ලංකාවේ ලිබරාටි බයියන් , රබයියන්, සබයියන්, ජබයියන් සහ පෙබයියන් - මුන් ඔක්කොම බයියෝ මල්ලි

ඉවත් කරන ලද ලිපිය සුළු වෙනස්කම් සහිතව නැවත  පළ කලෙමි.

ලංකාවේ සමහර ලිබරල් කියල පෙන්නගෙන ඉන්න එවුන් ගැන කලකිරීමටත් වඩා මට දැන් ඇත්තේ  දැඩි සැකයකි. 

 

මේ ලිබරාටි උන්ගන් සමහරු "අනේ ජෙරී අයියා /මල්ලි වැරදි දෙයක් කීවේ නැහැනේ" කියාගෙන ජාම  බේරා දීමට හදැති. සමහර විට  ඔවුන්ගේ  වෙබ් අඩවි පවා දුවන්නේ ඒ සල්ලි වලින්  වීමේ සම්භාවිතාව නිසා විය හැක. . මේ ලිබරාටිලාගෙන් සමහරු කාන්තාවන්ට ගේ රැකියා ආදියේ දී සමතැන් දීම  පිළිබඳවද දරන්නේ අමුතු ප්‍රතිගාමී අදහස් ය. මේ ඉන්නේ ලිබරාටි  බයියන්ය. 

රාජපක්ෂ බයියන් දැන් රනිල් නිසා රබයියන් වී ඇත. රබයියන් ආණ්ඩුවේ ඕනෑම තීරණයකට එකඟය. බදු ගැහැව්වද කමක් නැත. රබයියන් රනිලේ ගේ ප්‍රගතිශීලි තීරණ වලට මෙන්ම  මර්දන කාරී නීති වලටද එකඟය. 

  

 ජවිපෙ ලේබල් ගහගෙන  සිටින ජබයියන් සිටිති.  ජෙරෙමියාහ්  කේස් එකේදී බොදු බලේ සහ සිංහල ජාතිවාදය පෙන්වා ජෙරී අයියා බේරීමට පෝස්ට් දමති. බොදු බලේ , ඩෑන් ලා සහ මෙකී  නොකී ජාතිවාදී සංවිධාන, ඕනෑම ආගමික අන්තවාදී සංවිධානයන්   , ආගමික බොරු දෙසන්නන්, ඔය සියල්ලන්ටම එක සේ විරුද්ධ විය යුතු බවට ජබයියන්ට තේරෙන්නේ  නැත.

ලඟදි යහළුවෙකු දැමූ පෝස්ට් එකක කියැවුනේ මුන් හැමෝටම අධික බදු ගැසිය යුතු බවය. ඒ අදහසට මම සම්පුර්ණයෙන්ම එකගය. ජෙරී අයියා , හුලන්වේදා අයියා , උඩු මෙව්නාවේ අයියා  ඇතුළු සියල්ලන් ගෙන්ම  බදු ගැසිය යුතුය.

මුස්ලිම් හෝ වෙනත් සුළු ජාතික යන් ගේ අතින්, ඔවුන්ගේ ලිඩර්ස් ලා අතින්  වැරැද්දක් කරන්නේ නම් එය නොදැක්කා  සිටින බයියන්ද සිටිති. පෙබයියන් බොහෝ විට තමන් වඩා ප්‍රගතිශීලි බවත් කුමාර් අයියා ඒ කාලේ  යුද්ධයට පක්ෂ වුනාට අපි දැන් යුද්ධයට විරුද්ධ බවත් පෙන්වමින් පෙරටුගාමී පෝස්ට් දමති. එසේම සමහර  හාමුදුරු ගොල්ලන්ගේ   වැරදි පමණක්  පෝස්ට් කලාට අනිත් දේවල් නොදැක්කා සේ සිටිති. එසේ  සිටින අයට කියන්නේ පෙබයියන් කියාය.

අන්තිමට බලාගෙන ගියහම මුන් ඔක්කොම බබයියන්ය.  

අන්තර්ජාලයෙන් උපුටා ගන්නා ලදී.

එංගලන්තයේ කම්පැනි හවුස් වෙබ් අඩවියෙන් ඕනෑම කෙනෙකුට ලබා ගත හැක. 

පහත සඳහන් විස්තරය විකිපෙඩියා වෙබ් අඩවියෙන් ඕනෑම කෙනෙකුට ලබා ගත හැක.

Uebert Angel (born Uebert Mudzanire;[4] 6 September 1978) is a controversial British-Zimbabwean Businessman who has been implicated in fraud, money laundering and racketeering after undercover journalists filmed him arranging to smuggle gold and cash using his diplomatic passport.[5] His name appears on a US Department of Justice list along with 9,612 other people who paid for fake degrees.[6][7] He is an evangelical preacher and the founder of Spirit Embassy, a Pentecostal ministry in the United Kingdom.

He is also the Presidential Envoy and Ambassador At Large for the country of Zimbabwe to Europe and the Americas.[8][9] He is commonly referred to as Prophet Angel[10] and also formerly known as Uebert Angel Mudzanire.[11][12][13][14]The church was founded in 2007 as "Spirit Embassy" and in October 2015 it rebranded its name to "Good News Church", retaining "Spirit Embassy" as a term for Angel's overall ministry.[15][16]

https://find-and-update.company-information.service.gov.uk/company/10300131/filing-history

https://en.wikipedia.org/wiki/Uebert_Angel

ඌබට් අයියයි ජෙරෝමි මල්ලියි - චාන්සලර් ජෙරෙමියි

ඌබට් අයියයි ජෙරෝමි මල්ලියි - චාන්සලර් ජෙරෙමියි *******************************************************

ජෙරෙමි මල්ලි හෙවත් පාස්ටර් ජෙරෙමි ගැන හුඟක් කතා වෙන නිසා වෙබ් සයිට් එකට ගිහින්  බැලුව. සාමාන්‍යයෙන් ජෙරෙමිලා බුද්ධාගම, ක්‍රිස්තියානිය  ගැන කියන කතා හෝ  හුලන්දාව, උඩුමෙව්නාව  ආදියේ කට්ටිය කියන කතා මම වැඩිය ගණන් ගන්නේ නැහැ. මොකද ඔහොම  එක පාරටම උඩට නැගලා  එන, මාර ලස්සනට  තර්ක කරන, හොඳ  ගොඩ නැගිලි,  වගා ගොවිපළ  ආදිය තියෙනවා කියන්නේම  ලක්ෂ 50 හේ ගොඩ නැගිල්ලට ලක්ෂ 100 දාල 50 ක් පුණ්‍යාධාර හැටියට සුද්ධ කරලා දෙන තැන් කියල හිතෙන  නිසා.   

හරි දැන් කියන්න ගිය කතාව. ජෙරෙමි මහත්මයා ගේ වෙබ් අඩවියේ තියෙනවා එතුමාණන් වහන්සේ එංගලන්තේ ආගමික විශ්ව විද්‍යාලයක  චාන්සලර් හෙවත් කුලපති කෙනෙක් කියල. " He is the Chancellor of Osborne University of Theology, UK, appointed by his Spiritual Father, Prophet Uebert Angel." ගිහින් බැලුවා. 

එහෙම විශ්ව විද්‍යාලයක් තියනවද කියල. තියෙනවා නේන්නම් වෙබ් එකේ හෙවත් වර්චුවල් අවකාශයේ. ඒකේ  නිර්මාතෘ ඌබට් අයියා හෙවත් පපට් සොරි සමාවෙන්න ප්‍රොපට් ඌබට් ඒන්ජල්. අනාවැකි කියන හෙවත් වක්තෘ  ඌබට් ඒන්ජල්. එයා ඉන්නේ සිම්බාබ්වේ කියන රටේ. පට්ට දූෂිත පාලනයක් තියන අප්‍රිකාවේ රටක්.  බලමු මේ කවුද  කියල.  ඌබට් අයියා ලෙහෙසි පහසු පොරක් නෙමේ. මේ එයා  ගැන ලියල තියෙන එක,  ඒ වෙබ් එකේ. 

"Citizen and resident of the UK, Angel went on to attend Salford University in Greater Manchester. He received two degrees in Finance, achieving student of the year on campus. 

He is the author of eight books, including best-seller “Prayer Banks”. His most recent book, “Good News”, and top sellers “Supernatural Power of the Believer” and “Gods Medicine.”" මෙයා ඇවිල්ල සිරාවට පොරක් .  ඩිග්රි දෙකක්ම තියෙනවා.  මයින්ද රාජපක්ෂ මාතියත් ෆොටෝ එකක්  අරන් තියෙනවා එයා එක්ක. එයාට ඉතින් කැමරාවක් පෙන්නුවා කියන්නේ ඕනෑ ෆොටෝ එකකට ඔලුව දානවනේ.  දැන් මේ වෙබ් එකේ තියෙනවා ජෙරෙමි මහතා  ඒ විශ්ව විද්‍යාලේ කුලපති කියල. 

ඒ වුනාට  ඒකෙ තියෙන ගොඩ නැගිල්ල නම් වෙන විශ්ව විද්‍යාලයක එකක් වගේ පෙනෙන්නේ. 

මේ තියෙන්නේ පින්තුරෙ.

නියම විශ්ව විද්‍යාලයක් නේ. හැබැයි ඔය ගොඩ නැගිල්ල  තියෙන්නේ එංගලන්තයේ   ලිවර්පූල්  වල කියල තමයි ගුගලයා කියන්නේ.  මේ තියෙන්නේ ඇත්ත පින්තුරේ. 

ඒක උස්සල තියෙන්නේ මේ වෙබ් අඩවියෙන්.ෆොටෝෂොප් කරලා  තමන්ගේ විශ්ව විද්‍යාලයේ නම දාල වග පේනවා . මේ විශ්ව විද්‍යාලයේ, ගොඩ නැගිල්ලක් නැහැ. තැනක් නැහැ. තව හෙව්වා.(මේවගේ ඒවා ගොඩක් ලංකාවේ ලියාපදිංචි වී තිබෙනවා. එංගලන්තයට සම්බන්ධයි කියල. ඒක නිත්‍යානුකුල වෙන්න පුළුවන් ලංකාවට)  OSBORN INST. OF THEOLOGY LTD   Company number 10300131 කියල කම්පැනි එකක් ලියා පදිංචි කරල තියෙනවා එංගලන්තේ.පවුම් 100 කට. ඒක මෙහෙ පුළුවන් කරන්න. මිනිත්තු පහයි යන්නේ.   කම්පැනි එක ලියා පදිංචි කරලා තියෙන්නේ ඌබට් අයියගේ බිරිඳ ගේ නමින්. මිසිස් බෙවර්ලි ඒන්ජල්. ඔය උඩ ම පින්තුරේ ජෙරෙමි යි එයාගේ බිරිඳයි එක්ක ඉන්නේ එයා.  

වැඩේ මේකයි. මේ කම්පැනි එක තහනම් කරල තියෙන්නේ 2018 දී . මේ තියෙන්නේ විස්තර.

මේ තියෙන්නේ කම්පැනි හවුස් එකෙන් යවපු ලියුම. මේ මහත්තයා නැති  විශ්ව විද්‍යාලයක කුලපතිද එතකොට?

ගරු සිම්බාබ්වේ තානාපති අනාගත වක්තෘ  ඌබට් අයියා ලෙහෙසි පහසු කෙනෙක්  නෙමේ. විකිපෙඩියා එකේ තියෙන විධිහට ඌබට්ටා මහතා පට්ට පොරක්. මුදල් විශුද්ධි  කරණයට සහ හොරෙන් රත්රන් පැන්නීමට අහු වෙලා තියනවා මිනිහගේ තානාපති ගමන් පලපත්‍රය   භාවිතාකරලා. ඒ මදිවට  ඇමෙරිකන් අධිකරණ දෙපාර්තමේන්තුව කියනවා එයාගේ උපාධි බොරු  ඒවා කියල.  මේවානම් තනිකර ඇමෙරිකන් කුමන්ත්‍රණ වෙන්න පුළුවන්. අනික කවුද විකිපෙඩිය එකේ තියෙන ඒවා විශ්වාස කරන්නේ. බොරුවට මිනිසුන්ට පද හදනවා වෙන්න පුළුවන් ඉතින්. 😂

මේ තියෙන්නේ විකිපෙඩියා ලින්ක් එක ගිහින් බලන්න:

Uebert Angel (born Uebert Mudzanire;[4] 6 September 1978) is a controversial British-Zimbabwean Businessman who has been implicated in fraud, money laundering and racketeering after undercover journalists filmed him arranging to smuggle gold and cash using his diplomatic passport.[5] His name appears on a US Department of Justice list along with 9,612 other people who paid for fake degrees.[6][7] He is an evangelical preacher and the founder of Spirit Embassy, a Pentecostal ministry in the United Kingdom.

He is also the Presidential Envoy and Ambassador At Large for the country of Zimbabwe to Europe and the Americas.[8][9] He is commonly referred to as Prophet Angel[10] and also formerly known as Uebert Angel Mudzanire.[11][12][13][14]The church was founded in 2007 as "Spirit Embassy" and in October 2015 it rebranded its name to "Good News Church", retaining "Spirit Embassy" as a term for Angel's overall ministry.[15][16]

මේක ලිව්වේ අජිත් ධර්මකීර්ති නොවේ. කවුරුහරි ඇනෝ කාරයෙක් හැක් කරලා මේකට දාලා ඇත.

වෙබ් අඩවි:

https://oitcer22.acadle.com/

https://www.liverpool-limo.co.uk/graduation-limo-hire.html

විස්ස විද්‍යාලේ කුලාපති 

ඌබට් 

කම්පැනි විස්තරේ 

ඉඩම් හිමි වැවිලිකාර අම්මණ්ඩි ගේ කතාව

එක අම්මණ්ඩි කෙනෙක් හිටිය අපේ පළාත් වල ඇලිස් කියල.  හුඟක් මිනිස්සු අත්තටාම බොහොම කැමති වුනා මෙය රැහේ නායිකාව වගේ ඉන්න එකට. හැම දෙනාම කීවේ ඇලිස් අම්මණ්ඩි  හරිම  නිහතමානී කියල.  ඇයට ඉඩකඩම් අති විශාල ප්‍රමාණයක් තිබුණ. ඒ වගේම පළාතේ යාන වාහන, ලොකු ගොඩ නැගිලි, කර්මාන්ත ශාලා පවා එයාට අයිතියි. හැබැයි එයාට ඒවා අයිති වුනේ එයාගේ තාත්ත ගෙන්. එයා හම්බ  කරපුව නෙමේ. ඒ මදිවට එයා බදුත් ගැහුවා පළාතේ මිනිසුන් ගෙන්. එයාගේ වතුවල , කම්හල් වල වැඩ කරාට විතරක් නෙමේ. එයාලව බලා ගන්නවටත් එක්ක.  

 ඇත්තටම කියනවා නම් එයට උරුම වෙච්ච ධන නිධාන එයාගේ තාත්ත ගෙත් නෙමයි. තාත්තට හිටිය සහෝදරයෙක්.  සහෝදරයාට තමා ඇත්තටම අයිතිය තිබ්බේ. මිනිහගේ නම එඩී උන්නැහේ වගේ මගේ මතකේ. එඩිලම හැටහුටාමාරක් ඒ පවුලේ  හිටියනේ.  මිනිහට පළාතේ මිනිස්සු කීවේ අටවන එඩී කියල. (අටවන ජනපති සමග පටලා නොගන්න)  ඔය එඩි ටත් ඒවා අයිති වුනේ නිකම්ම නොවේ. පවුලේ පරම්පරාව දන්නා බබා සිංඤෝ කියන විධිහට (බබා සිංඤෝ  ට ගමේ කොල්ලෝ කුරුට්ටෝ විහිළුවට කිවේ බීබීසී කියල) විට්ටෝරියා මැණිකේ කියල පරම්පරා දෙක තුනකට කලින් හිටිය තැනැත්ති ලු වැඩියෙන්ම ධනය ගොඩ ගැහුවේ. ඉඩම් බලෙන් අල්ල ගත්තේ. කොටින්ම  උන්ගේ ඉඩම් ගාවින් බෝට්ටුවක් , නැවක්  ගියත් ගහල අල්ල ගන්න මාෆියාවක් හිටියලු. ඒවල වස්තුත් විට්ටෝරියා මැණිකේ අම්මණ්ඩි ගේ පෙට්ටගමටම ලු ගියේ. 

