භෞතිකවාදියෙකු (Materialist), අධි මානසික විද්‍යාවන් හා (paranormal) මරණයෙන් පසු ජීවිතය ගැන සෙවූ හැටි - පස්වන කොටස

මුල් ලිපි:
භෞතිකවාදයෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි  -1

භෞතිකවාදියෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි - දෙවන   කොටස 

භෞතිකවාදියෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි - තෙවන  කොටස 

භෞතිකවාදියෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි - හතරවන  කොටස

ඉහත හතරවන කොටසේ ඕල්කට් තුමා හා බ්ලවට්ස්කි මැතිනිය මළවුන් සමග හෙවත් එහා ලෝකයේ මාස්ටර් හෝ ගුරුන් සමග කතා කිරීම විශ්වාස කරන බොහෝ දෙනෙක් වෙති. ඒ අතර යතිවරුන්ද බොහෝ ප්‍රසිද්ධ පුද්ගලයන් මෙන්ම  විද්‍යාඥයන් පවා වෙති. බොහෝ අය මේවා ප්‍රසිද්ධියේ පිළිගන්නේ නැත. ඒ තමන්ව උපහාසයට ලක්වේ යයි බියෙනි. අනාගාරික ධර්මපාල තුමා බුදු දහම අනාත්මවාදී යයි කියා ඕල්කට් තුමන්ලා සමග පසු කලෙක විරසක වුනු බව අසා ඇත්තෙමි.

මළවුන් සමග කතා කරන්නන් හෙවත් මිඩියම් ලා සාමාන්‍ය ආගම් සමග සම්බන්ධයක් නැත. කතෝලික ආගමේ, මෙන්ම බුදු දහමේද සිය දිවි නසා ගැනීම පාපයක් බව සඳහන් වේ. මා නිරීක්ෂණය කළ දෙයක් නම් තම දිවි නසා ගැනීම් නිසා අහිමි වූ තම ලයාදරයන්ට හිමි වන්නේ අපාය යයි දේශනා කරන ආගම් නිසා ඒවායින්  ඉවත්වී මෙවැනි  කණ්ඩායම් වල පිහිට පතා මිනිසුන් එන බවයි.. දැන් දැන් එංගලන්තයේ නිදහස් සෞඛ්‍ය සේවාව මෙවැනි අයට අවශ්‍ය මානසික සායන පැවැත්වූවත් ඇමෙරිකාවේ එවැන්නක් නොමැතිව තිබුණා යයි සිතමි.

එතැනට යාමට කලින්  මේ අත්දැකීමද සටහන් කිරීම වැදගත් යයි සිතමි.

මේ කාලයේදී මම මගේ මව රැගෙන ඉන්දියාවේ වන්දනාවක ගියෙමි.  ඒ ගමන ගැන කතා කිහිපයක් මේ බ්ලොගයේ ද මා පළ කල පොතේ ද තිබේ. වන්දනා නඩය  සංඝයාවහන්සේ ලාගේ ප්‍රධානත්වයෙන් මහමෙවුනා  උයනේ හවස පහන් පුජාවක් පැවැත්වූහ. පහල ඇත්තේ එදා ගත් පින්තූර කිහිපයකි.

රාත්‍රියේ පහන් දල්වා ඇති අයුරු 

මගේ මව ඈත බලා  සිටියි. 

මේ පහන් පෙළේ දර්ශනය චමත්කාරය දනවයි.

රැහැයි ශබ්දයක් වත් නැති ඉතා නිහඬ රාත්‍රියේ මේ පහන් පුජාව ඇත්තෙන්ම සුන්දරය. නිරාගමිකයකු වුවද මේ අතීත නටබුන් තුල රාත්‍රී මදනළත්  සමග සෙමෙන් සැලෙන පහන් දැල්ලේ චමත්කාරයෙන් මත්වනු නියතය. ඉතින් මේ රාත්‍රියේ සැවොම පහන් පත්තු කරද්දී මගේ මව මා  අතටද තෙල්, ඉටිපන්දම්  ආදිය දුන්නාය. ඈත කෙළවරේ ගරා වැටුන චෛත්‍යයක් වටා මම පහන් දැල්වුයෙමි. හැමෝම එකතු වී සිටින්නේ මැද හරියේය. මේ අඳුරු පැත්තට කවුරුත් එන්නේ නැත. මගේ පිටුපස මදක් ඈතින් උපාසිකා උපාසිකාවෝ පහ හයක් පමණ පහන් දල්වති. ගරා වැටුණු චෛත්‍යයේ අඳුරු පැත්තේ කවුරු නැත. හාමුදුරුවන් හා අනිකුත් ඉන්න අය සිටින මැද  පැත්තට වෙන්නට පමණක් හැමෝම පහන් දල්වනවා මිස අඳුරු පැති වලට යන්නේ නැත.

 ඉන්දියාවේ මේ පෙදෙසේ විදුලි පහන් නැත. එනිසා පළාතම ගණ අඳුරුය.  මා ඒ පැත්තේ පහන් පත්තු කරද්දී මට අඩි දහයක් පමණ ඉදිරියෙන් තවත් අයෙකු යන බව දුටිමි. යනවාට වඩා සුදු උඩුකය පාවෙයි. එය අනිත් පැත්තට යන්නාක්  මෙන් නැතිවී ගියේය. ඒ පැත්තේ අනිත් අය පහන් පත්තු කරනවා ඇති යයි සිතා මම අනිත් පැත්තට ගමන් කලෙමි. ඒ  අර උදවිය තවම පහන් පත්තු කරමින් සිටි තැන පසු කරමිනි. අනිත් පැත්තෙන් කවුරුත් ආවේ නැත. පහන් පත්තු කරද නැත.  මම නැවත මැදට පැමිණ අර උපසිකාවනට කවුදෝ සුදු හැඳගත් රුපයක් පහන් පත්තු කරන තැන  දුටු බවත් ඉන්පසු දැඩි අඳුරේ  මේ පැත්තට පාවී මෙන් එන සෙයක් දුටු බවත්  කියා ඔවුන් ගෙන් කෙනෙක් ඒ පැත්තට ගියාදැයි ඇසුවෙමි. මා දෙස බියමුසු නෙතින් බැලූ සියල්ලෝම එතනින් ආත බූත කඩාගෙන පැන ගියහ.. ඔවුන් හාමුදුරුවන්ට මේ විස්තරය කිව්  බව මට වැටහුනේ හාමුදුරුවන්  කියූ කතාවකිනි.
"මහත්තයා හරි වාසනාවන්තයි. මාත් නිතර අහල තියෙනවා දෙවි දේවතාවෝ වඳින්න එනව කියල. අපේ හිමිවරු නිතර දැකල තියනවා. මම දැකල නම් නැහැ. නමුත් සමහර අයට විතරයි ඕව පේන්නේ."  දෙවියන් නම් අර අය බියෙන් මෙන් ඉවත්ව ගියේ ඇයි දැයි මට ප්‍රශ්නයක් විය. තමන් නිතිපතා වන්දනා කරන දෙවියන්ට මිනිසුන් ඇත්තටම බයද? පුතා දෙවියෙක් දැකීම ගැන මවද සතුටින් හිටියාය.

මේ ගැන පසුව සිතූ මට සිතුනේ මා දුටුවේ දෘෂ්ටි මායාවක් බවය.  ඉන්දියාව අධික උෂ්ණත්වයකින් යුතු රටකි. දහවලට එහි ඇති උෂ්ණත්වය ශ්‍රී ලංකාවටත් වඩා වැඩිය. අනික මේ සමහර පැතිවල ගහකොළ ද එතරම් නැත. එනිසා මිරිඟුව වැනි දේ ඇති වීම සාමාන්‍ය දෙයකි. අධික උෂ්ණත්වය ඇති දහවලේ මිරිඟුවක් දැකීම සාමාන්‍ය දෙයකි.  දහවලේ අධික උෂ්ණත්වය නිසා උඩට යන ජල වාෂ්ප වලින් වලාකුළු සෑදෙන බවද සැවොම දන්නා කරුණකි. මේ ජාල වාෂ්ප හැමෙකක්ම උඩ  අහසට යන්නේ නැති අතර සමහර ඒවා පොලොව මතුපිට වෙයි. හවස සීතල වාතය මේ නිසාය.

උපුටා ගත්තේ අන්තර්ජාලයෙනි 

උපුටා ගත්තේ අන්තර්ජාලයෙනි 

පොළොව අසල ඝනීභවනය (අන්තර්ජාලයෙනි)

ඉතින් මේ සීතල ජල බින්දු වලින් සෑදුන තාවකාලික දර්පනයක් වැන්නකින් මගේම හෝ එතන සිටි උපාසිකා/උපාසක කෙනෙකුගේ රුවක් පරාවර්තනය වී මට පෙනෙන්නට ඇත. අවට තිබු පහන්වල ආලෝකය පරාවර්තනය වන්නට ඇත. මා ඉවතට යන විට එයත් පාවී ගියේ මේ නිසා විය යුතුය.

පසුව බුද්ධගයාවේදී එහි තුබූ පොත් හලට ගියෙමි. එහිදී ඉතා වැදගත් පොතක් හමුවිය. එම පොත මහායාන බුදු දහමේ ප්‍රබලයන් වන නාගර්ජුන හිමි හා දම්මකිත්ති හිමි (150-200 AD)  අතර වන සංවාද ගැන ලියූ එකකි. ගෞතම බුදුන් ගෙන් පසු සිටි හොඳම ම බෞද්ධ දාර්ශනිකයන් වන ඔවුන්ගෙන් නාගර්ජුන ශුන්යාතය නමැති සංකල්පය මුලින්ම ඉදිරිපත් කළේය.  මේ අදහස් මේ ලිපි පෙලට ගලපන්නේ පසුවටය.

 ඊළඟ ලිපියෙන් සියදිවි නසා ගත්  දෙමළ බෝම්බකරුවකු හා 88-89 සමයේ මියගිය ජවිපෙ සාමාජිකයකු ඇත්තටම කතා කළේ දැයි විමසමි. එම ලිපියෙන්  පසු මගේ අවසන් පරීක්ෂණය ගැනද  පැහැදිලි කරමි.

