Friday, 3 October 2014

අම්බපාලි (කතා) වස්තුව



අතීත කතාව:

 මම කථා කියන කෑල්ල ඕන කමින්ම අත ඇරලා ලිව්වේ. කාටත් මතකද මන්ද මේ කතා වස්තුව. අම්බපාලි කියන්නේ ඉතාමත් සුරූපි කාන්තාවක් කියල තමා තෙරී ගාථා වල තියෙන්නේ.
 ඉන්දියන් චිත්‍රපටියේ පින්තුරක් උඩ තිබෙන්නේ. මෙයාගේ ලස්සන විශාල මහනුවර විතරක් නොවේ අනික හැම ජනපදයකම , නියන් ගමකම අනිකුත් අහල පහල රටවල පවා පැතිරිලා රාජකුමාරයෝ, සිටුවරු, කැසිනෝ කාරයෝ, ආයුධ ජාවාරම් කාරයෝ ඔක්කොම එනවලු ලඟට. මෙයාට එච්චරට ඉල්ලුම. කොච්චර විතර විශාලා මහනුවරට කිර්තිය ගේනවද (බදු සල්ලිත් ඇතුළුව) කියනවනම් මෙයාව රජවාසල ඔෆිෂල් නගර ශෝභිනිය හෙවත් කොර්ටෙසන් කෙරුවලු. මේකේ තේරුම තමා එයා සුපිරි පන්තියේ අයට ගණිකාවක් ය කියන එක.

 බුදුහාමුදුරුවොත් ඔය අව්වස්සේ වඩිනවලු විශාලාවට. හාමුදුරුවරු හා දාහක් එක්ක. එක හාමුදුරු නමක් අම්බපාලි හිටිය මැදුර ඉස්සරහින් පිඩුසිඟා වැඩියලු. සිටු කුමාරයෝ රත්තරන් හෙම අල්ලලා වැඩ දාපු ෆෙරාරි වගේ අස්ස කරත්ත හෙම පාක් කරගෙන ඉන්නවලු තමන්ගේ වාරෙ එනකල් අම්බිව එක්කන් යන්න. හාමුදුරුවොත් රාජ පුරුෂයෝ පටි වන වන, ආයුධ එල්ල කරගෙන ඉන්න නිසා බයෙන් බයෙන් ඔලුව වත් උස්සන්නැතිව යනකොට අම්බපාලි දැක්කම ආස හිතිලා මේ හරිම සන්සුන් ගමනෙන් යන හාමුදුරුවන්ට කතා කරලු. හාමුදුරුවොත් බයෙන් වගේ ගිහින් කිවලු මම මෙතෙන්ට එන්න සුදුසු නැහැයි කියල. අම්බපාලිත් ඇරලා නෑ.
"මම තමයි ඔබට ආරාධනා කරන්නේ. හැමෝම මටයි ආරාධනා කරන්නේ. ඒත් හැමෝම මට සලකන්නේ මගේ රූපය නිසා විතරයි. ඔබ තමා මගේ ජීවිතේටම මම ආරාධනා කරපු එකේම කෙනා ඒ නිසා කරුණා කරලා එන්න" කියල කිව්වලු.
ඉතින් අම්බපාලී දන් දීල බණ ටිකකුත් අහල.

 ඔය අස්සේ හෙන ජංජාලයයි බුදු හාමුදුරුවෝ වැඩ ඉන්න අම්බපාලිගේ මහා අඹ වනයේ. හාමුදුරුවරු එහෙන් මෙහෙන් කංකුන් ගානවලු, කට්ටියකට ඉරිසියාව, කට්ටියකට අප්සෙට් වැඩේට. කොච්චර සල්ලි තිබ්බත් , කොච්චර හොඳ මැදුරක හිටියත් මේත් ගණිකාවක් නේ කියලා.

බුදු හාමුදුරුවන්ටත් කතාව ගියාලු. උන්වහන්සේ කීවලු අපි කලින්ම තීරණය කරන්න ඕනේ නැහැනේ ඒ භික්ෂුව වැරදි කියල. අපි ටිකක් බලමු කියල. මෙන්න ඉතින් භික්ෂුවත් ආවලු හවස් වෙලා බුදුහාමුදුරුවෝ බැහැදකින්න. බැහැදැකලා කීවලු අම්බපාලි තමන්ට වස් වසන්න වඩින්න කියල ආරාධනා කෙරුව කියල. බුදු හාමුදුරුවොත් ප්‍රශ්නයක් දෙකක් අහල අවසර දුන්නලු. දැන් අනිත් සමහර හාමුදුරුවරුන්ට වැඩේ අල්ලන්නේ නැහැ. හෙන විවේචනලු. අරකි ගැන දන්නේ නැත්ද? අපේ එකා ඉවරයි?බුදු හාමුදුරුවෝ මේ මොනවා කරනවද? වගේ සීරියස් ටෝක්.
 බුදු හාමුදුරුවෝ ඒවා අහල දේශනා කලාලු

"මහණෙනි, කලබල වෙන්න එපා. අපි මාස හතරක් ඉවසල බලමු නේද. කියල. "

 ඉතින් අර සමහර හාමුදුරුවරුන්ට නින්ද යන්නෙත් නැතිලු. මේක ගැනම කල්පනා කරනවා මිසක් හරියට භාවනා වත් කරන්නේ නැතිලු. කොහොම හරි මාස හතර අමාරුවෙන් ගෙවිලා ගියාලු. ඔන්න අර හාමුදුරුවෝ එනවලු අම්බපාලි එක්ක. හාමුදුරුවරු කට්ටියක් හිතුවලු ඔන්න බඳින්න අහන්න තමා එන්නේ කියල. සිවුර ඇරලා යන්න වගේ කටකතාවකුත් ගියාලු. අර හාමුදුරුවොත් සන්සුන්ව වැඩල එකත්පස්ව හිටියම අම්බපාලි බුදුහාමුදුරුවන්ට බිම දිග වෙලා වැඳලා කිව්වලු එයාටත් මහණ වෙන්න ඕනේ. මේ ඔක්කොම සල්ලි, මැදුර වල් මුකුත් එපා. කියල අඹ වනයත් පූජා කලාලු සංඝයාවහන්සේට ම.
අම්බපලියත් මහණවෙලා රහත් වුණා කියලත් තිබෙනවා ථේරී ගාථා වල.

 වර්තමාන කතාව:

 දැන් මේ වගේ රටවල්වල අම්බපලිලා දෙවර්ගයක් ඉන්නවා. කට්ටියක් හෙනට සල්ලි තියෙන මොඩෙල් ල කියල ජාතියක්. මොඩෙලින් කරන අයත් ඉන්නවා. නමුත් වැඩි හරියක් නම ගහගෙන අම්බපාලි වැඩේ තමා කරන්නේ. ඒගොල්ලෝ එක්ක යන්න අරාබි කුමාරවරු, කැසිනෝ කාරයෝ ලම්බෝගිනි , ෆෙරාරි වලින් තමා එන්නේ. මේ ලස්සන මොඩෙල්ස් ලට ලොකු පාටි වලටත් ආරාධනා ලැබෙනවා. අර ඉතාලියේ බෙලරුස්කොනි දැම්ම බංග බංග පාටිය වගේ ඒවා. හැබැයි හිටපු ගමන් පොලෝසියෙන් පැනල අල්ලනවා. ඒ නම් ඉතින් පොලිස් බදු ගෙවන්නේ නැති වුනහම හම්බ කරන සල්ලි වලට. මේක මේ විශේෂ බදු වර්ගයක් හරිද.

 ඔය අස්සේ පාරවල් ඉන්න කට්ටිය, ඒ වගේම පුංචි ගෙවල් වල පිම්පියෝ බලෙන් තියන් ඉන්න නැගෙනහිර යුරෝපයේ, අප්‍රිකාවේ සුන්දරියන්ව ඇල්ලුවාම නඩු දාල හිරේට දානවා . නැත්නම් පිටුවහල් කරනවා ආපහු ආපු රටවල් වලට. අර පැලානේ දුෂණ මර්දනේ ද මොකේද එකක කට්ටියත් ඒකම කරනවා තායි අම්බපාළිලට. ගහන්නේ එහෙම නැහැ. උසාවියට දැම්මා. රටින් යැව්වා. ආයි මාස හයකින් ආවම ආයිත් ඒකම තමා වෙන්නේ.

 හැබැයි ළමයින්ට කන්න දෙන්න සත පනහට වැඩ කරන, බස් නැවතුම් පලවල රස්තියාදු වෙන අම්බපාලිලත් ඉන්නවා. ඒගොල්ලන්ට සමහරවිට රස්සාව කරගෙන යන්න පගා දෙන්නත් වෙනවා ඇති, සල්ලි වලින් හරි වෙන විධිහකින් හරි . ඒකට එයාල හැම වෙලේම කැමති නැතුවත් ඇති. නමුත් එහෙම අම්බපාලිලට කවුරුහරි ගැහුවොත් ඒක ඉතින් අම්බපාලිලගේ වරදම නෙමේනේ. ගැහුව කෙනා රාජ පුරුෂයෙක්නම් එය හිතනවා ඇති ඉහල උදවියත් කරනවා නම් ඇයි තමන් කලාම මොකද වෙන්නේ කියල .

 ඔය අව්වස්සේ අම්බපලිව බේරන්න එන්නේ අවකාශනන්දේ උදුලාරතන වගේ අය තමා . කට්ටියක් එයාටත් බනිනවා නඩු යනවා කියල. හැබැයි එයා එහෙම එන්නේ තමන් බුදු වදන් හරියට පිලි පදින්නේ නැති නිසා කියල බනින කාටවත් හිතෙන්නේ නැහැ. තව සමහර හාමුදුරුවරු සමහර රියදුරු මහත්වරු සමග පෙළපාලි යනවලු අම්බපාලිලට විරුද්ධව රාජ පුරුෂයන්ට පක්ෂව. ඔය අතරේ ජය කුමාරිල වගේ අය , අම්බපලිලගේ අම්මලත් මොනව හරි හේතුවකට රාජ පුරුෂයෝ බන්ධනාගාරේ ඇතුලට දාගන්නවා. ජයකුමාරිලගේ දුවල හෙම කොහේ දුක් විඳිනවද දන්නෙත් නැහැ. අර බුදු හාමුදුරුවන්ගේ කාලේ අම්බපාලි රහත් වෙලා නිවන් දැක්කට, කේලම් කියපු , මාස හතරක් නොනිදා වාද කරපු හාමුදුරුවරු රහත් වුනු බවක් ජාතක පොතේ නැහැ. (බුදු හාමුදුරුවෝ ළග ඉඳල බණ ඇහුවත්.) පුනරුප්පත්තියට (පිලි ගන්නවනම්) අනුව ඒගොල්ලෝ කොහේ හරි ඉපදෙන්නත් ඕනෙනේ. .

 කොහෙද දන්නේ නැහැ නේද ඉපදුනේ?
 ලිව්වේ 2014 අප්‍රේල් 10

Saturday, 27 September 2014

කලහකාරී තේනුවර බැරලයක් සමග ලන්ඩනයේ

චන්ද්‍රගුප්ත තේනුවර මට හමුවුනේ මින් අවුරුදු 26- 27කට කලින් මොස්කව් වලදී.
සමහර දේශපාලනඥයෝ 'කලහකරුවා' කියනවලු තේනුවරට කලාකාරය කියල කියන්නේ නැතුව. මේක සඳහන්  කරලා තිබුනේ අපේ ප්‍රවිණ  මාධ්‍යවේදියෙක් වන ජයසිරි අලවත්ත  චන්ද්‍රගුප්ත තේනුවර එක්ක කරපු  සම්මුඛ සාකච්චාවක්  ගැන ලිවූ ලිපියක. ලිපියේ යොමුව  පහත තිබෙනවා.
ඉතින් මට අවුරුදු ගානකට කලින්  හමුවුන තේනු බොහොම නිහඬ සන්සුන්ව කතාකරන චිත්‍ර කලාව ඉගෙන ගන්න ආපු ශිෂ්‍යයෙක්. දැන් කතාව මේකයි. මම චන්දෙ ඉල්ලුව (අනුන්ගේ බලපෑම මිස මට ඕනවට නෙමේ.  )  සෝවියට් දේශයේ සමස්ත ශ්‍රී ලංකා ශිෂ්‍ය සංගම්වල මහා සභාවේ මහ  ලේකම් ධුරයට.  ඒ දවස්වල කොමියුනිස්ට් පක්ෂයේ ස්ටයිල් එකට ලේකම් ධුරය තමා  බලවත්. සභාපති තෝරා ගන්නේ මහා සභා රැස්වීම ගෙන යන්න විතරයි.  චන්දෙ ලැබෙන්නේ සෝවියට් දේශයේ  රාජ්‍ය විශ්ව විද්‍යාලයක් තිබෙන හැම නගරයකින්ම පැමිණෙන  නියෝජිත කණ්ඩායම් වලින්. මම යන්තම් දිනුව එක චන්දයකින්ද කොහෙද . මොකද අපේ ස්වාධින (ලංකාවේ එකට සම්බන්ධයක් නැත) කණ්ඩායමට මුලින් සහයෝගය දුන් තේනුවර ඇතුලත් කණ්ඩායම වෙනම චන්දෙ ඉල්ලා තෙවන ස්ථානයට පැමිණීම නිසා.
එතකොට තේනුවර සහෝදරයා හිටියේ ශ්‍රී ලංකා කොමියුනිස්ට් පක්ෂයට සම්බන්ධ කණ්ඩායමක් එක්ක. එතකොට මට දුන් චන්ද වලින් වැඩි  චන්ද ප්‍රමාණයක් අරන් ආවේ වෙනත් නගරයක ශිෂ්‍ය සංගමයේ ලේකම් වෙලා හිටි ඩිලන්ත විතානගේ මහතා. දිලන්ත හිටි නගරේ දෙමල මුස්ලිම් ශිෂ්‍යයන්  අතරත්  ජනප්‍රියයි. හැමෝටම උදව් කරගෙන හිටි කිසි ජාතිවාදයක් හෙම පෙන්නුවේ නැති ශිෂ්‍යයෙක් .
තේනුවරගේ චන්දය මට හම්බවුනේ නැහැ කියල මම දන්නවා. ඒ දවස්වල ආචාර්ය නලින් ද සිල්වාගේ 'සමාජවාදී පන්තිය' ගැන පලවෙන ලිපු දිවයිනේ කියවල, ඊට පස්සේ young spartacist league එකේ සහ  මහාචාර්ය සුචරිත ගම්ලත්ගේ කතා අහල සෝවියට් දේශය ගැන ඔලුව කුරුවල් කරගෙන් මම හිටපු නිසා අපි හිටියේ මතවාද  දෙකක. හිටියේ වෙනස් අදහස් දරාගෙන උනත් අපට බාධාවක් වුනේ නැහැ එකතු වෙලා කතා කරන්න, හොස්ටල් එකේ බතක් දා  ගන්න.

දැන් අවුරුදු විසි ගණනකට පස්සේ තත්වය වෙනස්. මම අපේ මිත්‍ර දිලන්තට පොඩි විවේචනයක් දාලා  පෞද්ගලික ඊමේලයක්  යැව්වට පස්සේ අපේ වැඩි කතා බහක් නැහැ. කොහොමත් තිබ්බෙත් නැහැ ලොකු කතා බහක්. මම හලාල් වලටත්,  ෂරිය නීතියටත් විරුද්ධ කෙනෙක්. ඒ විරුද්ධ හැමෝටම නිතිය එක හා සමානව තිබෙන්න ඕනය කියල හිතන නිසා හා මම අදේවවාදියෙක් නිසා.  හැබැයි මගේ ඒ  විරුද්ධකම හැම ආගමකටම තිබෙනවා. කිසිම ආගමකට කිසිම  අමුතු තත්වයක් කිසිම ආණ්ඩුවකින් දෙන්න ඕනේ නැහැ.  හැබැයි ඕනෑම  සුළු ජාතියකට තමන්ගේ ආගම අදහගෙන නිදහසේ සිටීමේ අයිතිය වලක්වන්න කවුරුහරි උත්සහ  කරනවානම් ඒක වැරදියි.

දැන් තේනුවර තමන්ගේ බැරල්වාදය , නව බැරල් වාදය , පශ්වාත් බැරල්වාදය පහු කරලා අලන්කාරකරණයට ඇවිත්.  මේ හැම අවධියක්ම යුද්ධයට හා පශ්චාත් යුද සමයට සම්බන්ධයි. අවසන් යුද්ධයට ගොඩක් කලින්, ජනාධිපති චන්ද්‍රිකා ගේ කාලේ   මට හමුවුණු දෙමල ක්‍රියාකාරීන්ට මම කිව්වේ , චන්ද්‍රික තරමක් ලිබරල්. එයා එක්ක එකට වැඩ කරලා අවබෝධයකට එන්න . devolution එකක් අරගෙන ආයුධ  අත  හරින්න.  ලංකාවේ ආණ්ඩුවට ඕනනම් ඕගොල්ලන්ට ගහල මට්ටු කරන්න පුළුවන්. ඒ ගොල්ල ඒක  දෙපාරක්ම කරලා පෙන්නලා තිබෙනවා කියල. ලොකු විනාශයක් වෙන්නේ එතකොට. ඒ හුඟක් අය  මේක අවඥාවෙන් බැහැර කලා. තමන්ගේ බලය ගැන පුදුම අධි තක්සේරුවකුත් ඇමෙරිකාව , බ්‍රිතාන්‍යය ගැන පුදුම විශ්වාසයකුත් ඔවුන්ට තිබුන. ඔවුන් කිව්වේ එහෙම  කියන්නේ මම ජාතිවාදියෙක් නිසා කියල. මට නිකම්ම ජාතිවාදී ලේබලය වැදුන ඇත්ත කතා කරන්න ගිහිල්ල. දැන් මින් සමහර අය මට කතා  කරන්නේ නැහැ. ඕකම වුණා 87දීත්. මට කිව්වේ සුළු ධනේෂ්වර කියල ඇත්ත කියන්න ගිහිල්ල.

