Thursday, 28 February 2019

ප්‍රථම ප්‍රේමය ඔබ නොවේ (50) - ස්වේතා 2

අමරාවතිය 
උතුරු ලන්ඩනයේ සිට හැතැප්ම විසි පහක් විසි හයක් පමණ ඈතින් මහා ගඩස්ඩන් නම් සුන්දර ගමක් තිබේ.  මේ ගමට යාමට නම් ලන්ඩනය වටා කවාකාරව යන  එම් විසි පහ නමැති අධි වේගී මාර්ගයෙන් ගොස් බ්‍රිතාන්‍යයේ උතුරට යන "එම් එක" අධිවේගී  මාර්ගයට පිවිස හෙමෙල් හැම්ප්ස්ටෙඩ් නමැති පළාතට පිවිසිය යුතුය. මේ පළාතේ නාගරික පෙදෙස හැර ගම්බද පෙදෙස් සුන්දරය.

ගඩස්ඩන්  ගමට පිවිස එය මදක් පසු කර දකුණට හැරෙන විට ශාන්ත මාගරට් නැමති පෙදෙසක් හමුවේ. එහි එක පැත්තක චිල්ටන් කඳු පෙදෙස පිහි ඇති පැත්තේ  අමරාවතී බෞද්ධ භාවනා මධ්‍යස්ථානය පිහිටියේය. අක්කර ගණනාවක පැතිර ඇති මේ භාවනා මධ්‍යස්ථානය, තායි ථෙරවාද බුදු දහමේ තායි වනගත සම්ප්‍රදාය සහ ඉගැන්වීම් සඳහා ප්‍රසිද්ධ අපවත් වී වදාල  අජාන් චා(ෂා) ගේ ආරාධනයෙන් අජාන් සුමේදෝ විසින් එංගලන්තයේ පදිංචි ව ගොඩ නැන්වූහ.

මෙහි නොයෙකුත් රටවලින් පැමිණි සංඝයා වහන්සේලා සිටින මුත් ප්‍රධාන වශයෙන් තායි, බ්‍රිතාන්‍ය හා ඇමෙරිකන් භික්ෂූන් ගේ භාවනා මධ්‍යස්ථානයකි. ඕනෑම අමුත්තෙකුට මෙහි පැමිණ නැවතී  "සතිය" දියුණු කිරීම, බෞද්ධ දර්ශනය ඉගෙනීම හෝ අවශ්‍ය නම් දස සිල් වී කාලයක් වාසය කිරීමද කළ හැකිය.

අමරාවතී බෞද්ද්ධ මධ්‍යස්ථානයට දානය  රැගෙන පුජා කිරීමට ඕනෑම අයෙකුට හැකිය. ඒ සඳහා කලින් දැනුම් දීමක් අවශ්‍ය නැත.  ඒවා දහවල් එකොළහට පමණ සඟ සතු කෙරේ. ඉන්පසු පෝලිමේ පැමිණෙන භික්ෂූන්, භික්ෂුණින්, මෙහෙණින් වහන්සේලා, දස සිල් ගත්තන් අහර බෙදාගෙන සන්සුන්ව පසෙකින් වාඩිවී දන් වළඳති. ඉන්පසු එහි ස්ව කැමැත්තෙන් නතර වී ධර්මය හදාරන එසේම එතැන නොයෙකුත් කාර්යයන් ඉටු කරන අයද  දන් බෙදා ගනිති. ඉන්පසු වැඳුම් පිදුම් කරන්නට පැමිණි අයටද දානය ගත හැකිය.

ප්‍රියාන් මේ ස්ථානයට කැමැත්තක් දැක්වූයේ ආගමික නැඹුරුවකටත්  වඩා එහි ඇති නිස්කලංක බව නිසාය. කොහොමත් දානය පිළිගන්වන අවස්ථාවේ හා ඉන් පසුව වත් ශ්‍රී ලංකාවේ පන්සල් වල මෙන් බණ කීමක් හෝ පිරිත් කීමක් මෙහි නැත. අවශ්‍ය නම් තමන් දානය ගෙන පැමිණියේ කා වෙනුවෙන්  දැයි ලියා පොඩි  තුන්ඩු කැබැල්ලක් ප්‍රධාන සංඝයා වහන්සේට දිය හැකිය. ඔහු දානය තමන්ම බෙදා ගත්  පසු ඒ නම් කියවා  අද දින දානය මේ අය සිහි කිරීමට  යයි කියා පවසති. එපමණකි.

 විශාල බුදු පිලිමාවක් පමණක් ඇති බෞද්ධ මන්දිරයක් මෙහි තිබේ. එහි බොහෝ අය නිහඬව හිඳගෙන භාවනා කරති. ඒ ස්ථානය පසු කර යන විට අක්කර කිහිපයක භුමි භාගයක් ඇත. එය වටා  දකුණු පසට වෙන්නට භාවනා කුටි පිහිටා තිබේ. එහි තණ පිටිය මැද  කුඩා චෛත්‍යයකි. දහවල් දානයෙන් පසු බොහෝ විට භික්ෂූන් ඇතුළු  කිහිප දෙනෙක් මෙහි සක්මන් කරනු දැකිය හැකිය.

ප්‍රියාන් ගේ කාර්යාලයේ වැඩ කරන ඉංග්‍රීසි ජාතික ඩේවිඩ් වාසය කලේ හෙමෙල් හම්ස්ප්ටෙඩ් නගරයේය. ඩේවිඩ් බොහෝ විවෘත අදහස් දැරූ වෙකි.  ඔහුට අමරාවතිය දැක ගැනීමට අවශ්‍ය වූ නිසා ප්‍රියන් ඔහුත් සමග එහි ගියේය. එහි සඟුන් කජු වලින් උයන ව්‍යංජනයට ඉතා කැමැත්තක් දක්වන හෙයින් තමන් දන්නා ලෙසට කජු ව්‍යංජනයක් ද උයා ගත්තේය.

ඩේවිඩ් ගේ නිවසේ හමුවී කයිය ගැහීම නිසා  මදක් පමාවී පැමිණි ඔවුන් දෙදෙනා  කජු එක මුළුතැන් ගෙයට භාර දී ඉක්මනින්ම ගොස් හිඳ  ගත්තේ ශාලාවේ පසු පසය. ඔවුන් දෙදෙනා ඉදිරියෙන් පැදුරේ හිඳගෙන සිටියේ තරුණ කතුන් දෙදෙනෙක්  හා පිරිමියෙකි. හාමුදුරුවරුන් හා දස සිල් ඇත්තන් දානය  බෙදා ගෙන අවසන්ය. ඔවුන් ඉදිරියෙන් සිටි තිදෙනා කතා කරන්නේ   රුසියානු භාෂාවෙන් බව ප්‍රියාන් ට වැටහුණි. රුවැති යුවතියන් දෙදෙනා දෙස බැලූ ඩේවිඩ් ප්‍රියාන් ට ඔවුන් පෙන්වා ඇහැක් ගැසුවේ රෂියන් යනුවෙන් නෑසෙන්නට මතුරමිනි. ප්‍රියාන් ට රුසියානු බස කථා කිරීමට හැකි බව ඔහු දනී.

ඉදිරියේම සිටි තරුණිය ගේ රන්වන් පැහැ  කොණ්ඩය කොටට කපා තිබුණි. ඇය හැඳ සිටියේ සුදු බ්ලවුසයක් හා ඩෙනිම් කලිසමකි. ඇගේ උරයට උඩින් වැටුණු   ස්කාෆ් එකකින් ගෙල හා දෙඋර වැසී තිබුණි. අනිත්  තරුණිය ගවුමක් හැඳ එයට උඩින් වසන්තයට ගැලපෙන ඩෙනිම් කබායක්ද හැඳ සිටියාය. ඇයට තිබුනේ කළු පැහැයට හුරු කොණ්ඩයකි.  තරුණයා දුහුල් කමිසයකට උඩින් කබායක් හැඳ සිටියේය.  රන්වන් කෙස් සහිත තරුණිය හැරී අනිත් තරුණියට යමක් කියද්දී ඇය ගේ මුහුණ පැත්තෙන්  දුටු ප්‍රියාන් ගේ මුව ගොළු විය. ඇය ට ඇත්තේ ඉතා හුරු පුරුදු මුහුණකි. මේ ඇයද? මියගොස් යයි දන්වා තිබූ "ඇයට" නිවුන් සහෝදරියක් ද නැත.

තරුණියන් දෙදෙනා කිසියම් කරුණක් ගැන වාද කරති. එකියකට ජාතික කලාගාරය (National Gallery)  ට යාමට වුවමනාය. අනිකාට පෙම්වතා සමග ඉතිහාස  කෞතුකාගාරයට (National History Museum) ගොස් ඉන්පසු තවත් කොහෙද යාමට උවමනාය.
"සමා  වෙන්න ඔබල රුසියානු භාෂාව කතා කරනවා ඇහුනා. මම මොස්කව් හිටියේ. මගේ නම ප්‍රියාන්. රුසියානු භාෂාව කතා කරනවා ඇහුණාම සතුටක් දැනුන. අනික කැමතිනම් මට කලාගාරයට එක්ක යන්නත්  පුළුවන්. " ඔහු තමන්ව තරුණියන් දෙදෙනාට  රුසියානු භාෂාවෙන් කතා කරමින් හඳුන්වා දුන්නේය.

"ආ එහෙමද "කළු කොණ්ඩය සහිත තරුණිය සිනාවක් පෑවාය.

"මම ඔබ දැකල පුරුදු කෙනෙක් වගේ , ඔබේ නම තාන්යා ද?" ඔහු රන්වන් හිසකේ සහිත තරුණියගෙන් ඇසීය.

"නැහැ මම ස්වේතා. " කියූ ඇය ඉදිරිය  බැලුවාය. ඇය මුහුණ නොපෙන්වා සිටීමට ආයාස දරණ බව ප්‍රියාන් ට සිතුනි.

" අපි කෑම ගන්න  යනවද" ප්‍රියාන්  ව වැඩි ගණනකට  නොගෙනම ඇය අනිත් තරුණියගෙන් ඇසුවාය.

"යමු " එය ඇසූ තරුණයා නැගිට්ටේය.

හාමුදුරුවරුන් හා දස සිල් ඇත්තන් ද එහි වැඩ කරන උදවියද ආහාර බෙදා ගත් පසු දානය  ගෙනා නොගෙනා  සියල්ලෝම නැගිට කෑම බෙදා ගන්නට  පෝලිමක් සෑදී   සංවරව යති. කෙල්ලන් දෙදෙනාට මදක් පසුපසින් ප්‍රියාන් හා ඩේවිඩ් ද පෝලිමට එකතු විය.

"හේ, උන් කතා කරන්න  කැමති නැහැ   " ඩේවිඩ් මද සිනාවක් පා ඔලොක්කුවට මෙන් කීවේය.
"ඒ කෙල්ල මම දන්නා කෙනෙක් වගේ. පුදුමයි සමාන කම " ප්‍රියාන්  කීවේය.

"එහෙම මිනිස්සු ඕන තරම් ඉන්නව එක වගේ. මට මම වගේම  උන් හම්බ වෙලා තිබෙනවා" ඩේවිඩ් වැඩි ගණනකට නොගෙන පැවසීය,

යුවතියන් දෙදෙනා කෑම රැගෙන වාඩි වූයේ කලින් සිටි තැනින් නොව දිග ජනේලය අයිනෙනි.
ප්‍රියාන්  හා ඩේවිඩ් ඔවුන් සිටි තැනටම ගොස් කෑම ගත්හ.

කෑම අහවර වූ වහාම ඩේවිඩ් සමුගෙන පිට වූයේ ඒ අසලම ඇති රෙඩ් ලයන් පබ් එකේදී ඔහුගේ පෙම්වතිය හමුවීමට යොදාගෙන තිබූ හෙයිනි. කෑම ශාලාවේදී හමුවූ තවත් ශ්‍රී ලාංකික මිතුරන් කිහිප දෙනෙකු සමග සුළු වේලාවක් අල්ලාප  සල්ලාපයේ යෙදී සිටි ප්‍රියාන්  බුදු ගෙය අසලින් ඇවිද  තණ කොළ පිටියට ගියේ එහි රවුමක් දෙකක් ගොස් නැවත නවාතැනට යාමටය. ඉතා නිස්කලංක ඒ පිටිය වටේ සක්මන් කිරීමට  ඔහු කවදත් ප්‍රිය කළේය.

  තවත් කිහිප දෙනෙකුද ඈතින් යනු ඔහුට පෙනේ.  වමට හැරී මද දුරක් යන ඔහුට කිසිවකු පසුපසින් එනු දැනුනි.

ප්‍රියාන් හැරී බැලුවේය.

රන්වන් කොණ්ඩය කොටට කපා  සිටි රුසියානු භාෂාවෙන් කතා කළ යුවතිය ද වමට හැරී ඔහු යන පැත්තටම පැමිණෙන බව ඔහු දිටීය.  ඔහු අසල ඇති රුකක් නිරීක්ෂණය කරන ලෙසක් පෙන්වමින් මදක් නැවතී සිටියේ ඇය පසුවන තුරුය.

ඔහු ළඟට එන ඇය ගේ වම් කකුලේ කිසියම් ඇදයක් ඇති ලෙස ඇය කකුල මදක්  අද්දා ගෙන පිය නගන බව ඔහුට නිරීක්ෂණය විය..  ඔහුට අඩි කිහිපයක් දුරින් නැවතුනු තරුණිය සුන්දර සිනාවක් පෑවාය.

"ප්‍රියන්චික් , මම තාන්යා. "
රුසියානුවන් වඩා හැඳුනුම්කම් පාන්නට, පිරිමින්ගේ නමට චික් යන පදයක් එක්කරයි. ගැහැනුන්ට ච්කා යනුවෙන් එකතුවේ.

ඇය මොහොතකට කලින් ශාලාවේදී දුටුවත් ඒ තාන්යාවත්ද  කියා සිතුවත් මේ අවස්ථාවේ ප්‍රියාන් ගේ ගත සීතල වී ඇඟ කිළි පොලා යනු ඔහුට දැනුනි.

"මට සමාවෙන්න ස්වේතා කීවට. මගේ යාළුවෝ දෙන්න මාව දන්නේ ස්වේතා විධිහට "

එසේ කියමින් ඉක්මනින්ම  ඉදිරියට පැමිණි තාන්යා ප්‍රියාන්ව හෘදයංගම ලෙස  බදා වැළඳ ගත්තාය. රුසියානු කාන්තාවන් මුණ ගැසුණු විට  ආචාර කරන ආකාරයටම  කම්මුල් දෙපැත්තට හාදු  දෙකක් ද  දුන්නාය. වහාම ඇයටත් එලසම ආචාර කලද ප්‍රියාන්  තවමත් සිටියේ කිසිවක් කියා ගත නොහැකිවය.

"තාන්යා මේ ඔයානම් මගේ සතුට කියල නිම කරන්න බැහැ. ඔයා ට හදිසි අනතුරක් වෙලා හොයා ගත්තේ ගමන් බලපත්‍රයෙන් කියල තමයි මම අඳුරන රුසියානුවෙක් කීවේ " අවසානයේදී ධෛර්යය ගත් ඔහු පැවසීය.

"ප්‍රියාන් මටත් ගොඩක් සතුටුයි නුඹ  දැක ගැනීම ගැන.ඔව්, මමත් එතැන හිටියා ලේනා ඒක කියන කොට "
රුසියානු භාෂාවෙන් "වී" යනු "ඔබ" ලෙස පරිවර්තනය කල හැකිය. "තී" යනු නුඹ ලෙස කියවේ. වී යන පදය මදක් දුර කෙනෙකුට කියනා දෙයකි. පවුලේ හෝ ළඟ යහලුවෙකුට තී පදය භාවිතා වේ.   තාන්යා කෙලින්ම වී යන පදය නොව තී පදයෙන්ම  ප්‍රියාන් ව ඇමතුවාය.

"එතකොට ලියොනිඩ් මට කිව්වේ  ලේනා කිව්වා කියල ඔයා ජිවතුන් අතර  නැහැ කියලනේ. ලියොනිඩ් කිව්වේ නැහැ ඔයා දැක්ක බවක් වත් "

"ඔව් එතකොටත් මම ස්වේතා වෙලා හිටියේ. ඔයා ලියොනිඩ් ට මගේ පින්තුරයක් පෙන්නුවේ වත් දුන්නෙවත් නැහැනේ. "

"නැහැ නම් තමයි. මම එච්චර දුරට හිතුවේ නැහැ. ලේනා ගේ දුරකථන අංකයයි, ඉන්න තැනයි, ඔයා ගේ නේවාසිකාගාරය  ගැනයි  විතරයි කිව්වේ. එයා ලේනව හොයාගෙන තිබුණනේ  "

"හරි ඉතින් කොහොමද එයා දැන ගන්නේ මම තාන්යා කියල." පිළිතුරු දුන් තාන්යා
"ගිහාන් හොඳින් ඉන්නවද ප්‍රියාන්" එකවරම ඇසුවාය.

තාන්යා ඇසූ ප්‍රශ්නයට පිළිතුරු දෙන්නේ කෙසේද? ප්‍රියාන්ට සිතුණි. පන්සල් භූමිය තුල මුසාවාදයක් දෙසීම නොහොබිනා දෙයක් යයි කුඩා කාලයේ සිටම උගන්වා තිබේ.

"ගිහාන් හොඳින් ඉන්නව තාන්යා"
"එයා බැන්දද, අර පුංචි හිතවත්කමක් තිබ්බ කිව්ව ගෙවල් පැත්තේ ගැහැණු ළමය ද දන්නේ නැහැ බැන්දේ. මට නම මතක නැහැ, ශාෂා වගේ නමක්, ළමයි ඉන්නවද ?" තාන්යා ප්‍රශ්න වැලක් ඇසුවාය.

එක බොරුවක් වහන්නට බොරු දහයක් කියන්න වෙනවාය යන පිරුළ ප්‍රියාන් ට පසක් වුනේ ඒ වේලාවේය.  සිනහ මුසු මුහුණින් සිටි තාන්යා ගේ මුහුණේ සිනහව මැකී ගොස් මන්දස්මිතයක් සහිත ශෝකී භාවයක් අරක් ගෙන තිබෙනු ප්‍රියාන් ට පෙනුණි.

"ශාෂා කියන්නේ රුසියන් නමක්නේ. ඔයා අහන්නේ විශාඛා ගැන වෙන්නැති. ඔව්, එයා බැඳලා පුතෙකුත්  ඉන්නවා " ප්‍රියාන් දෙපැත්තට නැති පිළිතුරක් දුන්නේය.

"විශාඛා බැඳලා ඉන්නේ. එයාට පුතෙකුත් ඉන්නව. බොරු නෙමේනේ. කාවද බැන්දේ කියල මම කිව්වේ නැහැනේ. " ඔහු තමන්ගේ බොරුව තමාටම සාධාරණීකරණය කර ගත්තේය.

"ඉතින් ඔයා ස්වේතා කියල නම වෙනස් කළාද " ඔහු කතාව වෙනතකට හැරවීය.

"ප්‍රියාන් ඔයාට ලියොනිඩ් කිව්වා නේද මට මැද පෙරදිග රටකට අරන් ගිහිල්ල කරදරයක් වුණා කියල. එහෙන්  ආවට පස්සෙත් මාව විශ්ව විද්‍යාලයක ශිෂ්‍ය නේවාසිකාගාරයක හිර කරගෙන හිටිය. ඒවා ඔක්කොම වුනේ මම ස්වේත හම්බ වෙන්න ගිය නිසා සල්ලි හොයා ගන්න ලංකාවට එන්න. "

"නම් ගැන ලේනා  ලියොනිඩ්ට කියල තිබ්බේ නැහැ. ඔය වගේ දෙයක් වුනා කියල විතරයි අපි දන්නේ" ප්‍රියාන් හූමිටි තැබුවේය.

