ඕනේ කියල "

"වාහනේ හරවනකොට වැටුන වෙන්න බැරිද? එයා එලියට ඇවිල්ල කොහේ හරි ගියා වෙන්න බැරිද? සමහර විට මොස්කව් වලට යන්න ඇති මාව හොයාගෙන. මට ආපහු යන්න හිතෙනවා මොස්කව්"

"මොස්කව් යන්න විධිහක් නැහැනේ. ඔයා ජීවතුන් අතර නැහැ කියල එයාට කිව්වේ මමමනේ. යාලුවෝ නම් කිව්වේ සිද්දිය වෙලා තියෙන්නේ රෑ වෙලාවේ කියල. නාය යන කඳුකර පළාතක දරුණු වැස්සේ ලයිට් එළියක්වත් නැති පාරක ඒ වගේ අනතුරක් වෙන්න ඉඩකඩ වැඩියි කියල. බී ජීස් ලගේ සින්දු තියන කැසට් එකක් නිලන්තට හම්බ වෙලා තියනවා ජීප් එකේ තිබිල. රුසියානු ලේබල් ගහපු" ප්‍රියාන් ඇයට මතකයක් ගෙන දුන්නේය.

"මට ඒ පිස්සු වැඩේ නොකර ඉන්න තිබ්බ. මම ඔයාට ඇත්ත කිව්වනම්. ඒත් ලේනා කැමති වුනේ නැහැ මම ස්වේතා කියල නම වෙනස් කරගත්ත කියල කාටවත් කියනවට. ඒ කැසට් එකේ තියෙන්නේ අපි දෙන්න මුලින් හම්බ වුන දවසේ අහපු සින්දු. එයා ඒ කැසට් එක ලඟින් තියා ගත්ත හැම වෙලේම. මමත් ඒකෙ සින්දු ටික දන්නවා. එයා හැම වෙලේම හිතුවේ ඛේදාන්ත ගැන. අර යුනානා හා අවොස් ගැන කියන  සින්දුවටත් එයා හරි ආසයි. අපට මෙහෙම වුනේ ඒකද ප්‍රියාන් ". තාන්යා ඇසුවේ  හදවත කිඳා බසිනා සුළු ස්වරයකිනි.

"තාන්යා හුඟක් වෙලාවට  අපි කැමතියි විරහවට, වේදනාවට වගේම සතුටටත් . ඒ සින්දු අහන්නේ ඒකයි. ඒ විඳීමයි සැබෑ ජීවිතයේ වෙන දේවලුයි  එහෙම සමපාත  වෙන්න පුලුවන්ද කියල මම දන්නේ නැහැ. "

"ප්‍රියන්චික්, ඔයාගේ නතාෂා ට මොකද වුනේ දන්නවද? කවද්ද  අන්තිමට කතා කළේ " තාන්යා ඇසුවේ ප්‍රියාන් ගේ පෙම්වතිය ගැනය.
මෙර්ස්යකොව්කි මාවත - හැතැප්මක් දකුණට ඇත්තේ ක්‍රෙම්ලින් තාප්පයයි 

"එයාට  මෙහෙ එන්න වීසා ලැබුනේ නැහැ.  හැබයි ඊට පස්සෙත් කතා කළා. මගෙන් ඇහුවා මම එහෙ එනවද කියල අහල. මම කිව්වා බැහැ කියල. ඊට පස්සේ අපි දෙන්න වෙන් වෙන්න කතා කරගත්ත. පස්සේ හදිසියක් වෙලා මුදල් වගයකුත් යැව්වා. අන්තිම සැරේට මම කථා කලාම  ගෙදර හිටියේ වෙන කට්ටියක්. ගේ විකුණලා ගියයි කිව්වා මොස්කව් වලින් පිට තට්ටු නිවාසයක් අරන්. ඒ ගේ අර්බාත්ස්කයා වල තියෙන නිසා ලොකු ගාණක් වෙනවා කියල නතාෂා කියල තිබ්බ මට. මම ඇහුවා ඒ ගෙදර අලුතින් පදිංචි වෙලා ඉන්න අය ගෙන් දුරකථන නොම්මරයක් වත් තියල ගියාද කියල. නැහැ කිව්වා. එයාට ආයි කතා කරන්න ඕන වෙන්නේ නැතුව ඇති" ප්‍රියාන් පැවසීය.

"එයා හිටිය ඒ අර්බත්ස්කයා ළඟ තට්ටු  නිවාසයට මම ගියානේ මතකද අපි බල්ශෝයි තියාතර් ගිය දවසේ. ඒ ගේ කාමර තුනක් එක්ක ලොකු ගෙයක්. ඒකෙ වටිනාකම ඔයා දන්නවද? ඩොලර් එක් ලක්ෂ පනස් දාහකට කිට්ටුයි. "

"එච්චර  ගාණක්‌ " ප්‍රියාන් පුදුමව කීවේය

" ඔව්. ක්‍රෙම්ල් එක ළඟනේ.  ඒක නතාෂා වික්කේ නැහැ කියල මම කියන්නේ ඔයාට." රුසියානුවන් ක්‍රෙම්ලිනය හැඳින්වූයේ ක්‍රෙම්ල් කියාය.

"ඒ කිව්වේ"
අර්බාත්ස්කයා වීදිය 

"ප්‍රියාන් ස්වේතා ගේ ට්‍රැවල් ඒජන්සි එක තිබ්බේ අර්බාත්ස්කය වලනේ. එහෙ ගිය වෙලේ මම නතාෂා හම්බවෙන්න හිතිලා එහෙ ගියා.  කෝල් කරාට කවුරුත් ගත්තේ නැති නිසා. ගියහම ඔයා ඔය කියන මිනිස්සුම  මාව එලව ගත්ත. පස්සේ මම හොයල බැලුවම උන් ලොකු මාෆියා කණ්ඩායමකට අයිති එකෙක්ගේ පවුලක් කියල දැන  ගත්ත. ඔයා දන්නවද මොස්කව් වල  උන දේ ගෙවල් වලට"

"සෝවියට් දේශය බිඳ වැටුනට පස්සේ ඒ ඉන්න අයට ගෙවල් අයිති වුනා කියල හිතුවේ. " ප්‍රියාන් පිළිතුරු දුන්නේය.

"ඔව් එහෙම වුනා. පස්සේ මේ මාෆියා කණ්ඩායම් වයසක මිනිස්සුන්ට, තනියම ඉන්න අයට ගෙවල් විකුණා ගන්න  ඕන වුනහම ඔය වොරනේෂ් වගේ පැතිවල හරි මොස්කව්  වලින් එපිට සීමාවේ ගෙවල් පෙන්වල සල්ලිත් දෙන්න පොරොන්දු වෙලා තියනවා. එහෙම  සල්ලි දීල ඒ මිනිස්සු ඒ ගෙවල් වලට අරන් යන මුවාවෙන් අරගෙන ගිහින් මරල දාල. ඊට පස්සේ ගේ අයිති උන්ට. ඒවා ලොකු ගණන් වලට විකුණනවා තමන්ට ඕනේ අයට.  "

"ඔයා ඕක දන්නේ වලොද්යා ගෙන්ද "

"එයාලත් කීව. මොස්කව් නගරාධිපතිට අහුවුනා. එයත් හැබැයි  වොඩ්ක මාෆියා එකේ හිටි කෙනෙක්. මරපු වයසක ජෝඩු කිහිපයක් ගොඩනැගිලි අපද්‍රව්‍ය එකතුවෙච්ච කුණු වලක  දාල තිබිල හමු වුනා. ඔය විධිහට ගෙවල් විකුණලා සල්ලි හම්බ කරපු කෙනෙක් ලන්ඩන් වලට පැනල ඇවිත් තියනවා. "

"ඔව්, සල්ලි අරන් එන ඕන කෙනෙකුට එන්න දෙනවා මේ රටට. (මේ ක්‍රමය දැන් එංගලන්තය විසින් නැවත දමා ඇත) එතකොට ඔයා කියන්නේ ... " ප්‍රියාන් ප්‍රශ්නය නොඅසා නතර වුනේය.

