ඉතාලිය වෙනුවෙන්

මම 80 දශකයේ සෝවියට් සංගමයේ ඉගෙනුම ලබන විට බොහෝ රුසියානු  ,සහ ඉංග්‍රීසි  ගීත වලට අමතරව වෙනත්  විදේශීය රටවල් වල  සංගීතයද   ඉතා ජනප්‍රිය විය.  ඇත්තටම වෙනත් රටවල ගීත ඇසීමට මා පුරුදු වුනේද මේ කාලයේය. විවිධ යුරෝපීය  සංගීත ශානරයන් අතර ඉතා ජනප්‍රිය වුයේ ඉතාලි හා ස්පාඤ්ඤ සංගීතයයි.  ඒවා බොහෝ විට මොස්කව් ඩිස්කෝ සහ බාර් වල වාදනය විය. සෝවියට් සමාජවාදී සමූහාණ්ඩුවේ නිෂ්පාදිත සංගීත තැටි බහුලව මිලදී ගැනීමට තිබුණි. රුසියාවේ  සුප්‍රසිද්ධ ඉතාලි ගායකයින් අතර ඇඩ්‍රියානෝ සෙලෙන්ටානෝ, රිචී සහ  පොවේරි සහ ටෝටෝ කුටුග්නෝ  (මගේ  ප්‍රියතම ඉතාලියානු සංගීතඥයෙක් ) ද  විය. 

අපි 2015 දී ඉතාලියට ගියෙමු. ඉතාලියානුවන් ඉතා මිත්‍රශීලීයි ජාතියකි.  අපි  ඉතාලි කෑම වලට ආදරය කරන පවුලකි.  අපි විවිධ වර්ගයේ පැස්ටා, දේශීය වැනීසියානු අවන්හල්වල විශාල තුනී පීසා රස වින්දෙමු.පි බොටාර්ගා, ලසානියා , රයිබොලිටා, කාබොනාරා වැනි ආහාර අත්හදා බැලුවෙමු. දූවරුන් දෙදෙනා ඇතැම් ආහාර ප්‍රත්ක්ෂේප කරන අවස්ථාවක  , පීසා හෝ ස්පැගටි වලට ඔවුන් කිසි විටෙක අකැමත්ත දැක්වුයේ නැත.

 ඉතාලියේ ප්‍රසිද්ධ එහි  විශිෂ්ට හා ප්‍රසිද්ධ ආහාර වර්ග වලට  පමණක් නොවේ. ඔවුන්ගේ අතිශයින් වර්ණවත් හා පොහොසත් ඉතිහාසය වෙරෝනා, වැනීසිය සහ පීසා යන ආකර්ශනීය නගර සමඟ සංයුක්ත විය; සුප්‍රසිද්ධ වතිකානුව; පිනොචියෝ කතාන්දරය සහ දිගු කළු හිසකෙස් ඇති රූමත් කාන්තාවන්  අපව සැමවිටම ඉතාලියට බැඳ තබයි.

 මේ වන විට ඉතාලිය සෙසු යුරෝපයට සමගාමීව දුෂ්කර කාල පරිච්ඡේදයක් පසුකරමින් සිටී. කෙසේ වෙතත්, කොවිඩ් -19 හි මරණ සංඛ්‍යාව අඩු වන බවත් එහි ප්‍රස්ථාරයේ වක්‍රය පහළට නැමීමට පටන් ගෙන ඇති බවත් අපට පෙනේ. ඉතාලිය දැන් එහි උච්චතම අවස්ථාව පසු කර ඇති බවත්, මේ සුන්දර රට ඉතා ඉක්මනින් ආපසු යතා ටයට පැමිණෙනු ඇතැයි මම අවංකවම බලාපොරොත්තු වෙමි. 

මට නම්, ටෝටෝ කුටුග්නෝගේ "ලා ඉටාලියානෝ" ගීතය ඉතාලි ආත්මය නිරූපණය කරයි.

 වීවා ඉතාලියා

L'italiano - Toto Cutugno Video Ufficiale

ඇමෙරිකා එක්සත් ජනපදයේ කොරෝනා පැතිරීම, දක්ෂිණාංශික හා වාමාංශික අන්තවාදය

ඉතා අරුම පුදුම ලිපි කිහිපයක් ඇමෙරිකා එක්සත් ජනපදයේ කෝවිඩ් 19 පැතිරීම පිළිබඳව කියවන්නට ලැබුණි.  රෝගය ඉතා සීග්‍රයෙන් පැතිරෙන මම බ්ලොග් ලිපි කිහිපයකින්ම පැහැදිලි කලෙමි.  ඇමෙරිකාවේ ජිවත්වන ඇතැමුන්  තත්වය තවමත් හොඳ බව, ට්‍රම්ප් ගේ වසංගත පාලන ක්‍රියා මාර්ග නිවැරදි පෙන්වීමට තැතනුවත්  සත්‍යය නම් ඒවා බොහෝවිට ලංකාව වැනි රටවල ඇතැම් ජාතිවාදී පිස්සන් හා සමාජවාදී ලෙස හඳුන්වන නරුමයන් ගේ විකාර වලට දෙන දුබල පිළිතුරු බව පෙනී යයි. ඒ නිසා සත්‍යය  වැදගත්ය.

ජනාධිපති ඩොනල්  ට්‍රම්ප් මුලදී චීන වෛරසය කියමින් ඩෙඟා නැටුවද ඔහු පසුව වෛරසය පැතිරෙන  බව පිලි ගත්තේය . ඒ එසේ නොකලොත් ඇමෙරිකානු ප්‍රාන්ත ඔහුට එරෙහිව යන බව පැහැදිලි ව පෙනුනි බැවිනි. කෙසේ වතුදු වෛරසය පැතිරෙන  වේගය අනුව ඊට එරෙහි එන්නත්  නිපදවීම ප්‍රමාද වීම සහ  ඇමෙරිකානු සෞඛ්‍යය සේවකයන්ට අවශ්‍ය තරම් ආරක්ෂක ආවරණ නැති බවත් වාර්තා වන  හෙයින් ඩොනල්ඩ් ට්‍රම්ප්  නැවතත්  ආර්ථිකය බේරා ගැනීමේ මුවාවෙන් දුබලයන් (මා  මෙහි දුබලයන් කියන්නේ වයස්ගත පුද්ගලයන්, වෙනත් රෝග ඇත්තවුන් වැනි වෛරසයේ ප්‍රධාන ගොදුරුය)  මරණයට දැක්කීම සඳහා කැසපට කවයි.   

 එයට සහයෝගය දෙන්නේ අන්ත දක්ෂිනාංශයයි. ඒ කෙසේද ?

     

ලෝක සෞඛ්‍ය සංවිධානයට අනුව එක්සත් ජනපදයේ පළමු රෝගියා වාර්තා වන්නේ ජනවාරි විසි දෙවන දාය. ජනවාරි මස විසිහයේ සිට තිහ දක්වා පස් දෙනෙකු ආසාදිත බවට වාර්තා වූ අතර  පෙබරවාරි දෙවනදා  වනවිට එය දෙකෙන් වැඩිවී එකොළහක් වුනි.

 දින දහයකට පසු පෙබරවාරි දොළොස්වනදා දින එම ගණන දහහතරකි. සුළු වැඩි වීමකි. කෝවිඩ් 19 වෛරසයේ බීජෞෂණ දින ගණන දින දෙකේ සිට දහ හතර  දක්වාය. පෙබරවාරි විසි පහ  මේ ගණන පනස් තුනක් වී  මාර්තු තුන නැවත  දෙගුණයක්ව  එකසිය අටක් ලෙස  වාර්තා වෙයි. ඇමෙරිකාවේ  ප්‍රථම මරණය මේ දිනයේදීය.  ඉන්පසු සෑම දවසක් හැර දවසක්ම අසාදිත සංඛ්‍යාව දෙගුණ වන අතර මරණ සංඛ්‍යාව ද ඊට සමානුපාතිකව ඉහල යයි. මාර්තු හයදා වනවිට  ආසාදිත සංඛ්‍යාව දෙසිය දහ තුනකි. මාර්තු නම වනදා  නැවතත් එය දෙගුණයක්ව  472 ක් වී එකොලොස් වනදා ආසාදිතයන් නවසිය අසූ හතක්  වන විට  මරණ  ගණන  විසි නමයට ඉහල නගී . 

ඉන්පසු දින තුනකට වතාවක් දෙගුණ වෙන ආසාදිතයන් සංඛ්‍යාව දහ නම වැනිදා දස දහස ඉක්මවයි.  මරණ සංඛ්‍යාව එකසිය පනහකි. මාර්තු දහ නම වනදා    සිට පැතිරීම වඩාත් සීඝ්‍රවත්ය. 

  

 මාර්තු විසි දෙක දෙගුණ වන අගය මාර්තු විසි පහ 68,334ක් වෙයි. ලක්ෂය පනින්නේ මාර්තු 29 දාය. මරණ සංඛ්‍යාව 1668 කි. ලොක් ඩවුන් කිරීම සහ රෝග පරික්ෂා කිරීම  නිසා මරණ සංඛ්‍යාව 1.6% ක අඩු අගයක් ගන්නා  බවක් පෙනුනි. අප්‍රේල් පහ  වනවිට ඇමෙරිකා  එක්සත් ජනපදයේ මරණ සංඛ්‍යාව 9558 ක් වන අතර අසාදිත සංඛ්‍යාව ලක්ෂ තුන පනී.  අප්‍රේල් 7 වනදා වන විට එක්සත් ජනපදයේ මරණ ප්‍රතිශතය 3.23% කි. මරණ සංඛ්‍යාව 12795කි. අද වන විට ආසාදිත සංඛ්‍යාව ලක්ෂ හතකට ආසන්නය. මරණ සංඛ්‍යාව තිස් පන් දහසකි . එනම් 5.1% කි. මෙය අනිවාර්යයෙන්ම ඉදිරියේදී 7%-9% ක  ප්‍රතිශතයක් වන බව පෙනේ. 

අන්තවාදී සමාජවාදීන් ගේ තර්කය : මා ඔවුන්ට අන්තවාදීන් යයි කියන්නේ දිනකට ලෝකයේ බඩ  ගින්නේ මැරෙන සංඛ්‍යාව විසිපන්දහසක්  බව  ඔවුන් නිතර පවසන බැවිනි. එය සත්‍යයකි. බඩගින්න සහ එයට සම්බන්ධ ලෙඩ රෝග වලින් දිනකට එතරම් ප්‍රමාණයක් මිය යන බව පර්යේෂකයන්  පවසති. හැබැයි ඒ මිය යන්නේ එකවර නොවේ. එකම සතියකද  නෙමේ.  දවස් ගණන් , සති ගණන්, අවුරුදු ගණන් හාමතයේ සිටිමිනි. 

අනාදිමත් කාලයක සිට බඩ ගින්නේ මැරෙන මිනිසුන් බේරා ගැනීමට සමාජවාදීන් විසින් විප්ලව දියත් කළහ. ලංකාවේ 1971, 88-89 අරගල වලින් මුලින් විසි දහසක්ද ඉන්පසු හැට දහසක් ද මියගිය බව කියවේ. කාම්බෝජයේ කුසගින්න නිවීමට පැමිණි පොල්පොට් රජය විසින් මිලියන් 1.5 ත් දෙකත් අතර වැසියන් ගණනක් මරා දැමූහ. මින් බොහොමයක් බලෙන් ඇති කල සාගින්නෙන් මිය ගියහ. ස්ටාලින්   නිසා උක්රයිනයේ වැසියන් මිලියනයක් පමණ මිය ගියහ. සමහර විට බටහිර රටවල අධි පරිභෝජනය නවතා දැමීමට ආයුධ විරහිත සටනක්  ගෙනයාම වඩා හොඳ විය හැකිය.

අන්තවාදී දක්ෂිණාංශිකයන්ගේ තර්කය: මේ තර්කය අර තර්කයට සමගාමීව ඉදිරියට එන්නකි.  එනම් සාමාන්‍ය සෙම් ප්‍රතිශ්‍යා වෛරස හා නිවුමෝනියාව මෙන්ම පිළිකා වැනි රෝග වලින්ද මැලේරියා වසංගතය ආදියෙන්ද ඩෙංගු වසංගතයෙන් ද මේ හා සමාන හෝ ඊට වැඩි මිනිසුන් ප්‍රමාණයක් මිය යන බවයි.   මැලේරියාව තවමත් ඇත්තේ අප්‍රිකාවේ සහ සමහර ආසියානු රටවලය. මැලේරියාවට බෙහෙත් සොයාගෙන තිබේ. ශ්‍රී ලංකාව වැනි නිදහස් සෞඛ්‍ය සේවයක් මෙන්ම හොඳ වසංගත මර්දන ක්‍රමයක් ඇති රටවල මැලේරියාව සදහටම වාගේ තුරන් කර දමා තිබේ. මැලේරියා පෙති බී සංචාරය කළ හැකිය.  මැලේරියාව තව දුරටත් ලෝක තර්ජනයක් නොවේ. මේ අන්ත දක්ෂිණාංශික  මස් වැද්දන් ඒවා කියන්නේ නැත.