හැබැයි එඩී කියන්නේ පවුලේ චාරිත්‍ර වාරිත්‍ර සත පහකට ගණන් ගත්තේ නැති එකෙක් නිසා කෝමාරිකා ජනපදෙන් රොඩී කෙල්ලක් සහේට ගත්ත. පවුලේ එවුන්ට  මේකට මළ පැනල ඌව රටෙනුත් එලෙව්ව. අනේ ඉතින් එඩි අර ජනපදේම රොඩී කෙල්ලගේ තුරුලේ මැරුණා.  එඩි ට පවුලේ  වස්තුවයි රැහේ නායක කමයි ලැබෙන නිසා අනිත් උන් අපේ ඇලිස් ගේ තාත්ත ජෝර්ජි පොර්ජි ට ස්පෙයාර් වීල් කියලත් ඒ කාලේ කීවයි කියල අපේ බබා සිංඤෝ කියනව. .ඒ කීවේ අමතරයා කියන එක.  හැබැයි එඩියට වෙච්ච වැඩේ නිසා ඇලිස් ගේ තාත්ත රැහේ නායකයා වුනා නිකම්ම් වගේ . හැබැයි යි මිනිහත්  කලින්ම අනිත් ලෝකෙට ගමනක් ගිය නිසා අපේ ඇලිස් අම්මණ්ඩි තමා රැහේ නායිකාව වුනේ. ඒ මනුස්සය ඒ කාලේ හරි හැඩකාර කෙල්ල.

පොඩි වයසින් නායිකාව වුනාට ඇලිස් බැඳලා හිටියේ සද්දන්ත පවුලක කොල්ලේ වෙච්චි  පිළිපන්හාමි.  මේ දෙන්නට ළමයි හතර දෙනක් ඉන්නවා. ලොකුම එකා ඊළඟට රැහේ නායක කම ගන්න බලාගෙන ඉන්න චාලි. දෙවෙනියා උන්දරේ, දුව ආනා හාමිනේ. එඩී ගේ නම තියෙන පොඩි එඩි තමා හතරවෙනිය. පොඩි එඩිගේ මොළේ නම්  එච්චරම නැහැලු. හැම විභාගේම ෆේල්. සල්ලි ඕන තරම් තියෙන එකේ ඒක වැදගත් නැහැ ඉතින්.   ඒ නිසා  බන්දල දුන්නේ ටිකක්  මොලේ ඇති සොෆි නෝනා කියල නංගි කෙනෙකුට. ඒක කලෙත් ඇලිස් මහා අම්මණ්ඩි. 

ඇලිස් ට හිසරදේ උනේ ලොකු කොල්ල චාලියි,  කෙල්ල අනා හාමිනෙයි, දෙවෙනි පුතා  උන්දරේ කොල්ලයි තමා. උන්දරය එලියට ගියහම අහල පහල ජිවත් වෙන පොඩි කෙළි පැටික්කියෝ ගේ ඇතුළට ගන්න  වෙනවාලු ඒ කාලෙත්   උන්නැහැට මේ දවස් වල නඩුවකුත් තියනවද කොහෙද උමාරිකාවේ පිංචි  කෙල්ලක් අනාථ කොරන්ට ගිහිල්ල. 

චාලියා ඊට එහා. උන්දැට බැඳපු ගෑණු පෙන්නන්න බැහැ. උන්දැ ඒකට නිදහසට  කියන්නේ එයාගේ  අම්මණ්ඩි හරියට ආදරේ කලේ නැති නිසා කියාලු. බදා ගත්තේ වත් නැතිලු ආදරෙන්. එයාව හරියට බදා ගන්නේ බැඳපු  ඇන්ටිලා විතරළු. අම්මණ්ඩි ට වෙන වැඩක් නැතිය මේ ලොකු කොල්ලව බලා ගන්න  අර ඉඩ කඩම් බලන අතරේ නේද? ඒ මදිවට අහල පහල පළාත්  වල ලොකු ලොකු නායකයෝ ඉඳන්  එනව අම්මණ්ඩි බලල යන්න.  ඉතින් චාලි කලේ කමිලියා නෝනේ කියල අහල වත්තක හිටි හමුදාවේ එකෙක් ගේ බිරිඳ කමීලියා නෝනේව,  ඌ හමුදාවේ වැඩට රට ගොහින් ඉන්න අස්සේ දැලේ දා ගැනීම. හැමෝම  කියන්නේ  දහ අට සන්නියම නටල හිටපු කමීලියා නෝනේ චාලිව පටල ගත්ත කියල.

ඔහොම තියෙද්දී අම්මණ්ඩියි පිළිපන් හාමියි චාලිට බන්දල දුන්නේ ඉටි කිරිස් පැටික්කියක්. පුංචි ළමයින්ට උගන්න උගන්න  හිටි කන්‍යාවියක්. මොකද පුරාණ පුස්තක වල ලියල තියෙනවලු දික්කසාද ගැහැණු හෙම රැහට ගන්න බැරිය කන්‍යාවියක් මිසක්ක කියල. ඒ ආපු පැටික්කිගේ නම  දියන්නා නෝනා. හොඳ පරණ වැදගත් පවුලක හැදුන  උනාට මේ ලස්සන පැටික්කි ලෝකේ ගැන මෙලෝ අලබෝලයක් දැන ගෙන හිටි එකියක් නෙමෙයි. චාලිය පරණ පුරුදු චාරිත්තර අත ඇරියේ නැහැ. ඒ අතරේ චාලි ගේ මල්ලි උන්දරයටත් මගුලක් සෙට් කරලා දුන්න සේරා හාමිනේ කියල. ඔය අතරේ තමා අම්මණ්ඩි ගේ පවුලට ජිවත් වෙන්න බදු ගෙවන්න  බැහැ කියල පළාතේ වැසියෝ සටනක් පටන් ගත්තේ. ඒකෙ කොටසක් හැටියට චාලි ගේ අවලමේ යන කතා,  උන්දරේ මල්ලි ගේ දඩයම් චාරිකා ගැන,  දුව අනා හාමිනේ හස්බන්ඩ් ල මාරු කරන ඒවා පොත් වල , පත්තර වල, රේඩියෝ එකේ , රූප පෙට්ටියේ  වැටෙන්න ගත්ත. සේරා හාමිනේ උමෙරිකාවෙන් එක්ක ආපු හාදයෙක් එක්ක  සෙට් වුනා. අර මගුලයි මේ  මගුලයි ඔක්කොම කැඩුන.

චාලිය කමිලියා නෝනා අල්ලන් ඉන්න එක දියන්නා නෝනට තේරුනා. හැබයි  උන් දෙන්නට  දැන් පුතාල දෙන්නෙකුත් ඉන්නව. ලොක්ක විලිසොන්. පොඩි එකා හැරිසොන්. විලිසොන් , හැරිසෝන් දියන්නා එක්ක තමා හැම තැනම ගියේ. මොකද ඉතින් අර වන්සක්කාර චාලිට වෙන වැඩනේ. අම්මණ්ඩිටත් දැන් මළ පැනල ඉන්නේ. ඇයි වැඩේ වෙළඳම්  බලන්නයි,ගෙවල් දොරවල් වලව් ගිනි අරන් ඒවා බලන්නයි, මේ ලොකු වෙච්ච පුත්තුන්ගේ වැඩ බලන්නයි ඔක්කොම උන්දැ නොව කරන්නේ. වැඩේ අමාරු වෙච්ච් ගමන් පිළිපන් උන්නැහ තුවක්කුවත් අරන් කඳු පැත්තට යනවා ගෝන්නු  තැරි  ගහන්න. 

ඕන් ඉතින් දියන්නා කෙල්ලත් රිටන් එක දෙන්න ගත්ත චාලිට. ඉස්සෙල්ලම අස්සයෝ බලන කඩවසම්  ඉලන්දාරියෙක් එක්ක. හුඟක් පළාතේ මිනිස්සු කීවේ හැරිසොන් උගේ පුතා මිසක් චාලි ගේ නෙවේ  කියල. ඒ වුනාට  බබා සිංඤෝ නම් දැනන් හිටිය ඉලන්දාරියා එක්ක රෝන්දේ යන්න කලින් හැරිසොන් හම්බ වුනේ කියල. වැඩේ වණ වෙන්න ගත්තේ මේකේ කෙළවරක් නැති වුණාමල පෝලිමේ එන්න ගත්ත ඉලන්දාරි. කෙලි පැටික්කිත් කොච්චර වුනත් සෑහෙන ජනප්‍රියයි. මොන වැරැද්ද තිබ්බත් මිනිස්සු කැමති එයාට. චාලි , කමිලියා නෝනේ  විතරක් නීම් අර මහා ගෙදර උන්ටත් ඒක ඇල්ලුවේ නැහැ.   අන්තිමේ අම්මණ්ඩි කට්ටියව දික්කසාද කරලා දැම්මෙව්වා. ලොකු පුතා, පොඩි පුතා, දුව ඔක්කොම  පෝලිමේ. මෝඩ එඩී විතරක් මෝඩ හින්දම ද කොහෙද ශේප් එකේ හිටිය. 

 

කෙලි පැටික්කි ගේ රෝන්දේ යන වැඩේ වර්චස් උනේ වෙන ආගමක එකෙක් එක්ක යන්න පටන් ගත්තට පස්සේ. යෝනක කුලේ වෙළෙන්දෙක් ගේ ඩොදියන් කියල චූන් පාන් කොල්ලෙක් එක්ක සෙට්  වුනානේ මේකි.  අනාගතේ රැහේ පාලනේ බාර  ගන්න ඉන්න චාලි ගේ  හිටපු බිරිඳ  වුනත් මේ ගෑනි අනාගත රැහේ නායකයෙකු ගේ අම්ම කෙනෙක් නොව. මොනව කරන්නද, චාලි ඉහල පෙලේ කට්ටියක් එක්ක මොනවා ඇටෙව්වා ද දන්නේ නැහැ, කන්ද උඩරට  පැත්තේ  ගිය වෙලාවක, ඔය දෙමෝදර ද කොහෙද  ගුහාවක් අස්සෙන් යනකොට දියන්නා ගේ කාරෙක හැප්පිලා. ගෑනි යි අර ඩොදියන් නුයි එතනමලු. ඒක හොයන්න ගියොත් පැරිස්සියා කියන පොලිස් කාරයත් මෙලෝ මගුලක් හෙව්වේ නැහැලු මොනවාද උනේ කියන්නවත්. 

මේ වැඩේ වෙනකොට හැරිසොන් කොලූ ට යන්තං දහයයි. විලිසොන් අයිය තමයි එයත්කො පොඩි වුනත්ල්ල ව බලා ගත්තේ . ළමයි බලන්න  ඈත පළාතකින් ගෙනාපු ටිගි නෝනා ත් කොල්ලෝ දෙන්න බලා ගත්ත. ඔය අස්සේ චාලි බය නැතිව කමිලියා නෝනේ එක්ක ගමන් යන්න ගත්ත. මිනිස්සුන් අම්මණ්ඩි ට කියන්න ගත්ත චාලිව  උන්ට එපා කියල කෙලින්ම විලිසොන් මුණුපුරා ට රැහේ නායක කම දෙන්න කියල. විලිසොන් කොලුවත් වැඩේ ලස්සනට බාර  ගත්තේ කතිනා කියල කෙල්ලක් බැඳගෙන. හැබැයි ඒ වෙනකොට අර කන්‍යාවියක් බඳින කතාව හිමින්ම  අයින් කරලා තිබ්බේ. විලිසොන් යන්තන් බේරුනා. නැතිනම්  කතිනා බඳිනවා  බොරු.

 හැරිසොන් නම් කෙලින්ම යකා වුනා. චාලිට, ටිගි නෝනා ට තියා  විලිසොන් අයියට වත් ආම්බන් කරන්න බැරිවුනා. අම්ම නැති වෙච්ච එකේ වාඩුව ගත්තෙම අහල පහල කොල්ලෝ කෙල්ලෝ එක්ක නටන්න ගිහින්. අඩව් කීපයක්ම ඇල්ලුවා.  හැබැයි ඕකෙ  වාසිය ගත්තේ අපේ කමිලියා නෝනා. චාලි  ඒ වෙනකොට ලිඳ ළඟ ඕපා දුප සංගමේ,  බබා සිංඤෝ ගේ බිබී සී කට්ටිය, අහල පහල වතුවල ලවුඩ්ස්පිකර් විතරක් නෙමේ මේල් ගෙනියන අයියල ටිකත්, රේඩියෝ රූප පෙට්ටි ටිකත්  සෙට් කරගෙන.  චාලි යි කමිලියා නෝනයි රැහේ නායක කමට කොච්චර සුදුසුද  කියල අම්මණ්ඩි ටයි පිලිපන්ටයි විතරක් නෙමේ පුරෝහිතයෝ වගේ  ඉන්න එවුන්ටත් කියල දෙන්න  ලස්සනට බෝලේ බැස්සුවා. ඒ තාරේ හීන් සීරුවේ දික්කසාද නෝනලා බඳින්න බැරිය කියල තිබ්බ නීතියත් හිමිට වෙනස් කර ගත්ත. මේක අවුරුදු ගානක් හෙමිහිට හිමිහිට අරන් ගිය ප්ලෑනක් කියල හරියට  බලා හිටිය එකෙකුට දෙන්නෙකුට තේරුනා. ඒ උනාට උනුත්  සද්ද නැතිව  හිටිය. 

හැබැයි විලිසොන් ට කොහොම වෙතත් හැරිසොන් ට වැඩේ ඇල්ලුවේ නැහැ, ඌ කැරලි ගහන්න ගත්ත, අර කොහේදෝ රටක ගාමිණී කියල රජෙක් ගේ සාලි කියල පුතෙක් සැඩොල් කෙල්ලක් එක්ක ගියා වගේ අපේ එකත් සැඩොල් කෙල්ලක් හොයා ගත්ත කියහන්කෝ මේඝනා කියල.  අම්මණ්ඩි අම්මත් නැති හැරිසොන් මුණුපුරාට ඇත්තටම ආදරෙයි. ගෑණි ඒ නිසා ඕන වලියකින් කොල්ලව බේරුවා. උගේ තාත්ත චාලි ට වැඩිය කොල්ල බලා ගත්තේ ආච්චියි පිළිපන් සීයයි. ඉතින් විලිසොන් කොල්ලට වගේම ලොකුවට මගුලක් තියල හැරිසොන් ට සැඩොල් කෙල්ල  මේඝනා බන්දල දුන්න. 

 ඒ වුනාට වැඩේ නිකන් ඔට්ටේලියා පළාතේ අබෝරි කාරයන්ගේ බුමැරන්ගේ වගේ කැරකිලා ආව කියහන්කෝ. සැඩොල් කෙල්ලක් වුනාට ඒකිට හැරිසොන් ට වැඩිය සල්ලි තියනව. අර අම්මණ්ඩි ගේ මහා වලව්වේ කකුල් හෝදන එවුඑවුන් ටයි, පුටු අල්ලන එවුන්ටයි , සට්ටඹි රාල ළාටයි ඔළුව නමන්න මේකි කැමති වුනේම  නැහැනේ. ඔන්න  ලිඳ ළඟ සංගමේ  වැඩේ පටන් ගත්ත. දැන් විලිසොන් කොලුවා, එයාගේ ගෑනි කතිනාගේ පටන්  ඒ පවුලත් හැරිසොන් ට විරුද්ධව පවුලේ උන්ගේ පැත්ත ගත්ත. පවුලේ හැරිසොන් ට පස්සේ පේලි වල හිටපු නෑදෑයෝ රොත්තත් අම්මණ්ඩි ගේ සල්ලි වලින් ජිවත් වුනාට උන් කැමති වුනේ නැහැ සැඩොල් කෙල්ලට ඔලුව නමන්න. වැඩේ දෙල් වේගෙන ඇවිල්ල  කුණු කොස් වුනා. විලිසොන් කෙල්ලව අරගෙන මුදෙන් එහා පැත්තේ කෝමාරිකා ජනපදේට  පැන්න. පිළිපන් හාමි කලින්ම ගියා අනිත් ලෝකෙට. මහ අම්මණ්ඩි ටත් කර ගන්න දෙයක් නැතිව ගියා. උන්දැත් නොඑන ගමන් ගියා.

