ක්යෝටෝ පන්සල් වන්දනාව - දහසක් බුදුන්ගේ ආරාමය , උණ ගස් වනය , සෙන් ආරාමය හා රත්රන් පන්සල හා ෂින්ටෝ පන්සල

                                                       

පළමු ලිපිය :    ජපන් ගමන් - ටෝකියාවේදී  පළමු දවසෙන් දෙවෙනි දවසට 

දෙවන ලිපිය :  ෆුජි සන් කන්දට ගමනක් 

තෙවන ලිපිය : හැකෝනේ ගිනි  කන්ද ගිනි කඳු ආවාටයෙන් හැදුනු ආශි වැව (කල්දේරාව) 

හතරවන ලිපිය :  ටෝකියෝවේ  උසම කුලුන සහ මොඩෙල් ට්‍රේන් ෂොප් 

පස්වන ලිපිය: ජපානයේ කෑම සහ ක්යෝටෝවේ  කිරි අම්මා ගේ   කෑම කඩේ

හයවන ලිපිය :ක්යෝටෝ පන්සල් වන්දනාව - කියෝමිසු - දේරා - පිරිසිදු ජලයේ ආරණ්‍යය 

අපි ක්යෝටෝ වල හිටියේ මැයි 22 ඉඳන් 25 වෙනකන් වගේ .  

කියෝමිසු - දේරා පන්සලෙන් පස්සේ ටුවර් බස් එක කෙලින්ම ගියේ සංජු - සන් - ගෙන් - දෝ කියන දැව වලින් නිමවපු තවත් පන්සලකට . පන්සල හදලතියෙන්නේ  1164 කැනොන් බෝධිසත්ව වෙනුවෙන් .  මේකේ විශේෂත්වය තමා  දහසක් හිටිවන පිළිම කොටස් 33 කට බෙදල ප්‍රදර්ශනය කරන එක .  බෝධිසත්වය වේෂ තිස් තුනක් අරගෙන මිනිසුන් බේරා ගන්න එන නිසාලු එහෙම තියෙන්නේ. මේ  පන්සල ගිනි අරගෙන ආයෙත් 1249 හදල .  දැන් පිළිම 1032 තිබෙනවා .    මේ  පිළිම හැම එකක්ම වගේ එකිනෙකට වෙනස් .  ඇත්තටම ඒක නිරීක්ෂණය කලේ ඉනෙස් .  එතන පින්තූර ගන්න තහනම් නිසා මේ සැමැරුම් පොතෙන්  ගත් එකක් දාල තියෙන්නේ . තවත් අපූරු දෙයක් තමයි ජාතක කතාවල ඉන්න චරිත වල ප්‍රතිමා .  ශක්‍ර දේවේන්ද්‍රයා ,  වරුණ දෙවියෝ (thunder god ), වාසු , මහා බ්‍රහ්මය ,  විරුධක ,  විරූපාක්ෂ (හතරවරම් සෙට් එක )  , කින්නර , ගරුඩ , සුර ඔක්කොම ඉන්නව .   ජපන්නු වගේම සමහර චීන ,  තායිවාන් සංචාරකයෝ ඒ පිළිම වලට වඳිනවා දැක්කා. ගුරුතුමෙක් ගැටවර වියේ  පාසැල් ළමුන්  එක්ක ඇවිත්  හිටිය .  එයාලත් විස්තර අහන ගමන් පෝලිමට වැන්ද . හරියට අපේ පාසැල් කාලේ වගේ .  

මේ පන්සලේ ගෙවත්ත හරිම පියකරුයි .  ඔය උඩ දාල තියෙන පින්තූරය. නියම ජපන් ගාඩ්න් එකක් හරියට අපි ඒ කාලේ පොත් පත්වල බැලුව වගේ .   පහල නම් හාමුදුරු සොහොන්කොත් වගයක් .  මෙතැන් සන්සුන් වගේම ගාම්භීර ගතියකුත් දැනෙනවා .   අපි පොඩි කාලේ ගංගාරාම පන්සලට යනකොට ඒත් මේ වගේ නිසසල තැනක් වගේ දැනුනේ  කොපමණ සෙනග හිටියත් .  දැන්නම් ඒ ගතිය ගිහින් ගොඩ ගහල තියෙන පුරා  වස්තු වලින් .  මේ පන්සලෙත් ඒ වගේම ප්‍රතිමා ගණනක් තිබ්බත් විශාල නිසා හා සුන්දර නිසා ද කොහෙද ඉතාමත් සන්සුන්, නිශ්චල  ගතියක් තියෙන්නේ . 