ඉන්පසු මා "මළවුන් සමග කතා කිරීම" පිළිබඳව උපේක්ෂාවෙන් සලකන හේතූන්  පැහැදිලි කරමි.

~~~~~ මතු සම්බන්ධයි.


ජලය වාෂ්ප වන හැටි හා පින්තූරය : http://water.usgs.gov/edu/watercyclecondensation.html
http://www1.lsbu.ac.uk/water/density_anomalies.html
http://www.engineeringtoolbox.com/water-vapor-saturation-pressure-air-d_689.html

(මා තවමත් භෞතිකවාදියෙකු බව සිතමි. එහෙත් මා නොදන්නා දේවල් ගැන සෙවීම කවදාවත් අත් හැර නැත.  එනිසා පුර්ව-විනිශ්චයකින් තොරව ලිපි පෙළ කියවන්න. මේ ලිපියේ සඳහන්  ලවුලන් හෙවත් ජැමී විල්සන් හල් මගේ යෙහෙළියක වන අතර ෆේස්බුක් හි ඇගෙන් අනවශ්‍ය ප්‍රශ්න  ඇසීමෙන් වළකින ලෙස ඉල්ලා සිටිමි. මා ලියන දෙයෙහි හරි වැරැද්ද ඇයට මතක නම් ඇගෙන් ඇසීය හැකිය. මා මේ ලිපිය ලියන බවට ඇයට දන්වා තිබේ. එහෙත් මළවුන් සමග කථා කිරීමට ඇයට යෝජනා නොකරන්න. ඇය දැන් එයින්  ඉවත් වී සිටී . එයට හේතුව මේ ලිපි පෙලේම ඉදිරියේදී ලියවෙනු ඇත.)

භෞතිකවාදියෙකු (Materialist), අධි මානසික විද්‍යාවන් හා (paranormal) මරණයෙන් පසු ජීවිතය ගැන සෙවූ හැටි - හතරවන කොටස

මුල් ලිපි:
භෞතිකවාදයෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි  -1

භෞතිකවාදියෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි - දෙවන   කොටස 

භෞතිකවාදියෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි - තෙවන  කොටස 

පෙරේදා මා සිටියේ මැක්ලැරෙන් F1 වාහන සමාගම භුමියේ  සීඑන්එන් ස්ටුඩියෝ එකේය. එහි CNN සමාගමේ "මේ ලොවින් එපිටට " යන රුපවාහිනී සමුඛ සාකච්චා වැඩ සටහන පටිගත කෙරුණි. මට එය නරඹන්නට අරාධනා  කලේ රාජකීය තාරක විද්‍යා සංගමයයි. ඒ මා  එහි සාමාජිකයකු හෙයිනි. එහි තේමාව "out of this world " "මේ ලොවින් එපිටට " යන්න මළවුන්ගේ ලෝකය ගැන නොවේ. පෘතුවියෙන් එහා ගමනක් ගැනය. අඟහරු ලොවට යාමට සැරසෙන කණ්ඩායමේ එක අයෙකුද එහි සමාගමේ සභාපතිද එහි විය. ඒ ගැන ඉදිරියේ දී ලිවීමට සිතමි.

   එඩ්ගාර් කේසි පොත් කියවන මට "වේලයෙන් පිටු පස " කණ්ඩායමේ අයෙක් යෝජනා කල දෙයක් ඉමහත් කුතුහලයක් දැනවීය. ඒ සිල්වර් බර්ච් නමැති ආත්මවාදී ඇමෙරිකානු ආදී වාසි (රතු ඉන්දියානු) මිඩියම් ගැන කියවන ලෙසයි. මේ මිඩියම්  වරු ගේ නම්ද අර මුල් වාසීන්ගේ (රතු ඉන්දියන්) නම් මෙන් අමුතුය. සුදු බර්ච් ගස ඔහුගේ නමයි.  ඔහුගේම කටහඩින් දෙන රිඩින් (reading) හෙවත් මළවුන් ගේ කතා මෙතැන ඇසිය හැකිය.

"සුදු බර්ච් ගස" ගෙන්වන්නේ මොරිස් බබනෙල් නමැති මිඩියම්  හෙවත් සිල්වර් ගේ මාධ්‍යය වශයෙන් කටයුතු කළ තැනැත්තායි. . සුදු බර්ච්  කියන්නේ ඔහුට මාස්ටර්ලා  හෙවත් ගුරුන් විස්තර සපයන බවය.  කේසිට සියලු විස්තර දෙන්නේ කලින් සිටි වෛද්‍යවරයෙකු ගේ ආත්මයකි. සෘෂි වරයෙක්ද විය හැක. මේ විස්තර දෙන අය හඳුන්වන්නේ මාස්ටර් හෙවත් ගුරු හැටියටය. ඔවුන් විස්තර ගන්නේ මහා පුස්තකාලයක් වැනි තැනකිනි. ලෝකයේ ජිවත් වන හැමෝගේ ම  විස්තර,  බල්ලන්, බළලුන් ගේ පවා,  එහි ඇත.

 මම මේ ගැන අපේ කණ්ඩායමෙන් ඇසුවෙමි.  මෙහිදී ලවුලෙන් ප්‍රකාශ කලේ ඇගේ මියගිය පියා ප්‍රථමයෙන් පෙනී සිටින බවත් ඔහු හරහා ඇය අනිකුත් අය ගෙන්වන බවත්ය. මෙහිදී මා කිවේ එසේනම් ඇය කථා කළේ මගේ පියාට නොවන බවයි.  මගේ පියා දාන ශාලාවේ සිටි නිසා එය විස්තර කළ හැකි අතර ඇගේ පියා  ඒ ගැන නොදන්නා බවද ඇය කීවාය.

සිල්වර් බර්ච් 

ඉන්පසු මා කීවේ ඒ ඇගේ පියා  නොව අර සිල්වර් බර්ච් හෝ කේසි කි ජාතියේ මාස්ටර් කෙනෙක් විය හැකි බවත් එසේ නැති නම් ලංකාවේ හාමුදුරුවරු කියන ආකාරයට භූතාත්ම, ප්‍රේතාත්ම  විය හැකි බවත් කෙසේ නමුත්, මා ඒවා කිසි දිනෙක විශ්වාස නොකළ බවත්ය. ඇය හෝ අනිත් අය භූතාත්ම කතාවට එකඟ නොවූ අතර ඔවුන් කීවේ  මේ මළ ගිය ආත්ම පෙන්නුම් කරන්නට උදව් දෙන අය හොඳ මිනිස් ජිවිත ගත කළ තමන්ට හොඳින් ජිවත් වීමට උපදෙස් දෙන සුපිරිසුදු ආත්ම බවයි. ඔවුන් ජිවත් වන්නේ අපට තලයක් දෙකින් උඩින් බවද ඔවුහු කීහ. (astral plane) එම තල මොනවාද යයි ඇසීමේදී එසේ තල හත අටක් ඇති අතර උඩට යන්නට යන්නට එම තලවල අය බලවත් බවද ඔවුහු කීහ.

මෙහිදී ශ්‍රී ලංකාවේ  සිට කණ්ඩායමට ලොගින් වෙන ඩිව් නමැති පරීක්ෂකයෙක් හමුවිය. ඔහු සමග කුළුපග වීමේදී මම ඔහු සිටින තැන ගැන විස්තරයක් කලෙමි. ඒ මට එසේ කළ හැකි දැයි බලන්නටය. ඔහු සමග තවත් තැනැත්තෙක්  සිටින බවත් ඔහු අත් කොට ටි ෂර්ට් එකක් ඇඳ සිටින බවත් පැවසුවෙමි. (මට එසේ පෙනුනේ සිතේ හැඳි රූපයක් මගිනි)

 ඩිව් කිවේ ඒ ඔහුගේ සහෝදරයා බවය. ඔවුන් දෙදෙනාම මේ සාකච්චාවට උනන්දුවක් දක්වන බවය. පසුව විස්තර සොයා බලන විට දැන  ගන්නට ලැබුනේ ඩිව් ගේ සහෝදරයා රාජකීය විද්‍යාලයේ මගේම ඒලෙවල් පන්තියේ උගත් මිතුරකු බවය. ඔවුන් රෝමානු කතෝලිකයන්ය. රෝමානු කතෝලික අය මෙවැනි දේ විශ්වාස කරන බව දැන ගැනීමම මට පුදුමයක් බව කීවෙමි.

ඩිව් ගේ සහෝදරයා වන මගේ පන්ති මිතුරා මට ශ්‍රී ලංකාවෙන් පොත් තුනක් එවීය. ශ්‍රී ලංකාවේ බෞද්ධ කාන්තාවක් රෝමානු කතෝලිකයකු වන කෙනත් සමහ විවාහ වී සිට ඇත. ඔවුන් අවුරුදු 30 පමණ එකට ජිවත් වූ පසු ඔහු හදිසියේම මිය ගියේය. ඇය ඔහුගේ මරණයට තමන් වග කිව යුතු යයි සිතූ  තැනැත්තියකි. ඇය අලෝමා නමැති මිඩියම් කෙනෙකු හමුවුණු පසු, මියගිය  කෙනත් ඇය හරහා කතා කර ඇත. මේ කාන්තාව (රානි) ඉන්පසු ඒවා පළ කර ඇත. එම පොත් තුන නම් - Beyond the veil, Lead me to the Real, Death is not the end යන ඒවාය.   කෙනත් නමැති මියගිය තැනැත්තා ද ආලෝකයක් ගැන කතා කරන අතර මාස්ටර් ලා ගැනද විස්තර කරන බව ඔහුගේ බිරිඳ ලියු පොත් වල තිබේ.

ශ්‍රී ලංකාවේ බෞද්ධ, හින්දු , රෝමානු කතෝලික හා මුස්ලිම් ජනතාව ගෙන් සමහරු මේ මළවුන් ගෙන්වීම්  විශ්වාස කරති. මුස්ලිම් වරුන්ගේ ෂියා නිකාය ඒවා තදින් විශ්වාස කරති.

පසුව ශ්‍රී ලංකාවට ගිය මා  ඔවුන් දෙදෙනාම මුණ ගැසුනෙමි.  මගේ මිතුරාට බුදු දහම ගැන හොඳ දැනුමක් තිබේ, අපි පන්සල් ගිය අවස්ථාවල  ඒවා ගැන බොහෝ විස්තර මගේ බිරිඳට කියා දුන්නේ ඔහුය.  මා මේ ලිපිය ඔවුන් දෙදෙනාටම යවන අතර ඔවුන්ට මා වැරදි යමක් කියා ඇත්නම් නිවැරදි කළ හැකිය. 

තවත් දිනෙකදී  මගේ කාමරයේ නිවසක ඇති පින්තුරයක් ගැන සමන්තා නමැත්තියක් පැවසුවාය. එය ඇයට පෙනෙන  අන්දමට මගේ බිරිඳ සුදු ඇඳුමක් ඇඳ  සිටින අතර මා සිටින්නේ සිට ගෙනය.  මේ කියන්නේ මම පලමු ලිපියේ දක්වා ඇති අපේ මංගල ඡායාරූපය ගැනය. පසුව දැනගත් පරිදි සමන්තා ගේ පියා හා පියාගේ පියා  (සීයා) හා මව  ජර්මන්ය. ඔවුන් මගේ ජර්මන් බිරිඳගේ ප්‍රාන්තයෙන් සංක්‍රමණය වූවන්ය. මේ සමන්තා  පසුව කණ්ඩායමෙන් ඉවත්ව ගිය පළමු තැනැත්තියයි.

මගේ බිරිඳ මේ විස්තරයට කැමැත්ත පළ කලේ නැත. ඔවුන් අපේ නිවසට භූතයන් එවති යයි ඇය බිය පළ කළාය. එවැනි කිසිවක් සිදු නොවන බවත් ඔවුන් කිසියම් ආකාරයක මායාවක් (මැජික් එකක්)  ක්‍රියාත්මක කරන බවත් පවසා ඇය අස්වැසුවෙමි.

මෙහිදී ලවුලෙන් ඇගේ ඉංගිසි ජාතික සම්භවය ගැන අපට පැවසුවාය. ඒ අනුව ඇගේ මිත්තණිය ලන්ඩනයේය. වඩා  හොඳින් විමසා බලන විට ඇය පොන්ඩර්ස් එන්ඩ් නම් පෙදෙසේ ජිවත් වූ කෙනෙකි. ඒ කියන්නේ මා  ජිවත් වන නිවසේ සිට කිලෝමීටර එකහමාරක් ඈතින් ඇති එන්ෆිල්ඩ් නගරයේම අනු කොටසකි.  ලවුලෙන් කිවේ මේ සම්බන්ධකම් අහම්බයක් නොව එම සම්බන්ධකම් නිසාම සමහර විට ඇයට හා සමන්තා ට මේ විස්තර කිව හැකි බවය. මගේ අදහස වූයේ ලෝකය අපට ලොකුවට පෙනුනත් විශ්වයට අනුව කුඩා බවත් මේවා නිකම්ම නිකම් අහම්බයන් බවත්ය.

ලවුලන්ගේ සැමියා ගේ පියා යුගෝස්ලාවියාවේ (එවකට සමාජවාදී සමුහාණ්ඩුව) ස්ලොවේකියා  රටේ බ්‍රට්‍රිස්වාලාවා  නගරයෙන් කැනඩාවට සංක්‍රමණය වූ කෙනෙකි. ඒ කියන්නේ අගේ සැමියාට ස්ලෝවේකියන් කතා කළ හැකිය. අපේ නිවසට  ඒ කාලයේ ළමයි බැලීමට පැමිණි නැනී ද ස්ලෝවේකියාවේ බ්‍රට්‍රිස්වාලාවා වල ඉපදුනු යුවතියකි. ලවුලෙන් මා හගිස්වන්නට මේ කරුණද භාවිතා කළාය.

සිල්වර් බර්ච් ගැන සොයද්දී මට හමුවුයේ හෙලේනා බ්ලවට්ස්කිය.  මෙය මට  මහත් පුදුමයට කරුණක් විය. ඒ මා බ්ලවට්ස්කි ගැන කලින් කියවා තිබීමයි.  කොළඹ විශාඛා විදුහලේ උගත් මගේ සොයුරිය ළඟ කර්නල් ඕල්කට් තුමා,  ඇනී  බෙසන්ට් හා බ්ලවට්ස්කි ගේ පින්තුර රැගත් පොත් පිංචක් තිබුණි. එයට හේතුව ඕල්කට් හා බ්ලවට්ස්කි විසින් පිහිටවූ  තියෝසොපිකල්  සොසයිටි (දෙවියන් ගැන දැනුම හෝ පරම විඥාණාර්ථ සමාගම) මගින් බෞද්ධ විදුහල් වන ආනන්ද, නාලන්ද, ධර්මරාජ හා විශාඛා වැනි විදුහල් පිහිටුවීමයි.

හෙලේනා පෙත්රෝව්නා බ්ලවට්ස්කි යනු රුසියානු රදළ (aristocratic) කාන්තාවකි . ඇගේ පියා රුසියානු හමුදාවේ සේවය කළ ජර්මන් රදළ සෙන්පතියෙකි. මවද  රුසියානු රදළ කාන්තාවකි. හෙලේනා  බ්ලවට්ස්කි මිඩියම් කෙනෙකි. ඇය සම්බන්ධ කරගන්නා මළගිය මාස්ටර් ලාගේ නම් වන්නේ මොර්යා හා කුට් හූමිය. මොවුන් කව්දැයි ඇයවත් දන්නේ නැත.  කර්නල් හෙන්රි ස්ටිල් ඕල්කට් යනු  ඇගේ මිතුරෙකි. සැකෙවින් කතා ව  කියතොත් මලගිය ලෝකයේ මාස්ටර් ලා  විසින් දේව සභාවක් ගැන කියා තිබේ. ඈත පෙරදිග රටක සත්‍යය සොයා ඔවුන් යා යුතු බවත් ඔවුන් සත්‍යය වටහා ගන්නා බවත් පවසා ඇත. ඕල්කට් හා හෙලේනා දෙදෙනාම ඉන්දියාව  බලා නැව් නැගුනහ. එහි  අර්ද්‍යා නගරයේ තම සංගමයේ මුලස්ථානය පිහිටුවා ගත් ඔවුන් දෙදෙනා ආර්ය සමාජය නම් සංවිධානයක් ගොඩ නැගුහ. එහිදී බෞද්ධාගම වැළඳ ගත් මුල්ම බටහිරයන් වුයේද ඔවුන්ය.

පසුව ලංකාවට  (ceylon) පැමිණ බෞද්ධ පුනරුදයක් ඇති කරන්නට අනගාරික ධර්මපාල තුමාට උදව් කළේත්, බෞද්ධ පාසැල් පිහිටුවන්නට ජෙරමියෙස් ඩයස්, ඇනි බෙසන්ට් ආදීන්ට උදව් කළේත් මොවුන්ය.

මේ අනුව වර්තමාන ලංකාවේ  බුද්ධාගම පිහිටුවා ඇත්තේ බටහිරයන් දෙදෙනෙකුට මළවුන් කියූ සාස්තරයකටය.  එනම් භූතයන් හා ප්‍රේතයන්ට විරුද්ධ හාමුදුරුවරුන්ගේ ඒ මුළු ආගම ම පිහිටුවන්නට උදව් කල දෙදෙනා  භූතයන්ගෙන් අවවාද  ගත් යයි. එසේ නැත්නම් මේ භූතයන් ගෙන් ලද නියෝගයක් නොව ආනන්ද මෛත්‍රය හිමි කියන ආකාරයට දේව සභාවකින් ලත් නියෝගයක්ය.  ආනන්දය, නාලන්දය ආදී විද්‍යාල පිහිටුවන්නට උපදෙස් දෙන්නට ඇත්තේද මළවුන්  යයි මෙහිදී සැක  ඇතිවේ. කෙසේ වුවද එසේ කිරීමෙන් ශ්‍රී ලංකාවට වූවේ හොඳකි.  ආචාර්ය නලින් ද සිල්වා මහතා  බටහිර බුදු දහමට මෙතරම් බැන වදින්නේ සමහර විට මේ  නිසා විය යුතුය.