"ඔයා අපි කියා  කීවේ ගිහාන් ටත් එක්ක කියල මම දන්නවා. මට ආයේ ගිහාන් ගාවට යන්න ඕන කමක් තිබ්බේ නැහැ. මම හිටියේ මැරිලා වගේ. කිසි දෙයකට ආසාවක් තිබ්බේ නැහැ. ඔයා මොනවා හිතාවිද දන්නේ නැහැ මේක කිව්වම. ඒ මැරුණේ මාව ඒ රටට අරන් ගිය ස්වේතා. මගේ ගමන්බලපත්‍රය එතැන තිබ්බේ වලොද්යා. ලේනාගේ සැමියා "

"එතකොට ඔයා කියන්නේ..." ප්‍රියාන් වාක්‍යය අවසන් කරන්නට මත්තෙන් තාන්යා කථා කළාය.
"ලේනා තමයි ඒක සැලසුම් කලේ. මම හැම දේම එපා වෙලා ඔහේ හිටියේ. ලේනාට ඒක  ඉවසන්න බැරි වුනා. මම මාස තුනක් විතර රෝහලක හිටියා තුවාල වලට බෙහෙත්  කරන්න. මට ළමයි හම්බ වෙන එකත් හරියටම කියන්න බැහැ  කිව්වා. වෛද්‍යවරුන් ගෙන්  අහපු දරුණුම කතාව  තමයි මම වැඩි විරෝධයක් නොදක්ව හිටියානම් මෙපමණ තුවාල සිදු වන්නේ නැහැ කියන එක. ලේනා හරි දරුණු වෙලා හිටියේ ඒ දිනවල.  මටත් බනින එක නතර කලේ නැහැ.  මට ස්වේතගේ ගමන් බලපත්‍රයයි මොස්කව් වල තට්ටු නිවාසයේ යතුරයි ඒකෙ තිබ්බ සල්ලියි ඔක්කොම ලැබුන. "

"එතකොට ස්වේතගේ නෑදෑයෝ යාළුවෝ හිටියේ නැත්ද?"

"එයාට දික්කසාද වෙච්ච  අම්ම විතරයි හිටියේ. ඒ අම්මට වලොද්යා  සල්ලි වගයක් දීල තිබ්බ ස්වෙතාගෙන් කියල. ලොකු ප්‍රමාණයක්. තව ස්වේතට අයිති පද් මොස්කව් (මොස්කව්  නගරයෙන් පිට එය ආසන්නයේ ) ග්‍රීෂ්ම නිවාසයක අයිතියත් දීලා තිබ්බ. ස්වේතා වෙන රටක පදිංචියට ගියා කියල. ඒ ගෑණි මොනවත් හෙව්වේ නැහැ. අම්මයි දුවයි අතරේ  තද සම්බන්ධයක් තිබිලත්   නැහැ. ස්වෙතට හිටියේ  ඔක්කොම මාෆියා යහළුවෝ. ස්වේතා අතුරුදන් වුන ගමන් උන් පැත්ත පළාතේ ආවේ නැහැ. "
රුසියානුවන් මාෆියා නමින් හඳුන්වුයේ ඒ රටේ පාතාලයටය.

"ඒත් ඉතින් තාන්යා ඔයා කියන්නේ ..." එය ඇසීමට අපහසු ප්‍රශ්නයකි.
"ඔතන වුනේ කෙනක් ගේ ජිවිතයක් ගත්ත එකනේ. එහෙම කරලා ඉතින් රුසියාවේ වුනත් නීතියක් තියනවනේ. කොහොමද .." ඔහු ප්‍රශ්නය ඇසුවේ පරිස්සමිනි.

"ඔයා රුසියාවේ තත්වය තේරුම් අරන් නැහැ මෙහේ හිටි නිසා ප්‍රියාන්.  පහුගිය කාලේ  රහස් ඔත්තු සේවයේ අධිපති වුනේ කගබ එකේ හිටි කෙනෙක්. එයා සැන්ක්ට් පිතර්බුර්ග් ඉඳල ආවේ. එයා ළඟදීම අගමැතිත් වෙනවලු. එයා මාෆියා එක පාලනය කලේ එයත් එක්ක හිටපු කගබ එකේ පරණ උදවියට නිදහස දීල. වලොද්යා ඒකෙන් ප්‍රයෝජන ගත්ත. "

"ඒ කියන්නේ දැන් හොඳ වෙන්නැති.  කිසිම මාෆියා එකක් නැතිව ඇති දැන්. මොකක්ද  එයාගේ නම රහසක් නෙමයි නම්  "

"එහෙමත් නැහැ ප්‍රියාන් එයාට කැමති හරි එයා කියන දේ අහල ඉන්න අයට හරි මුකුත් කරන්නේ නැහැ. එයාගේ නමත් ව්ලැඩිමීර්"  ඇය කීවේ ලේනා ගේ සැමියා ද වලෝද්යා හෙවත් ව්ලදිමීර් බැවිනි.

තාන්යා පැවසුවේ අනතෝලි සබ්චාක් නමැති දේශපාලන නායකයා තම ගුරා කරගත් පැරණි ලෙනින්ග්‍රාද් නගරයේ සිටි කේජිබී නිලධරයෙකු ගැනය. ඔවුන් එම සෝවියට්  ඔත්තු සේවාව හඳුන්වන්නේ කගබ යනුවෙනි. කොමිතියේත් ගසුදාර්ස්ත්වෙන්නොයි බෙසපාස්නස්ති හෙවත් රාජ්‍ය ආරක්ෂාව සඳහා වන කමිටුව යනු එයයි. රුසියානු ජනාධිපති යෙල්ට්සින් ඔහු මොස්කව් වලට කැඳවා එහි නිවාස  සහ දේපල සඳහා  වන නිසි බලධරයා කළේය. මාෆියා වැඩ ගැන ඔහු අවබෝධයක් ලබා ගත්තේ එයිනි.  සිඝ්‍රයෙන් ඉහල නැගී ඔහු රුසියානු රහස් ඔත්තු සේවයේ අධ්‍යක්ෂක බවට පත්වුණි. පසුව අගමැති වී ජනාධිපති පදවිය දක්වා ගියේද මේ නිලධාරියාය.

"ස්වේතා විතරක් නෙමේ මට හිරිහැර කරපු පිරිමි තුන්දෙනෙකුටත්   වලොද්යා දඬුවම් කළා මාෆියාව පාලනය කරන්න අවශ්‍ය නිසා ඒක හේතුවක් කරගෙන. "

"ඒ විස්තරේ ඔයාගෙන් අහගන්න ඕනේ. ඒක නෙමේ,ඔයා මේ බෞද්ධ පන්සලට ආවේ කොහොමද ?"

"ඒක ටිකක් දිග කතාවක්. මට හැම  දෙයක්ම එපා වුනා. ඒකයි. මම  ඔයා එක්ක කතා කරන්න  කැමතියි.  නමුත් අන්න නාද්‍යා එනව රොබට් එක්ක. නාද්‍යා මොනවා කියාවිද දන්නේ නැහැ."

"රොබට් රුසියන් නෙමේද?"

"නැහැ එයා මෙහෙ එක්කෙනෙක්. මොස්කව් වල බ්‍රිතාන්‍ය ෆිනෑන්ස්  මැනේජ්මන්ට්  ශාඛාවක වැඩ කරන්නේ. එයා තමයි මේ තැන ගැන කිව්වෙත්. මම ඔයාගේ ආරාධනේ භාර ගන්නම් " තාන්යා ඉංග්‍රීසි වචන අපුරුවට උච්චාරණය කරයි. ඇය භාෂාව ඉගෙන ඇති බව පැහැදිලිය.

"ඒ මොකක්ද මොන ආරාධනයද "

"ප්‍රියාන් " තාන්යා තරහ ගිය බවක් පෙන්වූයේ  විහිළුවටය.

"ඇයි ඔයා කිව්වේ කලාගාරය බලන්න එක්කන් යන්නම් කියල අතනදී. මම එයාලට කියන්නම් ඔයා එක්ක ඒකට යනවා කියල. මගේ විශ්ව  විද්‍යාලයේ එකට හිටි යාළුවෙක් කියල කියමු. මතක ඇතිව ස්වේතා කියල කතා කරන්න"

නාද්‍යා සමග විවාහ ගිවිස ගෙන සිටින රොබට් පෙරදිග දර්ශනයන් ගැන හොඳ   අවබෝධයක් ඇත්තෙකු බව ප්‍රියාන් ට වැටහුණි. ඔවුන් වැඩිදුර ප්‍රශ්න නැගුවේ නැත.
තාන්යා සමග කාරයට නැගුණු ගිහාන් රිය පැදවූයේ ඔහුගේ නිවස පිහිටි දකුණු ලන්ඩනයටය. එහි උමන් දුම්රිය පල අසල කාරය නවතා  උමන් දුම්රියෙන් ලන්ඩන් නගරය මධ්‍යයට යාම ඔවුන්ගේ බලාපොරොත්තුව විය.

ලේටන් බසාර්ඩ් මාවතට වාහනය දමා ගනිද්දීද තාන්යා දිගටම තම මැද  පෙරදිග අත්දැකීම විස්තර කරමින් සිටියාය. වාහනයේ හිඳගෙන ඉදිරි පසට මුහුණ ඇති නිසා තමන්ගේ මුහුණ නොබලා එසේ කතා කරන්නට ඇයට පහසු යැයි ප්‍රියාන් ට සිතුනි.

ඔවුන් ගියේ හෙමෙල් නගරය දෙසටය. විනාඩි දහයකින් පමණ ඔවුන් ගේ වම්පසින් කුඩා දොළක් වූ ගේඩ් පසු කරනවිට ගේඩ්බ්‍රිජ් නමින් උද්‍යානයක් තිබේ.

"ලස්සන උද්‍යානයක්" තාන්යා අතීත විස්තරය මදකට නැවැත්වූවාය.