බ්‍රිතාන්‍යයේ මෙන්ම ඇමෙරිකා  එක්සත් ජනපදයේ ඇත්තේ අන්ත දක්ෂිණාංශික න්ට මුලින්ම කන්දෙන  ආණ්ඩු දෙකකි. ට්‍රම්ප් හා ජොන්සන් දෙදෙනා ගේම මූලික ප්‍රතිචාරය වූයේ චීනයට හැදුනාට වසංගත තත්වය එක්සත් ජනපදයට හා බ්‍රිතාන්‍යයට එතරම්  බල නොපාන බවයි. ඕනෑ තරම් සාක්ෂි තිබෙද්දිත් වෛරසයේ ප්‍රභේද පැතිරෙන බව පෙනී පෙනීත් ඉතාලියත්, එක්සත් රාජධානිය  සහ ට්‍රම්ප් ගේ දක්ෂිණාංශික රජයන්  ඒවා සැලකුවේ නැත. මා මුලින් ලියු බ්ලොග් ලිපියක මරණ සංඛ්‍යාව වැඩි විය හැකි බව හා චීනයේ මෙන්  ලොක් ඩවුන් කිරීමක් අවශ්‍ය විය හැකි බව කිවූ පසු  මගේ කාර්යාලයේ කිහිප දෙනෙක් ඒ පිළිබඳව උසුලු විසුළු කළහ. ඔවුන් බොහෝ අය පසුගිය මැතිවරණයේදී යුරෝපා සංගමයෙන් වෙන්වීමට චන්දය දුන් අය වීම මගින් පෙන්වන්නේ එවැනි වසංගත තත්වය පසුපස එන ආර්ථික කඩා වැටීම ගැන ඔවුන්ට තිබූ බරපතල අනවබෝධයයි. 

අද චීනයට කෝවිඩ් 19 මරණ ප්‍රමාණය සැඟවූ  බවට චෝදනා කරන බ්‍රිතාන්‍යයේ වැඩිහිටි නිවාස  දෙදහසක පමණ කෝවිඩ් 19 ආසාදිතයන් සිටින අතරම බොහොමයක් මරණ සිදුවීත් බ්‍රිතාන්‍ය  රජය ඒ අය වාර්තා ගත කර නැත. ඒ වෙනුවට නිදහස් සෞඛ්‍ය සේවයට අනුබද්ධ වැඩිහිටි නවස 90 ක රෝගීන් පමණක් වාර්තා කරති. ඊට අමතරව  චීනයේ මෙන්ම නිවෙස් වල මිය යන පුද්ගලයන්   වාර්තාගත කරන්නේ නැත. ඔවුන් කෝවිඩ් -19 වලින්ද සාමාන්‍ය රෝග වලින් මිය ගියාද යන්න කිසිවෙක් නොදනිති. මේ අනුව බලන් කල සමනය මරණ අගයට තවත් දෙදහසක් පමණ අප්‍රේල් 4 වන විට එකතු කළ යුතුව තිබුණි.

 

මේ වසංගත තත්වය පුරසාරමකට හරවා ගන්නා අය දකුණේ හා වම දෙපැත්තේම සිටිති. උදාහරණයක් වශයෙන් කියුබාව කල හොඳ දේවල් කිහිපයක්ම තිබේ. එකක් වෛද්‍යවරු පිරිසක් ඉතාලියට එවීමයි. අනික වයිරස ආසාදිත ලෙඩුන් සහිත අනිකුත් රටවල් ප්‍රතික්ෂේප කල බ්‍රිතාන්‍ය මගී නැවකට නැවතීමට ඉඩ දීමයි.  කියුබාවේ නිදහස් සෞඛ්‍ය සේවයක් සහ වැඩි වෛද්‍යවරු ප්‍රමාණයක් සිටිති. ඒ ගැන විවාදයක් නැත.

ඒ අතර යන පුරසාරම කියුබාව බෙහෙතක් සොයා ගත්  බවයි. ඔවුන් බෙහෙත පරික්ෂා කලත් ඉන් සම්පුර්ණ සුව වීමක් ඇත්දැයි තවම කවුරුත් දන්නේ නැත. ඊට  අමතරව කියුබාව සමාජවාදී නිසා කොරෝන වයිරස් රෝගී තත්වය සාර්ථකව මැඩ පවත්වා තිබේ. මෙය මේ වසංගතය පැතිරීම ගැන හරි හැටි නොදන්නාකමට කියන අඳබාල කතාවකි. එහි තවම රෝගය හරි හැටි පැතිරී නොමැත. අද වනවි රෝගීන් 862 දෙනෙකු ඇති අතර විසි හත්   දෙනෙකු මිය ගොස් ඇත. කියුබාවේ ජනතාව විසිරි ඇති පළාත්වල  රෝගය පැතිරීම අඩු අතර චීනය වැනිම වූ  මධ්‍යගත පාලනයක් ඇති රටක් වශයෙන් රෝගය පාලනය ලෙහෙසි විය හැකිය. එපමණකි.

තවත් අය සමාජවාදී රටක් වශයෙන් රුසියාවද ඒ ගොඩටම දමති.  රුසියාවේ සමාජවාදය අවසන් වුයේ 1991 දීය . සෝවියට් දේශයේ කාලයේ සාදන ලද පොලික්ලිනික් සහ රෝහල් නොවන්නට පූටින් ටද අමාරු වන්නේය. ඔහු ලහි ලහියේ මොස්කව් නගරයේ  තාවකාලික රෝහලක් සාදන්නේ එබැවිනි. රුසියාවේ  විසි හත් දහසකට රෝගය වැළඳී ඇති අතර දෙසිය තිහකට වැඩි ගණනක් දැනට ජිවිතයට සමු දී ඇත.

නිවැරදිව  රෝගය පාලනය කරන රටවල් අතර දැනට ඇත්තේ චීනය, දකුණු කොරියාව, තායිවානය  සහ ජර්මනියයි. චීනය හැර අනිකුත් රටවල් ඇඳිරි නීතිය භාවිතා නොකළහ. ජර්මනියේ කිසිම නගරයකින් වෙනත් නගරයකට යෑම තහනම් කර ඇති අතර රෝග ලක්ෂණ ඇති සියලු දෙන පරික්ෂණයට භාජනය කරති. ජර්මනියේ සෞඛ්‍ය සේවා හා රෝහල් නොමිළයේ සේවා සපයති. ජර්මනියේ ඇත්තේ ද දක්ෂිණාංශික රජයකි.  එහෙත් ඔවුන් මුල් කාලයේම ලෝක සෞඛ්‍ය සංවිධානයේ අනතුරු ඇඟවීම් සහ ඔවුන්ගේ විද්‍යාඥයන් ගේ අදහස් පිලි ගත්හ.

ශ්‍රී ලංකාවද මේ ගොනුවටම එකතු කිරීමට  මම කැමති මුත් මා ගණනය කළ ආකාරයට ශ්‍රී ලංකාවේ දෙදහසක පමණ ආසාදිතයන් පරිසක් දැනටමත්   සිටිය යුතුය. නමුත් ඇඳිරි නීතිය පැනවීම නිසා හා දිස්ත්‍රික්කයෙන් දිස්ත්‍රික්කයට යා නොහැකි නිසා ඔවුන් වසංගතය  මනාව පාලනය කරන බවක් පෙනේ.  ශ්‍රී ලංකා රජයෙන් කරන තවත් අගනා  ක්‍රියාවක්  නම් ආසාදිතයන් ගැවසුණු  තැන් සොයා ඔවුන් සමග සම්බන්ධකම් තිබූ අය නිරෝධනයට ලක් කිරීමයි. ජර්මනියේද මේ ක්‍රමය භාවිතා කරයි.   

ඊට අමතරව ශ්‍රී ලංකාවේ  බලධාරීන්ට මුහුණ පෑමට ඇති  ප්‍රශ්නයක් නම් ආසාදිතයන් ඒ බව පිලි ගැනීමට අකමැත්තක් දැක්වීමයි. 

එසේම  ඇඳිරි නීතිය ඉවත් කරන දිනවල මිනිසුන් වෙළඳ ශාලා වල  එකට පොදිකනු දැකිය හැකිය. එයට වරදක් කිව නොහැක්කේ ඔවුන්ද ජිවත් විය යුතු  හෙයිනි. මේ නිසා තවමත් ශ්‍රී ලංකාවේ ආසාදිතයන් සෑහෙන සංඛ්‍යාවක් සිටින බව මට සිතේ. නමුත් ශ්‍රී ලංකාවේ සෞඛ්‍ය සේවාවන්, ආරක්ෂක හමුදා හා රාජ්‍ය නිලධාරීන් ඉහත කී රටවල් හතරේ මෙන්ම වසංගතය මැඩ පැවැත්වීමේ ලා ප්‍රසංශනිය කාර්ය භාවයක් ඉටු  කරන බව පිළිගත යුතුය. 

ඉතාමත් කණගාටුවට කරුණක් වන්නේ බ්‍රිතාන්‍යයේ ජාතික සෞඛ්‍ය සේවය (NHS ) කෙතරම් සාධනීය වැඩ කොටසක් ඉටු කරත් පැවති කොන්සර්වේටිව්  රජයන් එයට නියමිත ප්‍රතිපාදන නිතර කප්පාදු කිරීම  නිසා වෛද්‍ය, හෙදි හිඟයක් මෙන්ම සෞඛ්‍ය සේවා උපකරණ  වලද   හිඟයක්ද පැවතීමයි. එසේම අගමැති බොරිස් ජොන්සන් ලොක්  ඩවුන් ක්‍රියා දාමය පටන් ගත්තේ බොහෝ පමා වීය.  එසේම ඔහුට අවවාද දුන් විද්‍යාඥයන් මුලින් කියා සිටියේ ප්‍රතිශක්ති එන්නත් වලින් තොර සමූහ ප්‍රතිශක්තිකරණය ගැනය. (මේ ගැන මුල් බ්ලොග් මා ලිපි වල ලියා   තිබේ.)

ඩොනල්ඩ් ට්‍රම්ප් විසින් දිගින් දිගටම වසංගත තත්වයක්  නැතිය කියා ප්‍රතික්ෂේප කල අතර පරීක්ෂණ පටන් ගත්තේද  බොහෝ පමා වීගෙනය. දැන් ඔහු ලෝක සෞඛ්‍ය සංවිධානයට හා චීනයට චෝදනා කරයි. ඔහුගේ ආරක්ෂක සේවා චීනය මුළු මරණ සංඛ්‍යාව වසන් කරන බවක් කලින් කීවේ නැත්ද? අප වැනි බ්ලොග් ලියන්නන්ට පවා ගණනය කිරීමේදී පැහැදිලිව පෙනුණු කරුණක් ඇමෙරිකානු ආරක්ෂක සේවා නොදැන සිටියා යයි කිව නොහැකිය. එකම හේතුව නම් මේ මුග්ධ අහංකාර පරවශ මිනිසා ඒවා විශ්වාස නොකිරීමය.

මේ හේතුව නිසාම ට්‍රම්ප් විසින් ඇමෙරිකානු ආරක්ෂක හමුදා අනතුරේ හෙලා ඇත. මෙය හොඳ තත්වයක් නොවන බව ඕනෑම කෙනෙකුට පෙනෙන, එහෙත්  නොකියන  කරුණකි.

මම ඇමෙරිකා  එක්සත් ජනපද රජයේ ක්‍රියා කලාපය විවේචනය කරන්නේ ඒ රට වැටිලා කියා සතුටු වීමකට නොවේ . එවැනි රටක් වසංගතයක් නිසා ඇද වැටෙන්නේ නැත. එහෙත් වසංගතයක් පැතිරීමේදී  බොහෝ වැසියන්ට රැකියා කිරීමට නොහැකි තත්වයක් උදාවී ආර්ථිකය අඩාල වීමක් කොහොමත් සිදුවිය හැකිය. ඒ නිසා නිසි පියවර කලින්ම  ගැනීමෙන් එවැනි තත්වයක් වලකා ගැනීම රජයේ කාර්යභාරයයි. ට්‍රම්ප් ගේ රජය නොකළේද එයයි. 

ජනාධිපති බැරක් ඔබාමා ඉදිරියේ එන වසංගත තත්වයට මුහුණු දිය යුතු අන්දම පවසන වීඩියෝ  වක් දුටිමි. එවැනි දූරදර්ශී නායකත්වයක් තිබුණු රටක් අසාර්ථක මුදලාලි කෙනෙකු විසින් අනතුරේ හෙලා තිබෙන පෙනී යයි.

 

අගමැති  බොරිස් ජොන්සන් සහ ඩොනල්ඩ් ට්‍රම්ප් විසින් මුලින් ගන්නා  ලද වැරදි දේශපාලන තීරණ නිසා  නිසා නිදහස් ලෝකය ලෝක ජනතාව ඉදිරියේ අපවාදයට බඳුන් වී ඇත. ඒ වෙනුවට ඒකාධිපති ආණ්ඩු ප්‍රසාදයට පත්වී ඇත.

 

ඉහත පින්තූරයේ කියා ඇත්තේ මෙවැනි  දෙයකි.

ඩොනල්ඩ් ට්‍රම්ප් වැනි ඉබ්බෙකු උස කුළුණක් මුදුනට  ගොස් ඇත. ඔහු එතනට ගොස් ඇත්තේ කෙසේද කියා ඉබ්බා නොදනී. එතැන ඔහුට අයත් තැනක් නොවේ.  කුළුන මුදුනේ සිටියදී එතන සිට කල යුත්තේ කුමක්ද කියා ඔහු නොදනී. ඔහුව ඔසවා තබා ඇත්තේ ඔහුගේ සීමිත දැනුමෙන් යමක් කරන්නට හැකි තැනකට නොවේ. අපට පුදුම මොන මෝඩයෙක්  ඔහු එවැනි උස තැනක  තිබ්බාද කියාය. 