"ප්‍රියාන්, මට නතාෂාගේ සහෝදරයාගේ බිරිඳ හම්බ වුනා. ඔයාට මතකද අර චිත්‍ර අඳින එක්කෙනා. නතාෂා මට දීල තිබ්බ දුරකථන නොම්මරේ. එයා කිව්වා නතාෂාව හොයා ගන්න බැහැ  කියල. කොහේ ගියාද දන්නේ නැහැ කියල. එයාලා හිතන් ඉඳල තියෙන්නේ ඔයත් එක්ක ලන්ඩන් ආව කියල නොකියම. නතාෂාගේ අම්මයි තාත්තයි දෙන්නම නැති වෙලා එයා තනියම හිටියේ කියල දන්නවද "

"ඔව් අන්තිම සැරේ කතා කරන  කොට ඒක කිව්වා. මම තව පාරක් උත්සාහ කලා නම් හරි. නැත්නම් එයා අහපු වෙලේ ආපහු මොස්කව් ගියානම් ඕක වෙන්නේ නැහැ."
ප්‍රියාන් ගේ දෙකකුල් වෙව්ලන සෙයක් දැනුනෙන් ඔහු මේසය ළඟම  තිබූ ඇඳෙහි ඇලවී දෙඅතින් හිස බදා ගත්තේය.

"අයියෝ " ඔහු කීවේ සිංහල භාෂාවෙනි.
තාන්යා පැමිණ ඔහු අසලින් වැතිරුනාය.
ඔහුගේ උරහිස අල්ලා මදක් ඔහු දෙසට හිස එසවූ ඇය

"ගිහාන් මොකක් හරි කරන්න ගිහින් වැරදුනාම ඔය වචනේ කියනවා "

ඇගේ දෑසින් කඳුලක් දෙකක් වැටුනේය. ගිහාන් පිළිබඳ මතකය ඇය අමතක කළ යුතුද? ඔහු ලතැවුනේය.
ඔහු ඇගේ ගෙල පෙදෙසින් මුදුව අත යවා  ඇගේ හිස මදක් ඔසවා ඔහුගේ ගෙල අසල සඟවා ගත්තේය.

බොහෝවිට දැඩි ශෝකයද මිනිසුන් ගේ හැඟීම් සහ හැසිරීම් තීව්‍ර ලෙස වෙනස් කරන්නට සමත් වන්නේය. ඔවුන් ගේ ශෝකය පොදුනම් ඒ ශෝකය තුල ඒ  වේදනාව තුල ජීවිතය විඳීමට මිනිසුන් හුරු වන්නේය.

තාන්යා හෙමින් මුහුණ ඔසවා ඔහුගේ දෙතොල සිප ගත්තාය. ඔහු ඇය දැඩි ලෙස වැළඳ ගත්තේය.

