පළමු ලිපිය : ජපන් ගමන් - ටෝකියාවේදී පළමු දවසෙන් දෙවෙනි දවසට
දෙවන ලිපිය : ෆුජි සන් කන්දට ගමනක්
හතරවන ලිපිය : ටෝකියෝවේ උසම කුලුන සහ මොඩෙල් ට්‍රේන් ෂොප්
පස්වන ලිපිය: ජපානයේ කෑම සහ ක්යෝටෝවේ කිරි අම්මා ගේ කෑම කඩේ
හත්වන ලිපිය : ක්යෝටෝ පන්සල් වන්දනාව - දහසක් බුදුන්ගේ ආරාමය , උණ ගස් වනය , සෙන් ආරාමය හා රත්රන් පන්සල හා ෂින්ටෝ පන්සල
මේකත් සිදුවුනේ ක්යෝටෝවේ ගත කළ අන්තිම දවසෙම තමයි ඒ කියන්නේ 2025 මැයි 23 . අර කෑම ගන්න යන්න කලින් ලැබුණු පැය කිහිපය . නාරා වල මුවන් හෙම බලල දුම්රියෙන් අපි ආපහු හෝටලයට ආව. මොකද ටුවර් බස් එක ගියා දවල් කෑම (බුෆේ ක්‍රමයට ) ගන්න සහ ජපන් හරිත තේ හදනවා පෙන්වන්න. අපි ඒ කෑල්ල හැලුව. බස් එක අපිව ක්යෝටෝ යන්න දුම්රිය ස්ථානයකට ගෙනත් ඇරලුවා. ඒ දුම්රිය ගමන යුටියුබ් එකට දැම්ම, බලන්න .
ක්යෝටෝ ආවහම ඉනෙස් කීව ඔයාව සප්‍රයිස් කරන්න යන්නේ කියල. මම හිතුව කෑම කන්න යනවා කියල . හැබැයි දැන් විනාඩි දහයක් පහලවක් ඇවිදිනවා, නගරය මැදින්, කොහේ යනවද කියල කියන්නෙත් නැහැ. මම දැක්ක දෙයක් තමයි නගරය සම්පුර්ණයෙන්ම වගේ හිස් කියල . මිනිස්සු වැඩ. පාරවල සෙනග නැහැ . ළමයි සෙල්ලම් කරනවා දැක්කා උද්‍යාන දෙකක තුනක . ඊට පස්සේ තවත් උද්‍යානයකට ආව. ඒකෙ යනකොට පොඩි පොඩි සංඥා දැක්ක . මේ පින්තුරේ එකක්. නිතර දුම්රිය යන දුම්රිය මාර්ග කිහිපයක් අයිනේ තමා උද්‍යානය තියෙන්නේ. මේකේ තැන තැන සිමෙන්ති හෝ යම් පාෂානයකින් හදපු පොඩි දුම්රිය එන්ජින් තියෙනවා මේස වල . මම ඇහුවා පරණ කෝච්චියක් පෙන්වන්නද යන්නේ කියල .
මෙතැන් ඉඳන් ස්ලයිඩ් ශෝ එක . වීඩියෝ කිහිපයක්ම යුටියුබ් එකට දැම්ම.
***************************************
මම එන්ජින් වර්ග වලට කැමැති ඒවායේ නිර්මාණශිලිත්වය සහ විවිධත්වය නිසා කියල මම හිතන්නේ. විනෝදාංශ වශයෙන් මම ගොඩක් දේවල් කළා. සංචාරයට යන විවිධ නගරවලින් රිදී හැඳි එකතු කළා කාලයක්. ඊට පස්සේ ෂොට් ග්ලාස් එකතු කළා. කාසි එකතු කළා. පරණ කාර් මොඩල් එකතු කළා . ළමයි දෙන්නා ප්‍රයිමරි කාලේ පාෂාණ වර්ග එකතු කලා එයාලට කියා දෙන්න. තාරකා විද්‍යා ඩිග්‍රිය කරන කොට ටෙලස්කෝප් එකක් ගත්ත. තරු බැලුව. ඕන වෙලාවක ආපහු යන්න පුළුවන් විනෝදාංශ වැඩ . හැබැයි මොඩෙල් ට්‍රේන් සෙට් එකක් හදන එක හිත අස්සේ හැංගිලා තිබ්බ. මොකද ඒවා ගණන් නිසා . ඒ වෙනුවට රේල් ජර්නි ඇති තරම් කළා . මාමණ්ඩිය ළඟ හොඳ ගණන් වැඩි ජර්මන් මොඩල් ට්‍රේන් සෙට් එකක් තියනවා . ඒක බිත්තිය උඩ ගහල තියෙන්නේ. තිබ්බට වැඩක් නෑ. ජපානේ මේවා සාපේක්ෂව ලාභයි අනිත් හැම රටකටම වැඩිය. ඉතින් ජපන් සෙට් එකක් තමා ගත්තේ . මේ දිනවල ඒකෙ වැඩ .
