මුස්ලිම් වෙළෙඳාම හා සිංහල වෙළඳාම

මනාගේ පින්තාරුව හා තවත් බ්ලොග් කරුවන් කිහිප දෙනෙකුම පසුගිය මාසවල ලියු බ්ලොග් ලිපි කිහිපයක් දැක ලිවීමට සිතා  සිටි මේ ලිපිය රයිගමයා එක දිගට විවේකයක් නැතිව ලියන ලිපි මාලාව දැක ලැබූ උද්දාමයෙන් ලියන්නට සිතා  ගතිමි. මෙය සිදුවුයේ ම ශ්‍රී ලංකාවට නිවාඩුවට පැමිණි කාලයකය. වරක් මගේ සොහොයුරා  සමග කිසියම් වැඩකට කොළඹ ගොස්  රෑ  පමාවී ඔහුගේ නිවස වෙත පැමිණෙමින්  සිටියෙමු. ඔහුගේ  නිවසේ ගෑස් සිලින්ඩරයක් අවසන් වී තිබු නිසා ඒ වෙනුවට වෙනත් එකක් රැගෙන යාමට ඔහු හිස් සිලින්ඩරයද රැගෙන ආවේය.  බොහෝ පමාවී තිබුණු අතර රාත්‍රිය දක්වා විවෘතව තිබෙන කඩ කිහිපයක්  ඇති බව පැවසූ ඔහු නිවසට  ආසන්න නගරයේ එක්තරා සිංහල ජාතිකයෙකු ගේ වෙළඳ සලක්  අසල වෑන් රථය නැවැත්වීය.

මගේ සොහොයුරා කොළඹ කොටුවේ පිපිරුණු එල්ටීටීඊ සියදිවි නසාගන්නා බෝම්බ කරුවෙකු ගේ ප්‍රහාරයකදී තුවාල ලැබ කකුලක් බිඳී යාම නිසා  කකුලේ  වානේ (යකඩ) කූරක් දමා  ඇති අයෙකි.  ඒ නිසා ඔහු ඇවිදින්නේ කිහිලි කරුවක ආධාරයෙනි. ඔහු සෙමෙන් වාහනයෙන් බැස කිහිලි කරුවේ  ආධාරයෙන් වාහනයේ මැද  දොරටුවට එන විට මම වහාම බැස  සිලින්ඩරය ගත්තෙමි. අප එය රැගෙන වෙළඳ සල ඉදිරියට ගොස්   බලා  සිටියෙමු.  කඩයේ මුදලාලි කවුදෝ ගැහැණියක සමග බර කතාවකය. ඔහු අපේ පැත්ත බැලූ මුත් අර  "නෝනා " සමග කතාව  නතර කලේ නැත. "නෝනා ද " කතා කලේ මහත් උජාරු ස්වරූපයකිනි. කඩයේ සේවකයෙකු ද සිටි මුත් ඔහු වෙනත් "බර" වැඩක්ය. කඩ හිමියා  මේ වැදගත් කතාව කරන කාන්තාව කවුද යයි මම සහෝදරයා ගෙන් විමසීමි. ඇය  ප්‍රාදේශීය සභාවක වැඩකරන ටිකක් වෙන්නට  ඔලුව උදුම්මාගෙන සිටින තැනැත්තියක බව සහෝදරයා පැවසුවේය. ඉවසීමෙන් විනාඩි පහකටත් වඩා  බලා  සිටි පසු, මොන කෙහෙල්මලකටද මෙතන ඉන්නේ වෙන කඩ නැත්දැයි මම සහෝදරයා ගෙන් ගෙන් විමසීමි. මේ වෙලාවේ ඇරලා තිබෙන්නේ මුස්ලිම් කඩයක් විතරයි කී ඔහු තමන් මුස්ලිම් කඩ වලට නොයන බවද කිවේය. මෙතන බඩු  ගන්නට ඇවිත් මුන්ගේ ආඩම්බර බලනවාට වඩා  මුස්ලිම් කඩයට යමු යයි මම කීවෙමි.

අකමැත්තෙන් වුවද සොයුරා සිලින්ඩරය නැවත පටවාගෙන රථය හරවා ගත්තේය. මුස්ලිම් කඩයේ මුදලාලි ද කඩය වසන්නට ළඟ බැවින් දෙතුන් දෙනෙකු සමග කතා කරමින්,  කවුන්ටරය අස්  කරමින්ද උන්නේය. වාහනය නතර කල සැනින් සිනාමුසු මුහුණින් ඔහු එදෙස බැලිය.  සොහොයුරා  රථයෙන් බැස  ගෑස්  සිලින්ඩර් තියෙනවා දැයි ඇසීය. වහාම සේවකයෙකුට කතා කළ  ඔහු සිලින්ඩරයක්  රැගෙන එන ලෙස දැන්විය. සේවකයා වහා පැමිණ රථයෙන් අපේ හිස් සිලින්ඩරය රැගෙන කඩයේ තබා අලුත් එකක් රථයට පැටවීය.
අප‍ට එය ඔසවා  ගෙන ගොස් කඩය ඉදිරිපිට බලා  සිටීමට සිදු නොවිණි. සේවකයා ඉන්පසු සොයුරා  ගෙන් මුදල් රැගෙන මුදලාලිට දී ඉතිරිය ද ගෙනත් දුන්නේය. මුදලාලි  අප නික්ම යනවිට අප හොඳින් දන්නා අඳුනන කෙනෙකු පරිද්දෙන් අතද  වැනීය. සියල්ලටම ගතවුයේ විනාඩි කීපයකි. ඒ පාරිභෝගිකයාට සළකන වෙළඳාම යි.

සිංහල වෙළෙන්දා  වෙළඳම් කරන්නේ තමන් කඩය ගෙනි යන්නේ පාරිභෝගිකයාගේ ලාභයෙන් නොවන ආකාරයටය. මෙවැනිම ආඩම්බර කමක්  මා දුටුවේ සෝවියට් දේශයේ වෙළඳ සල් වලය.

සෝවියට් දේශයේ වෙළඳ සල්වල බොහෝ දේවල් මිල ඉතා අඩුය. ඒ නිසා භාණ්ඩයක්  හෝ දෙකක් ගන්නවා වෙනුවට කීපයක් ම මිලදී ගැනීම බොහෝ අයගේ සිරිතය. මේ නිසා කෘතීම භාණ්ඩ හිඟයන්ද එහි නිතර ඇති වුනි. වෙළඳ සල් අයිති රජයට නිසා ඒවයේ වැඩ කරන අයද  රජයේ සේවකයන්ය.  රජය කියන්නේ ජනතාව කියා කොතෙකුත් කීවද සැබෑ  ලෝකයේදී එය එසේ නොවේ. සැබෑ ලෝකයේ රජය ජනතාවගේ නියෝජිතයා ම නොවේ. සෝවියට් දේශයේ ජනතාවට රජය තමන් ගේ යයි කියා තිබුනද ඔවුන් සිතුවේ රජය යනු කොමියුනිස්ට්  පක්ෂය හා රාජ්‍ය නිලධාරීන් බවයි.  සාමාන්‍ය වෙළඳ සල් හා විශාල සුපර් මාර්කට් වල සේවකයන් සිතුවේ තමන් රජයේ සේවකයන් මිස ජනතාවගේ   සේවකයන් නොවන බවයි. ජනතාවට හොඳ සේවයක් සැපයුවා කියා ලැබෙන දෙයක් නැත. ඒ නිසා තියෙන ටික හොරකම් කිරීමටත් ඉතිරිය යහළුවන්ට දීමටත් ඔවුන් පෙළඹුණි.

කෝබින් සමහර විට ජයග්‍රහණය කලොත් මේ වැනි තත්වයක් ඇති වේ යයි  බොහෝ දක්ෂිණාංශික පුවත් පත් බිය පල කරනු ලබයි. කෝබින් දැනට එවැනි දෙයක් කරන්නේ යයි කියා නැත. දුම්රිය සේවය එංගලන්තයේ අතිශය අසාර්ථක නිසා එය යුරෝපීය ක්‍රමයට සාමුහික අයිතියට ගෙන එම පිළිබඳව පමණක් ඔහු කතා කරන බැවින් ඉහත ප්‍රශ්නය ගැන ඔහුට අවබෝධයක් ඇති බව සිතිය හැකිය. කෙසේ වතුදු එංගලන්තය වැනි පාරිභෝගිකයාට සලකන වෙළඳ සල් හා සේවා තිබෙන රටක සියල්ල  රාජ්‍යයට අයිති කර ගැනීමට කෝබින් නොයනු ඇත යන්න මගේ විශ්වාසයයි. එසේම එංගලන්තයේ හෝ යුරෝපයේ වෙනත් රටවල රාජ්‍ය ආයතන වල සේවකයන් (නගර කවුන්සිල් හැර - මෙය වෙනම කතාවකි) තමන් ගේ සේවය ලබාගෙන එන ජනයා ට හොඳින් සලකති.

තමන් මේවායේ අයිතිකරුවන් බව ජනතාවට ඇති දැනුම මෙයට හේතුව යයි සිතමි.

උපුටා ගත්තේ ෆේස්බුක් හි එස්එල් බුවා ප්‍රෝෆයිලයෙනි.

මත්තල ගුවන් තොටුපලට ගිය වියදම ඉදිරියට දරන්නේද ඒ ණයට පොලිය ගෙවන්නේද ශ්‍රී ලංකාවේ ජනතාවය. ඒ ගුවන් තොටුපල ශක්‍යතාවය පිලිබඳ වර්තාවකදී  උපයෝගිතාව අතින් ඉතාම හොඳ තැනක් බවට සඳහන් වූ බව  මිතුරෙකු පැවසිය. ඔහුට අනුව මාගම්පුර වරාය ද එවැනිම වැදගත් මර්මස්ථානයක පිහිටා  තිබේ.  නමුත් මේ දෙකම  ආර්ථික වශයෙන් ලාභ ගෙන දෙන ඉදි කිරීම් නොවේ. මොන සමාජක්‍රමය යටතේ වේවා පලප්‍රයෝජනයක් නැත්නම් එය කුමට ඉදි කලේද යන ප්‍රශ්නය මතුවේ.  අවුරුද්දට වරක්  දෙවරක් ගුවන් යානයක් පැමිණි විට එයත් ප්‍රවෘත්තියක් බව ෆේස්බුක් හි ඇති උපහාස පින්තුරයක සඳහන් විය.  මේ සඳහා ණයට  ගත්  මුදල් රාජපක්ෂ මහතා හෝ ඒ රජයේ ඇමතිවරුන් විසින් ගෙවන්නේ නැත.  ඔහුගේ නම ඒවාට යෙදිය යුත්තේද ඔහු ගේ රජයකින් නොව ඉන්පසු එන වෙනත් රජයකින් හා ජනතාව ගේ අනුමැතියෙන් ඔහු ගේ සේවය අගැයීමට පමණය.

මහින්දෝදය විද්‍යාගාර හා අධි වේගී පාරවල් ගැන කිව යුත්තේද මේ ටිකමය. මහින්ද රජ සමයේ ඉදි කලේ රජු ගේ භාණ්ඩාගාරයේ ගොඩ කරගෙන තිබූ   මුදලින්  නොව රටවැසියාගේ බදු හා ආදායම් උකසට තබා ණයට ගත්   මුදල් වලිනි.  යෝජනාව දේශපාලකයෙකු ගෙන් විය හැකිය. ජනතාව ඔවුන් පත් කලේද එයටමය. ඒ නිසා ඒවායේ අයිති කරුවන්ද ඔවුන්ය. මෛත්‍රී උදාව , වික්‍රමසිංහ පුර වැනි ඉදිකිරීම් ඉදිරියට පැමිණේදැයි නොදනිමි.

මෑතකදී විවෘත කරන ලද අධිවේගී මාර්ගයේ පීත්ත පටියක් කාන්තාවන් දෙදෙනෙකු විසින් බලෙන් කපා  තිබුණි. හරියටම හරිය. අමාත්‍ය කිරිඇල්ල ඔහුගේ මුදලින් ඒවා හැදුවේ නැත.  ප්‍රශ්නය නම් මේ කාන්තාවන්  දෙදෙනා එය බැර  කර ඇත්තේ මහින්ද රාජපක්ෂ මහතාට වීමය. ඒ මදිවට ප්‍රසන්න රණතුංග ඒ දෙදෙනා බැලීමට ද ගොස් (ගියා ද දන්නේ නැත )   ඇත. ඔවුන් කල ක්‍රියාව අගය කිරීමටය. ඔව්,  ඔවුන් ජනතාවට අයිති දෙයක් ලෙස ජනතාවගේ නාමයෙන් පීත්ත  පටිය කැපුවා නම් ප්‍රශ්නයක් නැත. ප්‍රසන්න රණතුංග යන්නේ ඔවුන් මහින්ද වෙනුවෙන් හෝ ඔහු වෙනුවෙන් එය කළ  නිසා ස්තුති කරන්නටය. දැන් ප්‍රසන්න හිතන් ඉන්නේ මේ එයාගේ බුදලයෙන් හැදූ  එකක් කියාද? ඔහුගේ පියා  වන රෙජි රණතුංග වත් එහෙම මුදලක් භාණ්ඩාගාරයට ප්‍රදානය කල කියාවත් අපි දන්නේ නැත.

මා සිතන්නේ මේ සෑම විවෘත කිරිමකම දැක්වෙන "අහවලා විසින් ජනතා අයිතියට  පවරන ලදී" වෙනුවට  "ජනතාව ගෙවා සෑදූ අධිවේගී මාර්ගය ජනතාව විසින්  අහවලාට කියා විවෘත  කර ගන්නා  ලදී " යනුවෙන්  වෙනස් කල යුතු බවයි. ජනතාවට අයිති දෙයක් ජනතාවට නැවතත් පවරන්නේ කුමටද?

දැන් නැවතත් ලාභ පාඩු වෙළඳාමට යමු. මේ පැත්තේ ඇති දෙමළ  කඩයේ අය ඉතා හොඳය . වල්  ඌරු මසක්, මුව මසක් ගෙන ආ  විගස අපට දුරකතනයෙන් කතා කර දන්වති. ගිය විට සිංහලෙන් කතා කිරීමට යත්න දරති.  (මට නම් එහි වැදගත් කමක් නොපෙනේ. නමුත් ඒ ඔවුන් ගේ කැමැත්තය) හොඳ  සැළකිල්ලක් දක්වති. ඒ නිසා මම එතනට යාමට කැමතිය. පහත වරකා  කෑල්ල එහි විකිණීමට  තිබුනේ පවුම් 4.50 කට හෙවත් රුපියල් 990 කටය.. (දැන් ඇති  අනුපාතයට අනුව )  හොඳින් බැලූ  විට එය වරකා ගෙඩියෙන් 1/16  කි.  ඒ අනුව මුළු වරකා ගෙඩිය පවුම් 72කි (රුපියන් 15400කි) . ප්‍රවාහන වියදම් වශයෙන්  පවුම් දහයක් හා බදු සඳහා පවුම් 2 කක්  අයින් කලොත් ලාභය පවුම් 50-60 වේ.  අපි අර 1/16 කෑල්ල  රැගෙන සතුටු වෙමු.

දැන් කල්පනා කර බලමු සෝවියට් දේශයේ කඩ ගැන. ලාභයක් නැති නිසා භාණ්ඩ වල මිල අඩුය. සේවිකාවන් අපට  හොඳින් සලකන්නේ යාප්පුවෙන් යමක් විකුණන්නේ නැත.  නමුත් මිලදී ගත හැකි නිසා අපි පෙරේත කමට එකම වර්ගයේ භාණ්ඩ කීපයක් රැගෙන් ගොඩ ගසා  ගත්තෙමු. නැත්නම් සේවික සේවිකාවන්  ඒවා සඟවා (අර ආණ්ඩුවේ සමුපකාර  මෙන්) පස්ස දොරෙන් වීකුණුහ .

සෝවියට් දේශයේ වැරැද්ද වුයේ මිනිසුන් රජය තමන්ට පිටතින් ඇති දෙයක් බව සැලකීමයි. මාක්ස් කි අහෝසි වී යන රාජ්‍යය වෙනුවට සෝවියට් රජය බලසම්පන්න එකක්  විය. (නැතහොත් අප එසේ සිතා සිටියෙමු) එය ඇද  වැටුනේ ගිණිකුරු  වලින් සෑදූ  මාලිගයක් වැටෙන ආකාරයටය.  ඇද වැටී ගොඩ  නැගුනේ මිල අධික භාණ්ඩ ඇති, ඩොලර් මිලියන් ගණන්  වත් පොහොසත්කම් ඇති රුසියානුන් සිටින අර්ධ ඒකාධිකාරී  රාජ්‍යයක් ය.  වැඩි ගණන් දී තත්වයෙන් උසස් භාණ්ඩ ගැනීමට එහි වැසියන් කැමතිය.

මේ අප කැමති ජිවන රටාවයි. 

සම්බන්ධන් අනුර සුසංයෝගය හෙවත් යහවිජ්ජාව

මම ටී එන් ඒ එකට විපක්ෂ නායක කම නොදිය යුත්තේ මන්ද කීමට හේතු කීපයක් ම ලිව්වෙමි. ඉන් එක හේතුවක් වූයේ 1977 න්  පසු සිදුවූ සිදුවීම් පෙළය. එම ලිපිය මෙතන තිබේ.  මේ ලිපියට අනතුරුව සම්බන්ධන් මහතාට විපක්ෂ නායක පදවිය ලැබීම සිදුවිය යුතු සාධාරණ දෙයක් හැටියට බොහෝ දෙන තර්ක කරන ලිපි පළවිනි. ඉන් සමහරක් සාධාරණ තර්ක  ඉදිරිපත් කර තිබේ.  අශාන් වීරසිංහ විකල්ප වෙබ් අඩවියේ ලියන ලද මේ ලිපිය එවැන්නකි.  එහි මෙසේ කියා තිබේ.
""මේ පාර්ලිමේන්තුවේ දැනට තිබෙන බරපතලම හා ඉක්මන්ම විසඳුමක් අපේක්ෂා කරන අර්බුදය විපක්ෂ නායකයා පත් කිරීමයි.ඒ සඳහා විවිධ නම් යෝජනා වී ඇති නමුත් ඒ හැමෙකාම පාහේ දුෂ්ට මහින්ද රෙජීමය යටතේ හිතේ හැටියට හොරා කෑ, නැතහොත් කටවාචාලකමින් පාර්ලිමේන්තුවට සහ පොදුවේ දේශපාලනය නමැති භාරදූර කාර්යයට නිගා දුන්, හාල්පාරුවන්ය."
එසේම  ඔහු මෙසේ අවධාරණය කරයි.

"එනම්, විපක්ෂ නායකකම සිංහලයා අතම රඳවා ගැනීමට ඇති දැඩි අවශ්‍යතාවයයි. මේ කාරණයම වඩා සුවිශේෂ කොට කියන්නේ නම්, විපක්ෂ නායකකම දෙමළෙකුට යාමට ඇති බියයි. ‘මහින්ද ජාතිවාදියෙක් දෙමළ මිනිස්සු පව්, අපෝ අපි නම් එහෙම නෑ’ කියන ඇතැම් පුරවැසියන්ගේ මානසික වපසරිය තුළ පවා මේ භීතිකාව පැතීරී නැතිද?"

මගේ බ්ලොග් අඩවියේ ඉහත ලිපියේ මා  පල කරන තර්කයට ඔහු ගේ ලිපියේ  පිළිතුරක්  නැත.  එනම් ජාතිවාදී වේවා හෝ නොවේවා ආණ්ඩුවට චන්දය දුන් පිරිස මෙන්ම තව ලක්ෂ 47 වෙනත් පක්ෂයකට හෝ පක්ෂ වලට චන්දය  දුන් බවත් දෙමළ  ජාතිය පමණක් නියෝජනය කරන ටී එන් ඒ එකට ලැබුනේ චන්ද පන් ලක්ෂයකට ආසන්න  සංඛ්‍යාවක්  පමණක් බවත්ය. ඔවුන්ට ආසන  16 ලැබීම චන්ද ක්‍රමයේ විකෘතියකි.

කරුණාකර මෙය වරදවා වටහා නොගන්න. දෙමළ  හෝ මුස්ලිම් ජාතිකයෙකු ලංකාවේ ජනාධිපති හෝ අගමැති වීම ගැන මගේ කිසිම විරුද්ධත්වයක් නැත. එසේම දෙමළ  ජාතිකයෙකු විපක්ෂ නායක වීම පිළිබඳවද කිසිම විරුද්ධත්වයක්  නැත.  නමුත් ටීඑන්ඒ නමැති දෙමළ  ජාතිය නියෝජනය කරන පක්ෂයෙන් හෝ සිහල උරුමය නමැති සිංහල ජාතිය නියෝජනය කරන පක්ෂයෙන් හෝ මුස්ලිම් කොංග්‍රසයෙන් කෙනෙකු විපක්ෂ නායක වන්නේ නම් ඔවුන් නියෝජනය කරන සුළුතරය විපක්ෂය වීම වැළැක්විය නොහැකිය.  සිංහල උරුමයේ මනමේන්ද්‍ර මහතා විපක්ෂ නායක වුවහොත් ඔහුට "අපි තමා  මේ රටේ විපක්ෂය. සිංහල ජාතිය මේ ආණ්ඩුවට සම්පූර්ණයෙන් විරුද්ධයි කියා කීමට හැකියාව තිබේ."

මෙහිදී සිදුවූ සාධනීය කරුණු දෙකින් එකක් නම්  සම්බන්ධන් මහතා විපක්ෂ නායක පදවියට පත් වූ පසු තමන් සිංහල ජනතාවත් නියෝජනය කරන්නේ යයි කියා  ඒ මහතා  කල නිහතමානී ප්‍රකාශයි . එසේම ජවිපෙ  අනුර කුමාර මහතා ට විපක්ෂයේ ප්‍රධාන සංවිධායක කම ලබා දීමද  සාධනීය දෙයකි.