ඕන් ඊයේ පෙරේද චාලි මහ අම්මණ්ඩි දාල ගිය මහා පුටුව භාර ගත්ත. හැරිසොන් කොල්ලත් තාත්ත පුටුවට පනිනවා බලන්න ආව . මොකද ඒක  ලෙහෙසි  පහසු වැඩක් නෙමේ. තට්ටු හතකකින් විතර පනින්න ඕනේ මිලියන් විස්සක්   විතර පළාතේ මිනිස්සු බලන් ඉන්දැද්දී. ඒ මදිවට රූප පෙට්ටි වලිනුත් ගොඩක් අය බලනවලු. 

හැරිසොන් කොලුවත්  පලවෙනි පේලියේ ඉන්න ඉපදුනු එකා  වුනත් තුන්වෙනි පේලියට දාල තිබිල හිටියලු ඔන්න මහා ගෙදර ගාව තියන පන්සලේ ලොකු සාලාවේ දාපු පුටු පේලියේ.   

මට හිතුනේ අම්මප ඌට මොනවා හිතුනද කියල උගේ අම්ම වෙනුවට කුඩම්ම පුටුවේ වාඩි  වෙනකොට තාත්ත ලඟින්.

ඔන්න ඔහොමයි කතාව  ඉවර වුනේ, මම මේ ටීවී  එකේ සෝප් ඔපෙරා එකක් බැලුව. ඒකෙ කතාව කීවේ.  වෙන මුකුත් හිතන්න එපා ඉතින්.

සියලු නම්ගම් මනඃකල්පිතය 

(අපහාසයට නොව උපහාසයට පමණි) 

- අජිත් ධර්මකීර්ති -07/05/2023

අතුරු නැවතුමක් - stop gap

මේ දිනවල මගේ ෆේස්බුක් වෝලයේ ටැග් කර තිබුණු වීඩියෝ කිහිපයක් නැරඹුවෙමි. මේවා වලට නොයෙකුත් ප්‍රතිචාර ලැබී තිබුණු මුත් සාරවත් විවේචන නුදුටුවෙමි.

ඔබ ජවිපෙ, පෙරටුගාමී, සජබේ  හෝ පොහොට්ටුවේ වේවා මේ ප්‍රචාර වීඩියෝ මගින් අසන ප්‍රශ්න ගැන ඔබටත් සිතෙන්නට ඉඩ ඇත. ඒ ගැන සාධාරණ විවේචන එල්ල කරන්නේ නම් හොඳය. සංවාද ඇතිවන්නේ එවිටය. 

මේවා සියල්ල කාබන් ටීවී චැනලය නමින්  සමබිම පක්ෂයෙන් ප්‍රචාරය කරන ඒවාය.

අරගලයේ තිබූ අනන්‍යතා අර්බුදය - එහෙම එකක් තිබුන කියල මටත් හිතුන. 

A/L ප්‍රශ්න පත්‍ර විරෝධය මාක්ස්වාදීද? තේරුමක් නැති විරෝධයක් කියල මට හිතෙන්නේ. 

වෘත්තීය සමිති යනු නව ත්‍රස්තවාදයක්ද? දන්නේ නැහැ. ඒවා හුඟක් වෙලාවට අපට තියෙන අයිතීන් රකිනවා. එංගලන්තයේ නම් එහෙමයි. හුඟක් වෙලාවට පඩි වැඩිවීම හෙම ගන්න වෙන්නේ වෘත්තීය සමිති හරහා. අසාධාරණ ලෙස ඇස කලොත් උදව් කරන්නේ සමිති උපදේශකයෝ.

ජවිපෙ, පෙසප මෝඩ වම වෙනුවට අලුත් වමක්

(මෙතැනදී ඕන දක්ෂිණාංශිකක් කියන්න පුළුවන් අලුත් වමක් වුනත් මෝඩයි කියල) 

රාජකීය විද්‍යාලයේ නව අර්බුදය සහ ජවිපෙ නීතිය - මම ජනප්‍රිය පාසැල් තියරියට කොහොමත් විරුද්ධයි.

විපුලි යන්නම ගිහින් අවුරුද්දක්

විපුලි ගැන මේ සටහන  ලියන්න හිතාගෙන හිටියේ ගිය අවුරුද්දේ. අන්තිමේදී අවුරුද්දක් ගත වුනේ තේරෙන්නේ නැතිවම වගේ. මම හිතන්නේ මටත් බිරින්දෑ වන ඉනෙස් ටත් විපුලිගේ නික්ම යාම තවම කම්පනය ඇති කරන සිදුවීමක්. 

ගිය මාසේ  අපේ තාත්තගේ උපන්දිනේ තිබ්බ.  පෙබරවාරි විසි පහ. මම තාත්තා ගැන ලියපු ලිපියක් මෙතැන තියනව. තාත්තා යන්න ගියේ තරුණ කාලේදීම,  හුඟක් කලින් කියලයි මට හැම වෙලේම හිතුනේ.  තාත්තා නැති  වෙනකොට හැට දෙකකට  යන්තම් ලඟා වෙලා. ඒ වුනාට විපුලි එයාගේ ළමයි දෙන්න  වන සෙත් සහ උමානි දාල ගියේ හතලිස් නමය ඉවර වෙද්දී.  එයා ඊටත් වැඩිය තරුණයි. මං හිතන්නේ අපි වඩාත් කම්පනය වුනු කරුණ ඒක වෙන්න ඕනේ. 

මම දවසක් 2009 විතර  මගේ දුවල දෙන්න, ශනායායි ශකීරයි අපේ ගෙවල් හරියේ ඇල්බේනි කියන පිහිනුම් තටාකයේ පිහිනන්න එක්කන් ගිහින් එලියට එනවා. එලියට එන තැනම වගේ හෝල් එකේ  දකුණු ආසියානු  පෙනුමක්  ගැහැණු කෙනෙක් කොළ වගයක් තියාගෙන ඉන්නවා. මම ඔලුව දාල බැලුව. කොණ්ඩේ ක්‍රේල් ජැමෙයිකන් පෙනුමක් තියෙන පිරිමි කෙනෙක්  ළමයි දෙතුන් දෙනෙකුට කරාටේ උගන්වනවා. තව ඉන්දියන් කාරයෙක් වගේ උස මහත තරුණයෙකුත් සුදු කරාටේ කිට් එකක් ඇඳන් ඉන්නව. 

ඉතින් පසුව දැනගත් පරිදි ජැමයිකන් කාරයා අර හිටිය ගැහැණු කෙනාගේ හස්බන්ඩ් දුෂාන්ත පෙරේරා . ඉන්දියන් කාරයා  මංජුල  සේනානායක. දෙන්නම ලංකාවෙන් ආපු  ටයෙක්වොන්දෝ මාස්ටර් ල.  ගැහැණු කෙනා විපුලි පලිහක්කාර. පොල්ගහවෙලින් ලන්ඩන් ආපු සිංහල ටීචර් කෙනෙක්.  දුෂාන්ත සහ මංජුල ඊට පස්සේ මටයි , ශානි ටයි,  ශකී  ටයි  ටයෙක්වොන්දෝ ඉගැන්වුවා.  දුවල, විපුලිගේ ළමයි වන  උමානි හා සෙත් එක්කත්, මංජුල ගේ  දුව ස්ටේඵනි එක්කත් යහළුකම් ඇති කර ගත්ත. ඉනෙස්, විපුලි සහ සමන්තා   එක්කත් සෙට් වුනා. එහෙම තමයි ඒ කට්ටිය එකිනෙකා අඳුන  ගත්තේ. මම රතු බෙල්ට් එක වෙනකන්  ඉගෙන  ගත්ත. දුවල දෙන්නම බ්ලැක් බෙල්ට් කරලා සෙකන්ඩ් ඩෑන් වෙනකන් කළා. අපි අඳුනගෙන අවුරුදු 14 කට වැඩියි . 

අපි එකට හොලිඩේ ගියා. එකට පාටි දැම්ම. ඇවිදින්න ගියා. දුෂාන්ත පාටි කිං . පාටි වලට කෑම උයන්නත්  හොඳට පුළුවන්. මගෙයි  විපුලිගෙයි හැම වෙලේම තිබ්බේ දේශපාලන වලි සහ  ආගම ගැන සංවාද.  එක දවසක් විපුලි කියනවා, "මේ  බං අපි දෙන්න මේ අපේ හාමුදුරුවරුන්ට බනිනවා. කරන වැඩ වලට තමයි. ඒත් මුන් දෙන්න  මුකුත් කියන්නේ නැහැනේ උන්ගේ ආගම් ගැන . නිරෝෂ් හෙම (දුෂාන්ත ගේ අනිත් නම) පල්ලිත් යනව. ඔයාගේ  ඉනෙස් නුත් නත්තලට පල්ලි යනවනේ" කියල.  

මමයි විපුලියි බුද්දාගමේ, ඉනෙස් ජර්මන්  ප්‍රොතෙස්තන්ත. දුෂාන්ත කතෝලික. ඒ ගමන මායි  විපුලියි කතා කරගත්ත,  අපිත්  මිට පස්සේ හාමුදුරුවරු  විවේචනය නොකර ඉමුයි  කියල. හැබැයි මම විපුලිට  කීව මට ලියන්න නම් පුළුවන් වෙන්න ඕනේ කියල. 

මම දුටුව දෙයක් තමයි මේ මික්ස් ආගම් විවාහයේදී දුශාන්ත වඩා භක්තිමත් බව. ඒ වගේම කතෝලික යහළුවෝ බණ කියන වෙලාවට හෝ දානයක් වෙලාවටත් සිංහල අය එක්ක සෙට් වෙන බව. 

විපුලි නැති වෙන්න ළඟම කාලේ මට ආරංචි වුනා  විපුලි නොයෙකුත් යැදීම්  සඳහා ළඟ  පන්සලකට යනව කියල. අපි දෙන්න ඒ දවස් වල විවේචනය කරපුව ගැන දන්නා නිසා මට ඒකනම් හිතා ගන්න බැරුව කියා. විපුලි ජෙප්පියක්. ඒ කියන්නේ ජවිපෙ ට තමා සහයෝගය තිබ්බේ. ඉතින් මාත් එක්ක දේශපාලනය ගැන වාද කරනවා හමුවෙන හැම වෙලේම හෝ ටෙලිෆෝන් එකෙන් කතා කරද්දී පවා .මට බනින්නේ දීප්තිගේ ඒවා විතරයි කියවන්නේ කියල. මම එයාට කියන්නේ , 

"නැහැ මම හැම දේම කියවනවා.  ජවිපෙත් දීප්ති ලියනවා  වගේ දේවල් ලියනවනම් මම ඒවත් කියවනවා කියල. ත්‍රිමාණ සඟරාව විතරක් නෙමේ, ඒ  වගේ ලියන තව වෙබ් අඩවි තියනව. පරණ හිරු කට්ටිය කරන විකල්ප අඩවිය, කතිකා, ගාඩියන්   වගේ  ඒවා. ඔයාලගේ අය ලියන්නේ නැති එකනේ  වැරැද්ද කියල. ජවිපෙ නායකයෝ ඉන්නෙත් යන්නෙත් නිකන්  උඩින් උඩින්  වගේනේද  කියල.  ඔය සංවාද  වලට අපි යන්න ඕනේ නැහැ . අපි ඊට වැඩිය බලවත් නේ කියලනේ ජවිපෙ  හිතන් ඉන්නේ. ලෙනිනුත් එහෙම හිටියනම් යකෝ විප්ලවේ වෙන්නෙත් නැහැ. එහෙම නැතිව අනිත් අයට වගේ වෛරයක් මගේ නැහැ " කියල.

 සැකෙවින්ඔ කීවොත් ඔන්න   ඔය ජාතියේ  වාද තමා යන්නේ.  

"එහෙනම්  ඒ ගැන කියල ජවිපෙ ගැනත් මොනවා හරි ලියන්නකෝ" කියල විපුලි කියනව. මම දවසක් ලිපියක් ලියල බ්ලොග් එකේ ලින්ක් එක යැව්වා. බැනුම් ගොඩයි. 

"ඔයා අපිට කිසිම හොඳක් කියල නැහැ. හොඳක් ලියනවා වගේ  ලියල තියෙන්නේ බැනල." 

මං කිව්වේ " උඹ කියවනකොට හරියට කියවපන් කියල. පෙරටුගාමීන් මට  බනින්නෙත් ඔය විධිහටම  තමයි කියල." 

"අනේ මට තේරෙන්නේ නැහැ අජිත්. ඔයා ලියන්නේ ප්‍රහේළිකා" කියල ආයි බනිනවා. 

විපුලිගේ එක ඉල්ලීමක් මට ඉටු කරන්න  වුනේ විපුලි මිය ගියාට පස්සේ. ඒ තමයි ටිල්වින් සහෝදරයා එක්ක කල සාකච්චාව බ්ලොගයේ පළ කිරීම  සහ ලන්ඩනයේ තිබ්බ මාලිමාවේ  රැස්වීමට සහභාගී වීම. 

 පෙරටුගාමී පක්ෂයේ ලන්ඩන් ඉන්න සෙට් එක සංවිධානය කරපු දේවල් හෝ , අගෝරා ගැන ලියපු වෙලාවට ආයි කෝල් කරලා අහනව.

 "ආ දැන් ඔයා පෙරටුගාමී ද කියල."  මාත් එතකොට  අරින්නේ නැහැ.

මම කියනව "මේ පෙරටුගාමීන් හොඳ වැඩවගයක් කරලා තියනවා. අගෝරා  එකෙන් හෙම කරන ඒවා හොඳයි. ඉතින් ලීවම වැරැද්ද මොකක්ද? මොකක් හරි ලීවම එහෙම ලේබල් ගහන එක වැරදියි"

  

මම පෙරටුගාමී රැස්වීම් වලට හෙම ගියේ සේනක නිසා. සේනක ගේ ආදරණිය බිරිඳ නිර්මලී(මධු)  අපේ තාත්ත හිටි රෝහලේ වාට්ටුවේ හිටි නර්ස් නංගි කෙනෙක්.  මල්ලිට හා අම්මට  හුඟක් උදව් කරලා තියෙනවා තාත්තා බලා ගන්න. ඔය කතාව විපුලිට කීවට පස්සේ පෙරටුගාමී වැඩ වලට යන එක ගැන විවේචනය නැවතුනා. ඊට පස්සේ නම් කීවේ - "අනේ මටත් ආසයි  ඕවට යන්න, මට එන්න විධිහක්  නැහැ. වැඩනේ. ජොබ් දෙක තුනක් කරනවා. "  විපුලි හා දුෂාන්ත ගේ විසා ටයිප් එකේ හැටියට මෙහෙ ඉන්න  ගොඩක් අයට නිකන් හම්බවෙන දේවල් ලැබුනේ නැතිවා වගේම වීසා වලටත්  ගෙවන්න ඕනේ වුනා වැඩිපුර. ඒ අසාධාරණ විසා ප්‍රශ්නය  ගොඩක් අයට තිබ්බ. ඒ වගේ රැකියා කරන්න, ගේ දොර ළමයි බලා ගන්න නැත්නම් අනිත් අය වගේම සංස්කෘතික ජිවිතයකට ඔයිට වැඩිය යොමු වෙනවා. 

විපුලි තමයි මට පද්මිණි මාතරගේ  අඳුන්වල දුන්නේ. මගේ "සියාමා" පොත ප්‍රකාශයට පත් කරන්න ගිය වෙලේ. වසන්ති නානායක්කාර  ගැන කීවෙත් විපුලි. පද්මි එක්ක කතා කරලා පොත ගැන ප්‍රචාරයක් දෙන්න. මේ යෙහෙළියෝ  දෙන්න ගොඩක් කල් ඉඳන් දන්නවා. ඒ දෙන්නම දේශපාලනය තමන්ගේ මිත්‍ර සබඳතා වලට බාධාවක් කර ගත්තේ නැති දෙන්නෙක්. 

