සටන

එක රතුමලක් තනිවී හිටියත් මෙහෙම 

දහසක් රතු මල්ම පිපුනලු හැමදාම 

ඒ මල් ගොඩට එක් වන්නට පැතුවාට 

නොහැකිය හැමට වන්නට ඒ රතු මලම 

හිටියත් ඈත දුරු රටකට වී මෙහෙම 

අපේ හිත් ඔබ ළඟයි ආදර ජන රෑන 

රතු මල්  ගොඩක් වගෙ  එක්වී හැමදාම 

නංවමු  රැක ගනිමු හද දිනු රට නොපමාව 

--කොළඹ ගමයා 

දයාබර විපුලියේ

ලන්ඩන් වල ඉඳන් මගේ 

බ්ලොගේ කියවන 

විටෙක රණ්ඩු වෙන 

විටෙක හිනැහෙන 

කඩයක් ඇරගෙන 

පැය ගණන් වාද කරන 

ඒත් පස්සේ කෝල් කරලා 

තරහද බං කියල අහන 

සරසවියේ කොළඹ, උගත්

"සිංහල" උගන්නපු ගුරුතුමී  

විටෙක බොරු සැර පෙන්නන 

දයාබර විපුලි 

 

ඔයා   ගියා කියල 

තවම හිතා ගන්න බැහැ බන් 

ඔයාගේ කෙල්ලයි කොල්ලයි හිනා වෙලා හිටියට 

දුෂාන්ත හිනා වුනාට 

උන් ඇතුලෙන් පිච්චෙනවා කියල 

මම දන්නවා 

ඉනෙස් නුයි කෙල්ලෝ දෙන්නත් 

කඳුළු පොරෝගෙන 

ඇයි බන් පොඩි දෙන්න හය-හත  කාලේ 

ටයික්වෝන්ඩෝ කරන්න ගෙනත් 

එදා ඉඳන් අද  වෙනකල් 

උන් දෙන්නගේ ලන්ඩන් නැන්ද උනේ උඹනේ 

ඕනෑ පාටියක මැද ඉඳන් හිනැහෙන 

වටේ අය මැදට අරන් නටන නටවන 

ඇවිදින්න ගමන් යන්න දුවගෙන එන 

ජිවිතේ ප්‍රශ්න මැද විඳපු හිනැහුණු 

ජිවිතේ තව ගොඩක් දුර 

දුෂා එක්ක යන්න හිටිය 

"කෙල්ල කොහොමහරි යුනි ගියා අජිත් 

සෙතා තමා ඉතින් කොහොමහරි 

මට  යවා ගන්න ඕනේ කියල" 

අන්තිමටම මට කියපු 

විපුලි උඹ ගියා කියල 

තවමත් හිතා ගන්න බැහැ 

යන තැනක උඹ හිනාවෙලා ඉඳී කියල 

අපි දන්නවා 

පෙරේදා හිනා වෙලා 

මේ හදිසියේ 

අද අපිව  දාලා ගියාට 

පැතූ  නිවනක් නුඹට ලැබේවි 

සුභ ගමන් විපුලියේ!

සුභ ගමන් නංගියේ !

සුභම සුභ ගමන් විපුලියේ!

**********************************

විපුලි මිනිත්තු 3.55 සිට:

අරගලයේ කතා

මේ පහල තියෙන අරගල කතා ලිව්වේ කවුද කියන්න දන්නේ නැහැ. මම මේ කතා ටික උපුටා ගත්තේ solidarity කියන වට්ස්ඇප් කණ්ඩායමෙන්. දන්න කෙනෙක් ඉන්නවා ලියමනේ හිමිකරුගේ නම එවන්න. වැස්සේ ගෝල්ෆේස් තණ  බිමේ අරගලයට එකතු වුනු  ආදරණිය ජනතාව ගැන හා ඔවුන්ට උදව් කරන ජනතාව ගැන. මේක මධ්‍යම  පන්තික අරගලයක් වෙන්න පුළුවන්. අන්තරේ අරගලයක් වෙන්නත්  පුළුවන්. දෙගොල්ලම මධ්‍යම පන්තියේ.නමුත් එතන නිර්ධන  පන්තියත් හිටිය. වෙනත් තැන් වල ගාමන්ට් වල වැඩ කරන සොයුරියන් වගේම වතුකරයේ ජනතාවත් අරගලයේ සිටිනවා මම දැක්ක. එනිසා මේකට ලේබල් ගහන්න බැහැ.

ඉහත  වීඩියෝ එකේ ඉන්නේ අපි අතරේ ඉතා සිඝ්‍රයෙන් ජනප්‍රිය වුනු, මිහිරි ලෙස  අරගල ගීත ගයන ගීත කෝකිලාවියක් . නම  අන්ජලි බණ්ඩාර, අහල බලන්න.

******************************************************************

(උපුටා ගැනීමකි) 

මේ අරගලයේ ඉන්න අපේ රටේ ආදරණීය මිනිස්සු ගැන ❤🌹 🇱🇰 

එළිවෙනකල් වැහි 3 , 4 කින් හෙම්බත් වෙලා හිටිය අපි උදේ 6 ට අඩු වෙච්ච වැස්සත් එක්ක අලුත් දවසක් ගැන බලාපොරොත්තු තියන් ඉද්දි ආයෙත් නොනවතින අරගලයට නොනවතින වැස්සක්ම තිළිණ කරන්න ගත්තා.....

වැස්ස මාරම ආශිර්වාදයක් වුනා අරගලයට ඒ මොකද කියනව නම් , 

* මුලින්ම වාහන වල යන මිනිස්සු අරගලේ දැක්කම ඒ මූණු වල තිව්නෙ දෙයියනේ මුං තවම මේ වැස්සෙත් මෙතන වගේ මූඩ් එකක් ඒ මිනිස්සු අත උස්සල කෑ ගහගෙන යනව ඒක්කො වාහනේ නලාව අඬවගෙන යනවා...

* ටික වෙලාවක්‍ යද්දි වාහන එක දෙක නවත්තන්න ගත්තා ඒ හැමෝම කෑම , වතුර අරන් උදෙන්ම ඇවිල්ලා අපිව බලන්න 🥺 මේක උඹලට කියවද්දි ඒක දැනෙනවද කියන්න මං දන්නෙ නෑ ඒත් ඒක මාරයි  ❤

* විස්වාස කරන්න කොච්චර කෑම ලැබුනද කියනව නම් අපි පාරෙ යන බස් නවත්තල ඒවගෙ වැඩට යන මිනිස්සුන්ටත් කන්න දුන්න ඒ කෑම ...

* අපි ඉන්න තැනට  කෙල්ලෙක් ආවා ටික වෙලාවක් නිසොල්මනේ ඉදපු එයා ටික ටික කෑ ගහන්න, අරගලේ එක්ක සෙට් වුනා අපි කතා කරල අහල බැලුව විස්තර එතකොට කියුවෙ මං මේ එහා පැත්තෙ ගෙදර ගාව ඉද්දි පාරෙ ගිය බස් එකෙන් කිව්වා " අද නම් වැස්ස නිසා සෙනඟ මදි වගේ " කියලා.... එහෙම දෙයක් අහපු නිසා එහෙම්ම පයින්ම ඇවිල්ල තනියම... දන්නවද හොදම දේ එයා ටැමිල් ❤  ඉස්සර අපි බෙදුව උන්ට හෙන ගහන්න ඕන...

* උදේ 6.30  උනෙත් නෑ පුංචි මුස්ලිම් පැංචියො ටිකක් එක්ක ඒ බබාලගෙ අම්මල තාත්තල සීයලා ආව වැස්සත් අරන්ම , මං මෙහෙම දේවල්  ඇස් දෙකෙන් දැකල තිව්නෙ නෑ.... ඒ ළමයින්ගෙ අතට ජාතික කොඩිය දීලා ඒ අම්මා තාත්තා කිව්වෙ  ඉස්සරහට යන්න මේ අය රටට ආදරේට මේ ඉන්නෙ ඔයාලත් මේ වගේ වෙන්න කියලා... ඇස් දෙකට ආව කදුලු වැස්සටම හේදිලා ගියා... හිතන්න සෑහෙන්න දේවල් ඉතුරු වුනා... ඇයි අපි මේ බෙදිලා හිටියෙ මොනව බෙදාගන්න බැරුවද ? අපි බෙදුනෙ නෑ අපිව බෙදුවෙ මේ දේශපාලන හැතිකරේ....

මේ වගේ දරුවො ඉන්න අනාගත  ශ්‍රී ලංකාව කොච්චර ලස්සන වෙයිද ❤

* ඊ ළගට ඇවිල්ල නැවතුන වාහනෙන් ගෙනල්ලා තිව්නෙ වැහි කබා ( rain coat ) ඇස් අදහ ගන්න බැරි වුනා 😢  ඒ මිනිස්සුන්ටත් මේ කාලෙ අමාරු ඇති ඒත් වැස්සෙ තෙමෙන කෙල්ලො කොල්ලො වෙනුවෙන් රේන් කෝට් මහ ගොඩක් ගෙනාව ඒ මිනිස්සු.... ඇත්තටම ඒ කරපු දේ පින නම් ඇති සංසාරෙම හිසට සෙවනක් ලැබෙන්න ඒ මිනිස්සුන්ට  ❤🙏

* ඩොක්ටර් පාස් එකක් ගහපු කාර් එකක් ආවා මං හිතන්නෙ ඩියුටි ඕෆ් වෙලා යන පිරිමි ඩොක්ටර් කෙනෙක් එයා ළඟ ඒ වෙලේ දෙන්න දෙයක් තිව්නෙ නෑ එයා කරේ  කාර් එකේ වීදුරුව පහත් කරල එයාගෙ කුඩේ අපිට දීලා යන්න ගියා... මේව පොඩි දේවල්ද නෑ මේව මහ ලොකු දේවල්... පන්ති වලට බෙදල තිව්න ලංකාව එක පන්තියක් වෙනව ටිකෙන් ටික මේවා මාරයි ❤

* උදේ වැඩට යන තාත්තා කෙනෙක් අනේ ඒ මනුස්සයත් ඉටිකොලයක් ඇගට දාගෙන හිටියෙ වැස්සෙන් බේරෙන්න... ඒ තාත්තා ඉදන් කිව්වෙ "අනේ පුතේ මං එහෙම මොනවත් ගෙනාවෙ නෑ මං ගාව වැඩිපුර රුපියල් සීයක් තියෙනව මේක ගන්න " කිව්වා.... පපුව පිච්චිලා ගියා මේ රටේ මිනිස්සු කොච්චර ලස්සනද 😢🥺

වැඩියෙන් තියෙන රුපියල් සීය අපිට දෙන්න හදනව වැස්සෙන් බේරෙන්න මොකක් හරි ගන්න කියලා... 

මෙහෙම සිතුවිලිම මිනිස්සුන්ට එනව කියන්නෙ අරගලේ ජය මාවතට ඇවිල්ලා....

* කෑම බීම මදි නොකියන්න එද්දි ඉටිකොල , ඉටි රෙදි රෝල් ගනන් මිනිස්සු අරන් ආවා... ඒ මිනිස්සුන්ට පුළුවන්කම තිව්නෙ ගාර්බේජ් බෑග් ටිකක් ගෙනල්ල දෙන්නද ඒක ගෙනල්ල දුන්න ඔලුවට දාගන්න කියලා....

* මං මගේ ජීවිතේට හිතුවෙ නෑ ටැමිල් පවුලකින් මට උදේ තේ බොන්න ලැබෙයි කියලා...ටැමිල් අම්මෙකුයි තාත්තෙකුයි ආවා එක කුඩයක් යටින් ලොකු ප්ලාස්ක් එකක් පිරෙන්න තේ හදාගෙන....

ඒ  තේ එක හරි රහයි ජාති වාදෙ නෙවෙයි ආදරෙන් මත් වෙලා තිව්නා ❤

* මහ වැස්සෙ අයියා කෙනෙක් ඇවිල්ල කියනව මල්ලි මං ගානෙ උදේට කෑම සීයක් ගෙනාව බාරගන්න එන්න කියලා..ඒ වෙද්ශි ශෝටීස් කාලා තේ බීලා ඉදපු අපිට බඩගින්නක් තිව්නෙම නෑ.. අනික ඒ වෙලාවෙ ඒ වැස්සත් එක්ක බත් කන්න තැනකුත් නෑ.... 7 අපි ඒ කෑම ටික ළමා නිවාසෙකට යවන්න විදියක් හදලා දුන්නා... ඒ අයියා කිව්වෙ  "මල්ලි අපි ඊයෙ කල්පනා කරා මිනිස්සු වෙනුවෙන් කරන්න දෙයක් එහෙම හිතලා කෑම පැකට් 100 හැදුවෙ "  හිතන්න මේ වගේ අමාරු කාලෙක තනි මනුස්සයෙක් 100 කන්න දෙන්න එනවා .. එයාට වාසියකටද නෑ....

*තව තාත්තා කෙනෙක් ආව බෑග් එකක් උස්සන්.. දන්නවද ඒකෙ තිව්නෙ සී විටමින් පෙති 🥺 එයා කියනව ඔයාල වැස්සෙ තෙමුනනෙ කෝකටත් හොදයි මේක ගන්න කියලා.. අපේ අම්මට තාත්තටවත් එහෙම දේවල් මතක් වෙයිද  ?

* තව කෙනෙක් ඇවිල්ලා කිව්වා tv එකෙන් දැක්කා ඔයාල තෙමෙනව ඒ නිසා මං සමහන් හදන් ආවලු 🥺❤

* තව අම්මා කෙනෙක් වාහනේ නවත්තලා දරුවො දෙන්න එක්ක එනව ලොකු මලු උස්සගෙන විස්වාස කරන්න ඒ මලු වල තිව්නෙ බැන්ඩඩ් ටවල්... ඒ මිනිස්සු තුවා අරන් ඇවිල්ලා මේ තෙමුන මිනිස්සුන්ට පිහදාගන්න... මේක ආදරයද මොකක්ද අපි දෙන්න ඕන වචනෙ  🥺❤

*  ඔයාලා ජීවිතේට දැකල තිව්නද මහ පාරෙ නෙස්කැෆේ හදල දෙනව... ඒ මිනිස්සු අරගලේට නෙස්කැෆේ දෙන්න ජෙනරේටරයකුත් අරන් ඇවිල්ලා... මේව විස්වාස කරන්නත් අමාරු දේවල් 🥺❤

* ඒ ඔක්කොම අස්සෙ ඉන්දියාවෙ abp  මීඩියා එකෙන් ඇවිල්ලා හිටියා.. ඉන්දියාවෙ ඉදල ලංකාවට වැඩම කරපු හාමුදුරුවන් වහන්සේ කෙනෙක් හින්දියෙන් වොයිස් කට් දෙනව... ඊට පස්සෙ මිනිස්සු අස්සෙ ඉදපු ලංකාව් එකෙක් හින්දියෙන් වොයිස් කට් දෙනවා.... උන්ටත් හිතාගන්න බෑ මොකක්ද වුනේ කියලා....

