අනුරගේ ආගමනයේ අසම්භාව්‍යයේ සම්භාවිතාව

අපි 2018 වසරේදී  ශ්‍රී ලංකාවේ සංචාරයකට  ගියෙමු. ඒ  ලුණුගල පෙදෙසේ ජීවත්වූ  හිතවත් ලේඛක සහෝදරයෙකු  හමුවීමට සහ ඒ පෙදෙසේ සංචාරයකටය .  ඒ  ගිය අවස්ථාවේ ලුණුගල යාමට කලින් අප නතර වුනේ මහියංගනයේ හෝටලයකය. රාවණා රජු විසින් සීතා රඳවා සිටි තැනක් යයි සැලකෙන ස්ථානයක ඉදිරියෙන් පිහිටි එම පියකරු හෝටලය ගැන අපට පැවසුවේ මහියංගනයේ ජිවත්වන  හිතවත්  බ්ලොග් රසිකයකු හා  සාර්ථක ව්‍යාපාරිකයෙකුද වන සාහිත්‍ය ලෝලියෙකි .   ඒ ගැන මේ බ්ලොග් ලිපියේ ලියා ඇත .  -බදුල්ලේදී පැරණි මිතුරෙකු සහ මහියංගනයේ දී බ්ලොග් රසිකයෙකු හමුවීම-

මේ ලියන්නේ එහි නොලිව් කතාවය .  අපි එක රැයක් පමණක්  නතර වුනු එම හෝටලය  නව කාමර වලින් සමන්විත  තවමත් සමහර  ඉදිකිරිම්  නිම නොවූ   එකකි .  එහි නැවතුනු අපට රාත්‍රියේ ප්‍රණීත  ආහාර වේලක් ද කාර්ය මණ්ඩලය  සූදානම් කර දුනි .   අපේ දරුවන් හෝටල් කාර්ය මණ්ඩලයට කතා කර බාර් එකේ සින්දු දමා  නටන්නට ගත්හ .  මගේ සොයුරිය සහ සොයුරාගේ  දරුවන්ද කැටුව ගිය නිසා සියලු දරු දැරියන් අවුරුදු දොළහේ  සිට දාසය දක්වා වයස් වල විය .   රෙස්ටුරන්ට් එකේ සිටියේ අප පමණක් නිසා ඉංග්‍රීසි සින්දු දමා  නැටීම ගැන ප්‍රශ්නයක් ඇති වේ යයි නොසිතුවෙමු. මමත්,  මගේ සොයුරාත්, සොයුරියත්, අපේ වයසක මවත්  කතා කරමින් සිටින අතර ඉනෙස් ද දරු දැරියන්  සමග නටන්නට වූවාය . 

එහිදී කිසියම්  ජාතික ඇඳුම් ඇදගත් දෙතුන් දෙනෙකු සහිත මැදිවයස් වල පිරිමින් හතර පස් දෙනෙක් සංගීතය අසා දෝ බාර් එකට පැමිණ බොන්නට සහ නටන්නට පටන් ගත්හ .  ඔවුන් කොහේදෝ සිට කලින් බී පැමිණියවුන් බව අපට පසක් වුනි .  මේ පිරිමින්  ඝෝෂා කරමින් අපේ දැරියන්  නටන තැනට එන්නට උත්සාහ දැරූහ.  හෝටලයේ කාර්ය මණ්ඩලය එය වලක්වා ගැනීමට මුලදී සමත් වුනි. නමුත් මම මල්ලිට පැවසුවේ අවස්ථාව එතරම් සුදුසු නැති නිසා අප කාමරවලට යාම සුදුසු බවයි .  එවෙලේම වගේ කළමණාකාර ලෙස සිටි තරුණ මහතා පැමිණ අපට කාමර වලට යන ලෙසට ආයාචනා කළේය. 