  

 ඕක සාමාන්‍ය ජවිපෙ, පෙරටුගාමී සෙට් වලට  අදාල කරන්න බැහැනේ. ඒ ගොල්ලෝ හොයන්නේ බලන්නේ එයාලගේ අය ගැන විතරයි. පක්ෂයට යාලු  කෙනෙක් ලියල නම් බර වැඩියි. (හැබැයි අපි ඒවා  ගැන විවේචනය   කලොත් අපි  වැරදියි ඈ)  පක්ෂ  වල අයට විතරයි සෝෂල් මීඩියා සපෝර්ට් එක. එළියෙත් එහෙමයි. හැබැයි කතා කරන්නේ නම් ලංකාවේ ඉන්න ඔක්කොම උන් බේරගන්න. මායි විපුලියි අතරේ ප්‍රධාන වලියක්  යන්නේ ඕව ගැන. "මගේ ප්‍රශ්නය වුනේ , බොලා  දැන් හැසිරෙන්නේ  මෙහෙම නම් උඹල බලයට ගත්තට පස්සේ හොඳටම නෙපොටිස්ම් ප්‍රැක්ටිස් කරයිනේ කියන එක. එතකොට උඹල සහ  මේ ඉන්න එවුන් අතර  තියෙන වෙනස මොකක්ද?"  හැබැයි අපරාදේ කියන්න බැහැ විපුලි  නම් ඔය අපේ දර්ශනී නංගි  වගේ පොහොට්ටු ආධාරකාරයෝ එක්ක බුකියේ පට්ට විධිහට  ඇරගෙන පස්සේ එකට පාටිත්  දානව.  විපුලිගේ මම දුටු හොඳ ලක්ෂනයක් වුනේ තමන් ජේවීපී වගේ පක්ෂයකට ආධාර  කරන  එක ගැන වාද කලාට ඒක හිසට අරගෙන ජිවත් වුනේ නැහැ. හැම අදහසක්ම තියෙන යාලුවෝ විපුලිය හිටියේ. 

 අන්තිම කාලේදී නං පොඩ්ඩක් වැඩි  වුනා විපුලි ගෙන් එන විවේචන. 

"අජිත් ලියනගේ අමරකීර්ති ව ඇඩ් කර ගත්තද. අනේ අපේ කෙනෙක්. කියවන්න හොඳද එයා ලියන ඒවා."  මම අමරකීර්ති මහත්මයාගේ  පොතක් ගැන විචාරයකුත් ලියල ඒ කාලෙම ඇඩ් කරගෙන තියෙන්නේ කියල කීවේ නැහැ ඕන කමින්ම. 

" පිස්සුද බං ඕවට වෙලාවක් නැහැ" කීවම ආයි බනිනවා. ඔයාට දිප්තියි, පෙරටුගාමියි තමා ලොකු කියල. 

ඊළඟ දවසක කතා කරලා  කියනව - "මේ අර සන්නස්ගල ගේ වීඩියෝ එක දැක්කද? 

මමත් කියනවා විපුලිව අවුස්සන්න " මොන වීඩියෝ එකද, ඒ මනුස්සය  සුමානෙකට පන්සීයක් විතර දානවනේ. බ්ලොග් සම්මානෙට ඇවිල්ල රාජිතයට නක්කියක් දාල කට්ටිය අල්ලාගෙන අනුන්ගේ තෑග්ග තමන්ගේ වගේ  දීලා ගිය එක්කෙනානේ, උන් එක පක්ෂේ නේද හිටියේ එකිනෙකා කපා ගත්තට " 

 ඔන්න ආයි බනිනවා. " අනේ තමුසේ යනව යන්න  ඔය රාජිතය පරාජිතයව  මතක් කරන්න එපා.  මේ ඕයි  සන්නා ශෝක්  වීඩියෝ දානවා. පොඩ්ඩක් බලනවා , සිංහල හොඳට උගන්වනවා ළමයින්ට. ඔයාලට  ඕව  පොඩ්ඩක්  බැලුවහම මොකද වෙන්නේ , සිංහල හරි ඉගෙන ගන්න." එතකොට තමයි මට මීටර් වුනේ. විපුලි ලංකාවේදී දේශපාලනය සහ සිංහල ඉගැන්නුව  ටීච නේ. 

මොන ප්‍රශ්න තිබ්බත් විපුලි කට පුරා හිනා වෙලා හිටි  චරිතයක්. ඒ වගේම පාටියකදී  ඉස්සෙල්ලම අපිත් එක්ක සබකෝලයක් නැතිව ඩ්‍රින්ක්  එකක් දාගන්නෙත් , ඉස්සෙල්ලම ඉනෙස් සහ අපේ තවත් යෙහෙලියක් වන ක්‍රිෂාන්ති එක්කත් නටන්න පටන් ගන්නේත්  විපුලි. පාටි එකට ආව  කට්ටිය නටන්න අදින ජීවය තමා විපුලි. අකැමැත්තෙන් ඇඹරෙන ඩිලානිව, මාලිකාව අදිනවා නටන්න කියල. 

අපි කට්ටිය එකට ගොඩක් විනෝද ගමන් ගියා.  විපුලිලා වගේම අපිටත් මෙහෙ වෙන නෑදෑයෝ නැහැ. ඉනෙස් ගේ මුළු පවුලම ජර්මනියේ. මගේ ඔක්කොම ලංකාවේ. හදිසියකට ළමයි තියල යන්න මිත්තනියක්, මුත්තණුවෙක් නැහැ. නැන්දෙක් මාමෙ  ක් නැහැ.  ඉතින් අපේ මිත්‍රත්වය වැඩි වෙන එක අනිවාර්යයි. 

මේක ලියන කොට ඉනෙස් මතක් කළා තව දෙයක්. අපි සංචාරයකට ගියා වේල්සයට. ස්නොව්ඩොනියා කන්ද නගින්න ගියහම විපුලි බූට් දෙකක් අරන් ඇවිත් නැහැ. සැන්ඩ්ල් දෙකෙන් මුළු කන්දම නැග්ගා. 

විපුලිගේ එක දක්ෂතාවයක් තමයි හැමෝම එක්ක හොඳ සම්බන්ධතාවයක් තියා ගැනීම. දුෂන්තත් එක්ක එකතු වෙලා මොකක් හරි පාටියක්, පොඩි අවුරුදු ක්‍රීඩා තරඟ ටිකක්, පික්නික් එකක් සංවිධානය කරන කොට  විපුලි හා දුෂාන්තට ඉන්න  යහළුවන් පරාසය පේනවා.  

අන්තිම කාලේ විපුලි අරගලයට සම්බන්ධ කණ්ඩායම් වලට සෑහෙන සහයෝගයක් දුන්න කෙනෙක් . අමාරුවෙන් හරි මුදල් වලිනුත් සැහෙන්න සම්මාදම් වෙලා තියනවා. යන්න වෙලාවක් නැතිවුනා කියල කීවත් සමහර උද්ඝෝෂණ වලටත් ගිහින් තියනව. හැබැයි  දැන් හිටියනම් පලු යන්න බනියි, ඊට පස්සේ එක එක වේදිකා වලට නගපු උන් දැකල .😆

විපුලි හොඳ  යාලුවෙක් වෙන්නේ,  නැති තැන යාලුවෙකුට බනින්නේ නැති, යාළුවෙක්ව ආරක්ෂා කරන චරිතයක් නිසා. විපුලි මට වුනත්  වෙන කා ගැනවත් වැරැද්දක් කියල නැහැ. 

විපුලි හදිසි අනතුරකට මුහුණ දුන්නේ අප්‍රේල් 14 අවුරුදු දවසේ. මගේ උපන්දිනේ 15. මම ඇත්තටම ඊයේ පෙරේද   හිතුන "මම නැතිව එහෙම  උඹලට පාටි දාන්න දෙන්න පුලුවන්ද, පන්සලට දානයක් දීපන් " කියල විපුලි අර සරදම් හිනාව දාගෙන ඉන්නව ඇති  කියල ඉන්න තැනක.  මං දන්නා  විධිහට ටීචින් කෝස් එකකට යන්න ලැහැස්ති වෙලා හිටියේ.  ඒකට යන්නේ නැතිව මෙහෙ ටීචින් කරන්න බැහැ.

 විපුලි "ඇට මැස්සා" පොත ඉංග්‍රීසියෙන් කියවන්න පටන් අරන් තිබුන.   ඒකෙ පිටුවක ලියල තිබ්බ "එවිට මම වාසනාවන්ත මැස්සෙක්මි ජීවත් වුවද මිය ගියද " කියල එයාගේ අත් අකුරෙන්.. පහල තියෙන්නේ එයාගේ අකුරු. 

දුෂාන්ත, උමානි හා සෙත් එකතුව  බණක් කියල   දානෙකුයි දෙන්න ලැහැස්ති කරල තියෙන්නේ. විපුලි නිවන් පතාගෙන ගියාද නැත්ද  දන්නේ නැහැ. 

ඒත් බං විපුලි ,  ඔය වෙන කොහේ හරි ග්‍රහ ලෝකෙක ඉපදිලා කැමැති පරිදි සුළුවෙන්  විස්කි ඩිංගක්   දාගෙන නටාගෙන හිටපන් බං. ආයේ මේ ලෝකෙට එන්න එපා. 

-- අජිත් -06/04/2023

අහෝ පැරකුම් නොදිටි මොක්පුර or is he really sees what Deepthi saw

අජිත් පැරකුම් ජයසිංහ හෙවත්  පැරා දීප්ති කුමාර   ගුණරත්න  එක්ක "පත්තරෙන් එහා" සාකච්චාවක් දාල තිබ්බ. යූ බටේ. ඊයේ තමා ඇහුවේ. පැරා මේ දවස්වල අම්බානක බැනුම් අහනව රනිල් ට රෙදි නැතිව කඩේ යනව හෝ ආණ්ඩුවට කඩේ යනව කියල. මම දන්නා විධිහට දීප්තිත්, පැරත් දෙන්නම් රාජපක්ෂ ක්ලෑන් එකට විරුද්ධයි. මේ දෙන්නම මම දන්නා කාලෙක ඉඳල දෙමළ ජාතියේ ස්වයං නිර්ණයට පක්ෂාපාති වෙච්ච, සිංහල දුටුගැමුණු,  කාලිංග මාඝ/එළාර  ප්‍රභාකරන්  යුද්ධයට ඒ කාලේ ඉඳන්ම රෝහිත භාෂණ , වෙඩ්ඩලා වගේම විරුද්ධ වුන දෙන්නෙක්. ඒ කාලේ ජවිපෙ (සහ වර්තමාන කුමාර්ගේ ගුණරත්නම් ගේ  පෙසපද  ඇතුළුව) යුද්දෙට සහ රාජපක්ෂල ට ෆුල් සප් එක දුන්න එන්ටිටි එකක්.   එතකොට දැන් ඒ කොටස් දෙක වර්මාන අරගලයේ කොටස් කරුවෝ වෙලා ත්‍රස්ත විරෝධී පනතට විරුද්ධ වෙලා යාපනේ මිතුරෝ වෙලා. වසන්ත මුදාලිගේ යාපනෙත් ගියා  අන්තරේ වෙනුවෙන්.  පට්ට අවුල් වගේ නේද? අපි උඹලට ගැහුවා ඉස්සෙල්ල. දැන් වරෙල්ල අපි සාමය කතා කරන කොට වගේ සීන් කෝන් එක්ක නේහ්. මම අර ටිල්වින් සහෝදරයා  එක්ක සාකච්චාවේදී ඇහුවෙත් ඒකයි. ඒ කාලේ රාජපක්ෂලා එක්ක  එකතුවෙලා යුද්දෙට සප් එක දුන්න එකට දැන් පසුතැවිලි වෙනවද  කියල. 

එතුමා නම් කෙලින්ම නැහැ කීව. ප්‍රභාකරන්  සෙත්තපෝච්චි වෙච්චි එකට සමහරක්  දෙමළ ජනතාවත්  දැන් මුකුත් කියන්නේ නැති එකේ වැඩේ ඇත්තටම සෙට්ල් කියල මතු පිටින් පේනවා.

හැබැයි අර දීප්ති පැරා  දෙන්න දැන් රාජපක්ෂ ල රකින රනිල්ට සපෝර්ට් ලු.  එකියන්නේ වක්‍රව රකින්නේ රාජපක්ෂලාව? ඒකද ඇත්ත? 

මට පැරා ව හමුවෙන්නේ අහම්බෙන්.   ඒ කාලේ තිබ්බ අරුණි ශපීරෝ කියල බ්ලොග් එකක්. ඒක තවම ලියනවද දන්නේ නැහැ.ලින්ක් එකක් නැහැ. අර මාලන් රොෂාන් ෆේස්බුක් එකේ රෑන්ඩ් ගැන ලියන කොට මට මතක් වුනේ. මම ඒ කාලේ  අයින් රෑන්ඩ් පොත් වලට  පට්ට කැමතියි.. අරුණි ඒ මතවාදය අනුසාරයෙන්  ලියනවා කියල දැනගෙන ගියා කියවන්න. මට පේනවා අරුණි සහ උදිත මීගහතැන්න කියල දෙන්නෙක් ගුරුවරයෙකුට කොමෙන්ට් වලින් නෙලනවා. ගුරා කියලමයි නෙලන්නේ. අපි සාමාන්‍යයෙන් උපතින්ම පිඩිතයගේ පැත්තෙනේ. අපට උගන්වල තියෙන්නේ එහෙමනේ. නෝ මැටර් වට් දුයිෂෙන් ගේ පැත්ත ගන්න .ඉතින් මම පැරා ගේ පැත්තට බැට් කරා. නමුත් පැරා මාව  සත පහකට ගණන් ගත්තේ නැහැ හැබැයි😀. "ශාස්තෘ" නේ. එයාගේ අනුගාමිකයෙක් කියල  හිතන්න ඇති. අරුණි ට මම පොරොන්දු වුනා "ප්‍රාග්ධනය" කියවල ඊට පස්සේ    Böhm-Bawerk   ගේ පොත් කියවල සාකච්චාවකට එන්නම්  කියල. හැබැයි ඒක වුනේ නැහැ. ප්‍රග්ධනයේ දෙවෙනි වෙළුම තවම කියවන්න බැරි වුනා, අනිත් ඒවාට වෙලාව  කොහෙද?  හැබැයි ඒ දිනවල  හිතිච්ච දෙයක් තමයි , ඇමෙරිකාවේ ඉඳන් ලියන අයටත් , ඇමෙරිකාවේ ගිහිල්ල ආපු අනිත් අයටත්  අර ඇමෙරිකන් අභිමානය තියනව කියල. කියන දේ අපි අහන්  ඉන්න ඕනේ මිසක් වැඩිය තර්ක දාන්න ගියොත්   ඒ අය අවුල් වෙනවා. තරහ යනවා. ඒ අය විවේචනය කරන වාමාංශිකයොයි මෙයලයි අතර වැඩි වෙනසක් නැහැ. බ්ලොග් වල කමෙන්ට් දාන්න ගිහින් බැනුම් අහන්න තියෙනේ ප්‍රවණතාවය වැඩියි. ඒ නිසා මම ඒවාට යනවා අඩුයි.(ඇමෙරිකාන්ස්කි සිරිලන්කිස්කි බ්ලොග් වලට )  මම මේ පීචන් අමෙරිකන්ලා කතාව  ලීවේ ඒ කාලේ ඕකට පිළිතුරක් විධිහට. උදිත මීගහතැන්න ෆේස්බුක්  පේජ් දෙක තුනක් කරණ ජනප්‍රිය චරිතයක් දැන්.   

ඊට පස්සේ මම දිගටම පැරා ගේ W3ලංකා බ්ලොග් අඩවියේ රෙගියුලර් කියවන්නෙක් වුනා. ත්‍රිමාණ එක  ඒ කාලේ ඉඳන්ම කියවනවා.  හැබැයි ඉතින් ඒ කාලේ අරුණි ලා උදිතල කියපු දේම ටිකක් වෙනස් විධිහකට දැන් පැරා කියනකොට මොකද හිතෙන්නේ? 😀

හරි දැන්  වසර දෙක තුනක්  ඉදිරියට එමු. අපි කරපු බ්ලොග් සම්මාන උළෙලේ, මම හිතන්නේ පැරා ගේ බ්ලොගය හැම වසරේම දිනුව හොඳම දේශපාලන බ්ලොගය හැටියට.  ඒ උළෙලවල්  වලදී  මට පැරාව මුණ ගැහුනා. දියත උයනේ තිබ්බ  අන්තිම බ්ලොග් සම්මාන උළෙලට කලින් අපට ස්වාධින රුපවාහිනියේ   වැඩ සටහනකට යන්න ලැබුන. මේ වැඩ සටහන   අපේ බ්ලොග් යෙහෙලියක් සමන් අතාවුදහෙට්ටි අයියට කියල අර  ගත්ත කියලයි මම දන්නේ. ඕකට අජිත් පැරකුම් ජයසිංහත් සහභාගී වුනා. එන්න හිටි සුමිත් කලණසිරි හා තවත් අයෙක් ආවේ නැහැ.  පැරා කැමතිවුනා එන්න. ඉතින් අපි සහභාගී වුනා.