*  විශේෂයෙන්ම කියන්න ඕන Ratta  ගැන.. උඹ ඇත්තටම පොරක් මං ඇස් දෙකන් දැක්කා උඹ විදින දුක , කන කට්ට මේ වැඩේ ගොඩ දාගන්න තියෙන උනන්දුව  ❤ උඹල වගේ උන් තමයි  මේ වැඩ වලට ඉස්සරහට එන්න ඕන... අනිත් පොරවල් කියාගන්න ගෑනු හැංගෙද්දි හැමෝම වෙනුවෙන් මේ කට්ට කන එක ගැන මාර ගෞරවයක් තියෙනවා මචං ❤🙏

මේ මං ඇස් දෙකට දැකපු ටික විතරයි  අද හවස් වරුවෙ බෙහෙත් ද්‍රව්‍ය එක් රැස් කරගෙන......

කොස් එහෙමත් උයාගෙන ,ජංගම වැසිකිළි පහසුකම් දීලා , කෑම්පින් ටෙන්ට් ගහගත්‍ත මිනිස්සු තවම ඉන්නවා.....

අපේ රටේ මිනිස්සු කොයි තරම් පරිත්‍යාගශීලි ද ? 

එකතු වෙද්දි හමෝම එකා වගේ ඉන්න ආසද ?

නැති ප්‍රශ්න ඔලුවට දාල අපිව බෙදල වෙන් කරේ?

නිසැකවම දේශපාලන උප්පරවැට්ටි නිසා මිනිස්සු බෙඳල වෙන් කරළ තිව්නට මින් පස්සෙ ඒවා සුම්මා  අපි ඔක්කොම එක පව්ලක්....

මේ එකමුතුව ආදරේ කවදාවත්  දශමෙකින් වත් අඩු වෙන්න නොදී  ඉමු....

නොනිදන නොනවතින අරගලයට ජයවේවා  🇱🇰 

අරගල කියන්නෙ මොනවද , අරගල දිනන්නෙ කොහොමද ?  හැම වෙපන් එකකටම වඩා ආදරේ බලවත් බව අපි ලෝකෙටම කියල දෙමු ❤ 

මේ රට අපේ..අපි කොහොම හරි මේ රට ජරා දේශපාලුවොන්ගන් බේරගමු !

ආදරේ අරගෙන ඔයත් එන්න ගෝල්ෆේස් එකට ❤

ඔව් අපි මේක දිනනවා !

අරගලයට ජය 🇱🇰❤

(උපුටා ගැනීම අවසන්)

ඔබ සැමට අරගල සතුටුදායක ලෙස අවසන් වන සුබ නව  වසරක් වේවා. !

දෙවියන් අතර සටනේ ජය කාටද

ඤානක්ක බේරා  ගන්න දෙයියන්ගේ පොලිසිය 

 සීතාවක රාජසිංහ රජුට අරිට්ට කීවෙන්ඩු හිටිය වගේ, සාර්  නිකොලස් ට රස්පුටින් හිටිය වගේ ලංකාවේ නන්දිකඩාල්  රජ්ජුරුවන්ට ඉන්නේ ඥානක්ක . මේක ලියන්නේ "ඤානක්ක "කියලද මන්ද. එයා දෙවියන්ගේ ලෝකල් නියෝජිතයා කියලයි කියන්නේ. රට කරවන ලොක්කෝ  වගේම මැති ඇමැති ගොල්ලොත් , හමුදා ලොක්කොත් බිස්නස් කරන  කට්ටියත් මේ  දෙවියන්ගේ ආශීර්වාද ලබනවා කියලයි ආරංචිය. 

මේ ඉන්නේ ඒ  අක්කලු 

වැඩේ කියන්නේ අන්තිමට ඥානක්ක ට ගාඩ් එක දෙන්න වුනෙත් පොලිසියට.  දෙයියෝ නිවාඩු  දාලා ගිහින්ලු  පාස්කු නිවාඩුවට.  ඒක දැනගෙන එතනට ගිහින් වලි ඇදල තියෙන්නේ හිරුණිකා.  හිරුණිකා මිරිහානේ ඉඳන් ඒ ගැම්මටම  අනුරාධපුරෙත් ගිහින්. කොටින්ම  කියනවනම් සජිත්, පාඨලී විතරක් නෙමෙයි අනුර කුමාර ගේත් රෙදි ගලවලා තමයි හිරුණිකා  ගියේ. එනිසා හිරුණිකා ප්‍රේමචන්ද්‍ර ගේ ප්‍රොෆයිල් එක පොඩ්ඩක් උඩට ආව . ඒ ගමන්ම වගේ ජාතික කොඩිය එපා කීව කියල කතාවකට එයාව එලවනවාත් දැක්කා. සමහරු ජාතික කොඩිය ජාතිවාදී වුවමනාවකට අරන් යන බවත් පේනවා. තවත් සමහරු ගෙනියන්නේ ඇත්තටම රටට ආදරේ නිසා. හිරුණිකා ජාතික කොඩිය එපා කියනවා බවක් ඒ පටිගත කළ   වීඩියෝවේ ඇහෙන්නේ නැහැ. මේ වෙලාවේ හැමෝම අවශ්‍ය වෙනකොට හිරුණිකා ඉලක්ක කරල පහර දෙන්නේ ඇයි කියන එක තේරෙන්නේ නැහැ. මම හිතන්නේ එතන ජවිපෙ/සජබ අරගලයේ මූලික භූමිකාව ගන්න උත්සාහ කරනවා ඇති.   

හිරුණිකාව එළවීම පහල.

 හිරුනිකා දුවයි. 

දැන් බලාගෙන යනකොට දෙයියෝ ගැන බැලුවොත්  එක්කෝ විමලයායි, පිලයායි  නැව ගිලෙනවා කියල දැනගෙන මාරු වෙනකොට ඒ එක්කම  මාරු වුනාද එහෙම නැත්නම් සන්ධ්‍යා එක්නැළිගොඩ ගේ සාපයට  භය වුනාද කියල සැකයකුත් එනවා. එහෙම  කතාවකුත් කණින්  කොනින් ඇහුන. 

මේ  සන්ධ්‍යා   එක්නැළිගොඩ මහත්මිය පොල් ගහපු දවසේ

පාස්කු ප්‍රහාරයේ චුදිතයන්ට දඬුවම් නොදීමත් ලොකු ප්‍රශ්නයක්. හරියටම ඒ සැමරීම ලං   වෙනකොටම මේ අරගලයත් ඇරඹෙන්නේ.  ඒ නිසා පේන්නේ දෙවියන් දෙතුන් දෙනෙකු ගෙන්  එක්කෙනෙක් දිනාගෙන යනව වගේ. මම නම් ඔය පොල් ගැහිලි වත් ඥානක්ක වගේ අයගේ ගේම් වත් කවදාවත් විශ්වාස  කලේ නැති වුනත් අදහන අය ඉන්නවා. ඒ නිසා දැනට පේන විධිහට සන්ධ්‍යා ගහපු  පොල් ගෙඩියේ විතරක් නෙමේ පාස්කු ප්‍රහාරයේ කර්මයත් පල දෙනවා වගෙයි පේන්නේ.  අමතක කරන්න එපා අප්‍රේල් පහ විරු සමරු දිනයත් වැටිලා තියෙන්නේ අදට  කියල. 

දිගට හරහට රුසියාව - යුක්‍රේන යුද්ධය  ගැන කතා කරන කොට  ලංකාවෙත් ඇවිලුනා නේ. . ගෝඨාභය රාජපක්ෂ  ආණ්ඩුවට රුසියාවෙන් තෙල් අඩු මිලට දෙන්න ගිය සතියේ  පොරොන්දු වෙලා  තිබුණය කියල ආරංචියක් ආවා. 'ස' ගේ කරුමෙටද ඥානක්ක ගේ  කරුමෙට ද මන්ද  වික්ටෝරියා නියුලන්ඩ් ඉන්දියාවට යන ගමන් ගොඩ බැහැල තර්ජනයක් දාල ගිහින්ලු  ඒ රුසියන්  තෙල් ගන්න තහනම් කියල.  දැන් අහන්න එපා උක්රයිනයට ස්වයං නිර්ණය  අයිතිය තියනවනම් නේටෝවට එකතු වෙන්න,  ශ්‍රී ලංකාවට රුසියන් තෙල් ගන්න අයිතියක් නැත්ද කියල.  නැහැ. යුක්රේනය අමෙරිකාවෙන් අහල ගන්න අවසරය "ස්වයං නිර්ණය අයිතියක්"  කියල හිතන අයත් ඉන්නවා.  නමුත් ලෝකයේ බල තුලනය තියෙන පැත්තේ කීම අහන්න වෙනවා.  ඇමෙරිකාව ඉන්නේ මොන දෙයියටත් උඩිං. නැත්නම්  ඒ පවුලේ අය ඇමෙරිකන් පුරවැසිකම් ගනියිද?  

නිදහස් වෙළඳ කලාපයේ සොහොයුරියන් පාරට බැහැල ඉන්නව දැක්ක.

මම ඉතින් ඇමෙරිකාවට විරුද්ධ නැති වුනත් ඉඳල හිටලා ඔය වගේ  ප්‍රශ්න  අහනවා.  තෙල් නැවක්  ආව කියලම වුනත් ඉතින් රාජපක්ෂ පවුලේ ප්‍රශ්නය විසඳෙන්නේ නැහැ.මෙතැනදී  කරන ඕන දෙයක් ඉන්දියා- ඇමෙරිකා - චයිනා කියන සරල නොවන රේඛා තුනකට මැදිවෙලා කරන්න වෙන්නේ.  ඔන්න ඔතන නම් ප්‍රශ්නයක් තිබෙනවා. ඔය තුනින් මුලින්ම අත දානවා නම් අත දාන්නේ ඉන්දියාව.  එනිසා අරගල කරන අය සෑහෙන්න ප්‍රවේසම් වෙන්න ඕනේ.  

මේ නිසාම වෙන්නේ ඕනේ දීප්ති කුමාර ගුණරත්නට මේ ජනතා නැගිටීම පේන්නේ අරාජකවාදයක් හැටියට. එහෙම හිතෙන්නේ කැපී පෙනෙන දේශපාලන නායකත්වයක් නැති නිසා වෙන්න පුළුවන්. නමුත් 1917 පෙබරවාරි  මාසයේ  සිදූවූ රුසියානු විප්ලවයේ පැහැදිලි දේශපාලන  නායකත්වයක් තිබුනේ නැහැ. නමුත්  ඒක අවසන් වුනේ සාර් පලව හැරීමෙන්. 

හුඟක් අය නොයෙකුත් විසඳුම් අරන් එනවා. මට පෙනෙන්නේ මෙච්චරයි. හිරුනිකා  මිරිහානට ගිහිල්ල හරි නැතුව හරි අනිත් පක්ෂ වලට කලින් ජනතා අරගලය පටන් ගන්න කැටලිස්ට් එක දුන්න. ගෑස්නැහැ, භූමිතෙල් නැහැ උයන්න. නගර වල මිනිසුන්ට දරත් නැහැ. ළමයින්ට කන්න දෙන්න විධිහක් නැහැ. රැකියා කරගන්න විධිහක් නැහැ.  ඩීසල් , පෙට්රෝල් අස්ප  ගණන්. අපනයන වලින්  එන ඩොලර් ටිකටත් සැප වාහන අරගෙන කෙලිනවා.  කෝවිඩ් නිසා ඇතිවුන ප්‍රශ්න තිබුන. ඒක හරි. නමුත් වැට් අඩු කිරීම , බදු අඩු කිරීම,  පොහොර ප්‍රශ්නය වගේ අනා ගත්ත තැන්  තිබුන. ඒ නිසා මේ මහජන නැගිටීම සාධාරණයි.

හැබැයි දැනට නායකත්වයක් නැතිව ඉබේ තැන තැන සමාජ ජාලා, වට්ස්ඇප් කණ්ඩායම් ආදිය  හරහා සංවිධනය වෙන මේ නැගිටීම වෙනතකට හැරෙන්න පුළුවන්. ඒ කියන්නේ ජනාධිපතිතුමා  අස් වෙන්නේ නැතිව තවත් හිටියොත් අරගලය ප්‍රචණ්ඩ වෙන්න පුළුවන්. එනිසා දැනට ගත හැකි හොඳම ක්‍රියා මාර්ගය රජය සහ ජනාධිපති සම්පුර්ණයෙන් ම ඉල්ලා අස් වෙන එක. රනිල් කීව වගේ අග්‍ර විනිශ්චයකාර තුමාට රජය තාවකාලිකව භාර දීලා දහ  දෙනෙකු විතර ඉන්න තාවකාලික  ඇමැති මණ්ඩලයක් පත් කළා නම් හරි.