 

දැන් ඇමෙරිකා එක්සත් ජනපදය හොඳින් කරන්නේ කුමක්දැයි විමසා බලමු. සෞඛ්‍ය වෘත්තිකයන් විසින් මිලියන් තුනකට වැඩි ප්‍රමාණයක් පරික්ෂා (3,304,125) කර තිබේ. මුළු ආසාදිත සංඛ්‍යාව ලක්ෂ හතක පමණ වන  නිසා  වන නිසා මෙය හොඳ තත්වයකි.    එසේම ඇමෙරිකා  එක්සත් ජනපදය හෝ බ්‍රිතාන්‍යය, ශ්‍රී ලංකාව හෝ චීනය කරන අන්දමට ඇඳිරි නීතිය  දමා පාලනය කල හැකි රටවල්  නොවේ.  පෞද්ගලික නිදහස මහත් සේ අගයන එම නිදහස රැක  ගැනීමට ආයුධ ගැනීමට පසුබට නොවෙන ජනතාවක් හැසිරවීම අපහසු බව  ඩොනල්ඩ් ට්‍රම්ප් හොඳින් දනී.

එසේම ශ්‍රී ලංකාවේ ඇතැමුන් සිතන පරිදි මේ රටවල් දෙක ආර්ථිකය පසුබෑමකට ලක් වූවත් ඇද වැටී ඇතැයි සිතුවත් මේ අවපාතය දරා ගැනීමට ඔවුන් ශක්තිමත්ය.

නමුත් චීනයේ නිපදවන බොහෝ දේ මිලදී ගන්නේ යුරෝපය හා, ජපානය හා ඇමෙරිකා  එක්සත් ජනපදයයි. ඔවුන් එම භාණ්ඩ මිලදී ගැනීම ප්‍රතික්ෂේප කළහොත් චීනයට වන්නේ කුමක්ද?   

යුරෝපය හා මැද පෙරදිග රටවල් වල රැකියා කරන ශ්‍රී ලාංකිකයන් එවන මුදල ශ්‍රී ලංකාවේ දළ  ජාතික නිෂ්පාදනයෙන් 8-9% අතර ප්‍රමාණයකි. එනම් ඩොලර් බිලියන් 6 ත් 7ත් අතර ප්‍රමාණයකි.  ශ්‍රී ලංකාවේ වෙළඳ ශේෂය අඩු කිරීමට මේ මුදල භාවිතා වේ.  ඉදිරියේදී මේ මුදල අඩුවීමට නියමිතය. ඒ යුරෝපයේ හා මැද පෙරදිග ආර්ථික අවපාතයකට මුහුණ දීමට ඉඩ ඇති හෙයිනි. එසේම ශ්‍රී  ලංකාවේ අපනයන භාණ්ඩ  වැඩිපුරම මිලදී ගන්නේ ඇමෙරිකා එක්සත් ජනපදය හා යුරෝපයයි. ඔවුන්ද ඒ මිලදී ගැනීම් කපා හැරීමට ඉඩකඩ තිබේ.  ඒ නිසා මේ රටවල තත්වයට සිනා සෙමින් අපහාස උපහාස කරනු වෙනුවට ශ්‍රීලංකාවේ වැසියන් ආර්ථිකය බේරා ගැනීමේ ඊළඟ පියවර ගැන සැලකිලිමත් විය යුතුය. 

2018 WORLD HUNGER AND POVERTY FACTS AND STATISTICS

Trump and Fox News: the dangerous relationship shaping America's coronavirus response

 

 Trade deficit contracted in 2019 thanks to decline in import expenditure – CBSL

       

      

නාඳුනනා ඔබට

අපේ පුංචි ගෙවත්තේ 

චෙරි මල් නැවතත් පිපිලා 

පුංචි පුංචි 

මල් කිනිති ගහ පුරා

සොබා දහම නැහැ කවදත් 

නැවතුනේ ජීවය දෙන්නට

වෙන ඕනෑම දවසක 

මගේ හදවත සතුටෙන් පිරෙයි

 

ඒත් අද, ශුභ පාස්කු සිකුරාදා

හය දහසකුත් එක්ක තව සිය ගණනක්ම 

නාඳුනනා රැසක්, දිවි ලද්දවුන්ගේ 

ලෝකය  හැර ගොස්ය 

ආදරණීයයන්  අසලක නොයිඳම 

උපත  හා මරණය 

හැමට උරුමයි 

ජීවිතය යන 

නිමේෂය සමග 

මට කළ හැකි එකම දෙය 

මේ පුංචි චෙරි ගහේ  

බක් මහේ පිපුන සුදු මල් 

පුදන්නට නාඳුනනා ඔබට    

--Ajith

මිනිසුන් ස්ව කැමැත්තෙන් නිරෝධායනයට යොමු වෙනවද?

දැන් මගේ බ්ලොගයේ ගණනය කිරීම් වලට අනුව ශ්‍රී ලංකාවේ අද වන විට කොරෝනා රෝගීන් 220 ත් 400 අතර සිටිය යුතුය. නමුත් සොයා ගෙන ඇත්තේ 177කි. මා කිව්වේ අප්‍රේල් 8 වන විට 1700 ක් වනු ඇති කියාය.  (එක්කෝ රජය සඟවනවා විය යුතුය. නැතිනම් ආසාදිතයන් සැඟවී සිටිනවා විය යුතුය. )

 මා ලීවේ මෙසේය. //ප්‍රතිජනන  අගය R0 =1.5 ලෙස ගනිමු. ඒ කියන්නේ මේ සංඛ්‍යාවේ අවම අගයයි. එහිදී අප්‍රේල් 2 හා 4 අතර අගයන් වන්නේ 220 සිට 400 කි. අප්‍රියෙල් 8 වනවිට මුළු ආසාදිතයන් ගණන වන්නේ 1700 කි.  

//

මිනිසුන් (විශේෂයෙන් ඉතාලියෙන් පැමිණි අය ) නිරෝධායනයට එන්නේ නැත්තේ ඔවුන් රෝගය ගැන සැක කරන අය සමග එකට දමා තිබීමක් විය හැකි නිසා යයි වෙනෙකෙකු ගේ පෝස්ට් එකක සති දෙකකට කලින් ලීවෙමි. එම තැනැත්තියත් මිතුරනුත් (මා දන්නා අයෙකුත්) ඉතා නරක විධිහට සැරෙන් ප්‍රතිචාර දුනි. එනිසාම එම දෙදෙනා මිතුරු ලැයිස්තුවෙනුත් ඉවත් කලෙමි. මා ලීවේ වෙනතකින් ලැබුණු ආරංචියක් පමණි. මේවා සන්සුන්ව සංවාද කර විසඳා ගතයුතු දේ මිස ෆේස්බුක් මිම් දමමින් හෝ අවන්ඥාසහගත ලෙස පහර ගසින් විසඳිය යුතු ඒවා නොවේ.

දැන් මේ පින්තූරයෙන් පෙනෙන්නේ අසාදිත යැයි සැක කරන, නොකරන සියල්ල එකට දමා මදුරු දැල් වලින් පමණක් කවර් කර තිබෙන තැනකි. එනයින් බලන කල නිරෝගීව හිටි අයෙකුට පසුව රෝගය වැළඳී අවසන් ගමන් ගිය බවක් පෙනේ. එසේ නැත්නම් මේ පින්තුරය වටහා ගන්නේ කෙසේද? මට බැණ වැදුණු අය කීවේ එය එසේ නොවන බවයි. එසේ නම් ඒ බව රූපවාහිනී මගින් හෝ පෙන්වා දිය යුතුය.

දැන් පැහැදිලි වන්නේ මිනිසුන් බයට නොපැමිණ සැඟවී සිටින බවයි.

මේ නිරෝගිව හිටි ඉතාලියෙන් පැමිණි සහෝදරයා ට රෝගය සෑදී මිය ගියා නම් සුවය ලැබීයයි කියා නිවෙස් වලට පිටත් කල අයද නැවත රැගෙන විත් පරික්ෂා කලොත් නරකද? හේතුව නම් ඇතැම් ප්‍රභේදයක රෝග ලක්ෂණ මතු වෙන්නේ දින 14න් යයිද තවත් ප්‍රභේදයක දින 49 කින් යයිද කියති. වෙන වෙනම පොඩි කුටි වැනි දේ කර්ටන් වලින් හෝ හමුදා රෙදි වලින් සෑදිය හැකිය.

මගේ අදහස නම් මේ කියන 177 සංඛ්‍යාවට වඩා වැඩි හරියක් රෝගය වැළඳී නිහඬව සිටින බවයි. ඉතාලියෙන් පමණක් නොව, ඉන්දියාවේ සිට පැමිණි අයද ඇමෙරිකා එක්සත් ජනපදයේ සිට පැමිණි අයද මේ සංඛ්‍යාව තුල තවමත් නිදැල්ලේ සිටිති.

මේ භය කරන්නට ලියන් දෙයක් නොවේ. ඔලුවෙන් කල්පනා කර බලා කටයුතු කරන අවස්ථාවකි මෙය. . සන්සුන් සංවාදයකට විවෘතය. විශේෂයෙන් මගේ මිතුරු වෛද්‍යවරුන් ගේ අදහස් ද අගයමි.

ෆේස්බුක් එකේ අපේ යාළුවන්ද කතා කරන්නේ මරා ගන්නට මෙනි. කල යුතුව තිබෙන්නේ බැණ වැදීම , ෆේස්බුක් විරුවන්ගේ මීම් හැදීම නොව කරුණාවන්තව ඉවසීමෙන් කරුණු පහදා දී මේ අයව රෝහල් වලට ගෙන යාමය . එසේ එන්නේ නැතිනම් නිත්‍යානුකුලව අත් අඩංගුවට ගැනීමය. ෆේස්බුක් එකෙන් බැන්නා කියා මුකුත් වෙන්නේ නැත. ඉන් වෙන්නේ ඔවුන් තවත් සැඟවී සිටීම පමණි.

මේ මගේ බ්ලොගයට කලින් ලැබුණු ප්‍රතිචාරයකි. ඒ අනුව බ්‍රිතාන්‍යයේ මෙන් රෝගය වැළඳුනා යයි සැක කරන අය රෝහල් වලින් භාර ගන්නේ නැති බවක් පෙනී යන්නේ නැතිද? 

/අද මම ගියා කොරෝනා රෝගීන් ඇතුලත් කරගන්න ආන්ඩුවේ ඉස්පිරිතාලෙකට . දවස් හතරක් උන සහ කැස්ස. මම කිව්වා කොරෝනා ටෙස්ට් එක කරගන්න ආවේ කියලා. OPD දොස්තර මහත්තයා මගේ විස්තර අහලා " මේකයි' ඔයා high risk කැටගරියක නෑ. අපි ලේ බලමු කියලා Full blood count එකක් කලා. ඒක බලලා සාමාන්‍ය වෛරස් එකක් වගේ කියලා බේත් දුන්නා. හොඳ උනේ නැත්නම් ආයේ එන්නලු.මට තියෙන මානසික පීඩනය ගැන අමුතුවෙන් කියන්න ඕන ද ? ඇයි මාව ටෙස්ට් නොකලේ ? සීමිත පහසුකම් නිසාවත් ද ?

//

මේ ඇත්තේ සති  තුනකට කලින් ඉතාලියෙන් පැමිණි අය නිරෝධායනයට නොපැමිණීම ගැන  මම ෆේස්බුක් හි දැමූ කොමෙන්ටුවකි.

//ඇත්තටම මේ දකුණු කොරියාවේ , ඉතාලියේ ඉන්න අයට  ඔලුව හොඳ නැත්ද ලංකාවට යන්නේ ආපහු. එකක් ලංකාවේ ඉන්න ඒ මිනිස්සුන්ට ලෙඩේ  හැදෙනවා. එදා වේල හොයා ගන්න වැඩ කරන මිනිහෙකුට කොච්චර  අමාරු වෙනවද  එක  එක ආයතන වහන්න ගත්තම? ඒ මිනිස්සු සල්ලි හොයා ගන්නේ කොහොමද? ඔයාල  ඉඳල යයි අපහු ඉතාලියට , කොරියාවට, අර මිනිසුන්ගේ නේ ජොබ් නැති වෙන්නේ , මැරෙන්නේ .  අනික තමන්ගේම පවුල් වලට අයට වුනත් හැදෙයි නේද? හුඟක් මිනිස්සු ආත්මාර්ථකාමීයි. හැමෝම තමන්ගේ ජිවිතයට ආදරෙයි නේ. ඔය ඉන්න තැනකට වෙලා ගෙදර දොර හරි ඉන්න  කාමරේ හරි වහගෙන ඉන්නවාල. ඉතාලියේ නම් ගෙදරටම කෑම බඩු ත් ගෙනත් දෙනවලු අසනීප නම්.  //

දැන් එදා වේල සොයා ගන්නට බැරිව බඩගින්නේ මැරෙන අය ගැන සිතිය යුතු වන්නේ ඇඳිරි නීතිය  දින නියමයක් නැතිව දමා ඇති නිසාය. 

ශ්‍රී ලංකාවේ කොරෝනා වයිරස් COVID -19 තත්වය - 2

හිරු එළියෙන් වයිරසය නැති වෙනවද?

ශ්‍රී ලංකාවේ කොරෝනාවයිරස් තත්වය

.

 චීනය මුඛ ආවරණ පැළඳීම අනිවාර්ය කළේ ඇයි (කොරෝනා වෛරසය පැතිරී කාලය තුල)

සැබෑ ප්‍රශ්නය හකීම් නොවේ COVIDIOT කෝවිඩියට් වරුනි , මේ වෙලාවේ ජීවිතය රැක ගැනීමයි

 

මම දිගින් දිගටම කොරෝනා වයිරසය පැතිරීම ගැන දත්ත ඇසුරින් විශ්ලේෂණය කලද මා නොබැලූ පැත්තක් ගැන නොයෙක් ප්‍රතිචාර බ්ලොගයට ලැබුණි.  ඒවායින් ප්‍රතිචාර දෙකක් මෙහි පල කරමි.