තේනුවරට තමන්ගේ චිත්‍ර ප්‍රදර්ශන වල මාතෘකාව ගන්න වෙලා තිබෙන්න මිලිටරිය හැම වෙලාම දිනපු රටක. හැබැයි ඒ හැම දිනීමකම අනිත් පැත්තේ අන්තවාදය ලොකු උදව්වක් වුණා. අන්තවාදය නැතුව හැමෝම ජනතාව ගැන විශ්වාසය තැබුවානම් මේක වෙන්නෙ  නැහැ.

දැන් මට හිතෙන්නේ මම ඉන්නේ මැදක. මගේ පරණ මිත්‍ර දිලන්ත විතානගේ එක අන්තයක සහ තේනුවර සහෝදරයා තව අන්තයක කියල. නමුත් තේනුටත් මටත් තවම ඒ සොඳුරු සංවාදයේ යෙදෙන්න පුළුවන්. පසුගියදා බොහෝ කාලයකට පසු හමුවුණු වෙලාවේ, රාත්‍රී ආහාරය අරගෙන අපි එලියට බැස්සා මොස්කව් වල වගේ සුපුරුදු  විධිහට පොඩ්ඩක් ඇවිදින්න. ලන්ඩනයේ තරු පිරි අහසක් යට  අප දෙදෙනා කතා කලේ ඒ පිළිබඳව. බොහෝ දේවල් ගලා  ගිහින් තිබෙන්නේ පාලම යටින් අපි නොදැනුවත්වම.
හරියට "දොන් නදිය නිසලව ගලා බසි කියන පොතේ" ශෝලහව් කිව්වා වගේ.

මම තේනුවරට කිව්වේ , මම ඒ දවස්වල වගේම සමහරවිට ඔයාගේ දේශපාලන අදහස්වලට එකඟ නොවෙන්න පුළුවන්. නමුත්  තර්ජනයක් නැතුව,  ඔබේ අදහස ඉදිරිපත් කරන්නට ඔබට ඇති අයිතිය පිළිබඳව මම පෙනී හිටිනවා.

අපි අගෝර මණ්ඩපයේදී   තේනුවරගේ කථාව  අහන්න රැස් වෙනවා අද. (මෙය පවත්වා  අවසානයි.)


 ජයසිරි අලවත්ත මහතාගේ ලිපිය:
http://www.mirrorgirl.lk/art-gallery/art-space/1266-barralism-beautification

Friday, 26 September 2014

වරුණ එජාපෙන්??

ගිය අවුරුද්දේ ජනවාරි මාසයේ එක්තරා සීතල දවසක බ්ලොග් ලිපියක් ලිව්වා
අධිරාජ්‍ය විරෝධී සටන් පාඨය තවමත්  වලංගුද කියල අහල?
ඒකට මේ ලින්ක් එකෙන් යන්න.
 http://kolambagamaya.blogspot.co.uk/2013/01/blog-post.html

එතකොට මේ කතාව කලේ වරුණ දීප්ත රාජපක්ෂ. තවමත් උණු උණුවේ ජවිපෙන් ආපු  ගමන්.  දීල ඇරිය අධිරාජ්‍ය වලට. මට නම් ගියේ හිනාවක් විතරයි. මන් ඉතින් ඒත් ඇහුව ඕක ඔය පට්ට ගහපු, පට්ට ගහන කතාවක් නේ. ඕක  මේ එංගලන්තේ අධිරාජයක අවුලක් නැතිව ජිවත් වෙන අපට කිව්වට චන්ද ලැබෙනවද? මොකද ඕක ලංකාවට  හරියන කතාවක්නේ.
දැන් එතකොට ඔය ආරංචිය හරිනම් අර මන් මගේ ලිපිය කිව්වා වගේ අධිරාජ්‍ය විරෝධී කතා කියන්න අවශ්යතාවයක්  නැතුවම එජාපයට එකතු වෙන්න පුළුවන් කිසි බයක් නැතුව. තව දුරටත් අධිරාජ්‍යවාදී බිල්ල පෙන්නලා  මිනිස්සු රවට්ටන්න ඕනෙත් නැහැ..

මන් මේ කියන්නේ අධිරාජ්‍යවාදය කියන එක  නැහැයි කියල නෙමේ හරිද. හැබැයි ඕක ක්‍රියාත්මක වෙන්නේ ඔය චන්ද ගන්න ලංකාවෙ ඉන්න  කට්ටිය වේදිකා දෙදරන්න කෑ ගහල  කියන ආකාරෙන්  නම් නෙමේ.
මේකට තව වචන නාස්ති කරලා වැඩක් නැහැ.
වරුණට අපේ සුභ පැතුම්.



ප්.ලි. : මෙන්න මේ කොමෙන්ට්   කියල හිතුන නිසා මෙතන දානවා, ඇනෝ  කෙනෙකුගේ.
//වරුණ තමන්ගේ තරුණ කාලෙන්, වර්තමාන කාලෙන් විශාල කොටසක් මේ රටේ දුක්විදින මිනිසුන් වෙනුවෙන්, රටේ යහපත් අනාගතයක් වෙනුවෙන් කැපකළ කෙනෙක්. එනිසා මුලින්ම වරුණට මගේ ආචාරය. වරුණලගේ කුලකයේ අය කල කැප කිරීම් සැප කැමති මම වගේ ආත්මාර්ථකාමී ශරීර කූඩු හිමියන්ට ඇත්තෙන්ම පරිකල්පනය කරන්න බැරි සංසිද්දියක්. එනිසා බොහොම ලාබෙට අපිට වරුණ 'රයිට් ටර්න්' එකක් ගත්තා වගේ කතාවක් කියන්න පුළුවන්. එත් ඇත්ත කතාව එකද ? 

මට හිතෙන විදියට විමල්ල, ලාල් කන්තලා (බාගදා )හා අන්තිමේ වරුණ වැනි දීප්තිමත් යහපත් මිනිසුන්ට දක්ෂිණාංශික මඩ ගොහොරු වල නතර වෙන්න බල කරලා තියෙන්නේ 100% දුෂිත, ආත්මාර්ථකාමී වෙච්ච 'මහජනයා' කියන අපි අපිමයි. මේ රටේ 'මහජනයා' බොහොම පැහැදිලිව මේ මිනිස්සුන්ට කියල දීල තියෙනවා 'මහජනයා' කියන්නේ මොනවගේ සත්තු ජාතියක්ද කියන එක සහ වරුණල කරන්න ගිය දේශපාලනයට මේ රටේ ඉඩක් නැති බව. 'මහජනයා' ගේ කැමැත්ත ඕනනම් දයාසිරි, හරීන් වගේ දේශපාලන පුයර බබාලා වෙන්න ඕන කියන එකත් 'මහජනයා' අපිට කියලදිල තියෙනවා .

එනිසා මටත් කියන්න තියෙන්නේ වරුණට අපේ සුභ පැතුම් කියාලා තමයි.
//
මම කියන්නේ  වරුණ තම ජිවීතේ කැප කලේ දුක් විඳින මිනිසුන් වෙනුවෙන් නම් ඔහොම තීරණයක් ගත්ත නම් ඒ කියන්නේ දැන් මහා ජනය අප්සෙට් නිසා සැප විඳින්න ඕනේ කියන එකනේ. අපි නම් රස්සාවක් කරගෙන සැප විදීනවා. එක සැපක්ද කියන එක ප්‍රශ්නයක්.  ඔය කියන කතාවම නේ තව කෙනෙක් කිවේ මම සිගිරිය වත් බලල නැහැ කයල. කිවේ. ඉතින් දේශපාලනේ නොකර ඉන්නකෝ. මේ රටේ මහා ජනයට වාමාංශික දේශපාලනය එපා වෙලා තියෙන්නේ මොකද කියල තේරෙනවද?
මහජනතාව  කාටවත් කියල  නැහැනේ අනේ අපි වෙනුවෙන් දේශපාලනය කරන්න. අනේ අපිට විප්ලවය කර දෙන්න? අනේ අපි වෙනුවෙන් මැරෙන්න කියල? කොයි "මහා ජනයාද" එහෙම කියල තිබෙන්නේ?  ඔය පක්ෂවල ඉන්න ෆුල් ටයිමර්ස් ල සමහර අය අමාරුවෙන් දරු පවුලුත් ඉඳගෙන දුක් විඳගෙන කරනවා? හැබැයි විශ්ව විද්‍යාලේ ඉගෙන ගන්න එක අත  හැරලා ෆුල් ටයිම් කරලා ඊට පස්සේ අනේ අපොයි මන් කර ගත්ත දෙයක් කියල කියනවා? නිර්ධන පන්තියට දේශපාලනය අරන් යන්න  ඕනෙය කියන පදනම අතර පක්ෂයක් කරන දෙයක් ඕක. කවුරුත් බලෙන් කාටවත් කරන්න කියල කියපු දෙයක් නෙමයි.  තමන්ගෙයි choice එක. ඒක තේරුම් ගන්නේ නැත්නම් ඔය දේශපාලනය  කරන්න එපා. ඔතනින් යන්න. මිනිසුන්ට බනින්න එපා. 
මටත් iphone 5s එකක් තිබෙනවා.  සෝවියට් දේශයේ මිනිසුන්ට ධනවාදී ලෝකයේ තිබිච්ච සමහර බඩු  තිබ්බේ නැති එක ප්‍රශ්නයක් වෙලා තිබුන. ඒ මිනිස්සු රහත් වෙලා නැහැනේ. 
මිනිසුන්ට රහත් වෙන්න කියනවා නම් ඒකට බුද්ධාගම තිබෙනවා. ඔයාලව අවශ්‍ය  නැහැ. 

Monday, 22 September 2014

පෝලන්ත ප්‍රාතිහාර්යය, අයර්ලන්ත ප්‍රශ්නය හා සුන්දර්ජයා ගේ මැජික් ඉකොනොමිය

පෝලන්තයේ ප්‍රාතිහාර්යය ගැන නොයෙකුත් පුවත්පත් වල යනවා ලිපි. පෝලන්තය තමයි දැනට යුරෝපයේ ඉහලම ආර්ථික වර්ධනයක් තියෙන්නේ කියල හැම තැනම කියවෙනවා. සිංහල බ්ලොග් අවකාශයෙත් එහෙම ලිපියක් ගියා  මේ අවුරුද්දේ මුල මේ ලිපිය ලියන්න හිතුනේ පසු ගියදා රුසියානුවන් ඇපැල් සහ අනිකුත් පලතුරු තහනම් කලහම.  මම දැන් රුසියාව සමාජවාදී කියන්නෙවත් ඒ ගොල්ල විතරයි හරි කියල කියන්නවත් නෙමේ මේ හදන්නේ. මුලදී පෝලන්තය හිනා වුනත් රුසියානු ක්‍රියාවට, දැන් ඔවුන්ට දැනිල. ඇපල් විතරක් නෙමේ අනිත් ආහාර ගන්නෙත් නැහැ රුසියාව. වෙළෙඳ යුද්ධයක් මේ යන්නේ. පෝලන්තය පවුම් මිලියන් 670 (යුරෝ වලින් මිලියන් 840) නිෂ්පාදන වසරකට යවනවා රුසියාවට. ඇපල් විතරක් නෙමේ අනිත් බඩුත් ගණන්  අඩුවෙලා තොග වෙළඳ  පොලේ. පෝලන්තයේ අදායමට කෙල වෙන්න පටන් අරන්.. ඊයේ පෙරේද යුරෝපය රුසියාවට සම්බාධක දැමීමට එරෙහිව ඩච් (ඕලන්ද)  ගොවින් තක්කාලි වලින් හේග් නුවර ගහ ගත්ත. ප්‍රංශයේ ගොවිනුත් ඊයේ පෙරේද ඒකම  කළා.
(ස්ට්‍රොබරී එකතු කරන පෝලන්ත යුවතියන්) 

අර කලින් ලිපිය දාපු කෙනාගේ බ්ලොගයේ මම මෙහෙම පැහැදිලි කිරීමක් කලා. පෝලන්තයට හරි යන්නේ ආයෝජකයන් එන නිසා හා ණය ලැබෙන නිසා කියල . එහෙම  ලැබෙන්නේ ඇයි?

අපි හිතමු දැන් අපිට බැංකු ණය දෙන්නේ කොහොමද කියල? දැන් අපට රැකියාවක් නැත්නම් හරි , ස්වයං රැකියාවක් කරනවා නමුත් බැංකුවකට සල්ලි දාන්නේ නැත්නම් හරි අපට බෑන්ක් ස්ටේට්මන්ට් එකක් (මාසයේ ආදායම් වියදම්  විස්තරය) ලැබෙන්නෙත් නැහැ. බැංකුවට අපි හම්බ කරනවා දැන  ගන්න විධිහක් නැහැ. නමුත් තම පඩිය හරි වෙන ගානක් හරි හැම මාසෙම බැංකුවට දානවා නම්, ඉඩමක් හෝ අයිති ගෙයක් තියෙනවනම් (බැංකුව ඒ බව දන්නවනම්) ඔබට ක්‍රෙඩිට් කාඩ් එකක් වගේම ණයකුත් ගත හැකි. දැන් අපට නිතරම වගේ ණය ඉල්ලන්න කිය , කිසි දෙයක් අහන්නේ නැතුව පැය භාගෙන් අච්චර දෙන්නම මෙච්චර දෙන්නම් කියල පණිවුඩ ඊමේල් එවනවා  ක්‍රෙඩිට් කාඩ් ආයතන හා බැංකු වලින්. හේතුව අපට මාසික ආදායමක් තියෙනවා. ඒ නිසා පොලිය ගත හැකි. පොලිය දුන්නැත්නම් අපේ ගෙදර හරි ඉඩම හරි ඒ ගොල්ලට අයත් කර ගන්න පුළුවන්.  මේ ආයතන කර ගෙන යන්නේ අපේ පොලියෙන්. හැබැයි අපට ණය අරගෙන ගේ හොඳට හදල, කාරයක් අරගෙන , තව ණය අරගෙන වෙන ගෙයක් හදල නිවාඩුවට යන්න , තව ණය අරගෙන ගෙට එන පාර තාර  දාල හොඳට හදල,  තව ණය අරගෙන පිහිනුම් තටාකයක් හදල අපේ ජිවන තත්වය උසස් කර ගත්ත හැකි. හැබැයි ගොයියෝ පොලිය ගෙවන්න ඕනේ. රස්සාව නැතිවුනොත් ගස් තමයි.

දැන් ගමු පෝලන්තය.
පෝලන්තයේ  මුළු ජනගහනය මිලියන්  38 වගේ වෙන්නේ. ඉන් මිලියන් 1.3 ජිවත් වෙන්නේ බ්‍රිතාන්‍යයේ. (බලන්න ref 1.). මිලියන් 1.5 විතර ඉන්නේ ජර්මනියේ. (බලන්න ref 2.)
මේ යුරෝපයේ අනිත් රටවල හා ඇමෙරිකා  එක්සත් ජනපදයේ ඉන්න අය හැරුනම. බහුතරයක් මේ පෝලන්ත  ජාතිකයෝ වැඩ කරලා සල්ලි යවනවා පෝලන්තයට. මිට අමතරව ඔවුන් මුලින් තම පවුලම අරන් ඇවිත් පදිංචි වෙනවා වසරකට විතර. ඉන්පසු ළමයින්ට හා වැඩ නොකරන බිරිඳට හෝ මාපියන්ට සුභසාධක ආධාර (Child benefit and other benefits) ලබා ගෙන නැවත ඔවුන්ව මවු රටට යවනවා. එතකොට EU නිතිය අනුව එංගලන්තය , ජර්මනිය හෝ අනිත් රටවල් ඒවා ගෙවන්න ඕනේ.  මෙලෙස අති විශාල ප්‍රමාණයක මුදලක් පෝලන්තයට  යනවා.
අනිත් අදායම් මාර්ගය තමා  පෝලන්තය විසින් රුසියාවට හා අනිකුත් නැගෙන හිර යුරෝපයේ රටවලට යවන පලතුරු, පාන් වර්ග, ඌරු මස්  හා අනිකුත් ආහාර වර්ග. මේ නිසා ප්‍රබල ආදායම් මාර්ග දෙකක් තිබෙනවා පෝලන්තයට. මේ නිසා ණය ලබාදෙන ආයතන වැඩියි. (ලෝක බැංකුව, IMF වැනි) . එතකොට ණය මිලදී ගන්න ආයෝජකයොත් වැඩියි. නය මුදල් ආයෝජනය කරන අයත් වැඩියි. ඒ නිසා අලුත් ගෙවල්, ගොඩනැගිලි හැදෙනවත් එම  නිසා රැකියා මැවෙනවත් වැඩියි.  එමනිසා පෝලන්තයේ ආර්ථිකය වැඩි දියුණු විම  හෙවත් GDP (gross domestic product) එකෙත් වැඩි වීමක් පෙන්නුම් කරනවා.

