පොතට තිත තැබීම

පසුගිය කෝවිඩ් සමයේ මම අලුත් වැඩ කිහිපයක්ම පටන් ගතිමි.  ඒ කිසිවක් දුර දිග ගියේ නැත. දුර ගිය එකම දෙය නම් නැවතත් ගිටාර් වාදනය පටන් ගැනීමත් නව ගිටාරයක් මිලදී ගැනීමත්ය. මට මුල්ම ගිටාරය උපන් දින තෑග්ගක් ලෙස ලැබුනේ 1985 මොස්කව් හිදීය. සෝකල් හි මාදි විශ්ව විද්‍යාලයේ උගත් ජානක ලියනගම, උපාලි හේවගේ  හා ප්‍රභා ගුණවර්ධන සීනියර් තුන් කට්ටුව එකතුව දුන් ත්‍යාගයකි. 

හැබැයි මට කාඩ් එක වැදුනේ මේකා ගහන්නේ එකම තනුව කියාය. 

නමුත් මගේ පලමු ගිටාර් ගුරුවරිය වූ ලූදා බොහෝ අපහසුවෙන් මට තනු කිහිපයක් පුරුදු කලාය. ඒ කතාවේ කොටසක් මේ යොමුවේ ඇත.  මම ඒවා කවදාවත් ලංකාවේ සිසුන් සමග වයන්නට නොගියෙමි. ඒ දිනවල ජගත් ජයවික්‍රම නම් සුපිරි ගිටාර් වාදකයෙකු  සිසුන් අතර සිටියේය. අපේ අවාසනාවට ඔහු සිටියේ මොස්කව් වලින් ගොඩක් ඈතට වෙන්නටය.   නමුත් සම්පත් සමග අපේ කාමරයට වැනි අවස්තා කිහිපයක ඔහු සුන්දර ගීත  කිහිපයක් ගයන්නට අමතක කළේ නැත.

"ප්‍රථම ප්‍රේමය ඔබ නොවේ" පොත ලංකාවේ එළි දැක්වුණේ 2019 අවසන් කාර්තුවේය. ලන්ඩනයට පැමිණ ඒ කාර්යයම කරන්නට සිතුවේ 2020 මුල් කාර්තුවේ දීය. ඒ මට වෙනත් ගමන් කිහිපයක්ම තිබු නිසා හා දියණියන් ගේ ඉගෙනීමේ කටයුතු නිසාත්ය. නමුත් ඉන්පසු කෝවිඩ් වලින් බැට කෑමට  සිදුවූයේ අප කවුරුත් බලාපොරොත්තු නොවූ ලෙසටය. එසේම  මට කෝවිඩ් කාලයේ පටන් ගත් කාර්යයන් අවසන් නොකර අත හැර දැමීමේ රෝගයක් විය. මේ බ්ලොක් එක ඉවත් කර ගන්නේ  කෙසේද යන්න නිතරම සිතුවෙමි. 

ප්‍රශ්නය තිබෙන්නේ පොත ලන්ඩනයේ එලි දැක්වීම නොකළ නිසාය වැන්නක් මට සිතුනි. කිහිප වතාවක් කෝවිඩ් නිසාම ඒ අදහස අත හැරියෙමි. නමුත් කතාව සමාප්ත වන්නේ ලන්ඩනයේදීය.  කවුරුන් හෝ පොතේ කතාව අග දක්වා කියෙව්වා නම් මා  කියන්නේ කුමක්ද යන්න වැටහෙනු ඇත.   පොත ගැන සංවාදයක් ලන්ඩනයේ කළ යුතුය යන්න අදහස මට පැමිණියේ ඒ නිසාය.  මට "පොතට තිත" තැබිය හැක්කේ ලන්ඩනයේදී ඒ ගැන අමතක කිරීමෙනි.  ඒ දිනය හෙටට දී ඇත.  සෝවියට් දේශයේ උගත් මිතුරු මිතුරියන් කිහිප දෙනෙකුද සහභාගී වන බව දන්වා තිබේ. 

ප්‍රථම ප්‍රේමය ඔබ නොවේ 30 වැනි පරිච්චේදයේ කොටසක මා මෙසේ ලියා ඇත. 

//
සියල්ලෝම  දිග ඇදී  සිටිද්දී ගිටාරය ගත් තාන්යා ගීයක් පටන් ගත්තාය. මව සංගීත ගුරිවරියක් නිසාදෝ ඇයට හොඳින් ගිටාරය වාදනය කිරීමට හැකිය. කොහොමත් බොහෝ රුසියානුන් තම දරුවන්ට කුමක් හෝ සංගීත භාණ්ඩයක් වැයීමට හෝ නර්තනයක් කිරීමට  උගන්වති. එය වඩාත් පැතිර ඇත්තේ රුසියානු යුදෙව් ජාතිකයන් අතරය. බොහෝ විට පියානෝව හා වයලීනය හෝ  ඔපෙරා නැටුම් ගැහැණු ළමුන්ටද ගිටාරය හා ජිම්නාස්ටික් පිරිමි ළමුන්ටද උගන්වති.

තාන්යා පටන් ගත් ගීතය මදක් දුර ගයන විට සියල්ලෝම  නිසොල්මන් වූහ.
ඇය දැන්මම අනාගතය දකින්නීද? ඇය ගයන්නේ විටින් විට මද සිනහවකින් මුව සරසා ගෙන ඔහු දෙස බලාගෙනය. ගිහාන් ගේ සිත වටහා ගත නොහැකි දුකකින් පිරී ගියේය.

"ව්ස්යෝ නාපොමිනායේත් අ තෙබ්යේ
 අ තී නි ග්ද්යේ
අස්තල්ස්යා මීර්
කතෝරි ව්ම්ස්ත්යේ විදෙල් නස්
ව් පස්ලෙද්නි රස්....."

  ලෙසින් ගැයූ ගීතයේ තේරුම රහසකට වඩා හදවතේ තෙරෙපෙන අදහසක් කියා පෑමක් වැනි විය.

"හැකි හැම විටම  මතකයට නැගෙනුයේ  නුඹයි
නමුත් නුඹ නැත පෙනෙනා මානයක
අප එක්ව සිටි අයුරු  දුටු   ලොව පමණක්
ඉතිරිව ඇත අවසන් වරට 

බැල්කනිය සහ ජනේලය ඇති කාමරය
ආලෝකයෙන් පිරීලා
සාමකාමියි  එදා වගේම
අප එක්ව සිටි හැටි දුටුවා  මෙන්
අවසන් වරට 

කාලය ඉක්ම යාවී , නුඹට අමතක වේවි
සිඳුවූ හැම දෙයක්ම අප අතර ,
සිඳුවූ  හැම දෙයක්ම  අප'තර

නැහැ , මා නුඹ වෙනුවෙන් බලා  සිටින්නේ
නමුත් දැනගන්,
මා පෙම්  කළේ
අවසන් වරට, අවසන් වරට
අවසන් වරට, අවසන් වරට

දිනත් ගෙවී යයි ,
හිම සමයන්ම කොපමණ ඉකුත් වී ද නොදනිම්
නැත්නම් වසර කීයක්  ගත වුනිද
සමහර විට  තවෙකෙකු සමග මා
තුටිව දිවි ගෙවනු  වනු ඇත
සමහර විට එහෙමත් නැතිව

කිසිවක් මේ සඳු යට සදාකාලික නොවේ 
නමුත් ඔබ සමග වුන්  හෝරාවනම් 
මට කිසිදා
අමතක නොවෙනු ඇත
නුඹ  මා සමග සිටියුරු
අවසන් වරට

කාලය ඉගිලී යාවී 
නුඹට අමතක වේවි 
සිදුවූ සියල්ලක්ම අප අතර
නැහැ , මා නුඹ වෙනුවෙන් බලා  සිටින්නේ
නමුත් දැනගන්,
මා පෙම්  කළේ
අවසන් වරට, අවසන් වරට
අවසන් වරට, අවසන් වරට"

ගීතය අවසන් වී බොහෝ වෙලාවක් යනතුරු කිසිවකු කතා කළේ නැත.  ෂෝලහොව් ලීවාක් මෙන් දොන් නදිය නිසලව ගලා යයි. නිහඬතාවය බිඳිමින්  ඉඳහිට වතුර පොදක් පමණක් වෙරළේ වැදුණි.//

ඉහත දෙවැනි ගීතයේ වදන් ව්ලදිමීර් ලුගවොයි ගෙනි. මේ ගීතයේ තනුව සහ මුල් ගීතය ස්පාඤඤ හොසේ ලුයිසා ගේ "නුඹ  යන්නේ  කොහිද " යන ගීයෙනි.

මේ දිනවල බ්ලොග් ලෝකයේ ගීත ගැන කතාවක් යයි. 
ගිටාරයෙන්  වැයීම සඳහා මම රුසියානු ගිටාර්  තනුවම හා ඒ කෝඩ් ම  භාවිතා කළෙමි. වදන් වෙනස් කිරිමක්ද  සිදු කලේ පරිවර්තනය කළ ආකාරයටම ගැයීමට නොහැකි බැවිනි.

මේ මගේ පරිවර්තනයයි. 

**************************************

මතකයෙ  ඉන්නේ ඔබමයි   
ඔබ කොහේද ඇත්තේ 

ලොව නැවතුන දා මට 

අවසන් වර  අප එක්වූ දවසෙහි මෙන්

ඒ අවසන් වරටයි 

ඒ අවසන් වරටයි  

ඒ අවසන් වරටයි

 
ඉහල මාලයේ  කවුළුව ඇති කුටියේ  
ආලෝකය පිරීලා
සන්සුන් ලෙසමයි ඇත්තේ    

අවසන් වර අපෙ දෙනෙතට   

හමුවූ විලසේ 

කාලය ඉගිලී  යාවී 

 නුඹහට අමතක වේවි
පෙමින් පිරුණු අපෙ  කතන්දරේ 

පෙමින් පිරුණු අපෙ  කතන්දරේ 

 ඔබ එනතුරු මා  බලා  සිටින්නේ නෑ  

හේ,  ඔබ දන්නවා නම් 

පෙම්කලෙ  ඔබහට මා  

ඒ අවසන් වරටයි 

ඒ අවසන් වරටයි  

ඒ අවසන් වරටයි  

දිනත් ගෙවී යන්නේ මට නොදැනී 

හිම සමයන් හා වසන්තයත්  සමගින්  ,
වෙනෙකෙකු හා සතුටින් ඉන්නට 

පුලුවන් වේවිද මන්දා  

ඔබ නොලැබේ නම් 

නොවෙනස් වූවත් මේ  සඳු යට වෙන හැම දේ 
 අප ඒ හෝරාවම  නම් 
මට කිසිදා
අමතක වන්නේ නැහැ 
ඔබ මා  ළඟ  සිටි අයුරු 
ඒ අවසන් වරටයි 

කාලය ඉගිලී  යාවී 

 නුඹහට අමතක වේවි
පෙමින් පිරුණු අපෙ  කතන්දරේ 

පෙමින් පිරුණු අපෙ  කතන්දරේ 

 ඔබ එනතුරු මා   බලා  සිටින්නේ නෑ  

හේ,  ඔබ දන්නවා නම් 

පෙම්කලෙ  ඔබහට මා  

ඒ අවසන් වරටයි 

ඒ අවසන් වරටයි  

ඒ අවසන් වරටයි  

මේ  ගීතය යූබටයට අද දැමුවෙමි. ගීතය පසුව වඩා වැදගත් ආකාරයෙන් නිම අක්රන්නට බලාපොරොත්තු වෙමි.

ලන්ඩනයේ සිටිනම් හෙට හවස් වනවිට මෙතනට එන්න.

නොවැම්බර් 13 සෙනසුරාදා හවස 4.00 සිට - The Qube, Community Space For Ponders End, 291 High St, Enfield EN3 4DN, ටෙස්කෝ සුපර්මාකට් එක ඉදිරිපිට, ටෙස්කෝ රථ ගාලේ වාහන නතර කලහැක.  

පොත ගැන විචාර කිහිපයක් අගට එකතු කරමි.

"ප්‍රථම ප්‍රේමය ඔබ නොවේ" පිළිබඳව ආදරණිය වියමනක් - ධම්මිකා  චාන්දනී 

විජිත ගුණරත්න ගේ ප්‍රථම ප්‍රේමය ගැන නොවේ  

ප්‍රථම ප්‍රේමය ඔබ නොවේ ! - සොඳුරු සඳවතී 

"ප්‍රථම ප්‍රේමය ඔබ නොවේ " - විචාර සටහන් 1 - බුද්ධිකා එරන්දි ජයසිංහ,   බෝධිනී සමරතුංග, කොලොම්පුරේ අසංග 

"ප්‍රථම ප්‍රේමය ඔබ නොවේ " -විචාර 2 - සිසිර යාපා 

"ප්‍රථම ප්‍රේමය ඔබ නොවේ " - විචාර  3 -ගෙවුනු සතියේ සොඳුරු සහ අතිශය සුන්දර දවසක - පද්මිණී මාතරගේ 

සම්බෝල පාටියක් නොවේ

වෝක් එක පටන්  ගත්ත තැන 

අර මම කලින් ලීව "පාටියේ අඩු දේ " කතාවට පහුවදාම අහිංසක යෙහෙළිය  කෝල් කරලා කියනවා "අනේ අජිත් පොල් තිබ්බේ නැහැනේ ".( ලින්ක් එකට ඔබන්න ඒ ලිපිය  මිස් වුනා නම්.) 