අශාන්ගේ මුල් කියමනට නම්  පිළිතුරක් රජයෙන් ලැබී තිබේ. සම්බන්ධන් "තෝරාගෙන " ප්‍රගතිශීලින් මුලා  කල රජය අර අශාන්  හාල්පාරුවන් යැයි  නම් කරන සමහරුන්  ඇමතිවරුන් ලෙස රජයට බඳවා ගෙන තිබේ.

මෙහිදී 2005 වසරේ අග භාගයේ සිදුවූ  කතා බහක් මගේ මතකයට නැගේ. මෙය බීබීසී සිංහල සේවයේ එවකට සිටි කලමනාකර මහතා සහ එම  සේවයේම රැකියාව කල ජන මාධ්‍යවේදී මිතුරකු සමග අපේ මිතුරෙකුගේ හෝටලයක පැවති  සාදයකදී ඇතිවූ සංවාදයකි. එම සංවාදයේදී ඔවුන් දෙදෙනාම වාද කලේ එල්ටීටීඊ සංවිධානය කොතරම් බල සම්පන්නද යන්නය. ඔවුන් රටෙන් තුනෙන් එකක් පාලනය කරන බවද තමන්ගේම හමුදාවක් ඇති බවද ඔවුන් පරාජය කිරීම කල නොහැකි බවද ඔවුහු කිහ. මෙයට එකඟ නොවුණු මා කිවේ එල්ටීටීඊ සංවිධානය තමන් ගැන අධිතක්සේරුවකින් සිටින බවත් ප්‍රමාණයෙන් විශාල ශ්‍රී ලංකා ත්‍රිවිධ හමුදා වලට ඔවුන් අවශ්‍ය නම් පරාජය කල හැකි බවත්ය.

මෙහිදී ඔවුන් පැවසුවේ මා  ජාතිවාදී ස්ථාවරයක් ගන්නා  බවයි. මේ කතාව කියන්නේ ජාතිවාදීන් බවත් දෙමළ ජනතාවගේ ප්‍රශ්න විසඳීම  වලක්වන්නට කරන කතාවක්  බවත් ඔවුහු කීහ.
තවත් කීප දෙනෙකුද එකතුවුන මේ සංවාදයේදී ජවිපෙ අවසන් කැරැල්ලට සිදුවූ දේ මතක් කර දුන් මා  පැවසුයේ,  හමුදාවට අවස්ථාවක් දුනහොත් එවැනිම දරුණු ආකාරයකින් පවා මේ යුද්ධය  නිමවිය හැකි බැවින් එල්ටීටීඊ සංවිධානය අඩියක් පසු පසට රැගෙන අවම වශයෙන්   තමන් නියෝජනය කරන  මිනිසුන් ගැනවත් සිතා  සාකච්චා මේසයට පැමිණ වෙනම රටක් නොව ඊට වඩා  අඩු ස්ථාවරයකට  එළැඹීම වඩා  හොඳ බවයි. ඔවුහු අප සමග එකඟ නොවූ අතර අප ජවිපෙට සම්බන්ධ ජාතිවාදීන් බවට චෝදනා කළහ.

2009 යුද්ධය අවසන් වන අවස්ථාවේ මම ඉහත සිදුවීම එම මිතුරාට මතක් කර දුන් අතර සොල්හෙයිම්  බාලසිංහම් ට කියා බැණ වැදුනා යැයි  කී  කථාව  ඔහු පැවසුවේ එවිටය. (මගේ මුල් ලිප්යේ සඳහන් කල) .

දැන් යුධ අපරාධ ගැන මතක් කරන වේලේ  වෙනත් දමිල සගයෙකුගේ වෙබ් අඩවියක මා පැවසූ කරුණ වුයේ ප්‍රභාකරන් ගේ අධි තක්සේරුව විශ්වාස කරමින් ඔහු විවේචනය නොකර එල්ටීටීඊ සංවිධානයේ ස්ථාවරය ට  සහයෝගය දුන් බ්‍රිතාන්‍ය මන්ත්‍රීවරු හා ද්‍රවිඩ සංසදයේ අයගේ දෑත් වලද මියගිය දෙමළ ජනතාවගේ ලේ තැවරී ඇති බවයි.  ඒ ඔවුන් අඩුමගනනේ කිලිනොච්චියන් පසුව වත් සමාදානයකට එළඹෙන්නට  ප්‍රභාකරන්ට බල නොකළ නිසාය.  කිලිනොච්චිය ඇද වැටීමට කලින් ඒ කුඩා නගරය සඳහා සටන ස්ටාලින්ග්‍රාඩ් නගරයේ වූවා වැනි සටන් වලට සමාන කරමින් ඔවුන් කියූ වගඩාඩම්බර කථා වලට සිනා සීමත් ශෝක වීමත් හැර වෙන යමක් අපට කළ  නොහැකි විය.
පෙරටුගාමී පක්ෂයේ දීප්ති කුමාර ගුණරත්න මහතා මෙන්ම නව සම සමාජයේ ආචාර්ය වික්‍රමබාහු මහතා වැනි අයගේ ස්ථාවරය  එනම් එල්ටීටීඊ සංවිධානය විමුක්ති සංවිධානයක් ලෙස ගෙන සහය  දිය යුතුය යන්නට මට එකඟ වීමට නොහැක්කේ මේ නිසාය.  ඒ සිංහල රජය තරමට ම එල්ටීටීඊ සංවිධානයද නරුම වූ නිසාය. එංගලන්තයේ කප්පම් ගැනීමේ සිට, ක්‍රෙඩි කාර්ඩ් වංචා, මත  ද්‍රව්‍ය විකිණීම හා දෙමල නොවන තරුණියන් ගණිකා වෘත්තියේ යෙදවීමත් ඔවුහු අනුදත්හ. විප්ලවවාදී සංවිධාන  එවන් දේ වල යෙදෙන්නේ නැත.

මේ සිද්ධිය ගැන මගේ තවත් මිතුරකු පැවසුයේ මේ බ්‍රිතාන්‍ය හා කැනඩා මන්ත්‍රීවරු මෙන්ම ෆ්‍රැන්සිස් හැරිසන් ආදීනුත් එවැනි  ස්ථාවරයන්  ගත්තේ මුදල් හා චන්ද වලට  බවයි. එය ඔවුන් ගේ ජිවන මාර්ගයක් විය. අදටත් එය එසේමය.

විකල්ප සඟරාවේ පලවූ මේ ලිපියේ සිටම වාමාංශික යයි කියා ගන්නා මහත්වරු  තර්ක කරන්නේ සම්බන්ධන් ට විපක්ෂ නායක ධුරය දීම නිවැරදි බවයි. මෙහි ඇත්තේ සීනි  තැවරූ  කසාය  ගුලියක් බව ඔවුන් සඟවයි. එයට විරුද්ධව ලියන ඕනෑම කෙනෙක් ජාතිවාදී ගොන්නට හෝ "ජවිපෙ" නරුම ගොන්නට දැමීමට ඔවුහු මැලි නොවෙති.

විපක්ෂ නායකයා යනු ඊළඟ  ආණ්ඩුවේ නායකයාය.  ශ්‍රීලනිප ජාතිවාදී 47ට විකල්ප කණඩායමක්  ලෙස, විපක්ෂය ලෙස පිලි අරගෙන විපක්ෂ නායක පදවිය දුන්නා  නම් ඔවුන් ව සාකච්චාවට ගෙන නැවත නැවතත් පැරදවීමට හැකියාව තිබුණි.  ශ්‍රීලනිපය දෙකඩ වීමට ඉඩ හල යුතුව තිබුණි. ජනවාරි 8 මයිත්‍රී ට සහයෝගය දුන් ටීඑන්ඒ සම්බන්ධන් මෙතනට දැමූ  විට එය මග හැරී  යන අතර විපක්ෂ නායක ලෙස දෙමල ජනතාව වෙනුවෙන් පමණක් හෝ පෙනී සිටීමේ අවස්ථාව සම්බන්ධන් ගෙන් මග හැරී යයි.  එහෙමත් නැත්නම් විපක්ෂයේ සිට ඔහු දෙමල ජනතාව වෙනුවෙන් ඉදිරිපත් කරන යෝජනා වලට විරුද්ධ වීමටද රජයට අවකාශය සැලසේ.

කවුරුන් හෝ අර විරුද්ධ මන්ත්‍රීන් 47 දෙනාට විපක්ෂ නායක පදවිය දීම නුසුදුයි කියනවා නම් පසුගිය ආණ්ඩුවේ සිටි "හොරුන්ය " යන සම්මාන නාමය ලබා ගත් උදවියට ඇමතිකම් දීමෙන් කර ඇත්තේ කුමක්ද  යන ප්‍රශ්නය මතු වේ.

කොටින්ම  මේ කර ඇත්තේ හොර වැඩකි. විපක්ෂයේ සහයෝගය ඇතුව ප්‍රශ්නය නැවතත් යටපත් කර දැමීමේ උත්සාහයකි. වම යයි කියා ගන්න අය  මේ උපක්‍රමයට මුලින්ම ගොදුරු වී ඇති අතර දෙමළ   සන්ධානය පසුව ගොදුරු වනු ඇත. දෙමල ප්‍රශ්නය විසඳුමක් නැතුව තවත් දිග් ගැස්සෙනු ඇති අතර වෙනත් තරුණ සංවිධානයක් එම හිඩැස පිරවීමට එනු ඇත .

ෆේස්බුක් යහළුවකු වන ආචාර්ය සුරේන් රාඝවන් මෙසේ ලියා  තිබේ:

//"දෙමලිච්චන්ගේ ලෝකය ( or the World of Sambandan and Seven Sisters)
දෙමළාට දෙමළ වීම නිසාම ඇති ප්‍රශ්නය කුමක්දැයි?
මහා අදුරු නලින් සිල්වා තැනූ  තර්කයඅද බහුතරයේ ජාතිකවාදීන්ට ව්‍යූහාත්මක බුද්ධිමය පදනමක් සපයා ඇත . මා විසින් වරින් වර අසා ඇතිත්, සම්බන්දන්ගේ පත්වීමට විරුද්ධ සමයේ යලිත් ගොඩ නැගු ප්‍රතිතාර්කික පැණය නම් :
සිංහලයාට සිංහල වීම නිසාම ඇති බිය කුමක්ද? යන්නයි.
මෙය හුදෙක් ව්‍යූහාත්මක දේශපානයට පමණක් නොව 
සමස්ථ සිංහල සමාජ/දේශපාලන/සංකෘතික සවින්ඥානයටම කිඳා බැස ඇත්තේ  දෙමළා The Paradigmatic Ontological yet ( PostBuddhist) Subaltern other ...... යන මනස තුලය.
(In critical theory and postcolonialism, subaltern refers to the populations that are socially, politically and geographically outside of the hegemonic power structure of the colony and of the colonial homeland. - wikipedia )
කදිම අත්දෙකීමක් විය :
මම දුර කතනයෙන් කොළොඹ මා අතිශියෙන් ආදරය කරනා 
(ලිබෙරල්වාදී) මිතුරෙක් ඇමතුවෙමි. මහා කුරුළු නාදයක් පසුපසින් අසින මම ඒ හඬ නගන්නේ බට්ටිච්චන්ද මලිතන්දදැයි ඇසුවෙමි 
එවිට ඔහු එකවරම " අම්මේ අර කෑ ගහන්නේ දෙමලිට්ච්චෝ නේද යි විමසීය"
ජාතිකවාදය/ජාතිවාදය සොඳුරු මිනිසුන්  පවා අන්ධ කර ඇතිබව වැටහුනේ (මා පෙන්වා දුන්) පසු ඔහු එය 'හිතා මතා' නොකළ බව මට කී නිසාය. මම පිළිගනිමි. අපි හිතා මතා මහජාතිකයන් නොවෙමු.
ජාතිවාදය බොහෝ දුරට අවින්ඥානාක සවින්ඥනයයි.
අපි තවත් බොහෝ යන්නට ඇතිබව මට සිහින් රිදුමක් සමගින් මතක් විය.  "//

සිංහලයාට සිංහලයා  වීම බියක් සපයන්නේ මිලියන් අනූවක් දෙමල ජනතාව ජිවත් වන තමිල්නාඩුවක් ඇති නිසාත් එහි පාලකයන් චන්ද හා වෙනත් දේ බලාපොරොත්තුවෙන් ලංකාවේ දමිල ප්‍රශ්නය ඔද්දල් කරන නිසාත්ය.  ඉන්දියාවට ටිඑන් ඒ  නායකයන් දිවයාම පසුපසින් සිංහලයා ගේ බියද ඇදීයයි. රඝාවන්  මහතාට කියන්නට තිබෙන්නේ  ජාතිවාදී නොවන අප වැනි කොටස් සිටින  බවත් දෙමළ ජනතාව ගේ ප්‍රශ්නය විපක්ෂ නායක පදවියකින් නොවිසඳෙන බවත්ය. හේතුව මේ විපක්ෂ නායකයා ලංකාවේ ඊළඟ පාලකයා නොවන නිසාය. අනිත් රටවල නම් චන්දය දිනුව විපක්ෂ නායකයා ඊළඟ  අගමැතිය.  මේ වෙන්නේ රාඝවන් වැනි අයද නොදනුවත්වම එක්  වී සිටින තවත් රඟ පෑමකි.

ඉතිහාසය නැවත පුනරාවර්තනය වීමට නියමිතය. 

කණගාටුදායක වාර්තාකරණයක්

ශ්‍රී ලංකාවේ දැරියක අපචාරයකට ලක් කර මරා  දැමීමක් ගැන ප්‍රවෘත්ති කීපයක්  පලවී තිබේ. එසේම ෆේස්බුක් , ට්විටර් ආදී සමාජ ජාලා  අඩවි වලද බ්ලොග් වලද මේ සිද්ධිය ගැන නොයෙකුත් වාර්තා මෙන්ම අදහස් ද පළවේ. ප්‍රථමයෙන්ම මේ අහිංසක දැරිය ගේ අවාසනාවන්ත ඉරණම පිලිබඳ සම්පුර්ණ කණගාටුව මෙන්ම ශෝකයද ඥාතීන් ට පළ කරමි.
මේ සාහසික අපරාධය කළ  තැනැත්තා  ද හැකි ඉක්මනින් අත් අඩංගුවට ගැනීමට පොලිස් නිලධාරීන්ට හැකි වේයැයි උදක්ම බලා පොරොත්තු වෙමි.

කෙසේ වුවද මේ මරණය පිලිබඳ වාර්තාකරණය ඉතාමත් ජුගුප්සා  ජනක ලෙස පහත් ආකාරයෙන් කෙරෙනේ බවද නිරීක්ෂණය කලෙමි. ගොසිප් ලංකා හා තවත් වෙබ් අඩවියක දැරිය මිය ගිය තැන ඇල ඉවුරේ පින්තූරයක් දැරියගේ මුහුණ පමණක් ආවරණය කර පල  කර තිබේ. මෙවැනි පින්තුර පල කිරීමෙන් මොවුන් බලා  පොරොත්තු වන්නේ කුමක්ද?

එසේම එම ගොසිප් අඩවියේම එම දියණියගේ වෙනත් ඡායාරුපයක් වෙබ් අඩවිය සැකකාරයෙකු යයි සිතන පියාගේ (කුඩා ප්‍රමාණයේ මුහුණ පමණක් දියණියගේ පින්තුරයේ පහල කොටස ට වැටෙන පරිදි පල කර තිබේ. (මෙතැන) මෙහිදී දියණියගේ ඇඳුම දණහිසින් උඩට වෙන්නට ගිය පින්තුරයක් තෝරා පළ  කර ඇත.  වෙන පළ  කරන්නට පින්තුර හොයා ගන්නට බැරි වුනාද ?

පියා  සැක කාරයෙකු විය හැකිය. නමුත් පොලිසියෙන් එසේ කීවාද? එසේ නීතියෙන් කියා නැත්නම් එවැන්නක් පළ  කළ හැකිද? සමහර විට පියා  නොවිය හැකිය. එසේ වුව හොත් මේ වෙබ් අඩවි පියාගෙන් සමාව ඉල්ලනවා ද?

එසේම ළඳරු පාසලේ වෙනත් දරුවන්ගේ මුහුණුද ඇතුව තවත් පින්තුරයක් පල කර තිබේ. අර දරුවන්ටද මින් අසාධාරණයක් වන්නේ නැතිද? ඔවුන් නිරාවරණය කරන්නේ කුමටද?

මුහුණු පොතේ තත්වයද මින් අඩු නැත. ඊට අමතරව අපරාධකරුවන් එල්ලා මරා දැමීමට උද්ඝෝෂණ කරන අය න්ම ගිය  ආණ්ඩුව කාලේ පොලිසිය පාවිච්චි කල "ආයුධ පෙන්වීමට යාමේදී තමන් ම වෙඩි තබා ගන්න ක්‍රමය " වෙනුවෙන් පෙනී සිටින්නන් ද කොමෙන්ට් අතර දැකිය හැකිය.

එංගලන්තයේ සාමාන්‍යයෙන් මෙවැනි වාර්තාකරණයන් දැකිය නොහැකිය. නමුත් මා පුදුමයට පත්වුණේ වෙබ් ලෝකයේ නම රැන්දූ බව කියන ගෝඩ්  ෆාදර් කෙනෙකුද මෙවැන්නක් ලියා තිබීමය.  එංගලන්තයේ සිට පලවන මෙහි  මේ ලියා  ඇත්තේ කුමක් ද?//මරණ පරීක්ෂණ වාර්තාව අද නිකුත් වූ අතර දැරිය ************** කිරීමකින් පසු ******************. ********* ****** දැරිය*********** දැරිය  ************  ඇත. දූෂකයාගේ  ****** ****** ***** **** සීරීම් තුවාල දක්නට ඇත//

ඉතා ජුගුප්සාජනක ආකාරයෙන් දැරිය බලහත්කාරයට ලක් වූ අයුරු හා සිරුරේ සිට හමුවූ ඇතැම් වෙනත් පිරිමියෙකුගේ සිරුරින් පිටවූ ද්‍රව්‍ය ගැන විස්තරද ලියා තිබේ. මෙවැනි වෙබ් අඩවියකින් මෙවන් පහත්  වාර්තාකරණයක් බලාපොරොත්තු නොවීමි. සමහර විට මරා දැමුණේ වැඩිහිටි අයෙකු නම් තව කමක් නැත. මේ කුඩා දැරිවියකි. මේ වාර්තාකරණය ඔබ සාධාරණිකරණය කරන්නේ කෙසේද? 

කෝබින් ගේ ජයග්‍රහණය හා වමේ වම හා දකුණේ දකුණ.

බ්‍රිතානයේ මාධ්‍ය පණ්ඩිතයින් බොහොමයක් කිවේ ජෙරෙමි කෝබින් දිනුවොත් ලේබර් හෙවත් බ්‍රිතාන්‍ය කම්කරු පක්ෂය 2020 කෙසේ වෙතත්  තව අවුරුදු විස්සකටවත් දිනන්නේ නැත කියාය. ඩේවිඩ්  මිලිබෑන්ඩ් නම් බ්ලෙයාර් වාදී කම්කරු පක්ෂ රජයේ හිටපු  විදේශ ඇමති කම්කරු පක්ෂ නායකත්ව තරඟයෙන් ඔහු ගේ සහෝදරයාට පැරදීම ගැනද ඔවුන් කිවේ මෙයයි.

එඩ් මිලිබෑන්ඩ් බොහොමයක් දේශපාලන පණ්ඩිතයන් කියූ ආකාරයෙන්ම පරාජය වූ බව සත්‍යයකි. නමුත් ඔහු පැරදුනේ මාධ්‍ය පණ්ඩිතයන් කී බ්ලෙයාර් වාදී  නොවීම නිසා නොවේ.  ටෝනි  බ්ලෙයාර් යනු වාමාංශික පක්ෂයකින් බලයට පැමිණි  දක්ෂිණාංශික නායකයෙකි. (මේ වාමාංශයේ දක්ෂිනාංශය ලිපිය  බලන්න )  එඩ් පැරදුනේ ඔහුට ම අනන්‍ය වූ වැඩ පිළිවලක් නොතිබීම නිසාය. ඔහු කිවේ බැංකු කරන වරද වල් වලට දඬුවම් දී මේ තිබෙන ක්‍රමය දුෂණයෙන් තොරව හොඳට පවත්වා ගෙන යාමක් ගැනය. සුභසාධක කැපීමේ සිට අධ්‍යාපන පහසුකම් දක්වා ඔහුගේ මධ්‍ය වාමාංශික (centre left ) ස්ථාවරය හා දක්ෂිණාංශික ටෝරි ස්ථාවරය අතර වෙනසක් තිබුනේ නැත.

මෙය හරියට ජවිපෙ ලිබරල්වාදී ප්‍රතිපත්ති ඉදිරියට ගෙන යාමට තැත්  කලාක් වැනිය. එවැනි දෙයක් හොඳට කල හැක්කේත් නැවත මහින්ද ආගමනය  වලක්වා ගත හැක්කේත් එජාපයට ඡන්දය දීමෙන් පමණක් බව "ජනවාරි 8 " චන්දදායකයා වටහා ගත්තේය.  ජවිපෙ චන්ද පසුබෑමකට ලක් වූයේ  ඒ නිසා බව මගේ මතයයි.