"අපි එතනට යන්" ප්‍රියාන් පළමුවෙන්ම ඇති  වාහන නවත්වන ස්ථානයට හරවා වාහනය  කෙළවරේම නැවැත්වීය.


~~~~~~~~~~~~~~මතු සම්බන්ධයි

Monday, 25 February 2019

මගේ ලෝකයෙන් අහවල් ලෝකය හා ගෙල්මන් ගේ අරී අට මග

මහේෂ් හපුගොඩ ගේ "මගේ ලෝකයෙන් පසු ලෝකය " කෘතිය පිලිබඳව පැවති  සංවාදයේ සියළුම කතා ඇසුවෙමි.  මහේෂ් හපුගොඩ ගේ හෝ දීප්ති කුමාර ගුණරත්න ගේ කතාවේ මූලික හරයන්ට මගේ කිසිදු විරෝධතාවයක් නැත. නමුත් මේ රැස්වීමේ මුඛ්‍ය   පරමාර්ථයක්  වන්නේ ආචාර්ය නලින්ද සිල්වා මහතාගේ මගේ ලෝකය කෘතිය (මා කියවා නැත) ගැන සාකච්ඡාව හා ඔහු ජාතිකවාදයට නැඹුරු වීමේ හේතුවක් විග්‍රහ කිරීමට නම් එය එතරම් සාර්ථක වී නැත යනු මගේ අදහසයි.

මහේෂ් හපුගොඩ ගේ  "භක්තිය යනු දෙවියන්ගෙන් ‘නිදහස්’ වීමට ඇති හොඳම මාර්ගය වන්නේ ය" ලිපියේ මෙවැන්නක් සඳහන් වෙයි.
"එසේ නම් බටහිර ට ගොස් විද්‍යාඥයෙක් වීමට මුලපිරූ නලින් ද සිල්වා ‘මට බටහිර අරුතකින් විද්‍යාඥයෙක් විය නොහැකි’ (IMPOSSIBLE) බවට ඒත්තු ගනිමින් මෙරටට නැවත පසු බසින විට අනූව දශකයේ දීප්ති කළේ කුමක්ද? ඔහු කලේ බටහිර දියුණු මතවාද ලාංකික පොළොව මත පැල කිරීමට උත්හාස කිරීමයි (IMPOSSIBLE INTO POSSIBLE). එසේ නම් ‘අනූව දශකයේ යමක් සිදු වී ඇත’ යන ප්‍රවාදය සත්‍යයකි. නලින් යථාවට බිය වූ බව අප කියන්නේ ඒ නිසාය. "

සැබවින්ම ආචාර්ය නලින් ද සිල්වා යථාවට බිය වූයේද? මගේ අදහස නම් යථාවට බිය වූයේ එවකට තිබූ පරණ (කොප, ලසසප)  හා ඒ කාලයේ පිබිදී ආ නව වාමාංශය (ජවිපෙ) යන්නයි. දීප්තිට බටහිර මතවාද (හේගල්, ලැකාන් ගේ සිට ජිජැක් දක්වා ) ලංකාවේ පැල කිරීමට අවකාශයක්  බිහිවුනේ එනිසාය. කොටින්ම නලින්ද සිල්වා සහ ගුණදාස අමරසේකර ජාතික චින්තනයට යෑමෙන් නොදැනුවත්වම හෝ ඔවුන් බිහි කළ අවකාශය නිසාය.

මම එය මෙසේ පැහැදිලි කරමි. ගුණදාස අමරසේකර මහතා ද මට මතක විධිහට මුලින්  තරමක් දුරට වාමාංශික අදහස් තිබූ අයෙකි.  එය නලින් ද සිල්වා මහතාගේ තරම් දැඩිව පැන නැගුනක් නොවේ.  මාලින්ද සෙනෙවිරත්න ගේ ලිපියකට අනුව ආචාර්ය නලින් ද සිල්වා මහතා අමරසේකර ගේ "ධර්මපාල තුමා මාක්ස්වාදියෙක් ද" කෘතිය තදබල විවේචනයකට ලක් කොට ඇත.

අපේ තරුණ වයස අප පසු කලේ ගුණදාස අමරසේකර ගේ "යලි උපන්නෙමි", "කරුමක්කාරයෝ ", "අසත්‍ය කතාවක් " මෙන්ම මාර්ටින්  වික්‍රමසිංහ ගේ "සත්ව සන්තතිය " ආදී ග්‍රන්ථ  කියවමිනි. මේවා අපට සමාජය මෙන්ම  දැනුමද ප්‍රශ්න කරන්නට කියාදුන් පොත් පත්ය.  මට ඉතා හොඳින් මතක ලිපි පෙළක් ආචාර්ය නලින්ද සිල්වා දිවයින පුවත්පත ට ලියුවේය.  උපාලි විජේවර්ධන ජිවතුන් අතර සිටි ඒ කාලයේ  (ඔහු අතුරුදහන් වුනේ  '83 පෙබරවාරි වලය) එම පුවත්පත අද තරම් අතිශය ජාතිවාදී නොවූ තරමක් දුරට හොඳ විද්වත් ලේඛකයන්ගෙන් පිරුණු එකක් විය. මට මතක විධිහට නලින් ද සිල්වා මහතා  සෝවියට් කඳවුරේ "සමාජවාදී පන්තිය " ගැන කියුවේද මේ ලිපි පෙළ තුලය. නිලධාරී පෙලැන්තිය  සමාජවාදී පන්තියක් ලෙස නම් කළ නොහැකි වුනත් එදා ඔහුගේ අදහස් වටිනා ඒවා විය.

ඔහුගේ ගණිතමය දැනුම,  අභ්‍යවකාශ තාරකා විද්‍යාව හා ක්වන්ටම් භෞතිකය පිලිබඳ දැනීම විසින් එංගල්ස් ගේ "ඓතිහාසික භෞතිකවාදය " ප්‍රශ්න  කිරීම සඳහා ඔහුව පොළඹවන්නට ඇත.   එංගල්ස්  "ඓතිහාසික භෞතිකවාදය " ග්‍රන්ථයේ  ඉදිරිපත් කරන විද්‍යාව සම්බන්ධව හා තාරක විද්‍යාව   සම්බන්ධ  කරුණු සියල්ලම වාගේ යල් පැන  ගිය ඒවා වුවත් ඒවා දේවත්වයේ ලා සැලකීමම ඔහුටද ප්‍රශ්නයක් වන්නට ඇත. එංගල්ස් පොත ලියන විට ලෝකයා දැන  සිටියේ එක මන්දාකිණියක් එනම් සෞර ග්‍රහ මණ්ඩලය පිහිටි ක්ෂීර පථය ගැන පමණකි. එංගල්ස්  සඳහන්  කරන්නේ එපමණකි. එසේම පරිණාමවාදය පිලිබඳ ඉමහත් ප්‍රීතියට පත්ව මාක්ස් විසින් ප්‍රග්ධනයේ දෙවෙනි වෙළුම ඔහුට පුදන්නට කැමති වුවද ඩාර්වින් මාක්ස් ට ලිපි ලියා නැත. (එක ලිපියක් හැර)

එංගල්ස් උදම් ඇනුවේ සත්ව සන්තතියේ පරිණාමය ඩාර්වින් ඉදිරිපත් කල ලෙසටම මාක්ස්  මිනිස් සංහතියේ පරිණාමය ඉදිරිපත් කල බව පවසමිනි.  ඓතිහාසික භෞතික වාදය තුල එංගල්ස් තර්ක කළේ  එකල දැන  සිටි සීමිත විශ්වයේ (මන්දාකිනියේ) පරිණාමය හදාරමින්  ලෝකයේ පරිණාමය ද ඒ අනුව විග්‍රහ කල හැකි බව කියමිනි. නමුත් අප දැන් දන්නේ මේ පරිණාමය හුදු අහම්බයක් පමණක් බවයි. නමුත් ඒ අහම්බය අපට භෞතික විද්‍යා නියමයන් ඇසුරින් පැහැදිලි කරවා ගත හැකිය.

මහේෂ් හපුගොඩ සිතන්නේද එංගල්ස් ගේ පොත සර්ව සම්පුර්ණ එකක් කියාද?

පසු කාලයක පෙරටුගාමී සමාජවාදීන් ජවිපෙන් කැඩී යාමට ප්‍රථම පුබුදු ජයගොඩ ප්‍රමුඛ විශ්ව විද්‍යාල සිසුන් විසින් ක්වන්ටම් භෞතිකය ගැන පොතක් ලියා තිබුණි. මට මතක විධිහට එහි නම "ක්වන්ටම් ලෝකයේ දයලෙක්තිකය" වැනි එකකි. එහි අවසානයේ ක්වන්ටම් භෞතිකය පිලිබඳ දැනුම මාක්ස්වාදී අදහස් වලට විරුද්ධ නොවන බවට තර්කයක්ද  ගෙන එයි.

බොහෝ  ක්වන්ටම් භෞතික විද්‍යාවේ නියමුවන් පෙරදිග දර්ශනයන් පිලිබඳ අවබෝධයකින් යුක්තව සිටි බව නොරහසකි. සමහරවිට තමන් හැර දමා තිබූ පෙරදිග දර්ශනය වෙත යන්නට ගණිතඥයකු වන ද සිල්වා මහතාට සිතෙන්නට ඇත. නමුත් ඔහු නිවැරදි නොවන තැන මා ඇතුළු  වෙනත් බොහෝ අයට අනුව නම් බටහිර විද්‍යාව අසත්‍යයක් යයි ද එය ඉවත දැමිය යුතුයිද ඔහු විසින් ඉදිරිපත් කරන තර්කයයි.

වර්තමානයේ  බොහෝ බටහිර විද්‍යාඥයන්, මිට අවුරුදු 40-50 කට කලින් සිටි අය තරම් අන්තවාදී හෝ වාර්ගික නැත. ඉන්දීය, ශ්‍රී  ලාංකික හා අප්‍රිකානු විද්‍යාඥයන් බොහොමයක් බටහිර රටවල සේවය කරති. එනිසා බටහිර විද්‍යාව යනුවෙන් අමුතු දෙයක් අද නැත. ජපානය හා චීනයද විද්‍යාවේ දියුණුව ට ප්‍රාග්ධනය හා දැනුම  සපයන ප්‍රධාන පෙලේ රටවල් දෙකකි. ඒවා ආසියාතික රටවල්ය.  පෙරදිග දර්ශනයන් හා බටහිර දර්ශනයද , භෞතික විද්‍යාවද එකතුවුණු නවීන විද්‍යාවේ දියුණුවට උරදෙන්නවුන් තව දුරටත් නලින්ද සිල්වා මහතා කියන පරිදි "යුදෙව් චින්තකයන්" පමණක්ම නොවේ.

උදාහරණයක් ලෙස භෞතික  විද්‍යාවේ කවන්ටම් භෞතිකයේ  අරී අට මග ගනිමු. (eightfold way).  පරමාණු වල ද්විතියික අංශුන් (subatomic particles) වන හඩ්රෝන්ස් (hadrons) නිවැරදිව ව්‍යුහගත කිරීම සඳහා වන නියමයන් භෞතික විද්‍යාඥ මරේ ගෙල්මන් (murray Gell-Mann) හැඳින්වුයේ ආර්ය අෂ්ටාංගික මාර්ගය ලෙසය. ඔහු බෞද්ධයෙකි   (සමාවන්න,  සිංහල බෞද්ධයකු නොව ඇමෙරිකානු බෞද්ධයෙකි ).   ඔහුගේ මෙම අරි අට මග ව්‍යුහගත කිරීමෙන් ක්වාර්ක් මොඩල සොයා ගැනීමට මග පෑදුනි. බෞද්ධයෙකු වශයෙන් ඔහු එම නම භාවිතා කලේ ක්වන්ටම් අංශුන් වල පුදුම සහගත හැසිරීම් නිසා විය හැකිය. (ස්ට්‍රෙන්ජ්නස් strangeness කියා තත්වයක්ද මේ අංශුන් වලඇත . සිනා නොවන්න ) 

මෙම මම කලකට ඉහත  ලියූවකි. ක්වන්ටම් යුගල බන්ධනය හෙවත් සහසම්බන්ධතාවය

නමුත් ක්වන්ටම් අංශුන් වල එම හැසිරීම මගින් දෙවියන් සිටින්නේ යයි හෝ එම දෙවියන් නාථ දෙවියන් විය හැකියි කියා කොහෙත්ම ඔප්පු වන්නේ නැත. මේ නාථ  දෙවියන් ගැන කලකට ඉහත ලියුවකි.
පුහුල්වැල්ලේ විමලවංශ හාමුදුරුවෝ සහ නාථ වාදය හෙවත් නාතිස්ම් (Nathism)

අප මතක තබා ගත යුත්තේ බොහෝ නියමයන්  ඉදිරිපත් කර තිබෙන්නේ තවත් කිසියම් ස්වභාවික නියමයකට හෝ රීතියකට, රාමුවකට සාපේක්ෂව බවයි. නිව්ටන් ගේ භෞතික  විද්‍යාව හා අයින්ස්ටයින් ගේ භෞතික විද්‍යාව වෙනස් වන්නේ ඒවා වැරදි නිසා නොව භාවිත කරන ලද රාමුව නිසාය. ආචාර්ය නලින් ද සිල්වා මෙය හොඳින් දන්නා බවට සැකයක් නැත. මේ ගැන මා ලියා  ඇති මේ ලිපියෙන්  පහත කොටස උපුටා ගනිමි.නිව්ටන් හා අයින්ස්ටයින් බිග් බැන් මොඩලයට මග පෑදුවේද?

නිව්ටන් ගේ  වස්තුන් දෙකක ගුරුත්වාකර්ෂණ බලය නියමයන්  සත්‍ය වන්නේ  නිව්ටන් අවකාශය (space) (නිරපේක්ෂ) නියතයක් (absolute space) ලෙස සැලකීම නිසාය.  ඔහුට අනුව වෙනස් වූයේ කාලය පමණි.

අයින්ස්ටයින්  අවකාශය හා කාලය යන දෙකම  නියතයන් ලෙස සැලකුවේ නැත. ඔහුට අනුව මේ දෙකම විචල්‍යයන්ය. මේ අනුව අයින්ස්ටයින් අවකාශ-කාලය (space-time) නමැති සංකල්පය ඉදිරිපත් කල අතර එය නියත යයි නිගමනය කළේය

ක්වන්ටම්  අංශුන් ගැන කතා කරද්දී අවකාශ-කාලය (Space -Time ) ද නියත නොවන අතර අවකාශය හා කාලය නියත ලෙස ගෙන ක්වන්ටම් අංශුවක පිහිටීම ගණනය කල නොහැක.

සමහර භෞතික විද්‍යාඥයන් බෞද්ධ හෝ හින්දු වේදයන් හි ඉගැන්වීම්  කියවා  තිබෙන බවට සැකයක් නැත්තේ ඔවුන්  යථාර්තය යනු නියතයක් නොව අදහසක්  බවට පෙරදිග දර්ශනයන්  හැදෑරීම තුලින්  වටහා ගෙන සිටි බැවිනි. 

ගෙල්මන් අරී අට මග ගැන විස්තරයක් මෙහි තිබේ . ඔබට කිසියම් භෞතික  විද්‍යා දැනුමක් මේ ලිපිය කියවීම සඳහා අවශ්‍යය. Gell-Mann’s Eight Fold Way

ක්වන්ටම් භෞතිකයේ ගණිතමය අවබෝධය අපට කියන්නේ අපගේ යථාර්තය දිගින් දිගටම වෙනස් සම්භාවිතාවන් ලෙස ප්‍රාදුර්භූත වන බවයි. එනම් ඇත්තේ එසේ වීමට ඇති  සම්භාවිතාව පමණි.  අප සංවේදී වන්නේ හෝ ජිවත්  වන්නේ ඉන් එක සම්භාවිතාවක පමණකි. (වඩාත් අවබෝධ කර ගැනීමට ශ්රෝඩින්ගර් ගේ පූසා ගැන කියවන්න)

අප දන්නා පරිදි සෑම  පරමාණුක   අංශුවකටම (particle) ප්‍රතිවිරුද්ධ ආරෝපණයක් (charge) හා ශක්තියක් (energy)  ඇති ප්‍රති-අංශුවක් (anti-particle) තිබේ. මේවායේ ස්කන්ධය සමානය (mass).   ඉලෙක්ට්‍රෝනයට පොසිට්‍රෝනය ද, නියුට්‍රොනයට ඇන්ටි නියුට්‍රොනයද, ප්‍රෝටෝනයට ඇන්ටි ප්‍රෝටෝනයද මීසෝනයට ඇන්ටි මීසෝනය  ආදී වශයෙනි.
ඒ කියන්නේ පදාර්ථයට (matter ) ප්‍රති පදාර්ථයක් (antimatter) ඇති බවය. මේ අංශුන් හා ප්‍රති අංශුන් එකිනෙකා  හමුවූ විට එකිනෙකා  විනාශ (annihilate) කරගනු ලබන අතර  එම සන්සිද්ධියේදී ෆොටෝන් වැනි අංශුවක් නිපදවනු ලැබේ.
(මේ ප්‍රති අංශුන් වලින් පොසිට්‍රෝනය 1932 දී පෝල් ඩිරැක්  හා කාල් ඇන්ඩර්සන් විසින් කරන ලද පරීක්ෂණයකදී   සොයා ගන්න ලදී)

මෙවැනි අදහසක් එනිසා පැන නැගිය හැකිය. අප සෑදී ඇත්තේද මේ පරමාණුක අංශුන් වලින්මය. එම හැම අංශුවකටම ප්‍රති අංශුවක් ඇත්නම් ප්‍රති අංශු වලින් පමණක් ඉපදුනු ප්‍රති-ඔබ කෙනෙක් හෝ ප්‍රති-මම කෙනෙක්ද සිටිය හැකිය. මේ ප්‍රති-මම හෝ ප්‍රති-ඔබ වෙනත් ප්‍රති-විශ්වයක එනම් anti-particle හෙවත් antimatter විශ්වයක සිටිය නොහැකිද?
එවැනි සම්භාවිතාවක් තිබිය නොහැකිද?

මේ ගැන දිගින්  දිගට තව ලිවිය හැකි වුවත් මගේ මූලික අදහස මෙයයි. මේ නිසා තව දුරටත් අපට මිනිස් පරිණාමය පිලිබඳ ඩාර්වින් ගේ මතය පරීක්ෂණ හා නිගමන මගින් තහවුරු කල හැකි වුවත්  විශ්වයේ පරිණාමය ඉතා කුඩා අන්ශුන්ගේ හැසිරීම දක්වා ලඝු කිරීමේදී මුලික ඓතිහාසික භෞතිකවාදයේ  සඳහන් කරුණු වල බිඳ වැටීම වැළැක්විය නොහැකිය.

දයලෙක්තික භෞතිකවාදය යනු ඇත්ත වශයෙන්ම යථාර්තය වටහාගැනීම සඳහා වන මාර්ගයකි. එය කෙනෙකුගේ සිතුවිලි, භාවයන් හෝ භෞතික ලෝකය වටහා ගැනීමක් විය හැකිය. කාර්ල් කවුට්ස්කි මේ වදන් යුගල සංයෝජනය  කරන විට (coined) අදහස් කලේ සෑම චලනයකම (movement ), අන්තර්  සම්බන්ධයකම (interconnection), වෙනස් වීමකම  (change), එහි විලෝමය(ප්‍රතිපක්ෂය) හා එකිනෙකට පරස්පරවූ (contradictory) පාර්ශ්වයන් ගේ එකතුව (unity)  නියත වශයෙන්ම හේතු සහිතව වටහා ගැනීමේ ක්‍රමය ලෙසයි.  සරල ලෙස කීවොත් සෑම ප්‍රපන්චයකම පක්ෂ හා විපක්ෂ යනුවෙන් දෙකක් ඇති අතර ඒවා ගැටීම මගින් ඒවායේ එකතුව පෙන්නුම් කරනු ලබයි.

අංශුන් හා ප්‍රති-අංශුන් වලට මේ දයලෙක්තික  භෞතිකවාදී අදහස ගැලපිය හැකිද?  අංශුන් හා ප්‍රති අංශුන් ගැටීමෙන් නිපදවන නව ෆොටෝනය හේගල් කිවූ සින්තසිස් එකද?

එසේ නම් ක්වන්ටම්  භෞතිකය මගින් පදාර්ථය පවතින්නේ එක් සම්භාවිතාවක් ලෙස යනුවෙන් නිවැරදිවම හෙළි දැක්වීම තුල මේ අදහස් තව දුරටත් වලංගුද?

මේ නිසා අපට සමාජවාදය පිලිබඳ පරණ ආකල්පය තවදුරත් ඉදිරියට ගෙන යා හැකිද?

දිප්ති කුමාර  හා මහේෂ් හපුගොඩ ආදරය ගැන කියන්නේ එනිසා විය යුතුය. මට වැටහෙන ආකාරයට  ඔවුන්ට අනුව (හෝ ජිජැකියානු දර්ශනය තුල) ආදරය හා මිනිස් සම්බන්ධතා වර්ධනය කිරීම තුලින් ධනවාදය අවසන් කිරීමේ අඩිතාලම ගොඩ නගා ගත හැකිය. ප්‍රති-දීප්ති හා ප්‍රති-මහේෂ් වෙනත් ප්‍රති-විශ්වයක වෛරය (පන්ති වෛරය) අත්හදා බලනවා විය හැකිය.

දීප්තිගේ කතාව;
(සංවාදයට විවෘතයි)
ගෙල්මන් ගේ  සංවාද 1:

ගෙල්මන් ගේ  සංවාද 2




මාක්ස් හා ඩාවින්ගේ ලිපි ගැන:
http://friendsofdarwin.com/articles/marx-capital/
https://www.jstor.org/stable/2709077?seq=1#page_scan_tab_contents

මාන අටක විශ්වය 

Saturday, 23 February 2019

ප්‍රථම ප්‍රේමය ඔබ නොවේ (49) - ඉරණම ද ?

රෙකුලාසි පාලම 

ප්‍රියාන් දැන  සිටියේ ඔහුගේ මිත්‍ර රුසියානුවා කීදේ පමණි. තාන්යා ගේ සොහොයුරිය ලේනා ප්‍රියාන්  සමග කතාබහ කිරීම ප්‍රතික්ෂේප කළාය. ඒ වෙනුවට ඇය කළේ රුසියානුවාට යම් විස්තරයක් කීමය.

ප්‍රියාන් කියන දේ අවධානයෙන් අසාගෙන සිටියා විනා කිසිවක් නොකී ගිහාන් ගෙතුළ කරන පෙරළිය ඔහුට ඇසුනේ අවසන්  නොකළ ඇමතුමේ රිසීවරය තුලිනි. අවසානයේ දුරකථනය අතට ගත්තේ නිලන්තය.

"ප්‍රියාන් ගිහාන්ට මොනවාද කීවේ " නිලන්ත ඇසීය.

"මචන් මගේ යාළු රුස්ස ලියොනිඩ්  තමයි තාන්යා ගේ අක්කව හම්බ වුනේ. මට කතා කළේ නැහැ. තාන්යා මැද  පෙරදිග රටකට ගිහින් තියෙනවා. කැමැත්තෙන් වෙන්න ඕනේ. මොකක් හරි මොඩෙලින් වැඩකට කියල. ගිහාම වෙලා තියෙන්නේ වෙන දෙයක්. එහෙදි බලෙන් තියාගෙන ඉඳල එන්න බැරිවෙල. හැබැයි ආවට පස්සේ මොස්කව් වල පොඩි මාෆියා ගෘප් එකක් උස්සන් ගිහින් තියාගෙන  ඉඳල. ඔය ටික තමා දැනට කීවේ." ප්‍රියාන් පැවසීය.

"ගිහාන්ට දරා ගන්න බැහැ මචන් "

"මම හුඟක් දවස් කල්පනා කරලා කීවේ. රුස්ස මට කිව්ව හැම විස්තරයක්ම කිව්වෙත් නැහැ.  දැන් මොකද කරන්නේ."

ප්‍රියාන් ඇසුවේ ඔහුට කිසියම් දෙයකට වැරෙන් පහර දීමක් වැන්නක් ඇසුණු හෙයිනි.

"අර කොෆී ටේබල් එකට ගහල කැඩුවා. වතුර ගුරුලේත්තුව පොළේ ගැහුවා. කබඩ් දෙක තුනකම දොරවල් පයින් ගහල කඩලා දැන් අතන විශාඛා එක්ක ඉඳගෙන ඉන්නවා ඔලුවත් බදාගෙන. මොකද කරන්නේ. මේවා ඇත්තටම වෙච්චි  ඒවාද? මෙහෙත් ඔය රුසියාවේය  කියන කෙල්ලො නම් ඉන්නවා. ඔය මැද පෙරදිග නම් අජූතයි මම හිතන්නේ " නිලන්ත කීවේ ගිහාන්ට නොඇසෙන්නට ය.

"මචන්, මැද පෙරදිග මිනිස්සුන්ගේම  වරදක් නෙමේ. රුස්ස කියපු විධිහට මට තේරුනේ ඕව ජරා රුස්සොම කරන දේ විධිහට. මැද පෙරදිග ඉන්න එකා  දන්නේ නැහැනේ කැමැත්තෙන් ගේනවද නැත්ද කියල.  උන් කරන්නේ ගනුදෙනුවක්. උන් සල්ලි ගෙව්වම උන් ඒකට සර්විස් එකක් අපේක්ෂා කරනව. බටහිර ගැහැණු, මොඩෙලින් කරන සමහර එවුන් ඔය අරාබි කාරයන් ගේ යොට් වලට එහෙම  කැමැත්තෙන් යන්නේ. මොනකෝ  වල හෙම  ඔය වගේ දේ ඕන තරම් වෙනවා. මම දන්නා විධිහට මොස්කව් වල ඉන්න  සමහර  ලංකාවේ බිස්නස්  කරන එවුනුත් කලා. තවම කරනවා ඇති. ඉන්දියන් කාරයෝ , අප්‍රිකානු ශිෂ්‍යයෝ, රුස්සෝ එක්ක එකතු වෙලා තමන් යාළුවෙලා හිටි කෙල්ලන් පවා සිංගප්පුරුව වගේ රටවලට ගෙනල්ල හෝටල් වල තියාගෙන වික්කලු. මුන් ඔය රටවල ඉගෙන ගත්තද කියලත් වෙලාවකට හිතෙනවා.  ලංකාවේ එහෙම කරපු එකෙක්ම මට කියල තියනව කෙල්ලන්ට  කියලයි එක්කන් ගියේ කියල. ඇත්තද බොරුද දන්නේ නැහැ. ගිහාන් ට ඕක අනුමාන කරන්න  එච්චර අමාරු නැහැ. ඌ දන්නවා " ප්‍රියාන් කීයේය.

රුසියානුවන්ට විශේෂයෙන් රුසියානු හෝ ඒ අවට පැරණි සෝවියට් සමූහාණ්ඩු  වල සෝවියට් ක්‍රමය ඇතුලේ සාපේක්ෂව ආරක්ෂිතව සිටි මිනිසුන් සෝවියට් ක්‍රමය පෙරලී ලැබුණු නිදහස තුල අතරමං වූහ. නව  ක්‍රමයට හරිහැටි මුහුණ දෙන්නේ කෙසේද යන්න ගැන බොහෝ අයට අවබෝධයක් නොවීය.

"ඔය හොස්ටල් වල හෙම  හිටපු කෙල්ලන්ගෙන් සුළු කොටසක් මාෆියා පැත්තට ගියා . අනිත් උන්ගෙන් සමහරු උස්සන්න ගත්ත බලෙන්. මම දන්නා විධිහට ඕව පත්තරවල වත් ගියේ නැහැ .මොස්කව් දැන් හැට ගණන් වල  චිකාගෝ වගේ කියල සමහර රුස්සෝ කියනවා.  මචන් කතාව  ඉවර නැහැ. නමුත් නොකිය ඉන්න එක හොඳයි කියල මම හිතන්නේ. ගිහාන්ව  ලංකාවේ නවත්ත ගනින්. යන්න දෙන්න එපා" ප්‍රියාන් තව දුරටත්  පැවසුවේ ගිහාන් ගැන අනුකම්පාවෙනි . ඔහුට අවශ්‍ය වූයේ දුරකථන සංවාදය අවසන් කිරීමටය.

"ගිහාන් කියන්නේ යනවා කියලනේ.  මම මොකද කරන්නේ." නිලන්ත පවසනවාත් සමගම ගිහාන් නැවත දුරකතනයට පැමිණියේය.

"ප්‍රියාන්, මට හිතා ගන්න පුළුවන් මොනවාද වුනේ කියල.  මොකක් හරි ලොකු ප්‍රශ්නයක් වුණා. අර හොස්ටල් එකක තියන් හිටිය කියන එක නම් මට තේරෙන්නේ නැහැ. පොලිසියෙන් ගිහිල්ල බේරා ගත්ත කිව්වේ. උන්ට එහෙම බලෙන් හිර කරන් ඉන්න පුලුවන්ද මොස්කව් වල? මට  ලේනට කතා කරන්න බැරිද? බැරි වුනොත් මම යනවා මොස්කව්. මම තාන්යා ට ආදරෙයි. ඒක වෙනස් වෙන්නේ නැහැ.  උඹේ යාළු රුස්ස ගිහිල්ල ලේනව හම්බ වුනේ කොහෙද, මට රුස්සව හම්බ වෙන්න බැරිද? මම කොහොම හරි තානි ව කැමති කර ගන්නම් දැන් එයා එන්න අකමැති නම්. "

"ගිහාන්" ප්‍රියාන් මදක් නැවතී දිග හුස්මක් ගත්තේය .

"තාන්යා අඳුරන ටැක්සි කාරයෙක් ඉන්නවද? ඒ අර එකපාරක් ගිහින් හිටිය එකා ද?"

"ඔව්. ඌ  හොඳ මනුස්සය. එයාගෙම අම්ම එක්ක  හිටියේ ෆ්ලැට් එකක. මට කෝල් කරලා තාන්යා ඉන්නව කියල එන්න කිව්වේ. ඊට පස්සේ අපිත් එක්ක සෑහෙන යාළු කමින් නේ හිටියේ"

"තාන්යා එහෙ ඉඳල තියෙන්නේ. ලේන ගේ ගෙදර නෙමේ "

ප්‍රියාන් මදක් නැවතී දීර්ඝ හුස්මක් ගත්තේය. ගිහාන් නිහඬව අසා සිටී.
නරක ආරංචියක්, කෙනෙකු හදිසි අනතුරකට මුහුණ දුන් අවස්ථාවක් , මිය ගිය අවස්ථාවක් ඒ තැනැත්තා හෝ තැනැත්තිය දැන  සිටි ළඟම කෙනෙකුට කීම අපහසුය. ඔවුන් කෙසේ ක්‍රියා අකරනු ඇත්දැයි නොදන්නා බැවිනි. ප්‍රියාන්  මුහුණ දුන්නේද ඒ තත්වයටමය. ඔහු තීරණය කළේ වැඩි හැඟීමක් ඇති බවක් නොදැනෙන සේ ඔහු දන්නා ආරංචිය කීමටය.

"මචන්, මට මේක ටිකක් විශ්වාස කරන්න අමාරුයි තාන්යා ව දන්නානිසා.  උඹ තාන්යා ව හොයාගෙන එයි කියල  නවත්වන්න කිව්වද කියල මම දන්නේ නැහැ. ලේනා කියල තියනවා තාන්යා රුස්සගේ ටැක්සිය අරගෙන ගිහින් බිල්යායෙව  පැත්තේ බඩු  කෝච්චි යන රේල්  පාරකට ගිහිල්ල කියල " ප්‍රියාන් නැවතත් කෙටි විරාමයක් ගත්තේය.

"කෝච්චිය එන පාරේ ටැක්සියේ දොරවල් ලොක් කරලා තියන් ඉඳල."
"මොනවා".

ඉතිරිය අසා සිටියේ නිලන්තය.

"ගිහාන් දොර ඇරගෙන ගියා යන්න මචන්. මොකද්ද  උඹ කීවේ"

ප්‍රියාන් ට ඔහුගේ මිතුරු රුසියානුවා  කළ විස්තරයට අනුව කාරයේ සිටියේ තාන්යා බව හඳුනා ගෙන තිබෙන්නේ ගමන් බලපත්‍රයේ කොටසකින් හා අත් බෑගයෙනි. රුසියාවේ භාණ්ඩ ප්‍රවාහනය කරන දුම්රියවල්   ගමන් කරන්නේ අධික  වේගයෙනි.