දැන් බැරි වෙලාවත් රුසියාවේ සම්බාධක මුළු අවුරුද්ද පුරාමත් හා ඊළඟ  අවුරුද්දටත් ගියොත් අර ණය සර්විස් කරන්න හෙවත් , පොලී ගෙවන්න  තියෙන මුදල අඩු වෙනවා.  එතකොට බැංකු ණය දීම නැවතීමත්, ආයෝජකයන් ණය මිලට ගැනීමත් නවතීවි. ආර්ථිකය කඩා වැටෙන්න පුලුවන් . නැත්නම් තව මිනිස්සු ටිකක්  වැඩ කරන්න අනිත් රටවලට යයි. ඇමෙරිකාව මොනවා කිව්වත් පෝලන්තය අන්තිමට රුසියාවට විරුද්ධව යන්නේ නැතිවෙයි. එහෙම නැත්නම් දැන් ඊයේ පෙරේද කලා  වගේ අමෙරිකාවෙන් සල්ලි ඉල්ලයි. ඒත් නැති සල්ලි ඇමෙරිකාව කොහෙන් දෙන්නද?
ඇමෙරිකාවේ ණය බොන්ඩ් (bond) වශයෙන් විකුනනවා වගේම අනිත් රටවලුත් එය කරනවා. ලංකාවත් කරනවා. නමුත් bric (බ්‍රසීලය  චීනය, ඉන්දියාව ) රටවල් පුටින් ගේ ප්‍රධානත්වයෙන් ඩොලර් වලින් ගනු දෙනු නොකර තම මුදල් වලින් ගනු දෙනු කිරීම ඇරඹුවා. දැන් දැන් ණය විකිනිමත් ප්‍රශ්නයක් වෙලා. ගොඩක් බැංකු ණය ගන්න මුදල් දෙන්නේ තමන්ට ප්‍රමාණවත් රත්රන් සංචිතයක් නැතුව. දැනට ලෝකයේ වැඩිම රත්රන් සංචිත තියෙන්නේ රුසියාවට, චීනයට හා ස්විට්සර්ලන්තයට.

දැන් අයර්ලන්තය ගමු. පෝලන්තය වගේම කතෝලික රටක් වුනත් අයර්ලන්තේ මිනිස්සු වැඩිපුර ඉන්නෙ  ඇමෙරිකාවේ. ඔවුන් අයර්ලන්තයට මුදල් යවන්නේ නැහැ. අයර්ලන්තයට ස්ථිර ආදායම් හැටියට  එන්නේ යකඩ සුලු  වශයෙන් අපනයනය කිරීමෙන් හා සර්විස් ආර්ථිකයකින්. ඒ කියන්නේ වෙනත් රටවල් සඳහා සේවා සැපයීමෙන්. පහුගිය කාලේ අනිත් රටවල් වල ඇති වුන ප්‍රශ්න නිසා මේ සේවා බිඳ වැටුන. යුරෝපා සංගමය අයර්ලන්තයට ණය දී තිබුන. ඔවුන්ගේ දල ජාතික අදායම (GDP ) එක හුගක් හොඳයි. (පහුගිය හොඳ කාලේ යුරෝ 35000 වගේ වසරකට ) නමුත් රට වැටුන පහුගිය අවුරුදු පහ ඇතුලත. ගත්  ණයවල පොලිය ගෙවන්න අදායම මදි වුනා .  හදාගත්ත ගෙවල් විකුණා ගන්න බැරිවුනා. මෙන්න ප්‍රතිපලය.
http://www.theguardian.com/world/2014/feb/23/ireland-predicted-26000-empty-properties-end-2014

දැන් ආපහු  ණය  දීල අයර්ලන්තය බේරා ගන්න (bail out ) කරන්න හදන්නේ. ජර්මනිය තම ටිකක් හරි ගොඩ ඉන්නේ. නමුත් රුසියන් බාධක දාල  තමන්ටම  කෙලෙවගෙන ඉන්නේ ටිකක්.  ඒ නිසා යුද්ධ දෙක තුනක් කරලා යුධ ආයුධ  ටිකක් විකුණලා ඇමෙරිකාව ගොඩ යනකන්  ටිකක් ඉන්න වෙයි වගේ.

දැන් ටිකක්  කල්පනා කරලා බලන්න ලංකාව ගැන.  චීනය ඉන්දියාව විතරක් නෙමේ ලෝක බැංකුව , IMF වගේ ඕන ණය දෙන රටවල් සහ ආයතන ශ්‍රී ලංකාවට ණය දෙනවා.  ක්‍රෙඩිට් කාඩ් කොම්පැනි වගේ මේ සමහර ණයවල පොලිය වැඩියි.
නමුත් ලංකාව කියන සුවිශේෂී රටේ ඉතා ඉහල ශ්‍රමිකයන් (මෙහිදී පුහුණු /නුපුහුණු දෙගොල්ලම)  ප්‍රමාණයක් අරාබියේ, කොරියාවේන යුරෝපයේ, ඇමෙරිකාවේ රටවල වැඩ කරලා මුදල් යවනවා . පෝලන්ත වරු වගේමයි.  නිමි ඇඳුම් පිට රට යවනවා.
ඊළඟට තේ විශාල ප්‍රමාණයකුත් ,  රබර් හා පොල් සුළු ප්‍රමාණයකුත් රට යවනවා. ලස්සන , පෞරාණික රටක් නිසා සංචාරකයෝ එනවා. රටේ හමුදා UN එකේ සාම  හමුදා වලට ගියාම ඒවටත් ඩොලර් වලින් ගෙවනවා. මැණික් පිරට යවනවා. අයර්ලන්තේ වගේ නෙමෙයි මාර අදායමක් තියෙන රටක්. හැබැයි තවම දළ ජාතික ආදායම අයර්ලන්තේ වගේ 16 ගුණයක් අඩුය. (ඩොලර් 2800, යුරෝ 2100 පමණ ). මේ ආදායමත්  අයර්ලන්තයේ වගේ බොහොමයකට නොමේ. තෝරාගත් කට්ටියකටය.

මේ ලංකාව කියන රට සම්පත් අතින් පොහොසත්. මිනිස් සම්පත අතිනුත් එහෙමයි. ඒ නිසා හැමෝම බය නැහැ  ණය දෙන්න.  මේ ණය අරගෙන ඕන දෙයක් හදන්න පුළුවන්. රටේ අදායම දියුණු කරන්න පුලුවන් . රට ලස්සනට ගොඩ නගන්න පුළුවන්.
හැබැයි අර පොලිය කලට වෙලාවට ගෙවන්න ඕනේ. සුන්දර්ජයාලට කරන්න තියෙන්නේ වෙලාවට පොලිය ගෙවල, හරියට අපි ක්‍රෙඩිට් කාඩ්  , බැංකු ණය default වෙන්න නොදී ගෙවනවා වගේ වැඩේ කරගෙන යන්න.  ඉතින් ඕක මහා ලොකු දෙයක් නම් නෙමේ ඔය උඩ  දාන තරමට.
හැබැයි අපේ ළමයි අහන්නැතුව හොරෙන් වියදම් කරලා , පඩියට වැඩිය පොලිය වැඩි වුනොත් , ගේත් උකස් වෙලා පාරට වැටෙනවා. (එහෙම වැටිච්ච මිනිස්සු ඕන තරම්  යුරෝපයේ ඉන්නවා)

ඉතින් ණය අරගෙන ඒවාට කර්මාන්ත හදල, තව අපනයන වැඩි කරලා මුකුත් කරන්නේ නැතුව වියදම් කර කර හිටියොත් , hummer ,

පොර්ශේ (porsche )  අර ගෙන සොමිය ගත්තොත්, සමහරවිට අර ලැබෙන අදායමට වඩා  පොලිය වැඩි වෙන්න පුළුවන්. ණය default කරන්න වුනොත් , ණය සල්ලි වලට ගන්න ඉන්න  ආයෝජකයෝ මාරු වෙනවා. සුන්දර්ජයාලට වුනත් කරගන්න දෙයක් නැතුව යනවා. එහෙම වුනොත් සල්ලි තියෙන ඈයෝ කොහමත් ස්විට්සර්ලන්තෙට යයි. අනිත් අය  මුහුදට වැටෙයි.
එහෙම නොවේවා කියල අපි ප්‍රර්ථනා කරමු. නැත්නම් ඉතින්  පිටරට ඉන්න අයට තමා නැව්  අරගෙන යන්න වෙන්නේ බේරා  ගන්න අපේ දෙමාපිය නෑදෑයෝ ටික.

(ref 1.) UK http://en.wikipedia.org/wiki/Poles_in_the_United_Kingdom

(ref 2.) http://en.wikipedia.org/wiki/Poles_in_Germany

Tuesday, 16 September 2014

ශිෂ්ටාචාරාත්මක දික්කසාදය සිදුවෙයිද?

(මෙය ලියුවේ 16 වනදාය. ස්කොට්ලන්තය වෙන් වුනේ නැත)
බ්‍රහස්පතින්දා (සැප්තැම්බර්  18) ස්කොට්ලන්තය වෙන්වන්නේද නැත්ද කියා තීරණය කරනු ඇත.
ලන්ඩනයේ ස්කොට්ලන්ත ත්‍රස්තයන් බෝම්බ පුපුරුවාගෙන බස් වල දුම්රිය වල අහිංසක මිනිසුන් මරාගෙන මැරෙන්නේ නැත. ලන්ඩන් නගර වාසින් සරම කැහැපට ගහගෙන  (හෝ කලිසම උඩට නවා  ගෙන) ස්කොට්ලන්ත වාසීන්ගේ ගෙවල් ගිනිතබා ඔවුන් මරා  දමන්නේ නැත.

ස්කොට්ලන්ත වාසින් කතා කරන්නේ ඔවුන්ගේම ආරයකින් යුත් ඉංග්‍රීසි භාෂාවය. එසේ නැත්නම් සෑම ස්කොට්ලන්ත වැසියෙක්ම තම කෙල්ටික් (celtic/gaelic ) ස්කොටිෂ් භාෂාවට අමතරව ඉංග්‍රීසි කතා කරති. ස්කොට්ලන්ත වැසියන්ට එංගලන්තයේ වැඩ කිරීමට බාධාවක් නැත. (ලංකාවේ දෙමල වැසියන්ට දකුණේ වැඩ කිරීමට බාදාවක් නැත)

දකුණු එංගලන්තයේ ස්කොට්ලන්ත ජාතිකයන්ට පහර දෙන්නේ නැත. ඒ වෙනුවට ඔවුන් පෙළපාලි යති. රුපවාහිනී විවාද තබති. පහත ඇත්තේ ස්වාධින ස්කොට්ලන්තයක් සඳහා වන රැළියක ඔවුන්ගේ ජාතික කොඩිය රැගත් කතකි. අනිත් පින්තුරයේ තරුණිය ඉයස් (yes ) ව්‍යාපාරය (ස්කොට්ලන්ත ස්වාධිනත්වයට පක්ෂව) සඳහා පත්‍රිකා බෙදයි. මේ සියල්ල සිදුවන්නේ සාමාකාමිවය.

නමුත් මෙසේ සාමාකාමිව පැවතුනේ පසුගිය අවුරුදු 300 පුරා පමණි. එයට පෙර ඉංග්‍රීසින් හා ස්කොට් වරුන් බොහෝවිට සිටියේ යුද වැදගෙනය. එංගලන්තය වැඩි හරියක්ම සටන් වැද  ගත්තේ ස්කොට්ලන්තය සමගය.පහත ඇත්තේ එසේ යුද වැදුන ස්කොට්ලන්ත විරුවෙකු වන විලියම් වැලස් සේ මේල් ගිබ්සන් රඟපාන "Brave Heart " (නිර්භීත හදවත) චිත්‍රපටියේ ජවනිකාවකි.  
මේ යුදවල දිග ලැයිස්තුවක් මෙහි තිබේ. http://en.wikipedia.org/wiki/List_of_battles_between_Scotland_and_England

The acts of union යනු 1707 දී ස්කොට්ලන්තය හා එංගලන්තය අතර ඇති කරගත් ගිවිසුමයි. එක්සත් රාජධානිය බිහි වුනේ මේ ගිවිසුමෙන් පසුවය. එංගලන්ත හා ස්කොට්ලන්ත පාර්ලිමේන්තු එක්සත් වූ අතර එක්සත්  රාජධානියේ පාර්ලිමේන්තුව 1707 ඔක්තෝබරයේ ප්‍රථම වරට රැස්වුනි.
ධනවාදයේ දියුණුව ඇති වන්නට නම් ජාතීන්ගේ බෙදීම් තිබිය නොහැකිය. ප්‍රාග්ධන හිමියාට අවශ්‍ය වන්නේ නොබෙදුන මිනිස් ශ්‍රමයයි. නිෂ්පාදන බලවේග අයත් පන්තියට අවශ්‍ය වන්නේ එසේ නොබෙදුන , බැඳීම් නැති ශ්‍රමිකයන් පිරිසක් හා විශාල වෙළඳ පලකි. එක්සත් රාජධානිය ශ්‍රිඝ්‍රයෙන් ධනවාදයට ගමන් කරන්නේ මින් පසුවයි. 1760 ගණන්වල කාර්මික විප්ලවයට පදනම වැටෙන්නේද මෙලෙස එක්සත්වූ රටවල් දෙකක් වන ජර්මනිය හා එක්සත් රාජධානිය නිසයි.
ඉහත පින්තුරයේ ඇත්තේ මහා බ්‍රිතාන්‍යයේ එකතුව සඳහා (union ) පෙනී සිටින කාන්තාවන් තිදෙනෙකි. 

දැන් ප්‍රශ්නය ඇත්තේ හොඳට එකට සිටි මේ දෙගොල්ල ගෙන් ස්කොට්ලන්තයට වෙන් වන්නට අවශ්‍ය වන්නේ ඇයිද යන්නයි?
මගේ යහළුවකු වන ස්කොට් වැසියෙකු කීවේ මෙසේයි. 
"අපිට සිරියාවට ගහන්න ඕනේ නැහැ. අපිට ඉරාකයට ගහන්න ඕනේ නැහැ. අපේ තෙල් වල සල්ලි අපට ඕනේ. එංගලන්තයේ දාපු කාමර බදු නිතිය (Bedroom tax ) අපට ගෙවන්න ඕනේ නැහැ. (ඔබ  සමාජ සුභ සාධක මුදල් ලබා ජිවත් වෙන ආණ්ඩුවේ නිවසක ජිවත් වෙන්නේ නම් හා ඔබේ වැඩිපුර කාමරයක් ඇත්නම් එයට බද්දක් ගෙවිය යුතු වේ- මෙය අලුතින් පනවන් ලද්දකි.). අපට රුසියාව සමග හොඳින් ඉන්නත් , යුරෝපයට ඇතුළුවී හොඳින් ඉන්නත් ඕනේ. අපට සමාජවාදය ඕනේ නම් ඒකට  ඉංග්‍රීසින් ගෙන් අහන්න ඕනේ නැහැ. "

බැලුවහම දෙපැත්තම හරි වගේ. හැබැයි එක දෙයක් කිය යුතුයි. දැන් කොච්චර ශිලචාරව වාද කලත් , ස්වාධිනත්වය සඳහා වන චන්දය පැරදුන හොත්  නිදහස සඳහා පෙළපාලි ගිය දහස්  ගානක් ඒක අත අරින්න සුදානම් නැහැ. වෙන විධිහක (ආයුධ නැතුව  හෝ ඇතිව ) කැරැල්ලක් , උද්ඝෝෂණයක් එන්න පුළුවන් කම තිබෙනවා. එසේම ස්කොට්ලන්තය දිනුවොත් , එංගලන්ත පැත්තෙන් ආයුධ සහිත දේශ සිමාවක් පනවන බව කියනවා. එහෙම වුනොත් එංගලන්තය ආයුධ යවමින් ස්කොට්ලන්තයේ නිරවුල් භාවය නැති කරාවි. 
අවුරදු 300 ක සාමය හා ශිෂ්ටාචාරත්මක දික්කසාදය වෙනුවට ...ලේ හලන යුද්ධයක් බලාපොරොත්තු වෙන්නත් පුළුවන්.  

ධනවාදයේ වුවමනාවට නිර්මාණය කල වෙළඳපල ඔවුන්ම විනාශ කර ගන්නේ ඇයි? 
නැගී එන එංගලන්ත අධිරාජ්‍යවාදයට 1707 ගිවිසුමෙන් තවත් වෙළඳපලක් ලැබුණි.බ්‍රිතාන්‍ය අධිරාජ්‍යවාදය කාර්මික විප්ලය සමගින්  ලොව පුර පැතිර ගියේය. 
එම අධිරාජ්‍යය  බිදී වැටුනු  අතර දැන් එක්සත් රාජධානියද බිඳ වැටෙමින්  වඩා  බලවත් යුරෝපා සංගමය බිහි වෙමින් පවතී. මාක්ස් පැවසුයේ එයයි.
යුරෝපා සංගමයට විරුද්ධ නයිජල් ෆාරාජ් ගේ පක්ෂය එංගලන්තයේ සිඝ්‍රයෙන් ජනප්‍රිය වෙමින් පවතී. නමුත් එංගලන්තයට එසේ ඉවත්ව යා  නොහැක. ලෝක ධනවාදය එයට ඉඩ නොදෙනු ඇත.


පසු වදන: චීන හා  ඉන්දියන් අධිරාජ්‍යවාදීන් තම වෙළඳපොල  සඳහා අනිත් රටවල් වලට ආයුධ සපයා ඕනෑම ත්‍රස්තවාදී හෝ වේවා නිදහස් හෝ වේවා ව්‍යාපාරයක් මර්දනය කරන්නට ආධාර කරයි. විහිද යන ධනවාදයට අවශ්‍ය ජාතිවාදී බෙදීම් නොව ශක්තිමත් ඒකාධිකාරී රජයක් හා නොබෙදුණු ශ්‍රමිකයන් රැලකි. 




Wednesday, 10 September 2014

මාක්ස් ඇත්තටම ආගම් අබිං කියා කීවද?