 එඩ් මිලිබෑන්ඩ් පරාජය වූයේ  මේ හා සමාන ආකාරයටයි. තැචර් ගේ අති  දක්ෂිණාංශික ප්‍රතිපත්ති සමග පෑහුණු බ්ලෙයාර් ගේ ප්‍රතිපත්ති අතර බලන විට ඩේවිඩ් කැමරන්  දක්ෂිනාංශයේ වාමවාදී ලිබරල්  මෘදු නායකයෙකි.  එම ප්‍රතිපත්ති වඩා හොඳට ක්‍රියාත්මක කල හැකි ඔහු වෙනුවට නොදන්නා මිලිබෑන්ඩ් පත් කර ගන්නේ කුමට ද? ඒ නිසා එංගලන්තයේ චන්දදායකයන්  පැහැදිලි ලෙසම එඩ්ව  ප්‍රතික්ෂේප කරන ලදී.

ජෙරෙමි කෝබින් සහමුලින් ම වෙනස් කෝවක  රත් වූ යකඩයකි.  කෝබින් නායකත්ව තරඟයට  ඉදිරිපත් වූ වහාම වගේ උණුසුම් උන්මාදයක් වාමවාදී පාක්ෂිකයන් අතර පැතිරුණි. මේ දේශපාලන රැල්ල කම්කරු පක්ෂයෙන් එහාටත් පැතිරුණු අතර මෙතක් කල් කුඩා වාමාංශික පක්ෂ, පරිසර රැකීමේ ව්‍යාපෘති මෙන්ම හරිත පක්ෂය ආදී ව්‍යාපාර වල සිටි බොහෝ අය කම්කරු පක්ෂය වටා එක්  රැස්  වුහ. මේ සියල්ලන් ගේම මූලික අභිප්‍රාය වුයේ කඩා වැටී ඇති වමේ වම රැක ගැනීමයි.

උදාහරණයක් වශයෙන් මේ සංඛ්‍යාවන් දෙස බලන්න. පසුගිය චන්දයේදී කම්කරු පක්ෂයේ සාමාජිකත්වය ලක්ෂ දෙකකි. කෝබින් තරඟයට නම් දුන් සතියේ මේ ගණන ලක්ෂ තුනකට දෙසීයක් පමණ අඩු ගණනක්  දක්වා වැඩි විය.  දැන් 189,703 වන පක්ෂයට බැඳුනු සහයෝගය දෙන්නන් හා සහයෝගය ඉදිරියේදී දෙන්නට ලියා  පදිංචි වූ ගණන 121,295කි. අන්තිම පැය  විසි හතරේදී 160,000 ලියා  පදිංචි විනි.

කෝබින්මේනියාව නමින් ප්‍රසිද්ධ වූ මේ අති  මහත් උද්යෝගය ජෙරෙමි කෝබින්  වටා එක්  රැස්  වූයේ  ඇයි? කෝබින් නියෝජනය  කරන්නේ පරණ වමද? කෝබින්  තනන්නට  තැත්  කරන්නේ අසමත් වුනු සමාජවාදී රාජ්‍යයක්ද? කිසිසේත්ම නැත.

බ්ලෙයාර් ගේ කම්කරු රජය මගින් විශ්ව විද්‍යාල අධ්‍යාපනය සඳහා මුදල් අය කිරීම ආරම්භ කරන ලදී. ඒ අවුරුද්දකට පවුම් දහසක් බැගිනි. එයට හේතුව ලෙස ඔහු දැක්වුයේ විශ්ව විද්‍යාල පවත්වා ගෙන යාමට මුදල් නොමැති බවයි. අද එම මුදල වසරකට පවුම් 8000 දක්වා වැඩිවී ඇත. මෙය සහන ණයක්  ලෙස සිසුන්ට ලබා දුන්නත්  විශ්ව විද්‍යාල ඉගෙනීම අවසානයේ ලැබෙන පඩියෙන් සිසු සිසුවියන් එම මුදල ගෙවිය යුතුය. නිවසක් මෝර්ගේජ් කර ගන්නේ නම්  බැංකු ණය ද එයට එක් වේ. බොහෝ විට සිසු ණය  තිබෙනවා නම් බැංකු නිවාස  සඳහා ණය  දෙන්නට මැලි  කමක් දක්වයි.  මේ නිසා බොහෝ පහල මධ්‍යම පන්තික සිසුන් විශ්ව විද්‍යාල වලට යාමට මැලි කමක් දක්වති. අමාරුවෙන් මධ්‍යම පන්තික දරුවන් විශ්ව විද්‍යාල අධ්‍යාපනයට යන අතර ඉහළ පන්තිවල අයට  මේ ප්‍රශ්නය නැත.  කම්කරු පක්ෂයේ සාමාජිකයන් බ්ලෙයාර් ගේ මේ කාර්යය සැලකුවේ මහා පවා දීමක් ලෙසිනි. වරප්‍රසාද නැත්තන්ට ඉගෙනීමට ඇති අයිතිය අහෝසි කිරීමක් ලෙස බොහෝ දෙනා  මෙය අර්ථකථනය කළහ.

ජෙරෙමි  කෝබින් පැවසුවේ ඔහු මේ විශ්ව  විද්‍යාල අධ්‍යාපනයට මුදල් අය කිරීම නතර කර නොමිලයේ සියල්ලන්ටම අධ්‍යාපනය  සපයන බවයි. අධ්‍යාපනය හා නිදහස්  සෞඛ්‍ය සේවය සැමගේ අයිතිවාසිකමක් ලෙස ඔහු සලකයි.

කම්කරු පක්ෂ සාමාජිකයන් අනුමත  නොකරන දෙවන කරුණ නම් ඉරාකය  කරා  ගෙන ගිය විනාශ කාරී යුද්ධයයි.  සැප්තැම්බර් 11 දා ඇමෙරිකාවට පහර දුන්නේ ඉරාකයේ අනුබලයකින් නොවේ. එනිසා ඒ යුදයේදී මැරුණු හා අදත්  බෝම්බ වලින් මියයන ඉරාක ජනතාව ගේ  හා  අද අයිඑස්අයිඑස් ත්‍රස්තවාදීන් අතින් මැරෙන පිරිස ගේ වගකීම ද ඔවුන් පවරන්නේ බ්ලෙයාර් හා ඔහුට සහයෝගය දුන් මන්ත්‍රීන් ගේ කර පිටයි. කෝබින්  එම යුද්ධය නීති විරෝධී ලෙස නම් කරමින් මුල සිටම විරුද්ධ වූ අයෙකි.

කෝබින් අයර්ලන්ත යුද්ධය නතර කිරීමටත් ස්වාධින අයර්ලන්තයක් උදෙසාත් මුල සිටම පෙනී සිටි කෙනෙකි. එසේම පලස්තීන ප්‍රශ්නයේ දීද හමාස් ආදී පලස්තීන කොටස් වල සහයෝගය ඇති සංවිධාන සමග සංවාදයක් ඇති කල යුතුය යන මතය දැරුවෙකි.

කෝබින්  එතරම් මුදල් වියදම් කරන්නෙකු නොවේ. ඔහුට වාහනයක් නැති අතර බයිසිකලයෙන් පාර්ලිමේන්තුවට පැමිණේ.  මධ්‍යම  පන්තික පවුලක ඉපදී හැදී වැදුණු ඔහුගේ  ළමා කාලය  ගත කල කාමර හතක් ඇති නිවස පිහිටියේ දැකුම් කළු විල්ට්ශයර්  ප්‍රදේශයේ ය. ඔහුගේ මව ගණිත ගුරුවරියකි. පියා  විදුලි ඉංජිනේරුවෙකි. පියා  සහ මව මුණ ගැසී ඇත්තේ හැට  ගණන් වල ජනරාල් ෆ්රන්කෝ ගේ ෆැසිස්ට් වාදී  පාලනයට එරෙහිව ස්පාඤ්ඤ සමුහාණ්ඩු වාදීන්ට පක්ෂව පැවැත්වුනු රැලියකදීය.  මව හා පියාගේ වාමවාදී මතයන් ඔහුට බල පෑ බව සිතිය හැකි වුවත් දෙමාපියන් ඔහුව  ඉගෙනුම සඳහා යැව්වේ  මුදල් අය  කරන පෞද්ගලික විදුහලකටය.  නමුත් ජෙරෙමි තමන්ගේ දෙවෙනි බිරිඳ ගෙන් වෙන් වුයේ ඔහුගේ පුතා රජයේ විදුහලට නොව ක්වීන් එලිසබෙත් ග්‍රමර්  විදුහලට යවන්නට ඇයට  අවශ්‍ය වූ නිසාය.  මින් පැහැදිලි වන්නේ වාමවාදීන් වූ තම දෙමාපියන්ට වඩා  ජෙරෙමි සමාජ සාධාරණත්වය  ගැන සිතු බවයි.

ඔබ යුරෝපයේ ජිවත් වන්නකු නම් ප්‍රංශය, ජර්මනිය, ඉතාලිය ආදී රටවල් දුම්රිය සේවා පවත්වා ගෙන යන්නේ රජය සතු හා මගීන්ට කොටස් හිමි සමාගම් වල ආධාරයෙන් බව දන්නවා  ඇත. මිල ඉතා අඩු මේ දුම්රිය සේවා ඉතා හොඳින්  වෙලාවට ධාවනය වෙයි. හතර දෙනෙකු ගෙන් යුතු  පවුලකට දිනකට බල පාන යුරෝ 30 ක (රුපියල් 4700 පමණ) මුදලකට ජර්මනියේ විශාලම ප්‍රාන්තය වන  බැවේරියාවේ ඕනෑම තැනකට යන්නට හැකිය. එයත් හොඳ වේගවත් දුම්රිය වලිනි.

තැචර් විසින් 1994 දී  පෞද්ගලීකරණය කරන්නට කලින් බ්‍රිතාන්‍ය දුම්රිය සේවය  වෙලාවට ගමන් කිරීම සඳහා නම් තබා ගත් දුම්රිය සේවයක් විය. කොම්පැනි වලින් පාලනය වන දුම්රිය සේවා වල වෙලාවට ගමන් කිරීම සිහිනයක් වන අතර ඒවායේ ගමනද ඉතා මිල අධිකය.  බ්‍රිතාන්‍යයේ දෙවන පන්තියේ ටිකට් පතක මිල  යුරෝපයේ පළමු පන්තියේ ටිකට් පතක් මෙන් දෙගුණයකි.  ඒ මේ සමාගම්  වලට අවශ්‍ය ලාභය පමණක් නිසාය. ලාභය බලමින් රේල් පීලි අලුත්වැඩියා නොකරන ලද බැවින් දුම්රිය අනතුරු ද සිදු වුනි.  කෝබින් මේවා නැවත ජනසතු කරන බව කියයි. ඒ සිරිමාවෝ ගේ පන්නයේ වතු රැගෙන විනාශ කල ජනසතු කිරීම් වලින් නොවේ. ජර්මනියේ පන්නයට රජයේ සහභාගිත්වයෙන් දුම්රිය මගීන්  ගේ හා අනිත් ජනතාවටද   කොටස් ලැබෙන සමාගම් පිහිටුවීම මගිනි. ඒවා පාලනයට එවැනිම මණ්ඩලයක් පත් කිරීම මගිනි. මේ ක්‍රමය ජර්මනියේ සාර්ථකව ක්‍රියාත්මක වේ.

එසේම කෝබින් ඒකාධිපති වාදී  සමාජවාදී සමාජ ක්‍රමයක් එක එල්ලේම ප්‍රතික්ෂේප කරයි. මිනිසුන් ට නිදහස නැති සමාජ ක්‍රමයක් අනවශ්‍ය බව ඔහු ගේ අදහසයි.

ඔහු තමන්  සමානාත්මතාවය අගයන බවත් මේ සියවසේ වැදගත් වන්නේ මානව සම්පත සහ පරිසරය රැක  ගැනීම මිස බ්‍රිතාන්‍ය විසින් න්‍යෂ්ටික සබ්මැරීන් නිපදවීම නොවන බවත් පවසයි.

මස් මාළු අත් හැර එළවලු  පමණක් අනුභව කරන කෝබින් ඉතා සරල ලෙස ජිවත් වන මනුෂ්‍යයෙකු බව ඔහුගේ තෙවන බිරිඳ වන මෙක්සිකන් ජාතික  ලවුරා අල්වාරෙස් පවසන්නීය.  ලවුරා අල්වාරෙස්
යනු ලතින් ඇමෙරිකාවේ ඇති, සාධාරණ පඩියක් ගෙවා සාධාරණ ලෙස පරිසරයට හානි නොකර වගා කරන කෝපි  එංගලන්තයට ආනයනය කරන සමාගමක හිමි කාරියකි.

ලවුරා අල්වාරෙස් 

චන්ද දෙලක්ෂ පනස් දහසක් ලබා කම්කරු පක්ෂයේ නායකත්වයට අද පත් වුනු ජෙරෙමි කෝබින්  පසුගිය මාස  කීපය තුල එංගලන්තයේ වාමාංශය තුල නව බලා  පොරොත්තුවක් දල්වන්නට සමත් විනි. දශක ගණනක දේශපාලන දිශාව වෙනස් කරමින් වමේ වමට නායකයෙකු ලැබී ඇත. යුරෝපය පුරා  මේ රැල්ල පැතිර යයිද? දේශපාලන හා මාධ්‍ය පණ්ඩිතයන් බොරු කරමින් ජෙරෙමි  කෝබින්  ගේ බ්‍රිතාන්‍ය කම්කරු පක්ෂය බලය  ලබා ගනීද?


බීබීසි යේ ඇන්ඩ්රූ මාර් ගේ ප්‍රශ්නයකට පිළිතුරු දුන් පශ්චාත් නූතන මාක්ස්වදියෙකු වන ජෙරෙමි  කෝබින් පැවසුවේ   කාල්  මාක්ස් යනු බොහොමයක් දේ ගැන ඉතා දීර්ඝ ලෙස නිරීක්ෂණය කළ  ඉතා ආකර්ශනීය පුද්ගලයෙකු බවත් ඔහු ගෙන් අපට  බොහෝ දේවල් ඉගෙනීමට ඇති බවත්ය.

එක්සත් ජනපදයේ, බ්‍රිතාන්‍යයේ හා යුරෝපයේ බැංකු අධිපත්‍යයේ කිසියම් සලිත වීමක් දක්නට ලැබෙන අතර මේ කෝබින් රැල්ල යුරෝපය හරහා පැතිර යාම වැළැක්වීමට ඔවුන් හැකි සෑම දෙයක් ම කරනු ඇත.

වමේ වම එංගලන්තයේ නැවත උපත ලබා ඇත.

පින්තූර : බිබීසී අනුග්‍රහයෙනි.

නෙළුම් යායේ මාසික ත්‍යාගය සහ සම්මානය

නෙළුම් යායෙන් මාසික ත්‍යාගයක් දෙන බවට අප විසින් ගිය මස නිවේදනය කළෙමු. ත්‍යාගයේ පිරි නමන මුදල් ප්‍රමාණය පිලිබඳ සුළු ප්‍රශ්න  ඇති වූ බැවින්  ඒ වෙනුවට ග්‍රන්ථ හෝ වෙනත් ත්‍යාගයක් ප්‍රදානය කිරීමටද තීරණය කළෙමු. ඇසළ මස සඳහා  අපේ මුල්ම ත්‍යාගය  ප්‍රදානය කිරීමට තෝරා  ගත්තේ කුරුටු ගෑ ගී පවුර බ්ලොග් අඩවියටයි.
ඇසළ  (ජූලි) මස පළවූ  තුෂාර විතාරණ ගේ හිතේ සෙනෙහස පේන්නෑ පුත තුවක්කුව එය වහනවා බ්ලොග් කවි පෙළ ප්‍රමුඛ  කොට එම මස පළවූ  ලිපි පෙළ සඳහා මේ සම්මානය පිරි නමන්නෙමු. කුරුටු ගෑ ගී පවුර අඩවිය බ්ලොග් කරුවන් කීප දෙනෙකුගේ සාමුහික ප්‍රයත්නයකි. එසේම ඔවුන් විසින් අනිකුත් බ්ලොග්කරුවන් සඳහා සින්ඩියක් ද එම මාසයේම දියත් කල බවද  නිරික්ෂනය කළෙමු.

මේ සඳහා අප රුපියල් 2500 කට ආසන්න වටිනාකමකින් යුත්,   ඔවුනට අවශ්‍ය පොත් කීපයක් පිරි නැමීම සඳහා තෝරා  ගත්තෙමු. එසේම ඔවුන් මුදල් අඩු දරුවෙකුට පොත් පත් රැගෙන දීමේ සුදානමකින්ද සිටිති.  වසර ගණනක සිට බ්ලොග් ලියන කුරුටු ගෑ ගී පවුර බ්ලොග් අඩවියට ඉදිරියටත් සුවිශේෂ නිර්මාණයන් කිරීමට  අපේ සුභ පැතුම්  පිරි නමමු.

නිකිණි (අගෝස්තු) මස සඳහා අප තෝරා  ගත්තේ අහසෙන් එන්න බ්ලොගයයි.  එයින් මේ බ්ලොග් ලිපියට (එක පොතක් දෙදෙනෙක්) වඩා අවධානයක් දෙන්නටද අපට අවශ්‍ය බව සඳහන් කරමු. දෘශ්‍යබාධිත සහෝදරයෙකු විසින් ලියන මේ බ්ලොගයට අනුව දෘශ්‍යබාධිත පිරිස් සඳහා නිපදවා ඇති ඩේසි ඩිජිටල් තාක්ෂණ ක්‍රම වේදය ඇසුරින් පොත් ශ්‍රවණ මාධ්‍යයක් ලෙස කියවිය (ඇසිය) හැකිය.

"අහසෙන් එන්න " ලියන බ්ලොග් මහතා තමන්ට ත්‍යාගය ලෙස අප දෙන මුදලින් අධ්‍යයන පොදු සහතික පත් උසස් පෙළ විභාගයට පෙනී සිටින තවත් දෘශ්‍යබාධිත සිසුවෙකුට  විෂය නිර්දේශයට අවශ්‍ය පොත් එකොළහක් පමණ  රැගෙන  පරිත්‍යාග කරන ලෙස  අපට දන්වා එවා ඇත. ඒ අනුව ඒ මහතා දන්වා  එවන සිසුවෙකුට එම පොත පත ලබා දීමට පියවර ගන්නෙමු.

මාස  දෙක තුනක සිට පවත්වා ගෙන යන "අහසෙන් එන්න" බ්ලොගයේ කසුන් නයනජිත්ටද ඔහුගේ  බ්ලොග් අඩවිය ඉදිරියට ගෙන යාමට අපේ සුභ පැතුම් පිරි  නමන්නෙමු.

එසේම ලබන 2016 මාර්තු මාසයේ පැවැත්වෙන දෙවන වාර්ෂික නෙළුම්  යාය බ්ලොග් සම්මාන උළෙලේ මුලික වටය සඳහාද මේ බ්ලොග් අඩවි වල නම් ඉදිරිපත් කෙරෙනු ඇත.

ලියන්න ලියන්න තවත් ලියන්න. 

කියුබාව සමාජවාදීද 2 ?

මම සෝවියට් දේශයේ උගත් අවධියේ කියුබානු සිසුන් කිහිප දෙනෙක්ම යහළුවන් වශයෙන් ඇසුරු කලෙමි. මගේ වසරේ විදුලි බලාගාර උපාධි පාඨමාලාව සඳහා සිටි සිසුන් ගෙන් බහුතරය කියුබානුවන් විය. මීට  හේතුව වූයේ කියුබාවේ මුල්ම න්‍යෂ්ටික විදුලි බලාගාරය වන ජුරගුවා න්‍යෂ්ටික විදුලි බලාගාරය  සහ තාප විදුලි බලාගාර කීපයකට අවශ්‍ය ඉංජිනේරුවන් පුහුණු කරන්නට කියුබාව විසින් එකවර සිසුන් 35 ක් පමණ එවීම නිසාවෙනි. (1992 දී සෝවියට් දේශය බිඳ වැටීමෙන් පසුව සෝවියට් ආර්ථික ආධාර නැවතුණි.මේ නිසා ජුරගුවා න්‍යෂ්ටික විදුලි බලාගාරය ඉදි කිරීමේ කටයුතු ද නැවතුණි. )

මේ යහළු සිසුන් අතරින් කස්තීයෝ, එචිවාරියා, අලිහන්ද්‍රෝ, ඔස්වල්දෝ ආදීන් ප්‍රමුඛ විය.  ඔවුන් මට ඇමතුවේ කේපී කියායි. එයට හේතුව මම දුඹුරු පාට කැප්  තොප්පියක් නිතර පැළඳ සිටීමයි. (කැපයට කියුබානු භාෂාවෙන් කේප් හෝ කේපී යනුවෙන් කියවේ. )  කියුබානුවන් පිරිසක් කතා කරමින් කොරිඩෝරයේ යන විට අපි  නිතර දොර ඇර බලන්නෙමු. ඒ ඔවුන් බොහෝ විට එක දිගට සීග්‍රයෙන් කතා කරන විට සිංහල පිරිසක් කතා  කරන්නාක් මෙන් හැඟෙන නිසාය.

කස්තීයෝ ඉතා කඩවසම් තරුණයෙකි. බොහෝ කියුබානුවන් කඩවසම් තරුණ තරුණියන් වූ අතර ඔවුන් කුඩා  කාලයේ සිටම නොයෙකුත් ක්‍රීඩා වල යෙදී  සිටියහ. මා සීත සෘතුවේ සතියේ දිනවල හවස හෝ සෙනසුරදා උදේ දිනවල බාස්කට් බෝල් ගසන්නට ඇති පොඩි කෝට් වල මිනි ෆුට්බෝල් ගැසුවේ එම කියුබන් වරු රොත්ත සමගය. සමහර පලස්තීන, ජෝර්දාන්  හා සිරියන් ජාතික සිසුන් ද ඉඳහිට එක්  වෙති. අවට උෂ්ණත්වය  0 සිට සෘණ දහය දක්වා බැස්සද  සෙල්ලම් කරන විට මෙය එතරම් දැනුනේ නැත.