~~~~~~~~~~~~~~~~~~~~~~~~~~~~~~~~~~~~~~~~
ලුණුගල සිට බිබිල හරහා මහියංගනයට යන මහා පාර A5 ලෙස මාර්ග සිතියමේ නම් කර තිබේ. A මාර්ගයක් වුවද මේ මාර්ගය ඉතා කුඩාය. වාහන දෙකක් මාරු වෙන්නේද ඉතා අපහසුවෙනි. සමහරවිට එක වංගුවක වාහන නවතාගෙන අනිත්  වාහනය එනතුරු බලා සිටිය යුතුය.  මේ නිසා බොහෝ ලොරි හා බස් ගමන් කරන්නේ නැවතී නැවතීය.

මේ මාර්ගය වඩාත් අනතුරුදායක වන්නේ වැසි කාලයටය. එහිදී බොහෝවිට  විට කුඩා නායයාම් ඇතිවන අතර ඉහළ කන්දේ සිට මාර්ගයට ගල් පතිත වීමද සිදුවේ. වරක් බසයක් ගමන් කරන අතරතුර  කන්දේ ගල් කැඩී  ඉදිරිපසින් මාර්ගයට වැටී ඇති අතර බසය පසු පසට ගනිද්දී පසු පසින්ද කඩා වැටී බසය හිරවී තිබුණි.

ලුණුගලත් බිබිලත් අතර මාර්ගයේ රෙකුලාසි පාලම නම් පාලමක් හමුවේ.  මේ පාලමින් උඩ  රාවණා ගුහාව නමින් ගුහාවක්ද එම ගුහාවට ඇතුළත් වීමට ලෙන් දොරක් ද තිබූ අතර  එම ගුහාව තුලින් නුවර දක්වා යාමට උමගක් ඇතැයි කතාවක් වැසියන් අතර තිබුණි. (මේ උමග මහා මාර්ග සංවර්ධන ආයතනය මගින් වසා දමා ඇත. මේ මාර්ගය දැන් විශාල කරමින් ඇත - කතෘ)

වසර 1974 දී එක  රාත්‍රියක වන්දනාවේ ගිය පරණ වෑන්  රථයක් මේ මාර්ගයේ ගමන් කලේ කට්ට කරුවළේය. එහි විදුලි පහන් ක්‍රියා විරහිතව තිබුණි. මාර්ගය හරියට පෙනේනේද නැත. පාරේ එක පැත්තක කඳු ද අනිත් පැත්තෙන් හෙළද වේ.
රෙකුලාසි පාලමේදී දී වෑන් රථය ලිස්සා  ගොස් එතැන් ඇති ගල් තලාව උඩ  වැටී සුණු විසුණු වී තිබූ අතර එහි ගමන් කළ එක අයෙකු හැර අනිත් සියල්ලෝම මිය ගියහ.

 නිලන්ත හදිසියේම වාගේ පළමු වතාවට ලන්ඩනයට දුරකථන ඇමැතුමක් දුන්නේ සුභ ආරංචියකට  නොවේ.

"කොහොමද නිලන්ත , එදායින් පස්සේ  ගිහාන් කතා කළෙම නැහැ . මමත් සද්ද නැතිව හිටියේ පොඩ්ඩක් සන්සුන් වෙන්න අරින්න. කාලය විසින්  හැම තුවාලයක්ම හොඳ කරනවයි කියනවනේ."

"ප්‍රියාන්, ඒ ගැනම තමයි මම මේ කතා කළේ. ගිහාන් නැති වුනා මචන්."

"මොනවා" ප්‍රියාන් ට ඒ ආරංචිය අදහාගත නොහැකි විය.
"ඒ කොහොමද "

"එදා ඉඳන් ගිහාන් හිටියේ සෑහෙන අප්සෙට් එකෙන්. හිතා ගන්න පුලුවනිනේ උඹට. කෙල්ල මෙහෙ එක්කන් ඇවිත් අපිත්  එක්ක විනෝද ගමන් යන්න වගේ හීන මව මව හිටියේ. රස්සාවට ගියෙත් නැහැ සතියක් විතර. අපි තමයි රස්සාවට යන්නත්  බල කලේ. මොස්කව් යන්න එපාම කියල හැමෝම කිව්වේ."

"මට හිතා ගන්න පුළුවනි. සමාවෙයන් මචං. මට ලැබුණු ආරංචිය කියනවා ඇරෙන්න කරන්න දෙයක් තිබ්බෙ නැහැ. "

"ඒක මම දන්නව . මම කියන්න යන්නේ ඒ වගේම එකක්. ගිහාන් උන්ගේ සයිට් එකක වැඩකට නුවර ගිහින් එහෙම්ම රන්දෙනිගලත් ගිහිල්ල උඹල එක්ක රුසියාවේ හිටි යාළුවෙක් හම්බ වෙන්න. එතනින් මොන හේතුවකටද මන්ද ගිහාන් ට හිතෙන්න ඇති  ලුණුගල හරහා එන්න. යාළුව කියල තියනවා ඉඳල යන්න කියලත්. අර අපට සම්බන්ධ සිද්ධියකුත් උනානේ ඒ පැත්තේ. ඒ හින්දද මන්ද ගිහා ට හිතුනේ යන්න. මේ කාලෙට මෙහෙ වැස්සනෙ  මචන්. ඔය  ඒ පැත්තට වහින්නේ ධාරාණිපාත වැහි. හිටපු ගමන් බදුල්ල, පස්සර , ලුණුගල පැති නාය යනවා. ගිහාන් ගියේ සයිට් එකෙන් ඌට දීල තියෙන ජීප් එකෙන්.   රන්දෙනිගල ඉඳන් බිබිල හරහා ලුණුගල ඇවිත්. ඔය පාරේ රෑ වෙලාවට වැඩිය  යන්නෙත් නැහැ. අනික හොඳටම වහිනවා. ඔය කලින් ඇක්සිඩන්ට් එකක් වෙච්ච තැනකම ජීප් එක  ලිස්සල ගිහින්.  පාන්දර පාරේ ගිය වාහනයක් දැකල ලුණුගල පොලිසියට කියල. හොඳටම වහින නිසා ඒ වතුර පාරත්  සැරයි. මිනිය හම්බ වුනේ නැහැ මචන් "
නිලන්ත එක හුස්මට කීවේ හිතේ තිබූ මහා බරක් හෑල්ලු කරන්නට මෙනි.

"හයියෝ මචන්. මේකා ඕන කමින් කර ගත්තද. හිතා ගන්නත් බැහැ අනේ බං "

"දන්නේ නැහැ මචන්. අර 88-90 ගණන් වල ඔය හරියේ මළමිනිත් දාලා තියනවාලු.  පොලිසිය උත්සාහ කරා කිව්වා හොයන්න.බැරිවුණා කියල තමයි කියන්නේ.  වාහනේ නම් උඩට ගත්ත. ඉස්ස්සරහ චප්ප වෙලා තිබ්බේ. අර ගිහාන් නිතර අහන කැසට් එක තිබ්බ ඩෑෂ් බෝඩ් එක උඩ. මට හිතුන ගිහාන් අපට  පණිවිඩයක් තිබ්බද කියලත් "

"ඒ කිව්වේ. "

"ඔයා කතා කරාට පස්සේ ගිහාන් විශාඛා ටයි මටයි කිය කියා හිටිය තාන්යා එක්ක මුලින්ම අහපු  සින්දු ටික ඒ කැසට් පටියේ තිබ්බේ කියල. අර  "ට්‍රැජඩි" කියන සින්දුවට ඉස්සෙල්ලම නැටුවේ  කියල. උන් දෙන්න ඔය කැසට් එක නිතර අහනවලු.  ඒක කල්පනා කර කර තව ඩිප්‍රෙස් වුනා "

"ගිහාන් ගේ අම්මලා තීරණය කරලා තියනවා  පන්සලට දානයක් දෙන්න  ගිහාන් වෙනුවෙන්. අපි  ආයි පාරක් හොයල බලනවා. වැස්ස අඩු වුනහම. ඒත් මචන් පොලිසියෙන්  කියන්නේ කබරයෝ හෙම කනවා. හොයන්න අමාරු වෙයි කියල.

 "මට හිතා ගන්න බැහැ ගිහාන් එහෙම දෙයක් ඕන කමින් කෙරුව කියල. සමහර විට තාන්යා ගැන කල්පනාවෙන් යන්න ඇති. අනික් රෑත් වෙලා ඒ වගේ පාරක ගියේ ඇයි කියන එකත් ප්‍රශ්නයක්. මොනවා කරන්නද  මචං. එහෙම  දානයක් වත් දෙන එක හොඳයි. "