ප්‍රතිචාරය 1- //මහත්තයා අපි දැන් දවස් ගානක් ඉදං කුසට හරියට කෑමක් ගත්තේ නැහැ. ඇඳිරි නිතිය නිසා එලියට යන්නත් බැහැ. වෙළෙන්දෙක් එළවලු අරන් ආවා. ඒ උනාට අතේ සල්ලි නැති නිසා ගන්න උනෙත් නැහැ. ඒවායේ මිලත් වැඩියි. නන්දසේන ජනාධිපතිතුමා අපිව හාමතේ මරන්නවත්ද සර් යන්නේ. ආණ්ඩුවෙන් දීලා තියෙන නොම්බර වැඩ කරන්නේ නැහැ. ඇල් වතුර බෝතලයක් පුරවාගෙන ඒක බිබී තමයි ඉන්නේ දැන් දවල් ඉදං. 6 වෙනිදලු ඇඳිරි නිතිය අයින් කරන්නේ.//

මගේ පිළිතුර:

මහත්මයා , මම ජනතා විමුක්ති පෙරමුණේ රතු තරුව, හා අලුත් පියාපත් යන සංවිධාන දෙකටත් පෙරටුගාමී සමාජවාදී පක්ෂයේ සහෝදර පියාපත් එකටත් කැමති මේ නිසයි. අන්තර් විශ්ව විද්‍යාල ශිෂ්‍ය බල මණ්ඩලයත්, තෙවරප්පෙරුම මන්ත්‍රීවරයාත්  ආධාර බෙදනවලු. අනිත් දේශපාලන පක්ෂත් තම තමන් ගේ තරුණ පෙරමුණු හරහා එක්වී වැඩකළ යුතුයි. මෙය හැම මිනිහෙකුගේම ප්‍රශ්නයක්, ජාතික ආපදාවක්. පොහොට්ටුවේ  සහ එජාපයේ තරුණ පෙරමුණු නැත්ද? 

මේ එක විධිහක් උදව් කරන්න.

අනික තමා ආණ්ඩුවෙන් හැමෝටම සහනාධාර මුදලක් දෙන එක (දැන් දෙනව කියල කියනව) 

ඊළඟ එක අර නන්දන විරරතන සහෝ ලිව්ව විධිහට සමූපකාර ක්‍රමයක් හරහා ආධාර බෙදන එක. යටත් විජිතආණ්ඩුව මැලේරියා වසංගත  කාලයේ කරපු එක.  හමුදාව ඒවාට යොදවන එක . මානුෂීය හමුදාව කියලනේ කියන්නේ. ඒක කරන්න පුළුවන් දෙයක් නේ.

මම පෞද්ගලිකවම නම් සපෝර්ට් ලොක්‌ ඩවුන් කරනවට , ඇඳිරි නීතියට නෙමේ. මෙය පැතිරීම  පාලනය කරගෙනම  වැඩට යන්න දීම.

 සමහර ආහාර කඩ හැර තැබීම. 

ගොවිතැන් වගේ මිනිසුන් ගැවසෙන්න අවශ්‍ය නනැති  රැකියා  වලට ඉඩ දීම. (මිනිසුන් එක් රැස්  නොවන තැන් වල )

මෙවැනි  යෝජනා ටිකක් හදල හැමෝම සමාජ ජාල වල ප්‍රචලිත කරලා බල කරන්න බැරිද

ප්‍රතිචාරය 2- 

24 වෙනිදා සිට අපට දිගටම ඇඳිරි නීතිය. මහරගම පමුණුව පාරට මෙතෙක් කිසිම බලකායක සැපයුම් රියක් ආවේ නැත. පරිප්පු දෙසීයට, පොල්තෙල් බෝතලය 400/ට ගන්නටය වෙලා තියෙන්නේ. ඒකටත් ඇඳිරි නීතිය නොතකා යන්න වෙයි. 

ජනාධිපති මාධ්‍ය ඒකකයේ නොම්මර හමුවී අපේ ගැටලුව කියන්නට ගිය විට වුනු දේ එහි ප්‍රධානී සුගීශ්වර බණ්ඩාර මහතාගේ fb එකට කමෙන්ට් එකක් විදිහට දැම්මේ වෙන කල යුතු දෙයක් නැතිම තැනයි. (ඒ පෝස්ටුවේය ඒකකය පැය 24ම් වැඩය කියලා අංකත් දමා තිබුනේ, මාර්තු 30 රාත්‍රී 10.47 ට)

මේකය මා යැව්වේ.

‘Nimal Diaanayake ආයුබෝවන්. මම නිමල් දිසානායක. ඉන්නේ මහරගම පමුණුව පාරේ. මෙතෙක් කාර්ය සාධක බලකාය හා එක්ව එවනවා කී කිසිම සැපයුම් රියක් තියා අත් කරත්තයක්වත් තවම මෙහාට ආවේ නැහැ. පුද්ගලික ලොරියක් විතරයි ආවේ, පොල් හා බිත්තර අරගෙන. ඇඳිරි නීතිය නොතකා පාරේ යන වාහන, පුද්ගලයන් අනුගමනය කරන්නද අපට වෙන්නේ? මේ තත්ත්වය ගැන කියන්න 0112 354 354 ට කතා කළා. මහත්මයෙක් මගේ කතාව 0114 055 927 ට කියන්නැයි කීවා. කිව්වාම 0112 860 003 ට කතා කරන්නට උපදෙස් දුන්නා. එතැනින් කීවේ සතොස- 0112 436 301 හෝ කෝප් සිටි-0773 689 460 ට කතා කරන්න. සතොස සතොසේ ටෙලිෆෝනය උස්සන්නේ නැහැ. කෝප් සිටියෙන් අංගනාවක් කිව්වා 0112 354 354 ට අරන් මහජන සම්බන්ධතා අංශයට කියන්න කියලා. වටම ගිහින් ගෙටම ඇවිත්..., දැන් ඒ නොම්මරේ ගත්තාමත් ටෙලිෆෝනය උස්සන්නේ නැහැ. කරුණාකර කියන්නකෝ, තව කාටද කිව යුතු කියලා.’

තවම උත්තර නැත. 

තුන්වෙනි ප්‍රශ්නය: වැඩිහිටි ජනතාව  තම ගමට  හෝ වෙනත් තමන්ට ආරක්ෂාකාරී තැන්වලට ගොසිනි. ඔවුන්ගේ විශ්‍රාම වැටුප ගන්නට ඒ තැන්වල සිට එන්නට බැරිය. ඒ නිසා නිවසේ කවුරුන් හෝ එවූ විට තැපැල් කාර්යාල මුදල් නොදෙති. ඔවුන් කියන්නේ මුලින් ප්‍රාදේශීය  කාර්යාලයට යන ලෙසය. එයින් ලියුමක් රැගෙන ඉන් ADO හෝ මොකක්දෝ එකකට කියා එතැන ලේකම් ගෙන් ලියුමට අවසරය  රැගෙන පැමිණිය යුතුය.  ඉන්පසු තැපැල් කාර්යාලය මුදල් දෙනු ඇත. වංචා කිරීම  වැළැක්වීමට මෙය කරන්නේ යයි සිතාමු. රියදුරු බලපත්‍රය හා විශාමික තැනැත්තාගේ වෙනත් උපන් දින සහතිකය වැනි දෙයක් තබාගෙන මුදල් දෙන්නට බැරිද?

කොපමන අප බ්‍රිතාන්‍යට බැන්නත් ඔවුන් ඒ සහනාධාර ගෙවීම  පිළිවෙලකට කරති. විශාමික මුදල් ගෙවන්නේ බැංකුවටය, ඉන් ඕනෑම වෙලාවක මුදල් ගත හැකිය. තැපැල් කාර්යාලයෙන්ද එවන් අයෙකු අදාල අයගේ ලිපියක් හා හැඳුනුම්  පතක් රැගෙන්පැමිණ ගත හැකිය. ඉහත කී අතේ මුදල් නැති  මේ මිනිසුන් ජිවත් වන්නේ කොහොමද?

ලොක්ඩවුන් කිරීම  මේ අවස්ථාවේ හොඳ යයි කියන්නේ මේ නිසාය. හමුදාව හා පොලිසිය යොදවා රෝගය පැතිරීම වැඩි ස්ථාන පමණක් වසා තැබිය හැකිය. එසේ නැත්නම් මෙසේ අසරණ වී සිටින මින්සුන්ට උපකාර කිරීමට වෙනත් ක්‍රම වේදයක් සැලසිය යුතුය.

පරික්ෂා කර කොරෝනා වැළඳී සුව වූ හෝ නැති අයට පොලිස් සහතිකයක් නිකුත් කල නැවත රැකියාකිරීමට  ඉඩ සැලසිය යුතුය.

නිවෙස් වල සිට ස්වයං රැකියා කරන අයට ඒ සඳහා අවකාශය සහ සහයෝගය  දිය  යුතුය. 

රටේ විපක්ෂ නායකය සැඟවී  සිටින්නේ කොහේද ? මේ ඔහුගේ කාර්යභාරයයි. මොන දේශපාලන පක්ෂයක හෝ වේවා මේ මිනිසුන් මුහුණ දෙන ප්‍රශ්න  ගැන රජයට දැනුම් දී සාකච්ඡා කිරීම  ඔහුගේ යුතුකමක් පමණක් නොව රාජකාරියයි. 

හකීම් ගැන - මම ඔහුගේ ප්‍රකාශය සලකන්නේ හෙලිකොප්ටරයෙන්   පිරිත් පැන් වතුර ඉහීම , කුරුසය රැගෙන පියාසර කිරීම ආදිය ගනනටමය. හකීම් ට තිබුනේ දේශපාලන  ලකුණු රැස් කිරීම වෙනුවට විපක්ෂ නායකවරයා හරහා ඒ ගැන රජය සමග හීන්  සීරුවේ සාකච්ඡා කරන්නටය. ගින්නට හුළං ගැසීම නොවේ.   ඉදිරියේදී පාංශ කූලය දීම පිළිබඳවද ප්‍රශ්න ඇතිවිය හැකිය. විපක්ෂ නායක කෝ? 

-කොළඹ ගමයා 

වෙනත්  කොරෝනා ලිපි :

ශ්‍රී ලංකාවේ කොරෝනා වයිරස් COVID -19 තත්වය - 2

හිරු එළියෙන් වයිරසය නැති වෙනවද?

ශ්‍රී ලංකාවේ කොරෝනාවයිරස් තත්වය

.

 චීනය මුඛ ආවරණ පැළඳීම අනිවාර්ය කළේ ඇයි (කොරෝනා වෛරසය පැතිරී කාලය තුල)

පින්තූරය 

ශ්‍රී ලංකාවේ කොරෝනා වයිරස් COVID -19 තත්වය - 2

ඔබ මේ සංඛ්‍යා බලා කලබල වෙන හෝ ආවේගී වන අයෙකු නම් මෙය කියවීම නොකළ යුතුය.

මගේ මුල් ලිපිය බ්ලොගයෙන්  බලන්න. ශ්‍රී ලංකාවේ කොරෝනාවයිරස් තත්වය

එම මුල් ලිපියේ  මා සඳහන් කළ අගයන් මේවාය .

//මේ නිසා ශ්‍රී ලංකාවේ එකවරම රෝගීන් වැඩිවීමේ අවදානමක් ඇත්තේ අප්‍රේල් 2 හා 4 අතරය. එනම් බොහෝ විට රෝගීන් සංඛ්‍යාව  1126 සිට 4198 දක්වා වැඩිවිය  හැකිය.

මේ ගණනට  එනවිට හතළිහක පමණ පිරිසකට එය මාරාන්තික විය හැකිය.මතක තබාගන්න මේවා ගණිතමය වශයෙන් එන සංඛ්‍යා මිස රටේ ඇඳිරි නිතිය පැවතීම වැනි සාධක සලකා බලා කරන පුරෝකථන  නොවේ.ඒ කියන්නේ ශ්‍රී ලංකාව හා එහි වැසියන් ගන්නා ක්‍රියා මාර්ග මත වාසනාවන්ත ලෙස එසේ සිදු නොවීමට ඉඩකඩ තිබේ. 

බ්‍රිතාන්‍ය හෝ ඉතාලිය වැනි රටවල මෙන්  වසංගත තත්වය ගැන  නොසලකා හිටියොත් අවුරුදු සමය වනවිට මේ  රෝගීන් සංඛ්‍යාව අටදහස දක්වා වැඩිවිය හැකිය.  මරණ සංඛ්‍යාවද සීයත් දෙසීයත් අතර වනු ඇත.

.//

ශ්‍රී ලංකාවේ රජයේත් , සෞඛ්‍ය  සේවාවන්ගේ ත් ජනතාව විසින් covid-19 සම්බන්ධ නීති රීති පිලි පැදීමත් නිසා මේ අගය අඩුවී ඇති බව පැහැදිලිවම පෙනේ. 

