අපේ අසල්වැසියා බ්‍රයන් - 4 - ලී වැට

කතාවේ කලින් කොටස් තුන  මෙතන 

අපේ අසල්වැසියා බ්‍රයන් - 1

අපේ අසල්වැසියා බ්‍රයන් - 2

අපේ අසල්වැසියා බ්‍රයන් - 3

ගිය වතාවේ මෙහෙම ලීව මතකනේ - බ්‍රයන්ට ඕනේ අපි ලව්වා ලී  වැට අලුත් වැඩියා කරන්න. දකුණු පැත්තේ එක මගෙලු. මට අලුත් පැනෙල් දාන්නලු. මම පොරොන්දු වුනා හොයල බලල කරන්නම් කියල. ඉතින් ඔෆිස් එකේදී සුද්දෝ කට්ටිය මට කීව, ඒ කතාව ඇත්ත කියල  .  ගේ ගන්නකොට දෙන ඉඩමේ සහ නිවසේ අයිතිය දෙන ලියකියවිලි වල ඇති බලන්න කියල.  මම ඇවිත් බැලුව,  හරි කතාව .  දකුණු පැත්තේ බ්‍රයන් සමග තියන වැට මම අලුත් වැඩියා කරන්න ඕනේ .  බ්‍රයන් එයාගේ දකුණු පැත්තේ එක .  ඒකෙන් හැමෝගෙම වැටවල් අලුත්වැඩියා වෙලා තියෙන්නේ.  අසල්වැසියෙක් අලුත්වැඩියාව  කරන්නේ නැතිනම් නිත්‍යානුකුලව පැමිණිලි කරන්න පුළුවන් නගර කවුන්සිල් එකට.  මේවට එංගලන්තයේ කියන්නේ බයිලෝ Byelaws කියල .  (බයියන්ගේ ලෝ වගේ තමා ටිකක් .  ලෝකල් නිසා) . එංගලන්තෙට අලුතින් එන අය හෝ කුලියට ඉන්න අය මේවා නොදන්නා නිසා ගෙවතු හොඳින් තියා ගන්නේ නැහැ.  එනිසා අසල්වැසියෙක් පැමිණිලි කලොත් උන් ජාතිවාදී, වර්ණවාදී  අරව මේවා කියල ඉතින් බනිනව.  

මම එංගලන්තෙට ආපු මුල්ම කාලේ (රුසියාවේ ඉගෙන ගන්න කොට )  එක දවසක කෙන්සින්ටන් වල ඔය චොකලට්  සිගරැට්  විකුණන පොඩි පෙට්ටි  කඩේකින් චොක්ලට් එකක් ගන්න ගියා .  ඉන්දියන් කාරයෙක් තමා වෙළෙඳම් කලේ .  මම චොකලට් එකට  සල්ලි දීල ඉල්ලුවහම එයා වික්කේ නැහැ. මට අවුල් නිසා මම එතනින් යන්න හැදුවම වෙළෙන්දා  ආයේ මට කතා කළා . උඹ ළඟ දී ද මෙහෙට ආවේ කියල ඇහුව.  මම ඔව් කිව්වා. කොහෙන්ද කිව්වහම , ශ්‍රී ලංකාවෙන් කිව්වා . මිනිහ මට හොඳ පාඩමක් කියා දුන්න.

"මෙහෙමයි මේ රටේ මොනවා හරි ඉල්ලන කොට අපේ රටේ වගේ කෑ ගහන්න ඕනේ නැහැ .  ප්ලීස් කියන වචනය කීවහම ඇති .  දුන්නහම තෑන්ක් යූ කියපන්. " 

මම කීවා, 

"මම නිකන් ඉල්ලුවේ නැහැනේ . උඹෙන් සල්ලි දීලනේ ඉල්ලුවේ" කියල.  එතකොට එයාම  කිව්වා

 "නැහැ. උඹ සල්ලි දුන්නත් ප්ලීස් කියල තැන්ක් යූ" කියන්න ඕනේ. ඒක හොඳ සිරිතක් මේ මිනිස්සුන්ගේ  කියල.  ඒකහොඳ  අවවාදයක්.  දැන් ඉන්න කම්පැනි එකේ අපේ කන්ට්‍රැක්ට් ගත්ත  ඉන්දියන් කම්පැනි වලින් අයිටී කට්ටිය  කතා කරන  කොට ප්ලීස් කියල කියන්නේ නැහැ .  එතකොට ඒක නිකන් අණ දීමක් වගේ කියල තේරෙනවා.  මම ඕක වරක් මට වැඩේ භාර දුන්න ටීම් ලීඩර් කෙනෙකුට මෙන්ෂන් කලහම ඒකි ගත් කටටම කිව්වා "සවුත් ආසියානු පැත්තේ ප්ලීස් වචනය හෙම වැඩිය භාවිතා වෙන්නේ නැහැ .  මටත් මළ පනිනවා . නමුත් ඒ එහෙ හැටි.  ගණන් ගන්න එපා කියල ." 