 මම කීව එයාට  

"ගණන් ගන්න එපා. පාටිය  නියමයි.  ප්‍රශ්නේ ඔයාගේ නෙමේ මගේ. නැති දේවල් හොයන පුරුද්දනේ කියල."

ඇත්තම කියනවනම්  හැට නම ලක්ෂේට  මේ දවස් වල වෙන දේවල හැටියට, නිසංසල හදවතක් තියෙන මම වගේ කෙනෙක් අනෙක් අයට  හිනා වෙන එක වැරදිනේ නේද? මෙච්චර හොඳට කන්න  දීලා කෝපි එකකුත් බොන්න දීලා , ගෙදර ගෙනියන්නත් කෑම පාර්සලයක් දීල අඩුපාඩු හොයන අපි වගේ උන්ට යන්න වෙනම අපායක් මහමෙව්නාවේ අපාය නිර්මාතෘන්  හදල තියයි කියල මට බයත් එක්ක . 

ඒ අතරවාරයේ මට තේරුණා කට්ටිය දැන් ටිකක් බයයි වගේ මට පාටි වලට ආරාධනා කරන්න. "අපි දැන් පාටි දාන්නේ නැහැනේ. අනික කෝවිඩ් ඉවරත් නැහැනේ." 

මොන පිස්සුද? මම හොයා ගත්ත හේතුව. බ්ලොග් එකේ ලියයි කියල බයට. 

ඒ අතරේ මාස ගාණක් වැඩ අධික නිසා නොගිය ලන්ච් එකකට යන්න වුනා. මගේ යාළුවෙක් ගේ යාළුවෙක් මගේ යාළුවෙක් වුන සීන් එකක්. චණ්ඩිම කියල නමක් තිබ්බට හෙන අහිංසක ඩයල් එක. (එච්චරම සුවර් කරන්නත් එපා ඒක. දෙකට ගනින්න බැරිවගේ  ඉන්න එවුන්ලු හතරේ ඒවා ගහන්නේ)  ඉතින් චණ්ඩිමයි එයාගේ ආදරණිය බිරිඳ එස් එම් එන් මලීනුයි  කරපු ආරාධනයෙන් කෙන්ට් ප්‍රදේශයේ තිබ්බ ඒ ගෙදරට ගියා.  

 එදා උදේ බිරින්දෑ කිරිබත් හදල තිබ්බ දුව එන නිසා. එයාගේ උපන්දිනේ. එයා එනකන් කිරිබත් එක හංගල. ඉතින් මම සීරියල් ටිකකට සෝයා කිරි දාල කාල  බඩ පුරවාගෙන හිටියේ.  අනික කාටද ඕනේ ඔය ලුණු නැති කිරිබත් කන්න. (එයාගේ ජර්මන් ක්‍රමයට පැණි හෝ ජෑම්  දාල කන නිසා කිරි බතට ලුණු දාන්නේ නැහැ. කවද  කාපු ටකරන්ද) 

ඒත් ඉතින් අරහෙට යනකොට දොළහ පහුවෙලා "ස" කෙනෙක් කන්න බඩගිනි.  මෙන්න තියනවා ලුණු දාපු කිරිබත්. කෑලි දෙක තුනක් කනකොට මදි කියල තේරිලා එස් එම් එන් මලී කීව  කිරිබත්  දන්කුඩ තියනව කියල. "අපේ මේ චණ්ඩි හෙම හරි ආසයි නේ. ඒවා කාල තමා එයා  බල්ලා එක්ක චීනඩි ගහන්න යන්නේ" කියලත් කියපි. මමත් ඉතින් කීව වහාම ගේන්න කියල.  එතන හිටිය ටිබිලිසි නගරයේ ඉගෙන ගත්ත නම් ප්‍රසිද්ධ වෙනවට අකැමති යාලුව කීව එයා නම් කන්නේ පොෂ් කිරිබත් කෑලි විතරලු. 

මම කීව "හාහ් අපේ අම්ම දන්කුඩ දෙනව .  හකුරු හරි සීනි එක්ක හරි කන්න කිරි දාල " කියල විරය වගේ දන්කුඩ කතාවක් කිව. රැවුල එන්නේ නැහැ කියල අම්ම දන්කුඩ කන්න දුන්නේ නැහැ. අපරාදේ කියන්න බැහැ රැවුල නම් එනවා. කොණ්ඩේ තමයි නැත්තේ. ඇත්තම කියනවනම්  කතාව  අහුල ගත්තේ නමිය හරි ටොමිය හරි දාපු ලින්ක් එකකින් මතක් වුන බ්ලොග් කතාවක්. ලියල තිබ්බේ ඉන්ද්‍රනාථ  තේනුවර. චන්ඩිම කුස්සියට රිංගල වෙනිසන් කරි (වෙනිසන් කීවේ  ගෝනා ද මුවාද කියල ෂුවර් නැහැ ) එකකුත් ගෙනාව. මලී "අනේ අපේ චන්ඩිත් කැමතියි "කියල  නැවැත්තුවේ නැත්නම් කිරිබත්  දන්කුඩ ටික ඔක්කොම කනවා ඉතුරු කිරිබත් කෑල්ලත් එක්ක. 

ඇවිද්ද තැන් 

ඔන්න ඊට පස්සේ අපේ සංචාරක චාරිකාවට ගියා. ගිය තැන නම් ලස්සනයි කියල කියත හැකි.  ඔය ලන්ඩන් වලින් එහා ඇවිදින් යනකොට ගොවිපළවල් මැදිනුත් යන්න ඉඩ දීල තියනව. බ්‍රිතාන්‍යයේ ඒවාට bylaws කියල කියන්නේ. කාගේ හරි පෞද්ගලික වත්තක්, ගොවිපලක් ඇතුලෙන් සාමාන්‍ය ජනතාවට  යන්න ඉඩ දෙන්න  ඕනේ අඩි පාර වැටිලා තියෙන්නේ ඒ හරහානම් සහ ස්වභාව ධර්මයේ හැසිරීමේ  ප්‍රීතිය භුක්ති විඳීම සඳහා නම් යන්නේ. කොටින්ම රැජිනගේ සහ චාල්ස් කුමාරයාගේ අක්කර ගණන් වතු  යාය වලටත් මේ නීතිය  එහෙම්මමයි. 

 

ඉතින් අපේ අඩිපාර වැටිලා තිබුනෙත් ගොවිපළවල් දෙකක් මැදින්.  ඔන්න එකක මැද පිට පැත්ත යටට හිටින්න  වැටිලා ඉන්නවා බැටළුවෙක්. කකුල් හතරම උඩ  තියාගෙන. දැන් කාන්තා පක්ෂය "අනේ අපොයි" කියනව. චණ්ඩිම  බැටළුවා පෙරලන්න දත කනවා. මම කිව්වා ඔය ෆුට් ඇන්ඩ් මවුත් ලෙඩේ ද දන්නේ නැහැ අල්ලන්න නම්  එපා කියල. කෝවිඩ් මදිවට ඒකත් හැදුනොත්. දැන් කට්ටිය අයිතිකාර ගොවිපලට කතා කරලා මෙසේජ් තියනව. මම ගූගල් කරලා බැලුවහම බඩදරු වෙච්ච බැටළු හාමිනේ ලත් වැටුනම  ඔහොම ඉන්නවලු. මම වහාම ඒක නිවේදනය කළා.  ඒ ගමන චණ්ඩිම පොඩ්ඩක් තල්ලුවක් දුන්නම මෙන්න මේකා වේගෙන් නැගිටලා දුවන් ගියා හරියට මුකුත් නොවිච්ච ගාණට.  ඔක්කොම ඉතින් ලොකු අත්පුඩියක් දුන්න අපේ දවසේ වීරයාට.

බුලා ගේ අයිතිකාරයාගේ ලෑන්ඩ් රෝවරේ 

අයිතිකාරයාගේ ටැට්ටර් සෙට් එක 

එතැනින් ගිහිල්ල වැටුනේ තව ගොවිපලකට. ඔය ලෑන්ඩ් රෝවර් එකෙයි ටැට්ටර වලයි පින්තූර ගත්තේ ඒකෙ. ලෑන්ඩ් රෝවරේ ගාවින් තමා යන්න තියෙන්නේ. එතැන ගහල තියනවා බුලා ගෙන් ප්‍රවේසම් වන්න කියල.  (Bull) බුලා කියන්නේ සාමාන්‍යයෙන් හොඳට වැඩුණු වර්ගයා බෝ කරන්න තියන් ඉන්න හරක් නාම්බෙකුට. ඒ කියන්නේ අනින බුලෙක්. හෙමින් හෙමින් කට්ටිය ගොවිපලේ අයිනෙන්ම ගියා. බුලා සහ රැජිනල  ටික තණ උලන් කනවා ඈත. මුල් කොටස පහු කරලා ගියා. ඊළඟ කෑල්ල මැදින් පොඩි වතුර පාරක් යනවා. ඒක හරහා ලී  ගේට්ටුවක් දාල උඩට ලී පඩි දෙක තුනක් දාල අනිත් පැත්තට පනින්න. මෙහෙ සාමාන්‍යයෙන් තියෙන ක්‍රමයක්. මම ඕක උඩට නැගල බැලුවහම දකුණු අත පැත්තේ ගේට්ටුවක් තියනවා.  ගේට්ටුව ඇරලා තිබ්බේ . එතැන ඉඳන් බැලුවහම පේනවා බුලා තණ කොළ හප හප ඉන්නව සැපසේ. බුලා එන්න ඕනේ අප ඉන්න හරියට ගේට්ටුවක් පහු කරලා. චණ්ඩිම වීරයෙක් ලෙසටම ගියා ගේට්ටුව වහන්න. මෙන්න ගේට්ටුව වහල බුලා දිහා බලාගෙන ඉන්නවා  අපේ වීරයා. ඒ අතරේ ඒ කෑල්ලේ වම් අත පැත්තේ ගස් වලින් හැදුනු වැටක් තියනවා. ඒ වැටේ එහා පැත්තේ තවත් ගේට්ටුවක් තියනව අපට පේන්නේ නැහැ. ඒ ගේට්ටුවෙන් තවත් බුලෙක් වැට පන්නල  ඇවිල්ල චන්ඩිම පිටිපස්සට  වෙලා බලන් ඉන්නව. මේ මනුස්පයා මේ අහවල් දෙයක් කරනවද ගේට්ටුව වහගෙන කියල. මට තවම මැවිලා පේනවා. බයට වැඩිය දැන් ඔක්කොම හිනා වෙනවා. අපි චන්දිමට කීව හෙමින් සීරුවේ වරෙන් පස්සෙන් පස්සට කියල. චණ්ඩිම චන්දෙ පැරදිච්ච මන්ත්‍රී කෙනක් වගේ  දැන්  ශේප් එකේ පිටි පස්සට ආව. ගොන් නාම්බත් මුකුත් නොදැක්ක වගේ තණකොළ කන්න ගත්ත.

මං කිව්වා ඔන්නොහෙ යමු කියල මූලිකත්වය ගත්ත. චණ්ඩිම සහ පවුල් පස්සෙන් එනවා.පොඩි එකා සන්දියේ ,  ඔය ඉස්සර ලුණුගල ඉන්න කොට,  අඩාවත්ත පාරේ යන වෙලාවල  දෙමළ ජනතාවගේ ලැයින් වලට පස්සේ හරියේ මී ගවයෝ ඉන්නව. මම කරන්නේ එතනින්  හෙමින් හෙමින් ගිහින් ඊට පස්සේ දුවනව හැටට හැටේ. මේ හරක් නාම්බෝ මොක්කුද ඒ මී හරක් එක්ක බැලුවහම. නෑදෑයෝ කියල හිතල ද දන්නේ නැහැ කිසිම තර්ජනයක් හරක් නාම්බා ගෙන් ආවේ නැහැ. දැන් අපි එහා පැත්තේ වැටෙනුත් පැනල මගේ බිරින්දැයි අර නම දාන්න අකමැති ට්බිලිසි යාලුවා සහ පවුලටයි කැ  ගහනවා එන්න එන්න කියල. ඕන් ඔය වෙලාවේ එහා පැත්තේ කෑල්ලේ හිටි ඔක්කොම එළදෙන්නුයි, වැස්සියෝයි , පොඩි වහු පැටි කෑලි ටිකයි, බුලෙකුයි ආවේ නැතෑ අපි හිටිය පැත්තට. කට්ටිය ආවේ හරියට "සජිත් ස" ගෙන් උසනම් සෙකුරිටි , මිටිනම් කම්කරු රස්සා ගන්න වගේ.    ඇවිත් අර අපේ යාළුවෝ  ඉන්න පැත්ත බලාගෙන ඔක්කොම එක දිගට උම්බෑ කියනවා. හරියට අනේ එන්න මේ පැත්තට තණ උලා කන්න. අපි අනින්නේ නැහැ කියනව වගේ. අපේ අතරමන් වුනු කට්ටිය දුවලා ගිහින් නතර වුනේ පාරේ.

අපි අර ඒ දවස් වල හිටි, පස්සේ කෙල වෙලා ගිය "අළුත් පරපුර" වගේ   නිර්භය පරපුරක් ලෙස  ඉතින් කොහොම හරි පාර හොයාගෙන ජොයින් වුනා කට්ටියට.  

 

ආපහු චණ්ඩිම ලගේ ගෙදර ඇවිත්  ආගිය දේ කතා කරලා ඉඳ ගත්ත වෝදච්කි ටිකක් බොන්න. වදා කියල රෂියන් වලින් කියන්නේ වතුර වලට. මේක ටිකක්  වතුර වගේ පෙනෙන බීමක්. දෙක තුනක් දාගත්තාම රෂියන් දන්නැති අයත් ඒ භාෂාවෙන්ම කතා කරනවා.  

