ක්යෝටෝ වේ අන්තිම දවස - නාරාවේ මුවන්

පළමු ලිපිය :    ජපන් ගමන් - ටෝකියාවේදී  පළමු දවසෙන් දෙවෙනි දවසට 

දෙවන ලිපිය :  ෆුජි සන් කන්දට ගමනක් 

තෙවන ලිපිය : හැකෝනේ ගිනි  කන්ද ගිනි කඳු ආවාටයෙන් හැදුනු ආශි වැව (කල්දේරාව) 

හතරවන ලිපිය :  ටෝකියෝවේ  උසම කුලුන සහ මොඩෙල් ට්‍රේන් ෂොප් 

පස්වන ලිපිය: ජපානයේ කෑම සහ ක්යෝටෝවේ  කිරි අම්මා ගේ   කෑම කඩේ

හයවන ලිපිය :ක්යෝටෝ පන්සල් වන්දනාව - කියෝමිසු - දේරා - පිරිසිදු ජලයේ ආරණ්‍යය 

හත්වන ලිපිය :  ක්යෝටෝ පන්සල් වන්දනාව - දහසක් බුදුන්ගේ ආරාමය , උණ ගස් වනය ,  සෙන් ආරාමය හා රත්රන් පන්සල හා ෂින්ටෝ පන්සල 

ක්යෝටෝ වල හිටපු අන්තිම දවස මැයි විසිහතර  .  ඒකට මේ ලිපිය නෙමේ වෙන ලිපියක් ලියන්නම වෙනවා .  මැයි විසි තුන දා උදේම අයෙත් අර පරණ  ටුවර් බස් එකටම නැග්ගා. මෙදාපාර  ගියේ නාරා කියන නගරයට .  මේක තියෙන්නේ කියෝටෝ සහ ඔසාකා අතර .   

මුලින්ම අපි ගියේ නාරා පාක් එක හරහා කසුග - ටයිශා  ශින්ටෝ සිද්ධස්ථානය බලන්න .  ඒ අතරේ තිබ්බ පොඩි ජලාශයක පින්තුර සහ ශින්ටෝ පන්සලේ බකට් එල්ල තියෙනව බැලුව හැකි මේ ස්ලයිඩ් ශෝ එකේ .  මේ ස්ලයිඩ් දැමීමේ අදහසේ සහ අවවාද මාලාවේ  පුර්ණ ගෞරවය හිමි වන්නේ ටොරොන්ටෝ හංදියේ දොරකඩ ගහේ තැන්පත් මූකලන් බස්සා මැතිසඳට .   (යොමුවද තිබේ ) 

මේ පන්සල නාරා වල වැදගත්ම පන්සලක් .  හදල තිබෙන්නේ ක්‍රි . ව 768 විතර .  ෆුජිවරා කියන නෝබල් පවුල ඉතා  බලවත් .  ඔවුන්ගේ පෞද්ගලික සිද්ධස්ථානයත් හැටියට මුලින්ම නිර්මාණය කරලා තිබෙන්නේ . මේ පන්සලේ තඹ  ලන්තෑරුම් හුඟක් එල්ලලා  තිබෙනවා පන්සලට පූජා කරපුව. ඒකත් ලස්සන දර්ශනයක් . අර ලෑලි කෑලි එල්ලල තියෙන්නේ ලංකාවේ බෝධි වල එල්ලනවා වගේ සුභ ප්‍රර්ථනා ලියල හෝ මිය ගිය ඥාතීන් සිහි පත් කිරීම් . 

 පන්සලේ ශින්ටෝ දෙවියන්ට පණිවිඩ ගෙනියන්නේ ගෝන්නු  සහ මුවන්.  ගෝනෙක් ගේ ප්‍රතිමාවක් තියෙන්නෙත්  ඒ නිසා .  මේ නිසා අපි ඊළඟට ගියේ නාරා වල මුවන් ගේ උද්‍යානය බලන්න .   ශින්ටෝ කසුග ටයිෂා පන්සල වැඳලා හැමෝම මෙතනට එන්නේ මුවන්ට කෑම දෙන්න. පොඩි විස්කෝතු වගයක් තියනවා යෙන් කිහිපයක් දීල ගන්න පුළුවන් . කන්න දෙන එකත්  හිනායන දර්ශනයක් තමා .  ගැහැණු කට්ටිය කෑම අරන් දුවනව, කීං කෑං  ගගා.  මුවෝ පස්සෙන් පන්නනවා.  කොච්චර කීවත්  අහන්නේ නැහැ එක තැන ඉඳන් කෑම විසි කරන්න කියල .  අපිත් එක්ක බස් එකේ ගිය දකුණු අප්‍රිකානු කාන්තාවක් තමා ඔය ඉන්නේ .  