ඊට පස්සේ මාර්ග දෙකක් තිබෙනවා. එකක් අයි එම් එෆ් ගිහින් දැනට ගෙවන්න  තියෙන ණය වාරික ප්‍රතිව්‍යුහගත කරගෙන ගෙවන වාරික අඩු කර ගැනීම. ඊට පස්සේ  ලැබෙන අපනයන ආදායම් වලින්ට ඩීසල් වැනි අත්‍යවශ්‍ය ආනයන වලට ගෙවන එක. ඒ එක්කම බදු වැඩි කරලා, රාජ්‍ය සේවකයෝ අඩු කරලා, රජයේ ආදායම වැඩි කර ගන්න එක.  සහනාධාර  යම් ප්‍රමාණයකට කපා හරින්න වෙයි. හැබැයි ඒක ලොකු ප්‍රශ්නයක් වෙන්නේ නැහැ ආර්ථිකය ගොඩ දාගත්තොත්. ඉතින් මේ   තත්වෙට එනකොට සංචාරක කර්මන්තයත් සෑහෙන්න ගොඩ දාගන්න පුලුවන් වේවි. හැබැයි ඒක මේ ආණ්ඩුවට කර ගන්න බැහැ . පුලුවන්නම් මෙලහට කරලා. එයාල ෆේල්.  ඒක  කරන්න වෙන්නේ  තාවකාලික ආණ්ඩුවක ට හෝ අළුතින් පත් වන ආණ්ඩුවකට.  එහෙම ආණ්ඩුවක බලය බොහෝ විට සජබයට යාවි.  එයාලට  19 වන ව්‍යවස්ථා සංශෝධනය ආපහු ගේන  එකත් කරන්න වෙනවා . 

දීප්ති ගුණරත්න ඉදිරිපත් කරන විසඳුමත් මෙයට සමානයි. //අප මේ ව්‍යාජ බොල් උද්ඝෝෂණවාදීන්ට කඩේ යන්නේ නැත. අප රාජපක්ෂලා බලයට ගෙන ආවේ ද නැත. නමුත්, ලංකාව අලුතින් නිර්මාණය කළ හැකි මංසන්ධියක් දැන් බිහි වී ඇත. මහජන බදු මුදල් විනාශ කරන රාජ්‍ය ආයතන ප්‍රතිව්‍යුහගත කරන ඕනෑම වැඩසටහනක්, මේ මොහොතේ දී විප්ලවීය යැයි අපි බය නැතිව ප්‍රකාශ කරන්නෙමු.//-දීප්ති -උපුටා ගැනීම මගෙනි.

බදුල්ලේ ජනතාව අරගලයේ 

දෙවන  ක්‍රියා මාර්ගය  අරගලය දිගටම ගෙනියන එක.    ගෙනිහින් සම්පුර්ණ ක්‍රමයම උඩු යටිකුරු කරන එක. හැබැයි ඒකට ජවිපෙ ලැහැස්ති බවක් නම් පේන්න නැහැ. අනුර කුමාර කියන විධිහට ජනතාව වැඩේ කරල එයාලට කතා කරන්න ඕනේ බලය අරගෙන  ආණ්ඩුවක් පිහිටුවන්න. බලය අතට ගත්තොත්  ඉදිරියෙන් ඉන්න පිරිස ජවිපෙට කතා කරන එකක් නැහැ. දෙගොල්ල ගෙන් කවුරු ගත්තත්  සම්පූර්ණ සමාජවාදී ක්‍රමයකට යන්න ඕනේ. සිරිමාවොගේ  වගේ අර්ධ සමාජවාදී,  මිශ්‍ර  ආර්ථිකයක් හා නැදෑ ආණ්ඩුවක්  නෙමෙයි. හැබැයි හුඟක් වෙලාවට චීන මොඩලය තමයි ලංකාවට හරි යන්නේ. තනි පක්ෂ ආණ්ඩු ක්‍රමයක් යටතේ පෞද්ගලික වෙළදාම ට සහ පෞද්ගලික දේපල අයිතියට සීමා සහිතව ඉඩ දීම. අනිත් රාජ්‍ය  ආයතන හා ප්‍රතිපත්ති  සියල්ලම  සමාජවාදී ක්‍රමයට අනුව පිහිටුවීම. එතැනදී මේ අර්බුදය මදක් පාලනය කර ගන්න පුළුවන්.  වඩා සාධාරණ සම්පත් බෙදීමක් යටතේ කිසියම් සහන ප්‍රමාණය පහල පන්තිවලට ලැබෙනවා. හැබැයි ඒ වගේ ක්‍රමයක් මේ අර්බුදය තවත් තීව්‍ර වීමෙන් මිසක් එන්නේ නැහැ.

අරගලයේ විවිධ අය ඉන්නව. නිදහස් වෙළඳ කලාපයේ සහෝදරියෝ වගේම අයිටි (තොරතුරු තාක්ෂනවේදීන්)   සෙක්ටර් එකේ කට්ටිය, කොළඹ පොෂ් පන්තිය එක්ක උරෙන් උර ගැටෙමින් කොළඹ සාමාන්‍ය රැකියාව වල යෙදෙන ජනතාව, ත්‍රී වීල වලින් රැකියාවල යෙදෙන අය, සුළු නාගරික ජනතාව, සූ වෙළඳ පන්තිය , ග්‍රාමීය ගොවි ජනතාව, මේ ඔක්කොම   එලියට බැහැල අවසන්. ඒක මේ පෝස්ටර්  වලින් හොඳට තේරුම් ගන්න පුළුවන්. දුෂණය අවසාන  කිරීමත් , වී අයි පි ලට විශේෂ  ලෙස නොසැලකීමත්, ඩොලර් උපයන පෞද්ගලික අංශයේ සහ ගාමන්ට් සේවක සේවිකාවන් ගේ පඩි වැඩි කිරීමත්    වැනි  ඉල්ලීම් ඉදිරියට ඇවිත්. තව දුරටත් නිකම්ම් නිකම් ගෑස් අඩු කරන, පාන් අඩුවට දෙන සිල්ලර සටනක් නෙමේ මේක. වෙනද වගේ පොඩි හෝල් එකක ඉටිපන්දම් පත්තු නොකර  අප්‍රේල් පහ සමරු දිනය නිවැරදි ලෙස  සමරන්න පුළුවන් ජවිපෙට සහ පෙසපෙට හිතට  ගත්තොත්. පොල්පොට්වාදී වෙන්න ගියොත් අනා ගනී.  

එනිසා හුඟක් වෙලාවට අර ප්‍රථම තාවකාලික ආණ්ඩුව  කියන අදහස  වඩා ආකර්ෂණිය  එකක් වේවි  මේ හැමෝටම. 

වී අයි පී මෝටර් කේඩ් වලට එරෙහිව 

දුෂණයට එරෙහිව 

මිත්‍යාවට එරෙහිව 

රැවටීමට එරෙහිව 

ලයිට්  කැපීමට එරෙහිව 

කෙළවරක් නැතිව ඇන්නවීමට එරෙහිව 

අවසන් කරන්නම් මංජුල වෙඩිවර්ධන ගේ මේ පෝස්ටරයෙන්.

-ajith dharmakeerthi 

යොමු:1.  දීප්ති කුමාර ගුණරත්නට මේ ජනතා නැගිටීම පේන්නේ අරාජකවාදයක් හැටියට. 

2.  නමුත් 1917 පෙබරවාරි  මාසයේ  සිදූවූ රුසියානු විප්ලවයේ පැහැදිලි දේශපාලන  නායකත්වයක් තිබුනේ නැහැ

3. දීප්ති ගුණරත්න ඉදිරිපත් කරන විසඳුමත් මෙයට සමානයි.

ආන්ඩුව, හදිසි නීතිය, හමුදාව, ව්‍යවස්ථාව, නීතිය, ජනතාව සහ පාරාවලල්ල

පහත ලිපිය ලියා ඇත්තේ මගේ යහළුවෙකු වන මහේෂ  ත්‍රිමාන්න ය.  මෙහි සියලුම අදහස ඔහුගේය. 

ආන්ඩුව, හදිසි නීතිය, හමුදාව, ව්‍යවස්ථාව, නීතිය, ජනතාව සහ පාරාවලල්ල.

ආන්ඩුව හදිසි නීතිය පනවා ඇත. හොඳයි, හැබැයි ආන්ඩුව සිය අංක ගණිතය ගෙදර වැඩ කර ඇත්ද?

මේ සමග අමුණා ඇති ආන්ඩුක්‍රම ව්‍යවස්ථාවේ පරමාධිපත්‍ය හෙමින් කියවන්න. තේරුම් ගන්න. 3 වගන්තිය  අනුව පරමාධිපත්‍ය ජනතාව සතුයි 4 වගන්තිය එය විවිධ අයට දී ඇති ආකාරය පැහැදිලි කරයි.

ගෝඨා ප්‍රමුඛ ආන්ඩුව ඊයේ සාකච්ඡා කර හදිසි නීතිය පනවයි. 4 වගන්තියෙන් ජනතාවට තිබුණු එකම රැකවරණය නීතියේ රැකවරණය අහිමි කර ඇත. 

ගෝඨා ප්‍රමුඛ ආණ්ඩුව තේරුම් ගත යුත්තේ මේ 88/89 වත් 2005- 2015 වත් නොව 2022 බවයි.

ලංකාවේ ජනගහනය දෙකෝටි විසි ලක්ෂයකට හෙවත් මිලියන 22 ආසන්නයි.

පහත අමුනා ඇති අන්තර්ජාලයෙන් ලබාගන්නා ලද දත්ත අනුව 2010 ලංකාවේ අවුරුදු 16- 49 කාන්ඩය තුල ලක්ෂ 86 සිටී (කාන්තා පිරිමි). එයට දැන් 2022 දී තවත් ලක්ෂ 30  එකතු උනත් ලක්ෂ 116 සිටී.

පහත අමුනා ඇති  GOOGLE  දත්ත අනුවම ලංකාවේ 

ත්‍රිවිධ හමුදාවේ          346,000

ස්වේච්ඡා හමුදාවේ      90,000

පොලීසිය                        84,000

එකතුව                        520,000  සිටී.

මේ සියලුම දෙනා රාජපක්ෂික නැත පවතින පීඩනය හමුවේ විරුද්ධ කොටසක් සිටී.

මෙයින් තවත් කොටසක් ප්‍රභූ ආරක්ෂාව සහ අනෙකුත් ආර්ථික මර්මස්ථාන සඳහා ද යොදා ඇත. 

69 ලක්ෂයේ බහුතරයක් අද ආන්ඩුවට නැත.

අවසානයේ මේ පීඩනය මීට පෙර මේ රටේ ඉතිහාසයේ ඇති වූ පීඩනයක් නොවේ. ජනතාව යුද්ධය, නියඟය, වගා හානි, හදිසි විදුලිය බිඳවැටීම ඉවසා ගත්තේය. අද පීඩනය බොහෝම සුළු පිරිසකට හැර බහුතරයකට දැනී ඇත. පාරේ සපත්තු මසන්නාගේ නාට්ටාමි ගේ සිට මහා ව්‍යාපාරිකයන් දක්වා පීඩනය පුපුරා ගොස් ඇත.

පක්ෂ පාට ජාති ආගම් බේදය කින් තොරව මිනිස්සු පාරේය. ආන්ඩුව හොයන්නේ මර්දනය නම් මේ අංක ගණිතය හදන්න.

ගෝඨා සහ ආන්ඩුව තාම යුද්ධ ආතල් එකේ ඉන්නවා නම් එදා සමස්ථ රටම බොහෝ යාපනයේ ජනතාවද ආන්ඩුවට පක්ෂපාතී විය. අද ඒ මොකුත්ම නැත රාජපක්ෂ පවුල සහ ඔවුන්ගේ චෞර වලල්ල පමණක් ඇත. ඒකේ ද සමහර උන් දැන් එලියට පනිමින් ඇත. 

අවසාන වශයෙන් සියලුම හමුදාව එකතු කලත් පාරට බස්සන්න ඉන්නේ ලක්ෂ 4 පමණි, ජනතාව ලක්ෂ 120 සිටී. වෙඩිතියා හෝ හදිසි නීතිය යටතේ හිරේ විලංගුවේ දාන්නද හිතන්නේ. එක හමුදා නිලධාරියෙක් 30 මරන්න ? ලක්ෂ ගනනක් හිරේ දාන්න ........ 

මිනිස්සු හදිසි නීතිය ගනන් ගන්නේ නැතුව තවත් ප්‍රකෝප කිරීමේ අභිලාෂය කුමක්ද?

මේ  හදිසි නීතිය ආන්ඩුවට පාරාවලල්ලක් වෙන දවස වැඩි ඈතක නොවේ. අනිත් ගැසට් මෙන්ම මේක රිවස් කරන්න, ඒක කොහොමත් පුරුදුයි නේ.......

ලොකු වැරදීමක්, ජනතා බලයේ ලොකු අවතක්සේරුවක් ආන්ඩුව කරන්නේ. ජාත්‍යන්තර මාද්‍ය තුළ ආන්ඩුව ගැන යන දේවල් කිංස්ලි සුදේව කියන්නේ නැද්ද මං හිතන්නේ උන්ට තේරුම් ගන්න බෑ ඒවා.

රට ලේ විලක් වී විනාශ වීමට ආසන්න බවත් රාජපක්ෂලාට මේක කොරන්න බැරි බව දැන් වත් තේරුම් ගන්නේ නම් වටී.

-නීතිඥ මහේෂ ත්‍රීමාන්න

පූටින් යන්නේ කොයි පාරේ ෂි ජින් පිං යන පාරේ - පෙට්‍රෝ ඩොලර, පෙට්‍රෝ යුආන් සහ පෙට්‍රෝ රූබල්

පසුගියදා ලිපි කිහිපයක්ම ලීවේ රුසියානු ජනාධිපති ව්ලැඩිමීර් පූටින් ගේ යුක්‍රේනියානු ආක්‍රමණය වෙනුවෙනි.  රුසියාව  තමන්ගේ යුද්ධයේ ප්‍රථම කොටස අවසන් බව පසුගියදා  ප්‍රකාශ කළේය. යුද්ධය යුක්රේනය දිනා ඇතැයිද පූටින් දුවන බවද ඩේලි මේල් පුවත්පත ඒ සමගම වාර්තා කළේය. සශ්‍රීක පුරාණ  නගර ගණනාවක් විනාශ  වුනු මිලියන් දෙකක් ජනයා අනාථයන් කල යුද්ධය යුක්රේනය දිනුවාද? තමන්ගේ රටට සම්බාධක පනවා ගනිමින්, බටහිර ලෝකයේ හොඳ හිත පලුදු කර ගනිමින් , යුධ භටයන් දහසත්  පන්දහසත්  අතර ප්‍රමාණයක්  අහිමි කරගනිමින් පූටින් දිනා ඇත්ද? මගේ අදහස නම් දැනට මේ රටවල් දෙකම එක පැත්තකින් පරාජය  වී  තවත් පැත්තකින් දිනා ඇති බවය. 