ඔන්න එස්එ න් එම් මලී අරන් ආව අර කමෙම්බෙයාර් චිස් වගේ තියෙන්නේ , සමහර ඒවාට බ්‍රී කියලත් කියනවා. ඒකක් උදුනේ තියල  හොඳට රත් කරලා. මැදට රස සෝස් එකක් හදල දාල. දියවෙන චීස් හරිම රහයි කන්න. මාක් ඇන්ඩ් ස්පෙන්සර් එකෙන් ගත්තද දන්නේ නැහැ. කිව්වේනම්  එයා හැදුව කියල. හැබැයි ඒකට දැම්මලු ගන් පව්ඩර් සෝස්. ඒ කියන්නේ වෙඩි බෙහෙත් දාපු සෝස් . මේකනම් මේ  පෙරටුගාමී පක්සේ   කඩාකප්පල්කාරී වැඩකට සෙට් වෙන්නද  කොහෙද කියල බයත් හිතුනා. එස් එම් මලී පක්ෂෙකින් දාපු ඔත්තුකාරියෙක් වෙන්න බැරිද ?  ළඟදීම ඉවෙන්ට් එකකුත් තිබෙනවා.  ගිනි කූරක් ගැහුවනම් බඩේ ප්‍රීති වෙසක්.  හැබැයි ඒක නම් රහයි. ඒ වගේම ගොඩක් බයිට් තිබුන ඉතින් චීස් තමා වැඩි පුරම.

ඔය අස්සේ මට ඇහෙනවා කුණු කුණු ගානවා කුස්සිය පැත්තෙන්. 

"ඔයා අර සම්බෝලේ හැදුවද?"

"ඔව් අනේ රතු  සම්බෝලෙයි, ලූණු සම්බෝලෙයි , අවුමිරිස් සම්බෝලෙයි ඔක්කොම තියනවා."

"වරද්දන්න  එපා,  අනිත් පාර සම්බෝල  නැහැ කියල ලීවොත් හෙම "

"නෑ නෑ , අනේ එහෙම වෙන්නේ  නැහැ" බලනකොට එස් එන් එම් මලීයි චණ්ඩිම යි, ඕන්  අරන් එනවා සම්බෝල සෙට් එකක්ම. හපොයි මේ සම්බෝලයක් ගැන ලියල වෙච්ච  දෙයක්.

අපරාදේ කියන්න බැහැ  ගොඩමස් , දිය මස් දෙකම තිබුන ලන්ච් ඩිනර් එකට. කෑවේ ඔය අතරමැදි වෙලාවකනේ. බත් ඉඳියාප්ප ජාති ඔක්කොම එක්ක. කන්නත් බෑ ඉතින්..   ඩෙසර්ට් නුත් හොඳටම තිබුන.

චණ්ඩිම මගෙන් ඇහුව කෑම එක කිසි අවුලක් නැහැ නේද. මං කිව්වා සුපිරියි කියල. මෙන්න මෙයා  පෙන්නනවා මොබයිල් එක. උත්තරේ රෙකෝඩ් කළාලු. අපි නම් අහුවෙයි ඕවට. 

සාමාන්‍යයෙන් ඩ්‍රින්ක් එකක් දාල කෑව වෙලාවට රෑ වුනහම බිරින්දෑ තමයි ගෙදර යනකොට ඩ්‍රයිව් කරන්නේ. රෑට දැන් හරියකට ඇස් පේන්නෙත් නැහැ නොව. මම ඉතින් සැපට නින්දක්  දාගෙන එනවා.

යාන්තන් නින්ද යා ගෙන එනකොට මතක් වුනා.

නිවිති දාපු පරිප්පු තිබ්බේ නැහැනේ. අඩුම ගානේ තම්පලා දාපු පරිප්පු හරි තිබුනා නම්.

****************************************************************************

මේ කතාව එතනින් ඉවරයි. මම ලියපු "ප්‍රථම ප්‍රේමය ඔබ නොවේ" පොත පිලිබඳ සංවාදයක් මේ මාසේ 13 දා ලන්ඩන් වල තිබෙනවා. ඒ පැත්තක ඉන්නවානම් එන්න.  හවස 4.00 ඉඳන්.  විජිත  ගුණරත්න ස්වීඩනයේ ඉඳන් සහභාගී වෙයි.  අධ්‍යක්ෂක නුවන් ජේ ත් එනවලු.  ඩිලානි හදන බුරියානි එකට චණ්ඩිම ගේ ට්‍රේඩ් මාක් පෝක්  කරියක් තිබෙන නිසා එන බව මට කීවොත් හොඳයි. නැත්නම් මදිවෙයි.  ෆේස්බුක් /කෝල් ඕන එකක් දෙන්න. 

සම්බෝල හෝ පරිප්පු නැති  බව කරුණාවෙන් සලකන්න.

(දැන්වීම හැදූ සරද සමර ට ස්තූතියි)

දුයිෂෙන් පන්නයේ ගුරුතුමෙක් සහ දරුවන් සමූහයක් , නාථගනේ විදුහලින්

මේ ලිපියෙන් සමහර අයට මහියංගන ඉස්කෝලෙට වතුර දීපු එක මතක් වෙයිද දන්නේ නැහැ. සුමිත් කලණසිරි ප්‍රධාන පිරිස ඒ දිනවල බ්ලොග් සින්ඩිය වන නෙලුම් යාය එකතුව සමග කළ  ඒ සත්කාරයට විශාල පිරිසක් සම්මාදම් වුනා. ඒ ගැන සුමිත් ලියපු සුන්දර ලියමන  මෙතන. "වහින්නට හැකිනම් ගිගුම් දී". ඔය වැඩේ සහ ඊට කලින් අපි කරපු එවැනි වැඩ ගැන කතාවකට අයිටිවී එකේ  මමත්, නාලක ගුණවර්ධන, අජිත් පැරකුම් හා අනුරාධා කෝදාගොඩ ,  තරුරසී විසින් සංවිධානය  කරපු  රුපවාහිනී  වැඩ සටහනකට අපි සහභාගී වුනා. එහි අසන්නන්ගේ ප්‍රශ්නයක් වශයෙන්  නන්දන ගුණතිලක මහත්මයා  ඇහුවා "ඇයි මේ ආණ්ඩුව කරන්න ඕනේ වැඩ ඔය ගොල්ල කරන්නේ" කියල. මම හිතන්නේ මම උත්තර දුන්නේ අපේ කැමැත්තෙන්  කරන දෙයක් වශයෙන් සහ ආණ්ඩුව කරනකන් බලන්න ඉන්න බැරි බව වගේ දෙයක්.  හැබැයි ඒ ප්‍රශ්නය අද ඇහුව නම් පිළිතුරක් ලෙස අහන්න  තියෙන්නේ 

"අවුරුදු 73ක් ලංකාව පාලනය කළ  ආණ්ඩු සහ දේශපාලනඥයෝ පොල් ගෑවද කියල තවම මේ වගේ තත්වයේ පාසැල් තියනවා කියන්න. " 

හොඳ ආණ්ඩු ගැන සිහින කෙසේ වෙතත් උදව්  කරන්න ලැදි ජනතාවක්  ශ්‍රී ලංකාවේ සහ පිටරට සිටීම ඇත්තටම  භාග්‍යයක්. 😀

මම මේ නාථගනේ විදුහල ගැන දැක්කේ ෆේස්බුක් එකෙන්.  "සුරකිමු නාථගනේ විදු මව්" තමාගේ පිටුවේ නම.   විදුහලේ උගන්වන ගුරුතුමෙක්  ළමයි ලව්වා පාසැල් වත්තේ වගා කරනවා. සමහර වෙලාවට දෙමව්පියනුත්  උදව් කරනවා පෙනෙන පින්තූර වගයක් තිබ්බ.  විදුහලේ මුලින් ඉඳල තියෙන්නේ ළමුන් 11 ක වගේ පිරිසක්. මේ ගුරුතුමාගේ අප්‍රතිහත ධෛර්යය නිසා දැන් ඒ ගාන තිහකට විතර වැඩි වෙලාලු. වහන්න ගිය පාසැලක්  තමයි මේ අමාරුවෙන් ගෙනියන්නේ.   ඒක නිසාම මම ගුරුතුමා වන ඉන්දික අතපත්තුට පණිවිඩයක් යැව්වා පුස්තකාලයක් හදන්න උදව් කරන්න කැමැතියි කියල . ඊට කලින් තරංගනී රෙෂිකා (තරුරසී) නංගි එක්කත් ඒ වගේම පොඩි ප්‍රොජෙක්ට් එකක් කළ නිසා. 

එයා කිව්වා දැනට නම් පොත් වගයක් ලැබිලා  තිබෙනවා කියල. ඒ නිසා වෙන  විධිහේ උදව්වක්  කරන්න කැමතිද කියල ස්වයං රැකියා වැඩ පිළිවෙලකට.  ළමයි පාසැල් එන්නේ නැත්තේ පවුල්  වල තිබෙන අගහිඟ කම් නිසානේ. කෝවිඩ් තර්ජනය  නිසා රට වරින් වර වසා දමන නිසා  ඒ තත්වය තවත් උග්‍ර වෙලා තියෙන්නේ.  ඉන්දිකගේ අදහස තමයි පවුල් වලට උදව් කළොත් දෙපයින් හිට ගන්න ළමයින්ට ඒක උදව්වක් වේවි කියන එක. 

 

එනිසා අපි කට්ටියක් එකතුවෙලා එක පවුලකට උදව් කරන්න කටයයුතු කළා.

ඒ පවුලට අවශ්‍යවුනේ රබර්  සෙරෙප්පු හදන කටර් එකක්, මැෂිමක් ඇතුළු උපකරණ ගන්නට. ඉතින් ඒ කොටසට ආධාරයක් දෙන්න අපි කැමති වුනා. එතන ගිහිල්ල විමසලා  බලන්න නිශාන්ත රෝහණ, දිනෙත් පබසර, නිපුන ප්‍රනාන්දු හෙම  ගියා.  ඊට පස්සේ ජනක ලක්මාල් ඉදිරි සම්බන්ධිකරණ වැඩ කරන්න භාර ගත්ත.

මොනිකා ශාෆෙර් ෆෙහ්ර, ශාන්ත පෙරේරා, නිකි කින්ච්, කීත් නොට්ලී,  සුමුදු වික්‍රමාරච්චි, කොලින් සහ ආශා  සූරියබණ්ඩාර ඇතුළු අපි කට්ටිය  ආධාර ලබා දුන්නා. ඉතින් මම හිතන්නේ මැෂිම හෙම ලැබෙයි ලබන සතියේ විතර.

මැෂිම ගෙනාවම තබන  වැඩපළ තමයි මේ පින්තූරයේ තිබෙන්නේ.

විදුහලට මේ දක්වා  උදව් උපකාර කරපු අයගේ විස්තර ඉන්දික ගුරු මහතා ඒවා තිබෙනවා.

ඇත්තම කියනවානම් ඉන්දික අතපත්තු ගුරු මහතාට මේ දේවල් කරන්න අවශ්‍ය නැහැ. ගුරුවරයෙක් හැටියට උගන්වන ටික කරලා ගෙදර ගිහින් තමන්ගේ වැඩක් බලා ගන්න පුළුවන්. දුයිෂෙන්  කතාව නම් ටිකක් පරණ  කතාවක් නේ . ඒක සමහර වෙලාවට වර්තමානයට අදාළ නොවෙන්නත් පුළුවන්. ඒත් ඒ කතාවේ පොඩි කෑලි ටිකක් අපට නිතරම වගේ හමුවුනා පහුගිය කාලවල. මම හිතන්නේ මේ එයින් එකක්.  ඇති හැකි අයට ආධාර කරන්න පුළුවන් මේ පාසලටත්. මම හිතන්නේ ළිඳ තියන හරියත් එලි පෙහෙළි කරලා දෙන්න පුළුවන්. 

මේ ස්වයං රැකියා වැඩේ අමුද්‍රව්‍ය  මිලදී ගැනීම  සඳහා උදව් කරන්න කැමති අයට ඉන්දික  අතපත්තු ගුරු මහතාට කතා කරලා ආධාර කරන්න  පුළුවන්. 

  

- අජිත් ධර්මකීර්ති 

පාටියේ අඩු දේ

අද උදේ කීර්ති  පැස්කුවල් කියන සංගීතඥයා මෙහෙයවන සංගීත පන්තියකට යන්න හිටියේ. සින්දු කියන්න ඉගෙන ගන්න. නැත්නම් ගෙම්බා වගේ බක බක ගාන්න බැහැනේ පාටියකට ගියහම. බිරින්දෑ නම් කිව්වේ, අනේ මේ අවුරුදු පනස් හයක් වෙන්න යනව. මොන සිංදුද ඔයාට කියල. ලොකු දුව නම් කීව තාත්තා ඔන්නොහෙ යන්න ඒකට , වයස ප්‍රශ්නයක් නෙමේ තමන්ගේ හීන වලට. ප්‍රශ්නේ කියන්නේ මට එහෙම හීනයක් තිබුනෙම නැහැනේ. මේක මේ  කෝවිඩ් කාලේ ඔළුවට වැටිච්ච මරාලයක්.