මට වැටහෙන ලෙසට ක්‍රි ව. 217 වට්ටගාමිණී අභය රජු විසින් පිහිටුවන ලද අභයගිරි විහාරය පැවති  සමයේ දී ශ්‍රී ලංකාවේ  නියම බුදු දහම පැවතුනි. මහාවිහාර අභයගිරි ප්‍රශ්නය මත බෙදී වෙන්වී පසුව සොළින් විසින් විනාශ කරන ලද අභයගිරි විහාරය මහායානික බුදු දහමේ මුලස්ථානයකි.

මේ වන විට  2007 වසර වූ අතර මම  මෙහිදී මේ සියල්ල තනිකරම මායාවක් බව ලවුලෙන් ට පැවසුවෙමි. මා ලංකාවේදී  මේ දේව සභා කතා කවදාවත් විශ්වාස නොකළ බවද පැවසුවෙමි.

මෙහිදී තවත් අයෙකු පැහැදිලි කිරීමක්  කරන්නට ඉදිරිපත් විය. මේ තැනැත්තා ගේ  යහළුවා වා ජේම්ස් ****** මරා  දමා  ඇත්තේ ඔහු කියන ආකාරයට ඇමෙරිකන් ඔත්තු සේවා මගිනි. ඒ මැද පෙරදිග තෙල් වලට විරුද්ධ යමක් ඔහු සොයා ගෙන ඇති නිසා බව කීය.  ඔහු මරා දමා ඇත්තේ පොටෑසියම් ක්ලෝරයිඩ් ඉන්ජෙක්ෂන් එකක් ගසා කෘත්‍රිම හෘදයාබාධයක් සාදවාය. එහිදී පොටෑසියම් දිය වෙන නිසා මරණ පරීක්ෂණයක දී සොයා ගැනීමට නොහැකිය. මේ යහළුවා  සිරින්ජය සොයාගෙන තිබේ. එදා සිට ඔහු ජිවත් වන්නේ හොරෙන්ය.

එසේම ඔහු පැවසුවේ,  ඔහු එම රහස් ඔත්තු සේවාවේ රිමෝට් (remote viewing) බැලීම වැඩ සටහනේ සිටි බවයි. ඔවුන්ගේ කාර්යය වුයේ මැද  පෙරදිග ආදී ඇමෙරිකානු හමුදා ඇති පෙදෙස් දෙස  සිතෙන් බැලිය හැකිද  යන්න  සොයා බැලීමයි. එම වැඩ සටහන පසුව නවතා  දැමුවාක් බවද ඔහු කියා සිටියේය.

මෙය මා යහලුවෙකුට පැවසුවෙමි. ඔහුගේ අදහස වුයේ මේ කණ්ඩායමම රහස් ඔත්තු කරුවන් විය හැකි බවත් ඔවුන් මගේ චිස්තර මුලින් සොයා බලා පසුව මා  පුදුමයට පත් කරන්නට ඒවා කියන බවත්ය.  මේ සිද්ධීන් එසේ විය නොහැකි යයි කියා ඉවත දැමුවෙමි.  ඔවුන්ට එසේ කිරීමට  හේතුවක් නැත.

මම මෙයින් පසු කණ්ඩායමෙන්  ඉවත්ව යාමට සැරසී  සිටියෙමි. මේ කාලයේ මගේ ලංකාවේ මිතුරා වෛද්‍ය බ්‍රයන් වයිස් ගැන කියවන ලෙස දැන්විය. ඔහුගේ many lives many masters ආදී පොත් සියල්ල මා  ළඟ තිබේ. යුදෙව් වෛද්‍යවරයෙකු  වන ඔහු පුනරුත්පත්තිය විශ්වාස  කරයි. past life regression  (අතීත භව වලට යාම) නමැති මෝහන  ක්‍රමයකින් අතීත පුනර්භාවයන් ගැන  කියන බව කියති. ඔහු ලන්ඩනයට නිතර පැමිණෙන  මුත් මට ඔහු ගේ සම්මන්ත්‍රණයකට යාමට නොහැකි විනි.

වයිස් ගේ පොත්ද කියවූ නමුත් මගේ අදහස්  දැඩි ලෙස වෙනස් කරන්නට ඒවාට නොහැකි විය. මේ වන විට වසර 2008 ද එළඹ තිබුණි. ලවුලන් ගේ අන්තිම රිඩින් එක හෙවත් කියැවීම ලැබුනේ මේ දිනවලය. මේ වනවිට ඇය මුදලට මෙසේ මළවුන් ගෙන්වීම ද  අරඹා තිබුණි.

~ මතු සම්බන්ධයි.

සිල්වර් බර්ච් - http://www.silverbirchpublishing.co.uk/page.asp?pageid=3
ඔහුගේ කටහඬ - https://www.youtube.com/watch?v=3aFtkVRrizU
ඇමෙරිකානු මුල් වැසියන් වන මීඩියම් ලා ගේ නම්: http://whitecrowbooks.com/michaeltymn/entry/why_red_indians_so_often_control_mediums
හෙලේනා බ්ලවට්ස්කි - https://en.wikipedia.org/wiki/Helena_Blavatsky
http://www.magickalmind.com/blavatsky.htm

(මා තවමත් භෞතිකවාදියෙකු බව සිතමි. එහෙත් මා නොදන්නා දේවල් ගැන සෙවීම කවදාවත් අත් හැර නැත.  එනිසා පුර්ව-විනිශ්චයකින් තොරව ලිපි පෙළ කියවන්න. මේ ලිපියේ සඳහන්  ලවුලන් හෙවත් ජැමී විල්සන් හල් මගේ යෙහෙළියක වන අතර ෆේස්බුක් හි ඇගෙන් අනවශ්‍ය ප්‍රශ්න  ඇසීමෙන් වළකින ලෙස ඉල්ලා සිටිමි. මා ලියන දෙයෙහි හරි වැරැද්ද ඇයට මතක නම් ඇගෙන් ඇසීය හැකිය. මා මේ ලිපිය ලියන බවට ඇයට දන්වා තිබේ. එහෙත් මළවුන් සමග කථා කිරීමට ඇයට යෝජනා නොකරන්න. ඇය දැන් එයින්  ඉවත් වී සිටී . එයට හේතුව මේ ලිපි පෙලේම ඉදිරියේදී ලියවෙනු ඇත.)

භෞතිකවාදියෙකු (Materialist), අධි මානසික විද්‍යාවන් හා (paranormal) මරණයෙන් පසු ජීවිතය ගැන සෙවූ හැටි - තෙවන කොටස

මුල් ලිපි:
භෞතිකවාදයෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි  -1

භෞතිකවාදියෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි - දෙවන   කොටස 

මෙයින් පසු මා බොහෝ විට තැත් කළේ මේ මළවුන් ගෙන්වීම සත්‍යයක්ද යන්න  සෙවීමටය. ජෝන් එඩ්වර්ඩ් නමැති ප්‍රසිද්ධ මීඩියම් හෙවත් මළවුන් ගෙන්වීමේ මාධ්‍යයක් වශයෙන් කටයුතු කරන්නාගේ "එහා ලොවට තරණය " (crossing over) නමැති රූපවාහිනී වැඩ සටහන දිගින් දිගටම නැරඹුවෙමි. එසේම එඩ්ගාර් කේසිගේ පොත් රැගෙන කියවූයෙමි. මේ පොත්වල අඩංගු දෑ ගැන "වේලය පිටුපසින් " කණ්ඩායම සමග වාද විවාද කළෙමි.  මට සැබවින්ම සිතුනේ ජෝන් එඩ්වර්ඩ් කරන්නේ මුදල් රැගෙන බොරුවක් බවය. මිනිසුන් තමන්ගේ මියගිය නෑදෑයින් සමග කතා කරන්නට අවශ්‍ය වන්නේ ඔවුන්ට නොයෙකුත් මානසික ප්‍රශ්න තිබෙන නිසා බවට වාද කලෙමි. එසේම එඩ්ගාර් කේසි ගේ බෙහෙත් වර්ග බොහොමයක් ඉන්දියාවේ ආයුර්වේදී බෙහෙත් බවත් ඔහු ආයුර්වේද පොතකින් ඒවා සොරකම් කර නොදැනුවත් අමෙරිකානුන් රැවටු බවත් මට සිතිනි.

එඩ්ගාර් කේසි බොහෝ අනාගත කියවීම් ආදිය කලේ ස්වයං මෝහනයකට ලක්වීමෙනි. "නිදා ගෙන පේන කියන්නා " ලෙස ඔහුව හැඳින්වූයේ එබැවිනි. ඔහු බයිබලය හිස තබාගෙන නිදාගත් පසු එය මුළුමනින්ම මතක තිබු බව කියවේ. ඔහු බොහෝ තෙල් නිධි ඇති ස්ථානද සොයා දී තිබේ යයි කියති. ඔහු ක්‍රිස්තියානි වූවද පුනරුත්පත්තිය දැඩි ලෙස විශ්වාස කළ අතර තමන්ගෙන් සුවය ලැබීමට හා අනාගතය දැන ගැනීම සඳහා එන්නන්ගේ පෙර ආත්ම ගැන කීමද කළේය. මෙය ඔහුගේ ක්‍රිස්තියානි ආගමට විරුද්ධ වූ නිසා ඔහුට ඇතැම් ඇමෙරිකානු ආගමික සංස්ථාවන්ගේ දැඩි විරෝධයද එල්ල විනි. මට ඔහුව පෙනුනේ ලංකාවේ සිටින පේන  කියන්නෙක් මෙනි. ලංකාවේදී ඒවා විශ්වාස නොකළ මට කේසිගේ කථා විශ්වාස කිරීමට  අපහසු විය.

මෙහිදී මට තේරුම් ගියේ ජැමි හෙවත් ලවුලන් ඇතුළු පිරිස කිසිදු පල්ලියකට  නොයන බවත් ඇතැම් අය ස්පිරිචුවලිස්ට්  (ආත්මීය) පල්ලියට යන බවත්ය.  මෙහි ශාඛාවක් එන්ෆිල්ඩ් වලද තිබුණු අතර මම එයට වරක් දෙවරක් ගියෙමි.  මේ පල්ලිය බිහිවන්නේ මරණින් මතු ආත්මයක් වශයෙන් මළවුන් සිටී යයි විශ්වාස කිරීම  හා ඔවුන් සමග කතා කිරීම ප්‍රධාන පෙළේ ක්‍රිස්තියානි ආගම් සියල්ල ප්‍රතික්ෂේප කිරීම නිසාය. මෙහි ප්‍රධානින් සියල්ල මිඩියම් හෙවත් මළවුන් සමග අදහස් හුවමාරු කරන්නන් වන අතර එයට යන වන්දනාකරුවන්ද එය විශ්වාස කරන අයම වීය. නමුත් තමන්ගේ දෙවියන් වශයෙන් ජේසුස්වහන්සේව  ඇදහීම ඔවුන් දිගටම කරගෙන යාම විශේෂත්වය විය.  ජේසූන් මරණයෙන් පසු පැමිණ කතා කල බව ඔවුන් විශ්වාස කරති.

එම පල්ලියේදී එක් මීඩියම් කෙනෙක් (හෙවත් මළවුන්ගේ මාධ්‍යය) මට කතා කර දෙදෙනෙකු මා  හමුවීමට පැමිණ සිටින බව දන්වා කිසියම් විස්තර වගයක්  කළාය. ඒවා මෙහි සඳහන් කිරීමට නොවටිනා විස්තර  ලෙස හැදින්විය හැකිය. මා  ගුර්කා (එංගලන්ත හමුදාවේ ගුර්කා භටයන්) වරයෙකු ලෙස සලකා කියන දෙයක් ලෙස පෙනී ගිය නිසා මට යටි සිතින් සිනා සෙමින් එතැනින් පැමිණියෙමි. නැවත එතනට නොගිය මා මුලු විස්තරයම අපේ "වේලයෙන්  පිටුපස " පර්යේෂණ කාණ්ඩයට පවසා දැඩි විවේචනයක් කලෙමි.

අර පළමු ලිපියේ සඳහන් කළ අමරාවතී පන්සල වැදගත් වන්නේ මෙතනය. එම අවුරුද්දේ සුපුරුදු ලෙස ලංකාවේ දානයට මූල්‍ය සහය දෙන අතරේ අමරාවතියට    දානය දීමට සැරසුනෙමි. එහි අප හැමෝමත්,  පැමිණෙන යහළුවනුත් ආහාර පිස රැගෙන එන අතර භික්ෂූන් හා ස්වායත්තව සේවය කරන අය දානය ගත් පසු ඉතිරි සියල්ලෝම එහිම සිට දහවල් දානය බෙදා ගනිති. දානය ගෙනා අයගේ නම් හා මියගිය ඥාතීන්ගේ නම් පිළිවෙලට කියවනු ලැබේ.

මම ලවුලෙන් (ජැමී) ගෙන් මේ පිළිබඳව විමසුවෙමි. එදින  දානය රැගෙන යද්දී මගේ පය බුමුතුරුණකට පැටලුනු බව කීවාය . (ඒ දිනවල අපේ නිවසේ බිම කාපට් කර තිබුණි.) මා එවිට ඇයට කිවේ එවැනි දෙයක් ඕනෑම කෙනෙකුට කිව හැකි බවත් හැම නිවසකම වාගේ කාපට් තිබෙන බවත්ය. (කාපට් වලට පය පැටලීමද මට නිතර වෙන දෙයකි.) මෙහිදී ඇයට මදක් තරහා ගිය බවද පෙනුනි.

ඉන්පසු ඇය කියනා ලෙසට මගේ පියා සමග සම්බන්ධ වූවාය. මෙහිදී පැහැදිලි කළ යුත්තේ ලවුලෙන් ඇන්ග්ලිකන් කාන්තාවක වූ නමුදු කිසිදු  දේවස්ථානයකට නොයන්නියක් බවයි. එතැන සිටි බොහෝ අය ද එසේය.  ඔවුන් බොහෝ දෙනා බෞද්ධාගම ගැන අසා නොතිබූ අතර හින්දු ආගමේ ආකාරයට කර්මය විශ්වාස කළ අය වුහ. ඉහත සඳහන්  කළ එඩ්ගාර් කේසි පන්නයේ කර්මය විශ්වාස කළ අයද විය.

මෙසේ පල්ලි නොයාමට හේතුව ඔවුන් Witch  හෙවත් මායාකාරියන් ලෙස සමාජය හංවඩු ගසන නිසා බව මට විස්තර කළහ.  අලෙක්සන්ද්රියාවේ හිපාටියා ගෙන් පටන් ගෙන යුරෝපයේ බොහෝ ගැහැණුන් පුළුස්සා මරා දැමුණු බවද කිහ.  මෙසේ යුරෝපයේ මරා දැමුණු අවසාන කාන්තාව ස්විට්සර්ලන්තයේ අන්නා ගොල්ඩි ය.

අමරාවතියේ දාන ශාලාව 

 එදින ලවුලෙන් කීවේ  මා උස ජනෙල් තිබෙන විශාල ශාලාවක සිටි බවයි.  දානයක් දෙන විහාරයක එසේ තිබිය හැකි බව මම කීවෙමි. ලවුලෙන් කීවේ ඇය ජිවිතයේ කිසි දිනෙක විහාරයකට හෝ කෝවිලකට පා තබා නොමැති අතර ඒවා කළුද සුදුද වත් නොදන්නා බවයි. මෙහිදී දානයක් යනු කුමක්දැයි ඔවුන්ට පහදා දෙන්නට සිදු විය. එතන සිටි (චැට් රූම් එකේ) බොහෝ අය මියගිය ඥාතීන් සිහිකර දානයක් දීම හොඳ ක්‍රියාවක්  ලෙස සිතූ බව ඔවුන්ගේ පණිවිඩ වලින් වැටහිණි. එසේම ඔවුන්ගේ අදහස වූයේ යාචකයන්ට දානයන් දිය යුතු බවයි.

අපේ දෙවියන් කෙළවරක  සිටින බවද ඊජිප්තු ප්‍රතිමාවක් මෙන් බවද කීවාය. මෙය ඈ නොදැනුවත්කමින් කී දෙයක්දැයි විමසීමි.

දාන ශාලාවේ පන්සලේ භාවිතයට පූජා කළ ද්‍රව්‍ය 

 ඉන්පසු ඇය කීවේ මගෙන් හුරුබුහුටි කුඩා ළදැරියක් වතුර ඉල්ලු බවයි. ඇය හැඳ සිටියේ ඩෙනිම් ජැකට්ටුවක් බවද මල් වැටුන ඇඳුමක් ඇඳ සිටි බවද තව  දුරටත් පැවසුවාය. මේ දැරිය මගේ දියණියක් නොවූවත් බොහෝ ළඟ කෙනෙකු බවද කීවාය.

මා කැමති වූවා හෝ නැති වුවත් ඇය මෙහිදී පවසන්නේ සත්‍ය බවට මට පිළිගන්නට සිදුවිය.  මා  කුඩා කාලයේ සිට හදුනන යහළුවකු ගේ ප්‍රථම දරුවා වුයේ මේ කුඩා දියණියයි.  අපේ යහළුවන් අතරින් පළමුව විවාහ වූයේ ඔහුය. යහළුවන් කණ්ඩායමේම ආදරය ලත් සුරතල් දරු පැටියා වුයේ මේ හුරුබුහුටි පොඩිත්තියයි. ඇය ජර්මනියේ පැවැත්වූ අපේ විවාහ උත්සවයටද දෙමාපියන් සමග සහභාගී වූවාය.  ඇය මගෙන් වතුර බොන්නට ඉල්ලු බව හා ඇය ඇඳ  සිටි ඇඳුම පවා නිවැරදි ලෙස කිවේ කෙසේද යන්න මට එවේලේ සිතා ගත නොහැකි විය.