කාල් මාක්ස් ඇත්තටම කිවේ නෙමේ , ඇත්තටම අදහස් කලේ මොකක්ද කියන එකයි මෙතන වැදගත්.
මාක්ස් මේ ගැන සඳහන් කලේ "ක්‍රිටික් ඔෆ් හෙගල්ස් ෆිලොසොපි ඔෆ් රයිට් " -(ක්‍රි ව 1843)"කියන පොතේ.  ඉංග්‍රීසියෙන් කියවන්න අවශ්‍යනම් පහත යොමුවට යන්න.
http://www.marxists.org/archive/marx/works/download/Marx_Critique_of_Hegels_Philosophy_of_Right.pdf
මාක්ස් හේගල්ගේ දක්ෂිණාංශික දර්ශනවාදී නැඹුරුව විවේචනය කරමින් ලියු පොත් පිංචේ මුල හරියේ එන සඳහනක් තමා  මේක.

මිනිසුන් -පතල් කම්කරුවන්, ඇමෙරිකාවේ වහලුන් , ප්‍රවේනි දාස ගොවින් දරුණු තත්ව මත වැඩ කරලා යන්තම් පඩියක්  අරගෙන නොමැරී මැරී ජිවත් වෙන කොට ඔවුන්ට තිබුන එකම සහනය පල්ලියට යාම. පල්ලියේ කැරොල් ගායනා අදත් වහලුන්ගෙන් පැවත එන ඇමෙරිකන් කළු ජනයා  අතර ජනප්‍රියයි. දේවගැති වරු දෙවියන් පෙන්නලා ඒ අහිංසක මිනිසුන් වත් මුලා  කලා . කඩා  වඩා ගත්තා. කන්න නැති වුනත් සල්ලි දීපන් ස්වර්ගයට යන්න ඕනේ නම් කියලනේ  කීවේ. " මාක්ස් කිවේ මිනිස්සු අබිං ගන්නේ මත්  වෙලා ප්‍රශ්න අමතක කරන්න . මාක්ස් කීවේ  ආගම මිනිස්සුන්ට සැබෑ  ප්‍රශ්න (ධනපති පන්තියේ අකාරුණික පීඩනය) අමතක කරවල ස්වර්ගයක් පෙන්නලා මත් කරනවා. හරියට අබිං වගේ. " ඉතින් ඒක  වැරදි කතාවක් හැටියට මම නම්  දකින්නේ නැහැ.

මෙන්න ඒ කොටස:
"Religious suffering is, at one and the same time, the expression of real suffering and a protest against real suffering. Religion is the sigh of the oppressed creature, the heart of a heartless world, and the soul of soulless conditions. It is the opium of the people.

The abolition of religion as the illusory happiness of the people is the demand for their real happiness.
To call on them to give up their illusions about their condition is to call on them to give up a condition that requires illusions. The criticism of religion is, therefore, in embryo, the criticism of that vale of tears of which religion is the halo."

suffering කියන්නේ දුක නම් සැබෑ දුක පෙන්වන්නේ සහ සබැ දුකට එරෙහිව විරෝධය දක්වන්නේ ආගම මගින්. ආගම යනු පීඩිත බවට පත් වුනු සත්වයාගේ සුසුම,  (සැබෑ) හදවත් වලින් තොර ලෝකයේ හදවතයි, (පිරිසිදු)  ආත්මයන්  ගෙන් තොර ලොවක  (මෙහි ඇත්තේ තත්වයන් conditions යන වචනයයි) ආත්මයයි. එය මිනිසුන්ගේ (මිනිසුන් මත්  කරවා වේදනාව අමතක කරවන ) මත්ද්‍රව්‍යයයි.  (මෙහිදී අබිං)

මිනිසුන්ගේ සැබෑ සතුට ලබා ගැනීම සඳහා ඇති අවශ්‍යතාවය ආගම නැති කිරීම වන්නේ එයින්  මිනිසුන් ආගම මගින් ලබා ගන්නා මායාකාරී සතුට නැති කර දමන නිසයි.

අපි මිනිසුන්ගෙන් ඉල්ලුවොත් ඔබේ මායාකාරී බැඳි  බිඳ දමන්න කියා, ඉන් අදහස් වන්නේ එම මායාකාරී සතුට ගෙනේ දෙන තත්වයන් (ආගම)  අත් හැර දැමීමයි.  අපි  ආගම විවේචනය කරන්නේ මුලික වශයෙන් (දුක්ඛිතයන්ගේ ) ඒ කඳුළු ගංගාවේ (මෙහිදී වේලය හෝ නිම්නය යන අරුතද ගත හැක. ) රැස්  වළල්ල (halo) ආගම නිසයි.

මාක්ස් අබිං  - පාවිච්චි කර ඇති හේතුව කුමක්ද? අබිං කියන්නේ ඒ දවස් වල රෝහල් වල වේදනාව තුරන් කිරීමට පාවිච්චි කල මත්  ද්‍රව්‍යයක්.  එයම මිනිසුන් මත්  වීමටත් පාවිච්චි කලා චීනය වගේ රටවල. එතකොට මාක්ස් ඇත්තටම ඒ දවස් වල එංගලන්තයේ හා යුරෝපයේ පතල් වල කම්හල් වල වැඩ කල මිනිසුන් හා ඔවුන්ගේ දුක් පීඩා  දැක ඔවුන්ට අනුකම්පා කර  ලියු දෙයක් මේක. ඒ මිනිසුන් තම වේදනාව ඉදිරියේ ලැබෙන ස්වර්ගයක් ගැන හිතා තාවකාලිකව මැඩ  ගන්නවා. පල්ලියට ගිහින් සුළු නිදහසක් හරි භුක්ති විඳිනවා. ධනපතියන් විසිකරන මස් කට්ටක් ක්‍රිස්මස් දවසට හම්බ වෙනවා. ඕක තමා  මාක්ස් කිවේ.

දැන් මේක ඇත්තටම මාක්ස් කියාපු දෙයක්ද? නැත්නම් ඔහු උපුටා ගත්තද? ඉතිහාසඥයන් මේ පිළිබඳව සැක පහල කරනවා. මොකද මෙහි "This opium you feed your people"  කොටස මුලින්ම පලවෙලා තිබෙන්නේ මාර්කස් දේ සාදේ (Marquis de Sade) නමැති ප්‍රංශ වංශාධිපතියෙකු හා විප්ලවීය දේශපාලකයෙකු හා ලේඛකයෙකු ලියු "ජුලියට් ගේ ඉතිහාසය "L'Histoire de Juliette " (http://en.wikipedia.org/wiki/Opium_of_the_people) නමැති පොතේ. පොත පලවෙලා තිබෙන්නේ 1797. මාක්ස් වගේ පොත් හුඟක් කියවපු දර්ශනවාදියෙකුට මේ පොත මිස් වෙන්න විදියක් නැහැ. එකම දේ මේ පොත ටිකක් දරුණු පොතක්. සදේ කියන්නේ හුඟක් නිදහස් මිනිහෙක්. ඒ දවස්වල ලිංගික වශයෙන් නිදහස නැති කාලෙක  ඔහු ආගම එපා, නීති එපා , අද සතුටෙන් ජීවත් වෙන්න කියා කිවේ. මෙහි එන ජූලියට් ඒ වගේ හැමෝම සමග රති රමණය කල නිදහසේ ජිවත්  වූ ස්ත්‍රියක්. හුඟක් වෙලාවට මාක්ස් ඒ ආශ්‍රය (reference ) දුන්නේ නැත්තේ ඒ නිසා වෙන්නත් පුළුවන්. 
සදේ කියන්නේ මෙහෙම.: 
ජුලියට් ෆෙර්ඩිනන්ඩ් රජුට මෙහෙම කියනවා.
ඔබ නුවනැත්තන්ගේ ඇසට බයයි ෆෙර්දිනන්ඩ් , ඒ නිසයි ඔබ මෝහය පැතිරීම උනන්දු කරන්නේ. ඔබේ මිනිසුන්ට දෙන මේ අබිං මගින් ඔවුන් මත්  වුණාම ඔබ ඔවුන්ට දෙන දැඩි වේදනාවන් ඔවුන්ට දැනෙන්නේ  නැහැ.  ඒ  නිසා තමා උගත් මිනිස්සු ඔබේ රාජ්‍යයේ (පාලනයේ) දක්නට නැත්තේ.  ඉගෙනීමට හා දැනීමට ලැබිය යුතු ප්‍රශංශා සත්කාර ලැබෙන්නේ නැති නිසා නුවණැති බවෙන් ලාභයක් නැහැ. ඒ නිසා කවුරුත් ප්‍රඥාව හොයන්නේ නැහැ.


You fear the powerful eye of genius, that is why you encourage ignorance. This opium you feed your people, so that, drugged, they do not feel their hurts, inflicted by you. And that is why where you reign no establishments are to be found giving great men to the homeland; the rewards due knowledge are unknown here, and as there is neither honor nor profit in being wise, nobody seeks after wisdom.


ප.ලි මට මේ මාතෘකාව ගැන කතා කරන්න හිතුනේ මාතලන්ගේ වෙබ් අඩවියේ ගිය සාකච්චාවක් නිසා.  මුස්ලිම් ආක්‍රමණයක් නැති බව සංඛ්‍යා ලේඛන සහිතව චානුක වත්තේගම ලියු ලිපියක මාත්  සම්බන්දවූ සංවාදයකදී මාක්ස් ආගම අබිං කියූ බව කෙනෙක් තර්කයක් හැටියට භාවිතා කලා.

Thursday, 4 September 2014

පරාජිත, ඒකාකාරි, සුන්දර - ඔබ නැතුව ඔබ එක්ක

අගෝරාවෙන් චිත්‍රපටියක් පෙන්වන්න ලෑස්ති වෙනවා. බැලින්නම් චැනල් 4 එකේ පෙන්නපු "ඔබ නැතුව ඔබ එක්ක " කියන ප්‍රසන්න විතානගේ ගේ චිත්‍රපටිය.


ප්‍රසන්න විතානගේ කියන්නේ කලාත්මක චිත්‍රපටි කීපයක්ම අධ්‍යක්ෂණය කල ප්‍රවීන සිනමාකරුවෙක්.  හුඟක් යුරෝපිය චිත්‍රපටි උළෙලවල ඔහු සම්මාන ලබාගෙන තිබෙනවා. ඉතින් මන් මේ කරන්නේ සිනමා විචාරයක්ම නොවුනත් පරිස්සමින් කියන දේ කියන්න වෙනවා.
චිත්‍රපටියට පාදක කරගෙන තිබෙන්නේ ෆියෝදෝර් දොස්ටයෙව්ස්කි ගේ "මුදු ප්‍රාණියා  හෝ නිහඬ ඇය  " (The gentle creature or the meek one") රුසියානු භාෂාවෙන් ක්‍රොත්කයා කියන කෙටි කතාව. ඉංග්‍රීසි පොත මෙතැනින් බාගන්න පුළුවන්. http://www2.hn.psu.edu/faculty/jmanis/dostoevs/gentlesp.pdf

මෙහිදී ප්‍රසන්න විතානගේ මෙම කතාව වෙනස් කරනවා ලංකාවේ පැවතුන සිවිල් යුද්ධය පාදක කරගෙන.
එකේ වරදකුත් නැහැ. නමුත් මටනම් දොස්ටයෙව්ස්කි ගේ කෙටි කතාව කියවනවිට ඇතිවුන හැඟීම් මාලාව  මේ චිත්‍රපටිය බැලුවට එන්නේ නැහැ. දොස්ටයෙව්ස්කි දර්ශනවාදියෙක්. ඔහුගේ Notes from Underground කියන නවකතාව  existentialist කියල තමා කියන්නේ. ඒකෙන් කියන්නේ දර්ශනවාදී චින්තන ක්‍රියාවලිය ඇරඹෙන්නේ සිතන මිනිසෙකු  ගෙන්ම  විතරක් නෙමේ,  රඟන, හැඟීම් සහිත ජීවත්වෙන පුද්ගලික මනුෂ්‍යයෙකුගෙන්  කියල.  http://en.wikipedia.org/wiki/Existentialism

මේ කතාවත් ඒ හා සමානයි කියල කිව්ව හැකි. මීට අමතරව දොස්ටයෙව්ස්කි, ගොගොල් යන සම්භාවනීය රුසියානු ගත්කරුවන්ගේ නිර්මාණ එවකට පැවති  රුසියානු සමාජය විශ්ලේෂණයකට බඳුන් කලා . මිනිස් සම්බන්ධතාවන්, සමාජ සම්බන්ධතාවන්, සාර් පාලනය ප්‍රබල කතිකාවකට බඳුන් කලා. කොටින්ම පසුව රුසියාවේ සිදුවුණ සමාජ විප්ලව වලට (1905, 1917) මේ නිර්මාණ බල පෑව කියලත් කිව්ව හැකි.
ඉතින් මේ කතාව කියෙව්වොත් ඒක පරාජිත ප්‍රේමවන්තයෙකුගේ  කතාවක්ම නෙමේ. මේ කතාවේ එවකට තිබූ  රුසියානු සමාජයේ කෘර බව, මිනිස් සම්බන්ධතා  වල සංකීරණ කම , දරිද්‍රතාවය , සැඟවුණු ප්‍රේමය හා ඒ හා බැඳුනු ලිංගික ප්‍රශ්නත් කතා වෙනවා. (මට හිතෙන විධිහට) .

ප්‍රසන්නට මේ සිනමා කතාව ඒ විධිහටම ගෙන යන්න ඕනේ නැහැ තමා. නමුත් මූලික කතාව පාදක කරගත්තට යුද සමය හා පශ්චාත් යුද සමය හරියට ග්‍රහණය කරලා නැහැ.  ඒ වගේම දොස්ටයෙව්ස්කි, කතා නායකයා හා හුසාර් වරයෙකු අතර , කතා නායකයා මග හැරිය  නොකළ ද්වන්ධ සටන තදබල ලෙස ඉදිරිපත් කල ආකාරයට , ප්‍රසන්න මේ  කතා නායකයාගේ  හමුදා යාලුව කල වරද (දෙමල තරුණියක්  දුෂණය කිරීම)  හා ඔහු (කථා නායකයා) එය සැඟවූ බව එතරම් ප්‍රබල අන්දමින් ඉදිරිපත් කරලත් නැහැ. (මම කියන්නේ මේ සිනමා නිර්මාණයට සාපේක්ෂව).

දැන් අපි එයාර් බස් වල (ශ්‍රී ලන්කන් , එමිරේට්ස්  ඔය කොයිකෙත් ) යන කොට චිත්‍රපටි බලන්න පුළුවන්නේ. ඒ වල දාන සිංහල චිත්‍රපටි හුඟක් බාල පන්නයේ කොමඩි නේ. අර 70 දශකයේ විජය, ගාමිණී , මාලිනි ගස් වටේ දිව්ව විධිහටම (ඒක ඒ කාලෙට කමක් නැහැ) කොහේ හරි සිතල තියන තණකොළ පළාතක නටන ඒවයි  මෝඩ ජෝක්ස් නුයි තියෙන්නේ.  ඒ තත්වයෙන් මිදෙන්න ධර්මසිරි බණ්ඩාරනායක ල වගේ අධ්‍යක්ෂකවරු (හංස විලක් හැර ) හදපු චිත්‍රපටි වල කිසියම් ඒකාකාරී බවක් රැව් දෙනවා. ඒ ගතිය මේ චිත්‍රපටියෙත් තිබෙනවා. නිද්‍රාශීලි උඩරට නගරයක තමා  කතාව යන්නේ.  ඇත්තටම  එහෙම පුංචි නගර තිබෙනවද?  පශ්චාත් යුද සමයේ ශ්‍රී ලංකාවේ කුඩා නගරයක පවා චංචල හා කලබලකාරී බවක් රැඳී තිබෙන බවයි මම දැක්කේ. මේ දීර්ඝ ඒකාකාරී ගතිය සමහර වෙලාවට කරදරයක්. චිත්‍රපටියේ මුල හරියේ කතා නායක සරත්සිරි වඳින්නේ ගණ  දෙවි පිළිරුවකට. ඊට පස්සේ එයා  වඳින්නේ බුදු පිළිමයකට. වෙනස මොකක්ද කියල වැටහෙන්නේ නැහැ. අනික කතා නායිකාව සෙල්වී  පල්ලියට යන දර්ශනය හා ඊට පසු සංවාදය චිත්‍රපටියට කෘතිමව ඔබ්බවල වගේ ගතියක් දැනෙනවා.

මේකේ පරාජිත බව තමා කතා නායිකාව සියදිවි නසා ගැනීම . වෙනත් ජාතියකගේ පිඩාවට පත්වුණු සුළු ජාතියක් ඉන් මිදෙන්න සොයා ගත්තේ සිය දිවි නසාගැනීම මගින් මහා ජාතියට දඬුවම් කිරීමේ ක්‍රමයක්‌ . එය දරුණු, පරාදීන අනුන් විනාශ කරගෙන තමන් විනාශවෙන , සමාජීය වශයෙන් නොගැලපෙන විධි ක්‍රමයක්. සමජවාදින්වත් ධනවාදින්වත් වත් ඊට වඩා  අගය කරන්නේ ජිවත් වීම. ජිවත්වි සටනට මුහුණ දෙන එක. ජිවත්වි අරගලයකට නායකත්වය දෙන එක.
කතා නායිකාවට සිය දිවි නසා ගන්නවට වඩා එහා යන්න තිබ්බා. ඒ යන පාර ප්‍රසන්නට හොයල දෙන්න තිබ්බ. එතනින් දොස්ටයෙව්ස්කි  ගේ මාවතට , දොස්ටයෙව්ස්කි  ගේ අවසානයට වඩා වෙනත් අවසානයක් ගන්න තිබ්බා .  මේකේ ලෙනින් කල පැහැදිලි කිරිමකිදී ,  අපට දකින්න පුළුවන් ගොගොල් ගෙ, දොස්තයෙව්ස්කි ගේ , ටෝල්ස්ටෝයි ගේ පරාජිත, රුසියානු සමාජයේ ඛේදාන්ත වලට , ලෙනින් ප්‍රති උත්තරයක් දෙනවා. අරගල කරපන්. ජිවිතයෙන් පලා  යන්න එපා. මේ දේ මේ විධිහට ලැබිල තියෙන්නේ අපි නිහඬව පරාජය බාර  අරගෙන බැරි වුණාම ප්‍රශ්නයෙන් පලා  යන නිසා. ගෝර්කි (අම්මා- පාවෙල් ) වෙනස් කරලා ලිව්වේ ඒක. ඔස්ත්රෝව්ස්කි (- කොර්චාගින් -වානේ පන්නරය ලැබූ හැටි)   වෙනස් කරල ලිව්වේ ඒක.