අපේ  දෙවන අවුරුද්දේ දී, කස්තීයෝ පළමු අවුරුද්දටපැමිණි ඉතා සුරූපී කියුබන් සිසුවියක වන ඉසබෙල්  හා යහළු වුනේය. යහළු වුනු ගමන් ම වාගේ එක කාමරයක ජිවත් වීම හෙවත්  සන්නිවාසය හෝ අඹු සැමියන ලෙස හැසිරීම  අපේ ශිෂ්‍ය නේවාසිකාගාර වල අමුතු දෙයක් නොවේ. සිසුන් හා සිසුවියන් සිටියේ එකම නේවාසිකාගාර වලය.  මාස කීපයකට පසු ඉසබෙල් ගැබ් ගත්තාය.  ඉසබෙල් ට තව දුරටත් ඉගෙන ගැනීමට ආශාවක් නොතිබුණු  නිසා ඇය කියුබාව බලා  ගියාය.

තමන්ගේ දරුවා දකින්නට අවශ්‍ය නැත් දැයි  මම කස්තීයෝ ගෙන් ඇසුවෙමි. කේපී මට සල්ලි නැහැනේ ටිකට් එකක් අරන් යන්න. අනික අවුලක් නැහැ ඉසබෙල් නුයි මගේ අම්මයි බලා ගනියි.  ඉසබෙල් ළමයා  බලා ගැනීමට මුදල් කෙසේ සොයා ගනී දැයි ඇසුවෙමි. ඇයට මුළු දවසම ළමයා නර්සරියේ තැබිය හැකි බවත් මවට හෝ ඉසබෙල්ට ළමයා හවසට ගත හැකි බවත් ඔහු කිවේය. ළමයා වෙනුවෙන් කියුබන් රජය මුදලක් ද වෙන් කරනු ඇත. ඔහු එය කීවේ ඉතා සැහැල්ලුවෙනි.

මේ ඩේ කෙයාර් සෙන්ටර් වැනි ඒවා එංගලන්තයේ  හැම තැනම තිබෙන මුත් හොඳ ඒවා සොයා ගැනීම ලෙහෙසි නැත. මේ ගැන හොඳ බ්ලොග් ලිපියක් නුවර කුමාරි  මෙහි ලියා තිබේ.  එයට මා දැමු කොමෙන්ටුවක අපේ අත්දැකීම ලියා  තැබුවෙමි. නැගෙනහිර හා බටහිර ජර්මනිය 1989 පසු එක්සත් වුනු විට  නැගෙනහිර ජර්මන් ඩේ කෙයාර් සෙන්ටර් එලෙසම තබා ගැනීමට ජර්මන් බලධාරීන් උපදෙස් දුන්හ.  හේතුව ඒවා තත්වයෙන් ඉතා උසස් විධිමත් පාලනයක් ඇතුව පවත්වා ගෙන ගිය ස්ථාන වීමත් දරුවන් ඉතා හොඳින් රැක බලා ගැනීමත්  නිසාත්ය. ඒවායේ රැකියා කලේ ද (කරන්නේද) දරුවන් බලා ගැනීම පිළිබඳ  උපාධියක් හෝ ඩිප්ලෝමාවක් මෙන්ම අත්දැකීම් ලැබෙන පාඨමාලාද හැදෑරු අය ද විය.   (එංගලන්තයේ මාස 3ක නගර සභාව කරන පාඨමාලාවෙන් පසු ළමයි බලා ගත හැකිය. )

ඉසබෙල් ගොස් මාස කිහිපයකට පසු අපේ මේ හැන්ඩි කස්තීයෝ තවත් පියකරු තරුණියක හා පෙමින් වෙලුනි. පාපන්දු ගසන අතර තුර අනිකුත් සිසුන් කස්තීයෝට විහිළු කළේ තව කොපමණ කලක් මේ සම්බන්ධය පවතීද,  නැත්නම් කස්තීයෝ ඉදිරියේදී ගැබ්බර වන ලිලියානා කියුබාවට පටවන දවස කුමක් ද යන්නයි.  විහිළු කල ලෙසම ලිලී ගැබ්බර වූවාය. නමුත් ඇය කියුබාවට යාම ප්‍රතික්ෂේප කලාය.

ළමයා සමග සෝවියට් දේශයේ සිටිය හැකි මුත් එය දුෂ්කරය. කියුබානු රජය නැවත යාමට ගුවන් ටිකට් පත නොමිලේ දෙන මුත් නැවත   එන්නට දෙන්නේ නැත. මේ නිසා කියුබන් වරු මුදල් එකතු කළහ. මමද කිසියම් මුදල් ප්‍රමාණයක් පරිත්‍යාග කලෙමි.  ලිලියානා කියුබාවට ගොස් දරුවා බිහි කර නැවත පැමිණියාය.  ඩේ කෙයාර් සෙන්ටර් එකේ දවල්ට දරුවා හිටියත් ඉන්පසු  දරුවා බලා ගන්නේ කව්දැයි මම කස්තීයෝ ගෙන් ඇසුවෙමි. මා පුදුම කල කරුණක් කස්තීයෝ හෙළි කළේය. ඉසබෙල් විවාහ වී ඇත්තේ කස්තීයෝ ගේ හොඳ මිතුරෙකු සමගය. කස්තීයෝ ගේ හා ඇගේ  මුල් දරුවා ඔවුන් සමග කස්තීයෝ ගේ මවගේ ආධාරයද ඇතුව හැදෙයි. ලිලියානා තම දරුවා භාරදී
ඇත්තේ ද ඔවුන්ටය. කස්තීයෝ ගේ දරුවන් දෙදෙනාම දැන් එක තැන හැදේ. එක නර්සරියට යති. ඔහුගේ මිතුරාත්,  පරණ පෙම්වතියත්, අලුත් නැන්දම්මලා  දෙදෙනාත් දරුවන් හොඳින් රැක බලා ගනිති.  ඉගෙන ගෙන ඉවරවී පැමිණෙන්නැයි ඔවුන් ලිලියානා  අතේ කස්තීයෝ ට දන්වා ඒවා ඇත. රජයෙන් ලැබෙන මුදල දරුවන් දෙදෙනාට ප්‍රමාණවත් බව ඉසබෙල් කස්තියෝට දන්වා එව්වාය. (මේ ලොකු මුදලක් නොවේ. යන්තම් ජිවත් වීමට ප්‍රමාණවත්ය)

මේ කතාව මම ලීවේ කැස්ත්‍රෝ ගේ සමාජවාදී කියුබාවේ සමාජ සම්බන්ධතා ගැන ලිවීමටය. කියුබන් වරු අතර මේ අපුරු මිත්‍රත්වයන්  හා සහජිවනයන් විප්ලවයෙන් පසු බිහිවූ කියුබාවේ දක්නට ලැබේ. ඔවුන් අතර ප්‍රශ්න බොහෝ විට ඇති වූයේ අනිකුත් සිසුන් නිසාය. මේ විධිහේ සමාජ සම්බන්ධතා අනිකුත් රටවල තිබුනද ඒ කියුබාවේ මෙන් වඩා පැතිරුණු  ආකාරයෙන් නොවේ.

අලිහන්ද්‍රෝ, ඔස්වල්දෝ ආදීන්ගේ කාමරවල චේ ගෙවේරා ගේ පින්තුරයක්  අලවා  තිබුන මුත් කස්ත්‍රෝ ගේ පින්තුර තිබුනේ නැත. මම වරක් මේ ගැන ප්‍රශ්න කලෙමි.  එචිවාරියා කල පැහැදිලි කිරීමේදී මා කියුබාව ගැන නොදත් තොරතුරු ටිකක්  දැන  ගතිමි. ඒ බැටිස්ටා ගෙන්  පාලන බලය අල්ලා ගත්  පසු ඇමෙරිකා  එක්සත් ජනපදය සමග විරෝධතාවයක් ඇති කර ගැනීමට  චේ ගේ හෝ කැස්ත්‍රෝ  ගේ අදහසක් නොතිබුනේය  යන්නයි. ඔවුන්ට අවශ්‍ය වුයේ ඇමෙරිකාවේ සහයෝගයද ඇතුව වඩා  ප්‍රජාතන්ත්‍රවාදී රජයක් කියුබාවේ පිහිටුවීමටය. පුවත් පත් කතුවරුන්ගේ ආරාධනයෙන් 1959 අප්‍රේල් 15 දා කැස්ත්‍රෝ  ඇමෙරිකාවේ සංචාරයක් කල අතර පසුව චේ ද ඇමෙරිකාවේ සංචාරය කළේය. (වීඩියෝ ව බලන්න).

කැස්ත්‍රෝ ඇමෙරිකා එක්සත් ජනපදයේ විදේශ ප්‍රතිපත්තිය මෙන්ම (ඒකාධිපතියන්ට සහයෝගය දීම) එහි කොම්පැනි හා දේපල අයිති අය  දුප්පත් වැසියන් හට පීඩාකාරී ලෙස සැළකීමට  විරුද්ධවද  හඬ නැගීය. ජනාධිපති අයිසන්හවර් කස්ත්‍රෝ මුණ නොගැසී  ගොල්ෆ් ක්‍රීඩා කිරීමට  ගිය අතර උප ජනාධිපති නික්සන් කස්ත්‍රෝ මුණ ගැසිනි.  ඒ හමුවෙන් පසු නික්සන් කිවේ කස්ත්‍රෝ බොළඳ බවත් ඔහු සිතා  සිටින දේවල් ක්‍රියාත්මක කිරීමට නොහැකි බවත්ය.

විප්ලවය අතරතුර හා පසුව ඇමෙරිකාවට  පලා  ගිය ධනවත් කියුබානුවන්ගේ බල කිරීම මත මෙන්ම  කියුබාවේ ජනසතු කරණයෙන් තමන්ගේ ව්‍යාපාර හා වතු අහිමි වුන ඇමෙරිකානු ධනවතුන් ගේ ඉල්ලීම මත ඇඑජ කියුබාවට එරෙහිව ආර්ථික බාධක පනවන්නේ ඉන් පසුවය. ඉනික්බිති අතරමන් වුන  කැස්ත්‍රෝ  හා චේ සෝවියට් දේශය පැත්තට හැරුනහ.

විප්ලවය සිදු කිරීමෙන් අනතුරුව පැවති ඉඩම් ප්‍රතිසන්ස්කරණයේදී චේ කලේ අක්කර දහසක් දක්වා ඒවා අයිති අයටම තබා ගැනීමට ඉඩ දීමත් අනිකුත් ගොවියන්ට වැඩිපුර තිබු  අක්කර ප්‍රමාණයෙන් අක්කර 67 බැගින් වගා  කරන්නට බෙදා දීමත්ය.  හදිසියේම කස්ත්‍රෝ චේ ව ශ්‍රී ලංකාව බුරුමය ජපානය ආදී රටවල සංචාරයකට යැවීය . එහිදී චේ මේ රටවල් සමග  කියුබාව වෙනුවෙන් වෙළඳ සම්බන්ධතා ඇති කර ගත්තේය.  ආපසු පැමිණි චේට  කැස්ත්‍රෝගේ  ඉල්ලීම මත ඉඩම් ඇමති පදවිය භාර ගැනීමට සිදු විය. (කියුබානුන්ගේ අකුරු හැකියාව වැඩි කිරීමේ ව්‍යාපාරයේ නියමු ධුරයට අමතරව) . මෙහිදී කැස්ත්‍රෝගේ අණින් වඩා වේගවත් ලෙසින් ප්‍රතිසංස්කරණ සිදු කෙරුණු අතර සියලුම ඉඩම් පවරා ගෙන සමුහ ගොවිපලවල් ඇති කෙරුණි.  ඇමෙරිකානු කර්මාන්ත  ශාලා, ව්‍යාපාර හා වතු ජනසතු කෙරුණි. ඇමෙරිකාව සියලුම වෙළඳ  සම්බන්ධතා අත්  හරින ලද අතර සීනි  මිලදී ගැනීමද තදින්ම සිමා කරන ලදී. මුදල් නැති කස්ත්‍රෝ සම්බන්ධතා  ගොඩ නංවා  ගැනීමට චේ ව නැගෙනහිර යුරෝපිය රටවලට යැව්වේය. චේ 1960 සෝවියට් දේශයට පැමිණි අතර ඒ වසරේදීම නැගෙනහිර ජර්මනිය සමගද ගිවිසුම් අත්සන් කළේය.

 මුලදී බොහෝ දාර්ශනිකයන් ගැන කියවූ චේ ගේ දින පොත්  තුල බුදුන් වහන්සේ සහ ඇරිස්ටෝටල් ගේ දර්ශන ගැන හදාරා ආදරය, කරුණාව සහ සහජීවනය  ගැන ඔවුන් දැක්වූ අදහස් උපුටා සටහන් කර ගෙන තිබෙන බව ඔවුහු මට පැවසුහ. පසුව ඔහු මාක්ස්වාදය කියවා දැඩි මාක්ස්වාදියෙකු විය.

ලෙනින් 1921 දී කොන්ස්ත්‍රාඩ් නැවියන්ගේ කැරැල්ලේදී තත්වය වටහා ගෙන නෙප් පිළිවෙත ගෙන ආ ආකාරයටම ඇමෙරිකානු සම්බාධක හමුවේ නිදහස් සමාජවාදී ජිවිතයක් ගොඩ නැගීමට  අනිකුත් රටවල විප්ලව සිදුවිය යුතු බවට චේ වටහා ගත්තේ 1960 ගණන් වල මැද  හරියේදීය. මේ පිළිබඳව ෆිදෙල් කස්ත්‍රෝ හා චේ අතර බොහෝ වාද  විවාද ඇති වුනි. රාවුල්  බොහෝ විට ගත්තේ චේ ගේ පැත්තය.

අන්තිමේදී කැස්ත්‍රෝගේ  ද ආශීර්වාදය ඇතිව ලතින් ඇමෙරිකානු විප්ලවය සඳහා චේ පිටත් විය. තමන් මරා දමන්නට ප්‍රථම බොලීවියානු ගුවන් භට ගුස්මාන්  සමග කතා කරද්දී කස්ත්‍රෝ ඔහු පාවාදුන් බව කියා තිබේ. ඒ පේරු, ආර්ජන්ටිනා හා නිකරගුවා වල විප්ලවීය ව්‍යාපාර දියත් කිරීමට චේ ට අවශ්‍යව තිබු නමුත් සෝවියට් දේශයේ අනුග්‍රහය ලැබෙන්නේ බොලීවියා වල විප්ලවයට යයි කියා ඔහුට බොලීවියා යන්නට කස්ත්‍රෝ බල කල නිසා යයි ගුස්මාන්  කියයි. මේ කථාව සනාථ කිරීමට මට නොහැකිය.

එසේම කියුබානුවන් මට පැවසූ කරුණක් වූයේ චේ දැඩි නිදහස් කාමියෙකු බවයි. ගිනි මැලයක් ගසා කියුබන් රම්  ටිකක් පානය කර කියුබන් සුරුට්ටුවක් පත්තු කර ගෙන ගිටාරයකින් සින්දුවක් ගැයීමට හෝ සින්දු ඇසීමට ඔහු ප්‍රිය කළේය. චේ ගේ ව්‍යාපාරය තුල ඇතැම් ආසියානු නායකයන් කළාක් මෙන් ප්‍රේම සම්බන්ධතා තහනම් කර තිබුනේ ද නැත. කියුබානුවන් අදත් ඔහුට ආදරය කරන්නේ ඒ නිදහස් කාමී සුන්දර බව නිසාය .

කස්ත්‍රෝ නරකද, ඔහුට මිනිසුන් සහයෝගය දක්වන්නේ නැත්ද යන්න මම විමසුවෙමි. කියුබානුවන්  කිවේ ඔවුන් කැස්ත්‍රෝ ට  ගරු කරන බවයි. ඔහු ඔවුන්ට අසත්‍ය නොපවසා  සත්‍යය පැවසූ බවත් තමන්ට සමාජවාදය ඒ ආකාරයෙන් ගොඩ නැගිය නොහැකි බවත් නමුත් හැකි තරම් සමානාත්මතාවයෙන් යුතු රටක් ගොඩ නගන බවටත් ඔහු ඔවුන්ට පොරොන්දු විනි. එසේම කස්ත්‍රෝ ස්ටාලින් හෝ මාඕ මෙන් අකැමති මිනිසුන් දහස් ගණනින් මරා දමන්නට ගියේද නැත.

ලෝකයේ ඉහළතම සෞඛ්‍ය සේවාවක් ඇති, නිදහස් අධ්‍යාපනයක් ඇති රටක් බිහි වුනේ එලෙසය. නමුත් ගොඩ නැගිල්ලක් නවීකරණය කර ගැනීමට මුදල් නැත. මේ තත්වය කියුබනුවන් පිළිගනිති.
 "ඇමෙරිකානු සම්බාධක අයින් කරන දාක අපි අපේ රට මීට  වඩා  හොඳින් ගොඩ නගනවා. මේක කස්ත්‍රෝගේ වැරැද්ද නෙමෙයි. " ඔවුන් එදා මට කිවේ එලෙසය.

ලෝකය ඉන්පසු බොහෝ වෙනස් වී තිබේ. යුරෝපියානු  සංගමය ඇමෙරිකානු විරෝධය ඉවත ලා කියුබාවට සංචාරකයන් යැවීමටත් සිමිත වෙළඳ සම්බන්ධතා ඇති කර ගැනීමටත් ක්‍රියා කළහ. දැන් රවුල් යටතේ ඇමෙරිකානු සම්බන්ධතා ගොඩ නැගී තිබේ. කියුබානුවන්ට නිවසක් විකිනීමට, මිලදී ගැනීමට, ඉඩමක් ගැනීමට මෙන්ම ආපන ශාලා, කුඩා කර්මාන්ත ඇති කර ගැනීමට රවුල් විසින් ඉඩ දී තිබේ. කියුබානුවන් කියුබාවට මග හැරී  ගිය ආර්ථික දියුණුවේ හිඩැස  නිදහස රැක ගනිමින් ම පුරවා ගනීද?


පින්තුර උපුටා ගත්තේ : https://iconicphotos.wordpress.com/2013/12/24/first-look-at-cuban-revolution/

අවුල් වුනු ලිබරල් හන්දිය , දොන් කොර්ලියෝනේ සහ ලිබරල් ජවිපෙ

"දවස් කීපයක් බැලුවත් හරියන්නේ නැතිය. මේකාට නම් හොඳටම අවුල් වගේය. නෙලුම් යාය දාල බ්ලොග් පල කරහම බ්ලොග් නැති වෙනවා කියා දහ අතේ දිවුරුවේය. මයියා කියන කතාව හරි කිව්වේය. පලු පැලෙන්න ළඟ නැති නෙළුන් අජියාට බැන වැදෙනවාය. ඇත්තටම තමුන්නැහේ ට මොකද වෙලා   තියෙන්නේ කියල ඇහැව්වාම, "මාව තේරුම් ගන්නේ නැහැනේ උඹල" කියල අඬනවාය.  තෑගී දුන්නහම බ්ලොග් ලියවෙන්නේ නැතය, නිර්මාණ ශක්තියටද  මොකක්ද එකට කෙල වෙනවා ය කියා හතර හන්දියක් ගානේ දෙස් දෙවොල් තියනවාය. ක්ලස්සික් බොනපාර්ට් කැරැස්ටරිස්ටික්ය "

ඒත් මේ සොඳුරු අවුල් වූ හංදියා ට මම කීවේ කාලය එළඹෙන විට සියල්ල හරියන බවත් වැටහෙන බවත්ය. සම්මාන දීමෙන් බ්ලොග් වලට කෙළ නොවෙන බවත්ය.  හන්දියා අන්තිමට එයට එකඟ වුවත් අපි දෙදෙනාගේම පහන් සංවේගයට හා ආදරයට කාලයක් පාත්‍රවූ "පස්සයට" මගේ ඇති නිර්පාක්ෂික භාවය මගේ කුහක කමක් හා දේශපාලන අවස්ථාවාදයක් ලෙස විස්තර කිරීම ගැන නම් මට මල පැන්නේය. කොටින්ම කිවහොත් අහවල් "පස්සයට" මගේ අකමැත්තක් නැත. දුෂණයට, භීෂණයට විරුද්ධව පසුගිය පාර්ලිමේන්තුව තුලත් පිටත් ඔවුහු සෑහෙන හඬක් නැගූහ. ඒකාධිපතිවාදී බලයන්ට විරුද්ධව හඬ  නැගූහ, ඒ නිසාම මර්දනයට ද ලක්වුහ. නමුත් දෙමුහුන් න්‍යායක් හදමින් නරෝද්නික්වාදී නැගිටීම්  දෙකක් කරමින්  ජන අරගලයන් අවුරුදු ගණනක්  පස්සට තල්ලු කලේද ඔවුහුමය. ඒ නිසා විවේචනයක් තිබේ. ඒ ආදරණිය විවේචනයකි. කණ ආදරයෙන් අතගා ඔළුවට සැරෙන් ටොක්කක් ඇන්නේ නැත්නම් මුන් අවදි වෙන්නේ නැතිය.  ඒ විවේචනය කුහකකමක් හෝ අවස්ථාවාදයක් වන්නේ නැත.