ප්‍රියාන් සහ නිලන්ත ඒ කතා කළේ අවසන් වතාවටය. බොහෝ දුරට තම  තමන් ගේ පවුල්, රැකියා පිළිබඳ කටයුතු නිසා ගිහාන් හා තාන්යා පිලිබඳ මතකය කෙමෙන් වියැකෙමින් තිබුණි. හුදෙකලා පෙම්වතුන් දෙදෙනෙකු ගේ ආදර අන්දරයක් බොහෝ විට පෞද්ගලික එකකි.

~~~~~~~~~~~~~~~~~~~~~මතු සම්බන්ධයි


Tuesday, 19 February 2019

ප්‍රථම ප්‍රේමය ඔබ නොවේ (48) - සිනමා පටයක මෙන් දිග ඇදුනු ජීවිතයක කෙළවරද

ශෙප්කින්ස්කි වනය 
තව දුරටත් ගිහාන් සොයා යාමේ උමතු බලාපොරොත්තුවක් තාන්යා ගේ සිත තුල රැව් දුන්නේ නැත. තමන්ගේ එක තීරණයකින් ජීවිතය මෙතරම් දරුණු ලෙස වෙනස් වේයැයි ඇය සිහිනෙනිදු නොසිතුවාය.

යුවතියන් දෙදෙනාට මහත්ම අස්වැසිල්ලක් වූයේ පිලිපීන සේවිකාව වූ ඇග්නස් ය. ඒ අතරේ ඔවුන්ට මෙන්ම හමුදා ප්‍රධානියාටද   ආහාර සපයන  සේවකයන් දෙදෙනෙක් එහි සිටියහ. වෙනත් සේවකයන් සිටියත් ඔවුන්ගේ  ඇස ගැටුනේ මේ දෙදෙනා පමණි. ඇග්නස් ඔවුන් හඳුන්වා දුන්නේ ශ්‍රී ලංකාවේ ලලිතා හා විකී වශයෙනි. මුළුතැන්ගෙයි අහර පිළියෙළ කලේ ලලිතාය. විකී රියැදුරෙක් වුවත් සේවිකාවන් දෙදෙනාට අවශ්‍ය අනිකුත් කුදු මහත් උදව් රාශියක් ඉටු කර දුන්නේය.

තාන්යා ට ලලිතා යන නම ඇසුනේ ලෝලිතා ලෙසය. සෝවියට් දේශය බිඳ වැටුණු පසු තහනම්ව තිබු පොත් රාශියක් නැවත පලවූ අතර ඉන් එකක් වුයේ ව්ලදිමීර් නබෝකොව් ගේ "ලොලිටා " පොතය. එය කියවා  තිබු ඇයට ලලිතා ගේ නම මතක තිබ්බේ එලෙසය. මුළු රාත්‍රිය පුරාවටම එරික් කිවූ ලෙස "සේර්විස්" සඳහා වැඩ කිරීම කළ පසු උදය පුරා  නිදා ගත්තත් දහවල මධ්‍යහ්න වේලාවේ ආහාර  ගැනීම සහ හවස තේ හෝ කෝපි පානය අතර  සේවිකාවන් දෙදෙනා සහ සේවකයා සමග කතා බහ කිරීමට ඔවුනට හැකිවිය. ලෝලිතා කීවේ  ඔවුන් තෝරා ගැනීමට එදා පැමිණි හමුදා නායකයා හොඳ මිනිසෙකු බවය. ඇය නැවතී සිටි නිවසේ දී ඈට බොහෝ දඬුවම් විඳීමට ට සිදුව තිබුණි. වරක් බඳුනක් බිඳ වැටී කැඩුණු නිසා නිවසේ ගෘහණිය ඇගේ අතට උණුසුම් ඉස්ත්‍රික්කය  තබා තිබුණි. ගෙහිමියාගෙන්ද කරදර සිදුවූ බව ඈ පැවසුවාය.

"මම එළියට බැහැල පැනල යනකොට පොලිසියෙන් අල්ල ගත්ත. මේ අය්ය තමයි මහත්තයට කියල මාව බේරා ගත්තේ. එදා ඉඳන් මෙහෙ " ලෝලිතා පිලිස්සුණු අත පෙන්වූවාය. විකු අයා ද ඒ මතයම දැරීය. ලෝලිතා විකී අයියා ලෙස කරන ඇමතුම රුසියානු යුවතියන්ට ඇසෙන්නේ විකූ අයා ලෙසටය. එනිසා  ඔවුහුද එලෙසම ඇමතූහ.

තෙවන  දිනයේ එකවර  පැමිණි පිරිමි දෙදෙනෙකු මහා හඬින් කතා කරමින් සිනා සෙමින් තවත් ආරුක්කුවක් වැනි යකඩ රාමුවක් ගෙන ආහ. ඔවුන් තාන්යා ගේ අනිත් පයද එහි එල්ලීය. මුළු  රැය පුරා  ඇය සිටියේ ඒ අපහසු ඉරියව්වෙනි. ක්සේන්යා ගේ කුටියට ආ අයද ඔවුන් එහි කැඳවුහ. ඒ දරුණු වධය උදයේ එහි ආ ඇග්නස් ගේ නෙත ගැටිණි. ඇග්නස් සහ ලෝලිතා තාන්යා අපහසුවෙන් ඔසවා ගෙන ගොස් නහවා පිරිසිදු කළහ. ලෝලිතා සුදුලූනු, ළුණු සහ තවත් මොනවදෝ එකතු කොට රත්කළ අත් බෙහතක්  නැප්කින් එකකට ගුලි කොට එම රස්නයෙන් තාන්යා ගේ යටිකය හා  රිදුම්  දෙන පෙදෙස් තැව්වාය. ඇගේ  දෙනෙතෙහි කඳුළු  උණන තරම ට ලෙන්ගතු  වූ මේ කරුණාවන්ත ගැහැණුන් දෙදෙනාගේ දයාවන්ත බව හා ආදරය  තාන්යාට  දරාගත නොහැකි  විය.

ඇයට ඇගේ පියා  සිහි විය. වරක් ශෙප්කින්ස්කි නමැති   වනයේ පවුල් කිහිපයක් සංචාරයේ යෙදිනි. ලේනා සහ අනිකුත් ළමයින් සමග සෙල්ලමට දිව යද්දී තාන්යා ඇද වැටුනේ කටු පඳුරු ගාලකටය. කටු වලින් සිරී ලේ පෙරාගෙන හඬද්දී ප්‍රථමයෙන් දිව ආ අලෙක්සේයි තම දියණිය දෑතින් ඔසවාගෙන කිලෝමීටර  භාගයක් තරම ඈත පිහිටි කුඩා වැවට දිව්වේය. එහි ඇය වතුරෙන් පිරිසිදු කර ඒ ගැම්මටම කාරයට දිවගොස් හදිසියකට ගැනීමට තිබූ වෙළුම් පටි ගෙනවිත් ඇගේ සීරුණු තුවාල වෙළුවේය. ඇගේ වේදනාව අමතක වී නැවත  සිනහසෙන තුරුම  ඔහු ඇය සමග වැව අයිනේ හිඳගෙන   සිටියේ මවටත් ලේනාටත්  අනිත් අසල්වැසියන් සමග ශෙප්කින්ස්කි වනයේ  විනෝද චාරිකාව යාමට ඉඩ සලසමිනි.  පියා සිටියානම්. හමුදා පුහුණුව ලත් ඔහු සමහරවිට මුන් සියල්ලම මරා දමා ඇය බේරාගනු ඇත. ඇයට නොදැනුවත්වම දෙනෙතින් කඳුළු ගලා ආයේය.

හමුදා නායකයා ඇග්නස් හෝ විකී පෙන්වූ නිසා දෝ අර දෙවැනි   ආරුක්කුව දිනකට පසු ඉවත් කිරීමට අණ කළේය. එසේම දෙවෙනි මහලේ සිද්දියෙන් පසු වරක් ක්සේන්යා වෙත ගියා  විනා ඔහු ඔවුන් වෙත බලහත්කාරකම් කරන්නට නැවත පැමිණියේද නැත. යුවතියන් දෙදෙනා එහි සිටින්නේ ස්ව කැමැත්තෙන් නොවන බව ඔහු වටහාගත් සෙයකි.

දෙවන හා තෙවන  සිද්ධීන්  දෙකකදී ද  හමුදානායකයා  ඇයට අනුකම්පා කරන බව තාන්යා ට තහවුරු විය. එක පිරිමියෙකු තමන් ගෙනා චොකලට්  තාන්යා ප්‍රතික්ෂේප කිරීම ගැන  උරණ විය. ඔහු කලේ ඇගේ සිරුර මතට නැග බලහත්කාරයෙන් ඒවා කැවීමය. ඇය සිටි ආකාරය අනුව මුවේද උගුරේද හිරවූ චොකලට් ශ්වාසනාලය දිගේ  යෑම නිසා හුස්ම ගැනීමට අපහසුව ඇය දරුණු ලෙස කැස්සාය. ඇග්නස් කොහේදෝ සිට පැමිණ ඇගේ පිටට ගසමින්, මුවට අත දමා  චොකලට් ඉවත් කරමින් ඇය එම කරදරයෙන් මුදවා ගත්තාය. කෝපවූ පිරිමියා ඇග්නස් ව කාමරයෙන් එලවූ නමුත් අඩ හෝරාවක් යන්නට මත්තෙන්  කිසිවෙකු පැමිණ ඒ පිරිමියා කාමරයෙන් රැගෙන ගියේය.   ඔහු නැවත ආවේ නැත. ලොක්කා එය කළ බව විකු අයා පැවසීය.

තෙවැන්න නම්  වෛද්‍යවරයාගේ සිද්ධියයි. වෙළුම් ගලවන්නට ආ වෛද්‍යවරයා යුවතියන් එහි සිටින්නේ කුමටද යන්න දැන ගන්න ට ඇත. ඔහුද  ඇයව අපයෝජනය කිරීම  ඇයට ඉවසුම් නොදෙන්නක් විය. වෛද්‍යවරයෙක්  යනු රෝගියාගේ විශ්වාසය දිනා ගත් අයෙක් මිස අපයෝජකයෙක් නොවේ. ඇගේ දැඩි කෝපය හා ශෝකය නිවන්නට ලෝලිතා උත්සාහ ගත්තේ ක්‍රමානුකූලව හුස්ම උඩ  පහත හෙළීමට කියා දීමෙනි. ගිහාන් බොදුනුවකු වුවද දැඩි ලෙස ආගමික වූ අයෙක් නොවුණු නිසා ඔහු පැමිණි රටේ ආගම ගැන ඇගේ වැඩි දැනුමක් නොවීය. ඇය ඒවා දැන  ගත්තේ විකූ සහ ලෝලිතා ගෙනි.   එසේ වුවද  සංසාරයේ එන හමුවීම්, ලෝලිතා හා තාන්යා ගේ කරදර කිසියම් පෙර ආත්ම වල ඔවුන් කළ දේ නිසා යයිද කියනා   ක්සේන්යා අමාරුවෙන් පරිවර්තනය කළ  කරුණු ඇයට තේරුනේම නැත. ඔවුන්ගේ අදේවවාදී රට වෙනස් වී තුබුණද රුසියාව තවම ආත්මවාදී ආගම් වලට හැරී තිබුනේ නැත.

වෛද්‍යවරයාද ඉන්පසු ඉවත් කෙරුණි. මේ නගරයේ කිසියම් සුදු ජාතික වෛද්‍යවරුන් සිටින බව තාන්යා දැනගත්තද තරුණියන් එහි රඳවා සිටීම හෙළිදරව් වන නිසා ඔවුන් නොගෙන්වන බව ඇයට වැටහිණි. එදා හමුදා ලොක්කා හෝටලයට පැමිණ ඔවුන් තෝරා ගත් නමුදු ඔහු තමන් කෙරෙහි අනුකම්පාව  දක්වමින් කරන හැසිරීම තාන්යා ට ප්‍රහේළිකාවක් විය.

ඇයට තවත් අස්වැසිල්ලක් වූයේ ඇය ඔවුන්ගේ භාෂාව තරමක් දන්නා බවද ගීත කිහිපයක් දන්නා බවද විකූ අයා හා ලෝලිතා දැන  ගැනීමය. ගිහාන් ඔවුන් මොස්කව් වැවේ නෑමට ගිය දින සිට නිතර ගැයූ "ප්‍රේමයේ විල් තෙරේ" ගීතය ඔවුන් දෙදෙනාම දැන සිටියේ නැත. එහෙත් තාන්යා ට හොඳින් මතකයේ තිබු "සඳෙන් එහා කඳු මුදුන් හිමේ" නමැති ගිහාන්  ඈ වෙනුවෙන් නිරන්තරයෙන්  ගැයූ  ගීතය විකූ ගායනා  කළේය. ලෝලිතා ජපානයේ සකුරා  මල් ගැන කියවෙන ගීයක් නිතර ගායනා කළාය. ගිහාන් නිතර ගයන ගීත කිහිපයක්ම විකූ ද ගායනා කළේ මුළුතැන්ගෙයින් ගෙනා උයන භාණ්ඩයකට තාලයට ගහමිනි. ඔහු කෙතරම් හොඳින් එය කළේද යත් තරුණියන් දෙදෙනා ඒ හඬින් හා ගායනයෙන් කුල්මත්ව සිටියහ. ඔවුන්ගේ මුවේ සිනහවක් නැගුනේ එවැනි විටකදීය. එසේම තමන්ගේ රටේ නොවන්නා වූද  එම රටේ ආගන්තුක සේවකයන් පමණක්වූ ලෝලිතා, විකූ අයා සහ ඇග්නස්  ගේ කරුණාව, දයාව සහ ආදර සංග්‍රහයන් ඔවුන්ට තම ජිවිතයේ අපහසුම දින කිහිපය ගත කරගන්නට ඉමහත් පිටුවහලක් විය.

ඔවුන් එහි සිටියේ  යූරා නමැති පාතාල නායකයා හා ස්වේතා ට ගෙවා ඇති මුදල්වලට හිලව්වට වුවත් පැමිණි පිරිමින්  නොයෙකුත් සුවඳ   විළවුන්, චොකලට් සහ එම රටේ මුදල්ද සන්තෝෂම් ලෙස  කාමරයේ තබා ගියහ. ඒවා වැඩිපුර ලැබුනේ ක්සේන්යා ටය. ඒ වනවිට ක්සේන්යා පෙරළුණ බෝට්ටුවේ යට පැත්තත් හොඳ යයි  හිත හදාගෙන සිටියාය.   තාන්යා ඇයට ලැබුණු සියලු දේ ප්‍රතික්ෂේප කළාය. චොකලට්   කිහිපයක් සුවඳ විලවුන් ද යම් මුදල් කොටසක් ද  ඇය ඇග්නස්, ලෝලිතා හා විකූ ට පරිත්‍යාග කළාය.

එරික් හා ස්වේතා පැමිණියේ තවත් සතියක් දෙකක් පමා වීය.  යුවතියන්ට ලැබුණු සුවඳ විලවුන් හා මුදල් ස්වේතා මල්ලකට එක්කාසු කළේ තාන්යා එතරම් උපයාගෙන නැති බවට දෝෂාරෝපණයක් ද කරමිනි. ක්සේන්යා වාද කළද ස්වේතා ක්සේන්යා එකතු කරගත් මුදල්ද උදුරා ගත්තාය.

ඔවුන් නික්ම යන දිනයේ එරික් ලා පැමිණීමට ප්‍රථම උදයේම කාමරයට  පැමිණි හමුදා නායකයා ඩොලර් දෙසීයක  මුදලක් ඇඳ මත තබා තාන්යා ගේ හිසට තට්ටුවක්ද දමා නිහඬවම නික්ම  ගියේය. ඔහු එරික් හෝ ස්වේතා හමුවීමට පැමිණියේ නැත. ඔහු පිළිබඳව තාන්යා ගේ සිතේ  පැහැදීම තවත් වැඩි කරවන කරුණක් වූයේද එයයි. තාන්යා ඒ මුදල් ඇඳුම් බෑගයේ  අඩියේ සඟවා ගත්තාය.

ඇය සිතා සිටියේ මොස්කව් ගුවන් තොටුපළේදී කෑ ගසා තමන්ට වූ අකරතැබ්බය පවසා ස්වේතා හා එරික් ආගමන විගමන නිලධරයන්ට අල්ලා දීමටය. ඇය  විශ්මයට පත් කරමින් ඔවුන් විශේෂ දොරටුවකින් කිසිවක් පරික්ෂා නොකරම එලියට කැඳවා ගෙන යන ලදී.
ලේනාගෙන්   පසුව දැනගත් පරිදි එම ධනවත් මැද පෙරදිග රටට සෝවියට් දේශය බිඳ වැටීමෙන් ඉතිරිවූ අති මහත් ආයුධ සංඛ්‍යාවෙන් කොටසක්  විකිණීමට අවශ්‍යතාවයක්   මිනිස්තෙර්ස්ත්වා අබරෝණි යට (රුසියාවේ ආරක්ෂක අමාත්‍යංශයට  )  තිබුණි. එම රට ආයුධ මිලදී  ගත්තේ ඇමෙරිකාව , බ්‍රිතාන්‍යය, ජර්මනිය ආදී බටහිර රටවලින් පමණි. ඒ කාලයේ නිතර බීමතින් සිටි රුසියාවේ බඩ තඩි මහලු ජනාධිපතිවරයා   ප්‍රජාතන්ත්‍රවාදය ගෙන ආවද මේ කිසිවක් සොයා බැලුවේ නැත. අමාත්‍යාංශයේ දූෂිත නිලධාරීන් ගේ සහය යූරා සහ ස්වේතා ට ලැබී තිබුණි. ඔවුන් දොළ පිදේණි බවද හමුදා නායකයා අකමැත්තෙන් සිටි ඇගේ පහස ප්‍රතික්ෂේප කළේ එනිසා බවද තාන්යා ට පැහැදිලි විය.

අනතුරුව සිදුවූයේ තවත් බලාපොරොත්තු නොවූ දෙයකි.  ඔවුන්ගේ මාෆියා පාතාල  නායක යූරා නියෝග කළේ තාන්යා නිදහස් නොකිරීමටය. බොහෝවිට මෙවැනි අපරාධ සඳහා පැහැරගන්නා කතුන් ගෙන් බොහොමයක් තම ඉරණම භාරගෙන එම ජිවිතයට පසුව අනුකූල වන අතර කිහිප දෙනෙක් පමණක් පැනයති. නැත්නම් මුදල් අගහිඟ වූ විට නැවත පැමිණෙති. තාන්යා දිගින් දිගටම අනුගත නොවීම යූරා සැලකුවේ අනතුරක් ලෙසය. මේ නිසා ස්වේතා හා එරික් තාන්යා කෙලින්ම  රැගෙන ගියේ කුස්මින්කි වලටය. එහි පරණ සෝවියට් වෙතරිනාර්නයා බියෝතෙක්නොලොගි හෙවත් පශු වෛද්‍ය හා ජීවවිද්‍යා තාක්ෂණ  විශ්ව විද්‍යාලය පිහිටියේය.  විශ්ව විද්‍යාලයේ එක නේවාසිකාගාරයක පාලනය සම්පුර්ණයෙන්ම පාහේ පැවතියේ මුරාඩ් නම් ජාවෙඩ් හා එරික්ගේ යහළුවකු  වන ඉන්ගුශේටියා නම් කුඩා රුසියන් ස්වයං පාලිත සමුහාණ්ඩුවකින් පැමිණි පරණ ශිෂ්‍යයෙකු අතය. ඔහු කුඩා පාතාල කණ්ඩායමක් පිහිටුවාගෙන සියලු මත්ද්‍රව්‍ය හා වෙළඳම් පාලනය කරමින් හා කප්පම් ගනිමින් සිටි කුඩා ප්‍රමාණයේ මාෆියා කාරයෙකි.

තාන්යා වෙනත් තැනකට මාරු කරන තුරු එරික් හා ස්වේතා කළේ ඇය මුරාඩ්  ට භාරදීමය. තාන්යා  වැටුනේ කබලෙන් ළිපටය. එහි මුරාඩ් ගේ හත් දෙනෙකුගේ කණ්ඩායමේ සුරතලිය වීමට ඇයට සිදු වන බවට ස්වේතා කළින්ම දන්වා සිටියේ අවඥා සහගත සිනාවකින් යුතුය.

"දැන්වත් උඹ හැදෙයි අපට ඕන විධිහට. මුන් එක්ක සෙල්ලම් බැහැ " එරික් කීවේය.

පළමු දිනයේදීම  මුරාඩ් ඒ කීම සනාථ කළේ දඟලමින් විරෝධය පෑ තාන්යා ගේ තොල් පුපුරා ලේ ගලන සේ එල්ල  කල පහර කිහිපයකිනි.
තාන්යා ට මේ සිදුවන දේ අදහාගත නොහැකි විය. මොස්කව්  මෙවැනි තැනක්  යි ඇය කවදාවත් සිතුවේ නැත. මොස්කව් පැමිණි දා පටන්ම වාගේ ගිහාන් සමග ඇය ගත කලේ ප්‍රීතිමත් සාමකාමී ජීවිතයකි. සෝවියට් දේශය බිඳ වැටුණු මුල් අවුරුදු දෙකෙහිද ගිහාන් ගිය පසුද තරමක් කරදර තිබුනද ඒ සාමකාමී බව බිඳුනේ නැත. මාෆියා කණ්ඩායම් හා වෙළඳාම් කරන පාතාලයන් ගැන දැන සිටියද ඔවුන්  සමග ගනුදෙනු කළේ ගිහාන් හා ඔහුගේ මිතුරන් ය. මේ සිටින්නේ වෙනම සංවිධානය වූ පිරිසකි.

 මැද  පෙරදිග රටේදී ලෝලිතා දෙතුන් වරක්ම  සංසාර නම් වචනයක් භාවිතා කරමින් ඔවුන්ට ඇයව හමුවුනේ කිසියම් දීර්ඝ කාලීන  බැඳීමක්  නිසා බවත් එනිසා ගිහාන් සමග නැවත හමුවීම නොවැලැක්විය හැකි බවත් කීවාය. තාන්යා නම් ඒ බලාපොරොත්තුව අත හැර තිබුණි. නමුත්  කිසියම් ආකාරයක ට  තමන් ට උපකාර ලැබෙන්නේ ගිහාන් සමග තිබූ සංසාර ගත බැඳීම නිසා  යයි ලෝලිතා හා විකූ අයා නිතර  කියූ එම "සංසාර" වචනය සමග සම්බන්ධ කමක් යන්තම් හෝ ඇති බවට තාන්යා ට එක් දිනකදී  තදින් සිතුනි.

ඒ  ඇය කුණු බාල්දිය  විසි කිරීමට කුස්සියට ගිය වේලේ දී  ශ්‍රී ලාංකික යයි සිතෙන තරුණ සිසුන් දෙදෙනෙක් හමුවීමය. මාෆියා කණ්ඩායම සිටි කාමර තුනම පිරිසිදු කිරීම, ඔවුන්ගේ ඇඳුම් පැළඳුම් හරි තැන්වල දැමීම, ඉවීම,පිඟන් කෝප්ප හා  වොඩ්කා වීදුරු සේදීම  මෙන්ම ඔවුන්ට අවශ්‍ය අවශ්‍ය වෙලාවට කාමරයකට ඇදගෙන කරන බලහත්කාරකම ද  ඇගේ දිනපතා කාර්යයන් අතර විය.  ඔවුන් සිටින කොරිඩෝරයෙන්   පිටට ඇයට යාම තහනම් නිසාත් ඔවුන්ට නොපෙනී වෙන කොහේවත් යා නොහැකි නිසාත් කුස්සිය තුල කිසියම් නිදහසක් තිබුණි.

ඇය සිසුන් දෙදෙනාගෙන් ඇසුවේ ඇගේ විස්තරය කියා සොයුරිය  ලේනා ට දුරකථන ඇමතුමක් දීමට හැකිද යන්නය. ඔවුන් බටහිර රටකට යාමට පැමිණ මුරාඩ් ගේ යහළුවෙකු හරහා එහි නැවතී සිටින බවද ඇය දැන ගත්තාය. ඔවුන්ගේ රුසියානු දැනුම එතරම් හොඳ නැත. මදක් කල්පනා කල තාන්යා කුස්සියේ දොරින් මුරාඩ් ගේ කාමරය දෙස බැලුවාය. මාෆියා කාරයන් කොක් හඬලා සිනාසෙමින් සිටින බව ඇසෙන මුත් අනතුරක  සේයාවක් වත්  නැත.
 ඇය  තමන්ගේ ඩෙනිම් කලිසමේ සඟවාගෙන සිටි ඩොලර් සියයේ නෝට්ටු දෙකෙන් එකක් සිසුවෙකුට දුන්නාය. ඔවුන් ගේ එකකුගේ අත  සිගරට් පෙට්ටියක් විය. ඇය  පුපුරා ගිය දෙතොල  හා පහර කා නිල්වුණු කලවයන් පෙන්වා උදව් අවශ්‍ය බව පැවසුවාය. ඔවුනට එය වැටහිණි.  එකෙක් හිමින් සීරුවේ ඔවුන්ගේ කාමරයට ගොස් පැන්සලක් රැගෙන ආවේය. ඇය ලේනා  ගේ ලිපිනයද දුරකථනය අංකයද ලියා සිගරට් පෙට්ටියේ  ඇතුළු කොළයේ ඇගේ තත්වය සැකෙවින් ලියා හත් දෙනෙකුගේ කණ්ඩායමෙන් බේරාගත යුතු බවද ලීවාය.  පණිවිඩය  දී නැවත පැමිණියහොත්  තවත්  ඩොලර් සියයක්  දෙන බවට ඇය සිසුන් දෙදෙනාට පොරොන්දු වූවාය. ලේනා සිටින්නේ පැයක පමණ දුරකය. සිසුන් දෙදෙනා ඒ මුදලින් ටැක්සියක යාමට පොරොන්දු විය.

පැය තුනකටත් වඩා ගතවිය.  පැය  තුන,  හතර පහ විය.  "මුන් කොල්ලන් දෙදෙනා අල්ලාගෙන මැරුවා වත්ද?" ඈට සිතුණි.  ඇය පිඟන්  කිහිපයක් හිමින් සීරුවේ රැගෙන කුස්සියට යාමට සැරසුනේ ඒවා සෝදන මුවාවෙන් ලාංකික සිසුන් සොයා යාමටය. එකෙණෙහිම අස්ලාන් ඇගේ බොටුවෙන් අල්ලා ගත්තේය.
"මෙහෙ වරෙන් තානිච්කා ස්ලාදච්ක (ප්‍රණීතාවිය)  අද මගේ දවස" වොඩ්කා බොමින් සිටි  අනිත් උන් මහා හඬින් සිනා සුනෝය.

 ඇයව  ඇඳට තල්ලු කල අස්ලාන් ඔහුගේ කළිසම ගලවන්නට විය.
හදිසියේම ගෙලට වැදුණු දැඩි පහරකින් අස්ලාන් කපා හෙළූ ගසක් සේ ඇදවැටුණි.

"අමෝනිට්සි" තාන්යා මිමුණුවේ කාමරයට කඩා වැදුණු  භටයින් දෙදෙනා දෙස විමතියෙන් බලමිනි.

අමොන් යනු "අත්රයාඩ් මිලිට්සී අසෝබව නස්නචේනියා" යන වදන් පෙලින් සැදුනකි. එහි තේරුම "මිලිෂියා වේ  (සෝවියට් කාලයේ  මහජන හමුදාව, පසුව  රුසියාවේ පොලිසිය ලෙස නම වෙනස් විය ) විශේෂ කාර්ය සාධක බල කණ්ඩායම " යනුයි. ඔවුන් සෝවියට් කාලයේදී ත් සංවිධානාත්මක මැරයන් හා තහනම් වෙළඳුන්ට ද දේශපාලන විරුද්ධ වාදීන්ට ද එරෙහිව ක්‍රියාත්මක වූ   විශේෂ පුහුණුව ලත් පොලිස් (මිලිට්සියා) කණ්ඩායමකි. කතා බහින් නොව දරුණු පහර දීමෙන් හා උණ්ඩයෙන් අපරාධකරුවන්ට පිළිතුරු දෙන බවට නම් දැරූ හමුදාවකි.

 අමොන් භටයන් දෙදෙනා පසුපසින් ටයි කෝට් පැළඳ ඇතුළු වූයේ සොයුරිය ලේනා ගේ පෙම්වතා වලෝද්යාය.

තාන්යා ඒ සැණින් ඉදිරියට පැන වලෝද්යා වැළඳ ගෙන හඬන්නට ගත්තාය. ඇය බලා පොරොත්තු වූයේ ලේනා හොරෙන් පැමිණ  ඇය මුදවා ගනු ඇතැයි යන්නය. ඒ වෙනුවට වලොද්යා හමුදාවක් සමගම පැමිණියේය. ලේනා සිටියේ නේවාසිකාගාරයේ පහළය.  අමොන් භටයන් රාශියක් මෙන්ම  රුසියානු රහස් ඔත්තු සේවයේ අයද එහි සිටියහ.
ලේනා  තම සොයුරිය බදා ගත්තේ දෑසේ කඳුළු පුරවාගෙන වුවත් තම  දැඩි බව හා සන්සුන් බවද සංයමයද නොපැකිලව තබා ගත්තේ වැඩි හැඟීමක් පළ නොකරමිණි. අමොන් වරුන්ගේ නාමය රකිමින් එදින අස්ලාන් ඇතුළු මුරාඩ් ගේ   දෙතුන් දෙනෙක් "සංවිධානාත්මක කොල්ලයකට සම්බන්ධවූ නිසා " මැරුම් කා තිබුණි.

වලොද්යාට කේජීබිය වෙනුවට  අලුතින් පිහිටවූ   රුසියානු  රහස් ඔත්තු සේවයේ මොස්කව් ප්‍රාදේශිකයේ ප්‍රධාන නිලධාරී තනතුරක් ලැබී තිබුණි. විදේශිකයන් වඩා ගැවසෙන මොස්කව් වල මෙය වැදගත් තනතුරකි. ඔහු අමොන් කණ්ඩායම සමග තමන්ගේ ඇති සබඳතාව යොදාගෙන රහසේ මෙම මෙහෙයුම දියත් කර තිබුණි.

එයට හේතුව ස්වේතා නොදැනම නැවත එන ලෙස  පවසා නිවසට යාමට  නිදහස් කර තිබු ක්සේන්යා ලේනා හමුවී සියලු විස්තර පවසා තිබීමයි. තාන්යා ක්සේන්යා ට සොයුරිය ගේ විස්තර දී තිබුනේ ඇය සොයුරියගේ නිවසේ නවතින නිසා ක්සේන්යාව නැවත හමුවීමේ බලපොරොත්තුවෙන්ය . තාන්යා මොස්කව් වලදී නැවතත් බලහත්කාරයෙන් ගෙන ගිය බව ක්සේන්යා පවසා තිබුනේ ඔවුන් විශේෂ දොරටුවකින් ආ බවද පවසමිනි. වෙනත් අමාත්‍යංශයක දූෂිත නිලධාරීන්ගේ සබඳකම් සොයා ගැනීමට වලොද්යා ට වැඩි කාලයක් ගත නොවීය. ඔවුන් සිටියේ තාන්යා සොයා මොස්කව් පීරමිනි.




මතු සම්බන්ධයි ~~~~~~~~~~~~~~~~~~~

අමොන්
ස්ලාද්ක  - ප්‍රණීත හෝ පැණි රස
ස්ලාදච්ක - ප්‍රණීත හෝ රසැති තරුණිය
අමොන් - https://en.wikipedia.org/wiki/OMON

මිණිබිරී ගේ රචනාවට පිළිතුරක්

මිනිබිරියක් ලිවූ සිංහල රචනාවක් කියල අපුරු නිසඳැසක් බුකියේ එහෙ මෙහෙ යනවා. යාළුවෙක් ගේ බිත්තියේ  තිබිල කියෙව්වා. පස්සේ හිතුන ඒ ගැම්මටම මේ පිළිතුර ලියන්න.
කරෝල කතාවයි, අඩි දෙකකට උඩින් කතාවයි  ඇත්තටම මම දන්න කෙනෙකුගේ නෑදෑයෙකුට වුන දෙයක්.
බුකියේ කවිය 

~~~~~~~~~~~~~~~~~~~~~~~~~~~~~~~~
සීයලා කර ඒ වර්ජනේදී
එක් වෙන්නටම  එපා කියල
රටේ අලුත්ම වමේ කට්ටිය
හොරෙන් වාගේ කියා තිබුනා

ඒ ගොල්ලොත් ඔය ඔහේ ඉඳිද්දී
සීයලා අපේ  ජීවත්ම වෙන්නට
ගෙවල් ගානේ කරෝලයි හාල්
මැස්සො වික්කා

එහෙම හිටි සීයාගේ යාලුවා
හයක් අවුරුදු ගතවෙලා ආ
දෙවන විප්ලවේ ද්‍රෝහියෙක් වී
වෙඩිම  පහරකට මුහුණ පෑවා

ද්‍රෝහියෙක් වුනු අනේ ඔබගේ
යාළුව ගේ මිනිය අඩි දෙකක උඩකට
ගෙනියගන්නත්  බැහැ කියාලා
නීතියක් අනෙ  දමා තිබුනා

වර්ජනය  කලෙ  නුඹ  එදා ඒ
උන්ම වෙනුවෙන් නොවේදැයි දෝ
අනේ සීයේ මටත් හිතුනා

Friday, 15 February 2019

ප්‍රථම ප්‍රේමය ඔබ නොවේ (47) - සොයාගොස් ඔබ, නාඳුනන රටක තනිවී

පැය පහමාරක්  පමණ වූ ගමනින්  වෙහෙස වී  සිටි  එරික්, මීෂා, ජාවෙඩ් සහ ස්වේතා ප්‍රමුඛ තරුණියන් දොළහක කණ්ඩායම ප්‍රථම දිනය ගත කලේ විවේක සුවයෙනි.  ඔවුන් නවාතැන් ගත්තේ මුහුද පෙනෙනා මානයේ වූ විශාල තරු පහේ හෝටලයකය.  එහි මුළු තට්ටුවක එක පැත්තක් ඔවුනට වෙන්ව තිබුණි.  කණඩායමේ බොහෝ තරුණියන් කාමරවල සැප පහසුවට වශී වූ සෙයක් පෙනුණි . කිහිප දෙනෙක් එහි සවි කර තිබු යන්ත්‍රයෙන් කෝපි පානය කළහ. තවෙකෙක් ශීතකරණයක තිබූ කුඩා මත් පැන් බෝතල් හා කොකා කෝලා පානයට  ගත්හ. අති විශාල ඇඳන් වල මහා හඬින්  සිනා සෙමින් වැතිරුනහ. තාන්යා තුල වූයේ උදාසීන බවකි.   ඇය සෝවියට් දේශයේ දී ගොස්  තිබුනේ කොස්මොස් සහ ගස්තිනිට්සා උක්රයිනා යන හෝටල  දෙකට පමණි. ඒවාද  නැවතීමට නොව ගිහාන් සමග  එහිවූ ආපන ශාලා වල  ආහාර ගැනීමට ගිය ගමන්ය.