 ජර්මනියේත් මොකක් හරි ඉල්ලන කොට හෙම බිට (bítte) හෙවත් ප්ලීස් කියන කෑල්ල කියනවා .  එහෙම කීවේ නැත්නම් ඒ මිනිසුන්ගෙන් ලැබෙන ප්‍රතිචාරයත් වෙනස්.  මොකකට හරි ස්තුති කලහම යූ වෙල්කම් හෝ බිට ෂෝන් කියල කියන්න ඕනේ .      

අපේ ඔෆිස් එක පිටි පස්සේ තමා බී ඇන්ඩ් කිව් (B & Q) කියන ගොඩනැගිලි අලුත්වැඩියා වට වගේම වෙන ඕනෑම අලුත්වැඩියාවකට අවශ්‍ය අටවන භාණ්ඩ ගන්න පුළුවන් DIY  (do it yourself හෙවත්  අටවන) කඩේ තියෙන්නේ.  මම එතැනින් පැනෙල්  හතරක් ගත්ත වටේ හතරක් තමා කැඩිලා තිබ්බේ. බ්‍රයන් අයිරිෂ් කාරයන්ට බනින එකත් සාධාරණයි.  උන් ගේ වික්කේ මේවා හදන්නේ නැතිව.  අපි බැලුවෙත් නැහැ.  අයිරිෂ් කාරයට පෙනුනේ බ්‍රයන් ගේ ජාතිවාදී කම විතරයි . 

පැනෙල් හයි කරලා තියෙන්නේ සිමෙන්ති කණු දෙකක් මැද. ඔය ෆොටෝ වල තියෙන්නේ පැනෙල්  අපේ ගෙවත්තේ දෙපැත්තේ . 

 මගේ පැත්තේ ඒවා (සුදු මල් තියෙන )   ආයේ දාන්න ඕනේ .  අල්ලපු පැත්තේ එකා ගණන් ගන්නෙත් නැහැ. කුලියට ඉන්න බ්‍රසීල කට්ටියක් .  

 පරණ එක අරන් අලුත් එක දාන එක ලෙහෙසි වැඩක්.  මම පැනෙල් දාන්න යන කොටම බ්‍රයන් කඩන් පැන්න. 

"හා හා ඕවට තීන්ත ගාන්න ඕනේ මිනිහෝ .  නැත්නම් වැස්සට  දියබත් වෙලා කැඩිලා යනවා." 

"මල මගුලක් නේ මේක. මට කලින් කියන්න එපැයි දැන් ආපහු යන්න ඕනේ තීන්ත ගන්න" මමත් කඩන් පැන්න.

එතකොට බ්‍රයන් කියනව "වරෙන් යන්න ගැරේජ් එකට. මගේ ළඟ ඉතුරු තීන්ත වගයක් තියෙනව. ඒක ගාමු. උඹ පස්සෙ ගෙනල්ල දීපන් මට ඕනේ වෙලාවට. ඔෆිස් එක ළඟ නේ කඩේ තියෙන්නේ" කියල. අපි ගේ ඉස්සරහ පැත්තට ගියා. ගැරේජ් එකේ දොර ඉස්සරහ තියෙන්නේ .

ඔන්න ඔය වෙලේ බ්‍රයන්ගේ ගර්ල්ෆ්රෙන්ඩ් එනවා අපේ දිහාවට. බ්‍රයන් මට හඳුනල දුන්නා මේ මගේ ගර්ල්ෆ්‍රන්ඩ් පවුලින්. අවුරුදු හැට පහක හැත්තෑවක විතර ලංකාවේ විදිහට කියනවනම් ආච්චි කෙනෙක්. ඒවුනාට ඇත්තටම එයා ලස්සනයි. ලස්සනට ඩෙනිමක් ඇඳලා එනකොට මට තේරුනා එයා කකුලක් ඇද ඇද එන්නේ කියලා. පුංචි කාලේ පෝලියෝ හැදිලා ඒ කකුල ඇද වෙලා තියෙන්නේ. බ්‍රයන් ටෝක දාල තියෙන්නේ ජීපී හෙවත් දොස්තර ගේ ඔෆිස් එකේ ඉන්න කොට . බ්‍රයන් යන තැනක හැමෝටම කතා කරනවා හැබැයි. මේ බ්‍රයන් ගේ හතරවෙනි හෝ පස්වෙනි කාන්තාව. ඉනෙස් හිටියා එළියේ. පෞලින් ඉනෙස්ට කියනවා