හැන්දෑවේ මුල් හෝරාව ගතවුනේ ඔවුන් දෙදෙනා එක්කරලමිනි.

~~~~~~~~~~~~~මතු සම්බන්ධයි ~~~~~~~~~~~~~~~~~~~~~~~~~~~~~~~








Sunday, 17 March 2019

සුළඟ අප රැගෙන යාවි


අප කවුරුත් නුවන් ජේ නමින් දන්නා ජනප්‍රිය තරුණ සිනමාවේදියෙකු වන නුවන් ජයතිලක ගේ කුළුඳුල් සිනමා නිර්මාණය "සුළඟ අප රැගෙන යාවි " ළඟදීම ශ්‍රී ලංකාවේ ප්‍රදර්ශනය වන බව මට දැන ගැනීමට ලැබුණි.  මම එය නැරඹුවේ මෙයට  වසරකට දෙකකට පමණ ඉහතදී ලන්ඩනයේ ප්‍රදර්ශනවූ අවස්ථාවේය.

එදින චිත්‍රපටය නරඹන ලද ඇතැම් රසිකයන් එය  තවත් "රේඛාව"ක් බවත් තවත් ලෙස්ටර් කෙනෙකු අප අතරට එන බවත් පැවසූහ. මම බොහෝ වාරයක්  මේ චිත්‍රපට දෙක සංසන්දනය කෙළෙමි.  ඇත්තටම මට එසේ සිතෙන්නේ නැත. රේඛාව එලි දැක්වුණේ ලාභ හින්දි කොපි වලින් සිංහල සිනමාව පිරී තිබුණු කාලයකය. මනරම් ගීත සමුච්ඡයකින් යුත් "රේඛාව" ඒ සමයේ සිනමා රසිකයාට නැවුම් අත්දැකීමක් වූවා සේම සිංහල සිනමාවේ නව මානයක් සනිටුහන් කරන්නක් ද විය. ඒ එසේ වූයේ ඉන්දීය ලාභ චිත්‍රපට වල කොපි ඊටත් වඩා ලාභයට මේ රටේ නිපදවා තිබූ නිසාම නොවේ. ශ්‍රී ලංකාවේ   අධ්‍යක්ෂකවරයෙකුට මුළු  රටේම සංස්කෘතික ප්‍රබෝධයට තුඩු දෙන නිර්මාණයක් කිරීමේ හැකියාව ඉන් සනිටුහන් කළ නිසාය. එසේම රේඛාව සහ මුලින්ම වාගේ ලංකාවේ නිපදවූවකි.

රේඛාව නිපදවා  අවුරුදු හැට දෙකක් ගතවී ඇත. එනිසා ඉහත කී  හේතූන් තවත් සිනමා පටයකට තව  දුරටත් වලංගු වේ යැයි සිතිය නොහැකිය.

 මේ චිත්‍රපට දෙක සමාන කළ හැකි තැන් දෙකක් තිබේ. රේඛාව සම්පූර්ණයෙන් ම වාගේ  රූගත කර තිබෙන්න එළිමහනේය. නුවන් ජේ ගේ "සුළඟ  අප රැගෙන යාවි" හි සියයට අසූවක් පමණ දර්ශන පටිගත කර තිබෙන්නේද  එළි මහනේය.  ලෙස්ටර් විසින් රේඛාව සඳහා තෝරාගත් ළමුන් මුලින් චිත්‍රපටවල රඟපෑ අය නොවේ. ඔවුන් සම්පූර්ණයෙන්ම වාගේ ආධුනිකයන් බවට මා අසා තිබේ. (වැරදි නම් නිවැරදි කරන්න.)  නුවන් ජේ විසින් තෝරාගෙන තිබෙන්නේද රඟපෑමේ ප්‍රසිද්ධ දරුවන් කණ්ඩායමක් නොව රඟපෑම ස්වභාවයෙන් උරුම කොටගත් ළමා නළුවන් කණ්ඩායමකි. ඔහු දක්ෂ ලෙස මේ ළමා කණ්ඩායම හසුරුවයි.

මා කළකට ඉහත දී නැරඹූ සිනමා පටයක්  වන්නේ කෙයිසුකේ කිනොෂිටා නම් අද්විතීය  ජපාන සිනමාකරුවාගේ "නෙත් විසිහතර" (twenty-four-eyes) නම් විශිෂ්ඨ නිර්මාණයයි. ඔහුගේ එම චිත්‍රපටය ඔහු වැනිම විශිෂ්ඨ සිනමාවේදියෙකු වූ අකිතා කුරසෝවා ගේ "සමුරායි වරු සත්දෙනා "   (Seven Samurai) සිනමා කෘතිය පරදවා හොඳම චිත්‍රපටය වශයෙන්  1954 දී තේරුණි. එසේම  හොඳම විදේශික සිනමා  පටයට හිමි ගෝල්ඩන් ග්ලෝබ් සම්මානයද  1955 දී  එයට හිමි වුනි.

මේ චිත්‍රපටය  ජපනුන් ඉතා ආදරය කළ, එසේම   ප්‍රවේශපත්‍ර විකිණී වාර්තා තැබීමෙන් පමණක් නොව  විචාරකයන්ගේ නොමඳ ප්‍රසාදයද හිමිවූවකි. එය, ජපන් සිනමා විචාරකයන් විසින් හොඳම  ජපන් චිත්‍රපට දහයෙන් එකක් ලෙස 1999  දී  නම් කරන ලදී. කොටින්ම පශ්චාත් නූතන ජපන් සමාජයේ යුධ විරෝධී ආකල්ප මුවහත් කිරීමට  මෙම චිත්‍රපටය විශාල සේවයක් කරන ලද්දේ යයි කියති. ජපන් විචාරකයකු වූ සටෝ ටඩාඕ වරක් පැවසුවේ මෙම චිත්‍රපටය අනිකුත් සෑම පශ්චාත් යුධ සමයේ සිනමාපට වලට වඩා ජපනුන්ගේ දෙනෙත් වල කඳුළු පිරවීමට සමත්වූ බවයි.

කිනොෂිටා ගේ චිත්‍රපටය විසි වසරක් පුරා දිවෙන වෘත්තාන්තයකි. එය ගොඩ නැගෙන්නේ දීප්තිමත් තරුණ ගුරුවරියක වූ හිසාකි (හිදෙකෝ ටකමිනේ)  සහ  ප්‍රධාන දූපත් වලින් ඉතා දුරස්ථ ජපන් දූපතක සුන්දර මුහුදුකර ගමක ඇගේ ප්‍රථම පන්තියේ ළමුන් දොළොස් දෙනෙකුත් අතර ගොඩ නැගෙන හෘදයංගම වූ සම්බන්ධය හරහාය.  මේ දූපතේ මිනිසුන් නාගරික තරුණියක වූ ඇය දෙස මුලින් බලන්නේ දැඩි අවිශ්වාසයකිනි. නමුත් පසුව ඇගේ දක්ෂතාවයත්, තමන් උගන්වන ළමුන් කෙරෙහි ඇය දැක්වූ කරුණාවත් දයාවත් ගම්මුන් හඳුනා ගනිති.

දෙවෙන ලෝක යුද්ධය හා කොරියන් යුද්ධය ද තුලින් වෙනස් වන ගමත් ඇගේ සිසුන් කිහිප දෙනෙකු යුද්ධයේදී  මිය යාමත් අතරතුර සමහරුන්ගේ කටුක ජීවිතත් සමගින් කෙමෙන් වියපත් වන ඔවුන් තමන්ගේ පළමු ගුරුතුමියට දක්වන ලැදියාව චිත්‍රපටයේ වසර විසි හතරත් එහි නළු නිළි සමූහයත් එකිනෙකා බඳින හුය වේ.    

ඛේදවාචකයන්, මතකයන් සමගම  කාලය කාව්‍යමය ලෙසින් ආවර්ජනය කරමින් දිවයන චිත්‍රපටය යුදකාමී ජපාන සමාජය සහමුලින්ම වාගේ වෙනස් කරන්නට හා ඔවුන්ට සාමකාමී වීමට බල කල  සවිමත් පදනමක් සකස් කල බව ජපන් විචාරකයන් ගේ මතයයි.  

කිනොෂිටා ගේ චිත්‍රපටයේ නොයෙකුත් අවස්ථා කිහිපයක් මෙහි සටහන් කරමි.

"දෑස් විසි හතරේ " ගායනා කරමින් ඇවිදින සිසුන් සමුහයක් හා කඳුකර ගමක් පෙන්නුම් කරයි. ඔවුන් යන්නේ ගමට එන ගුරුතුමිය හමුවීමටය.

සකුරා මල් පිරුණු වත්තක දරුවන් ගීත ගායනා කරමින් ගුරුතුමිය සමග ඇවිදිති.

ඔවුන් පසෙක කඳුවැටියක් ඇති මනරම්  මුහුදු වෙරළේ ගුරුතුමිය සමග ගීත ගායනා කරති.

හදිසියේ ඇද වැටී කකුලක් ආබාධයට  පත්වන ගුරුතුමිය  බැලීමට සිසුන් බොහෝ දුරක් ගෙවා තනියම යති. ඇත්තටම ඒ ඔවුන්ට යා හැකි දුරක් නොවේ. ඔවුන් නිවෙස් වලට ඒමට පරක්කු වනවිට මුළු ගමම කලබල වෙති. නමුත් සා පිපාසාවෙන් පෙළෙමින් හැඬුවද  දරුවන් කෙසේ හෝ ගුරුතුමිය බැලීමට යති. ඇය ඔවුන්ට ආහාර ලබාදී ධීවරයෙකු සමග නිරුපද්‍රිතව ගමට යවයි. ගැමියන් නාගරික ගුරුතුමිය කෙරෙහි තමන් තුල ඇති විරෝධය ඉවත් කර ගන්නේ එතැනදීය.

ළාබාල සිසුන් දෙදෙනෙකු ගුරුතුමිය මුණ ගැසීමට  ඇගේ ගමට යයි.  ඔවුන් යන්නේ තමන් ඒ පාසැලෙන් අස්වන බව කියන්නටය. ගුරුතුමියද තමන් අස්වෙන බව කියන්නීය.

නුවන් ජේ ගේ "සුළඟ එනු පිණිස " චිත්‍රපටයේ ගවයා නැති වන විට ගමේ හිතවත් පිරිසක් කලබල වෙති.  ඒ වය නැතිවූ පවුලේ උදව්වටය.

දරුවන් දෙදෙනා නැතිවුණු ගවයා සොයා යාමත් ඉන්පසු එක දරුවෙකු කොළඹ යාමට වාහනයකට නැගීමත් සමාන අවස්ථා ලෙස මට පෙනේ.   ඒ දරුවන්ගේ හැටිය.

කඳුකරයේ දරුවන් දෙදෙනා ඇවිදින සමනළයන් පසුපස දිව යන දර්ශන මා කුඩා කාලයේ ලුණුගල ගමේ ජීවත්වූ කාලය සිහිපත් කරවයි. කුඩා නගරයක් වූ ඒ ගමින් එම සුන්දරත්වය දැන් එතරම් දක්නට නැතත් බත් කූරන් හඹා යමින් ගතකළ සුන්දර ළමා වියක් මටද තිබුණි.

ඇත්තටම බැලුවොත් මීමුරේ ගම ලුණුගලට වැඩි ඈතක් නැත. එය පිහිටා ඇත්තේ මහියංගනය පසුකර හසලක පැත්තට යන විටය.  ස්ටයින ඇඩම්ස් ගේ කැමරාව ඉතා  දර්ශනීය පසුතල කිහිපයක්ම  සූක්ෂම ලෙස ග්‍රහණයට හසු කරගනියි. මට මතක එක සුන්දර දර්ශනයක බසයක් ගමන් කරන්නේ පාර හරහා යන දිය වැලක් මතිනි. නුවන් ජේ ගේ අදහස් වලට ගැලපෙන්නටම ඇඩම්ස් ගේ කැමරාවද දක්ෂ ලෙස මෙහෙයවී ඇත.  ශ්‍රී ලංකාවේ සංචාරක අමාත්‍යංශයේ ප්‍රචාරක අංශයට මේ චිත්‍රපටයේ ඇතැම් දර්ශන පසුතල සංචාරක ප්‍රවර්ධනයට උපයෝගී කරගත හැකියයි මට වරෙක සිතුනි. ඒවා එතරම්ම  සුන්දරය.

එසේම චිත්‍රාල් සෝමපාල ගේ  සවන් පිනන සිහිල් සංගීත රටාවන්   හිමාල් මනුප්‍රියගේ  හඬින් කඳු මුදුන් තැනි තලා සමනළයන් අතරින් සැඟවෙමින් ගලායයි.
තවලම් කෝච්චි 

ලංකාවේ ඉංග්‍රීසි පාලන කාලයේ තිබුනේ තවලම් කෝච්චිය. ඒ දෙබාන බැඳි  කරත්ත සමූහයක් එක දිගට සති දෙකක් හෝ මාසයක් පමණ වැය කර බඩු ගෙනයාමට කොළඹ එන ගමනයි. එය නැවතුනේ සැබෑ දුම්රියේ ආගමනයෙනි. ඉන්පසු ලොරි පැමිනුණි. ඒ දෙබාන බැඳි කරත්ත වල කාලය නිමැවුණු පසු නුවන් ට තවමත් තවලමේ යන ගවරැලක් හා එහි හිමියෙක් සොයා ගැනීමට හැකිවීම පුදුමයකි.
ඒ පුදුමය මතුවූයේ  "එක හරක් හොරෙකු " මොබයිල් දුරකතනයක් චිත්‍රපටයේ භාවිතා කරනු දැකීමෙනි.

ගෝල්ෆේස් 

කතාවේ අවසන් කොටසේ "සුද්දා" සොයා   කොළඹ  එන දරුවා ට කොළඹ කුණු ගොඩවල් හමුවේ ජිවත්වන දරු කැලක් මුණ ගැසෙයි. මට මතක විධිහට කාලයක් කොල්ලුපිටියේ බේරේ  වැව පැත්තට වන්නට කොරියාව නමින් හැඳින්වූ  පැල්පත් සමුහයක් විය. මා වසරක් ගිය පොල්වත්තේ ශාන්ත  මයිකල් (රජයට පවරාගත්) විදුහලට මේ ළමයින් බොහොමයක් ආහ. ඔවුන් ගෙන් සමරුන් දහවලට කන්නේ පාසැලෙන් දෙන රජයේ ත්‍රිපෝෂ බිස්කට් පමණි. යහළු වූ විට මේ දරුවන් ඉතා හිතවත් අය වෙති. ගමේ දරුවාට වෙරළේදී එක්කහුවෙන දරුවන් මගේ අතීතයට මා රැගෙන ගියේ එසේය. ගෝල්ෆේස් හි කාලතුවක්කු තිබූ  හරියේ කොළඹට පැමිණි ගමයෙකු වූ මමද ක්‍රීඩා කොට ඇත්තෙමි.

කොළඹ ඇති විශාල කුණු කන්දක ඉදිරිපිට එක දැරිවියක අනික් දරුවන්ගෙන් "ගවයා " සොයා ගැනීමට උදව් ඉල්ලයි. මේ කුණු කන්ද සහිත දර්ශන කොළඹ මීතොට මුල්ලේ සිදුවූ විනාශයට කලින් පෙන්වන්න තිබුනා නම් කියා වරක් සිතුනි.

මට ඇති එකම ප්‍රශ්නය චිත්‍රපටයේ අවසානයයි. සිනමා විචාරයේ "දීප්තිකරණයට" අනුව ගතහොත්  චිත්‍රපටය සැබවින්ම අවසන් විය යුතුව තිබුනේ එක්කෝ ගවයා මස් කඩයක හෝ ගව මස් විකුණන ටෙන්ඩරය දිනූ  දේශපාලකයෙකුගේ පිඟානකදී  හමු වීමෙනි. නැත්නම් කොළඹට පැමිණි "පොඩ්ඩා" නිවසක වහල් සේවයකට හෝ වෙනත් වෙළඳාමක බලෙන් යොදවා සිටිනු පොලිසියට අසු වීමෙනි. විසිතුරු කොළඹ යටිබිම් ගත  යථාර්තය එතරම් දරුණු බව අපි දනිමු.

නමුත් මෙහිදී නුවන් ජේ ගේ සැඟවී සිටින "දරුවා" ප්‍රීතියෙන් එළියට යට එයි. අප හැමෝම තුලත් ඒ දරුවෙක් සැඟව සිටී. ඉඳහිට කඩයක තිබෙන පරණ කාරයක (dinky toy ) ආකෘතියක්  මා මිලට ගන්නේ එහෙයිනි. එනිසා සැබෑව නොව ළමා ලෝකයේ සිහිනයකින් නුවන් ජේ තුල සැඟව සිටි දරුවා චිත්‍රපටය අවසන් කරයි.

සමහරවිට  මුළු පවුලටම නැරඹිය හැකි චිත්‍රපටයක් හදන්නට ඔහුගේ ඇති වුවමනාව මත  එසේ වුනි නම් එය සාර්ථක වී ඇත. මායා නවගත්තේගමගේ නිෂ්පාදනයට ද  නවගත්තේ නමටද ඔහු සාධාරණත්වය ඉෂ්ට කොට ඇත.

රේඛාව ලෝක ප්‍රකට චිත්‍රපටයකි. මා  ඉහත සඳහන් කළ කිනොෂිටා ගේ චිත්‍රපටය,  මේ ලෝක ප්‍රකට චිත්‍රපට පෙළ නම් හිණිමගෙහි උඩම  ඇත්නම් රේඛාව ඇත්තේ එහි මුල් පඩි කිහිපයේය. නුවන් ගේ "සුළඟ අප රැගෙන යාවි " හිණි මග අසලට පැමිණ නතර වී ඇත. ඒ නුවන් ජේ හා නිෂ්පාදක  අධ්‍යක්ෂක විමුක්ති ජයසුන්දර ට   දින පහළවක් තුල සීමිත බජට්ටුවකින් ප්‍රාතිහාර්ය කිරීමට නොහැකි බැවිනි. මට පෙනෙන්නේ තමන් විසින්ම අපහසුවෙන් අසීරුවෙන්  ආ මාවත හරහා තමන් විසින්ම තනා ගත්  ගඩොල් බිත්තියක එල්ලී ඉදිරිය  බලන නුවන් ජේ ය.  ඒ ගඩොල් බිත්තිය බිඳ ප්‍රාතිහාර්ය පාන්නට මේ තරුණ අධ්‍යක්ෂකවරයාට හැකියාවක් ඇති බව  "සුලඟ අප රැගෙන යාවි " තුලින් ඔහු අපට පෙන්වා දී ඇත. 