 ඉතින් ඊයේ ටෙක්ලා ගේ ගෙදර ගිහින් එනකොට රෑ තුනයි. ඉතින් මොන සින්දු පුහුණු වීම්ද . ඒක පටන් ගන්නෙත්  හෙන  උදේ පාන්දරම අරුණළු වැටෙන්නත් කලින් දහයට විතර. එකොළහමාර වෙනකන්ම නිදා ගත්ත.  ඒකනම් තනිකර චම්පක ගේ වැරැද්ද. ගිටාර් එක අරන් එන්න කිව්වා සින්දු කියන්න. සින්දු වලට ගිටාර් එක ගහන කොට තමයි මතක් වුනේ සිංහල සින්දුවල මැද හරිය මතක නැහැ කියල. ගිටාර් එක විසි කරලා දැම්ම චම්පිකය  කැරෝකේ කියන්න  ගිය නිසා.

දැන් ඔය චම්පිකය කියන්නෙත් මාර චරිතයක්. දන්නා විධිහට විමල් විරවංශ යි (අර සීගිරී නොගිය කෙනා)  චම්පිකයි තමයි කළුතර තිස්ස විද්‍යාලයේ  ක්‍රිකට් ටීම් එකේ ඕපනින් බැට්ස්මන් ල දෙන්නා. වීරවංශ සීගිරි නොගියට ක්‍රිකට්  ගහල තියෙනවා. ඕක මොකක්ද ඉතින් කළු රන්ජිතුත් ගහල තියෙන එකේ. 

 ඉතින් බලන්න දෛවයේ හැටි පින්වත්නි.  විරවංශ ප්‍රබල අමාත්‍ය දුරයක , මෙයා  මෙහේ පාටි වල සින්දු කියනවා. ඕගොල්ලොත් හොඳ කල්‍යාණ මිත්‍රයෝ සෙට් එකක් හදා ගන්න විරවංශ ඇමතිතුමා  වගේ. 

ඉතින්   ටෙක්ලා කරේජස්ෆ්ලෑග් ගේ ආරාධනයෙන් එතන තියෙන අර finger ෆූඩ් කියල කියන්නේ , සොසේජස් කෑලි , කුකුළු අඬු , චීස් කෑලි, අමු කැරට්, අමු පෙපර්ස්  කන්න ගත්ත.  බිරින්දෑ කිව්වා ඔයා හොඳට කන්න  වෙන නම් කෑම නැහැ ඕව තමයි තියෙන්නේ කියල.  රෂියන් සැලඩ්, කල්බසා කෑලි ටිකක්, ඔලිව් ගෙඩි ටිකක්, කේක් ම ගෙඩි පිටින්  දෙකක්ම  හෙමත් තිබුන. මාත් ඉතින් කෑම ටිකක් බෙදා ගෙන සෙට් වුනා. 

එතනම නුවරින් ආපු  ග**යි , කුරුණෑගලින් ආපු  ආශා යි, රත්මලානෙන්  ආපු  ජීවනී යි බර ඕපා දූපයක. මම ඉඳ ගත්ත විතරයි කතාව වෙනස් කළා. දැන් කතා කරන්නේ හඳයි  ඉරයී අතරේ දුර කොපමණද? ඔයා  ක්වන්ටම් අංශු ගැන අර තිබ්බ ලිපියේ කියෙව්වද ? ආදී වශයෙන්. මට පොඩ්ඩක් හොල්මන් වුනාම ආශා කියනව 

"ඔයා මේ පාටි වල කතා කරන ඒවා බ්ලොග් වල ලියන නිසා අපි දැන් කතා කරන්නත් බයයි. " කියල.   ඒත් ඒ එක්කම කියනව "මම තමයි ඉස්සෙල්ලම ඔයාගේ  වයිෆ් හදන පරිප්පු හොඳයි කීවේ. හැබයි ඔයා ලියල තියෙන්නේ ටෙක්ලා ගැන විතරයිලු. " 

ඉතින් මේ ගැහැණු මනස ගැන විශ්ලේෂණය  කරන්න ඕනේ කොහොමද?" ලැකාන් ද බුදු හාමුදුරුවෝද ඕෂෝ ද ගන්න  ඕනේ?   බ්ලොග් එකේ ලියන්නත් එපාලු. ඒ වුනාට ලීවේ නැතුවහමත්  බනිනවා. ඒ වුනාට ඊළඟ පැයේ කට්ටිය කතා කලේ කිතුල් පිටි උයන හැටි,  තල් පිටි කැඳ හදන හැටි. ආනා කියල හොද්දක් හදන හැටි. මම දැනගෙන හිටියේ මිස්ටර් ආනා ගැන විතරයි.  වැඩේ නරක අතට හැරුන නිසා මං  අනිත් පැත්තට හැරුනා. 

මෙන්න එතනට සරෝජ්  පතිරණ එකතු වුනා නේ කන්න. සාමාන්‍යයෙන් බීබීසී එකේ වැඩ කරනවා කියන්නේ අපිට වෙන බයිට් ඕනේ නැහැ. සරෝජ් තමා බයිට් එක. හැබයි ඉතින් බයිට්  වශයෙන් එතැන  කියැවුණු දේවල් බ්ලොග් එකක  ලියන්න බැරි නිසා නිකන් ඉන්නවා.

සරෝජ් දඩ බත් පිඟානක් බෙදා ගෙන කනවා දැකල මම ඇහුවා "මචන් බතුත් තියෙනවද? නැත්නම් උඹට විතරද?" කියල. කියන්න බෑනේ ජ'නලිස්ට් ලට වෙනම  සලකනවද කියල.  සරෝ  කිව්වා " බත් නම් දැක්ක මචං ගිහිල්ල  බලපන් කියල කුස්සිය පැත්තේ. කියල.  " ඩබල් එකේ  ගියා කුස්සියට. මෙන්න ටෙක්ලාගෙන් ඇහුවම කියනව "ඔයාගේ වැරැද්දනේ. මම හැමදාම බත් හදනවා. එක පාරක් කුමාරට රෑ දෙකට බත් ඕනේ වුනා . එදා ඉඳන් ඕන පාටියක බත් ෂුවර් කියල. " 

"ඉතින් දෙයියනේ  ඔයාමනේ කීවේ ෂෝට්ඊට්ස්  කන්න කියල" කීවම ටෙක්ලා කියනව. "මම ඔයාට කීවේ නැහැනේ එතැන තියෙන ඔක්කොම කන්න කියල"

කිරි අප්පට බල්ලෝ පැනපි කීවලු. 

ඒ වුනාට හැබැයි  බත් නොකා යන්න පුලුවන්ද? ටෙක්ලාගේ කෑම කොහොමත් රහයි.

ඇපල් උයල, පරිප්පු වලට තම්පල දාල , ලීක්ස් , කුකුල් මස්,  ඇදේට කපපු තෙල් දාපු බෝංචි, අල බැදුම , මාළු බැදලා , මාළු ඇඹුල් තියල හොඳට තිබ්බ. ඉතින් මාත්   පොඩ්ඩක් බඩට දාගත්ත. (හොඳ පොඩ්ඩ). ගිය සැරෙත් ටෙක්ලා ගේ ගෙදර දානයකි වෑන්ජන් දාසයක් විතර තිබ්බ. ඒ තියෙන ටික කන්නේ නැතිව මම ඇහුවනේ "කෝ පරිප්පු" කියල.  බලන කොට ඒක ළිපේ අමතක වෙලා. . ටෙක්ලට ගන්න අමතක වෙලා ආශා ගෙනත් තිබ්බ. 

ලුණුගලගොඩ ගමයානන්ද හාමුදුරුවෝ පවා කියල තියනවා "මිනිසුන්ට නැති දේම පෙනෙන එක ලොකු වැරැද්දක්" කියල.  ගෑස් නැහැ , පොල් නෑ , ගුරුවරු නෑ, දර නෑ, පෙට්‍රල් නෑ, කිරි පිටි නෑ.

ඔය කොච්චර ගොටුකොළ, තම්පලා  හෙම තියෙනවද? ඒවා පේන්නේ නෑ.

 

මගේ වැරැද්දත්  ඉතින්  නැති දෙයක්ම තමයි පේන්නේ. කවුන්සලින් වත් යන්න ඕනේ. හදා ගන්න. 

ඒ මදිවට ලොකු දුවට දෙන්න  කියල ටෙක්ලා  බත් පාර්සල් දෙකක්ම දීල.

ඉන් එකක් අද දවල්ට කෑවා .

වෑන්ජන අටක් තිබ්බට මොනවා හරි  අඩුයි වගේ.

ඔලුවේ අත ගහගෙන කල්පනා කළා.

මතක් වුනා.

කෝ යකෝ සම්බෝල?

- කොළඹ ගමයා (අජිත් ) 

අපි දෙදෙනා අද ...............