"අනේ මටත් ඒෂියන් කොල්ලෙක් එක්ක යාළුවෙන්න ඕන කමක් තිබ්බා. අපේ ඔෆිස් එකේ හිටිය. හරි ගියේ නෑනේ" කියල. එහෙම කියල ඇවිත් මගේ වම් අතේ උඩ හරියෙන් මිරිකුවා. බ්‍රයන් කාරයා හැක හැක ගාලා හිනාවෙනවා.

"උඹ පරිස්සම් වෙයන් ඕකි ගෙන්" කියල. පෞලින් දැන් බොරු තරහක් අරගෙන . මම ඇහුව ඉතින් ඉන්දියන් කොල්ලට මොකද වුනේ කියල .

"අපොයි ඌ ඉන්දියාවට ගිහිල්ලා කසාදයක් කරන ආවනේ. උගේ අම්ම කීවලු."

" මම කිව්වා ඒවානම් එහෙම තමයි. මෙහෙ ඉන්න අය එහෙ ගිහින් බැඳලා එනවා . අපේ ටැමිල් අයත් එහෙමයි කියල ."

එතකොට තමයි බ්‍රයන් කීවේ "මේ අජිත් ලංකාවේ කොල්ලෙක්. ලංකාවේ උන් හොඳයි." කියලා. එහෙම කීවේ ඇයි කියල මට තේරුනේ නම් නැහැ.

 ගොඩක් වයසයි කියලා අපිට හිතුනට එංගලන්තෙ මේ වගේ කපල් හුඟක් ඉන්නවා. සැමියා හෝ බිරිඳ මියගිහිල්ල නං තව කවුරුහරි කෙනෙක් එක්ක යාළු වෙනව. ඇවිදින්න යන්න, පික්නික් එකක් යන්න, සෙනසුරාදා ඉරිදට බියර් බොන්න පබ් එකට යන්න වගේ වගේ දේවල් එකට කරනවා . එහෙම ජිවිතේට සහකාරියක් හෝ සහකරුවෙක් එකතු කර ගන්න එක සාමාන්‍ය දෙයක්. ඒ වගේම තමයි මේ දෙන්න තියන් ඉන්න නිදහස. බ්‍රයන්ට ලොකු ගෙදරක් තිබ්බට පෞලින් ඇවිත් ඉන්නේ දවස් දෙකයි . පෞලින් එයාගේ ගෙදර දුවත් එක්ක ඉන්නේ . නැත්නම් අර මටත් වැඩිය වයස දුව උයන් කන්නෙවත් නැතිලු .

තීන්ත අරන් එලියට එනකොට තව කෙනෙක් එකතු උනා. මයිකල් කියන්නේ බ්‍රයන්ගේ ලොජර් . වැඩිය අපිත් එක්ක මුලදී කතාවට ආවේ නෑ. ඒ වෙලාවේ එලියට ඇවිල්ල අපිට වැට ගහන්න උදව් කරන්න. මම පස්සේ දැනගත්ත විදියට මයිකල් කියන්නේ සිවිල් ඉංජිනේරුවෙක් . බ්‍රයන් තනියම තමයි එයාගේ ගේ අලුත්වැඩියා කරන්න පටන් අරන් තියෙන්නේ . මුලදී අපේ ගේ වගේ කාමර තුනේ එකක් . දකුණු පැත්තේ ඉඳන් ගරාජයක් හදල ඒක උඩ තව කාමරයක් හදල කුස්සිය පිටි පස්සට අරගෙන කාමර හතරක ලොකු ගෙයක් කරලා. වහලත් උඩ වෙනස් කරලා, මොකද දික් කරන්න ඕනේ කාමර වෙනස් කරනකොට . එතකොට මයිකල් තමයි structural engineering කෑල්ල කියලා දීලා තියෙන්නේ. බාල්ක හරියට දාන්නේ කොහෙටද වගේ දේ.මොකද නැත්නම් වහළවල් කඩා වැටෙන්න පුළුවන් . ඔය ගෙවල් හදන වැඩේට විරසක වෙලා තමයි බ්‍රයන් ගේ දෙවෙනි බිරිඳ අත හැරලා ගිහින් තියෙන්නේ. නිමක් නැති ගෙවල් හැදිල්ලක් කියල.