ඊට පස්සේ අපි ගියා බුෆේ ක්‍රමයට කෑම ගන්න .  එතනදී නම් ෆොටෝ ගැහුවේ නැහැ .  විනාඩි විසිපහකින් වගේ කන්න තිබ්බ නිසා .  කෑම නම් නියමයි ඉතින් .   සෑහෙන්න ලොකු චොයිස් එකක් තිබ්බ . කොරියන් විශිහ්ට බැදපු චිකන් .  ලංකාවේ වගේ බැදපු මාලුය් .  සුෂී එක එක ජාතියේ .   ජර්මන් චීස් කේක් තිබ්බ .  පොඩි පොඩි කෑලි. අර මොචා එක්ක .  එතැනදී බ්‍රිතාන්‍ය ඉන්දියානුවෙක් හම්බ වුනා, තමිල්නාඩු මූලයන් තියෙන.  බලන කොට එයා අපේ නගරයට (එන්ෆිල්ඩ් ) අල්ලපු නගරයේ බානට් වල .  එයත් නීතිය පිලිබඳ මෘදුකාංග හදන කම්පැනි  එකක ,  අපේ රයිවල් එකක්. කරන්නේ මගේ ටයිප් ජොබක්මයි. ඒකත් පුදුමයි .  

එතනින්  ගියේ  ඊටත් වඩා ලස්සන සෙන් බුදු දහමේ රින්සායි නිකායේ පන්සලකට ටෙන්රුයි ජි  අරශියාම වල .  පන්සල හදල තියෙන්නේ 1339.  මේක ඔය ජපානේ කඳුවැටි  පහේ සිස්ටම් එකට (five mountains and ten monasteries) අයිති යුනෙස්කෝ සයිට් එකක් . ඒ කලේ ආණ්ඩුවෙන් (Ashikaga shogunate) සහය දීපු පන්සල් නිසා ඒ නම වැටිලා තියෙන්නේ .  ඔය මම පින්තුරය දාල තියෙන්නේ ෆේස්බුක් එකේ ප්‍රොෆයිල් එකට .  ඒක තියෙන්නේ ලොකු උණ ගස් වනාන්තරයක් ඇතුලේ සගනෝ උණබම්බු වනය කියල කියන්නේ .   මට මතක් වුනේ අර චීන ෆිල්ම් එක - Crouching Tiger, Hidden Dragon: Bamboo Forest Final Fight.   මේ වනය තනිකරම ස්වභාවික එකක් .  

මේ පන්සලේඋඩ  වහලයි ඈත පෙනෙන කඳු වැටියේ මුදුනයි එක පේලියටතියෙන්නලු හදල තියෙන්නේ .  මට නම් ඒක හරියට ගන්න බැරිවුනා .    මේ ප්‍රදේශයම හරිම සුන්දරයි .  සෙනග අඩු වුනානම් තවත් ලස්සනයි . 

 ජපන් පවුල් කිමෝනා සහ සම්ප්‍රදායික ඇඳුම් ඇඳගෙන ඇවිත් විශාල ශාලාවේ වාඩිවෙලා ඉන්නව . බොහොම සාමාන්‍ය විධිහට  කතාබහ කරනවා  තේ බිබී .

ඉන්පසු  ගියේ ගෝල්ඩන් ටෙම්පල් එක බලන්න. මේකේ නම කින්කකු - ජි. එළියේ තියෙන පුංචි වැව නිසා හරිම ලස්සනට පේනවා .   වහලයේ මුදුනත් පලවන හා  දෙවන තට්ටුවට එනකන්  0.5   μm රන් පත් වලින් වහල තියෙන්නේ  .  හැබැයි ඒක නිසාම ඇතුළට යන්න දෙන්නේ නැහැ . මේකත් යුනෙස්කෝ සයිට් එකක් සෙන් බුද්ධාගමට අයිති. රදළ සයෝන්ජි ට අයත් වෙලා  තිබුනු මාලිගාව තුන්වන  අශිකාගා ශෝගන් යෝශිමිට්සු ගේ ඇස ගැටෙනවා. ඔහු සමුරායි සෙන්පතියෙක්. ඔහු අර ගන්නවා මාලිගයක් කරන්න . "කිතයමා" සංස්කෘතිය (චීනය සමග ඒකාබද්ධව) පටන් ගත්තේ මෙතනින්ලු .  ජනකතාවට කියන්නේ පහලම තුන්වන  කොටසේ රත්රන් නැත්තේ රදළයන් ට ඉඳගන්න දෙන තැන නිසාලු .  ශෝගන් රදලයන්ට කැමති නැහැ .  ඔවුන් සමච්චලයට ලක් කරන්නලු  එහෙම කලේ .  නමුත් එනිසාම රදලයන් අතින් මැරුම් කෑවලු.   