ඒ කෙසේ වෙතත් සුන්දර , පරාජිත ආදරයක් මේ සිනමා කෘතියේ ඉස්මතු කරනවා. තරමක් දුරට බ්‍රොන්ටෙගේ වදරින් හයිට්ස් තරම්ම නොවුනත් (හිත්ක්ලිෆ් ) සුන්දර ආදරයක් වෙනුවෙන් හිත සසල කර ගත් අනාථවූ  මිනිසෙකුත්  එවැනිම අනාතවූ සුන්දර , අහිංසක යුවතියකගේත් ආදරයක ඛේදාන්තයක් චිත්‍රපටිය පුරාම දිව යනවා.  එය හදවතට කාවදින ආකාරයට ඉදිරිපත් කරන්න දොස්තයෙව්ස්කි වගේම ප්‍රසන්නත් දක්ෂ වෙනවා.
චිත්‍රපටියේ ඉවර වෙන්නේ හදවත වේදනාවෙන් බිඳින  මේ වදන් ටිකෙන්.
"මම ඔයාගේ ආදරයට බය වුනා. ඔයාට ඕන විධිහේ නෝනා කෙනෙක් වෙන්න බැරි වෙයි කියල මට හිතුන. ඔයාට බාගෙට ආදරේ කරන්න මට බැහැ. මට ඕනෙ ඔයාට මුළු හදවතින්ම ආදරේ කරන්න."
"ඇයි ඔයා  මට මෙහෙම කලේ. ඔය තව එක පාරක්‌  හැරිලා බැලුව නම්........ ".


Tuesday, 2 September 2014

රත්න ශ්‍රී ගේ සම්මුඛ සාකච්චාව

 රත්න ශ්‍රී  ගේ සම්මුඛ සාකච්චාව


Rathna Shri's Video Link

මේ ගැන පසුව විස්තරයක් ලියන්න බලා  පොරොත්තු වෙනවා මම.
මෙහි අවසන් කොටස මිට කලින් ලිපියක දාල තිබෙනවා .

අගෝරාවට හෙළි කල රත්න ශ්‍රි ගේ විරහ ගීතය :

http://kolambagamaya.blogspot.co.uk/2014/07/blog-post_19.html

Thursday, 7 August 2014

මගේ හීනය මට දකින්න ඉඩ හරින්න

කුමාර් එන දවස කියන්න බැහැ - පුබුදු ජයගොඩ  ලින්ක් එක :  එන දවස ගැන පුබුදු ජයගොඩ - ත්‍රිමාණ යේ  ප්‍රශ්නයකට උත්තරයක් 
(සමහර නොත්රෙන  තොත්ත බබාලාට -- මේක ලියා  ඇත්තේ දේශපාලනය කරන වාමාංශයේ ඇත්තන් ගෙන් පොඩි හිනාවක් සපයා ගන්න විතරයි. හීන යනු සැබෑවට සිදුවන  දේවල් නොවේ. )


අවුරුද්ද 20...කියමු. 

පසුබිම් කතාව: ගරු සෝ....හාමුදුරුවන්ගේ විපස්සයේ සෙක්සි සන්ධානය මහා විප්ලවයක් කර සාර් රජතුමා පරාද කර සෝ.......... හාමුදුරුවන් ලවා රජකම අහෝසි කරවා කෙරෙන්ස්කිගේ පන්නයේ මෙන්ශේවිකයන් සමග සන්ධාන ආණ්ඩුවක් පිහිටුවන ලදී.  සෝ.... හාමුදුරුවන් ප්‍රජාතන්ත්‍රවාදී ජනාධිපති උන්නාන්සේ බවට පත්ව වැඩි කල් යාමට මත්තෙන් විපස්සයේම අන්තවාදී වාම කණ්ඩායම නව බෝල්ෂෙවික් වරු වශයෙන් සන්ධාන ගත විය. ඔවුන් නව මෙන්ශේවික් රජයට විරුද්ධව අරගල පටන්ගත්  අතර එයට හේතුව වශයෙන් පවසන ලද්දේ නව ආණ්ඩුව ඇමෙරිකාවට හා චීනයට ගැති තවත් එක් ධනපති ආණ්ඩුවක් බවයි. 
........................................................................................................................

.....................................................................................................................................

අලුතින් ඉන්දියාවට යා කර හැදු මන්නාරමට එන දුම්රිය පාරේ දුම්රියක් එයි. ඔස්ට්‍රලියාවෙන් ඉන්දියාවට ගිය කුමාර් ගුණරත්නම් ලෙනින් පිටුවහළේ සිට පෙට්‍රොග්‍රාදයට ආවාක් මෙන් මන්නාරම හරහා දුම්රියෙන් කොළඹට එයි. 
දීප්ති කුමාර විප්ලවයේ න්‍යායාචාර්ය තුමා  මල්මාලයක් රැගෙන එක සමාන නම් ඇති පක්ෂවල ආධාරයෙන්, එකට වමේ විප්ලවය කල තමන්ගේ මෙන් එකම වාගේ  වාසගමක්  ඇති තම සටන් සගයා  පිලි ගැනීමට බලා සිටි. අධ්‍යාපන ඇමැති නිර්මාල් රන්ජිත් සීයට  හයේ රතු පිත්තයක් අරගෙන දුම්රිය වේදිකාවේ හරියටම නවත්තන තැන හරහා  ඇදගෙන බලා  සිටින ගමන් දීප්ති කුමාරට විහිළුවක් කර සිනා සෙයි. දීප්ති සමග විප්ලවයේ අනු  න්‍යායාචාර්ය වැඩේ කල සුමිත් චාමින්ද  පිත්තය කපන්නට කුමාර්ට කතුර දෙන්නට බලා  සිටින ගමන් ඒ විහිළුවට සිනා වෙයි. වික්‍රමබාහු ඊලම්  කොඩියක් රැගෙන උතුරටත් එන්න යනුවෙන් පිකටින් බෝඩයක් උස්ස ගෙන බලා  සිටි. පුබුදු ජයගොඩ හා චමීර කොස්වත්ත රතු බලකාය හසුරුවන අතරේ අජිත් කුමාරසිරි  අලුත් තාලේ උපහාර ගීයක් පුහුනුවෙයි. ඕපාත මහත්තයා  අල්ලා  ගත්  ප්‍රති විප්ලවවාදී අනුර කුමාර හා ලාල්  කාන්ත ගෙන් තවමත් ප්‍රශ්න කරමින් සිටින නිසා මෙතන නැත.

අලුත් ආණ්ඩුවේ මාධ්‍ය ඇමති තුෂාර දස්කොන්  ත්‍රිමානය අප්ඩේට් කරන්න ෆොටෝ ගන්න ලෑස්ති වෙන කට්ටියට ගුරු හරුකම් දෙයි. .


"මගේ සිහිනය මට දකින්න ඉඩ හරින්න. මගේ සිහිනෙන්  මා මුදන්න ලං නොවන්න. ලං නොවන්න ...."
ප්.ලි. මෙය විකාර හීනයක් පමණි. 

රොසේට්ටාව ළඟා වෙයි

පින්තුරය ගත්තේ මෙතනින්: credit: wikipedia
අවුරුදු දහයකට පසු රෝසේට්ටා අභ්‍යවකාශ (රොබොටික්) යානය තම එල්ලයට අගෝස්තු 06 වනදා ළඟා  වුණා. මේක වැදගත් සිදුවීමක්. මෙම යානය හදාරන්න බල පොරොත්තු වෙන්නේ 67P චෙරුමොව් -ගෙරසිමෙන්කෝ කියන ධුම කේතුව. මෙය මුලින්ම හොයා ගත්තේ 1969 සෝවියට් දේශයේ අල්මා - අතා කියන නගරය අභ්‍යවකාශ මධ්‍යස්ථානයේදී ක්ලීම් චෙරුමොව් හා ස්වෙත්ලානා ගෙරසිමෙන්කෝ යන තාරකා   විද්‍යාඥයන් දෙදෙනා විසින්. මෙය තමන් වටා  පැය  12.ය කට වරක් කැරකෙන අතර අවුරුදු 6.45 කට සැරයක් හිරු වටා කක්ෂය සම්පුර්ණ කරනවා. මෙය කිලෝ මීටර 3.5 පළල හා කිලෝ මීටර 4ක පමණ දිග කේතුවක් .
යුරෝපියානු අභ්‍යවකාශ මධ්‍යස්ථානය මගින් රෝසේට්ටාව යැව්වේ මෙම  ධුම කේතුව හැදිල තියෙන්නේ මොනවයින්ද කියල හොයන්න වගේම , අප සිටින සෞර  ග්‍රහ මණ්ඩලයේ උපත හා විශ්වය උපත සම්බන්ධ කර ගන්න අවශ්‍ය තොරතුරු ලැබේවිය යන පදනමින්. අරියෙන් 5 රොකට්ටුවක් මගින් 2004 මාර්තු දෙවෙනිදා යැවු මේ යානය  මේ අගෝස්තු මාසයේ බලා  පොරොත්තු වූ පරිදි කේතුව වටා  කක්ෂ ගත වුණා.

දැන් මෙහි වැදගත්කම කුමක්ද? මගේ මේ ලිපියේ ධනවාදයේ ඊළඟ උපාය" ධනවාදය පවත්වා ගැනීමේ අලුත්ම ස්ට්‍රැටජිය (උපාය)"  බ්ලොග් ලිපියේ සඳහන් කලේ ඇස්ටරොයිඩ් වැනි අභ්‍යවකාශ වස්තුන්ට යානා යවා ඉන් අමු ද්‍රව්‍ය ලබා ගැනීමේ සැලසුම්. මමත් ගිය රාජකීය තාරක සංගමයේ දේශනය මෙතන. "රාජකීය තාරකා සංගමයේ දේශනය" හා ඒ පිලිබඳ BBC ලිපිය. http://www.bbc.co.uk/news/science-environment-25716103 . රෝසේට්ටුවේ කක්ෂ ගතවීම වැදගත් මේ පල නොකළ දේවල් පවා ඉගෙන ගැනීමට අවකාශය ලැබීමයි. 

රිචර්ඩ් බ්‍රන්සන් නමැති බ්‍රිතාන්‍ය ව්‍යාපාරික ධනපතියා වර්ජින් ගැලක්ටික් නමින් අභ්‍යවකාශයට මිනිසුන් ගෙනයන සේවාවක් පටන් ගන්න ලැහැස්ති කරලා තියෙන්නේ . එයාගේ මුල්ම යානය සාර්ථකව කක්ෂගත කළා පසු ගියදා.
රිචර්ඩ් බ්‍රන්සන් ඇත්තටම බලා  පොරොත්තු වෙන්නේ වෙන දෙයක් බව හෙළි වුණා. ඔහු කිවේ ඇස්ටරොයිඩ් කැනීම් සඳහා ඔහු යානා නිපදවීමට හා අමුද්‍රව්‍ය පොලොවට ගෙනත් විකුණා ලාභ ගැනීම ඔහුගේ බලා පොරොත්තුව බවයි. මෙයට දැන් තවත් අමෙරිකානු සමාගමක් එකතු වෙලා තිබෙන්නේ. ඩිප් ස්පේස් ඉන්ඩස්ට්‍රිස් කියන එක. මේ ලිපිය බලන්න

රුසියාවත් මේ තරඟයේ සිටිනවා ඉන්දියාව හා චීනය සමග. 

ඉදිරියේදී ධනවාදයේ අලුත් පිම්මවල් කීපයක් බලා පොරොත්තු වෙන්න පුළුවන්. මේ එකක් .


Tuesday, 5 August 2014

ගුරුතුමා ළමුන් ලවා ටොකු ඇන්නවිම හා ගුරු ගුටි

මේ කතාව ලියන්න හේතුව ළඟදී දැක්ක නිව්ස් එකක්. ගුරුතුමෙක් හෙවත් විදුහල්පතිවරයෙක් අනෙක් ළමුන් ලවා තව ළමයෙකුට ටොකු ඇන්නවීමක් ගැන පත්තරේක දාල තිබුන. ගුරුතුමා අත්  අඩංගුවේ.  ඇත්තටම කණගාටුදායකයි. ගුරුතුමා හා ළමය දෙන්න ගැනම. මේ සිද්ධිය නිසා මතක් වුන දෙයක් මේ. වසර 1972-1974 කාලයේ මගේ විදුහල හෙවත් ඉස්කෝලේ වුනේ ලුණුගල මධ්‍ය මහා විද්‍යාලය.  හරිම ලස්සන පරිසරයක් ලුණුගල තිබුනේ. අපි හිටියේ  පොලිස් නිවස්න වල. එතන අඩාවත්ත කියල පාරක් තිබුන.  ඒක පහලට එනකොට වතුර පාරක් පාරේ අයිනේ ගලාගෙන යනවා. ඒ හරිය පහු කරලා එනකොට කුඹුරු.  ඊට පස්සේ පෙනෙන්නේ ලස්සන කුඹුක්කන්  ඔය.

එතනින්  පන්සල පාරට හැරිලා තමා සෙන්ට්‍රල් එකට එන්න ඕනේ. ඒක තිබෙන්නේත් ලස්සන පරිසරයක. කනිෂ්ඨ පාසැල තිබෙන්නේ පොඩි කඳු ගැටය උඩ . ලොකු පිට්ටනියකුත් තියෙනව.
මෙන්න ගුගල් පින්තුරේ.
credit to Google Maps: https://www.google.co.uk/maps/preview?source=newuser-ws
ඉතින් මම දෙකේ පන්තියේ සිට හතර පන්තිය දක්වා ඉගෙන ගත්තේ මේ කනිෂ්ඨයේ. මේ සිදුවීම  වෙනකොට මම තුනේ පන්තියේ වෙන්න ඕනේ.  මේ කතාවේ කියන  ගුරුතුමා   ජාතික ඇඳුම අඳින කෙට්ටු උස පුද්ගලයෙක්.

එක දවසක් විවේකයෙන් පස්සේ ලොකු ගාල ගෝට්ටියක්. අපිත් කලබලේට බැලුව. අර ගුරුවරයා පන්තියේ ළමයෙක්ව මැදට අරගෙන බනිනවා. මේ විදුහලේ කණිෂ්ඨ කෑල්ල ලොකු හෝල් එකක්. පන්ති බෙදල වෙන් කරලා තිබුනට බිත්තියක් වත් නැහැ. අනික පන්තියේ උගන්වන දේත් ඇහෙනවා. ඉතින් අපි බැලුව මොකද වෙන්නේ  කියල. අර ළමය ටිකක් මහත හතරේ පන්තියේ කියෙන්නේ අවුරුදු නමයක විතර දුප්පත් බව පෙනෙන පිරිමි ළමයෙක්. ටිකක් ලොකු කොට කලිසමක්  හා දුර්වර්ණ වෙච්ච ලා  කොළ පාට කමිසයක් ඇඳගෙන හිටියා  වගේ මතකයි. එයාට අපි සෝමේ කියමුකෝ. (මේ සෝමේ  අන්වර්ථ නමක්. මගේ පන්තියේ හිටිය සෝමතිලක  කියල යාළුවෙක් එයා නෙමේ ) මන් හිතන්නේ මිනිහ ගණිතය ලියන පොත අරන් ඇවිල්ල නැහැ. කොහොම හරි එක පාරටම අර බැන බැන හිටිය ගුරුතුමා ආවේශ වුන වගේ වේවැල අර ගත්ත. දැන් මෙයා  අර අහිංසකයට ගහනවා. එකක් දෙකක් නෙමේ ගහ ගෙන ගහගෙන ගියා . කොල්ල මර හඬ දීල අඩනවා. අනික්  ඈත පන්තිවල ගුරුවරු හා ළමයිනුත් ඇස්  උඩදාගෙන කටවල් ඇරගෙන  බලන් ඉන්නවා. ටිකක්  වෙලා හති ඇරිය  මේ ගුරුභවතා ආයි  ගහන්ඩ පටන් ගත්ත ආවේශ වෙලා වගේ. අර කෑ  ගහලා අඬන කොලුවා එක පාරටම නිස්සද්ද වුණා . ගුරා ගහනවා තවම. ටිකකින් අපට වැඩේ තේරුණා. කොල්ලට චූ යනවා. දෝරේ  ගලනවා වගේ.  අපේ පන්තිය හරියට එනකන් ගලාගෙන එන සයිස් එකට.
එක  ගුරුවරයෙක්  ආවේ නැහැ කොල්ලව බේරා ගන්න. පොඩි වුනත් මම මාරාන්තික තරහකින් හිටියේ. අපේ පන්ති භාර ගුරුතුමිය එනකොට  ගැහිල්ල නතර වුණා. එයාට  ගුරුවරයාගේ සැළකීමක් තිබුන. කොල්ල බිම බලාගෙන හිට ගෙන හිටිය ඉස්කෝලේ ඉවර වෙනකම්ම පැයක්  විතර චු ගොඩේ. ඊට පස්සේ මොනවා වුනාද මම දන්නේ නැහැ. කොල්ලගේ අම්ම ඇවිත් පන්තිය හේදුවලු .