වැඩ ඔක්කොම කලාට පස්සේ මයිකල් කාමරයක් කුලියට අරගෙන නතර වෙලා. එයත් දික්කසාද වෙච්ච කෙනෙක්. ගර්ල් ෆ්‍රෙන්ඩ් කෙනෙක් කෙනෙක් ඉන්නව ටිකක් ඈත ඉල්ෆොර්ඩ් පැත්තේ . මට එතකොට වයස තිස් ගණනක්නේ. මයික් ට පනස් ස් ගානක් වගේ. බ්‍රයන් තමයි වැඩිමලා.

 අන්තිමට උනේ සුද්දො දෙන්නා එකතුවෙලාවේ මගේ පැනල් ටිකට තීන්ත ගාලා දුන්නෙ එක. උන්ට තේරුණා.මම ජීවිතේට හරියට තීන්ත ගාපු කෙනෙක් නෙවෙයි කියලා. බ්‍රයන් කියල දුන්නා මුලින් බේස් කෝට් එකක් ගාලා  දෙවැනි පාර ආයේ හරියට ගාන්න ඕන කියල. එතකොට තමයි පැනල්  වැස්සට තෙමුනට මුකුත් වෙන්නෙ නැත්තේ. පින්සල හරියට අල්ලන හැටි හෙමත් කියල දුන්න . වැඩේ කියන්නේ ඉනෙස් තීන්ත ගාන්න දන්නවා හොඳට. එයාලගේ දෙමාපියන් ගේ ගමේ ගෙයක් තියනවා නිවාඩුවට ඉන්න. ඒකෙ පවුලේ කට්ටිය එකතු වෙලා කැඩුණු තැන් පිළිසකර කරලා තීන්ත ගාන නිසා එයත් ඉගෙන ගෙන. මම රුසියාවේ ඉන්න කොට තේරුන දෙයක් තමයි රුසියානුන්ට උනත් මේ DIY වැඩ හොඳට පුළුවන් කියන එක .

  පැනෙල් ටික හයි කරහම ඇත්තටම ලස්සනයි.  අපි කට්ටියටම තේ හදලා දුන්න.  ඉනෙස් හදපු  ඇපල් ස්ට්රුඩල් කියන ජර්මන් අතුරුපස එක්ක . කොළ පාට ඇපල් පොඩියට කපල සෝස්පැන් එකකට දාල වතුර, කුරුඳු , වැනිලා වගේ දේ සහ සීනි දාල තම්බනවා. හොඳ ජෑම් වගේ දෙයක් හැදෙනවා . ඊට පස්සේ අපි ඔය පේස්ට්‍රි හෙම හදන පිටි වලින් හදපු පිටත ෂිට් තියෙන්නේ . ඒවා ඇතුලට දාල කිචන් ෆොයිල් වලින් වහල බේක් කරනවා. ඔය මැක්ඩොනල්ඩ් එකේ ඇපල් පයි කියල විකුනන්නෙත් ඒ වගේ එකක්. ඉනෙස්ගෙන් තමයි මම ඒ අතුරුපස එක ගැන ඉස්සෙල්ලම දැන ගත්තේ. උඩට අයිසින් සීනි දාල කස්ටඩ් හරි අයිස් ක්‍රීම් උඩට දාගත්ත්තම හරිම රසයි.

පැනල් දැම්මට පස්සේ අපි කට්ටිය එකිනෙකාට වඩා හිතවත් වුනා කියලයි මට තේරුනේ .

අපේ අහල පහල අයනම් බ්‍රයන් එක්ක වැඩි ඇයි හොඳයියක් නැහැ. ස්කොට්ලන්ත කපල් එකක් ඉන්නවා අපට ගෙවල් හයකට එහායින් . තවම ඉන්නවා දැන් අවුරුදු 25 ට වැඩියි මේ චතුරශ්‍රයේ . එයාලා ඉනෙස් එක්ක කියල තියෙනවා

"බ්‍රයන් නාහෙට නාහන එකෙක්. අනිත් අයට උගන්නන්නමයි එන්නෙ. අපට පුදුමයි ඔයාල බ්‍රයන් එක්ක ඔළුව ගහගෙන ඉන්න ඉන්න එක නම්" කියල . ඉනෙස් කියල තියනව අජිත් බ්‍රයන් එක්ක යාලුයි . දෙන්න තකට තක කියල .

ස්කොට්ලන්ත දෙන්න දැන් වුනත් පාරේදී හම්බ වෙලා කතා කලාට එතනින් එහාට සම්බන්ධයක් නැහැ. අපිත් දැන් මේ චතුරශ්‍රයට විත් අවුරුදු 25 වෙන්න ළඟයි.

අජිත් ධර්ම - 11/08/2024