ඔන්න  මට උදේ කෝල් එක්ක එනවා පැරා ගැන. පැරාට  තමයි ආයෙත් අර දේපාලන කැටගරියේ  හොඳම ලිපියට සම්මානය ලැබිල තියෙන්නේ.  ඒකට මුදලින් රුපියල් 15000 ක ත්‍යාගයකුත් තියනවා, ඒ වර්ෂයේ ඒ මුදල දැනට වඩා වටිනවා. (දැන් 35000 විතර) දැන් පැරා ට ඕක දුන්නොත් අපට අපේ අයටම තෑගී දෙනවා කියල චෝදනාවක් එයිලු. ඇත්තටම පැරා සංවිධායක මඩුල්ලේ හිටියෙත් නැහැ. බ්ලොග් විනිශ්චය කලෙත් නැහැ. අර රුපවාහිනී සංවාදයට අපි වෙනුවෙන් සහභාගී වුනා විතරයි. ඩේලි නිව්ස් එකේ ලිපියක පැරා සුමිත් ගාවම ඉඳන් ඉන්නවා. කිරි අප්පට බල්ලෝ පැනපි. අන්තිම අසාධාරණ වුනත් මම  පැරා ට කතා කරලා මම පත්වෙලා තියෙන අසීරු තැන පැහැදිලි කළා. පැරා කැමතිවුනා තෑග්ග හා සම්මානය  අත් හරින්න. ඒක  දෙවනියට දිනලා තිබ්බ  බ්ලොග් අඩවියට ගියා. උළෙලේදී පැරා ඉඳගෙන ඉන්නව දැක්ක. එනිසා තමා මම කවුරු   කීවත් පැරා සල්ලි වලට ලියනවා කියල, ආණ්ඩුවට සල්ලිවලට කඩේ යනව කියල විශ්වාස නොකරන්නේ. ඒ දවස්වල බ්ලොග් ලියු රමිඳු ලක්ඛිත ද කොහෙදත් එහෙම එකක් ෆේස්බුක් එකේ කියල තිබුන. පැරා සල්ලිවලට ලියනවානම් ඒක  කෙලින්ම කියන කෙනෙක් කියලයි මම හිතන්නේ. ශාස්තෘ ම තමයි.  පැරා හැම  වෙලේම ඒක කීව. සල්ලිවලට දුන්නොත් ලියනවා කියල. ඒකෙ වැරැද්දක් නැහැ, ලොකුවට ස්වාධීනයි කියන ගාඩියන් ලේඛකයොත් සල්ලිවලටනේ  ලියන්නේ.

අනික පැරා ගේ ශාස්තෘ පොතයි එළියකන්ද වධ කඳවුර  ගැන පොතයි දෙකම මම කියවල තියනව. පැරාට බනින සමහර අය ඒවා අහලකවත් හිටියේ නැති අය. ඒ වගේ අත්දැකීමක් තියෙන හැම කෙනෙක්ම ආයේ විප්ලවයකට කැප වෙන්න ඕනේ කියල නියමයක්  නැහැනේ. ඒ විඳපු දුක් වලින් පස්සේ සාමාන්‍ය  ජිවිතයක් ගත කරන්න අයිතියක් තියෙන්න ඕනේ. බනින අයගෙන් හුඟක් අය පිටරටවල් වල හොඳ ජොබ්  කරන හොඳට ජිවත් වෙන අය. 

දිප්තියි පැරයි ඒ දවස් වල හොඳ නැහැ, මම දීප්තිට පොත ගැන කතා කරන්න  එන්න කියනකොට හෝ බ්ලොග් සම්මානේ බලන්න එන්න කියන කොට පැරා සහ දීප්ති දෙන්නම ඕක කීව, මගේ තව යහළුවෝ දෙන්නෙකුත් කැමති වුනේ නැහැ දීප්ති ඉන්නවනම් එන්න. ඉතින් මට දීප්තිව එක පාරක් ඇත්තටම හලන්න වුනා එක උළෙලකදී . දීප්ති එක්ක ඉන්නව නම්  යාලුවෝ නැතිවෙන  සීන් එකක් තියෙන්නේ. මොකද දීප්ති හැමෝවම නම් වශයෙන්ම විවේචනය කරන  නිසා .  හැබයි දැන් පැරා කියන්නෙත් ටිකක් එහාට මෙහාට කරලා  දීප්ති කියන දේමයි. 

 ඔන්න දැන් දීප්ති පැරා ව ගෙන්නලා පහුගියදා  පත්තරෙන් එහා වැඩ සටහනට. ඒක මෙතනින් බලන්න පුළුවන්.

දැන් ප්‍රශ්නේ මේකයි. දීප්ති කියනව අනුර කුමාර දිසානායක සමාජ ප්‍රජාතන්ත්‍රවාදී රජයක් හදන්න යන්නේ කියල. මටනම් ඒකෙ වැරැද්දක් පේන්නේ නැහැ, ලංකාවේ දැනට තියෙන මගුලට වඩා නම් හොඳයි. හරි එතකොට ප්‍රශ්නේ තමා සමාජ ප්‍රජාතන්ත්‍ර වාදී රටවල බදු  ගහනව වැඩියි. ස්වීඩනය, ජර්මනිය හොඳ උදාහරණ. ජවිපෙ සහ වෘත්තීය සමිති  විරුද්ධයි. පෙසපෙත් (පෙරටුගාමී), සජබෙත් විරුද්ධයි.  😕

තව ප්‍රශ්නයක්.  ලෝඩ් ලෝව්සන් ඔෆ් බ්ලබි හෙවත් බ්‍රිතාන්‍ය අගමැතිනි මාග්‍රට්  තැචර් ගේ මුදල් ඇමති (චාන්සලර්) තමා බදු අඩු කරලා  ආර්ථිකය ගොඩ ගත්තේ. පස්සේ වෙනත් ප්‍රශ්නෙකට ආණ්ඩුවෙන් අයින් වුනේ. එතකොට ගෝඨාභය රාජපක්ෂ බදු අඩුකරපු එක වැරදිද. නැහැ. අඩුකරපු විධිහ වැරදියි. එයාලට චන්දෙන් දිනන්න උදවව්  කරපු අයට බදු සහන දීල රජයට   ලැබෙන ආදායම අඩු කරල වැඩේ පට්ට අවුල් කළා. ලෝව්සන් එහෙමෙ නෙමේ කලේ. ඉන්ඩිරෙක්ට් ටැක්ස් හෙවත් වක්‍රව බදු ගහල ආදායම ගත්ත.

බදු අඩු කලහම මිනිසුන්ට වැඩිපුර  සල්ලි ලැබෙනවා වියදම් කරන්න. ඒ ගොල්ල වියදම් කරනවා. ට්‍රික්ල් ඩවුන් එකොනොමි කියල කොන්සේප්ට් එකක් තියෙන්නේ. ආර්ථිකය දියුණු වෙනවා. ඕකනේ අපිඅටා කියල දුන්නේ. 

හරි, ප්‍රශ්නේ ඒක නෙමේ. බදු ගහන එක සමාජ ප්‍රජාතන්ත්‍ර වාදී හෝ සමාජවාදී රජයන් වලින් කරන දෙයක් රජයට අදායම වැඩි කරල පොදු සේවා (අධ්‍යාපනය, සෞඛ්‍යය , ගමනාගමනය) වලට යොදවන්න. දැන් ඒක කරන්නේ රනිල් ගේ රජය.  සමබිමේ දීප්ති සහ කඩේ යන  පැරකුම්  සහයෝගය දෙනවා. එතකොට බදු වලට විරුද්ධ? ජාතික ජන බලවේගය. පෙරටුගාමී සමාජවාදී පක්ෂය, එල්ලීගෙන යන අනිත් අය , අන්තරේ හා සජබේ. සජබේ ට ඇත්තටම ප්‍රතිපත්තියක් තියෙනවද  කියන එකත් සැක  සහිතයි.   එතකොට තැචර් ප්‍රතිපත්තියට සහයෝගය දෙන්නේ ලංකාවේ වාමාංශය.

මේ අපබ්‍රන්ශය තේරුම්  ගන්නේ කොහොමද? 

අනිත් පැත්තට තැචර් රාජ්‍ය සේවය අඩු කළා. ඒක තමා  රනිල් කරන්න යන්නේ. දීප්ති සහ පැරා ලා ඒකට සහය දෙනවා කියලා පේනවා . වාමාංශික පක්ෂ විරුද්ධයි. එතැනදී අරක ආයි මාරු වෙනවා. 

නව ලිබරල් ධනවාදයේ දී රාජ්‍යය මැදිහත්වීම අඩු කරලා පුද්ගලික අංශය වැඩි කරන්න ඕනේ. අතිරික්ත සේවකයන් අඩු කරන්න ඕනේ. රාජ්‍යයට අයිති ව්‍යාපාර පුද්ගලික අංශයට දෙන්න ඕනේ. සජබේ දැන් මොකද්ද කරන්න ඕනේ? පියාණෝ කලේ ඔය රනිල් කරන්න හදන ඒවානේ.

ලංකාවේ ජනතාව දැන් කියන්නෙත් වැඩිපුර රාජ්‍ය සේවකයෝ අයින් කරන්න   කියල. ජවිපෙ සහ පෙසපේ ඒකට විරුද්ධ වුනාට ඔය වැඩි හරියක්  රාජ්‍ය සේවකයෝ හැම තැනටම රිංගව්වේ  වාමාංශික පක්ෂ නෙමේනේ. ශ්‍රීලනිපය සහ එජාපය. චන්ද ගන්න.   ඒ ගොල්ලම ඒ අයව අයින් කරන එක හොඳ නැත්ද?

මටනම් මේ ඔක්කොම පට්ට අවුල්. 

- අජිත් ධර්මකීර්ති 06/04/2023

Blogger’s block

     

දෙපතුල් දැවීමේ රෝග ලක්ෂණය සහ කකුල් වල වෙහෙසකාරී බව සුව වීම

කාලයක සිට මගේ දෙපතුල දැවීමක් සහ කකුල් වල පහල කොටසේ එබඳුම දැවිල්ලක්ද ඒවායේ කිසියම් විඩා ගතියකින්ද මම   පීඩා වින්දෙමි.  මෙම ගැටලුව බොහෝ විට රාත්‍රියේදී මා නිදා සිටියදී සිදු වූ අතර, මම රාත්‍රියේදී අවදි වූයේ දැවෙන පාද සමඟය. වේදනාව සමනය කිරීම සඳහා, මම නිදා ගැනීමට ප්‍රථම පාදවල සහ යටි පතුල්  සීතල වතුරේ ඔබාගෙන සිටියෙමි. ඇතැම් විට විවිධ තෙල් වර්ග සහ නොයෙකුත් ක්‍රීම් වර්ගද භාවිතා නිතර භාවිතා කලෙමි. වඩාත්ම කරදරය වූයේ මට සුව නින්දක් නොලැබීමය.

මේ රෝග ලක්ෂණ මොනවා දැයි සෙවීමට හේතූන් ගූගල් කර උපදෙස් ලබා ගැනීමෙන් පසු මම ඉක්මනින් සුවයක් සෙවීම  සඳහා බටහිර වෛද්‍ය විද්‍යාවට යොමු වුනෙමි. ගූගල් විමසීම් වලින් කියවුනේ  අනුව, පාද වල දැවීමේ ගතිය බොහෝ විට ස්නායු ආබාධයක (peripheral neuropathy)  සලකුණක් බවය.  දියවැඩියාව, නිදන්ගත මත්පැන් භාවිතය, ඇතැම් විෂ රසායන වලට නිරාවරණය වීම ,  ඇතැම් බී විටමින් ඌනතාවයන් ඇතුළු විවිධ හේතු තිබිය හැකි බවද කියැවුණි. මීට අමතරව, හෙල්ත්ලයින් නමැති වෙබ් අඩවියක  සඳහන් වූනේ කකුලේ තුවාල හැදීම නිසා, දැඩි ව්‍යායාම, අධික තාපයට හෝ සීතලට නිරාවරණය වීම හෝ විෂ සහිත ද්‍රව්‍යයක් නිසා කකුල් වල දැවෙන සංවේදීතාවයක් ඇති විය හැකි බවයි. එහි සඳහන් වුනේද දියවැඩියාව, මත්පැන් භාවිතය ආබාධ, Guillain-Barré සින්ඩ්‍රෝමය සහ මල්ටිපල්  ස්ක්ලේරෝසිස් (MS) ද මෙයට හේතු විය හැකි බවයි. 

අපේ සර්ජරියේ  වෛද්‍යවරයා මුලින්ම මට  cetirizine නියම කළේ මට යම් දෙයකට අසාත්මිකතාවයක් ඇති වී තිබේ යැයි සලකමිනි.  මගේ රෝගී තත්ත්වය දියවැඩියාව නිසා විය හැකි බවත් ඔහු යෝජනා කළ අතර මට නිදා ගැනීමට උපකාර කිරීමට සාමාන්‍ය  විෂාදයන් ඇති රෝගීන්  සඳහා දෙන බෙහෙත්  වර්ගයක් නියම කළේය. එහෙත් එම බෙහෙත් නිසා මට දහවල දැඩි නිදිමතක් දැනුනි. රැකියාව කිරීමටද අපහසු නිසා මම ඒ ඖෂධ ගැනීම නතර කලෙමි.  මමරැකියාවෙන් ලැබෙන පුද්ගලික සෞඛ්‍ය රක්‍ෂණ සේවයේ විශේෂන්ඥ වෛද්‍ය සේවාවද  මගේ GP දැනටමත් යෝජනා කර ඇති දෙයට වඩා වෙනත් උපදෙසක් ලබා දීමට අසමත් වුනි.

පසුගිය වසරේ සැප්තැම්බර් සහ ඔක්තෝබර් මාසවලදී මම ශ්‍රී ලංකාවේ සිටියදී පානදුර ප්‍රදේශයේ ආයුර්වේද සම්බාහන පහසුකම් සපයන රෝහලකට ගියෙමි. එහි සිටි   ආයුර්වේද වෛද්‍යවරයා හමුවීම මට මග හැරුණද, මට ආයුර්වේද සම්බාහනයක් ලබා දීමට එකඟ වූ මනා පුහුණුව ලත් සම්බාහන වෛද්‍යවරයකු වූ මංජුල ගුරුගේ මහතා මට හමු විය. මගේ යටි පාද සහ පාද වල දැවීමේ ගතියද දෙකකුලේ ආතතිය සහ විඩාව ගැනද  දන්වා එම ප්‍රදේශයන්  කෙරෙහි අවධානය යොමු කරන ලෙස ඉල්ලා සිටියෙමි.

ගුරුගේ මහතා  “මහා නෙල්‍යාධි තෛලය” ට සමාන  ආයුර්වේද තෙල් භාවිත කර මගේ පාදවලට නිසි සම්බාහනයක් ලබාදුනි. එයට පැයක පමණ කාලයක් ගතවිය.   ඉන්පසු ඔහු මා "නික" කොළ ලෙස හඳුනාගත් ඖෂධ පැළෑටි සහිත වසා දැමූ බෙහෙත් ඔරුවක්  සහිත වාෂ්ප කාමරයකට ගෙන ගියේය. ඔහු සඳහන් කළේ මට පෙර ජර්මානු යුවළක් එම ආයුර්වේද ප්‍රතිකාරය රැගෙන නික්ම  ගිය බවයි.  

නික කොළ සහිත වාෂ්ප ප්‍රතිකාරයෙන් පසු, මට ඉමහත් සැහැල්ලුවක් දැනුණු අතර, මගේ ශරීරය සම්පූර්ණයෙන්ම දහදියෙන් පෙඟී තිබුණි.  වැදගත්ම දෙය නම්, මම තවදුරටත් දෙපතුල් සහ  පාද දැවීමේ සින්ඩ්‍රෝමයෙන් අත් මිදීමයි. දෙකකුලේ වෙහෙස ගතිය ඉඳහිට ඇති මුත්ඒ  මා බොහෝ විට දහවල ඇවිදීමෙන් පසුව දැනෙන දෙයක්  නිසා ඒ ගැන කරදර නොවෙමි. ආයුර්වේද  සම්බාහනය සහ ප්‍රතිකාර ලබාගෙන දැන් මාස පහක් ගතවී ඇත. මෙම නිදන්ගත රෝග තත්ත්වයන් ගෙන් මා සුව වූයේ මන්දැයි මට තවමත් තේරුම් ගත නොහැක. එම තෙල් වර්ගයද මංජුල මහතාගේ උපදෙස් පරිදි රැගෙන ආවෙමි. 