"සර්, අපි මුලදී ඒ ගොල්ලන්ව බාර් එක ගාවම තියා ගන්න ට්‍රයි කළා දකින්න ඇතිනේ. දැන්නම් ටිකක් අමාරුයි නවත්ත ගන්න". ඔහු පැවසීය.  ඔහුගේ කීම පිළිගෙන අපි සියලු දෙනා ළමයින්ද සමග කාමර වලට ගියෙමු .  එහෙත් තංගල්ලේ රුසියානු තරුණිය  සහ ඇගේ බ්‍රිතාන්‍ය පෙම්වතාගේ සිදුවීමද මතක තිබූ හෙයින්,  මම කෝකටත් කියා අපේ කාමර දෙක තිබූ  ඉහල මාලයේ බැල්කනියට වී සිටියෙමි .  එයට පහල මාලයේ ද අප කාමර දෙකක් රැගෙන තිබූ බැවිනි .  බිරිඳ ද නින්දට නොගොස් දොර අසල රැඳී සිටියාය .  අප පැමිණ ටික වෙලාවකින් තමන්ගේ විශාල පැජරෝ වාහන වලට නැගීමට පැමිණි තඩියන් ගෙන් දෙදෙනෙක් අප සිටින කාමර අසලට පැමිණියහ .  එසේ පැමිණ හැඳ  සිටි වේට්ටි ඔසවා, රජ තුන කට්ටුවම එළියේ දමමින්   ඒ අසල මල් පාත්ති වලට මූත්‍රා කළහ .  ඔවුන් අප නැවතී සිටියේ එතන බව දැන  සිටියහ .  නරියන් හැසිරෙන්නේ එලෙසය. ඒ කළේ තර්ජනයක්ය. නරින් තමන්ගේ සීමා සලකුණු කරන්නේ එලෙසය .   

   මා ලංකාවට යනවිට සාමාන්‍යයෙන් නතර වෙන තවත් සංචාරක නිකේතනයක් තිබේ ,  සුන්දර නිස්කලංක පෙදෙසක නාන  තටාකයක් සහ කබානා ද ඇති එතරම් මිල අධික නොවන එහි අයිතිකරු එය විකුණා දැමුවේ වසර කිහිපයකට පෙරය .  එහිදී ඔහු මගේද උදව් ඉල්ලු නිසා මා දන්නා  විදේශික මිතුරන් කිහිප දෙනෙකුටද  පැවසුවෙමි. විකිණීමට වූ  හේතු අතර  ප්‍රාදේශීය දේශපාලනඥයන් ගේ හා උසස් පොලිස්  නිලධාරී න්ගේ උත්සව පැවැත්වූ පසු ඒවාට මුදල් නොගෙවීම ද ද විය .  එසේම ඔවුන් හිටි හැටියේ කඩා වැදී නොමිලේ කා බි නතර වී යාමද සිදු කළහ.  නිවාඩු නිකේතනයකට නොමිලේ පහසුකම් දියහැකි  සීමාවක් තිබෙන  බව මේ දේශපාලන අඳබාලයන් නොදත්හ . 

මේ අනීතික සාමය  මෙන්ම ඉන්පසු පැවැති ගෝඨාභය රජයේ දුර්වලකම හා අදූරදර්ශී පාලනය නිසා අරගලයක් පැන නැගී අතර එයින් පාලන බලය ලබා ගත්තේ හිටපු ජනාධිපති රනිල් වික්‍රමසිංහ ය .  ඔහු ආර්ථිකය ස්ථාවර  කල අයුර පිළිබඳව මගේ ප්‍රසාදයක් ඇතත් ඔහුට සහයට සිටි අය අතර ශ්‍රී ලංකාවේ  ජනතාව ප්‍රතික්ෂේප කළ දුෂිතයන් ලෙස එනම් කල බොහෝ දේශපාලනඥයන් ද  විය.  ඒ අතර ඔහුගේ රජයට උද්යෝගයෙන් වැඩ කල කාංචන විජේසේකර වැනි තරුණ ඇමතිවරුන්ද සිටියහ.  

   නමුත් රනිල්ගේ භූමිකාව ට සහමුලින්ම ඉරක් ඇඳුනේ කිසියම් අගනා ලෝහයක නමකින් හදුන්වන දේශපාලකයෙකුගේ විගඩම් නාටකයක් නැරඹීමට ලැබීමත් රනිල් වික්‍රමසිංහ ද එහි ආශාවෙන් හිඳ සිටීමත් දැකීමෙනි.කෙතරම් ආර්ථිකයට සුව දායක වුවත් මේ ජනතාවට එපා වුවන් රැගෙන නැවත රනිල් ගේ පැමිණීමක් මට සිතා ගත නොහැකි වීය.