මේ ළමය ඊට පස්සේ ඉස්කෝලේ ආවේ නැහැ. මමයි අපේ පවුලේ කට්ටියයි ගමනක් කියා මන් හිතන්නෙ  ජනතා පුර කියන පාරේ. ඔහොම යනකොට කඳුගැට තියෙන හරියක අලුත දුන්න ඉඩම් වගේ කෑල්ලක් දැක්ක කටු මැටි ගෙයක් එක්ක. මන් දැක්ක "අර සෝමේ" ඉඳන් ඉන්නවා. කඳු ගැට්ට උඩ . අර කලිසමයි කමිසෙයි ඇඳගෙන. මාත් එක්ක ලාවට හිනා වුණා  ඇඳින  ගෙන.

ලංකාවේ "සමහර" ගුරුවරු ටිකක් තියෙන මධ්‍යම පන්තික ළමයිනට එක විධිහකටත්  නැති බැරි ළමයිනට තව විධිහකටත් සලකන බව මම දන්නවා. ඒත් මේක මහා කෘර කමක්.

නැති බැරි භේදය ගැනයි දුප්පතාට හැමදාම ගුටි ලැබෙන බවයි මන් ඉගෙන ගත්තේ එදා කියල මට හිතෙන්නේ.

- මෙහි සඳහන් සෝමේ අන්වර්ථ නාමයකි. 

Saturday, 19 July 2014

අගෝරාවට හෙළි කල රත්න ශ්‍රි ගේ විරහ ගීතය

අගෝරා කියන්නේ ලන්ඩනයේ අපේ හිතවතුන් පිරිසක් පිහිටුවා ගත්ත සංස්කෘතික කලා  කවයක්. මේ ලඟදි තිබ්බ මුහුරත් උළෙලට  මමත් සහයෝගයක් දුන්න. ඒකෙ වැදගත්ම අංගය වුනේ රත්න ශ්‍රී විජේසිංහයන් විසින් ලබා දුන්න සම්මුඛ සාකච්චාව. ඒක ඉතාම රසවත්. ළඟදීම ඒක  යුටියුබයට ඇතුලත් කරන්න බලා  පොරොත්තු වෙනවා.  

දැන් මේ සාකච්චාවේ අග හරිය විතරක් මම ලියන්න තීරණය කලා . ඒකට  හේතුව අපි යථාර්තවාදී කලාව ගැන කොච්චර කිව්වත් කලා කරුවෙක් යථාර්තය අත්  විදින්නේ නැත්නම් ඒ යථාර්තය හරි හැටි නිර්මාණයෙන්   පිළිබිඹු වෙන්නේ නැහැ කියන අදහස ඉස්මතු කරන්න මට අවශ්‍ය නිසා.
රත්න ශ්‍රී කියන සංවේදී කලාකරුව, ගීත රචකයා  කියනවා  මෙන්න මෙහෙම. 

මං ලිව්ව දේවල් මමම වර්ණනා කරන එක සදාචාරාත්මක නැහැනේ . නමුත් මට ලිව්වේ ඇයි කියල කිව්ව හැකි. විශ්වනාත කියල භාරතීය විචාරකයෙක් කියනවා මෙහෙම එයාගේ දර්පනය කියන පොතේ . "බලන්න අර තණ  පිටිය දිහා. තණ පිටියේ තියෙනවා තැන කොළ , කටු පඳුරු , ලැහැබ් හැම දෙයක්ම තියෙනවා. එතන එළ  දෙනක් බැඳලා ඉන්නවා. ඒ එළදෙන අර ඔක්කොම තෘණ සහ කටු ඇතුළු හැම දෙයක්මත් අනුභව කරලා සුදු පාට  කිරි ලෝකෙට දෙනවා. නිර්මාණත් හරියට මේ කිරි වගේ. නිර්මාණ වල තණකොළ නෑ . කටු නෑ . මොනවත් නෑ . හැබැයි මේ එළදෙන කිරි විතරක් නෙමේ සමහර විට ගොමත් පිට කරනවා. නිර්මාණත් ගොම වගේ ඒවා තිබෙනවා. ගොම වලින් ටිකක් හරි ප්‍රයෝජනයක් තියෙනව, ගහකට පොළොවකට වුනත් දාන්න  පුලුවන් .  ඒ වගේම එළදෙන  තව වැඩක් කරනවා. දවල් තිස්සේ කාපුවා  රෑට ඔක්කාරය කරනවා. නිර්මාණත් ඔක්කාරය වගේ ඒවා තියෙනෙවා. ඒ නිසා මම ලියපු දේවල් කිරිද, ගොමද , ඔක්කාරයද කියල තීරණය කරන්න ඕනේ අහන අය මිසක් මම නෙමේ. නමුත් මට අර තණ පිටිය නැත්නම් ගෝචර භුමිය ගැන කියන්න පුළුවන් කම තියෙනවා. ඒ අත්දැකීම් තමයි කිරි වෙන්නේ , ගොම වෙන්නේ. "

මින්පසු රත්න ශ්‍රී එනවා තමන්ගේ ම වූ අත්  දැකීමකට. 

අවසන් වශයෙන් එකම එක අත්දැකීමක් මම කියන්නම්.  මානව ජිවිත වල තියෙන මානව සම්බන්ධතා වල තිබෙන ප්‍රබල කම තේරුම් ගන්න.  මේකත් මේ මම රාජ්‍ය නිලධාරියෙක් වශයෙන් වැඩ කරන කාලේ මුහුණ දීපු අත්දැකීමක්. මට එක සැරයක් යන්න තිබුන නිල කටයුත්තකට දඹුල්ල අනුරාධපුර මාර්ගයේ සිවලාකුලම හන්දියෙන් හැරිලා තෝඩ  මඩුව කියන ගමට. ගමට යන පාර වැටිලා තිබුනේ වැව් බැම්ම උඩින්.  ඒ ගියපු කාර්යය  ප්‍රජා  ශාලාවේ සිද්ධ වෙන අතරේ ලොකු වතුර තිබහක් දැනුනා. අපි ගියා  කිට්ටුව ගෙයක් හොයාගෙන වතුර ටිකක් බොන්න. මේ මධ්‍යම පාන්තික ගෙදරක්. ලොකු මිදුලක් තියෙනව. ගේ ඇතුලේ සාලේ  ගොඩ ගහල තියනවා ලොකු ලුණු,  මිරිස් අස්වැන්න නෙළල. මිදුලේ කෙලවරේ නුග  ගහක් තියෙනවා. නුග ගහ වටේට මල් වවල ලස්සනට. පාන් පැලක්  තියෙනවා එතන . එතන අවුරුදු අසුවක විතර කෙනෙක් මිදුල අතු ගානවා ඉදලකින් වටේට . එයා  සරම උඩ  අමුණ ගෙන කොන්ඩෙත් බැඳලා , කොණ්ඩේ  ඉදිලා , රැවුල ඉදිලා. අපි ගිහින් අහනවා මාමණ්ඩි  වතුර ටිකක් බොන්නෙ කොහොමද  කියල.  ඉන්ඩ  මහත්තැන් කියල ඉදල හේත්තු කරලා ගෙට ගිහින් ජෝගුවට අපට වතුර ගෙනත් දෙනවා බොන්න. බොන ගමන් අහනවා මේ "මහත්තය බුන්නද ඇති වෙන්න " කියල එයාගේ භාෂාවෙන් අහනව. බොහොම ආදරෙන් . ඉතින් මන් ඇහුව මාමණ්ඩි අර ළුණු එහෙම ගන්න පුලුවන්ද අපට කියල. ඉන්ඩ මහත්තැන් කියල ගෙට ගිහිල්ල බෑග් දෙකකට පුරවල ගෙනල්ල දුන්න. සල්ලි දෙන්න හැදුවම කියනවා "චී  මහත්තය සල්ලි වලට දෙන්නේ නැහැ . මට සල්ලි තියෙනවා. මගේ පුතාල දෙන්නට බස් දෙකක් තියෙනවා දකුණු අනුරාධ පුරේ වැඩ කරන." මේ  මාමණ්ඩිගේ නම මුතු බණ්ඩා.

දැන් මේ අවුරුදු දහයකට විතර කලින් වෙච්ච සිද්ධියක් මං මේ කියන්නේ. මං එන ගමන්, කඩුල්ල පැත්තට යන ගමන් අහනවා මාමණ්ඩි ඇයි මෙතන මේ ලස්සනට මල් වවලා. මේ පාන් පැලක් හෙම හදල, මේ ලස්සනට මේ තියන් ඉන්නේ මොකද කියල. එයාගේ මූන වෙනස් වුනා  එක පාරටම. මගේ දිහා විනාඩියක්  විතර කතා නොකර බලන් ඉඳලා කියනවා "මහත්තැන් මේ මගේ පවුල නිදා ගන්න  තැන. එයාගේ නම සුදු බන්ඩි . එයාගේ සොහොන මේ. එහෙම කියල කවියක් කියනවා.

"කපා  කොටා බටු තිබ්බටු සිඟිත්තෙ
රන් මැණිකා  අද නිදිදෝ කනත්තේ "

කියලා.
අන්තිමට  මේ මුතු බණ්ඩා මාම  කියනවා "මහත්තැන් දැන් මං  මේ කරන වැඩේ මට හෙට අනිද්දට කරන්න හම්බ වෙන්නේ නැහැ."  මං ඇහුව ඇයි  මොකද වෙලා තියෙන්නේ . "දැන් මගේ මලය" -එහා පැත්තේ ඉඩමක් පෙන්නලා කියනවා- "අර හේරත් බණ්ඩා මේකට නඩුවක් දාල  මේ ඉඩමට. නඩු තීන්දුවත් ලැබිලා තියෙන්නේ. " තීන්දුව විධිහට තියෙන්නේ අර සොහොන එහා පැත්තට යන විදියට තමයි මේ මායිම වැටෙන්නේ . දැන් මේ මායිම හරහා වැටක් ගැහුවොත්, කම්බි ගැහුවොත්, තාප්පයක් බැන්දොත් එහෙම මේ මුතු බණ්ඩා මාමණ්ඩිට බැරි වෙනවා තමන් මේ දිනපතා  කරන මේ චාරිත්‍රය කරන්න.  එයා  හරි දුකෙන් කිව්වේ. මං  දැන් මේ කල්පනා කරන්නේ මේ අසු හැවිරිදි මහල්ලා මේ මනුස්සය තාම කොච්චර තමන්ගේ මියගිය බිරිඳට ආදරේද? දැන් ඉඩම් කියන්නේ සීමාකාරී සාධකයක්. ඔය මහවැලි කලාප වල ඒවා බෙදිලා බෙදිලා යන කොට කැඩෙනවා මේවා. ඒකත්  වලක්වන්න බැරි කාරණයක්. ඉතින් මේක ලියන්න මන් කල්පනා කලේ. මේක දැන් කෙනෙකුට පුළුවන් තව තොරතුරු එකතු කරගෙන කෙටි කතාවකට ලියන්න. කවියකටත් හොඳයි. නමුත් මේ හැඟීම හරි ප්‍රබලයිනේ. මේක වඩාත්ම ගැලපෙන්නේ ගීතයකට කියල මන් තීරණය   කරනවා.

ගීතය-
ඒ නිසා මන් තීරණය කරනවා මේක පටන් ගන්නේ කොහෙන්ද? දැන් මට මතක් වෙනවා තාම  මේකේ සිද්ධ වෙච්ච නැති දෙයක් තියනව . ඒ තමයි කවද හරි දවසක  දැන් නඩු තීන්දුව දීල තියෙන්නේ. දැන් මිනිදෝරු කන්තෝරුවෙන් ඇවිල්ල ජීප් එකේ තිරිංග තද කරලා නවත්තල සද්ද කරලා සපත්තු අඩි  වලින් මල්  පැල පාගල එහාට මෙහාට ඇවිදලා දම්වැල අල්ලලා ලකුණු කරලා මායිම ලකුණු කරන වෙලාව. තවම වෙලා නැහැ . කවද හරි වෙනව  ඒක හැබැයි. එතකොට මේ මුතු බණ්ඩා මාමා මොනවා කරනවා  ඇත්ද ? මුකුත්ම  කර කියා ගන්න දෙයක් නැතිව අන්ත අසරණ විධිහට බලා  ගෙන ඇති . එතනිං පටන් ගන්න මම තීරණය කරනව.

මිනින්දෝරු කන්තෝරුවේ මුලාදෑනි ටික
සුදු බණ්ඩි මගේ නිදා ඉන්න ඉඩම මනිනවද
ඈ ඇහැ ඇරේවි යන්න හොදයි දංවැල් අරගෙන
තරහ අවසරයි යනවද දංවැල් අරගෙන

පිං කුඹුරු නෙලන කාලෙට මට හීල අරන් එන
හිස විසාදියට තෙල් උළලා තොන්තුවා වෙන
රත්තරන් දෑත සුදු බණ්ඩිගෙ දෙණියේ පස් යට

දෙයි හාමුදුරුවො දන්නවනම් දැන් ඈ නැති වග
තෙල් පාන උනත් නිවා දමයි සංහිඳ පාමුල
වාවන්නෑ මේ දුරුත්ත සංසාරෙ තනි මට

සංගීතවත් කලේ එච් එම් ජයවර්ධන දිවුල්ගනේ ගායනා කලේ. හැබැයි මේක ලියන කාලේ මගේ බිරිඳ හිටිය. දැන් කල්පනා  කරන කොට හිතෙනවා මේක මගෙත් කතාව තමයි කියල ඇත්තටම.  මමත් ඒ මුතු බණ්ඩා මාමාගේ තත්වෙට ඇවිල්ල කියල මට හිතෙනවා. 

(සාකච්චාව මෙතනින්  අවසාන වෙනවා. )

දැන් මෙතන රත්න ශ්‍රිට මේ සින්දුව කීප විදියකින් ලියන්න තිබුන.  එකක් තමයි නිලධාරිවාදී කෑල්ල. ඒ කියන්නේ සපත්තු වලින් මල පාගන කතාව. නමුත් සියුම්ව මග හැරෙන ඒ කොටස ඔහු දම්වැල්  වලින් නතර කරනවා. අනික තමයි මහවැලි කලාපයේ ඉඩම් ප්‍රශ්න. නමුත් ඒක ලීවොත් මේ ගීතය නීරස වෙනවා ඒක දේශපාලනිකයි . අනික මධ්‍යම පන්තික පවුලක්නේ. ඕක වෙන පන්තියකට අදාළත්  නැහැ.  ඒක  නිසා අපට  තීරණය  කරන්න සිද්ධ වෙනව  මේක ආදර  විරහ ගීතයක් කියල. 

හැබැයි මේ කියන කොටසේ වඩාත්ම සංවේදී කොටස තමා මේ සින්දුවේ කියන කතාවේ මුතු බණ්ඩා මාමණ්ඩි ගේ තැන රත්න ශ්‍රී විසින් ගැනීම. හංසයන් යුවලක් තම ජිවිත කාලය පුරා එක යුවලක් වශයෙන් ආදරෙන් බැඳිලා ඉන්නවා කියල අපි දන්නවා. එක පුරුෂයකුගේ හංස ගීතය (මෙහි හංස ගීතය යනු  - අවසන් ගීතය යන අරුතින් ලියුවක් නොවේ, විරහ ආදර ගීතය යන අරුතෙන් ලියුවකි).  උදෑසන  පාන් පැල  අවට නමදින විටත් කල කරුවාගේ හංස ගීතය ගීතයක් ලෙසත් අප හා මුසු වෙනවා. මේ ගීතය යථාර්තවාදී වෙන්නේ එතන.  තවත් දෙයක් තිබෙනවා.  
අර මල්  පැල පාගයි,  දම්වැලෙන්  මනියි කියල රත්න ශ්‍රි උපකල්පනය කරන  මිනින්දෝරු මහත්තුරු  , මහවැලියේ ඉඩම් දෙන කට්ටිය දැන් නියෝජනය කරන්නේ  සින්දුව ගයන දිවුල්ගනේ ආණ්ඩුකාර තුමා. 

රත්න ශ්‍රිට ස්තුතියි. 

මේ සින්දුවේ පදමාලාව සම්පුර්ණයෙන් මෙතන තිබෙනවා.  මම ලිව්වට පස්සේ සින්දුව හොයන කොට දැක්කේ . ඒ නිසා කොපි කලේ නැති වුනත් යොමුව දාන එක හොඳයි කියල හිතුන. 

http://geepadura.blogspot.co.uk/2012/11/minindoru-kanthoruwe-karunarathna.html

සින්දුව මෙතන තිබෙනවා. Youtube 

-අජිත් 

Thursday, 17 July 2014

ධනවාදය පවත්වා ගැනීමේ අලුත්ම ස්ට්‍රැටජිය (උපාය)

ආණ්ඩුව: අපි මුදල් සුරැකුම්පත්  (බැඳුම්කර -bonds) ඔබට විකුනන්නම් ඔබේ නය වලින් ඔබව මුදවා ගන්න.
බැංකුව : අපි සල්ලි නයට ගන්නම් ඔබෙන් , එතකොට අපිට පුළුවන් ඔබෙන්  සුරැකුම්පත්  (බැඳුම්කර -bonds)  (මිලදී ගන්න. 
අපි පෙර ලිපියෙන් සාකච්චා කලේ ලාභය ගැන හෙවත් අතිරික්ත වටිනාකම ගැන. ඒ ගැන ඇතිවුන සංවාදයේදී වැදගත් කරුණු කීපයක් මතු වුණා. ඒ ලිපිය  හා කොමෙන්ටු මෙතනින් .