 ~~~~~~~~~~~~~~~~~~~~~~~~~~~~~~~~~~

     



Tuesday, 12 March 2019

ද ස්විදානියා මචං -до свидания

උඹට  තිබුනේ හොඳ හදවතක්
හිතවතුන් කිව්වේ එහෙම 
රැකියාවේදී උන් උඹට ආදරය කලා 
උඹේ  නිහතමානී කමට, 
හිතවත් කමට, 
කරුණාවට, 
ඒත් 
හොඳ මිනිසුන් නික්ම යනවා ඉක්මනින්ම, 
උඹ අසනීප වුණු  වෙලේ  උන්  කීවේ එහෙම 

"උඹ ඒක ඔප්පු කරන්න එපා මචං
ෆයිට් කරපං
පැරදෙන්න පුළුවන්
ෆයිට් කරලා පැරදියන්
උඹ අපිත් එක්ක  ක්‍රිකට් ගැහුවා වගේ !
මම කීව එහෙම

ඒත්, මමත්  නුඹත් දැනන් හිටියා 
ඒක නවත්වන්න බැරි බව 
රෝගය දරුණු බව 
එය නුඹ හමා එන බව 

"උඹ දුක්වුණේ එකම දෝණි ගැන 
මගේ පොඩි එකී තනි වෙනවා මචං
මම කොහොමද එයා දාල යන්නේ"
උඹ ඇඬුවේ එහෙම

උඹ බිරිඳ ගැන දුක්වුණා හැමදාම
එයා කොහොමද තනියම කරන්නේ
එයත් ඉන්නේ අමාරුවෙන්
දෝණිවත් බලාගෙන

එයා  කවදාවත් දැනන් හිටියද දන්නේ නැහැ
උඹ  දුක්වෙන බව
දෝණි දැනන් හිටියද දන්නේ නැහැ
උඹ හිතින්  අඬන  බව

මොකද උඹ ඒවා පෙන්නුවේ නැහැ
කාටවත් පෙන්නුවේ නැහැ
ඒවා දැනන්  හිටියේ අපි විතරයි
අපි නොකිය ඉන්න බව උඹ දන්නා නිසා

විශ්ව  විද්‍යාලේ ප්‍රශ්න  උඹ ඒව දරා ගත්ත
ආදරයක් බිඳුනම උඹ ඒකත් දරා ගත්ත
විභාග ප්‍රශ්න වලදි  උඹ ඒකත් දරා ගත්ත
රැකියාවේදී ඇනුණු කටු ඒවත් උඹ  දරා ගත්ත

හැබැයි නොමිනිස් රැලක්  ගැහුවම
උඹට හැමදේම එපා වුනා
උඹ ආයිත් යාළුවො හොයාන ආව
ජිවිතේ සාමකාමී වෙයි කියල
ලෝකෙ තවත් කොනකට

ඒත් ඒක එහෙම වුනේ නැහැ
ප්‍රශ්න ආව එක පිට
උඹ  ආයිත් දරා ගත්ත
ඒ හැම දෙයක්ම

මම උඹට කවි වගයක් ලීවා
උඹ පස්සේ ආපු යුවතියක් ගැන
විශ්ව විද්‍යාලෙදි
කාලෙකට ඉහතදී,
මතකද මන්ද
උඹ මගේ ඔල්මොරොන්දන් කවි වලට හිනා වුණා
ඒත්  ඒකිට අනුකම්පා කරා,
හිනාවුනේ නැහැ
උඹ එහෙමයි
ඒක මට ආයෙත් හම්බ වුණා
පරණ කොල අස්සේ තිබිල