පූටින් ගේ රුසියානු හමුදා කීව් නගරය අසල දැඩි පරාජයකට ලක්වී ඇතැයි බටහිර මාධ්‍ය කියති.. (දැන් ඔවුන් හමුදා කිව් නගරයෙන් ඈත් කර ගනිමිනි සිටින්නේ වෙනත් හේතුවකට බව මගේ අදහසයි..)  රුසියානු හමුදාවට  වැඩිම ප්‍රශ්නය  වී ඇත්තේ බ්‍රිතාන්‍ය රජය සැපයු ජවෙලින් යුධ ටැංකි නාශක අවිය බව පැවසේ. පූටින් ගේ ටැංකි හමුදා දෙකක් සම්පුර්ණයෙන්ම විනාශ කර දමන්නට  යුක්‍රේන/ඇමෙරිකන්, දකුණු අප්‍රිකානු හමුදා සමත් වී ඇත. (බටහිර මාධ්‍ය විසින් රුසියානු  වැග්නර් කුලී හමුදා යුක්රේනය සටන් කරන බවට ප්‍රචාරයක් රැගෙන ගියේ මේ ඇමෙරිකානු හා  දකුණු අප්‍රිකානු කුලී හමුදා සටන් කරන බව සඟවන්නටය. ඇමෙරිකානු රජයට කුලී හමුදා නිත්‍යානුකුලව  සපයන්නට නොහැකිය. නමුත් රුසියන් වැග්නර් කණ්ඩායම මෙන් රටවලට ඔවුන් මිලදී ගත හැක.  මේ හේතුව නිසාම  රුසියානු යුධ සැලසුම, බටහිර මාධ්‍ය සැලසුමෙන් වෙනස් වන්නේ ඇයි නමැති ලිපියේ පරිදි කීව් නගරය මාර්තු 24 වනවිට අල්ලාගනු ඇතැයි මා සිතුවද එය එසේ වූයේ නැත. නමුත්  ක්‍රිමියාව දක්වා ගොඩබිම් මාර්ගයක් විවර කරගෙන එය පවත්වාගෙන යන්නට නම් ඔහුට දිගින් දිගටම කීව් නගරයට තර්ජනයක් එල්ල කල යුතු වේ. 

මේ පින්තුරය ෂේන් මැතිව් නම් බ්‍රිතාන්‍ය ජාතිකයෙකු ගේය. ඔහු කීව්  නගරයේ "නිදහස" උදෙසා සටන් කරමින් සිටි. 

උක්රයිනය  මාධ්‍ය මෙහෙයුමෙන් ද  බටහිර ලෝකයේ හොඳහිත සහ ඩොලර්  බිලියන ගණනින් ආධාර  දිනා ගනිමින්ද ජය ලබා ඇත. පූටින් ගේ රුසියාව සම්බාධක ද පනවා ගනිමින්  එහිදී පරාජය වී ඇත.  

පූටින් දිනා  ඇත්තේ මොන පැත්තෙන්ද? ඔහු දොන්බාස් ප්‍රදේශයේ හමුදාව රඳවා , ක්‍රිමියාවද තබා ගනිමින් රට දෙකඩ කර ඇත. එසේම බටහිර පමණක් නොව මුළු ලෝකයේම ආර්ථිකය පහල දමමින් උද්ධමනය වැඩි කරමින් ආර්ථික යුද්ධයක් ද  දියත් කර ඇත. ඒවා පූටින් ගේ සීමිත ජයග්‍රහණයන්ය. 

මේ යුද්ධය හෝ පූටින් කියන අන්දමට විශේෂ මෙහෙයුම විග්‍රහ කර ගැනීමට නම් ආවේගීව පාර්ශවයක් තමන්ගේ කර ගැනීම නොකළ යුතු දෙයකි.එයින් සිදුවන්නේ කුමක්ද යන්න ගැන හරි වැටහීමක් ලබා ගැනීමේ හැකියාව නොමැතිව යයි.   

මම  2014 දී පමණ පූටින් ගේ ස්ටාලින්වාදී  ස්ථාවරය සහ මහා ජාතිවාදය ගැනද රුසියාවේ ඔටෝක්‍රසිය ගැනද ලිපි දෙකක් ලීවෙමි.  විසි පස් වසරකට පෙර ඇද වැටුණු බර්ලින් තාප්පය, පූටින් හා ස්ටාසිලන්තය හා ඔටෝක්‍රසි හා ඉගෙන ගන්න, ඉගෙන ගන්න, ඉගෙන ගන්න යන ලිපි දෙකයි. ඒ නිසා ඒ ගැන නැවත ලිවීමට අවශ්‍යතාවයක් තිබුනේ නැත. පළමු සඳහන්ලි පියේ පූටින් චීන ආර්ථික හා දේශපාලනික  විධි ක්‍රම අනුගමනය කරන බවද ලීවෙමි. 

 

මේ යුද්ධයට හේතු කිහිපයක් පැහැදිලි කිරීමට මම ලිපි කිහිපයක් ලීවෙමි. රුසියානු ආක්‍රමණයට මා ලියූ හේතු කිහිපයක් මෙසේය.

1. යුධ සංවිධානයක් වන නේටෝවේ ව්‍යාප්තවාදය. (මේ ලිපි දෙක බලන්න.   කාමරය ඇතුලේ අලියා  නොදැකීම ,  රුසියානු යුක්‍රේන ප්‍රශ්නයේ තවත් පැතිකඩක් ) නේටෝව නිසා රුසියාව රූකඩයක් මෙන් උඩ  පනින්නේද යන මුග්ධ අදහසක් නොව එවැනි සැබෑ ප්‍රශ්නයක් තිබිම ගැන මෙහි සාකච්චා කෙරේ. ඉතිහාසය නොදන්නා, මාධ්‍ය මගින් පමණක් ඉගෙන ගන්නා අයට ඒවා එසේ විය හැකිය. ජෙරෙමි කෝබින් කිහිප වතාවක්ම ඒ ගැන බ්‍රිතාන්‍ය පාර්ලිමේන්තුවේ  ප්‍රශ්න කල අතර රුසියනු ඔලිගාර්ක් හොරුන්ට එරෙහිවද කතා කළේය. ඔලිගාර්ක් ලාගේ  කළු සල්ලි  භාවිතා කල ලන්ඩනය කෝබින් කියූ දෙයට කන් දුන්නේ නැත. අද ඒ ජඩ මාධ්‍ය ඔහු පූටින් ගේ පැත්තේ  යැයි වංක ලෙස  චෝදනා කරති. කෝබින් ගේ කතාව මෙහි ඇත.  බොහෝ රුසියානු මුදල් 2014ට පෙරද ඉන් පසුවද ලන්ඩන් වල හොල්මන් කළේය.  යුරෝපා සංගමයෙන් බ්‍රිතාන්‍යය ඉවත් වීමට කල ජන මත විචාරණයේද රුසියානු මුදල් සංසරණය විය. 

2. මහා රුසියානු ජාතිවාදය - ඉතිහාසය  පැහැදිලි කරමින් ලියා  ඇති මේ ලිපියෙන් ඒ ගැන අදහසක් ලබා ගැනීමට පුළුවන්. රුසියානු ඉතිහාසය සහ යුක්රේනියානු  පෙකනිවැල  තවත් බොහෝ වාමාංශික අය  මේ  පිළිබඳව ලියා ඇත.)

3. උක්රයිනයේ  භාෂා ප්‍රශ්නය  (රුසියානු භාෂාවට සම තැන නොදීම)  ඊයේ මාර්තු 25 යුක්‍රේන විදේශ ඇමති වරයා කියා සිටියේ රුසියානු රාජ්‍ය භාෂාව යුක්‍රේන භාෂාව පමණක් බවයි. මේ බීබීසී ලිපියේ ඒ ගැන සඳහනක් ඇත.

4. යුක්රේනයේ නාසි හමුදා කණ්ඩායම් පිලිබඳ ප්‍රශ්නය - එවැන්නක් තිබෙන  බව ලිපි කිහිපයකම ලීවෙමි.  නමුත් බටහිර මාධ්‍ය විසින් ඒක පාක්ෂික වීම නිසා මේ පිලිබඳ සත්‍යය යටවී ඇත. මෑතකදී ඉන්ඩිපෙන්ඩන්ට් පුවත් පත ඒ ගැන සඳහනක් කර තිබුණි. මගේ  "අලියා නොදැකීම" ලිපියේ බීබීසී වීඩියෝ බලන්න. 

ලඟකදී යහළුවෙකු මට මෙවන් දෙයක් ලියා එවා තිබුණි. සෙලෙන්ස්කි යුදෙව් ජාතිකයෙකු බැවින් ඔහුට නාසීන් ට සහය දීම ගැන චෝදනා නොකළ යුතු බවයි. සෙලෙන්ස්කි අසා තිබුනේද මම යුදෙව්වෙක් නම් මම නාසිවාදියෙකු වන්නේ කෙසේද යන්නය. ඔහුට ඇති චෝදනාව නාසි වාදියෙකු වීම නොව නාසිවාදීන් සමග ඩීල් දැමීමයි. ඇසෝව් බ්‍රිගේඩ් එක ගැනීමෙන් පසු දෙවන වරට නාසි භට කණ්ඩායම් ප්‍රධාන හමුදාවට අනුයුක්ත කලේ ඔහුය. ඒ ඔහුගේ ජනාධිපති කම බේරා ගැනීමටය. 

එසේම මේ අය ඊශ්‍රායලය පැත්තක් නොගැනීම ගැන කියන්නේ කුමක්ද? ඔවුන් රුසියාවට එරෙහි සම්බාධක වලට එක්වී නොමැත. සෙලෙන්ස්කි එහි පාර්ලිමේන්තුව ඇමතුවත් ඔවුන් ආයුධ එවීම පවා  ප්‍රතික්ෂේප කළහ. සෙලෙන්ස්කිට වඩා ඔවුන්ට වටින්නේ රුසියාව විසින් ඉරානයට න්‍යෂ්ටික ආයුධ නොදීමයි. ඒ කියන්නේ යුදෙව් රාජ්‍යය වඩා තැකීමක් කරන්නේ තම රටේ ආරක්ෂාව ගැනය. (අරාබිකරයේ තනි යුදෙව් ප්‍රජාතන්ත්‍රවාදී රජය වන එයට ඒ ගැන චෝදනා කිරීමට මටනම් නොහැකිය.)

මේ අය 1933 අගෝස්තු 25 සියොන්වාදී සංවිධානය මුදල් ඇති යුදෙව්වන් පලස්තීනයට  රැගෙන යාමට නාසි ජර්මනිය සමග කල ගිවිසුම ගැන දන්නවාද?  ඒ ගැන ඉංග්‍රීසි ලිපියක් මෙහි ඇත.  ඒ වන විටත් නාසීන් විසින් යුදෙව් මර්දනය දියත් කර තිබුණි. යුදෙව් මර්දනය වෙනත් රටවලද පැතිර යමින් තිබු නිසා සියෝන්වාදීන් කළ ක්‍රියාව ගැන මගේ විවේචනයක් නැත. එසේම සෙල්න්ස්කි නාසී කණ්ඩායම් හමුදාවට ගැනීම ගැන  විවේචනයක් ද නැත. විවේචනය ඇත්තේ ඒ බව සැඟවීමට තැත් කිරීමයි. ඒ සැඟවීම කරන්නේ  එය රුසියාවේ තර්කයට වාසියක් වන නිසාය.  

නාසින් ඇරඹු දෙවන ලෝක යුද්ධ සමයේ ඝාතන කඳවුරු  හා ගෙටෝවල පාලනයට නාසීන් යුදෙව්වන් භාවිතා කල අතර ඔවුන් හැඳින්වුණේ යුදෙන්රට්  යනුවෙනි. මේ අයගෙන් සමහරු තම පවුල්බේරා  ගැනීමට වෙනත් යුදෙව්  පවුල් ජර්මන් එස් එස්  භටයන්ට සහ ගෙස්ටාපෝ  වට පාවා දුන්හ. මේ ඉතිහාසය මගින් පැහැදිලි වන්නේ යුදෙව් වූ පමණින් කිසිවකු නාසීන් සමග ගිවිසුම් ගත වන්නේ නැතැයි  අපට නිශ්චිතව කිව නොහැකි බවයි.  එනිසා පෙනෙන්නේ එවැනි  තර්කයක අතිශය බොළඳ කම පමණකි. 

5. පෙට්‍රෝ ඩොලරය

පෙට්‍රෝ ඩොලරය ගැන කියවීමට පෙර එකොනෝ ගේ බ්ලොගයේ ලියා ඇති මේ ලිපි දෙක,  සල්ලි බාල්දු වීමේ කතාව හා රත්තරන් මංකොල්ලය කියව්වොත් වඩා හොඳ වැටහීමක් ලැබෙනු ඇත.  බොරතෙල් අපනයනය කිරීමේදී සිදුවන ගනුදෙනු  සඳහා යොදා ගන්නේ වැඩි වශයෙන්ම ඇමෙරිකානු  ඩොලරය  නිසා පෙට්‍රෝ ඩොලරය යන නම වැටී ඇත. ඇමෙරිකානු ඩොලරයේ අගය  මුලින් තීරණය වූයේ රත්රන් මතය. 1970 කාලයේ තෙල් මිල ඉහල යාමෙන්  ඇතිවූ අර්බුදයත් තෙල් අපනයනය කරන රටවල ඇති වූ  මුදල් අතිරික්තයත්  මත ඩොලරය තෙල්ග නුදෙනු වලට භාවිතා වීම ඇරඹුණි. ඩොලරයේ බලය තහවුරු කිරීමට  ලොව විශාලම ආර්ථිකය  හා බලවත්ම හමුදා බලය හිමි රට වන ඇමෙරිකා  එක්සත් ජනපදය සිටීමද  ඇමරිකාව වඩාත් භාණ්ඩ   ආනයන කරන රටක් වීමද ඩොලරය  වඩා ජනප්‍රිය මුදල් ඒකකය වීමට  වඩාත් බලපෑ සාධකය.   