අප මිතුරියක වූ කුඩා දියණිය ගේ මව මේ විස්තරයට නොපහන් බවක් දැක්වූවාය.  මා මේ පිළිබඳව මගේ මවට පැවසූ විට ඇගේ පිළිතුර විස්මය දනවන සුළු විය. ඇය මා මළවුන්ට කතාකිරීම වහාම නවතා දැමිය යුතු බව පැවසුවාය. හේතුව පන්සලේ හාමුදුරුවන් කී  දෙයකි. මේ  ගෙන්වන්නේ භූතයන් හා ප්‍රේතයන් බව ඔහු කියා ඇත.  එසේ භූත ලෝකයේ ඉපදී ඇති නිසා ගෙන්වන්නට පුළුවන් බවද කියා ඇත. මගේ මව හාමුදුරුවන්ගේ වදන් වලින් ශෝකයට පත්වූ නිසාත් ඇගේ සිත තව  දුරටත් පාරන්නට නොහැකි නිසාත්  මා එය නවතන බව පැවසුවෙමි. මගේ පියා  එවැනි ආත්මයක ඉපදී ඇති කීම මගේ සොයුරියන්ද කෝපයට පත් කරවන්නක් විය.

මේ හාමුදුරුවෝම "නයනේ" ගේ ප්‍රතිචාරයේ පැවසූ පරිදි පන්සලේ තාප්පය වටේ විදුලි ආලෝකය හා තවත් වැටක් ගැසීමට මවට යෝජනා කර තිබුණි. පියාට දිව්‍යාත්මයක් ලබා දීම එහි අරමුණ යයි කියා තිබේ.

මෙහිදී මට මතක් වන තවත් සිද්ධියක් තිබේ. පියා මියගොස් හත් දවසේ දානය මේ පන්සලට දෙන්නට කතා කරද්දී සියලුම හාමුදුරුවරු උපාධි සඳහා ඉගෙනීම් වලට යන බැවින් හා, ලොකු හාමුදුරුවන් අසනීප නිසාත් හීල් දානය  පමණක් එවන ලෙස දන්වා තිබිණි.  මගේ මව මෙයට අකමැති වුවාය. මට පසුව දැන  ගන්නට ලැබුනේ මගේ පියා  හා මව දිගටම වැඳුම් පිදුම්  කල කොළඹ පන්සලක  නායක හිමියන් ඇතුළු හිමිවරුන් පැමිණීම ගැන මේ හාමුදුරුවන් අසතුට පළ කල බවයි. එහිදී මම කියා සිටියේ පන්සලට දානය මින්පසු නොදෙන්න කියායි. මා එසේ කියූ බව දැනගත් නායක හිමි  හත් දවසේ දානය එදිනම දවාලට  සුපුරුදු ලෙස පූජා කිරීම සඳහා  කැමති වී තිබිණි.

කෙසේ හෝ මව හාමුදුරුවරුන්  කී දේ අසා,  මෙසේ පියා ගැන මළවුන් ගෙන්වන්නන් ගෙන් විමසීම  ගැන දෝෂාරෝපණය කළ පසු මා ලවුලෙන් ට මේ විස්තරය කීවෙමි. මට අවශ්‍ය වුයේ ඔවුන් මෙය කෙසේ කරන්නේද කියා දැන ගැනීමටය. ඇගේ විධි ක්‍රමය ගැන මගේ අවිශ්වාසය දත්  ඇය මෙහිදී මට උදව් කිරීමට එකඟ වුවාය. කිසිවක් තදින් සොයා බැලීමෙන් තොරව නොපිළිගැනීමේ ලක්ෂණය ගැන ඇගේ කිසියම් සුහදත්වයක් හා අවබෝධයක් තිබිණි. ඉහත එඩ්ගාර් කේසි ආදින් ගේ පොත් මිලයට ගෙන මිඩියම් කෙනෙකු වන්නට මා උත්සාහ කළේ ඉන් පසුවය.

ප.ලි.
මගේ මව දිගටම ඉහත කී පන්සලට පියා  වෙනුවෙන් පොසොන් මාසයේ දානමය පිංකම කරන අතර ඇය දෙසීයකට වැඩි සිල් ගන්නා උපාසක උපසිකාවන්ටද දානය පිරිනමන්නි මහත් බැතියෙනි. මමද වරක් එයට ලංකාවේදී සහභාගී වුනෙමි.
නායක හිමි මගේ පියා දැන් "දේව සභාවක " සිටින බව හෙවත් හොඳ තැනක සිටින බව කියා තිබේ. "එංගලන්තයේ සිටින ළමයා ද " හොඳ පින්වන්තයෙකු ලෙස උසස්වීමක් ලබා තිබේ.  "ඔබ සතුටින් නම් මමත් සතුටින්" බව මවට දැන්වූයෙමි .


ජෝන් එඩ්වර්ඩ් - http://johnedward.net/
එඩ්ගාර් කේසි -  https://www.edgarcayce.org/edgar-cayce/his-life, http://www.edgarcayce.org.uk/index.html
ස්පිරිචුවලිස්ට් පල්ලිය  http://beaconoflightenfield.co.uk/
අමරාවතී භාවනා මධ්‍යස්ථානය - http://www.amaravati.org/about/
මායා කාරියන් යයි පවසා මරා දැමුණු කාන්තාවෝ : https://en.wikipedia.org/wiki/List_of_people_executed_for_witchcraft

~ මතු සම්බන්ධයි
(මා තවමත් භෞතිකවාදියෙකු බව සිතමි. එහෙත් මා නොදන්නා දේවල් ගැන සෙවීම කවදාවත් අත් හැර නැත.  එනිසා පුර්ව-විනිශ්චයකින් තොරව ලිපි පෙළ කියවන්න. මේ ලිපියේ සඳහන්  ලවුලන් හෙවත් ජැමී විල්සන් හල් මගේ යෙහෙළියක වන අතර ෆේස්බුක් හි ඇගෙන් අනවශ්‍ය ප්‍රශ්න  ඇසීමෙන් වළකින ලෙස ඉල්ලා සිටිමි. මා ලියන දෙයෙහි හරි වැරැද්ද ඇයට මතක නම් ඇගෙන් ඇසීය හැකිය. මා මේ ලිපිය ලියන බවට ඇයට දන්වා තිබේ. එහෙත් මළවුන් සමග කථා කිරීමට ඇයට යෝජනා නොකරන්න. ඇය දැන් එයින්  ඉවත් වී සිටී . එයට හේතුව මේ ලිපි පෙලේම ඉදිරියේදී ලියවෙනු ඇත.)

භෞතිකවාදියෙකු (Materialist), අධි මානසික විද්‍යාවන් හා (paranormal) මරණයෙන් පසු ජීවිතය ගැන සෙවූ හැටි - දෙවන කොටස

මුල් ලිපිය:
භෞතිකවාදයෙකු (Materialist), අධි මානසික විද්‍යාවන් හා (paranormal)  මරණයෙන් පසු ජීවිතය ගැන සෙවූ  හැටි  -1 


මගේ මව අපේ පළමු දරුවා බැලීමට පමණි අවස්ථාවේ පවුලේ අය ගාල්ලේ සාස්තර කියන තැනකට  ගිය බව කීවාය. එතන විශේෂත්වය වන්නේ මළවුන් ගෙන්වන බව කී ඈ  සොයුරියකගේ දැඩි ඉල්ලීමට එහි ගිය බවද  කීවාය. මා ඒවා විශ්වාස නොකරන නිසා ඇය මට එය කලින් කියා තිබුනේ නැත. එහිදී මගේ පියා කතා කරන කට හඬින්ම කතා කළ තැනැත්තා  "ලොකු පුතා කොහිද "යැයි ඇසු බවත්  ඔහු ආවේ නැහැ නේද යයි ඇසූ  බවත් ඇය කීවාය. මා මළගමට පැමිණි බව ඈ විසින් පැවසූ බවත් එවෙලේ සියල්ලන්ම හඬන්නට පටන් ගැනීම නිසා එතනින් ඉවත්ව ආ බවත් කීවාය. ඒ වෙලේ ඒවා බොරු විය හැකි බවත් කවුරුන් හෝ දැනසිටි දෙයක් කීවා විය හැකි බවත් මා ඇයට පැවසුවෙමි.

මා එසේ කීවද එවැන්නක් ගැන රුසියාවේ සිටියදී අසා තිබු බවක් මට සිහිවිය.  මෙවැනි හැකියාවන් තිබූ අය කේජිබී  එක මගින් අත්අඩංගුවට ගෙන පර්යේෂණ කිරීම  සඳහා විද්‍යාඥයන්ට භාර දී තිබුණි. සෝවියට් දේශය බිඳ වැටීමෙන් පසු නිදහස් වූ  මෙවැනි අය ගැන නිරතුරුව රූපවාහිනිය මගින්  පෙන්වන ලදී.  සිතේ බලය හා මොළයේ ක්‍රියාවලිය අතර සම්බන්ධය ගැන සෝවියට් දේශයේ ආරක්ෂක අංශ නිතර පර්යේෂණ කළහ. කෙතරම් භෞතිකවාදී ලෙස ක්‍රියා කළද සෝවියට් දේශයේ විද්‍යාඥයන් හා ආරක්ෂක අංශ ඒවා මගහැර තිබුනේ නැත.

ඒ කාලයේ 2001 දී පමණ ගූගල් තිබුනේ  නැති අතර මම සෝවියට් උපාධි අවසන් කළ අය සඳහා  MSN සමූහයක් (ගෘප් එකක්) පවත්වාගෙන ගියෙමි.  එමගින් අනිකුත් සමුහයන් ගැන ද අවශ්‍ය නම් සොයා බැලිය හැකි විය. මෙයින් එකක් මගේ ඇස ගැටුණු අතර එය "වේලයෙන් පසු පස" (behind the veil ) නම් මළවුන් සමග කතා  කරන අයගෙන් සමන්විත අන්තර්ජාලයේ කටයුතු කරන කණ්ඩායමක් විය. එහි නිර්මාතෘ අන්තර්ජාල නම වන  ලවුලන් (Loullen) නමින් හැඳින්වූ කැනේඩියානු කාන්තාවකි. ඇගේ  නියම නම ජැමී විල්සන් හල් වන අතර ඇය මගේ ෆේස් බුක් හි යහළුවෙකු බව සමහර අය දැක ඇති.  එදා 2001දී  හඳුනාගත් ජැමි හා  මම අදත් හොඳ  මිතුරන්ය.

එම කණ්ඩායම තෝරා ගැනීමේ අනිත් හේතුව වූයේ ඔවුන් මුදල් අය නොකිරීමයි. මුදල් අය කරන අයට ඒ නිසාම මොනවා හෝ කීමට සිදුවෙයි. ඒ අනුව ඕනෑම බොරුවක් කිරීමටද අවකාශය ඇත.

එහි මළවුන් සමග කතා කරන අයට කියන්නේ මාධ්‍ය (medium) කියාය. මවගේ ඉහත සඳහන්  කතාව මෙන්ම පියා ගේ හදිසි අභාවයෙන් ඇතිවූ ශෝකය මත ඔහු හා සම්බන්ධ වන්නට ඇත්නම් හොඳය යන අනියත ආශාවක්  මට ඇතිවුනි. එයට හේතුව සමහරවිට මගේ දැඩි ශෝකය තාර්කික බව අභිබවා යාම විය හැක. එහි සාමාජිකයකු වී දෙතුන් දිනකින් මගේ වාරය එළඹුණේ ලවුලෙන් විසින් මා ඇමතීම නිසාය. එම්එස්එන් කණ්ඩායම් කතා කරන අන්තර ජාල චැට් රූම් තිබේ. එදා එහි ඇමෙරිකන් කාන්තාවන් වන ඩොන්නා , රූත් සහ ඕස්ට්‍රේලියන් මහතෙකු වන W ද සිටියහ.

ලවුලෙන් කිවේ කිසියම් වයස එතරම් වැඩි නොවන අයෙකු මට කතා කිරීමට බලා සිටින බවයි. ඔහු හමුදාව වැනි ආයතනයක සේවය කරන අයෙකු ලෙස හා තවත් විස්තර පැවසිනි.  මගේ සිතේ ඇති සැක සහිත භාවය නිසා මේ කරුණු වලට මා කෙලින් පිළිතුරු දුන්නේ නැත. ලවුලෙන් මදක් කෝපයට පත්ව ඇය කිසියම් නිවැරදි දෙයක් කියන්නේ මා ඔව් යයි පිළිතුරු දිය යුතු බව කීවාය. එහිදී මා ඇයට පැහැදිලි කළේ මා මේවා එතරම් විශ්වාස නොකරන බවත්, නමුත් ඕනෑම දෙයක් සොයා බැලීමේ අදහසින් පැමිණි බවත් ඇය කියන තොරතුරු වලින් සමහර ඒවා කෙනෙකුට තර්කානුකුලව සිතා කිව හැකි බවත්ය.

ලවුලෙන් ගේ මා වඩාත්ම ගරු කරන ගතිය මා  දුටුවේ එහිදීය. මා සමග වාද කර හෝ තමන් කරන දේ නිවැරදි යයි කීම වෙනුවට ඇය මට අවශ්‍ය ලෙස කටයුතු කිරමට එකඟ වුනාය . ඇය මෙය කරන්නේ විනෝදයට නිසා එහි ප්‍රශ්නයක් නැති බව පැවසුවාය. ඉන්පසු ඇය කියන  දේ වලින් මට  විද්‍යානුකුලව හෝ තර්කානුකූලව පිළිතුරු සෙවීමට නොහැකි දේ මෙසේය.

එක සාක්ෂියක්?

ඇය පැවසුවේ එහි (ඈ ඉදිරියේ) පෙනී සිටින තැනැත්තා  ජිවත්ව සිටියේ මා සිටින තැනින් හැතැප්ම හයදාහක පමණ දුරින් බවය. (ලන්ඩනය හා කොළඹ අතර දුර කිලෝමීටර 8000 පමණ වේ, හැතැප්ම 5000 පමණ.) මා ලන්ඩනයේ ජිවත්වන බව ඇය දැන  සිටියාය. සාමාජිකයකු වන විට එම විස්තර ඉදිරිපත් කළ යුතුය. මගේ පියා  මිය ගියේ ශ්‍රී ලංකාවේ බව පිළිගතිමි. ඇය එවැනි රටක් ගැන දැන සිටියේ වත් නැත. (රටවල් ගැන ඇගේ දැනුම ඉතා අඩුබව පසුව දැන ගතිමි) ඉන්පසු ඔහුගේ නමේ මුල අකුර ඇය නිවැරදි ලෙස කීවාය. මගේ මව ඔහු නිතර සිහි කරන බව කීවාය. එනිසා ඔහු තමන් යන තැන පමා කරමින් සිටින බවද පැවසුවාය.

මේ මිඩියම් වරියන්ගේ අදහසට අනුව මියගිය පසු එක්තරා ආලෝකයක් දෙසට ඔවුන් යා යුතුය. ඔවුන් බොහෝ විට තමන් කරා එන මියගිය ආත්මයට එසේ යන ලෙස උපදෙස් දෙන බවද කීවාය.

ඊළඟට ඇය කී දෙයින් මා  වඩාත් විමතියට පත්වීමි. ඔබට දරුවෙකු සිටීද කියා ප්‍රශ්නයක් ඇසීමට පෙර මට දුවක් සිටින  බව ඇය පැවසීමෙනි.

මගේ ලොකු දුවගේ නහය ඔහුගේ වගේ යයි කියමින් "මගේ පියා"  සිනාසෙන බව ඇය කීවාය.  ඔබ දුවක් කියා දන්නේ කොහොමද යයි මම ඇසුවෙමි. තමන් එහෙම දෙයක් දන්නේ නැති බවත් මගේ පියා හඟවන්නේ එලෙස බවත් කී ඇය එය එසේ දැයි ඇසුවාය. මා එසේ යයි පැවසුවෙමි.

නැවත  ටික වෙලාවකින් ඈ කී දෙයින්  මගේ විමතිය දෙගුණ විය. මේ කියන දිනය මට මතක තිබීම එයට හේතුවයි.
"ඔබේ පියා කියන්නේ එසේ කිව්වේ ඔබේ මව බවයි. ඇය සිනාසුන නිසා ඔහුත් සිනාසෙන බවයි. " ලවුලන් කීවාය.

ලන්ඩනයට පැමිණි දවසේ සිට මගේ මව සිටියේ දුකිනි. පියා සමග ආ යුතු ගමනක් ඇය තනිව ආ බව ඇය නිතර සිහි කළාය. මගේ පියා  හා මව එකිනෙකා  කෙරෙහි ඉතා ආදරයෙන් සිටි, කිසි දිනෙක එකිනෙකාට බැන නොවැදී සිටි යුවලකි.

මගේ බිරිඳ තම දෙමව්පියන් සමග විසිත්ත කාමරයේ සිටියදී මා මව සමග නිදන කාමරයේ අළුත උපන් දියණිය සමග සිටියෙමු.  දුව දෙස බලා "ඔයාගේ දූගේ නහය තාත්තාගේ වගේ" යයි කියමින් මව සිනාසුණාය, ඇය අදහස් කළේ මගේ  පියා ය. ලන්ඩනයට ආ දවසේ සිට  ඈ පළමුවරට සතුටෙන් සිනාසුනේ එදාය.

මම ලවුලන්  නිවැරදි බව එවේලේ පිලි ගතිමි. ඇය මේ විස්තර  කියන්නේ කිසියම් ක්‍රමයකින් මා සිතන දේවල් දැන ගෙනදැයි ඇසුවෙමි.  මා එවේලේ එම සිදුවීම ගැන සිතුවා දැයි ඇය පෙරලා ඇසුවාය. එසේ කළේ නැති බව පිලි ගතිමි. මගේ පියා එදා කාමරයේ සිටියාද යයි විමසුවෙමි. ඔහු සිටින්නට ඇත්දැයි ඇය නොදන්නා බවත් නමුත් ඔවුන් සිහි කරන විට ඔවුන් එතැනට ආ හැකි  බවත් ඇය පැවසුවාය .