ඩුබායි අන්තර්ජාතික ගුවන් තොටුපලින් ඉවතට පැමිණි වහාම ස්වේතා ගමන් බලපත්‍ර එකතු කර ගත්තේ ආරක්ෂාවට යයි කියමිනි. ඒවා හෝටලයේදී තමන්ට නැවත දෙන බවට තාන්යා සිතුවත් නැවත ලැබුනේ නැත. ඇයට  මෙම රට කෙසේ දැයි නැරඹීමට  හවස් යාමයේ  මදක් සංචාරය කිරීමට   සිතුනත් එසේ කිරීමටද අවසර ලැබුනේ නැත.
නමුත් නොයෙකුත් වර්ගයේ කෑම  හා බීම වලින් නම් අඩුවක් නොවීය. මේ රටේ මත්පැන් පානය නොකරන්නේ යයි කීවද ඒවායින් අඩුවක් නොතිබුණි.

පසුවදා උදයේ ඔවුන්ට සැරසෙන්නට අණ ලැබුණි. ඒ ස්වේතා කී පරිදි ඇඳුම් වර්ග ප්‍රදර්ශනයට හෙවත් මොඩෙලීරවනියට බව ඇය සිතුවාය. ඔවුන්ට නොයෙකුත් මාදිලියේ යට ඇඳුම් වර්ග ඇඳීමට අණ කෙරිණි. ඒවා බොහෝ විට පිහිනීමට  අඳින බිකිනි වලට සමාන විය. ක්සේන්යා කීවේ මේ රටේ මුහුද වටේම ඇති හෙයින් එහි කාන්තාවන් නොයෙකුත් වර්ගයේ පිහිනීමේ ඇඳුම් හැඳීමට කැමති බවයි. සෝවියට් රුසියාවේ මෙතරම් හොඳ ඒවා තිබුනේ  නැත. එහෙත් රට විවෘත වූ පසු බොහෝ ඇඳුම් පිටරටින් ගලා ආවත් ඒවා මිලෙන් අධික විය. තාන්යාට එය ප්‍රශ්නයක් නොවූයේ බොහෝවිට ඇයට අවශ්‍ය ඇඳුම ගිහාන් ලන්ඩනයෙන් හෝ බර්ලින් නගරයෙන් ගෙන ආ බැවිනි.
ස්වේතා සියලුම යව්වනියන්ට නාන ඇඳුමට උඩින් දුහුල් සළුවක්  වැනි යමක් පොරවා ගැනීමට අණ කළාය.

තාන්යාට වෙලාව පිළිබඳ හැඟීමක් තිබුනේ නැත. ඔවුන් උදය ආහාරය ගෙන පැයක් දෙකක් පමණ ගත වෙන්නට ඇත.

 කාමර විශාල කොරිඩෝරය දෙපසම තිබූ  අතර හැම  කාමරයටම කුඩා විසිත්ත කාමරද තිබුණි. ඒවායේ එළියේ කොරිඩෝරයේ  මල් පැල ආදිය තබා තිබුණි.  එකවරම  මිනිසුන් දෙදෙනෙකු එරික් සමග ඔවුන්ගේ කාමර තිබු පෙදෙසේ මැද හරියට පැමිණියහ. එක අයෙකු හමුදා නිල ඇඳුමකට සමාන එකක්ද අනිකා සුදු දිග ඇඳුමක්ද හැඳ සිටියහ. සුදු ඇඳුම හැඳ සිටි තැනැත්තා ගේ හිසේ සුදු රෙද්දකට කළු රවුමක් වැන්නක් තබා තද කර තිබුණි. එවැනිම කළු රවුමක් තුලින් රින්ගවූ  රතු සහ සුදු කොටු සහිත රෙද්දක් අනිකාගේ හිසේ විය. හමුදා ඇඳුම් කාරයාට විශාල බුරුසුවක් වැනි උඩු රැවුලක් තුබූ අතර  අනිකා මුහුණ  පුරා  රැවුල වවාගෙන සිටියේය.  ඒ හැඳ සිටි ආකාරයට ඔවුන් රූපවාහිනියේ දැක පුරුදු  මැද පෙරදිග වැසියන් බව තාන්යා ට පසක් විනි.

කෙල්ලන් සමූහය දෙස බැලූ ඔවුන් එරික් සහ ජාවෙඩ් සමග කතා කළහ. ජාවෙඩ් පරණ සෝවියට් සමුහාණ්ඩුවක් වූ අසර්බයිජාන් වලින් පැමිණියෙක් බව තාන්යාට කෙල්ලක පවසා තිබුණි.

එකිනෙකා  සමග කතා කරමින් සිටියදී හමුදා කාරයා තමන් අසලම සිටි කෙල්ලගේ උඩුකය  ඇඳුම ඇර ඉතා සාමාන්‍ය දෙයක් කරන්නාක් මෙන් ඇගේ එක පියොවුරක් මිරිකීය.  මොල්දෝවා වලින් මොස්කව් පැමිණි වෙරෝනිකා නමැති අමුතු නමකින් යුත් ඒ තරුණිය හදිසි ක්‍රියාවෙන් විමතිව කෑ ගසා පිටු පසට පැන්නාය. පිරිමින් සියල්ලෝම සිනා සුනහ. එවිට එරික් තාන්යා අසල සිටි ක්සේන්යා තමන් දෙසට ඇද ගත්තේය. ඔහු හමුදා කාරයාට යමක් පැවසුවේ "සමල්චි බ්ලයාත් " (නිහඬව  ඉඳපන් බැල්ලි) ලෙස ක්සේන්යා ට තදින් අණ කරමිනි. හමුදා කාරයා එවර දෙඅතින්ම ක්සේන්යා ගේ තිසර යුගල ඔබා බලා නරුම සිනහවක්  පෑවේය.  ක්සේන්යා ඇදවී ගිය මුහුණින් යුතුව නිහඬව උන්නාය.තාන්යා ගේ හදවත  දරුණු ලෙස ගැහෙන්නට විය.  මේ සිදුවන්නේ කුමක්ද?

මේ විශාල තට්ටුවේ මුල හරියේ විශාල විසිත්ත කාමරයක් විය. එහි ඉතා සැප පහසු අන්දමේ කුෂන් වලින් කල පුටු බොහොමයක් තිබුණි. පැමිණි දවසේ කෙල්ලන් ඒවායේ හිඳගෙන කතා බහ කළහ.
ඔවුන්  විශාල  විසිත්ත කාමරයට කැඳවාගෙන ගිය ස්වේතා හා මීෂා ඔවුන්ට පේලියට  සිටින්නට අණ කළහ. ඔවුන් ඉදිරියේ සැප පහසු පුටු වල කිසියම් යුෂ වර්ගයක් පානය කරමින් සිටියේ මැදිවියේ පිරිමින් පිරිසකි.

තාන්යා ට තමන් තව දුරටත් ස්වේතා කියනා අන්දමේ ඇඳුම් මොඩෙලිරවනියට පැමිණි අය නොවන බව පසක් වුනි. ආපසු හැරුණු ඈ කාමරයට දිව ගියාය. කාමරයේ තමන්ගේ ගමන් බලපත්‍රය නැති බව මතක් වී ඈ  ස්වේතා නතරවී සිටි මුලින්ම තිබූ විශාලතම කාමරයට දිව්වාය. ස්වේතා ගේ ඇඳුම් ගොඩේ ස්වේතා ගේ වටිනා බෑගය  දුටු තාන්යා විකල්ව ගිය සිහියෙන් බෑගය අවුස්සමින් එහි ඇති සියල්ල එලියට ඇද දැම්මේ ගමන් බලපත්‍රය හා ගුවන් ටිකට් පත සොයා ගන්නා අටියෙනි. කෙසේ හෝ ගුවන් තොටුපලට යෑම ඇගේ අභිප්‍රාය විය. ස්වල්ප මොහොතකට පසු ඇය සොයා කාමරයට පැමිණි මීෂා ඇගේ  මුහුණට දැඩි පහරක් ගසා ගෙලෙන් වැරෙන් අල්ලා මුහුණ  ඇඳට තබා තද  කළේය. තාන්යා ඔහුගෙන් මිදෙන්නට දැඟලුවා ය.  එහි පැමිණි ස්වේතා ඔහුට අණ කළේ  අමුත්තන්ට  තමන් ආ කාරිය හෙවත් ඔවුන්ගේ  තේරීම කර ගන්නා තුරු තාන්යා එතනම  තබා ගන්නා   ලෙසයි.

අඩ හෝරාවකට පමණ පසු එරික් හා ජාවෙඩ් එහි එනතුරුත් මීෂා සිටියේ තාන්යා ගේ ගෙල පාගා ගෙන රූපවාහිනිය නරඹමින්ය. තමන් හසුවී සිටින්නේ "ක්‍රිශා (වහල) " ලෙසින් හඳුන්වන මාෆියා කණ්ඩායමකට  යයි තාන්යා සිතුවාය. කළ යුත්තේ කුමක්ද යන්න  ගැන ඇයට නිනව්වක් නැතිවිය.

"මේකිට මොන  පිස්සුවක් ගැහුවද? දැන් අරෙහෙ ගෙනිහිල්ල පිස්සු කෙලින්න ගත්තොත්" එරික් ස්වේතා ඇමතීය.

"එරික් උඹ දන්නවනේ කරන්න ඕනේ මොකක්ද කියල. යූරා කියල දෙන්න ඇතිනේ" පවසමින්  ස්වේතා  දොර දෙසට ගියාය .

"මුන්ගේ මෙතැන නායිකාව ස්වේතා එහෙනම් " තාන්යා ට වැටහිණි.

"ස්වේතා මට අනුකම්පා කරපන්. උඹට මම සල්ලි දෙන්නම් ආපහු මොස්කව් ගිය ගමන්. මගේ පෙම්වතා උනත් දෙයි. මට  මගේ පෙම්වතා ගාවට යන්න  දීපන්. මම වෙන මිනිස්සු එක්ක  ඉන්නේ නැහැ. මම මැරෙනවා."

"පිස්සුද උඹට හොයන්න බැරි ගාණක්  දැනටමත් වියදම් වෙලා  ඒවා හොයන්න ඕනේ . එරික් මොකද උඹ බලන් ඉන්නේ. ඔය බැල්ලි අපේ නේවාසිකාගාරේ ඉන්න කාලේ  ඉන්දියන් එකෙක් ගෙන්නාගෙන වේසකමේ ගියේ. මේකිට විදේශිකයෝ එක්ක ඉඳල පුරුදු බඩුවක්. දැන් සාන්ත මරිය වෙන්න යනවා "" ස්වේතා නැවතත් කීවේ අණ දෙන ස්වරයෙනි.

"ස්වේතා ඇයි මට මේ විධිහට බනින්නේ.  මම හිටියේ ගිහාන් එක්ක විතරයි. එයා ආගමික වුනේ කවදද."  තාන්යා ට වැඩිදුර සිතීමට ඉඩක් නොවුනේ, මීෂා  විසින් ඇඳේ  කෙළවරට ඇගේ මුහුණ තද කරගෙන සිටි නිසා  දණ ගසා  ගෙන සිටි තාන්යා ගේ   දෙපා දෙපසට ඇදෙන ලෙස කලවයන්  වලට දැඩි  පා පහර කිහිපයක් එරික් විසින් එල්ල කළ බැවිනි. ඇය වේදනාවෙන් කෑ ගැසුවාය.

"මේකි කෑ  ගහනවා තොට පේන්නේ නැත්ද දුරාක් (මෝඩයා )"  එරික් මීෂා ට ගර්ජනා කළේය.

"හොඳ වැඩක් කරන්නම්" තම මේස් එක ගැලවූ මීෂා එය තාන්යා ගේ කටේ එබුවේය.  දින කිහිපයකින් සෝදා නැති මේස් එකේ කුයිලයට තාන්යා ට හුස්ම හිරවෙන කැස්සක්  ආවේය.

ජාවෙඩ් ගේ උදව්වෙන් නිරුවත් කළ අසරණ යුවතියට බලහත්කාරකම කිරීමට අපහසු වූ එරික් කෝප විය.

"අර මූණේ  ගාන  ක්‍රීම් එක ගනින්. මේකිගේ ඉන්දියන් කාරයා කිරි විතරයි බීලා තියෙන්නේ. තද වැඩියි බ්ලයාත් " ස්වේතා එරික් ගේ එම කතාවට මහා හඬින් සිනහ සුනාය.

"ඇය වැනිම වූ තවත් ගැහැණියකට, එකට උගත් එකියකට මෙතරම්  දරුණු ලෙස සලකන්නට ඇයට හැකි වූයේ කෙසේද?" තාන්යා සිතුවේ දැඩි ශෝකයෙනි.

දඟලමින් වේදනාවෙන් මිරිකෙන යුවතිය තුලට බලහත්කාරී ලෙස ක්‍රීම් වර්ගය ඇතුළු කළ එරික්  ජාවෙඩ් සමග ස්වේතා අණකළ දඬුවම ඉටු කලේ සිනා සෙමින් ඝෝෂා කරමිනි. ස්වේතා එළියේ රැස්ව සිටි කෙල්ලන් කාමර වලට එලෙව්වාය.

ජාවෙඩ් ස්වේතා කැඳවාගෙන ආවේ කළු ලෝගුවක්ද රැගෙනය. ඉතා අපහසුවෙන් හා වේදනාවෙන් සිටි තාන්යා ගේ හිස තුලින් එය රිංගවා එය හැඳ ගැනීමට ක්සේන්යා උදව් වූවාය . මුළු ඇඟම වැසෙන සේ අඳින කළු ලොගුවක්වූ එය ට හිස් වැසුමක්ද තිබුණි. ඇයට එලිය පෙනුනේ ඉදිරියේ ඇති විවරයකිනි. ක්සේන්යා ද එවැනිම ලෝගුවක් හැඳ  සිටි අතර ස්වේතා හිස වසාගෙන දිග ගවුමක් හැඳ සිටියේ රූපවාහිනියේ දැක පුරුදු  විදේශික කාන්තාවක් ලෙසය.

"යමල්ල " ස්වේතා කෙල්ලන්ට අණ කළාය.

"අනිත් එවුන් " එරික් ඇසුවේය.

"යූරා තව ටිකකින් ඇවිත්  හතර දෙනෙක් ගෙනියයි අතන්ට. අනිත්  කට්ටිය අපි ආවහම බලමු. කාමර අගුළු දාල වහපන්.  මීෂා උඹ ඉඳපන්.  එළියේ හෝටලේ අපි දන්නා හාදයා මුරට තියල යන්නේ එළියේ  දොරත්  වහලා." ස්වේතා පැහැදිලි කළාය.
තාන්යා ගමන් කළේ ඇදි ඇදී අපහසුවෙනි. මීෂා ඇගේ පසුපසට පයින් පහරක් ගසා ඉක්මණින් ඇවිදීමට අණ කළේය.

"උඹල වැඩි හානියක් කළේ නැහැ නේද? කොහෙද තොපි බැ... පුතාල  කෙල්ලෙක් දුන්නොත් කාල දානවා. උන් එපයි කියල  කිව්වොත් යූරා සල්ලි ගන්නේ උඹලගෙන්. " ඔවුන්ට නොමනාපයෙන් මෙන් බැණ වැදුණු ස්වේතා කුඩා කුෂන් එකක් අසල  පුටුවකින් ගෙන
"මේක තියා ගනින් ඇතුලට " පවසා තාන්යා අතට දුන්නාය. මීෂා ලෝගුව ඔසවා කොට්ටය තාන්යා ගේ කුස මත තබා කලිසමේ බඳ පටියෙන් බැන්දේය. ඇය දැන් ගර්භනී මාතාවක් මෙනි.

හෝටලයේ විදුලි සෝපානයෙන් පහළට එද්දිත් ලොබිය හරහා යද්දිත් තාන්යා දෙපස බැලුවේ කවුරුන් හෝ දුටුවොත් කෑ ගසා උදව් ඉල්ලන්නටය. එහෙත් ඒ හෝටලයේ සිටි ඇතැම් සුදු ජාතිකයන්ද අනිකුත් විදේශිකයන් යයි කිවහැකි අයද  ඔවුන් දෙස බැලුවේ වත් නැත. හෝටලය ඉදිරිපස විශාල කළු පැහැති  රථයක් නවතා  තිබුණි.  රථයේ පැත්තකින් විවෘත කළ දොරට එක තරුණියක එක ආසනයට බැගින් වාඩි කර  ඔවුන් අසල ස්වේතා හා එරික් හිඳ ගත්හ. ජාවෙඩ් රියදුරු සමග ඉදිරියේ හිඳගති.

වායු සමීකරණය කරන ලද වාහනයේ වීදුරු  සියල්ල අඳුරු කර තිබුණි. එහත් ඇතුළේ සිටි අයට එලි මහන පෙනේ. වාහනය වේගයෙන් ඇදී ගියේය. ඔවුහු  හෝරා  පහක පමණ කාලයක් මුහුදක් අයිනකින් ඇති විශාල මාර්ගයක ගමන් කළහ. අතරමග අබුඩාබි නමින් නගරයක් පසු කළ බව ස්වේතා එරික්ට කීවාය. තවත්  අඩ හෝරාවකින් පමණ ඔවුන් තවත් රටක දේශ සීමාවකට පිවිසිණි.

ඔවුන් සතු ලියැකියවිලි ඉදිරිපත් කළේ ජාවෙඩ් ය. ඔහු  ව්‍යක්ත ලෙස එම  රටේ භාෂාවෙන් කතා කරන  බව තාන්යා ට වැටහිණි. මදක් ඝෝෂාකාරී ලෙස ඇසෙන  එය බොහෝ විට මැද පෙරදිග ප්‍රචලිත භාෂාව විය හැකියයි ඇය සිතුවාය.

දින දෙකක් ඇතුළත තමන්ගේ ජීවිතය එහෙම පිටින්ම වෙනස් වී තිබේ. තව දුරත් ශ්‍රී ලංකාවට යෑම ගිහාන් හමුවීම පිළිබඳව ඇය සිතුවේ නැත. හැකි ඉක්මනින් මොස්කව් යාමට හැකිනම්. ඇයට  මවුපිය දෙදෙනා මතක් විය. අසරණ මව ඇය විදේශික රටක සිරි නරඹමින් සිටින්නේ යයි සිතනවා විය හැක. ඇගේ දෑසින් කඳුලු ගලා එන්නට විය. හැකි ඉක්මනින් රොස්ටොව්  යා යුතුය.