මට තේරුම් ගන්න  බැරිවුනා
ඒ දවස් වල
මිනිහෙක් මෙච්චර
දරා ගන්නේ කොහොමද කියල

උඹ අසනීප වුනහම
මට වෙලාවක  හිතුන
දරා ගත්තට  දේවල් හිතින්
ගතට දරා ගන්න  බැරි වෙනවද කියල

උඹ සින්දු අපට ලියන දෙනකොට
අපට සින්දු හොයල දෙනකොට
සින්දු වලින් ජීවත්වෙන එකෙක් කියල
අපි උඹට විහිලුත් කලා

ඒත් දැන් උඹ ගිහින්
උඹේ එකම දරුවා අඬනව උඹ නැතුව
උඹේ බිරිඳ අඬනවා උඹ නැතුව
උඹ හැමදේම දරා ගත්ත වගේ
උන්ටත්  ඒක කියල දුන්න නම් මචං
උඹට අමතක උනාද බං
ඒක විතරක්

අපිත් දවසක එනවනේ බං
මම ස්තලිච්නයා එකක් ගේන්නම්
උඹ පිල්මේනියා ටිකක් ගනිං
බයිට් එකට
එදා වගේම

ද ස්විදානියා මචෝ ~~~~~~~~~~~~~~~~~~~~~







    

Wednesday, 6 March 2019

ප්‍රථම ප්‍රේමය ඔබ නොවේ (51) - හෙමෙල් හි උද්‍යානයේ අසීරු සැඳෑව

රථයෙන් බට ඔවුන් දෙදෙනා උද්‍යානයේ පහළට ගමන් කළහ. උද්‍යානය මැදින් ඇති පාර දිගේ කිලෝමීටරයක් පමණ ගමන් කර වමට හැරුනොත් පරණ හෙමෙල් නගරය හා එහි පැරැණි  ගොඩනැගිලි තිබේ. ඒ පැත්තෙන් තුරු සහිත  මාවත දිගේ ඇවිද නැවත මෙතනට ආ හැකිය. වම් අත පැත්තේ කුඩා දරුවන් කෑ  ගසන හඬ ඇසේ. දෙමාපියන් කුඩා ළමුන් සමග පැමිණ උද්‍යානයේ ළමුන්ට ක්‍රීඩා කිරීමට සාදා ඇති කොටසේ විනෝද වෙති. තාන්යා ඒ දෙස හෙළුවේ දුක්මුසු බැල්මකි.

"මෙතැන ඉඳගමු." දකුණු පසට හැරී මද දුරක් ඇවිද ගිය පසු ගසක් අසල තිබූ බැංකුවක් දැක තාන්යා පැවසුවාය.

ඔවුන් දෙදෙනා මදක් නිහඬව අවට සිරි නරඹමින් සිටියහ. ප්‍රියාන් කට හඬ අවදි කළේය.

"ඔයා කියපු ටික හිතා ගන්න බැහැ . පුදුම වදයක් විඳලා තියෙන්නේ. තුවාල වෙච්ච කකුලේ වේදනාවත් එක්ක. බෙහෙත් වත් නැතිව."

"වේදනා නාශක පෙති තිබ්බ. විකූ අයා එයාල හොරෙන් හදන මත්පැන් වගයකුත් දුන්න. ඒක හොරෙන් කළේ . අහුවුනොත් ඉවරයිලු. "

"ඉතින් බීල ඉන්න කොට අහු වෙන්නේ නැත්ද" ප්‍රියාන් ඇසීය.

"මම හිතන්නේ, ඒ පිරිමි  හිතුව අපට කලින් අය බොන්න දෙන්න ඇති කියලා. ක්සේන්යා ටත් බොන්න දීල තිබුන. උන්ට මත්පැන් තියනවා. කොහෙන් හරි.  "

"පුදුම රටක්. ලොකු කඩතුරාවකින් වහගෙන වෙන දේවල් " ප්‍රියන් පැවසීය.

"ඔය විකූ අයා කියන්නේ වැඩිමහල් සහෝදරයා කියන අදහස එන විකී අය්ය හරි විකුම් අයිය හරි වෙන්න ඕනේ" ඔහු නැවතත් කීවේය.

"නැහැ වෙන්න බැහැ ලෝලා කීවේ එහෙම .අයා කියල. "

"ලෝල කිව්වේ ලලිතටද? එහෙම කියනවා. අයියා වැඩිමහල් සහෝදරයා.  විකූ කියන්න ඇති ලලිත නංගි කියල, නංගි බාල සහෝදරිය. "

"වෙන්න බැහැ . ඒ දෙන්න අතරේ සම්බන්ධයක් තියනව කියල මට තේරුනා"

"තාන්යා ඒක වචනේ තේරුමටම ගන්න එපා. ලංකාවේ එහෙමයි . කසාද බැඳලත් අයිය නංගි , ඒ කියන්නේ සහෝදරයා සහෝදරී  කියන අය ඉන්නවා. "

"ඒක හරි පුදුමයි නේ. ඒ දෙන්න හරි හොඳට මට සැළකුව. අපි දෙන්නටම. ඒ ගොල්ලන්ට හමුදා නායකයා කීවලු ලන්ඩන් එන්න පුළුවන් කියල." තාන්යා වඩාත් ප්‍රියාන් දෙසට මුහුණ ලා හැරුණාය.


"ඔව්, එහෙම මැද පෙරදිගින් ඇවිත් මෙහෙ නතර වුනු අය හුඟක් ඉන්නවා. එරික් ට, ජාවෙඩ් ට හෙම මොකද වුනේ. එතකොට මීෂා, ඕව කරපු යූරා " ප්‍රියාන් ඇසුවේ තාන්යා සන්සුන්ව සිටින බව පසක් කර ගැනීමෙන් අනතුරුවය .

"එරික් මැරුණා ස්වේතා එක්කම " ඇය වහා කියා නිශ්ශබ්ද වූවාය.

"ඒ කොහොමද? ඔයා කීවේ ස්වේතා දුම්රියට අහුවෙන්න දැම්ම  කියලනේ"  ප්‍රියාන්ට ඉබේම වාගේ ඇසුනේ කුතුහලය ඉස්මතුවුනු හෙයිනි.

"ඔයාට මතකද ගේනා. අර ගිහාන් ගේ ටැක්සි රියදුරා" ඇය පෙරළා ඇසුවාය.
"ඔව් මට මතකයි. ගිහාන් මටත් අඳුන්වල දුන්නේ. හදිසියේ එහෙ මෙහෙ  යන්න. සමහර බඩුත් අපෙන් ගත්ත. ඩොලර් මාරු කළා." ප්‍රියාන් සිහි කළේය.

"ගේනා කගබ එකේ"

"මොනවා, මට කීයට වත් හිතුනේ නැහැ"

"ගේනා අර ජගා ඕල්යා හමුවෙන්න ගිහින් හිටිය  පැත්තේ වැඩ කරපු කෙනෙක්. හදිසියේ හමු වෙච්ච  නිසා මම හරහා ඔය ගොල්ලෝ එක්ක සම්බන්ධ වෙලා තියෙන්නේ එයාගේ නචාල්නික් ට කියල. එහෙම අඳුර ගත්තේ. මම මැද පෙරදිග ඉඳන් ආවට පස්සේ  මට ලේනා දිගටම බනිනවා එපා කියද්දී ගියා කියල. ගිහාන් ගැන හැමදාම මතක් වෙනවා. ඒ මදිවට සනීප නැහැ. මට කවදාවත් අසනීප වුනු කෙනෙක් නෙමෙයි. මට එපා වෙලා හිටියේ. පස්සේ මම ඔය ගේනට කතා කරලා එයාගේ ගෙදර  ගිහින් හිටිය. ගේනා මට  වෙච්ච දේ ඇහුවට පස්සේ තරහෙන් පිපිරුවා.  පස්සේ වලෝද්යට කතා කරල තියනවා. ඊට පස්සෙයි ඕව ඔක්කොම සැලසුම් කරල තියෙන්නේ. " නචාල්නික් යනු නායකයා යන අරුත දෙන පදයකි. බොහෝවිට මැනේජර් ට සමානය.