හැබැයි ඉතින් සමහර අය මුවන්ට ආචාර කරලා කෑම දුන්න කිසි ප්‍රශ්නයක් නැතිව .  ඉස්සෙල්ලම මුවාට ඔලුව නවන්න ඕනේ ජපන්නු වගේ .  ඊට පස්සේ මුවත් ඔලුව නවනවා . ඉන්  පස්සේ විස්කෝතුව  පිටි පස්සේ හංග ගන්න ඕනේ .  එතකොට මුවා ආයෙත් ඔලුව නවනවා .  එතකොට දෙන්න ඕනේ කන්න . මගේ යුටියුබ්  එකේ බලන්න පුළුවන් .  කැමතිනම් සබ්ස්ක්‍රයිබ් කරන්න අළුත් ආකර්ශනිය දර්ශනීය වීඩියෝ සඳහා .  😀😁

අපි අවුරුදු දෙකකට කලින් ලංකාවට ගිය වෙලේ සංචාරකයෝ වගයක් ඉසුරුමුණි විහාරය ඇතුලේ  ෆොටෝ ගන්නවා .  බුදු පිළිමයට පිටුපස හරවල වගේ හිටියේ ,  බුදු පිළිමයත් එක්ක පින්තුරය ගන්න ඕනේ නිසා .   ටුවරිස්ට් ගයිඩ් අය්යාර්  කෙනෙක් එකපාරටම  හෙන  හයියෙන් කෑ ගහල  බනින්න ගත්ත. ඒ  සංචාරකයන්ට සහ ඒ අය එක්කරන් ආව ගයිඩ් ට .  රටේ නීතියට ගරු කරන්නේ නැහැ .  ආගමට ගරු කරන්නේ නැහැ කියල .  මම ඉනෙස් එක්ක ඒ ළඟම හිටි නිසා මටත් එක්ක   බනින්න ගත්තේ ඒ සංචාරකයෝ මගේ අය  කියල හිතා ගෙන .  අපි පොළොන්නරුවෙන් වෙනම  ටුවර් ගයිඩ් කෙනෙක් අරන් ගියේ .  එයා  කීව "නෑ මේ මහත්තයල මමත්  එක්ක ආවේ කියල" ඒ ගමන මෑන් අපි එක්ක එකතු වෙලා අර මිනිසුන්ට බනින්න ගත්ත.  අර සංචාරකයන් ගේ ගයිඩ් පස්සේ ඇවිත් එයාගේ සංචාරකයෝ අරන් ගියා. 

මම මේ ජපන් සංචාරයේදී දැක්කේ  එක  තැනකදී ඇරෙන්න (දහසක් බෝධිසත්ව පිළිම එකේ පින්තුරැ ගන්න  දෙන්නේ නැහැ ඒවා විනාශ වෙයි කියල ) සංචාරකයෝ තමන්ට  ඕන විධිහට පින්තුර ගන්නවා .  කොට කලිසම් ,  දිග කලිසම් ඕන එකක් ඇඳලා බොහොම නිදහසේ, ජැප්පෝ ඇවිත් කෑ ගහන්නේ නැහැ අපේ ආගමට නිගරු කරනවා කියල . මමත් බුදු පිලිමයට පිටුපස හරවල ගත්තේ පින්තූර. ස්ලයිඩ් එක බලන්නකෝ . 

ටොඩයි ජී පන්සල බෞද්ධ එකක් .  මේක තමා අන්තිම යුනෙස්කෝ සයිට් එක අපි බලන්න ගිය .  විශාල  ලෝකඩ බුද්ධ ප්‍රතිමා  වහන්සේ කෙනෙක්වැඩ සිටිනවා ශාලාවේ - බුද්ධා මහාවයිරෝචන, ජපන් භාෂාවෙන් දයිනිචි නියෝරයි.  මේ බුදු හාමුදුරුවෝ මුළු විශ්වයේම ප්‍රතිමුර්තිය හැටියට සලකනවා .   පන්සල් ගොඩනැගිල්ල අවුරුදු 1200 කට කලින් හදල තියෙන්නේ ලීයෙන්.  පන්සලේ වැදගත්කම, මේක  තමා  චීන බෞද්ධ නිකායක් වන Huayan school විසින් ගොඩ නංවන ලද ප්‍රථම ජපන් පන්සල.