එම නිසා නැවත ගණනය කිරීමක් කරන ලදී. මේ අනුව අප්‍රියෙල් 2 හා 4 අතර  ආසාදිතයන් ගේ ගණන 275 (1126 වෙනුවට )  සහ 620 අතර වනු ඇත (ඇඳිරි නිතිය නොසලකා හැර ගණනය කර ඇත).,  ප්‍රතිජනන  අගය 2.2 ලෙස ගණනය කල හෙයින්  මෙය සාධනීය අගයකි.  නමුත් මේ අගයන් අනුව පුරෝකථනය කළහොත් නැවතත් අප්‍රේල් 8 වනවිටආසාදිතයන් ගණන  හය දහසක් දක්වා වැඩිවේ. අප්‍රේල් 15 වනවිට එය ඉතා ඉහල අගයක් ගනී. ඒ ගණන මම නොලියමි. එයට හේතුව ඇඳිරි නීතිය  හා වෙනත් ක්‍රියා  මාර්ගද සමාජීය පරතරය තබා ගැනීම වැනි ක්‍රියා මාර්ගද ශ්‍රී ලංකාව විසින් අනුගමනය කරන බැවිනි. එසේම  එවැනි ගණනක් ගැන මට සිතීමටද  නොහැකිය. ඒ  එය ලක්ෂ හයකට ආසන්න වීමය. පැතිරීමට බලපාන සියලු කරුණු සලකා බැලුවහොත් එවැනි ආසාදිතයන් ගණනක් ඇති වීමට සම්භාවතාවක් නැත.  

දැන් අපි ප්‍රතිජනන  අගය R0 =1.5 ලෙස ගනිමු. ඒ කියන්නේ මේ සංඛ්‍යාවේ අවම අගයයි. එහිදී අප්‍රේල් 2 හා 4 අතර අගයන් වන්නේ 220 සිට 400 කි. අප්‍රියෙල් 8 වනවිට මුළු ආසාදිතයන් ගණන වන්නේ 1700 කි.   මා මුල් ලිපියෙන් කීවේ  අවුරුදු සමය වනවිට රෝගින් ගණන අටදහසකින් වැඩි වෙතියි කියාය.මේ ගණනයට අනුවද එය එසේමය. එනිසා අප්‍රේල් 15 වනවිට මුළු ආසාදිතයන් ගණන වනුයේ 27000 කි.

 

මේ අප්‍රියෙල් 15 දක්වා ගණනය කළහොත්  ලැබෙන අංක  දෙක අතර ඇත්තේ (ප්‍රතිජනන අගය 2.2 ලෙස ගෙන හා එම අගය 1.5 ලෙස ගෙන ) අති විශාල වෙනසකි. 

එනිසා  මම  ලංකාවේ තත්වය ජර්මනියට සමාන කලෙමි. එයට හේතුව  ශ්‍රී ලංකාවේ මෙන් ජර්මනියේ  ද සෑම  රෝගියෙකුම  පරීක්ෂණයට ලක් කරන අතර ඒ හැම අයෙකුම  වෙන් කර ප්‍රතිකාර කරනු ලැබේ. 

ආසාදිතයන් හා මරණ අඩුවීමට මෙය ප්‍රධානම සාධකයක් බව පෙනේ.

ජර්මනියේ මෙන් ශ්‍රී ලංකාවේද වෙනත් නගර වලට යාමට අවසර නොමැත. ප්‍රශ්නය වන්නේ ශ්‍රී ලංකාව තවම ඇත්තේ මෙම වසංගතයේ මූලික අවධියේ වීමයි. එනිසා මේ සංඛ්‍යා සැබවින්ම එලෙස වීමේ සම්භාවිතාව වන්නේ අඩු අගයකි.

ජර්මනියේ  ආසාදිතයන්  ගණන   100 සිට මුල් දින දහයට 1296 දක්වා වැඩිවීමක්ද ඊළඟ දින 10 තුල 18,323 දක්වා වැඩිවීමක්ද තිබුණි. ඊළඟ  එළඹෙන දින 11 තුල එය71,000 දක්වා වැඩිවුණි.

ශ්‍රී ලංකාවේ 31 දා වනවිට ආසාදිතයන්  ගණන 143 කි. ප්‍රතිජනන  අගය 2.2 නම් ඊළඟ  දින දහයේදී  (අප්‍රේල් 10) එය 21,000 දක්වා වැඩිවේ. ප්‍රතිජනන අගය 1.5 නම් එය 1210 කි. එනම් ජර්මනියේ සංඛ්‍යාවට සමානය. ඊළඟ දින දහයේදී එනම් අප්‍රේල් 20 වනවිට ප්‍රතිජනන අගය 2.2 නම් අසම්භාව්‍ය ලෙස වැඩිවෙන අගයක් ලැබේ (මුළු ශ්‍රී ලංකාවේම ජනගහනය). එය විය හැක්කක් නොවේ.  එහෙත් ප්‍රතිජනන  අගය   1.5 නම්     මේ ගණන ලක්ෂ දෙකකට සීමා  වේ. නමුත් ඔබ බැලිය යුත්තේ ජර්මනිය දෙසය. දින විස්සේදී ජර්මනියේ එම ආසාදිතයන් ප්‍රමාණය  හැත්තෑදහසක් පමණ වේ.  ශ්‍රී ලංකාවේ එය අසූදහසත් අනූ දහසත් අතර අගයක් වනු ඇත. ජර්මනියේ මේ ආසාදිතයන් ගණනට සාපේක්ෂව  මියගිය ප්‍රමාණය  682 කි. මේ අනුව ප්‍රතිජනන  අගය 1.5ටත් වඩා අඩු අගයකි. පහත සඳහන් ඉම්පීරියල් කොලේජ් වාර්තාවෙන් කියවෙන්නේ යයි. එනම් ප්‍රතිජනන අගය, රටක් ගන්නා ක්‍රියා මාර්ග අනුව අවම  අගය වන 1.5 ටත් වඩා අඩුවිය හැකිය.

ශ්‍රී ලංකාවේ ආසාදිතයන් ප්‍රමාණයද අප්‍රේල් 20 වනවිට ජර්මනියේ  දැනට ඇති ප්‍රමාණය ට වඩා දාහක හෝ දෙදාහකට  වැඩි අගයක් ගනු ඇතැයි සිතිය හැකිය.

(එංගලන්තයේ දැනට කිසිම ලෙඩ රෝගයක් කලින් නොතිබූ වයස 19 සිට 45 දක්වා වූ රෝගීන් 13ක් මිය ගොස් ඇත, එක අයෙක් මා හඳුනන අයෙකි.) 

මගේ යෝජනාව  නම් ශ්‍රී ලංකාව ඉන්දියාවට, මාල  දිවයින සහ බංගලා දේශයට දොර වැසිය  යුතු බවයි.  (සංචාරකයන්ට) දෙවන රැල්ල එන්නේ ඒ පැති වලිනි. ශ්‍රී ලංකා නාවික  හමුදාවේ සයුර යාත්‍රාව ආසාදිතයන්ට ප්‍රතිකාර කිරීම  සඳහා යොදා ගත හැකිය. බණ්ඩාරනායක සම්මන්ත්‍රණ ශාලාව ආදිය ඉක්මනින් ඇඳන් යොදා පිළියෙළ කළ හැකිය. එසේ නොමැති  නම් පන්සල් සහ පල්ලි වල ඇති ශාලා රජයට පවරා ගත යුතුය.   

මේ දේශපාලන භේද , ආගම්  භේද නොතකා එක්වියයුතු අවස්ථාවකි.  

එසේම මේ තත්වයට එන්නට නොදී නිවසේ සිටිමින් වෛරසය පැතිරීම  වලකා ගත්තොත් මේ කිසිවක් සිදු කිරීමේ අවශ්‍යතාවයක් එළඹෙන්නේ ද නැත.

මේ ලිපිය සකස් කිරීමේදී  මුලික  ලිපි දෙකක් උපයෝගී කර ගතිමි. ඉන් එකක් බේසියන් මොඩලය යොදාගත්  ලන්ඩන් ඉම්පීරියල් කොල්ජ් වාර්තාවකි.  මේ ලිපි දෙකම මෙහි තිබේ.

Report 13: ­­Estimating the number of infections and the impact of non-pharmaceutical interventions on COVID-19 in 11 European countries

How Scientists Quantify the Intensity of an Outbreak Like COVID-19

ලෝකයේ වාර්තා 

-කොළඹ ගමයා 

      

   

පූසි ද හදිස්සියේ කතා කලාය

පූස් දුව 

මම නිහඬව කොම්පියුටරය දෙස නෙත යොමාගෙන සිටියෙමි.  නිවසේ සිට වැඩ කරන්නට පටන් ගෙන දැන් දින තුන හතරකි. එක අතකට මෙය හොඳ අපේ  බොසාටමය. ඔෆිසියේදී මෙන් නොව මං දැන් ටිකක් වැඩිපුර වෙන්න වැඩ කරමි.  කෑම බීම මේසය ළඟටම  ලැබේ. දූලා දෙන්නාගේ පාසල් වහලාය.  දෙන්නාම මොබයිල් වල මුහුණ රුවාන ඉන්නවාට මම කිසිත් කියන්නේ නැති බව දනිති.  හැමෝම සතුටිනි.

හදිසියෙම කවුදෝ කතා කරන හඬක් ඇසුණේය. මම වට පිට බැලීමි. දුවල දෙන්නාද අහලක නැත.  උදේට ස්කයිප් එකේ උගන්වා අවසන් කරන බිරින්දෑ නිවී හැනහිල්ලේ රූපවාහිනිය නරඹන්නීය.

"මේ , මේ මම කතා කළේ ඩැඩී  " නැවතත් කොඳුරන හඬක්  ඇසේ.

දුවල දෙන්නා ගාඩ්න් එකේ දැයි බැලීමි නැත . අහලක වත් නැත.

"ඩැඩී මේ බිම බිම, මං කිකී ඔයාගේ පූස් දුව "

"මොකාක්" කලබල වූ මම වේගයෙන් පැමිණි කොරෝනා වයිරසයක්  වැදුනාක් මෙන් පුටුවෙන්  ඇද වැටුනෙමි. ඇදවුනු කට වමතින් හරි ගස්සා ගත් මම  බිම වැතිරී සිටි කිකී, අපේ පූසා දෙස බැලීමි.

"මට හරි සතුටුයි. " පූසි කීවාය.

මම මෝෆින් වැනි කිසිදු  දෙයක් නොගන්නා  නිසා බිරිඳ අන්තිමට හදා දුන් තේ කෝප්පයේ මොනවහරි බෙහතක් දැම්මා දැයි පුසුඹ අල්ලා බැලීමි. කිරි මිශ්‍ර තේ සුවඳ  පමණය.

"ඔයා මොකද බය වෙලා වගේ ඩැඩී, අද මට මමී චීස් කෑලිත් දුන්නා .ඔයා උදේ දුන්න හැම් කෑලි වලට පස්සේ. පූස් කෑම කාලම එපා වෙලා හිටියේ. හරි සතුටුයි." පූසි කියාගෙන ගියාය.

කතා කරන්නේ පූසි දැයි හරියටම නිශ්චිත කර ගැනීමට වැරෙන් හිසට ටොක්කක් ඇණ ගතිමි. හදිසියේම මට මතක් වුනේ උදේ කෑම ගනිද්දී  පූසිට හැම් කෑලි ටිකක් විසික් කළ බවය. කොරෝනා වසංගතයට කල් තබා ගන්නට ගෙනා ඒවා යේ දින ඉකුත් වෙන්නේ අද නිසා ඒවා ඉවර කල යුතුය. එනිසා කිකී සමග බෙදා ගතිමි.

"කොහොමද බොල මමී , ඩැඩී වුනේ.උඹේ අම්මයි තාත්තායි අල්ලපු ගෙදර නේ හිටියේ"

පූසි පුංචි කාලේ අපි බාර ගත්තේ අල්ලපු ගෙදර ලොකු පූසි හදිසියේ බිහි කළ පැටව් රොත්තෙනි.

"එහෙම කතා කරන්න එපා ඩැඩී, දැන් ඔයයි ඉනෙස් මමීයි  නේ මාව හදා ගත්තේ. හදා  ගත්ත දෙමාපියෝ තමයි මගේ අම්මයි තාත්තයි. මට සතුටු මොකද දන්නවද ? ඔයාල ඔක්කොමල  දැන් ඉන්නේ ගෙදර, මමී මාව හුරතල් කරනවත් වැඩියි. ඔයා මට  පූස් කෑම වෙනුවට වෙන කෑමත් දෙනවා. අඹ දුන්න ඊයෙ . පෙරේදා ගස්ලබු දුන්න. අද හැම්. "

ඇත්තටම මේ පිස්සු පූසි මම අඹ කෑල්ලක් කනවා ඇස් ලොකු කර බලා සිටි නිසා මම පොඩි අඹ කෑලි කිහිපයක් දුනිමි. ඇය ඒවා කෑවාය. පෙරේදා ගස්ලබු කෑවාය.
පූසන් පලතුරු කන බවක් මා දැන  සිටියේ නැත.

"පූසන් කොරෝනා වයිරසේ ගැන දැනගෙන ඇති. විටමින් සී තියෙන ඒවා කන්න කියල පූස් සෞඛ්‍ය සංවිධානෙන් කියන්න ඇති. "  පොඩි දුව බැරෑරුම් ලෙස කීවාය.

"දැන් බලන්න මගේ අක්කිලා දෙන්නම ගෙදර. වෙනද වගේ මාව කාමරෙන් එලවන්නෙත් නෑ. හෙට අනිද්දට පූස් කෑමත් දෙන්න පටන් ගනී "
පූසි හෙන ජොලියෙන් කීවාය.

"ඒකනම් මේ කපේට වෙන්නේ නැහැ. එයාලගේ මමී  තමයි වදෙන් පොරෙන් කෑම ටික බෙදල දෙන්නේ. නැත්නම් අර ක්‍රිස්ප් පැකට් නුයි පැණි රැළි යි කකා ඉඳී දවස පුරාම. අනික ඔහේගේ අක්කිලා උනේ කොහොමද?"