ශීත කාලයට පන්සල පෙනෙන හැටි : 

මේ ලිපිය අවසන් කරන්න ඕනේ නිසා ෂින්ටෝ ෆුන්ශිමි ඉනාරි සිද්ධස්ථානය ට  ගිය එකත් දානවා කියල හිතුව .  මොකද ක්යෝටෝ ගැන තව ලිපි දෙකක්ම තියනව ලියන්න .  ශින්ටෝ ආගමේ තියනව පන්සලට  ඇවිදින්න හදල ලස්සන පාරවල් .  ඒ දෙපැත්තේ ඉටිපන්දම් හෝ පහන් පත්තු කරන්න කණු තියෙනවා .  රාත්‍රියට හරිම ලස්සන ඇති .  ඊළඟට රතුපාටින් තමයි හැම පන්සලකම ගේට්ටු පාට කරලා තියෙන්නේ. රතුපාට ජීව ගුණය ට සහ නරක එළවන්න  . පන්සල ඇතුලේ විශේෂ පාරවල් තියෙනවා ලී ආරුක්කු ගහල . ටෝරි ගේට්ටු කියල කියන්නේ . ඒ පාරේ උඩට ගියහම ඉනාරි කන්දට ගිය හැකි .  ඉනාරි කියන්නේ  හාල් වලට අධිපති දෙවියන්ට.ඉතින් ඉතාම වැදගත් සිද්ධස්ථානයක්. මේකේ හුඟක් වෘකයන් ගේ සහ හිවලුන් ගේ ප්‍රතිමා තියෙනව .  දෙවියෝ පණිවිඩ එවන්නේ උන් අතේලු.  ටෝරි ගේට්ටු වලින් මතක් කරන්නේ මියගිය ඥාතීන් සහ ළඟම හිතවත්තු ,  ඔවුන් සිහි කරමින් ඒවා තුලින් යන්න ඕනේ .  මුදල් තිබෙනවා නම් දෙමාපියන් ඇතුළු මියගිය ඥාතීන් වෙනුවෙන් ගේට්ටුවක් එකතු කරන්න පුළුවන් . 

මුළු ක්යෝටෝ පලාතම ස්වභාවික සෞන්දර්යයෙන් අනූනයි. සංචාරකයෝ නම් වැඩියි .  මේ වගේ තැන්වලට යන්න ඕන සංචාරකයෝ අඩු දවස් වල ප්‍රදේශයේ නිසංසලත්වය උරාගෙන, වැව ගාව භාවන කරලා සිත නිවාගෙන ඇවිදින්න .  

තව එකක් මේ පන්සල් වලට ජපන් ජාතිකයෝ එන්නෙම සම්ප්‍රදායික ඇඳුම් ඇඳගෙන .  පිරිමි මොන්ට්සුකි සහ  යුකටා (පිරිමි  )  ඇඳුම .  ගැහැණු කිමෝනෝ සහ යුකටා. 

මම ඉතින් කොහේ ගියත් නංගිලා, අයියේ ෆොටෝ එකක් ගහල දෙන්න කියල ඉල්ලනවා. ජපානේ කියල වෙනසක් නැහැ .  එක උස හින්දද දන්නේ නැහැ .  ඔය ගේට්ටු අස්සෙන් යනකොට බර්ලින් ඉඳන් ආපු තුර්කි ගෑණු ලමේකුත් ෆෝන් එක දීලා කිව්වා පින්තූර අරන් දෙන්න කියල .  බිරින්දෑ කියනව "පොඩ්ඩක් එහාට යන්න බැහැනේ ෆොටෝ එකක් ගහන්න, මෙයා ගෑණු ලමයින්ගේ ෆොටෝ ගන්නවලු ".  එයාලා ගන්න කියනවට මම මොනවා කරන්නද ?  අහිංසක මම . 

 

ශින්කන්සෙන් බුලට් ට්‍රේන් , ටෝකියෝ සිට ක්යෝටෝ දක්වා යන මාර්ගයේ 

ලිව්වේ 23/06/2025 කොළඹ ගමයා වන මම විසිනි . 

.