බ්ලොග් ගැන කතා කරනවා නම් සිංහල බ්ලොග් කලාවක් දියුණු කිරීමට කවුරුවත් නෙලුම් යාය  පටන් ගත්තේ නැත. අවශ්‍ය වුයේ බ්ලොග් කරුවන් වැඩි කිරීමට, බ්ලොග් හැම තැනටම ගෙන යාමට සහ ප්‍රචලිත කිරීමට කියා කියන්න පුළුවන් හැම තැනම කියා තිබේ. බ්ලොග් කරුවන් උනන්දු කිරිමටත් සංවාදයක් ඇති කිරීමටත් කැප වෙනවාය කියා දිවුරා පොරොන්දු වී නැතත් එහෙම දැනටමත් වෙනවාය.  මේ සිංහල, දෙමල , ඉංග්‍රීසි යන භාෂා තුනෙන්මය. සිංහල බ්ලොග් කලාව සඳහාම සින්ඩි ත් ගහක් ගලක් ගානේ තිබේ.
 සිංහල බ්ලොග් කියවනය, ඉන්දි .කා , මාතලන්ගේ සින්ඩිය, අජිත් කුමාරගේ සින්ඩිය ලඟදි පිටියට බඩ ගෑ කුරුටු ගෑ ගී පවුරේ සින්ඩිය ද තිබේ. අටමාද තරහට වගේ එකක් අටමාගෙන තිබේ. හන්දියාට මේක ඔළුවට වක්කරලා දෙන්නට බැරිය.

හැබැයි හන්දියෝ මෙහෙම ප්‍රශ්නයක් තිබේ. අපේ දොන් කොර්ලියෝනේ බොහොම දක්ෂයෙකි. තමන් ට විරුද්ධ අය පවා හරවා ගෙන තමන් ගේ අදහස් සුක්ෂමව ප්‍රතිවාදියාගේ  මොළයේ කරකැවීම ට දක්ෂයෙකි. හංදියා  නිතර කතා කරන භාෂාවෙන් කියනවා  නම් "හුලයට මොකන්නෙකි. "  මෙහි අවසන් ප්‍රතිඵලය වුයේ බ්ලොග් ලෝකය පැත්තකට දමා  හංදියා, හන්දියක් ගැන ලිවීමට පටන් ගැනීමය. මට කුණු හබ්බයෙන් බැන වැදුනේ අහවල් පස්සය  ගැන නොලිවීම ගැන නිසා නම් හංදියා ගේ අදහස මට තේරුම් ගත හැකිය. ඒත් හංදියා බ්ලොගය නොලිවීම ගැන කොල්ලන් සහ බල්ලන් බනින්නේ මටය. බ්ලොග් ලෝකයම පාවා  දුන්නේ හංදියාය. මට මාර ජොලිය.
හංදියා  තීරු රචකයෙකු වීම මගේ අමන්දානන්දයට හේතු වුනත් මූ  ඒක කලේ මට බැන වදිමිනි. මට දැන් හේතුව තේරී තිබේ.  තීරු රචකයෙකු  හා පස්සයට ජන මාධ්‍යවේදියෙකු වීමේ උණෙන් පෙළුණු අවුල් වූ හන්දියා ට හිත හදා  ගැනීමට බැනීමට එකෙක් සිටිය යුතුය. (හික්ස්)

හැබැයි පස්සයට සපෝර්ට් කරන්නට පටන්ගත් හන්දියා චන්දෙ දවසට කලින් දවසේ පස්සය සමුලඝාතනය කළේය. කොටින් මමූ  පස්සය ලිබරල් කළේය.

හන්දියා කීවේ න්‍යාය අවශ්‍ය නැති බවය. සෝවියට් දේශය වැනි රටවල් ලෝකයේ තිබ්බත් නැතත් ඒවා ගැන කතා කිරීම හන්දියාට අනුව කාටවත් අවශ්‍ය නැතිය. කතාව ඇත්තය. පන්ති පහක් කලහම දැනුම ඇති යයි සිතූ කාලයක් ද විය. න්‍යාය පොඩ්ඩක් හා භාවිතාව ගොඩක් තිබ්බාම වැඩේ ගොඩය. වැඩේ ගොඩ වීම හෙවත් ඇන ගැනීම නම් හැමදාම කෙරුණි. බලාගෙන යනවිට හන්දියාගේ භාවිතාවද  දෝරේ  ගලාගෙන යයි.  හන්දියාගේ ලොකුම ප්‍රශ්නය දීප්ති කුමාර ගුණරත්නගේ න්‍යායවාදයයි. දීප්ති කරන්නේ හෝ කරන්නට තැත් කරන්නේ  හඩු ගැහුණු පරණ පුස් බැඳුනු ලංකාවේ මාක්ස්වාදයට ජිජැක්  ලැකාන් ලා ඇසුරෙන් වත් නව ජීව වායුවක් පිඹීමට මිස හන්දියා වැනි ලොං හැලුණු ජෙප්පන්ට න්‍යාය කියා දීමට නොවේ. කුමාර් ගුණරත්නලා  හදන්නේ ජවිපෙ මාක්ස්වාදී කොටස තමන් ගේ කරට  ගැනීමට නිසා ඒ ගොල්ලන් බලන්නෙත් ජවිපෙ කෑල්ල දිහමය. ඒ ගැන උන්ට වරදක් කීමට බැරිය. උන් වුනත් පොඩ්ඩක් වෙන්නට සුමිත් චාමින්දගේ "භාව සත්තා නිමේෂයේ " රිංගන්නේත්  ඒකය.  විජේවීර ෂන්මුගදාසෙන් ගෙන් අයින් වෙච්ච් දවසේ ඉඳන් කලෙත් ඕකමය. මේ දෙගොල්ල ගේම මහා අනෙකා ජවිපෙ වී ඇත්තේ ඒ නිසාය. නමුත් මේ පක්ෂ චන්දෙ ඉල්ලුවාය කියා ජවිපෙ චන්ද වලට වෙන කෙහෙල්මලක් නැත. ඒ පක්ෂවලට ගිය ඈයෝ එහෙම ගියේ ආයි ජවිපෙ පැත්ත බලන්න නෙමේය. එතනින් කැඩෙන චන්දයක් නැත. දැන් චන්දෙන් පස්සේ වත් ඒ බව තේරිය යුතුය.

හන්දියා ඒ වෙනුවට  කිවේ ජවිපෙ වඩ වඩාත් ලිබරල් විය යුතු බවය. හන්දියාට පෙනුන විධිහට අනුර කුමාර, බිමල්, විජිත හේරත් ගේ සිට ලාල්කාන්ත දක්වා ඔක්කොම පට්ට ලිබරල්ය. හඳුන්නෙත්ති මාර ලිබරල්ය. කොච්චර ලිබරල්ද කියනවා නම් ආසනයද  පැරදුනේය. ඇයි හන්දියෝ, නව ලිබරල් ධනවාදය හොඳටම ක්‍රියාත්මක කරන්න යුඇන්පී කියා එකකුත් තියෙන එකේ, ඒකෙ අනුර වගේම කැරිස්මටික් අගමැති වුනු නායකයෙකුත් ඉන්න එකේ මිනිස්සු ලිබරල් ජෙප්පන්ට චන්දෙ දෙන්නේ මොකටද කියා හිතුනේ නැත්ද?   මේක තනිකරම දොන් කොර්ලියෝනගේ සීනි තැවරු ගුලියක් එහෙම පිටින්ම ගිලල ලියපු එකක් වත් දෝ කියා හිතුනත් මට පස්සේ හිතුනේ බෝතලේ මාරු වෙන්න ඇති කියලාය.

හපුට්ටන්ට කුරුට්ටන්ට බනින්ට කලින් න්‍යායක්  දන්නෙත් නැත්නම් කියන්නට තිබ්බේ අඩුම ගානේ විජේවීර ගේ දෙමුහුන් න්‍යාය වත් අනුගමනය කරන්න කියලා ය. යුඇන්පී එකට චන්දෙ දෙන එවුන් ජෙප්පන්ට චන්දෙ දෙන්නේ නැත. පාවෙන චන්දය දෙන එවුන්  වඩා ලිබරල් පාටියට චන්දය දෙනු ඇත. කියන්නට තිබ්බේ "මෙන්න ඇස්ටි හැලෙන සමාජවාදය අලුත් මුහුණුවරකින් ", "රතු වෙනුවට ඊස්ට්මන්  වර්ණයෙන් " "අයිස්චාර්යා රායි රංගනයෙන් ජිප්සීස් මි විතෙන්, කපුගේ බයිට් කරමු " වගේ දේවල්ය. ශ්‍රී ලංකා එකේ චන්ද කියක් හරි කඩා ගන්නට තිබුනේය. මොකද අර කවුද කීවා වගේ කවන්ධය නැති වෙන ශ්‍රීලනිපයේ ඔලුව ජෙප්පන් ගේ විය යුතුය. මේ ඇවිල්ලා  56න්  පස්සේ අනාථ  වුනු ජාතිවාදී දරු කැලය. 2005 දී රාජපක්ෂ මහත්තයා  එක්ක  සෙට් වෙච්ච සෙට් විල්ල  නැගලා ගියේ ඒකය . දැන් රට බේරා ගෙන ඉවර නිසා හන්දියාට ඕන වුන පලියට ලිබරල් යන්නට බැරිය.  ලංකාවේ උන් එක්ක අවංක වී බැරිය. ලිබරල් යනවා වුනත් කියන්න  ඕනේ ජනසතු කරනවා කියලාය. ඔය එක එක ධනපති ව්‍යාපාරික උන් එක්ක ගිවිසුම් ගැහුවේ ඇන ගන්නමය. අඩුම ගානේ "අපි චීන ක්‍රමය ගෙනෙනවාය" කියා කිව්වා නම් අර බිල්ඩින් වැඩ නතරවී වැලේ  වැල් නැතුව ඉන්න උන් ටිකගේ චන්ද ටික හරි ගන්නට තිබුනේය.

අඩුම ගානේ ජේ ආර් ගෙන් ඉගෙන ගත්තේ නැත්ද කියා හිතෙන්නේ මේ වෙලාවටය. විවෘත ආර්ථිකය ගෙනත් ලංකාව නම් කලේ ප්‍රජාතාන්ත්‍රික සමාජවාදී ජනරජය කියලා ය. කොහෙද සමාජවාදය කියා කවුරුවත්ම ඇහුවේ නැතිය.

දැන් කෙළවී  හමාරය. හපුට්ටෝ හා කුරුට්ටෝ ද සිනාසෙති. අවුල්  වුණාම ඔහොම වෙනවාය. දැන්වත්  පොඩි න්‍යායක් හරි ඉගෙන ගන්නවා  නම් හොඳය. එන්ෆිල්ඩ් පැත්තේ අවොත්  නොමිලයේ ටියුෂන් පාරක් වත් දෙන්න පුළුවන්ය.

උදාහරණයකට කියනවා නම්,

බීලා  නැති වෙලාවට තනිකරම අවුල්  වුනු හන්දි ගැන ලිවිය හැකිය. බීර බෝතල් දෙකකින් ශේප් වෙන වෙලාවට එකම හන්දියක් ගැන රිපීට් කල හැකිය. වොඩ්කා  එකකට සෙට් වෙන කොට කාගේ හරි හතර හන්දි ගැන ලිවිය හැකිය. බැරි වෙලාවත් විස්කි වඩියකට සෙට් වුනොත් කොම්පඤඤ වීදියේ හන්දියටම යා හැකිය.

ලිබරල් හන්දියට උඹට දැන්ම යන්ට බැරිය. ඒක තවම කොළ පාටය.

පස්සයේ සමුළුවට ආ අසහාය ගායක තුමාගේ වදනකින්ම කෙළවර කොරනවාය. මාත් අඩියකට සෙට් වුණාම කියන්නේ දැන් මේවා ය. කපුගේව ඕනේ කාටද බන් දැන් ?

"නුඹ නාඩන් නුඹ නාඩන් උඹට ඕව හොඳ පාඩම්."

හන්දියට මෙතැනින්  ගිය හැකිය.

දෙමළ ජාතික සන්ධානය (ටීඑන්ඒ ) විරුද්ධ පක්ෂය නොවිය යුත්තේ ඇයි

අසුව දශකයේ දී ජවිපෙන්  ඉවත්වූ (මට මතක විධිහට 1982 දී)  බෝපගේ සහෝදරයා ගේ මතවාදය  මෙන්ම සුචරිත් ගම්ලත් මහතා ගේ මතයද අනුගමනය කරමින් වාමාංශික විප්ලවවාදීන් වශයෙන් මා සැලකූ උමා  මහේෂ්වරන්, පද්මනාභ ආදීන්ට ඊළම්  සමාජවාදී රජයක් උතුරේ පිහිටවීමට දකුණේ වාමාංශිකයන් වශයෙන් අප සහයෝගය දිය යුතුය යන ස්ථාවරයේ සිටියෙමි. එසේම උතුරේ ස්වයං නිර්ණන අයිතිය ටද  මගේ සහයෝගයක් ද විය. මට හැම විටම ප්‍රශ්නය වුයේ නැගෙනහිරය.  මගේ අදහස වුයේ පෘතුගීසින් එනවිට නැගෙනහිර අයත්ව තිබුනේ කන්ද උඩරට රාජධානියට හෙයින් නැගෙනහිර කවම දාක වත් උතුරේ පාලනයට යටත් නොවිය යුතු බවයි. උතුරේ   රජතුමාට අයත් වුයේ වන්නි දිස්ත්‍රික්කය හා යාපනය දිස්ත්‍රික්කයයි.

කෝට්ටේ පාලනයට කප්පම් ගෙවුවද යාපනයේ රජු ස්වාධීනව  උතුර පාලනය  කළේය. රටේ රජයන් කීපයක් (උතුර, කන්ද උඩරට, කෝට්ටේ, සීතාවක ආදී වශයෙන්) . ඒකීය රාජ්‍ය පාලනය හයවන පරාක්‍රමභාහු රජුගෙන් පසු අවසන් විනි. ඉන්පසු රට ඒකීය රජයක් බවට පත් කර පාලනය කලේ ඉංග්‍රීසින් ය. ඒ 1815න්  පසුවය.

මේ අනුව ඉංග්‍රීසින් රට එක්සත් කිරීමට කලින් තිබූ පාලනය ස්ථාපිත කිරීමට නම් උතුරේ සමාජවාදී පාලනයකුත් දකුණු පළාතේ සමාජවාදී පාලනයකුත් අවශ්‍ය යයි කල්පනා කලෙමි. ඉන්පසු උතුරේ මහේෂ්වරන් ලා සමාජවාදී පාලනයක් පිහිටවූ පසු එහි ආධාරයෙන් දකුණේ හම්බන්තොට තංගල්ල සිට ගාල්ල දක්වා සමාජවාදී රජයක් පිහිටු වීමටත් ඒ ආධාරයෙන් පසුව කොළඹ හා කන්ද උඩරට සමාජවාදී රජයන්ද පිහිටවිය හැකි වෙතැ යි සිතුවෙමි. ඉන්පසු සෝවියට් සමුහාණ්ඩුව මෙන් ශ්‍රී ලංකා සමාජවාදී සමුහාණ්ඩුවක් පිහිටවිය හැකි යයි සිතුවෙමි.  මේ සෝවියට් දේශයට ඉගෙනීමට යාමට ප්‍රථම යන්තම් අවුරදු 18 ඉක්මවූ තරුණයකුගේ අදහස් විය.

ඒ වනවිට ජෝන් රීඩ් ගේ "ලොව හෙල්ලූ දස දවස " මෙන්ම ගෝර්කි ගේ අම්මා වැනි පොත්, එසේම "වානේ පන්නරය ලැබූ හැටි" ආදී පොත් ද කියවා ඔක්තෝබර විප්ලවය ගැන යම් අදහසක් ද ඇති කරගෙන සිටියෙමි.

සෝවියට් දේශයේ පළමු වසර අවසන් කරමින් දෙවන වසරට යනවිට මේ ස්‌වයං  නිර්ණය අයිතිය පිලිබඳ අදහස  තදබල ප්‍රශ්න කිරීමකට භාජනය කලෙමි. ස්වයං නිර්ණයට පක්ෂපාත ලංකාවේ ට්‍රොට්ස්කිවාදී පක්ෂ තිබුනද 1917 විප්ලවයෙන් පසුව ලෙනින් හා ට්‍රොට්ස්කි ස්වයං නිර්ණය අයිතිය පිළිගත්තේ  ළඳරු සෝවියට් දේශයට වඩා දියුණු ආර්ථිකයක් තිබු පින්ලන්තයට අදාලව පමණක් බව වැටහිණි. එයපිළිගත්තේත් පින්ලන්තය ස්වාධීන රටක්  වශයෙන් පැවතීමේ ඉතිහාසයක් තිබු නිසා මෙන්ම රුසියන් අධිරාජ්‍යයෙන් පීඩා විඳි  නිසා යන්න බවද මගේ වැටහීම විය.

පෝලන්ත ස්වයං නිර්ණනයට ලෙනින් ගේ සහය පල කල ලිපියක් ද තිබෙන නමුත් සත්‍ය වශයෙන් ම සිදුවුයේ වෙනත් දෙයකි. සෝවියට් රතු හමුදා ට්‍රොට්ස්කි (war commissar) ගේ නායකත්වයෙන් සෝවියට් උක්රයිනයේ දෙනිකින්ගේ සුදු හමුදා සමග සටන් වැදුණු අතර පෝලන්තයේ කොටස් (ල්වොව් වැනි නගර) අල්ලා ගන්නා  ලදී.  කොල්චාක් ගේ හමුදා පරාජය කර සයිබීරියාව හා ඈත පෙරදිග පෙදෙස් ද යටත් කර ගත්හ. මෙහිදී තමන්ගේම  හමුදා පිහිටුවා ගත් රුසියානු අධිරාජ්‍යය යටතේ තිබූ ලත්වියාව, ලිතුවේනියාව හා එස්තෝනියාව තමන්ගේ ස්වාධීන  රාජ්‍ය පිහිටුවා ගත්හ. සිය ප්‍රදේශ රතු හමුදාවට අහිමි වූ  වර්තමාන පෝලන්තය නිදහස් වුයේ එංගලන්ත හා  ප්‍රංශ රාජ්‍යයන්ගේ මිලිටරි උදව්වෙනි. රුසියානු අධිරාජ්‍යය යටතේ තිබූ යුරෝපිය හා ආසියානු රාජ්‍යයන් (ආර්මේනියාව, ජෝර්ජියාව, අසර්බයිජානය, කසාක්ස්ථානය, තුර්ක්මෙනිස්ථානය  ආදිය) සියල්ල රතු හමුදා විසින් යටත් කර ගන්නා  ලදී. මේ අනුව පැහැදිලිවම පෙනී යන්නේ ලෙනින් සහ ට්‍රොට්ස්කි ස්වයං නිර්ණන තියරිය, සෝවියට් සමාජවාදී රුසියාව පිහිටවූ පසු පෙට්‍රොග්‍රාඩ් හි (පසුව ලෙනින්ග්‍රාද් හා සාන්ත පිතර්බුර්ග් ) පක්ෂ කාර්යාලයේ ජනේලයෙන් එලියට විසි  කල බවය.

රුසියාවේ අවුරුදු තුනකට වැඩි කාලයක් සිටි විජේවීරද මෙය දැන නොසිටීමට විධිහක් නැත. බෝපගේ ගේ තීරණය කුමක් වුවත් විජේවීර ශ්‍රී ලංකාවේදී 1982 දී ගත් තීරණය මේ අනුව නිවැරදිද? විජේවීර තමන්ගේ ස්වයං නිර්ණන අයිතිය පිලිබඳ ලියවිල්ලේ මේ කිසිවක් සඳහන් නොකළේ ඇයි?

1940 අගෝස්තු 20 ස්ටාලින් එවූ අපරාධකරුවෙකු ගෙන් හිසට වැදුණු පහරකින් අගෝස්තු 22 ට්‍රොට්ස්කි මිය ගියේය."රතු සහ සුදු අතර " නමැති පොතේ  හයවන පරිච්චේදය ට්‍රොට්ස්කි වෙන් කරන්නේ ස්වයං නිර්ණය අයිතිය සඳහායි. ළඳරු සෝවියට් රාජ්‍යයට එරෙහිව බ්‍රිතාන්‍ය ප්‍රංශ ආක්‍රමණය, සුළු ජාතීන් ගේ ධනපති ස්වයංනිර්ණන අයිතිය පිලිබඳ තර්කය අනිසි ලෙස උපයෝගී කරගන්නා  බව බ්‍රිතාන්‍ය සෙන්පති වෝකර් ගේ වදන් උපුටා දක්වමින් පවසන ඔහු ජාතීන් එක්ව සටන් කරන රතු හමුදාවක් තුල ජෝර්ජියන්, උක්රේනියන්, මුස්ලිම් එකතුවක්, සහජීවනයක් තිබෙන  බව අවධාරණය කරයි.

1977  තිබු මැතිවරණයෙන් රටේ චන්ද වලින් මිලියන  එකහමාරක් (1,855,331) ලබා ගත්  ශ්‍රී ලනිපය ආසන 8ක් ලබා තුන්වන තැන ගත් අතර  චන්ද 421,488 (ලක්ෂ 4ක් පමණ) ලැබූ ද්‍රවිඩ එක්සත් විමුක්ති පෙරමුණ ආසන  18ක් ලබා විපක්ෂය විය. මෙහි අවාසනාවන්ත කරුණ වන්නේ එජාප හා ශ්‍රීලනිප ජාතික පක්ෂ වන අතර ද්‍ර.එ.වි. පෙරමුණ දෙමල ජනතාවට පමණක් සීමා වුන වාර්ගික පක්ෂයක් වීමය. එංගලන්තයට 1983 න් පසු පැමිණි බොහෝ දෙමළ  ජනතාව දේශපාලන අනාථයන් ය. 1977 හා 1983 එල්ලවූ සිංහල වර්ගවාදී ප්‍රහාර වලට පසු පැමිණි මේ ජනතාව ගෙන් බොහෝ දෙනෙක් සාමකාමී වුවද ඔවුන් අතුරෙන් සිංහල වර්ගවාදීන් තරමටම අන්තවාදී වූ පිරිස පැතිරවූ කාරණය වන්නේ 1977 දෙමල ජාතිකයන් පක්ෂය ප්‍රධාන විපක්ෂය වීමයි. දෙමල ජාතිය දෙවන විශාලතම ජාතිය වන අතර ඊළඟට බලය ලබා ගැනීමට නියමිත ප්‍රධාන විපක්ෂයට රට දෙකඩ කර බලය ලබා දිය යුතුය යන්න ඉතා සාධාරණ ඉල්ලීමක් සේ යුරෝපිය ප්‍රජාවට පෙනුනේද මේ නිසාය.