"මේ මේ මගෙත් මමී තමයි. ඔයා ඩැඩී නම් එයාලා අක්කිලා තමයි. හුහ්  " පූසි උරණවූ ලෙසින් කීවාය.

"හරි හරි ඒක අමතක වුනා. මේ කොරෝනා කෙහෙල් මලක් නිසා වෙච්ච දෙයක් අම්මපා හැබෑට, වැඩට යන්න  නෑ. පූසියෝ කතා කරනවා. හෙලිකොට්ටරෙන් පිරිත් පැන් ඉහිනවා. කුරුසේ වටේ ගෙනියනවා. පල්ලි වලින් සෙරෙප්පු දාල දුවනව. කවදා කෙළවරක් වෙයිද? " මම නුරුස්නා ලෙසින් කීවෙමි.

"එහෙම කියන්න එපා. කොරෝනා නිසා තමා ඔයාලා ගෙදර ඉන්නේ. මට හොඳ කෑම ලැබෙන්නේ. ඔක්කොමලා මාව හුරතල් කරන්නේ. මම කොරෝනට ආදරෙයි." පූසි කීවේ හෙන සැහැල්ලුවෙනි.

"ආ මෙන්න නිව්ස් එකක්. " හදිසියේ ස්කයි නිව්ස් එකෙන් පුවතක් දුටුවෙමි.

"මොකද්ද මොකද්ද " පූසි උඩ පැන්නාය.

"ගෙදර ඇත්තියෙක් ගෙන් එයාගේ පෙට් පූස් ට කොරෝනා බෝවෙලා."

"බුදාම්මෝ " කෑ ගැසූ පූසි ඇරී තිබුන දොරින් පැන දිව්වාය .

හොඳින් පුටුවේ ඇලවී නිදා සිටි මා  උඩගොස් ඇහැරුණේ මයික්‍රොසොෆ්ට් ප්‍රොජෙක්ට් ටීම් හරහා එන බොසාගේ කෝල් එකෙනි.
හොඳ වෙලාවට නින්ද ගිහින් තිබුණේ හෙඩ්ෆෝන් එක කනේ රුවාගෙනය.

    -කොළඹ ගමයා

හිරු එළියෙන් වයිරසය නැති වෙනවද?

මේ කතාව ප්‍රචලිත වෙන්නේ සීත රටවල පැතිරෙන නිසා වෙන්න ඕනේ.
මේ කාලෙට ප්‍රතිශක්තිය කොහොමත් අඩුයි.

හැබැයි ඕකේ ඇත්ත  මේකයි කියල මම හිතන්නේ .මම සෝවියට් දේශයේ ජිවත් වුන නිසාත් පසුව බ්‍රිතාන්‍යයේ ජිවත් වන නිසාත් ජර්මනියට නිතර යන නිසාත් දැන  ගත්ත දෙයක්. දැන් මොස්කව් වල වැඩියෙන්ම බැක්ටීරියා, වයිරස් උණ  පැතිරෙන්නේ  ශීත  කාලය අවසන් වනකොට නැත්නම් ශිත සමය  අවසන් වෙමින් වසන්තය ට එනකොට. ඒ කියන්නේ අධික ශීතලට (මේක නිකන් මවා  ගන්න)බෝල වගේ ගුලිවෙලා ඉන්න වයිරස් එලියට එනවා යන්තම් උණුසුම් වෙනකොට.  (අපට කියලා දුන්නේ එහෙම පළමුවෙනි අවුරුද්දේ ගුරුතුමියක්) එතකොට ඒ කාලෙට වැඩියෙන් පැතිරෙනවා. ගිම්හානය වෙනකොට මිනිසුන්ට  සනීපයි. ප්‍රතිෂක්තියත් ඇවිල්ලා. එනිසා වයිරස් එක තිබ්බ කියල හැදෙන්නේ නැහැ. ඒ කාලෙට මිනිස්සු පලතුරු කනවත් වැඩයි. ව්‍යායාම කරනවත් වැඩියි.
  එනිසා  ජර්මනිය සහ ස්වීඩනය වගේ රටවල් පැත්තට  යනකොට දැඩි ශීත කාලයේ මේ වයිරස් සහ බැක්ටීරියා අඩුයි.

මම සෝවියට් දේශයේ ඉන්න කාලේ වඩා හොඳට උණුසුමට  ඇඳගෙන එලියට යන්න කිවේ හිම දියවෙන කාලේ (ටීචර්ස් ලා ). ඒ කාලෙට තමා ලෙඩ වැඩි. හෙම්බිරිස්ස කාරයොත් වැඩියි.

දැන් රුසියාවේ තවම පැතිරෙනවා අඩුයි මේ වයිරසය . ඒත් ඇයි පූටින් ලෑස්ති වෙන්නේ  ලොකු රෝහලක් හදාගෙන ? තව  ඉස්සරහට රස්නේ එද්දී.

උදාහරණයකට ගත්තොත් එංගලන්තයේ වයිරස් සහ බැක්ටීරියා ජාති 80 විතර තියනවලු. ඒකට හේතුව මෙහෙ ශීත සමය  දරුණු නැති නිසා.  එනිසා මෙහෙ මිනිසුන්ට සාමාන්‍යයක් වශයෙන් හෙම්බිරිස්සාව සහ නියුමෝනියා තත්ත්ව ස්වභාවයෙන්ම වැඩියි.
අනික මේ කාලෙට තමයි අපේ ප්‍රතිශක්තිය අඩුම. වැඩිපුර විටමින් සී තියෙන පලතුරු කන්නේ පෙති බොන්නේ මේ කාලෙට.

එංගලන්තයට සාපේක්ෂව උතුරු යුරෝපයේ රටවල ජර්මනිය, ෆින්ලන්තය , ස්විට්සර්ලන්තය් වගේ රටවල වයිරස් වර්ග සහ බැක්ටීරියා අඩුයි .  30ක් වගේ ලු තිබෙන්නේ. (මේවා ගූගල් කරලා හොයා ගන්න පුළුවන්.)නමුත් ආයි ස්පාඤ්ඤ ය වගේ මදක් උණුසුම් රටවල් පැත්තට  පැත්තට යනකොට මේ ප්‍රතිශතය වැඩි වෙනවා.

සාමාන්‍යයෙන් රස්නේ ඇති (අංශක 40 ට යන ) සයිප්‍රස් වල මේ බැක්ටීරියා හා වයිරස් අඩුයි. ඒ වගේම ඒ මිනිසුන් ගේ ප්‍රතිශක්තිය වැඩියි.

සයිබීරියාවේ තිබෙන්නේත් මේ තත්වයමයි.හීතල වෙනකොට සෘණ 40 ට 50 යනවා. රස්නේ වෙනකොට +50 ට යනවා. එනිසා බැක්ටීරියා හා වෛරස රඳන්නේ නැහැ. හැබැයි ඉතින් රස්නේ රටවල වෙන දරුණු වෛරස් තියෙනවා. එබෝලා වගේ.

දැඩි හිරු රශ්මියට අනාවරණය කලොත් ගොඩක් විෂ බීජ නැතිවෙනවා කියල අපි දන්නවනේ.  එනිසා වෛරසය පැතිරීමේ වේගය අඩුවෙන්න පුළුවනි. ඒත් මාරයා එන්නේ හැංගිලා.

ශ්‍රී ලංකාවේ කොරෝනාවයිරස් තත්වය

ශ්‍රී ලංකාවේ කොරෝනා වයිරසයේ පැතිරීම 

අද දින දක්වා ශ්‍රී ලංකාවේ කිසිදු කොරෝනාවයිරසය අනුබද්ධව ඇතිවූ අසනීප තත්වයන් නිසා සිදු වූ මරණ කිසිවක් වාර්තා වී නැත. ඉතා ඉක්මනින්  රෝගියා නිරීක්ෂණය කර   රෝහල්ගත කොට සුව වන තෙක් උපස්ථාන කිරීමේ ක්‍රියාදාමයක් ශ්‍රී ලංකාව අනුගමනය කරණ බව පෙනේ.  ශ්‍රී  ලංකාවේ ජාතික  සෞඛ්‍ය සේවය ට මල් කළඹක් පුද කිරීමට මෙය හොඳ අවස්ථාවක් යයි සිතමි.

එහෙත් ශ්‍රී ලංකාව තවමත් ඇත්තේ කොරෝනාවයිරස් වසංගතයේ මුල් අවධියේ බව නොකියා බැරිය.  එනම් මාර්තු පළමුවනදා සිට 25 දක්වා රෝගීන් 102 දෙනෙකි.
මෙයින් චීන කාන්තාවගෙන් කිසි කෙනකුට වෛරසය වැළඳුනු බවක් නොපෙන්වයි.  අනිකුත් චීන ජාතිකයන්ට රෝගය නොපෙන්වා වාහකයන් වීමේ අවස්ථාවක් තිබුනේ නැතිද?
නැත්නම් දවස් 14 ඇතුලත් ඊළඟ රෝගියා හමුවිය යුතුය. එසේ හමුවී ඇත. එනම් මාර්තු 14 රෝගීන් 6 දෙනෙකි. ලෝක සෞඛ්‍ය සංවිධානයට අනුව එක් අයෙකු ගෙන් 2.2 ට පැතිරේ. එහෙත් දවස් 7 කදී හැත්තෑ දෙනෙකුට පැතිරී තිබුනේ නැත. එය ශ්‍රී ලංකාවේ සෞඛ්‍ය සේවා ගත් ක්‍රියා මාර්ග නිසා විය යුතුය.

නමුත් ඉතාලිය, ඇමෙරිකාව යන රටවලින් පැමිණි අයගෙන් රෝගය නැවත බෝවී තිබුණි. මේ නිසා 17දා වන විට 29 කුත් 21 දා වනවිට 59 කුත් හමුවී තිබේ. අද 25 දා වන විට 102 කි. ඒ අනුව දෙගුණයක් වීමේ ප්‍රවණතාවය එලෙසම තිබේ. මේ අනුව 30 දා වනවිට 230 පමණ හමුවිය හැකිය.
එය ඉහත  වගුවෙන් පෙනේ. රෝගීන් සංඛ්‍යාව වැඩිවන බව පැහැදිලිය.

යුරෝපයේ රෝගීන් සියයකට එක අයෙකුද දෙසීය වන විට දෙතුන් දෙනෙකුද මිය යාමේ ප්‍රවණතාවයක් තිබුණි.
මේ නිසා ශ්‍රී ලංකාවේ එකවරම රෝගීන් වැඩිවීමේ අවදානමක් ඇත්තේ අප්‍රේල් 2 හා 4 අතරය. එනම් බොහෝ විට රෝගීන් සංඛ්‍යාව  1126 සිට 4198 දක්වා වැඩිවිය  හැකිය.
මේ ගණනට  එනවිට හතළිහක පමණ පිරිසකට එය මාරාන්තික විය හැකිය.

මතක තබාගන්න මේවා ගණිතමය වශයෙන් එන සංඛ්‍යා මිස රටේ ඇඳිරි නිතිය පැවතීම වැනි සාධක සලකා බලා කරන පුරෝකථන  නොවේ.
ඒ කියන්නේ ශ්‍රී ලංකාව හා එහි වැසියන් ගන්නා ක්‍රියා මාර්ග මත වාසනාවන්ත ලෙස එසේ සිදු නොවීමට ඉඩකඩ තිබේ. 
බ්‍රිතාන්‍ය හෝ ඉතාලිය වැනි රටවල මෙන්  වසංගත තත්වය ගැන  නොසලකා හිටියොත් අවුරුදු සමය වනවිට මේ  රෝගීන් සංඛ්‍යාව අටදහස දක්වා වැඩිවිය හැකිය.  මරණ සංඛ්‍යාවද සීයත් දෙසීයත් අතර වනු ඇත.

ශ්‍රී ලංකා රජය ඇඳිරි නීතිය  පනවා ඇති අතර ජර්මනිය වැනි තත්වය පාලනය කර ඇති රටවල මෙන් දිස්ත්‍රික්ක අතර යෑම සීමා කර ඇත. සියලුම රෝගීන් තරයේ පරික්ෂා කරනු ලැබේ. මේවා සාධනීය තත්වයන්ය.එහෙත්  රෝගීන් ප්‍රමාණය වැඩිවුව හොත්  සෞඛ්‍ය සේවාවන්ට එය දරා ගැනීමට නොහැකි වනු ඇත.

ශ්‍රී ලංකාවේ බොහෝ වැසියන් එකිනෙකාට උදව් කරමින් අවබෝධයෙන් ක්‍රියා කරනු දැකීම සතුටකි.
 එනිසා තත්වය ගැන සීරුවෙන් කල්පනා කර බලා හැකි පමණ වෙන්ව සිටිමින් රෝගය පැතිරීම පාලනය කරගන්න.
අපේ ආදරණියයන්  වෙසෙන රට නිසා ඉහත අනාවැකි සිදු නොවන තරමට එය හිතට සහනයකි. 

වෙනත් ලිපි:
මුඛ ආවරණ පැළඳීම
චීනය මුඛ ආවරණ පැළඳීම අනිවාර්ය කළේ ඇයි (කොරෝනා වෛරසය පැතිරී කාලය තුල)

චීනය මුඛ ආවරණ පැළඳීම අනිවාර්ය කළේ ඇයි (කොරෝනා වෛරසය පැතිරී කාලය තුල)

මේ ලිපිය සම්බන්ධ මුල් ලිපිය පළමුව කියවන්න.