දේශ සීමාව පසුකල වහාම රථය නවතා ඔවුන් ආහාර අනුභව කළහ.  ඒ වනවිට හවස් වී රාත්‍රිය උදා  වෙමින් තිබුණි. ඩුබායි නගරයෙන් ගත් පාන්,  චීස් වර්ග, ඇපල් යුෂ කෙල්ලන් දෙදෙනාට ලැබුණි.  දේශ සිමා මුර පොළ පසු කළ පසු රට ඇතුලට ඇදී ගිය රථය විශාල මාර්ගය දෙකට බෙදෙන තැනකින්  දකුණට  හැරවීය.
"ඒ පාර අගනුවරට නේද ? " එරික් ඇසුවේ ස්වේතා ගෙනි.
"ඔව්, මේ මගේ තුන්වෙනි ගමන. පලවෙනි දෙක යූරා එක්ක " ආඩම්බරයෙන් පිළිතුරු දුන්නේ ජාවෙඩ් ය.  මුහුද පසුවී පැයකින් පමණ රථය ගමන් කළේ රට තුලටය.  තාන්යා රථය යන මාර්ගය සිහියේ තබා ගන්නට වෑයම් කලාය.  රථය  ජනාකීර්ණ  පෙදෙසකය. ඉන්පසු එය අවතීර්ණ වූයේ කාන්තාර බද පෙදෙසකටය. රාත්‍රිය එළඹී තිබේ. තවත් පැය කිහිපයක ගමනකින් පසු රථය  නැවතත් නතර විය.  එය නතර වූයේ කිසියම් නගරයක් වැන්නක  ඉදිරිපසය. රාත්‍රිය නිසා කිසිවක් හරියට පෙනෙන්නේද නැත.

"නගරයකට  ඇතුලත් වන්නට මුර කපොලු  ඇත්තේ ඇයි, සමහර විට සෝවියට් දේශයේ තිබූ අජටාකාශගාමින් ජිවත් වූ  තාරකා නගරය වැන්නක් විය හැකිය " තාන්යා සිතුවාය.   එහි මුරට සිටි අය හමුදා ඇඳුම් වැනි යමක් හැඳ  සිටි බවක් ඇයට යන්තමට පෙනුනි. ඔවුන් මෙම රථය හඳුනන බව පෙනුණේ ඉකමනින්  ඇතුළට යාමට ඉඩ දුන් හෙයිනි.

  තවත් අඩ හෝරාවකටත් වඩා ගමන් කළ රථය  තවත් මුර කපොලු සහිත ගේට්ටු දෙකකින්  ගමන් කළේය. ඒ දෙතැනම ඔවුන්ගේ වාහනය නවතා සෝදිසි කලේ නැත. මදක් ඈතින් විදුලි පහන් දැල්වෙන විශාල ගොඩනැගිලි කිහිපයකින් වටවූ තැනක රථය  නැවතුණි. වෙලාව මධ්‍යම රාත්‍රිය වන්නට ඇතැයි තාන්යා ට සිතුනි.

වට පිට බැලීමට ඉඩක් නොතබාම ගොඩ නැගිල්ල තුලට ගෙනයන ලද යුවතියන් දෙදෙනා විදුලි සෝපානයකින් දෙවන තට්ටුවේ  ඇති කාමරයක රඳවා එරික් හා ස්වේතා ඉවතට ගියහ. ක්සේන්යා වහා පැමිණ තාන්යා වැළඳ ගත්තාය.

"මට දුකයි උඹ ගැන තාන්යා. ඇයි උඹ එහෙම පැනලා යන්න හිතුවේ . මුන් මහා නපුරු මිනිස්සු. අපට මොනවා වෙයිද දැන් "

"ක්සේන්යා උඹත්  දැනන් හිටියේ නැත්ද? මම හිතුව මම විතරයි නොදැන අහුවුනේ කියල."

"නැහැ, මට කිව්වේ මොදෙලිරවනියට එක්ක යනව කියලනේ "

"මට තේරෙන්නේ මුන් අපිව කාට  හරි විකුණලා තියෙන්නේ කියල. කොහොමද මුන්ගෙන් පැනලා යන්නේ කියල මම හිතන්නේ"

ඔවුන් සිටි කාමරය විශාල එකකි. එහි පැත්තක විශාල ඇඳක් හා නාන කාමරයක් තිබුණි. හිඳ ගැනීමට සුව පහසු සත්ව හමින් කළ විශාල පුටු කිහිපයක්ද  විය. ඇඳ ඉදිරියේ විශාල රූපවාහිනියකි. මුළු බිමටම  වර්ණවත් කාපට් අතුරා අලංකාර කර ඇති කාමරයේ වම් පැත්තේ ඇති විශාල දොරටුව හා බැල්කනිය  දුටු තාන්යා  එය විවෘත කිරීමට තැත් කළාය. දොර විවෘත  වුනේ බිත්තිය දිගේ පැත්තටය. එළියේ පුටු තුනක් හා මේසයක් තබා තිබුණි.  එලියේ උෂ්ණත්වය  දැඩි ලෙස මුහුණට වැදුණු තාන්යා  දොර වැසුවාය.

එරික් හා ස්වේතා පැමිණියේ උදයේ පැමිණි හමුදා කාරයා සමගය. කාමරයේ වම් පැත්තේ ඇති දොර විවෘත කර එරික් ක්සේන්යා එයට තල්ලු කළේය. තවත් කාමරයක් එහි ඇති බව ඔවුන් දුටුවේ එවිටය. කාමරයට තල්ලු වෙමින් ගිය තවමත් යන්තම් දහ අට වැනි වියේ සිටි  ක්සේන්යා  හඬන්නට ගත්තාය. එරික්  වැරෙන්  ඇගේ මුහුණට පහරක් ගැසුවේය.  අවස්ථාවෙන් ප්‍රයෝජනයට ගත් තාන්යා වහා පැත්තට ඇරෙන දොරෙන් බැල්කනියට පිවිසී  එහි තිබූ පුටු තුනෙන් එකක නැග බැල්කනියෙන් එළියට පැන්නාය . දෙවෙනි තට්ටුවේ නිසාත් ඇය කිසියම් කාලයක් පාසලේදී ජිම්නාස්ටික් උගත් නිසාත් පහලට වැටීමේදී පොළවට වදින කම්පනය මග හැරීමට හැකි වෙතැයි සිතුවාය.

"ඇය සිතුවා වැරදිය. තද සිමෙන්ති පොළොවේ දෙකකුල් තැබූ අවස්ථාවේ ම වම් කකුලේ දණහිස් අසල දැඩි වේදනාවක් සමග ඇය ඇද වැටුනාය. දෙඅතට වාරුවී නැගිටියත් ඇයට වැඩි දුරක් අස්ථියක් බිඳී ඇතැයි සිතෙන තරමට වේදනා දුන් කකුල සමග ඉදිරියට යෑම  අපහසු විය. මිනිසුන් කිහිප දෙනෙකුම පසු පසින් දිව එන හඬ ඇසිණි. එක වරම පිට හරහා පොල්ලක් වැනි යමකින් වැදුණු දැඩි පහරින් ඇය අද වැටුනාය. උස මහත පිරිමින් සතර දෙනෙකු ඇයව මරා දැමුණු ගෝනෙකු ලීයකට තබා බඳින්නට ඔසවන්නාක් මෙන් ඇගේ අත් දෙකින්  හා දෙපා වලින් ඉහළට එසවූහ. කකුල ඇද ඔසවද්දී දැනුනු අධික වේදනාවෙන් කෑ ගැසූ තාන්යා විසංඥ වූවාය.

කොපමණ වේලාවක් ගතවූවා දැයි තාන්යාට නිනව්වක්  නැත. ඇයට සිහි එන විට ආ ළඟ සිටියේ  නාඳුනන කාන්තාවකි. ඇගේ එක කකුලක් සම්පුර්ණයෙන්ම වෙළුම් පටි වලින් බැඳ තබා නැමිය නොහැකි වන ලෙස ඇඳ අසල  රඳවා තිබූ කරු සහිත රෝහල් වල සේලයින් දෙන කණුවක් වැන්නක එල්ලා තිබුණි. හෙදියක සේ ලෝගුවක් හැඳ සිටි   කාන්තාව වහා එලියට ගියාය. ස්වේතා හා එරික් පැමිණියේ බැන ගෙනය.
"උඹ නිසා පහුගිය පැය කීපයේ  උඹේ වැඩේ කරන්න  වුනේ මට. උන් ගෙවල තියෙන්නේ මේ සේර්විස් එකට අපට. මේක බිස්නස් එකක් කියල තී දන්නේ නැත්ද බ්ලයාත්. " ඇය තාන්යා ගේ කම්මුලට පහර කිහිපයක් ගැසුවාය.
"උඹව මරල වැලි ගොඩේ හංගල අපි යනවා දැන ගනින්. මේ  සති දෙකේ ඔහොම ඉඳල හරි සෙර්විස් එක කරලා වරෙන් ආපහු මොස්කව් යන්න ඕනෙනම්. හොඳ වෙලාවට උඹේ කකුල ඇඹරිලා විතරයි. කැඩිලා නැහැ. දවස් දෙකෙන් මේක අයින් කරයි. " කකුලේ වෙළුම්ද පෙන්වා   එරික් තර්ජනය කළේය.

වේදනා නාශක බෙහෙත් විද ඇති නිසා කිසියම් මත් ගතියකින් සිටි තාන්යා ට ඔවුන් කීදේ ද සේර්විස් යනු කුමක්ද හෝ වෙනත් කිසිවක් හරියාකාරව වැටහුනේද නැත. නමුත් ඇය සිටියේ තව දුරටත් විරෝධය පෑමෙන් පලක් නොවන බව පමණක් වටහා ගනිමිනි.

"අපි දැන් යනවා, අපි එන්නේ සති දෙකකින්. උන්ට කීකරුව හිටියේ නැත්නම් උඹ ගන්න අපි එන්නේ නැහැ " ඔවුන් නික්ම ගියහ.
 
හෙදිය නිකටට අත තබාගෙන තමන් දෙස බල සිටියේ අනුකම්පා සහගත දෑසින් බව තන්යාට පෙනුණි.  තාන්යා ඇයට රුසියානු භාෂාවෙන් කතා කළාය.
"මම කොහෙද ඉන්නේ? මෙතනින් යන්නේ කොහොමද?"
ගැහැණිය කතා කලේ කැඩුණු ඉංග්‍රීසියෙනි.
තාන්යා ට වැටහුණු ආකාරයට මේ ස්ථානයෙන් පිට යාමට නොහැකිය. සෑම තැනම මුරකාවල් තිබේ. ඇය නිදන්නේම  ගොඩ නැගිල්ලේ වෙනත් පැත්තකය.
ඔවුන්ගේ කතාව අසා තුවායක් පොරවා  ගත් ක්සේන්යා අල්ලපු කාමරයේ සිට පැමිණියාය. පැමිණි වහාම ඇය කළේ තාන්යා  ගේ ගෙල බදා ගැනීමය.

"උඹට පිස්සුද තාන්යා. පැනල යන්න  බැහැ. ගියොත් මුන් මරයි. උඹ පැන්නට පස්සේ එරික් මට පිස්තෝලයක් පෙන්නුවා. අර මිනිහ ගාවත් තියනවා. මම හිතුවේ උඹ මැරෙන්නම  පැන්න කියල. පස්සෙයි දැක්කේ මේ ගොඩනගිල්ලේ දෙවන තට්ටුව උස නැහැ කියල."

"මම ඉස්සෙල්ල දැක්ක ඒක. ඕන දෙයක් වෙන්න කියල පැන්නේ. කාගෙන් හරි උදව්වක් ඉල්ලන්න. මොකද වුනේ ඊට පස්සේ "

"උඹට සිහි නැති වුණාම කළු පාට හම තියෙන දොස්තර කෙනෙක් ඇවිත් බැලුව. උන් උඹව කොහෙද අරන් ගියා එක්ස්රේ  එකක්  ගන්න. ඊට පස්සේ බෙහෙතක් විදලා ගියා.  මට මේ පැය හතර පහට හය දෙනයි. අර බඩ ලොකු හමුදා කාරයා ඉස්සෙල්ලම. එරික් කාමරේ එලියට වෙලාම හිටියා. උඹේ වෙලාවටත්  එක්ක ගෙවන්න  වුනේ  මට " ක්සේන්යා කීවාය.

"මට සමාවෙයන් ක්සේන්යා. මට මෙතනින් පැනලා යන්නයි ඕන වුනේ". තාන්යා කිවේ දොම්නස් සහගත හඬකිනි.
"උන් ටිකක් වද දෙනවා. මේ. " ක්සේන්යා ඇගේ සිරුරේ තඩිස්සි වී ඇති තැන්  හා විකා ඇති තැන් පෙන්වූවාය. දෙදෙනාටම එකවර ඉකි ගැසිනි.
 හෙදිය සෙමෙන් සෙමෙන් ඔවුන් අසලට පිය මැන දෙදෙනාගේම හිස අත ගෑවාය.
.
 ක්සේන්යා ගේ කැඩුණු ඉංග්‍රීසියෙන් කළ කතා බහේදී ඇය පිලිපීන ජාතික හෙදියක බව ඔවුන් දැන  ගත්හ. මුලදී මුදලට එන ගැහැණුන් බව සිතා සිටියත් තාන්යා ගේ පැනීමෙන් පසු ඔවුන් බලහත්කාරයෙන් රඳවා සිටින බව වටහාගත් පිලිපීන  කාන්තාව කෙල්ලන් දෙදෙනාට අනුකම්පා කළාය. ඔවුන්ට නිදි පෙති සහ වේදනා  නාශක පෙතිද තේ සහ කෑමද සැපයූ ඇය නිදා ගැනීමට යන බව පවසා ඉවත්ව ගියේ හැකිනම් ඉක්මණින් නිදා ගන්න ලෙස අයැදීමක් ද කරමිනි.