අද දෙවෙනියත්  ගියා 

විශ්ව විද්‍යාලෙට 

විදු පියසේ නතර වුනා 

අපි දෙන්න ඉතින්  

ආව ගෙදර 

දූවරු දෙන්නම 

දැන් නිවහනේ නැහැ 

පොඩි කාලේ දඟකාර හිනාවන් 

කෙල්ලන්ගේ කිංකිණි හිනාවල් 

වලින් පිරිලා තිබ්බ නිවස නිහඬයි 

තාත්ත කෙනෙකුට දුවල කියන්නේ 

ඇස් දෙක වගේ 

ලෝකේ බලන්නෙත් සමහර වෙලාවට 

ඒ දෙන්නා ගැන හිතල 

ඒ ඇහින්මයි 

ඉතින්, කාලෙකට   පස්සේ 

අපි දෙන්න විතරයි 

එයා ෆිල්ම් එකක එල්ලිලා

මම බ්ලොග් එකක එල්ලිලා 

ජිවිතේ ආයිත් අළුත් 

අවධියක 

තුන්වෙනි බ්ලොග් රැල්ල 

තෙවෙනි යාමය 

නැත්නම් 

ජිවිතේ සැඳෑ  සමයට 

කලින් එකද 

මොකද තවම වැඩනේ 

විශ්‍රාම ගිහින් නැහැනේ 

ඒකට 

මොකද්ද කියන්නේ 

නමක් තියනවද 

~~~~~~~~~~~~~~~~~~~~~~~~~~~~~~~~~~~

දෙවෙනි වසන්තය 

කියල  යාළුවෙක්  කියනවා 

ඒකත් ඇත්ත 

වේදනාබර දෙවන වසන්තයක්  

කුහුඹිය ගේ කතාව හෙවත් කුහුඹු කළමනාකරණය

සෑම දිනකම කුඩා කුහුඹිය  තම කාර්යාලයට (හෝ වැඩපළට ) හිමිදිරියේම පැමිණ එසැණින්ම වැඩ පටන් ගත්තාය. සෑම දිනකම නිෂ්පාදන බොහෝමයක්  කළ ඇය ඒ ගැන ඉතා සතුටු වූවාය.  ඇගේ බොසා හෙවත් සමාගමේ ප්‍රධාන විධායක නිලධාරී තැන වන සිංහයා  කුහුඹිය කිසිදු සුපවයිසර් කෙනෙකු නොමැතිව, කාගේවත් සොයා බැලීමකින් තොරව වැඩ කරන ආකාරය  හොඳින් නිරීක්ෂණය කළේය.  ඔහුට හදිසි යුරේකා මොහොතක් පහල වුනේ එවිටය. මැනේජර් කෙනෙකුගේ, සුපවයිසර් කෙනෙකුගේ හෙවිල්ලක් බැලිල්ලක් නැතිව ඇය මෙතරම් නිෂ්පාදනය කරනවා නම් සුපර්වයිසර් කෙනෙකු යටතේ ඇය වඩා පලදායී ලෙස   නිෂ්පාදනයේ යෙදෙනු ඇතැයි සිංහයාට  සිතුනි.  

සිංහයා කලේ ඉතා හොඳ වාර්තා (රිපෝට්) ලිවීමේ කෙළ පැමිණියෙකු වූද සුපවයිසර් කෙනෙක් ලෙස ඉතා දීර්ඝ පළපුරුද්දක් ඇත්තා වූද කැරපොත්තා, කුහුඹිය ගේ සුපර්වයිසර් හැටියට බඳවා ගැනීමයි. කැරපොත්තා මහතාගේ මුල්ම  කාර්යය වූයේ පැමිණීමේ ලේඛනයක් හා පමාවී පැමිණීම් සලකුණු කිරීමට  රතු පෑනක් ද ලස්ස්ති කිරීමයි. කුහුඹිය හැමදාම වැඩට පැමිණෙන්නේ කාටත් කලින් වුවද ඔහු එය ගණන් ගත්තේ නැත. ඔහු පෑන ද  කොම්පැනි වියදම් හැටියට ඇතුළත් කළේය. එසේම ඉදිරි පියවර ලෙස පන්ච් කාඩ් සිස්ටම් එකක්ද ඊටත් පසුව ඉලෙක්ට්‍රොනික ක්‍රමයකට යාමටද ඔහු කල්පනාකාරී ලෙස සැලසුම් කළේය.

එසේම මේ සියල්ල පිලිබඳ වාර්තා ලිවිම සඳහා ලේකම්වරියක ගේ (සෙක්‍රටරි ගේ ) අවශ්‍යතාවය  ඔහුට හොඳින් දැනුනි. කැරපොත්තා ෆයිල් ගොනු කිරීමට  සහ සියලුම දුරකථන ඇමතුම් නිරීක්ෂණයට සුරූපී මකුළු ළඳක  බඳවා ගත්තේය. 

සිංහයා , කැරපොත්තා ගෙන් ලැබෙන වාර්තා වලින් ඉතා සතුටට පත්විය. කුහුඹිය  කවදාවත් නොකැඳවුණු,  සිංහයාගේ මහේශාක්‍ය ඔෆිස් ලෙනට කැරපොත්තා කැඳවූ සිංහයා වාර්තා ඉදිරිපත් කිරීමේදී ප්‍රස්තාර ආදිය උපයෝගී කර නිෂ්පාදන අනුපාත මෙන්ම ප්‍රවණතාවයන් විශ්ලේෂණය කිරීමේ වැදගත්කම පැහැදිලි කළේය. එසේම එවැනි ප්‍රස්ථාර සහිත වාර්තාවක් සිංහයාට අධ්‍යක්ෂ මණ්ඩල රැස්වීම් වලට පවර්  පොයින්ට් ප්‍රසන්ටේෂන් එක සමග ඉදිරිපත් කිරීමට හැකි බවද පැවසීය. මෙවැනි සුපිරි වාර්තා වලින් බෝඩ්  මිටින් වලදී සිංහයා වැඩයා වන බවද සිංහයාට දැනුනේය. 

එවැනි සුපිරි වාර්තා හැදීමට නව කොම්පියුටර දෙකක් තමන්ට සහ මකුළුවාට අවශ්‍ය බවද නිවසේදී හෝ ගමනේදී වැඩ කිරීමට ලැප්ටොප් එකක් ද හොඳ ලේසර් ප්‍රින්ටරයක්ද අවශ්‍ය බවද කැරපොත්තා දැන්වීය. මේ නිසාම තොරතුරු තාක්ෂණ (IT) දෙපාර්තමේන්තුවක්  ද පිහිටවූ ඔහු එහි කළමනාකරු වශයෙන් බුරා නම් පළතුරු  මැස්සා පත් කළේය.

 මෙතුවක් කල් ඉතා සැහැල්ලුවෙන් තම  නිෂ්පාදන ධාරිතාව ඉක්මවමින්  වැඩ කළ කුහුඹිය මේ අතිමහත්  ලිපිගොනු පිරුණු  අමතර වැඩ වලින්ද   කැරපොත්තා, මකුළුවා මෙන්ම මැස්සා විසින් සංවිධානය කරන, ඇගේ කාලය වැයවන  මීටින් වලින්ද ශාරීරිකව මෙන්ම  මානසිකවද  වෙහෙසට පත් වූවාය.  

සිංහයාට  කල්පනා වුනේ කුහුඹිය වැඩ කරන දෙපාර්තමේන්තුවට ඔෆිසර් ඉන් චාර්ජ් කෙනෙකු හෙවත් ලොක්කෙකු නොපමාව පත් කල යුතු බවට කාලය එළඹ ඇති බවය.  ඔහු මේ සඳහා හොඳ සැර බලු නාම්බෙකු වූ ටොමියා පත් කළේය.  ටොමියා ගේ ප්‍රථම වැදගත් තීරණය වූයේ ඔහුගේ ඔෆිස් කාමරයේ පරණ බුමුතුරුණ ඉවත් කර පර්සියාවෙන් විශේෂයෙන් ගෙන්වූ බුමුතුරුණක් මිලදී ගැනීමය. එසේම සෞඛ්‍ය  සම්පන්න ලෙස විද්‍යානුකුලව හිඳ ගැනීමට හොඳ ලෙදර් වලින් නිමැවූ  පුටුවක් ද ෆිනෑන්ස් දෙපාර්තමේන්තුවට කරුණු ඉදිරිපත් කර ලබා ගත්තේය. නව දෙපාර්තමේන්තු අධිපති ටොමියාට ද පරිගණයක්, ලැප්ටොප් එකක් සහ පෞද්ගලික සහකාරවරයෙකුද වහාම අවශ්‍ය විය. ඔහු තමන්ගේ කලින් දෙපාර්තමේන්තුවේ සිටි සුරූපී ටොමියානි  ගෙන්වා ගත්තේ, ඔහුගේ  අයවැය වියදම් සීමා කිරීමේ උපාය මාර්ගික සැලසුමක්  සකස් කිරීමේ කාර්යයට සහය ගැනීමටය. එයට අනිවාර්යයයෙන්ම රාත්‍රී වනතුරු කාර්යාලයේ වැඩ කළ යුතු නිසා විස්කි ඩිකන්ටරයක්  ද  ටොමියානි ට ෂැම්පේන් සහ වයින් බෝතල්  කිහිපයක්ද මිලට ගත්තේ කාර්යාල  ක්‍රෙඩිට්  කාඩ් පතිනි.

කුහුඹිය රැකියාව කළ දෙපාර්තමේන්තුව දැන් අඳුරු ගුහාවක් වැනිය. කවුරුත් සිටින්නේ අසහනයකිනි. එහි වෙනදා සිනහවෙන් විහිළු තහළුවෙන් වැඩ කරන අය නැත. මුළු ගැන්වුණු මළානික කුහුඹු කුහුඹියන්  වෙලාව අවසන් වී අළුතින් පිහිටවූ පන්ච් කාඩ් මැෂිමේ කාඩ් එක  ගසා  ගෙදර  දුවන තෙක් ඔරලෝසුව වෙත හොරෙන් බැල්ම හෙළති.

හරියටම මෙන්න මේ අවස්ථාවේ දී ටොමියා සිංහ බොස්ට පැවසුවේ කාර්යාල පරිසරය හා වාතාවරණය  පිලිබඳව ප්‍රාමාණික වියතුන් යොදවා  කාර්යාල-කාළගුණික අධ්‍යනයයක් කළ යුතු බවය.    ටොමියාගේ ද සහය ඇතිව මුළු දෙපාර්තමේන්තුවම දැඩි විමර්ශනයකට බඳුන් කළ සිංහයා ට පැහැදිලි වූයේ නිෂ්පාදන ධාරිතාවයන් පෙරට වඩා බොහෝ සෙයින්  අඩු වී ඇති බවය.

කැරපොත්තා, ටොමියා ඇතුළු සියළු නුවණැති සේවක නයුවන්ගේ අදහස වූයේ   ප්‍රධාන පෙලේ උපදේශන සමාගමක් හොබවන බකමූණා ගේ සේවාවන් මිල අධික වුවත් ලබාගෙන විගණනයක් කර මේ ප්‍රශ්නයට විසඳුමක් ලබා ගන්න ලෙසටය. සිංහයාගේ කොලේජ් එකේ උගත් හොඳ පවුලකින් පැවත  එන බස්සා ප්‍රමුඛ උපදේශන සමාගම පුරා තෙමසක් වැය කොට වෙළුම් කිහිපයකින් සමන්විත වාර්තාවක් අධක්ෂක මණ්ඩලයට ඉදිරිපත් කරන ලදී.

ඔවුන්ගේ අතිශයින් වැදගත්, උගත්, වියත් වාර්තාවේ සඳහන් වුයේ දෙපාර්තමේන්තුවේ සේවක ප්‍රමාණය අනවශ්‍ය ලෙස සීමාව ඉක්මවා  ගොස් ඇති  බවයි.    

සිංහයා පළමුවෙන්ම රැකියා විරහිත කළේ කවුරුන්දැයි ඔබ සිතන්නේද?

ඔබ සිතුවා හරිය. කුහුඹිය ට රැකියාව අහිමි විය.

කුහුඹිය ගේ වැඩ අවසන් කරන ලිපියේ මෙසේ සඳහන්ව තිබුණි.

"කුහුඹිය  කාර්යාලයේ දියුණුව උදෙසා කරන සෑම  ක්‍රියාවක් දෙසම  සෘණාත්මකව බලන අතර රැකියාව කෙරෙහි කිසිදු උද්යෝගයක්  පෙන්නුම් නොකරයි.   "

-මෙම ලිපිය ලින්ක්ඩ්ඉන් හි ඉංග්‍රීසියෙන් පළවූ ලිපියක ඡායානුවාදයකි. මුල් කතෘ අඥාතය.

නරක ක්‍රමයක් හොඳ පුද්ගලයෙකු සැම විටම පරාජය කරයි. - එඩ්වර්ඩ් ඩෙමින් (ඇමෙරිකන් ඉංජිනේරුවකු හා කළමනාකරණය පිලිබඳ උපදේශකවරයෙකි)

A bad system will beat a good person every time.' - W. Edwards Deming

අනුවර්තනය - අජිත් ධර්මකීර්ති   

ප.ලි 

වසරක ඇවෑමෙන් යොහානි නමැති ප්‍රසිද්ධ ගායිකාවකගේ තනුවකට ඉන්දියාවේ විදී කොනක නටමින් මුදල් යදින සිංහයෙකු සිටින බව බීබීසී පුවතක සඳහන් ව තිබුණි. 

දෙමළ පරිවර්තිකාව අමතක වෙනවද

අපේ පරිවර්තන සාහිත්‍යය සෑහෙන්න ප්‍රබල එකක්. අපි පොඩි කාලේ ඉඳන්ම අපේ ස්වතන්ත්‍ර නිර්මාණ වගේම පරිවර්තන පොතුත් සෑහෙන්න කියෙව්වනේ. 

මම පරිවර්තනය කරපු පොත් වලට ඒ කාලේ ඉඳන්ම කැමතියි. මම හිතන්නේ ලංකාවේ ගොඩක් පාඨකයන්ට ඒක පොදුයි.

ඒ නිසාම කේ ජී කරුණාතිලක ගේ ඉඳන් දැදිගම වී රුද්‍රිගු දක්වාත් පද්ම  හර්ෂ කුරණගේ , සිරිල් සි පෙරේරා ගේ සිට චින්තා ලක්ෂ්මි දක්වාත් මතක් වෙනවනේ.  අවශ්‍ය නම් අපට  පරිවර්තනය කරපු පොත්  වල නම් පවා ලියන්න පුළුවන්.