මුඛ ආවරණ පැළඳීම

රෝගය බෝවන අන්දම දළ වශයෙන් 

(කරුණාකර කලින් පෝස්ටුව කියවා මෙය කියවන්න)

සියලු දෙනාටම ප්‍රශ්නයක් වන්නේ මුඛ ආවරණ පැළඳීම සමහරු බල කරද්දී විශේෂන්ඥ වෛද්‍යවරු එසේ නොකියන්නේ ඇයිද යන්නය. ඔවුන් නිවැරදි බව කලින් දැමූ පොස්ටුවේ කියුවෙමි. එසේ නම් චීනය වූහාන් ප්‍රදේශයේ මුඛ ආවරණ පැළඳීම අනිවාර්ය කළේ ඇයි?

එය මෙසේ පැහැදිලි කරමි.

ලෝක සෞඛ්‍ය ය සංවිධානයට අනුව එක් අයෙකුගෙන් දෙදෙනෙකුට වත් අවම වශයෙන් වයිරසය පැතිරේ. (හරි ගණන 2.2 කි) ඒ නිසා දෙදෙනෙකුට, ඉන්පසු හතර දෙනෙකුට , ඉන් තවත් අට දෙනෙකුට, ඉන් තවත් 16 දෙනෙකුට වශයෙන් රෝගය පැතිරේ. රෝගය පැතිරීම ඉතා ඉක්මන්ය. 

 වයිරසය ඔබේ සිරුරේ තිබුනද රෝග ලක්ෂණ මතු වන්නේ දින 2-14 අතර කාලයක් තුලදීය. මෙයට කියන්නේ බීජෞෂණ සමය  incubation period කියාය.  මේ කාලය තුල වයිරසය ඇති තැනැත්තා අවුරුදු  උත්සවයක "සැඟවුණු  අමුත්තා " වැන්නෙකි. ඔහු හෝ ඇයගෙන් රෝගය බෝ වුනද රෝගය ඇතැයි ඔවුන් දන්නේ නැත. මෙහි සාමාන්‍යය අගය (Average)   දින 5 කි. දින 5ත් 14ත් ඇතුලත රෝගය වැළඳී මුඛ ආවරණ පළඳින්නට පටන් ගන්නා  විටදී  වැළඳුනු තැනැත්තා  බොහෝ විට තව කිහිප දෙනෙකුට එය පතුරුවා තිබෙන්නට පුළුවන. 

එනිසා මුහුණ වැස්මක් හෝ මුඛ ආවරණයක් පැළඳීම රෝගය නැති අයෙකුට අවශ්‍ය නැත. නමුත් රෝගය පැතිරීම අතිශයින් වේගවත් වීම නිසාත් රෝග ලක්ෂණ ඇති අය ඒ ගැන නොදැනුවත් වූ නිසාත් චීන බලධාරීන් සැමටම මුඛ ආවරණ පළඳවන්නට නියෝග කරන ලද බව පෙනේ. ඉන් ඔවුන් බලාපොරොත්තු වන්නට ඇත්තේ රෝගය වැළඳී එහෙත්  ඒ ගැන නොදත්ත වුන් ගෙන් රෝගය පැතිරීම වලක්වා ලීම විය හැක. 

බටහිර රටවල අවශ්‍ය ප්‍රමාණය ට මෙම මුඛ ආවරණ  නැති හෙයින් ඔවුන් එය පැළඳීම අනිවාර්ය කර ඇත්තේ අත්‍යවශ්‍ය සේවා සපයන අයට පමණකි. ඒත් මුළු මුහුණම වාගේ වැසෙන පරිදිය.
Shocking Videos Show Chinese Authorities Humiliating People For Not Wearing Masks

මුලාශ්‍ර Coronavirus Disease 2019 (COVID-19)

What should you do if you think you have symptoms of COVID-19? 

මුඛ ආවරණ පැළඳීම

මුඛ ආවරණ රතු තරුවෙන් හදල දෙන එක හොඳයි. ඒ සමගම ඇඳුම් කට්ටලත් දෙන නිසා. ඒක විශිෂ්ඨ වැඩක්. හොඳ දේට  හොඳයි කියමු.

ඒත් සමහර ජවිපෙ සම්බන්ධ අය   සෞඛ්‍ය සේවා අධ්‍යක්ෂ ජනරාල් වෛද්‍ය අනිල් ජාසිංහ මහතා කියපු දේ ප්‍රශ්න කරලා තිබුන. මුඛ ආවරණ අනිවාර්ය නැහැ කියන එක. නමුත් ඒක ඇත්ත.

කවුරුහරි කිවිසුමක් ඇරියොත් ඔබ ගාව ඉඳන් මුඛ ආවරණයෙන් බේරෙන්නේ මුව විතරයි. කෙළ බින්දු ඇහැට වැටෙන්න පුළුවන් ඒ එන වේගෙට, මුහුණේ ඉතිරි පෙදෙසට වැටෙන්න පුළුවන්.  කිවිසුමක වේගය පැයට  හැතැප්ම 100. නැත්නම් කිලෝමීටර 160ක්. අනිත් කොටස් ඔබේ මුහුණේ සහ ඇඟේ අනිත් තැන්වලට විසිරෙනවා.  ලක්ෂයක් පමණ විෂබීජ විසිවෙන්න පුළුවන්. ඒ කියන්නේ මුඛ ආවරණයෙන් බේරෙන්නේ 10-30% ප්‍රමාණයක් විතරයි. (ලෝක සෞඛ්‍ය සංවිධානයේ වෙබ් අඩවිය බලන්න ).

එක මුඛ ආවරණයක් (surgical) වරකට වඩා පැළඳිය නොහැකියි. හෝදා පැළඳීම ද කළ නොහැකියි . සමහර විට සම්පුර්ණයෙන්තැම්බිය යුතුයි. එවිට සර්ජිකල් එකක් නම් කිවිසුම් හෝ කතාවෙන් එන බිඳිති  උරා ගන්න කොටස විනාශ වෙනවා.

ඊට පස්සේ අතින් මූණ   ඇල්ලුවොත්  හැදෙනවා. එනිසා එක්කෝ හෙල්මට් එකක් දාන්න ඕනේ. නැත්නම් හාර්ඩ් වෙයාර් කඩේකින් බාසුන්නැහේ ලා දාන ප්ලාස්ටික් ඇස් ආවරණයක් දාන්න ඕනේ.
 වානේ  පෘෂ්ඨ (stainless steel) මත පැය 9 කුත් ප්ලාස්ටික් මත පැය හයකුත්  අනිකුත් පෘෂ්ඨ මත  පැයක් පමණත් වෛරසය රඳන නිසා අත් වැසුම් පළඳින්න ඕනේ. විශේෂයෙන් සල්ලි අත ගාන සුපර්මාකට් වල අය. අත් දෙක හැම වෙලේම හෝදන්න කියන්නේ ඒකයි. පිහදාන්න ඩෙටොල් නැත්නම් දෙහි ගෙඩියක් කපල අතුල්ලන්න. එපමණම  හොඳ නැති  වුනත් යම් සහනයක් තිබෙනවා.


සබන් තමා හොඳම. ඒකෙනුත් ඔය හොඳ සුවඳ ඒවා නෙමේ රෙදි හෝදන සබන් වගේ ඒවා . එසේම දෙමල ජනතාව ඉහින කහ වතුරත්  ඉතා හොඳයි කියනවා පැතිරීම වලක්වන්න.

කහ වතුර  ගැන විද්‍යාත්මක පැහැදිලි කිරීමක් අවශ්‍යනම් පහල යොමුවට යන්න.
https://www.ncbi.nlm.nih.gov/pmc/articles/PMC6509173/

කොරෝනාවෙන් සමාජවාදයට ??

ඩිමිට්‍රි අර්කාදියෙවිච් නල්බන්දියන් - "සමූහ ගොවිපලක තරුණියක් "

දක්ෂිණාංශික කොන්සර්වේටිව් පක්ෂයේ මුදල් ඇමති (චාන්සලර්0 ඍෂි සුනාක් ගේ අයවැය බොහෝ දුරට "වියදම්" කිරීමේ අයවැයක් විය. එනම් ඔහු කුඩා ව්‍යාපාර හිමියන්ට සහන රැසක් දුන් අතර රැකියා ලාභීන් ගේ බදු සහනයද ඉහල දැමීය. කම්කරු පක්ෂ නායක ජෙරෙමි කෝබින් ගේ සමහර ප්‍රතිපත්ති ණයට ගත්තේ යයි සමහර කම්කරු පක්ෂ මන්ත්‍රීවරු චෝදනා ද නැගූහ.

එසේම කොරෝනවයිරසය මැඩලීම සඳහා තවත් පවුම් බිලියන 300ක්  ඔහු වෙන් කල අතර සමස්ත වැඩ කරන ජනතාවට වැඩ කලත් නොකලත් අවම වේතනයක්  (universal basic income) ගෙවීමටද යෝජනා කළේය. මෙය කෝබින් ගේ චන්ද පොරොන්දුවකි. රිෂි  සුනාක් ට  ස්තුති කරන ගමන්ම අගමැති බොරිස් ජොන්සන් පාසැල් වැසීම  මෙතරම් ප්‍රමාද කරන්නේ ඇයිද යන්න මට කුකුසක් විය. එය පැහැදිලි වුනේ ඔහු අවසානයේ පාසැල් මේ සිකුරාදා (20/03/2020) සිට වැසීමට එකඟ වුනත් එසේ කළේ අත්‍යවශ්‍ය සේවා සපයන අයගේ දරුවන්ට පාසල් ඒමට ඉඩකඩ සලසමිනි. එනම් ගුරුවර ගුරුවරියන් ඒ ළමයින් සඳහා  පාසල් පැමිණිය යුතුය. එම රැකියා අතරට සෞඛ්‍ය සේවය, පොලිසිය, ඩිලිවරි රියදුරු මහතුන්, හමුදාව ආදිය  ඇතුලත්ය. එයට හේතුව ලංකාව වැනි ආසියානු රටවල මෙන් ළමයි බලා ගැනීමට වැඩිහිටි සීය ලා, කිරි අම්මලා  එතරම් නැති වීමත් තාවකාලික නැනී ලා වියදම් අධික වීමත්ය. 

ඉංග්‍රීසි ජාතික යහළුවකු සමග කතා බහ කරන අතරේ මා ඔහුට පැවසුවේ මෙයට පිළිතුර තිබෙන්න සෝවියට් දේශය දරුවන් බලා ගැනීම සඳහා අනුගමනය කළ ක්‍රමය බවයි. රැකියාවට යන දෙමාපියන් ගේ දරුවන් බලා ගැනීම සඳහා  වූ නිකේතන පාසල් ක්‍රමයට සකස් වී තුබුණු අතර කුඩා දරුවන්ට එහි නිදා ගැනීමටද ඉඩ කඩ සලසා තිබුණි. පසු කලෙක ජර්මනිය එක්වූ පසු නැගෙනහිර ඒවා එසේම පවත්වාගෙන ගිය බවද නිරීක්ෂණය කලෙමි. මේවායෙහි රැකියා කරන ලද්දේ උසස් අධ්‍යාපන ඩිප්ලෝමා ලත් ගුරුවර ගුරුවරියන්ය. එක්සත් රාජධානියේ එවන් උසස්  අධ්‍යාපනයක් අවශ්‍ය නැත. වසංගත අවස්ථාවක සෝවියට් රජයට මේ පාසල් වැසීමට අවශ්‍යතාවයක් නැත.  
සෝවියට් දේශයේ ප්‍රශ්න බොහෝ තිබු බව අපි දනිමු. එය බිඳ වැටීමට ඒවා හේතු වන්නට ඇත. නමුත් එහි පැවතුන සාධනීය දේ වර්තමාන සමාජ ප්‍රවර්ධනය සඳහා යොදා ගත හැකිය. මේ එවැන්නකි.  

ඊළඟ කතාව කුකුලන් ගැනය. මේ ලිපියේ මම ඒ ගැන කලින් කතා කලෙමි.  
සෝවියට් ආහාර හා ධනවාදී ආහාර සමග එංගලන්තයේ ලාභ ජරාව සංසන්දනයක්
 අපි එම "රජයේ" කුකුළු මස් කෑමට අකමැති වූයෙමු. ඒවා රබර් වගේ ඇදෙන ගං කුකුළු මස් ජරාව බව ඇතැමෙක් කීහ. මේ කුකුළු මස් න්‍යෂ්ටික යුද්ධයක් හෝ වංසගත තත්වයකට මුහුණ දීමට මාස  හය හත විශාල අධි ශීතකරණ වල බහා තබා ගෙන පසුව වෙළඳ පලට නිකුත්  කරන බව ඇතැම්හු පැවසූහ.  සෝවියට් දේශය බිඳ වැටීමට ආසන්න කාලයේ හොලන්ඩ්  වලින් ගෙනා බ්‍රොයිලර් කුකුල්ලු ඊට වඩා රසවත් විය.  

නමුත් එම කුකුලන් දවස් 28 කුකුලන් බවත් , උන්ට කකුල් විහිදා කුකුල් හඬ නැගීමටවත්  අවසරයක් නැති බවත් ස්ටෙරොයිඩ් ගසා පුම්බා ඇති උන් කෑමට ගැනීම පිළිකා කාරක කෑමට ගැනීමක් බවත් දැන් අපි දන්නෙමු. අපි දැන් හොයන්නේ ගං කුකුලන් (organic) ය. 