තාන්යා කියූ පරිදි ගේනා ගේ කාරයක  දුම් යන පයිප්පයට  බටයක් සවිකර එය කාරය ඇතුලට යවා ඇත්තේ ජනේල වසාය. එරික් හා ස්වේතා ගේ  අත් පා බැඳ කාරය තුල හිර කර ඇත. දුම් පයිප්පයෙන් එන  කාබන් මොනොක්සයිඩ් වායුව  දිගටම ආශ්වාස කළ විට පැය භාගයක් ඇතුළත මරණය ලඟා වේ. ප්‍රාණය  විරහිත ස්වේතා හා එරික් ගේ දේහයන් එම රථයේම  තබා රාත්‍රී බඩු ප්‍රවාහනය කරන  සීග්‍රඝාමි  දුම්රිය  එන මග තබා තිබේ. දන්නා බිස්නස් කරුවෙකු වන එරික් හා "තාන්යා" නමැත්තිය  මාෆියා මුදල් ගනුදෙනුවක් නිසා සිය දිවි නසා ගන්නට ඇති බවට මිලිට්සියාවට  (පොලිසියට) ඒත්තු ගන්වා ඇත. රහස් ඔත්තු සේවයට කිසියම් සබඳතාවයක් ඇතැයි වටහාගත් පොලිසිය නිහඬ වී ඇත. තාන්යා ස්වේතා වුනේ එලෙසය.

කිසියම් වැරදීමක් සිදුවුන බව වැටහුණු ජාවෙඩ් බල්ගේරියාවේ සොෆියා අගනුවරට පැන ගොස් තිබුණි. ඔහුගේ අභිප්‍රාය වී තුබුණේ බල්ගේරියාවෙන් තුර්කියට පැන ගැනීමය. රටවල් දෙක අතර භූමියෙන් සම්බන්ධ  දේශ සීමාවක් තිබේ.

"ඔයා අහල තියනවද සෙද්මොයි අත්දිලෙනිය බල්ගේරියන් ආරක්ෂක කමිටුවේ" තාන්යා හෙවත් ස්වේතා ඇසුවාය.
"නැහැ මම දන්නේ නැහැ. බල්ගේරියන් ආරක්ෂක කමිටුව සෝවියට් කගබ (කේජිබී) වගේ එකක් නේද? ඔයාගේ කතාව එන්න එන්නම සිරියෝස්නා  " ප්‍රියාන් පිළිතුරු දුන්නේ කල්පනාකාරිවය.  සිරියෝස්නා යනු සීරියස් හෙවත් බරපතල යන තේරුම ගෙන දෙන වචනයකි.

තාන්යා පැහැදිලි කළ පරිදි බල්ගේරියාවේ තිබූ රහස් ඔත්තු සේවයේ තවත් රහස් අංශයක් තිබුණි. සෙද්මොයි අත්දෙලෙනිය යන නමෙහි  තේරුම  හත්වෙනි අංශය යන්නය.  ජේම්ස් බොන්ඩ් නම් සුප්‍රසිද්ධ ඉංග්‍රීසි රහස්  ඔත්තු කරු ගේ චිත්‍රපට වල ඔහුගේ සංකේත අංකය 007 ය. එයට සරදමක් ලෙස මේ හත්වෙනි අංශය නම යොදා ඇතැයි කියවේ.  එය සෝවියට් දේශයෙන් , හෝ සමාජවාදී රටවලින් පැනගිය අයවළුන් මෙන්ම සමාජවාදී රටවලට විරුද්ධ අය ඝාතනය කිරීම සඳහා පිහිටවූ  රහසිගත සංවිධානයකි. බල්ගේරියානු ලේඛකයෙකු වන ජෝර්ජ් මකාරොව් ලන්ඩන් නගරයේදී මරා දැමුවේ ඔවුන් යයි කියති.  එය සිදු කළේ කුඩයක අග වස පෙත්තක් රඳවා ඉන් වැරදීමකින් මෙන් ඇනීමෙනි.
සොෆියා නුවර ල්වොව් පාලම 

"ඒක දැන් නැහැ. නමුත් රුසියාවේ රහස් ඔත්තු සේවය ඒකෙ සමහර අයව මුදල් ගෙවල සම්බන්ධකම් තියාගෙන තියනවා. ඒ කෙනෙක් ට ස්වෙතලගෙන් ගත් මුදල්  යොදවල කරලා තියෙන්නේ. ව්ලද්යා කියල ගඟක් තියනවා. ඒ ගඟ  ඔය සොෆියා හරහා යන්නේ. සොෆියා වල ටිකක් ප්‍රසිද්ධ සිංහ පාලම (ල්වොව්) කියල පාලමක්  ගාවදි අර කලී වලින් හදපු  (කලී යනු  පොටෑසියම්ය )  එන්නතක් ගහල තියනවා. කෙලින්ම උඩ  ඉඳන් බිමට ලිස්සලා වැටුන වගේ පෙනෙන්න " තාන්යා ජාවෙඩ් ට අත්වූ ඉරණම පැහැදිලි කළාය.

"මම සොෆියා ගිහින් තියනවා. ඔය පාලම ලඟටත් ගියා. ඒක ටිකක් ප්‍රසිද්ධ එකක් තමයි. තුර්කි ගිය වෙලේ බල්ගේරියා හරහානේ ගියේ. පාලම සෑහෙන උඩකින් තියෙන්නේ. මොකද්ද කලි  එන්නත කියන්නේ " ප්‍රියාන් ඇසුවේ ඇය කියූ දෙය නොතේරුන හෙයිනි.

"ප්‍රියාන්, මට ලේනා කිව්ව දේ මම දන්නේ. ඒ එන්නත පරණ කගබ එක භාවිතා කරපු එකක්. ඒක ගැහුවම හෘද ස්පන්දනය වැඩි වෙනවා එක පාරටම. වෙලාවට කලී ටික අයින් නොකළොත් ස්තෙනොකර්දියා එකක් එනවා. ඊට පස්සේ කොහෙට හ‍රි තල්ලු කරන්න තියෙන්නේ එක පාරට ගැස්මක් එන්න."

ස්තෙනොකර්දියා යනු ඇන්ගිනා (ඉංග්‍රීසි ඇන්ජයිනා)  වැනි තත්වයකි. හෘදය ස්පන්දනය අස්වාභාවික ලෙස වැඩි වී පපුවේ වේදනාවක් ඇති වේ. එය ස්ට්‍රෝක් එකක් දක්වා වර්ධනය විය හැක.

"මට නිකන් හැඟෙන්නේ ක්‍රිමිනල්නයා ඉස්තෝරියා එකක් කියෙව්වා  වගේ.රහස් පරීක්ෂකයෝ විතරයි අඩු. ඒ වෙනුවට රහස් ඔත්තු සේවා " ප්‍රියාන් පැවසුවේ ඔහුට තාන්යා ගේ කතාව  අපරාධ  කථාවක් (ක්‍රිමිනල්නයා ඉස්තෝරියා) ලෙස හැඟුණ හෙයිනි.

"මීෂා ට කරපු දේ ඊට දරුණුයි. ඔයගොල්ල හිටපු නේවාසිකාගාරය ගාව නේද ලෙෆොර්තෝවා හිර ගෙය  තියෙන්නේ " තාන්යා ඇසුවාය.

"ඔව්, ඒක නම් ටිකක් දරුණු කියල අහල තියනවා. මොස්කව්  වල එකක් උනත්. ස්ටාලින් ගේ  කාලේ දේශපාලන සිරකරුවන්ට වධ දීල තියෙන තැනක් නේ." ඔවුන් ගේ නේවාසිකාගාරය ඇති පැත්තේ මේ විශාල සිර ගෙය පිහිටා තිබුණි.