මේ නාමාවලියට  පස්සේ කාලේ තමා චූලානන්ද සමරනායක ගේ නම එන්නේ පරිවර්තන නිසාම. ඔහු ලියූ කවී පොත්  වලට වඩා පරිවර්තන ජනප්‍රියයි කියල මම හිතන්නේ. ඊට පස්සේ බ්ලොග් වලින් දැනගත්ත නිලූක කදුරුගමුව හා චන්දන ගුණසේකරත් මුහුණුපොත හරහාම දැනගත්තු රශ්මික මණ්ඩාවල වල වගේ නව පරපුරේ ප්‍රසිද්ධ පරිවර්තකයනුත් ඉන්නවා.    

ළඟදි දවසක "අසිපතක සෙවන යට" සිංහල පරිවර්තනය කියවල මේ දවස් වල තවත් දෙමල පොතක් වන සිවනාදන් ගේ "මතක මිය ඇදෙන සඳ" කියවන්න පටන් ගත්ත. ඒක පරිවර්තනය කරලා තියෙන්නේ හෂිත අබේවර්ධන .

මම මුහුණු පොතේ සටහනකුත් දැක්ක හෂිතගේ කැමතිම පරිවර්තන පොත් නාමාවලියක් ගැන - පරිවර්තක ගේ නමත් එක්ක.

  

මම මේ පරිවර්තන ගැන කියන්න ගත්තේ මේ ලඟදි දැනගන්න ලැබුන අමුතු කතාවක්. මම දන්නා පුවත්පත් කලාවේදිනියක් තමා ප්‍රියදර්ශනී සිවරාජා. එයා සිංහල පොත් කිහිපයක්ම දෙමළ භාෂාවට පරිවර්තනය කරපු කෙනෙක්.

එයා මට කියනවා ලඟදි කරපු සිංහලෙන් දෙමළට කවි වගයක් පරිවර්තනය කළාලු. නමුත්ඒ ගැන සඟරාවේ සංස්කාරක සහ කවිවල මුල් අයිතිකාරිය ඒ ගැන කරපු පෝස්ට් එකක් සහ සංවාදයක දී ඇයව ව අමතක කළාලු.   දැන් අදහසක් තියනවා තමයි,  නම් දාන එක වැදගත් නැහැ , වැඩෙයි කෙරෙන්න ඕනේ, මුළු ලෝකයටම දැනුම අයිතියි වගේ එකක් . හැබැයි එහෙනම් ඉතින්  මුළු ලෝකෙම අය අඥාත ව ලියන්න ඕනේ. එහෙම පරිවර්තනය කරන්න ඕනේ. හැබැයි එහෙම වෙන්නේ  නැහැනේ. මම බුකියේ කිහිප වතාවක්ම දැකල තිබෙනවා වෙනත් අය (මා  දන්නා අඳුනන අයගෙම) පරිවර්තන/අනුවර්තන කරපු කතා තමන් ලීවා /කළා වගේ  පළ කරලා ලයික්  ගන්නවා, ඒක  ලියුව වගේ හැසිරෙනවා. සමහරු තමන්ගේ නමත් යටින් දානවා. බුකියේ ඉතින් ඒවා එහමයි වෙන්නේ. 

 

  මේ කියන කවි ටික ප්‍රියදර්ශනී කරලා දීලා තියෙන්නේ නොමිලේ කියල කියනව. කොහොමත් හැබැයි සඟරා වලට කරන ඒවාට දැන්නම් කවුරුත් සල්ලි ගෙවන්නේ නැහැ. සඟරා වලට ඕන තරම් බුකියෙන් සහ බ්ලොග් වලින් උස්ස ගන්න පුළුවන් කවි සහ කතා. ඒවාට ගෙවන්න ඕනේ කියල ඉතින් නීතියකුත් නැහැ.

සඟරාවේ කවි පෙළ ගැන  කරපු ඒ ෆේස්බුක්  සංවාදයේ   ඒ ගැන මතක් කලේ නැති නිසා  ප්‍රියදර්ශනීට කිසියම් සිත් වේදනාවක් ඇතිව තිබෙනවා. මේ නිසා ඇයගේ යෙහෙළියක වන පද්මිණි මාතරගේ ඒ බව පෙන්වා දී තිබෙනවා.

ඒ සංවාදය තමා ඔය තියෙන්නේ යට.

මගේ ප්‍රශ්නය ප්‍රියදර්ශනී එසේ සිතීම සාධාරණද? නොමිළයේම  කල පරිවර්තනයක් හා එය සඟරාවකට කල නිසා  පරිවර්තිකාව ගේ නම සඳහන්  කල යුතුමද කියන ප්‍රශ්නය මම ඇහුවා?  ඊටත් අමතරව මම කිවේ මෙතැන කිසියම් සදාචාරාත්මක ප්‍රශ්නයක් විතරයි තියෙන්නේ කියල. මුල් කතුවරිය තමන්ගේ කවි වල පරිවර්තනයක් ප්‍රියදර්ශනී කළා කියල මතක් කළා නම් හොඳයි. එපමණයි.

ඊයේ මම ලියපු එක නිවැරදි කරලා අද තොරතුරක් ආව. සංවාදය කරපු කෙනා හෝ වෙනත් අයෙක් විසින් ප්‍රියදර්ශනී එම පරිවර්තනය කළ බවට සටහනක් දමල තිබෙනවා ඊයේ . ඒක මෙතැන.

නමුත් කවිවල මුල් කතුවරිය ප්‍රියදර්ශනිව නොසළකා හැරිමක්  කරලා තියනවා කියල හිතන ඇයගේ  මූලික ප්‍රශ්නය විසඳුනත් හිත රිදීමේ ප්‍රශ්නය විසඳිලා නැති වගේ  පෙනෙනවා. ඇය නැවත සිංහලෙන් දෙමළට හෝ දෙමලෙන් සින්හලට පරි වර්තනය කරන්නේ ගෙවීමක් කළොත් පමණයි කියන අදහසේ ඉන්නවා.. 

ඕක ඉතින් මම ඒ දවස් වල ඉඳන් කියන එකක් ලංකාවේ පුවත්පත් කලාවේදීන්ට සහ කලාවේදිනියන්ට. නිකම් ලියන්න එපා, නිකන් පරිවර්තනය කරන්න එපා.  පස්සේ දුක් වෙන්නත් එපා.

 

    

බ්‍රිතාන්‍යයේ පෙට්‍රල් ඩීසල් ප්‍රශ්නය

අපේ ගෙවල් පාර ඒ කියන්නේ හාට්ෆඩ් (Hertford) මාවත දැන් දවස් ගානක ඉඳන් බ්ලොක් වෙලා. පෙට්‍රල්, ඩීසල් ගහ ගන්න කාර් පෝලිම. බොරිස් ජොන්සන් ගේ කොන්සවේටිව් ආණ්ඩුව සහ මගේ සමහර බ්‍රෙක්සිට් යාලුවෝ කියන්නේ මේක ජන මාධ්‍ය  වලින් ඇති කරන බයක් කියල. ඒක මට පිළිගන්න අමාරුයි. පත්තර වලින් පෙන්වන්නේ පෙට්‍රල් නැති බව. හේතුව තමයි බරවාහන (ලොරි හා කන්ටේනර්  ) පදවන  රියදුරන් නැති කම. ආණ්ඩුව ඒ ගොල්ලන්ගේ පඩි වැඩි කරන්න කියල සමාගම් වලට දැන් වුවා. පත්තර වල තිබෙන  අන්දමට රියදුරන් ගේ පඩිය දැන් අවුරුද්දකට පවුම් 75000 සිට 100000 දක්වා වැඩි  කරලලු. ඒ කියන්නේ මාසෙට පවුම් 6250 - 8300 දක්වා (ශ්‍රී  ලංකා රුපියල් වලින් ලක්ෂ 18 සිට ලක්ෂ 24 දක්වා ) මම නම් හිතන්නේ එපමණම වැඩි කරලා නැහැ. දන්නා විධිහට අවුරුද්දට 40000 - 60000 වගේ තමා ලැබෙන්නේ. (මසකට පවුම් 3000- 5000 -ලක්ෂ 10- 15 පමණ) 

මගේ අදහස නම් මේ බ්‍රෙක්සිට් එක නිසා ඇති වෙච්ච තත්වයක්, මෙපමණ කල් හිටිය රුමේනියන්, ඇල්බේනියන්, චෙක්, පෝලන්ත සහ දකුණු අයර්ලන්ත රියදුරන් නැහැ. ඊට අමතරව  යුරෝපයේ  ඉඳන් මෙහෙට බඩු අරන් එන බර වාහන වලට  දේශ සිමාවේ දිග පෝලිමක ඉන්න ඕනේ. ඒ නිසා රියැදුරන් එන්න කැමතිත් නැහැ.

මේ නිසාම බ්‍රිතාන්‍ය ආණ්ඩුව ලොරි රියදුරන් ට තියෙන පාඨමාලාව මාස තුනකට අඩු කළා. ඒත් තවම අවශ්‍ය  කරන රියදුරන් ප්‍රමාණය නැහැ. ඒ නිසා දැන් විදේශික රියදුරන් 5000 විතර ගෙන්න ගන්න අවසර දෙන්න යනවා. රියදුරන් නැති නිසාම දැන් චිකන් එහෙමත් සුපර්මාකට් වල අඩුයි. ගෙනෙන්න  කෙනෙක් නැති නිසා.

මේ අර්බුදය අපේ වාමාංශික යාළුවෝ  විස්තර කරගන්නේ කොහොමද  කියන්න දන්නේ නැහැ. හැබැයි තවම  දොස්තර, නර්ස්, විදුලි කාර්මික, පයිප්ප වැඩ කරන නළ කැමියන් ආදීන්ගේත් අඩුවක් තවම තියනව. තොරතුරු තාක්ෂණය පැත්තෙන් රස්සා ඕන තරම් තිබ්බත් ඒවා පිට රටවලට (ඉන්දියාව, මැලේසියාව ශ්‍රී ලංකාව )  outsource කරන නිසා ප්‍රශ්නය තරමක් සමනය  වෙලා තියෙන්නේ. නමුත් ඉහත කී රස්සාවලට එහෙම කරන්න බැහැනේ. බ්‍රෙක්සිට් එක නිසා රැකියා රාශියක් මෙහෙ ඉතිරි වුන බව ඇත්ත. නමුත් ඒවා කරන්න අවශ්‍ය දක්ෂතා (skills) තියෙන අය අඩුයි.  

ආර්ථිකය වර්ධන වේගය 2.1%.  වසංගතය පටන් ගන්නට කලින් ප්‍රමාණයට තවම ඇවිත් නැහැ.  GDP එකනම් 3.6% කින්  වර්ධනය වෙලා. 

 

බ්ලොග් කියන්නේ ..

 

දැන් අපි නැවතත් බ්ලොග්කරණයට යොමු වෙමින් පවතිනවා. ෆේස්බුක් එකේ "යාළුවෝ" වැඩියි. පන්දාහට ලංවුනත් ලියන දෙයක් කී  දෙනෙක් කියවනවද  කියලවත්  හොයා ගන්න බැහැ.  හැමෝම ලයික් දාන්නේ නැහැනේ. නිකන් තියෙන ලයික් දාන්න, ෂෙයාර් කොරාන්න කොමෙන්ට් කොරාන්න කියල අපි උම්මා දෙන්න යන්නේ නැහැනේ. ඒ නිසා මම තවම බ්ලොග් එක ලියාගෙන  යනවා. 😏

අහස්  ගව්ව බ්ලොගය කරන ඒ වගේම රූපන කියන රූපවාහිනි නාලිකාවත්  මෙහෙයවන අනුරුද්ධ වැලිගමගේ සොයුරා  ඇහුවා බ්ලොග් ගැන කතා කරන්න පුළුවන්ද කියල තිලකසිත බ්ලොගය  ලියන තිලකසිරි ඒකනායක සමග. ඒ වැඩ සටහන සෙනසුරාදා ප්‍රචාරය වෙන්න නියමිතයි. මම මේ ලියන්න යන්නේ සාකච්චාවේදී  නොකීව කාරණාවක් ගැන.

මේ ලඟදි දැන ගන්න ලැබුන "මගේ කීචි" බ්ලොගය ලියපු මල්ලි  ලෝකයට සමු දී නික්ම ගිහින් කියල. අමිල ඔබට සුභ ගමන්.  ඔහු වලල්ලාවිට පාසැලට බ්ලොග් මිතුරන් ගෙන්  ආධාර රැගෙන  හරහා විදුලිය දෙන්න කටයුතු කළා.   එවැනි සමාජ සත්කාර  හුඟක් කරපු කෙනෙක්.

ඒ නිසාම ඉහත සාකච්චාවේදී මට අනුරුද්ධට මතක් කරලා දෙන්න බැරිවුණ දෙයක් තමයි අප කළ ඒ සමාජ වැඩ. සුමිත් කලනසිරි, ප්‍රසන්න, දිමුතු  (කටුස්සා ) ආදීන් වතුකරයේ පාසැලකට උදව් කරපු හැටි. ඉන්දික සහ අනෙත් අයගේ දායකත්වයෙන් සුමිත් කලනසිරි ඇතුළු පිරිස මොණරාගල  පාසැලකට වතුර දීපු හැටි. විදානේ, සුරංග ලියනගේ තවත් බ්ලොග් කරුවන් සමග   බදුල්ලේ,   රත්නපුරයේ සහ තවත් පාසැල් කිහිපයකට ම එවැනි උදව් කරපු හැටි. ඒවා කට්ටිය එකතුවෙලා බොහොම කැමැත්තෙන් කරපු වැඩ. මුදලින් දායක වුනු බොහෝ  අය ඉන්නවා. රසික සුරියආරච්චි, ලුඩ් ෆෙර්නාන්දු , ඉවාන් පව්ලුෂා, පැතුම් හේරත්, ඉන්දික , මෙත්මලි, පෙමාස් ගුණසිංහ මහතාගේ බ්ලොගයේ අය , රත්නපුරේ කැටපත් පවුරේ අය සහ   මමත් දායක වුනා,

අපි පෞද්ගලික මුදලින් (කොටින්ම අපේ සාක්කුවෙන්) රුපියල් දහසක මුදලක මාසෙකට වරක් හොඳම බ්ලොගයට දුන්න සම්මානයක්  වශයෙන්.  කැමති දෙයක් ඒකෙන් කරන්න. ඩේටා කාඩ් එක්ක ගන්න. අහේතුවකට  පැමිණි විරෝධයක්  නිසා ඒක නැවතුනා.  අද ආණ්ඩුව කෝවිඩ් ආධාර කියල දෙන්නෙත් රුපියල් දෙදාහක්. මට මතකයි එකට එකතු වෙලා බ්ලොග් එකක් ලියපු  කණ්ඩායමක් ඒ මුදලට තව මුදලක් එකතු කරල උසස්  පෙළ  පොත් කිහිපයක් සිසුවෙකුට අරන් දුන්න. ඉතින් ඒවගේ සොඳුරු වැඩත්අ පි කළා. 