එනම් මාක්ස් කිව්වා වගේ ලාභය දිගටම වැඩිවෙන මේ අනවරත ක්‍රියාවලිය දිගටම ගෙන යන්න බැරි වුණාම , සූරා කෑම සාධාරණිකරණය (justify ) කරන්න බැරි වුනහම මොකද කරන්නේ. මෙතන අර්බුදයක් ඇති වෙන බව පෙනෙනවානේ. මාක්ස් ඉන්න කාලේ මේ අර්බුදය මිට වඩා දරුණුවට තිබ්බ. එතකොට මොකද වුණේ ? එංගලන්ත අධිරාජ්‍යය මිනිසුන්ව පැටෙව්වා අධිරාජ්‍යය පුරාවට. ඔස්ට්‍රේලියාව , නවසීලන්තය වැනි රටවල් ඇති කලා. අලුත් ධනවාදී රටක් (ඇමෙරිකා එක්සත් ජනපදය) බිහි කලා අධිරාජ්‍යවාදය විසින්.  මාක්ස් කියපු ධනවාදයේ අවසන් වීම වුනේ නැහැ. මේ ගැන ලියු ලිපිය මෙතනින් බලන්න.

එම තත්වයන් දෙකක් ලෝකයේ නැවත ඇතිවුනා . රැකියා විරහිත භාවය හා සම්පත් කොල්ල කෑම වැඩි වුනා. ඊට පිළිතුර වුනේ පලවන ලෝක යුද්ධය. ඉන්පසු ආව ආර්ථික අවපාතය. ඊට ධනවාදයේ පිළිතුර හිට්ලර් ගෙන් පටන් ගත් ජාතිවාදී සමාජවාදය. ඉන්පසු දෙවන ලෝක යුධ්දය ඇරඹුන. ධනවාදය සෝවියට් දේශයේ හැකියාවන්ට තර්ජනය කලේ එහෙම. සෝවියට් දේශයේ ක්‍රියාත්මක වුනේ ස්ටාලින්ගේ රාජ්‍ය ධනවාදය. සමාජවාදී ලක්ෂණ සහිතව.
දැන් නැවත ඇතිවෙන ආර්ථික අවපාතය හා කඩා  වැටීම ජර්මනිය හා බ්‍රිතාන්‍යය තරමක් දුරට නවත්වා ගෙන තිබෙනවා. නමුත් ඇ.එ. ජනපදයට එය තවම කරන්න බැරි වෙලා තිබෙනවා. චීනයේ ලාභ ශ්‍රමය නැති වී ගෙන යනවා. චීනය දියුණු වෙමින්  යන නිසා. අප්‍රිකාවේ ශ්‍රමය තවම දියුණු නැහැ ආසියාවේ තරම්. යුරෝපයේ රටවලට සමාජ සුභ සාධන ගෙවීම් (benefit ) දෙන්න තවත් බැහැ . බ්‍රිතාන්‍යයේ කොන්සර්වේටිව් රජය සුභ සාධක ගෙවීම් කපා  ගෙන කපා  ගෙන යනවා. සෝවියට් දේශයට පෙනෙන්න හා ජනතාව මුලා  කරන්න මේවා දුන්නට බදු වලින් හා තමන්ගේ ලාභයෙන් මේවා ගෙවන්න ධනපතියෝ කැමති නැහැ (දැන් සෝවියට් දේශය නැති නිසා ) . මධ්‍යම පන්තිය මේ සුභ සාධන වලට එරෙහිව ක්‍රමානුකුලව පෙළ ගස්සනවා ධනපති මාධ්‍ය විසින්. අපිත් සමහර වෙලාවට මේ පච වලට අහු වෙනවා.
නැවත ලෝක යුධයක් ඇති කරන්න බැහැ . සම්පත් හා දේශපාලන බලය  බෙදා ගැනීම සඳහා  යුරෝපියානු සංගමය හා රුසියාව අතර ඇතිවී තිබෙන සීතල යුද්ධය යුක්රේනයේ රට බෙදා ගැනීමේ සිවිල්  යුද්ධයක් දක්වා පරිවර්තනය වී අවසන්. රුසියාව තම අධිරාජ්‍යවාදී වුවමනාවන් සපුරා ගැනීම සඳහා යුරේසියානු සංගමයක් පිහිටුවාගෙන තිබෙන අතර පුටින් තම ධනපති ක්‍රමය වස ගැනීම සඳහා සහෝදරයා යන සමාජවාදී ව්‍යවහාරය භාවිතා කරමින් රුසියානු ජනතාව මුල කරමින් සිටිනවා. ඒ බව හෙළි කරමින්  ලියු ලිපිය මෙතැනින් බලන්න.  ඒ සඳහා රුසියානු කොමියුනිස්ට් පක්ෂයේ සාමාජිකයන් නුත් සහයෝගය දෙනවා. රුසියාවට පක්ෂ සාමාන්‍ය  යුක්රේනියානු ජනතාව මේ සිතා  සිටින්නේ නිවැරැදි සෝවියට් බලයකට ඔවුන් නැවත යන බවයි. ඔවුන් භාවිත කරන දැකැත්ත සහ මිටිය කොඩි, ඔවුන්ගේ සටන් පාඨ  මේ සඳහා  උදාහරණ.
සිදුවන්නේ කුමක්ද යන්න ගැන වාමාංශික පක්ෂ වලට හැඟීමක් තිබෙනවද?  රුසියාව, ඉන්දියාව, චීනය, බ්‍රසීලය තම BRIC සංවිධානය මගින් බැංකුවක් පිහිටුවා අවසන්. ඔවුන් ඩොලරයට ප්‍රබල තර්ජනයක් එල්ල කරමින් සිටිනවා.
මම පසුගිය 2010 වසරේ  රාජකීය තාරකා  සංගමයේ (Royal  Astronomical  Society ) දේශනයකට ගියා.  මාතෘකාව උල්කාපාත (වචනය හරිද දන්නේ නැහැ)  හෙවත් ඇස්ටරොයිඩ  (asteroid ) වල වටිනා  ලෝහ කැනීම් ගැන.
එම දේශනය මෙතනින් බලන්න. 
අජටාකාශ යානා උල්කාපාත /ඇස්ටරොයිඩ   වලට බස්සා ඒවා හාරා වටින මුල ද්‍රව්‍ය රැගෙන ඒම . මේ අදහස වැඩි දියුණු වී තිබෙනවා තව දුරටත්. BBC ලිපිය බලන්න.
හේතුව නම් සම්පත් සඳහා වන අරගලය උත්සන්න වීම හා ලාභ අඩු වීම. අනික විද්‍යාවේ දියුණුවට කාටවත් අභියෝග කරන්නත් බැහැ. නමුත් රුසියාව විසින්  අගහරු ලෝකයට යාම පරික්ෂ කිරීම සඳහා දවස් 200ක් මිනිසුන්  අජටාකාශ යන කාමරයක තබාපරීක්ෂා   කිරීමෙන් පසු ඇමෙරිකාව, චීනය, රුසියාව හා යුරෝපා සංගමය සඳේ හා අඟහරු ලෝකයේ ජනාවාස පිහිටුවන්න සැලසුම් කරනවා කියල හෙළි වුණා.
දැන් කල්පනා කරලා බලන්න. මාක්ස් කීව  පෙරලිය සිදු වුනේ නැහැ ඉහත කිව වගේ අධිරාජ්‍යවාදය වෙන  රටවල් සූරා කෑම (සම්පත් සඳහා) සහ ,  තම දුප්පත් හා සුළු අපරාධ කල ජනයා අල්ලා  ගත්  රටවල් වල පදිංචි කිරීම මගින්.
දැන් වෙන්න යන්නේ ඊට සමාන දෙයක්. අජටාකාශ යානා නිපදවිමම ලොකු කර්මාන්තයක් . බ්‍රිතාන්‍යය  අජටාකාශ යානා  නැවතුම් (space  port ) පොලක් සැදීමට සැලසුම් ගහල ඉවරයි. ලබන දශකය තුල ඇස්ටරොයිඩ හෑරීම, හා ලග ලෝක වල ජනාවාස පිහිටුවීම සැලසුම් කරගෙන යනවා. මේවා වල වැඩ කරන්න ගෙනි යන්නේ හා පදිංචි කරන්න ගෙනි යන්නේ කවුද? යුරෝපයේ හා බ්‍රිතාන්‍යායේ රැකියා විරහිත , සමාජ ආධාර (benefits ) වලින් ජිවත් වෙන මිනිස්සු. යන්න බැහැ  කිවොත්  ආධාර කපල එලියට දානවා ගෙවල් වලින්. නැත්නම් හිරේ. අපරාධකාරයෝ ඇස්ටරොයිඩ කැණීම සඳහා පුහුණුව දී ගෙන යාමට හැකියි.
අනිත් ප්‍රශ්නය තමයි විද්‍යාවේ දියුණුව සමග මිනිසුන් හුඟක් වැඩ වලට අවශ්‍ය වෙන්නේ නැහැ. යන්ත්‍ර සුත්‍ර වලින් ඒවා කෙරුව හැකි. විරැකියාව තව වැඩි වෙනවා වෙන කර්මාන්තයට යෙදෙව්වේ නැත්නම්. ඒක එන්නේ හඳේ සහ අඟහරු ලෝකයේ ජනාවාස පිහිටුවන්න අවශ්‍ය දේ හදන විශාල කම්හල් එක්ක.
දැන් මේ කතාව හීන මවන පිස්සෙකුගේ කතාවක් හැටියට පෙනෙන්න පුලුවන් . බ්‍රිතාන්‍යය වගේ "මානව හිමිකම් " රකින රටක එහෙම වෙන්න පුලුවන්ද?
මේ බ්‍රිතාන්‍යයම තමයි විශ්ව විද්‍යාල ශිෂ්‍යයන්ට ගෙවන්න කිව්වේ. බොරිස් ජෝන්සන් (ලන්ඩන් නගරාධිපති ) කැරලි මර්දනය කරන්න වතුර බවුසර් අරගෙන ලෑස්ති වෙනවා.
මම මේ කියන්නේ තව අවුරුදු 20කින් 2020 -2050 අතර මේ දියුණු රටවල් කරන්න බල පොරොත්තු වෙන දෙයක්.
ඉන්දියාව කරන අඅභ්‍යවකාශ  වැඩ මෙතනින් . . 
අර ඔස්ට්‍රේලියාව පිහිටුවද්දී සිද්ධ වුන වගේ දෙයක් නැවත සිද්ධ වෙනව. මාක්ස් කීව  මතකද ඉතිහාසය පුනරාවර්තන වෙනවා සර්පිලාකාරව කියල.  දයලේක්තිකව පලවන මොහොතට වඩා ඉතිහාසය නැවත රඟ දැක්වෙන  දෙවන මොහොත උසස්. (තාක්ෂනය මුදල් ආදී දේ බැලුවහම ).
මෙතැනදී තව කරුණක් කියන්න ඕනේ? විද්‍යාඥයන් මෙතන දිනයිද යුද වාදීන් දිනයිද කියන එක විශ්වාස නැහැ?
ජේම්ස් බොන්ඩ් හා ඒ වගේ අනිත් අමෙරිකානු චිත්‍රපටි  වල දුෂ්ටයා  වුනේ උතුරු කොරියාව හා කියුබාව දැන් අවුරුදු දහයකට කලින්. දැන් දැන් ඒ තැන නැවතත් රුසියාව හා මුස්ලිම් ත්‍රස්තවාදය අරගෙන වගේ. (මෙතැනදී තවත් ධනවාදී රටක් වන රුසියාව ශුද්ධ කරන්න මට අවශ්‍යතාවයක් නැහැ)  24 වගේ රුපවාහිනී සිනමාව ගෙන බලන්න කවුද දුෂ්ටය කියල? මහජන මතය හදන හැටි බලන්න නැවතත් යුද්ධයකට?
වාමාංශික පක්ෂ කියන විධිහට ධනවාදය භංග වේද ? ඊළඟ පිම්ම පනීද  ?

Thursday, 10 July 2014

මාක්ස් ලාභය ගැන - අතිරික්ත වටිනාකම -(ප්‍රාග්ධනය අංක 8)

(ප්‍රාග්ධනය අංක 8)

අතිරික්ත වටිනාකම හෙවත් අපි සුලභව හඳුන්වන ලාභය ගැන මාක්ස් ලිව්වේ මෙහෙම දෙයක්. අපි පසුගිය ලිපියේ කතා කලේ භාණ්ඩ - මුදලට හා මුදල් නැවත භාණ්ඩ වීමේ ක්‍රියාවලිය. ( C - M - C - commodity  - money - commodity  )

(මෙය මෙහි පැහැදිලි කර ඇත. සංසරණ මාධ්‍යය - ප්‍රාග්ධනය)

දැන් අපි අරගමු මෙන්න මේ ක්‍රියාවලිය. මුදලින් භාණ්ඩයක් ගැනීම සහ එය නැවත විකිණීම (හෙවත් මුදලට හුවමාරු කිරීම ) - මුදල්-භාණ්ඩ - මුදල් හෙවත් M - C - M ක්‍රියාවලිය. මෙය බැලූ බැල්මට නැවත නැවතත් සිදුවන තේරුමක් වැඩිය නැති ක්‍රියාවලියක් වගේ. හුඟක් වෙලාවට මුදලේ ප්‍රමාණය වෙනස් වෙන්න හෝ භාවිතා කරන මුදලේ වර්ගය වෙනස් වෙන්න හෝ පුළුවන්. ඒ කියන්නේ පවුම් 10 කට අරගෙන එයම පවුම් විස්සකට හුවමාරු කිරීම (විකිණීම) නැත්නම් ඩොලර් 10 කට අරගෙන පවුම් 10කට දීම. මේ තේරුමක් නැති M - C - M ක්‍රියාවලියට තේරුමක් එන්නේ එහෙනම් භාවිතා කරන ප්‍රමාණය මත. වැඩි ගණනකට හුවමාරු වෙනවා නම් වඩා වැඩි මුදල් ප්‍රමාණයක් සංසරණයට එකතු වෙනව.

අපි හිතමු වටින සේද රෙද්දක් පවුම් 100 කට ගත්ත කියල. ඒක මම විකුනනවා 110 ට. මේ ක්‍රියාවලිය අර සමිකරනයෙන්ම ලියුවොත් එන්නේ මෙහෙම.

මුදල්-භාණ්ඩ - මුදල්' හෙවත් M - C - M'.
මෙන්න මේ ලකුණ ' බලන්න;
ඉන් අදහස් වන්නේ දෙවන මුදල පලවන මුදල් අගය හා සමාන නොවන බවයි.
එනම් මුදල' හෙවත් M' = M +ΔM. මෙහිදී ΔM=පවුම් 10. 

[ මේ ලකුණ Δ ග්‍රීක අකුරක් වන ඩෙල්ටා - මෙහි ගණිතමය අදහස වන්නේ වෙනස (difference) හෝ අගයේ (සංඛ්‍යාත්මකව) වෙනස් වූ ප්‍රමාණය යන්නයි]
මෙන්න මේ වෙනස් වූ අගයේ ප්‍රමානාත්මක වටිනාකම වන ΔM (ඩෙල්ටා M) අතිරික්ත වටිනාකම (surplus-value) යනුවෙන් හඳුන්වනවා. ඔබට පෙනෙනවා ඇති භාණ්ඩයේ මුල් වටිනාකම වෙනස් නොවී පවතින අතර එයට අතිරික්ත වටිනාකම එකතුවී එය තව දුරටත් ප්‍රසාරණය වී ඇති බව.(expands itself)

මෙන්න මේ ක්‍රියාවලිය මුදල් ප්‍රාග්ධනය බවට පරිවර්තනය කරනු ලබනවා.
(මෙසේ කියා ඇත්තේ මාක්ස් ගේ ප්‍රාග්ධනය මුල් කොටසේ පලමුවන වෙළුමේ, මතක තබා ගත යුතු දෙයක් වන්නේ මාක්ස් මෙය තව දුරටත් විකාශනය කරමින් ප්‍රග්ධනය ඇතිවන හැටි පෙන්වා දෙනවා ප්‍රාග්ධනය 2 වන වෙළුමේ)

ඒ කියන්නේ මාක්ස් කියන විධිහට මේ අතිරික්ත වටිනාකම හෙවත් ලාභය ප්‍රග්ධනය හැටියට පරිවර්තනය වෙනව. (මෙහිදී සඳහන් කරන්න ඕනේ මෙයට පිළිතුරු ලෙස බොහෙම් බෝවෙර්ක් ලියු ලිපියෙන් පසු මාක්ස් මේ ගැන දෙවන වෙළුමේ දීර්ඝ පැහැදිලි කිරීමක් කල බව. ඒවා මෙතන සාකච්චා වෙන්නේ නැහැ. )

අනවරත (නොනවතින) ලෙස සිදුවන භාණ්ඩ - මුදල් - භාණ්ඩ C - M - C ක්‍රියාවලිය පාලනය කරන්නේ මුලිකවම පරිභෝජනය විසින්. එනම් මූලික අවශ්‍යතා සපුරා ගැනීම සඳහා. නමුත් මුදල්-භාණ්ඩ- මුදල්; M - C - M, යන ක්‍රියාවලිය ගත්තොත් මුල හා අග ඇත්තේ මුදලයි. මෙය මෙම ක්‍රියාවලිය අනන්තය දක්වා දික් ගස්සනවා.
M + ΔM ( delta M) යන්න නම් M මුල් මුදලේ අගයෙන් වෙනස් වන මුත් එයත් කිසියම් මුදල් ප්‍රමාණයක් විතරයි (උදා. 110). හැබැයි අපි එය වියදම් කලොත් එය තව දුරටත් ප්‍රාග්ධනය බවට පරිවර්තනය නොවේ. එසේම අපි එය මේ ක්‍රියාවලියෙන් (මේ සන්සරණයෙන්) ඉවත් කලොත් එය නිධානයක් (එකතු කර ගත්;තොගයක් හෝ සංචිතයක් - මාක්ස්ගේ වචනය hoards) බවට පත් වෙනවා. වටිනාකම ප්‍රසාරණය වීමේ උවමනාව හඳුනා ගත් පසු එය පසු; මුදල' (M' ) හා මුල් මුදල (M ) යන දෙක අතරේම පවතින බව පෙනේවි. ඒ නිසා ප්‍රග්ධනයේ චලිතය (ගමන) සිමා රහිත බවත් එහි අරමුණ මේ ක්‍රියාවලිය මුදුනේ හෝ අග හෝ සාක්ෂාත් කරගෙන නැති බවත් තේරුම් ගත යුතුවේ. (මාක්ස් මෙතන මේ කියන්නේ ලාභ ලබා ගැනීමේ කෙළවරක් නැති බවයි).