ස්ලයිඩ් වල දහතුන් වෙනි එකේ බලන්න දුම්රිය පෙට්ටියක් යටට ගිහින් බලන්න පුළුවන් විධිහට හදල තියනවා. සමහර පින්තූර වල ශින්කන්සෙන් බුලට් ට්‍රේන් එක විකාශනය වුන හැටි බලන්න පුළුවන් .
සමහර පින්තූර වල තියෙන්නේ පරණ රේල් එන්ජින් සහ මැදිරි, පරණ රේල්වේ සිස්ටම් වල යොදවපු සිග්නල් බොක්ස් රූම් එක, පරණ පරිගණක , පරණ ටිකට් මැෂින්, ඉලෙක්ට්‍රික් ටට්‍රේන් වල උඩ විදුලි රැහැනට සම්බන්ධ කරන පැන්ටෝග්‍රාප් එක . ඒකෙ වීඩියෝ දෙකක් ගත්ත යුටියුබ් එකට.
පින්තූර හුඟක් තියෙන නිසා තව ස්ලයිඩ් ෂෝ දෙකක් දාන්න වෙනවා. මේ දෙවෙනි එකේ ටිකට් මැෂින් වලට අමතරව ජපන් රේල් කම්පැනි වල නම් දාල තියනවා . ජපානේ තමා මම හරියටම දැක්කේ පුද්ගලික කම්පැනි අතර තරඟකාරීත්වය මහජනයාගේ (පාරිභෝගිකයාගේ) යහපතට හේතු වෙලා තියනව . මොකද එංගලන්තේ හිටපු අගමැතිනි මාග්‍රට් තැචර් ජලය, දුම්රිය, විදුලිය, ගෑස් ඔක්කොම පෞද්ගලිකරණය කළානේ. අපි වැඩිපුර ගෙව්වට වතුර අපතේ යනවා ඝන මීටර් මිලියන් ගණන් . ෆැට් කැට් ඩිරෙක්ට ලා ලාභ ගන්නවා, අපි ගෙවනවා . ගෑස් සහ විදුලියත් එහෙමයි සෑහෙන කාලයක ඉඳන් . දැන් ටිකක් තරඟය නිසා මිල වැඩිවෙනවා අඩු වුනත් යුද්ධේ නිසා ආයෙත් අවුල් . දුම්රිය සේවය තමයි කාලම දැම්මේ. දුම්රිය කම්පැනි ලාභ ගත්තට දුම්රිය අලුත් වැඩියා කළේ නැහැ. ට්‍රැක් පරණයි. යුරෝපිය සංචාරකයෝ හිනා වෙනවා දැක්කම. ටිකට් වල ගාන මුළු යුරෝපෙම වැඩිම . ඔහොම ඉඳල අන්තිමට කෝබින් හෙමත් ඒ කාලේ තර්ජනය කළා ආපහු ගන්නවා කියා බලයට ආවොත්. එතකොට බයට ආයෝජන කරන්න ගත්ත. දැන්නම් හොඳ අලුත් දුම්රිය එන්ජින් සහ රෝලින් ස්ටොක් තියනව. කෝබින් පැරදුනහම ආයෙත් පරණ ලෙවල් එකට ගියා ටිකක්. අගමැති කියර් ස්ටර්මර් ගේ කම්කරු රජය පහුගියදා සවුත් වෙස්ටන් රේල්වේ එක රජයට පවරා ගත්ත, නව ග්‍රේට් බ්‍රිටිෂ් රේල්වේ කියන රජය සතු සමාගමට.