ඒ නිසා ඒ කාලය ගැන  කිසිම දුකක් හිතේ නැහැ. සෑහෙන්න කාලය , ශ්‍රමය , ධනය වැය වුනා තමයි. කණගාටුවක් නැහැ සතුටක් මිසක්. ඉතින් අපි තවම බ්ලොග් ලියමින් සිටිනවා. මම 2013 බ්ලොග් ලියන්න පටන් ගන්නකොට බ්ලොග් කරුවෝ, බ්ලොග් කාරියෝ සහ වෙබ් එකට ලියන අය හුඟක් හිටිය.  කොටස් වශයෙන් පළවෙන  නවකතා ගියා සිංහල වෙබ් අඩවි වල. බෝධිනී සමරතුංග ඒ වල ලීව කෙනෙක්.  මට MSN ගෘප් එකක් තිබුන අනූ ගනන් වල අග භාගයේ ඉඳල. ගූගල් ගෘප් එකක් තිබුණ මම ඇඩ්මින් වෙලා  හිටිය. ඒවල  අපි ලීව . ඒ බ්ලොග් වලට කලින්.  අනිත්කොනේ බෝධිනී , ඇටමැස්සා,  කකා හෙවත් කතන්දර කාරයා (රසික), මාතලන්, අජිත් පැරකුම් ජයසිංහ, අරුණි ශපීරෝ, දිනිති දීපිකා සහ නම් අමතක වුනු බොහෝ අයගේ බ්ලොග් වල මම රසිකයෙක් වෙලා හිටිය.  අජිත් කුමාරගේ බ්ලොග් සින්ඩිය හා අටම්පහුව සින්ඩියත් මතක් කරන්න ඕනේ. ඉතින් ඒ හැමෝටම ස්තූතියි. මටනම් මම ප්‍රවීණයෙක් කියල හිතෙන්නේ නැහැ. බ්ලොගය ට තවම ගොඩ වැදිලා තියෙන්නේ හාර  ලක්ෂයකට ටිකක් වැඩි වෙන්න පිරිසක්. ඉතින් අපි තවම ලියනවා. ලියන්න තියෙන දේවල් තවම ඉවර නැහැ. ගොඩ වැදිලා යන්න එන්න.  

මෙන්න එම විමසුම:

මගේ පළමු සහ අන්තිම රොටිය

අද උදේ මට රොටී කෑමේ සිතක් පහල විය. එහෙම අදහස් ඉඳහිට  මේ පිස්සු ඔළුවට එන්නේය. දෙමළ කඩේ frozen (අධි ශීතකරණ කරන ලද) රොටි පහේ පැකට්ටුවේ ගණන  පවුම් 3 සිට හයයි පනහ දක්වා වැඩිවී ඇත. ඒ කියන්නේ එක රොටියක් පවුම් 1.30  හෙවත් ලංකාවේ දැන් රේට් එකට රුපියල්ම 385 කි. ඒ රොටියේ විෂ්කම්භය සෙන්ටි මීටර් ම පහකි.  කවුරුත් නොදන්නවා උනාට අපේ නිවසේ රොටි, තෝසේ , ඉඳි ආප්ප , ආප්ප  මෙන්ම පරිප්පු හදන්නේද අනිකුත් කරි වර්ග හදන්නේද මගේ ජර්මන්  ජාතික බිරිඳ වන ඉනේස්ය.  ඉනෙස්  ඉඳියප්ප හදන්නේ සාමාන්‍ය විධිහට නොවේ. ඉනෙස්  හදන්නේ ඉඳියප්ප කෝච්චිය. ඒ ගැන වෙනම දවසක කිව යුතුය.

ඊයේ පෙරේදා  යමුනා ගේ පනස් වැනි උපන්දිනයේ දී කවිකාර සුරංගගේ පියම්බිකාව  වන රමණි ආප්ප හදද්දී, ඉනේස්ද ආප්ප ආදිය හදන බව කී  විට ඔවුන් එය විශ්වාස කලේ නැත, අන්තිමේදී තමන් ආප්ප හදන්නේ කෙසේද, පරිප්පු හදන්නේ කෙසේද යන්න ගැන ඉනේස්ම විස්තර කළාය.

 රුසියාවේදී මට චිකන් කරිය උයන්නට ඉගැන්වූ ලොකු වඩ්ඩා නමැති සොඳුරු සීනියර් අයියා කී පරිදි අතට අහුවෙන තුනපහ, මිරිස්, කහ, ගම්මිරිස් ආදිය ඔක්කොම එකට දමා ළඟ තියෙන සෝස් ඔක්කොමද දමා හදන කරිය  ඉනෙස් මුලදී කෑවත් අපේ අම්මා ලන්ඩන් පැමිණි වෙලේ උයන දෙස හොඳින් බලා සිටි ඇයට මගේ මෝල් කම අතටම හසුවුනේය. මම හැම කරියටම එකම දේවල් දමන බව කී ඇය සිංහල හෝ දෙමල කෑම උයන්නේ ඒ ලෙස නොවන බව කියා මා කුස්සියෙන් එලෙව්වාය. ඇය පරිප්පු උයන්නට උගත්තේ එහෙමය.

මේ ලඟදි තවත් යහළුවෙකු වන ටෙක්ලා ඉනෙස් ගේ පරිප්පු රස බව කීවාය. තිස්ස ජනනායක අනුගාමිකයෙකු වන ටෙක්ලා ඒ කිව්වේ ඇත්තට ද බොරුවටද කියා මට ෂුවර් නැත. අම්මා  මෙන්ම ඉනේස්ද පරිප්පු වලට තුනපහ දමන්නේ නැත.  මම උයන පරිප්පු කෑවා නම් ටෙක්ලා ලඟත් නොහිට  දුවනු ඇත.  ඒකට චිකන් එකට මෙන් ළඟ තිබෙන අඩුවැඩිය සියල්ල දමා අඩුපාඩුවට කිරිද දමා එන පරිප්පුවට අන්තිමට පෙරී පෙරී සෝස්, චෛනිස් ස්වීට් චිලි සෝස් හා අඳුරු සෝයා සෝස් (dark soya sause හරිය) දමන බැවිනි.

ඉතින් මට රොටී  ඕනේ කිව් නිසා ඉනෙස් නැගිට ගියත් කොහෙන්දෝ පැමිණි කෝල් එකක් නිසා ඇයට පැය භාගයක් පමණ කතා කර රොටිය  අමතක වී ඇය වැඩට ගොස් ඇත. ඒ දවස් වල රොටිය බබා කියා බ්ලොග් එකක් තිබුන බව මතක් වී හොයා බැලුවත් ඒකෙ රොටි ගැන ඇර අනිත් දේවල් ගැන ලියා තිබේ.  ඉනෙස් රොටි හදන්නට පිටි ජාති දෙකක් මැන සලාද බඳුනට දමා ගොස් තිබුනු නිසා මම එයට උණු වතුර ටිකක් දමා බැලුවෙමි. ඉන්පසු අනන විට අතේ ඇලෙන්නට වූ නිසා සෝයා කිරි දැමුවෙමි. හරි ගියේ නැත. ඉන්පසු පිළිවෙලින් ඕට් කිරිද ඉන්පසු නැවතත් උණු කල වතුරද දැමුවෙමි, ඒ ගමන තලප මෙන් පිටි ගුලියක් හදා ගත හැකිවිය. ඒත් හොඳටම  ඇලෙයි. 

අත හෝදාගෙන ඔලිව් තෙල් බෝතලෙයන් හැඳි දෙක තුනක් හලා ඉන්පසු අතේද ඔලිව් තෙල් ගා ගතිමි. 

ඒත් මේ ආච්චිගේ වස්ත්‍රයේ පිටි ගුලිය අතෙහි ඇලෙන්නේමය. කොටින්ම  රොටියක් රවුම් කර හදාගන්නට බැරිය. තෙල් දමා ඒ උඩට පිටි දැම්මත් ගුලිය අතෙහිම ඇලෙයි. අම්මා රොටී හදනවිට බලා නොසිටීමේ පාපය ගෙවන්නේ දැන්ය. 

 

අන්තිමට මම සාමාන්‍යයෙන් දවල් දොළහ  දොළහ වෙනකන් නිදා ගන්න පොඩි දුව ඇහැරුවෙමි. ඇය මව ගෙන් මේවා ඉගෙන ගන්නා බව දන්නා හෙයිනි.  දුව නිදිමතේම පටන් ගත්තේම "ෆොර් ගෝඩ්සේක් ඩෑඩ් " කියාගෙනය, "දෙවියන්ට ඔප්පු වෙච්චාවේ තාත්තේ , පිටි, පිටි, තියෙනවනේ ලෑල්ල උඩට දාන්න " කියා අනිත්  පැත්ත හැරී නිදා ගත්තාය.

මේ මොන මගුලක්ද?  පිටි වලින් හදන රොටි වලට ආයෙත් පිටි දමන්නේ මොකටද කියා කල්පනා කෙරුවෙමි. ඇලෙන්නේ නැති වෙන්න පිටි දැම්මහම ඒකත් රොටියටම නේ යන්නේ. මොන විකාරයක්ද? කොහොමත් පොඩ්ඩි බොරු  කියන්නේ නැත. ට්‍රයි කර බැලිය යුතුය.

  මස් කපන ලෑල්ලට පිටි හලා අත් දෙකේද පිටි හලා ගත්තෙමි. යන්තමින් අතේ ඇලෙන එක නතර වුනේය. අර රොටී  රවුමට හදන්නේ කොහොමද කියා මට නම්  හිතා ගන්නට බැරිය. ඒවා  හැදුනේ විවිධාකාර ලෙසටය.

පළමුවෙනි එක රවුම් කර ගන්නට කොහෙත්ම බැරි විය. ඒක වැරදියට ගහපු චපාතියක් වගේය. නැත්නම් පැතලි වී වැටුණු උල්කාවක් දැයි කියාත් හිතුනි.

සෙන්ටි මීටර් දහයකට වඩා පැත්තක් දිග එකක් හැදුනි. මට ඒක පෙනුනේ ඔස්ට්‍රේලියාව වගේය

ඊළඟ රොටිය හැදුනේ හඳේ හාවා වගේය. හඳේ හාවා රවුම් වුනේම නැත. ඔන්නොහේ  තාච්චියට  දැමුවෙමි. 

ඊළඟ රොටිය ඇමිබාවක් අන්වීක්ෂයෙන් බලන විට වගේය. මේක රවුමට නොව එලිප්සයක් වගේ යයිද සිතු නිසා සමහරවිට ග්‍රහ ලෝකයක බලපෑමක් වෙන්නටද පුලුවුන. ළඟදීම හඳහන බලා ගන්නට හෝඩුවාවක් වත්ද? පෘතුවියේ  එළිප්සයාකර ගමනට සමාන වගේ යයිද සිතුනි.

අන්තිම රොටිය කෙලින්ම සෙනසුරුගේ බැල්ම වැටී රවුම් වෙන්නට ගොස්  එලිප්සයක් විය. අවංකවම කියනවනම් විශ්වයේ cosmic microwave background - CMB  (හෙවත් විශ්වීය මයික්‍රෝවේව් පසුතලය??) එහෙම නැත්නම් විකිරණ බලය විසිරී  තිබෙන ආකාරය පිලිබඳ ප්ලෑන්ක් චන්ද්‍රිකාවෙන් ගත්ත  පින්තුරයත් මේ වගේමය.

මේ තියෙන්නේ ඒ CMB පින්තූරයයි .

පින්තූරය : Planck Maps the Microwave Background

විශ්වයේ විකිරණ බැක්ග්‍රවුන්ඩ් රොටියෙන් පසු මම වැඩේ නතර කෙළෙමි. හුටා ය. ඇඳුම්  පුරාත් මූණෙත් අත් දෙකේත්, බිමත්  හැම තැනම පිටිය. ඒ ටික සුද්ද කල වෙන ඇඳුමක් ද ඇන්ද පසු මට රොටී හදන්නට පැයකටත් වඩා ගතවී ඇත.  ඒ නිසා මේ හදන  අන්තිම රොටී හැදීම යයි මම නාථ දෙවිඳුන්ට අන්තිම විශ්ව රොටිය පුදා  සපථ  කලෙමි.

නිකොලායි බෞමන් , පක්ෂ අභ්‍යන්තරයේ ලිංගික ප්‍රශ්න

දීප්ති කුමාර ගුණරත්න ලියූ "ඕපපාතික බුද්ධිමතුන්" නමැති ලිපියේ  සුමිත් චාමින්ද මහතා පිලිබඳ සඳහනකට මම ත්‍රිමාණ වෙබ් අඩවියට ප්‍රතිචාරයක් එක් කෙළෙමි. දීප්ති සහෝදරයා චිසින් මගේ ප්‍රශ්නයට දැන් න්‍යායික පිළිතුරක් දී තිබේ. ඔහු කියන්නේ තමන් සදාචාරවාදියෙකු  හෝ ගතානුගතිකවාදියෙකු නොවන බව මා  දන්නේය යන්නයි.

දීප්ති ගුණරත්න සහෝදරයාගේ පිළිතුර  "ඔබේ ගවුම කුමක්ද " යන ලිපියයි. 

දීප්ති අසන්නේ ‘සුමිත්ගේ ලිංගික ගැටලුව පිළිබඳ දීප්ති ඔයාගේ න්‍යායික අදහස කියන්න’ යනුවෙන් මා නොඇසූ බවයි. හේතුව මගේ ප්‍රතිචාරයේ තිබේ.  මා ලියුවේ  " සුමිත්, වසන්ත සහ වසන්තගේ පෙම්වතිය යන තිදෙනාම වැඩිහිටි අය යි. ගැටලුව ඒ හින්දා සුමිත්ගේ සදාචාරය පිළිබඳ ප්‍රශ්නයක් වෙන්න පුළුවන්". මෙහිදී දීප්ති සදාචාරවාදියෙකුද නැත්ද යන ප්‍රශ්නය අදාල නැත. නමුත් දීප්ති ගතානුගතිකවාදී ස්ටලින්වාදියෙකු නම් විය හැකිය. ඒ මෙසේය.