 මේ නිසා සියලුම රටවල් ඩොලර් සංචිත තබා ගැනීමට පෙළඹුණි. ලෝකයේ මුදල් ඒකකය වුයේ මේ අනුව අමෙරිකානු ඩොලරයයි. බ්‍රිතාන්‍ය පවුමට ඒ තැන තිබුනද බ්‍රිතාන්‍ය අධිරාජ්‍යය අවසන් වීමත් සමග එය නැතිවුණි.

 මේ පෙට්‍රෝ ඩොලරය නිසාම ඇමෙරිකා  එක්සත් ජනපදයට ලෝකයේ ප්‍රබල දේශපාලන අධිකාරයක්ද හිමිවුණි.  පෙට්‍රෝ ඩොලරයේ අධිකාරයට අභියෝග කිරීම ලෙහෙසි නැත. එසේ කිරීමට තැත් කල ලිබියාවේ ගඩාෆි බලයද අහිමිව මරා දැමුණි. ඒ යුද්ධය  ඇරඹු  නේටෝ සංවිධානය ලිබියාවට බෝම්බ හෙලීමට හොඳ වැදගත් හේතුවක් පෙන්වීමට ද අසමත් විය. එයට ප්‍රථම  ලිබියාව ත්‍රස්තවාදීන්ට සෝවියට්  අවි සැපයු රටක් වුවද සෝවියට් දේශය බිඳ වැටීමෙන් පසු  ප්‍රංශය හරහා බටහිර සමග හිතවත්කමක් ගොඩ නගාගෙන තිබුණි. 

 

පෙට්‍රෝ ඩොලරයට ඊලඟ තර්ජනය පැමිණියේ යුරෝ මුදල් ඒකකයෙන් සහ චීනයේ යුආන් හෙවත් රෙන්මින්බි වලිනි. චීන රජය සහ සමාගම් යුආන් වලින් තෙල් වලින්  ගෙවීම ඇරඹු අතර එනිසා මුදල් ඒකකය  පෙට්‍රෝයුආන්  නමින්ද හැඳින් වේ. රුසියාව තමන්ගේ තෙල්, ගෑස්  සහ ගල් අඟුරු යුරෝපයට යුරෝ වලින් විකිණීම ආරම්භ කරන ලදී. මේ නිසා ඩොලරයේ අගය කිසියම් ප්‍රමාණයකින් පහත  වැටුණි.  නමුත්  පෙට්‍රො ඩොලරය ඉහල පවතින්නේ අමෙරිකා එක්සත් ජනපදය ලෝකයේ විශාලතම දැවී තෙල් නිෂ්පදකයා නිසා මෙනම් ඔපෙක් සංවිධානයේ රටවල් තවමත් ගනුදෙනු කරන්න ඩොලර් වලින් වීම නිසාය.

රුසියාව උක්රයිනය (ඉංග්‍රීසියෙන් යුක්‍රේනය) ආක්‍රමණය කිරීමත් ඒ හේතුව නිසා රුසියාවට සම්බාධක පැනවීමත් සමග තත්වය වෙනස්වී තිබේ. රුසියාව  තව  දුරටත් තම තෙල්, ගෑස් සහ ගල් අඟුරු ඩොලර් වලින් විකිනීමට කැමති නැත. ඔවුන් රූබල් වලින් ගනුදෙනු කරන ලෙස තෙල සහ ගෑස් ආනයන කරන රටවලට දන්වා තිබේ. . යුරෝපය විශේෂයෙන් ජර්මනිය එයට කැමති  නැත. රුසියාව ගිචිසුම් වෙනස් කරන බවට තර්ජනය කරයි. ඔචුන්ට එසේ කල හැකිය. නමුත් ඉදිරියේදී යුරෝපයට වෙන විකල්පයක් නැති අතර රුබල් වලින් ගෙවීමට සිදුවේ. රූබලය පෙට්‍රෝ රූබල් බවට  පත්වීම එක්සත් ජනපදයට දැඩි තර්ජනයකි. දැමූ සම්බාධක ආපහු හැරෙමින් ඇමෙරිකාවේ ආර්ථිකයට ප්‍රශ්න ඇති කරයිද?

දැනට නම් ඒ බවක් පෙනෙන්නේ නැත. ජෝන් කෙනඩි තුර්කියේ පිහිටවූ මිසයිල හොරෙන් රෑ යාමයේ ඉවත් කර න්‍යෂ්ටික යුද්ධයක්  වළක්වා ගත්තද ඇමෙරිකාවේ ආයුධ වෙළෙන්දන් ගේ උදහසට ලක්විය. බයිඩන් එතරම් මෝඩ නැත. ඔහු අති විශාල ආයුධ ප්‍රමාණයක් උක්රයිනයට සපයන අතර බ්‍රිතාන්‍යය ද  එයම කරයි. මේ නිසා ආයුධ නිපදවන සමාගම් වලට කරල පැහී තිබේ.   

ඊළඟ තර්ජනය එන්නේ ස්විෆ්ට් නමැති බැංකු හරහා මුදල් හුවමාරු කිරීමේ ක්‍රමයෙන් රුසියාව  ඉවත් කිරීම නිසාය.  2014 ක්‍රිමියානු ආක්‍රමණයෙන් පසු  රුසියාව තමන්ගේම ක්‍රමයක් වර්ධනය කරමින් සිටියි.  මුල්‍ය ගනුදෙනු මාරු පිළිවෙත (SPFS) යනුවෙන් මෙය නම් කර ඇත. ප්‍රශ්නය නම් ඔවුන් එය චීන ක්‍රමය සමග ඒකාබද්ධ කිරීමට දරන ප්‍රයත්නයයි.  චීන ක්‍රමය "දේශ සිමා අතර අන්තර බැංකු ගෙවීම් ක්‍රමය " හෙවත් CIPS  නමින් හැඳින්වේ. මේ දෙක ඒකාබද්ධ කළහොත් චීනය හා රුසියාව හරහා තෙල් සහ ගෑස් හුවමාරු ගනුදෙනුව සිදුවනුයේ රූබල් හා පෙට්‍රෝ යුආන් අතරය. මෙය පෙට්‍රෝ ඩොලරයට මෙන්ම ඇමෙරිකානු දේශපාලන අධිකාරිය ටද බලවත් පහරක් එල්ල කරයි.

මේ අතරම ඉන්දියාව සහ පකිස්ථානයද රුසියාව සමග තමන්ගේ මුදල් ඒකක වලින් ගනුදෙනු කිරීමට සැරසේ.   ඉන්දියාව මාර්තු අග සිට මේ ගනුදෙනුව ඇරඹීමට සූදානම් වන බව මෙම ලිපියෙන් පැහැදිලි වේ.  පකිස්ථානයට  තෙල් සපයන්නේද ඉන්දියාවට ආයුධ සපයන්නේද රුසියාවයි. 

  

ඉන්දියාව රුසියාවට එතරම් අපනයනය කරන දෙයක් ඇත.  මේ නිසා ආනයන අපනයනඅනුපාතය  රුසියාවට වාසි දායක ලෙස තිබුනත් දැන්  ඉන්දියානු  සමාගම්, බටහිර සම්බාධක වලින් රුසියාවට අහිමි වන භාණ්ඩ හා අමුද්‍රව්‍ය සැපයීමට සුදානමින් සිටි. ඌරන් කැකුණ තලන විට හබන් කුකුළන්ට රජ මගුල්ය.

පූටින් චීනය අනුගමනය කරන බව මම 2014 ලියූ ලිපියක පැහැදිලි කලෙමි. (ලිපියේ යොමුව උඩ) . රුසියානු ඔලිගාර්ක් ලා කෙරෙහි ඔහුගේ බලපෑම චීන රජය චීනයේ බිලියනපතියන් හා ධනපති සමාගම් වලට දක්වන බලපෑමම  මෙනි. එසේම පූටින් ගේ දේශපාලන ක්‍රමයද ඒකාධිකාරී එකකි.  කොමියුනිස්ට් පක්ෂයක් නැති වුවද පූටින් විරුද්ධ පක්ෂ තදින් මර්දනය කර ඇත. එසේම රුසියාව තුල ඔහු මිශ්‍ර  ධනවාදී අර්ථ ක්‍රමයක් ක්‍රියාත්මක කරයි. 

ඇමෙරිකානු ජනාධිපති ජෝ බයිඩන් මහතා මිනීමරු රුසියානු ජනාධිපති වරයා බලයෙන් පහ කල යුතු බව පැවසුවේ පෝලන්තයේ දීය . සාමාන්‍යයෙන් රාජ්‍යතාන්ත්‍රික  වදන් භාවිතයක දී මෙවැනි තර්ජන එසේ කෙරෙන්නේ නැත. බයිඩන් ගේ කෝපය යුක්‍රේනය නිසාම වූවක් යි මට සිතෙන්නේ නැත. පෙට්‍රෝ ඩොලරයේ  සම්බන්ධය ඕනෑවටත් වඩා වැඩිය. 

7. පූටින් තුල පැරණි  සෝවියට් ආධිපත්‍යය පිළිබඳ නොස්ටල්ජියාව (nostalgia) - ජනාධිපති පුටින් උක්රයිනයේ ස්වාධිනත්වය පිලි ගන්නේ නැත. ඔහුගේ වරද නම් රුසියානු බස වහරන උක්රයින ජනතාව  ඔහුගේ පැත්තේ යයි සිතීමයි. බහුතරයක් දෙනා රුසියාව යටතේ සිටීමට වඩා යුරෝපා සංගමය සමග සිටීමට වඩා කැමතිය.  මම අද මගේ  යහළුවෙකු වන ඉංජිනේරු කිත්සිරි  පෙරේරා සමග කතා කලෙමි. ඔහු උක්රයිනයෙන් පැමිණ තම උක්රයින බිරිඳ සමග ජර්මනියේ නතරව සිටී.  ඔහු පැවසුවේ  1990 න්  පසු උපන් නව පරම්පරාව යුරෝපීය ක්‍රමයට හැඩ ගැසුණු අය බවත් පූටින් ගේ පැරණි තලයේ ජිවන රටාවකට  ඔවුන් කිසිදාක කැමති නොවන බවත්ය. පුටින් ක්‍රිමියාව ආක්‍රමණය කල පසු ජර්මන් චාන්සලර් ඇන්ජෙලා මෙර්කල් පූටින් හා දුරකතනයෙන් සංවාදයේ යෙදුනාය. ඉන්පසු ජනාධිපති ඔබාමාට කතා කළ ඇය පවසා තිබුනේ  පූටින් සිටින්නේ යථාර්තයෙන් බොහෝ ඈත බවය. ඇගේ වදනින් "he is in another world", ඔහු ඉන්නේ වෙනම ලෝකයක යයි ඇය පවසා ඇත.

7. ********* මේ කරුණ  තහවුරු කිරීමට තවමත් අවශ්‍ය තොරතුරු මද බව නිසා දැනට නොලියමි.  ඉදිරියේදී ලිවීමට ඉඩ ඇත. 

බටහිර මාධ්‍ය  වාර්තාකරණය රුසියාවේ මෙන්ම ඒක පාක්ෂික යයි මට සිතේ. මම දැනට ග්‍රවිටාස් , අල් ජසීරා , ෆ්‍රාන්ස් 24 වැනි මාධ්‍ය වාර්තාද පරීශීලනය කරමි. 

විනාශ වන අති පෞරාණික උක්රයින නගර  දෙස බලන විට  මට දැඩි දුකක් දැනේ. කීව්, හාර්කොව්  හා මරියපෝල් වල විනාශය ශෝකජනකය. නමුත් මම බටහිර  මාධ්‍ය මෙන්  සියයට සියයක්ම  වරද එල්ල කරන්නේ තනි පුද්ගලයෙකු වෙත  නොවේ. රුසියාවේ තෙල් සහ ගෑස් 2014 ක්‍රිමියාව  පවරා ගැනීමෙන් පසු  පවා මිලදී ගත්  රටවල් සමුහයක් බටහිර වෙති.   වසර  2000 පමණ සිට බොහෝ සිද්ධීන් සමූහයක තර්කානුකුල  අවසානය 2014 ක්‍රිමියා  පවරාගැනීම  හා 2022 රුසියාව විසින් සිදුකල උක්රයින  ආක්‍රමණයයි.   

රුසියානු  ජනාධිපති පුටින් , තමන් බටහිර ආධිපත්‍යය අවසන් කරන බවට තර්ජනය කළේ නිකම්ම  නොවේ. ඔහුගේ යුද්ධ යන්ත්‍රය  පරාජය වෙමින් පවතින බවත්  යුක්රේන හමුදා ජය ලබමින් සිටින බවට ද බටහිර මාධ්‍ය වාර්තා පලවෙයි. නමුත් මට හිතෙන්නේ පුටින් තමන්ගේ  අභිප්‍රායන් බොහොමයක් සාක්ෂාත් කරගෙන ඇති බවය. ලෝකය නැවතත් 1990-2022 පශ්චාත් සෝවියට් බල අධිකාරයකට යන්නේ නැත. 

බ්‍රිතාන්‍යයේ තෙල් මිල වැඩිය. උද්ධමනය වැඩිය . මේ අවුරුද්ද අවසානය වන තෙක් රුසියානු ගෑස්  මිලදී ගන්නට සිදු වේ.  මේ ඇත්ත පලවන්නේ යන්තමිනි. ජර්මනියට,ප්‍රංශයට , ඉතාලියට, ස්පාඤ්ඤයට  රුසියානු ගෑස්  නැවැත්වීමට දැනට කල නොහැකි දෙයකි. ඇමරිකාව ආයුධ විකුණා දැනට ආර්ථිකය ගොඩ දාගත්තත් පෙට්‍රෝ ඩොලරයේ  වැටීම ප්‍රශ්නයක් වනු ඇත. එය සිදු නොවීමට නම් වෙනිසියුලාවට හා ඉරානයට ඔවුන්ගේ ඇති විරෝධතා සමනය කර ගත යුතුව ඇත.  

සෙලෙන්ස්කි මහතා තමන්ගේ රට මධ්‍යස්ථ වන බවට පසුගියදා  ප්‍රකාශ කළේය. දැන් සාම සාකච්ඡා ආරම්භ  වී ඇත. 