ලවුලෙන් හෙවත් ජැමි විල්සන් හල් හා මා අතර අවුරුදු ගණනක මිතුරුකම පටන්ගත්තේ එලෙසය.

ඉන්පසු මම නිතර එම අන්තර්ජාලයේ එම චැට් රූම් එකේ ලවුලන් හා රූත් මළවුන්ගෙන් ලැබෙන විස්තර අනිකුත් සාමාජිකයන්ට කියනු බලා සිටියෙමි.

දෙවන සාක්ෂිය ඊළඟ ලිපියෙන්.

මතු සම්බන්ධයි.

(මා තවමත් භෞතිකවාදියෙකු බව සිතමි. එහෙත් මා නොදන්නා දේවල් ගැන සෙවීම කවදාවත් අත් හැර නැත.  එනිසා පුර්ව-විනිශ්චයකින් තොරව ලිපි පෙළ කියවන්න. මේ ලිපියේ සඳහන්  ලවුලන් හෙවත් ජැමී මගේ
යෙහෙළියක වන අතර ෆේස්බුක් හි ඇගෙන් ප්‍රශ්න  ඇසීමෙන් වලකින ලෙස ඉල්ලා සිටිමි. මා ලියන දෙයෙහි හරි වැරැද්ද ඇයට මතක නම් ඇගෙන් ඇසීය හැකිය. මා මේ ලිපිය ලියන බවට ඇයට දන්වා තිබේ.
එහෙත් මළවුන් සමග කථා කිරීමට ඇයට යෝජනා නොකරන්න. ඇය දැන් එයින්  ඉවත් වී සිටී . එයට හේතුව මේ ලිපි පෙලේම ඉදිරියේදී ලියවෙනු ඇත)

භෞතිකවාදියෙකු (Materialist), අධි මානසික විද්‍යාවන් හා (paranormal) මරණයෙන් පසු ජීවිතය ගැන සෙවූ හැටි - 1

පල්ලිය ඉදිරිපස - මෙය ග්‍රීසියේ ඇතිනා දෙවඟන සඳහා කළ පාර්තිනොන් මෙන් ඉදිරිපස කුළුණු රාශියක් පේලියට තිබේ.

පල්ලියේ ඇතුලත  මධ්‍ය ශාලාව ඉතා විශාලය.

මුළු පල්ලියම අඩ කවයක් ලෙස දෙපසට විහිදේ. මෙහි ඇති කුළුණු අතරින් ගමන් කළ හැකිය.

අප පසුගියදා රුසියාවේ කල සංචාරයේදී විශාල රෝමානු කතෝලික පල්ලියක් බලන්නට ගියෙමු. කතෝලික පල්ලි රුසියාවේ බහුලව නැත්තේ ඒ රටේ අදහන්නේ  ඔර්තොඩොක්ස් ක්‍රිස්තියානිය නිසාය. මේ පල්ලියේ විශේෂත්වය වන්නේ එය පමණක්ම නොවේ. සෝවියට් දේශයේ විප්ලවයෙන් පසු පල්ලි සමතලා කල අතර සමහර පල්ලි පිහිනුම් තටාක, ශිෂ්‍ය නිවාස ආදීයට පරිවර්තනය කෙරුණි. ඒ සෝවියට් රජය නිරාගමික එකක් වූ නිසාය. මේ තත්වය පැන නැගුනේ ලෙනින් ගේ කාලයේ නොව ස්ටාලින් ගේ කාලයේය.

පිහිනුම් තටාකයක් බවට පරිවර්තනය කළ ප්‍රොතෙස්තන්ත පල්ලිය 

ස්ටාලින් ඉහත සඳහන් විශාල පල්ලිය විනාශ කළේ නැත. ඒ වෙනුවට එය කෞතුකාගාරයක් කරන්නට නියෝග කළේය. පල්ලිය සතුව තිබූ රත්රන් රජය සතු කලේ ඒවායින් මාර්ග සැදිය යුතු බව දන්වමිනි.

මේ කෞතුකාගාරයේ ප්‍රධාන ලක්ෂණයක් නම් එහි එල්ලා  තිබූ විශාල ෆුකෝ ගේ අවලම්බයයි (Foucault pendulum). ප්‍රංශ භෞතික විද්‍යාඥයෙකු වන ලියොන් ෆුකෝ පෘථිවිය තමන්ගේ අක්ෂය වටා කරකැවෙන බව ඔප්පු කරන්නට විශාල අවලම්බයක් භාවිතා කළේය. එම ක්‍රමය මෙහි සඳහන්ව ඇත.  අවලම්බය පෘථිවිය කරකැවෙන ආකාරයට කරකැවෙන බව ඔහු ඔප්පු කළේය. අදේවවාදියෙකු වූ ස්ටාලින් එය එල්ලීමට අණ කලේ බයිබලය සාවද්‍ය බව පෙන්වීමට සාධකයක් වශයෙනි. මුළු පල්ලිය පුරාවට ආගම් ඇදහීමේ වැරදි  දක්වා ලිපි ලේඛණ හා ප්‍රදර්ශන භාණ්ඩ තබා තිබුණි.

සෝවියට් දේශය ට යාමට ප්‍රථම කාලයේ පවා මා පන්සල් වල හෝ කෝවිල් වල තිබූ  දේව ප්‍රතිමා වලට  වලට වන්දනා කලේ නැත. මේ ගැන මා මෙහි ලියා ඇත. සෝවියට් දේශයේ දී රුසියානු මිතුරු මිතුරියන් සමග ඉතිරිවී තිබූ ඔර්ත්ඩොක්ස් පල්ලි කිහිපයක් නැරඹීමට ගියෙමි.

සෝවියට් දේශයේ සිට ලංකාවට පැමිණි වරක බෙල්ලන්විල පන්සලට ගියේ මවගේ බල කිරීමට, ඇගේ සිත රිදවීමට නොහැකි නිසාය. පිටරට යන මා  වෙනුවෙන් ඇය මොකක්දෝ භාරයක් වී තිබිණි.

සෝවියට් දේශයේ සිට පැමිණ, එංගලන්තයේ ගතකළ කාලය තුල පන්සලකට ගියේ කවුරු හරි දානයක් දෙන විට එයට සහභාගී වීමට ආරාධනා ලැබුනොත් පමණකි.  නමුත් ඒ අතරතුර අමරාවතී නම් භාවනා මධ්‍යස්ථානයක් සහිත පන්සලට නම් කිහිප වතාවක් ගියෙමි. ඒ එය සුන්දර පරිසරයක පිහිටා  තිබීමත් සාමාන්‍ය ක්‍රමයට වඩා වෙනස් ලෙස බෞද්ධ කටයුතු සිදු කිරීමත් නිසාය.

මගේ පියා අවසන් හුස්ම හෙළුවේ 1998 දීය. පරිගණක භාෂා සහිතව ඉංජිනේරු කළමනාකරණය පිලිබඳ උපාධිය මා අවසන් කලේද එම වසරේය.  ඉන් පසු සෑම වසරකම ඔහු වෙනුවෙන් මව දෙන  දානයේ බරපැන මා දැරුවෙමි. අර කි අමරාවතී පන්සලටද දානය ගෙන ගියෙමි. මගේ පෙම්වතිය (දැන් බිරිඳ) බෞද්ධ පොත්පත් කියැවූ හෙයින් පන්සල් යාමට ඇයද එක්වුණේ කැමැත්තෙනි. ඇයට බෞද්ධ පොත්වල ඇති දේ විස්තර කිරීම සඳහා  මටද අවුරුදු ගණනාවකට  පසු ඒවා නැවත හැදෑරීමට සිදුවුණි. අමරාවතී පන්සලේ ඇති තිබ්බත රටේ  පොතපත ඈ වැඩිපුර කියවූවාය.

අමරාවතී භාවනා මධ්‍යස්ථානය 

ඉන් වසර දෙකකට පසු අප විවාහ වන විට මගේ බිරිඳට අවශ්‍ය වුයේ සිංහල සිරිතට උත්සවයක් ගැනීමටය. බොහොම අමාරුවෙන් ඉන්දියාවේ දී දෑතින් නිමවූ (යන්ත්‍ර වලින් නිමවූ සාරිද තිබේ යයි ඔවුන් කීහ )  සාරියක් වෙම්බ්ලි වලින් ගත්තෙමු. සිංහල සිරිතට ජාතික ඇඳුම හැඳිම  ඇගේ දැඩි අකමැත්ත මධ්‍යයේ මා  ප්‍රතික්ෂේප කළ හෙයින් ටයි එක නොමැතිව ඉන්දියානු ක්‍රමයට උඩුකය කබාය නිමකර ගත්තේද වෙම්බ්ලි හිදීය.

විවාහයෙන් පසු ඇගේ පවුලේ අය හා අපේ පවුලේ අයද සමග රට වටා කළ සංචාරයේ මුලින්ම ගියේ සුන්දර බදුල්ලටය. එහි දුන්හිඳ පැත්තේ හෝටලයක නතර වුනෙමු. මට එහි නම මතක නැත.

දුන්හිඳ බැලීමට යාමේදී එළියේ සිටින පිරිසක් බිරිඳ හා ඇගේ  පවුලේ අය දැක දුන්හිඳ බැලීම ට යාම ජීවිතයත් මරණයත් අතර සටනක් බව දක්වා රැගෙන යාමට නම් එක් අයෙකුට රුපියල් 2000 ගණනේ ගෙවිය යුතු බව කීවෝය . මම එය ප්‍රතික්ෂේප කලෙමි. මා නිතර පැමිණ ඇති බව පැවසූ විට ඔවුන් කිවේ මා  ගිය මාර්ගය දැන්  වතුරට සේදී ඇති බවත් එනිසා ඔවුන් පමණක් දන්නා මාර්ගයේ නිරුපද්‍රිතව යා හැකි බවත්ය.

මගේ පියා විසින් අප දුන්හිඳ බලන්නට රැගෙන ගිය අයුරු මට මතක තිබූ ඔවුන්ගේ කීම බැහැර කර දුන්හිඳ බැලීමට ගියෙමි. මගේ මව මෙහිදී පියා  සිහි කරමින් ඔහු මග පෙන්වනු ඇති යයි කීවාය. මම ඈට කිසිවක් නොකීවේ ඒ වනවිට ඔහු අපට අහිමිව අවුරුදු දෙකහමාරක් පමණක් වූ  නිසා ඇගේ මතකයට අනුකම්පාවෙනි.

මාර්ගයේ එක තැනක්  සෝදාගොස් තිබු අතර එතනින්  පැන යාමට ලෑලි දමා ඒදණ්ඩක් සකස් කර රුපියල් 100 බැගින් අය කරන දෙදෙනෙක් සිටියහ. මම මගේ පියා මට පෙන්වා ඇති, මේ මාර්ගයේ ඇති වෙනිවැල්ගැට වැල්, සුදු ජාතික තරුණියක් වතුරට වැටී මිය ගිය ස්ථානය ආදිය ද පියකරු දිය ඇල්ලද  පෙන්වා ආපසු පැමිණෙද්දී අර  කට්ටිය විමතියෙන් බලා සිටියහ.

මගේ වැඩිමහල් දුව අපට ලැබුණේ ඊට මාස දහයකට පසුය. මේ වනවිට මා නැවත   බෞද්ධ පොත්පත කියවා  පන්සලට දානයද ගෙන යන අයෙක් බවට  පත්වී සිටියෙමි. (මා ළමා වියේදී  දහම්පාසල් අවසන් විභාගයට පෙනී සිටි ,ශිලා ව්‍යාපාරද සංවිධානය කළ අයෙක්මි. )

මා ඉහත විස්තරය කළේ ඊළඟට කීමට යන කතාවට අවශ්‍ය පසුබිම සැකසීමටය.
https://en.wikipedia.org/wiki/Foucault_pendulum

පලුටාව පුරා රැව්දෙන වේදනාවේ ගීතය

 මම මේ කියන්න යන්නේ වාර්තා චිත්‍රපටියක් ගැන. චිත්‍රපටියේ අධ්‍යක්ෂක නන්දන වීරරත්න. මේ වාර්තා චිත්‍රපටයෙන් විස්තර කරන්නේ  පලුටාවේ සිදුවූ දරුණු සිද්ධියකින් පසු වැසියන් තම දැඩි වේදනාවන් සමනය කර ගත්තේ කොහොමද යන්න ගැන.
(පළමු පින්තුරයේ ඇත්තේ පලුටාව යන නම ගිනි දැල්වෙන කහ අකුරෙන් ලියා දකුණු පස ගිනි ගොඩකි.)

පලුටාව කියන්නේ මධ්‍යම පළාතේ පුංචි ගමක් . අධ්‍යක්ෂකවරයා පවසන විධිහට මේ ගම්වැසියන් ලංකාවේ  ආදී වාසීන් වන වැඩි ජනතාව ගෙන් පැවත එන අය. නන්දන විරරත්නට අනුව මුළු ගමේම වාසගම් හතරලු  තියෙන්නේ.

පලුටාවේ ජිවත් වුනු මිනිස්සු බොහෝ විට මියෑදුනේ ස්වභාවික හේතුවකින් මහලු වියේදී, නැත්නම් ඉඳ හිට අලියෙක් මුලිච්චි වෙලා, එහෙමත්  නැත්නම් ලෙඩකින්. වසර 1987 අග  වන කොට ලෝකේ විශාලම හමුදාවකින් ලක්ෂ දෙකහමාරක සොල්දාදුවෝ ලංකාවට ගොඩ බැස්ස. ඒ ගොඩ බැස්ස ඉන්දියන් හමුදාව සටන් කළේ වන්නිකරේ ඊලම් කොටි එක්ක. ඒක මේ ගමේ නිසසල බවට බලපෑමක් කළේ නැහැ.

නමුත් 1989 වප් මස (ඔක්තෝබර්) හත් වනදා  මේ හැම දෙයක්ම වෙනස් වුනේ ගම ළඟම සිදුවුණු  බෝම්බ පිපිරීමකින්.

ඒකාලේ වෙනකොට ඉන්දියන් හමුදාව හා කොටි එක පැත්තක රටේ සටන් වදින කොට ශ්‍රී ලංකාවේ  දකුණු පැත්තේ වෙනම සිවිල් යුද්ධයක්. පිඩිත කියල කියන ජනතාව  එකට සටන් කළ යුතුව තියෙද්දී සටන් කරන්නෙ  බෙදිලා. උතුරේ අය නාසිවාදීන් වගේ. දකුණේ අය  පොල්පොට් ල වගේ.  තනිකරම ලේ ගංගාවක් සුන්දර ශ්‍රී ලංකාව පුරා  ගලා යනවා.

(මේ පින්තුරයේ ඇත්තේ පියා  නැති මිනිබිරියට මිත්තනිය ඉතිහාස කතාවක්  වැව අද්දර සිට කියන අයුරුය. ඈතින් පෙනෙන්නේ සිගිරි ගලයි.)

ඒ තීරණාත්මක දවසේ 1998 ඔක්තෝබර් 7 පලුටාව ගම  අසල බිම් බෝම්බයක් පුපුරා යනවා.   දකුණේ සිංහල සටන්කාමීන් රජයේ හමුදාවට විරුද්ධව ඇටවූ බෝම්බයෙන් ගජබා රෙජිමේන්තුවෙන් යැවූ නිරීක්ෂණ හමුදා ඛණ්ඩයක සිංහල හමුදා භටයන් දෙදෙනෙක් මිය යනවා. දෙමළ සටන්කාමීන් සමග තිබූ යුද්ධයේ මෙවැනි තත්වයකදී මැරෙන  එක සොල්දාදුවෙකුට දහ  දෙනෙක් මරණ පුරුද්දක් රජයේ හමුදාවලට තිබුණලු. හැබැයි ඒ මරණ දහ දෙනා හොයා ගන්නේ අහල පහලින්. සටන්කාමීන් හෙවත් ත්‍රස්තවාදීන් පැනල යනවා  හමුදාව එනකොට. ඉතින් හමුදාව වාඩුව අල්ලන්නේ ළඟම තියෙන ගමෙන්. මේ දවසේ ඒ අවාසනාවන්ත වළාකුල පෑයුවේ පලුටාවට.

හමුදාවේ අනුපාතයට අනුව විස්සක් ඕනෑ වුනත් ඔවුන්ට විසි තුනක් ම හිටිය. මේ පිරිමි වයස දාහතරේ සිට හතළිස්  පහ දක්වා අය. පෝලිම් ගස්සල වෙඩි තියන කොට එක්කෙනෙක් වෙඩි වැදිලා වගේ වැටුන . ඒ ගමගෙදර අබේරත්න. මේ තේරුමක්  නැති සමූල ඝාතනයේ එකම සාක්ෂිය. මම අසූ ගණන් වල මේ වගේ දේවල් වෙනවා කියල ඇදහුවේ ලතින් ඇමෙරිකාවේ එල් සැල්වදෝරය වගේ රටවල. මා උපන් රටේ මෙහෙම වෙනවා කියල දැනීමත් දරුණු කම්පනයක් ඇති කරනවා.

(මේ පින්තුරයේ පලුටාව ප්‍රධාන මාර්ගය දැක්වේ.  හමුදා වහනය සිරකරුවන් රැගෙන ගිය මාර්ගයේ ගස් වල දෙපස ඇත.)

ගවේෂණාත්මක මාධ්‍යවේදියෙක් වන නන්දන වීරරත්න පලුටාවේ වැසියන්ව මුලින්ම හමුවෙන්නේ 1990. ඔහු විසින් ඉන්පසු කඩින් කඩ ගමට යමින් චිත්‍රපටිය රූගත කළා.

මියගිය අහිංසකයන්ගේ සහෝදරියන්, බිරියන් , මව්වරුන් හිතේ දැවෙන දරුණු විරහය මැඩ ගෙන පිළිතුරු දෙනවා කැමරාවට. නමුත් ඒ මුහුණු මහන්සියෙන් දුක් ගින්නෙන් වේලිලා, වැටෙන කඳුළු වලින් ඒ මුහුණු තෙත් වෙන්නේ නැහැ. 

