දෙවන ලිපිය : ෆුජි සන් කන්දට ගමනක්
ජපානය කියන්නේ අවුරුදු හැට පහට වැඩි ජනතාව 30% ක් ඉන්න රටක් . ජපන්නුන්ගේ ආයු කාලය අනිත් රටවලට වඩා වැඩියි . වැඩි පුරම අවුරුදු 100 පිරුණු වැඩිහිටියෝ ඉන්නෙත් ජපානේ. එතනිනුත් ඔකිනාවා පළාතේ මුළු ජපානයේ මධ්‍යම අගයට (ඇවරේජ්) වඩා වැඩියෙන් වයස සීය පැන්න අය ඉන්නේ . විද්‍යාඥයෝ හොයල බලන කොට ඔවුන් මුළු ජපානයේම අනිත් පැති වලට වඩා 10% අඩුවෙන් ලුණු කන්නේ . (මාලිමා ආණ්ඩුව විසින් මුදල් ගෙවා පළ කරන ලද දැන්වීමක් නොවන බව කරුණාවෙන් සලකන්න 😆) . ඒ එක හේතුවක් . ජපානේ ගත කල් දවස් වල මට දැනුන දෙයක් තමයි මම චීන කෑම කෑවහම වතුර බාල්දියක් වත් බොන්න ඕනේ . ලංකාවේ කෑම වලට බාල්දි බාගයක් වත් බොන්න ඕනේ . ජපානේ කෑම කෑවට ලොකු තිබහක් දැනෙන්නේ නැහැ . ලුණු සහ සීනි අඩුයි. ඔවුන් ගේ මේ දීර්ඝ කාලයක් ජිවත් වන එකට තව හේතු තියනව. මේ එක හේතුවක් විතරයි .
ෆුජි ගිනි කඳු බලල ඉන්පසු අපි ගියේ දහවල කෑම ගන්න ඔවකුඩනි නිම්නයේ තිබුන සෞන්සන් කියන උණුදිය උල්පත් වලින් ස්නානය කරන තැනකට . මෙතන නාල කෑම කාල එන්න පුළුවන් තැනක් . හැබැයි අපි නාන්න ගියේ නැහැ . ආපන ශාලාවේ අපට බුෆේ ක්‍රමයට කෑම ලැහැස්ති කර තිබුනත් අපි මෙනු එකෙන් තෝරා ගන්න තීරණය කලා. සපත්තු ගලවල තමයි ඇතුළට යන්න ඕනේ . ජපානේ යනවනම් හිල් තියෙන මේස් අරගෙන යන්න එපා ඔන්න . අපි ගිහින් බිම පහසුවට ඉඳ ගන්න පුළුවන් මේසයක් තෝරා ගත්ත . තේ වලට ජැස්මින් තේ සහ ග්‍රීන් ටී (කොළ තේ කියලද කියන්නේ ) තමා තිබුනේ .
උදේ බඩ පැලෙන්න කාල හිටි නිසා අපි ටෙම්පුරා සහ සෝබා නූඩ්ල් සුප් එකක් තමා තෝරා ගත්තේ . බොහොම සිම්පල් වගේ පෙනුනට කන්න බැරි තරම් නුඩ්ල්ස් ගොඩක් දෙනවා . ජපන් ටීවී කතා වල දැකල තමා ඒව ගත්තේ . ටෙම්පුරා එකට ලොකු ලැන්ගුස්ටින් (නොර්වේ ලොබ්ස්ටර් ) එකක් , බ්‍රොකොලි , මාළු කෑලි දෙකක් හෙම බැදලා දෙනවා . මිරිස් කුඩු තියනවා මේසේ ඕනේ නම් දාගන්න . ජපානයේ කෑම ඉදිරිපත් කරන විධිහ හරිම අලංකාරයි . කන් න හිතෙන විධිහට කෑම ඉදිරිපත් කරන එකත් කලාවක් . ඒ ඇති ඉතින් . තව මෙලන් ජූස් එකකුත් බීව. අපිට මේස් දාගෙන ඉන්න වෙන නිසා වැසිකිලි ගියොත් වෙනම පාවහන් තියල තියනවා පාවිච්චි කරන්න . මේ වගේ තැන්වල වැසිකිලි නම් ජපානයේ හුඟක්ම පිරිසිදුයි . ඒ ස්ථානය ඉදිරියේ තමා පින්තුරය ගත්තේ .
ඊට පස්සේ අපිව අරන් ගියා හැකොනේ රෝප්වේ හෙවත් කේබල් කාර් ස්ටේෂන් එකට . ගොන්ඩෝලා කියලත් කියනව . අපි මෙතනින් උඩට යනව සෝන් කියල ස්ටේෂන් එකකට . ඒ යන්නේ ඔය හැකොනේ ගිනි කන්ද උඩින්. කේබල් කාර් එකේ නැත්නම් ගොන්ඩෝල එකේ විස්සකට විතර ගිය හැකියි . උඩට යන මාර්ගය දෙපැත්තේ ගස් කෝලන් ඇත්තටම ටිකක් යුරෝපයේ වගේ. ගොන්ඩෝල එක පතුල විදුරු දාල තියන නිසා යට පේනවා .