ක්සේන්යා තාන්යා ගේ පොරවනයටම ඇතුළුවී එම ඇඳේ ම ඇලවුණාය.
දැඩි ලෙස මහන්සිවී සිටි යුවතියන් දෙදෙනා වෙත ඉක්මනින්ම පැමිණි සියලු දුක් දෝමනස්සයන් අමතක කරවන  නිදි දෙව්දුව ඔවුන්  වැළඳ ගත්තාය.

~~~~~මතු සම්බන්ධයි 

Tuesday, 5 February 2019

ප්‍රථම ප්‍රේමය ඔබ නොවේ (46) - ස්වේතා



ප්‍රියාන් මුහුණ දුන්නේ බරපතල ප්‍රශ්නයකටය. ගිහාන් ට විස්තරය පැවසීමට එක අතකින් ඔහුට නොහැකිය. ඒ ඔහුගේ මිත්‍රත්වය නිසාය. නමුත් ගිහාන් පිළිතුරක් බලාපොරොත්තුවෙන් සිටී. ඒ නිසා නොකියා බැරිය. නිලන්තට කතා කර විස්තරය කීමට සිතූ මුත් ගිහාන් ට කලින් නිලන්තට කීම නොමනාය. නිලන්ත පිළිබඳව ඔහු දනිතත් ඔවුන් අතර එතරම් දැඩි මිත්‍රකමක් නැත. ඔහු ගිහාන්ගේ අඹ යහළුවා මිස ප්‍රියාන් සමග දැඩි මිත්‍රත්වයක් නැත.  ශ්‍රී ලංකාවට ගිය විටෙක ඔහුගේ නිවසේ දුරකථන අංකය ලැබුනමුත් ඔහු එම නිවසින්  පිටවී ගොස්ය.

හදිසියේම විශාඛා ගේ පාසල් මිතුරියක් තමන්ගේ ද මිතුරියක් බව ඔහුට සිහිවිය. හදිසියක් යයි කියා ඇයට ඇමතූ  ඔහු විශාඛා හා නිලන්ත ගේ නිවසේ දුරකථන අංකය ලබා ගත්තේය.

නිලන්ත දිගින් දිගටම ප්‍රියාන් ගෙන යම් විස්තරයක් ලබා ගන්නට තැත් කළේය.

"මචන් මම ගිහාන්ට කතා කරනවා කිව්වේ හවස හයට විතර. උඹට බැරිද රෑ හතට අටට විතර එහෙ යන්න. වෙන විස්තරයක් කියන එක හරි නැහැ. පුලුවන්නම් පලයන් ඌ වෙනුවෙන්. "

"මචන් මම ගිහාට ඕන දෙයක් කරනවා. ඒත් උඹ අපට කිව්වනම් හරි. අපි ඌ කියල වෙනසක් නැහැ බං, ඌ මගේ එක කුස උපන්  සහෝදරයෙක්  වගේ . මොකක් කියලද මම යන්නේ "

"උඹල යාළුවොනේ හේතුවක් නැතිව යන්න බැරිද?"

"මම වටලප්පන් හදල දෙන්නම්. ගිහා පෙරේතයනේ ඒවාට. තෝසේ ටිකකුත් හදන්නම් අම්ම එක්ක. ඔයාට යන්න බැරිනම් කෑම ටිකක් හදාන  ආව කියල දෙන්නම යමු. අම්ම දරුව  බලා ගනීනේ. "
විශාඛා කීවාය. ඒ අදහසට ප්‍රියාන් ද, නිලන්තද එකඟ වුනි.

*************************************************
ගිහාන් ට ඇති මුදල් ප්‍රශ්න ගැනත් ඔහුගේ සොයුරියගේ විවාහය සංවිධානය කිරීම,  දෙදෙනාට එකට සිටින්නට තැනක් සොයා ගැනීම ආදිය ගිහාන් මුහුණ දෙන අනිකුත්  ප්‍රශ්න ගැනත් තාන්යාට අවබෝධයක් තිබුණි. ඇය දන්ත වෛද්‍යවරියක ලෙස උපාධිය අවසන් කළා වුවත් එක්වරම රැකියාවක් සොයා ගැනීමට ශ්‍රී ලංකාවේ ඉතා අසීරු බව ගිහාන් පවසා තිබුණි. ඒ තමන්  පිටරටක උපාධිය ලත් නිසාය.එසේම කසාද බැඳ වීසා ලබා ගන්නා තුරු රැකියා කිරීමටද නොහැකිය. ගිහාන් ඉංජිනේරුවකු  වුවද ඔහු දැනට ලබන වැටුප  සාපේක්ෂව ඉතා අඩු බවද ඇය දත්තාය. ඒ පඩිය ඩොලර් වලට පෙරලා ගණන් ගැනීමෙනි.

ඇය තමන්ට ලැබුන පත්වීමට රොස්ටොව් ගියේ නැත. සෝවියට් දේශය බිඳ වැටුණු පසු රුසියාවේ ඒ පත්වීම් හරියට සිදු කෙරුණේද නැත. හැමෝම සිටියේ වික්ෂිප්ත බවකිනි . හිටපු බලධාරීන් සහ බොහෝ කන්තක්ති හෙවත් "සම්බන්ධකම්" තිබූ අය හදිසියේ  "බිස්නස්" කාරයන් වී සිටියහ.  නගරවල තිබූ සුපර්මාකට්, ගබඩා ආදී දේපොළ කුණු කොල්ලෙට විකිණී ගියේය. ඒවා ගත් අය ඉතා අමුතු පෙනුමැති තමන් බිස්නස් මෑන් ලා යන අමුතු නමින් හඳුන්වා ගත් නවතම  ධනපතියන් ලෙස හැසුරුණු   කොටසක් විය. සම්ප්‍රදායික ධනපතියන්ට වඩා ඔවුන් දිස්වුනේ මංකොල්ලකරුවන් රැසක් පරිදිය.

අල්ලසක් නොදී කිසිදු දෙයක් කර ගැනීමට නොහැකි තත්වයක් උදාවුනි.
ගිහාන් ඉතිරි කර ඇය සන්තකයේ තබා ගිය  ඩොලර් කිහිපය අල්ලසක් ලෙස වියදම් කළ ඈ  මොස්කව් වල පොලික්ලිනිකා නමින් හඳුන්වන රෝහලක  පත්වීමක් ලබා ගත්තාය . ඒවායේ වැටුපද ලැබෙන්නේ පමා වෙලාය . ඒ වැටුපද ඉතා සොච්චමකි. ඒ දිනවල් රූබල් වලට කිවේ දිර්වෙයාන්නිකි කියාය. ඒ කියන්නේ ලී පතුරු යන අදහසිනි. ලී  පතුරු තරමට රූබල් වල වටිනාකමක් නැත.

තම සොයුරිය සමග තාවකාලිකව වාසයට ගිය තාන්යා මුදල් වියදම් කලේ ඉතා සකසුරුවමිනි. ගිහාන් ගේ යහළුවකු වූ ප්‍රියාන් මොස්කව් වල හිටි දවස් වල ශ්‍රී ලංකාවේ සිට රැගෙන ආ එම රටේ නිෂ්පාදිත  පියකරු කබා (ජැකට්) කිසියම් ප්‍රමාණයක් විකිණීමට දී තිබුණි. එය ලැබුනේ වැලන් නම් ප්‍රියාන් ගේම තවත් යහළුවෙකු හරහාය. ඇයට එවැනි දේ  නුහුරු වුවද යෙහෙළියන් කිහිප දෙනෙකුට දී ඒවා විකුණා  කිසියම් මුදලක් උපයා ගත්තාය.  දැන් ඔහුගේ ඒ යහළුවන් කිසිවෙකු මොස්කව් වල නැත. ඇයට දැනුනේ දැඩි අසරණ බවකි. ශ්‍රී ලංකාවට යෑමට ගුවන් ගමන් බලපත්‍රය ගැනීමට සමහරවිට ඒ මුදල සෑහෙන මුත් කිසියම් මුදල් ප්‍රමාණයක් අත නැතිව යාමට ඇය අකැමැති වූවාය . තම දෙමාපියන් ගිහාන්ට කැමති බවත් ඇය ශ්‍රී ලංකාවට යෑමට සූදානම් වීම  ගැන ඔවුන්ගේ විරුද්ධත්වයක් නැති බවට ඇති දැනීමත් ඇයට සහනයක් ගෙන දුනි.

නමුත් ගිහාන් ගෙන් ලිපියක්වත්  ආරංචියක් නැත. පසුගිය  කාලයේ දුන් දුරකථන ඇමතුම් වලින් විශාඛා සම්බන්ධ ප්‍රශ්න තිබූ බවත්,  ඔහුගේ නැගණිය සහ මවත්  විදේශීය ගැහැණියක සමග විවාහ වීම පිළිබඳව දරන  ආකල්පය  එතරම් ඔවුන්ගේ පැත්තට නොවන බවත්   ඇය දැන  සිටියාය.  එනිසා වෙනත් නිවසක මිස ගිහාන් ගේ නිවසේ  ජිවත් විය නොහැකිය. ගිහාන් අඩුම ගණනේ ඇයව එංගලන්තයට වත් රැගෙන ගියා නම්.......
 වැල්යුති හෙවත් හාඩ් කරන්සි හෙවත් පවුම් උපයා ගත හැක්කේ එහි රැකියාවක් කිරීමෙනි. ඇගේ සිතේ  මුල් වරට ගිහාන් කෙරෙහි කෝපයක්  උපන්නේය.  තවමත් ලංකාවට කතා කිරීමට ප්‍රධාන දුරකථන මධ්‍යස්ථානයකට යා යුතුය. ඒවා ඇත්තේ ගොර්කාව්ස්කයා වීදියේ  හෝ අර්බත්ස්කයා  වලය.  පසුගිය සති කිහිපයේම ඇය සැම  විටම නොවරදවා ගොස් දුරකතනයෙන් කතා කලත් ගිහාන් දුරකථනය ගත්තේ නැත.

ඔහු ලංකාවේ තරුණියක  සමග විවාහ වෙන්නට සිතා නිහඬ වෙනවා වත්ද? එසේ වීමට නොහැකිය. ඔහු තමන් ට දැඩි ලෙස ආදරය කළ බව පමණක්  ඇය දනී. එසේ සිතීම ගැන තමන් කෙරෙහිම කෝපයක් ඇගේ සිතේ නැගුණි.
හොඳම දේ මුදල් ටිකක් කෙසේ හෝ සොයාගෙන ශ්‍රී ලංකාවට යාම යයි ඇයට සිතුනි. ගිහාන් ගේ ලිපිනය ඇය සතුව තිබේ. දැන් රුසියානුවන් ට මුදල් තිබේ නම් වීසා ලබා ගත හැකිනම් ඕනෑම රටකට යා හැකිය.  ගිහාන් සොයා ශ්‍රී ලංකාවට යාම හැර වෙනත්  විසඳුමක් ගැන සිතීමට ඇය අපොහොසත් වූවාය.

 එකම කාමරයේ ඈ සමග සිටි යෙහෙළියක වන ඉන්ගා ඇයට ආරංචියක් දුනි. ඒ ස්වේතා ගැනය. ස්වේතා දැන් " ට්‍රාවල්  ඒජන්සි " යන ඉංග්‍රීසි නමින් හඳුන්වන කුඩා සමාගමක් පිහිටුවා විදේශිකයන්ට රුසියාව  පෙන්වීමට මෙන්ම රුසියානුන්ට පිටරට පෙන්වීමට ගෙනයන බව ඉන්ගා කීවාය. එවැනි දේ පෙර තිබුනේ නැත. ඇය රැකියාවට බොහෝ කතුන් බඳවා ගන්නා බවද නොයෙකුත් බටහිර පන්නයේ වෙළඳම් කරන   "බීස් නාස්  වුමන්" බවද තව දුරට පැවසූ ඉන්ගා තන්යාට දුරකථන නොම්මරය දුන්නාය. මේ     ට්‍රාවල්  ඒජන්සි යනු  විදේශ සංචාර සංවිධානය කරන සමාගමක් බව තාන්යා පසුව දැන ගත්තාය. "බීස් නාස්  වුමන්" යනු වෙළඳම් කරන කාන්තාවය.

ස්වේතා ඒ කාලේ  සිටියේ ඔවුන්ගේම කොරිඩෝරයේ ඈත කාමරයකය. රූමත් තරුණියක වූ ඇයට පිරිමි මිතුරන් බොහොමයක් විය. ඒ  අය අතර වෙළඳාම ට මෙන්ම කුඩා මාෆියා වැඩට ප්‍රසිද්ධ සෝවියට් සමුහාණ්ඩු වල  චෙචෙන්, අර්මේනියන් , ගෘසියන් මිතුරන්ද විය.   සෝවියට් කාලයේ ඇය නේවාසිකාගාරයේ නොයෙකුත් කාන්තා සුවඳ විලවුන්, ක්‍රීම්  වර්ග , ඩෙනිම් මෙන්ම කාන්තා යට ඇඳුම් ද විකුණා මුදල් සෙව්වාය . ඇය පැළඳුවේ බටහිර ඇඳුම් ආයිත්තන්ය. ස්වේතා ගෙන් තාන්යා ද ඇඳුමක් දෙකක් මිලදී ගෙන තිබේ. වචනේ පරිසමාප්ත අර්ථයෙන්ම ස්වේතා බීස් නාස් වුමන් ය.

අර්බත්ස්කයා පෙදෙසේම ඒජන්සිය  පිහිටා  තිබීම නිසා තැන සොයා ගැනීමට දැඩි අපහසුවක් වූයේ නැත.

තාන්යා දුටු  ස්වේතා තමන් සිටි වායු සමීකරණය කළ කාමරයෙන් පිටතට  පැමිණ තාන්යා වැළඳගෙන සිරිත් පරිදි මුහුණ දෙපැත්තට හාදු දෙකක් දී පිළි ගත්තාය.

තමන් පත්වී සිටි තත්වය සැකෙවින් විස්තර කළ තාන්යා ගිහාන් ගැන වැඩි විස්තර  නොකියා කිසියම් මුදලක් සොයා ගැනීමට කාන්තාවන්  භාවිතා කරන  භාණ්ඩ විකිණීමක් වැනි හවහක  සුළු වේලාවක් කළ හැකි රැකියාවක් තාවකාලිකව සොයා ගැනීමට උපකාර ඉල්ලා සිටියාය.
මහා හඬින් සිනහා සුනු ස්වේතා තමන් තව දුරටත් සුවඳ කුප්පි විකුණන ස්වේතා නොවන බව අවඥාවෙන් පැවසුවාය.  ඇගේ ඒජන්සියට යුරෝපීයයන් හා විශේෂයෙන් ඇමෙරිකානුවන් එන බවත් ඔවුන්ට මොස්කව් පෙන්වීම සඳහා යන්නේ නම් දිනකට ඩොලර් විසි පහක් පමණ දිය හැකි බවත්ය.  එසේ මුදල් ඉතිරි කිරීමට නම් මාස කිහිපයක් වත් රැකියාව කළ යුතු බව තාන්යාට සිතුණි. නමුත් තම වෛද්‍ය රැකියාවට යා යුතු නිසා එසේ කල නොහැකි බව ඈ  ස්වේතාට පැවසුවාය. ඇය මුදල් සොයන්නේ ශ්‍රී ලංකාවට යෑමට බවද පැහැදිලි කළාය.

තාන්යා දෙස හොඳින් බැලූ ස්වේතා මදක් නොසිතාම කළේ කිසියම් විධිහක අයුතු යෝජනාවකි.

"අවශ්‍ය නම් එම සංචාරකයන් ගෙන් සමහරු රැය පවා ගත කිරීමට කැමති විය හැකියි. ඩොලර් සීයක් දෙසීයක් නිකම්ම හෙව්ව හැකි. එහෙම කරන අය ඉන්නවා " ස්වේතා කීවේ ඇඟට පතට නොදැනීය.

" උඹ දන්නවනේ ස්වේත්ලානා  මම ලංකාවට යන්නේ පෙම්වතා හම්බවෙන්න. අපි එහෙදි බඳිනවා. එනිසා කීයටවත් එහෙම  සල්ලි හොයන්න මට ඕනේ නැහැ." තාන්යා දැඩි ලෙසින් පිළිතුරු දුන්නාය.
ස්වේතා හෝ ස්වෙතච්කා  යනු නම කෙටි කර ආදරයට කියනා ආකාරයයි. ස්වෙත්ලානා යනු  දීර්ඝ නාමයයි. වඩා නිත්‍යානුකුල බව හැඟවීමට හෝ යහළුවන් හෝ දෙමාපියන් අවවාදයක් දෙනවිට තදින් කියන බව ඇඟවීමට  රුසියානුන්  මුළු නමම  භාවිතා කරති.

ඒ අතරේ ටයි එකක් දමා වටිනා කබායක් හැඳි  කොණ්ඩය කළු ආර්මේනියානු හෝ ගෘසියානු ජාතිකයෙකුට  සම කළ හැකි මැදිවියේ මිනිසෙක්  පැමිණියේය.

"එරික් කොහොමද, ප්‍රීවියත්,  ප්‍රීවියත්  ? ස්වේතා ඔහුව උණුසුම් ලෙස පිළි ගත්තාය?

"මේ එරික් ඇවිතිස්යාන් , මේ තාන්යා. තාන්යා එරික් මට ගොඩක් බිස්නස් අරන් එන කෙනෙක්  " ස්වේතා එකිනෙකා  හඳුන්වා දුන්නාය. එරික් යටැසින් තාන්යා  දෙස බල හැඳ සිටි වටිනා අව් කන්නාඩි  යුගල ගැලෙව්වේය.

"තාන්යා රස්සාවක් හොයනවා. ඔයා අරන් එන සංචාරකයින්ට මොස්කව් පෙන්වන්න කියල කිව්ව මම . හැබැයි එයාට ඉක්මනට සල්ලි ඕනෙලු ලංකාවට යන්න."

"කවද්ද යන්නේ ශ්‍රී ලංකාවට " එරික් ඇසීය.

"ළඟදීම යන්න කියල ඉන්නේ සල්ලි ටිකක් මදි " තාන්යා පිළිතරු දුන්නාය.

එරික් ඈ දෙස දෙතුන් වරක් බැලුවේය. ඔහු බලන්නේ තමන්ගේ සිරුර දෙස බව වටහාගත් තාන්යා මහත් අපහසුතාවයකට  පත් වුවාය. රතුවූ මුහුණින් නැගිටි තාන්යා ස්වේතා ට සමුදී එතනින් ඉවතට යන්නට සුදානමින්ය.

"ඔයා මොඩලීරවනිය (මොඩෙලින් රුසියානු බසින්)   කරලා තියනවද " ඔහු වහා ඇසීය.
තාන්යා ට ඔහු ඇසූ දෙය තේරුනේ නැත.

"මේකි ඕව දන්නේ නැහැ එරික් ". මහා හඬින් සිනාසී කියූ ස්වේතා

"ඔහොම ඉඳ ගනින් " පසින් බලෙන්ම වාගේ  තාන්යා උරහිසින් තදින් අල්වා  වාඩි කර ඇයද ඒ අසල මේසයේ වාඩි වූයේ ඇගේ  දිග කකුලක් තාන්යා හිඳ  සිටි පුටුවේ ඇන්දට තබමිනි. ස්වේතා හැඳ සිටියේ ලෙවයිස් ඩෙනිම් සායකි . ඇය හිඳ  ගත්තේ රතු පාට යට ඇඳුමද මදක් පෙනෙනා ලෙසය. තාන්යා ජනේලයෙන් පිටත බැලුවාය.

"තාන්කා මේ අහපන්.  උඹට මුකුත් කරන්න දෙයක් නැහැ වැඩිය, අපි උඹට ඇඳුම් දෙනවා. උඹට  තියෙන්නේ ඒ ඇඳුම්  ඇඳගෙන ඒවා බලන්න එන මිනිස්සු ඉස්සරහ එහාට මෙහාට ඇවිදින්න. ඇත්තටම එරික් ට තේරුණා උඹේ ඇඟ හොඳයි කියල. අල ගිලින අපේ සමහර අනිත් කෙල්ලන්ට  වගේ උඹට තඩි කකුල් නැහැ. ඉස්සරහත්  ගානට තියනවා. පස්සත් ලස්සනයි. මොකද කියන්නේ. " ස්වේතා තාන්යා ගේ උරහිසට අතක් තබා ලෙන්ගතු ලෙසින් කීවාය.

"වෙන නරක වැඩ කරන්න නැහැනේ . රෑට මිනිස්සු එක්ක යන්න  හෙම නම් මට බැහැ . මම අහල තියනවා එහෙම ඒවා වෙනවා කියල. " තාන්යා ඇසුවේ අවිහිංසක ලෙසිනි.

"උඹ නම් මෝඩ ගෑණියෙක්. මෙහෙ දැන් සල්ලි තියන රුසියන් කොල්ලෝ ඕන තරම් ඉන්නවා. ඔය විදේශිකයෝ නැතුවට. මම උඹට එකෙක් හොයල දෙන්නම්. "

"මට එපා. උඹට ගොඩක් ස්තූතියි. මම  යනවා" තාන්යා නැගිටින්නට තැත් කළාය.

"මෙහෙ එක දවසක් මොඩලීරවනිය  කලොත් ඩොලර් සීයක් විතර දෙන්න පුළුවන්. හැබැයි ඩුබායි කියන මැද පෙරදිග රටේ එකක් තියනවා ළඟදීම. සති දෙකක කාලෙකට. එහේ  මොඩලීරවනිය කලොත් ඔයාට ඩොලර් දෙදාහක් දෙන්නම්. තව ගැහැණු ළමයි ගොඩක් යනව. ඔයා ඇත්තටම ලස්සන නිසා කියන්නේ. අපි ගිවිසුමක් අත්සන් කරලා ගෙනියන්නේ. හොර කරන්නේ නැහැ. ගමන් වියදම්, කෑම වියදම්,  හෝටල් වියදම් ඔක්කොම දෙනවා. අනික ඒ රටේ ඉඳල ලංකාව කියන රටට හුඟක් ළඟයි. පැය දෙකක්වත් නැත්ද කොහෙද? මෙහෙ එන්නේ නැතුවම එහෙට යන්නත් පුළුවන් ඔයාට " එරික් කීවේය.

ලංකාව යන නම ඇසුනු වහාම නැගිටමින් සිටි තාන්යා ට ඉබේම ඉන්දවිනි.

ස්වේතා තාන්යා ගේ වෙනස් වීම සැණෙකින් නිරීක්ෂණය කළාය.
"තාන්කා, මගේ කෙල්ලේ, උඹ නියම රුසියන් දියමන්තියක් නේ. උඹල වගේ උන් ඕනේ අපට. හැබැයි උඹ ටිකක් වැඩිමල්. අපට ඉන්න කෙල්ලෝ  උඹටත් වඩා හුඟක් ලාබාලයි. නමුත් මගේ නේවාසිකාගාරේම හිටි කෙල්ලනේ උඹ. මම උඹව එක්ක යන්නම්. මාත් යනවා. පාස්පෝර්ට් එක අරන් වරෙන් මම ඩුබායි වලටයි, ලංකාව කියන රටටයි  වීසා ගහල දෙන්නම්. "

"ඔයා පාස්පෝර්ට් එක අරන් එන්න. හෙටම. අපි ගිවිසුම් අත්සන් කරනවා ඉදිරි දින දෙක තුනේ. ඩොලර් පන්සීයක් අත්තිකාරම් දෙන්නම්. " එරික් ඉතා කරුණාවෙන් මෙන් කීය.

තම ලාච්චුව විවෘත කළ ස්වේතා ඉන් ඩොලර් සියයක් ගෙන තාන්යා අත තැබුවාය.

"උඹ දිරිවෙයාන්කා වගේ ඔය ගම්වල අඳින ගවුමක් නේ ඇඳන් ඉන්නේ. මේක අරගෙන හොඳ ඇඳුමක්  දෙකක් ගනින්. ඉතුරු ඒවා අපි දෙන්නම් " (දිරිවෙයාන්කා යනු ලී පතුරක් හෙවත් කිසිම කමකට නැති යන අර්ථය දෙන වදනකි)

ඔවුන්ගේ හදිසි කරුණාවට තාන්යා වශී වූවාය. හදිසියේම අවශ්‍ය කරන මුදල් සොයා ගැනීමටද ලංකාවට යාමටද මාර්ගයක් පෑදී තිබේ. ඇයට ස්වේතා ගේ දුරකථන අංකය දුන් ඉන්ගා ටද සිතින් ස්තූති කළාය.

තාන්යා ගේ වැඩිමහල් සොයුරිය ලේනා ට මේ චාරිකාව එතරම් සිතට ඇල්ලුවේ නැත. ඇය එයට දැඩි ලෙස විරුද්ධ වූවාය. තම නැගණිය නොදන්නා රටකට යාම අනතුරුදායක බවට ඇය තර්ක කළාය.

"ගිහාන් ට ඕනේ නම් ඌ එන්න ඕනේ මෙහෙ. මෝඩ කොල්ල. උඹ යන්නේ මොකටද? උඹ ආලයෙන් පිස්සු වැටිලා ඉන්න මෝඩ කෙල්ලක් " ලේනා කෑ ගෑවාය.

නමුත් ලේනා ගේ පෙම්වතා වලොද්යා මෙන්න  ඔවුන්ගේ පියා  වන ඇලෙක්සෙයි ද මව අක්සානා ද ගත්තේ තාන්යා ගේ පැත්තය.

" ඔන්නොහෙ රට රටවල් බලල ලංකාවට  ගිහින් ගිහාන් හමු වුන දෙන් . එක පාරට බඳින්න එපා. එහෙ ලංකාව බලල, ජිවත් වෙන්න පුලුවන්ද බලල  එන්න මෙහෙට ආපහු. ගිහාන්ට කියන්න මෙහෙදී  බඳින්න කියල. ඔයාට ස්වේතා විශ්වාසයි නේ ".

ස්වේතා අවිශ්වාස කිරීමට තාන්යා ට හේතුවක් නොතිබිණි. ඇය ගේ  සිත අරක් ගෙන   තිබුණේ සති දෙකකින් ලංකාවට යෑමට ලැබෙන අවස්ථාව  ගැනය.

මව ගේ අවසාන යෝජනාව සම්මත වුනි.

මොස්කව් ශේර්මිතෝවා ගුවන් තොටුපලේදී සොයුරියන් දෙදෙනාම බොහෝ වෙලා එකිනෙකා  වැළඳගෙන  කඳුලක් පිස ගත්තෝය. ඔවුන් දෙදෙනා මෙසේ වෙන්වී එක සොහොයුරියක්  වෙනම රටකට ගොස් නැත.

ගුවන් යානයේදී තාන්යා ගේ මුළු සිත පුරා වූයේ ගිහාන් ගැන සිතිවිලිය.

"සති දෙකයිනේ. ඊට පස්සේ ගිහානුෂ්කව   හම්බවෙනවා. එයා  ආසයි මම එයාව බදාගෙන   එයාගේ බෙල්ල ගාවට තොල තියා හොරෙන් වගේ හාදුවක් දෙන එකට". ඇයට නොදැනීම සිනාවක් මුවගේ  නැගුණි.

ඇගේ යාබද අසුනේ සිටි යන්තම් වයස  දහ අටක් වන ක්සේන්යා තාන්යා ගේ මුවෙහි නැගුණු  මදහස දැක සිනාවක් පෑවා ය. තාන්යා ජනේලයෙන් එළිය බැලුවාය . ගුවන් යානය මොස්කව් නුවරින්  ඉහල අහසට නැගෙයි.

කුමක්දෝ හේතුවක් නිසා ඇයට මොස්කව් නුවර කිහිප දිනකට  හෝ හැරයාම පිළිබඳව දැඩි ශෝකයක්  දැනුණි.

~~~~~~~මතු සම්බන්ධයි
-පින්තූරය අන්තර්ජාලයෙනි.