 තාත්ත නැති එක දරුවෙක් නෙමෙයි. දරුවෝ ගොඩක්. අපි දන්නවා තාත්තා නැති රණ විරුවන් ගේ ළමයි ඉන්නවා කියල. ඒ දරුවෝ විඳින දුකක් තිබෙනවා. නමුත් රට වෙනුවෙන් දිවි දුන් රණ විරුවන් ගේ දරුවන් හැටියට ඔවුන්ට ශිෂ්‍යත්ව හම්බ වෙනවා. ආධාර ලැබෙනවා . පාසල් ලැබෙනවා. නමුත් මේ "ද්‍රෝහීන්" ගේ ළමයි. ඇත්තටම ඔවුන් ගේ පියවරුන් වරදක් නොකලත් හමුදාවේ වරදක සාක්ෂි වෙන ළමයි රොත්තක් මේ. උන් ගැන කවුරුත් බලන්නේ නැහැ.

නන්දන වීරරත්න කැමරාව මෙහෙයවන්නේ ඉතාම සුක්ෂම නමුත් පියකරු ලෙසට.  සංචාරකයන් වශී වෙන සුන්දරත්වය විටෙක පෙන්වන ඔහු බුදු දහමින් සැනසෙන ජනතාවක් බුදුන් පුදන නිවී සැනහුන ස්වභාවය පෙන්වන කොට හිතෙන්නේ මේ සංචාරකයන් වෙනුවෙන් කළ චිත්‍රපටියක් කියල. සිගිරි ගල නිල්වන් ජලාශය උඩින් ඈතින් පෙනෙනවා. 

මේ අතිශයින් සුන්දර දර්ශන මැදින් දිළිඳුකමින් නිරන්තරයෙන් පීඩා විඳින ගම්වැසියන් සමුහයක් නෙතට හමුවෙනවා.  තමන්ගේ සිතේ වේදනාවක්, කරදරයක් කාට හරි කියන කොට ඒකෙන්   කියන කෙනාගේ හිතට සැහැල්ලුවක් ඇති වෙනවා කියල අදහසක් තිබෙනවා. සමහර විට ඔවුන් නන්දන වෙනුවෙන් මේ කතාව කිව්වේ එනිසා වෙන්න පුළුවන්.

ඔවුන්ගේ දුක් දෝමනස්සයන් කැටිව ගෙන කඳුළු අතරින් කියවෙන කතාව අවසන් වෙන්නේ අපේ නෙතටත්  කඳුලක් උනමින්. ඇත්තෙන්ම මේ වාර්තා චිත්‍රපටය එතරම්ම ප්‍රබලයි.  ඉතින් මේ වාර්තා චිත්‍රපටය අවසානයේ ලන්ඩනයේදී එක් රැස් වෙලා  අපි කතා කලා. 


මේ ගමට යුධ සෙබළුන් පැමිණියේ අසල තිබූ පැල්හවැර ගජබා රෙජිමේන්තුවේ හමුදා අණුකණ්ඩයෙන්. එම 1990 වසර අවසන් වනවිට සිංහල ත්‍රස්තවාදීන්  යැයි සැක  කල සියල්ල සමූල ඝාතනය කිරීමෙන් අනතුරුව සෙබළුන් දෙමළ ත්‍රස්තවාදීන් මර්දනයට උතුරට පිටත් කෙරුනා.

(පලුටාවේ ඝාතනයේදී දරුවන්, සැමියන්, සහෝදරයන් අහිමි වූ කාන්තාවන්)

එවකට ගජබා රෙජිමේන්තුවේ මාතලේ දිස්ත්‍රික්කය  භාර අණදෙන නිලධරයා වුයේ කර්නල් ගෝඨාභය රාජපක්ෂ මහතායි. (ඔහු මේ සිදුවීමට සම්බන්ධයක් ඇතැයි  මේ ලිපියෙන් අදහස් කෙරෙන්නේ නැති බවත් පැහැදිලිව කිව යුතුයි)

පලුටාව 

(ළා කොළ පැහැති  නව ගොයමින් පිරුණු සුන්දර පලුටාව ගම)

මට නම් ඛේදවාචකය හැටියට පෙනුනේ සෝමවංශ අමරසිංහ මහතාගේ හා ජවිපෙ භූමිකාව. එදා පැවති දේශපාලන ත්‍රස්තවාදය පටන් ගැනීමට දේශප්‍රේමී ජනතා ව්‍යාපාරයේ කාර්යභාරය අවතක්සේරු කරන්නට බැහැ. දයා පතිරණ, නන්දන මාරසිංහ, කොමියුනිස්ට් පක්ෂයේ එල් ඩබ් පණ්ඩිත, එජාප නිලතල දරන්නන් වැනි  බොහෝ අය මරා දැමුණා.  හමුදාවේ සිට නිවසට එන අය මරා දමන්නට ජවිපෙ යයි කියන කොටසකින් නියෝගයක් එවුනා. නොයෙකුත් අනීතික හමුදා කණ්ඩායම් හා රජය  පැත්තෙන් එකට දහයේ නොව එකට  සියයේ අනුපාතයට තරුණයින් මරා දැමුණා හෝ අතුරුදහන් කෙරුණා.  සමහර අය ජවිපෙට කිසිම සම්බන්ධයක් නොතිබූ අහිංසකයින්. ජවිපෙ හිතවාදීන් ට තර්ජන එල්ල වුණා. ත්‍රිම විතාන, විජේදාස ලියනාරච්චි ආදීන් දරුණු වධ දී මරා දැමුණා. 

එදා දේශප්‍රේමී ජනතා ව්‍යාපාරයේ අය බිම් බෝම්බයක් තබා බියගුළුව  සැඟවුණා. ගම්  වැසියන් මරණ බව ඔවුන් නොදැන සිටින්නට විධිහක් නැහැ. ද්‍රවිඩ කොටිනුත් මේ දේම කළා. බිම්  බෝම්බ තබා පැන ගොස් හමුදාව දෙමළ ගම විනාශ කළ පසු ඒවා රූපගත කර බටහිර රටවල පෙන්වා මුදල් රැස්  කිරීම ඔවුන් කළා.  මිනිසුන් සැඟවී  සිටින කෝවිලක සිට ඉන්දියන් හමුදාවට පහරදී, ඉන්පසු ඉන්දියන් හමුදාව ඒ පහර දුන් තැනට ප්‍රති ප්‍රහාර එල්ල කරන විට එතැනින් පැන ගිය දෙමල සටන්කාමීන්, පසුව පැමිණ  ෂෙල් පහරින් මැරුණු මිනිසුන් වීඩියෝ කරන විට එයට විරුද්ධ වූ  කෙනෙක් තමා වෛද්‍ය නිර්මලා රාජසිංහම් (තිරාණගම) . ඔවුන් (ද්‍රවිඩ ඊලාම් විමුක්ති කොටි සටන්කාමීන් )  ඇයව යාපනයේ දී මරා දැමුවේ ඒ නිසයි.

 ජවිපෙ ප්‍රසිද්ධ නායක සෝමවංශ අමරසිංහ හා නිල නොවන නායක කුමාර් ගුණරත්නම් ඉන්පසු උතුරේ යුද්ධයට හමුදාවට සහය දීමට ජවිපෙ මෙහෙය වූවා. මේ ගම වැනි තැනක වුනු සමුලඝාතන වලට විරුද්ධව  එදා හඬ නැගුවා නම් බොහෝ විට පසුව සිදුවූ දෙමළ වැසියන් ඝාතනය මග හැර ගන්නට ඉඩ තිබුන. 

ඉතින් අපි හමුදාවට චෝදනා කරනවද , දේශපාලකයන්ට චෝදනා කරනවද , මෙහෙයවන්නාට චෝදනා කරනවද කියල මට හිතා ගන්න බැහැ. මේ ලිපියේ අරමුණ මුළු හමුදාවකටම චෝදනා එල්ල කිරීම  නොවේ. හමුදාව කියන්නේ මනෝමුලික ආයතනයක්. එවැන්නක් පිහිටුවීම හෝ විසුරුවා හැරීම රජයකට හෝ ජනතාවකට කරන්න පුළුවන්. මේ මගේ අදහස පවසා  කාලයකට කලින් පල කෙරුව ලිපියක් . දකුණු අප්‍රිකාවේ වර්ණභේද වාදී රජය බිඳ වැටුනට පස්සේ කළු හිරකරුවන්ට වධ දුන් හා මරා දැමූ   පොලිස් නිලධාරියෙකු සාක්කි දුන්නා. එම නිලදරුවා  කඳුලින් තෙත් කරමින් කළු සිරකරුවන් ඔහුට සමාව දුන්නේ ඔහු කළේ අණ පිලි පැදීම පමණක් කියා.

මේ සමුලඝාතනයෙන් මාස  14 කට පසු එවකට පැවති රජය මරණ සහතික නිකුත්  කරලා එක පවුලකට රුපියල් 50,000 බැගින් වන්දියක් ලබා දුන්නා. ගැමියන්  එම මුදලින් ඝන්ඨාර කුළුණක් ඉදි කර තිබෙනවා. මරණ සහතික වල දක්වා ඇත්තේ මේ හමුදාව හා ත්‍රස්තවාදීන් අතර වෙඩි හුවමාරුවකදී මිය ගිය අය වශයෙන්.   

මා දකින්නේ මේ චිත්‍රපටිය යථාර්තවාදී සිනමාවක අති ප්‍රබල නිරුපණයක් ලෙසින්.

බටලන්ද ඝාතන ගැන චෝදනා ඇති රනිල් වික්‍රමසිංහ මහතාගේ රජය දැන් අතුරුදන් වූවන් සඳහා කාර්යාලයක් පිහිටවල තියනවා. ජනතා විමුක්ති පෙරමුණ එයට සහයෝගය දීල තිබෙනවා. ඇතැමුන් චෝදනා කරනවා මේ කරන්නේ හමුදාව එල්ලන්න වැඩක් කියල. නැහැ,  මුළු හමුදාවක්  එල්ලන්න කාටවත් බැහැ.  නමුත් සංහිදියාවක් ඇති කරන්නට හැමෝටම පුළුවන්. වේදනාව සමනය කර ගන්නට උදව් කරන්න පුළුවන්. එනිසා මෙවැනි දෙයකට දායක වුනු පක්ෂ දෙකකින් එහෙම කමිටුවක් බිහි කර ගැනීමම ජයග්‍රහණයක්. 

සමහර විට අපට මේ සොල්දාදුවන් සහ ගැමියන් මුණගස්වා අර පියවරු නැති ළමුන්ට තෑගි ටිකක් දුන්නා නම් හොඳයි කියලත් මට හිතෙනවා.  ඒකෙන් මේ ප්‍රශ්නය විසඳෙන්නේ නැති බවත් ඇත්ත. නමුත් දුක තුනී වෙන්න පුළුවන්. රටේ ජනතාවට සත්‍යය පහද දෙන්න පුළුවන්.

"චිත්‍රපටිය අවසාන වන එක රූප රාමුවකි. තනි කොකෙකු අඳුරු දියේ නොසැලී බලා සිටි. ඒ අසල දියේ වැටී බිඳී ගිය ගහකි. මා සිතන පරිදි මේ පින්තුරයෙන් අතිශයින් ප්‍රබල පණිවිඩයක් ලබා දෙයි. ලෝකයේ තනිවූ බිඳී ගිය සිතක් සහිත රුවක් මගේ මනසේ මැවේ."

- ඉදිරිපත් කර ඇති චිත්‍ර වාර්තා චිත්‍රපටයේ රූප රාමු වලින් ගත්  ඒවාය.
- අධ්‍යක්ෂක වරයා විසින් චිත්‍රපටියේ ඩිවිඩි වෙළඳපලට ළඟදීම නිකුත් කරනු ඇත.

වලා පටල (penumbra) ගැන අදහසක්

උතුරු ලන්ඩනයේ දී අපි වලා පටල චිත්‍රපටය  පෙන්වුයේ පසුගිය මැයි මාසයේය. මට වලා පටල ගැන ලියන්නට අදහසක් සිතේ තිබූමුත්  එයට සුදුසු අවස්ථාවක් නොලැබිණි. මගේ පෙර ලිපියේ යථාර්තවාදී කලාව පිලිබඳ ව වූ චිත්‍ර ප්‍රදර්ශනය ගැන ලියවුනු හෙයින් වලා පටල ඒ හා සම්බන්ධ කොට ලියන්නට සිතුවෙමි.  එදින මවිසින් ප්‍රවීන නාට්‍යවේදී විජිත ගුණරත්නයන් සභාවට හඳුන්වා දීමේ දී බ්‍රෙෂ්ට්ගේ  "එපික් තියෙටර්" පිලිබඳ කෙටි හැඳින්වීමක්  කලෙමි.  එපික් නාට්‍යය ක්‍රමයේ දී කියවෙන්නේ නාට්‍යය විසින් ප්‍රේක්ෂකයාට,   නාට්‍යයේ චරිත සමග භාවාත්මක ලෙස බැඳීමට  (තදාත්මිකව) අනුබල නොදිය යුතුය යන්නය. ඒ වෙනුවට තර්කාන්විත ස්වයං ප්‍රත්‍යාවේක්ෂණයක් හා වේදිකාවේ රංගනයන් කෙරෙහි විවේචණාත්මක දැක්මක්   ඇති කර ගැනීමට ප්‍රේක්ෂකයා සමත් විය යුතුය.

මෙහිදී විජිත ගුණරත්නයන්ගේ  අදහසට අනුව හෙන්රි ජයසේන වැනි ප්‍රතිභාපුර්ණ කලාකරුවන් වුවද කලේ බ්‍රෙෂ්ට් සෞන්දර්යාත්මක කිරීමයි. බ්‍රෙෂ්ට් ගේ නාට්‍යවල මෙය දැකිය නොහැකිය.  තවත් කෙටි චිත්‍රපට අධ්‍යක්ෂකවරයෙකු වන නන්දන වීරරත්න එදා පැවසුවේ කිසියම් අන්දමකින් සෞන්දර්ය රසයක් ඉස්මතු  නොවන තැන නීරස ගතියක් මතුවන බවයි. බ්ලොග් ලියන අරුණ පෙරේරා මහතාගේ අදහස වූයේ වළා පටල වාර්තාමය චිත්‍රපටයක් විනා  වැඩි යමක් නොවන බවයි.

වලා පටල චිත්‍රපටියක් මිස වේදිකා නාට්‍යයක් නොවේ. බ්‍රෙෂ්ට්ගේ "එපික්" ක්‍රමය ඒ ආකාරයෙන්ම ගොඩ නැංවීමක් සිනමාව තුල කිරීම අපහසුය. නමුත් නොකළ හැක්කක් නොවේ. චිත්‍රපටය නරඹන අතරතුර  "වලා පටල  "  යථාර්තවාදී (realism )  සිනමා කෘතියක ඉදිරිපත් කිරීමක්  බව සිතුණි. මෙහිදී යථාර්තය යනු ඔබ හා මා අද දවසේ අත්විදින යථාර්තය නොවිය හැකිය.

චිත්‍රපටියේ පසුබිම නිර්මාණය කිරීම සඳහා අධ්‍යක්ෂකවරයා ඉමහත් වෙහෙසක් දරා තිබේ. ඒ සඳහා 1970 සමයේ ශ්‍රී ලකාවේ පැවති පන්නයේ අර්ධ නාගරික ගමක් වෙනමම නිර්මාණය කර තිබුණි. චිත්‍රපටිය නිම කරන ලද්දේ 2008 දී පමණ නිසා හැත්තෑව දශකයේ ඇඳුම් පැළඳුම් ද ඒ ආකාරයෙන්ම සැකසීමට මහත්  වෙහෙසක්  දරා  තිබුණි. එසේම ඒ කාලයේ භාවිතා කල රථ වාහන පවා ඉතා අපහසුවෙන් සපයා ගෙන තිබූ බවක් ද පෙනුනි. මා වැනි පරණ රථ වාහන වලට ඇළුම් කරන්නන්ගේ නෙත පිනවන දසුම් කිහිපයක් ද විනි..

චිත්‍රපටය  1971 අරගලයට ප්‍රථමයෙන් සිදුවුණු සත්‍ය සිද්ධින්  සමුහයක් විචාරය   කරන්නට ප්‍රේක්ෂකයා පොළඹවයි.  චිත්‍රපටයේ රූප රාමු කොටස් කිහිපයකට බෙදිය හැකිය.  එක කොටසක් චිත්‍රපටයේ ප්‍රධාන චරිතය වන දෙමළ වෛද්‍යවරයා වන මනෝහරන් මහතා වටා රූගත වේ. දෙමළ දොස්තර මහතා හොඳ, මිනිසුන්ට කරුණාවෙන් රැකියාව කරන අයෙකු වන අතර ගමේ සුභ සිද්ධිය සඳහා වූ සමාජ වැඩ වලට උපකාරී වෙයි. ඔහු හා ගමේ ඒ සඳහා  වෙහෙසෙන තරුණ ගුරු මහතෙකු ද මිතුදමක් ද මේ නිසා ඇතිවේ. මේ දෙදෙනාගේ හා ගමේ තරුණ පෙලේ සුභ සාධන කටයුතු වලට ගමේ මන්ත්‍රීවරයා  නොසතුට පළ කරයි. මන්ත්‍රීවරයා සිතන්නේ ඔවුන් ඔහුට විරුද්ධව ගමේ චන්දදායකයන්  පෙළ ගස්වන බවයි.  ඒ සඳහා පෙරමුණ ගන්නේ මන්ත්‍රීට කේලාම් කියන ගමේ සුළු ධනවතුන්, කඩ හිමි මුදලාලි ආදීන්ය. සාමාන්‍යයෙන් වන පරිදි මන්ත්‍රීවරයා පැත්තේ  ගමේ චන්ඩින් වන ගණන් කාරයන් කිහිපයක්ද  පොලිසියද වේ.

මන්ත්‍රීවරයා ගේ වත්තේ කුලියට වැඩ කරන දිළිඳු ගැමියන් දෙදෙනෙක් වෙති. මන්ත්‍රී ඔවුන්ට සලකන්නේ ඉතා පහත්  ලෙසය. එක පස් කපන්නෙකු,  අනිකාගේ බිරිඳ  අසනිපවූ දරුවා රැගෙන රෝහලට  ගොස් ඇති බවත් පස්කපන්නා රෝහලට දිව ගිය බවත් පැවසූ විට මන්ත්‍රී කෝපයෙන් කඩා පනියි. මන්ත්‍රී ගෝරනාඩු කරන්නේ  "ඇයි , උඹ කියන්නේ මට පස් කපන්න කියලද?".

එහෙත් ඒ අසනීප වන දරුවා ට සැත්කමක් කරන දොස්තර හොඳහිත අමාරුවේ දැමීමට මෙයින් පොටක් පෑදෙන බව වැටහෙන මන්ත්‍රීවරයා ඉන්පසු පස් කපන  කුලී වැඩ කරුවාට මුදලින් සංග්‍රහාදිය  කරමින් හිත දිනාගනී. මේ සටකපට කම භාවිතා වෙන්නේ රෝහලේ වෛද්‍යවරයාගේ උපදෙසට විරුද්ධව ළමයා ප්‍රදේශයේ රජයේ රෝහලට ගෙනයාම සඳහාය.