මීදුම වගේ පින්තූර වල පේන්නේ ගිනි කන්දෙන් නැගෙන දුම . මේ පළාතම සල්ෆර් වායුවෙන් පිරිලා ඒ ගඳ එනවා . ඒ කියන්නේ කුණු බිත්තර ගඳ . කේබල් කාර් එක මාරු වෙන්නේ ඔකුවඩනි කියන ස්ටේෂන් එකෙන් . මේ වගේ පොලොව තුලින් දුමාරය එන අනිත් තැන් මම දැකලතියෙන්නේ අයිස්ලන්තයේ . (බ්ලොග් ලිපි බලන්න ) කන්ද උඩට ගියහම මේ දුමාරයෙන් උයපු නැත්නම් පුච්චපු කළු බිත්තර කන්න පුළුවන් . මේකේ යනකොට පුජියාමා නැතිනම් ෆුජි සං ගිනි කන්දන්ත් ලස්සනට පෙනෙනවා .
මේ මාර්ගයේ අපි හැකොනේ කන්ද සහ වාෂ්ප දුමාරය එන තැනුත් බලල පහලට ආවේ ආශි කියන වැවට . ඇත්තටම මේ වැව කල්දේරා එකක් නැතිනම් ගිනි කන්දක් පිපිරිම නිසා ඇතිවු ආවාටයක්. හරියට අර මම ග්‍රීසියේ සැන්ටෝරිනි දූපතේ දැක්ක වගේමයි . යුටියුබ් එකේ මම මේ ගමනත් දමල තියෙනවා . මේ වැව කනගාවා දිස්ත්‍රික්කයේ තිබෙන්නේ . ගිනි කන්ද පිපිරුනේ වර්ෂ 1170 දී . මේකේ වටේට උණුදිය උල්පත් තිබෙනවා . ර්යෝකන් කියන්නේ ඔය අපි කන්න ගිය තැන වගේ නෑමට , කෑම ගැනීමට අවශ්‍ය නම් නිදා ගැනීමටත් , සවුනා ආදිය තිබෙන තැනක් . මේවා ක්‍රිස්තු වර්ෂ 700 වගේ ඉඳන් පැවත එන බවයි කියන්නේ .
මේ වැවට හෙවත් කල්දෙරමට බහින්න තහනම් . මීටර් 15 ත් 45 ත් අතර ගැඹුරක් තිබෙනවා උනත් හේතුව ඒක නෙමේ . වතුර අංශක හැත්තෑවට වඩා හිටපු ගමන් රත් වෙන එක . අවුරුදු පන්සීයකට විතර කලින් සමුරායි වරයෙක් පිහිනන්න ගිහින් . එකපාරට ම වතුර රත් වෙලා . වැව මැද හරියක ඉඳන් පිහිනන් ආපහු එද්දී ඔහු පිළිස්සී මිය ගිහින් . රට පාලනය කල ශෝගුන් වරයා තහනම් කරලා තිබෙනවා වතුරට බහින්න . ඒක අදටත් ක්‍රියාත්මකයි .
ලස්සනට හදපු පයිරේට් නැව් දෙක තුනක් තියනවා වැව වටේ යන්න .
ඉන් පස්සේ අපි ආපු බස් එකෙන්ම ඔදවරා කියන දුම්රිය නැවතුම් පලට පැමිණියා . එතන ඉඳන් ජපන් බුලට් ට්‍රේන් එකෙන් ඔදවරා ඉඳන් ටෝක්යෝ වලට ජේ ආර් ටොකයිඩෝ ට්‍රෙන් එකක ආවේ. පැයට කිමී 250 ක පමණ වේගයෙන් යන නිසා විනාඩි හතළිහෙන් වගේ ටෝක්යෝ ආව. ( බස් එකට පැය දෙකහමාරක් ) . මේ ගමන් වාරයේදී දැක්කේ කොපමණ තට්ටු නිවාස ජපානයේ තිබෙනවද කියල . ඒ තරමට තට්ටු නිවාස දැක්කේ මිට කලින් සෝවියට් දේශයේදී . මේ ගෙවල් ලාභයි . ඒ වගේම පොඩියි . නමුත් ඉතා පිරිසිදුව හැම බිල්ඩිමක්ම , නිවසකම පවත්වාගෙන යන්නේ .
පින්තූර සියල්ල මම ගත්ත ඒවා . 
- අජිත් 29/06/2025