මන්ජුල ගුරුගේ මහතා රැකියාව කරන්නේ පානදුරේ කස්තුරිආරච්චි ආයුර්වේද වෛද්‍ය මධ්‍යස්ථානයේ ය. ඔහුගේ දුරකථන අංකය  +94 777547419.  මේ ලිපිය ලිවීමට කලින් මේ තොරතුරු සපයන බව ඔහුට දන්වා සිටියෙමි. 

ref:

Burning feet

Burning Legs

- අජිත් ධර්මකීර්ති 30/03/2023

උපන් දින සුබ පැතුම

ඔබේ ජිවිතයේ ඉතාම වැදගත් දින දෙකින් එකක් වන්නේ ඔබේ උපන් දිනය වන අතර අනික ඔබ උපන්නේ ඇයිද යන්න වටහා ගත් දිනය බව මාර්ක් ට්වේන් කියාඇත.  
කාල් මාක්ස් කියා ඇත්තේ උපන් දින සුභ පැතීම ධනවාදී දෙයක් කියාය. සමහරවිට  එසේ කියන්නට ඇත්තේ බොහෝ අය දුක් විඳිද්දී සුළුතරයක් විශාල මුදලක් වියදම් කර සාද දමන නිසා විය හැක. 

නමුත් උපන්දින සුභ පැතුමක් කරන්නට වියදමක් යන්නේ නැත.

මම බොහෝ  තිස්සේ පවුලේ අයට, ඥාතීන් ට  මෙන්ම දන්නා  හඳුනන  අයට උපන් දිනට සුභ පැතුමක් කරමි.  මොස්කව් හි උගන්නා කාලයේ  පන්තියේ හිටි  ලූදා නම් ශිෂ්‍යාව හැමෝටම සුභ පැතු අතරම හැකි සෑම විටම මුදල් එකතු කර කේක් එකක්  මිලදී රැගෙන විදේශ ශිෂ්‍යයෙකු හෝ ශිෂ්‍යාවක නම්  නේවාසිකාගාරයේ ඔවුන්ගේ කාමරයට අප සියල්ල සමග ගොස් සුභ පතන්නීය. එවැනි  එක සුහද උපන්දින  හමුවකදී ඉරාන ජාතික ශිෂ්‍යාවක වූ ෆරීඩා ට තිබු ප්‍රශ්නයක් ගැන අප දැන  ගතිමු. ඇගේ  ප්‍රශ්නය ට විසඳුමක් ලබන තුරු පන්තියේ උන් ඈ  සමග සිටියහ.  මගේ බිරිඳ ගේ මව සහ පියාද බොහොමයක් ඥාතීන් ගේ හා මිතුරු මිතුරියන් ගේ නම් ගොනුවක් තබාගෙන උපන්දිනයට දුරකථන ඇමතුමක් දෙති. ෆේස්බුක් එන්නට කලින් මටද එවැනි නාම ලේඛනයක්  තිබුණි. ඒ ගූගල් හා මයික්‍රොසොෆ්ට් කැලැන්ඩරය හරහාය. පසුව මේ පුරුද්ද ෆේස්බුක් එකට මාරුවිනි.    

ඒ කාලයේ දවසක මම මදක්  හඳුනන මිතුරෙකුට උපන් දින සුභ පැතුමක් මේලයක් හරහා යැවීමි.  දිනකට පමණ පසු ඔහු ඒ ගැන ස්තුතී කර මගේ මොබයිල් නොම්මරය අසා මේලයක් එවීය.ඉනුත් දෙදිනකට පසු ඔහු මට කතා  කළේය. 

 "අජිත් ඔයා මට පහුගිය වසර කීපයේම මට උපන්දින සුභ පැතුම් එව්වනේ. මම තෑන්ක් යූ කියල නෝට් එකක්  එව්වා විතරයි"

එයට කමක් නැති බව කීවෙමි. හැමෝටම වැඩ රාජකාරි තිබේ. 

 ඔහු පැවසුවේ ඒ දිනයේ ඔහුට සුභ පැතූ එකම කෙනා මා බවය. ඔහුට ප්‍රශ්න රාශියක්  ඇති බවත් සියදිවි නසා ගන්නට පවා සිතෙන බවත් මට පැවසුවේය. ඒ ඇසූ වහාම ඔහුට  මා හමුවී කතා කරන ලෙස දන්වා  එවේලේම හමුවන්නට වෙලාවක් හා පබ් එකක නමක්ද කීවෙමි. සියදිවි නසා ගැනීම් ගැන මිනිසුන් විහිළු කරන්නේ නැතැයි මට සිතුනි.

පබ් එකේ දී ඔහු පැමිණියේ පැය භාගයක් පමණ පරක්කු වීය, ඔහු පරක්කු වීමේ හේතුව  ගැන මොනවදෝ කිවේය. මම බියර් දෙකක් මිලදී ගතිමි.  තමන්ගේ ජිවිතයේ ප්‍රශ්න රාශියක් ඔහු  මා හට කියා පෑවේය. ඔහු ගේ බිරිඳ දරුවන් සමග ඔහු හැර ගොස් ඇත. ඇත්තට ම ඔවුන් සිටි නිවසේ ඇය ජිවත් වී  ඔහුව එලියට දමා ඇත.  ඇය එසේ කලේ ඔහුට රැකියාව අහිමි වීමෙන් පසුව යයි කී  ඔහු, බිරිඳට දෝෂාරෝපණය කළේ ඈ නිසා  රැකියාව අහිමි වූ බව පවසමිනි..ඔහු ජීවත් වන්නේ කවුන්සිල් එකෙන් සහනාධාර  කුලිය ගෙවන කාමරයකය. රැකියා විරහිතයන්ට ලැබෙන සහනාධාරයෙන් ඔහු යන්තමින් ජීවත් වෙයි.

ඔහුත් සමග දෙවන බියර් වීදුරුව හිස් කරන විට වඩා විස්තර එලියට එන්නට විය. ඔහුට රැකියාව නැති වී ඇත්තේ දෙතුන් වරක්ම  ප්‍රමාද වී  සේවා දායකයන් හමුවීමට යෑමෙනි.  ඔහු නරකට වැඩ කරන අයෙක් නොවේ. ඔහු තමන් කළ  රැකියාව පිලිබඳ ප්‍රාමාණික දක්ෂයෙකි. එහෙත් පමාවී වැඩට ඒම හෝ පමාවී සේවා දායකයන් හමුවීමට යාම පිළිබඳව ඔහුට කාර්යාලයෙන් අනතුරු හඟවා තිබුනේ වරක් දෙවරක් නොවේ.  ඔහු බිරිඳට වරද පටවන්නේ දරුවන් පාසැලට ගොස් ඇරලීම ඔහුට පවරා  ඇය කලින් රැකියාවට යන නිසාය. උඹට ටිකක් කලින් ළමයි ගිහින් දාල වැඩට ගියානම් මොකද වෙන්නේ කියා අසන්නට සිතූ මුත් මම එය නොඇසුවේ ඔහු සිටින තත්වය සලකාය. 

ඔහුට දරුවන් බැලීමට ලැබෙන්නේ සතියකට වරක් යයි ඔහු මැසිවිලි නැගීය. දරුවන්ට දැන් සුළු පියෙකු ද සිටි. බිරිඳ පෙම්වතෙකු සොයාගෙන ඇත. බිරිඳට පෙම්වතා කලින් සිටම ඉන්නට ඇතැයි ඔහු  සැක කරයි. මේ සියල්ලම නිසා වේදනාවට පත්වුණු ඔහු දිවි තොර කර ගන්නට තීරණය කර ඇත.   මගේ උපන් දින සුභ පැතුම නිසා මා  හමුවී කතා කරන්නට තීරණය කර ඇත. තමන් ගැන කිසිවෙකු සිතා ඇතැයි යන සිතුවිල්ල ඔහු තුල තදින් ඉස්මතුව ඇත. මට නොකියා නික්ම යාම නුසුදුසු යයි ඔහු සිතා ඇති බවකි.

 

ඔහු මට ඇත්තක් පවසනවාද බොරුවක් ගොතනවා ද යන්න මට සිතා  ගත නොහැකි වුනි.

 

මම ඔහුට ෆුල් මොන්ටි  චිත්‍රපටයේ කතාව කීවෙමි. එහි ඇත්තේ රැකියා විරහිත වුනු පියෙකු තම පුතා බැලීමට යාමට ගන්නා උත්සාහයයි,. දික්කසාද බිරිඳ පුතා බැලීමට ඉඩ නොදෙන්නේ පියාගේ  රැකියා විරහිත කම නිසා මෙන්ම කිහිප වරක්ම පොරොන්දුවී ළමයා බැලීමට නොපැමිණ මග හැරීම නිසාය. ඔහු මග හරින්නේ ළමයාට යමක්ය අරන්  වත්කමක් නොමැති වූ හෙයිනි.  ඔහු ඒ කාලයේ ටැබුවක් වූ පිරිමින් (චිපන්ඩෙල්ස්  වැනි) කිහිපදෙනෙක්  විසින්  ගැහැණු උදෙසා  ක්‍රම ක්‍රමයෙන් සංගීතයට අනුව ඇඳුම් උනන ස්ට්‍රිප් ෂෝ එකක් සංවිධානය කරයි. පොලිසිය පසුපස එලවීම් සිනා උසුළු විසුළු මැද නිකුත් රැකියා විරහිත යහළුවන් සමග ඔහු එය කරන අතර හිටපු බිරිඳ  පවා එය නැරඹීමට පැමිණේ. අවසානයේ ඔහුට  තම පැතුම ඉටු  කර ගනිමින් පුතා කැටුව දවසක් විනෝදයෙන් ගත කිරීමට ඉඩ ලැබේ.

යහළුවාට රැකියාවක් නැතිකම ප්‍රශ්නයක් නිසා ඒ ගැන උනන්දුවන බව කීවෙමි. ඔහු ප්‍රමාද වෙන නිසා ඒ බවක් නොතකන තැනක්ම සෙවිය යුතුය. අනතුරුව මට යහළුවෙකු හරහා ඕනෑම වෙලාවක පැමිණ රැකියාව කිරීමට හැකි සර්විස් ස්ටේෂන් රැකියාවක් සොයා ගත හැකිවිය. උදේ කාලය අතර තුර ඕනෑම වෙලාවක පැමිණ බිල්පත් සැකසීම ඔහුගේ කාර්යයය විය.  ඔහු එය සතුටින් කළ අතර එම අවුරුද්ද පුරා මම ඔහු කිහිප වරක්ම මුණ ගැසුනෙමි. එතනම රැකියාව කල පෝලන්ත තරුණියක්  වන ඇග්නේෂ්කා සමග ඔහු සම්බන්ධයක් ද අරඹා තිබුණි. දරුවන් බැලීමට පමණක් නොව සමහර සති  අන්ත වල බිරිඳම  කතා කර දරුවන් ඔහුට භාර දී තිබුණි. ඒ කාලයේ මම ඔහුගේ එක්තරා ගතියක්ද නිරීක්ෂණය කළෙමි. ඔහුට කිසියම්  දෙයක් කිරීමට ඇති උදාසීන බවයි. පෝලන්ත තරුණිය ඔහුව නිවාඩු රැගෙන යයි. වෙනත් ගමන් , උත්සව ආදිය ට වුවද ඇය කීවේ නැත්නම් නිවසට  වී සිටීම ඔහුගේ සිරිතයි.  ඔහුගේ බිරිඳ සමග සිටියදී කිසිම බිල් පතක් ගෙවීමට ඔහු උනන්දු  නොවූ අතර බිරිඳ ඒ සියල්ලම කලාය. පෝලන්ත තරුණිය වුවද ඔහුගෙන් මුදල් ගෙන ඒ සියල්ල ඉටු කලාය.

ක්‍රම ක්‍රමයෙන්  ඔහු හා මා අතර හමුවීම් අඩුවූයේ අප දෙදෙනාටම වෙනත් වැඩ තිබු බැවින් යයි සිතමි. ඉන්පසු ෆේස්බුක් ගිණුමක් පටන් ගත්  නිසා මම මගේ ගූගල් හා MSN ගෘප් ද නවතා දැමුවෙමි. මට තව දුරටත් උපන්දින සඳහා එන නෝටිස් ගූගල් මේලයෙන් ලැබුනේ නැත. 

අවුරුදු ගණනකට පසු කෝවිඩ් කාලය ද අවසන් ව පැවති මුල් කාලයේ අපේ කම්පැනියේ  අය  සමග නත්තල් සන්ධ්‍යාවකට සහභාගී වුනෙමි. මෙවැනි සමහර සාද  ප්‍රදේශයේ කම්පැනි කිහිපයක් එකතු කොට ඉවෙන්ට් සංවිධාන කරන කම්පැනි විසින් මෙහෙයවන  ඒවාය. මට අර යහළුවා ගේ පෝලන්ත පෙම්වතිය  ඇග්නේෂ්කා ද එහිදී හමුවිණි. මා දුටු වහාම ඇගේ මුහුණ කඩා වැටුණි. මම ඇගෙන් දෙදෙනාගේම විස්තර විමසුවෙමි, ඇය මාත් සමග එම ශාලාවෙන් එලියට ගොස් මධ්‍යසාර සහ අනිකුත්බී ම දෙන ස්ථානය අසල  හිඳ ගත්තේ ලොකු විස්තරයක් කීමටය. ඇගේ නෙත් කඳුළින් බරව තිබුණි. 

"එයාට ඔයාට කතා කරන්න ඕනෑ කම තිබුන. නමුත් ඔයා කාලෙකින් උපන් දින සුභ පැතුමක් වත් එව්වේ නැහැ කියලා කීව."

 මම ෆේස්බුක් ගිණුම ගැන පවසමින්  නිදහසට කරුණු කීවෙමි. මගේ ෆේස්බුක් ගිණුමේ ඔහු සිටියේ නැත. කෙසේ වෙතත් ඈ  පැවසුවේ, මට කතා කිරීමට ඔහු පසුබට වූයේ  ඒ නිසාම නොවන බවය.  බොහෝ කලකින් කතා නොකළ නිසා නැවත  කතා කරන්නේ කෙසේද යන්න ගැන ඔහුට අපහසු බවක් දැනී තිබුණි.  මම ඒ ගැන කවදාවත් නොතකන බව ඇයට පැවසුවෙමි. යහළුවෙකු නම් අවුරුදු  ගණනකට පසු වුවද කතා කළ හැකි විය යුතුය. 

ඇය කී පරිදි ඔහු  නැවතත් තද විශාදයකට පත්ව ඇත. එහි මුලික හේතුව වී තිබුනේ දරුවන්ය.  ඔහුගේ බිරිඳ දරු දෙදෙනා රැගෙන නව සැමියා ගේ රටට ගොස්ය. ඔහු ඔවුන් රටින් යන දවසේ ගුවන් තොටුපලේදීදරු දෙදෙනා වැළඳ ගෙන ඬා වැලපී ඇත. දරුවන්ද වැලපී ඇතත්, එවෙලේ  කෝපයට පත් බිරිඳ දරුවන් උදුරා ගෙන යාමට තැත් කරද්දී ඇගේ නව සැමියා එය වළකා ඇත. එසේම ඔහුට ඕනෑම අවස්ථාවක එම රටට පැමිණ දරුවන් බැලීමටද එසේම ඔවුන් නැවත  ලන්ඩන් පැමිණිය හොත් දරුවන් සමග ඔහු හමුවට පැමිනෙණ බවට පොරොන්දුවකද දී ඇත . ඔහු සැබවින්ම මහත්මයෙකි.

පෝලන්ත තරුණියගේ කතාවෙන් මට වැටහුනේ ඒ දුකට එහා ගිය දෙයක් එතන තිබී ඇති බවය. ඔහු රැකියාව කළද සතුටින් සිටියද සමහරගති සහ පුරුදු අත හැර නැත. බිරිඳ  දරුවන් සමග නව  සැමියාගේ රටට යෑමට අවසර ඉල්ලා පවුල් උසාවියේ සාමාන්‍ය නඩුවක් පවරා ඇත. එය ඉතා සාමාන්‍ය, විරසක  දෙදෙනෙකුට නීතිඥයන් ඇතිව හෝ නැතිව විසඳා ගත හැකි දෙයකි. ඔහු උසාවියේ කිසිම ලියුමක් විවෘත කර නැත.එයට මා කලින් කී  ඔහුගේ උදාසීන භාවයද හේතුවක් වන්නට ඇත. දරුවන් බැලීමට ගිය දින වලද බිරිඳ දරුවන්  නිවසින් පිටතට එව්වා විනා ඒ බවක් ඔහුට කියා  නැත.   ඇග්නේෂ්කා සිතන්නේ ඔහුට ඒ බව කියා ඇතත් ඔහු එය අමතක කරන්නට ඇති බවය. දරුවන් ඔවුන් පිටරට යන බව ඔහුට පවසා තිබුනද ඔවුන් නිවාඩුවට යාමක් යයි සිතා  ඔහු ඒ ගැන  වද වී නොමැත. 