චිත්‍රපටිය ආරම්භයේදී ඉහත කි දෙමළ ජාතික දොස්තර හොඳහිත හා ගුරුවරයා සංවිධානය කරන ගමේ රැස්වීමට කඩා වදින මන්ත්‍රීගේ මැර  පිරිසක් පහර දීමෙන් තරුණයෙකුගේ අතක් කැඩේ. මේ තරුණයා ද අර ගමේ රෝහලේම ප්‍රතිකාර ලබයි. ඒ අතර දොස්තර හොඳ හිත වටා මැවෙන ජවනිකාවද නිරීක්ෂණය කරයි.

මේ කරුණාවන්ත වෛද්‍යවරයා දරුවාට බෙහෙත් කර සුව කිරීමට එරෙහිව මන්ත්‍රී එතනට කඩා වදින අතර සමහර හෙදියන්ද, රෝහලේ සුළු සේවකයන්ද වෛද්‍යවරයාට එරෙහිව කුමන්ත්‍රණය කරයි. මුදල් දී බාගන්නා දරුවාගේ පියා මන්ත්‍රී ගේ බලපෑම මත  දරුවා රැගෙන දිස්ත්‍රික් රෝහලට යයි. එහිදී දරුවා මිය යයි. අසාධාරණ ලෙස එහි වරද එල්ල වන්නේද දොස්තර හොඳ හිතටය.

ඔය අතරවාරයේ වෙනත්  සම්බන්ධයක් නැති රූප රාමු  කිහිපයක් ලෙස පොලිසියෙන් මුද්‍රණාලයකට කඩා වැදී දේශපාලනික පත්‍රිකා මෙන්ම එහි වැඩ කරන සේවකයන්ද අත්අඩංගුවට ගනිති. මෙයින් ඉඟි කරන්නේ  1971 අරගලයට ප්‍රථම චේගුවේරා  කාරයන් ගැන ඉව වැටී එවකට පැවති  රජය ජවිපෙ හිතවාදීන් අත් අඩංගුවට ගැනීම යයි කෙනෙකුට  සිතිය හැකිය. තරුණ ගුරුවරයාගේ යහළුවෙකු ද අත් අඩංගුවට  ගන්නා  හෙයින් ගුරුවරයා ආරක්ෂාව තකා ගමින් පිටව යයි. එයට උපකාර කරන්නේද දෙමළ වෛද්‍යවරයාය.

නමුත් ඊට කලින් දා  දිනයක පොලිසියේ ලොකු මහත්තයාද  මුදලාලි හා පළාතේ මන්ත්‍රී  සමග මත්පැන් සාදයකට එක්වෙයි. එනිසා මෙයද මන්ත්‍රී සම්බන්ධ කුමන්ත්‍රණයක් යයි කිව හැකිය. තමන්ගේ චන්ද බලයට එදිරිව ඒ යැයි  සිතන ඕනෑම බලවේගයකට මන්ත්‍රීවරයා විරුද්ධය. ඉන් කාටවත් හානි වූවාට ඔහුට ප්‍රශ්නයක් නැත.

චිත්‍රපටිය පුරාවට ඉඳහිට අර රෝහලේ නතරවී ප්‍රතිකාර ලබන තරුණයා ද  පෙන්වයි. විටෙක විමතියෙන්ද, විටක බියෙන්ද,  විටෙක කුතුහලයෙන් ද  යුතුව ඔහු තිරයට පැමිණෙයි.   අතරමන් වූ තරුණ පරපුරක  ඉච්ඡා භංගත්වය තුලින් පැන නගින අසහනය, අවි අතට ගැනීමට හේතු සාධකයක් වන්නේ  කෙසේද යන්න පෙන්වා දෙන අයුරු අපූරුය.

ශ්‍රී ලංකාවේ දේශපාලනය 1970 දී  බරපතල ලෙස වෙනස් වූයේ වාමාංශික  පක්ෂ සමග සභාගයකට එළඹුණු  ශ්‍රී ලංකා නිදහස් පක්ෂය සමිගි පෙරමුණු  රජය පිහිටුවීමෙනි. නමුත්  1971 වනවිට විජේවීර ගේ ජනතා විමුක්ති පෙරමුණ තරුණ බලවේගයක් ගොඩ නගා තිබුණි.

චිත්‍රපටියේ වෛද්‍ය මනෝහරන් උදව් කරන්නේ ගමේ සමාජ සුභ සාධන වැඩ සටහනකටය. එයට උදව් දෙන්නේ තරුණ ගුරුවරයෙකි. දෙදෙනාම මන්ත්‍රීගේ උදහසට හා ගමේ සුළු ධනපති මුදලාලි ආදීන්ගේත් උදහසට පත්‍ර වේ. ගුරුවරයා පලායයි. වෛද්‍යවරයාට රැකියාව අහිමි වෙයි. ගුටි කා අතක් කඩාගත් තරුණයාට මේ වැරැද්ද  පෙනුනන්ත් එය නිවැරැදි කිරීමට ක්‍රමයක් නැත.

දියුණු ධනවාදී සමාජයක මෙවැන්නක් සිදුවුවහොත් ඒ සඳහා පැමිණිලි කිරමට ස්වාධීන අධිකරණයක් තිබෙන අතර, ප්‍රබල සමාජ සංවිධාන මුලිකත්වය ගෙන උද්ඝෝෂණ පෙත්සම් ආදියෙන් එවැනි තත්වයන් වලකති.  ඒ කාලයේ  වැඩවසම් ක්‍රමයට වඩාත් හුරු ශ්‍රී ලාංකික සමාජය එවැනි බලවේග නොමැති කමින් අසරණ වෙයි. එවැනි අවස්ථාවක සමාජ සාධාරණය ගැන කතා කරන   සංවිධානයකට තරුණයාට බැඳීමට සිදු වන්නේ නම්  එසේ වීමට අවශ්‍ය ඕනෑ තරම් කරුණු තිබෙන  බව මේ චිත්‍රපටිය පුරාවට ඇදෙන සිද්ධි මාලාව තුලින් පෙන්වයි.

චිත්‍රපටියේ සෞන්දර්යාත්මක පැත්තක්  නොමැති බවට නැගෙන චෝදනාවේ ද  කිසියම්  සත්‍යයක් සාපේක්ෂව තිබිය හැකිය.  මන්ත්‍රීවරයා පොලිස් නිලධාරීන් හා මුදලාලි ආදීන් සමග මත්පැන් පානය කරන අවස්ථාවේ ඔහුගේ සහායකයන් එකතුවී ගී ගයනු වැන්නක් රූගත කල හැකිව තිබුණි. එසේ වුවද ගමේ පියකරු දොළක දරුවන්  කෙලි දෙලෙන්  ස්නානය කරන අයුරු එක  දර්ශනයක තිබේ. ඒ දර්ශනයක බෞද්ධ කවියක්ද පසුබිමින් ගායනා කෙරේ.

වෛද්‍ය මනෝහරන් ලෙස ගාමිණී හත්තොටුව  මහතා ගේ රංගනය ප්‍රශංසනාත්මක වුවද ඔහුගෙන් අපේක්ෂා කළ තරම් ප්‍රබල රංගනයක් ඉස්මතුවූ බවක් ද නොපෙනේ.  ඔහුගේ ප්‍රධානියා වන දෙල්ගොඩ නමැති වෛද්‍යවරයාගෙන් මෙන්ම මන්ත්‍රීවරයා ගෙන්ද වඩා ප්‍රබල රංගනයක් ඉස්මතු වෙයි.

සමහර විට මනෝහරන් වෙදැදුරු ගේ අහිංසකත්වය ඉස්මතු කිරීමට එසේ වූවාදැයි ද සිතේ. මේ ප්‍රශ්නය තුලින් පහත දැක්වෙන විමසීමකට යාමට මට සිත්විනි.

යථාර්තවාදී සිනමාවක් ගැන කතා කිරීමේදී සිදුවෙන හෝ සිදු වී ඇති යයි සිතෙන දේ ඒ ලෙසම රූගත  කිරීමම  අවශ්‍ය  නොවේ. වාර්තා චිත්‍රපටයක එය කළ හැකිය.

ත්‍රිමාණ වෙබ් අඩවියේ මෙසේ සඳහන්ව තිබුණි.  (ත්‍රිමාණ වෙබ් සඟරාවේ ලිපිය )

ලකාන් "සත්තාව" යනුවෙන් අදහස් කරන්නේ මෙය නොවේ. "සත්තාවට සිරුරේ දිග පළල පමණක්  නොව සංකේතාත්මක මානයක් ද ඇත.එම සංකේතයන් මේ පද්ධතිය තුල ව්‍යුහ ගත කරන්නේ  තවත් සම්බන්ධතා පද්ධතියක් තුල හා සංකේතයන් රැඳී  ස්ථාන වලින් "ලෝකය (සැදී ඇති) අනුපිළිවෙල" ට අනුවය.  මේ නිසා පද්ධතියක  ස්ථානගත වන  නිවැරදි සංකේතාත්මක සම්බන්ධයක් දෙයක ගුණාත්මක භාවයේ නිරූපණයක් ම නොවේ. 

මේ නිසා ලකාන් ට "සත්තාව" යනු පද්ධතියක පරිකල්පනික කල්පිතයක්  හා සංකේතාත්මකයක් අතර  සහවාදයක් (synthesis) වන අතර  එහි  අනුපිළිවෙළ (order) එකිනෙකා (කල්පිතය හා සන්කෙතත්මකය) පරස්පර ලෙස ව්‍යුහගත කරයි.  මේ දෙ ආකාරයේ සංයෝගය, මිනිස් සිරුර හා සංකේතාත්මක සාමාජිය අනුපිලිවෙල ට ආශ්‍රිතව  ඇති ව්‍යුහගත පද්ධතියක, අප ඉදිරියේ සිදුවන දෘශ්‍යමානය මෙන්ම අතාත්වික ලෙස ප්‍රාදුර්භූත වීමද   තීරණය කරයි.  

"යථ" (The real) ලකානියානු විශ්ලේෂණයේදී මුළුමනින්ම වෙනත් දෙයකි. ලකාන් නැවත නැවතත් අවධාරණය කරන්නේ "යථ " යන "සත්තාව (reality ) නොවන බවයි. ඉහත සදහන් ලෙස සත්තාව හෙවත් යථාර්තය යනු කල්පිතයේ හා  සංකේතාත්මකයේ (නිමිත්තේ) සහසන්ධීය පද්ධතියකි. යථ යනු සත්තාව ඉක්මවා යන  සත්තාවේ අතිරික්තයක් වන සත්තාවෙන් මග හැර යන දෙයකි. එනයින්  යත යනු සත්තාවේ ස්ථානයක් (වෙන්ව)  නැත්තකි .  (The real is that which is -without- place in reality) 

මේ අනුව නරඹන අතරතුර   "වලා පටල " යනු  බ්‍රෙෂ්ට්ගේ නාට්‍යවාදී ස්වරූපයේ එපික් ක්‍රමයට රූගත කරන ලද යථාර්තවාදී සිනමාවේ වාර්තා චිත්‍රපටියක් යයි හැඟුනද චිත්‍රපටය අවසානයේ අපගේ චිත්ත විභාගයට ලක්වන්නේ වෙනත් දෙයකි. එනම් මේ අධ්‍යක්ෂකවරයාගේ පරිකල්පනයට හසුවූ යථාර්ථයේම  කල්පිතයක් හා සංකේතාත්මක සිද්ධීන් පද්ධතියක සහවාදයක් (synthesis) බවයි.

ප්‍රධාන දොස්තර මෙන්ම දෙමළ වෛද්‍යවරයාද ලකානියානු මනෝ විශේලේෂණයට හසුවෙන ප්‍රතිවිරුද්ධ ලෙස සාමාජිය මානසික පීඩනයකට ලක්වෙන චරිත දෙකකි. දරුවා අසනීපවන විට,  වෛද්‍යවරයා විවේකයෙන් නිවසේ සිටියදී එහි  යන මව මෙන්ම මන්ත්‍රීවරයා ගේ නිවස කුලී වැඩ කරන ඇගේ සැමියාද මේ මානසික පිඩනයට හසුවන්නේ වෙනත් සංකේතාත්මක සිද්ධීන් පද්ධතියක මුත් මේ පද්ධති දෙකම එකකට එකක් සම්බන්ධය.

 මන්ත්‍රීවරයා මෙන්ම ඔහුගේ සුළු ධනේෂ්වර හිතවතුන්ද රෝහල් සේවකයන් මෙන්ම ගැමියන්ද මේ මානසික පීඩනයටම ලක්වූවෝ වෙති.  ගුරුවරයා හා ඔහුගේ හිතවතුන්ද නීතිය ක්‍රියාත්මක කරන පොලිසියද මේ පද්ධතියටම සම්බන්ධ වන්නේද එතනින්ය. මෙහිදී අධක්ෂකවරයා සාමාන්‍ය  සෞන්දර්යාත්මක චිත්‍රපටයක මෙන් අපට ප්‍රධාන චරිත කිහිපයක් වටා යන ලෙහෙසි කතාවක යථාර්තවාදී නිරූපණයක්  වෙනුවට යථාර්තයෙන් පරිබාහිර සංකීර්ණ මනෝ විශ්ලේෂණයක් රූපරාමු අතරින් එළිදක්වයි. නමුත් මෙය අප සංවේදී වන යථාර්තයට කෙදිනක සම්බන්ධයක් තිබූ බවද අපට වැටහේ.

මේ නිසා ගාමිණී හත්තොටුව පිළිබඳව මා ඉහත සඳහන් කළ කල නිගමනය වැරදිය. ඔහුගේ චරිතයේ ඉස්මතුවීමක් තුලින් ඉහත කි සම්බන්ධයන් බිඳී යයි. එනිසා ඔහුගේ රඟපෑම් විලාසය චිත්‍රපටයේ මතුවෙන සංකීර්ණ මනෝභාවයන් හා සබැඳේ .

වර්තමාන ලංකාවේ පෞද්ගලික රෝහල් බහුලය. එවැන්නක දැකිය නොහැකි දර්ශනයක් වන්නේ රෝගීන් හා ඔවුන් බලන්නට එන්නන් විසි කරන බත් අනුභව  කරන දඩාවතේ යන සුනඛයන්ය. එවකට රජයේ රෝහල් අවට මේ දර්ශනය සුලභ බව මගේ මතකයේ තිබේ. චිත්‍රපටය අවසාන වන්නේ බල්ලෙකු රෝහලේ හිස් කොරිඩෝරය තුළින් යන දසුනකිනි. එක්තරා අන්දමක සුන්යාත හැඟීමක් මේ දසුන සිතේ  ඇති කරයි.මේ අවසන් දර්ශනය මගේ සිතේ තදින් කා වැදුනේ ඉහත සිදුවීම් සියල්ලේ අවසානය කුමක්ද යන්න  සිතීමේ දීය. අධ්‍යක්ෂකවරයා ගේ සිතේ මැවුන  මේ දර්ශනය  සිනමා කෘතියේ සංකේතාත්මක නිරූපණය තුලින් ඉහත කි සත්‍ය කතාවේ පරාජය වූයේ සමාජය බවත් ඇතිවන්නට තිබූ  සමාජීය දියුණුවේ හිඩැසත් දනවයි.

මේ චිත්‍රපටය ලංකාවේ තිරගත කිරීමට බාධා කිරීමට හේතුව මට සිතා  ගත නොහැකිය.  මා දැනගත් පරිදි 1971 සමයේ කතාවක් නිසා ජේවීපී ලේබලයක් වැදී  තිබීමයි. එකල තිබු මහින්ද රාජපක්ෂ පාලනය යටතේ නොයෙකුත් අවහිරතා බාධා කිරීම කරන ලදී. අධ්‍යක්ෂකවරයා විසින් ගම් දනව්  පුරා, විද්‍යාල ශාලාවල, සංස්කෘතික මධ්‍යස්ථානවල ප්‍රේක්ෂකයා  වෙනුවෙන් තිරගත කිරීමෙන් සාර්ථක විය හැකි චිත්‍රපටයක්  යයි සිතේ. ඉංග්‍රීසි උප සිරැසි සහිතව කිසියම් යුරෝපීය නාට්‍ය උළෙලෙකට ඉදිරිපත් කළා නම් සම්මාන ලැබිය හැකි අන්දමේ නිර්මාණයක් බව හඟිමි.   

සාන්ත පිතර්බුර්ගයේ එර්මිතාෂ් (Hermitage) කෞතුකාගාරයේ "අධි-යථාර්ථවාදය" චිත්‍ර ප්‍රදර්ශනය

පළමු ලිපිය 

දෙවන ලිපිය 

ගොගොන් - මිච් ග්‍රිෆින් 

සාන්ත පිතර්බුර්ගයේ චිත්‍ර සහ කලා නිර්මාණ මිලියන් 3ක ට වඩා ඇති  එර්මිතාෂ් (hermitage) කෞතුකාගාරය නැරඹීමට ගිය අවස්ථාවේ යථාර්තවාදී කලාව පිලිබඳ චිත්‍ර ප්‍රදර්ශනයක් එහි දෙවන ගොඩ නැගිල්ල වන ජෙනරල් ස්ටාෆ් හි පැවැත්වෙන බව දුටිමි.  එර්මිතාෂ් (hermitage) කෞතුකාගාරය පිළිබඳව ත් එහි පැරණි කළා නිර්මාණ පිළිබඳවත් වෙනත් ලිපියකින් ලියමි.

ඉහත ඇති පළමු පින්තූරයේ දැක්වෙන්නේ නිරුවත් ගැහැණු කෙනෙකු ඔසවාගෙන සිටින වෛද්‍යවරයෙක් සහ පිරිමි දෙදෙනෙකි. අගේ සිරුරට ආශා කරන අය මෙන්ම සිරුරට වෛද්‍යවරයෙකුද අවශ්‍යය.