ඇමෙරිකානු ජනාධිපති බයිඩන් මස් වෙළෙන්දෙකු ලෙසට නම් කල  රුසියානු ජනාධිපති   පූටින් දැනටමත් ලෝකයේ අනාගත ගමන් මග වෙනස් කර ඇත. තවත් iron curtain -වානේ තිරයක් නිම වෙමින් තිබේ. මේ වර චීනය හා   රුසියාව එතුලට ගමන් කරයිද? ඉන්දියාව සිටින්නේ කොතනද? ලෝකයේ බිලියන දෙකහමාරක ජනගහනයක් හා ආර්ථිකයන්  තුනක් බටහිරට අමතක කරන්නට හැකිද? 

Rupee-ruble trade to be ready by next week: Report 

ඉන්දියාවේ යුක්‍රේන්  ප්‍රශ්නය ග්‍රවිටාස් වාර්තාව  

මරියපෝල් වල රුසියාවට පක්ෂ රුසියානු උක්රයින කොටසක්: (මේ සුළු පිරිසකි)

https://www.youtube.com/watch?v=xpTSLd-XoW8

මේ වීඩියෝ වේ මිනිසුන් කියන්නේ රුසියානු ප්‍රදේශ වලට පහර දෙන්නේ උක්රයින් හමුදා බවයි. ඇමෙරිකානු දක්ෂිනාන්ශය  පුටින් ට සහය දෙන බවක් පෙනේ. මෙහි අර්ථය කුමක්ද  යන්න මට දැනට කිව නොහැකිය. 

මරියපෝල් 2 

- අජිත් ධර්මකීර්ති 

සබැඳි ලිපි:

1. රුසියානු යුක්‍රේන ප්‍රශ්නයේ තවත් පැතිකඩක් 

2. රුසියානු ඉතිහාසය සහ යුක්රේනියානු  පෙකනිවැල 

3. ලංකාවේ චීන මිසයිල පිහිටෙව්වොත් ඔබ ගන්නේ කොයි පැත්තද? 

4. න්‍යෂ්ටික මරණයේ සීතල - "රුසියාව නැති ලෝකයක් අපට අවශ්‍යද" - ද්මිත්‍රි කිසිල්යෙව් ගේ තර්ජනය 

5. රුසියානු යුධ සැලසුම, බටහිර මාධ්‍ය සැලසුමෙන් වෙනස් වන්නේ ඇයි

6. මගේ පෙම්වත!

7.  කාමරය ඇතුලේ අලියා  නොදැකීම 

කාමරය ඇතුලේ අලියා නොදැකීම

යුක්‍රේන රුසියානු යුද්ධයේ ප්‍රධාන මායිම සලකුණු වී ඇත්තේ මෙසේය. නිදහස් ස්වාධින රටක් ආක්‍රමණය කිරීමට වෙන රටකට කිසිදු  අයිතියක් නැත යන්නය.  එය සම්පුර්ණයෙන්ම නිවැරදි ස්ථාවරයකි. එසේ නොවුහ හොත් අනිත් හැම ප්‍රබල රටක්ම කුඩා රටවල් ආක්‍රමණය  කරනු ඇත. එසේත් නැතිනම් එලෙස කරන බවට තර්ජනය කරනු ඇත.  එක්සත් ජාතීන්ගේ සංවිධානය පිහිටුවා ඇත්තේ එවැනි ආක්‍රමණ වැළැක්වීමටය. 

කුඩා රටවල්ද අර බලවත් රටවල් අමනාප කර නොගෙන සිටීම වැදගත්ය.  එම කියන්නේ එම රටවල් යටවී සිටීමට නොවේ උපායමාර්ගිකව කටයුතු කිරීමයි.

යුක්‍රේනයේ අද පවතින්නේ තමන් ළඟ සිටින චන්ඩියා ට කින්ඩි දමමින් ඈතින් චන්ඩින් ගෙන්වීමේ පල විපාකයකි.  නිදහස් රටක් වශයෙන්  ඈතින් චන්ඩින් ගෙන්වීමට යුක්රේනයට අයිතියක් ඇති බව සැබෑවකි . නමුත් රටේ අනාගතයත් වැසියන්ගේ ජිවිතත් පරදුවට තබා එසේ කල යුතුද? රටක් කියන්නේ ගෙයක් නොවේ. සමහරු මෙය ගෙයක් අසල චන්ඩියෙක් ජීවත් වීමට ලඝු කරති. චන්ඩියා ජනාධිපති නම් ඔබ දෙවරක් සිතන්නේ නැත්ද? චන්ඩියා ජනාධිපති නම් කල යුත්තේ ගෙදර අයගේ ජිවිත බේරාගෙන ජනාධිපති විරෝධී කෙනෙක් හොයා තමන් අයින් වී උගුලක් ඇටවීම වන්නකි. 

1. ඇමෙරිකා එක්සත් ජනපදයට සැප්තැම්බර් 11 වනදා එල්ල කල ප්‍රහාරයෙන් පසුව මම නේටෝ රටවල් ඇෆ්ඝනිස්ථානයට පහර දීම පිළිබඳව සතුටු වුනෙමි. නේටෝව ගැන මගේ සිතේ තිබුනේ පහන් හැඟීමකි. එහිදී නේටෝව ස්වාධින රටක් ආක්‍රමණය කිරීමෙන්  එක්සත් ජාතීන්ගේ වගන්තිය 2(4)  (article 2.4) කැඩීම පිළිබඳව කරදර නොවුනෙමි. වෙන්නේ මම කැමති දෙයක් නම්, වෙන්නේ හොඳ වැඩක් කියා මට සිතෙන්නේ නම් ඒ ගැන කරදර වන්නේ කුමටද යන්න මගේ ස්ථාවරය විය. බටහිර මාධ්‍ය ක්‍රියා කරන්නේද ඒ ආකාරයෙන්ම බව මට පසක් වුයේ බොහෝ පසුවය.

2. ඉරාකයට  කළ  පළමු ආක්‍රමණයට පෙර   සදාම් හුසේන් ඇමෙරිකාවේ හා බ්‍රිතාන්‍යයේ ලණු  හොඳටම ගිල්ලේය. බ්‍රිතාන්‍ය හා ප්‍රංශය  ඔහුට බිලියන්  ගණනින් ආයුධ  විකිණුහ. ඔහු කුවේට් රාජ්‍යය ආක්‍රමණය කළේය. මෙහිදී තමන්ට ඇමෙරිකාවේ අනුමැතිය ලැබුනහයි ඔහු වරදවා සිතුවේය. එවකට සිටි ඇමෙරිකානු තානාපතිනිය මේ ගැන ලියා ඇත. නේටෝව ඉරාකයට පන්න පන්නා පහර දුන්නේ එක්සත් ජාතීන්ගේ අනුමැතිය සහිතවය.  නේටෝව  දෙවන වරට ඉරාකය ආක්‍රමණය කලේ එක්සත් ජාතින් ගේ අනුමැතිය නැතිවය  (2003).

එයට ඉදිරිපත් කරන ලද පළමු හේතුව වුයේ සුළු ජාතියක් වූ කුර්දි වරුන්ට එරෙහිව රසායනික අවි භාවිතා කිරීමය (මෙහිදී 30000 කුර්දින් මිය ගියා යයි පැවසුනි) . දෙවන හේතුව වූයේ  අති ප්‍රබල මිනිසුන් දහස් ගණනින් මරණ (WMD)  බලවත් ආයුධ තබා ගත්තේ යයි චෝදනා එල්ල වුනි.  (එම අවි අදටත් සොයාගෙන නොමැත) 

ඉරාකයේ මියගිය සටන්කාමීන් නොවන සාමාන්‍ය ජනතාව  මිලියන් දෙකක් පමණ  යයි ගණන් බලා තිබේ.

3. නේටෝව යුගොස්ලවියාවට නොනවත්වා බෝම්බ දමා  පහර දුන්නේ 1991 දීය . ඒ බොස්නියන් මුස්ලිම් වරුන් ට එරෙහිව ක්‍රියාත්මක කල යුද්ධය නිසාය. මෙයටද  එක්සත් ජාතින් ගේ අනුමැතිය ලැබුනේ නැත. නේටෝව එය නොතකා ස්වාධින රටක් වූ යුගොස්ලවියාවට පහර දුන් අතර එනිසාම බෙදී වෙන්වූ රාජ්‍යයක් බවට පත්විය. හේතුව වුයේ සුළු ජාතීන්ට අමානුෂික ලෙස සැලකීම සහ යුදමය ලෙස පහර දීමයි. (කෝසොවෝ). යුගෝස්ලාවියාව බිඳී යාම ගැන පසු තැවුනත් එම රට සුළු ජාතීන්ට හොඳින් සැලකුවේ නැති සිතා එයද මට  සාධාරණීකරණය කර ගතිමි.  මේ මම ඒ ගැන ඒ කාලයේ ලියු ලිපියකි. 

4. සිරියාවේ ප්‍රශ්නයට රටවල් කිහිපයක්ම මැදිහත් වුනි. ඒ අයිසිස් නිසාය. නමුත් අයිසිස් නිර්මාණය වුනේද බයිඩන් ගේ පුත්‍රයා සහ ඊශ්‍රායල සම්බන්ධයකිනි. ඒ අසාද් බලයෙන් පහ කිරීමටය. ඒ ගැන මම ලිපි පෙළක්ම ලියා තිබේ. මේ අවසාන ලිපියයි . නමුත් අයිසිස් සංවිධානය ලෙවන්ත් නමැති පැරණි රාජ්‍යය සැදීමට උත්සුක වුන අතර ඔසාමාගේ අල් කයිඩා සංවිධානය මෙන් ඔවුන්ද  ඇමෙරිකානුවන් ගොනාට ඇන්දූහ. (ඔසාමා සහ මුජෙහදින් සෝවියට් ආක්‍රමණයට එරෙහිව පුහුණු කලේ ඇමෙරිකාවයි) . මේ නිසා ඇමෙරිකාව ඉරාක  කුර්දි හා මෙහ්දී වරුන් ට අවි සපයා අයිසිස්  වරුන්ට  එරෙහිව ප්‍රොක්සි  යුද්ධයක් දියත් කළේය. ඒ සමගම  අස්ථාවර වුනු සිරියාවේ අසාද් ට එරෙහි විධ ත්‍රස්තවාදී කණ්ඩායම් වලට උදව් කළේය.මේ සියල්ල කලේ එක්සත් ජාතීන්ගේ අනුමැතිය නැතිවය. එක්සත් ජාතීන්ගේ අනුමැතිය නැතිව පැමිණි පූටින් ගේ  රුසියානු යානා  අලෙප්පෝ  නගරය බෝම්බ දමා සමතලා කළේය. ඉරානය තව පැත්තකින් පහර දුන්නේ අයිසිස් අන්තවාදීන්ට ඔවුන්ද විරුද්ධ හෙයිනි. මේ යුද්ධයේදී මම සිරියාව පැත්ත ගැනීමට මුලික හේතුව වුනේ අසාද් තම රටේ මිනිසුන්ට හොඳින් සැලකීම නිසාය. මට සිරියානු යහළුවන් බොහොමයක් සිටි අතර තරුණ  තරුණියන් දෙකොටසටම විදේශ රටවල ඉගෙනීමට රජයෙන් ශිෂ්‍යත්ව දුනි. ඔවුන්ගේ නිදහස් සෞඛ්ය  සේවයක් හා නිදහස් අධ්‍යාපනයක්  ඇති  අතර සවුදියේ මෙන් නොව තරුණියන්ට රිය පැදවීමට හා රැකියාව කිරීමට ද පිරිමියෙකු නැතිව ඇවිදිමටද  නිදහස තිබේ. එවැනි රටක්  අයිසිස් වැනි අන්තවාදී සංවිධානයක් අල්ලා ගැනීම අපරාධයක් ලෙස සැලකුවෙමි. 

පුටින් සිරියාවට  මැදිහත් වුයේ එහි රුසියානු නාවුක හමුදා භාවිතා කරන වරායක් තිබෙන නිසාය.

සිරියාවේ මිලියනයක පමණ වූ දේශපාලන  අනාථයන්ට වැඩිපුරම රැකවරණ දුන්නේ ජර්මනියයි.  ප්‍රශ්නය ඇති කල රටවල් පවා ඒ දේශපාලන අනාථයන් භාර ගත්තේ නැත. 

5. යේමනයේ යුද්ධයේදී සවුදි අරාබිය සහ ඊජිප්තුව  කෙලින්ම ඉරානය සහයෝගය දෙන හුති ගරිල්ලනට විරුද්ධව අනිත් පැත්තට ආයුධ  දීම පමණක් නොව බෝම්බද දමති. අවුරුදු හතක්  තිස්සේ දිග ඇදී යන මේ යුද්ධයේ අනාථයින් බොහෝය. ඔවුන්ට යාමට රටක් ද නැත. දරුවන් මන්දපෝෂණයෙන් පෙලෙයි.  දරුවන් දහදාහක් පමණ දැනට මිය ගොස් තිබේ.

පූටින් ද ඉහත අන්දමේ තර්ක කිහිපයක් එකතු කර තිබේ. මා ඒවා ලිවූ පසු විවේචනය කල බොහෝ  අය පැවසුවේ මා පූටින් ගේ ආක්‍රමණය සාධාරණිකරණය කරන බවයි. මධ්‍යස්ථ ස්ථාවරයක්  ගැනීම යනු පූටින් ගේ පැත්ත ගැනීම බවත් තිබෙන එකම නිවැරදි ස්ථාවරය යුක්රේන් පැත්ත බවත් ප්‍රබල මතයක් සමාජ මාධ්‍ය වල  පැතිරෙයි. මේ මතයට හේතුව මාධ්‍ය වල මෙහෙයුම යයි සිතමි. ලිබරල් සුරතලෙකු  වන පකිස්ථාන අගමැති ඉම්රාන්  ඛාන් ද ඉන්දියාවද රැගෙන ඇත්තේ මධ්‍යස්ථ ස්ථාවරයකි. ඒ කියන්නේ මේ අයට අනුව ඒ පූටින් ට සහය දැක්වීමකි.