 දරුවන් ගේ නික්ම යාමෙන් ඉතා ශෝකයට පත්ව ඔහු කාලය ගත කර ඈත්තේ රැකියාවට යාමද අතපසු කරමිනි.

අවසානයේ සිදුව ඇත්තේ ඇග්නෙෂ්කා ඔහු හැර යාමයි. ඊට සති දෙක තුනකට පසුව ඔහුගේ උපන් දිනය යෙදී  තිබුණි. ඇග්නේෂ්කා එදා ඔහුට කතා කර පවසා ඇත්තේ  ඇයට වැඩක් යෙදී ඇති බැවින් පසුව ඔහු හමුවට එන බවකි. එහිදී තම දරුවන් උපන් දිනයේ දවසේ වත් කතා නොකළ බව ඇග්නේෂ්කාට පවසා ඇත. ඇය ඔහු අස්වසා ඇත්තේ දරුවන් මව සමග  කොහේ හෝ යන්නට ඇතියි කියාය. 

ඔහු තමන්ගේ දිවි තොර කරගෙන ගෙන් ඇත්තේ එදා රැයේදීය.

සමහර කරුණු කාරණා සිදුවන පිළිවෙල අනුව යමක් සිද්ධවීම වළකන්නට අපට නොහැකිය. එනමුදු ඔහු කතා නොකලද ඔහුට ඉඳහිට හෝ  කතා කරන්නට තිබුනා යයි යම්ප සු තැවීමක් දැනුදු මට තිබේ.   දැනුදු මම යහළුවෙකුගේ  උපන්දිනයක්  දුටුවොත් සුභ පැතීමක් කරමි. එක් අයෙකුට හෝ එය වැදගත් විය හැකිය. 

- අජිත් ධර්මකීර්ති 07/03.2023 

  

ටිල්වින් සිල්වා සහෝදරයාට චිත්‍රපටයක්

මා ජවිපෙ යාවජිව ලේකම් ටිල්වින් සහෝදරයා සමග කල සාකච්ඡාවේදී යම් චිත්‍රපටයක්  ගැන සඳහනක් කළෙමි. සාකච්චාවේ  යූ ටියුබ් වීඩියෝවට මේ යොමුවෙන් යන්න. පසුව ජාතික ජන බලවේගයේ ලනඩනයේ පැවති සමුළුවට සහභාගිවී ෂාරුක් ඛාන් ජයතිස්ස මැයෙන්  ලිපියක්ද ලීවෙමි. එම ලිපියේ ඇතැම් කරුණු ගැන සමහර මිත්‍රශීලි අදහස් එතරම් නිවැරදි නොවන බව මගේ හැඟීමයි. උදාහරණයක් වශයෙන්  "ෂාරුක් ඛාන් ජයතිස්ස"  කියා ලියුවේ ඒ මහතා ෂා රුක් ඛාන් වැනියයි කීමට නොවේ. (එසේ කියා නලින්ද මහතා අපහසුතාවයකට ලක් කිරීමටද නොවේ) . ජාතික ජන බලවේගය කිසියම් ප්‍රමාණයක ජනප්‍රියවාදී වාම දේශපාලනයකට හසු වී  ( left-wing  populism ) ඇති බව කීමටය. 

 එසේම ජයතිස්ස මහතා සෙල්ෆි කරුවන් සමග වමට, දකුණට , ඉහළට පහළට යාමක් කෙසේ වෙතත් ඔහු එම අයගෙන් මෑත් වී ඇවිදගොස් අනිකුත් අයට කතා කිරීමට ගත් උත්සාහය මම දුටුවෙමි.  කිසියම් පාක්ෂිකයන් පිරිසක් සමහ සුහද කතා බහකට සැරසුණු වහාම ඔහු නැවත නැවතත් සෙල්ෆි කරුවන්ගේ ග්‍රහණයට හසු වෙමින් වටේ යයි. එය ලිවීමෙන් මා අදහස් කලේ වර්තමාන ජවිපෙ ප්‍රමුඛ ජාතික ජන බලවේගයේ තත්වයයි. ඔවුන් ගේ පාක්ෂිකයන් සහ ආධාරකරුවන් විසින් එම බලවේගය නොයෙකුත් දිශානති  වලට වමට, වඩා වමට , දකුණට, ප්‍රතිසංස්කරණ පැත්තට  ඇදගෙන යාමක් පෙන්නුම් කරන්නේ නැතිද? ඉතා ඉක්මනින් ඔවුන්ට එය තමන්ට අවශ්‍ය දිශානතියට හසුරුවා ගැනීම නොවැළක්විය හැකි වනු ඇත.  

ටිල්වින් සහෝදරයා සමග වීඩියෝවට ප්‍රථම කළ කතාබහේදී 1960 ගණන්වල අග භාගයේ සිට හැත්තෑවේ දශකයේ අග දක්වා කාලයේ සෝවියට් දේශයේ ස්වර්ණමය යුගය ලෙස ඔවුන් සලකන බව මට පැවසීය. සමරවිට ජවිපෙ නායක රෝහණ විජේවීර ඒ කාලයේ වසරක් දෙකක් සෝවියට් දේශයේ ගත කළ නිසාද යන්න නොදනිමි.  කෙසේ වෙතත්  ඒ කාලය ගැන නිවැරදිව  පෙන්වන චිත්‍රපටයක්  මම තෝරා ගතිමි. ඒ "මොස්කව් කඳුළු මත විශ්වාසය තබන්නේ නැත "  යන චිත්‍රපටයයි  (රුසියන් වලින් මොස්ක්වා  ස්ල්යෝසම් න්යේ  වේරිත් "Moscow Does Not Believe in Tears")

මේ චිත්‍රපටය  ඉංග්‍රීසි උප සිරැසි සමග මෙහි නැරඹිය හැකිය. 

එය පිටවූයේ 1979 දී  වන අතර අධ්‍යක්ෂක වරයා වුයේ ප්‍රසිද්ධියක් ඉසිලූ  ව්ලැඩිමීර් මෙන්ශෝව්ය. තිර රචනය එලසේම  ප්‍රසිද්ධ වැලන්ටින් චෙර්නික් ගේය.  මේ චිත්‍රපටය ට 1981 දී අමෙරිකාවේ හොඳම විදේශ භාෂා චිත්‍රපටයට හිමි ඇකඩමි අවෝඩ් සම්මානය ද ලැබුණි. 

මුල් කොටසේ කතාව පටන් ගන්නේ 1958 වසරේ ජීවත් වූ කම්කරු කෙල්ලන් තිදෙනෙක් වටාය. ගාමන්ට් කෙල්ලන් ගැන කතා කිහිපයක්ම මම ලියා තිබේ. රුසියාවේ පෙබරවාරි විප්ලවයට මුල් වූයේද ඔවුන්ගේ පෙළපාලියක් වුවත් ඉතිහාසය විසින් එය වසා දමා තිබේ. කැතරිනා හෙවත් කේට්, ලුද්මිලා හෙවත් ලූදා සහ ඇන්තොනිනා ජිවත් වන්නේ කම්හලක රැකියාව කරමින් කම්හල විසින් සපයන ලද නේවාසිකාගාරයකය. මෙවැනි රබෝචි දොම් හෙවත් ශ්‍රම දායකයන් සඳහා නේවාසිකාගාර අප උගත් කාලයේද තිබුණි. ඒ කියන්නේ ලංකාවේ  මෙන් අඩු පහසුකම් සහිත ගෙවල් හිමියන්ට අධික මුදල් දෙමින් හුන්ඩු වැනි කාමර වල තෙරපෙමින්  බැනුම් අසමින් සිටින තැන් නොවේ. ඇත්තටම මේ කාමර පොඩි ඒවා නොවේ. ඔවුන්ට පොදුවේ භාවිතා කරණ කුස්සිද, නාන කාමර ද තිබුණි. චිත්‍රපටයේ පෙන්වන්නේ එවැනි සැබෑ තැනකි. 

අධ්‍යක්ෂකවරයා සූක්ෂම ලෙස කපන කතුරෙන් මිදී සැබෑ තත්වය පෙන්වන තැන කිහිපයක් තිබේ. අසූ ගණන්වල එදවස වාමාංශික ට්‍රොස්ට්කි වාදියෙකු වූ ආචාර්ය නලින්ද  සිල්වා මහතා "දිවයිනේ" පළ කල  ලිපි පෙලකදී සෝවියට් දේශයේ "සමාජවාදී පංතියක්" ගැන ලීවා ටිල්වින් සහෝදරයාට මතක ඇතැයි සිතමි.  මේ කෙල්ලන් තමන් සිටිනා කම්කරු නිවස්නය ගැන කියන්නට කැමැත්තක් දක්වන්නේ නැත.  දෙතුන් වතාවක් ම ලුදා තමන් ගේ අත පතා එන පිරිමින්ට කියන්නේ ඇය වැදගත් පවුලක කෙල්ලක් බවත් ඔවුන් සිටින්නේ ලස්සන නිවසක බවත් පවුලේ අය සමග ආහාර ගන්නා බවත් ආදී වශයෙනි. නමුත් නේවාසිකාගාර යේ පිළිගැනීමේ තැන රැකවලේ සිටින මහලු කාන්තාවට එය සැම විටම වැරදෙයි.

ඔය අතරේදී කැතරිනා ගේ මාමා කෙනෙකුට කළු මුහුදේ නිවාඩුවකට යාමට ලැබේ. (මමද  කළු  මුහුදේ නිවාඩුවකට  ගිය අතර එය කලේ විශ්ව විද්‍යාලයට හොරෙනි.) රජයේ වියදමින් කළු මුහුදේ නිවාඩු යාමට වරම් ලැබෙන්නේ පක්ෂයේ නිලධාරීන්ට, ඉහල රජයේ සේවකයන්ට, ප්‍රසිද්ධ නළු නිළියන්ට , අඅධ්‍යක්ෂක වරුන්ට ගත් කතුවරුන් සහ පිටරට වලින් පැමිණෙන මොස්කව් වලට හිතවත් රාජ්‍ය තාන්ත්‍රිකයන්හටය.  ඉතින් නලින් ද සිල්වා ගේ අර "සමාජවාදී පන්තියේ" මාමා නිවසේ යතුර කැතරිනා ට භාර දී යන්නේ සුරතල් බල්ලාද බලා ගන්නට දීමෙනි. ලුද්මිලා සහ කැතරිනා මේ අවස්ථාව යොදා ගන්නේ  තමන්ට හොඳ ඉහල  "සමාජවාදී  පන්තියේ " පිරිමියෙකු හොයා ගන්නටය. ඔවුන් ආරාධනා කරන අය අතර විශ්ව විද්‍යාල මහාචාර්ය වරු, කථිකාචාර්යවරයෙක්, කතු වරයෙක්,  ,උසස් රජයේ නිලධාරියෙක්, රුපවාහිනී කැමරාකරුවෙකු වන රුඩොල්ෆ් හා    නිෂ්පාදකයෙක් හා පදක්කම් දිනූ  සෝවියට් හොකි ක්‍රීඩකයෙක් වන සෙර්ගේයි  ආදීන් සිටිති. 

චිත්‍රපටය නරඹනවිට  රජයේ නිලධාරියා පෝලිම් වල නොයිඳ පන්නාගෙන  එන කෑම බෑගයෙන් එලියට ගන්නා අයුරු නිරීක්ෂණය කරන්න. ඉතින් මේ පාටියේ දී වංචාකාරී ලෙස කතා කරන රුපවාහිනී කැමරාකරු රුඩොල්ෆ්  ට රැවටෙන කැතරිනා ඔහු සමග සංවාසයේ යෙදෙයි.  රුඩොල්ෆ් කැතරිනාට  තම නිවසට ආරාධනා කරන අතර "ඉහල සමාජ  තත්වයක්"  ඇති කැතරිනාට ඔහුගේ මවද කැමති වෙයි.  ඒ අතරේ කැතරිනා වැඩ කරන කම්හලට එන රුඩොල්ෆ් දකින්නේ තමන් "ඉහල සමාජවාදී පන්තියේ " යයි මවා පෑමක් කළ කැතරිනා සැබැවින්ම  කම්කරු කාන්තාවක බවයි.  ඒ අතරේ  කැතරිනා ගේ යෙහෙළිය ලූදා ද ප්‍රසිද්ධ හොකි ක්‍රීඩකයා සමග යහළු වෙයි. 

අවාසනාවකට මෙන් කැතරිනා රුඩොල්ෆ් නිසා ගැබ්බර වෙයි.  ඒ දිනවල කාන්තාව විසින්  පියා නම් කරන්නේ නම් ඔහු තමන් ගැබ් කළ කාන්තාව විවාහ කර ගත්ත යුතුය. කැතරිනා සොයා එන රුඩොල්ෆ් ගේ මව කැතරිනා ට බැන වදින්නේ තම නිවසේ තවත් දෙදෙනෙකුට ඉඩ නැති බවද තමන් ඇති තරම් කාලයක් කොමියුනාල්ක වල ජීවත්වූ බවද පවසමිනි. 

සාර් රජ කාලයේ  තිබූ ධනවතුන්ගේ විශාල නිවාස, මාලිගා, ධනපතියන් ගේ කම්හල් , සාප්පු  ආදිය විප්ලවයෙන් පසු ජනසතු කරන ලදී. මේවා  සාමාන්‍ය ජනතාවට ලබාදීම මගින් දිළින්දන් ගේ නිවාස  ප්‍රශ්නය මදක් දුරට විසඳන ලදී. ඒවායේ කාමරයක්  හෝ දෙකක්  පවුලේ විශාලත්වය අනුව ලැබේ. වැසිකිලි, නාන කාමර සහ කුස්සිය තවත් පවුල් හතරක් පහක්  සමග පොදුවේ භාවිතා කළ යුතුය. කොමුනාල්ක කියන්නේ ඒවාටය. ඒවායේ ජිවත් වීමට බොහෝ මොස්කව් වාසීන් අකැමතිය. තමන්ගේම නිවසක් මහල් නිවාස  පද්ධතියකින් ලබා  ගැනීමට පෝලිමේ සිටිය යුතුය. ඒ අතරේ පක්ෂ හැඳුනුම් කමක් හෝ වෙනත් ක්‍රමයකින් මහල්  නිවසක් කලින් ලබා ගත හැකිය. පක්ෂයේ වැඩ කරන අයට සහ සයිබීරියාවේ පතල් වල වැඩ කරන කම්කරුවන්ට නිවෙස් ඉක්මනින් ලැබේ.  රුඩොල්ෆ්  කැතරිනා සමග විවාහ  වන්නට අකමැති වන්නේ ඔහුට  අනාගතය ගැන වෙනත් සිහින තිබෙන බව කියමිනි.    

මේ තිදෙනා අතරින් අන්තොනිනා යහළු වී සිටින්නේ සෙර්ගෙයි සමගය. සෙර්ගෙයි මහන්සි වී වැඩ කරන අයෙකි. ඔහු ගේ දෙමාපියන්ට මොස්කව් වලින් පිටත ප්‍රදේශයක දාචාවක් තිබේ. දාචා යනුවෙන් ග්‍රීෂ්ම සමය ගත කරන නිවෙස් බොහෝ මොස්කව් වාසීන්ට තිබේ. ඒවායේ ඔවුන් නොයෙකුත් වගාවන් කරති. සීත කාලයට අවශ්‍ය අර්තාපල්, තක්කාලි වෙනත් එළවලු ආදිය  වගාකර ගබඩා කර ගනිති. ඒවායින් අඩුපාඩුවක් නැති බව චිත්‍රපටයේ පෙන්වයි. අප සිටි කාලයේදී ද මේ තත්වය එලෙසේමය. ඔවුන් සති අන්තය ගත කරන්නට තෝරා ගන්නේ මෙවැනි  දාචා නිවෙස්ය, සමහර විට ඒවායේ නළ ජලය නැති අතර ජලය අසල ළිඳකින් සපයා ගත යුතුය. 