රුසියානු ආච්චිගේ රිසයිකල් බෑගය 

තෙවැන්න නම් රුසියානු මිනිසෙකු හෝ බොහෝ දුරට බබුෂ්කා (මිත්තණියන්) සුපිරි වෙළඳ සැල් හෝ සාමාන්‍ය වෙළඳ සලකට, පොළට රැගෙන ගිය නැවත භාවිත කල හැකි (recycling ) බෑගයයි.  කිසිම නවීන පෙනුමක් නැති එම පරණ වුනු එම බෑග අපට සිනහ  උපදවන සුළු විය.  මා ඇතුළු ඇතැම් තරුණ සිසුන් ඒවාට සිනාසුනා මතකය.  අපි ඉතා ආඩම්බරයෙන් බටහිර රටවලින් බඩු මිලට ගත් විට දෙන විච්චුර්ණ පාට පාට ලස්සන විලාසිතාවන්ගේ මුහුණු පිරුණු ප්ලාස්ටික් බෑග ආඩම්බරයෙන් රැගෙන ගියෙමු. ඒ දවස් වල එය කූල් (cool) දෙයකි. (fashionable )

පියකරු රුසියානු යුවතියන්ද විදේශිකයන්ගෙන් ලත් එවන් ප්ලාස්ටික් බෑග් ආශාවෙන් රැගෙන ගියහ.

 දැන් මැදිවිය අවසන් කරමින් සිටින මා ලෝකය ප්ලාස්ටික් ව්‍යවසනයෙන් මුදා ගන්නට පරණ. නැවත  භාවිතා කළ හැකි බෑග වෙළඳ සලට යාමට භාවිතා කරමි.  දැන් කූල් බව එයයි.
මගේ මිතුරා නැවතත් ඈනුමක් අරී . ඔහු මගේ කතාවට  කැමති නැත.

"අජිත් ඔබ හැම වෙලේම සෝවියට් දේශයේ උදාහරණ ගේනවා. ඊට පස්සේ අපට දෝෂාරෝපණය කරනවා. අපිමොනවාද කළේ "

මම ඔහුට පිළිතුරු දෙමි.
"මුකුත් කළේ නැත" (Nothing)

මාද ඇතුළුව , අප කිසිවක් කලේ නැත.

ඒ රට බිඳී වැටීම කම්පනයක් ඇති කලද ඒ ගැන  සතුටු වුනෙමු. 
"දැන් රුස්සාට පිට රට යන්න පුළුවන්. පිටරට බඩු ගන්න පුළුවන් " අපට මෙන්ම බහුතරයක් සෝවියට් වැසියනටද  හිතුනේ එලෙසය. 

මට දැන් හැඟෙන්නේ සෝවියට් දේශය හිතුවක්කාරී තරුණ දරුවෙකු වශයෙනි.

හදා ගන්නට තිබුනා  නේද යයි සිතේ. 


පින්තූරය  The Collective Farm Girl

ඔබට සමාජවාදය ගැන  නව කියවීමක් අවශ්‍ය නම් පරණ වාමවාදී පක්ෂ වලින් එය ගත නොහැකිය. ඔවුන් ගේ යල්පැනගිය මතවාදයන්  ප්‍රතික්ෂේප වී ඇත. ඔවුන් ඔබට කියා දුන්නේ අප දුටු සමාජවාදය නොවේ. 
ඒ සඳහා ඔබ යා යුත්තේ මෙතනටය .

ජොන්සන් ට වැරදුනා ද ජොන්සන්

හර්බට් ස්පෙන්සර් 

මාර්තු 16 දා තත්වය WHOP

ශක්තිවන්තයා නොනැසී ජිවත් වනු ඇත  "Survival of the Fittest" යන අදහස මුලින්ම විද්‍යාත්මක සිද්ධාන්තයක් ලෙස පළ කලේ හර්බට් ස්පෙන්සර් නමැති දර්ශනවාදියා සහ විද්‍යාඥයා ය.  
ඔහුගේ එම අදහස ණයට  ඉල්ලා ගත් චාර්ල්ස් ඩාවින්  පරිණාමවාදය පිලිබඳ "සත්ව සම්භවය " පොතේ එම වාක්‍යය  ඇතුලත් කලේ "ස්වභාවික තෝරා ගැනීම " "Natural Selection" පිලිබඳ ඔහුගේ න්‍යාය වඩාත් පැහැදිලි කිරීම සඳහාය.  ස්වභාව ධර්මයාගේ වෙනස් වීමට අනුව හැඩ ගැසෙන ජීවී වර්ග පවතිනු ඇත යන්න පරිණාමවාදයේ මූලික ඉගැන්වීමකි. වෛරස හා බැක්ටීරියා වලට එරෙහිව අපගේ සිරුරේ ප්‍රතිශක්තිය ඇතිවීමද මේ හා සම්බන්ධය.

ඉතාලියේ සෞඛ්‍ය සේවාව පවසන්නේ ඔවුන්ට  තව දුරත් වැඩිහිටි වයස 80ට වැඩි ජනතාව මෙන්ම වෙනත් ලෙඩ රෝග වලින් පීඩා  විඳින්නන් සඳහා කටයුතු කිරීමට නොහැකි බවය. එනිසා ඔවුන්ට ඉතිරිව ඇත්තේ දන්නා දහමක පිහිටි ඉල්ලලා යාදිනි කීමට හෝ තම ඉරණම භාර ගැනීම පමණකි.
  කොරෝනවයිරසයෙන් එන තර්ජනය මිදීමට නොයෙකුත්  රටවල් මහජන චීනය අනුව යමින් පාසල් හා විශ්ව විද්‍යාල වසා දැමීම, මිනිසුන් ගැවසෙන උත්සව තහනම් කිරීම, ආපන ශාලා බිම හල් ආදිය වසා දැමීම වැනි  උපක්‍රම අනුගමනය  කරති. මදක් ඒකාධිකාරී බවක් පෙනුනද එම දැඩි නීති නිවා වයිරසය පැතිරීමේ වේගය පාලනය වෙතියි ඔවුහු සිතති. මහජන චීනයේ එය සාර්ථක වෙමින් පවතී.

 එහෙත් මහා බ්‍රිතාන්‍යයේ අග්‍රාමාත්‍ය බොරිස් ජොන්සන් ඒ වෙනුවට රැළේ ප්‍රතිශක්තිකරණය හෙවත් herd immunity ක්‍රමය අනුගමනය විද්‍යාත්මක උපදෙස් මත අනුගමනය කරන බව මහජනයාට දැනුම් දී තිබේ.

ඔහු එසේ දැනුම් දුන්නේ ඔබේ ආදරණියයන් මිය යනු   ඇත යන අනතුරු හැඟවීම සමගය.

මා ඒ පිළිබඳව බ්ලොග් පෝස්ටුවක් ලියුවෙමි. 

මා එහි ලියුවේ අගමැති තුමනි ඔබේ ආදිතමයන් කියූ දේ අකුරටම පිළිපැදීම අවශ්‍ය නැත යන්නයි. අපේ දෙමාපියන් අප කුඩා කාලයේ කම්මුල්ගාය, පැපොල වැනි වයිරස් මගින් බෝවෙන  රෝග වැළඳුන  දරුවන් අසලට ඕනා කමින් රැගෙන ගියේ රෝගය කුඩා කාලයේ බෝවුණු පසු නැවත නොවැළඳෙන බැවිනි. හේතුව එමගින් ඇතිවන ප්‍රතිශක්තිකරණය බව සැම  දෙනාම දනිති. 

නමුත් ඒ හැත්තෑව , අසූව දශකයන්හිදීය. මේ විසි එක්වැනි ශතවර්ශයයි.  එමනිසා මේ Herd immunity මතවාදය ළමයින්ට ගැලපුනත් වැඩිහිටියන්ට ගැලපෙන්නේ නැත.  

මා විසින් දත්ත රැගෙන කරන ලද ප්‍රස්ථාරයේ ලෝක මරණ සංඛ්‍යාව සීග්‍රයෙන් ඉහල යන බව දැක්වෙයි. දත්ත ලබා ගත්තේ ලෝක සෞඛ්‍ය  සංවිධානයේ වෙබ් අඩවියෙනි. මේ ප්‍රතිශතය දැන් 3.7% පමණ වේ. එනම් මිනිසුන් ලක්ෂයක් ගත්තොත් මරණ සංඛ්‍යාව 3700 කි.

World wide death rate 

increase in UK

මා ගිය ඉරිදා LBC නමැති රේඩියෝව අසන විට එහි වැඩ සටහන් මෙහෙයවන්නා  "Survival of the Fittest"  සංකල්පය යුජෙනික්ස් (eugenics ) හෙවත් සුජනක ප්‍රවේනි විද්‍යාවට අයත් බව කියමින් බැණ වැදුනි. මදක් අසනවිට ඔහු කතා කරන්නේ මගේ පොස්ටුව ගැන මට වැටහුණි. මා කීවේ බ්‍රිතාන්‍ය රජයේ ප්‍රතිපත්තිය  "Survival of the Fittest" සංකල්පයට සමාන වන්නේ ඔවුන් රැලේ ප්‍රතිශක්තිකරණ අදහසට ඉඩ දුනහොත් බවය. එයට හේතුව මේ වෛරසය ක්‍රියාත්මක වන්නේ එලෙසින් බැවිනි. ඒ  දුර්වල මහලු අය හා ලෙඩ ඇති අය මියයමින් එක්තරා අන්දමකට කෙරෙන  "ශුද්ධය" නිසාය.  ඉන් බේරෙන තරුණ උදවියගේ පෙනහළු වලටද දැඩි හානි සිදුවේ.


චීනයේ මරණ සංඛ්‍යාව දහය දක්වා අඩුවී ඇත. නව රෝගින් සංඛ්‍යාව 27 කි. (මුළු රෝගීන් සංඛ්‍යාව තවම අසූ එක්දහසකි.  අද එක්සත් රාජධානියේ මරණ සංඛ්‍යාව 55 දක්වා (එනම් 20 කින්) වැඩිවී ඇත.

ඉංග්‍රීසියෙන් ලියූ ලිපියේ මා අදහස් කළේ  චීනයේ හෝ ඉතාලියේ මෙන් දැඩි තීරණයක් ගෙන මිනිසුන් වැඩිපුර  ගැවසෙන  ස්ථාන තහනම් කිරීම, පාසල් වැසීම යනාදිය  කල යුතු බවයි. 
අද බොරිස් ජොන්සන් කල පුවත්පත් සාකච්ඡාවෙන් පැහැදිලි වුයේ ඔහු එම ක්‍රියාමාර්ගයට කෙමෙන් එළඹෙමින් තිබෙන වගයි. තව දුරටත් රැලේ ප්‍රතිශක්තිකරණය වෙනුවට ඔහු නිවෙස් වලට වී හැකිනම් රැකියා කරන ලෙසටත් අනවශ්‍ය ගමන් නොයන් ලෙසටත් අවවාද කරයි. බොහෝවිට නගර වසා  දැමීමක් දක්වා මෙය ඉදිරියට යනු ඇත.

මූලාශ්‍ර : WHO Situation Report

  
උපුටා ගැනීමේදී කරුණාකර යොමුව ඇතුලත් කරන්න.

චීනයේ කොරෝනා ආසාදිතයන් හා චීනයේ මිය යන ප්‍රමාණය

චීනයේ කොරෝනා ආසාදිතයන් හා චීනයේ මිය යන ප්‍රමාණය

චීනයේ කොරෝන ආසාදිතයන් නැති යයි කීම තේරුමක් නැති දෙයකි. චීනයේ කොරෝනා  ආසාදිතයන් තවමත් සිටී .  එසේනම් ඔවුන් ජය ගත්තා යයි කියන්නේ ඇයි ?
ඔවුන් එසේ කියන්නේ රෝගයේ උච්චතම අවස්ථාවේ (peak ) තිබූ ආසාදිතයන්  ගේ ප්‍රමාණය හා මියගිය අද තත්වය හා සංසන්දනය  කරන විට සීග්‍රයෙන් අඩුවන නිසාය.
මාර්තු පල වනදා හා දෙවන නව මරණ 35 හා 42 තිබුනද 12 දා වන විට එය 11 දක්වා පහත බැස ඇත.

China	Sick	Death	New Deaths
01/03/2020	87137	2873	35
02/03/2020	80174	2915	42
03/03/2020	80304	2946	31
09/03/2020	80904	3123	23
10/03/2020	80924	3140	17
11/03/2020	80955	3162	22
12/03/2020	80981	3173	11

එසේම මාර්තු පළමු වනදා අසාදිත සංඛ්‍යාව 87137 වුවද මාර්තු 12 දා 80981 කි. හත් දහසකින් අඩුවී ඇත.
නමුත් නෝනා වරුනි මහත්වරුනි චීනයේ තවමත් ආසාදිතයන් සිටිති..
එසේම මේ සියල්ලෝම වුහාන් වල පමණකි යයිද  ඔවුන්ට එලියට එන්න දෙන්නේ නැති කිමද බොරුවකි. බෙයිජිං වල හාරසිය ගනනක් ආසාදිතයන් සිටිති. ඔවුන් සිටින්නේ රෝහල් වල විය හැකිය. එලියට එන්න නොදෙනවා විය හැකිය. නමුත් වුහාන් වලින් එළියේ ආසාදිතයන් සිටිති.

අවසන් වශයෙන් කිව යුතුව  ඇත්තේ මේ ලෝක සෞඛ්‍ය සංවිධානය චීනය තවම අවදානම්  රටක් වශයෙන් නම් කර තබා තිබෙන බවයි..

මේ කියන්නේ මම හෝ 3%   නොවේ. ලෝක  සෞඛ්‍යය සංවිධානයයි.

මූලාශ්‍ර - ලෝක සෞඛ්‍ය ය සංවිධානය