 

මේ ඇවිල්ල බෞද්ධ රහතන් වහන්සේ කෙනෙක් ගේ ප්‍රතිමාවක් .  මෙයාව ඇල්ලුවොත්  ඇඟේ ලෙඩ සුව වෙනවලු. තමන්ගේ ඇඟේ ලෙඩ තියන  හරිය ,  ඒ කියන්නේ දණහිස නම් නම්  මෙයාගේ ඇඟේ ඒ අවශ්‍ය තැන- දණහිස අත ගාන්න ඕනේ .  අනේ ඉතින් උන් වහන්සේ ගේ කකුල් ,  පය හෙම හොඳට මැදිල දිලිහෙනව .  ඔලුව නම්  යන්තම් බේරිලා , මොකද ඉනිමගක් ඕනේ වෙන නිසා. මාරු වැඩේ කියන්නේ වැඩිපුරම බටහිර සංචාරකයෝ සහ ආසියානු සංචාරකයෝ රහතන්ව  අල්ලන්නේ .  

අපි එදා දවාලේ  කන්න ගිය තැන ගැන  ඒ වෙනුවට ලියනව  දන්නවනේ අපි සාමාන්‍ය  ජපන්නු කන තැන්  හොයාගෙන යන්නේ කියල .  ඇවිදින කොට හම්බ වුනා සුද්දෙක් ඉඳගෙන ඉන්නව ආපන ශාලාවක් ඉස්සරහ .  ඇහුවා මොකෝ මේ කියල . අරිනකන් ඉන්නවලු කන්න .  බලනකොට මෑන් ජර්මන් .  ඉතින් ඉනෙස් සට සට ගාලා ජර්මන් වලින් කතා කළා.   ජර්මන් කාරයත්  වෙළඳ වැඩකට ආව ගමන් මුළු මාසෙම කෑවේ එතැනින් ලු. මරු කෑම ලු . 

 

අපිත් ගියා ඇතුලට . කෑම වල විස්තර නම්  මතක නැහැ. පින්තුර තමා තියෙන්නේ .  ඉනෙස් කෑවේ රාමේන් එකක්. රහයි කීව.  මම ඔය බත් එකට මස් කෑලි දාල , ළුණු කොළ එහෙම  ඉහල තියෙන එක.  දැල්ලෝ බැදපුවත් ගත්ත සකේ දෙකක් එක්ක . මෙහෙ මේ ආපන ශාලා පොඩියි .  එතනම උයල දෙනවා .  කෑම රහයි .  ඉක්මන් .  අපි කාල එලියට එනකොට මිනිස්සු පෝලිමේ ඉන්නව ඇතුළට එන්න . 

ජපානේ වැඩි හරියක් ගෙවල් එංගලන්තෙටත් වඩා පොඩියි . ලංකාවේ දොස්තරල, මහාචාර්ය වරු ඇතුළු  ඇතුළු මධ්‍යයම  පන්තියට හරියන රටක් නෙමේ ඒ නිසා .  ඒ වගේම  පොඩි කාර් වැඩියි .  ඔය ලංකාවේ තියෙන වැගන් ආර් වගේ ඒවා .  

මේ කාරෙක පදින එකක් වෙන්න බැහැ.

මේක ඇවිල්ල රාස්සියෙකුගේ (witch )  කඩයක්. බලනකොට පිරිමි කෙනෙක් හිටියේ ගැහැණු වේෂයකින් .  එයා ඒ දවස් වල ගායකයෙක් ලු .  අමුතු චරිතයක් .  පරණ ලට්ට ලොට්ට ගොඩ ගහගෙන ඉන්නව .  මම මොනවද  කරන්නේ කියල අහල ,  එයාගේ වෙබ්සයිට් එක ලෝඩ් වෙන්නේ නැති එකට හේතුවක් කියන්න කීව.  මම හේතු ගොඩක් කීව . කියල ඇහුව අන්තිමට ඕක පබ්ලිෂ් කලාද කියල .  එහෙම දන්නේ නැහැලු .  පබ්ලිෂ් කරන්න ඇතිලු දුන්න එකා. එනම් ඉතින්   ඉස්සෙල්ල ඌට කෝල් එක්ක දෙන්න එපැයි ඉස්සෙල්ලම. අනේ මන්ද මේ ජැප්පෝ. 

   හොටෙල් එක ගාව බයිසිකල් ගාල . 

හොටෙල් එකේ මගේ කාමරෙන් එහා පැත්තේ දුම්රිය ස්ථානයක් .  මොනවාද ඉතින් කැමරාව අටවන් වීඩියෝ කරන එක තමා කලේ.  

ක්යෝටෝ සිට ෆුකුකුසා යන දුම්රිය මාර්ගය මගදී හම්බ වුනා . ඉතින් රේල් ගේට්ටුව ගාව මේ කෝච්චි පිස්සා ඒවා රෙකොර්ඩ් කළා .

ඒවා මෙන්න මෙතන .

  තව එක ඉතා වැදගත් ලිපියක් තියනවා කියෝටෝ ගැන. කියෝටෝවේ අන්තිම පැය කිහිපය .    ඒකෙන් පස්සේ ඔසාකා . 

එහෙනම් සුභ සැන්දෑවක් .  

කොළඹ ගමයා 04/07/2025