"ඔව්, ඒක පස්සේ භාර දුන්නේ අලුත් රුසියානු රහස් ඔත්තු සේවයට. වලෝද්යා ගේ නචාල්නික් යටතේ තියෙන්නේ. මීෂා මත්ද්‍රව්‍ය එක්ක අල්ලන කොට තව ගැහැණු ළමයි හතරදෙනෙකුත් හිර කරන්  ඉඳල  තියෙන්නේ.  අවුරුදු දහයකට  හිරේ දැම්මලු. නමුත් ඒක නෙමේ මට වුන ප්‍රශ්නේ ප්‍රියාන්. මීෂා මට බලහත්කාරකම් කරපු එක්කෙනෙක් කියල ලේනා දන්නවා. එනිසා ඇතුලේ හිරකාරයන්ට සිගරට්, වොඩ්කා තව උන්ට ඕන දේ  හෙම යවල උන් ලවා මීෂා ට දඬුවම් කරල තියනවා. ඔයාට  තේරෙනවද පිරිමි පිරිමි."

"නැහැනේ. මම දන්නා විධිහට  ඔයා කියන දේ  රුසියාවේ තහනම් නේ. වලෝද්යා කොහොමද එහෙම දේකට අනුබල දෙන්නේ"

"ඔයාට තේරෙන්න නැහැ. හැම හිර ගෙදරකම ඕව තියනව රුසියාවේ වුනත් එහෙමයි. අර විධිහට අණක් ගියහම ඒක වැඩියි. ඊට අමතරව ගුටි දෙන්නත් කියල.  මාස දෙක තුනකට පස්සේ මම ගියා බලන්න. මට දුක හිතුන නිසා." විස්තර කරන තාන්යා ගේ වූයේ ඇත්තටම දුක් සහිත මුහුණකි.

"ඔයාට පිස්සුද එහෙම දෙයක් කරන්න. අපරාධකරයෙකුට අනුකම්පා කරන්න "

"වෙන්න ඇති. ඒත් මට හිතුනා. ලේනමයි එක්කන් ගියේ . මීෂා ගේ නෑදෑයෝ විධිහට . මාව දැක්ක  ගමන් පරල වුනා වගේ කෑ  ගහන්න ගත්ත. මාව මරනවා කිව්වා. ඌව දූෂණය කරපු හැම වතාවකටම  දෙක ගානේ මට කරලා මාව මරනවා කියල කෑ ගැහුව."

" ඒ කියන්නේ හොඳට හම්බවෙන්න ඇති "

"ඔව්, නමුත් ඒකෙන් වලොද්යා යි ලේනයි තවත් දරුණු වුණා. මට ආරංචි වුනා රණ්ඩුවකදී තව හිරකරුවෙක් හිරගේ ස්තලොවයා (කැන්ටිම) එකේ පිහියකින් ඇනල මීෂාව මරල"

"හිරේ ඇතුලේ"

"ඔව්, එහෙම දේ  වෙනව. වෙනවා නෙමෙයි  කරවනවා. මට හැම  දෙයක්ම එපා වෙන්න ඒකත්  එක හේතුවක්"

"මට හිතා ගන්න පුළුවන් ඔයාගේ කළකිරීම. පලි ගැනීමකින් හිතේ ප්‍රශ්න, දුක වගේ දේවල් හදන්න බැහැ . අපි අර පැත්තට ඇවිදින්න යමුද ටිකක්. ඔයාගේ විස්තරත් එක්ක ටිකක් හිත බර වෙලා වගේ. අයිස්ක්‍රීම් විකුණනවා අර ළමයි ඉන්න තැන " ප්‍රියාන් යෝජනා කළේ තාන්යා මතකයත් සමග නොසන්සුන් වන බව වැටහී ගිය හෙයිනි.

"යමු" ඔවුන් දෙදෙනා ළමුන් ක්‍රීඩා කරන කුඩා පිටිය අසල ඇති අයිස් ක්‍රීම් වෑන් එක වෙත පිය මැන්නහ.

"මොන අයිස්ක්‍රීම් එකක්ද ඕනේ "

"ඔයා කැමති එකක් ගන්න "

"එහෙනම් මැග්නම් දෙකක් ගමු"

"ඔයා දන්නවද මට ගිහාන් ව ඉස්සෙල්ලම හම්බ වුනේ පාක් කුල්තූරි උද්‍යානයේ. ගිහාන් අයිස් ක්‍රීම් එකක් කකා මම හිටි පැත්තට ආව" ඇගේ දෙනෙත් හිරු එලියට දිළිසුණි. ඇය  ගිහාන් හමුවූ අවස්ථාව  ප්‍රියාන් ට විස්තර කළේ මහත් ප්‍රීතියකිනි.

"මම ඒක දැනන් හිටියේ නැහැ. ඔයා තවමත් කිව්වේ නැහැ මෙහෙ එන්න හේතුව " ඇගේ ගිහාන් හමුවීමේ කතාව අසා සිටි ප්‍රියාන් නොඉවසිලිමත් විය.
"අපි අරහෙට යමු" ඔහු ඉදිරිය පෙන්වීය.

 උද්‍යානයේ මේ කෙළවරේ ඇත්තේ කුඩා දිය සොරොව්වකි. කුඩා දොළ පාරක් වන ගේඩ් හි වතුර මෙතනින් මදක් විශාල ජල රඳවනයකට  වැටේ.  ඔවුහු එතැනට සෙමෙන් සෙමෙන් ඇවිද ගියහ.

"මම මුලදී හිතුව වලොද්යා මේවා ඔක්කොම කරන්නේ මම නිසා කියල. ඒ නිසා තමයි මම නවත්වන්න හැදුවේ. නමුත් පස්සේ තේරුණා මේක අර අධ්‍යක්ෂක ගේ අළුත් නියෝග නිසා කියල. මම නිසා ඒ ගොල්ලන්ට ලොකු මාෆියා සංවිධානයක් අහුවුනා. ආණ්ඩුවේ අයත් සම්බන්ධ. ඒකෙන් වලොද්යා ගේත් බලය වැඩි වුණා. ලේනාටත්  රයියොන්නි අධ්‍යක්ෂක පදවියක්  ලැබුන. ඒ ගොල්ල හිතුවේ  මට නිකම්ම සල්ලි ගොඩකුයි  කොහෙවත් තිබ්බ තට්ටු නිවාසයකුයි ලැබුන නිසා මම සතුටෙන් ඉඳී කියල. මගේ සතුට මම මවාගෙන  හිටියේ ගිහාන් එක්ක. ඒක නැතිවුනාට පස්සේ තනියම මොස්කව්  මැද  හොඳ තට්ටු නිවාසෙක හිටියයි කියල ඇති පලේ මොකක්ද මට?" තාන්යා ප්‍රියාන් දෙස බැලුවේ නිල් පැහැති දෙනෙතේ කඳුලක් රඳවා ගනිමිනි.

රයියොන්නි යනු ප්‍රාදේශීය යන අරුත් දෙන වදනකි.

"ඒක ඇත්ත, මට තේරෙනවා " ප්‍රියාන් ඇය හා එකඟ වීම හැරෙන්නට වෙන කරන්නට දෙයක් තිබුනේ නැත.

"හපොයි මම කරපු දේවල්. අර හැරේ ක්‍රිෂ්ණා හැරේ ක්‍රිෂ්ණා කියල එකකට බැඳුන"

"හරේ ක්‍රිෂ්ණා හරේ රාමා නෙමෙයි ද " ප්‍රියාන් ට සිනහවක් ගියේය.

"ඒ වගේ එකක්. මුලදී හොඳයි. එළවලු විතරයි කන්නේ. උදේට හවසට සුවඳ දුම් අල්ලලා යාඥා කියනවා. මොස්කව් වල වීදි  දිගේ බෙර ගගහ යනවා. මම සාරියකුත් ඇන්ද එහෙම  යන්න . ඒකට නම් හොඳ සතුටෙන් හිටියේ. ගිහාන් එක්ක සාරි ඇඳලා  යනව කියල හිතන් හිටියේ ලංකාවට ගියාම."

"ඒකෙන් හරි සැනසීමක් ලැබෙනවනේ" ගිහාන් හූමිටි තැබීය.