ශ්‍රී ලංකාවේ මෙවර මැතිවරණය ඉතාමත් තීරණාත්මක එකකි .  අනීතිය රජ කරවන සමයේ රජ කළවුන් බොහොමයක් තරඟයෙන් ඉවත්ව තිබේ .  ජාතික  ජන බලවේගයෙන් ටෙක්නොක්‍රැට් ලා හෙවත් වෘත්තීය හා අධ්‍යපන සුදුසුකම් වලින් ඉහල මට්ටමේ කණ්ඩායමක් ඉදිරිපත් කර තිබේ . මේ අය  ප්‍රජාතන්ත්‍රවාදී තෝරා ගැනීම් වලින් නොව  ජවිපෙ වැනි පක්ෂයක  දේශපාලන බල මණ්ඩලය  හා  එහි එහි බල ව්‍යුහය මගින් මෙහෙවන කණ්ඩායමක් ලෙස කෙනෙකුට දැකිය හැකිය .  නමුත් ඔවුන්ගේ වෘත්තීය  හා අනිකුත් සුදුසුකම් අනුවද ජනතාවට බරක් නොවෙන වරප්‍රසාද රහිතව සේවය කරන්නට සූදානම් පිරිසක් ලෙසද  ඔවුන්ට බහුතර බලය ලබා දිය යුතු බව මගේ අදහසයි. මෙතෙක් කල් පාලනය කල නියම ප්‍රජාතන්ත්‍ර වාදයෙන් තොර ගත් පිරිස ඉවත්ව යන්න ප්‍රශ්න රාශියක් ඇති කර දමමිනි .  

මා පහත  සඳහන් ලිපියේ පෙරටුගාමී සමාජවාදී පක්ෂයේ යම් ප්‍රතිපත්ති හාස්‍යයට ලක් කලද (පෙරටුගාමීන් ශ්‍රී ලංකාවේ පූර්ණ සමාජවාදී රාජ්‍යයක් පිහිටුවති - බීසීසි)  නුවන් බෝපගේ ඇතුළු  ඔවුන් ගෙන් සමහර අපේක්ෂකයන්ද  සත්‍ය වශයෙන්  පාර්ලිමේන්තුවට තේරී පත්වීමට  සුදුසු අය යයි සිතමි .  ටෙක්නොක්‍රටික් රජයකට සාර්ථක විවේචනාත්මක විපක්ෂයක් අවශ්‍යය .  පාඨලී  රණවක අවාසනාවකට තරඟයෙන් ඉවත්ව වුව ද ඔහු ද සිටිය යුතු අයෙක් යයි හඟිමි .  සජබ පාර්ශ්වයේ ආචාර්ය හර්ෂ ද සිල්වා හා එරාන් වික්‍රමරත්නද, යුඇන්පියෙන් තරඟ  වදින කාංචන විජේසේකර ද සුදුසු අය ලෙස සිතමි .  දීප්ති කුමාර ගුණරත්න ගේ සමබිම පක්ෂයෙන්ද අපේක්ෂකයන් පිරිසක්  ඉදිරිපත් කර තිබේ .  ඔහු රනිල්ට සහය දුන්නේ ශ්‍රී ලංකාවේ ධනවාදය සංවර්ධනය විය යුතුය යන අදහසේ සිටය .  මාද  ඒ අදහස යම්තාක් දුරට අගය කලද ජාජබ රජයක් බොහෝවිට වියට්නාම , චීන රාජ්‍ය ක්‍රම අනුසාරයෙන් ආර්ථිකය හසුරුවන බවට ඉඟියක් ලැබී තිබේ .  ආර්ථිකය එලෙස හසුරුවන්නේ නම් සහ සාර්ථක පාර්ලිමේන්තුවක් තුල රටේ දියුණුවක් ඇති විය හැකි බව මගේ විශ්වාසයයි .  

      

පාර්ලිමේන්තුවට, පළාත් සභා වලට හෝ නගර සභා වලට පත් නොකර එවිය යුත්තේ මා මුලදීම සඳහන් කල නීතියක් නොසලකන නරුම දේශපාලන නරින්ය.  

 කිසියම් දෙයක් සිදුවීම පිළිබඳව සම්භාවිතාවක් තිබේ .  එකම සිද්ධි දාමයක සම්භාවිතාවයන් පොකුරක මධස්ථ අගයක්  හෙවත් සාමාන්‍ය (mean) සම්භාවිතාවක් තිබේ. ජාතික ජන බලවේගයේ අනුර කුමාර දිසානායක ගේ ජයග්‍රහණයට කිසියම් සම්භාවිතාවක් තිබුනද බොහෝ දෙනෙකු එය ඉහල අගයක් වෙතැයි විශ්වාස කලේ නැත. රනිල් ලක්ෂ විස්සක් ලබා ගනී යයි සජබේ ,  පෙසපේ හා සමහර ජවිපෙ අයද විශ්වාස කලේ නැත .    එහෙත් අනුර කුමාර දිසානායකට ඒ ගැන මනා වැටහීමක් තිබුණි . 