මේ හිස්ටිරියාව ඇති කර ඇත්තේ මාධ්‍ය විසිනි. මෙහි දරුණු බව කෙතරම්ද යත් ඩොස්ටොයෙව්ස්කි ගේ පොත්  පිළිබඳ  උගන්වන  විශ්ව විද්‍යාල පාඨමාලා ඉවත් කර තිබේ. පූටින් ගේ ආක්‍රමණය හා ඩොස්ටොයෙව්ස්කි අතර සම්බන්ධය හරියට  හැත්තෑ එක කැරැල්ලේදී ලංකා පොලිසිය  "ගම්  පෙරළිය " පොත අත් අඩංගුවට ගත්තාක් මෙනි. වොඩ්කා තහනමට අමතරව චයිකොව්ස්කි වැන්නන්  ගේ සම්භාව්‍ය සංගීතයද ඔපෙරා ආදියෙන් ඉවත් කරමින් යයි. මෙය විකාරයකි. 

පූටින් ගේ එක තර්කයක් නාසි හමුදාය. 

බටහිර මෙන්ම ශ්‍රී ලංකාවේ ලියන්නන් ගේ ද ප්‍රධාන තර්කයක් වන්නේ නාසි කොටස යුක්රේනයේ නැත යන්නය. ඒ මදිවාට මෝඩ තර්කද  ඉදිරිපත් කරති. එනම් අසොව්  බලකාය හැදුනේ යුක්‍රේනයේ  සටන් කරන චෙචේනියානු මුස්ලිම් බලකායට විරුද්ධව කියාය.  සුදු ජාතිවාදීන් (white nationalist group) විසින් එම බලකාය  එය පිහිටෙව්වේ 2014 දීය.  එදා සංචිතය භටයන් 12000 කින් සමන්විත වුවකි. . 

මේ තිබෙන්නේ එම බලකාය ගැන වීඩියෝ එකකි.

මේ බිබිසි මගින් යුක්‍රේනයේ නාසීන් ගැන 2018 දී කළ විඩියෝවකි. 

මේ 2015 එකකි. මින් පෙනී යන්නේ මේ කණ්ඩායම් ඊයේ පෙරේදා හැදුනු ඒවා නොවන බවයි. නාසි හමුදා ඛණ්ඩාංක  සමහර නම් මෙසේය:  ස්වබෝදා (නිදහස ) , ප්‍රාවී සෙක්ටර් (දකුණු අංශය ) , නැෂනල් කෝ , ඇසොව් හමුදාව, අයිඩර් හමුදාව, දොන්බාස් හමුදාව, ද්නිපර් -1 හමුදාව. ද්නිපර් -2 හමුදාව.  Svoboda, Pravy Sektor, National Corps, C14, the Azov Battalion, the Aidar Battalion, the Donbas Battalion, the Dnipro-1 Battalion, the Dnipro-2 Battalion

හැබැයි යුක්රේනයට මේ චෝදනාව ගෙන ආවද පූටින් ගේ රුසියාවේද තරුණ තරුණියන්ට කැපවුණු ජාතික  ව්‍යාපාරයක් ඇත. අරුම පුදුම ලෙස එහි නම නාශි ය. නාශි යන රුසියානු වචනයේ තේරුම "අපි " යන්නය. නමුත් එය බොහෝවිට බටහිර විරෝධී ජාතිවාදී සංවිධානයකි.  එය ඔලිගාර්ක්ලාට , නාසින්ට , ෆුට්බෝල් රස්තියාදුකරුවනට විරුද්ධ සංවිධානයක් වුවද විරුද්ධ පාක්ෂිකයන්ට පහර දුන් අවස්ථා ඇත.

සෙලෙන්ස්කි මේ අයට මුලදී සහයක් දැක්වූයේ නැත. ඔහු රුසියාව සම්බන්ධව මිත්‍රශීලි ප්‍රතිපත්තියක් අනුගමනය කළේය. නමුත් ඔහුට විරුද්ධව විරෝධතා (යනුකොවිච් ට මෙන්) වැඩි වන විට ඔහු මෙම කණ්ඩායම් යුක්‍රේනයේ සාමාන්‍ය හමුදාවට අනුයුක්ත කළේය. (ඇසොව් බලකාය අනුයුක්ත කලේ ඊට කලිනි)

දැන් යන මාධ්‍ය මෙහෙයුම අතිශය අන්තරාකාරී එකකි. මධ්‍යස්ථ හා රුසියාව පැත්තට කතා කරන  කිසිම දෙයක් ෆේස්බුක්, ගූගල් හා යුටියුබ් වලින් ඉවත් වෙමින් පවතී. එසේ වන්නේ  යුක්‍රේනියානු ජාතිවාදීන් බොහොමයක් ඒවාට එරෙහිව චෝදනා කරන හෙයිනි. ඔවුන්ට අවශ්‍ය රුසියාව  සමග යුද්ධයයි. රුසියාවට අවශ්‍ය ඔවුන් නිරායුධ කිරීමයි. නේටෝවට අවශ්‍ය පුටීන් ඉවත් කිරීමටයි. පුටීන් ට සහ බහුතරයක් රුසියානුන් ට අවශ්‍ය නේටෝව රුසියාව අසලට මිසයිල සමග නොපැමිණීමයි. රුසියාවේ තත්වය ඊට දෙවැනි නැත. රුසියාවේ නිදහස් මාධ්‍ය සියල්ල තහනම් කර හෝ වසා දමා ඇත. රුසියානුන් දන්නේ  ජනාධිපති පූටින් අනුමත  කරන දේ   පමණකි. යුක්‍රේන ප්‍රශ්නය ගැන කාලයකට  කලින් පටිගත කෙරුණු වීඩියෝවක් තිබේ.  

 

යුක්රේනය ගිනි ගනී නමැති මේ චිත්‍රපටය දැන් යුටියුබයෙන්  ඉවත් කර තිබේ. කිසිවෙකු විසින් එය මේ ස්ථානයේ රඳවා ඇතත් එය ඉවත් කිරීමට ඉඩ තිබේ.  මේ වීඩියෝවේ කියන  සියලුම දේ නිවැරදි නොවූවත් රුසියාව විසින් යුක්‍රේනය ආක්‍රමණය කරන බවට ඉඟියක් එහි පළවේ. 

තම රට එක්සේසත් කිරීම සඳහා පූටින්  චෙචේනියාවේ ග්‍රොස්නි  නගරය සම්පුර්නයෙන්ම සමතලා  වන තුරුම  බෝම්බ දැම්මේය. ඒ ඊට කලින් රුසියානු හමුදාව  දුදායෙව් ගේ හමුදා වලින් පරාජය කිරීමේ  පලිය ගැනීමටත් සමගය. එහිදී මියගිය ප්‍රමාණය 25000 ත් ලක්ෂ දෙකත් අතර වනු ඇති ගණන් බලා ඇතත් කිසිවෙක් එය නොදනී.  රුසියානු සොල්දාදුවන් අටදහසක් පමණ මිය ගොස් ඇත. පූටින් සහ රුසියාව ඔවුන් රණ විරුවන් කර ඇත. රුසියානු මව්වරුන්ට ඇර වෙන කාටවත් එය ප්‍රශ්නයක් නොවේ. චේචේනියාව නැවතත් රුසියානු පාලනයට ගැනීම ගැන  ඔවුන් සතුටු වෙති. සිරියාවේ අලෙප්පොවේ සිදුවූයේද එයයි. යුක්රේනයේ නගර වලට සිදු වන්නේද සිදු වන්නට යන්නේද එයයි. මම ඒ බෝම්බ දැමීමට  සහයෝගය දෙනවා නොවේ. සාම සාකච්ඡා හා යථාර්තය පිලි ගැනීම කෙතරම් වැදගත් ද යන්න මම මේ යුද්ධය පිළිබඳ ලියු හැම ලිපියකම සඳහන් කලෙමි. 

රුසියාව විසින් කරන්නේ ජන ඝාතක යුද්ධයකි. නෙටෝවේ ඉහත සඳහන් යුද්ධද ශ්‍රී ලංකාවේ යුද්ධයද බුරුමයේද අනිත් තැන්වලද ජනඝාතක යුද්ධ සිදු විය. සිදුවෙමින් පවතී. නමුත් ඒවා නිසාය කියා   පූටින් ගේ ජන ඝාතක යුද්ධය ට සමාව දීමට නොහැකිය. නමුත් මෙහි වරද සම්පුර්ණයෙන්ම පූටින් ටම පැවරිය නොහැකිය. බටහිර මාධ්‍ය කියන්නේ එසේය. වැරැද්ද එතනය. මරියෝපොල් නගරයේ රුසියනුන් හා යුක්‍රේන් වරු සමසේ සිටිති (ලක්ෂ දෙකක් පමණ). පුටින් එය සම්පුර්ණයෙන්  සමතලා නොකරන්නේ එහි සිටින රුසියානු ජනතාව නිසා යයි සිතමි. නමුත් පූටින් නොසිතු ප්‍රශ්නය වූයේ එහි සිටින රුසියානු ජනතාව පූටින් යටතේ නොව යුක්රේනය සමග සිටීමට දක්වන කැමැත්තයි.  පහත ඇති විඩිය වෙන් එය පැහැදිලිය. මේ ප්‍රශ්නය පූටින් ට අනිකුත් නගර වලින්ද මතුවී තිබේ. යුක්‍රේනයේ රුසියානුන් ආක්‍රමණයට විරුද්ධ වීම නිසා රුසියානු සොල්දාදුවන් ඔවුන්ට වෙඩි නොතැබීම ප්‍රශ්නයක් වී තිබේ. රුසියාව හෙමින් යාමට එක හේතුවක් වන්නේද එයයි. (අනෙක නම් කලින් ලිපියේ සාකච්චා කල දෙවෙන ලෝක යුද්ධයේ සැලසුම් අනුව යාම) 

මම  1991 යෙල්ට්සින් මොස්කව් වල ඔහුගේ විප්ලවය මෙහෙයවන විට එහි සිටියෙමි. රුසියානු හමුදාවේ යුද්ධ ටැංකි කුමන්ත්‍රණ කල කොමියුනිස්ට් නායකයන් මොස්කව් මධ්‍යයට ගෙන ආවද ඔවුන් ජනතාවට වෙඩි තැබීම ප්‍රතික්ෂේප කළහ.  බොහෝවිට යුක්‍රේනයේ අනිත් නගර වල සිටින රුසියානුවන් මේ යුද්ධය අනිත්  පැත්තට හැරවීමට හේතුවක්  විය හැකිය. 

නමුදු  ප්‍රශ්නයක් වන්නේ ඔවුන් පූටින්  ට විරුද්ධ පැත්තේ සිටියද යුක්‍රේන හමුදාවේ ජාතිවාදී සේනාංක කොටස්  (ඉහත දැක්වූ නම් බලන්න ) ඔවුන්ට නගර වලින් එලියට යාමට දෙන්නේ නැත. ඔවුන්ද ඒ පෙදෙස් වලට ප්‍රහාර  එල්ල කරති. (හරියට ශ්‍රී  ලංකාවේ දෙමළ  ජාතිවාදයට විරුද්ධ දෙමළ  අයද ඒ පැත්තට ජාතිවාදී සිංහලයන් විසින්  ඇද දැමු අයුරින්) මේ ප්‍රවෘත්ති බටහිර මාධ්‍ය වල යන්නේ නැත. 

එක්කෝ නේටෝවත් රුසියාවත් දෙකම වැරදි විය යුතුය.  නැත්නම් දෙගොල්ලම හරි විය යුතුය. සෙලෙන්ස්කි මෙහි රඟ  පාන්නේ  useful idiot  හෙවත් අවශ්‍ය මෝඩයා ගේ චරිතයයි. පමාවී හෝ ඔහුට මෙය අවබෝධ වන දවසක් එනු ඇත.  

(ඒ දවස පැමිණ ඇති බව මේ ලිපියෙන් පෙනේ. Ukraine will not join Nato, says Zelenskiy, as shelling of Kyiv continues.)

 රටක් වශයෙන් නේටෝවට ඇතුළු වීමට අයිතිය තිබේ යන  සුන්දර කතා ලිවිම පලක් ඇති දෙයක් නෙමේ. දෙමල ජනතාවට ස්වයං නිර්ණය ඇති මුත් ඉන්දියාව එයට කිසි සෙත් ඉඩ දෙන්නේ නැති බව කීවිට මගේ සමහර දෙමළ  මිතුරන් මෙන්ම ශ්‍රී ලංකාවේ රැඩිකල් වම වෙනුවෙන් පෙනී සිටිනා මිතුරන් ද  කීවේ මා ජාතිවාදියෙකු බවය.

දැන් අප අතර නැති පිටරට මාධ්‍යයක වැඩ කළ ජ්‍යෙෂ්ඨ මාධ්‍යවේදියෙකු එම චෝදනාවම මට එල්ල  කලේ මම ජවිපෙට සම්බන්ධ ජාතිවාදියෙකු බව කියමිනි. මම එදා ඔහුට කීවේ ශ්‍රී ලංකා හමුදාව කැරලි දෙකක්  මර්දනය කර තිබෙන බවත්   එසේ කරන ලද්දේ ඉතා දරුණු ලෙස බවත්ය. සාම සාකච්චා වලින් ඉවත් වෙන  ප්‍රභාකරන් හා එල් ටි ටි එකට සිදු වන්නේ ද එය බවයි. ඉන්දියාව ශ්‍රී ලංකා දෙකඩ කිරීමට කැමති නැත. එය ඔවුන්ට ප්‍රශ්නයක් වන නිසාය.  එල් ටි ටි එක කල යුත්තේ සාම සාකච්චා වල සිටිමින් ඊළම නොව සාමාන්‍ය යම් බලතල සහිත පාලනයක් ගැනීමය. ඔහු කිවේ එල් ටි ටි එක ඉතා බලවත්  බවත් ලංකා හමුදාවට හැරෙන්නට වත් බැරි බවත්ය.   මගේ දෙමල මිතුරන්ද ඔය ඉන්දීය කතාවට විරුද්ධ වූහ. එසේම ඔවුන් සිතුවේ බටහිර ඔවුන්ගේ සහයට එයි කියාය. ඔවුන් උදම් ඇනුවේ ඉන්දියාව එළවූ බව කියමිනි. බොහෝ දෙනෙක් මිය යමින් මේ කතාවේ ඉතිරිය ඉතිහාසයට අයිති වුනි.  මගේ එකම ස්ථාවරය වූයේ ජාතිවාදියෙකු නොවීමය.