"නැහැ ප්‍රියාන්. එතැන සමහරු මත් ද්‍රව්‍ය ගන්නවා  කියල මට තේරුණා. ආශ්‍රමයේ දීම දෙතුන් දෙනෙක් එක එක යෝජනා කලා. ගැහැණු හැම  දෙයක්ම බෙදා ගන්න  ඕනේ වගේ කතා කලේ සමහරු. ඒ කියන්නේ මොකාටද එන්න හදන්නේ කියල ඔයාට තේරෙනවනේ.  මම එකඟ වුනේ නැහැ. අත හැරලා ගියා. ඊට පස්සේ අර යෙගෝවාගේ ස්විදෙතෙල්ස්ත්ව එකට ගියා . එතැනදී දෙවියන් ගැන ඉගැන්වූව, බයිබලය කියල දුන්න. කට්ටිය නම් හරිම හොඳයි. නමුත් මට එතැන එක්කෙනෙක් එක්ක බඳින්න කිව්වා ඇමෙරිකාවට ගෙනියන්නම් කියල. මම කැමති වුනේ නැහැ. ඒ ගොල්ල ඒක තමයි කරන්නේ ගැහැණුන්ට. බැඳලා දෙනවා කාට හරි ඉක්මනින්ම. අනික ඒ ගොල්ලට වලොද්යා ලේනා හෙම වැඩිය කැමති නැහැ. අම්ම අක්සානා ඇවිත්  මාත් එක්ක හිටිය ඒ දවස් වල මොස්කව් වල. තාත්ත ට මගේ මූණ බලන්නත් දුකයි. එනිසා වැඩිය ආවේ නැහැ. මාව බේරා  ගන්න එයා හිටියේ නැහැ කියන එක එයාට තදින් වැදුන."

යෙගෝවාගේ ස්විදෙතෙල්ස්ත්ව යනු යෙහොවස් විට්නස් නමින් හඳුන්වන ආගමික සංවිධානයයි. සෝවියට් දේශය බිඳ වැටුණු පසු මුලින්ම  පැමිණි ආගමික සංවිධානයකි. ඔවුන් පැමිණ ආගම  ප්‍රචාරය කිරීම හා පල්ලි පිහිටවීම සිඝ්‍රයෙන් සිදු කළහ.  පසු කලෙකදී  රුසියාවේ තහනම් විය.

"ඊට පස්සේ තමා මට මේ නාද්‍යා හමුවුනේ. සංසාරය කියන එක, අපේ දුෂා එක,  එක එක  කාල වල ඉපදිලා  සැරි සරණ විධිහ  එයා තමා කියල දුන්නේ. මම ඔය වචනේ ගිහාන් සින්දු කියන කොට අහල තියනවා. පස්සේ අර රටේදී  ලෝලා, නෙමේ නෙමේ  ලොලිතාත් කියල දුන්න.  මම බුරියාත් වල බෞද්ධ පන්සල් වලටත් නාද්‍යා  එක්ක ගියා. බලන්නකෝ මට ගිහාන් ඉස්සෙල්ලම හමු වුනා. ලෝලිතා, විකූ අයා හමු වුණා. ඒ දෙන්න ලංකාවේ. ඊට පස්සේ ලංකාවේ ශිෂ්‍යයෝ දෙන්නෙක් තමා මාව බේරා ගන්න ලේනට කියන්න ගියේ. ඊට පස්සේ ඔයා  හම්බ වුනා මෙහෙ. ඕව ඔක්කොම සංසාරේ කරන දේවල්. මේ, මේ වචනේ මොකක්ද ඒකට  කියන."
දුෂා යනු ආත්මය යන අරුත දෙන වදනකි. බුරියාත් යනු රුසියාවේ බෞද්ධයන් වෙසෙන කුඩා සමුහාණ්ඩුවකි.

"ඔයා කියන්නේ කර්මය ගැනද "

"අන්න හරි කාර්මා "

"තාන්යා ඕව ඔක්කොම අහම්බෙන් වෙන දේවල්. ඔයාට ගිහාන් හම්බ වුනේ අහම්බෙන්. ඔය මැද පෙරදිග රටේ අපේ රටෙන් ආ අය හරියට වැඩ කරනවා. ඉතින් එහෙම දෙතුන් දෙනෙක් හම්බ වෙන්න පුළුවන් ඉඩක් තියනවා.  අනික් එක තමයි ඒ කාලේ මොස්කව් ඇවිත් බටහිරට පැනල එන්න ආව ලංකාවේ අය ගොඩක් මොස්කව් වල හිටිය. දැනුත් එහෙමයි. එනිසා එතැන එහෙම දෙන්නෙක් හිටින්න ඉඩකඩ  වැඩියි. මගේ හමුවීම ගත්තොත්,   මම මේ පන්සලට නිතර එනවා. ඔයාව හමුවෙන්න තියන සම්භාවිතාව වැඩියි මම එන නිසාම. ඕව ඔක්කොම අහම්බෙන් වුනේ. ඔයාට වෙච්ච  දේ , ඒකත් සෝවියට් දේශය වැටුන නිසා, බිස්නස් කියල මිනිස්සු  හොරකම්, පාතාල මාෆියා වැඩ කරන්න පටන් ගැනීම නිසා වගේ හේතු මත තමා උනේ. නැතුව ඔයා කොහේ හරි ආත්මෙක කරපු වරදක් වත් වෙන යම් දෙයක් වත් නිසා නෙමෙයි. " ප්‍රියාන් ඇගේ අදහසට විරුද්ධව කතා කළේය.

"ඔයා බුද්ධාගමේ නේ. ඇයි ඔහොම කියන්නේ. මම මෙහෙ ආවේ නතර වෙන්න මේ අමරාවතී ආශ්‍රමයේ. තව රුසියානු එක්කෙනෙකුත් ඉන්නව මෙහෙ. අර සුදු ඇඳලා  හිටියේ කට්ටියක්. රොබර්ට් තමා කීවේ මේකේ ඉන්න පුළුවන්ය,  භාවනා කරන්න  පුළුවන්ය  නතර වෙලා කියල. පස්සේ ආගමේ සොයුරියක් වෙනව කියල මට හිතුනා."

"අනේ මන්දා තාන්යා. එකක් අපේ ආගමේ ඔය කන්‍යා සොයුරියෝ කියන සංකල්පය නැහැ. අනික මේකේ ඉන්නේ හාමුදුරුවරු වගේම සිවුර පොරව ගත්තු මෙහෙණින් කියල කට්ටියක්. ඔයාට ලෙහෙසි වෙන්නේ  නැහැ ඒ ජීවිතය. ඔයාට වෙච්ච දේවල් මම දැන  ගත්ත උනත් ඔය තීරණය හරිය කියල මට හිතෙන්නේ නැහැ. තව කල්පනා කරන්න."

"ඔයා මගෙයි ගිහාන් ගෙයි ආදරය  ගැන දන්නේ නැහැ ප්‍රියාන්. මට වෙච්ච ඔක්කොම දේ දන්නෙත් නැහැ. "

"ඉතින් මට කියන්න. මම අහගෙන ඉන්නම්. ඒක නෙමේ  ඔයාට යන්න ඕන නේද  ජාතික චිත්‍ර ගැලරි එකට. දැන් පරක්කු වෙනවනේ මෙතැන හිටියොත් " ප්‍රියාන් ඇසුවේය.

"ඇත්තටම මට යන්න ඕනේ නැහැ දැන්නම්. මගේ හිත දැන් ඇවිස්සුනා. මට ඕනේ කතා කර කර ඉන්න. ඒක වඩා හොඳයි"

"එහෙනම් යමුද මම ඉන්න තැනට. දැන් ගොඩක් හවස් වෙලත් එක්ක. " ප්‍රියාන් යෝජනා කළේය.

"ඔයා මට රස ස්පයිසි (ආසන්න රුසියානු වචනය ස්පෙට්සි ) තියන අර ඔයාල රුසියාවේ හැදුවා වගේ කෑම එකකුත් හදනවද එහෙනම්"
තාන්යා ඉල්ලීමක් කළාය.

"අනිවාර්යයයෙන්ම ඒක කරන්නම්. කතා කරන එක හොඳයි. මටත් රුසියාවෙන් ආපු කෙනෙක් කාලෙකින් හමුවුනේ නැහැ.  "

ඔවුන් දෙදෙනා නැවතත් කාරය වෙත පිය මැන්නේ ප්‍රියාන් ගේ නවාතැනට යාමටය.

~~~~~~~~~~~~~~~~~~~මතු සම්බන්ධයි
පින්තූරය: https://www.alamy.com/stock-photo/park-bench-autumn-uk.html

මොස්කව් හි හරේ ක්‍රිෂ්ණා අනුගාමිකයන්