වෙන  ඕනෑම රටක ප්‍රධාන විපක්ෂය වන්නේ එම රටේම ප්‍රධාන ජාතියේ හා සුළු ජාතීන්ගෙන් ලැබුණු චන්ද වලින් පාර්ලිමේන්තුවට පත්වන ජාතික  පක්ෂයි. (ජර්මනියේ ක්‍රිස්ටියන් ඩිමොක්‍රටික්,  එංගලන්තයේ ලේබර් වැනි). ලංකාවේ සිදුවූ සුවිශේෂී තත්වය පිරටවලට පැමිණි දෙමල ජාතිකයන් අතරින් වාමාංශික නොවූ, වඩා  අන්තවාදී කොටස් භාවිතා කලේ දෙමල ජනගහනය අති  විශාල බව පෙන්වමිනි. බොහෝ විට ඉතාමත් තදින් සොයා බලන්නෙකු හැර අනිකුත් උදවිය නිසි සංඛ්‍යා ලේඛන දන්නේ නැත. එංගලන්තයේ සමහර  වාමාංශික සගයින්ට වුව මට මෙය පැහැදිලි කිරීම ඉතා අසීරු විය.

උතුරේ ස්වයං නිර්ණය යනු තමන්ගේ පාලනයට ඉඩ දීම පමණක් වන බවත් එය වෙනම රටක් ලෙස වෙන්වීම නොවන බවත් මට පැහැදිලි  වුයේ මෙහිදීය.  එසේම සමහරක් දෙමල මිතුරන් නැගෙනහිර උතුරේ පාලනයකට යටත් නොවිය යුතුය යන අදහස දැරුහ. ප්‍රභාකරන් හා විමුක්ති කොටි සංවිධානය  බොහෝ ලෙස 1977 ද්‍රවිඩ පක්ෂය විපක්ෂය වීම තමන්ගේ කරුණු දැක්වීම් වලට යොදා ගත්හ. ඔවුන් සිංහල ජාතිවාදීන් තරමටම ජාතිවාදී බව මට වැටහී ගියේ එංගලන්තයේදීය.  ( සාමාන්‍ය ද්‍රවිඩ ජනතාව නොවේ.) ඔවුන් චෝල මහා රාජයා ගැන,  දෙමල අධිරාජ්‍ය ගැනද කතා කරන බව මට වැටහින. කොටින්ම  සිංහල ජාතිවාදීන් අතීතය භාවිතා කර මිනිසුන් අවුස්සන ආකාරයටම ඔවුන්ද අතීත විභූතිය උපයෝගී කර ගත්හ.

ප්‍රභාකරන් ප්‍රමුඛ විමුක්ති කොටි සංවිධානය කිසිම විසඳුමකට අකමැති වීම පිටුපස සිටියේ ද මේ තමන් මෙතරම් බලවත් යයි අධි තක්සේරුවෙන් සිටි කණ්ඩායමයි. මේ බව පවසමින් දැඩි ලෙස කළකිරුණු එරික් සොල්හෙයිම් ඇන්ටන් බාලසිංහම් ට (අවසන් සාකච්චා බිඳ වැටුණු අවස්ථාවේ )  බැන වැදුන බවට එතන සිටි ජනමාධ්‍යවේදී මිතුරක් පැවසුවේය.

මෙවර මැතිවරණයේදී ජවිපෙ 4.86% චන්ද ලබා අසන 6 ගනිද්දී ද්‍රවිඩ සන්ධානය 4.62% ආසන  16 ලබා ගෙන තිබේ,. ශ්‍රීලනිප , එජාප හවුල් ආණ්ඩුවක් තුල ඔවුන්ට විපක්ෂ නායක කම දීමට හෝ ප්‍රධාන විපක්ෂය කිරීමට යෝජනාවක් පවතී.

ද්‍රවිඩ සන්ධානය වාමාංශික සන්ධානයක් නොවේ.  එය එක ජාතියකට  පමණක් සිමා වන වර්ග වාදී පක්ෂයකි. ඔවුන් පෙනී සිටින්නේ එක ජාතියක් සඳහා පමණකි. පොදු ප්‍රශ්න පිරි රටක විපක්ෂයේ කාර්යය ලැබිය යුත්තේ ජාතික පක්ෂයකට මිස වාර්ගික පක්ෂයකට නොවේ.

ශ්‍රී ලංකාවේ ජාතික පක්ෂද තමන්ට හැකි බොහෝ අවස්ථා වල අන්ත ජාතිවාදී හා වර්ගවාදී ලෙස හැසිරෙයි. පසුගිය චන්දයේ දීද එය දක්නට ලැබුණි. මෙයට සැමවිටම දැඩි ලෙස විරුද්ධව පෙනී සිටියෙමි.

කෙසේ හෝ වේවා 1977 කල වැරැද්ද නැවත කිරීම නොකළ යුත්තකි.

ස්වයං නිර්ණය මට නම් ජිවත් වීමේ නිදහස තහවුරු කිරීමයි. ඉගෙනීමට, දරුවන්ට යහපත් ජිවිතයක් දීමට , රැකියාවකට ඇති අයිතිය, නිදහසේ ජිවත් වීමට ඇති අයිතිය සෑම ජනතාවකටම තිබිය යුතුය.

ඉතිහාසය නැවතත් පුනරාවර්තනය වන්නේ පළමු වර ඛේදවාචකයක් ලෙසින් හා දෙවන වර විකාරයක් ලෙසින් යයි මාක්ස්  කියා තිබේ.

විජේවීර නුදුටු ජැප්පා දුටු සෝවියට් දේශය

මා  සෝවියට් දේශයට ගිය මුල් අවුරුද්දේ රුසියානු භාෂාව, සහ උසස්  පෙළ ගණිත විෂයන් නැවත රුසියන් භාෂාවෙන් හැදෑරීමට සඳහා වන පළමු වසර අවසන් කළේ මොස්කව් හි එයාරෝෆ්ලොට් නමැති ප්‍රදේශයේ පිහිටි මාදි (මොස්කව් වල මහා මාර්ග පිලිබඳ විශ්ව විද්‍යාලය ) නමැති රාජ්‍ය විශ්ව විද්‍යාලයට  අනුබද්ධිත විශ්ව විද්‍යාලයකටය.  එහි ඉගෙනීමට ජපනෙකුද පසුව පැමිණියේය. ඔහු සිටියේ මා  උගත් පංතියේය.  ගණිතය ටිකක් අමාරු නිසා ජැප්පා මගේ උදව් පැතුවේය. ජැප්පා ගේ රුසියන්  භාෂා දැනුම හොඳ නිසා ඒ පැත්තෙන් මට ද උදව්වක් ලැබුණි. අප මිතුරන් වූයේ  එලෙසය.  තවත් පන්තියක මරියා  නමින් පුංචි පිලිපීන කෙල්ලක සිටියාය. මේ කෙල්ලත් මා හොස්ටල් එකට එන විට පාර පැත්තේ තිබූ  ඇගේ  කාමරයේ සිට "අජී " කියා අත වැනීමට පුරුදුව සිටියාය. ඒ නිසා මම  ඇය සමගත් මිතුරු වීමි. මරියා ගේ පන්තියේ සිටි කාර්ලොස් ද ඇගේ හිතවතෙකු වුයෙන් කාර්ලොස්ද අපටම එකතු වුනි.

පළමු වන වසරේ මුල් වාරය  අවසානයේ දෙසැම්බර් නිවාඩුව එළඹෙයි. මුළු පරිසරයම සුදෝ සුදු හිමෙන් වැසී  ගොස්ය. මම මේ කාලයේ රාත්‍රියේ ඇවිදීම ප්‍රිය කරමි. රාත්‍රිය කළුවර නැත. මුළු ප්‍රදේශයම සුදු හිම නිසා අමුතුම සිත සනහන ළා එළියකින් ආලෝකවත් වී ඇත. මෙසේ ඇවිදින දෙතුන්  වරකදී මට ජැප්පා ද මුණ ගැසුණි. භාවනා කරන්නාක් මෙන් ජපනා ඇවිදිමින් සිටිනු කීප වරක්ම දුටිමි.

අපේ සීත  සෘතුවේ නිවාඩුවට විශ්ව විද්‍යාලය මගින් සියලුම විදේශික සිසුන්  මොස්කව් අසල නිවාඩු නිකේතනයකට රැගෙන යනු ලබයි. මේවාට කියන්නේ පැන්සියෝනත් කියායි. විශාල ප්‍රදේශයක පැතිරී ඇති මෙහි සිසුන් පන්සීයකට පමණ එකවර නිවාඩුව ගත කල හැකි ලෙස නිර්මාණය කර තිබේ. ස්කී කිරීමට මෙන්ම වෙනත් හිම ක්‍රීඩා සඳහාද, ගෘහස්ථ ක්‍රීඩා සඳහාද පහසුකම් සපයා තිබේ.  මා  සමග තවත්  ලාංකික සිසුවකු  ද සිටි අතර ස්කි කිරීමට සහ රාත්‍රියේ පවත්වන ඩිස්කෝ එකටද අපි ගියෙමු.  එහි සංගීතය ඇසීමට හා නැටීමට අසල ගම් වල තරුණ තරුණියන්ට ද ආරාධනා කර තිබුණි. වඩා සමාජශීලි අරාබි කරයේ සිටි පැමිණි සිසුන්  හා ලතින් ඇමෙරිකානු සිසුන් පියකරු රුසියානු තරුණියන් හා හාදවනු අපි දුටුවෙමු. වඩා ලැජ්ජාශීලි වූ අපේ පිරිස ඩිස්කෝ ශාලාවේ අයිනට වී නටන බවක් පෙන්වමින්  පියකරු තරුණියන් නටන දෙස බලමින් සිටියෙමු.

ජැප්පා ට මෙය දිරවුයේ නැත. තෙවන දිනයේ ජැප්පා මරියා  සමග පැමිණ මට එලියට යාමට කතා කළේය. මගක් යනවිට කාර්ලොස් ද එකතු වුනි. අප නැවතී සිටි ගොඩනැගිල්ලේ එළියේ හිම පිරී  තිබුණි. ජැප්පා බෑගයෙන් බියර් බෝතල්  හතරක්  ගත්තේය. එදා දවල් නිවාඩු නිකේතනයෙන් පිට එළියේ ඇවිද්ද ජැප්පා බියර් ආදිය විකුණන කඩයක් සොයාගෙන තිබුණි. සෝවියට් දේශයේ බියර් ඉතා ලාභය. කොපෙක්  20ක් පමණ වේ. අපි  සුදු හිම පිරුණු  පඩිපෙලේ ගොනුවී කතා කරමින්  බියර් බීවෙමු. අපට සීතලක් නොදැනුණි.

ඉන්පසු  අප කලේ උදේ ආහාරයෙන් පසු ක්‍රීඩා කිරීමත් දවල් ආහාරයෙන් පසු අර කඩයට ගොස් බියර රැගෙන විත් බීමත්ය. බෝතල් විසි නොකර නැවත කඩයට භාර දුන් විට ඒවාටද මුදලක් ලැබේ. එයින් ද බියරම මිලදී ගතිමු.

ජැප්පා ට සෝවියට් දේශයේ ජීවිතය ක්‍රමයන් එපාවී යමින් තිබුණි. ඔහු කැමති එකම දෙය කෑමය. ඔහු කීවේ ජපන් සුෂී වලට වඩා  ඔහු රුසියානු කෑම ප්‍රිය කරන බවයි. මාත් රුසියානු අහර වලට ඉතා ප්‍රිය කරමි. දැනුදු එසේය. අපට උදයේ කිරෙන් ඉවු බත් (මේ කිරි බත් නොව කැඳ විශේෂයකි) හෝ බ්ලිනි නමින් මී පැණි සමග කෑමට තෝසේ වැනි  කෑමද තම්බාපු බිත්තර හා සොසේජස් ද තිබුණි. දහවලට හරක් මස් වලින් සෑදු  ගුල්යාෂ් සමග පොඩි කරන ලද අල හෝ රෝස්ට් කරන ලද කුකුළු පළුවක්  සමග සලාද වැනි දේ හා සුප් එකක්ද හවසටත් ඒ ආහාරමද ලැබුණි. කේක් වර්ගද හවසට ලැබුණි.  මේ සෑම විටම බිමට යුෂ වර්ගයක් හෝ කකාඕ හෙවත් උණු කිරි වලට චොකලට් කුඩු දැමූ  පානයක් ද විය. (හොට් චොකලට්) මේ සියල්ලම නොමිලයේ රජයෙන් සැපයිනි.

කාර්ලොස් සහ මම මරියාගේ සිත ගන්නට උත්සාහ කල අතර ඇය අප දෙදෙනා සමගම උකුළු මුකුළු කළාය. ජැප්පා ඔහේ සිනා වෙමින් බලා සිටියේය. මෙහිදී මට දැන ගන්නට ලැබුනේ උන් තිදෙනාම එම රටවල කොමියුනිස්ට් පක්ෂ හරහා පැමිණි බවය. ජපානයට කොමියුනිස්ට් පක්ෂයක් තිබෙන බව දැන ගත්තේත් ජැප්පා නිසාය.

 කාර්ලොස් ලතින් ඇමෙරිකාවේ ගරිල්ලා ව්‍යාපාර වලට සමච්චලයෙන් සැලකුවේය. සමහරක් ඒවා මත්  ද්‍රව්‍ය ප්‍රවාහනයද කරන බවද ඔහු පැවසීය.දයාන් ජයතිලක ගේ දේශනා වලින්  හා ලංකා ගාර්ඩියන් එකෙන් උගත්  විමුක්ති කාමී ලතින් ඇමෙරිකානු ගරිල්ලා ව්‍යාපාර පිලිබඳ මගේ අදහස් අවඥාවෙන් බැහැර කල ඔහු ඒවා විමුක්තිය උදෙසා සටන් කරනු වෙනුවට ජනතාවට කරදර කරන ව්‍යාපාර ලෙස සැලකීය.

මරියා එතරම් දේශපාලනය කතා නොකළ මුත් පිලිපීනයේ වාමාංශික ව්‍යාපාරය සෝවියට් දේශය අනුගමනය කිරීම,  පිලිපීනයේ වැඩි පිරිසක් දුප්පතුන් වුනත් අනුගමනය නොකරන බවත් ඔවුන් ඇමෙරිකන් ක්‍රමයට වඩා කැමැති බවත් පැවසුවාය. සෝවියට් දේශය සිතූ තරම් හොඳ  නොවන බවද  ඇගේ අදහස විය.

රජයේ ශිෂ්‍යත්වයකින් රුසියාවට පැමිණි මට කොමියුනිස්ට් පක්ෂ හරහා පැමිණි මොවුන්ගේ සෝවියට් විරෝධය සිනහවට කාරණයක් විය. රුසියන් භෂාවෙන් මට හැකි පරිදි අදහස් දක්වමින් විජේවීර නමැති ලංකාවේ වාමාංශික නායකයා  චීන ක්‍රමයට කැමැති වූ බවත් එනිසා සෝවියට් දේශයෙන් පිටු වහල් කල බවත්, නමුත් සෝවියට් දේශයේ ලොකු වැරැද්දක් (පක්ෂයේ අධිපත්‍යය හැර ) දැනට නොපෙනෙන බවත් කීවෙමි. මා රුසියාවට ඒමට ප්‍රථම දිවයින පත්‍රයට ලිපි පෙළක් ලිවූ ආචාර්ය නලින්ද සිල්වා ඉදිරිපත් කළ  "සෝවියට් දේශය පාලනය කරන සමාජවාදී පන්තිය " ගැන ජැප්පා ට පැහැදිලි කලෙමි. සුචරිත ගම්ලත් ගේ ට්‍රොට්ස්කි වාදය හා ස්ටාලින්ගේ ක්‍රමයට ඇති විරෝධය ගැන කීවෙමි. ජැප්පා කලේ මේ විස්තර වලට මහා හඩින්  සිනා සීමය.

ජැප්පා ට සිනා සීමට හේතු තිබුණි. රුසියානු තරුණ තරුණියන් මෙන්ම  ගුරුවරුද ජැප්පා ට මහා භක්තියකින් සැළකූහ. ජැප්පා ළඟ තිබු ජපානයෙන් මිලදී ගත් පෑන් පැන්සල්, විදුලි උපකරණ අගය කළහ.  ඒ දිනවල සින්දු ඇසීමට තිබුණු කැසට් දමන  සෙට් අතර වෝක්මන් ද ඉතා ජනප්‍රියය. ජැප්පාට ද දෙකක් ම තිබුණි.   අපේ සිසුන්ද මේවා ලන්ඩනයෙන් හෝ ජර්මනියෙන් මිලදී ගෙන රුසියානුන්ට විකුණුහ. 1977 ලංකාවේ විවෘත ආර්ථිකයෙන් මෙවැනි පුංචි සුඛෝපභෝගී යයි නම් කරන ලද භාණ්ඩ ලංකාවට ද ගලාගෙන ආමුත් වැඩි දෙනෙකුට ඒවා ගැනීමට මුදල් තිබුනා ද යන්න සැක  සහිතය.  මට නම් මුදල් තිබුනේ නැත. ජැප්පා සතුව තිබූ මේ භාණ්ඩ නිසා ඔහුගේ  ජනප්‍රියත්වය වැඩි වුනු මුත් ජැප්පා මේ රුසියනුන් ගේ හා  අනිකුත් සමාජවාදී රටවල සිසුන් ගේ හැසිරීම සමච්චලයට භාජනය කළේය. ඔහුත් මමත් දෙදෙනාම සෝවියට් දේශයේ ජයග්‍රහණ ගැන බොහෝ වර කතා කෙරුවෙමු. ඇමෙරිකාවට වඩා  හොඳ රොකට්, අභ්‍යවකාශය ජය ගැනීම, විශාල කම්හල්, විදුලි බලාගාර, විශාල ගොඩ නැගිලි ආදී විශාල දේ ගොඩ නැගීමට, විශාල ට්‍රක් රථ, කල් පවතින ජීප් නිපදවීමට හැකි මුත් කුඩා සංගීත පටිගත යන්ත්‍රයක් නිපදවීමට හෝ කුඩා බැටරියක් නිපදවීමට ඔවුන්ට නොහැකි වන්නේ මන්ද යන්න අප නිතර කතා කල මාතෘකාවක් විය. සෝවියට් දේශයේ එවැනි භාණ්ඩ තිබුන මුත් ජපානයේ මෙන් උසස් තත්වයේ නිෂ්පාදන නොවීය. මේ තත්වය ගැන අපි නිතර කතා කළෙමු.

ඊට අමතරව ජැප්පා ගේ වටේ කේජිබි යයි කිව හැකි කිහිප දෙනෙක් සැරි සැරූහ. දෙතුන් වාරයක්ම නිවාඩු නිකෙතනයේදීත් පසුව විශ්ව විද්‍යාලයේ දීත්  ජැප්පා මට මොවුන් ව පෙන්වූවේය.  ජැප්පා භය නැතුව එළියේ ඇවිද අසල ගමේ බියර් කඩය සොයා ගියේ ඇයිදැයි මට පසක් වුනි. ඔහුට භය වීමට කාරණාවක් නැත. ඔහුගේ පිටු පස කේජිබි සෙවනැල්ල වැටී තිබුණි. කිසිවෙකු ඔහුට කරදර කිරීමට ආවොත් ඔහුගේ කේජීබී  මුර කරුවන් ඔහුව ආරක්ෂා කරනු ඇත. ජැප්පා එය මැනැවින්  පාවිචිචි කළේය.

රෝහණ විජේවීර චීනයට පක්ෂව සෝවියට් දේශය විවේචනය කරමින් සෝවියට් දේශය ධනවාදයට දෙසට ගමන් කරන බවට චෝදනා කළේය. 1963 ඔහු ලංකාවේ සිටියදී රුසියාවට යාමට වීසා නොලැබුණු කාලය චීනයේ සංස්කෘතික විප්ලවය පටන් ගත් කාලයයි. මිලියන ගණනක  චීනුන් නගරයෙන් ගම්  වලට දැක්කීම හා වධ දී මරා  දැමීම සිදු වුනි.  ජැප්පා මේ ගැන මැනවින් දැන  සිටියේය.  මේ සෝවියට් දේශයේ ස්ටාලින් ගේ කාලයේ තිබු මර්දනය හා සමාන කාලයකි. විජේවීර කැමති වුයේ මෙයටද?

1979 චීනය ඇමෙරිකා  එක්සත් ජනපදය සමග වෙළඳ සබඳතා පටන් ගත්  අතර,  රජය සතු දේපල පෞද්ගලික ප්‍රාග්ධනය බවට පත් කරමින් රාජ්‍ය ධනවාදය හා පෞද්ගලික දේපල අතර සම්බන්ධය ඇති කරමින් කොමියුනිස්ට් පක්ෂය යටතේ ක්‍රමයෙන් ධනවාදී ආර්ථිකයක් (චීනයේ) ගොඩ නංවන ලදී. සෝවියට් දේශයේ රාජ්‍ය ධනවාදය (දේපල රජය සතු)   ක්‍රියාත්මක වූ සමාජවාදී ක්‍රමය තව දුරටත් පැවති අතර එය කඩා වැටුනේ විජේවීර ගේ හදිසි මරණයෙනුත්  පසුවය. විජේවීර ගේ චීන නැඹුරුව හා පසු කාලීන ජවිපෙ හි චීන නැඹුරුව ප්‍රශ්නාර්ථයක් වන්නේ එහෙයිනි.