කෙනෙකු තවත් ප්‍රශ්නයක් අසා තිබුනේ බලය  ඇති නිසා, ශ්‍රී ලංකාව චීනයට සහය දෙන්නේ යැයි කියා, ඉන්දියාවට ලංකාව ආක්‍රමණය කිරීමට අප ඉඩ දෙන්නේද? මෙය කියවන්නා  නොමග යවන ප්‍රශ්නයකි. ශ්‍රී ලංකාව ඕනෑ තරම් චිනයට සහයෝගය දී ඇත. විශේෂයෙන්ම  සිරිමාවෝ රාජ්‍ය සමයේදී ඒ බව මට හොඳින්  මතකය. චෞ එන් ලායි ශ්‍රී ලංකාවේ  හොඳ මිත්‍රයෙකු වී සිටියේය. ඉන්දියාවෙන් ශ්‍රී ලංකාවට ට ප්‍රශ්නයක් තිබුනේ නැත. ප්‍රශ්නය ආවේ 1977න් පසු ජේ ආර් ඇමෙරිකාවට සහයෝගය දීම නිසාය.  එසේම ෆෝක්ලන්ඩ් යුද්ධයේදී බ්‍රිතාන්‍යයට සහය පලකළ රටවල් හතෙන් එකක් වුයේ ශ්‍රී ලංකාවයි.  ඉන්දියාව මේවා ඉවසුවේ නැත.

ඉන්දියාව මෙහිදී  වැරදිය. එසේම  නේටෝව ඉරාක - කුර්දි ප්‍රශ්නය භාවිතා කලාක්  මෙන් ඉන්දියාව ලංකාවට එරෙහි වීමට  භාවිතා කලේ දෙමළ  ප්‍රශ්නයයි. පූටින් භාවිතා කරන්නේ  නැගෙනහිර උක්රයින  දොන්බාස් රුසියානුන් ගේ ප්‍රශ්නයයි. ලංකාව ඇත්තටම දෙමළ ජනතාවට හොඳින් සැලකුවේ නැත. නමුත් ඒ නිසාම  ඉන්දියාව ලංකාව ආක්‍රමණය කිරීම වැරදිය. එසේම එදා  මුළු බටහිර ලෝකයම හා සෝවියට් දේශයද  සහයෝගය දුන්නේ ඉන්දියාවටය.

දොන්බාස් පෙදෙසේ මෙන්ම  අනිත් තැන්වලද රුසියානු භාෂාවෙන් වැඩ කිරීම  යුක්‍රේනියානු  රජය තහනම් කළේය. පාසල් වල එම බස ඉගෙනීම පවා තහනම් කළේය. යුක්රේනියානු බස නොදන්නේ නම් රජයේ උසස්වීම් ලබන්නට නොහැකිය. මේ ක්‍රියා යුරෝපා සංගමය  හෙළා දකින්නට මැලි වුනි. ඒවා පිට දමමින් ක්‍රිමියාව  ඈඳ ගත්  පුටින් යුක්රේනය දෙකඩ කළේය.  නමුත් ඇත්ත හේතුව ක්‍රිමියාවේ සේවස්තොපල් වරාය නේටෝවට හිමිවීම වැළැක්වීමයි.

 

ශ්‍රී ලංකාවේ ඇතැමුන් යුක්‍රේනය  රුසියාවට තර්ජනයක්  නිසා එය ආක්‍රමණය කිරීමට රුසියාවට හැක යන අදහසක්  පවසන බව දැන ගතිමි.   මෙය මෝඩ තර්කයකි. තර්ජනය යුක්රේනය නොවේ. එහි මිසයිල පිහිටුවීමට දරන තැතය. එම අදහස පිටුපස ඉන්නේ නේටෝවය. තර්ජනය නේටෝවෙනි.

චීනය ලංකාවේ මිසයිල පිහිටුවන්නට ලැහැස්ති වුවහොත් ඉන්දියාව ලංකාව අනිවාර්යයෙන් ආක්‍රමණය කරනු ඇත. එදාට ලංකාව  ස්වාධින රටක්ය  කියා  කිසිවෙකුට කරන්න පුළුවන් ලබ්බක් ද නැත. චීනය ඉන්දියාව සමග සටනට ගියොත් මිස වෙන කවුරුත් ලංකාව වෙනුවෙන් සටනට එන්නේද නැත. චීනය ඉන්දියාව සමග සටනට ගියොත් න්‍යෂ්ටික අවි සහිත රටවල දෙකක් නිසා ඇතිවන තෙවන ලෝක යුද්ධයෙන් ලංකාව වැනසී යනු ඇත.

සෙලෙන්ස්කිට මට කියන්නට ඇත්තේද එපමණය.

මේ රටවල ශිතල අන්තිම දරුණු ශීතලක් බව මා දන්නේ එහි ජිවත්ව සිටි බැවිනි.  කඩයකින් ඉවීමට බඩු රැගෙන  නවාතැනට යනටික පවා දරුණු  ශීත සමයේ ඉමහත්  මහන්සියක් දනවයි. ෂෙල් වලට ජීවිතය බේරා ගැනීමට දිවීම, බිම් ගෙවල වල වතුර නොමැතිව, ආහාර නොමැතිව  ශීතලේ සිටීම කොපමණ අපහසුද? අපට බටහිර හෝ ඔස්ට්‍රේලියාව , කැනඩාව  වැනි රටවල් වල සිට  යුක්‍රේනයට  සටන් කරන්නට කියා ලියන්නට පුළුවන.  නමුත් එහි  අමාරුව  දන්නේ එහි ජිවත් වෙන මිනිසාය. ආක්‍රමණිකයාට එරෙහිව කරන යුක්‍රේන සටන සුන්දර අදහසක් බව ඇත්තය. එය  හරියට ස්ටාර් වෝස්  චිත්‍රපටයේ  විප්ලවීය ගරිල්ලා සන්ධානය (Rebel Alliance) එක එම්පයර් එකට එරෙහිව සටන් වැදීම මෙන්  අපට උත්ප්‍රාසය මෙන්ම  සතුට දනවයි. මහා සතුරෙකුට,  ගොලායත් ට විරුද්ධව  කුඩා ඩේවිඩ් ගේ සටන හා එහි ජයග්‍රහණය ට හැමෝම උදම් වෙති. ශ්‍රී ලංකා හමුදා එල්ටිටිඊ සංවිධනයට විරුද්ධව කළ  සටනේ බටහිර මාධ්‍ය ශ්‍රී ලංකාව පැත්තේ සිටියේ නැත. ඔස්ට්‍රේලියාවට එරෙහිව ශ්‍රී ලංකාව ක්‍රිකට් කුසලානය ඔසවනවිට ඔවුන් සිටියේ ලංකාව පැත්තේය.  අද හැමෝම යුක්‍රේනය පැත්තේ ඉන්නේ ඒ අනුවය. 

නමුත් සැබෑව නම් යුක්රේනය පිටුපස රුසියාවට  වඩා බලවත් නේටෝ සංවිධානය සිටීමයි.  මෙතැන ඇත්තේ බලවත් යුධ කඳවුරු දෙකක් අතර හාල්මැස්සන් ගේ භුමීයේ පවතින  සටනකි. 

මේ යුද්ධය මාධ්‍ය කියන  ආකාරයට දිනාගෙන යන්නේ  යුක්රේනයයි. නමුත් එසේ  දිනනවා නම් ජනාධිපති බයිඩන්  තෙල් සහ ගෑස් රුසියාවෙන් ගැනීම  තහනම් කරන්නේ නැත. එක්සත් රාජධානිය මේ අවුරුද්ද අවසානය වන විට රුසියානු තෙල් සහ ගෑස් මිලට  ගැනීම නවතන බව කියයි. යුරෝපය ගෑස් නවතන බවක් කියන්නේම  නැත.  ගෑස් සහ තෙල් වලින් රුසියාවට  දිනකට ඩොලර් බිලියන් එකත් එකහමාරත් අතර  ආදායමක් ලැබේ. ඒ වෙනුවට රුසියානු ධනපතීන් හෙවත් ඔලිගාර්ක්ස් නොහොත්  කතිපයාධිකාරීන් (වචනය උපුටා ගත්තේ මෙතැනිනි.)  ලාට සම්බාධක පනවා ඇත. එයින් පූටින් ට වත් රුසියානුන් ට වත් වගේ  වගක් නැත. නැතිවන්නේ ඔවුන්ගේ මුදල් නොවේ. ආයෝජන නැතිවන්නේ බටහිරටමය. රුසියානුන් ඔලිගාර්ක්ස් ලාට කොහොමටත් කැමති නැත. සෝවියට් දේශයේ මහජන  මුදල් සොරා ගත්  ඔවුන්ට නවාතැන් දුන්නේ ලන්ඩනය ඇතුළු බටහිර යයි ඔවුහු චෝදනා කරති. එයත් නිවැරදිය. රුසියාවට පැනුන සම්බාධක වලින් ඔවුන්ට යම්  පහරක්  වැදෙනු  ඇත. හැබැයි රුසියාව මිලදී ගන්නා සුඛෝපභෝගී භාණ්ඩ නැතිවීම නිසා පහර වදින්නේ නාගරික ජනයාටය. පූටින් ට විරුද්ධ උද්ඝෝෂණ වලට යන්නේ ඔවුන්ය.  තවමත් බහුතරයක් රුසියානු ජනතාව ඉන්නේ පූටින් ගේ පැත්තේය. 

 බටහිර ජිවත්වන අපට වැදෙන  පහරද සුළුපටු නැත. ලන්ඩනයේ තෙල් මිල නොවූ විරු ලෙස ඉහල ගොස් ඇත. වාහනයේ පෙට්‍රල් ටැංකිය පිරවීමට යන මුදල දෙගුණ වී ඇත. මාසික ගෑස් මිල දෙගුණ වී ඇත. ඒ නිසා අනිකුත් බඩු  බාහිරාදියේ මිලද ඉහල යමින් පවතී. සීඝ්‍ර උද්ධමනයක් අත ළඟය.  බටහිර ආර්ථිකයට වදින පහරද සුළුපටු නැත. ඒ ආර්ථික යුද්ධය එන්නේ ඉදිරියටය. 

පූටින් ඇරඹු යුද්ධයෙන් තවත් අයට වාසි සිදුවී ඇත. 

වෙනිසියුලාවේ සමාජවාදී ආණ්ඩුව තව දුරටත් නරක එකක් නොවේ.එහි ජනාධිපති  නිකොලස් මදුරෝ චෝයි බබෙකි. මේ බව අපට කියන්නේ  එහි ගිය ඇමෙරිකානු නියෝජිතයන්ය. ඔවුන්ට පැනවූ සම්බාධක ලිහිල් වෙන අතර අඩු මිල තෙල් ලෝක වෙළඳ පොලට ඒමට නියමිතය. රුසියාවෙන් නොගන්නා තෙල් ඇමෙරිකාව සැරසෙන්නේ වෙනිසියුලාවෙන් ගැනීමටය. 

එසේම ඉරානයේ  සිර  දඬුවම් විඳිමින්   සිටි බ්‍රිතාන්‍ය පුවත්පත් කලාවේදිනිය අද නිදහස් කරන ලදී. ඒ නිසා (allegedly ඒ නිසා) ඉරානයේ තෙල් වලට පනවා ඇති සම්බාධක  ඉවත් වෙනු ඇත. බොරිස් ජොන්සන් අද සවුදි අරාබියට ගියේ අසූ එක් දෙනෙකු එල්ල මැරූ හේතුව අහන්නට නොවේ. තෙල් නිෂ්පාදනය වැඩි කරන්නට කියන්නටය.

මේවා ඔක්කොම අපට හොඳය. ඒ නිසා කට වහගෙන සිටීම වාසිය. ෆේස්බුක් එකේ මවිසින්  මේවා විවේචනය කරනු ඔබට දැකිය නොහැක්කේ ඒ නිසාය. 

මේ යුද්ධයට ඇති හොඳම විසඳුම සෙලෙන්ස්කි විසින් නේටෝව අමතක කර  සාකච්ඡා වලට යාමය. ක්‍රිමියාව  ඔවුන්ට අහිමි වනු ඇත. නමුත් රට ගොඩ නගා තායිවානය මෙන් හොඳ ආයුධ  ටිකක් රැස් කර ගතහොත්  රුසියාවට නැවත  ඔවුන්ට අත තැබීම අපහසු වනු ඇත. ඒත් දැන්නම් පමා වැඩි විය හැකිය.   නේටෝව හමුදා යැව්ව හොත් හෝ පියාසර තහනම්  කලාපයක් ක්‍රියාත්මක  කළහොත්  තෙවන ලෝක යුද්ධයක් ඇරඹීමේ අවදානම වැඩිය.  

පූටින් ගේ අදහස යුක්‍රේනය අල්ලා ගැනීමම  නොවේ.  ඔහුගේ සැලසුමේ ඩොලරයට පහර දීමේ කොටසක්ද ඇත. ඒ සඳහා  ඔහුට චීනයේ සහයද  අවශ්‍යය.  

වෙන කෙනෙකු නොලිව්වොත්  ඒ ගැන විස්තරයක් ඉදිරියේදී සපයමි.

Ukraine on fire: film you can watch here: or here.

යුගොස්ලාවියාවට බැඳී පෙමට ඉකි බින්ද යුවතියන්

මරියපෝල් නගරයෙන් ජනතාවට ඉවත්වීමට ඉඩ නොදෙන බව බටහිර මාධ්‍ය කීවද "නිත්‍යානුකුල" නොවන මගින් ඔවුහු  පිටතට යති. 

යුක්‍රේන ප්‍රශ්නය පිලිබඳ ලිපි මාලාව:

1. රුසියානු යුක්‍රේන ප්‍රශ්නයේ තවත් පැතිකඩක් 

2. රුසියානු ඉතිහාසය සහ යුක්රේනියානු  පෙකනිවැල 

3. ලංකාවේ චීන මිසයිල පිහිටෙව්වොත් ඔබ ගන්නේ කොයි පැත්තද? 

4. න්‍යෂ්ටික මරණයේ සීතල - "රුසියාව නැති ලෝකයක් අපට අවශ්‍යද" - ද්මිත්‍රි කිසිල්යෙව් ගේ තර්ජනය 

5. රුසියානු යුධ සැලසුම, බටහිර මාධ්‍ය සැලසුමෙන් වෙනස් වන්නේ ඇයි

6. මගේ පෙම්වත!