  සෝවියට් දේශයේ මොස්කව් හි මා  උගත් විශ්ව විද්‍යාලය පිහිටි අවියමතෝර්නයා ප්‍රදේශයට යාබදව පිහිටියේ බෞමන්ස්කයා නම් ප්‍රදේශයයි. බෞමන්ස්කයා හි මෙට්‍රෝ උමන් දුම්රිය පලෙහි  නමද   බෞමන්ස්කයාය. එහි සෝවියට් දේශයේ පිහිටි තවත් උසස් විශ්ව විද්‍යාලයක් ද වේ.  එම විශ්ව විද්‍යාලය ලොමොනොසොව් රාජ්‍ය විශ්ව විද්‍යාලයට පසුව පිහිටුවන ලද මොස්කව්හි දෙවන පැරණිතම විශ්ව විද්‍යාලයයි. එය 1763 දී පිහිටුවන ලද්දේ  දෙවන කැතරින් අධිරාජිනිය විසින් මොස්කව් හි  ජර්මන් කොටසේය.  1917 ඔක්තෝබර්  විප්ලවයෙන් පසු එය බෞමන් විශ්ව විද්‍යාලය යනුවෙන් නම් කරන ලද්දේ බොල්ෂෙවික්වි ප්ලවාදියෙකු වන නිකොලායි බෞමන් ට උපහාරයක් වශයෙනි.

මේ විශ්ව විද්‍යාලය ගැන මම "චෙර්නොබිල්" ගැන ලියද්දි ලීවෙමි. ලෝකයේ ප්‍රථම න්‍යෂ්ටික විදුලි බලාගාරය වන රුසියානු සමුහාණ්ඩුවේ ඔබ්නින්ස්ක් න්‍යෂ්ටික විදුලි බලාගාරය 1954 දී ගොඩ නගන්නට මුලික වූ  න්‍යෂ්ටික භෞතික  විද්‍යාඥ නිකොලායි දොලෙෂල් උගත්තේ මෙහිය.  නමුත් මට ලිවීමට අවශ්‍ය නිකොලායි බෞමන් ගැනය. නිකොලයි එර්නේස්ටෝවිච් බෞමන්,  ලෙනින් සමග ස්විට්සර්ලන්තයේ පිටුවහළේ සිටි රුසියානු සමාජ ප්‍රජාතන්ත්‍රවාදී පක්ෂයේ  (පසුව බොල්ෂෙවික්  පක්ෂය) සාමාජිකයෙකි. ඔහු ලෙනින් සමග ඉස්ක්‍රා (ගිනි පුපුර) පුවත්පතට සම්බන්ධව වැඩ කටුතු කලේ රුසියනු මාක්ස්වාදයේ පියා  ලෙස සැලකෙන  ප්ලෙහනොව් සමග ජිනීවා නගරයට පිටුවහල් වීමෙනි.

නිකොලායි ඉතා දක්ෂ  පක්ෂ සංවිධායකයෙකු වූ අතර ඉස්ක්‍රා පුවත්පත බෙදා හැරීමෙහි ලා පුරෝගාමියෙකුද විය. පිටුවහලට හේතු  වුයේ සාර් පාලනයට එරෙහිව ශිෂ්‍යයන් හා කම්කරුවන් අතර උද්ඝෝෂණ සංවිධානය කල බැවිනි. ඔහු කිහිප වරක්ම සාර්  ගේ සිරගෙවල් වලද ලැග්ගේද  එම නිසාමය.

පිටුවහල්ව සිටියදී සහෝදර විප්ලවවාදියෙකු ගේ බිරිඳ සමග ඔහු අනිසි සබඳතාවයක් ඇතිකරගත් අතර ඔහු  නිසා ඇය ගැබ් ගත්තාය. ඔහු  එය නොපිළිගත් අතර ඇය හා ඇගේ සැමියා ගැන විකට චිත්‍ර (කන්‍යා මරියා තුමිය  දරුවෙකු වඩා සිටිනා අන්දම ඇඳ)  ඔහු ඇය ව අනුන් ඉදිරියේ නින්දාවට භාජනය කළේය. මේ කාන්තාවද ඉස්ක්‍රා පුවත්පත බෙදා  හැරීමෙහි නියුතුව සිටි විප්ලවවාදී ක්‍රියාකාරිනියකි. ඇය ඉස්ක්‍රා පුවත් පතේ  කතෘ මඩුල්ලට හා රුසියානු සමාජ ප්‍රජාතන්ත්‍රවාදී පක්ෂයට මේ ගැන ලියා බෞමන් පක්ෂයෙන් නෙරපා දමන ලෙස ඉල්ලා සිටියාය.   ඉස්ක්‍රා  කතු මඩුල්ලේ මර්ටෝව්, පට්‍රෙසොව් සහ ට්සාසුලිච් අපයෝජනය වූ  කාන්තාවට පක්ෂව කතා කළහ. ප්ලෙහනොව් සහ ට්‍රොට්ස්කිද කතු මඩුල්ලේ සිටියත් ගත්තේ නිහඬව සිටීමේ ස්ථාවරයකි.

ලෙනින්ට තිබුනේ වෙනත් අදහසකි. පක්ෂයට  හොඳ සංවිධායක වරයෙක් අහිමි කර ගැනීමට ලෙනින් සූදානම් වුයේ නැත. ඔහු කිවේ තමන් හා පක්ෂයේ අභිප්‍රාය සාර් පාලනය පෙරළා දැමීම බවයි. ඒ සඳහා අවශ්‍ය ඕනෑම දෙයක් කිරීමටද   ඔහු පසුබට නොවන බවයි. මර්ටෝව් ට තම මිතුරාගේ තිරණය අදහා ගත නොහැකි එකක් විය. ජනතාවගේ නිදහස සඳහා සටන් කළ පක්ෂයක් අගතියට පත් කාන්තාව ගේ  පැත්ත නොගැනීම ඔහු නිර්දයව විවේචනය කළේය. 

 

ඉස්ක්‍රා කතු මඩුල්ල අවම වශයෙන් බෞමන් කැඳවා නිදහසට කරුණු විමසීමක් වත් නොකළහ. කාන්තාව සිය දිවි නසා ගත්තාය. 

පසු කලෙක මර්ටෝව් පක්ෂයන් ඉවත්වීමත්ටත්  මෙන්ශේවික් හා බෝල්ෂෙවික්  වශයෙන් පක්ෂය දෙකඩ වීමටත් බලපෑ  එක හේතුවක්  වූයේද මේ බෞමන් සිද්ධියයි.  

මේ සිද්ධිය අද වූවානම් meToo වැනි ව්‍යාපාර බලවත් මේ කාලයේ ලෙනින්ට ,නිකොලායි  බෞමන් සමග අකුලාගෙන ගෙදර යන්නට සිදුවනු නොඅනුමානය .

 ශ්‍රී ලංකාවේ බොහෝ වාමාංශික පක්ෂ මාක්ස්/ලෙනින්/ට්‍රොට්ස්කිවාදී හෝ මාක්ස්/ලෙනින්/ස්ටාලින්වාදී හෝ මාක්ස්/ලෙනින්/මාඕ වාදී ඒවාය. දීප්ති කුමාර ගුණරත්න ද ලෙනින්වාදියෙකු බව ඔහුගේ අදහස් වලින් පැහැදිලිය.  මේ අනුව සුමිත් චාමින්දට, දීප්ති සහෝදරයා කරන චෝදනාව නිවැරදිද?

ලෙනින් පවුල පිලිබඳ සංකල්පයට විරුද්ධ නොවූ ෆැමිලි මෑන් කෙනෙකු වූවද ඔහු හැසිරුනේ වඩා නිදහස් ලෙසයි. පවුල, සමාජවාදී සෝවියට් දේශයේ  සාමාජිය වර්ධනයේ මූලික ඒකකයක් (යුනිට්  එකක්) කලේ ස්ටාලින් ය. මම මේ පිළිබඳව මිට පෙර "සෝවියට් විවාහ හා ජෙහාන් ට්‍රොට්ස්කි - 1" නම් ලිපි පෙලේ (1,2,3,4) ලියා තිබේ.  ලෙනින්ට ඉනේස්සා අර්මන්ඩ් ට අමතරව ප්‍රංශ ප්‍රභූ කාන්තවක සමගද සම්බන්ධයක් තිබු බවද (එලිසවෙතා කේ.) හෙළිදරව් වී ඇත. ලෙනින් එම සම්බන්ධයට තිත තිබ්බේ රුසියානු විප්ලවය සම්බන්ධව  ඇගේ සහයෝගයක් නොතිබූ බැවිනි. තම බිරිඳ කෘප්ස්කයා සහ පෙම්වතිය  අර්මන්ඩ් සමග ලෙනින් එකට නිවාඩුවකට ගිය බවද අද නොරහසකි. එහිදී පක්ෂ වැඩ කටයුතු වලද නිරත වෙන්නට ඇත. කොටින්ම රුසියානු විප්ලවය තම ජිවිතයේ එකම අභිප්‍රාය කරගත් ලෙනින්ට පෞද්ගලික ජීවිතයේ කරන දේ  එතරම් අදාල වූයේ නැත.   

ලන්ඩනයේ පිරමීඩ සම්බන්ධ වෙළඳාමකට හවුල් වූ එක්තරා වාමාංශික පක්ෂයක සාමාජිකයෙකු ගැන මට දැන ගන්නට ලැබුණි. පක්ෂ අභ්‍යන්තරයේ එම ප්‍රශ්නය කතාකරගෙන විසඳා ගත් බවටද මට දැන ගන්නට ලැබුණි. තමන්ට භක්තිමත්ව සේවය කරන  හොඳ සාමාජිකයෙකු නැති කරගන්නට පක්ෂයක් අකැමති බවට හොඳ  උදාහරණයකි එය. පක්ෂයට පරිබාහිරව සිටින හිතවතුන්, පුද්ගලයන් මොනවා කීවත් පක්ෂය තම ප්‍රධාන අරමුණට හානි කරගන්නේ නැත. ලෙනින් කලේද එයයි. සමහරවිට ලෙනින් එම පුද්ගලයාට  එමගින් emotional blackmail (සිංහල වචනයක් නොදනිමි - ආවේගී කප්පමක් , බල කිරීමක්) එකක් කරන්නට ඇත. වරදක් කළ නිසා බෞමන්ඒ  පිළිබඳව පසුව පශ්චත්තාප වී පක්ෂයට හොඳින් වැඩ කරන්නට ඇත. නිකොලායි  බෞමන් 1905 දී  රාජාණ්ඩුවාදීන් සමග ගැටුමකදී  මිය ගියේය. විප්ලවයට දිවි දුන්නෙකු ලෙස සලකා ඔහු ගේ නමට ප්‍රදේශයක් හා කීර්තිමත් විශ්ව විද්‍යාලයක් නම් කර  සදාතනික කර ඇත්තේ ඒ නිසාය. 

එසේනම් දීප්ති, චාමින්ද සිද්ධියේදී ක්‍රියාකර ඇත්තේ ස්ටලින්වාදියෙකු ලෙසද? මට හිතෙන්නේ දීප්ති වර්තමානය සමග ජිවත්වන නිසා අනුගත වන්නේ වර්තමාන දියුණු ධනවාදී සමාජයක සාරයට බවයි. දීප්තිට තම පක්ෂය (එක්ස් හෝ පරණ පෙරටුගාමී හෝ සමබිම පක්ෂය)  විප්ලවයක් දක්වා රැගෙන ගොස් රාජ්‍ය බලය ලබා ගැනීමට අදහසක් ඇත්නම් ඔහු ක්‍රියා කල යුතුව තිබුනේ ලෙනින් ක්‍රියා කළ ලෙසටය. නමුත් අද එය වැරදි ක්‍රියාවක් වන්නට හොඳටම ඉඩ තිබේ. මේ නිසා දීප්තිට බලය ලබා ගැනීමේ කිසිදු උවමනාවක් නැති බව  ඉන් අදහස් කළ හැකිය.

ගවුම ගැන කතා කලහොත් ඉරාජ් නැමති ගායකයා ගවුම ඇන්දේ අපහාසයක් ලෙසය. ඔහු ඉන් බොහෝවිට අපහාස කරන්නට අදහස කර  ඇත්තේ මංගලට හා රනිල්ට විය හැකිය. (සමාජයේ එම දේශපාලකයන්  දෙදෙනා  ගැන ඇති මතයට අනුව). එසේම එනයින් ඉරාජ් ගැහැණු වර්ගයා ටද  අපහාසයක් කරයි. ගැහැණු අඳින ඇඳුමක් අපහාසාත්මක සංකේතයක් යොදා ගැනීම නිසාය. 

 දීප්ති "ගවුම " ලිපියෙන් පලකරන න්‍යායාත්මක අදහස් වලින් පැහැදිලි කරන්නේ  අප එම ප්‍රශ්නය දෙස බැලිය යුත්තේ වර්තමාන දර්ශනවාදීන් අනුසාරයෙන් බවයි. ඒ අනුව දීප්ති කර ඇත්තේ සදාචාරයට පක්ෂ වීමක් හෝ  ගතානුගතිකත්වයට පත්  වීමක්  නොවුවත් ස්ටාලින්ලිවාදී පවුල් ආකෘතියක් වර්තමාන "ප්‍රගතිශීලි ධනවාදී " සමාජයට ආදේශ කිරීමකි. 

මා දන්නා පරිදි සුමිත්  චාමින්ද ලිංගික අපහාසයක් කර නැත. ලෙනින්ට අනුව දීප්තිට පක්ෂය හෝ (එක්ස් කණ්ඩායම ) බේරාගෙන නිහඬව සිටින්නට හැකියාව තිබුණි.  චාමින්ද ලිංගික අපයෝජනයක් (abuse)  කර තිබුණා නම් වර්තමාන නීතිය  යටතේ හෝ ඔහුට ගැලවීමක් නැත. නමුත් එම චෝදනාව මුලිකව පැමිණිය යුත්තේ වින්දිතයාගේ පාර්ශ්වයෙනි. එවැන්නක්ද  දක්නට නැත. 

බ්‍රිතාන්‍ය වාමාංශික පක්ෂවල සමහර  නායකයන් පසුගිය කාලයේ ඇද වැටුනේ  මේ වැනි චෝදනා පැමිණීම හා ඒ අනුව ක්‍රියා නොකිරීම නිසාය. අද ඒ පක්ෂ වල සාමාජික සංඛ්‍යාව  අතිශයින් සීමිත වී ඇත.  එනිසා ඒ දිනවල දීප්ති කණ්ඩායම බේරා ගැනීම සඳහා කිසියම් ක්‍රියා මාර්ගයක් ගත්තා නම් එය නිවැරදි විය හැක. මා දීප්තිට  ලෙනින් අනුගමනය කරන්නට කියන්නේ නැත. ලෙනින් ක්‍රියා කළ ආකාරය වර්තමාන තත්වයන්ට කොහෙත්ම ගැලපෙන්නේද  නැත.   නමුත් මගේ අදහස නම් දැන් දීප්ති කුමාර ගුණරත්න  මේ ගවුම බිම තබා පක්ෂය කරට ගතයුතු බවය. 

The Bauman Affair

සෝවියට් විවාහ හා ජෙහාන් ට්‍රොට්ස්කි - 1"

සෝවියට් විවාහ හා ජෙහාන් ට්‍රොට්ස්කි - 2