අපේ අධ්‍යයන කාලය 1985 අවසන් වුන අතර ඒ වන විට ජැප්පා නැවත ජපානයට යාමට තරයේ අදිටන් කර ගෙන සිටියේය. රුසියානුන් පවා දියුණු ජපානයට කැමති නම් මේ ක්‍රමයෙන් ගත හැකි දෙයක් නැත යන්න  ඔහුගේ නිගමනය විය.

නමුත් කොමියුනිස්ට්වාදය අත හැරීමට ඔහු සුදානම් ව සිටියේ නැත. ජපානයේ කුඩා කාමර වල හිරවී වැඩ කරන, සමාජ සම්බන්ධතා අඩු විශාල ශ්‍රමික පිරිසක් සිටින බවත් ඔවුන් සඳහා කුමක් හෝ කල යුතු බවටත් ඔහුගේ හැඟීමක් විය. නමුත් ඒ සෝවියට් පන්නයේ සමාජවාදය නොවන බව ඔහුට පසක් වී තිබුණි. මට එය වැටහුනේ තවත් කාලයකට පසුය. ඒ අප පැමිණි ශ්‍රී  ලංකාවට වඩා  සෝවියට් දේශය දියුණු රටක් වීම නිසා විය හැක.

ජැප්පා පළමු අවුරුද්ද අවසානයේ නැවත ජපානයට  ගියේය.මරියාද උසස් අධ්‍යාපනයට තමන්ට ලැබුන විශ්ව විද්‍යාලය අතහැර පිලිපීනයට ගියාය. කාර්ලොස් සිවිල් ඉංජිනේරු ආයතනයට ගිය අතර මම  සහ ශ්‍රී ලංකාවේ සහෝදර සිසුවා සමග මොස්කව් විදුලි බල ආයතනයට (බල ශක්ති පිලිබඳ තාක්ෂණික විශ්ව විද්‍යාලය) ඇතුලත් වීමු.

සුමාන  කීපයකට පසු මම නැවත භාෂාව ඉගෙන ගත් මාදි එකට යහළුවන් බැලීමට පැමිණියෙමි. මට කාර්ලොස් නැවත එහිදී හමු වුනි. කාර්ලොස් අතේ ජපානයෙන් පැමිණි කාඩ්පතක් විය. එය අප දෙදෙනාම නම් කර (මටත් කාර්ලොස්ටත්) එවන ලද්දකි. කාර්ලොස්  මට කලින් එය ලබාගෙන තිබුණි.  ජැප්පා, ජපානයේ විශ්ව විද්‍යාලයකට ඇතුලත් වී  තිබේ. ඔහු සතුටින් සිටින බවත් අප ගැන නිතරම මතක් වෙන බවත් ලියා එව්වේය. මටත් කාර්ලොස් ටත් දැඩි ලෙස සිනා පහල වුයේ එයට නොවේ. කාඩ්පතේ යටින් තිබු මරියාගේ සටහන දැකීමෙනි. ඇය ජපානයේ ඉගෙන ගන්නා බවත් ජැප්පා සමග අප ගැනත් සෝවියට් දේශය ගැනත් කතා කරන බවත්, ඇය  ජපානයට වඩා කැමති බවත් ලියා තිබුණි.  අපට සිනා ගියේ අපටත් නොදැනී හීන් සීරුවේ මරියා  සමග සම්බන්ධයක් හදා  ගෙන ජපානයට ගිය සැනින් ඇයවද  කැන්දා ගත්  ජැප්පා ගැනය. අප ඔවුන්ට සුභ පතා  කාඩ් පතක් යවිමු. ජැප්පා ළඟ  මගේ ලිපිනය නොමැති නිසා ඔහු ආපසු මට ලිව්වා ද යන්න නොදනිමි. ඉහත පින්තුරයේ සිටින්නේ ජැප්පා ය. අවාසනාවකට මට ඔහුගේ නම මතක් වන්නේ ම නැත. නමුත් පින්තුරය තවමත් තිබේ.

 ජැප්පා ගේ නම ඉසාමි බව සහසුද්දයෙන්ම කිවේ වෙනත් යහළුවෙකි. නමුත් මට මතක විධිහට ඔසාකි ය.

ජැප්පා ගේ නම ඉසාමි කොන්ඩෝ බවත් නිවාඩු නිකේතනයේ නම ඉගුමින්කා  බවත් එදා මාදි එකේ සිටි සීනියර් සිසුවකු ලියා  ඒවා තිබිණි.

දාහේ පටියේ මාසික තෑග්ග හා නෙළුම් යායෙන් පොත් බෙදිල්ල

තරාතිරම් වාදය ගැන මා මිට කලින් ලිපි කීපයක් ලියා  තිබේ.

පීචං අමෙරිකන්ලා හා තවත් කතා - 1
තරාතිරම්වාදය 1- සමාජ සුභ සාධකගේ කොමෙන්ටුවට තව කතාවක්
තරාතිරම්වාදය 2
අන්තිම ලිපියේ ලියුවේ ඉන්දියානු ගමන ගැනය. නෙළුම්  යායේ මාසික තෑග්ග වශයෙන් රුපියල් දාහක් දීමට කල යෝජනාවට එල්ලවූ විවේචනයක් දුටු මට මේ අත්දැකීම මතක් විනි. මා  ගිය ඉන්දියානු චාරිකාවේ  සංවිධායක වරයා එක තැනක එක රැයක් පමණක් මට වෙනම කාමරයක් දිය නොහැකි බව පැවසුවේය. එතන එහෙම කාමර නැති පන්සලකි. නිඝන්ටයන් අදහන අයගේ ආරාමයක දේශනා ශාලාවේ මුළු වන්දනා කණ්ඩායම ම නිදා ගත යුතුව තිබුණි. වෙන විසඳුමක් කොහොමත් නැති නිසා මා මෙයට විරුද්ධත්වයක්  නොපෑවෙමි.

එදා මදක් පමාවී ආරාමය වෙත බස් රථ පැමිණුනි. සාමාන්‍යයෙන් උදව් කරන ඉවීම කරන කණ්ඩායමේ දෙමළ තරුණ පිරිස ඉවුම් පිහුම් කිරීමට හා ශාලාව ශුද්ධ කිරීමට ගියහ. මම මගේත් මවගේත් ගමන් මාළු  රැගෙන ශාලාව තුල තැබීමි. ඉන්පසු මට පෙනී ගියේ වයසක උපාසක අම්මලා හා අබල දුබල අය ඉතා අමාරුවෙන් තමන්ගේ ගමන් මලු අදින බවය.එහිදී මා කළේ  වයසක අයගේ ගමන් මළු ශාලාවට ඇද ගැනීමට උදව් වීමයි. සමහර අය මෙහිදී තමන්ගේ සියලුම ගමන් මලු උස්සා ගෙන යාමට මට දුනි. මම මෙය එතරම් ගණන් නොගෙන දුන් සියලුම ගමන් මළු ටික ඇද දුනිමි. ටික වෙලාවකින් මම උදව් කල එක  උපාසක අම්මා කෙනෙකු  පැමිණ මට ඇපල් ගෙඩියක් දුන්නාය.  "ඇපල් කාල ඇති වෙලා. ඇඹරල්ලා  ගෙඩියක් වත් තිබ්බ නම්" කියා විහිළුවක් කර එය ප්‍රතික්ෂේප කලෙමි. "මගේ මුනුපුරොත් ඔය පිටකොටුවෙන් ගේන  ඇපල් කන්නේ නැහැ" කී  ඇය නැවත ගොස් ඇත්තටම ඇඹරල්ලා ගෙඩියක් ගෙනත් දුන්නාය. මම විමතියෙන් එය භාර ගතිමි. "ඕක විතරයි ඉවර නොවී  තිබ්බේ. පින් සිද්ද වෙච්චාවේ " කියා ඇය ආපසු ගියාය.

වැඩේ අවසන් කර ඇඟ  ටිකක් සෝදා ගෙන ඇලවී පොතක් බලමින් සිටියදී අර උපාසක අම්මා කලබලෙන් මා  දෙසට එන බව පෙනිණි. මගේ මවද  මා අසලම ඇලවී සිටියාය. "අනේ මහත්තයෝ සමාවෙන්න. මම හිතුවේ සංවිධායක මහත්තයාගේ කෙනෙක් කියල. ඔබතුමා  උදව් කරාට  ගොඩක් පින්. අනේ මම ඇඹරැල්ල ගෙඩියක් දුන්නට සමාවෙන්න." ඒ පිටිපසින් මා උදව් කළ තව කීප දෙනෙකුද සිටි අතර සියල්ලෝම "ඔබතුමාට" ස්තුති කරන්නට පෝලිමේ පැමිණි අයයි.  මදක් එහා මෙහා බැලු විට මට සියල්ල පැහැදිලි විය. මා එංගලන්තයෙන් පැමිණි බව ඉතිරි පිරිසටත් කියූ සංවිධායක වරයාගේ ලේකම් මෙන් සිටි තරුණිය සිනා වෙමින් සිටියාය. ඒ වේලේ  මගේ මවද මැදට පැන  "එයා  ඇඹරැල්ල කන්න ආසයි. එංගලන්තේ නැහැනේ " යයි මගේ රැවීම මැද කීවාය. ඒ මදිවාට  අර ශ්‍රංගයා  සිටි විශ්‍රාම  ශාලාවේ මෙන් පිටු පස සිටි අයද  මා වර්ණනා කලෝය. "ඔය පුතා  හා අම්මා  තමා  මෙතන පින් රැස්  කලේ. " (මගේ මවද මට ටිකක් මළු  ඇද  දීමට උදව් කලා ය.)  ඔවුන්ට අනුව මට පසුදාම නිවන් යා හැකිව තිබුණි.

මේ "ඔබතුමා" කතාව පසුව මට කරදරයක් විය. තවත් අයෙකුට කෑම පෝලිමේ සිටියදී කෑම බෙදා ගැනීමට පිඟානක් නොතිබුණු බව පෙනී මම මගේ පිඟාන දුනිමි. ඔහු  "ඔබතුමාට" හෙවත් මට සෑහෙන්න ස්තූති කළේය. මම මන්තිරි කෙනෙකු නොවන බවත් අජිත් කියා අමතන ලෙසත් කීවෙමි. නමුත් ඔහු කිවේ මන්ත්‍රී කෙනෙකුට වඩා  "එංගලන්තයෙන් ආවත් " තම කෑම පිඟාන අනිත් කෙනෙකුට අහර අනුභවය සඳහා දුන් මට ඔබතුමා  කියා මා  කැමති වුනත් නැතත් කියන බවයි. ඔහු මුළු චාරිකාව පුරාම එසේ ඇමතීය.

මෙම චාරිකාවේදී සාමාන්‍යයෙන් ලැගුම් ගන්නේ හෝටලයක නම් මම මව සමග  ආහාර ගත්තේ හෝටලයේ ආපන ශාලාවෙනි. නැත්නම් එලියට ගොස් වෙන තැනකිනි. වෙන විසඳුමක් නැති තැන පමණක් අර හැමෝටම උයන ආහාර ගතිමි. හේතුව ඒවා සැර වැඩි වීමය. නමුත් කෝකියා මෙයට ඇනුම්පද කීවේය. "ඒ මහත්තයට අපේ කෑම හොඳ නැහැනේ. එංගලන්තයේ ඉඳන් ඇවිත් නිසානේ. අර වෙනම කෑම  දෙන අනිත් චාරිකා තියෙන්නේ, ඇයි ගියේ නැත්තේ."

ප්‍රශ්නය ඇත්තේ මෙතනය. ලංකාවේ දැන් බොහෝ අයට  පිටරට යා හැකිය. එසේම බොහෝ පවුල් වලට කොහේ  හෝ පිටරටක නෑදෑයෙක් සිටී. මේ නිසා මේ පිටරට ඉන්න අය දෙස වෙන ඇසකින් බැලීම් අවශ්‍ය නැති අතර පිටරට සිටින අයද මම මෙහෙ අරහේ සිටිනවා කියා ඔලුව උදුම්මා ගත යුතු නැත.

මෙහිදී මට මතක් වන්නේ අපි මුලින්ම සෝවියට් දේශයේ සිට ලන්ඩනයට පැමිණි කාලයයි. 1985 හේ සිට බොහෝ වසර වල අපි පැමිණියෙමු. මට මිතුරකු වරක් පැවසුවේ දේශපාලන උදව් මත පැමිණි අය, බොහෝ ඈත කාලයේ සිට පැමිණි රදල අය මෙන්ම මුදල් වියදම් කර පැමිණෙන පොහොසත් දෙමාපියන්ගේ දූ  පුතුන්ද, ඇමති දූ පුතුන් ද  මේ රුසියාවේ සිට එන උදවියට කැමති නැති බවයි.  වරක් මම ලංකාවේ සිට ගෙනා   පාර්සලයක් දීමට ලන්ඩනයේ නිවසකට ගියෙමි.  ගෙදර මැදිවියේ ඇන්ටී (ආන්ටි) මට හොඳ කෑම වේලක්ද දී කතාවට  වැටුනාය. මා ද සෝවියට් රුසියාවේ සිට අවුරුදු පතා පැමිණෙන අයෙක් බව නොදැන ඇය මෙසේ කීවාය . "අනී බලාන්ඩකෝ මේ හැම තැනම රුසියාවේ හෙම ඉඳාන් එක එකා  එනවනේ දැන් මෙහෙ. අපේ ඩැඩි හෙම අපව එව්වේ කොච්චර අමාරුවෙන්ද? ස්කූල් වලට ගෙවල. අපටත් තැන නැහැනේ මේ විධිහට ගියොත්.  එංගලන්තේ ඉන්න දන්නා එවුන්ද".
මම සිනහව වළකා ගෙන සිටියෙමි.

මට තේරුම් ගියේ මෙයයි. ඒ ඇන්ටිද එංගලන්ත රජයෙන් සුභ සාධක මුදල් රැගෙන නැනී වැඩක් හොරෙන් කරගෙන ආණ්ඩුවේ ගෙයක් නොමිලේ රැගෙන ජිවත් වන්නියකි. හැබැයි ලංකාවේ ගෙවල් තියෙන්නේ කොළඹ  හත පැත්තේය.  සේවක සේවිකාවන්ද සිටි. ලංකාවට ගිය විට හැසිරෙන්නේ මහා රැජින සමග ලන්ච් එකට නිතර යන ගානටය. අපි වැනි එවුන් මෙහි පැමිණිය හොත්  මේවා මාට්ටුවී ලංකාවට ආරංචි වෙන බයට කියන කතා විය යුතුය.

මුලින් ම කිව යුතු වන්නේ තරුරසී ඇතුළු අනිත් අය යෝජනා කල පරිදි රුපියල් දහස වෙනුවට පොත් තෑගි වශයෙන් දීමට මම එකඟ බවය.  මුලදී එසේ යෝජනා නොකළේ මේවා කරන්නට ලංකාවේ පිරිස සොයා ගැනීම අපහසු බැවිනි.
මාතලන්ට සම්මානය ලැබුණු විට ඔහු මුදල් ත්‍යාගය ප්‍රතික්ෂේප කළේය. ඒ වෙනුවට ඔහු ඇතුළු තවත් කීප දෙනෙකුම පොත් වවුචර දෙන ලෙස ඉල්ලා සිටියේය. ප්‍රශ්නය වුයේ මේ හැම දෙයම කරන්නට හිටියේ අර හීනි හිමාශියා පමණය. උදේ සිට නොකා නොබී දුව පැන ඇවිදිමින් බ්ලොග් උළෙල සංවිධානය කරන්නට වෙහෙසෙන හිමාෂි වවුචර ගන්න යවන්ටත් බැරිය.  (කටුස්සා  කියන්නේ සම්පුර්ණ ඇත්තය. හිමාෂි හුලං කකා වතුර බිබී හැම තැනම  දුවන්නීය. ) වාහනයක් මගේ අතින් හැප්පීම නිසා එක් දිනක් හැම වැඩක්ම තවත් පරක්කු විය. ඒ අතරේ මාතලන් කතා කල විට වවුචර ගන්නට යවන්න  කෙනෙක් නැති බව කීවෙමි. මගේ වාසනාවට මාතලන් ඒ වෙලේ මුදල් ගන්නට කැමති වුනි. ඒ මගේ පහසුව පිණිසය.

මේවා සියල්ලත් සමග නෙළුම්  යායේ මාසික තෑග්ග වශයෙන් රුපියල් දහසක් දීමට ඇතිවුණු  විරෝධයේදී එක්තරා "බූරු  බේබ්  " (ගූගල් නම) කෙනෙක් එල්ල කල චෝදනා වලට මා දුන් පිළිතුරු දරුණු  වැඩි බවත් මා සීමාව පැන්න බවත් බ්ලොග් මිතුරන් කිහිප දෙනෙකු විවේචනද  කළහ.

මේ ඇගේ  මුල් විවේචනයයි.
//රුපියල් දාහකට මොනවද කරන්න පුළුවන් ඇත්තෙන්ම?
සම්මානයක් හරි ඕන බම්බුවක් හරි අගය කිරීමක් වෙන එක අතරයි, මේ රුපියල් ශත කාසියකට දෙකකට විකිණෙන මිනිස්සු ගැන මට දැනෙන්නේ අම්බානක දුකක්.
අපරාදේ ගූගල් ලා වර්ඩ්ප්‍රෙස් වගේ කට්ටිය බ්ලොග් ෆ්ලැට් ෆෝම් එකක් හැදුවේ. මේ වගේ රුපියලට දෙකට කොහෙවත් එවුන්ට කඩේ යන්නනේ ඕයි. නැත්නම් විස්කි බෝතලයකට සිගරට් පැකට් එකකටනේ.
ලැජ්ජයි-//බුරු බේබ් 
මේ මගේ පිළිතුරයි. 
//ඔයාට සල්ලි තියනවනම් තියන් ඉන්න. අපි කාටවත් කඩේ යන්න කියල නැහැ.
මේක ගන්න ඕනේ නැති කට්ටිය එපා කිව්වම ඉවරයි. අපි කාටවත් බල කරලා නැහැනේ. රුපියල් දාහ අපට දෙන්න පුළුවන් ගාන. ඔයාට ඊට වැඩිය දෙන්න ඕනේ නම් දෙන්න. රුපියල් දාහෙන් මුකුත් කර ගන්න බැරිය කියල ඔයා කියනවනම් ළමයෙකුට පැන්සල් පෙට්ටියක් කියාද කියල බලල කතා කරන්න. අපි දෙන්න හදන්නේ නැති කෙනෙකුට මිසක ඔයාල වගේ තියන අයට නෙමේ. දැන් මෙන්න මේ චැරිටියෙන් දෙන්නත් රුපියල් 2000 මාසෙට. www.shareandcare.org.uk
ගූගල් ල ඒවා හැදුවේ නැත්නම් බුරු දෙනවල් ඉන්නවා කියල අපි දැන ගන්නේ කොහොමෙයි? අපි කොහෙවත් යන එවුන් වෙන්නට ඔයා  යන තැන දන්නා මාර පොෂ් කෙනෙක්ද?//

මෙහිදී මගේ වැරැද්ද ලෙස මා  දකින්නේ "බුරු දෙනවල්" යන වචනය භාවිතා කිරීම යයි සිතමි.  බූරු  බබා හෝ බුරු බඩුව කියනවාට වඩා බුරු දෙන හොඳ වචනයක් ලෙස මා සිතුවෙමි. එසේ නම් එළදෙන ද නරක වචනයක් විය යුතුය.  කෙසේ හෝ වේවා එම වචනය පාවිච්චි කිරීම ගැන කණගාටු වෙමි.  විස්කි බෝතලයකට සිගරට් පැකට් එකකට මා  කවදාවත් කාටවත් කඩේ ගොස් නැත. මගේ මුදලින් ඒවා ගත හැකිය.

ඉන්පසු ඇය  මෙසේ ලීවාය.
//අජිත් සාමාන්‍යයෙන් මම මම ගැන මහ ලොකුවට කියන්න යන්නේ නෑ. 
මම කාන්තාවක්.  ඉන්නේ යුරෝපේ රටක පොඩි කාලේ ඉඳන්. අද තව වෙනකම් රුපියල් ශත හෝ ඊට එහා කිසිම දේකටවත් විකිණිලා නෑ. පොඩ්ඩක් අහල බලන්නකෝ ඔය වටේ පිටේ ඉන්න බ්ලොගර්ස් ලගෙන්. 
මම කොන්දක් තියෙන ගැහැණියක්... ඉන් එහාට ඔයාට මම උත්තර දෙන්නේ නෑ. මේක ඔයාගේ තැන. අද ඊයේ ඉන්ටර්නෙට් එකට ආපු බ්ලොග් කියවපු බ්ලොග් කියන්නේ මොකක්ද කියන්න නොදන්න ඔයාලා එක්ක දේශපාලනය කතා කරන්න හරි වැරදි කියන්න මම එන්නේ නෑ. හැබැයි අපි හැමදාම වගේ කාටවත් කඩේ යන්නේ නෑ..... 
එච්චරයි. මනුස්සකමට, ආදරේට එකෙක් මරන්න හරි යයි. එන් එහාට රුපියල් ශත අපි ඩීල් කරන එක නතර කලේ ඉපදෙනකොටමයි-//බුරු බේබ් 

මෙය කියවන විටම මගේ මතකයට ආවේ අර ඉහත කි "පිටරටවල" ජිවත් වන ඔලුව ඉදිමුණු අය  ගැනයි. මේ නිසා පහත සඳහන් පිළිතුරු දුනිමි.