කැතරිනා ට කම්කරු ජිවිතයේ දිගටම සිටින්නට අදහසක් නැත. එනිසා ඇය  රසායනික විද්‍යාව පිලිබඳ උපාධියක් කිරීමට අදහස් කරගෙන සිටියාය. එසේ වුවත් ඇය තම දරුවා තනියම හදා වඩා ගැනීමට තීරණය කරයි. බොහෝ  අපහසුතා මධ්‍යයේ ඇය මහන්සිවී ඉගෙන ගනී.

කතාවේ දෙවන කොටස අවුරුදු විස්සකට පසු සෝවියට් දේශයේ හැත්තෑවේ කාලය නිරූපණය කරයි. කැතරිනා ගේ දියණිය  ඇලෙක්සන්ද්‍රා පියකරු යොවුන් වියේ පසුවන්නීය.කැතරිනා  දැන් එම  කම්හලේම අධ්‍යක්ෂක වරියයි.  ඇයට තමන්ගේම විශාල මහල් නිවසක් තිබේ. ඇයට නැත්තේ ආදරයක් පමණි. මහන්සිවී ඉගෙන ගත්තොත් සෝවියට් රජයේ ඉහල තැනකට පැමිණිය හැකි බවට පෙන්වන සෝවියට් පරමාදර්ශයක් වන්නේ කැතරිනාය.  අන්තෝනිනා තමන්ගේ සරල පැවතුම්  ඇති සෙර්ගෙයි සමග විවාහ වී දරුවන් සමග සතුටින් ජිවත් වෙයි. එයද සෝවියට් පරමාදර්ශයට සමගාමී වේ. ඔවුන්ගේ මොස්කව වලින් එපිට දාචාවද   එලෙසම තිබේ. සති අන්තයට යෙහෙලියන් තිදෙනා එහි ප්‍රීතියෙන් සහ අතිතානුස්මරණයෙන් ගත  කරති.  

ප්‍රසිද්ධිය සහිත සැමියෙක් හඹා ගිය ලුදා ප්‍රසිද්ධ හොකී ක්‍රීඩකයා  විවාහ කර ගනී. නමුත් ඔහු මත්පැන් ලෝලියෙකි. ඔවුන් දික්කසාද වී ඇත. සෝවියට් දේශයේ පිරිමින්  ගේ මධ්‍යසාර භාවිතය ඉහල මට්ටමක  තිබු අතර වොඩ්කා මිල අඩු නිසා  මත්පැන් ලෝලීන් ද වැඩිය. ඒ ප්‍රශ්නය පසුව ගොර්බචෝව් ටද  හිසරදයක් විය.  

දාචා නිවසට  ආපසු එනා කැතරිනා ට දුම්රියේදී  ගෝෂා හමුවේ. විශ්වවිද්‍යාල පර්යේෂණාගරයක උපකරණ නිපදවන නුවණැති අයෙකු වූ ගෝෂා  සමග කැතරිනා පෙමින් බැඳේ. ඔය අතරේ එම කම්හලේ  අධ්‍යක්ෂකවරිය සමහ සම්මුඛ සාකච්චාවක් කිරිමට එන රුපවාහිනී කණ්ඩායමේ රුඩොල්ෆ් තමන්  අත්හැර දැමු පෙම්වතිය දැන් අධ්‍යක්ෂිකාවක් බවද ඔහුට දියණියක් සිටින බවද දැන ගනී. කැතරිනා  ප්‍රතික්ෂේප කරයි,  දියණිය අලෙක්සන්ද්‍රා ගේ පෙම් හබයකට මැදිහත් වන ගෝෂා සමග කැතරිනා  විරසක වෙයි. නමුත් ඇය පසුව වටහා ගන්නේ තමන්ට සුදුසු තැනැත්තා නිහතමානී මිනිසකු වන ගෝෂා බවය. 

මම මේ සිනමා පටය දෙතුන් වරක් නරඹා තිබේ. ඒ හැම වතාවකම කලින් හරියට නුදුටු දේ නිරීක්ෂණය වේ. සෝවියට් දේශයේ  විද්‍යාඥයන් , අජටාකාශගාමින් මහාචාර්ය, ආචාර්ය  වරුන්, කතුවරුන්, ඇතැම් කලාකරුවන්, සංගීත වේදීන්  පක්ෂ බලධාරීන්  ආදීන් ඉන්ටෙලිජෙන්සියාව  ලෙස  හැඳින්වුනි. ඔවුන්ට කිසියම්  වරප්‍රසාද සහිත ජිවිතයක් තිබුණි. කැතරිනා ගෝෂා හමුවීමට කලින්  අනියම් සම්බන්ධයක් පවත්වා ගෙන ගියේද එවැනි විවාහකයෙකු සමගය. එවැනි සම්බන්ධතා බොහොමයක් සෝවියට් දේශයේ තිබුණි. කාන්තාවන් බොහෝ විට පිරිමින් තරම්ම නිදහස් නිසා විය හැකිය.    

චිත්‍රපටයේ ඉතා සියුම් ලෙස පක්ෂ නිලධාරීන්, ඉන්ටෙලිජෙන්සියාව සහ සාමාන්‍ය මිනිසුන් අතර වෙනස  පෙන්වයි. නමුත් චිත්‍රපටය සෝවියට් දේශයේ එදවස තිබූ තත්වයේ සොඳුරු බව ද  පෙන්වයි. "සෝවියට් සිර මැදිරියේ සිට" නවකතාව  ලියූ ඔරුවල බන්දු  සිටියේද මේ කාලයේමය.    එය සිර මැදිරියක් වූයේ මිනිසුන්ට වෙනත් රටවලට යාමට නිදහස නොතිබූ නිසාද නැතිනම් බන්දුට ආචාර්ය උපාධිය  කිරීමට ඉඩ නොදීම නිසාද යන්න පැහැදිලි නැත.

නැගෙනහිර ජර්මනියේ උපත ලද මගේ බිරිඳද මේ චිත්‍රපටය මා සමග නැරඹුවාය. ඇය කියන්නේ සෝවියට් දේශයේ තිබූ තරම් නිදහසක් නැගෙනහිර ජර්මනියේ නොතිබූ බවය. ඇගේ දෙමාපියන් ඇයව පල්ලියේ  භෞතිස්ම කළ නිසා  ඇයට විශ්ව විද්‍යාලයට ඇතුලත් වීමට අවසර නොදුන් බව ඇය කීවාය. ඇයට ඉගෙනීමට ලැබුනේ දෙමාපියන් දියණියන් සමග බටහිරට ආ පසුවය.  මා උගත් විශ්ව විද්‍යාලයට පිට ගම් හා නගර වලින් පැමිණි බොහෝ සිසුන් කොම්සොමෝල් සාමාජිකයන්ය. 

ජවිපෙ  ගැන කියනවානම් මට හැඟෙන්නේ  කලින් ජාතිවාදී, ජාතිවාදී විරෝධී හා මධ්‍යස්ථ ඔලු තුනේ මකරෙකු සිටි  එය තුනට කැඩුනේ විමල්  විරවංශ ජාතිවාදී පැත්තට ගොස්  කුමාර් ගේ පැත්ත ජාතිවාදී විරෝධි, න්‍යායවාදී ලෙසත්  අනුරගේ පැත්ත මධ්‍යස්ථ ප්‍රතිසංස්කරණවාදී   ලෙස බෙදිමෙන් යයි මට සිතේ.    ඔවුන් පිහිටුවන රජයක් වඩා ලිබරල්වාදී එකක්  වේවිද නැත්නම් සමාජවාදී එකක් වේවිද යන්න කීම තවම අපහසුය.  බොහෝ විට සමාජවාදයට වඩා බර ප්‍රතිසංස්කරණ වාදී රජයක් වීමට බොහෝවිට අවකාශයක් තිබේ. 

-අජිත් ධර්මකීර්ති 26/02/2023

චිත්‍රපටය:

ටිල්වින් සිල්වා සහෝදරයා ට ප්‍රශ්න කිහිපයක් සමග ජාජබේ ඇට් ලන්ඩන් 

ෂාරුක් ඛාන් ජයතිස්ස 

අර මැරිලි සහ මේ මැරිලි

ශ්‍රී ලංකාව හිටපු ගමන් අවදි වෙලා කියල පේනවා තරුණ වියට එළැඹෙන ළමයි තුන් දෙනෙක් ගුරුවරියකගේ ස්වාමි පුරුෂයාට ගහල මරපු එකට.  ඒ අතරේ ඌරන් කැකුණ තලනකොට හබන් කුකුළන්ට රජ මගුල් කියනව වගේ තව කට්ටියලක්  රැඩිකල් අයට බනිනවා. අරගලේට බනිනවා. මානව හිමිකම් නිසාලු ඔක්කොම. එහෙමනම් ඉතින්  මානව හිමිකම් තියන,  ළමයින්ට ගහල හදන්නේ නැති ඔක්කොම රටවල කොල්ලෝ කෙල්ලෝ දිගට හරහට මිනිසුන්ව මරනවා ඇතිනේ. 

එහෙම නැහැ. බ්‍රිතාන්‍යයේ එහෙම සිද්ධි කිහිපයක් වාර්තා වුනා. පහුගිය කාලවල. ගෙයින් එලියට බැහැල කෑ කොස්සන්  ගහන කොලු රැලකට බනින්න ගිය පියෙක් මැරුම් කෑව කාලෙකට ඉහත කිංග්ස් ක්‍රොස් වල . සංචාරක තරුණියක් කිංග්ස් ක්‍රොස් පැත්තේ  ඇවිදින්න ගිහින් දූෂණය වුනා. අවස්ථා දෙකේදීම කරපු කොලුවන්ගෙන්   භාගයක්ම බ්‍රිතාන්‍යයට කාලයකට ඉහතදී සංක්‍රමණය වුනු  අයගේ දරුවන්. ඒ හැමෝගෙම පොදු සාධකයක් තිබ්බ. අම්ම තාත්ත දෙන්නම රැකියා වල .නිවෙස් වලට එන්නේ රෑ වෙලා. ඉස්කෝලේ ඇරිලා දඩාවතේ යන කොලු රෑනවල් ඒ පැත්තේ පිරිලා. හවසට ගෙදරට දෙමාපියෝ ඇවිත් රෑ කෑම හදනකන්  කරන්න වැඩක් නැතිව, ඉගෙන ගන්නෙත් නැතිව හිටපු  සෙට් එකක්. හැබැයි අර අහිංසක මව්පියන් අරන් දීල තියෙනවා හැමදේම. වටින ඇඳුම් පැළඳුම්, වටිනා මොබයිල්, මොපෙඩ් කියන පොඩි මෝටර් සයිකල් වගේ දේත් උන්ට තිබ්බ. 

කිංග්ස් ක්‍රොස් වල  ලොකු දුම්රිය පළක් තිබුනත් නීමට ඇවිදින්න යන්න බැරි පළාතක් වෙලා තිබුනේ. ගණිකාවෝ, මත්ද්‍රව්‍ය ගන්න අය වැහි වැහැල. පරණ හෝටල් හෙම අබලන් වෙලා ගිහින්. පරිසරය හිතා ගත්තේ හැකිනේ. 

ඔය වගේම මොපෙඩ් බයික් සෙට් එකක් අපේ පැත්තෙත් හිටිය . වැඩියෙන්ම ගැවසුණේ මැක් ඩොනල්ඩ්ස් එක ගාව. සුදු කළු මිශ්‍ර සෙට් එකක් එතන හිටියේ අර වගේම.  උන් හැබැයි මිනී මැරුවේ නැහැ. නමුත් උන් ඉන්න වෙලාවට ඒ පැත්තෙන් යන එක ටිකක් අවදානම්. 

බ්‍රිතාන්‍ය රජය මේ සිද්ධීන් වලට මුහුණ දුන් විධිහට මම කැමතියි. 

මුලින්ම සෙන්ට් මාර්ටින්ස් කියන කලා සහ මෝස්‌තර නිර්මාණ පිලිබඳ විද්‍යාලය ගේනවා මුලින් තිබුණු තැන ඉඳල කිංග්ස් ක්‍රොස් වලට.  එතකොට ඒ පැත්තේ ඉගෙන ගන්න එන ශිෂ්‍යයෝ නවාතැන් ගන්න පටන් ගන්නවා. 

 ඒ හදපු බිල්ඩිම මාර ලස්සනයි.  ඒ එක්කම මුළු පැත්තටම හොඳ ආයෝජනයක් කරලා. වෙනස් කරනවා 

පළාතේ මිනිසුන්ට අලුත් ආදායම් මාර්ග සහ රැකියා නිර්මාණය වෙනවා. 

අද ගූගල්  ඔෆිස් එකත් එතන. ලංකාවේ කෑම තියන අවන්හලක් තියනවා. ලෝකේ වටේම තියන රටවල කෑම ගන්න පුළුවන් ස්ථාන විරුටැහැ කරලා. අපි ලඟදි ගියා කොරියන් අවන්හලකට. හදල තියෙන විවෘත  මාකට් එකේ තමන්ගේ නිෂ්පාදන විකුනන්න පුළුවන් . අලුත් නිවාස හදල. හෝටල් අලුත්වැඩියා කරනන්  මුදල් ණයට දීලා . නැත්නම්  අලුත් ඒවා හදල. දැන් අපරාධ අඩුම පළාතක්. ඉස්කෝලේ ඇරිලා එන ළමයින්ට යන්න තැන් තියනව. කරන්න දේවල් තියනව. 

කිංග්ස් ක්රෝස්ස් වලම තමයි බ්‍රිතාන්‍ය පුස්තකාලයේ අලුත් ගොඩ නැගිල්ල  තියෙන්නෙත්. 

අපේ පැත්තේ මොකද වුනේ කියනවනම් ලන්ඩන් වලට ඔලිම්පික් එනකොට මේ පැත්තේ ලිවැලි කියන හරිය සම්පුර්ණයෙන්ම  වෙනස් කරලා වයිට් වෝටර්  සෙන්ටර් කියල එකක් හැදුව. ඔලිම්පික් තරඟ  පවා එතැන පැවැත්වුවා  දැන් එතන ගිහිල්ල ඉඳගෙන කන්න බොන්න තැනක් වගේම බෝට්ටු පදින්නත් පුළුවන්. වටේ තිබ්බ පොඩි පරණ පුස්තකාල වහල අලුත් විශාල ඒවා දෙකක් හැදුව. ඒවල එක එක ක්‍රියාකාරකම් කරන්න පහසුකම් දුන්න. අලුත් නිවාස  යෝජනා ක්‍රම ආව. කොටින්ම රජය ආයෙත් ආයෝජනය  කළා. අර මොපෙඩ් ගැන්සි අඩුවුනා.

මේකෙන් අදහස් වෙන්නේ  නැහැ. ප්‍රශ්න ඇත්තෙම නැහැ කියල. තියනව. සාපේක්ෂව අඩුයි. 

අපට  හැම වෙලේම ළමයින්ට, වැඩෙන තරුණයන්ට බනින එක ලෙහෙසියි. ඒ ළමයි කරපු වැඩේ වැරදියි. ඒකෙ දෙකක් නැහැ. දඬුවම් කරන්නත් ඕනේ. ඒකත් හරි. හැබැයි කතා  කරන්න ඕනේ ඉදිරියට එන දෙයක් වලක්වා ගන්නේ කොහොමද කියන එක.  ලංකාවේ දැනට එහෙම ආයෝජන කරන්න  පුළුවන් තත්වෙක නෙමේ ඉන්නේ.  අපි ළමයින්ට උගන්වන්න ඕනේ ජිවිතයකට ආදරය කරන්න. ඒක හරියට වෙනවාද කියන්න  මම දන්නේ නැහැ.  

අනිත් එක තමා මොන රටේ හිටියත් විශේෂයෙන් ලන්ඩන් වල පාරක යද්දී තරුණ කොල්ලෝ කෙල්ලෝ කෑ ගහගෙන එනවනම් මම අනිත් පැත්තට මාරු වෙලා යනව. උන් කාට හරි ගහන්න යනවනම් පොලිසියට කෝල් එකක් දෙනවා.  එක පාරක් එහෙම කළා. හැබැයි කවදාවත් උන්ව හදන්න ගිහිල්ල නැහැ. මගේ පාඩුවේ පැත්තකින් යනව මිසක්. මොකද  නාහෙට නාහන කාලයක් අපි හැමෝටම  තිබ්බ.

- අජිත් ධර්මකීර්ති 18/02/2023