ජපානේ එක එක ලයින් වෙන් වෙනම රේල් කම්පැනි අතරේ රන් වෙන්න . සමහර වෙලාවට තැනකට යන්න රේල් කම්පැනි දෙකක හෝ තුනක දුම්රිය තියනව . අපට වැරදුනා දෙතුන් පාරක් . නමුත් ඉතා හොඳ සේවයක් වැඩ කරන අය ලබා දෙන නිසා ප්‍රශ්නයක් වුනේ නැහැ , සමහර තැන් වල ටිකට් කවුළුවෙන් එලියට ඇවිත් ප්ලට්ෆොර්ම් එකට යන විධිහ කියල දෙනවා. එක්කෝ එක්කගෙනම යනවා . වෙන කම්පැනි එකකින් නම් ටිකට් ගන්න තියෙන්නේ ඒ විස්තරත් දෙනවා . තමන්ගේ කම්පැනි එක වෙනුවෙන් පුදුම කැපවීමකින් වැඩ කරනවා . මට එතන පෙනුනේ නැහැ බලෙන් වැඩ ගන්නවා කියල සමහරු කියනව වගේ. එසේම එක කම්පැනි අනිකට වඩා හොඳ වෙන්නේ ජරා වැඩ කරලා , යටි කුට්ටු වැඩ කරලා නෙමේ කියලයි මට පෙනුනේ . පාරිභෝගිකයාට හොඳට සලකල තමා එයාල දියුණු වෙන්න බලන්න . මේ මම දැකපු විධිහ.
මේ ස්ලයිඩ් වල තවත් දෙයක් තිබෙනවා . මේ මියුසියම් එකේ නොයෙක් වාෂ්ප එන්ජින් වල හරිම රෙප්ලිකා තනා තිබෙනවා . ගන්න පුළුවන් තරමක් පින්තූර ගත්ත . ඒවා සමහරක් මේ ස්ලයිඩ් එකේ බලන්න පුළුවන් .
***********************************************
එසේම මේ කෞතුකාගාරයේ තියනවා මොඩෙල් ට්‍රේන් නගර දෙකක් . එකක් ළමයින්ට වගේම වැඩිහිටියන්ටත් ක්‍රියාත්මක කරවන්න්පුළුවන් බුලට් ට්‍රෙන් එකක් සහ නගරාන්තර දුම්රියක් . පළමුවැනි එකේ වීඩියෝ එක මෙතන .
මෙතන වීඩියෝ දෙකක් අප්ලෝඩ් කරල තියෙන්නේ. දෙකම බලන්න .
මේ වීඩියෝ එකත් හුඟක් ලස්සනයි . මේ මොඩෙල් විලේජ් එක හෝ නගරයක දුම්රිය ධාවනය . ඒකෙ ප්ලෑන් එක තමයි මේ පින්තුරේ තිබෙන්නේ . මුළු වීඩියෝ එකම බැලුවොත් රාත්‍රියට පුංචි මොඩෙල් ට්‍රෙන් වල ලයිට් දාගෙන යනව බලන්න ලස්සනයි .
මේ තියෙන්නේ ඒ වීඩියෝ එක . මේක මිනිත්තු පහක් විතර යනවා .
ඊළඟට තියෙන වීඩියෝ දෙක ලෙහෙසියෙන් හම්බ වෙන්නේ නැති අවස්ථාවක් . වාෂ්ප එන්ජිමකට ගල් අඟුරු පුරවනවා බලන්න පුළුවන් එක වීඩියෝ එකකින් .
ඊළඟ වීඩියෝ එකේ පෙන්වන්නේ ඒ එන්ජිම ෂන්ටින් කරන හැටි සහ ගාල් කරන හැටි . මේක ඉතා දුර්ලභයි මට නම් . මම අන්තිම සැරේට එහෙම දැක්කේ පොල්ගහවෙල දී සහ බදුල්ලේදී හැත්තෑ ගණන් වල.
තව වීඩියෝ කිහිපයක්ම එතන අප්ලෝඩ් කළා . හැකිනම් බලන්න . මේ බ්ලොග් ලිපිය මෙපමණ පමා වුනේ ස්ලයිඩ් හදන්න සහ වීඩියෝ අප්ලෝඩ් කරන්න කාලය ගතවුණු නිසා .
හැබැයි ඉතින් දුම්රිය හා ඒ සම්බන්ධ දේ ගැන කැමති අය වඩා එන්ජෝයි කරයි ලිපිය.
ප . ලි : බසු මෙතඩ් එකට පින්තුර 4 ක් දාල ට්‍රයි එකක් දුන්න . ඒකට ප්‍රතිචාරයක් දෙන්න , හොඳ මොකක්ද කියල .
දැන් බලන්න ඕනේ ස්ලයිඩ් එක වෙනස් කලොත් HTML එක අප්ඩේට් කරන්න ඕනෙමද කියල .
කොළඹ ගමයා - 15/07/2025