//ඔයා ඔයා ගැන මහා ලොකුවට හිතන් ඉන්නවා කියල මම වෙන කොමෙන්ට්ය් වලිනුත් දැකල තියනවා. මම ඉන්නෙත් අවුරුදු 32 විතර යුරෝපයේ. //
//අද ඊයේ ඉන්ටර්නෙට් එකට ආපු බ්ලොග් කියවපු බ්ලොග් කියන්නේ මොකක්ද කියන්න නොදන්න ඔයාලා එක්ක දේශපාලනය කතා කරන්න හරි වැරදි කියන්න මම එන්නේ නෑ. // මේකට කියන්නේ prejudice කියල හැබැයි. අද ඊයේ ඉන්ටනෙට් ආපු කියල මට කියන්න ඔයා දන්නේ කොහොමොයි. මට ඉන්ටනෙට් ඉස්සෙල්ලම හම්බ වුනේ මින් අවුරුදු 16 කට විතර කලින්. එතකොට බ්ලොග් ගැන දන්නේ ඔයා විතරද? ඔයා දන්නවද මම වෙන නම් වලින් බ්ලොග් ලියල තියනවා කියල. දන්නේ නැති දේවල් ගැන කතා නොකර ඉන්න. ඔයාට කඩේ යන්න කවුරුත් කීවෙත් නැහැ. යන්නත් එපා.
අනික ඔයාගේ කොමෙන්ට් වලින් මම දැකල තියනව යුරෝපේ රටක පොඩි කාලේ ඉඳන් හිටියයි කියල ඔයාගේ මහා ඇම්මක් තියනවා කියල. ඔයට ඒ කොමෙන්ට් වලදී ඇනෝ මහත්වරු ඇති වෙන්න දීලා තියනවා මම දැකල තියෙන නිසා මම එතනට යන්නේ නැහැ. අපි අපේ වැඩේ කරන්නම්. ඔය ඔයාගේ වැඩේ කරගෙන යන්න. එංගලන්තේ කොම්පැනි හවුස් එකේ බලන්න චිප්ස් ඇන්ඩ් බයිට්ස් කියන කොම්පියුටර් කොම්පැනියේ ඩිරෙක්ටර කවුද කියල 1994. දැන් ඒක dissolve කරලා තියෙන්නේ

පත්තර මල්ලි මෙහිදී කී දෙයට එකඟ වෙමි.  නමුත් නෙළුම්  යාය  ලංකානිව්ස්වෙබ් අඩවිය හා සම්බන්ධ බව ඔහු දැන  නොසිටින්නට ඇත.
//අජිත් බොස්.. පුද්ගලිකත්වය මෙතනට අවශ්‍ය නෑ නේද . ඇයි එතනට වැටෙන්නෙ ??

පත්තර මල්ලිට දුන් පිළිතුර.
මෙන්න මේ කතා දෙක නිසා පත්තර මල්ලි. //
//අපරාදේ ගූගල් ලා වර්ඩ්ප්‍රෙස් වගේ කට්ටිය බ්ලොග් ෆ්ලැට් ෆෝම් එකක් හැදුවේ. මේ වගේ රුපියලට දෙකට කොහෙවත් එවුන්ට කඩේ යන්නනේ ඕයි//
//අද ඊයේ ඉන්ටර්නෙට් එකට ආපු බ්ලොග් කියවපු බ්ලොග් කියන්නේ මොකක්ද කියන්න නොදන්න ඔයාලා එක්ක දේශපාලනය කතා කරන්න හරි වැරදි කියන්න මම එන්නේ නෑ. // ඔය යුරෝපේ රටක පොඩි කාලේ ඉඳන් හිටිය අය ඇමෙරිකා එක්සත් ජනපදයේ අවුරුදු දෙකක් විතර ඉඳන් ඉන්න අයගේ ටිකක් වෙන්න ඇම්මක් මම දැකල තියනවා. අනිත් අයට කලින් ඒ ගොල්ල කොම්පියුටර දිහා බලන්න ඇති කියල. බූරු බේබ් ගේ කොමෙන්ට් මම කියවා තියනවා සමහර බ්ලොග් වල. . මගේ පලවෙනි ඊමේල් එක මට ලැබුනේ අනූ ගණන් වල. මම හාර්ඩ් ඩිස්ක් එක 20MB තියන මැෂින් වල වැඩ කරලා තියෙනවා 88-91 විතර . මෙයාල තමා බ්ලොග් ඔස්තාර් ලා. මේ නෙලුම් යාය කියල පල කරලා බ්ලොග් කට්ටියට තැන දෙන්න හිතුනෙත් මේ ඔස්තාර් ලා නිසාම තමා . අනික මට ලොකු අමාරුවක් නැහැ අතේ තියන සල්ලි විසි කරන්න. මේකට ගොඩක් අය විරුද්ධ නම් නොකර ඉන්න වුනත් පුළුවන්. නමුත් මොකක් හරි පටන් ගන්නයි මම හදන්නේ.

මෙහිදී දේශකයා  මා පටු අදහස් ඇත්තෙක් යයිද බුරු බේබ්  ට සෘණාත්මක අදහසක් ඉදිරිපත්  කිරීමට අයිතියක් ඇතැයිද පැවසුවේය. මෙහිදී මා  කිවේ මේ අදහසට මාතලන්, කල්‍යාණ  මිත්‍ර, රූපේ ඇතුළු තවත්  කීප දෙනෙකු ද විරුද්ධ  වූ අතර එය මා  බල පොරොත්තු වූ දෙයක් බවයි. නමුත් මට කරන විවේචනයකදී එයට පිළිතුරු දීමට මට සාධාරණ අයිතියක් තිබේ. මෙය විවේචනය දරා  නොගැනීමක් වශයෙන් අර්ථ දැක්වීම වැරදිය. මෙහිදී රයිගමයා, රසික හා චෙෆාකි ගේ අදහස් වලට මගේ විරුද්ධත්වය ක්  නැත. ඔවුන් යහළුවෙකු ලෙස සලකන අයෙකුට  එල්ල වන විවේචනයකට  ඔවුන් ඉදිරිපත් වී කිසියම් චරිත සහතික ඉදිරිපත් කරන ලදී.  නමුත් මා  දුටු බූරු  බේබ් ගේ සමහර කොමෙන්ටු වල මේ පිටරට වල ජිවත් වීම අතිශෝක්තියෙන් උපුටා දමා  තිබෙනු නිරීක්ෂණය කලෙමි.

මම සෝවියට් දේශයේ අත්දැකීම් අලලා ලියන ඒවා අනවශ්‍ය තේරුමක් නැති දේ වශයෙන් අරූද වරක් නිර්දය විවේචනයක් මට කළේය.

අවසාන වශයෙන් චෙෆාකි කිවේ රුපියල් දහසකට ගත හැක්කේ රෝස්ට්  කුකුලෙක් බවයි.  ඔහුට පිළිතුරු වශයෙන් මා  කිවේ රුපියල් දහසකට මට පොත් දෙක තුනක් ගත හැකි බවයි.  උදාහරණ වශයෙන් වනචාරිනි රුපියල් 400, දියෝනිස් දෙවොල පාමුල රු 500, සොරොව්ව රු 350 බත්තලන් ගුණ්ඩුව , අටවක පුත්තු 450 ආදී වශයෙන් හෝ රොස්ට් කුකුලන් භාගයක්, කාලක්  වශයෙන් අර්ථ දැක්විය හැකිය.

වතු කම්කරුවන් ඊයේ පෙරේදා වර්ජන කරන්නට පටන් ගත්තේ දෛනික වැටුප රුපියල් දහස කරන්න කියාය. මහපොළ දෙන ගානේ සිට දාහක් වත් වැඩි කරන්නට සිසුහු ඉල්ලති. අපි කවදාවත් ලංකාවේ පාරේ ඇවිදින විට රුපියල් දාහක්‌  හිඟන්නෙකුට විසි කරන්නේ නැත. මම ලංකාවේ හෝටල් වල නතර වීමට යද්දී රුපියල් දාහක් දෙදාහක් අඩු කර ගැනීමට බලමි.  ඇඹරැල්ල  ගෙඩිය අර උපාසක අම්මා  දුන්නේ හිතේ කැමැත්තෙනි. මා  පහත්  කිරීමට නොවේ. මගේ මහන්සිය ඇඹරැල්ල ගෙඩියට සම කිරීම ගැන මම අමනාප වුයේ නැත. අප තෑග්ගක් යමෙකුට දෙන්නේ තෑග්ගේ වටිනාකමටත් වඩා  ක්‍රියාව හෝ අවස්ථාව අගය කිරීමටය.

හැබැයි මට අමතක වූ කාරණයක් තිබේ. ලංකාවේ චන්දයක් ලංව මෙවන් යෝජනාවක් ගෙන ඒමයි. මට එය ඒ වෙලාවේ මතක් වුයේ නැත. සමහරවිට බූරු බේබ්  ඇතුළු විවේචනය කරන අයගේ සිතේ එයත් රඟ  දෙන්නට ඇත.

මම මුල්ම රුපියල් දහස පොත් ගැනීමට කියා පිරි නැමීමට සිටියේ යාං හෑල්ල ලියන ශ්‍රන්ගයා ටය. නමුත් යෝජනාව කලා නම් ජුවා හා පුචාට වඩා  හොඳ රැකියාවක් හා තත්වයක් ඇති ශ්‍රන්ගයා මගේ ඔලුව පලන්නටද ඉඩ තිබිණි.  මේ නිසා මා  බේරා  ගැනීම ගැන බූරු බේබ් , දේශකයා , රූපේ , මාතා, රසික, රයිගමයා  හා චෙෆාකි ට ස්තුති වන්ත වෙමි. එසේම මේ යෝජනාවට  සහය පල කල, මගේ නිස්සරණාධ්‍යශය තේරුම් ගත්  කවිකාරි මං, කුරුටු, නොකී කතා, බුද්ධික කන්දෙපොල, රසික, මහේෂ් රත්නායක, ලොකු පුතා,  මධු මාධවී , මනොෂ් සඳරුවන්,  එල ද බ්‍රා , රොහාන් ධනංජය, රාජ් හා තරු රසී ටද මහත් සේ ස්තුති වන්ත වෙමි. චන්දය අවසාන වූ පසු පොත් කිහිපයක් සම්මාන ලෙස සෑම මසකම ලබා දීමට ලංකානිව්ස්වෙබ් කර්තෘ චන්දිම විතානාරච්චි මහතා සමග සාකච්චා කරමි.  වෙනත් සෑම  වතාවක මෙන්ම පොත් ගැනීමට උදව් කරන අයද සොයාගත යුතුය. මේ සැරේ හිමාශි නම් කීයට වත් බැනුම් අහන්නට නැවත එන්නේ නැත.

නැවත ආවොත් පරණ රෙජීමයන්

"සිහසුනට තරඟ වැද" නමින් බ්ලොග් කරුවන් දෙදෙනෙකු විසින් සාර්ථක ලෙස සිංහලට පරිවර්තනය කරන ලද ජෝර්ජ් මාර්ටින්ගේ  ගේ කෘතිය, එච්බීඕ  හා ස්කයි ඇට්ලන්ටික් රුපවාහිනියේ ගේම් ඔෆ් ත්‍රෝන්ස් (Game of Thrones) නමින් ප්‍රදර්ශනය වෙයි.

මෙහි මුල් කොටසේ සේර්සෙයි ලැනිස්ටර් නමැති රැජින රජුගේ ප්‍රධාන සහායක වන (අගමැති වැනි තනතුරක්) නෙඩ්  ස්ටාර්ක් ට රජකම ගැනීමට අවුරුදු 14 කට කලින් තිබු අවස්ථාවේ එසේ කරන්නට තිබු බවත් එය නොකිරීමෙන් ඔහු විශාල වරදක් තමන්ට කරගත් බවත් පවසයි. එහිදී නෙඩ් එයට එකඟ  නොවෙයි. එහිදී ඇය යලිත්  මෙසේ පවසයි. "When you play the game of thrones, you win or you die. There is no middle ground." "ඔබ සිහසුනට තරඟ  කරන ක්‍රීඩාවේදී එක්කෝ ඔබ දිනනවා නැත්නම් මැරෙනවා. මැද මාවතක් නැහැ. "

මගේ යහළුවෙකු මම මේ දිනවල පවතින දේශපාලන උණුසුම ගැන නිහඬව සිටින්නේ මන්ද යයි විමසා ඒ පිළිබඳව අවම වශයෙන්  බ්ලොග් ලිපියක් වත්  නොලියන්නේ මන්දැයි ප්‍රශ්න කළේය.  කිසිම දේශපාලන පක්ෂයට කෙලින් ම සහය පල නොකිරීමේ හේතූන්  කිහිපයක් ඇති නිසා  එසේ නොකරන බව මම පැවසුවෙමි. ඉහත කී ලෙසින්ම මැද  මාවතක් ඇත්තටම තිබේද යන්න මට ඇති ප්‍රබල ප්‍රශ්නයකි.

එහෙත් අගෝස්තු 17 බලයට එන්නන් විසින් පොරොන්දු විය යුතු දෙයක් තිබේ.ඒ දැනට ඇතිවී තිබෙන මේ නිදහස සුරැකීමයි.

ගිය වසරේ අගෝස්තුවේ රාජපක්ෂ රජය තිබූ  කාලයේ මම පවුලේ අය  සමග ශ්‍රී ලංකාවට ගියෙමි. අපි පානදුර අසල හෝටලයක සතියක් පමණ නතරවී සිටි අතර ඒ අතර වාරයේ කොළඹට  පැමිණ, පසුව දුම්රියෙන් නැවත හෝටලයට යාමට කොටුව දුම්රිය පළට පැමිණියෙමු. එසේ කලේ මාත්  දරුවනුත් දුම්රියේ යාමට ඉතා කැමැත්තක් දැක්වීමත් දුම්රිය වල ඡායාරුප ගැනීම මගේ විනෝදාංශයක් වූ නිසාත්ය.

මම ඡායාරූප  ගනිද්දී ඒ දෙස අර දුම්රිය පලවල සුදු ඇඳගෙන මහන්තත්ත ලීලාවෙන් සිටි එකෙක් ඒ  දෙස බලා  සිටියේය.  වැඩ කරන පෝටර්ලා හා මගීන්ට ලොකු කම් පෙන්වමින් තමන් මහා ලොකු රස්සාවක් කරන බව දක්වමින් හැසිරෙන මේ සුදු ඇඳගත් නිලධාරීන්  දුම්රිය ස්ථානාධිපතිගේ සහායකයන් හෝ ටිකට්  විකුණන අය  විය යුතුය. මේ තැනැත්තා ඉන්පසු තවත් පොලිස් නිලධාරීන් දෙදෙනෙකුද ඇදගෙන එතනට පැමිණියේය.

එක පොලිස් නිලධාරියෙකු මගෙන් ප්‍රශ්න කළේය. ඔහු මගෙන් මා  ජන මාධ්‍යවේදියෙකු ද, දුම්රිය ස්ථානයේ ඡායාරුප ගන්නේ මන්ද? කුමන පත්‍රයකට මේවා යවන්නේද? සුදු කාන්තාව මොන එන්ජිඕ එකේද යනුවෙන් ප්‍රශ්න කීපයක්ම ඇසීය. සුදු ඇඳගත් උද්ධච්ච්යා සහ තවත් පොලිස් නිලධරයෙකු මදක් ඈතින් තර්ජනාකාරී ලෙස  අප දෙස බලා සිටියහ.  මම නිවාඩුවකට පැමිණි අයෙකු බවත් කාන්තාව මගේ බිරිඳ බවත් ඒ අසල සිටින්නේ දරු දෙදෙනා බවත් කීවෙමි. මම දුම්රිය එන්ජින් වල පින්තුර ගැනීම විනෝදාංශයක් වශයෙන් කරන බවද පැවසුවෙමි.  ඔහු ඉන්පසු කිවේ මෙවැනි කතාවකි. "අප හිතුවේ ඔයා මාධ්‍යවේදියෙක් කියල. ඕකුන්ට මේ මහත්තුරු පැත්ත පළාතේ එන්න දෙන්නේ නැහැ. ළඟදී  ආපු දෙතුන් දෙනෙකුට දුවන්න දුන්න." ඒ සිද්ධිය වෙබ් පුවතකින්  දුටු බව මට මතක් විනි. මගේ බිරිඳද ඔහුට හඳුන්වා දී මගේ ගමන් බලපත්‍රය පෙන්වීමට සැරසුනෙමි.

එය නැවත් වූ ඔහු ඉන්පසු සුහදශීලීව  කතා කර මට පරිස්සමින් හෝටලයට යන ලෙස දැන්වුවේය. අනිත් දෙදෙනා නික්ම ගියත් අප දුම්රියට නගින තුරු ඔහු ඒ අසල සිටියේය. "ලංකාවේ ජන මාධ්‍යවේදීන්ට ගිය කලක් " යයි මට සිතුනි. 

ඉන්පසු සිදුවුයේ තරමක් අදහා ගත නොහැකි දෙයකි.   එතනම සිටි අයෙකු දුම්රියට නැග මමත් බිරිඳත් අතරින් හිඳ ගත්තේය. දරු දෙදෙනා අනිත් කෙළවරේය. බිරිඳ එතනම ළඟ  සිටි තවත් ජර්මන් කාන්තාවක් හඳුනාගෙන සංවාදයක යෙදුනාය. අර තැනැත්තාද ප්‍රශ්න රාශියක් මගෙන් ඇසුවේය. මගේ වගතුග ඉන්නේ කොහෙද රැකියාව කුමක්ද වැනි ප්‍රශ්නයි. සිවිල් ඇඳුමින් සිටි කෙනෙක් මෙවැනි ප්‍රශ්න අසන්නේ මන්ද යයි සිතුනද මම ආචාරශීලිව පිළිතුරු දී ඔහු  සමග කතාවට වැටුනෙමි. ඒ අතර දුම්රිය පසු කර යන  ස්ථානයක පොලිසිය පෙන්වමින් එහි ඇති සම්බන්ධතාවය ගැනද ඔහුට පැවසුවෙමි. ඉන්පසු ඔහු වඩාත් මිත්‍රශීලිව මා  සමග කතා කළේය. ඔහු කිවේ ඔහු කොතලාවල ඩිෆෙන්ස් ඇකඩමියේ වැඩ කරන බවයි.

 සුපුරුදු ලෙස දුම්රිය ගමනාන්තයට නොගිය අතර දෙහිවල හෝ රත්මලාන හරියෙන් එය නතර කෙරුණි. හේතුව මා දන්නේ නැත. මිනිස්සු රස්තියාදු වන්නේ එලෙසය. මිට කලින් නුවර ගිය ගමනකදී දුම්රිය පේරාදෙණියෙන් ඉවරවි අපට කාරයක් ගෙන්වාගෙන යාමට සිදුවුණි.  දුම්රිය නැවතුන තැනින් අපට ත්‍රීවිල්  හෝ බස් ගත හැකි තැනක් පෙන්වූ මේ තැනැත්තා නික්ම ගියේය. 

නැවත  හෝටලයට ගිය පසු මම මේ සිද්ධිය යහලුවෙකුට පැවසුවෙමි. ඔහු කිවේ ඒ ගෝඨා ගේ ඔත්තුකරුවෙකු බවයි. රටක ඔත්තු සේවාවන් තිබීම සාමාන්‍ය  දෙයකි. නමුත් සාමාන්‍ය මිනිසුන් පසුපසත් එවැනි අය යවන්නට තත්වයක් තිබෙනවා  නේදැයි ඇසූ  විට "උඹ සාමාන්‍ය  එකෙක්යැ. පිටරට ඉඳන් උඹල මොනවට එනවද කවුද දන්නේ " යයි සමච්චලයට මෙන් කිවූ ඔහු,  "දැන් ලංකාව සැහෙන්න දියුණුයි නේද?"  කියා ඇසීය. "උඹ දියුණුව මනින්නේ මිනිස්සු පසු පස යන  පොලිස් ඔත්තුකරුවන්ගේ ගානටද " කියා ඇසීමි. ඔහු කිවේ ලංකාවේත්  දැන් පිටරට වගේ හොඳ  ඔත්තු සේවයක් තිබෙන බවයි. මම ඔහුට කිවේ උඹලට නිදහස නැතිවී ඇති බව උඹලාටම  නොතේරෙන බවත් ඒ බව ලියන ජන මාධ්‍යවේදීන් ගුටි කන බවත්ය. ඊට කලින් කීප දෙනෙකු අතුරුදහන්විද තිබෙන බව ඔහුට මතක් කර දුනිමි.    

මේ මා අත්දුටු සිදුවීම්  මාලාවක එකක් පමණි. 

මම කිසිම දේශපාලන පක්ෂයකට චන්දය දෙන්නට හෝ දෙන්නට එපා යයි කාටවත් කියන්න යන්නේ නැත. නමුත් පරණ කට්ටිය නැවත එනවා නම් හෝ අලුත් කට්ටියක් එනවා නම් දෙගොල්ලම මිනිසුන්ගේ නිදහස රැකිය යුතු බව මගේ හැඟීමයි. එය වඩාත් හොඳට ඉටු කරන කොටසට චන්දය දීම වඩා  උචිත නොවේද?  එහෙම කොටසක් සිටිනවාද? 

++++++++++++++++

පහත පලවන්නේ එදා මා ගත්  දුම්රිය එන්ජින් වල ඡායාරූපයි.