මේ ක්‍රියාවලියේ ප්‍රධාන නියෝජිතයා වනමුදල් අයිතිකරුවා ධනපතියා (capitalist) බවට පත් වේ. මෙතැනදී කල්පනා කරන්න මෙහෙම. ඇයි  ධනපති හෝ දිළිඳු රටවල බැංකු වලින් පුංචි ව්‍යාපාර සඳහා නය ආධාර දෙන්නේ. ඔබ යම් මුදල් ප්‍රමාණයක අයිතිකරුවකු වෙන තුරු ඔබ ධනපතියකු වීම සඳහා අඩිතාලම වැටෙන්නේ නැති නිසා. ඊළඟට හැමෝම ලොකුවට කතා කරන බිල් ගේට්ස් ගමු. ඔහු තමන් මුලින් බිස්නස් කල හොයා ගත්  මුදලින් සියැටල් කොම්පැනියකින් ඩොලර් 50000 ගෙවා ගත් පරිගණක මෙහෙයුම් පද්ධතිය මදක් වැඩි දියුණු කර IBM වලට විකිණුව. ඔහු ලාභය ගත්තේ එහි license හෙවත් බල පත්‍රය පාවිචි කරන ගානට විකිණීම හා එහි අයිතිය තමන් සතුව තබා ගැනීමෙන්. අනිත් අයට විකිණීමේදී එහි ලාභය හැම වෙලේම වැඩි කලා. එය අනවරත ක්‍රියාවලියක් නිසා ඔහුගේ ආදායමත් ඒ වගේම වැඩි වුණා. මෙතැනදී ඔහු විසින් එම මෙහෙයුම් පද්ධතිය අලුත්වැඩියා කිරීම හා රැකියා අවස්ථා ඇති කිරීම ගැන සාකච්චා කරන්නේ නැහැ.

මෙය ලියුවේ පහත කොමෙන්ටුව තේරුම් ගන්න ආධාරයක් වශයෙන්.

බ්ලොග් කරුවෙකුගේ ප්‍රශ්න:
 සමාජ සුභ සාධක - මට තියන ප්‍රශ්නෙ තත්වය ඕක නම් කොහොමද ලාභය අනවරත ව වර්ධනය වෙන්න කිසිම විදියක් නෑ.එක නිෂ්පාදකයෙකුට ආදායමක් ලැබෙන්නෙ එයාගෙ නිෂ්පාදන විකුනලයි.ඒ නිෂ්පාදන මිලට ගන්න අය ට සල්ලි ලැබෙන්නෙත් වෙනත් නිෂ්පාදකයකු ලඟ සේවය කරලයි.එහෙමනම් ලාභ ලැබීමේ වේගය වැඩි වෙන්න බෑ.කිසියම් අවස්ථාවකදි මේක හිර වෙන්න ඕන නේද?පොදුවෙ ගත්තම ලාභ ලැබීම නතර වෙන්න ඕන.මට හිතෙන්නෙ යුරෝපයෙ දැන් ඒක වෙලා කියල.ප්‍රාග්ධනය ගැන ඔයාට හොඳ දැනුමක් තියන හින්ද ඔයාට කොහොමද ඒක හිතෙන්නෙ.මම නම් ප්‍රාග්ධනය පොත කියවල නෑ.ඔය වටින් ගොඩින් අහපු දැනගත්ත දෙයක් මිස.

පිළිතුර - ඒක හින්ද තමයි මාක්ස්වාදයේ කියන්නේ ලාභය කෘතිමව  වැඩි කරනවා කියල. මේ ලාභය තමා ධනපති පන්තිය බිහි කරන්නේ. ලාභ ලැබීමේ වේගයත් කෘතිමව තමා වෙන්නේ. මාක්ස් මේක තම ග්‍රන්ථයේ පලවෙනි කොටසේ ලිව්වා එකට බොහෙර්ම් බෝවෙර්ක් එකඟ නොවී විවේචනයක් ලියා පළ කලා. පස්සේ මාක්ස් දෙවෙනි වොලියුම් එකේ දී නැවතත් පැහැදිලි කලා . යුරෝපයේ හැම භාණ්ඩයකම සංයුක්තව ගත්තම ලාභ ලැබීම නතර වෙලා නැහැ. එයට හේතුව යුරෝපයේ නිෂ්පාදකයා පාවිචිචි කරන්නේ අඩු ශ්‍රමය. එංගලන්තයේ මාර්කස් ඇන්ඩ් ස්පෙන්සර් කම්හල තියෙන්නේ ලංකාවේ හොරණ. අයිෆෝන් කම්හල් තියෙන්නේ චීනයේ (අඩු පඩියට ) ඒ වගේ. ඊළගට යුරෝපයේ හොඳ වාහන වැඩි ගානට විකිනෙන්නේ දුප්පත් රටවල් වල හා චීනයේ, රුසියාවේ. එනිසා ඒ ලාභ එහෙමමම්යි. නමුත් මදි. මේක හදන්න නම් යුද්ධයක් ඕනේ. ඔයාට ඔය තේරෙන හැටි හරි. දැන් උක්රයිනය අවුලන්නේ ඒකයි . ඔය ඉරාකේ ගහන අයිඑසයිඑස් එකට මුලින් ආයුධ දුන්නේ කවුද සිරියාවේ ගහන්න ?

 සමාජ සුබසාධක: ඔබ හරි. ඔය දේ තමයි වෙන්නෙ. දැනට යුරෝපයෙ නිෂ්පාදන වල ලාභය ක් ඇති.ඒ ආසියානු අප්‍රිකානු රටවලින් ලාභ ශ්‍රමය ගන්න නිසා. ඒත් මේ වැඩේ හැමදාම කරන්න බෑ. අපේ රටේ වුනත් ගාමන්ට් වල වේකන්සි පුරවන්න බෑ. මොකද මේ පඩියට කට්ටිය එන්නෙ නෑ.අපි දන්නව ගාමන්ට් වල උපරිම ශ්‍රම සූරාකෑමක් වෙනව .මෙහෙම සූරාකන එකෙත් සීමාවක් තියනව.පුටුවෙ වාඩිවෙන එක තහනම් කරල,මුත්‍රා කරන එකට කාඩ් ක්‍රම හදුන්වල දීල කරන්න පුළුවන් උපරිම වධ දීලත් සූරාකන්න පුළුවන් උපරිමයටම සූරා කාල දැන් ඉතිරිවෙලා තියෙන්න කස පහර දෙන එක විතරයි. ජීවන වියදම ඉහල යාමත් එක්ක මේ පඩි මදි.අපේ වගෙ රටවල ආර්ථික වර්ධනය වෙන කොට ජීවන වියදම වැඩි වෙනව.තව දුරටත් ලාභ ශ්‍රමය සොයාගෙන ආසියාවට අප්‍රිකාවට යන්න බැරි වෙනව.වැඩි පඩි ගෙව්වොත් ලාභයක් නැතිවෙනව කියමු.එහෙම වුනොත් ඉදිරියෙදි ආසියාවෙයි යුරෝපයෙයි නුපුහුණු කම්කරු වැටුප් සමාන වෙයි.
ලාභ ශ්‍රමය ගැන කියනවනම් ඔය කම්හල් ලඟදිම වැහෙනව.දැනටත් ගාමන්ට් වැහීගෙනනෙ යන්නෙ.ආසියාවට අප්‍රිකාවට අලුත් කර්මාන්ත ඉදිරි දශාක්යෙදි එයි කියල හිතන්න අමාරුයි.

පිළිතුර:මේක කාලය පිළිබද ප්‍රශ්නයක්.කවදහරි ලාභය වර්ධනය වෙන එක නතර වෙනව. ධනපති පන්තියෙ අවසානය උදා වෙන්නෙ එදාටයි.මේක ස්වාභාවික ක්‍රියාවලියක්.

මට හිතෙන විදියට ලංකාවෙ ශ්‍රමිකයකුගෙ වැටුප වගෙ දහ ගුණයක් දියුණු යැයි කියන රටක ශ්‍රමිකයෙකුගෙ වැටුප. අපේ රටවල වැටුප් වැඩි වුනාට ඒ වේගයෙන් අර රටවල වැටුප් වැඩි වෙන්නෙ නෑ.අපේ රටවල වැටුප් අර මට්ටමට එනව මිස.ග්‍රීසිය,ස්පාඥය වගෙ දකුණු යුරෝපීය රටවල ආර්ථිකය ඍන වෙනව.මේ දෙරටත් කඩා වැටෙන එක පටන් අරන්ද මන්ද.යන්තම් අල්ලගෙන ඉන්නෙ බ්‍රිතාන්‍යයයි ජර්මනියයි විතරයි.මම හිතනව සමස්තයක් වශයෙන් චීනය හැර ලෝකෙ හැම ආර්ථිකයකම වර්ධන වේගය 2.0 ට අඩු වෙලා.දැනටම ඒක වෙලා හුඟක් රටවල. මේක මෙහෙම වෙලා අද හෙටම ආර්ථික වර්ධනය 0 වෙනව. ධනපති ක්‍රමය නතර වෙන්නෙ අන්න ඒ වෙලාවෙ.

ප්‍රශ්නය - සමාජ සුභ සාධක කියනවා වගේ ලාභය වර්ධනය වන එක නතර වෙනවද? මාක්ස් කියන විධිහට M -C -M' ක්‍රියාවලිය දිගටම (නොනැවතී) සිදුවෙන නිසා ලාභය වර්ධනය වීම නතර වෙන්නේ නැහැ. ලිව්වේ 7 July 2014

Thursday, 3 July 2014

දක්ෂිනාංශයෙන් සමාජවාදයක් පැතීම හා මාක්ස්වාදී රනිල්

මේක ලියන්න හිතුනේ (වෙන මාතෘකා දාහක් හිතේ නලියද්දි) ත්‍රිමානයේ  තිබ්බ ලිපියකට දාපු කොමෙන්ටුවක් දැකලා . ඒකෙ  කියල තිබෙනවා මා  වැනි ප්‍රගතිශීලින් (මන් දන්නෙත් නැහැ මං  ප්‍රගතිශීලි ද කියල) රනිල්ට සහයෝගය දක්වනවා කියලා . ඒ කියන්නේ මෙහෙම දෙයක්. 

"3මාන වෙබ් අඩවියට එම කමෙන්ටු යොමු කරනා “ප්‍රගතිශීලීන්” මූලික වශයෙන් අවබෝධ කොටගෙන ඇති ප්‍රධානතම කාරනාව වන්නේ එක්සත් ජාතික පක්ෂය බලයට ගෙන ඒම යුගයේ ප්‍රගතිශීලීම කටයුත්ත බවය. මාගේද දේශපාලන ස්ථාවරය එය වේ."

මගේ ලිපි වලින් වත් කොමෙන්ටු වලින් වත් එහෙම දෙයක් කොහෙවත් ලියවිලා තිබෙනවද කියල මම කල්පනා කලා  ඇත්තටම? මම දන්නා විධිහට නම් නැහැ. මේ කොමෙන්ටුවෙන්  ගම්‍ය වෙන්නේ මෙහෙම දෙයක්. එක්කෝ මේ ලියන තැනැත්තා එජාපය ට ලැදී කෙනෙක්. එහම නැත්නම් වෙන මාක්ස්වාදී පක්ෂයක සාමාජිකයෙක් පොඩි ටෙස්ට් එකකට ලියපු දෙයක්.
 
මගේ යහළුවෙක් ඉන්නවා බොබ් චැප්මන් කියල ඇමෙරිකානු ජාතික විශ්‍රාම ලත් ඉංජිනේරුවෙක්. ඔහුගේ වෙබ් අඩවියේ ලින්ක් එක මගේ ඉංග්‍රීසි බ්ලොගයේ තිබෙනවා. මිනිහ උග්‍ර දෙවියන් අදහන  ක්‍රිස්තියානි ආගමිකයෙක්. ඒ වගේම අමෙරිකන් තේ පක්ෂයේ  "tea party movement " http://en.wikipedia.org/wiki/Tea_Party_movement   අනුගාමිකයෙක්. මාත් එක්ක ගිය ඊමේල සංවාදයකදී මිනිහ කිව්වා:
 අජිත් මම ඔබේ අදේව වාදය හා මාක්ස් වාදය පිළිගන්නේ  නැහැ කියල. මන් කිව්වා බොබ් ප්‍රශ්නයක් නැහැ.
 මට මේ ටික කියන්න. ඔබට මිනිස්සුන්ට රස්සා  දෙන්න ඕනේ නේද? ඔව් .  
ඔබේ දෙවියෝ මිනිසුන් වහලුන්  කර ගන්න  එකට සූරා කන එකට විරුද්දයි නේද? ඔව්
ඔබට ඔබම ගත්ත නය ගෙවන්න ඕනේ නේද? ඔව් 
ඇමෙරිකාවේ මිනිස්සු හැමෝම නය වෙලා නේද? ඔව් . 
ධනපතියෝ තව පෝසත් වෙනවා නේද?  ඔව්
ධනපතියෝ ඔයිට වැඩිය අඩුම ගානේ   දෙවියෝ කිව විධිහටවත්  ඉන්න ඕනේ නේද? ඔව්. 
ඔබට ඇමෙරිකන් රාජ්‍ය මැදිහත්වීම අඩු කරන්න ඕනේ නේද? ඔව්
නය අඩු කරන්න ඕනේ නේද? ඔව් 
රජය අහෝසි වෙලා යනවට ඔබ කැමති නේද ? ඔව් 
ඔබේ පළාතේ මිනිස්සු පළාතේ වැඩ තම තමන් විසඳ ගන්න හදනවා  නේද?  ඔව් . 
ඉතින් බොබ් මාක්ස් කියන්නෙත් ඕකමනේ? ...බොබ්   බොබ්..
.සුමානෙකට පස්සේ බොබ් ලියනවා  අජිත් ඒ වුනාට මම නිදහස් ආයෝජනයට, නිදහස් වෙළදාමට  කැමතියි. දියුණුවෙන්න පුළුවන් ඒකෙන් විතරයි
බොබ් යුරෝපේ හෙම නය වෙලා නිසා ආයෝජනය කරන්න එන්නේ අදේවවාදී චීන කොමියුනිස්ට් කාරයොයි රුස්සෝ ටිකයි නේද? ඔව්--

බොබ් දැනට ඇමෙරිකාවේ ඔත්තු සංවිධාන මාක්ස්වාදීන් හොරෙන් ඝාතනය කරලා (බොබ් ඔබේ යහලුවත් එතනට ඇතුලත්) , නැති කරලා දාන නිසා අඩුම ගානේ  අන්ත දක්ෂිණාංශික බවක් පෙනුනත් රජය අහෝසි කරන්න කැප වෙලා ඉන්න නිසාත් , ඔබ හොඳ  පුද්ගලයෙකු නිසාත්  ඔය පක්ෂෙන් හරි ඇමෙරිකාවේ ඔය ක්‍රමයට හා ඔබාමාට විරුද්ධව සටන් කරන එකට මගේ වචනෙන් හරි සහයෝගය දෙනවා. අජිත් බොහොම ස්තුතියි. අදේවවාදියෙක් වුනත් ඔබ හිතන්නෙත් අපි හිතන විධිහට

පිස්සුද බොබ් මම කල්පනා කරන්නේ ඔබේ පවතින තත්වයට සාපේක්ෂව. ....

දැන් රනිල් ඇතුළු විපක්ෂේ ඔය කියන තරම්ම හොඳ නැහැ. පුබුදු ජයගොඩ කියනවා වගේ අධ්‍යාපන ධවල පත්‍රිකාව රනිල් ගේනවා මටත් මතකයි. එහෙම කෙනෙක් මැරිලා උපදින්න විධිහක් නැහැ. රනිල් කවදාවත් පන්ති අරගලයකට සහයෝගය දෙන්නෙත් නැහැ. ඒ නිසා මම එජාපය බලයට ගෙන ඒම  හෝ රනිල් සජිත් බලයට ගෙන ඒම  ප්‍රගතිශීලි කියල කවදාවත් හිතන්නේ නැහැ.නමුත් පවතින අසාමාන්‍ය ලෙස බෙලහීන විපක්ෂයේ බෙල්ලට පොලුපාරවල්  දෙන්නත් මට ඕන කමක් නැහැ. ගහ මරා  ගන්නේ නැතුව ඕන දේශපාලනයක්. 
ත්‍රිමාණ යේ කොමෙන්ටුව: http://3mana.com/%E0%B7%84%E0%B6%AD%E0%B6%BB%E0%B6%AF%E0%B7%99%E0%B6%B1%E0%B7%8F%E0%B6%B8-%E0%B7%83%E0%B7%96%E0%B6%BB%E0%B6%BA%E0%B7%9D/#comment-6748