දැනට ඉතා කෙටියෙන් හැඳින්වීමක් කරන්නේ නම් මෙය පිහිටවුයේ 1764 දී දෙවන කැතරින් අධිරාජිනිය විසින්ය. ලෝකයේ ඇති පරණම කෞතුකාගාරයක් වන මෙය  ට්සාර් රජවරුන් විසින් මහජන ප්‍රදර්ශනය සඳහා විවෘත  කරන ලද්දේ 1852 දීය.  සොවියට්  දේශය පිහිටවූ 1917 විප්ලවයෙන් පසු මෙහි ඇති නිර්මාණයන්හි වටිනාකම සලකා  සෝවියට් බලධාරීන් විසින් ජාතික සම්පතක් ලෙස එර්මිතාෂය  රැක  බලා ගන්නා ලදී. එහෙත් 1940 - 1944 අතර ඇතිවුණු දෙවන ලෝක සංග්‍රාමයේ දී ලෙනින්ග්‍ග්‍රාඩ්  නගරය දින 900 ක වැටලෑමකට  හසුවුණු අතර ඒ කාලයේ වැටුණු ජර්මන් බෝම්බ වලින් එර්මිතාෂයට බලවත් හානි සිදු වුනි. එහි තිබු වටිනා  කළා කෘති රුසියාවේ වෙනත් තැන්වල ට යවා  ආරක්ෂා කරන ලදී.  පසුව  පෙර ආකාරයෙන්ම ගොඩ නගන ලදුව පෙර ශ්‍රී විභුතියෙන්ම  අනගි මිල කළ නොහැකි කළා කෘති  ප්‍රදර්ශනයේ  තබා තිබේ.

සෝවියට් දේශය පැවති සමයේ සමාජවාදී යථාර්ථවාදය මුලික කරගත් කළා නිර්මාණ ඉදිරිපත් කල යුතු යයි රීතියක් විය. ඒ ගැන පෙරදීද මා ලියා  ඇත. එහිදී රජයේ බලපෑම ඉස්මතුවීම නිසා එම රීතියට වෙනස්ව ස්වාධින කළා නිර්මාණ කරන්නට ඇතැම් කලා කරුවන් වෙහෙස ගත්  අතර එතුල සිටිමින් හොඳ නිර්මාණ බිහි  කරන්නට චින්ගීස් අයිත්මාතව්  වැනි කලාකරුවන් තැත්  කළහ.

මේ ප්‍රදර්ශනය ගැන කරන හැඳින්වීමේ මෙසේ ලියැවෙයි.

"කලාව සම්බන්ධයෙන් ගත් කළ යථාර්ථවාදය අද ඉතා වැදගත්  මාතෘකාවක් වන්නේ ඇයි? එර්මිතාෂ් කෞතුකාගාරයේ "යථාර්ථවාදය පිලිබඳ චිත්‍ර ප්‍රදර්ශනය" වනාහී මෙම මාතෘකාවට පිළිතුරක් සපයන්නට ගත් උත්සාහයකි. එරිමිතාෂ් හි හමුදා වෘත්තික ගොඩ නැගිල්ල (General Staff building - ancient name of the building) 2015 සිට දහ නමවන ශතවර්ෂයේ සිට විසි එක්වන ශතවර්ෂය දක්වා වන යථාර්ථවාදය පිලිබඳ කළා කෘති ඒකරාශී කර තිබෙන  ස්ථානයකි. එමනිසා මෙම ව්‍යායාමය යථාර්ථවාදයේ ස්වරූපය හා මතවාදය පිලිබඳ බහුවිධ සංවාදයන් මතු කිරීමට ගත්  ප්‍රයත්නයකි.

විසිවන සියවසේ යථාර්ථවාදයේ ස්වරූප බොහොමයකි. හයිපර් - හෙවති අධිතාත්විකවාදය  (Hyper-realism), සරේලිස්ම්  හෙවත් අතාත්විකවාදය (surrealism), ඡායා-යථාර්තවාදය (Photo-realism), සමාජ යථාර්ථවාදය (Social-realism)  හා මායාවී යථාර්ථවාදය (magical-realism)  මේ අතරින් කිහිපයකි.  මේ සියවස අගභාගයේ සිට තාත්විකවාදී නැඹුරුව වඩා උනන්දුවට මෙන්ම සාකච්චාවට බඳුන්වී තිබේ.

යථාර්තවාදී එළඹුමේ  මුලික පදනම - සත්තාව සෙවීම - යනු ආත්මඥාණය ලබා ගැනීමේ සරලම නිර්මාණාත්මක ක්‍රමයයි.  කථනයන් ප්‍රමුඛ කොට ගත්  පුරාතනික කළා ලෝකයේ දැවැන්තයන් ගේ සිතුවම් වලින් පටන් ගෙන, යථාර්ථවාදී කලාව  අද තාක්ෂණික හා මනෝමූලික වූ සංකීර්ණ නිර්දේශයන් පද්ධතියක් මත පදනම්ව භෞතිකවාදී ලෝකයේ මනෝමූලික දැක්ම නිරූපණය කරයි.

යථාර්ථයේ වෙනස පිලිබඳ සංජානනය රඳා පවතින්නේ වත්මන් පෞද්ගලික හා සාමාජිය ප්‍රමුඛතා මතය. දැන් නැවතත් මේ ආස්ථානය වැදගත් වෙමින් යයි. කලාව විසින් මෙම වෙනස උරා ගනිමින් සෑම අවස්ථාවකම සත්තාවේ විවිධාකාර පිළිබිඹු  නිපදවයි.  ප්‍රදර්ශනයේ ඇති  සමකාලීන කලාකරුවන්ගේ නිර්මාණ තමන්ගේම මුලාශ්‍රයන් හඳුන්වා දෙයි. මේ සෑම කලා කෘතියක්ම පවතින්නාවූ මොහොත තුල පැවැත්මේ අත්දැකීමෙහි   (අනුභූතික හෝ සංදෘෂ්ටික අත්දැකීමෙහි) නිරවද්‍යවූ පිටපතක් වනවා මෙන්ම, රූපකයක,   ව්‍යන්ගයක, කේතයක, සංකේතාත්මක තේරුමක හෝ සංස්කෘතික සම්බන්ධයක  ශක්‍යතාවයක් සහිතය.

ඇමෙරිකානු කලාකරුවකු වන ටෝනි මටෙලි ගේ  අධිතාත්විකවාදී ප්‍රතිමා නිර්මාණය (ගැරී ටටින්ස්ටියන් කලා කෘති සමූහය) නම් කර ඇත්තේ ඉංග්‍රීසියෙන්  F*ck'd(Couple) - යුවලකගේ විනාශය යනුවෙනි. මෙහි නවීන තාක්ෂණික ක්‍රමවේදයක් ඇසුරෙන්  ඉන්ද්‍රියගෝචර  යථාර්ථයේ (sensual reality) ගැඹුරු හා භාවාත්මික ශෝකය හා සානුකම්පික සොබාව අනුකරණය ඇසුරෙන් විදහා පෙන්වයි.
යුවලකගේ විනාශය චිත්‍රයේ අතක් කැපී වෙන්වුන මිනිසෙකි. ගැහැණිය හා මිනිසා යට ඇඳුම් වලින් පමණක් සැරැසී සසිටී . ඔවුන් දෙදෙනා වටේම විනාශය , බිඳී ගිය භාණ්ඩ ආදිය වේ.

ප්‍රදර්ශනයට සහභාගී වන අනිත් කලාකරුවන් දෙදෙනා නම් ඇමරිකානු ජාතික ජිම් ෂෝ සහ බ්‍රිතාන්‍ය ජාතික මිච් ග්රිෆිත්ය.  මිච් ග්‍රිෆිත් ගේ නිර්මාණ සම්භාවණිය යථාර්ථවාදයේ සුසමාදර්ශයකි. "

මිච් ග්‍රිෆිත් ගේ ඉහත නිර්මාණයේ තරුණයාගේ හිසේ ඇත්තේ ක්‍රෙඩිට්  කාර්ඩ් වලින් සාදන ලද ඔටුන්නකි. නවීන සමාජය වැඳ පුදන්නේ ධනය, බලය, තත්වය හා ප්‍රසිද්ධියට බව මෙමගින් පෙන්වයි. ඔටුන්න මගින් පෙන්වන්නේ තමන් කෙරෙහි ඇති ආලය ප්‍රමුඛවූ (narcissism) ව්‍යාජ වටිනාකම් හරහා මිනිස් ප්‍රතිමා හා  හොර රජුන් නව සමාජයේ බලය  පැතිරවන බවයි.

මේ තරුණය හැඳගෙන සිටින්නේ යට ඇඳුම පමණකි. අත් දෙක යමක් පැහැදිලි කරන්නට මෙන් දෙපසට විහිද ගෙන සිටී.

අද සමාජය සිරුර පිලිබඳ අනවශ්‍ය අවධානයක් පෙන්වයි. සිරුර සඳහා වන ව්‍යායාම මෙන්ම සිරුරේ බලය, ශක්තිය, මුදු බව, ලස්සන  ආදී සියල්ල ගොඩ නැංවීම සඳහා විශේෂිත ආහාර පානද විකිණෙයි.සාමාන්‍ය ලෙස ඇවිදීම, දිවීම, ස්වභාව ධර්මයේ රස විඳීම වෙනුවට ජිම් එකක් තුල දහදිය හෙළීම  සුලබ  දෙයක් වුවද එහි අන්තයකට යාම තුල සිරුර අනිකාට පෙන්වීමේ දැඩි නාසිස්මික ආශාව පැන නගී.

 සිරුර අනිකුන් සමුහයකට පුද කිරීම තුලින් ආශාව සමනය වේවිද?

ඉතා පින්තුරයේ ඇත්තේ නිරුවත් ගැහැණිය ඔසවා ගෙන සිටිනවාක් මෙන්ම ලේ ගල යටි කයක් ඇති කඩවසම් පිරිමි සිරුර ඔසවා ගෙන සිටින ගැහැනුන් හා මිනිසුන් සමුහයකි.

ඉහත  චිත්‍රයේ ඇත්තේ තමන්ගේ ශරීරයේ බර ගැන පසුතැවෙන යුවලකි. ඔවුන් දෙදෙනාම බර කිරි. ගැහැණිය සින්දු ඇසීමට හෝ ශෝෂාවෙන් ඉවත් වීමට කනේ ඉයර් ෆෝන් ගසාගෙන සිටි. මිනිසා හිස බදාගෙන බෙරිහන් දෙයි.

පහත  චිත්‍රය ගැන ඔබට සිතෙන්නේ මොනවාද? ශරීරය ව්‍යායාම වලින් හැඩ නංවන පිරිමියෙකු දකුණේ ද  මුහුණ ලස්සන කර ගැනීමට ක්‍රීම් තවරා කැකිරි පෙති දෙනෙත මත  තබා ගෙන සිටින ගැහැණියක වම් පැත්තේ ද සිටී.  මැද සිටගෙන සිටින්නේ පිළිකාව නිසා පියයුරක්  අහිමි වුනු කාන්තාවකි. 

"කළා නිර්මාණයේදී සැමවිටම නිකායන් දෙකක් තිබුණි. එකක් විඥානවාදීන්ගේය. අනෙක යථාර්ථවාදීන් ගේය."  - තියොෆයිල් ගෝටියේ

"There have always been two schools of thought in painting: That of the idealists and that of Realists. "-Theophile Gautier

මේ වනාහී ඉතාලියානු කලාකරුවකු වන කරවගියෝ ගේ ගොර්ගොන් වරුන්ගේ   මෙඩුසා නමැති දෙව්දුවගේ මුහුණට කෙලින්ම සමානකම දක්වන චිත්‍රයකි. ග්‍රීක මිථ්‍යා කතා වලට අනුව මෙඩුසා  දෙස  බලන හැම කෙනෙක්ම ඇගේ  දරුණු ඇස් වලින්  ශෛලමය පාෂාණයක් බවට පත්වේ. ග්‍රිෆිත් ගේ මෙඩුසා මුහුණ තෙල් වලින් නැහැවී ඇගේ ඇස් තදින් වැසී  බලය අඩුවී තිබේ.   මෙහිදී ඔහු ප්‍රශ්න කරන්නේ සොබාදහම වනසමින් ඇතිවෙන කර්මාන්ත වල වර්ධනයට එරෙහි වන්නන් යක්ෂයන් කිරීමේ මාධ්‍ය හා දේශපාලන ව්‍යාපාරයයි.

ඔවුන් (ඔහු හෝ ඇය) මට ආදරය කරතිද නැතිද? සියවසකට එහාදී මලක  පෙති කඩමින් කල ප්‍රශ්නයම රමණයෙන් පසු සිගරැට්ටුවක් දල්වාගෙන සිතීමට ඇය  පුරුදු වූයේ කෙසේද? 

අඩ නිරුවත් තරුණියක් රමාණයෙන් පසු සිගරට්ටුවක් බොයි.

ඉහත චිත්‍රයෙන් ප්‍රශ්න කරන්නේ තරුණියන් බ්ලු චිත්‍රපටි සඳහා රැගෙන බන්ධන කරන (bondage) ආකාරය ටම පිරිමියාව එතනට පත් කිරීමයි. තරුණයා පුඋවකට තබා බැඳ ඇත. ඔහුගේ දෙඇඳ සිටින කමිසය ඔලුව වටා ඔතා  දෙනෙත් වසා ඇත. තරුණිය ඔහුගේ මුහුණට ශම්පෙන් වත් කරයි.  

ඔවුන් රැගෙන යන දේ - මිච් ග්‍රිෆිත් 

දුම් වළාවල් හා විනාශය මැද  සොල්දාදුවකු විසින් තමන්ගේ රටින් පලායන තරුණ අනාථ වූ ගැහැනියක රැගෙන යයි. මෙය සිරියාවේ පෞරාණික නගරයක් වූ පල්මිරා හි සිදුවූ විනාශය සංකේතවත් කරයි. එසේම ඉතිහාසයේ නිතර කියවෙන කවුරුන් හෝ පැමිණ තමන් බේරා ගනීවි යන  සංකල්පයද ඉසමතු කරයි. සිංහලයන්ගේ දියසේන කුමාරයා පිලිබඳ මිථ්‍යා විශ්වාසය  වැන්නකි. 

පළමුවන වෙඩික්කරු - යුදයට කතා කිරීම - මිච්ග්‍රිපිත්ස්  

මේ චිත්‍රයේ වෙඩික්කරු යුද්ධයට යාමට සැරසේ. පෙම්වතිය ඔහුගේ කකුල් බදාගෙන වැළපෙයි.

නවීන යුධෝපක්‍රම 

හොඳම පැය 

ඉහත සිත්තම් ත්‍රිත්වයෙන් පෙන්වන්නේ වීඩියෝ ගේම් වල සිටින වෙඩික්කරුවෙක්  වැන්නකි. ඔහුගේ අවසන් එල්ලය තමන්ට හමුවන සියල්ලන්ම මරා දැමීමයි. මෙහි පෙන්වන බ්‍රිතාන්‍ය සොල්දාදුවා ඔහුගේ  සිතට විරුද්ධව  ජාත්‍යන්තර යුද්ධයකට යැවූවෙකි. ඔහුගේ දෛනික ප්‍රශ්නය ඔහුට දුන් අණ  ක්‍රියාත්මක කිරීම අපරාධයක්ද යන්නය? එනම් ඔහු යුධ අපරාධකරුවෙකු වන්නේද  යන්නය. 

ජාන පාලම - මිච් ග්‍රිෆිත් 

මෙහි පෙන්වන්නේ ඓතිහාසිකව එන පියෙක්ගේ හා පුතෙක්ගේ සම්බන්ධයයි. යුරෝපයේ පුනරුදය (renaissance) සමයේ හැම සිත්තමකම වැඩකරු තම ආයුධ හා උපකරණ  පෙන්වීම සිරිතක් විය.  වැටෙන කොළ පත් පෙන්වන්නේ කාලයේ ගලා යාමයි. 

ද්‍රෝන් යානය - මිච් ග්‍රිෆිත් 

ඇතැම් මාධ්‍ය මගින් වාණිජකරණය හා මෝහනය කරන ලද යුද්ධය සඳහා පින්තුර ලබා ගන්නේ පරිගණක යුද ක්‍රීඩා ආභාෂයෙන්ය. මේ ගැහැණිය හරියට නියමුවෙකු නැති ද්‍රෝන යානයක් වැනි මිසයිලයකි. යුද්ධයේ ඇති බිහිසුණු බව,  නොදත් බව පෙන්වමින්  අවතාර (zombi)  මෙන් හැසිරෙන ජනතාව ගෙන් වසන් කර ඇත. ලින්ගිකකරණය (sexualised) කරන ලද කාන්තා සොල්දාදුවාගේ මොබයිල් දුරකථනය රයිෆලයට බැඳ තබා ඇත්තේ මෙහි අතාත්විකභාවය පෙන්වීමටය.

ඇරිස්ටෝටල් ගේ  කියමනකින් ලිපිය අවසන් කරමි.

"ඇතැම් විට වස්තූන් (objects)  දෙස බැලීම වේදනාකාරී වුවද අපි ප්‍රමෝදයට   පත්වන්නේ කලාව තුලින් යථාර්ථය වඩාත්  තාත්වික ලෙස නිරූපණය  වන්නේ නම් පමණි. උදාහරණයක් වශයෙන් මියගිය සත්වයන්ගේ හෝ මිනිසුන්ගේ ශරිර වල ස්වරූපය (පෙන්වීම) ගත හැකිය. මෙය තේරුම් ගැනීමට උපකාර කරගත හැකි හේතුව මෙයයි: එනම් අපේ ධාරිතාවය කොපමණ කුඩා වුවත්, දර්ශනවාදියෙකුට පමණක් නොව සාමාන්‍ය ජනතාවට පවා යමක් ඉගෙන  ගැනීමට ලැබීම ඉහල  වින්දනයක් ලැබිය හැකි දෙයක් වීමයි. අප ලබන ප්‍රමෝදයට හේතුව නම් චිත්‍රය දැකීමෙන් ලබන සතුට මෙන්ම යමක් ඉගෙනීමෙන් ලබන සතුටද සංයුක්තව ගත් කල යමක තේරුම අපට වැටහී යාමයි.

අල්මාරිය Closet - Ilya and Emiliya Kabakov

පහත යොමුවල වැඩි විස්තර තිබේ.

Links to the exhibition information 
About Mitch Griffin

මගේ ෆේස්බුක් හා ගූගල්ප්ලස් අවකාශය   තුල අනිකුත් ඡායාරූප පළවේ. ඔබ උපුටා ගන්නේ නම් එර්මිතාෂ් ප්‍රදර්ශනය හා කලාකරුවන්ගේ නම් සඳහන් කරන්න.


Complete exhibition is in my facebook page and in Google+. If you copy please make sure you mention artist's names and place of the exhibition.