මම මුලින්ම  ජාතික ජන බලවේගයේ සමුළුවකට සහභාගී වනවිට ඉදිරියට එන ජනතා කැමැත්ත පක්ෂ සාමාන්‍ය පක්ෂ දේශපාලනය අභිබවා යන අසම්භාව්‍ය  සම්භාවිතාවක් ඇති සිදුවීම් පෙළක් බව වැටහුණි .   මේ ලිපි දෙකම  : ටිල්වින් සිල්වා සහෝදරයා ට ප්‍රශ්න කිහිපයක් සමග ජාජබේ ඇට් ලන්ඩන්, ෂාරුක් ඛාන් ජයතිස්ස ලියවුනේ ඒ අනුවය .  

 මේ ලිපි  දෙක  හාස්‍ය ය මුසු ඒවා වුවද ඒවායින්  සිදුවීම් පෙළ ගැසෙන හැටි තේරුම්යන්නට  ඇතැයි සිතමි. ලන්ඩනයේ පැවති දෙවන සමුළුවේදී අනුර කුමාර දිසානායකට පිළිගැනීම ලැබුනේ අනාගත ජනපති ලෙසය .  

ඔහුගේ කතාව මම සම්පුර්ණයෙන් ම අසා  සිටියෙමි .  ඔහු කිසිම තැනක වචන වරද්දා  නොගත් අතර තමන් පිහිටුවන අනාගත රජයට ලේබල් ගැසීමක් ද නොකළේය . 

 

 පසුව ඉතා අහම්බෙන් මට අනුර කුමාර දිසානායක වෙන්ඩ  ජනාධිපති සහෝදරයා යහළුවෙකුගේ නිවසේදී හමුවුණි .   එහිදී අමුතුවෙන් රඟපෑමක් නොකළ ඔහු කහට තේ කෝප්පයකින් සප්පායම් වෙන අතරේ තමාගේ ඉදිරි වැඩ පිළිවෙල හා අමාරුකම් ගැන සමාලෝචනයක් කළේය. ඔහු කතා කලේ බොහෝ සන්සුන්ව අමුතු රඟ දැක්වීමකින් තොරවය.    

යන්න ළං වෙද්දී මම අප තම්බමින්  සිටි  රුසියානු පිල්මේනි වලින්  කිහිපයක් දීසියකට දමා   කෑමට ආරාධනා කලෙමි. ඔහු එකක් කන්නට යද්දී ආරක්ෂක සගයා  වහා එකක් රැගෙන මුවේ රුවා  ගත්තේය .  ඔහු ඉතා නිවැරදිය .  අපව විශ්වාස කරන්නේ කොහොමද?  හමුවුණෙත් එදාමය . 

අනුර සහෝදරයා පිල්මේනි කෑල්ලක් කා , " ෂාහ් මේව රහයි නේ .  කලින්ම දුන්න නම් කාල යන්න  තිබුනා. ආයේ ආපු වෙලාවක කමු"   යැයි පැවසිය. 

මට හිතුනේ අනුර කුමාර සහෝදරයා පරණ සෝවියට් සාහිත්‍යය කියවූ පරපුරේ නොව ඉන් පසු පරපුරේ විය හැකි බවය .  බොහෝවිට ඔහුගේ රජය නවතාවයක් සිරිලකට රැගෙන එනු ඇත.

නැවත පැමිණි විටෙක ඔහුට අප හමු නොවනු ඇත්තේ ඒ පැමිණෙන්නේ රාජ්‍යයේ නායකයා  නිසා  හමුවන්නට  බොහෝ අය සිටිය හැකි බැවිනි .  

ජනාධිපති වීමට කලින්  අහම්බෙන් ගත්  කලින්  සෙල්ෆිය පල කරන්නට නොසිතා සිටියද එය  පල කරන්නට සිතා ගතිමි .  එය  ගත්තේ ජූනි මාසයේදීය. 

මා ගන්නා ස්ථාවරය  නිවැරදි එකක් යයි දැනගත හැක්කේ තව අවුරුදු පහකින්ය.

- අජිත් ධර්මකීර්ති  - 20/10/2024